အသင်းတော်အစည်းအဝေးများအတွက် ပြင်ဆင်ပြီးပျော်ရွှင်မှုခံစားလေ

^၁ ညီအစ်ကိုများအသင်းအပင်းအနေနှင့် ကျွန်ုပ်တို့၏ပတ်စဉ်အစည်းအဝေးများကို ပညာရှိစွာ မှန်မှန်တက်ရောက်ကြသည်။ (၁ တိ. ၄:၁၅၊ ၁၆) ၎င်းတို့မှ ပျော်ရွှင်မှုနှင့် အကျိုးအပြည့် မည်သို့ခံစားနိုင်မည်နည်း။

^၂ စည်းဝေးများအတွက် မှန်မှန်ပြင်ဆင်ရန် အချိန်သတ်မှတ်ထားသင့်သည်။ အချို့သူများသည် အခြားသူတို့ထက် ပြင်ဆင်မှုအတွက် အချိန်ပိုပေးနိုင်ပေမည်။ သို့ရာတွင် မည်သို့ပင်အလုပ်များနေစေကာမူ အစည်းအဝေးအတွက်ပြင်ဆင်ရန် အချိန်ပေးခြင်းသည် ပညာရှိ၏။ မိသားစုလိုက် အတူတကွပြင်ဆင်ခြင်းသည် အထူးအကျိုးရှိသည်။—ဧ. ၅:၁၅၊ ၁၆။

^၃ သီအိုကရက်တစ် ဓမ္မအမှုဆောင်ကျောင်းအတွက်– ပတ်စဉ်ကျမ်းစာဖတ်ရှုခြင်းအစီအစဉ်ကို လိုက်မီရန်ကြိုးစားပါ။ (ယောရှု ၁:၈) ဆွေးနွေးမည့်အကြောင်းကို လေ့လာထားပြီး ဟောပြောသူများ ပြောဆိုနေစဉ် လိုက်ကြည့်နိုင်ရန် လိုအပ်သောစာအုပ်များကိုယူလာပါ။ သင့်ဓမ္မအမှုတွင် တင်ဆက်သောအချက်အလက်များကို မည်သို့အသုံးပြုနိုင်ကြောင်း စဉ်းစားထားပါ။

^၄ လုပ်ငန်းတော်အစည်းအဝေးအတွက်– ကျွန်ုပ်တို့၏နိုင်ငံတော်ဓမ္မအမှုတွင် အကြမ်းဖျင်းဖော်ပြထားသောအစီအစဉ်ကို ကြည့်လိုက်ပါ။ ဆွေးနွေးမည့်ဆောင်းပါးများကို ဖတ်ရှုပါ။ ကင်းမျှော်စင်ဆောင်းပါး သို့မဟုတ် အခြားစာပေတစ်ခုခုမှအကြောင်းကို သုံးသပ်ကြမည်ဆိုလျှင် ၎င်းကိုလည်း ရှာဖွေ၍ဖတ်ကြည့်ပါ။ လယ်ကွင်းလုပ်ငန်း၌ တင်ဆက်မည့်အကြောင်းများကို သရုပ်ပြကြမည်ဆိုလျှင် သင့်ဓမ္မအမှု၌ အသုံးပြုရန် အသင့်ရှိနေဖို့ ယင်းတို့ကို ကြိုတင်စစ်ဆေးကြည့်ထားပါ။

^၅ ကင်းမျှော်စင်သင်တန်းအတွက်–လေ့လာမည့်အကြောင်းကို ကြိုတင်ဖတ်ရှုထားပြီး အဖြေများကို မှတ်သားထားပါ။ ကိုးကားထားသောကျမ်းချက်များကို ဖွင့်ဖတ်ကြည့်ခြင်းအားဖြင့် ပိုနားလည်ပါမည်။ ယင်းသင်ခန်းစာသည် သင်သိထားနှင့်ပြီးသောအကြောင်းနှင့် မည်သို့ဆက်စပ်ကြောင်းကို ဆင်ခြင်သုံးသပ်ခြင်းဖြင့် သင့်အသိပညာတိုးလာလိမ့်မည်။ အနည်းဆုံး တစ်ပိုဒ်နှစ်ပိုဒ်နှင့်ပတ်သက်ပြီး တိုတိုအဖြေပေးရန် ပြင်ဆင်ထားခြင်းဖြင့် သင်တန်းတွင်ပါဝင်ပါ။ ဤသို့ပြုခြင်းသည် မိမိတို့၏ “မျှော်လင့်ခြင်းအကြောင်းကိုဝန်ခံ” သည့် အရေးကြီးသောနည်းဖြစ်သည်။—ဟေဗြဲ ၁၀:၂၃။

^၆ အသင်းတော်စာအုပ်ကြီးသင်တန်းအတွက်– ဦးဆုံး၊ လေ့လာမည့်အကြောင်းကို ခြုံ၍ကြည့်ပါ; ခေါင်းစဉ်ကြီးနှင့် ခေါင်းစဉ်ငယ်များကို သုံးသပ်ပါ။ ထို့နောက် ဖတ်ရှုစဉ် အဓိကအချက်များကို သတိပြုပါ။ သက်ဆိုင်သောကျမ်းချက်များကိုလည်း ပြန်စစ်ဆေးကြည့်ပါ။ မေးခွန်းများကို ကိုယ်ပိုင်စကားဖြင့် ဖြေဆိုကြည့်ပါ။ သင်ခန်းစာကို ပြင်ဆင်ပြီးနောက် မိမိစိတ်ထဲတွင် ပြန်စစ်ဆေးပါ။ အဓိကအချက်များနှင့် တွေးတောဆင်ခြင်နည်းများကို သတိရရန်ကြိုးစားပါ။—၂ တိ. ၂:၁၅။

^၇ အစည်းအဝေးများတွင် ပျော်ရွှင်မှုခံစားပါ– အစည်းအဝေးများမှ ပျော်ရွှင်မှုအပြည့်အဝခံစားရရန် ယေဟောဝါ၏ဝိညာဉ်တော်အကူအညီကို တောင်းဆိုသည့် စည်းဝေးအဖွင့်ဆုတောင်းချက်မတိုင်မီရောက်ရှိနေရန် အရေးကြီးသည်။ စိတ်ကိုလန်းဆန်းစေသော နိုင်ငံတော်သီချင်းများမှလည်း အကျိုးခံစားရသည်။ ကလေးငယ်များမရှိ၊ သို့မဟုတ် ခန်းမနောက်တန်းတွင် ထိုင်စရာ အခြားအကြောင်းများမရှိလျှင် ရှေ့ပိုင်း၌ထိုင်ခြင်းအားဖြင့် အာရုံလွင့်စရာအကြောင်း လျော့နည်းပြီး စည်းဝေးအစီအစဉ်မှ အကျိုးပိုခံစားရကြောင်း သတိပြုမိမည်။ ကလေးငယ်များရှိသောမိဘများသည် အစည်းအဝေးအတွင်း သူတို့ကိုအပြင်ခေါ်သွားစရာအကြောင်းရှိပါက အနောက်ပိုင်းရှိဘေးထိုင်ခုံများတွင်ထိုင်ခြင်းအားဖြင့် အာရုံလွင့်ပါးမှုလျော့နည်းစေပါလိမ့်မည်။

^၈ စည်းဝေးမတက်မီ အနည်းငယ်အနားယူထားမည်ဆိုလျှင် နိုးကြားလန်းဆန်းနေပါမည်။ ဖတ်ရှုသောကျမ်းချက်များကို ကိုယ်တိုင်ဖွင့်ကြည့်ခြင်းအားဖြင့် ကြားလိုက်သောအရာကို ပိုမှတ်မိနိုင်ရန် အကူအညီရပါလိမ့်မည်။ သင့်မိသားစုနှင့်မိတ်ဆွေများအား တတ်သိသင်ယူသောအကြောင်းများကို ပြောပြပါ။ ဤသို့ပြုခြင်းအားဖြင့် အချက်အလက်များကို ပိုစွဲမှတ်ထားနိုင်သည်။ ဤအကြံပေးချက်များကို လက်တွေ့ကျင့်သုံးခြင်းအားဖြင့် အစည်းအဝေးများသည် ပိုမိုအဓိပ္ပာယ်ရှိပြီး ပျော်ရွှင်စရာဖြစ်၍ ကျွန်ုပ်တို့ကို ‘မေတ္တာစိတ်ရှိစေလျက် ကောင်းသောအကျင့်ကိုကျင့်’ ရန် အမှန်တိုက်တွန်းနှိုးဆော်ပေးပါလိမ့်မည်။—ဟေဗြဲ ၁၀:၂၄၊ ၂၅။