သမ္မာတရားကိုသွန်သင်ပေးရန် စိတ်ဝင်စားသူအားလုံးထံပြန်လည်ပတ်

^၁ ကျွန်ုပ်တို့၏စာအုပ်စာတမ်းများကို ယူထားသည်ဖြစ်စေ၊ မယူသည်ဖြစ်စေ သမ္မာတရားကို စိတ်ဝင်စားကြောင်း တင်ပြသူအားလုံးထံသို့ ကျွန်ုပ်တို့ပြန်လည်ပတ်သွားကြဖို့ အရေးကြီးသည်။ ထိုသူ၏စိတ်ဝင်စားမှုကို တိုးပွားစေရန်နှင့် အိမ်တွင်းကျမ်းစာသင်အံမှု စတင်ရန်ရည်ရွယ်ချက်ဖြင့် ကျွန်ုပ်တို့ပြန်လည်ပတ်မှုများပြုလုပ်ခြင်းဖြစ်သည်။ ယင်းကား ကျွန်ုပ်တို့၏ပန်းတိုင်ဖြစ်သည်။ ထို့ကြောင့် စိတ်ဝင်စားသူများတွင် ကျွန်ုပ်တို့၏စာအုပ်စာတမ်းများ ရှိသည်ဖြစ်စေ၊ မရှိသည်ဖြစ်စေ သူတို့ထံ ပြန်လည်ပတ်ပါ။ ဤလုပ်ငန်း၌ အောင်မြင်မှုရရှိရန် သူတို့ထံ ကောင်းစွာပြင်ဆင်သွားရမည်ဖြစ်သည်။ ကျွန်ုပ်တို့ပြောဆိုမည့်အကြောင်းနှင့် စိတ်ဝင်စားသူအတွက်ပါ ဆုတောင်းပြီး ကြိုတင်စဉ်းစားသွားရမည်။

^၂ သင်သည် ယခင်က အိမ်ထောင်ရေးပြဿနာများနှင့် ဆိုးသွမ်းသောလူငယ်များအကြောင်း ပြောဆိုခဲ့မည်ဆိုလျှင် စာအုပ်ယူထားသည်ဖြစ်စေ၊ မယူသည်ဖြစ်စေ ဤသို့စကားချီးစနိုင်ပေမည်–

▪ “အရင်တစ်ခေါက်က အိမ်တွင်းမှာ လင်နဲ့မယား၊ မိဘနဲ့ကလေးတွေကြား ပြဿနာတွေဖြစ်ကြတဲ့အကြောင်း ပြောဆိုခဲ့တာ သတိရမယ်။ အိမ်ထောင်တိုင်းမှာပဲ ပြဿနာကြီးကြီးငယ်ငယ်ရှိကြတာချည်းပဲမဟုတ်လား။ (ဖြေဆိုပါစေ။) မိသားစုဆက်ဆံရေး ကောင်းလာဖို့အတွက် အကူအညီဖြစ်တဲ့ တကယ်ကောင်းတဲ့ဆုံးမစကားတွေကို ကျမ်းစာထဲမှာ တွေ့ရတယ်။ မိသားစုတစ်စုဟာ ကျမ်းစာကို အတူတူလေ့လာတဲ့အခါ ကောင်းချီးတွေခံစားရမယ်။” ထာဝစဉ်အသက်ရှင်စာအုပ်ရှိမည်ဆိုလျှင် မိသားစုကျမ်းစာသင်အံမှုကို မည်သို့ပြုလုပ်နိုင်ကြောင်းတင်ပြနိုင်သည်။ စာအုပ်မရှိပါက ယောဟန် ၁၇:၃ ကိုဖတ်ပြပြီးနောက် အိမ်တွင်းကျမ်းစာသင်အံမှုပြုလုပ်ပေးခြင်းအားဖြင့် မိသားစုကို အကူအညီပေးလိုကြောင်း စကားကမ်းလှမ်းပါ။

^၃ ယခင်အချိန်တွင် ဆိုးသွမ်းသောလူငယ်များအကြောင်း ပြောဆိုခဲ့မည်ဆိုလျှင် ဤအတိုင်းဆက်ဆွေးနွေးလိုပေမည်–

▪ “အရင်တစ်ခေါက်တုန်းက သားသမီးတွေကြောင့် မိဘတွေ တွေ့နေကြရတဲ့ပြဿနာတွေအကြောင်း ပြောဆိုခဲ့ကြတယ်။ မိဘတွေဟာ သားသမီးတွေကို လေ့ကျင့်ပေးတဲ့အခါ ကျမ်းစာသြဝါဒတွေကိုသာ အသုံးပြုမယ်ဆိုရင် အိမ်တွင်းမှာ ပြဿနာသိပ်ရှိမှာမဟုတ်ဘူး။ ကလေးတွေကို သွန်သင်ပေးတဲ့ အကောင်းဆုံးနည်းကတော့ ပုံသက်သေကောင်းပဲဖြစ်တယ်။ ကောလောသဲ ၃:၁၈၊ ၁၉၊ ၂၁ မှာဒီလိုဆိုထားတယ်။ (ဖတ်ပါ) ဒါကိုကလေးတွေတွေ့တဲ့အခါ မိဘတွေကို အတုယူကြတော့မှာအမှန်ပဲ။ ဧဖက် ၆:၄ မှာကျမ်းစာက ဒီလိုဆိုတယ်။ (ဖတ်ပါ)” ကလေးအများစုသည် ပဲ့ပြင်ဆုံးမမှုနှင့် လမ်းပြညွှန်ကြားမှုကို အလိုရှိကြသည်။ မိဘများက ကြိုးစားဆုံးမလျှင် ကလေးများသည် ပျော်ရွှင်မှုရှိကြပြီး ရိုသေလေးစားတတ်လာကြမည်။ မိသားစု စာအုပ်ကိုအသုံးပြုပြီး သားသမီးများနှင့် ကျမ်းစာကိုမည်သို့လေ့လာကြောင်း ရှင်းပြပါ။ စာအုပ်ရှိမည်ဆိုလျှင် ယင်းကိုအသုံးပြုပါ။ စာအုပ်မရှိပါက မည်သို့ရရှိနိုင်ကြောင်း ပြောပြနိုင်သည်။

^၄ မည်သည့်နည်းကိုပင် သင်အသုံးပြုစေကာမူ သင်အံမှုစတင်နိုင်ရန် ကြိုးစားအားထုတ်ပါ။ ကျမ်းစာလေ့လာသည့်အခါ သူတို့နှလုံးကိုထိမိရန် ကြိုးစားပါ။ ကျမ်းချက်များကို သဘောပေါက်နားလည်စေပါ။ သူတို့အား သမ္မာတရားကို မိမိ၏စကားမှမဟုတ် ဘုရားသခင့်နှုတ်ကပါဌ်တော်မှ သွန်သင်ပေးပါ။ ဘုရားသခင်သည် သူတို့ကိုချစ်တော်မူ၍ သူတို့အား ထာဝရအသက်ရရှိစေလိုကြောင်း သဘောပေါက်စေပါ။ (ယော. ၃:၁၆) ထို့ကြောင့် သူတို့နှင့် ကျမ်းစာလေ့လာတိုင်း ဘုရားသခင်နှင့် ခရစ်တော်သည် သူတို့အပေါ် မည်မျှမေတ္တာရှိသည်ကို သဘောပေါက်သင့်သည်။ အတတ်နိုင်ဆုံးကြိုးစားပြီး သူတို့ကို ခရစ်တော်၏တပည့်များဖြစ်စေသင့်သည်။ ထို့ကြောင့် သူတို့အား သမ္မာတရားကို သွန်သင်ပေးကြစို့လေ။