တွေ့ ရှိသောစိတ်ဝင်စားမှုအားလုံးအတွက် အမှန်တကယ်စိုးရမ်မကင်းဖြစ်ကြောင်းတင်ပြလော့

^၁ မကြာမီ ကမ္ဘာတစ်ဝန်းနိုင်ငံတော်ကြွေးကြော်ခြင်းသည် “ဘုရားသခင်ကိုမသိသောသူ” များဖျက်ဆီးခံရပြီးနောက် ပြီးဆုံးသွားမည်ဖြစ်သည်။ (၂ သက်. ၁:၇-၉) ထို့ကြောင့် အခြားသူများ၏အသက်ပေါင်းများစွာအတွက် အမှန်တကယ်စိုးရိမ်မကင်းဖြစ်ခြင်းသည် ယေဟောဝါ၏လူမျိုးတော်အား များသည်ထက်များသောလူတို့ထံ နိုင်ငံတော်သတင်းတရားရောက်ရှိရန် လှုံ့ဆော်ပေးနေသည်။—ဇေ. ၂:၃။

^၂ လစဉ်လတိုင်း “ဝမ်းမြောက်စရာသတင်း” ကြားလိုသူများကို ရှာဖွေရာတွင် နာရီသန်းပေါင်းများစွာကိုအသုံးပြုကြသည်။ (ဟေရှာ. ၅၂:၇) နောက်ဆုံးထုတ်စာပေဝေငှသည်ကို တုံ့ ပြန်ရာတွင် များစွာသောသူတို့သည် ကင်းမျှော်စင်နှင့် နိုးလော့! သို့မဟုတ် ကျွန်ုပ်တို့ထံမှ ဘုရားသခင် အဘယ်အရာတောင်းဆိုတော်မူသနည်း ဘရိုရှာကိုလက်ခံကြသည်။ ဤသူများအတွက် အမှန်တကယ်စိုးရိမ်မကင်းဖြစ်ခြင်းသည် တွေ့ခဲ့သည့်စိတ်ဝင်စားသူအားလုံးထံ နောက်တစ်ကြိမ်ပြန်သွားရန် ကျွန်ုပ်တို့ကိုလှုံ့ဆော်ပေးသင့်သည်။—သု. ၃:၂၇။

^၃ တိကျမှန်ကန်သောမှတ်တမ်းများထားပါ– သင်သည် စိတ်ဝင်စားသူနှင့် ဝေငှခဲ့သည့်စာပေများကို အပြည့်အစုံနှင့် တိကျမှန်ကန်စွာ မှတ်တမ်းထားပါက ပို၍ပြီးမြောက်အောင်မြင်ပေမည်။ အိမ်ရှင်အမည်နှင့်လိပ်စာ၊ သင်သွားရောက်ခဲ့သည့်နေ့နှင့် အချိန်၊ ဝေငှခဲ့သည့်စာပေနှင့် ဆွေးနွေးခဲ့သည့်အကြောင်းအရာ စသောအချက်အလက်များသည် သင်ပြန်သွားသောအခါ ပို၍ထိရောက်မှုရှိရန် အထောက်အကူဖြစ်စေမည်။ ထို့အပြင် သင်နှင့်ဦးဆုံးစကားစမြည်ပြောဆိုခဲ့ရာတွင် အိမ်ရှင်ပြောသည့်စကားတချို့ကို ရေးမှတ်ထားပါက ပြန်သွားသောအခါ ဆွေးနွေးခန်းကိုဆက်ဆွေးနွေးစဉ် သူတို့အား ထိထိရောက်ရောက်ကိုးကားပြောဆိုနိုင်ပေမည်။

^၄ ချက်ချင်းပြန်လည်ပတ်မှုပြုလုပ်ပါ– လွန်ခဲ့သည့်လက စာပေလက်ခံယူခဲ့သူ ဘယ်နှစ်ဦးထံ ပြန်လည်ပတ်ရန် သင်စမ်းကြည့်သနည်း။ နောက်ထပ် မည်သည့်ဆက်သွယ်မှုမျှမပြုဘဲ ရက်သတ္တပတ်ပေါင်းများစွာ ကုန်လွန်ခဲ့ပြီလော။ သူတို့၏ထာဝရကောင်းကျိုးအတွက် အမှန်တကယ်စိုးရိမ်မကင်းဖြစ်ခြင်းက ဖြစ်နိုင်လျှင်ဖြစ်နိုင်ခြင်း ရက်အနည်းငယ်အတွင်း ပြောဆိုခဲ့သည့်စကားကို စိတ်ထဲမှမေ့ပျောက်မသွားမီ ချက်ချင်းပြန်သွားဖို့ လှုံ့ဆော်မှုဖြစ်စေသင့်သည်။ သူတို့၏စိတ်ဝင်စားမှုကို တိုးပွားစေရန် ချက်ချင်းပြန်သွားခြင်းဖြင့် စာတန်သည် “နှလုံး၌ကြဲသောတရားစကားကိုနုတ်” မယူမီ သူ၏ကြိုးစားအားထုတ်မှုများကို ကြားဝင်ဆီးတားနိုင်ပေမည်။—မာ. ၄:၁၅။

^၅ ပြင်ဆင်ခြင်းသည် မရှိမဖြစ်လိုအပ်– ပြန်လည်ပတ်မှုများပြုလုပ်ရာတွင် ထိရောက်မှုရှိခြင်းသည် သင် မည်မျှကောင်းကောင်းပြင်ဆင်သည်ဟူသည့်အချက်နှင့် တိုက်ရိုက်ဆက်စပ်သည်။ မသွားမီ သင့်ပဏာမခြေလှမ်းအတွက် ကြိုတင်စီစဉ်ပါ။ ဧပြီလ ၁၉၉၇ ကျွန်ုပ်တို့၏နိုင်ငံတော်ဓမ္မအမှု နောက်ကျောစာမျက်နှာတွင် မဂ္ဂဇင်း သို့မဟုတ် တောင်းဆိုဘရိုရှာကို သင်ဝေငှသောအခါ အကျိုးဖြစ်ထွန်းသောအောင်မြင်မှုရရှိရန် အသုံးပြုနိုင်မည့်တင်ဆက်ပုံများစွာကို စီမံပေးထားသည်။ နောက်တစ်ခုမှာ သင်ပြန်သွားသောအခါ ပြောပြရန် အကြောင်းအရာတချို့ရှိထားခြင်းဖြစ်သည်။ စိတ်ဝင်စားမှုကို ပျိုးထောင်ပေးသောအခါ သင်ဘာပြောနိုင်သနည်း။ ကျမ်းစာသင်အံမှုကို မည်သို့စနိုင်သနည်း။

^၆ မြေကြီးကို သန့်စင်စေရန်နှင့် ယင်းတွင် အသက်ရှင်ဖို့သာ၍ကောင်းသောနေရာဖြစ်လာရန် လုပ်ဆောင်ဖို့လိုအပ်ရာများကို ဆက်ဆွေးနွေးသောအခါ သင်ဤသို့ပြောနိုင်သည်–

▪ “ယခင်အလည်လာတုန်းက မြေကြီးကို ငြိမ်းချမ်းတဲ့ပရဒိသုဖြစ်အောင် မပြုလုပ်နိုင်ခင် ပြင်းထန်တဲ့အရေးယူလုပ်ဆောင်မှုတွေကို လုပ်ဖို့လိုတယ်ဆိုပြီး ကျွန်တော်တို့သဘောတူခဲ့ကြတယ်။ ဒီတာဝန်ကိုပြီးမြောက်ဖို့ လူသားတွေဆီမှာ ဘာလိုအပ်မယ်လို့ မိတ်ဆွေထင်ပါသလဲ။ [တုံ့ ပြန်မှုကိုစောင့်ပါ။] လူသားအရေးကိစ္စတွေမှာ ဘုရားသခင်ကြားဝင်လုပ်ဆောင်ဖို့ ဘာကြောင့်လိုအပ်မယ်ဆိုတာ ကျေးဇူးပြု၍သတိပြုပါ။” ဆာလံ ၃၇:၃၈ ကိုဖတ်ပါ။ ထို့နောက် တောင်းဆိုဘရိုရှာပါ သင်ခန်းစာ ၅ ကိုဖွင့်ပြီး ဤပရောဖက်ပြုချက်ကို ဘုရားသခင်မည်သို့ပြည့်စုံစေမည်ဖြစ်ကြောင်းတင်ပြရန် အပိုဒ် ၄-၅ မှရွေးချယ်ထားသောအပိုင်းများကို အသုံးပြုပါ။ ဘရိုရှာကိုအသုံးပြုပြီး ကျမ်းစာသင်အံမှုကမ်းလှမ်းခြင်းဖြင့် ပြန်သွားပါ။

^၇ သင်သည် ဦးဆုံးသွားရောက်ချိန်တွင် ဘုရားသခင့်နိုင်ငံတော်အကြောင်းဆွေးနွေးကာ “တောင်းဆို” ဘရိုရှာကိုဝေငှခဲ့ပါက ပြန်သွားသောအခါ ဤကဲ့သို့အကြောင်းအရာကိုသင်ပြောပြနိုင်သည်–

▪ “နောက်ဆုံးအကြိမ်ကျွန်တော်တို့စကားပြောခဲ့ကြတုန်းက ဘုရားသခင့်နိုင်ငံတော်ဟာ မြေကြီးတစ်ခွင်လုံးကို အုပ်စိုးမယ့် တကယ့်အစိုးရတစ်ခုဖြစ်တယ်ဆိုတာ သိရှိခဲ့ရတယ်။ အဲ့ဒီနိုင်ငံမှာ အုပ်ချုပ်မယ့်ဘုရင်ဟာ ယေရှုခရစ်ဖြစ်တယ်လို့ သမ္မာကျမ်းစာကဖော်ပြပါတယ်။ ဒီလိုမျိုးအစိုးရနဲ့ ခေါင်းဆောင်မျိုး ရှိထားခြင်းအားဖြင့် ရရှိမဲ့အကျိုးကျေးဇူးတွေကို မိတ်ဆွေမြင်ယောင်နိုင်ပါသလား။” တုံ့ ပြန်မှုကိုစောင့်ပါ။ တောင်းဆိုဘရိုရှာ၊ သင်ခန်းစာ ၆ ကိုဖွင့်ပါ။ အနာဂတ်တွင် လူသားများအတွက် ဘုရားသခင့်နိုင်ငံတော်ပြုလုပ်ပေးမည့်အရာများကို တင်ပြရန် စာမျက်နှာ ၁၃ မှ အပိုဒ် ၆-၇ ပါရွေးချယ်ထားသောအချက်များနှင့် ရုပ်ပုံကိုအသုံးပြုပါ။ ဒံယေလ ၂:၄၄ ကိုဖတ်ပြီး သင့်လျော်ပါက အသိပညာစာအုပ်ကိုဝေငှပြီး ကျမ်းစာသင်အံမှုကမ်းလှမ်းပါ။

^၈ ကမ္ဘာ့ဘာသာတရားများသည် လူသားမျိုးနွယ်တစ်ရပ်လုံးအတွက် ပြဿနာများကိုပေါ်ပေါက်စေကြောင်း အသိအမှတ်ပြုသူတစ်စုံတစ်ဦးကိုတွေ့ခဲ့ပါက ပြန်လည်ပတ်သောအခါ ဤကဲ့သို့သင်မေးနိုင်သည်–

▪ “ဘုရားသခင်နှစ်သက်တဲ့ဘာသာတရားကို ကျွန်တော်တို့ဘယ်လိုများသိနိုင်မလဲဆိုပြီး မိတ်ဆွေတွေးတောဖူးပါသလား။ [တုံ့ ပြန်မှုကိုစောင့်ပါ။] ဒီ ကျွန်ုပ်တို့ထံမှ ဘုရားသခင်အဘယ်အရာတောင်းဆိုတော်မူသနည်း ဆိုတဲ့ဘရိုရှာက မှန်တဲ့ဘာသာကို ခွဲခြားသိရှိနိုင်တဲ့အမှတ်အသားများကို ဖော်ပြပေးပါတယ်။” သင်ခန်းစာ ၁၃ ကိုဖွင့်ပြီး အပိုဒ် ၃-၇ ပါ စာလုံးစောင်းဖြင့်ရေးထားသည့်အချက် ငါးချက်ကို ပေါ်လွင်စွာတင်ပြပါ။ သင် ဤသို့ဆက်ပြောနိုင်သည်– “မှန်တဲ့ဘာသာကို ရှာဖွေတဲ့အပြင် တစ်ဦးစီထံက ဘုရားသခင်တောင်းဆိုချက်တွေကိုပါ ကျွန်တော်တို့သိထားရမယ်။” ယောဟန် ၄:၂၃၊ ၂၄ ကိုဖတ်ပါ။ ဤကဲ့သို့ နောက်ဆွေးနွေးရန် ကမ်းလှမ်းပါ။ ဘရိုရှာမှ သင်ခန်းစာ ၁ ကိုဖွင့်ပြီး သင်အံမှုကျင်းပပုံကိုပြပါ။

^၉ မိသားစုပျော်ရွှင်မှုအကြောင်းကို ဆက်ဆွေးနွေးရန် ပြန်သွားသောအခါ အောက်ပါအတိုင်း သင်ပြောပြနိုင်သည်–

▪ “ပထမအကြိမ် ကျွန်တော်တို့တွေ့ခဲ့ကြတုန်းက ဘုရားသခင့်နှုတ်ကပါဌ်တော်သမ္မာကျမ်းစာမှာပါတဲ့ ဩဝါဒကိုကျင့်သုံးခြင်းအားဖြင့်ရရှိမယ့် မိသားစုပျော်ရွှင်မှုရဲ့လျှို့ဝှက်ချက်ကို မိတ်ဆွေကိုကျွန်တော်ပြောပြခဲ့တယ်။ မျက်မှောက်ခေတ်မိသားစုရဲ့လိုအပ်ရာတွေအတွက် အာရုံစိုက်လုပ်ဆောင်တဲ့အခါ သမ္မာကျမ်းစာဟာ ခေတ်မမီတော့ဘူး ဒါမှမဟုတ် ခေတ်မီသေးတယ်လို့ မိတ်ဆွေယုံကြည်ပါသလား။” တုံ့ ပြန်မှုကိုစောင့်ပါ။ အသိပညာစာအုပ်ကိုတင်ဆက်ပါ။ အခန်း ၂ ကိုဖွင့်ပြီး အပိုဒ် ၁၃ မှကိုးကားဖော်ပြချက်ကိုဖတ်ပြပါ။ အပိုဒ် ၃ မှအချက်များကိုသုံးပြီး မိသားစုကျမ်းစာသင်အံမှုကမ်းလှမ်းပါ။

^၁၀ တိကျမှန်ကန်သောမှတ်တမ်းများထားခြင်း၊ မရှိမဖြစ်လိုအပ်သည့်ကြိုတင်ပြင်ဆင်မှုပြုခြင်းနှင့် စိတ်ဝင်စားမှုတိုးပွားရန် ချက်ချင်းပြန်သွားခြင်းဖြင့် ကယ်တင်ခြင်းလမ်းစဉ်သို့ ဆွဲဆောင်ပေးမည့် အိမ်နီးနားချင်းကိုချစ်သည့်မေတ္တာမျိုးကို ကျွန်ုပ်တို့ပြသနိုင်ပါသည်။—မ. ၂၂:၃၉; ဂလ. ၆:၁၀။