စာရှုသူများထံမှ မေးခွန်းလွှာ

“မိန်းကလေးရဲ့ နှလုံးသားဆီ သွားတဲ့ ယောက်ျားလေးရဲ့ လမ်းကြောင်း” ကို ‘ငါ ဉာဏ်မမီဘူး’ လို့ ပညာအလိမ္မာ ၃၀:၁၈၊ ၁၉ မှာ ကျမ်းရေးသူ ပြောတာ ဘာကို ဆိုလိုသလဲ

“ငါ ဉာဏ်မမီတဲ့အရာ သုံးခုမက၊ ငါ နားမလည်တဲ့အရာ လေးခုကတော့– ကောင်းကင်မှာ လင်းယုန်ပျံသန်းရာ လမ်းကြောင်း၊ ကျောက်ပေါ်မှာ မြွေသွားရာ လမ်းကြောင်း၊ ပင်လယ်ပြင်မှာ သင်္ဘောသွားရာ လမ်းကြောင်း၊ မိန်းကလေးရဲ့ နှလုံးသားဆီ သွားတဲ့ ယောက်ျားလေးရဲ့ လမ်းကြောင်းတွေပဲ” လို့ ပညာအလိမ္မာ ၃၀:၁၈၊ ၁၉ မှာ ဖော်ပြထားတယ်။ ဒီကျမ်းပိုဒ်ထဲက “မိန်းကလေးရဲ့ နှလုံးသားဆီ သွားတဲ့ ယောက်ျားလေးရဲ့ လမ်းကြောင်း” ဟာ ဘာကို ဆိုလိုသလဲဆိုတာ ကျမ်းပညာရှင်တွေ အပါအဝင် လူတော်တော်များများ သိချင်ကြတယ်။

“တော်ပြီ” လို့ ဘယ်တော့မှ မပြောတဲ့အရာတွေအကြောင်း အခန်းငယ် ၁၅၊ ၁၆ မှာ ဖော်ပြထားတယ်။ ဘာအမှားမှ မလုပ်ပါဘူးလို့ ပြောတတ်တဲ့ “အိမ်ထောင်ရေးဖောက်ပြန်တဲ့ မိန်းမ” အကြောင်း အခန်းငယ် ၂၀ မှာ ဖော်ပြထားတယ်။ ဒါကြောင့် “မိန်းကလေးရဲ့ နှလုံးသားဆီ သွားတဲ့ ယောက်ျားလေးရဲ့ လမ်းကြောင်း” ဆိုတဲ့ စကားစုဟာလည်း မကောင်းတာတစ်ခုခုကို ရည်ညွှန်းနေတာလို့ ကျွန်တော်တို့ အရင်က နားလည်ခဲ့ကြတယ်။ ကောင်းကင်မှာ ပျံသန်းတဲ့ လင်းယုန်၊ ကျောက်ပေါ်မှာ သွားတဲ့ မြွေ၊ ပင်လယ်ပြင်မှာ သွားတဲ့ သင်္ဘောလိုပဲ လူတွေ ခြေရာခံလို့ မရအောင် ယောက်ျားလေးတစ်ယောက် လှုပ်ရှားတတ်တာကို ရည်ညွှန်းနေတာလို့ ကောက်ချက်ချခဲ့ကြတယ်။ ဉာဏ်များတဲ့ ယောက်ျားလေးက ရိုးသားတဲ့ မိန်းကလေးကို ဖြားယောင်းပြီး လိင်အမြတ်ထုတ်တာကို ဆိုလိုတယ်လို့ ထင်ခဲ့ကြတယ်။

ဒါပေမဲ့ ဒီကျမ်းပိုဒ်ဟာ ကောင်းတာတစ်ခုခုကို ရည်ညွှန်းနေတာလို့ ကောက်ချက်ချနိုင်တဲ့ အကြောင်းရင်းတွေ ရှိတယ်။ ကျမ်းရေးသူက သူ အံ့ဩမိတဲ့အရာတွေကို ဖော်ပြထားရုံသာ ဖြစ်တယ်။

ဒီကျမ်းပိုဒ်ဟာ ကောင်းတာတစ်ခုခုကို ရည်ညွှန်းနေကြောင်း ဟီဘရူးလက်ရေးစာမူတွေကလည်း ထောက်ခံတယ်။ ပညာအလိမ္မာ ၃၀:၁၈ မှာ “ငါ ဉာဏ်မမီတဲ့အရာ” လို့ ပြန်ဆိုထားတဲ့ ဟီဘရူးစကားလုံးဟာ “ထူးဆန်းတဲ့၊ အံ့ဩစရာကောင်းတဲ့၊ မဖြစ်နိုင်ဘူးလို့ ထင်ရတဲ့အရာ” ကို ဆိုလိုတယ်လို့ ဓမ္မဟောင်းကျမ်းအဘိဓာန် (Theological Lexicon of the Old Testament) မှာ ဖော်ပြထားတယ်။

“ကျမ်းရေးသူ အံ့ဩမိတဲ့အရာတွေကို ဖော်ပြထားရုံပါပဲ” လို့ အမေရိကန်ပြည်ထောင်စု၊ ဟားဗတ်တက္ကသိုလ်က ပါမောက္ခ ခရောဖော့ ဟောင်ဝယ်လ် တွိုင်းလည်း ကောက်ချက်ချထားတယ်။

ဒါကြောင့် ပညာအလိမ္မာ ၃၀:၁၈၊ ၁၉ ဟာ ကျွန်တော်တို့ ဉာဏ်မမီနိုင်လောက်အောင် တကယ် အံ့ဩစရာကောင်းတဲ့အရာတွေကို ဖော်ပြထားတာသာ ဖြစ်တယ်လို့ ယူဆနိုင်ပါတယ်။ ကောင်းကင်မှာ လင်းယုန်တွေ ဘယ်လိုများ ပျံဝဲသလဲ၊ ခြေထောက် မရှိဘဲ ကျောက်ပေါ်မှာ မြွေတွေ လျှောခနဲလျှောခနဲ ဘယ်လိုများ သွားသလဲ၊ ပင်လယ်ပြင်ကို သင်္ဘောအကြီးကြီးတွေ ဘယ်လိုများ ကူးသလဲ၊ ယောက်ျားလေးနဲ့ မိန်းကလေး ဘယ်လိုများ ချစ်ကျွမ်းဝင်ပြီး ပျော်ရွှင်စွာ သက်ထက်ဆုံး ပေါင်းဖက်သွားသလဲဆိုတာ ကျမ်းရေးသူလိုပဲ ကျွန်တော်တို့အားလုံး အံ့ဩမိကြပါတယ်။