အရက်ယမကာကို ချင့်ချိန်မှုရှိရှိ သောက်နိုင်ပုံ

လူတချို့က စိတ်ညစ်တဲ့အခါ အရက် ပိုသောက်ကြတယ်။ အထီးကျန်လို့၊ ပျင်းလို့ဆိုပြီး ပိုသောက်တာလည်း ရှိတယ်။ သင်ကော ခါတိုင်းထက် ပိုသောက်နေသလား။ အရက် အလွန်အကျွံ မသောက်မိအောင်၊ အရက်မစွဲအောင် ဘာလုပ်နိုင်သလဲ။ အောက်ပါ လက်တွေ့ကျတဲ့ အကြံပြုချက်တွေက အရက်သောက်ရာမှာ ချင့်ချိန်မှု ရှိစေဖို့ ကူညီပေးနိုင်တယ်။

• တော်သင့်ရုံ သောက်တယ်ဆိုတာ ဘာလဲ

• သောက်တာ များသွားပြီဆိုတဲ့ လက္ခဏာတွေက ဘာလဲ

• အရက်သောက်ရာမှာ ချင့်ချိန်မှု ရှိစေဖို့ ကူညီပေးတဲ့ အကြံပြုချက် ငါးချက်

တော်သင့်ရုံ သောက်တယ်ဆိုတာ ဘာလဲ

ကျမ်းစာအဆို- ‘သောက်ကြူးသူတွေထဲမှာ မင်း မပါစေနဲ့။’—ပညာအလိမ္မာ ၂၃:၂၀။

စဉ်းစားကြည့်ပါ။ အရက် တော်သင့်ရုံ သောက်တာကို ကျမ်းစာ မတားမြစ်ဘူး။ (ဒေသနာ ၉:၇) ဒါပေမဲ့ တော်သင့်ရုံ သောက်တာ၊ သောက်ကြူးတာ၊ အရက်မူးတာ မတူကြောင်း ကွဲကွဲပြားပြား ဖော်ပြတယ်။ (လုကာ ၂၁:၃၄။ ဧဖက် ၅:၁၈။ တိတု ၂:၃) အရက်မူးတဲ့အဆင့် မရောက်ရင်တောင် အလွန်အကျွံ သောက်တာက ဆုံးဖြတ်နိုင်စွမ်း၊ ကျန်းမာရေး၊ တခြားသူနဲ့ ဆက်ဆံရေးတို့ကို ထိခိုက်ပျက်စီးစေနိုင်တယ်။—ပညာအလိမ္မာ ၂၃:၂၉၊ ၃၀။

တော်သင့်ရုံ သောက်တာလား၊ အလွန်အကျွံ သောက်တာလားဆိုတာကို တစ်နေ့ ဘယ်နှခွက်၊ တစ်ပတ် ဘယ်နှရက် သောက်တယ်ဆိုတဲ့အပေါ် မူတည်ပြီး တိုင်းတာကြောင်း အာဏာပိုင်တွေ သိကြတယ်။a တစ်ယောက်နဲ့ တစ်ယောက် အရက်ကို တုံ့ပြန်မှု မတူလို့ တချို့အတွက် လုံးဝ မသောက်တာ အကောင်းဆုံးပဲ။ ကမ္ဘာ့ကျန်းမာရေးအဖွဲ့ အဆိုအရ-

“အောက်ပါအခြေအနေမျိုးမှာ တစ်ခွက်၊ နှစ်ခွက်ပဲဆိုရင်တောင် များလွန်းတယ်-

• ယာဉ်မောင်းနေတဲ့အခါ၊ စက်ကိရိယာတွေသုံးပြီး အလုပ်လုပ်နေတဲ့အခါ။

• ကိုယ်ဝန်ဆောင်တဲ့အခါ၊ နို့တိုက်နေရတဲ့အခါ။

• ဆေးသောက်ထားတဲ့အခါ။

• ကျန်းမာရေးပြဿနာတစ်ခုခု ရှိနေတဲ့အခါ။

• အရက်သောက်တာ မထိန်းနိုင်တဲ့အခါ။”

သောက်တာ များသွားပြီဆိုတဲ့ လက္ခဏာတွေက ဘာလဲ

ကျမ်းစာအဆို- ‘ငါတို့ရဲ့ လမ်းစဉ်တွေကို အသေအချာ ဆန်းစစ်ကြစို့။’—မြည်တမ်းစကား ၃:၄၀။

စဉ်းစားကြည့်ပါ- ကိုယ့်ရဲ့ အရက်သောက်တဲ့အကျင့်ကို မှန်မှန် ဆန်းစစ်ပြီး လိုအပ်သလို ပြုပြင်ပြောင်းလဲမယ်ဆိုရင် အရက်ရဲ့ နောက်ဆက်တွဲ ဆိုးကျိုးတွေကို ရှောင်ရှားနိုင်မယ်။ အရက်စွဲနေပြီဆိုတာ ပြတဲ့ အောက်ပါလက္ခဏာတွေ ကိုယ့်မှာ ရှိမရှိ ဆန်းစစ်ကြည့်ပါ။

• သောက်လိုက်ရမှ စိတ်ပျော်တယ်လို့ ယူဆတယ်။ စိတ်ပြေလက်ပျောက်ဖြစ်ဖို့၊ လူပေါင်းဆံ့ဖို့၊ စိတ်ပျော်ဖို့ အရက်သောက်ရမယ်လို့ ယူဆတယ်။ ပြဿနာတွေ ကြုံတဲ့အခါ အရက်သောက်တယ်။

• ခါတိုင်းထက် ပိုသောက်တယ်။ သောက်တဲ့အကြိမ်ရေ ပိုစိတ်လာတယ်။ အပြင်းစားတွေ သောက်လာတယ်။ ပိုသောက်တာတောင် မတိုးတော့ဘူး။

• အရက်ကြောင့် အိမ်မှာ၊ အလုပ်မှာ ပြဿနာတက်တယ်။ ဥပမာ၊ အရက်ဖိုး မတတ်နိုင်တာတောင် ဝယ်သောက်တယ်။

• သောက်ပြီးတဲ့နောက် အန္တရာယ်မကင်းတဲ့ ဆုံးဖြတ်ချက်တွေ ချမိတယ်။ ဥပမာ၊ ကားမောင်းတာ၊ ရေကူးတာ၊ စက်ကိရိယာတွေသုံးပြီး အလုပ်လုပ်တာတို့ ဖြစ်တယ်။

• ကိုယ်အရက်သောက်တာကို စိတ်ပူကြောင်း တခြားသူတွေ ပြောတယ်။ တခြားသူတွေ ကိုယ့်ကို အဲဒီလို ပြောလာတဲ့အခါ ဆင်ခြေကန်တယ်။ တခြားသူတွေ မသိအောင် ခွက်ပုန်းသောက်တယ်။ ဘယ်လောက် သောက်တယ်ဆိုတာ အမှန်အတိုင်း မပြောဘူး။

• အရက်ဖြတ်ဖို့ ခက်တယ်။ လျှော့သောက်ဖို့၊ ဖြတ်ဖို့ ကြိုးစားပေမဲ့ ဒုံရင်းပဲ ဖြစ်နေတယ်။

အရက်သောက်ရာမှာ ချင့်ချိန်မှု ရှိစေဖို့ ကူညီပေးတဲ့ အကြံပြုချက် ငါးချက်

၁။ ဇယား ဆွဲပါ။

ကျမ်းစာအဆို- “ဝီရိယရှိသူရဲ့ အစီအစဉ်တွေ ကျိန်းသေ အောင်မြင်လိမ့်မယ်။”—ပညာအလိမ္မာ ၂၁:၅။

ဒီနည်း စမ်းကြည့်ပါ- တစ်ပတ်အတွင်း ဘယ်နေ့တွေမှာပဲ သောက်မယ်ဆိုတာ ကြိုသတ်မှတ်ထားပါ။ အဲဒီနေ့တွေမှာ ဘယ်နှခွက်ပဲ သောက်မယ်ဆိုပြီး ကန့်သတ်ထားပါ။ တစ်ပတ်မှာ အနည်းဆုံး နှစ်ရက်ကို အရက်မသောက်တဲ့နေ့ဆိုပြီး သတ်မှတ်ထားပါ။

“သောက်တဲ့ရက် ဆက်နေတာမျိုး မဖြစ်အောင် ထိန်းတာက အရက်ချိုး မဖြစ်အောင် ကာကွယ်တဲ့ နည်းလမ်းကောင်းပဲ” လို့ ယူကေအခြေစိုက် အရက်ပညာပေးအဖွဲ့က ဆိုတယ်။

၂။ ဇယားအတိုင်း လက်တွေ့ လုပ်ပါ။

ကျမ်းစာအဆို- ‘အစပြုလုပ်ဆောင်ခဲ့တာကို အပြီးသတ်လိုက်ပါ။’—၂ ကောရိန္သု ၈:၁၁။

ဒီနည်း စမ်းကြည့်ပါ- သောက်တဲ့ ပမာဏ၊ ဘယ်နှခွက်ဆိုတာကို အတိအကျ မှတ်နိုင်ဖို့ စံသတ်မှတ်ထားတဲ့ ခွက်ကို သုံးပါ။ ကျန်းမာရေးနဲ့ညီပြီး အရက်မပါတဲ့ ဖျော်ရည်တွေ အသင့်ဆောင်ထားပါ။

“အပြောင်းအလဲ ခပ်သေးသေးတွေ လုပ်တာက အရက်ကြောင့် ဖြစ်လာတဲ့ ပြဿနာကို လျှော့ချနိုင်တယ်” လို့ အရက်စွဲခြင်းဆိုင်ရာ ယူအက်စ် အမျိုးသားအသင်းအဖွဲ့က ဆိုတယ်။

၃။ ဆုံးဖြတ်ထားတဲ့အတိုင်း လုပ်ပါ။

ကျမ်းစာအဆို- “ဟုတ်ရင် “ဟုတ်တယ်၊” မဟုတ်ရင် “မဟုတ်ဘူး” လို့ပဲ ပြောပါ။”—ယာကုပ် ၅:၁၂။

ဒီနည်း စမ်းကြည့်ပါ- မသောက်ဖို့ ဆုံးဖြတ်ထားတဲ့ရက်မှာ တစ်ယောက်ယောက်က သောက်ဖို့ ပြောလာရင် ယဉ်ယဉ်ကျေးကျေး ငြင်းတတ်အောင် ပြင်ဆင်ထားပါ။

“ကမ်းလှမ်းချက်ကို မြန်မြန် ငြင်းနိုင်လေ အလျှော့ပေးနိုင်ချေ ပိုနည်းလေပဲ” လို့ အရက်စွဲခြင်းဆိုင်ရာ ယူအက်စ် အမျိုးသားအသင်းအဖွဲ့က ဆိုတယ်။

၄။ ဆုံးဖြတ်ချက်ရဲ့ အကျိုးကျေးဇူးတွေကို အာရုံစိုက်ပါ။

ကျမ်းစာအဆို- “ကိစ္စတစ်ခုရဲ့ အဆုံးဟာ အစထက် ပိုကောင်းတယ်။”—ဒေသနာ ၇:၈။

ဒီနည်း စမ်းကြည့်ပါ- အရက်ကို ချင့်ချိန်မှုရှိရှိ သောက်ရတဲ့ အကြောင်းရင်းတွေကို စာရင်း လုပ်ထားပါ။ အိပ်စက်ခြင်း၊ ကျန်းမာရေး၊ ငွေကြေး၊ တခြားသူတွေနဲ့ ဆက်ဆံရေးစတဲ့ ကဏ္ဍတွေမှာ တိုးတက်ကောင်းမွန်လာတယ်ဆိုတဲ့ အချက်တွေ ပါဝင်စေပါ။ ကိုယ့်ဆုံးဖြတ်ချက်အကြောင်း တခြားတွေကို ပြောပြတဲ့အခါ အခက်အခဲတွေထက် ကောင်းကျိုးတွေကို အာရုံစိုက်ပါ။

၅။ ဘုရားသခင်ဆီ အကူအညီ တောင်းပါ။

ကျမ်းစာအဆို- “ကျွန်တော့်ကို အစွမ်းခွန်အားပေးတဲ့ ဘုရားသခင်ကြောင့် အရာရာကို စွမ်းဆောင်နိုင်လို့ပဲ။”—ဖိလိပ္ပိ ၄:၁၃။

ဒီနည်းကို စမ်းကြည့်ပါ- ကိုယ့်ရဲ့ အရက်သောက်တဲ့အကျင့်ကို တွေးပူနေရင် ဘုရားသခင်ဆီ ဆုတောင်းပါ။ ခွန်အားနဲ့ ချုပ်တည်းမှု ရှိဖို့ ဆုတောင်းပါ။b ကျမ်းစာမှာပါတဲ့ လက်တွေ့ကျ အကြံဉာဏ်ကို အချိန်ယူ ရှာဖွေပါ။ ဒါဆိုရင် အရက်နဲ့ပတ်သက်ပြီး ချင့်ချိန်မှု ရှိနိုင်ဖို့ ဘုရားသခင် ကူညီပါလိမ့်မယ်။