အရပ်သားပြည်သူတွေကို ဘယ်သူ ကယ်တင်ပေးမလဲ—ကျမ်းစာအဆိုက ဘာလဲ

ကုလသမဂ္ဂ အစီရင်ခံစာမှာ ဒီလိုဖော်ပြထားတယ်–

• ဂါဇာ-အစ္စရေး စစ်ပွဲကြောင့် ၂၀၂၃ ခုနှစ် အောက်တိုဘာ ၇ ရက်ကနေ ၂၃ ရက်အတွင်း သေဆုံးသူ ၆,၄၀၀ ကျော်၊ ဒဏ်ရာရသူ ၁၅,၂၀၀ ကျော် ရှိတဲ့အထဲက အများစုဟာ အရပ်သားတွေ ဖြစ်တယ်။ ဒါ့အပြင် သိန်းနဲ့ချီတဲ့သူတွေဟာ နေရပ်စွန့်ခွာ ပြေးကြရတယ်။

• ၂၀၂၃ ခုနှစ်၊ စက်တင်ဘာ ၂၄ ရက်အထိ ရုရှား-ယူကရိန်း စစ်ပွဲကြောင့် ယူကရိန်းမှာ အရပ်သား ၉,၇၀၁ ယောက် သေဆုံးပြီး ဒဏ်ရာရသူ ၁၇,၇၄၈ ယောက်ရှိပြီ။

စစ်ဘေးသင့်ပြည်သူတွေအတွက် သမ္မာကျမ်းစာမှာ မျှော်လင့်ချက်သတင်း ပါသလား။

အရပ်သားတွေအတွက် မျှော်လင့်ချက်

ဘုရားသခင်က “မြေတစ်ခွင်လုံးမှာ စစ်မှုကို ငြိမ်းစေ” မယ်လို့ ကျမ်းစာမှာ ကြိုပြောထားတယ်။ (ဆာလံ ၄၆:၉) ဘုရားသခင်က လူ့အစိုးရတွေ အားလုံးနေရာမှာ ဘုရားနိုင်ငံတော်အစိုးရကို အစားထိုးပါလိမ့်မယ်။ (ဒံယေလ ၂:၄၄) ဘုရားနိုင်ငံတော်က လူသားတွေအတွက် ငြိမ်သက်အေးချမ်းမှုကို ဆောင်ကြဉ်းပေးပါမယ်။

ဘုရားနိုင်ငံတော်ဘုရင် ယေရှုခရစ် လုပ်ဆောင်ပေးမယ့်အရာကို သတိပြုကြည့်ပါ–

• “အော်ဟစ်အကူအညီတောင်းနေတဲ့ နွမ်းပါးသူတွေ၊ နိမ့်ကျသူတွေ၊ ကူကယ်ရာမဲ့သူတွေကို မင်းကြီး ကယ်တင်လိမ့်မယ်။ နိမ့်ကျသူတွေ၊ နွမ်းပါးသူတွေကို သနားလိမ့်မယ်။ ဆင်းရဲသားတွေရဲ့အသက်ကို ကယ်တင်လိမ့်မယ်။ သူတို့ကို ဖိနှိပ်မှုနဲ့ အကြမ်းဖက်မှုကနေ ကယ်တင်လိမ့်မယ်။”—ဆာလံ ၇၂:၁၂-၁၄။

စစ်ပွဲတွေ၊ အကြမ်းဖက်မှုတွေကြောင့် ဖြစ်ပေါ်လာတဲ့ စိတ်ဆင်းရဲစရာတွေ၊ ဆင်းရဲဒုက္ခတွေကို ဘုရားနိုင်ငံတော်က ကုစားပေးပါမယ်။

• “ဘုရားသခင်က သူတို့ရဲ့ မျက်ရည်ရှိသမျှကို သုတ်ပေးလိမ့်မယ်။ သေခြင်းရှိတော့မှာ မဟုတ်ဘူး။ ငိုကြွေးမြည်တမ်းခြင်း၊ အော်ဟစ်ခြင်း၊ နာကျင်ခြင်းလည်း ရှိတော့မှာ မဟုတ်ဘူး။ အရင်ကဖြစ်ဖူးတာတွေ ကွယ်ပျောက်သွားပြီ။”—ဗျာဒိတ် ၂၁:၄။

မကြာခင် ဘုရားနိုင်ငံတော်က လူ့အရေးကိစ္စတွေကို ကြားဝင်ဆောင်ရွက်ပါတော့မယ်။ “စစ်မက်သတင်းတွေ” ကြားရလိမ့်မယ်လို့ ကျမ်းစာမှာ ကြိုပြောထားတယ်။ အဲဒီအတိုင်း အခု ဖြစ်ပျက်နေတာပါ။ (မဿဲ ၂၄:၆) ဒီအဖြစ်အပျက်နဲ့ တခြားအဖြစ်အပျက်တွေက ကျွန်တော်တို့ဟာ လူအုပ်ချုပ်မှုရဲ့ “နောက်ဆုံးကာလ” မှာ အသက်ရှင်နေရတယ် ဆိုတာ ဖော်ပြနေပါတယ်။—၂ တိမောသေ ၃:၁။