နတ်ဆိုးတွေ တကယ်ရှိသလား

သမ္မာကျမ်းစာ ဖြေဆိုရာ

နတ်ဆိုးတွေ တကယ်ရှိပါတယ်။ နတ်ဆိုးတွေက ဘုရားသခင်ကို ပုန်ကန်တဲ့ နာမ်ဝိညာဉ်သားတွေ၊ “ပြစ်မှားသောကောင်းကင်တမန်” တွေဖြစ်ကြတယ်။ (၂ ပေတရု ၂:၄) ကိုယ့်ဘာသာကိုယ် နတ်ဆိုးဖြစ်အောင်လုပ်ခဲ့တဲ့ ပထမဆုံး ကောင်းကင်တမန်က စာတန်မာရ်နတ်ဖြစ်ပါတယ်။ သူ့ကို “နတ်ဆိုးမင်း” ဆိုပြီး ကျမ်းစာမှာဖော်ပြထားတယ်။—မဿဲ ၁၂:၂၄၊ ၂၆။

နောဧခေတ်က ပုန်ကန်မှု

နောဧခေတ် ရေလွှမ်းမိုးခြင်းမတိုင်ခင် ကောင်းကင်တမန်တွေ ပုန်ကန်ခဲ့ကြောင်း ကျမ်းစာမှာ ဒီလိုဖော်ပြထားတယ်– “ဘုရားသခင်၏သားတို့သည် လူသမီးတို့လှကြောင်းကို မြင်၍ ကိုယ်စိတ်ရှိသည်အတိုင်း စုံဖက်ကြ၏။” (ကမ္ဘာဦး ၆:၂) အဲဒီဆိုးညစ်တဲ့ ကောင်းကင်တမန်တွေက သူတို့ရဲ့ “နေသင့်ရာအရပ်” ဖြစ်တဲ့ ကောင်းကင်ကို စွန့်ခွာပြီး လူ့ကိုယ်ခန္ဓာကို ဆောင်ယူခဲ့ကြတယ်။ ပြီးတော့ လူ့သမီးတွေနဲ့ ပေါင်းသင်းနေထိုင်ခဲ့ကြတယ်။—ယုဒ ၆။

ကမ္ဘာမြေကြီးကို ရေလွှမ်းမိုးတဲ့အခါ ပုန်ကန်တဲ့ကောင်းကင်တမန်တွေက သူတို့ရဲ့လူ့ကိုယ်ခန္ဓာကို စွန့်ပြီး ကောင်းကင်ကို ပြန်တက်သွားကြတယ်။ ဒါပေမဲ့ ဘုရားသခင်က သူတို့ကို မိမိရဲ့မိသားစုအဝင် အဖြစ်မခံတော့ဘူး။ နတ်ဆိုးတွေကို အပြစ်ပေးတဲ့အနေနဲ့ နောက်တစ်ခါ လူ့ကိုယ်ခန္ဓာကို ယူဆောင်ခွင့် မပြုတော့ဘူး။—ဧဖက် ၆:၁၁၊ ၁၂။