ဟောပြောချက်တစ်ခုပေးရန် တာဝန်ရသည့်အခါ အတော်များများသည် နိဒါန်းမှအစ၊ နိဂုံးထိအဆုံး ပင်ပန်းကြီးစွာရေးချကြသည်။ ဟောပြောချက်မပြီးဆုံးခင် များပြားသောစာမူကြမ်းများကို ပြင်ဆင်ခဲ့ရပေမည်။ ဤနည်းသည် နာရီနှင့်ချီ၍ကြာပေမည်။

သင့်ဟောပြောချက်များကို ထိုနည်းအတိုင်း ပြင်သလော။ ပို၍လွယ်ကူသောနည်းတစ်နည်းကို သင်ယူချင်သလော။ သင်သည် အောက်လိုင်းပြင်တတ်သွားပါက စာလုံးတိုင်းကိုရေးချနေဖို့ လိုတော့မည်မဟုတ်ပေ။ ယင်းက ဟောပြောချက်ပေးခြင်းကိုလေ့ကျင့်ရန် အချိန်ပို၍ရစေမည်။ သင့်ဟောပြောတင်ဆက်မှုများကိုပေးဖို့ ပို၍လွယ်ကူစေမည်သာမက နားထောင်သူအတွက်ပို၍စိတ်ဝင်စားစေကာ ပရိသတ်ကိုပို၍လှုံ့ဆော်ပေးမည်။

အသင်းတော်တွင်ပေးသည့် လူထုဟောပြောချက်များအတွက် အခြေခံဟောပြောချက်အောက်လိုင်းကို ပြင်ဆင်ပေးထားသည်မှာမှန်ပါသည်။ သို့ရာတွင် အခြားဟောပြောချက်အများစုအတွက်မူ ထိုသို့မပေးထားချေ။ သင့်အား အကြောင်းအရာတစ်ခု သို့မဟုတ် ခေါင်းစဉ်တစ်ခုကိုသာ ပေးထားပေမည်။ သို့မဟုတ် သင်သည် သတ်သတ်မှတ်မှတ်ပုံနှိပ်ထားသည့် အကြောင်းအရာကို ခြုံငုံတင်ပြပေးရန် တောင်းဆိုခံရမည်။ တစ်ခါတစ်ရံ ညွှန်ကြားချက်အနည်းငယ်သာ သင့်အားပေးထားပေမည်။ ထိုသို့သောတာဝန်များအားလုံးအတွက် သင့်အောက်လိုင်းကို ကိုယ်တိုင်ပြင်ဆင်ဖို့လိုအပ်သည်။

စာမျက်နှာ ၄၁ ပေါ်ရှိနမူနာက သင့်အား တိုတုတ်သောအောက်လိုင်းတစ်ခု မည်သို့စီစဉ်နိုင်ကြောင်း အကြံရစေမည်။ အဓိကအချက်တစ်ခုစီသည် ဘယ်ဘက်မာဂျင်မှစတင်ပြီး စာလုံးကြီးများဖြင့်ရေးသားထားသည်ကို သတိပြုပါ။ အဓိကအချက်တစ်ခုစီအောက်တွင် ယင်းကိုထောက်ခံသော အယူအဆများကို ဖော်ပြထားသည်။ ထိုအယူအဆများကို အဆင့်ဆင့်တည်ဆောက်သွားရန်အသုံးပြုမည့် ထပ်ဆင့်အချက်များကို ယင်းတို့အောက်တွင်ဖော်ပြထားပြီး ဘယ်ဘက်မာဂျင်မှ အနည်းငယ်အတွင်းသို့ ဝင်ထားသည်။ ဤအောက်လိုင်းကို ဂရုတစိုက်ဆန်းစစ်ကြည့်ပါ။ အဓိကအချက်နှစ်ခုသည် ခေါင်းစဉ်နှင့်တိုက်ရိုက်ဆက်နွှယ်ကြောင်း သတိပြုပါ။ အချက်ငယ်များသည် စိတ်ဝင်စားဖွယ်ကောင်းသော အချက်များသက်သက်သာမဟုတ်ကြောင်းကိုလည်း လေ့လာသုံးသပ်ပါ။ ယင်းအစား၊ တစ်ချက်စီသည် မိမိတို့အထက်တွင်ရှိသော အဓိကအချက်ကို ထောက်ခံပေးသည်။

သင်သည်အောက်လိုင်းတစ်ခုကိုပြင်ဆင်သည့်အခါ ၎င်းသည် ဤနမူနာနှင့်တစ်ထပ်တည်း တူချင်မှတူမည်။ သို့သော် ဖော်ပြပါမူများကို သဘောပေါက်ပါက အကြောင်းအရာကိုဖွဲ့စည်းပြီး အချိန်အတော်အသင့်ဖြင့် ဟောပြောချက်ကောင်းတစ်ခုကိုပြင်ဆင်ဖို့ ယင်းတို့ကကူညီမည်။ သင်မည်သို့ရှေ့ဆက်သင့်သနည်း။

ဆန်းစစ်လေ့လာ၊ ရွေးချယ်၍ဖွဲ့စည်းပါ

အဓိကအကြောင်း သင်လိုအပ်သည်။ သင့်အဓိကအကြောင်းသည် စကားလုံးတစ်လုံးတည်းဖြင့် ကိုယ်စားပြုနိုင်ဖွယ်ရှိသော ကျယ်ပြန့်သည့်အကြောင်းအရာတစ်ခုမျှသာ မဟုတ်ပါ။ ယင်းသည် သင်ပြောပြချင်သည့် ပင်မအယူအဆဖြစ်ကာ ယင်းက အကြောင်းအရာကိုဆွေးနွေးဖို့ စီစဉ်ထားသည့် ရှုထောင့်ကို ညွှန်ပြသည်။ အဓိကအကြောင်းတစ်ခုတာဝန်ပေးခံရလျှင် အဓိကစကားလုံးတစ်လုံးစီကို ဂရုတစိုက်ဆန်းစစ်လေ့လာပါ။ သင်သည် ထုတ်ဝေထားသော အကြောင်းအရာပေါ်မူတည်၍ တာဝန်ပေးထားသည့်အဓိကအကြောင်းကို တည်ဆောက်သွားရန်ဖြစ်ပါက အဓိကအကြောင်းကိုစိတ်ထဲထားကာ ထိုအကြောင်းအရာကိုလေ့လာပါ။ အကြောင်းအရာတစ်ခုသာ တာဝန်ပေးခံရပါက အဓိကအကြောင်းကိုရွေးချယ်ရန် သင့်တာဝန်ဖြစ်မည်။ သို့သော် ထိုသို့မရွေးချယ်မီ သုတေသနအချို့ပြုခြင်းသည် အထောက်အကူဖြစ်ကြောင်း တွေ့ရှိပေမည်။ အမြင်ကျယ်ကျယ်ထားခြင်းဖြင့် အယူအဆသစ်များ ရရှိတတ်လေ့ရှိသည်။

ဤအဆင့်များကိုလုပ်ဆောင်ရင်း သင့်ကိုယ်သင်ဤသို့ဆက်မေးပါ– ‘ဒီအကြောင်းအရာဟာ ငါ့ပရိသတ်အတွက် ဘာကြောင့်အရေးပါတာလဲ။ ငါ့ရဲ့ရည်ရွယ်ချက်ကဘာလဲ။’ အကြောင်းအရာကိုခြုံငုံမိစေရုံ သို့မဟုတ် သိမှတ်စရာဝေဆာသောဟောပြောချက်တစ်ခု ပေးရုံသာမကဘဲ သင့်ပရိသတ်အတွက် အကျိုးဖြစ်ထွန်းစေသည့်တစ်စုံတစ်ရာကို ဖြည့်ဆည်းပေးရန်လည်း ဖြစ်စေသင့်သည်။ သင့်ရည်ရွယ်ချက်ပုံပေါ်လာသည့်အခါ ယင်းကိုရေးချလိုက်ပါ။ သင်ပြင်ဆင်သည့်အခါ ၎င်းကို မပြတ်သတိရနေစေပါ။

သင့်ရည်ရွယ်ချက်ကို သတ်မှတ်ဆုံးဖြတ်ကာ ၎င်းနှင့်ဆီလျော်သောအဓိကအကြောင်းတစ်ခုကိုရွေးချယ် (သို့မဟုတ် သင်တာဝန်ကျသည့်အဓိကအကြောင်းသည် ထိုရည်ရွယ်ချက်နှင့်မည်သို့ကိုက်ညီကြောင်း ဆန်းစစ်လေ့လာ) ပြီးနောက် ပို၍ဦးတည်ပြီး သုတေသနပြုလုပ်နိုင်သည်။ ပရိသတ်အတွက် အထူးတန်ဖိုးရှိမည့် အကြောင်းအရာကို ရှာဖွေပါ။ ယေဘုယျအချက်များလောက်နှင့်သာကျေနပ်မနေဘဲ သိမှတ်ဖွယ်ရာနှင့် အမှန်အထောက်အကူဖြစ်စေသော သတ်သတ်မှတ်မှတ်အချက်များကို သုတေသနပြုပါ။ သင်ပြုလုပ်သည့် သုတေသနပြုမှုပမာဏသည် လက်တွေ့ကျပါစေ။ အများအားဖြင့် အသုံးပြုနိုင်သည်ထက် ပိုများသောအကြောင်းအရာ သင်ရရှိလာပါလိမ့်မည်၊ ထို့ကြောင့် သင်ရွေးချယ်ဖို့လိုပေမည်။

သင့်အဓိကအကြောင်းကို တည်ဆောက်သွားရန်နှင့် သင့်ရည်ရွယ်ချက်ကိုအောင်မြင်နိုင်စေရန် ဆွေးနွေးဖို့လိုအပ်သည့် အဓိကအချက်များကို ခွဲခြားသိမြင်ပါ။ ယင်းတို့သည် သင့်ဟောပြောချက်၏အကြမ်းထည်၊ သင်၏အခြေခံအောက်လိုင်းဖြစ်လာမည်။ အဓိကအချက်မည်မျှပါရှိသင့်သနည်း။ တိုတုတ်သောဆွေးနွေးခန်းအတွက် နှစ်ချက်သည်လုံလောက်နိုင်သည်၊ တစ်နာရီကြာဟောပြောချက်အတွက်ပင် ငါးချက်သည်လုံလောက်လေ့ရှိတတ်သည်။ အဓိကအချက်နည်းလေလေ ယင်းတို့ကို ပရိသတ်ပို၍မှတ်မိဖို့အလားအလာ ရှိလေလေဖြစ်မည်။

စိတ်ထဲ၌ သင်၏အဓိကအကြောင်းနှင့် အဓိကအချက်များရှိပြီဆိုလျှင် သုတေသနပြုထားသည့်အကြောင်းအရာကို ဖွဲ့စည်းပါ။ သင့်အဓိကအချက်များနှင့် အဘယ်အချက်များ တိုက်ရိုက်ဆက်နွှယ်သည်ကို သတ်မှတ်ဆုံးဖြတ်ပါ။ ဟောပြောတင်ဆက်ပုံကို ထပ်ဆင့်သစ်လွင်စေမည့် အသေးစိတ်အချက်အလက်များကို ရွေးချယ်ပါ။ အဓိကအချက်များကိုထောက်ခံသည့် ကျမ်းချက်များကိုရွေးချယ်သည့်အခါ ထိုကျမ်းချက်များအပေါ် အဓိပ္ပာယ်ပြည့်ဝသောနည်းဖြင့် ကျိုးကြောင်းဆင်ခြင်ရန် သင့်အားကူညီမည့်အယူအဆများကို မှတ်သားပါ။ အချက်တစ်ခုစီကို ယင်းနှင့်သက်ဆိုင်သည့် အဓိကအချက်အောက်တွင်ထားပါ။ အချို့သောအချက်အလက်သည် မည်သည့်အဓိကအချက်နှင့်မျှမကိုက်ညီလျှင် အလွန်စိတ်ဝင်စားဖွယ်ကောင်းနေလျှင်ပင် ယင်းကို ဖယ်ရှားလိုက်ပါ၊ သို့မဟုတ် အခြားအချိန်တွင်အသုံးပြုရန်အတွက် ဖိုင်သွင်းထားလိုက်ပါ။ အကောင်းဆုံးအကြောင်းအရာကိုသာထားရှိပါ။ များများခြုံငုံမိစေရန်ကြိုးစားလွန်းပါက သင်သည် စကားကိုမြန်မြန်ပြောရမည်ဖြစ်ပြီး သင့်ခြုံငုံတင်ဆက်မှုသည် ပေါ့ပျက်ပျက်ဖြစ်သွားမည်။ ပရိသတ်အတွက် အမှန်တကယ်တန်ဖိုးရှိစေသည့် အချက်အနည်းငယ်ကိုဖော်ပြပြီး ထိုအရာကိုကောင်းစွာလုပ်ဆောင်လျှင် သာ၍ကောင်းသည်။ အချိန်မကျော်စေပါနှင့်။

သင်သည် မလုပ်ထားရသေးပါက ကျိုးကြောင်းဆီလျော်စွာ အစီအစဉ်တကျ အကြောင်းအရာကို စဉ်လိုက်ပါ။ ခရစ်ဝင်ကျမ်းရေးသူလုကာသည် ထိုအတိုင်းပြုလုပ်ခဲ့သည်။ သူ၏အကြောင်းအရာနှင့်ဆက်စပ်သည့် အချက်အလက်အများအပြားကိုစုဆောင်းပြီးနောက် ယင်းတို့ကို “ကျိုးကြောင်းဆီလျော်စွာ အစီအစဉ်တကျ” ပြုစုခဲ့သည်။ (လု. ၁:၃၊ ကဘ) သင့်ဟောပြောချက်ကို သက္ကရာဇ်စဉ်အလိုက် သို့မဟုတ် အကြောင်းအရာအလိုက်စဉ်ထားနိုင်သည်၊ သင့်ရည်ရွယ်ချက်သို့ရောက်ရန် အဘယ်အရာသည် အထိရောက်ဆုံးဖြစ်သည်အပေါ်မူတည်၍ အကြောင်းနှင့်အကျိုး သို့မဟုတ် ပြဿနာနှင့်အဖြေအစီအစဉ်ဖြင့် ဖြစ်နိုင်သည်။ အယူအဆတစ်ခုမှ အခြားတစ်ခုသို့ ရုတ်ခြည်းမပြောင်းလိုက်သင့်ပါ။ နားထောင်သူများကို အလွယ်တကူမဆက်စပ်နိုင်သည့် ကွာဟမှုများမရှိစေဘဲ အယူအဆတစ်ခုမှ နောက်တစ်ခုသို့ လွယ်ကူစွာ ဦးတည်ခေါ်ဆောင်သွားသင့်သည်။ တင်ပြထားသည့်အထောက်အထားက ပရိသတ်အား ကျိုးကြောင်းညီညွတ်သောကောက်ချက်သို့ ဦးတည်ပေးသင့်သည်။ အချက်အလက်များကိုစီစဉ်,စဉ် ဟောပြောတင်ဆက်မှုသည် ပရိသတ်အတွက် မည်သို့နေမည်ဖြစ်ကြောင်း စဉ်းစားပါ။ သင်၏တွေးဆပုံလမ်းကြောင်းအတိုင်း သူတို့ လွယ်လွယ်နှင့်လိုက်မည်လော။ သင့်စိတ်တွင်ရှိသည့်ရည်မှန်းချက်နှင့်အညီ သူတို့ကြားသိရာအတိုင်းပြုမူရန် လှုံ့ဆော်ခံရကြမည်လော။

ထို့နောက် သင့်အကြောင်းအရာတွင် စိတ်ဝင်စားမှုကိုနှိုးဆွပေးသည့်၊ သင်ဆွေးနွေးတင်ပြမည့်အရာသည် သူတို့အတွက် အမှန်တန်ဖိုးရှိကြောင်း ပရိသတ်အားပြသသည့် နိဒါန်းတစ်ခုကိုပြင်ဆင်ပါ။ ယင်းက သင်၏ ပထမဆုံးဝါကျအနည်းငယ်ကိုရေးချဖို့ ကူညီနိုင်ပေမည်။ နောက်ဆုံးတွင် သင့်ရည်မှန်းချက်နှင့်ဆီလျော်သည့် လှုံ့ဆော်ပေးသောနိဂုံးကို စီစဉ်ပါ။

အောက်လိုင်းကို အတော်လေးစောစောပြင်ဆင်ထားပါက ယင်းကိုသင်ဟောပြောချက်မပေးမီ ပြုပြင်မွမ်းမံရန် အချိန်ရပေလိမ့်မည်။ တစ်စုံတစ်ရာသောအယူအဆကို စာရင်းဇယားအချက်အလက်အချို့၊ ပုံဥပမာတစ်ခု သို့မဟုတ် တွေ့ကြုံမှုတစ်ခုဖြင့် ထောက်မပေးဖို့ လိုအပ်ကြောင်း သင်တွေ့ပေမည်။ လတ်တလောအဖြစ်အပျက် သို့မဟုတ် ဒေသစိတ်ဝင်စားရာအချက်အချို့ကိုအသုံးပြုခြင်းက ပရိသတ်အား အကြောင်းအရာ၏သက်ဆိုင်မှုကို ပို၍လွယ်ကူစွာမြင်ရန် ကူညီပေမည်။ သင့်ဟောပြောချက်ကိုပြန်လည်သုံးသပ်စဉ် ပရိသတ်အတွက် သတင်းအချက်အလက်ကို အလိုက်သင့်ပြုပြင်တင်ဆက်ပေးနိုင်သည့် နောက်ထပ်အခွင့်အလမ်းများကို ပို၍သတိပြုမိလာပေမည်။ အကြောင်းအရာကောင်းကို ထိရောက်သောဟောပြောချက်တစ်ခုဖြစ်ဖို့ စီစဉ်ရာတွင် ဤဆန်းစစ်၊ ပြုပြင်မွမ်းမံခြင်းသည် မရှိမဖြစ်လိုအပ်သည်။

ဟောပြောသူအချို့တို့သည် ပိုမိုကျယ်ပြန့်သော မှတ်စုမှတ်ရာများ အခြားသူများထက် ပို၍လိုအပ်ပေမည်။ သို့သော် သင်၏အကြောင်းအရာကို အဓိကအချက်အနည်းငယ်အောက်၌သာဖွဲ့စည်းကာ ယင်းတို့အား အမှန်မပံ့ပိုးသည့်အရာကို ဖယ်ရှားပစ်ပြီး သင်၏အယူအဆများကို ကျိုးကြောင်းဆီလျော်စွာ အစီအစဉ်တကျထားပါက အတွေ့အကြုံအနည်းငယ်ရှိရုံဖြင့် အရာရာကိုရေးချဖို့ လိုတော့မည်မဟုတ်ကြောင်း သင်တွေ့ရလိမ့်မည်။ အချိန်ကုန်သက်သာစေလိုက်နိုင်မည်ဖြစ်ခြင်း! ထို့အပြင် သင့်ဟောပြောချက်အရည်အသွေး တိုးတက်လာမည်။ ယင်းက သီအိုကရက်တစ်ဓမ္မအမှုကျောင်းပညာရေးမှ သင်အမှန်ပင်အကျိုးကျေးဇူးရရှိနေကြောင်း ထင်ရှားစေမည်။

ကျောင်း၌ရသည့်တာဝန်တစ်ခုစီသည် တိုးတက်ရန် အခွင့်အလမ်းရစေသည်။ အသိစိတ်ရှိရှိဖြင့် ကြိုးစားအားထုတ်ပါက သင်၏တိုးတက်မှုသည် သင်နှင့် အခြားသူတို့ရှေ့တွင်ပါ တဖြည်းဖြည်းထင်ရှားလာမည်။ (၁ တိ. ၄:၁၅) ကျောင်းက သင့်စွမ်းရည်ကို ပို၍အပြည့်အဝဖွံ့ဖြိုးလာစေရန်လည်း ကူညီပေးမည်။

အသင်းတော်ရှေ့စကားပြောရမည့်အရေးကို တွေးပူထိတ်လန့်နေသလော။ သင်သည် ကျောင်းတွင် အချိန်အတန်ကြာ ပါဝင်လာခဲ့သည့်တိုင် ယင်းသို့ဖြစ်တတ်ခြင်းသည် ဓမ္မတာပင်။ သို့သော် အချို့သောအရာများက သင့်စိုးရိမ်ပူပန်မှုကို လျော့နည်းသွားအောင် ကူညီနိုင်ပါသည်။ အိမ်တွင် အသံကျယ်ကျယ်ဖြင့် မကြာခဏ စာဖတ်သည့်အကျင့်ပြုလုပ်ပါ။ အသင်းတော်အစည်းအဝေးများ၌ မကြာခဏ မှတ်ချက်ပေးပါ၊ သင်သည် ကြေညာသူတစ်ဦးဖြစ်လျှင် လယ်ကွင်းလုပ်ငန်းတွင် မှန်မှန်ပါဝင်ပါ။ ယင်းသို့ပြုခြင်းက အခြားသူများရှေ့ စကားပြောဆိုရာတွင် အတွေ့အကြုံရစေပါလိမ့်မည်။ ထို့အပြင် သင့်ကျောင်းသားတာဝန်များကို ကောင်းစွာကြိုတင်ပြင်ဆင်ပြီး ယင်းတို့ကို အသံကျယ်ကျယ်ဖြင့် အဟောကျင့်ပါ။ သင်သည် ရင်းနှီးသောပရိသတ်ရှေ့တွင် ဟောပြောမည်ဖြစ်ကြောင်းကို သတိရပါ။ မည်သည့်ဟောပြောချက်မဆိုမပေးမီ ယေဟောဝါထံဆုတောင်းပါ။ မိမိထံတောင်းလျှောက်သူကျေးကျွန်များအား ကိုယ်တော်သည် သန့်ရှင်းသောဝိညာဉ်တော်ကို ဝမ်းမြောက်စွာပေးသည်။—လု. ၁၁:၁၃; ဖိ. ၄:၆၊ ၇။

အတော်အသင့်သာ မျှော်လင့်ပါ။ ဟောပြောသူတစ်ယောက်အဖြစ်နှင့် ထိရောက်သောသွန်သင်သူတစ်ယောက်ဖြစ်လာရန် အတွေ့အကြုံရရှိဖို့ အချိန်လိုသည်။ (မိ. ၆:၈) သင်သည် ကျောင်း၌စာရင်းသွင်းခါစဖြစ်လျှင် ချက်ချင်း ချောချောမောမောတင်ဆက်နိုင်ဖို့ မမျှော်လင့်ပါနှင့်။ သို့အစား၊ တစ်ကြိမ်လျှင် စကားပြောသွန်သင်ချက်မှ အချက်တစ်ချက်ကို လုပ်ဆောင်ပါ။ ဤစာအုပ်တွင် ယင်းကိုဆွေးနွေးထားသည့် အပိုင်းကဏ္ဍကို လေ့လာပါ။ ဖြစ်နိုင်လျှင် ထိုတွင်အကြံပြုထားသည့် လေ့ကျင့်ခန်းကို ပြုလုပ်ပါ။ ယင်းက အသင်းတော်တွင် သင့်တာဝန်ကိုမကိုင်တွယ်မီ သွန်သင်ချက်နှင့်ဆက်နွှယ်နေသည့်ကိစ္စများတွင် သင့်အား အတွေ့အကြုံပေးမည်။ တိုးတက်မှုရရှိလာပါလိမ့်မည်။

ဖတ်ရှုခြင်းတာဝန်ကိုပြင်ဆင်ပုံ

လူထုရှေ့စာဖတ်ခြင်းအတွက် ပြင်ဆင်မှုတွင် တာဝန်ကျသည့်အကြောင်းအရာထဲရှိ စကားလုံးများကို ပြောပြနိုင်ရုံထက်မက များစွာပါဝင်ပါသည်။ အကြောင်းအရာက ဘာကိုဆိုလိုကြောင်း ရှင်းရှင်းနားလည်ရန် ကြိုးပမ်းအားထုတ်ပါ။ သင့်တာဝန်ကိုရလျှင်ရချင်း စိတ်တွင်ထိုရည်မှန်းချက်ဖြင့် ၎င်းတစ်ခုလုံးကိုဖတ်ပါ။ ဝါကျတစ်ခုစီ၏လိုရင်းအချက်နှင့် စာပိုဒ်တစ်ပိုဒ်စီတွင် အဆင့်ဆင့်ရှင်းလင်းထားသည့် အယူအဆတို့ကို နားလည်ရန်ကြိုးစားပါ၊ သို့မှသာ သဘောတရားများကို တိကျမှန်ကန်စွာနှင့် လျောက်ပတ်သောခံစားမှုဖြင့် ပြောနိုင်မည်ဖြစ်သည်။ ဖြစ်နိုင်သည့်အခါတိုင်း အကျွမ်းတဝင်မရှိသောစကားလုံးများ၏ အသံထွက်အမှန်အတွက် အဘိဓာန်တွင် စစ်ကြည့်ပါ။ အကြောင်းအရာကို ကောင်းစွာသိကျွမ်းအောင် ကြိုးစားပါ။ မိဘများသည် မိမိတို့သားသမီးများ ယင်းကိုပြုလုပ်ရန် ကူညီဖို့လိုပေမည်။

ကျမ်းစာ၏အပိုင်းတစ်ပိုင်း သို့မဟုတ် ကင်းမျှော်စင်မှ ဆောင်းပါးတစ်ပုဒ်၏စာပိုဒ်များ ဖြစ်ကောင်းဖြစ်မည့်အရာကိုဖတ်ရန် တာဝန်ပေးခံခဲ့ရဖူးသလော။ ထိုအကြောင်းအရာကက်ဆက်ခွေများကို သင့်ဘာသာစကားဖြင့်ရနိုင်ပါက ဖတ်ရှုခြင်းကို နားထောင်ခြင်း၊ အသံထွက်၊ စကားစုများဖတ်ရှုပုံ၊ လေးနက်မှုနှင့် အသံအပြောင်းအလဲကဲ့သို့သော အချက်များကို မှတ်သားခြင်းတို့သည် လွန်စွာအထောက်အကူဖြစ်နိုင်သည်။ ယင်းနောက် ထိုအရည်အချင်းများကို သင့်ကိုယ်ပိုင်ဖတ်ရှုမှုတွင် ထည့်သုံးသွားဖို့ကြိုးစားပါ။

သင့်တာဝန်ကို အစပြုလုပ်ဆောင်သည့်အခါ တာဝန်ပေးခံရသောစကားပြောအရည်အချင်းကို ဆွေးနွေးသည့်သင်ခန်းစာအား ဂရုတစိုက်လေ့လာဖို့ သေချာစေပါ။ ဖြစ်နိုင်မည်ဆိုလျှင် သင်တာဝန်ကျသည့်အကြောင်းအရာအား ကြိမ်ဖန်များစွာ အသံထွက်ဖတ်ရှုလေ့ကျင့်ပြီးနောက်မှ ယင်းကို ပြန်လည်သုံးသပ်ပါ။ ထိုရေးသားထားသည့်သွန်သင်ချက်ကို အတတ်နိုင်ဆုံး လုံးစေ့ပတ်စေ့လိုက်နိုင်အောင် ကြိုးပမ်းပါ။

ဤလေ့ကျင့်ပေးမှုသည် သင့်အား ဓမ္မအမှုတွင် ကောင်းစွာလုပ်ဆောင်နိုင်စေမည်။ သင်သည် လယ်ကွင်းလုပ်ငန်းတွင်ပါဝင်စဉ် အခြားသူများအားဖတ်ပြဖို့ အခွင့်အရေးများစွာ ရတတ်သည်။ ဘုရားသခင့်စကားတော်သည် လူတို့၏အသက်တာများကိုပြောင်းလဲနိုင်သည့် တန်ခိုးရှိခြင်းကြောင့် ယင်းကို သင်ကောင်းစွာဖတ်ပြရန် အရေးကြီးသည်။ (ဟေဗြဲ ၄:၁၂) တာဝန်တစ်ခုနှစ်ခုရပြီးသည်နှင့် ထိရောက်စွာဖတ်ရှုဖို့လိုသည့် ကဏ္ဍများအားလုံးကို ကျွမ်းကျင်လာမည်ဟု မမျှော်လင့်ပါနှင့်။ နှစ်များစွာအတွေ့အကြုံရှိခဲ့သူ ခရစ်ယာန်အကြီးအကဲတစ်ဦးထံ တမန်တော်ပေါလုက ဤသို့ရေးသားခဲ့သည်– “လူထုရှေ့စာဖတ်ခြင်းကို ဆက်၍ကြိုးစားအားထုတ်နေလော့။”—၁ တိ. ၄:၁၃၊ ကဘ။

ဆွေးနွေးမည့်အကြောင်းအရာနှင့် ဇာတ်အိမ်တို့ကို လုပ်ဆောင်ခြင်း

ကျောင်းတွင် ဇာတ်အိမ်တစ်ခုဖြင့်လုပ်ဆောင်ရသည့် တာဝန်တစ်ခုကို သင်ရရှိသည့်အခါ သင်မည်သို့ရှေ့ဆက်ဆောင်ရွက်သင့်သနည်း။

အဓိကအရာသုံးခုကို သုံးသပ်ဖို့လိုသည်– (၁) သင်တာဝန်ကျသည့်အကြောင်းအရာ၊ (၂) သင်၏ဇာတ်အိမ်နှင့် သင်စကားပြောဆိုမည့်ပုဂ္ဂိုလ်နှင့် (၃) သင်တာဝန်ရထားသည့်သွန်သင်ချက်။

သင်တာဝန်ကျသည့်အကြောင်းအရာ၏ အကြောင်းကို ရွေးချယ်စုဆောင်းဖို့လိုသည်။ သို့သော် ထိုအထိမပြုမီ သင့်ဇာတ်အိမ်ကိုသာမက သင်နှင့်ပြောဆိုမည့်သူကိုပါ အလေးအနက်စဉ်းစားပါ၊ ထိုအချက်များသည် သင်ဆွေးနွေးမည့်အကြောင်းအရာအမျိုးအစားနှင့် သင့်တင်ဆက်ဟောပြောပုံအပေါ် ဆက်နွှယ်နေမည်ဖြစ်သောကြောင့်တည်း။ မည်သည့်ဇာတ်အိမ်ကို သင်အသုံးပြုမည်နည်း။ သင်သိသူတစ်ယောက်ယောက်အား သတင်းကောင်းမည်သို့တင်ဆက်နိုင်ကြောင်းကို သရုပ်ပြမည်လော။ သို့မဟုတ် ဦးဆုံးအကြိမ် လူတစ်ယောက်နှင့်တွေ့ဆုံသည့်အခါ ဖြစ်နိုင်ဖွယ်ရာကို သင်ပြသမည်လော။ သင့်ထက်အသက်ပိုကြီးသူ သို့မဟုတ် အသက်ငယ်သူလော။ သင်ဆွေးနွေးဖို့စီစဉ်သည့် အကြောင်းအရာနှင့်စပ်လျဉ်းပြီး သူ့တွင်အဘယ်သဘောထားရှိနိုင်သနည်း။ ယင်းနှင့်ပတ်သက်၍ သူမည်မျှသိထားနှင့်ပုံရသနည်း။ သင့်ဆွေးနွေးခန်းရလဒ်အနေဖြင့် အဘယ်ရည်မှန်းချက်အထမြောက်စေရန် သင်မျှော်လင့်သနည်း။ ထိုမေးခွန်းများအတွက်အဖြေများက လုပ်ဆောင်ရမည့် အရေးကြီးသောလမ်းညွှန်ချက်များကို ပေးပါမည်။

တာဝန်ပေးခံရသည့်အကြောင်းအရာပါ အကြောင်းကို အဘယ်နေရာတွင် ရှာတွေ့နိုင်မည်နည်း။ ဤစာအုပ်၏ စာမျက်နှာ ၃၃ မှ ၃၈ တွင် “သုတေသနပြုလုပ်ပုံ” ဆွေးနွေးခန်းပါရှိသည်။ ၎င်းကိုဖတ်ရှုပြီးနောက် သင်ရရှိနိုင်သည့် သုတေသနကိရိယာများကို အသုံးပြုပါ။ ကိစ္စရပ်အများစုတွင် သင်အသုံးပြုနိုင်သည်ထက်ပိုသော အကြောင်းကို လျင်မြန်စွာရှာတွေ့ပေမည်။ အသုံးချနိုင်သည့်အရာကို သတိပြုမိလာသည်အထိ လုံလုံလောက်လောက်ဖတ်ရှုပါ။ သို့သော် ထိုသို့ပြုစဉ် သင့်တင်ဆက်မှုအတွက် အသုံးပြုမည့်ဇာတ်အိမ်အပြင် သင်နှင့်ပြောဆိုမည့်သူကိုပါ ခေါင်းထဲထည့်ထားပါ။ အသုံးပြုရန်သင့်လျော်သည့်အချက်များကို မှတ်သားထားပါ။

သင့်တင်ဆက်မှုကိုဖွဲ့စည်းပြီး အသေးစိတ်အချက်အလက်များကို နောက်ဆုံး ရွေးချယ်ခြင်းမပြုမီ သင်တာဝန်ရထားသည့် သွန်သင်ချက်ဆွေးနွေးခန်းကို ဖတ်ရှုဖို့အချိန်ယူပါ။ ထိုသွန်သင်ချက်ကိုကျင့်သုံးခြင်းသည် သင့်ကိုတာဝန်ပေးခြင်းအတွက် အဓိကအကြောင်းရင်းများမှ တစ်ခုဖြစ်သည်။

ရသည့်အချိန်စေ့သောအခါ အချက်ပေးမည်ဖြစ်သောကြောင့် ပေးထားသည့်အချိန်အတွင်း အကြောင်းအရာကိုငုံမိစေခြင်းအားဖြင့် သင်၏နိဂုံးချုပ်ကိုပေးရသည့် ကျေနပ်မှုကို သင်ရရှိလိမ့်မည်။ သို့သော် ကျွန်ုပ်တို့၏လယ်ကွင်းဓမ္မအမှုတွင် အချိန်သည်အဓိကအချက် အမြဲတမ်းမဟုတ်ချေ။ ထို့ကြောင့် သင်ပြင်ဆင်သည့်အခါ ရနိုင်သည့်အချိန်ပမာဏကို ထည့်တွက်ပါ၊ သို့သော် ထိရောက်သည့်သွန်သင်မှုအပေါ် အလေးထားပါ။

ဇာတ်အိမ်များနှင့်စပ်လျဉ်း၍ အမှာစကား။ စာမျက်နှာ ၈၂ ရှိအကြံပြုချက်များကို ဆန်းစစ်ပြီး သင့်ဓမ္မအမှုတွင်လက်တွေ့ကျမည့်၊ တာဝန်ကျသည့်အကြောင်းအရာကို ယုတ္တိရှိရှိ အသုံးပြု၍ရနိုင်မည့်အရာတစ်ခုကို ရွေးချယ်ပါ။ အကယ်၍ သင်သည် ကျောင်းတွင်ပါဝင်လာသည်မှာ အချိန်အတန်ကြာပြီဆိုလျှင် ယင်းကို သင့်ဓမ္မအမှုအတွက်တက်လှမ်းစရာနှင့် ထပ်ဆင့်အရည်အသွေးတိုးတက်စရာ အခွင့်အလမ်းအဖြစ် ရှုမြင်ပါ။

သီအိုကရက်တစ်ဓမ္မအမှုကျောင်းကြီးကြပ်မှူးက ဇာတ်အိမ်ပေးထားလျှင် စိန်ခေါ်ချက်ကိုလက်ခံပါ။ ဇာတ်အိမ်အများစုသည် သက်သေခံခြင်းနှင့်ပတ်သက်သည်။ ဖော်ပြပါအခြေအနေများအောက်တွင် သင်တစ်ခါမျှသက်သေမခံခဲ့ဖူးပါက အတွေ့အကြုံရှိကြေညာသူများနှင့်ဆွေးနွေးကာ အကြံဉာဏ်များရယူပါ။ ဖြစ်နိုင်မည်ဆိုလျှင် သင်၏တာဝန်ကျအကြောင်းအရာကို ကျောင်းတွင် သင်အသုံးပြုမည့်ဇာတ်အိမ်မျိုးဖြင့် ဆွေးနွေးကြည့်ရန်ကြိုးစားပါ။ ယင်းသို့ပြုခြင်းက သင့်လေ့ကျင့်မှု၏ အရေးကြီးသောရည်မှန်းချက်ကို အထမြောက်စေရန် သင့်အား ကူညီပေးမည်။

ဟောပြောချက်တစ်ခုပုံစံဖြင့် တင်ဆက်ရမည့်အခါ

သင်သည်အမျိုးသားဖြစ်လျှင် အသင်းတော်၌ တိုတုတ်သောဟောပြောချက်တစ်ခုတင်ဆက်ရန် တာဝန်ပေးခံရနိုင်သည်။ ယင်းဟောပြောချက်များကို ပြင်ဆင်ရာတွင် ဆင်ခြင်သုံးသပ်ဖို့လိုသည့် အခြေခံအချက်များသည် ဖော်ပြထားပြီးဖြစ်သော သရုပ်ပြခန်းပုံစံ ကျောင်းသားတာဝန်များပါအချက်များနှင့် အတူတူပင်ဖြစ်သည်။ အဓိကကွဲပြားခြားနားချက်များမှာ ပရိသတ်နှင့် တင်ဆက်သည့်နည်းတို့ဖြစ်သည်။

ပရိသတ်ရှိယောက်စီတိုင်း ယင်းမှအကျိုးရရှိစေရန် မိမိ၏အကြောင်းအရာကို ပြင်ဆင်လိုခြင်းမှာ သဘာဝဆန္ဒဖြစ်သည်။ တက်ရောက်လာသူအများစုသည် အခြေခံကျမ်းစာအမှန်တရားများကို သိနှင့်ထားကြသည်။ သင်ဟောပြောဖို့တာဝန်ကျသည့်အကြောင်းနှင့် သူတို့ကောင်းစွာရင်းနှီးနေပေမည်။ သင့်အကြောင်းအရာနှင့်ပတ်သက်၍ သူတို့အဘယ်အရာသိထားနှင့်ကြောင်းကို ထည့်တွက်စဉ်းစားပါ။ သင့်တင်ဆက်မှုမှ တစ်နည်းနည်းဖြင့် သူတို့အကျိုးရသွားစေရန် ကြိုးပမ်းအားထုတ်ပါ။ သင့်ကိုယ်သင်ဤသို့မေးစမ်းကြည့်ပါ– ‘ယေဟောဝါကို ပုဂ္ဂိုလ်တစ်ဦးအဖြစ် မိမိကိုယ်တိုင်နဲ့ ပရိသတ်တို့ရဲ့လေးမြတ်မှုကို သာ၍နက်ရှိုင်းအောင် မိမိရဲ့အကြောင်းအရာကို ဘယ်လိုအသုံးပြုနိုင်မလဲ။ အကြောင်းအရာတွေထဲမှာ ဘုရားသခင့်အလိုတော်ကို ပိုင်းခြားသိမြင်ဖို့ ကျွန်ုပ်တို့အားကူညီမည့် အဘယ်အရာပါရှိသလဲ။ ဇာတိလိုအင်များဖြင့်လွှမ်းမိုးနေတဲ့ လောကအလယ်မှာ ယုံကြည်အားထားရတဲ့ ဆုံးဖြတ်ချက်များချဖို့ ဒီအကြောင်းအရာက ကျွန်ုပ်တို့ကိုဘယ်လိုကူညီနိုင်မလဲ။’ (ဧ. ၂:၃) ထိုမေးခွန်းများ၏ ကျေနပ်ဖွယ်အဖြေများရရန် သုတေသနပြုဖို့လိုအပ်သည်။ သမ္မာကျမ်းစာကိုအသုံးပြုနေချိန်တွင် ကျမ်းပိုဒ်များဖတ်ရုံမျှထက်မက ပိုပြုလုပ်ရန် ကြိုးပမ်းအားထုတ်ပါ။ သင်အသုံးပြုသည့်ကျမ်းစာအပေါ် ကျိုးကြောင်းဆင်ခြင်ပြီး ကောက်ချက်များဆွဲထုတ်ရန်အတွက် အခြေခံအကြောင်းရင်းကို ယင်းတို့က မည်သို့ပေးကြောင်း ပြသပါ။ (တ. ၁၇:၂၊ ၃) အကြောင်းအရာမများစေပါနှင့်။ မှတ်မိလွယ်စေမည့်နည်းဖြင့် သင့်အကြောင်းအရာကိုတင်ဆက်ပါ။

ပြင်ဆင်ခြင်းတွင် သင့်ဟောပြောပုံကိုဂရုစိုက်ခြင်းလည်း ပါဝင်သင့်သည်။ ယင်းကို ပေါ့ပေါ့သဘောမထားပါနှင့်။ သင့်ဟောပြောချက်ကို ကောင်းကောင်းကြားနိုင်လောက်အောင်ပေးရန် လေ့ကျင့်ပါ။ အမျိုးမျိုးသော စကားပြောအရည်အချင်းများဆိုင်ရာ သွန်သင်ချက်ကို လေ့လာကာအသုံးချရန် သင့်ကြိုးပမ်းအားထုတ်မှုသည် သင်၏တိုးတက်မှုကို များစွာထောက်ကူမည်။ သင်သည် ဟောပြောခါစတစ်ဦးဖြစ်စေ သို့မဟုတ် အတွေ့အကြုံရှိပြီးသူဖြစ်စေ မိမိအကြောင်းအရာနှင့်သင့်လျော်သည့် ယုံကြည်စိတ်ချမှု၊ ခံစားမှုတို့ဖြင့် ဟောပြောနိုင်ရန် ကောင်းကောင်းပြင်ဆင်ပါ။ ကျောင်း၌တာဝန်တစ်ခုစီကို သင်လုပ်ဆောင်စဉ် ဘုရားပေးလက်ဆောင်ဖြစ်သည့် စကားပြောစွမ်းရည်ကိုအသုံးပြုခြင်းမှာ ယေဟောဝါအားဂုဏ်တင်ရန်ဟူသည့် ရည်မှန်းချက်ကို စိတ်တွင်စွဲမှတ်ထားပါလေ။—ဆာ. ၁၅၀:၆။

အသင်းတော်တစ်ခုလုံးအကျိုးရရန် သီအိုကရက်တစ်ဓမ္မအမှုကျောင်းအစီအစဉ်ကို ပြင်ဆင်ပေးထားသည်။ အခြားသောအသင်းတော်အစည်းအဝေးများအပြင် စည်းဝေးပွဲများနှင့် စည်းဝေးကြီးများ၌ အဖိုးမဖြတ်နိုင်သော သတင်းအချက်အလက်ကိုလည်း တင်ဆက်ပေးသည်။ ယင်းအစီအစဉ်များတွင် ကဏ္ဍတစ်ခုကို တာဝန်ပေးခံရပါက သင်သည် ကြီးလေးသောတာဝန်တစ်ခု ပေးအပ်ခံရခြင်းဖြစ်သည်။ ခရစ်ယာန်ကြီးကြပ်မှူးတိမောသေအား မိမိ၏သွန်သင်ခြင်း၌အမြဲသတိပြုနေရန် တမန်တော်ပေါလုတိုက်တွန်းခဲ့သည်။ (၁ တိ. ၄:၁၆) ခရစ်ယာန်အစည်းအဝေးများ၌ တက်ရောက်လာသူတို့သည် တန်ဖိုးရှိအချိန်ကို သီးသန့်ဖယ်ထားကြပြီး—အချို့မူ များစွာကြိုးပမ်းအားထုတ်ခဲ့ကြရပြီး ဘုရားသခင်နှင့် သူတို့ဆက်ဆံရေးနှင့်သက်ဆိုင်သော ကိစ္စရပ်များအတွက် ညွှန်ကြားမှုခံယူရန် တက်ရောက်လာကြခြင်းဖြစ်သည်။ ထိုကဲ့သို့သွန်သင်ချက်ပေးရခြင်းက အမှန်ပင် ခမ်းနားသောအခွင့်ထူးတစ်ခု ဖြစ်ပေသည်! ယင်းကို သင် မည်သို့သင့်လျော်စွာ ကိုင်တွယ်နိုင်မည်နည်း။

ကျမ်းစာဖတ်ရှုခြင်းမှ ပေါ်လွင်ချက်များ

ကျောင်း၏ ဤကဏ္ဍကို အပတ်အတွက် သတ်မှတ်ပေးထားသည့် ကျမ်းစာဖတ်ရှုခြင်းအပေါ် အခြေခံသည်။ အကြောင်းအရာက ယနေ့ကျွန်ုပ်တို့အား မည်သို့အကျိုးသက်ရောက်စေပုံကို အလေးပေးတင်ပြသင့်သည်။ နေဟမိ ၈:၈ တွင် မှတ်တမ်းတင်ထားသည့်အတိုင်း ဧဇရနှင့် သူ၏အပေါင်းအဖော်များသည် ဘုရားသခင့်နှုတ်ကပါဌ်တော်မှ လူထုရှေ့ဖတ်ရွတ်ခြင်း၊ ရှင်းပြခြင်း၊ ‘အနက်ကိုပြန်ခြင်း’ နှင့် နားလည်စေခြင်းငှာပြုခဲ့ကြသည်။ ကျမ်းစာပေါ်လွင်ချက်များကို သင်ကိုင်တွယ်ခြင်းတွင် ထိုသို့ပြုလုပ်ရန်အခွင့်အလမ်းရစေသည်။

ထိုသို့သောတာဝန်ကို သင်မည်သို့ပြင်ဆင်သင့်သနည်း။ ဖြစ်နိုင်လျှင် တာဝန်ရထားသည့်ကျမ်းစာအပိုင်းကို တစ်ပတ်၊ တစ်ပတ်ထက်မက ကြိုတင်ဖတ်ရှုပါ။ ထို့နောက် အသင်းတော်နှင့် ယင်း၏လိုအပ်ရာများကို စဉ်းစားကြည့်ပါ။ ၎င်းအတွက်ဆုတောင်းပါ။ ဘုရားသခင့်နှုတ်ကပါဌ်တော်၏ ဤအပိုင်း၌ အဘယ်သွန်သင်ချက်၊ အဘယ်ဥပမာများ၊ အဘယ်မူများက ထိုလိုအပ်ရာများနှင့်အကိုက်ဖြစ်သနည်း။

သုတေသနပြုမှုသည် မရှိမဖြစ်လိုအပ်သည်။ စီဒီရွမ်ကင်းမျှော်စင်စာကြည့်တိုက် သို့မဟုတ် ကင်းမျှော်စင်စာပေများအညွှန်းတို့ကို သင့်ဘာသာစကားဖြင့် ရနိုင်သလော။ ရနိုင်ပါက၊ ၎င်းတို့ကို ကောင်းစွာအသုံးချပါလေ။ အဓိကအာရုံစိုက်ရန် သင်ရွေးချယ်ထားသည့် အခန်းငယ်များဆိုင်ရာ ရှင်းပြထုတ်ဝေထားပြီးခဲ့ရာကို သုတေသနပြုခြင်းအားဖြင့် ဉာဏ်အလင်းပေးသည့် အကြောင်းအရာနောက်ခံ၊ ပရောဖက်ပြုချက်များပြည့်စုံမှု၏ရှင်းလင်းချက်များ၊ ယေဟောဝါအကြောင်း အဘယ်ကျမ်းပိုဒ်များက ဖော်ပြသည်ကို ဆန်းစစ်တင်ပြထားမှုများ သို့မဟုတ် အခြေခံမူဆွေးနွေးချက်များကို သင်တွေ့ရှိပေမည်။ အချက်အလက်များများထည့်ဖို့ မကြိုးစားပါနှင့်။ ရွေးချယ်ထားသည့်အခန်းငယ် အနည်းငယ်ပေါ်တွင်သာ အာရုံစူးစိုက်ပါ။ အခန်းငယ်အနည်းငယ်ကို ခြုံငုံမိစေပြီး ကောင်းစွာရှင်းလင်းတင်ဆက်ခြင်းသည် သာ၍ကောင်းသည်။

သင့်တာဝန်သည် ပရိသတ်အား ပတ်စဉ်ကျမ်းစာဖတ်ရှုခြင်းမှ သူတို့ မည်သို့အကျိုးရရှိခဲ့ကြောင်း မှတ်ချက်ပေးရန် ဖိတ်ခေါ်ဖို့လည်းလိုပေမည်။ မိမိတို့ကိုယ်ပိုင်နှင့်မိသားစုလေ့လာမှု သို့မဟုတ် မိမိတို့ဓမ္မအမှု သို့မဟုတ် မိမိတို့အသက်လမ်းတွင် အကျိုးရစေမည့်အဘယ်အရာကို သူတို့တွေ့ရှိခဲ့ကြသနည်း။ လူများ၊ နိုင်ငံများနှင့် ကိုယ်တော်ဆက်ဆံမှုများတွင် ယေဟောဝါ၏အဘယ်အရည်အသွေးများ ပေါ်လွင်ထင်ရှားခဲ့သနည်း။ သူတို့၏ယုံကြည်ခြင်းကိုခိုင်ခံ့စေပြီး ယေဟောဝါအား တန်ဖိုးထားလေးမြတ်မှု တည်ဆောက်ပေးသည့်အဘယ်အရာကို ပရိသတ် သိရှိခဲ့ကြသနည်း။ အသေးစိတ်ကျကာ ရှုပ်ထွေးသည့်အချက်များဖြင့် အချိန်ကုန်ခံမနေပါနှင့်။ အဓိပ္ပာယ်နှင့် ရွေးချယ်ထားသည့် အချက်များ၏ လက်တွေ့ကျသောတန်ဖိုးကို အလေးပေးပါ။

သွန်သင်ခြင်းဟောပြောချက်

၎င်းသည် ကင်းမျှော်စင် သို့မဟုတ် နိုးလော့!ရှိဆောင်းပါးတစ်ပုဒ် သို့မဟုတ် စာအုပ်တစ်အုပ်၏အပိုင်းတစ်ပိုင်း အစရှိသည့် ထုတ်ဝေထားသည့်အကြောင်းအရာပေါ် အခြေပြုပေမည်။ များသောအားဖြင့် သတ်မှတ်ထားသောအချိန်အတွက် အကြောင်းအရာ လိုသည်ထက်ပိုရှိပါသည်။ ထိုတာဝန်ကို သင်မည်သို့ကိုင်တွယ်သင့်သနည်း။ သွန်သင်သူတစ်ယောက်အနေဖြင့် အကြောင်းအရာကို ငုံမိရုံသာပြုသောသူကဲ့သို့ မဖြစ်ရပါ။ ကြီးကြပ်မှူးတစ်ဦးသည် “ဆုံးမသြဝါဒပေးတတ်သူ” ဖြစ်ရမည်။—၁ တိ. ၃:၂။

သင်၏ပြင်ဆင်မှုကို တာဝန်ကျအကြောင်းအရာလေ့လာခြင်းဖြင့် စတင်ပါ။ ကျမ်းချက်များကို ဖွင့်ဖတ်ပါ။ တွေးတောဆင်ခြင်ပါ။ ဟောပြောသည့်ရက်မတိုင်ခင် ကြိုတင်၍ ကောင်းစွာပြုလုပ်ရန် ကြိုးပမ်းပါ။ ဟောပြောချက်ကိုအခြေပြုထားသော ထုတ်ဝေပြီးအကြောင်းအရာကို ကြိုတင်ဖတ်ရှုဖို့ ညီအစ်ကိုများ အားပေးခံထားရကြောင်း စိတ်တွင်စွဲမှတ်ထားပါ။ သင့်တာဝန်သည် ယင်းကိုပြန်လည်သုံးသပ်ရုံ သို့မဟုတ် အကျဉ်းချုပ်တင်ပြရုံသက်သက်မဟုတ်ဘဲ ယင်းကို မည်သို့ကျင့်သုံးရမည်ကို ပြသရန်ဖြစ်သည်။ အသင်းတော်ကို အမှန်ပင်အကျိုးရစေမည့်နည်းဖြင့် အကြောင်းအရာ၏ သင့်လျော်သောအစိတ်အပိုင်းများကို အသုံးပြုပါ။

ကလေးတိုင်းတွင် မိမိတို့ကိုယ်ပိုင်အရည်အသွေးရှိကြသကဲ့သို့ပင် အသင်းတော်တစ်ခုစီတွင်လည်း ထူးခြားသည့်စရိုက်ရှိကြသည်။ ထိရောက်စွာသွန်သင်သည့်မိဘတစ်ဦးသည် မိမိကလေးကို ကျင့်ဝတ်စည်းမျဉ်းများအား အလွတ်ရွတ်ပြရုံသာပြုမည်မဟုတ်ပါ။ သူသည် ကလေးနှင့်အတူ ကျိုးကြောင်းဆင်ခြင်သည်။ သူသည် ကလေး၏အရည်အသွေးနှင့် ကလေးရုန်းကန်နေရသော အခက်အခဲများကို ထည့်တွက်စဉ်းစားသည်။ ထိုနည်းထပ်တူပင် အသင်းတော်ရှိသွန်သင်သူများသည် မိမိတို့ ဟောပြောနေသည့်အုပ်စု၏လိုအပ်ရာများကို နားလည်ကာဖြေရှင်းပေးဖို့ ကြိုးပမ်းအားထုတ်ကြသည်။ သို့သော် ပိုင်းခြားသိမြင်မှုရှိသောသွန်သင်သူတစ်ဦးသည် ပရိသတ်ရှိတစ်စုံတစ်ယောက်အား အရှက်ရစေနိုင်သည့်ဥပမာများအသုံးပြုခြင်းကို ရှောင်ကြဉ်မည်။ သူသည် ယေဟောဝါ၏နည်းလမ်းတော်တွင် လျှောက်လှမ်းခြင်း၏ရလဒ်တစ်ခုအနေနှင့် ခံစားနေရသည့် အကျိုးကျေးဇူးများကို ထောက်ပြမည်ဖြစ်ပြီး သူတို့ရင်ဆိုင်ရသောပြဿနာများကို အောင်မြင်စွာကိုင်တွယ်ဖြေရှင်းရန် အသင်းတော်အားကူညီမည့် ကျမ်းစာမှသွန်သင်ချက်ကို ပေါ်လွင်စေမည်ဖြစ်သည်။

ကောင်းသောသွန်သင်ခြင်းသည် ပရိသတ်ထဲရှိသူတို့၏နှလုံးကို ထိမိသည်။ ယင်းသည် အချက်အလက်များကိုဖော်ပြရုံမျှသာမက ၎င်းတို့ကိုယ်စားပြုရာအပေါ် တန်ဖိုးထားလေးမြတ်မှုကို တည်ဆောက်ပေးရန်လည်း လိုအပ်ပါသည်။ ယင်းက သွန်သင်မှုခံနေရသူများအတွက် စစ်မှန်သောစိုးရိမ်ကြောင့်ကြပေးမှု လိုအပ်စေသည်။ ဝိညာဉ်ရေးရာသိုးထိန်းများသည် သိုးစုကိုသိသင့်သည်။ သူတို့သည် အသီးသီးရင်ဆိုင်နေရသည့် ပြဿနာများကို မေတ္တာပါစွာ စိတ်တွင်စွဲမှတ်ပါက နားလည်မှု၊ သနားကြင်နာမှုနှင့် စာနာမှုပြသလျက် အားတက်သရောဟောပြောနိုင်ပေမည်။

ထိရောက်သောသွန်သင်သူများ သိကြသည့်အတိုင်း ဟောပြောချက်တစ်ခုတွင် အတိအကျသတ်မှတ်ထားသည့် ရည်မှန်းချက်တစ်ခုရှိထားရမည်။ သော့ချက်များသည်ပေါ်လွင်ကာ မှတ်မိစေမည့်နည်းဖြင့် အကြောင်းအရာကို တင်ဆက်သင့်သည်။ ပရိသတ်သည် မိမိတို့အသက်တာအား အကျိုးသက်ရောက်စေမည့် လက်တွေ့ကျသော သဘောတရားများကို မှတ်မိနိုင်စေသင့်သည်။

လုပ်ငန်းတော်အစည်းအဝေး

သင်သည် ကျွန်ုပ်တို့၏နိုင်ငံတော်ဓမ္မအမှုမှ ဆောင်းပါးတစ်ပုဒ်ကိုအခြေပြုထားသည့် ဟောပြောချက်တစ်ခုပေးသောအခါ စိန်ခေါ်ချက်သည် တစ်မူကွဲပြားပေမည်။ ဤတွင် သင်သည် အသင့်လျော်ဆုံးအရာကို ရွေးချယ်ရန်မဟုတ်ဘဲ ပေးထားသည့်အကြောင်းအရာကို ပရိသတ်ထံ ပြည့်ပြည့်ဝဝတင်ပြရန် တောင်းဆိုခံရလေ့ရှိသည်ကို တွေ့ရမည်။ ပေးသည့်မည်သည့်သွန်သင်ချက်မဆိုအတွက် အခြေခံဖြစ်သောကျမ်းစာအပေါ် ကျိုးကြောင်းဆင်ခြင်ရန် ပရိသတ်ကိုကူညီပေးပါ။ (တိ. ၁:၉) အချိန်ကန့်သတ်ထားရာ များသောအားဖြင့် ထပ်ဆင့်အကြောင်းအရာကို ထည့်ပြောချိန်မရှိချေ။

တစ်ဖက်တွင်မူ သင်သည် ကျွန်ုပ်တို့၏နိုင်ငံတော်ဓမ္မအမှုတွင် ဆောင်းပါးမပါသည့် အကြောင်းအရာကိုတင်ဆက်ရန် တာဝန်ပေးခံရပေမည်။ ကင်းမျှော်စင် ဆောင်းပါးတစ်ခုကို ညွှန်းပေးထားပေမည် သို့မဟုတ် တာဝန်တွင် တိုတုတ်သောမှတ်စုအနည်းငယ်ပါဝင်ပေမည်။ သွန်သင်သူတစ်ယောက်အနေဖြင့် တာဝန်ကျအကြောင်းအရာနှင့်ဆက်နွှယ်လျက်ရှိသော အသင်းတော်လိုအပ်ရာများကိုသုံးသပ်ရန်မှာ သင့်တာဝန်ဖြစ်သည်။ တိုတုတ်၍လိုရင်းရောက်သည့် ပုံဥပမာတစ်ခုကို အသုံးပြုရန် သို့မဟုတ် သင့်လျော်သော တွေ့ကြုံမှုတစ်ခုကိုပြောပြပေးဖို့ လိုပေမည်။ သင့်တာဝန်သည် ထိုအကြောင်းကို ဟောပြောရန်သာမကဘဲ ဘုရားသခင့်နှုတ်ကပါဌ်တော်မှ ပြဋ္ဌာန်းထားသည့်အလုပ်ကို ပြီးမြောက်စေရန်နှင့် ယင်းကိုလုပ်ဆောင်ခြင်း၌ ရွှင်လန်းမှုရရန် အသင်းတော်အား အကူအညီပေးသည့်နည်းဖြင့် ၎င်းကိုကိုင်တွယ်ရန်ဖြစ်ကြောင်း သတိရပါ။—တ. ၂၀:၂၀၊ ၂၁။

သင့်တာဝန်ကိုပြင်ဆင်စဉ် အသင်းတော်သားများ၏အခြေအနေများလည်း ထည့်စဉ်းစားပါ။ သူတို့လုပ်ဆောင်နေပြီးဖြစ်ရာအတွက် သူတို့အားချီးမွမ်းပါ။ တာဝန်ကျအကြောင်းအရာတွင်ပေးထားသည့် အကြံပြုချက်များကို သူတို့ကျင့်သုံးခြင်းက ဓမ္မအမှုတွင် သူတို့၏ထိရောက်မှုနှင့် ရွှင်လန်းမှုကို မည်သို့တိုးပွားစေနိုင်မည်နည်း။

သင့်တာဝန်တွင် သရုပ်ပြတစ်ခု သို့မဟုတ် လူတွေ့မေးမြန်းခန်းတစ်ခု လိုအပ်သလော။ ထိုသို့ဆိုလျှင် ၎င်းကိုကောင်းစွာ ကြိုတင်စီစဉ်သင့်သည်။ ယင်းအတွက် စီစဉ်ဆောင်ရွက်ပေးရန် တစ်စုံတစ်ယောက်ကို လွယ်လွယ်နှင့်တောင်းဆိုလိုက်လိုစိတ် ပေါ်နိုင်ပေသည်၊ သို့သော် ယင်းသို့ပြုခြင်းက အကောင်းဆုံးရလဒ်များကို အမြဲမပေါ်ထွက်စေပါ။ အတတ်နိုင်ဆုံး သရုပ်ပြ သို့မဟုတ် လူတွေ့မေးမြန်းခန်းကို စည်းဝေးရက်မတိုင်မီ အစမ်းလေ့ကျင့်ပါ။ ဤသင့်အပိုင်းကဏ္ဍအား ပေးထားသည့်ညွှန်ကြားချက်ကို အမှန်အားဖြည့်ပေးသည့်နည်းဖြင့် ကိုင်တွယ်ကြောင်းသေချာစေပါ။

စည်းဝေးပွဲများနှင့် စည်းဝေးကြီးများ

ကောင်းမွန်သောဝိညာဉ်ရေးရာ အရည်အချင်းများတွင် တိုးတက်ကြသည့်ညီအစ်ကိုများနှင့် ထိရောက်သောလူထုဟောပြောချက်ပေးသူ၊ သွန်သင်သူများ ဖြစ်လာသည့်ညီအစ်ကိုများသည် အချိန်တန်သော် စည်းဝေးပွဲတစ်ခု သို့မဟုတ် စည်းဝေးကြီးတစ်ခု၌ အစီအစဉ်တွင်ပါဝင်ရန် တောင်းဆိုခြင်းခံရပေမည်။ ယင်းတို့သည် သီအိုကရက်တစ်ပညာရေးအတွက် အမှန်ပင် အထူးအခါသမယများဖြစ်သည်။ ယင်းကဲ့သို့သောတာဝန်သည် စာမူတစ်ခု၊ အောက်လိုင်းတစ်ခု၊ သမ္မာကျမ်းစာပြဇာတ်တစ်ခုအတွက် ခေတ်သစ်နှင့်သက်ဆိုင်သည့် ညွှန်ကြားချက်များ၊ သို့မဟုတ် ညွှန်ကြားချက်စာပိုဒ်တစ်ခု ဖြစ်ပေမည်။ ဤကဲ့သို့သောအစီအစဉ်တွင် လုပ်ဆောင်ရန်အခွင့်အရေးရရှိပါက သင့်အား ပေးထားသည့်အကြောင်းအရာကို ဂရုတစိုက်လေ့လာပါ။ ယင်း၏တန်ဖိုးကို နားလည်သဘောပေါက်သည်အထိ လုပ်ဆောင်ပါ။

စာမူဟောပြောချက်တစ်ခုတာဝန်ပေးခံရသော သူတို့သည် အကြောင်းအရာကို လုံးကောက်ဖတ်ပြသင့်သည်။ သူတို့သည် အကြောင်းအရာကို စကားလုံးပြန်စီခြင်း သို့မဟုတ် အစီအစဉ်ပြုပြင်ခြင်း မပြုကြပါ။ သူတို့သည် အဓိကအချက်များနှင့် ယင်းတို့အား အဆင့်ဆင့်ရှင်းလင်းတင်ပြထားပုံတို့ကို ရှင်းလင်းစွာပိုင်းခြားသိမြင်ရန် ၎င်းကို လေ့လာကြသည်။ သူတို့သည် လျောက်ပတ်စွာ အဓိပ္ပာယ်ပေါ်လွင်အောင်ဖတ်ခြင်း၊ စိတ်အားထက်သန်မှု၊ လှိုက်လှဲပျူငှာမှု၊ ခံစားမှု၊ ထက်သန်မှုနှင့် ယုံကြည်စိတ်ချမှုအပြင် ကြီးမားသည့်ပရိသတ်အတွက် ဟောပြောချက်ကို သင့်လျော်သောအသံပမာဏနှင့် စိတ်ပြင်းပြမှုတို့ဖြင့် ဟောပြောနိုင်သည်အထိ အသံထွက်ဖတ်ရှုခြင်းကို လေ့ကျင့်ကြသည်။

ဟောပြောချက်အောက်လိုင်း တာဝန်ပေးခံရသော ညီအစ်ကိုများသည် အောက်လိုင်းနှင့်နီးကပ်စွာ မိမိတို့၏အကြောင်းအရာကို အဆင့်ဆင့်ရှင်းလင်းသွားဖို့တာဝန်ရှိသည်။ ဟောပြောချက်ပေးချိန်အတောအတွင်း အောက်လိုင်းမှဖတ်ပြခြင်း သို့မဟုတ် ယင်းကို စာမူပုံစံဖြင့် ပြင်ဆင်ခြင်းပြုမည့်အစား ဟောပြောသူသည် အကြောင်းအရာကို နှလုံးမှနေ၍ လက်တန်းတင်ဆက်သင့်သည်။ ဖော်ပြထားသည့်အဓိကအချက်တစ်ချက်စီကို ရှင်းလင်းစွာတင်ဆက်နိုင်ရန် အောက်လိုင်းတွင်ပေးထားသည့်အချိန်ကို အနီးကပ်လိုက်ခြင်းသည် အရေးကြီးသည်။ ဟောပြောသူသည် အဓိကအချက်များအောက်တွင် ဖော်ပြထားသည့်အယူအဆများနှင့် ကျမ်းချက်များကို ကောင်းစွာအသုံးပြုသင့်သည်။ သူသည် အောက်လိုင်းတွင်ပေးထားသည့် အချက်များကို ချန်ပြီး မိမိကြိုက်နှစ်သက်ရာအချက်များ ထည့်သွင်းခြင်းကို မပြုလုပ်သင့်ပေ။ မှန်ပါသည်၊ သွန်သင်ခြင်း၏အခြေခံအုတ်မြစ်သည် ဘုရားသခင့်နှုတ်ကပါဌ်တော်ဖြစ်သည်။ ခရစ်ယာန်အကြီးအကဲများ၏တာဝန်မှာ ‘နှုတ်ကပါဌ်တော်ကိုဟောပြော’ ရန်ဖြစ်သည်။ (၂ တိ. ၄:၁၊ ၂) ထို့ကြောင့် ဟောပြောသူသည် အောက်လိုင်းရှိကျမ်းချက်များကို အထူးအာရုံစိုက်သင့်သည်—ယင်းတို့ကို ကျိုးကြောင်းဆင်ခြင်ပြီး သက်ဆိုင်မှုကို တင်ပြရန်ဖြစ်သည်။

မဖင့်နွှဲပါနှင့်

ဟောပြောရန်အခွင့်အရေးများစွာရသည့် အသင်းတော်တစ်ခုတွင် သင်အမှုထမ်းဆောင်နေသလော။ ယင်းတို့အားလုံးကို သင်မည်သို့ကျေပွန်စွာ ဆောင်ရွက်နိုင်မည်နည်း။ သင့်အပိုင်းကဏ္ဍများအား အနီးကပ်မှပြင်ဆင်ခြင်းကို ရှောင်ပါ။

အသင်းတော်ကိုအမှန်အကျိုးရစေမည့် ဟောပြောချက်များသည် လုံလုံလောက်လောက် ကြိုတင်စဉ်းစားထားရန်လိုသည်။ သို့ဖြစ်၍ တာဝန်တစ်ခုရသည်နှင့် အကြောင်းအရာကို ဖတ်ရှုသည့်အလေ့အကျင့် ပြုလုပ်ပါ။ ယင်းသို့ပြုခြင်းက အခြားလုပ်ဆောင်မှုများကိုလုပ်ဆောင်ရင်း ထိုအကြောင်း ကောင်းစွာတွေးတောခွင့်ရစေသည်။ ဟောပြောချက်မပေးခင်ရက်များ၊ အပတ်များအတွင်း ထိုအချက်အလက်ကို အကောင်းဆုံး မည်သို့အသုံးချနိုင်ကြောင်းတွေ့ မြင်ရန် ထောက်ကူသည့်မှတ်ချက်များကို သင်ကြားရပေမည်။ ၎င်း၏အခန့်သင့်မှုကိုဖော်ပြသည့် အခြေအနေများ ပေါ်ပေါက်လာပေမည်။ သင်တာဝန်ရရှိပြီးသည်နှင့် ယင်းကို ချက်ချင်းဖတ်ရှုတွေးတောခြင်းအတွက် အချိန်ကုန်သော်လည်း ယင်းသည် အကျိုးရှိရှိအသုံးချသောအချိန်ဖြစ်သည်။ နောက်ဆုံး သင်သည် အောက်လိုင်းကို အဆင့်ဆင့်တည်ဆောက်ဖို့ ထိုင်လိုက်သောအခါ၊ ကောင်းစွာကြိုတင်ပြင်ဆင်ထားခြင်း၏ အကျိုးကျေးဇူးများကို ရရှိပါလိမ့်မည်။ ထိုနည်းဖြင့် တာဝန်များကိုကိုင်တွယ်ခြင်းက ဖိစီးမှုကို ကြီးမားစွာလျော့ပေါ့စေမည်ဖြစ်ပြီး လက်တွေ့ကျ၍ အသင်းတော်၌ရှိသောသူများ၏နှလုံးထဲ ရောက်သွားစေသည့်နည်းဖြင့် အကြောင်းအရာကို တင်ဆက်ရန် သင့်အား ကူညီပေးမည်ဖြစ်သည်။

မိမိလူမျိုးတော်အတွက် ယေဟောဝါ၏ပညာရေးအစီအစဉ်နှင့်ဆက်စပ်ပြီး သင့်အားအပ်နှင်းထားသည့်ဆုကျေးဇူးကို တန်ဖိုးထားလေးမြတ်သည့်အတိုင်းအတာအထိ သင်သည် ကိုယ်တော်အားဂုဏ်တင်မည်ဖြစ်ကာ ကိုယ်တော်အားချစ်မြတ်နိုးသူတို့အတွက် ကောင်းချီးတစ်ရပ်ဖြစ်ပေလိမ့်မည်။—ဟေရှာ. ၅၄:၁၃; ရော. ၁၂:၆-၈။

အပတ်စဉ် ယေဟောဝါသက်သေများ၏ အသင်းတော်အများစုသည် ကျမ်းစာပါအကြောင်းတစ်ခုနှင့်ပတ်သက်သည့် လူထုဟောပြောချက်တစ်ခုကို စီစဉ်ကြသည်။ သင်သည်အကြီးအကဲတစ်ဦး သို့မဟုတ် ဓမ္မအမှုထမ်းတစ်ဦးဖြစ်လျှင် သင်သည် ထိရောက်သောလူထုဟောပြောချက်ပေးသူ၊ သွန်သင်သူတစ်ဦးဖြစ်ကြောင်း ထင်ရှားပြသလော။ ထိုသို့ဆိုလျှင် သင်သည် လူထုဟောပြောချက်ပေးရန် တာဝန်ပေးခံရပေမည်။ သီအိုကရက်တစ်ဓမ္မအမှုကျောင်းသည် ထောင်သောင်းမကသောညီအစ်ကိုများကို ဤလုပ်ငန်းတော်အခွင့်ထူးအတွက် အရည်အချင်းပြည့်မီရန်ကူညီပေးခဲ့ပြီ။ လူထုဟောပြောချက်ပေးရန်တာဝန်ကျသည့်အခါ မည်သည့်နေရာမှစတင်သင့်သနည်း။

အောက်လိုင်းကိုလေ့လာပါ

မည်သည့်ရှာဖွေမှုမျှ မပြုလုပ်မီ အောက်လိုင်းကိုဖတ်ရှုပြီး ၎င်းကို သဘောပေါက်သည်အထိ ဆင်ခြင်တွေးတောပါ။ ဟောပြောချက်၏ခေါင်းစီးဖြစ်သော အဓိကအကြောင်းကို စိတ်ထဲထားပါ။ ပရိသတ်အား သင်သွန်သင်ပေးမည့်အရာကား အဘယ်နည်း။ သင့်ရည်မှန်းချက်ကားအဘယ်နည်း။

အဓိကခေါင်းစဉ်များနှင့်ရင်းနှီးလာစေပါ။ ယင်းအဓိကအချက်များကို ဆန်းစစ်လေ့လာပါ။ တစ်ခုစီသည် အဓိကအကြောင်းနှင့်မည်သို့ဆက်နွှယ်နေသနည်း။ အဓိကအချက်တစ်ချက်စီအောက်၌ အချက်ငယ်များစွာကို ဖော်ပြထားသည်။ အချက်ငယ်များအား ထောက်မသည့်အချက်များကို ယင်းအချက်ငယ်တို့အောက်တွင်တင်ပြထားသည်။ အောက်လိုင်း၏အပိုင်းတစ်ခုစီသည် ရှေ့အကြောင်းပေါ်တွင်တည်ဆောက်ထားပုံ၊ နောက်အပိုင်းဆီသို့ ဦးတည်ပေးပုံနှင့် ဟောပြောချက်၏ရည်မှန်းချက်ကို အထမြောက်စေပုံတို့ကို သုံးသပ်ပါ။ အဓိကအကြောင်း၊ ဟောပြောချက်၏ရည်မှန်းချက်နှင့် ထိုရည်မှန်းချက်ကို အဓိကအချက်များက မည်သို့အထမြောက်စေပုံတို့ကို နားလည်သည့်အခါတွင် သင်သည် အကြောင်းအရာကို စတင်တည်ဆောက်သွားရန် အဆင်သင့်ဖြစ်နေလေပြီ။

ရှေးဦးစွာ သင်၏ဟောပြောချက်ကို အဓိကအချက်တစ်ချက်စီပါသည့် ဟောပြောချက်အတိုလေးခု သို့မဟုတ် ငါးခုအဖြစ်ယူမှတ်ခြင်းသည် အကူအညီဖြစ်ကြောင်း သင်တွေ့ရှိရပေမည်။ ယင်းတို့ကို တစ်ကြိမ်လျှင်တစ်ချက် ပြင်ဆင်ပါ။

ပေးထားသည့်အောက်လိုင်းသည် ပြင်ဆင်ရေးကိရိယာတစ်ခုဖြစ်သည်။ သင် ပေးမည့်ဟောပြောချက်၏မှတ်စုများအဖြစ် ယင်းကိုအသုံးပြုရန် မရည်ရွယ်ပါ။ ယင်းသည်အရိုးစုတစ်စုကဲ့သို့ဖြစ်၏။ ၎င်းအပေါ် အသားဖြည့်ပေး၊ နှလုံးတစ်ခုပေးပြီး ထွက်သက်ဝင်သက်ထည့်ပေးဖို့ လိုအပ်သည့်အလားဖြစ်ပေမည်။

ကျမ်းစာကိုအသုံးပြုခြင်း

ယေရှုခရစ်နှင့် ကိုယ်တော်၏တပည့်တော်များသည် မိမိတို့၏သွန်သင်ချက်ကို ကျမ်းစာပေါ်၌အခြေပြုခဲ့ကြသည်။ (လု. ၄:၁၆-၂၁; ၂၄:၂၇; တ. ၁၇:၂၊ ၃) ထို့အတူသင်ပြုလုပ်နိုင်ပေသည်။ ကျမ်းစာသည် သင့်ဟောပြောချက်၏အခြေခံဖြစ်သင့်သည်။ ပေးထားသည့်အောက်လိုင်းတွင် ကျိုးကြောင်းဖော်ပြချက်များကို ရှင်းပြရုံ၊ ဆက်စပ်ပြရုံပြုမည့်အစား ကျမ်းစာက ထိုကျိုးကြောင်းဖော်ပြချက်များကို မည်သို့ထောက်မထားကြောင်း ပိုင်းခြားသိမြင်ပါ၊ ထို့နောက် ကျမ်းစာမှသွန်သင်ပါ။

ဟောပြောချက်ကိုပြင်ဆင်သည့်အခါ အောက်လိုင်းတွင် ကိုးကားထားသည့်ကျမ်းချက်တိုင်းကို ဆန်းစစ်ပါ။ အထက်အောက်စကားများကို မှတ်သားပါ။ အချို့သောကျမ်းချက်များသည် နောက်ခံအကြောင်းကို အထောက်အကူပြုရုံသာပြုပေမည်။ ဟောပြောချက်ပေးနေချိန်အတောအတွင်း ယင်းတို့အားလုံးကိုဖတ်ဖို့ သို့မဟုတ် မှတ်ချက်ပေးဖို့မလိုအပ်ချေ။ သင့်ပရိသတ်အတွက် အကောင်းဆုံးအချက်များကို ရွေးချယ်ပါ။ သင်သည် ပုံနှိပ်ထားသည့်အောက်လိုင်းတွင် ကိုးကားထားသည့်ကျမ်းချက်များအပေါ် အာရုံစူးစိုက်ပါက ထပ်ဆင့်ကျမ်းစာရည်ညွှန်းချက်များကိုအသုံးပြုရန် လိုအပ်မည်မဟုတ်ပါ။

သင်၏ဟောပြောချက် အထမြောက်အောင်မြင်မှုသည် အသုံးပြုသည့် ကျမ်းစောင်အရေအတွက်ပေါ်တွင်မဟုတ်ဘဲ သွန်သင်ချက်အရည်အသွေးပေါ်တွင် မူတည်သည်။ ကျမ်းစောင်များကို နိဒါန်းပျိုးသည့်အခါ၌ ယင်းတို့ကို အဘယ်ကြောင့်သုံးကြောင်း ဖော်ပြပါ။ ယင်းတို့ကို ဆက်စပ်တင်ပြရန် အချိန်ပေးပါ။ ကျမ်းတစ်ချက်ကို သင်ဖတ်ရှုပြီးနောက် ကျမ်းချက်ကိုဆွေးနွေးနေစဉ် ကျမ်းစာကိုဆက်ဖွင့်ထားပါ။ သင့်ပရိသတ်လည်း ထပ်တူဖွင့်ထားပေမည်။ သင့်ပရိသတ်၏စိတ်ဝင်စားမှုကို သင်မည်သို့နှိုးဆွနိုင်ပြီး ဘုရားသခင့်နှုတ်ကပါဌ်တော်မှ ပြည့်ပြည့်ဝဝပို၍အကျိုးရရှိအောင် မည်သို့ကူညီနိုင်မည်နည်း။ (နေ. ၈:၈၊ ၁၂) ရှင်းလင်းခြင်း၊ ပုံဥပမာပေးခြင်းနှင့် သက်ဆိုင်ပုံတင်ပြခြင်းတို့ဖြင့် ထိုသို့သင်ပြုလုပ်နိုင်သည်။

ရှင်းလင်းခြင်း။ သော့ချက်တစ်ချက်ကို ရှင်းလင်းရန်ပြင်ဆင်သည့်အခါ သင့်ကိုယ်သင်ဤသို့မေးပါ– ‘ယင်းက ဘာကိုဆိုလိုတာလဲ။ ငါ့ရဲ့ဟောပြောချက်မှာဘာကြောင့် ဒါကိုအသုံးပြုနေတာလဲ။ ဒီအခန်းငယ်နှင့်ပတ်သက်ပြီး ပရိသတ်က သူတို့ကိုယ်သူတို့ ဘာတွေမေးကောင်းမေးနေကြမလဲ။’ အထက်အောက်ကျမ်းစကား၊ နောက်ခံ၊ ပတ်ဝန်းကျင်အခြေအနေ၊ စကားလုံးများ၏အားမာန်၊ မှုတ်သွင်းခံစာရေးသူ၏ရည်စူးချက်တို့ကို ဆန်းစစ်ရန်လိုပေမည်။ ယင်းကသုတေသနပြုဖို့လိုအပ်သည်။ “သစ္စာနှင့်သတိပညာရှိသောကျွန်” မှစီမံပေးထားသည့်စာပေများတွင် မြောက်မြားစွာသောအဖိုးမဖြတ်နိုင်သည့် အချက်အလက်ကို သင်တွေ့ရှိရမည်။ (မ. ၂၄:၄၅-၄၇၊ သမ) ကျမ်းချက်နှင့်စပ်လျဉ်း၍ အလုံးစုံရှင်းပြရန်မကြိုးစားဘဲ ဆွေးနွေးနေသည့်အချက်နှင့် ဆက်စပ်နေသောကျမ်းချက်ကို ပရိသတ်အား သင်အဘယ်ကြောင့် ဖတ်စေရကြောင်းကို ရှင်းပြပါ။

ပုံဥပမာပေးခြင်း။ ပုံဥပမာပေးခြင်း၏ရည်ရွယ်ချက်မှာ သင့်ပရိသတ်အား သာ၍နက်နဲသည့် နားလည်မှုအဆင့်ဆီသို့ ဦးဆောင်သွားရန် သို့မဟုတ် သင်ဆွေးနွေးခဲ့သည့်အချက်တစ်ချက် သို့မဟုတ် အခြေခံမူကို သူတို့မှတ်မိစေရန်ဖြစ်သည်။ ပုံဥပမာများက လူတို့အားသင်ပြောပြခဲ့သည့်အရာကို နားလည်စေကာ သူတို့သိပြီးသည့်အရာတစ်ခုနှင့်ဆက်စပ်ဖို့ ကူညီပေးသည်။ ယင်းသည် ကျော်ကြားသောတောင်ပေါ်ဒေသနာကို ယေရှုပေးချိန်တွင် ကိုယ်တော်ပြုလုပ်ခဲ့ရာဖြစ်သည်။ ‘မိုးကောင်းကင်ငှက်များ၊’ “တောနှင်းပင်၊” “ကျဉ်းသောတံခါး၊” ‘ကျောက်ပေါ်မှာဆောက်သောအိမ်’ ကဲ့သို့သောအသုံးအနှုန်းများက ကိုယ်တော်၏သွန်သင်ခြင်းကို လေးနက်ရှင်းလင်းစေကာ မေ့မရနိုင်အောင်ဖြစ်စေသည်။—မ. အခန်းကြီး ၅–၇။

သက်ဆိုင်ပုံတင်ပြခြင်း။ ကျမ်းတစ်ချက်ကို ရှင်းပြခြင်းနှင့် ပုံဥပမာပေးခြင်းတို့က အသိပညာပေးသည်၊ သို့သော် ရလဒ်များရစေသည့်အရာမှာ ထိုအသိပညာကို ကျင့်သုံးရန် သက်ဆိုင်ပုံတင်ပြခြင်းဖြစ်သည်။ မှန်ပါသည်၊ သမ္မာကျမ်းစာသတင်းတရားအတိုင်း ဆောင်ရွက်ရန်မှာ သင့်ပရိသတ်၏တာဝန်ဖြစ်သည်၊ သို့သော် အဘယ်အရာပြုရန်လိုအပ်သည်ကို ပိုင်းခြားသိမြင်ရန် သူတို့ကို သင်ကူညီပေးနိုင်သည်။ ပရိသတ်သည် ဆွေးနွေးနေသည့်ကျမ်းချက်အား နားလည်ပြီး ယင်းသည် တင်ပြနေသည့်အချက်နှင့် မည်သို့သက်ဆိုင်သည်ကိုမြင်ကြောင်း သင် စိတ်ချယုံကြည်သည့်အခါ ယုံကြည်ချက်နှင့်အပြုအမူတို့အပေါ် ၎င်း၏ထိထိမိမိအကျိုးသက်ရောက်မှုကို အချိန်လုံလုံလောက်လောက်ယူ၍ သူတို့အားပြသပါ။ မှားယွင်းသောအယူအဆများ သို့မဟုတ် ဆွေးနွေးလျက်ရှိသောအမှန်တရားနှင့် မညီညွတ်သည့်အပြုအမူတို့ကို စွန့်လိုက်ခြင်း၏အကျိုးကျေးဇူးများကို ပေါ်လွင်စေပါ။

ကျမ်းစာသက်ဆိုင်ပုံအား မည်သို့တင်ပြမည်ကို သင်စဉ်းစားသောအခါ သင့်ပရိသတ်တွင်ပါဝင်သည့် လူတို့သည် များပြားသောနောက်ခံမှလာကြကာ အခြေအနေအမျိုးပေါင်းစုံနှင့် ရင်ဆိုင်ကြရကြောင်းကို သတိရပါ။ ဤတွင် စိတ်ဝင်စားသူလူသစ်များ၊ လူငယ်လူရွယ်များ၊ အသက်ကြီးသူများနှင့် အမျိုးမျိုးသော ကိုယ်ရေးကိုယ်တာအခက်အခဲများဖြင့် ရုန်းကန်နေကြသူများ ပါရှိပေမည်။ သင်၏ဟောပြောချက်ကို လက်တွေ့ကျစေပြီး ဘဝဖြစ်ရပ်မှန်အတိုင်းဖြစ်စေပါ။ သင့်စိတ်ထဲတွင် လူအချို့အဝက်လောက်သာရှိသည့်နှယ် သွန်သင်ချက်ပေးခြင်းမျိုးကိုရှောင်ပါ။

ဟောပြောသူ၏ဆုံးဖြတ်ချက်များ

သင်၏ဟောပြောချက်နှင့်စပ်လျဉ်း၍ အချို့သောဆုံးဖြတ်ချက်များကို သင့်အတွက် ဆုံးဖြတ်ပေးထားပြီးဖြစ်သည်။ အဓိကအချက်များကို ရှင်းရှင်းလင်းလင်းဖော်ပြထားပြီး အဓိကခေါင်းစဉ်တစ်ခုစီကိုဆွေးနွေးရန် သင် အသုံးပြုသင့်သည့်အချိန်ပမာဏကိုလည်း ရှင်းလင်းစွာ ဖော်ပြထားသည်။ အခြားသောဆုံးဖြတ်ချက်များကိုမူ သင်ချရန်ဖြစ်သည်။ အချို့သောအချက်ငယ်များအပေါ် အချိန်ပို၍အသုံးပြုပြီး အခြားအချက်များအပေါ် အချိန်လျော့သုံးရန် သင်ရွေးချယ်ပေမည်။ အချက်ငယ်တိုင်းကို တန်းတူညီတူ ခြုံငုံတင်ပြရမည်ဟု မယူမှတ်ပါနှင့်။ ယင်းသို့ယူမှတ်ခြင်းသည် အကြောင်းအရာကို အလောတကြီးဖြစ်သွားစေတတ်ပြီး ပရိသတ်ကို ဖုံးလွှမ်းလျှံထွက်သွားစေနိုင်သည်။ သာ၍အကျယ်တဝင့်ရှင်းပြမည့်အချက်၊ အကျဉ်းသာတင်ပြရမည့်အချက် သို့မဟုတ် ကြားညှပ်၍တင်ပြသွားမည့်အချက်တို့ကို သင်မည်သို့ဆုံးဖြတ်နိုင်မည်နည်း။ သင့်ကိုယ်သင်ဤသို့မေးပါ– ‘ဟောပြောချက်ရဲ့အဓိကအယူအဆကိုတင်ပြဖို့ ဘယ်အချက်တွေက ထောက်ကူပေးမှာလဲ။ ငါ့ရဲ့ပရိသတ်အကျိုးရရှိဖို့အတွက် ဘယ်အချက်တွေက အလားအလာအကောင်းဆုံးလဲ။ ကိုးကားထားတဲ့ကျမ်းချက်တစ်ချက်နဲ့ ဆက်နွှယ်နေတဲ့အချက်တစ်ခုကို ချန်လှပ်ထားခြင်းဟာ တင်ဆက်နေတဲ့ သာဓကတန်းကို အားနည်းသွားစေမလား။’

မှန်းဆချက် သို့မဟုတ် ကိုယ်ပိုင်ထင်မြင်ချက် သွတ်သွင်းခြင်းကို ကြိုးစား၍ရှောင်ကြဉ်ပါ။ ဘုရားသခင့်သားတော်ယေရှုခရစ်ပင် ‘မိမိအလိုအလျောက်’ ပြောဆိုခြင်းကိုရှောင်ကြဉ်ခဲ့သည်။ (ယော. ၁၄:၁၀) လူတို့သည် ယေဟောဝါသက်သေများ၏အစည်းအဝေးများသို့ လာကြသည့်အကြောင်းရင်းမှာ သမ္မာကျမ်းစာဆွေးနွေးချက်ကို နားထောင်ရန်ဖြစ်သည်ကို အသိအမှတ်ပြုပါ။ အဟောအပြောကောင်းသူတစ်ယောက်အဖြစ် သင် ယူမှတ်ခံရလာပါက ဖြစ်နိုင်စရာမှာ မိမိထံမဟုတ်ဘဲ ဘုရားသခင့်နှုတ်ကပါဌ်တော်ထံ အာရုံစူးစိုက်စေခြင်းကို သင်အလေ့အကျင့်ပြုလုပ်သောကြောင့်ဖြစ်သည်။ ယင်းကြောင့်၊ သင့်ဟောပြောချက်များသည် လေးမြတ်တန်ဖိုးထားခံရသည်။—ဖိ. ၁:၁၀၊ ၁၁။

ရိုးရှင်းသောအောက်လိုင်းတစ်ခုကို အဆီအနှစ်ပြည့်နေသော ကျမ်းစာရှင်းပြချက်တစ်ခုအဖြစ် အသွင်ပြောင်းခဲ့ပြီးဖြစ်၍ ယခု သင့်ဟောပြောချက်ကို အစမ်းလေ့ကျင့်ဖို့လိုသည်။ အသံထွက်ပြီးလေ့ကျင့်ခြင်းသည် အကျိုးဖြစ်ထွန်း၏။ အရေးကြီးသောအရာမှာ အချက်များအားလုံး စိတ်ထဲ၌ကောင်းစွာရှိကြောင်းသေချာရန်ဖြစ်သည်။ ယုံကြည်စိတ်ချမှုအပြည့်ဖြင့် သင်ဟောပြောရမည်၊ အကြောင်းအရာကိုအသက်ဝင်စေပြီး အမှန်တရားကို စိတ်အားထက်သန်မှုအပြည့်ဖြင့် တင်ဆက်ရမည်။ ဟောပြောချက်မပေးခင် သင့်ကိုယ်သင်ဤသို့မေးပါ– ‘ဘယ်အရာကို အထမြောက်စေဖို့ ငါမျှော်လင့်နေသလဲ။ အဓိကအချက်များ ပေါ်လွင်သလော။ ကျမ်းစာကို ငါ့ဟောပြောချက်ရဲ့အခြေခံအဖြစ် အမှန်ထားသလော။ အဓိကအချက်တိုင်းကို နောက်အချက်ဆီသို့ သဘာဝကျကျ ဦးတည်စေသလော။ ဟောပြောချက်က ယေဟောဝါနဲ့ကိုယ်တော့်ပြင်ဆင်ပေးမှုများအတွက် လေးမြတ်တန်ဖိုးထားမှုကို တည်ဆောက်ပေးသလော။ နိဂုံးသည် အဓိကအကြောင်းနှင့်တိုက်ရိုက်ဆက်စပ်သလော၊ ပရိသတ်လုပ်ဆောင်ရမည့်အရာကို ပြသလော၊ ယင်းကိုလုပ်ဆောင်ဖို့ သူတို့ကိုလှုံ့ဆော်ပေးသလော။’ ထိုမေးခွန်းများအား ဟုတ်ပါသည်ဟုသင်ဖြေဆိုနိုင်လျှင် အသင်းတော်အကျိုးနှင့် ယေဟောဝါအားချီးမွမ်းခြင်းအတွက် သင်သည် ‘ပညာအတတ်ကိုတင့်တယ်’ စေသည့်အခြေအနေတွင်ရှိနေပါသည်!—သု. ၁၅:၂။