ကျွန်ုပ်တို့၏ လုပ်ငန်းတော်နှစ်သစ်အတွက် ယခုပင်လုပ်ဆောင်

^၁ နောက်လဖြစ်သော စက်တင်ဘာလသည် ၁၉၉၅ လုပ်ငန်းတော်နှစ်သစ်ကို အစပြုမည်။ ယင်းကို မည်သို့စတင်ကြမည်နည်း။ ဤလုပ်ငန်းတော်နှစ်ကို မည်သို့စတင်ခဲ့ကြသနည်း။ အသေအချာ ပြန်သုံးသပ်ကြည့်ကြစို့။ ၁၉၉၃ ဩဂုတ် (၁၉၉၃ လုပ်ငန်းတော်နှစ်၏ နောက်ဆုံးလ) တွင် အများဆုံးကြေညာသူအရေအတွက်—၂,၁၈၈ ယောက်—ရခဲ့ရာ ယင်းသည် ၁၃ ရာခိုင်နှုန်းတိုးတက်မှုပင်ဖြစ်သည်။ ၁၉၉၃ စက်တင်ဘာလ (၁၉၉၄ လုပ်ငန်းတော်နှစ်၏ ပထမလ) တွင်ကော။

^၂ စက်တင်ဘာတွင် ၄ ရာခိုင်နှုန်းတိုးတက်မှု ရခဲ့၏; စုစုပေါင်းကြေညာသူအရေအတွက်သည် ၂,၁၆၈ သို့လျော့နည်းသွား၏။ ယခင်လထက် မှတ်တမ်းသွင်းသူ ကြေညာသူ ၂၀ လျော့သွားသည်။ အသင်းတော်တစ်ခုစီသည် ကြေညာသူတစ်ဦးသာ လျှော့၍ မှတ်တမ်းသွင်းခဲ့ပါမူ တစ်နိုင်ငံလုံး၏ မှတ်တမ်းကို အကြီးအကျယ်ထိခိုက်သွားစေသည်။ အောက်တိုဘာနှင့် နိုဝင်ဘာတွင် ၃ ရာခိုင်နှုန်းတိုးတက်မှုရသည်; ဒီဇင်ဘာတွင် ၂ ရာခိုင်နှုန်း တိုးတက်သည်။ ထိုအတိုင်း လအနည်းငယ် ဆက်တိုးတက်ခဲ့သည်။ မေလတွင်မူ ၁ ရာခိုင်နှုန်းတိုးတက်မှုသာရှိသည်။ အလွန်ဝမ်းနည်းစရာပါတကား! အဘယ်ကြောင့် ဤသို့လျော့သွားနေရသနည်း။ တိုးတက်မှုမရှိစေရန် အဘယ်အရာက တားဆီးနေသနည်း။ တစ်ကမ္ဘာလုံး တိုးတက်နေချိန်တွင် မြန်မာနိုင်ငံ၌ ဘာဖြစ်နေသနည်း။

^၃ ကျွန်ုပ်တို့ယောက်စီယောက်တိုင်း ယေဟောဝါ၏လုပ်ငန်းတော်ကို မည်သို့ဆောင်ရွက်ကြောင်း စစ်ဆေးကြည့်ရန် အချိန်တန်ပေပြီ။ ဆယ်ဖို့တစ်ဖို့ကို ကျွန်ုပ်တို့သစ္စာရှိရှိ ဆက်သနေကြသလော။ ယေဟောဝါ၏လုပ်ငန်းတော်ကို စင်ကြယ်သောနှလုံး၊ စုံလင်သောနှလုံး သို့မဟုတ် နှလုံးအပြည့်အဝနှင့် ထမ်းဆောင်နေကြသလော။ စတိလောက်သာ အမှုတော်ဆောင်ခြင်းသည် နှလုံးအပြည့်အဝ ဆောင်ရွက်သောလုပ်ငန်း မဟုတ်ပါ။—မာလ. ၃:၁၀; ၆ ရာ. ၂၅:၂ နှိုင်းယှဉ်။

^၄ ကျွန်ုပ်တို့၏လုပ်ငန်းတော် နှစ်သစ်ကို မည်သို့စတင်ကြမည်နည်း။ ၁၉၉၃ စက်တင်ဘာလတွင်ကဲ့သို့ ၄ ရာခိုင်နှုန်းတိုးတက်မှုမျှသာ ပါဝင်ဆောင်ရွက်မည်လော။ ကျွန်ုပ်တို့၏ဘုရားသခင် ယေဟောဝါအပေါ် ချစ်ခြင်းမေတ္တာ မလျော့ပါက ထိုသို့ဖြစ်စေမည်မဟုတ်ပါ။ ၁၉၉၄ စက်တင်ဘာလတွင် စနေနှင့်တနင်္ဂနွေနေ့ လေးရက်စီရှိသည်။ ဤရှစ်ရက်စလုံးတွင် ဘုရားသခင်နှင့်ကိုယ်တော်၏နိုင်ငံတော်အကြောင်း ဟောပြောကြမည်ဆိုလျှင် အမှန်ပင် အကြီးအကျယ်တိုးတက်ပါလိမ့်မည်!

^၅ စက်တင်ဘာလအတွင်း တစ်ပတ်လျှင် အနည်းဆုံး ၃ နာရီ မှတ်တမ်းသွင်းကြရန်နှင့် အပတ်တိုင်း ယင်းကိုသတိပြုကြရန် ယောက်စီယောက်တိုင်းအား တိုက်တွန်းပါသည်။ အကြီးအကဲများနှင့် ဓမ္မအမှုထမ်းများသည် ယင်းကို ဂရုစိုက်သင့်သည်။ တစ်ပတ်လျှင် ၃ နာရီ မှတ်တမ်းသွင်းနိုင်ခြင်းသည် မခဲယဉ်းပါ။ နောက်နောင် ယေဟောဝါ၏လုပ်ငန်းတော်၌ ပါဝင်ချိန်ကို တဖြည်းဖြည်းနှင့် တိုးများစေနိုင်မည်။ လုပ်ငန်းတော်တွင် ကျွန်ုပ်တို့ပါဝင်သမျှအချိန်သည် နာရီရရုံမဟုတ်ဘဲ တန်ဖိုးရှိအချိန် ဖြစ်သင့်သည်။

^၆ ကြေညာသူအားလုံး လ၏ပထမစနေ သို့မဟုတ် တနင်္ဂနွေနေ့တွင် (စက်တင်ဘာ ၃ သို့မဟုတ် ၄ ရက်နေ့) လုပ်ငန်းတော်၌ ပါဝင်နိုင်ကြရန် ကြိုးစားသင့်သည်။ မိသားစုကြီးသောအိမ်ထောင်ဖြစ်လျှင် အချို့မှာ စနေနေ့၊ အခြားသူတို့မှာမူ တနင်္ဂနွေနေ့တွင် ပတ်စဉ်မှန်မှန် အမှုဆောင်ထွက်ကြလျှင် မိသားစုအဝင်ရှိသူတိုင်း ပတ်စဉ် ၃ နာရီသွင်းနိုင်ကြလိမ့်မည်။

^၇ လယ်ကွင်းလုပ်ငန်းတွင် ကြေညာသူတိုင်းကို ပါဝင်စေရန် ဂရုစိုက်ရုံမက ကြေညာသူအသစ်များကိုလည်း သတိပြုပါ။ သင့်ကျမ်းစာသင်အံမှုကို လုပ်ငန်းတော်၌ ပါဝင်ရန် အကူအညီပေးနိုင်မည်လော။ ကြိုးစားကြည့်ဖူးပြီလော။ သင့်သင်အံမှုသည် အသင့်ရှိနေမည်ဆိုလျှင် ဦးစီးကြီးကြပ်မှူးအား အကြောင်းကြားပါ။ ယင်းကိစ္စကို သူစစ်ဆေးကြည့်ပါလိမ့်မည်။ အသင့်ရှိသည်ဟု သူသဘောတူမည်ဆိုလျှင် သက်သေခံခြင်းလုပ်ငန်းတွင် ပါဝင်နိုင်ပေမည်။ သင့်အိမ်တွင်းရှိသူများကော။ သင့်မိသားစုတွင် လယ်ကွင်းလုပ်ငန်း၌ပါဝင်ပြီး မှတ်တမ်းသွင်းနိုင်မည့်သူများ ရှိနေပါသလော။ အကြီးအကဲများအား အကြောင်းကြားပါ။

^၈ ကျွန်ုပ်တို့၏စက်တင်ဘာလမှတ်တမ်းကို အကောင်းဆုံးဖြစ်စေရန် ကြိုးစားကြစို့။ ဤသို့ပြုလုပ်ဆောင်ရွက်ကြမည်ဆိုလျှင် ကျွန်ုပ်တို့၏လုပ်ငန်းတော်နှစ်ကို ယေဟောဝါ၏ကောင်းချီးဖြင့် အစကောင်းစေပါလိမ့်မည်။ ယေဟောဝါဘုရားသခင်၏ သန့်ရှင်းမြင့်မြတ်သော နာမတော်ကို ကျွန်ုပ်တို့ချီးမွမ်းထောမနာပြုရန် ကြိုးစားအားထုတ်ကြစဉ် ကိုယ်တော်သည် ကျွန်ုပ်တို့အားလုံးနှင့်အတူ ရှိပါလေစေ။ ဤနည်းအားဖြင့် ယေဟောဝါ၏ ဘုန်းထင်ရှားရေးအတွက် အကြီးအကျယ်တိုးတက်မှုနှင့်အတူ ကျွန်ုပ်တို့၏ လုပ်ငန်းတော်နှစ်သစ်ကို စတင်နိုင်ပါမည်။