စိတ်လှုပ်ရှားဖွယ်သတင်းကို မိသားစုများအား ကြေညာ

^၁ ကျမ်းစာမူများကို ကျင့်သုံး၍ ဘုရားသခင့်နိုင်ငံတော်အတွက် အသက်ရှင်နေထိုင်ကြသော မိသားစုများသည် ပြဿနာများကို လုံးဝဖြေရှင်းမပေးနိုင်သည့်တိုင် အနည်းဆုံးတော့ လျော့နည်းကြောင်း တွေ့ရှိကြပြီး ပျော်ရွှင်ကြပါသည်။ သင့်ရပ်ကွက်ရှိ မိသားစုများအား သင့်မိသားစုဘဝကို ရွှင်လန်းစေခြင်း စာအုပ်ဖြင့် ဤကောင်းသောသတင်းကို သင်သိရှိစေမည်လော။

^၂ ယင်းကို မည်သို့ပြုလုပ်မည်နည်း။ ပျော်ရွှင်သာယာသောမိသားစုဘဝအတွက် မူများကို ဖော်ပြသည့် ဘုရားသခင့်နှုတ်ကပါဌ်တော်ကို အာရုံပြုစေခြင်းအားဖြင့်ဖြစ်သည်။ မိသားစုဘဝကို လူတို့စိတ်ဝင်စားကြသည်။ ယင်းအကြောင်း ပြောဆိုရန် အသင့်ရှိပါ။ ဤစာအုပ်သည် သူတို့ကို မည်သို့အကူအညီပေးနိုင်ကြောင်း ဖော်ပြပါ။ သို့သော် ကမ္ဘာပေါ်မှ ဆိုးသွမ်းမှုရှိရှိသမျှကို ဘုရားသခင့်နိုင်ငံတော်က မဖယ်ရှားမချင်း မိသားစုဘဝအတွက် ​ပြဿနာ​များ လုံးလုံးလျားလျား ပျောက်သွားလိမ့်မည်မဟုတ်ကြောင်းကိုလည်း ပြောပါ။ သခင့်ဆုတောင်းချက်ကို ရွတ်ဆိုကြသည့်အခါ ယင်းအတွက်သူတို့ ဆုတောင်းနေကြသော်လည်း လူအများစုက ယင်းကိုမသိကြပါ။ (မ. ၆:၉၊ ၁၀) မိသားစုဘဝစာအုပ်၏ နောက်ဆုံးအခန်းက ဤအမှန်တရားကို တန်ဖိုးထားရန် သူတို့ကို ကူညီပေးနိုင်ပါသည်။

^၃ သို့သော် မိသားစုဘဝ၏ ပြဿနာများအကြောင်း လူတို့အား ပြောဆိုသည့်အခါ လိမ္မာပါးနပ်ရမည်။ အိမ်ရှင်မှာ ပြဿနာများရှိနေမည်ဟု သင်ယူဆကြောင်း မထင်မှတ်စေပါနှင့်။ ယေဘုယျအားဖြင့် လူအများတွေ့ ကြုံနေကြရသော ပြဿနာတစ်ခုအဖြစ် တင်ပြလျှင် ပိုကောင်းပါမည်။

^၄ ဤသို့စတင်ပြောဆိုနိုင်ပေမည်– “ယနေ့လောကမှာ အဖြစ်များတဲ့ ပြဿနာတချို့ကို ဆွေးနွေးဖို့လာတာပါ။ အဲ့ဒီထဲမှာမိသားစုဘဝပါ အပါအဝင်ပေါ့။ ကိုယ့်မိသားစုကို ပျော်ရွှင်စေချင်တဲ့ လူချည်းပဲမဟုတ်လား။ ဒါပေမဲ့လည်း မိသားစုအများဟာ မပျော်နိုင်ကြဘူး။ မိသားစုဘဝမှာ ပိုပျော်ရွှင်မှုရနိုင်ဖို့ ဘာအကူအညီရှိတယ်လို့ ထင်သလဲ။ [ဖြေပါစေ။] မိသားစုဘဝကို တီထွင်ခဲ့တဲ့ ဖန်ဆင်းရှင်စကားကို နားထောင်ရင် အကျိုးရှိမယ်လို့မထင်ဘူးလား။ ကျမ်းစာထဲမှာ လိုအပ်တဲ့ လမ်းပြညွှန်ကြားချက်တွေကို ကိုယ်တော်ဖော်ပြထားတယ်။ အဲ့ဒီမူတွေကို သင့်မိသားစုဘဝကို ရွှင်လန်းစေခြင်း စာအုပ်ထဲမှာ ဆွေးနွေးထားတယ်။ ဒီအကြောင်းနဲ့ပတ်သက်ပြီး အဘက်ဘက်ကနေ ဆွေးနွေးထားတာကို သတိပြုပါ။ [မာတိကာကိုပြ။] ဒီစာအုပ်က လူ့ပြဿနာတွေရဲ့ တည်မြဲတဲ့ ဖြေရှင်းနည်းကိုလည်း ဖော်ပြတယ်။ အဲ့ဒီအတွက် ခင်ဗျားဆုတောင်းနေပါလိမ့်မယ်။ သခင့်ဆုတောင်းချက်ကို သိတယ်မဟုတ်လား။ [မဿဲ ၆:၉၊ ၁၀ ကိုကိုးကားဖော်ပြပါ။] ဒီကမ္ဘာပေါ်ကနေ ဆိုးသွမ်းမှုအားလုံးကို ဘုရားသခင့်နိုင်ငံတော်က ချေမှုန်းပစ်ဖို့ ကိုယ်တော်အလိုရှိတယ်။ ဘုရားသခင့်နိုင်ငံတော်ကို ယုံကြည်အားထားတဲ့လူအားလုံးရဲ့ မိသားစုဘဝဟာ ဘယ်လိုအကျိုးခံစားကြရမယ်ဆိုတာကို ဒီစာအုပ်ရဲ့ နောက်ဆုံးအခန်းက ဖော်ပြတယ်။ ဒီစာအုပ်ကို ကျပ် ၃၀ နဲ့ယူထားနိုင်တယ်။”

^၅ ဤလအတွင်း မိသားစုများစွာနှင့် ဤအကြောင်းကို ပြောဆိုနိုင်ရန် ပန်းတိုင်ထားမည်ဆိုလျှင် ကောင်းမည်မဟုတ်ပေလော။ သင့်ပြန်လည်ပတ်မှုအတွက် လမ်းကြောင်းခင်းသည့်အခါ ယင်းကို သတိရပါ။ ပထမအကြိမ်လည်ပတ်၍ နိဂုံးတွင် ဤသို့ပြောနိုင်သည်– “မိသားစုများနဲ့ ကျမ်းစာအကြောင်း ဆွေးနွေးချင်တဲ့အတွက် ဒီအကြောင်းကို ဆက်ဆွေးနွေးနိုင်ဖို့ တစ်မိသားစုလုံး ရှိတဲ့အခါ ပြန်လာချင်တယ်။ [အဆင်ပြေမည့်အချိန်ကို မေးပါ။] ဒီအတောအတွင်း စာအုပ်ကိုအစမှအဆုံး ဖတ်ချင်မှာပဲ။ ပြန်လာတဲ့အခါ ခင်ဗျားနဲ့ ခင်ဗျားမိသားစု အကြိုက်ဆုံးအခန်းကို ဆွေးနွေးကြတာပေါ့။”

^၆ သင့်ရပ်ကွက်ရှိ မိသားစုများအတွက် ဤစာအုပ်သည် အလွန်အထောက်အကူပြုလိမ့်မည်ဟု သင်ဝန်ခံမည်မှာသေချာပါသည်။ စာအုပ်ပါ ကောင်းသောသြဝါဒများကို တန်ဖိုးထားသည့်စာများ များစွာရရှိခဲ့ပြီ။ အမျိုးသားတစ်ဦး ဤသို့ဆိုသည်– “ကျွန်တော်တို့မောင်နှံစုံ ဒီစာအုပ်ကို ဆက်ဖတ်လေ ကျွန်တော်တို့ မိသားစုဘဝ အခြေအနေ တိုးတက်လေပဲ။” အသင်ကိုယ်တိုင်လည်း ဤစာအုပ်ကိုဖတ်ရှုချိန်တွင် ထပ်တူခံစားခဲ့ရပေမည်။

^၇ ထိုကြောင့် တပည့်ဖြစ်စေရန် ကြိုးစားရာတွင် မိသားစုတစ်စုလုံးကို ကူညီပေးနိုင်ရန် ထည့်စဉ်းစားပါ။ ဘုရားသခင့်နိုင်ငံတော်သတင်း၏တန်ဖိုးကို တွေ့မြင်စေရန်ကူညီပေးခြင်းဖြင့် အနာဂတ်ကောင်းချီးများတွင် သူတို့ပါအတူတကွပါဝင်နိုင်ကြမည်။—ဗျာ. ၂၁:၄။