ခရစ်ယာန်အစည်းအဝေးများကို သင်အဘယ်ကြောင့် တက်ရောက်ရန်လိုအပ်

တောင်အမေရိကတွင်နေထိုင်သော ရိုစဲရီယိုသည် အလစ်ဇဘက်သ်နှင့် လပေါင်းများစွာကျမ်းစာလေ့လာနေခြင်းမှ ပျော်ရွှင်မှုခံစားနေရသည်။ ဘုရားသခင့်နိုင်ငံတော်သည် ကမ္ဘာမြေကြီးပေါ်တွင် ပရဒိသုအခြေအနေများကို မည်သို့ပေါ်ပေါက်လာစေမည်အကြောင်း သူသိရှိလာရ၍ ပီတိသောမနဿဖြစ်ခဲ့သည်။ သို့ဖြစ်၍ပင် အလစ်ဇဘက်သ်သည် သူမအား နိုင်ငံတော်ခန်းမ၌ အစည်းအဝေးများတက်ရန် ခေါ်ဖိတ်တိုင်း သူမလာပါ။ အိမ်တွင်သာ ကျမ်းစာကိုလေ့လာပြီး အသင်းတော်အစည်းအဝေးများကိုမတက်ဘဲ ကျမ်းစာမှာကြားသည့်အတိုင်း ကျင့်ကြံနေထိုင်နိုင်ပါသည်ဟု သူယူမှတ်ပါသည်။ ခရစ်ယာန်အစည်းအဝေးများသည် သင့်အား အမှန်အကျိုးပြုမပြု အသင်စဉ်းစားကြည့်ဖူးပါသလော။ ဘုရားသခင်သည် မိမိလူမျိုးအား စည်းဝေးရန် အဘယ်ကြောင့်စီစဉ်တော်မူခဲ့သနည်း။

ပထမရာစုရှိခရစ်ယာန်များသည် သူတို့ဝန်းကျင်မှလူတို့နှင့် အလွန်ခြားနားသည့်အတွက် သူတို့ အသက်ချမ်းသာရရန် မှန်ကန်သောပေါင်းသင်းမှု လိုအပ်နေပါသည်။ ရှေးခရစ်ယာန်အသင်းတော်တစ်ခုထံ တမန်တော်ပေါလု ဤသို့ရေးသားခဲ့သည်။ ‘သင်တို့သည် အပြစ်တင်ခွင့်မရှိ၊ အဘယ်သူကိုမျှ မပြစ်မမှားဘဲနေ၍ မဖြောင့်မမှန် ဖောက်ပြန်သောလူမျိုးအထဲ၌ လောက၏အလင်းအဖြစ်ထွန်းလင်းနေသည်။’ (ဖိလိပ္ပိ ၂:၁၅) ယုဒပြည်နယ်တွင် ခရစ်ယာန်များသည် အခက်အခဲအထူးကြုံတွေ့နေကြ၍ သူတို့ထံပေါလုက ဤသို့ရေးသားခဲ့သည်။ “မေတ္တာစိတ်ရှိစေခြင်းငှာလည်းကောင်း၊ ကောင်းသောအကျင့်ကို ကျင့်စေခြင်းငှာလည်းကောင်း တိုက်တွန်းနှိုးဆော်ရသောအခွင့်ကိုရှာ၍ အချင်းချင်းတစ်ယောက်ကိုတစ်ယောက် ထောက်စာကြည့်ရှုကြကုန်အံ့။ လူအချို့တို့၏ထုံးစံရှိသည်အတိုင်း အချင်းချင်း စည်းဝေးခြင်းအမှုကို မရှောင်မလွှဲကြနှင့်။ အချင်းချင်းတို့ကို တိုက်တွန်းနှိုးဆော်ကြလော့။ ကာလအချိန် ရောက်လုနီးသည်ကို ထောက်သဖြင့် သာ၍ကြိုးစားကြလော့။” (ဟေဗြဲ ၁၀:၂၄၊ ၂၅) အတူတကွစည်းဝေးခြင်းအားဖြင့် မေတ္တာစိတ်ရှိစေခြင်းငှာလည်းကောင်း၊ ကောင်းသောအကျင့်ကိုကျင့်စေခြင်းငှာလည်းကောင်း ကျွန်ုပ်တို့ မည်သို့ တိုက်တွန်းနှိုးဆော်သနည်း။

ခရစ်ယာန်များ တစ်ဦးကိုတစ်ဦး မည်သို့ “ထက်စေ” နိုင်

“တိုက်တွန်း” ဟုပြန်ဆိုသည့် ပေါလုအသုံးပြုခဲ့သော ဂရိစကားလုံးက စာသားအတိုင်း “ထက်စေခြင်း” အဓိပ္ပာယ်ရှိသည်။ “သံကို သံဖြင့်ထက်စေသကဲ့သို့ လူသည် အဆွေခင်ပွန်း၏မျက်နှာကို ထက်စေတတ်၏” ဟုဆိုရာတွင် ခရစ်ယာန်များသည် တစ်ဦးကိုတစ်ဦး မည်သို့ “ထက်စေ” နိုင်ကြောင်း ကျမ်းစာပါပညာရှိစကားတစ်ခွန်းက ရှင်းပြပါသည်။ (သု၊ ၂၇:၁၇; ဒေသနာ ၁၀:၁၀) ကျွန်ုပ်တို့သည် မှန်မှန်သွေးပေးရန်လိုသော ဓားများနှင့်တူသည်။ ယေဟောဝါကိုချစ်ကြောင်းတင်ပြခြင်းနှင့် ယုံကြည်ခြင်းအခြေခံသည့် ဆုံးဖြတ်ချက်များချခြင်းသည် ဤလောကနှင့်မတူ၊ ခြားနားစွာနေခြင်းကိုဆိုလိုသည့်အတွက် လူအများမှခြားနားသော သီးခြားလမ်းကိုဖောက်ယူရမည်။

လူအများနှင့်မတူရလေအောင် မနားမနေအားထုတ်ရသည့်အတွက် ကောင်းမွန်သောအကျင့်များတွင် ကျွန်ုပ်တို့၏ဇွဲကိုတုံးသွားစေနိုင်ပါသည်။ သို့သော် ယေဟောဝါကိုချစ်မြတ်နိုးသူများနှင့် ပေါင်းသင်းနေပါက တစ်ဦးကိုတစ်ဦး စိတ်အားထက်သန်စေနိုင်၏။—မေတ္တာစိတ်ရှိစေခြင်းငှာလည်းကောင်း၊ ကောင်းသောအကျင့်ကို ကျင့်စေခြင်းငှာလည်းကောင်း တစ်ဦးကိုတစ်ဦး တိုက်တွန်းနှိုးဆော်ပေးနိုင်သည်။ တစ်ဖက်ကကြည့်ပြန်လျှင် ကျွန်ုပ်တို့သည် တစ်ဦးတစ်ယောက်တည်းရှိသည့်အခါ ကိုယ့်အကြောင်းပိုစဉ်းစားတတ်သည်။ စာရိတ္တယိုယွင်း၊ အတ္တသဘောဆန်သည့် သို့မဟုတ် မိုက်မဲသောအကြံအစည်များ စိတ်ထဲဝင်လာပေမည်။ “အသီးအခြားနေတတ်သောသူသည် ကိုယ့်အလိုဆန္ဒပြည့်စုံစေရန် ရှာကြံ၍ အမြော်အမြင်ပညာရှိသမျှကို မျက်မာန်ထ၏။” (သု၊ ၁၈:၁၊ သမ) ထိုကြောင့် သက်သာလောနိတ်မြို့ရှိအသင်းတော်ထံ ပေါလုဤသို့ရေးသားခဲ့ခြင်းဖြစ်သည်။ “သင်တို့သည် ယခုပင်ပြုသည်နည်းတူ အချင်းချင်းတိုက်တွန်း၍ တစ်ယောက်ကိုတစ်ယောက် တည်ဆောက်ကြလော့။”—၁ သက်သာလောနိတ် ၅:၁၁။

အခြေခံ ကျမ်းစာသွန်သင်ချက်များကို ရိုစဲရီယိုလေ့လာပြီးသောအခါ၌လည်း သူမသည် အသင်းတော်နှင့်မပေါင်းသင်းဘဲ ဆက်လက်နေခဲ့သည်။ ထိုကြောင့် ထပ်ဆင့်အကူအညီ မပေးနိုင်တော့သည့်အတွက် အလစ်ဇဘက်သ်သည် သူမထံ ဆက်မသွားတော့ပါ။ လပေါင်းအနည်းငယ်ကြာလေသော် တိုက်နယ်ကြီးကြပ်မှူးတစ်ဦးသည် ရိုစဲရီယိုထံလည်ပတ်ကာ “မိသားစုရှိ တစ်ဦးစီအနေနဲ့ စားသောက်ဆိုင်မှာ အစားအစာကောင်းကိုစားပေမယ့် အိမ်မှာ မိသားစုနဲ့အတူတူ အစာမစားရင် ဘာဆုံးရှုံးမလဲ” ဟုမေးမြန်းခဲ့သည်။ ရိုစဲရီယိုက “မိသားစုနဲ့ပေါင်းသင်းမှု ဆုံးရှုံးမှာပေါ့” ဟုဖြေဆိုပါသည်။ ဆိုလိုရင်းကို သူချက်ချင်းသဘောပေါက်သွားကာ ထိုအချိန်မှစ၍ စည်းဝေးများကို မှန်မှန်တက်လေတော့သည်။ စည်းဝေးတက်ခြင်းသည် အကျိုးများစွာရှိကြောင်း သူမသတိပြုမိခဲ့ပြီး ထိုအချိန်ကတည်းက စည်းဝေးမှန်လေတော့သည်။

အသင်ယုံကြည်သည့်အကြောင်းများကိုပင် အခြားသူများယုံကြည်ကြောင်း ကြားနာရခြင်းသည် အားရှိစရာဖြစ်သည်။ ဤယုံကြည်ခြင်းကြောင့် မိမိတို့ဘဝကို မည်သို့ပြောင်းလဲခဲ့ကြောင်း တွေ့မြင်နေရခြင်းကလည်း ထိုနည်းထပ်တူပင်ဖြစ်သည်။ ယင်းသို့ဖြစ်ကြောင်း ပေါလုသည် မိမိ၏အတွေ့အကြုံမှ မိမိသဘောပေါက်ပါသည်။ ယင်းကြောင့် ရောမမြို့ရှိအသင်းတော်ထံ ဤသို့ရေးသားခဲ့သည်။ “သင်တို့သည် မြဲမြံခိုင်ခံ့မည်အကြောင်း ငါသည် သင်တို့၌ ဝိညာဉ်ဆုကျေးဇူး တစ်စုံတစ်ခုကိုအပ်ပေးခြင်းငှာ သင်တို့ကို အလွန်တွေ့မြင်ချင်ပါ၏။ ထိုသို့ဆိုသော် ငါနှင့်သင်တို့သည် ယုံကြည်သောအားဖြင့် အချင်းချင်း အားရသက်သာခြင်းသို့ ရောက်ကြမည်အကြောင်းကို ဆိုလိုသတည်း။” (ရောမ ၁:၁၁၊ ၁၂) အမှန်မှာ၊ ရောမမြို့သို့ နှစ်အတန်ကြာမှ ပေါလုရောက်သွားနိုင်ခဲ့သည်။ ရောက်သွားခဲ့ချိန်တွင် ရောမလူမျိုးလက်ထဲ အကျဉ်းသားတစ်ဦးဖြစ်နေရရှာသည်။ သို့သော် မိမိနှင့်တွေ့ဆုံခြင်းငှာ မြို့မှ မိုင်ပေါင်း ၄၀ ကျော် လမ်းလျှောက်လာခဲ့သည့် ရောမမြို့မှညီအစ်ကိုများကိုတွေ့ရှိသောအခါ “ဘုရားသခင်၏ကျေးဇူးတော်ကိုချီးမွမ်း၍ စိတ်သက်သာခြင်းသို့ရောက်လေ၏။”—တမန်တော် ၂၈:၁၅။

ခဲယဉ်းသောကာလတွင် ဝိညာဏအစာတွေ့ရှိခြင်း

ရောမမြို့တွင် အကျယ်ချုပ်ခံရစဉ် အချင်းချင်းစည်းဝေးခြင်းအမှုကို မရှောင်မလွဲကြရန် ဟေဗြဲအသင်းသားများထံ ပေါလုစာရေးခဲ့သည်။ ဆက်လက်၍ “ကာလအချိန်ရောက်လုနီးသည်ကိုထောက်သဖြင့် သာ၍ကြိုးစားကြလော့” ဟုသူရေးသားခဲ့ခြင်းကား ကျွန်ုပ်တို့အတွက် ပိုမိုအဓိပ္ပာယ်လေးနက်စေသည်။ (ဟေဗြဲ ၁၀:၂၅) ဤလောက၏နောက်ဆုံးကာလသည် ၁၉၁၄ ခုနှစ်တွင်စတင်ခဲ့ကြောင်းနှင့် “တရားဆုံးဖြတ်၍ အဓမ္မလူတို့ကိုဖျက်ဆီးသောနေ့ရက်” နီးပြီဖြစ်ကြောင်း ကျမ်းစာအထောက်အထားများဖြင့် ယေဟောဝါသက်သေများ တင်ပြခဲ့သည်မှာ ကြာမြင့်ပေပြီ။ (၂ ပေတရု ၃:၇) ဗျာဒိတ်ကျမ်းအရ နောက်ဆုံးကာလအစတွင် ကောင်းကင်မှ မာရ်နတ်ကိုပစ်ချခဲ့သောအခါ သူသည် ပြင်းစွာသောအမျက်ဒေါသဖြင့် “ဘုရားသခင်၏ပညတ်တော်တို့ကိုကျင့်၍ ယေရှု၏သက်သေခံတော်မူချက်ကိုစွဲလမ်းသောသူတည်းဟူသော ထိုမိန်းမ၌ ကြွင်းသောအမျိုးအနွယ်ကို စစ်တိုက်ခြင်းငှာသွား” သည်ဟုဆို၏။ (ဗျာဒိတ် ၁၂:၇-၁၇) ထိုကြောင့် ဘုရားသခင်၏ပညတ်တော်တို့ကိုကျင့်ခြင်းသည် ယခုအထူးခဲယဉ်းပေမည်။ ယုံကြည်သူချင်းတို့နှင့် သာ၍စည်းဝေးရန် လိုအပ်နေပါသည်။ မာရ်နတ်၏ထိုးနှက်ချက်များကို တွန်းလှန်တိုက်ခိုက်နိုင်ရန် ကျွန်ုပ်တို့၏ယုံကြည်ခြင်းနှင့် ဘုရားသခင်အားချစ်ခြင်းကို ခိုင်ခံ့မြဲမြံစေရန် အစည်းအဝေးများက အကူအညီပေးပါလိမ့်မည်။

ဘုရားသခင်ကိုချစ်ခြင်းနှင့် ယုံကြည်ခြင်းတို့သည် ဆောက်လုပ်ပြီးနောက် အမြဲတည်တံ့နေသော အဆောက်အဦများနှင့်မတူပါ။ ယင်းအစား အမြဲကျွေးမွေးပြုစုပေးခြင်းအားဖြင့် တဖြည်းဖြည်းကြီးထွားလာသော်လည်း အငတ်ထားခဲ့လျှင် ညှိုးနွမ်းပြီး သေသွားတတ်သော သက်ရှိအရာများနှင့် တူပါသည်။ ယင်းကြောင့် ခွန်အားရှိနေစေရန် ဝိညာဉ်အစာကို ယေဟောဝါသည်မိမိလူမျိုးတော်အား မှန်မှန်ကျွေးမွေးနေရခြင်းဖြစ်သည်။ ကျွန်ုပ်တို့အားလုံး ဤကဲ့သို့သောအစာ စားသုံးရန်လိုပါသည်။ သို့သော် ဘုရားသခင့်အဖွဲ့အစည်းနှင့် ယင်း၏အစည်းအဝေးများမှအပ အဘယ်နေရာတွင် ထိုသို့သောအစာကို စားသုံးနိုင်မည်နည်း။ အဘယ်နေရာ၌မှ မရရှိနိုင်ပါ။—တရားဟောရာ ၃၂:၂; မဿဲ ၄:၄; ၅:၃။

ခရစ်ယာန်အသင်းတော်ကို မည်သို့ကျွေးမွေးပြုစုကြောင်း သဘောပေါက်နိုင်ရန် ယေရှုမေးခွန်းတစ်ခု မေးခဲ့သည်။ ကိုယ်တော်က “အရှင်သည် မိမိအိမ်သူအိမ်သားအပေါင်းတို့အား အချိန်တန်လျှင်အစားအသောက်တို့ကို ဝေဖန်စေခြင်းငှာ အအုပ်အချုပ်ခန့်ထား၍ သစ္စာနှင့်လည်းကောင်း၊ သတိပညာနှင့်လည်းကောင်း ပြည့်စုံသော ကျွန်ကား အဘယ်သူနည်း။ အကြင်ကျွန်သည် ဤသို့ပြုလျက်နေသည်ကို အရှင်သည် ပြန်လာ၍တွေ့၏။ ထိုကျွန်သည် မင်္ဂလာရှိ၏။” (မဿဲ ၂၄:၄၅၊ ၄၆) မိမိ၏တပည့်နောက်လိုက်များကို ကျွေးမွေးပြုစုခြင်းငှာ ပထမရာစုက မည်သူတို့အား ယေရှုသည် ခန့်အပ်ခဲ့သည်။ ဘုရားသခင့်နိုင်ငံတော်အခွင့်အာဏာဖြင့် မိမိပြန်ကြွလာသောအခါ သူတို့ကို မည်သူသစ္စာရှိရှိကျွေးမွေးပေးနေကြောင်း တွေ့ရှိခဲ့ပါသနည်း။ ထိုရာစုတစ်လျှောက်အသက်ရှင်ခဲ့သည့် လူသားတစ်ဦးတစ်ယောက်မျှမဖြစ်နိုင်ကြောင်း ထင်ရှားနေသည်။ ခရစ်ယာန်ခေတ်မတိုင်မီက ဣသရေလလူမျိုးသည် ဘုရားသခင့်ကျေးကျွန်ဖြစ်ခဲ့သည့်နည်းတူ သာဓကများအရ ထိုကျွန်သည် ဝိညာဉ်တော်ဘိသိက်ခံ ခရစ်ယာန်အသင်းတော်ဖြစ်ကြောင်း ထင်ရှားပါသည်။ (ဟေရှာယ ၄၃:၁၀) မှန်ပါသည်။ ထိုကမ္ဘာချီ ဝိညာဉ်တော်ဘိသိက်ခံ ခရစ်ယာန်များအဖွဲ့အားဖြင့် ကျွန်ုပ်တို့ကို ယေရှုသည် ဝိညာဉ်အစာကျွေးမွေးနေပါသည်။ ယင်းအဖွဲ့သည် ယေဟောဝါသက်သေများ၏ ဒေသခံအသင်းတော်များမှတစ်ဆင့် ယနေ့ ဝိညာဉ်အစာကို အဆက်မပြတ်ကျွေးမွေးနေပါသည်။

ဝိညာဉ်အစာ အဆက်မပြတ်ရခြင်းငှာ ယေရှု၏အစီအစဉ်အကြောင်းကို တမန်တော်ပေါလု ဤသို့ထပ်ဆင့်ဖော်ပြသည်။ “ထိုသို့နှင့်အညီ. . . မြင့်သောအရပ်သို့တက်ကြွတော်မူသဖြင့် များစွာသောသူတို့ကို ဖမ်းသွားတော်မူ၍ လူတို့အား ဆုလာဘ်များကိုပေးတော်မူသည်။ ခရစ်တော်၏ကိုယ်တော်ကိုတည်ဆောက်၍ ဓမ္မဆရာ၏အမှုကိုပြုတတ်မည်အကြောင်း သန့်ရှင်းသူတို့ကိုပြင်ဆင်ခြင်းအလို့ငှာ ထိုသခင်သည် လူအချို့တို့ကို တမန်တော်အရာ၌လည်းကောင်း၊ အချို့တို့ကို ပရောဖက်အရာ၌လည်းကောင်း၊ အချို့တို့ကို သာသနာပြုအရာ၌လည်းကောင်း၊ အချို့တို့ကို သင်းအုပ်အရာ၊ ဆရာအရာ၌လည်းကောင်းခန့်ထားတော်မူ၏။ ငါတို့ရှိသမျှသည် ယုံကြည်ခြင်းသို့လည်းကောင်း၊ ဘုရားသခင်၏သားတော်ကို သိကျွမ်းခြင်းသို့လည်းကောင်းတညီတညွတ်တည်းရောက်၍ ခရစ်တော်၏ပြည့်စုံခြင်းပမာဏအရပ်တည်းဟူသော ကြီးရင့်သောလူ၏အဖြစ်သို့ ရောက်ကြသည့်တိုင်အောင် ဖြစ်သတည်း။”—ဧဖက် ၄:၈၊ ၁၁-၁၃။

အဓိကအနေနှင့် ဒေသခံအသင်းတော်များတွင်—အစည်းအဝေးများ၌—ဤ “လူတို့တွင်ဆုလာဘ်များ” သည် ညီအစ်ကိုများကိုတည်ဆောက်ပေးကြပါသည်။ ဥပမာ၊ အန္တိအုတ်မြို့တွင် “ယုဒနှင့်သိလတို့သည် ပရောဖက်ဖြစ်သောကြောင့် များစွာသောစကားနှင့် ညီအစ်ကိုတို့ကိုဆုံးမ၍ မြဲမြံခိုင်ခံ့စေကြ၏။” (တမန်တော် ၁၅:၃၂) ယနေ့ ဝိညာဉ်ရေးဘက် အရည်အချင်းပြည့်ဝသောအမျိုးသားများသည် ကျွန်ုပ်တို့၏ယုံကြည်ခြင်း မညှိုးနွမ်း၊ မလှုပ်ရှားဘဲမနေစေခြင်းငှာ ထပ်တူပင်ပြုစုပျိုးထောင်ပေးပါလိမ့်မည်။

ကျွန်ုပ်တို့သည် စည်းဝေးများကို စတင်မတက်ရသေးသည့်တိုင် အသင်းတော်သားတစ်ဦးတစ်ယောက်၏ ကူညီမစမှုကြောင့် အတော်အသင့်တိုးတက်နေပေမည်။ “သင်တို့သည် ကြေခဲသောအစာကိုမသုံးဆောင်၊ နို့ကိုသာသုံးဆောင်ရသော ဘုရားသခင်၏ဗျာဒိတ်တော်၌ ရှေ့ဦးစွာသင်ရသော တရားနုတို့ကို သူတစ်ပါးထံ၌ တစ်ဖန်သင်” ယူရသောအချိန်ရှိကြောင်း သမ္မာကျမ်းစာဆိုထားသည်။ (ဟေဗြဲ ၅:၁၂) သို့သော် နို့ကိုသာသုံးဆောင်သည့်အရွယ်တွင် အစဉ်အမြဲမနေနိုင်ပါ။ ခရစ်ယာန်အစည်းအဝေးများသည် ဘုရားသခင်ကိုချစ်ခြင်း၊ ကိုယ်တော်ကိုယုံကြည်ခြင်း ထက်သန်နေရုံမက “ဘုရားသခင်၏အလိုတော် . . . အကုန်အစင်” ကိုကျင့်သုံးရာတွင် လက်တွေ့ကျအကူအညီပေးခြင်းငှာ စီစဉ်ပေးထားသည့် ကျမ်းစာသွန်သင်ချက်များကို အဆက်မပြတ် ပေးနေပါသည်။ (တမန်တော် ၂၀:၂၇) ယင်းကား “နို့” မျှမဟုတ်။ သမ္မာကျမ်းက ထပ်ဆင့်ဤသို့ဆိုသည်။ “ကြေခဲသောအစာမူကား ကိုယ့်အာရုံများကိုအသုံးပြုသဖြင့် ကောင်းမကောင်းကိုပိုင်းခြားသိမြင်တတ်သောအရွယ်ရောက်သူတို့အဖို့ဖြစ်၏။” (ဟေဗြဲ ၅:၁၄၊ ကဘ) အစည်းအဝေးတွင် ကြားသိရသော အကြောင်းအမျိုးမျိုးသည် အိမ်တွင်းကျမ်းစာသင်အံမှု၌ပြုသော အခြေခံလေ့လာမှုနှင့်တူမည်မဟုတ်ပါ။ အချို့ကား အရေးကြီးသည့် ကျမ်းစာပရောဖက်ပြုချက်များကို အခန်းငယ်တစ်ခုပြီးတစ်ခု အသေးစိတ်လေ့လာခြင်း၊ ကျွန်ုပ်တို့ဘဝအသက်တာတွင် ဘုရားသခင်ကို မည်သို့အတုယူနိုင်ကြောင်း အတွင်းကျကျဆွေးနွေးလေ့လာခြင်းတို့ဖြစ်မည်။

ယေဟောဝါ၏သတိပေးချက်များ —သင့်နောက်ဝယ် အသံတစ်ခုကဲ့သို့

ဤကဲ့သို့သောအသင်းတော်သင်တန်းများအားဖြင့် ကျွန်ုပ်တို့သည် မည်ကဲ့သို့သောသူများဖြစ်အပ်ကြောင်း ယေဟောဝါမှန်မှန်သတိပေးနေပါသည်။ ဤသတိပေးချက်များသည် အလွန်အရေးကြီးပါသည်။ ယင်းတို့သာမရှိလျှင် အတ္တသဘော၊ မာန်မာနထောင်လွှားခြင်း၊ လောဘကြီးခြင်းစိတ်များ လွယ်လင့်တကူဝင်လာနိုင်ပါသည်။ ကျမ်းစာမှသတိပေးချက်များက လူသားအချင်းချင်း ဆက်ဆံမှုကောင်းရန်၊ ဘုရားသခင်နှင့်ပါ ဆက်ဆံမှုကောင်းရန် အထောက်အကူပြုပါလိမ့်မည်။ “ကိုယ်လိုက်ရာလမ်းကိုဆင်ခြင်သောအခါ သက်သေခံတော်မူချက်တို့သို့လှည့်၍ လိုက်ပါ၏” ဟု ဆာလံ ၁၁၉:၅၉ ကိုရေးသူ ဝန်ခံပါသည်။

ခရစ်ယာန်အစည်းအဝေးများကို ကျွန်ုပ်တို့မှန်မှန်တက်ကြစဉ် ဟေရှာယမှတစ်ဆင့် ယေဟောဝါ၏ပရောဖက်ပြုချက် ပြည့်စုံလာခြင်းကို တွေ့ကြုံခံစားရမည်။ ယင်းက ဤသို့ဆိုသည်။ “သင်၏ဆရာသည် နောက်တစ်ဖန်ပုန်းရှောင်၍မနေရကြ။ ကိုယ်မျက်စိနှင့် ကိုယ်ဆရာတို့ကို မြင်ရလိမ့်မည်။ ‘သင်သည် လက်ယာဘက်၊ လက်ဝဲဘက်သို့လမ်းလွဲလျှင် ဤမည်သောလမ်းသည်မှန်၏။ ဤလမ်း၌သွားလော့’ ဟုသင့်နောက်၌ပြောသောစကားသံကို ကိုယ်နားနှင့်ကြားရလိမ့်မည်။” ကျွန်ုပ်တို့၏တိုးတက်မှုကို ယေဟောဝါဂရုစိုက်ကြည့်ရှုနေတော်မူသည်။ လမ်းမှားမည်ဆိုလျှင် မေတ္တာရှိစွာဖြင့် ဆုံးမပဲ့ပြင်တော်မူ၏။ (ဟေရှာယ ၃၀:၂၀၊ ၂၁; ဂလာတိ ၆:၁) ဤမျှမက ကိုယ်တော်ကူညီမစတော်မူသေးသည်။

အသင်းတော်မှတစ်ဆင့် သန့်ရှင်းသောဝိညာဉ်တော် ရရှိခြင်း

ယေဟောဝါသက်သေများနှင့်အတူ ခရစ်ယာန်အစည်းအဝေးများကို မှန်မှန်တက်ရောက်ခြင်းအားဖြင့် ဘုရားသခင့်လူမျိုးအပေါ် သက်ရောက်နေသည့် ဘုရားသခင်၏သန့်ရှင်းသောဝိညာဉ်တော်အကူအညီကြောင့် ခွန်အားရရှိပါသည်။ (၁ ပေတရု ၄:၁၄) ထို့ပြင် အသင်းတော်ရှိခရစ်ယာန်ကြီးကြပ်မှူးများသည် သန့်ရှင်းသောဝိညာဉ်တော်အားဖြင့် ခန့်အပ်ခြင်းခံကြရပါသည်။ (တမန်တော် ၂၀:၂၈) ဘုရားသခင်ထံတော်မှဖြစ်သော ဤလှုပ်ရှားသောစွမ်းအားသည် ခရစ်ယာန်တစ်ဦးကို ဩဇာလွှမ်းမိုးပါသည်။ သမ္မာကျမ်းစာက “ဝိညာဉ်တော်နှင့်ဆိုင်ရာအသီးမူကား ချစ်ခြင်း၊ ရွှင်လန်းခြင်း၊ ငြိမ်သက်ခြင်း၊ စိတ်ရှည်ခြင်း၊ ကရုဏာပြခြင်း၊ ကောင်းမြတ်ခြင်း၊ ယုံကြည်ခြင်း၊ နူးညံ့သိမ်မွေ့ခြင်း၊ ချုပ်တည်းခြင်းများပေတည်း” ဟုဆိုထားသည်။ (ဂလာတိ ၅:၂၂၊ ၂၃၊ ကဘ) ဘုရားသခင့်အဖွဲ့အစည်းတွင် လုပ်ဆောင်နေသော သန့်ရှင်းသောဝိညာဉ်တော်သည် ယေဟောဝါကိုချစ်မြတ်နိုးသူများအတွက် အဘယ်ဆုကျေးဇူးကို ကိုယ်တော်စီမံထားတော်မူကြောင်း ကောင်းစွာသဘောပေါက်စေခြင်းငှာ အကူအညီပေးပါလိမ့်မည်။ ဤအစီအစဉ်ရှိ ကျော်ကြားသူများသည် ဘုရားသခင့်ရည်ရွယ်ချက်များကို နားမလည်နိုင်ကြကြောင်း ရှင်းပြပြီးနောက် ပေါလုဤသို့ရေးသားပါသည်။ “ဘုရားသခင်သည် မိမိဝိညာဉ်တော်အားဖြင့် ငါတို့အား ဖော်ပြတော်မူ၏။”—၁ ကောရိန္သု ၂:၈-၁၀။

ယုံကြည်ခြင်းခိုင်ခံ့မြဲမြံစေသော ဝိညာဏအစာအပြင် အသင်းတော်၏ အဓိကလုပ်ငန်း၌ပါဝင်လိုသူများအား အသင်းတော်သည် လေ့ကျင့်သွန်သင်ပေးတော်မူ၏။ ယင်းကားအဘယ်နည်း။

အသင်းတော်မှတစ်ဆင့်ရရှိသော လေ့ကျင့်မှု

ခရစ်ယာန်အသင်းတော်သည် အသင်းဝင်အချင်းချင်း တစ်ဦးကိုတစ်ဦးပျော်ရွှင်မှုပေး၍ သာ၍ကောင်းသောသူများဖြစ်လာရန် အားပေးသည့် လူမှုရေးအသင်းတစ်ခုမျှမဟုတ်ပါ။ ဝိညာဏမှောင်မိုက်အောက်ရှိသူများထံ ဘုရားသခင်၏နိုင်ငံတော်သတင်းကောင်းကို ဟောပြောရန် အသင်းတော်အား ယေရှုတာဝန်ပေးထားတော်မူသည်။ (တမန်တော် ၁:၈; ၁ ပေတရု ၂:၉) ယင်းကိုတည်ထောင်ခဲ့ချိန်၊ စီအီး ၃၃ ပင်တေကုတ္တေပွဲနေ့မှစတင်၍ ယင်းသည် ဟောပြောသူများဖြင့် ဖွဲ့စည်းထားပါသည်။ (တမန်တော် ၂:၄) အသင်သည် ယေဟောဝါ၏ရည်ရွယ်ချက်များကို တစ်ဦးတစ်ယောက်အားပြောဆိုသော်လည်း ယုံအောင်မပြောနိုင်သည့်အဖြစ်မျိုးကြုံဖူးပါသလော။ အသင်းတော်အစည်းအဝေးများက သွန်သင်ပေးနည်းဘက် တစ်ဦးချင်းကို လေ့ကျင့်ပေးပါသည်။ ကျမ်းစာဥပမာများကို လေ့လာသုံးသပ်ခြင်းအားဖြင့် ဆင်ခြင်နှီးနှောနိုင်သည့် နှစ်ဦးသဘောတူညီနိုင်သော ယေဘုယျအချက်ကိုဖော်ထုတ်ပေးတတ်လာမည်၊ ဆင်ခြင်တုံတရားနှင့်အညီ အခြေအတင်ပြောဆိုရာတွင် ကျမ်းချက်များကို အခြေခံအသုံးပြုတတ်လာမည်၊ မေးခွန်းများ၊ ပုံဥပမာများ အသုံးပြုခြင်းအားဖြင့် သူတစ်ပါးအား စဉ်းစားဆင်ခြင်တတ်ရန် ကူညီပေးနိုင်ပုံကို တတ်လာပါမည်။ သမ္မာတရားကို အခြားသူတစ်ဦး သဘောပေါက်နားလည်လာရန် အကူအညီပေးရာတွင် ဤကျွမ်းကျင်မှုများအားဖြင့် အသင်သည် ထုတ်ဖော်ပြောဆို၍မရနိုင်သည့် ရွှင်လန်းမှုကိုခံစားရန် အကူအညီရရှိနိုင်ပါသည်။

ဤခိုက်ရန်ပွား၍ စာရိတ္တယိုယွင်းသောလောကကြီးတွင် ခရစ်ယာန်အသင်းတော်သည် အမှန်တကယ်ပင် ဝိညာဏခိုလှုံရာဖြစ်ပါသည်။ ယင်းကို မစုံလင်သောလူသားချည်းဖြင့်သာ ဖွဲ့စည်းထားသည်မှန်သော်လည်း ငြိမ်သက်ခြင်းနှင့် မေတ္တာ လွှမ်းမိုးသည့် အေးငြိမ်းရာအရပ်ဖြစ်ပါသည်။ ထိုကြောင့် ယင်း၏အစည်းအဝေးအားလုံးကို မှန်မှန်တက်ရောက်ကာ ဆာလံဆရာ၏ အောက်ပါစကားများ မှန်ကန်ကြောင်း ကိုယ်တိုင်ခံစားကြည့်ပါ။ “ညီအစ်ကိုတို့သည် သဘောတူလျက် ပေါင်းဖော်ကြသည်အရာမှာ အလွန်ကောင်းပေ၏။ အလွန်တင့်တယ်လျောက်ပတ်ပေ၏။ . . . ထာဝရဘုရား [ယေဟောဝါ၊ ကဘ] သည် အစဉ်အမြဲအသက်ရှင်ခြင်းအခွင့်တည်းဟူသော ကောင်းချီးမင်္ဂလာကို စီရင်တော်မူ၏။”—ဆာလံ ၁၃၃:၁၊ ၃။