ကင်းမျှော်စင်နှင့် နိုးလော့!—အခန့်သင့်သမ္မာတရားဂျာနယ်များ

“အိုသမ္မာတရား၏ဘုရားသခင်ယေဟောဝါ၊ ကိုယ်တော်သည် ကျွန်ုပ်ကိုရွေးနှုတ်ခဲ့ပြီ။”—ဆာလံ ၃၁:၅၊ ကဘ။

၁၊ ၂။ (က) ကင်းမျှော်စင် မှ မိမိဖတ်ရသည့်အရာနှင့်ပတ်သက်၍ ညီအစ်မတစ်ဦးမည်သို့ခံစားရသနည်း။ (ခ) ကျွန်ုပ်တို့၏ဂျာနယ်များအကြောင်း မည်သည့်မေးခွန်းများမေးစရာရှိသနည်း။

ခရစ်ယာန်ညီအစ်မတစ်ဦး ဤသို့စာရေးလိုက်သည်– “ကင်းမျှော်စင် ရဲ့ ‘စိတ်ဒုက္ခရောက်ချိန်တွင် သက်သာမှုရှာတွေ့နိုင်’a ဆောင်းပါးမှာပါတဲ့ သိပ်ကောင်းတဲ့အကြောင်းအရာတွေအတွက် သင်တို့ကိုအများကြီးကျေးဇူးတင်ပါတယ်။ သင်တို့ထုတ်နှုတ်ဖော်ပြတဲ့ အချက်အလက်များစွာဟာ ကျွန်မတွေ့ ကြုံခဲ့ရတဲ့ခံစားချက်တွေအတိုင်းပါပဲ; အဲဒီဆောင်းပါးက ကျွန်မအတွက်တိုက်ရိုက်ရေးထားသလိုပါပဲ။ ပထမအကြိမ် ဖတ်တဲ့အခါမှာ ကျွန်မမျက်ရည်ကျမိတယ်။ ကျွန်မရဲ့ခံစားချက်ကို တစ်ယောက်ယောက်ကသိနေတယ်လို့ သဘောပေါက်လာတော့ အံ့ဩစရာကောင်းလိုက်တာ! ကျွန်မယေဟောဝါသက်သေတစ်ယောက်ဖြစ်ရတာ သိပ်ကိုကျေးဇူးတင်မိတယ်။ မဝေးတော့တဲ့အနာဂတ်မှာ ပရဒိသုအတွင်းထာဝရအသက်ရမဲ့ကတိတော်တွေကို တခြားဘယ်မှာသွားရှာတွေ့နိုင်မှာလဲ။ အခု အဲဒါတွေက ကျွန်မတို့ရဲ့စိုးလ်ကို နှစ်သိမ့်မှုပေးတယ်! ကျေးဇူးတင်ပါတယ်။ ကျေးဇူးကုဋေကုဋာပါပဲ။”

^၂ ထိုသို့သင်ခံစားရဖူးသလော။ ကင်းမျှော်စင် သို့မဟုတ် ယင်း၏တွဲဖက် နိုးလော့! ဂျာနယ်တို့သည် သင့်အတွက်အထူးရေးသားထားသယောင် ကြုံဖူးပါသလော။ ကျွန်ုပ်တို့၏မဂ္ဂဇင်းများပါမည်သည့်အချက်များက လူများ၏နှလုံးကိုဆွဲဆောင်သနည်း။ ယင်းတို့တွင်ပါဝင်သည့်အသက်ကယ်သတင်းမှ အကျိုးရရှိအောင် အခြားသူများအား ကျွန်ုပ်တို့မည်သို့ကူညီနိုင်မည်နည်း။—၁ တိမောသေ ၄:၁၆။

သမ္မာတရားကိုထောက်ခံသောမဂ္ဂဇင်းများ

၃။ မည်သည့်ခိုင်လုံသောအကြောင်းများကြောင့် ကင်းမျှော်စင် နှင့် နိုးလော့! မဂ္ဂဇင်းတို့သည် စာဖတ်သူများစွာအား ထိမိခဲ့သနည်း။

^၃ ယေဟောဝါသည် “သမ္မာတရား၏ဘုရားသခင်” ဖြစ်သည်။ (ဆာလံ ၃၁:၅၊ ကဘ) ကိုယ်တော့်နှုတ်ကပါဌ်တော်သမ္မာကျမ်းစာသည် သမ္မာတရားစာအုပ်ဖြစ်သည်။ (ယောဟန် ၁၇:၁၇) စိတ်နှလုံးရိုးဖြောင့်သူများသည် သမ္မာတရားကိုတုံ့ပြန်ကြသည်။ (ယောဟန် ၄:၂၃၊ ၂၄ နှိုင်းယှဉ်။) ကင်းမျှော်စင် နှင့် နိုးလော့! တို့သည် ယင်းတို့ကိုဖတ်ရှုသူသန်းပေါင်းများစွာ၏စိတ်တွင် နက်ရှိုင်းစွာစွဲမြဲထင်ဟပ်နေရသည့်အကြောင်းတစ်ခုမှာ ယင်းတို့သည် သမာဓိနှင့်သမ္မာတရားဂျာနယ်များ ဖြစ်သောကြောင့်ပင်။ အမှန်သော် ကျမ်းစာသမ္မာတရားကို သစ္စာစောင့်သိခြင်းနှင့်ပတ်သက်၍ ပြဿနာပေါ်ပေါက်လာသောကြောင့် ကင်းမျှော်စင် ကိုစတင်ထုတ်ဝေရခြင်းဖြစ်သည်။

၄၊ ၅။ (က) မည်သည့်အခြေအနေများက စီ. တီ. ရပ်စယ်လ်အားကင်းမျှော်စင် ထုတ်ဝေရန်ဖြစ်စေခဲ့သနည်း။ (ခ) ကင်းမျှော်စင် ဂျာနယ်ကို “သစ္စာနှင့်သတိပညာရှိကျေးကျွန်” က မည်သို့အသုံးပြုသနည်း။

^၄ ၁၈၇၆ ခုနှစ်က ချားလ်စ် တီ. ရပ်စယ်လ်သည် နယူးယောက်ပြည်နယ်၊ ရိုချက်စတာမြို့မှ နယ်လ်ဆင် အိပ်ချ်. ဘာဘာနှင့် တစ်ဖွဲ့တည်းဖြစ်ခဲ့သည်။ ဘာဘာ၏ အချိန်မှန်ထုတ် ဘာသာတရားနှင့်ဆိုင်သော နံနက်သံတော်ဆင့် စာစောင်ကို ပုံနှိပ်ထုတ်ဝေနိုင်ရေးတွင် ပြန်လည်ဖော်ထုတ်ရန် ရပ်စယ်လ်က ငွေကြေးထောက်ပံ့ပြီး ဘာဘာကစာတည်းမှူး၊ ရပ်စယ်လ်က လက်ထောက်စာတည်းမှူးအဖြစ် လုပ်ဆောင်ခဲ့ကြသည်။ သို့သော် တစ်နှစ်ခွဲခန့် ကြာသောအခါ ၁၈၇၈ ခု၊ ဩဂုတ်လထုတ်တွင် ဘာဘာက ခရစ်တော်သေခြင်း၏ရွေးနှုတ်နိုင်သည့်တန်ဖိုးကို ငြင်းပယ်သည့်ဆောင်းပါးတစ်ပုဒ်ကို ရေးသားခဲ့သည်။ ဘာဘာထက်အနှစ် ၃၀ ခန့်ငယ်သောရပ်စယ်လ်က “အရေးကြီးသောဘုရားသခင့်နှုတ်ကပါဌ်တော်မှသွန်သင်ချက်တစ်ခု” ဟုရည်ညွှန်းကာ ရွေးနှုတ်ဖိုးကိုထောက်ခံသည့်ဆောင်းပါးတစ်ပုဒ်ကို နောက်လထုတ်တွင် တုံ့ပြန်ရေးသားခဲ့သည်။ (မဿဲ ၂၀:၂၈) ဘာဘာနှင့် သမ္မာကျမ်းစာအရကျိုးကြောင်းဆင်ခြင်ရန် ထပ်ခါတလဲကြိုးပမ်းခဲ့ပြီး နောက်ဆုံးတွင် ရပ်စယ်လ်သည် သံတော်ဆင့် စာစောင်နှင့် လုံးဝအဆက်အသွယ်ဖြတ်ရန် ဆုံးဖြတ်လိုက်သည်။ ထိုဂျာနယ်၏ ၁၈၇၉ ခု၊ ဇွန်လထုတ်မှစ၍ လက်ထောက်စာတည်းအဖြစ် ရပ်စယ်လ်၏နာမည်လုံးဝပါမလာတော့ချေ။ နောက်တစ်လကြာသောအခါ အသက် ၂၇ နှစ်ရှိရပ်စယ်လ်သည် ရွေးနှုတ်ဖိုးကဲ့သို့သော ကျမ်းစာသမ္မာတရားများကို အစကတည်းကထောက်ခံသည့် ဇိအုန်ကင်းမျှော်စင်နှင့် ခရစ်တော်ရောက်ရှိခြင်းသံတော်ဆင့် (ယခုအခါ ကင်းမျှော်စင် ယေဟောဝါ၏နိုင်ငံတော်ကိုကြေညာခြင်း ဟုသိကြ) စာစောင်ကို စတင်ပုံနှိပ်လာသည်။

^၅ ကင်းမျှော်စင် သည် ကျွမ်းကျင်သည့်ရှေ့နေတစ်ဦးကဲ့သို့ ကျမ်းစာသမ္မာတရားနှင့် အယူဝါဒများကိုကာကွယ်သူအဖြစ် လွန်ခဲ့သော ၁၁၄ နှစ်တိုင်တိုင်ရပ်တည်လာခဲ့သည်။ ထုတ်ဝေလာသည့်တစ်လျှောက်တွင် ယင်းကိုလေးမြတ်သည့် စာဖတ်သူသန်းပေါင်းများစွာတို့၏ ယုံကြည်စိတ်ချမှုကို ရလာခဲ့သည်။ ယင်းသည် ရွေးနှုတ်ဖိုးကို အင်တိုက်အားတိုက်ဆက်လက်ထောက်ခံဆဲဖြစ်သည်။ (ဥပမာ၊ ၁၉၉၁ ခု၊ ဖေဖော်ဝါရီ ၁၅ ရက်ထုတ်ကိုရှု။) ယင်းသည် ‘သစ္စာနှင့်သတိပညာရှိသောကျွန်’ နှင့် ယင်း၏အုပ်ချုပ်ရေးအဖွဲ့အတွက် တည်နေပြီဖြစ်သော ယေဟောဝါ၏နိုင်ငံတော်ကိုကြေညာရန်နှင့် “အချိန်တန်” ဝိညာဏအစာကိုဝေငှရန်အတွက် အဓိကကိရိယာတစ်ခုအဖြစ် ဆက်လက်ရှိလာခဲ့သည်။—မဿဲ ၂၄:၁၄၊ ၄၅။

၆၊ ၇။ ရွှေခေတ် ၏ဖော်ပြပါရည်မှန်းချက်ကား အဘယ်အရာဖြစ်ပြီး စဉ်းစားတတ်သူများက ယင်း၏သတင်းများကိုလက်ခံကြောင်း မည်သည့်အချက်ကတင်ပြသနည်း။

^၆ နိုးလော့! မဂ္ဂဇင်းကောမည်သို့နည်း။ စတင်ထုတ်ဝေသည့်အချိန်မှစ၍ နိုးလော့! သည်လည်း သမ္မာတရားကို ထောက်ခံလာခဲ့သည်။ မူလက ရွှေခေတ် ဟုခေါ်သောဤမဂ္ဂဇင်းသည် လူထုကိုဖြန့်ဝေရန်ရည်ရွယ်ခဲ့သည်။ ယင်း၏ရည်မှန်းချက်နှင့်ပတ်သက်၍ ပထမဆုံးထုတ်ဝေသော ၁၉၁၉ ခု၊ အောက်တိုဘာလ ၁ ရက်ထုတ်စာစောင်တွင် ဤသို့ရှင်းပြထားသည်– “ယင်း၏ရည်ရွယ်ချက်မှာ ယခုခေတ်ဖြစ်ပျက်နေသည့် ထူးခြားဆန်းကြယ်သောအရာများ၏ မှန်ကန်သောအဓိပ္ပာယ်ကို ဘုရားရေးရာဉာဏ်ပညာ၏အကူအညီဖြင့် ရှင်းပြရန်နှင့် လူသားများအတွက် သာ၍ကြီးမြတ်သောကောင်းချီးခံစားရမည့်အချိန်သည် နီးကပ်နေကြောင်းကို စဉ်းစားတတ်သူများ စောဒကတက်ဖွယ်မရှိ အခိုင်အမာယုံကြည်စိတ်ချနိုင်ရန်အတွက် သက်သေထူရန်တို့ဖြစ်သည်။” စဉ်းစားတတ်သူများသည် ရွှေခေတ် ပါအကြောင်းအရာများကို လက်သင့်ခံကြသည်။ ယင်းကို နှစ်ပေါင်းများစွာ ကင်းမျှော်စင်b ထက်ပင် စောင်ရေပို၍ထုတ်ဝေခဲ့သည်။

^၇ ကင်းမျှော်စင် နှင့် နိုးလော့! တို့၏ဆွဲဆောင်မှုသည် ယင်းတို့ကို အယူဝါဒဆိုင်ရာအမှန်တရားဖြန့်ဝေခြင်းနှင့် ကမ္ဘာ့အချင်းအရာများဆိုင်ရာ ပရောဖက်ပြုထူးခြားထင်ရှားချက်များကို ရှင်းလင်းပြခြင်းတို့ကြောင့်သာမကပါ။ အထူးသဖြင့် လွန်ခဲ့သည့်ဆယ်စုနှစ်တစ်ခုနှစ်ခုလောက်က ကျွန်ုပ်တို့၏မဂ္ဂဇင်းများသည် အခြားအကြောင်းကြောင့်လည်း လူတို့၏နှလုံးကိုဖမ်းစားခဲ့သည်။

လူတို့၏ဘဝကိုအကျိုးသက်ရောက်သော အခန့်သင့်ဆောင်းပါးများ

၈။ မိမိ၏စာကိုဖတ်ရှုသူများအား အသင်းတော်အတွင်းအဘယ်သြဇာလွှမ်းမိုးမှုကို တွန်းလှန်ရန် တိုက်တွန်းခြင်းဖြင့် ယုဒသည် မည်သည့်ပြုပြင်ပြောင်းလဲရေးသားမှုကို ပြုခဲ့ရသနည်း။

^၈ ယေရှုသေလွန်၍ရှင်ပြန်ထမြောက်ပြီးနောက် နှစ်ပေါင်း ၃၀ ခန့် ကြာသောအခါ သမ္မာကျမ်းစာရေးသားသူယုဒသည် ဆိုင်ပြိုင်လာသည့်အခြေအနေတစ်ရပ်ကို ရင်ဆိုင်ခဲ့ရသည်။ စာရိတ္တယိုယွင်း၍ တိရိစ္ဆာန်သဘောရှိသောလူများသည် ခရစ်ယာန်များထဲသို့မသိမသာစိမ့်ဝင်လာသည်။ ယုဒက ခရစ်ယာန်ချင်းတို့အား အယူဝါဒနှင့်ဆိုင်သောအကြောင်းအရာ—ဘိသိက်ခံခရစ်ယာန်များစွဲကိုင်ထားသည့် ကယ်တင်ခြင်းအကြောင်းကို ရေးသားရန်ရည်ရွယ်ခဲ့သည်။ ယင်းအစား အသင်းတော်အတွင်း အဖျက်သြဇာလွှမ်းမိုးမှုကိုတွန်းလှန်ရန် မိမိ၏စာဖတ်သူများအား တိုက်တွန်းဖို့လိုအပ်ကြောင်း သန့်ရှင်းသောဝိညာဉ်တော်၏ညွှန်ကြားမှုအားဖြင့် သူသိမြင်ခဲ့သည်။ (ယုဒ ၃၊ ၄၊ ၁၉-၂၃) အခြေအနေကို ယုဒပြောင်းလဲလိုက်ပြီး သူ့ခရစ်ယာန်ညီအစ်ကိုများ၏လိုအပ်ရာများနှင့် အခန့်သင့်သြဝါဒကို ပေးလိုက်သည်။

၉။ ကျွန်ုပ်တို့၏ဂျာနယ်များအတွက် အခန့်သင့်ဆောင်းပါးများကိုပြင်ဆင်ရခြင်းတွင် မည်သည့်အရာပါဝင်သနည်း။

^၉ အလားတူပင် ကျွန်ုပ်တို့၏ဂျာနယ်အတွက် အခန့်သင့်ဆောင်းပါးများကိုပြင်ဆင်ရခြင်းသည် စိန်ခေါ်နေသောတာဝန်တစ်ရပ်ဖြစ်သည်။ အချိန်နှင့်လိုက်၍ လူများလည်းပြောင်းလဲလာရာ—သူတို့၏လိုအပ်ရာများနှင့် စိတ်ဝင်စားရာများသည် လွန်ခဲ့သည့်ဆယ်စုနှစ်တစ်ခုနှစ်ခုလောက်ကနှင့် မတူတော့ချေ။ နယ်လှည့်ကြီးကြပ်မှူးတစ်ဦး မကြာမီကသတိထားမိသကဲ့သို့ပင်ဖြစ်သည်– “ကျွန်တော်သက်သေခံဖြစ်လာတဲ့ ၁၉၅၀ ခုနှစ်ကျော်အချိန်တွေကဆိုရင် လူတွေကိုကျမ်းစာသင်ဖို့ချဉ်းကပ်မှုဟာ အခြေခံအားဖြင့် အယူဝါဒပိုင်းဖြစ်တယ်—သုံးပါးပေါင်းတစ်ဆူ၊ မီးငရဲ၊ စိုးလ်စသည်တို့နဲ့ပတ်သက်တဲ့ အမှန်တရားကို သင်ပေးခြင်းဖြစ်တယ်။ ဒါပေမဲ့ အခုကျတော့ လူတွေရဲ့အသက်တာမှာ အခက်အခဲတွေ၊ ပြဿနာတွေများလွန်းအားကြီးပုံပေါက်လို့ ဘယ်လိုအသက်ရှင်နေထိုင်ရမယ်ဆိုတာကို ကျွန်တော်တို့သင်ပေးနေရတယ်။” အဘယ်ကြောင့်ထိုသို့ ဖြစ်ရသနည်း။

၁၀။ ၁၉၁၄ ခုနှစ်မှစ၍ လူသားရေးရာများ တဖြည်းဖြည်းဆုတ်ယုတ်ကျဆင်းလာခြင်းကို အဘယ်ကြောင့်ကျွန်ုပ်တို့မအံ့သြသင့်သနည်း။

^၁၀ “နောက်ဆုံးကာလ” (ကဘ) နှင့်ပတ်သက်၍ ကျမ်းစာကြိုတင်ဖော်ပြထားသည်– “ဆိုးညစ်သောသူ၊ လှည့်ဖြားသောသူတို့မူကား သူတစ်ပါးကိုလည်းကောင်း၊ ကိုယ်ကိုလည်းကောင်း လှည့်ဖြား၍ ဆိုးညစ်ခြင်း၌ တရွေ့ရွေ့တိုးပွားကြလိမ့်မည်။” (၂ တိမောသေ ၃:၁၊ ၁၃) ထို့ကြောင့် ၁၉၁၄ ခုနှစ်မှစ၍ ဆုံးခန်းကာလစတင်ခဲ့ပြီဖြစ်ရာ လူသားရေးရာများ တဖြည်းဖြည်းဆုတ်ယုတ်ကျဆင်းလာခြင်းကို ကျွန်ုပ်တို့မအံ့သြသင့်ပါ။ စာတန်အတွက် သာ၍အချိန်တိုတောင်းလာပြီဖြစ်ရာ တစ်ခါနှင့်မျှမတူအောင် လူသားလောကအပေါ် သူ၏ဒေါသကိုသွန်ချနေသည်။ (ဗျာဒိတ် ၁၂:၉၊ ၁၂) ရလဒ်အနေနှင့် စာရိတ္တနှင့်မိသားစုတို့ဆိုင်ရာတန်ဖိုးသည် လွန်ခဲ့သည့်အနှစ် ၃၀ သို့မဟုတ် ၄၀ လောက်ကနှင့် အခြားကြီးခြားသွားသည်။ သာမန်လူများသည် လွန်ခဲ့သည့်ဆယ်စုနှစ်များကလောက် ဘာသာတရားကိုင်းရှိုင်းမှုမရှိကြတော့ချေ။ ရာဇဝတ်များဒင်းကြမ်းဖြစ်နေရကား လူတို့သည် လွန်ခဲ့သည့်အနှစ် ၂၀ သို့မဟုတ် ၃၀ ခန့်ကမကြားဖူးသည့် ကြိုတင်ကာကွယ်မှုများကို ပြုလုပ်နေကြရသည်။—မဿဲ ၂၄:၁၂။

၁၁။ (က) လူတို့စိတ်တွင် မည်သည့်အကြောင်းအရာများရှိနေပြီး သစ္စာနှင့်သတိပညာရှိကျေးကျွန်အတန်းအစားသည် လိုအပ်ချက်များကို မည်သို့ တုံ့ပြန်ပေးသနည်း။ (ခ) သင့်ဘဝကိုထိမိစေသော ကင်းမျှော်စင် သို့မဟုတ် နိုးလော့! တစ်စောင်စောင်ကို ဥပမာပေးပါ။

^၁၁ ထိုကြောင့် စိတ်ပိုင်းဆိုင်ရာ၊ လူမှုရေးဆိုင်ရာနှင့်မိသားစုဆိုင်ရာပြဿနာများသည် လူများစွာ၏စိတ်ထဲတွင်ကိန်းအောင်းနေသည်မှာ အဆန်းမဟုတ်ချေ။ သစ္စာနှင့်သတိပညာရှိကျေးကျွန်အတန်းအစားသည် ကင်းမျှော်စင် နှင့် နိုးလော့! တို့တွင် လူများ၏အမှန်လိုအပ်ချက်များနှင့် သူတို့၏ဘဝကိုအမှန်တကယ်ထိမိစေသောအချက်များကို အခန့်သင့်ဆောင်းပါးများအားဖြင့်တုံ့ပြန်ခဲ့သည်။ ဥပမာအချို့ကို သုံးသပ်ကြည့်ပါ။

၁၂။ (က) ကြင်ဖော်မဲ့မိဘရှိမိသားစုများနှင့် ပတ်သက်သည့်ဆောင်းပါးများကို ၁၉၈၁ ခုထုတ် ကင်းမျှော်စင် အတွက်အဘယ်ကြောင့်ပြင်ဆင်ပေးခဲ့ရသနည်း။ (ခ) ကြင်ဖော်မဲ့မိဘရှိမိသားစုများနှင့် ပတ်သက်သည့်ဆောင်းပါးများအတွက် ကျေးဇူးတင်လေးမြတ်မှုကို ညီအစ်မတစ်ဦးမည်သို့တင်ပြခဲ့သနည်း။

^၁၂ မိသားစုပြဿနာများ။ ကြင်ဖော်မဲ့မိဘရှိမိသားစုအရေအတွက်သည် လျင်မြန်စွာတိုးများလာကြောင်း ကမ္ဘာချီမှတ်တမ်းများကတင်ပြသောအခါ “မိဘတစ်ဦးတည်းရှိမိသားစုများ—ပြဿနာတို့ကိုကိုင်တွယ်နိုင်နင်းခြင်း” ခေါင်းစဉ်အောက်ရှိ ဆန်းသစ်သောဆောင်းပါးများကို ၁၉၈၁ ခု၊ နိုဝင်ဘာ ၁၅ ရက်ထုတ် ကင်းမျှော်စင် အတွက် ပြင်ဆင်ခဲ့သည်။ ဆောင်းပါးများသည် ရည်ရွယ်ချက်နှစ်မျိုးရှိသည်– (၁) ကြင်ဖော်မဲ့မိဘများရင်ဆိုင်ရသည့် ထူးခြားသောပြဿနာများကို သူတို့ဖြေရှင်းနိုင်အောင် အကူအညီပေးရန်၊ (၂) အခြားသူများသည် ကြင်ဖော်မဲ့မိဘရှိမိသားစုများအပေါ် “အဖော်အဖက်စိတ်ဓာတ်” (ကဘ) ကိုတင်ပြပြီး သူတို့အား အမှန် “ကြည့်ရှုပြုစု” ရန်အလို့ငှာ သူတို့အား ကောင်းစွာသိနားလည်စေရန်ဖြစ်သည်။ (၁ ပေတရု ၃:၈; ယာကုပ် ၁:၂၇) ထိုဆောင်းပါးများအတွက် စာဖတ်သူများစွာတို့ထံမှ ကျေးဇူးတင်စာများကို လက်ခံရရှိခဲ့သည်။ “မျက်နှာဖုံးကိုမြင်လိုက်တော့ ကျွန်မမျက်ရည်ကျမိတယ်။ မဂ္ဂဇင်းကိုကျွန်မဖွင့်ပြီး အကြောင်းအရာကိုဖတ်လိုက်တဲ့အခါမှာတော့ လိုအပ်နေတဲ့အချိန်မှာ အဲဒီလိုအကြောင်းအရာတွေကို ပေးသိတဲ့ယေဟောဝါကို ကျေးဇူးတင်တဲ့စိတ်တွေ ကျွန်မနှလုံးသားမှာပြည့်လျှံလာတယ်” ဟု ကြင်ဖော်မဲ့မိဘတစ်ဦးစာရေးခဲ့သည်။

၁၃။ ၁၉၈၁ ခုထုတ် နိုးလော့! (လိပ်) တွင် စိတ်ဓာတ်ကျဆင်းခြင်းနှင့်ပတ်သက်၍ မည်သည့်အကျယ်တဝင့်ဆွေးနွေးချက်ကို ထည့်သွင်းထုတ်ဝေပြီး ယင်းအကြောင်းစာဖတ်သူတစ်ဦးမည်သို့ပြောသနည်း။

^၁၃ စိတ်ပိုင်းဆိုင်ရာပြဿနာများ။ စိတ်ဓာတ်ကျဆင်းခြင်းအကြောင်းများကို ၁၉၆၀ ပြည့်လွန်နှစ်များမှစ၍ ကင်းမျှော်စင် နှင့် နိုးလော့! များတွင် ဖော်ပြလာခဲ့သည်။ (၁ သက်သာလောနိတ် ၅:၁၄) သို့သော် ထိုအကြောင်းနှင့်ပတ်သက်သည့် ဆန်းသစ်၍ အပြုသဘောဆောင်သည့်အမြင်ကို ၁၉၈၁ ခု၊ စက်တင်ဘာ ၈ ရက်ထုတ် နိုးလော့! (လိပ်) တွင် “စိတ်ဓာတ်ကျဆင်းမှုကိုသင်တိုက်လှန်နိုင်!” ဟူသောမျက်နှာဖုံးဆောင်းပါးအနေဖြင့် ပါရှိခဲ့သည်။ မကြာမီ ကင်းမျှော်စင်အသင်းသို့ ကမ္ဘာအရပ်ရပ်မှကျေးဇူးတင်စာများ စုပုံရောက်ရှိလာသည်။ ညီအစ်မတစ်ဦးဤသို့ရေးခဲ့သည်– “ကျွန်မနှလုံးသားထဲကခံစားချက်တွေကို ဘယ်လိုလုပ်ပြီးစာနဲ့ရေးပြနိုင်မှာလဲ။ ကျွန်မအသက် ၂၄ နှစ်ပါ။ လွန်ခဲ့တဲ့ ဆယ်နှစ်ကျော်လောက်အတွင်းက စိတ်ဓာတ်ကျဆင်းတဲ့အချိန်ခဏခဏကြုံခဲ့ရတယ်။ ဒါပေမဲ့ အခု ယေဟောဝါနဲ့ပိုမိုနီးကပ်လာပြီလို့ ကျွန်မခံစားရပြီး စိတ်ဓာတ်ကျဆင်းတဲ့သူတွေရဲ့လိုအပ်ချက်တွေကို ဒီမေတ္တာပါတဲ့ဆောင်းပါးတွေနဲ့ ကိုယ်တော်တုံ့ပြန်ပေးတယ်လို့ ကျွန်မပြောပါရစေ။”

၁၄၊ ၁၅။ (က) မတော်မတရားပြုကျင့်ခြင်းနှင့်ပတ်သက်၍ ကျွန်ုပ်တို့၏ဂျာနယ်များတွင် မည်သို့ပါရှိခဲ့သနည်း။ (ခ) အဘယ်မဂ္ဂဇင်းဆောင်းပါးများသည် ဩစတြေးလျားနိုင်ငံရှိ ပြိုင်မြင်းစီးသမားတစ်ဦးကို ထိခိုက်စွဲမှတ်စေခဲ့သနည်း။

^၁၄ လူမှုရေးပြဿနာများ။ “နောက်ဆုံးကာလ” တွင် “လူတို့သည် ကိုယ်ကိုချစ်သောသူ၊ . . . ပင်ကိုယ်အရချစ်ခင်စုံမက်ခြင်းမရှိသောသူ၊ . . . ချုပ်တည်းခြင်းမရှိသောသူ၊ ပြင်းထန်သောသူ၊ ကောင်းမှုကိုမချစ်သောသူ” များဖြစ်ကြမည်။ (၂ တိမောသေ ၃:၁-၃၊ ကဘ) ထို့ကြောင့် ယနေ့ အဓမ္မမှုများကို ကြီးမားသည့်အတိုင်းအတာဖြင့်ပြုနေကြခြင်းအတွက် ကျွန်ုပ်တို့မအံ့သြသင့်ပေ။ ဤအကြောင်းနှင့်ပတ်သက်၍ ပွင့်လင်းသည့်ဖြေရှင်းနည်းကို ၁၉၈၃ ခု၊ အောက်တိုဘာ ၁ ရက်ထုတ် ကင်းမျှော်စင် (လိပ်) တွင် ဆောင်းပါးပါရှိသည်။ နောက်ရှစ်နှစ်ကြာသောအခါ ၁၉၉၁ ခု၊ အောက်တိုဘာ ၈ ရက်ထုတ် နိုးလော့! (လိပ်) တွင်ပါလာသော ဆောင်းပါးသည် မတရားပြုခံရသူများအတွက် သိနားလည်မှုနှင့်မျှော်လင့်ချက်ကိုပေးရန်အပြင် အခြားသူများအတွက် အကူအညီဖြစ်စေသောအထောက်အမကိုပေးနိုင်ရန်အတွက်ပါ ဂရုတစိုက်ပြင်ဆင်ထားခြင်းဖြစ်သည်။ ဤဆောင်းပါးဆက်များသည် ကျွန်ုပ်တို့ဂျာနယ်၏သမိုင်းတစ်လျှောက်တွင် စာရေးသူများ၏အကြီးမားဆုံးသောတုံ့ပြန်မှုကို ဖြစ်ပေါ်စေခဲ့သည်။ စာဖတ်သူတစ်ဦးဤသို့ရေးသားခဲ့သည်– “ပြန်လည်ကောင်းမွန်လာဖို့ ထိထိမိမိဖြစ်စေတာကတော့ ဒီဆောင်းပါးမှာပါတဲ့ နှစ်သိမ့်မှုပေးတဲ့အကြံအစည်တွေနဲ့ ကျမ်းစာကိုးကားချက်တွေပါပဲ။ ကျွန်ုပ်ကို ယေဟောဝါအထင်မသေးဘူးလို့သိရတာက အံ့ဩစရာကောင်းတဲ့သက်သာမှုဖြစ်တယ်။ ကျွန်ုပ်တစ်ယောက်တည်းမဟုတ်ဘူးလို့ သိရတာကလည်း အလားတူနှစ်သိမ့်မှုကိုဖြစ်စေပါတယ်။”

^၁၅ ဩစတြေးလျားနိုင်ငံ၊ မဲလ်ဘုန်းမြို့ရှိ ပြိုင်မြင်းစီးသမားတစ်ဦးသည် ဆစ်ဒနီမြို့ရှိ ကင်းမျှော်စင်အသင်းရုံးသို့ အဝေးပြောဖုန်းဖြင့် ဖုန်းဆက်၍ မြင်းပြိုင်ပွဲလောကအပေါ် သူ၏နာကြည်းစက်ဆုပ်မှုကို ဖော်ပြခဲ့သည်။ ၁၉၉၃၊ မတ် ၈ ရက်ထုတ် နိုးလော့! (လိပ်) မဂ္ဂဇင်း၌ ဆောင်းပါးကို ခုလေးတင်ဖတ်ပြီး၍ ဤကဲ့သို့သောတန်ဖိုးရှိမဂ္ဂဇင်းမျိုးရှိသည်ကို မယုံကြည်နိုင်အောင်ဖြစ်ခဲ့သည်ဟု သူပြောသည်။ သူသည် မိနစ် ၃၀ ကြာ မေးခွန်းများမေးခဲ့ပြီး၊ ရရှိသောအဖြေများကို နှစ်ခြိုက်စွာနားထောင်ခဲ့သည်။

၁၆။ ကျွန်ုပ်တို့၏ဂျာနယ်များအတွက် ကျေးဇူးတင်လေးမြတ်မှုကို မည်သည့်နည်းဖြင့်သင်တင်ပြနိုင်သနည်း။

^၁၆ အသင်ကောမည်သို့နည်း။ ကင်းမျှော်စင် သို့မဟုတ် နိုးလော့! တို့တွင်ပါဝင်သော ထူးခြားသည့်ဆောင်းပါးတစ်ခုခုက သင့်ဘဝကိုထိမိခြင်းရှိပါသလော။ သို့ ဖြစ်ပါက ကျွန်ုပ်တို့ဂျာနယ်များအတွက် သင်လှိုက်လှိုက်လှဲလှဲကျေးဇူးတင်လိုစိတ်ရှိမည်မှာ သေချာပါသည်။ သင့်ကျေးဇူးတင်ခြင်းကို မည်သည့်နည်းဖြင့်ဖော်ပြနိုင်သနည်း။ လထုတ်တိုင်းကို သင်ကိုယ်တိုင်ဖတ်ရှုခြင်းအားဖြင့်ဖြစ်သည်။ ဤတန်ဖိုးရှိဂျာနယ်များကို အတတ်နိုင်ဆုံးကျယ်ကျယ်ပြန့်ပြန့် ဖြန့်ဝေခြင်းအားဖြင့်လည်း ဖြစ်နိုင်သည်။ ယင်းမည်သို့ ဖြစ်နိုင်သနည်း။

အခြားသူများကိုဝေငှလေ!

၁၇။ မဂ္ဂဇင်းဝေငှခြင်းတိုးတက်ရန် အသင်းတော်များမည်သို့လုပ်ဆောင်နိုင်သနည်း။

^၁၇ ပထမအနေနှင့် အသင်းတော်တိုင်းလုပ်နိုင်သည့်အရာတစ်ခုရှိသည်။ ၁၉၅၂ ခု၊ အောက်တိုဘာလထုတ် သတင်းပေးသူ (ယခု ကျွန်ုပ်တို့၏နိုင်ငံတော်ဓမ္မအမှု) စာစောင်က “မဂ္ဂဇင်းကို အထိရောက်ဆုံးဖြန့်ဝေနိုင်သည့်နည်းလမ်းများမှာ တစ်အိမ်မှတစ်အိမ်၊ တစ်ဆိုင်မှတစ်ဆိုင်ဖြန့်ဝေခြင်းဖြစ်သည်။ ထို့ကြောင့် ဤမဂ္ဂဇင်းဖြန့်ဝေနည်းများသည် မဂ္ဂဇင်းနေ့လုပ်ဆောင်မှုအတွက် ပုံမှန်အစိတ်အပိုင်းတစ်ရပ်ဖြစ်ရမည်ဟု အသင်းမကထောက်ခံအားပေးသည်” ဟုဖော်ပြပါရှိသည်။ ထိုအကြံပြုချက်သည် ယနေ့အထိအတည်ဖြစ်လျက်ရှိသည်။ အသင်းတော်များသည် ပုံမှန်မဂ္ဂဇင်းနေ့၊ အဓိကအားဖြင့် မဂ္ဂဇင်းနှင့်သက်သေခံခြင်းအတွက် သတ်မှတ်ထားသည့်နေ့တစ်နေ့ စီစဉ်ထားနိုင်သည်။ အသင်းတော်အများစုတို့အတွက် သတ်မှတ်ထားသည့်စနေနေ့များသည် သင့်လျော်သောနေ့များဖြစ်သည်။ မှန်ပါသည်၊ အသင်းတော်တိုင်းသည် တစ်အိမ်မှတစ်အိမ်၊ တစ်ဆိုင်မှတစ်ဆိုင်၊ လမ်းပေါ်သက်သေခံခြင်း၊ မဂ္ဂဇင်းလမ်းကြောင်းများအားဖြင့်—မဂ္ဂဇင်းနှင့်သက်သေခံခြင်းအတွက် အထူးနေ့ရက်များ သို့မဟုတ် ညနေပိုင်းအချိန်များကို သတ်မှတ်ထားပေးသင့်သည်။ ထို့အပြင် ဘုရားနိုင်ငံတော်ကြေညာသူအသင်တို့အတွက် မဂ္ဂဇင်းကိုတိုးချဲ့ဝေငှနိုင်သည့် အခြားမည်သည့်နည်းများရှိသေးသနည်း။

၁၈၊ ၁၉။ (က) ကင်းမျှော်စင် နှင့် နိုးလော့! မဂ္ဂဇင်းများကိုအာရုံစိုက်ခြင်းက မဂ္ဂဇင်းဝေငှနိုင်ရန် သင့်အားမည်သို့အကူအညီဖြစ်စေသနည်း။ (ခ) မဂ္ဂဇင်းများဝေငှစဉ် လိုရင်းတိုရှင်းတင်ပြခြင်းဖြင့် အဘယ်သင့်လျော်သောအခွင့်အရေးရှိသနည်း။ (ဂ) မဂ္ဂဇင်းကို လူများ၏အိမ်ထဲရောက်ရှိစေခြင်း၏တန်ဖိုးကို မည်သည့်အရာကဖော်ပြသနည်း။

^၁၈ “ကင်းမျှော်စင်” နှင့် “နိုးလော့!” တို့ကိုအာရုံစိုက်ခြင်း သည် ပထမခြေလှမ်းဖြစ်သည်။ မဂ္ဂဇင်းများကို ကြိုတင်ဖတ်ရှုပါ။ ဆောင်းပါးတစ်ပုဒ်စီဖတ်တိုင်း ‘ဒီဆောင်းပါးက ဘယ်သူ့ကိုစိတ်ဝင်စားစေမလဲ’ ဟု ကိုယ့်ကိုယ်ကိုမေးပါ။ ဆောင်းပါးမှ စိတ်ဝင်စားမှုနှိုးဆွစေနိုင်သည့်စကားအနည်းငယ်ကို စဉ်းစားကြည့်ပါ။ ပုံမှန်မဂ္ဂဇင်းနေ့ကို အားပေးခြင်းအပြင် ယင်းတို့ကို အခြားသူများအား အခွင့်အရေးရတိုင်း—ခရီးသွားစဉ် သို့မဟုတ် ဈေးဝယ်စဉ်၊ လုပ်ဖော်ကိုင်ဖက်ချင်း၊ အိမ်နီးချင်း၊ ကျောင်းနေဖက်ချင်း သို့မဟုတ် ဆရာဆရာမများနှင့် စကားပြောနေစဉ် ဝေငှနိုင်ရန် စာစောင်များကိုသယ်သွားပါလေ။

^၁၉ ရိုးရိုးကလေးတင်ပြခြင်း သည် ဒုတိယအကြံပြုချက်ဖြစ်သည်။ ၁၉၅၆ ခု၊ ဒီဇင်ဘာ ၁ ရက်ထုတ် ကင်းမျှော်စင် (လိပ်) က ဤသို့ဖော်ပြထားသည်– “မဂ္ဂဇင်းဝေငှသောအခါ လိုရင်းတိုရှင်းတင်ပြနည်းသည် အကောင်းဆုံးဖြစ်သည်။ ရည်ရွယ်ချက်ကား မဂ္ဂဇင်းများများဝေငှနိုင်ရေးဖြစ်သည်။ ‘စကားပြောခြင်း’ ကို ယင်းတို့ဘာသာလုပ်ကြမည်ဖြစ်သည်။” ဆောင်းပါးတစ်ခုမှ အကြောင်းအရာတစ်ခုကိုကောက်နှုတ်ပြီး ကိုယ်ပိုင်စကားဖြင့်ပြော၍ မဂ္ဂဇင်းဝေငှခြင်းသည် ထိရောက်မှုရှိကြောင်း အချို့ကြေညာသူများတွေ့ရှိရသည်။ မဂ္ဂဇင်းသည် အိမ်ထဲသို့ရောက်ရှိသည်နှင့် သင့်ထံမှလက်ခံရရှိသူအပြင် အခြားသူများအား ‘စကားပြော’ ပေလိမ့်မည်။ အိုင်ယာလန်နိုင်ငံတွင် တက္ကသိုလ်ကျောင်းသူတစ်ဦးသည် သူမ၏ဖခင်က သက်သေခံတစ်ဦးထံမှရရှိသော ၁၉၉၁ ခု၊ စက်တင်ဘာ ၁ ရက်ထုတ် ကင်းမျှော်စင် ကိုဖတ်မိသည်။ “ဆက်သွယ်ခြင်း” နှင့်ပတ်သက်သောဆောင်းပါးများနှင့် အခြားဆောင်းပါးများသည် သူမ၏စိတ်ဝင်စားမှုကို လှုံ့ဆော်ခဲ့သည်။ မဂ္ဂဇင်းကိုဖတ်ပြီးပြီးချင်း တယ်လီဖုန်းလမ်းညွှန်စာအုပ်တွင်ပါသော သက်သေခံတို့၏ဖုန်းနံပါတ်ကို ခေါ်တော့သည်။ မကြာမီ ကျမ်းစာသင်အံမှုစတင်ကျင်းပပြီး ထိုမိန်းကလေးသည် ၁၉၉၃ ခု၊ ဇူလိုင်လတွင်ကျင်းပသည့် “မြင့်မြတ်သောသွန်သင်ခြင်း” ခရိုင်စည်းဝေးပွဲတွင် နှစ်ခြင်းခံခဲ့သည်။ မဂ္ဂဇင်းများကို ယင်းတို့ကိုယ်တိုင် လူများဖြင့် “စကားပြော” နိုင်သောနေရာဖြစ်သည့် အိမ်များထဲသို့ ဘယ်နည်းဖြင့်မဆို အရောက်ပို့ပါလေ! နယ်လှည့်ကြီးကြပ်မှူးတစ်ဦးက အခြားသောရိုးရှင်းသည့်အကြံတစ်ခုကိုပေးသည်– “သင့်အိတ်ထဲကမဂ္ဂဇင်းတွေကို ထုတ်လိုက်ပါ။” အမှန်ပင်ဖြစ်သည်။ သင်ပြောသည့်အရာက အိမ်ရှင်အားစိတ်ဝင်စားမှုမဖြစ်စေလျှင် ဆွဲဆောင်မှုရှိသောမျက်နှာဖုံးရုပ်ပုံများက သင့်အတွက်မဂ္ဂဇင်းများဝေငှပေးနိုင်ပေလိမ့်မည်။

၂၀၊ ၂၁။ (က) မဂ္ဂဇင်းလုပ်ငန်းတွင်ပါဝင်စဉ် သင်မည်သို့ပြောင်းသာလွဲသာလုပ်နိုင်သနည်း။ (ခ) လစဉ် မဂ္ဂဇင်းပိုမိုဝေငှနိုင်ရန် သင်ဘာလုပ်နိုင်မည်နည်း။

^၂၀ တတိယအကြံပြုချက်ကား ပြောင်းသာလွဲသာရှိပါ။ (၁ ကောရိန္သု ၉:၁၉-၂၃ နှိုင်းယှဉ်။) တိုတိုတုတ်တုတ်တင်ပြချက်အချို့ကို ပြင်ဆင်ထားပါ။ ယောက်ျားများအတွက် ဆွဲဆောင်မှုရှိမည့်ဆောင်းပါးတစ်ပုဒ်၊ မိန်းမများအတွက် ဆွဲဆောင်မှုရှိမည့်အခြားဆောင်းပါးတစ်ပုဒ်တို့ကို မှတ်ထားပါ။ လူငယ်များအတွက် “လူငယ်များအမေး . . . ” ကဏ္ဍကို သင်တင်ပြလိုပေမည်။ မဂ္ဂဇင်းလုပ်ငန်းတွင်ပါဝင်စဉ် ပြောင်းသာလွဲသာရှိပါ။ မဂ္ဂဇင်းနေ့အပြင် ညနေပိုင်းသက်သေခံခြင်းကလည်း တစ်အိမ်မှတစ်အိမ်မဂ္ဂဇင်းဝေငှနိုင်ရန် အကောင်းဆုံးအခွင့်အရေးကိုရရှိစေကြောင်း သင်တွေ့ရပေမည်။

^၂၁ စတုတ္ထအကြံပြုချက်ကား ကိုယ်ပိုင်ပန်းတိုင်ထားရှိရန် ဖြစ်သည်။ ၁၉၈၄ ခု၊ မတ်လထုတ် ကျွန်ုပ်တို့၏နိုင်ငံတော်ဓမ္မအမှု ၏ ကြားညှပ်စာရွက်ပါ “မဂ္ဂဇင်းများသည် အသက်လမ်းကိုညွှန်ပြ” ဟူသောဆောင်းပါးတွင် ဤသို့ဖော်ပြထားသည်– “အကြံပြုချက်တစ်ခုအနေနှင့် ကြေညာသူများသည် မိမိတို့အခြေအနေပေါ်မူတည်၍ တစ်လလျှင် ဥပမာအားဖြင့် မဂ္ဂဇင်းဆယ်စောင်ပန်းတိုင်ထားနိုင်သည်; ရှေ့ဆောင်များမူ ၉၀ ထားနိုင်သည်။ အချို့ကြေညာသူများသည် တစ်လလျှင်မဂ္ဂဇင်းများပိုမိုဝေငှနိုင်ရာ ပိုမြင့်မားသည့်ကိုယ်ပိုင်ပန်းတိုင်ကိုထားရှိပေမည်။ သို့သော် ကျန်းမာရေးချို့တဲ့မှု၊ နယ်မြေအမျိုးအစား သို့မဟုတ် အခြားခိုင်လုံသောအကြောင်းများကြောင့် အချို့တို့အတွက်ပန်းတိုင်သည် နိမ့်ပေမည်။ သို့တိုင် ယေဟောဝါအတွက်သူတို့၏အမှုဆောင်ခြင်းသည် တန်ဖိုးရှိလျက်ပင်ဖြစ်သည်။ (မ. ၁၃:၂၃; လုကာ ၂၁:၃၊ ၄) အရေးကြီးသည်ကား ကိုယ်ပိုင်ပန်းတိုင်ထားရှိရန်ပင်ဖြစ်သည်။”

၂၂။ ကျွန်ုပ်တို့၏ အခန့်သင့်သမ္မာတရားဂျာနယ်များအတွက် ယေဟောဝါအားကျေးဇူးတင်ကြောင်း မည်သည့်နည်းဖြင့်တင်ပြနိုင်သနည်း။

^၂၂ “သမ္မာတရား၏ဘုရားသခင်” ယေဟောဝါသည် သစ္စာနှင့်သတိပညာရှိသောကျေးကျွန်အတန်းအစားနှင့် ယင်း၏အုပ်ချုပ်ရေးအဖွဲ့ကိုအသုံးပြုပြီး ဤအခန့်သင့်ဂျာနယ်များကိုစီစဉ်ပေးသည့်အတွက် ကျွန်ုပ်တို့မည်မျှကျေးဇူးတင်ကြပါသည်တကား! (ဆာလံ ၃၁:၅၊ ကဘ) ယေဟောဝါအလိုတော်ရှိသရွေ့ ဤမဂ္ဂဇင်းများသည် လူများ၏အမှန်လိုအပ်ချက်များအတွက် ဆက်လက်၍ ထိထိရောက်ရောက်အကူအညီပေးသွားပေမည်။ ယင်းတို့သည် ယေဟေဝါ၏မြင့်မားသောစာရိတ္တစံချိန်ကို ဆက်လက်ထောက်ခံနေပေမည်။ မှန်ကန်သောအယူဝါဒကို မြှင့်တင်ရာတွင်ရပ်ဆိုင်းမည်မဟုတ်ပါ။ ဘုရားသခင့်နိုင်ငံတော်အုပ်ချုပ်နေပြီး အရေအတွက်တိုးတက်နေသော ယေဟောဝါဝတ်ပြုသူများအားဖြင့် တစ်ခါနှင့်မျှမတူအောင် မြေကြီးပေါ်တွင် ဘုရားသခင့်အလိုတော်ပြည့်စုံနေသောအချိန်ဖြစ်သည့် ကျွန်ုပ်တို့၏ခေတ်ကာလအား သတ်မှတ်ဖော်ပြသော ပရောဖက်ပြုချက်များ၏ပြည့်စုံချက်ကို ယင်းတို့က တစိုက်မတ်မတ်အာရုံစိုက်သွားစေမည်သာဖြစ်သည်။ (မဿဲ ၆:၁၀; ဗျာဒိတ် ၁၁:၁၅) ကင်းမျှော်စင် နှင့် နိုးလော့! အားဖြင့် အဖိုးမဖြတ်နိုင်သည့်ရတနာကို ကျွန်ုပ်တို့ရရှိထားပါသည်တကား။ လူတို့၏ဘဝကိုထိမိပြီး ဘုရားနိုင်ငံတော်သမ္မာတရားကို ခုခံကာကွယ်ပေးသည့် ဤအရေးပါသောဂျာနယ်များကို စိတ်ထားနူးညံ့သူများအားဝေငှပေးရန် ရသည့်အခွင့်အရေးတိုင်းကိုအသုံးပြုကြစို့။

[အောက်ခြေမှတ်ချက်များ]

သင့်အဖြေကားအဘယ်နည်း

◻ ကင်းမျှော်စင် နှင့် နိုးလော့! တို့သည် သမ္မာတရားဂျာနယ်များဖြစ်ကြောင်း မည်သည့်အချက်ကတင်ပြသနည်း။

◻ ကင်းမျှော်စင် နှင့် နိုးလော့! တို့သည် လူများ၏အသက်တာကို မည်သို့ထိမိခဲ့ပြီနည်း။

◻ မဂ္ဂဇင်းဝေငှခြင်းတိုးတက်ရန် အသင်းတော်များမည်သို့ ပြုနိုင်သနည်း။

◻ မဂ္ဂဇင်းပိုမိုဝေငှနိုင်ရန် မည်သည့်အကြံပြုချက်များက သင့်ကိုအကူအညီဖြစ်စေမည်နည်း။

[စာမျက်နှာ ၂၂ ပါ လေးထောင့်ကွက်]

လူတို့၏အသက်တာကိုထိမိစေခဲ့သော ဆောင်းပါးအချို့

နှစ်များတစ်လျှောက် ကင်းမျှော်စင် နှင့် နိုးလော့! တို့တွင်ပါသော ရှင်းလင်းပြတ်သားသည့်ဆောင်းပါးများအတွက် စာဖတ်သူများက ကျေးဇူးတင်စာများရေးလာခဲ့သည်။ အောက်ပါတို့သည် ကျွန်ုပ်တို့၏စာဖတ်သူများအား အကျိုးပြုခဲ့သည့်ဆောင်းပါးအနည်းငယ်ဖြစ်သည်။ ဤဆောင်းပါးများ သို့မဟုတ် အခြားဆောင်းပါးများက သင့်ဘဝကိုပြောင်းလဲစေခဲ့သလော။

ကင်းမျှော်စင်

“လျှို့ဝှက်အပြစ်များကိုအနိုင်ယူရန် ဘုရားအကူအညီကိုလက်ခံလေ” (၁၉၈၆ ခု၊ ဧပြီ ၁၅)

“သက်ကြီးရွယ်အိုမိဘများအား ဘုရားတရားဝတ်ပြုခြင်း” (၁၉၈၈ ခု၊ ဇွန် ၁)

“ရည်ရွယ်ချက်တစ်ခုရှိသောပညာရေး” (၁၉၉၂ ခု၊ နိုဝင်ဘာ ၁)

နိုးလော့!

“စိတ်ဓာတ်ကျဆင်းမှုကိုသင်တိုက်လှန်နိုင်!” (၁၉၈၁ ခု၊ စက်တင်ဘာ ၈ [လိပ်])

“မြတ်နိုးရသူတစ်ဦးကွယ်လွန်သောအခါ . . . ” (၁၉၈၅ ခု၊ ဧပြီ ၂၂ [လိပ်])

“သင့်ကလေးများကိုကာကွယ်ပါ!” (၁၉၉၃ ခု၊ အောက်တိုဘာ ၈ [လိပ်])

[စာမျက်နှာ ၂၃ ပါ ရုပ်ပုံ]

ကနေဒါနိုင်ငံတွင်—တစ်အိမ်မှတစ်အိမ်ဟောပြောမဂ္ဂဇင်းဝေငှခြင်း