ဘုရားသခင့်တောင်းဆိုချက်များကိုအခြားသူများသိရန် အကူအညီပေးခြင်း

“အဘယ်ကြောင့်နည်းဟူမူကား၊ မဟောဘဲမနေနိုင်။ မဟောဘဲနေလျှင် အမင်္ဂလာရှိ၏။”—၁ ကောရိန္သု ၉:၁၆။

၁၊ ၂။ (က) အဘယ်လုပ်ငန်းနှစ်ရပ်တွင်ပါဝင်ရန် ကျွန်ုပ်တို့ကို ယေဟောဝါတောင်းဆိုထားတော်မူသနည်း။ (ခ) နှလုံးရိုးဖြောင့်သူများသည် ဘုရားသခင့်နိုင်ငံတော်၏လက်အောက်ခံများဖြစ်လာနိုင်ရန် မည်သည့်အရာကို သင်ယူရမည်နည်း။

ယေဟောဝါရှင်ထံတော်တွင် လူသားများအတွက် သတင်းကောင်းရှိသည်။ ကိုယ်တော်တွင် နိုင်ငံတစ်ခုရှိပြီး ယင်းအကြောင်းကို လှည်းနေလှေအောင်းမြင်းဇောင်းမကျန် ကြားသိစေလိုသည်။ ဤသတင်းကောင်းကို ကျွန်ုပ်တို့သိရှိသွားသည့်အခါ အခြားသူများကို ဝေမျှပေးဖို့ ဘုရားသခင်တောင်းဆိုထားတော်မူသည်။ ယင်းသည် လုပ်ငန်းနှစ်ရပ်ဖြစ်သည်။ ပထမတစ်ခုအနေနှင့် ကျွန်ုပ်တို့သည် ဘုရားသခင်၏နိုင်ငံတော်သတင်းကောင်းကို ကြွေးကြော်ရမည်။ “ဤအစီအစဉ်စနစ်၏ဆုံးခန်း” နှင့်ပတ်သက်သော ကိုယ်တော်၏ပရောဖက်ပြုချက်တွင် ယေရှုက “[ဘုရားသခင်၏] နိုင်ငံတော်နှင့်ယှဉ်သောဧဝံဂေလိတရားကို လောကီနိုင်ငံအရပ်ရပ်ရှိသမျှတို့၌ ဟောရလိမ့်မည်။ သို့ပြီးမှ အဆုံးသည်ဖြစ်လတ္တံ့” ဟုမိန့်တော်မူခဲ့သည်။—မဿဲ ၂၄:၃၊ ကဘ၊ ၁၄။

^၂ ထိုလုပ်ငန်း၏ဒုတိယကဏ္ဍမှာ [ဘုရားသခင့်] နိုင်ငံတော်ကြွေးကြော်ချက်ကို တလိုတလားတုံ့ပြန်သူများအား သွန်သင်ပေးခြင်းဖြစ်သည်။ ယေရှုထမြောက်တော်မူပြီးနောက် မိမိ၏တပည့်တော်အုပ်ကြီးကို ကိုယ်တော်က “သင်တို့သွား၍ လူမျိုးတကာတို့ကိုငါ့တပည့်ဖြစ်စေလျက်၊ ခမည်းတော်၊ သားတော်၊ သန့်ရှင်းသောဝိညာဉ်တော်၏နာမ၌ ဗတ္တိဇံကိုပေးကြလော့။ ငါသည် သင်တို့အားပေးသမျှသောပညတ်တော်တို့ကို စောင့်ရှောက်စေခြင်းငှာ ဆုံးမသြဝါဒပေးကြလော့။ ငါသည်လည်း ကပ်ကမ္ဘာကုန်သည်တိုင်အောင် သင်တို့နှင့်အတူအစဉ်မပြတ်ရှိသည်” ဟုမိန့်တော်မူ၏။ (မဿဲ ၂၈:၁၉၊ ၂၀) ‘ခရစ်တော်ပေးခဲ့သည့် ပညတ်တော်တို့’ သည် ကိုယ်တော်ထံမှ အစပြုခြင်းမဟုတ်ပါ; ဘုရားသခင်၏ပညတ်တော်များ သို့မဟုတ် တောင်းဆိုချက်များကို စောင့်ရှောက်ရန် အခြားသူများအား ကိုယ်တော်သွန်သင်ပေးခဲ့သည်။ (ယောဟန် ၁၄:၂၃၊ ၂၄; ၁၅:၁၀) ထို့ကြောင့် ‘ခရစ်တော်ပေးခဲ့သည့် ပညတ်တော်တို့ကို စောင့်ရှောက်’ ဖို့ အခြားသူများအားသွန်သင်ပေးခြင်းဟူသည် ဘုရားသခင်၏တောင်းဆိုချက်များကို သူတို့သိရှိရန် ကူညီခြင်းဖြစ်သည်။ နှလုံးရိုးဖြောင့်သူများသည် ဘုရားသခင့်နိုင်ငံတော်၏လက်အောက်ခံများဖြစ်လာနိုင်ရန် ဘုရားသခင်၏တောင်းဆိုချက်များကို ပြည့်မီရမည်။

၃။ ဘုရားသခင့်နိုင်ငံတော်ကား အဘယ်နည်း၊ ဘုရားသခင့်နိုင်ငံတော်သတင်းတရားကို ဤမျှကောင်းသောသတင်းဖြစ်သွားစေရန် ယင်းက မည်သည့်အရာကို ဖြစ်မြောက်စေမည်နည်း။

^၃ ဘုရားသခင့်နိုင်ငံတော်ကားအဘယ်နည်း။ ထို့အပြင် ဘုရားသခင့်နိုင်ငံတော်သတင်းတရားကို ဤမျှကောင်းသောသတင်းဖြစ်သွားစေရန် ယင်းက မည်သည့်အရာကို ဖြစ်မြောက်စေမည်နည်း။ ဘုရားသခင့်နိုင်ငံတော်သည် ကောင်းကင်အစိုးရတစ်ခုဖြစ်သည်။ ယေဟောဝါ၏နှလုံးတော်ထဲတွင် အလွန်တန်ဖိုးရှိသောအရာဖြစ်သည်၊ အကြောင်းမှာ ယင်းအားဖြင့် ကိုယ်တော်၏နာမတော်ကို သန့်ရှင်းမြင့်မြတ်စေမည်ဖြစ်ပြီး ကဲ့ရဲ့ရှုတ်ချမှုရှိရှိသမျှကို ရှင်းလင်းပစ်မည်ဖြစ်သောကြောင့်တည်း။ ဤနိုင်ငံတော်သည် ယေဟောဝါ၏အလိုတော် ကောင်းကင်တွင်ပြည့်စုံသကဲ့သို့ မြေကြီးပေါ်တွင်ပြည့်စုံစေရန် ဆောင်ကြဉ်းပေးရာတွင် ကိုယ်တော်အသုံးပြုမည့် အသုံးတော်ခံဖြစ်သည်။ ဤအတွက်ကြောင့်ပင် ဘုရားသခင့်နိုင်ငံတော်လာပါစေဟု ဆုတောင်းကြရန် ယေရှုက ကျွန်ုပ်တို့ကို သင်ပေးခဲ့ပြီး မိမိတို့၏ဘဝတွင် ယင်းကို ရှေးဦးထားဖို့ တိုက်တွန်းတော်မူခဲ့သည်။ (မဿဲ ၆:၉၊ ၁၀၊ ၃၃) ယေဟောဝါ၏နိုင်ငံတော်အကြောင်း အခြားသူများအား ကျွန်ုပ်တို့ သင်ပေးခြင်းသည် ကိုယ်တော်အတွက် အဘယ်ကြောင့်ဤမျှအရေးပါရကြောင်း သင်သိသလော။

စွန့်စားမှုတစ်ခုဖြစ်သော်လည်း ဝန်ထုပ်ဝန်ပိုးမဟုတ်

၄။ သတင်းကောင်းဟောရမည့် ကျွန်ုပ်တို့၏တာဝန်သည် ဝန်ထုပ်ဝန်ပိုးတစ်ခုမဟုတ်ကြောင်း မည်သို့ပမာပြနိုင်သနည်း။

^၄ ဤသတင်းကောင်းကို ဟောပြောခြင်းသည် ဝန်ထုပ်ဝန်ပိုးတစ်ခုဖြစ်သလော။ လုံးဝမဟုတ်ပါ! ပမာပြရလျှင် ဖခင်တစ်ဦးတွင် မိမိ၏မိသားစုကို ရုပ်ပစ္စည်းဘက် ထောက်ပံ့ပေးဖို့တာဝန်ရှိသည်။ ဤသို့ထောက်ပံ့ရန်ပျက်ကွက်ခြင်းသည် ခရစ်ယာန်ယုံကြည်ခြင်းကို ငြင်းပယ်ခြင်းနှင့်အတူတူဖြစ်သည်။ တမန်တော်ပေါလုက “မိမိလူတို့ကိုမပြုစု၊ ထိုမျှမက၊ မိမိအိမ်သူအိမ်သားတို့ကိုမပြုစုသောသူမည်သည်ကား၊ ယုံကြည်ခြင်းတရားကိုငြင်းပယ်၏။ မယုံကြည်ဖူးသောသူထက်သာ၍ ယုတ်မာ၏” ဟုရေးသားလိုက်သည်။ (၁ တိမောသေ ၅:၈) သို့သော် ထိုတာဝန်သည် ခရစ်ယာန်အမျိုးသားတစ်ဦးအတွက် ဝန်ထုပ်ဝန်ပိုးတစ်ခုဖြစ်သလော။ သူသည် မိမိ၏မိသားစုကို ချစ်လျှင် သူတို့အား ထောက်ပံ့ပေးလိုသည့်အတွက် ဝန်ထုပ်ဝန်ပိုးဖြစ်မသွားပါ။

၅။ ဟောပြောခြင်းနှင့် တပည့်ဖြစ်စေခြင်းလုပ်ငန်းသည် တာဝန်တစ်ခုဖြစ်သော်လည်း ယင်းတွင် ပါဝင်ခြင်းကို အဘယ်ကြောင့်နှစ်ခြိုက်သင့်သနည်း။

^၅ အလားတူစွာ ဟောပြောခြင်းနှင့် တပည့်ဖြစ်စေခြင်းသည် ကျွန်ုပ်တို့၏အသက်အတွက် အားထားနေရသော တာဝန်တစ်ခု၊ တောင်းဆိုချက်တစ်ရပ်ဖြစ်သည်။ ပေါလုသည် ဤနည်းအတိုင်းပင် ယူမှတ်သည်– “အဘယ်ကြောင့်နည်းဟူမူကား၊ မဟောဘဲမနေနိုင်။ မဟောဘဲနေလျှင် အမင်္ဂလာရှိ၏။” (၁ ကောရိန္သု ၉:၁၆; ယေဇကျေလ ၃၃:၇-၉ နှိုင်းယှဉ်။) သို့သော် ကျွန်ုပ်တို့ဟောပြောရသည့် အကြောင်းရင်းမှာ မေတ္တာကြောင့်ဖြစ်ပြီး ဝတ်ကျေတန်းကျေလုပ်ခြင်းမဟုတ်။ အဓိကအားဖြင့် ကျွန်ုပ်တို့သည် ဘုရားသခင်ကိုချစ်ပြီး တစ်ချိန်တည်းတွင် အိမ်နီးချင်းတို့ကိုပါချစ်ရာ ထိုသတင်းကောင်းကို သူတို့ကြားရဖို့ မည်မျှအရေးကြီးကြောင်း ကျွန်ုပ်တို့သိကြသည်။ (မဿဲ ၂၂:၃၇-၃၉) ယင်းက အနာဂတ်မျှော်လင့်ချက်တစ်ခုကို သူတို့အား ပေးသည်။ ဘုရားသခင့်နိုင်ငံတော်သည် မကြာမီ တရားမမျှတမှုများကို ပြုပြင်ကာ ဖိစီးနှိပ်စက်မှုဟူသမျှကို ဖယ်ရှားပစ်ပြီး ငြိမ်သက်စည်းလုံးမှုကို ပြန်လည်ဆောင်ကြဉ်းပေးမည်။ ဤအရာအားလုံးသည် ဘုရားသခင့်နိုင်ငံတော်၏ဖြောင့်မတ်သောအုပ်စိုးမှုကို လက်အောက်ခံသူများအတွက် ထာဝရကောင်းချီးဖြစ်သည်။ အခြားသူများအား ဤကဲ့သို့သောသတင်းကောင်းမျိုးဝေမျှရခြင်းကို ကျွန်ုပ်တို့နှစ်ခြိုက်ပီတိမဖြစ်ကြပေလော။—ဆာလံ ၁၁၀:၃။

၆။ ဟောပြောခြင်းနှင့် တပည့်ဖြစ်စေခြင်းလုပ်ငန်းသည် အဘယ်ကြောင့် အမှန်ပင်စွန့်စားမှုတစ်ခုဖြစ်သနည်း။

^၆ တစ်ချိန်တည်းမှာပင် ဤဟောပြောခြင်းနှင့် တပည့်ဖြစ်စေခြင်းလုပ်ငန်းသည် အမှန်ပင်စွန့်စားမှုတစ်ရပ်ဖြစ်ပါသည်။ လူများသည် တစ်ဦးနှင့်တစ်ဦးမတူကြပါ။ အားလုံးတွင် စိတ်ဝင်စားမှုတစ်မျိုးတည်း၊ အရည်အသွေးတစ်မျိုးတည်းရှိကြသည်မဟုတ်ပါ။ အချို့သူများသည် ပညာတတ်ကြီးများဖြစ်ကြသော်လည်း အခြားသူများမှာမူ ပညာအရည်အချင်းအလွန်နည်းသည်။ တစ်ချိန်က အနှစ်သက်ဆုံးအပျင်းပြေစရာဖြစ်ခဲ့သည့် စာပေဖတ်ရှုခြင်းကို ယခုအခါတွင် များသောအားဖြင့် ပင်ပန်းပြီးငြီးငွေ့စရာကောင်းသည့်အရာအဖြစ် သဘောထားလာကြသည်။ စာပေတတ်ကျွမ်းမှုကို “ရေးနိုင်ဖတ်နိုင်သည့်အရည်အသွေး သို့မဟုတ် အဆင့်အတန်းဖြစ်သော်လည်း စိတ်မဝင်စားဖို့ကောင်းသည့်အရာ” ဟုအနက်ဖွင့်ဆိုမှုသည် အဆင့်မြင့်စာပေတတ်ကျွမ်းမှုကို ဂုဏ်ယူသည့်နိုင်ငံများတွင်ပင် ကြီးထွားလာသော ပြဿနာဖြစ်နေသည်။ သို့ဆိုလျှင် ဤကဲ့သို့သော နောက်ခံနှင့် စိတ်ဝင်စားမှုမတူညီသည့်သူများအား ဘုရားသခင်တောင်းဆိုသည့်အရာကို သိရှိစေရန် ကျွန်ုပ်တို့မည်သို့အကူအညီပေးနိုင်ပါသနည်း။—၁ ကောရိန္သု ၉:၂၀-၂၃ နှိုင်းယှဉ်။

အခြားသူများကို ကူညီရန်သင့်လျော်စွာပြင်ဆင်ပေးထား

၇။ ဘုရားသခင့်တောင်းဆိုချက်များကို အခြားသူများ သိရှိစေဖို့ကူညီရန် “သစ္စာနှင့်သတိပညာရှိသောကျွန်” သည် ကျွန်ုပ်တို့အား မည်သို့ပြင်ဆင်ပေးထားသနည်း။

^၇ သင့်တွင် သင့်လျော်သော ကိရိယာများ သို့မဟုတ် တန်ဆာပလာများရှိထားမည်ဆိုလျှင် စွန့်စားရသောတာဝန်တစ်ခုကို လွယ်လွယ်နှင့်ပြီးစီးနိုင်သည်။ လုပ်ငန်းတစ်မျိုးမျိုးအတွက် ယနေ့တွင် သင့်လျော်သောကိရိယာတစ်ခုကို ပြောင်းလဲနေသောလိုအပ်ချက်များကြောင့် နက်ဖြန်တွင် ပြုပြင်လိုက်ရ သို့မဟုတ် အစားထိုးလိုက်ရတတ်သည်။ ဘုရားသခင့်နိုင်ငံတော်နှင့်ပတ်သက်သည့် သတင်းတရားကို ကြွေးကြော်ရသည့်ကျွန်ုပ်တို့၏တာဝန်သည်လည်း အလားတူဖြစ်သည်။ နှစ်များတစ်လျှောက် “သစ္စာနှင့်သတိပညာရှိသောကျွန်” သည် အထူးသဖြင့် အိမ်တွင်းကျမ်းစာသင်အံမှုများတွင် အသုံးပြုဖို့ရည်ရွယ်ထားသည့် စာပေများဖြစ်သော အလွန်အသုံးတည့်သည့် ကိရိယာများဖြင့် ကျွန်ုပ်တို့ကို ထောက်ပံ့ပေးခဲ့သည်။ (မဿဲ ၂၄:၄၅၊ သမ) ထို့ကြောင့် “အသီးသီးဘာသာစကားကိုပြောသော လူအမျိုးအနွယ်ခပ်သိမ်းတို့” မှလူတို့ ဘုရားသခင့်တောင်းဆိုချက်များကို သိရှိလာရန် အကူအညီပေးဖို့ ကျွန်ုပ်တို့ကို ပြင်ဆင်ပေးထားသည်။ (ဗျာဒိတ် ၇:၉) ကမ္ဘာ့လယ်ကွင်းတွင် ပြောင်းလဲနေသော လိုအပ်ချက်များနှင့်ကိုက်ညီစေရန် နောက်ထပ်ကိရိယာများကို အခါအားလျော်စွာ ထောက်ပံ့ပေးလာခဲ့သည်။ ဥပမာအနည်းငယ်ကို သုံးသပ်ကြစို့။

၈။ (က) “ဘုရားသခင်သစ္စာတော်တည်စေသတည်း” စာအုပ်သည် ထပ်ဆင့်ကျမ်းစာပညာရေးတွင် မည်သည့်ကဏ္ဍမှပါဝင်ခဲ့သနည်း။ (ခ) ၁၉၆၈ ခုနှစ်တွင် ကျမ်းစာသင်အံမှုလုပ်ငန်းအတွက် အဘယ်ကိရိယာကို ထောက်ပံ့ပေးခဲ့ပြီး အထူးသဖြင့် ယင်းကို မည်သည့်ရည်ရွယ်ချက်ဖြင့် ထုတ်ဝေခဲ့သနည်း။ (ဂ) သမ္မာတရားစာအုပ်သည် တပည့်ဖြစ်စေခြင်းလုပ်ငန်းတွင် မည်သို့အထောက်အကူပြုခဲ့သနည်း။

^၈ ၁၉၄၆ မှ ၁၉၆၈ ခုနှစ်အထိ “ဘုရားသခင်သစ္စာတော်တည်စေသတည်း” စာအုပ်ကို ကျမ်းပညာရေးအတွက် အစွမ်းထက်သောကိရိယာတစ်ခုအဖြစ် အသုံးပြုခဲ့ပြီး ဘာသာစကားပေါင်း ၅၄ ဘာသာဖြင့် စောင်ရေ ၁၉,၂၅၀,၀၀၀ ထုတ်ဝေခဲ့သည်။ ၁၉၆၈ ခုနှစ်တွင် ထုတ်ဝေလိုက်သော ထာဝရအသက်သို့ပို့ဆောင်သောသမ္မာတရားစာအုပ်ကို စိတ်ဝင်စားသူများနှင့် ကျမ်းစာသင်အံမှုပြုရာတွင် နှစ်များစွာ ထိထိရောက်ရောက်အသုံးပြုခဲ့သည်။ ထိုအချိန်မတိုင်မီက အချို့သူများသည် နှစ်ခြင်းမခံဘဲ တစ်နှစ်ပြီးတစ်နှစ် ယေဟောဝါသက်သေတို့နှင့် သင်အံမှုပြုခြင်းမှာ ဖြစ်ရိုးဖြစ်စဉ်ဖြစ်ခဲ့သည်။ သို့သော် ဤကိရိယာသည် သင်သားအပေါ် အကျိုးသက်ရောက်ပြီး သူသင်ယူနေသည့်အရာကို လက်တွေ့ကျင့်သုံးရန် အားပေးတိုက်တွန်းဖို့ ရည်ရွယ်ခဲ့သည်။ ရလဒ်ကကော။ ယေဟောဝါသက်သေများ—ဘုရားသခင့်နိုင်ငံတော်ကြွေးကြော်သူများစာအုပ်က “၁၉၆၈ ခုနှစ် စက်တင်ဘာ ၁ ရက်တွင်စတင်ပြီး ၁၉၇၁ ခုနှစ် ဩဂုတ် ၃၁ ရက်တွင်ကုန်ဆုံးသည့် လုပ်ငန်းတော်နှစ် သုံးနှစ်အတွင်း စုစုပေါင်း ၄၃၄,၉၀၆ ဦးနှစ်ခြင်းခံခဲ့သည်—ယင်းမတိုင်မီ လုပ်ငန်းတော်နှစ်သုံးနှစ်အတွင်းနှစ်ခြင်းခံသူအရေအတွက်ထက် နှစ်ဆကျော်သည်တကား!” သမ္မာတရား စာအုပ်သည့် ယင်းကိုထုတ်ဝေကတည်းက ဘာသာစကားပေါင်း ၁၁၇ ဘာသာဖြင့် အံ့သြလောက်ဖွယ်စောင်ရေ ၁၀၇,၀၀၀,၀၀၀ ကျော်ထုတ်ဝေနိုင်ခဲ့သည်။

၉။ ထာဝစဉ်အသက်ရှင်စာအုပ်တွင် မည်သည့်အထူးအသွင်အပြင် ပါသနည်း၊ ဘုရားသခင့်နိုင်ငံတော် ကြွေးကြော်သူအုပ်စုပေါ်တွင် မည်သည့်အကျိုးသက်ရောက်မှု ရှိခဲ့သနည်း။

^၉ ၁၉၈၂ ခုနှစ်တွင် သင်သည် ကမ္ဘာ့ပရဒိသုအတွင်း ထာဝစဉ်အသက်ရှင်နိုင်သည်စာအုပ်သည် ကျမ်းစာသင်အံမှုအတွက် လက်စွဲစာအုပ်ဖြစ်လာသည်။ ဤကိရိယာတွင် ပုံများ၏သွန်သင်ချက်အမြုတေကို တိုတိုနှင့်ပေါ်လွင်စေရန် ပုံတစ်ခုစီတွင် အဓိပ္ပာယ်လေးနက်သောပုံစာများပါသည့် ပီပြင်သောသရုပ်ဖော်ပုံ ၁၅၀ ကျော်ပါရှိသည်။ ၁၉၈၂ ခုနှစ် အောက်တိုဘာလထုတ် ကျွန်ုပ်တို့၏နိုင်ငံတော်ဓမ္မအမှုက ဤသို့ဆိုသည်– “‘ဘုရားသခင်သစ္စာတော်တည်စေသတည်း’ စာအုပ်သည် ကျွန်ုပ်တို့၏ သင်အံမှုလက်စွဲဖြစ်ခဲ့သော (၁၉၄၆ ခုနှစ်မှ ၁၉၆၀ ပြည့်လွန်နှစ်များအလယ်အထိ) အနှစ်နှစ်ဆယ်ခန့်အတွင်း ကျွန်ုပ်တို့၏အုပ်စုတွင် ဘုရားသခင့်နိုင်ငံတော် ကြွေးကြော်သူအသစ် ၁,၀၀၀,၀၀၀ ကျော်ထပ်တိုးခဲ့သည်။ ထာဝရအသက်သို့ပို့ဆောင်သောသမ္မာတရားစာအုပ်သည် ၁၉၆၈ ခုနှစ်တွင်ထွက်လာပြီးနောက် ကျွန်ုပ်တို့၏သင်အံမှုလက်စွဲစာအုပ်ဖြစ်လာသောအခါ နောက်ထပ်ကြေညာသူ ၁,၀၀၀,၀၀၀ တိုးလာသည်။ ကျွန်ုပ်တို့၏သင်အံမှုစာအုပ်သစ်ဖြစ်သော သင်သည် ကမ္ဘာ့ပရဒိသုအတွင်းထာဝစဉ်အသက်ရှင်နိုင်သည်ကို အသုံးပြုခြင်းကြောင့် ဘုရားသခင့်နိုင်ငံတော်ကြေညာသူအုပ်စုတွင် အလားတူတိုးပွားမှုကို ကျွန်ုပ်တို့မြင်တွေ့ရမည်လော။ ယေဟောဝါအလိုတော်ရှိလျှင် မြင်တွေ့ရမည်မှာ သေချာသည်!” ၁၉၈၂ ခုနှစ်မှ ၁၉၉၅ ခုနှစ်အထိ ဘုရားသခင့်နိုင်ငံတော် ကြွေးကြော်သူအုပ်စုတွင် ၂,၇၀၀,၀၀၀ ထပ်တိုးလာသောကြောင့် ယေဟောဝါအလိုတော်ရှိကြောင်းထင်ရှားပါသည်။

၁၀။ ၁၉၉၅ တွင် အဘယ်ကိရိယာသစ်ကို ထောက်ပံ့ပေးခဲ့သနည်း၊ ယင်းသည် ကျမ်းစာသင်သားများကို ဝိညာဉ်ရေးတိုးတက်မှု အတော်အတန်လျင်မြန်လာစေရန် အဘယ်ကြောင့်စွမ်းဆောင်ပေးနိုင်သင့်သနည်း။

^၁၀ “စပါးရိတ်စရာ များစွာရှိ၏။ ရိတ်သောသူတို့သည် နည်းကြ၏” ဟုယေရှုမိန့်တော်မူခဲ့သည်။ (မဿဲ ၉:၃၇) ရိတ်စရာစပါး အမှန်ပင်များစွာရှိနေပါသည်။ လုပ်စရာများစွာရှိနေဆဲပင်။ အချို့နိုင်ငံများတွင် လူတို့သည် ကျမ်းစာသင်ဖို့အတွက် ဆိုင်းငံ့စာရင်းတွင် စောင့်နေရကြသည်။ ထို့ကြောင့် ဘုရားသခင်အားသိကျွမ်းခြင်းပညာကို ပို၍မြန်မြန်ဆန်ဆန်ကြဲဖြန့်ဖို့ရည်ရွယ်ကာ ၁၉၉၅ ခုနှစ်တွင် “သစ္စာနှင့်သတိပညာရှိသောကျွန်” သည် ထာဝရအသက်ရရှိစေသောအသိပညာဟု အမည်တပ်ထားသည့် ၁၉၂ မျက်နှာစာအုပ်ဖြစ်သော ကိရိယာသစ်ကို ထောက်ပံ့ပေးခဲ့သည်။ ဤအဖိုးတန်ကိရိယာသည် မှားယွင်းသောအယူဝါဒများပေါ်တွင် အာရုံမစိုက်ပါ။ အပြုသဘောနည်းဖြင့် ကျမ်းစာသမ္မာတရားများကို ဖော်ပြပေးသည်။ ယင်းသည် ကျမ်းစာသင်သားများကို ဝိညာဉ်ရေးတိုးတက်မှု အတော်အတန်လျင်မြန်လာစေရန် စွမ်းဆောင်နိုင်မည်ဟု မျှော်လင့်သည်။ အသိပညာစာအုပ်သည် ဘာသာစကားပေါင်း ၁၂၅ ခု၊ စောင်ရေ ၄၅,၅၀၀,၀၀၀ ဖြင့် ကမ္ဘာ့လယ်ကွင်းတွင် ထိထိမိမိအကျိုးသက်ရောက်နေပြီဖြစ်ပြီး ဘာသာစကား ၂၁ ခုဖြင့် ထပ်၍ဘာသာပြန်ဆဲရှိသည်။

၁၁။ စာမတတ်သူများ သို့မဟုတ် စာအနည်းအကျဉ်းသာဖတ်နိုင်သူများကို သင်ကြားဖို့ထောက်ကူရန် အဘယ်ထိရောက်သောကိရိယာကို ထောက်ပံ့ပေးထားသနည်း၊ ယင်းသည် ကမ္ဘာချီသင်ကြားပို့ချရေးအစီအစဉ်ကို မည်သို့အကြီးအကျယ်ထောက်ကူလာခဲ့သနည်း။

^၁၁ ‘သစ္စာရှိသောကျွန်’ သည် အခါအားလျော်စွာ အထူးပရိသတ် သို့မဟုတ် ပရိသတ်အနည်းအကျဉ်းအတွက် ရည်ရွယ်သော ကိရိယာများကို ထောက်ပံ့ပေးလာခဲ့သည်။ ဥပမာ မိမိတို့၏ယဉ်ကျေးမှု သို့မဟုတ် ဘာသာရေးနောက်ခံကြောင့် အထူးအကူအညီလိုအပ်နိုင်သည့် လူများနှင့်ပတ်သက်၍ကောအသို့နည်း။ ဘုရားသခင့်တောင်းဆိုချက်များကို သိရှိရန် သူတို့အား ကျွန်ုပ်တို့ မည်သို့ထောက်ကူပေးနိုင်သနည်း။ ကျွန်ုပ်တို့လိုအပ်ခဲ့သည့်အရာကို ၁၉၈၂ ခုနှစ်တွင် ရရှိခဲ့သည်။ ၃၂ မျက်နှာရှိ ကမ္ဘာသားဘဝထာဝရစံစားကြ ဘရိုရှာဖြစ်သည်။ သရုပ်ဖော်ပုံလှိုင်လှိုင်ပါသည့် ဤစာပေသည် စာမတတ်သူများ သို့မဟုတ် စာအနည်းအကျဉ်းသာဖတ်နိုင်သူများကို သင်ပေးရာတွင် ထိရောက်သောကိရိယာတစ်ခုဖြစ်လာခဲ့သည်။ ယင်းတွင် အလွန်ရိုးရှင်းပြီး လွယ်လွယ်ကူကူနားလည်နိုင်သော အခြေခံကျမ်းစာသွန်သင်ချက်များဆိုင်ရာ တင်ပြချက်ပါဝင်သည်။ ဘဝစံစား ဘရိုရှာကို ထုတ်ဝေကတည်းက ယင်းသည် ကျွန်ုပ်တို့၏ကမ္ဘာချီ သင်ကြားပို့ချရေးအစီအစဉ်ကို အကြီးအကျယ်ထောက်ကူလာခဲ့သည်။ ဘာသာစကားပေါင်း ၂၃၉ ခုဖြင့် စောင်ရေ ၁၀၅,၁၀၀,၀၀၀ ကျော် ပုံနှိပ်ထုတ်ဝေထားပြီးဖြစ်ရာ ယင်းသည် ယနေ့အထိ ကင်းမျှော်စင်အသင်း၏ ဘာသာစကားအများဆုံးဖြင့် ထုတ်ဝေသော စာအုပ်ဖြစ်လာခဲ့သည်တကား!

၁၂၊ ၁၃။ (က) ၁၉၉၀ ပြည့်နှစ်မှစ၍ ‘သစ္စာရှိသောကျွန်’ သည် နေရာအနှံ့တွင်ရှိနေသောပရိသတ်ထံ ရောက်ရှိရန် မည်သည့်နည်းသစ်တစ်ခုကို ထောက်ပံ့ပေးခဲ့သနည်း။ (ခ) အဖွဲ့အစည်း၏ဗီဒီယိုခွေများကို ကျွန်ုပ်တို့၏လယ်ကွင်းဓမ္မအမှုတွင် မည်သို့အသုံးပြုနိုင်သနည်း။ (ဂ) တပည့်ဖြစ်စေခြင်းလုပ်ငန်းအတွက် အထောက်အကူဖြစ်ရန် မည်သည့်ကိရိယာသစ်ကို မကြာသေးမီက ထောက်ပံ့ပေးခဲ့သနည်း။

^၁၂ ပုံနှိပ်စာပေများအပြင် နေရာအနှံ့တွင်ရှိနေသောပရိသတ်ထံ ရောက်ရှိနိုင်သည့် သွန်သင်ပို့ချနည်းသစ်တစ်နည်းကို ၁၉၉၀ ပြည့်နှစ်မှစ၍ ‘သစ္စာရှိသောကျွန်’ က ကျွန်ုပ်တို့အား ထောက်ပံ့ပေးထားသည်။ ၎င်းမှ ဗီဒီယိုခွေဖြစ်သည်။ ထိုနှစ်အောက်တိုဘာလတွင် ယေဟောဝါသက်သေများ—နာမတော်နောက်ဝယ်ရှိအဖွဲ့အစည်းအမည်ရှိ ၅၅ မိနစ်ကြာ ဗီဒီယိုခွေကို ကင်းမျှော်စင်အသင်းက ဦးဆုံးအကြိမ်အဖြစ်ထုတ်ဝေခဲ့သည်။ ဘာသာစကားပေါင်း ၃၅ ဖြင့်ရနိုင်သော ဤလှပပြီး သိမှတ်ဖွယ်ရာစုံလင်လှသည့်တင်ဆက်မှုသည် မြေတစ်ပြင်လုံးတွင် သတင်းကောင်းကို ကြွေးကြော်ပါဟူသည့် ယေရှုမိန့်မှာချက်ကိုသယ်ပိုးထမ်းဆောင်နေကြသော ယေဟောဝါထံအပ်နှံထားသူတို့၏ ကမ္ဘာချီအဖွဲ့အစည်းအကြောင်းကို ပြသသည်။ ဤဗီဒီယိုခွေကို တပည့်ဖြစ်စေခြင်းလုပ်ငန်းတွင် အထောက်အကူပြုဖို့ အထူးရည်ရွယ်ထားသည်။ ဘုရားသခင့်နိုင်ငံတော်ကြေညာသူတို့သည် ဤကိရိယာသစ်ကို လယ်ကွင်းဓမ္မအမှုတွင် ချက်ချင်းအသုံးပြုခဲ့ကြသည်။ အချို့ဆိုလျှင် မိမိတို့၏စာအုပ်အိတ်ထဲတွင်ထည့်သွားကာ စိတ်ဝင်စားသူများကို ပြဖို့ သို့မဟုတ် ငှားပေးဖို့ အမြဲအသင့်ရှိကြသည်။ ယင်းကိုထုတ်ဝေပြီး များမကြာမီတွင် နယ်လှည့်ကြီးကြပ်မှူးတစ်ဦး ဤသို့စာရေးခဲ့သည်– “ဗီဒီယိုခွေများသည် သန်းနှင့်ချီသောလူများ၏ စိတ်နှလုံးထဲသို့အရောက်ပို့သည့် ၂၁ ရာစုနည်းဖြစ်သွားပြီ၊ ထို့ကြောင့် ဤဗီဒီယိုခွေသည် ကမ္ဘာချီဘုရားသခင့်နိုင်ငံတော်လုပ်ငန်းကို တိုးချဲ့ရန် အဖွဲ့အစည်းနောက်ထပ်အသုံးပြုမည့် ဗီဒီယိုခွေပေါင်းများစွာထဲမှ ပထမဦးဆုံးတစ်ခွေသာဖြစ်လိမ့်မည်ဟု ကျွန်ုပ်တို့မျှော်လင့်ပါသည်။” မှန်ပါသည်၊ အပိုင်းသုံးခုပါသော သမ္မာကျမ်းစာ—တိကျသောသမိုင်း၊ စိတ်ချရသော ပရောဖက်ပြုချက်နှင့် ယေဟောဝါသက်သေတို့ နာဇီထိုးနှက်မှုကို အခိုင်အမာရပ်တည်အမည်ရှိ ဗီဒီယိုခွေများအပါအဝင် နောက်ထပ်အခွေများကို ထောက်ပံ့ပေးထားပြီ။ အဖွဲ့အစည်း၏ဗီဒီယိုခွေများကို သင့်ဘာသာစကားဖြင့်ရထားလျှင် ယင်းတို့ကို လယ်ကွင်းဓမ္မအမှုတွင်သင်အသုံးပြုပြီးပြီလော။a

^၁၃ မကြာသေးမီကထုတ်ဝေသည့် ကိရိယာသစ်ဖြစ်သော ကျွန်ုပ်တို့ထံမှ ဘုရားသခင် အဘယ်အရာ တောင်းဆိုတော်မူသနည်းဘရိုရှာကို တပည့်ဖြစ်စေခြင်းလုပ်ငန်းတွင် ထောက်ကူရန် ထောက်ပံ့ပေးခဲ့သည်။ ယင်းကို အဘယ်ကြောင့်ပုံနှိပ်ထုတ်ဝေခဲ့ရပါသနည်း။ ယင်းကို မည်သို့အသုံးပြုနိုင်သနည်း။

ကိရိယာသစ်ကို ဆန်းစစ်ခြင်း

၁၄၊ ၁၅။ တောင်းဆိုဘရိုရှာကို မည်သူတို့အတွက် ရည်ရွယ်သနည်း၊ ယင်းတွင် မည်သည့်အရာ ပါဝင်သနည်း။

^၁၄ ကျွန်ုပ်တို့ထံမှ ဘုရားသခင် အဘယ်အရာ တောင်းဆိုတော်မူသနည်း စာပေအသစ်မှာ ဘုရားသခင်ကို ယုံကြည်နှင့်ပြီးသားနှင့် ကျမ်းစာကို တန်ဖိုးထားနှင့်ပြီးသားပုဂ္ဂိုလ်များအတွက် ရည်ရွယ်ထားသည်။ နယ်လှည့်ကြီးကြပ်မှူးများအပြင် ဖွံ့ဖြိုးဆဲနိုင်ငံများတွင် နှစ်ပေါင်းများစွာအတွေ့အကြုံရှိသော ဂိလဒ်သင်တန်းဆင်း သာသနာပြုများသည် ဤဘရိုရှာကို ပြင်ဆင်ရာတွင် ထောက်ကူပေးခဲ့ကြသည်။ ယင်းတွင် ကျမ်းစာအခြေခံသွန်သင်ချက်များကို ငုံမိသွားစေသည့် ဘက်စုံလေ့လာမှုသင်ရိုးတစ်ခုပါရှိသည်။ စကားအသုံးအနှုန်းမှာ ထောက်စာမှုရှိပြီး ရှင်းလင်းကာ တိုက်ရိုက်ကျသည်။ တစ်ချိန်တည်းတွင် စာသားမှာ လွယ်ကူလွန်းခြင်းမဟုတ်ပါ။ ယင်းသည် “နို့” မျှသာမက လူအများဆုံးနားလည်နိုင်သင့်သည့်နည်းဖြင့် ဘုရားသခင့်နှုတ်ကပါဌ်စကားတော်မှ “ကြေခဲသောအစာ” ကိုပါ တည်ခင်းကျွေးသည်။—ဟေဗြဲ ၅:၁၂-၁၄။

^၁၅ မကြာသေးမီနှစ်များက နိုင်ငံအများအပြားရှိ ဘုရားသခင့်နိုင်ငံတော် ကြေညာသူများသည် ဤကဲ့သို့သော စာပေတစ်ခုကို တောင်းဆိုခဲ့ကြသည်။ ဥပမာ ပါပူဝါနယူးဂီနီရှိ ကင်းမျှော်စင်အသင်း၏ဌာနခွဲက ဤသို့စာရေးခဲ့သည်– “လူတို့သည် ကွဲလွဲနေသောဘာသာရေး သွန်သင်ချက်များကြောင့် ရှုပ်ထွေးနေကြပါသည်။ သူတို့သည် မိမိတို့၏ကျမ်းစာဖြင့် စစ်ကြည့်နိုင်သော ကျမ်းချက်များစွာကထောက်ခံသည့် တိုတိုနှင့်ထိရောက်သော သမ္မာတရားရှင်းလင်းဖော်ထုတ်ချက်များ လိုအပ်ပါသည်။ ခရစ်ယာန်စစ်များထံမှ ဘုရားသခင်တောင်းဆိုသည့်အရာ၊ ကိုယ်တော်လက်မခံနိုင်သည့် ဓလေ့ထုံးစံ၊ အကျင့်အကြံများနှင့်ပတ်သက်သည့် ရှင်းလင်းတိကျသည့်ဖော်ပြချက်ကို သူတို့လိုအပ်သည်။” တောင်းဆိုဘရိုရှာသည် ဘုရားသခင့်တောင်းဆိုချက်များကို ဤကဲ့သို့သောသူများ သိရှိဖို့ကူညီပေးရန် ကျွန်ုပ်တို့လိုအပ်သည့်အရာပင်တည်း။

၁၆။ (က) ဘရိုရှာအသစ်ပါ ရိုးရှင်းသောရှင်းပြချက်များမှ အထူးသဖြင့် မည်သူများ အကျိုးရရှိနိုင်သနည်း။ (ခ) သင့်ရပ်ကွက်ရှိသူများသည် တောင်းဆိုဘရိုရှာမှ မည်သို့အကျိုးရနိုင်သနည်း။

^၁၆ ဤကိရိယာသစ်ကို သင်မည်သို့အသုံးပြုနိုင်သနည်း။ ဦးဆုံးအနေနှင့် စာဖတ်ဖို့အခက်အခဲရှိသူများ သို့မဟုတ် စာမဖတ်လိုသူများနှင့် လေ့လာရန် ယင်းကို အသုံးပြုနိုင်သည်။b အဆိုပါပုဂ္ဂိုလ်များသည် ဘရိုရှာပါ ရိုးရှင်းသောရှင်းပြချက်များမှ အကျိုးရရှိပေမည်။ ကြိုတင်ပေးပို့လိုက်သော ဤစာစောင်တစ်စောင်ကို ဂရုတစိုက်သုံးသပ်စိစစ်ပြီးနောက် ကင်းမျှော်စင်အသင်း၏ဌာနခွဲများက အောက်ပါအတိုင်းစာရေးကြသည်– “အကျယ်တဝင့်မဖတ်လိုသူများနေထိုင်ရာ နိုင်ငံ့ဒေသများစွာတွင် ဤဘရိုရှာ အလွန်အသုံးဝင်မည်။” (ဘရာဇီး) “ဒေသခံဘာသာစကားကို မဖတ်တတ်သေးသည့် တစ်နယ်တစ်ကျေးမှ ပြောင်းရွှေ့လာသူများစွာရှိပြီး ပြင်သစ်ဘာသာစကားကို ကောင်းကောင်းမဖတ်သူတချို့ ရှိကြပါသည်။ ဤကဲ့သို့သောသူများနှင့် လေ့လာရာတွင် အထောက်အကူအဖြစ် ဤဘရိုရှာကို အသုံးပြုနိုင်ဖွယ်ရှိသည်။ (ပြင်သစ်) တောင်းဆိုဘရိုရှာမှ အကျိုးရနိုင်ဖွယ်ရှိသည့် သင့်ရပ်ကွက်မှလူများကို သင်စဉ်းစားယူနိုင်ပါသလော။

၁၇။ ဘရိုရှာအသစ်သည် နိုင်ငံများစွာတွင် မည်သည့်နည်းဖြင့် အသုံးဝင်သနည်း၊ အဘယ်ကြောင့်နည်း။

^၁၇ ဒုတိယအနေနှင့် နိုင်ငံများစွာတွင် ဤဘရိုရှာသည် ပညာအရည်အချင်းမည်မျှပင်ရှိစေကာမူ ဘုရားသခင်ကို ကြောက်ရွံ့သောသူများနှင့် ကျမ်းစာစလေ့လာရာတွင် အသုံးဝင်ပေမည်။ ထာဝရအသက်ရရှိစေသော အသိပညာစာအုပ်ဖြင့် သင်အံမှုတစ်ခုကို အစပြုဖို့ အားထုတ်သင့်သည်မှာ မှန်ပါသည်။ သို့သော် အချို့အခြေအနေများတွင် သင်အံမှုတစ်ခုကို ဘရိုရှာတစ်စောင်ဖြင့် စခြင်းသည် ပို၍လွယ်ကူပေမည်။ ထို့နောက် သင့်တော်သောအချိန်တွင် ကျွန်ုပ်တို့၏လက်စွဲလည်းဖြစ်၊ သင်အံမှုကို ပို၍အထောက်အကူလည်းပြုသော အသိပညာစာအုပ်ဖြင့် ပြောင်းသင်သင့်သည်။ တောင်းဆိုဘရိုရှာအသုံးပြုခြင်းနှင့်စပ်လျဉ်း၍ ကင်းမျှော်စင်ဌာနခွဲများက ဤသို့စာရေးကြသည်– “ကျမ်းစာသင်အံမှုများစခြင်းမှာ ခက်ခဲသည်၊ကြေညာသူများသည် သင်အံမှုတစ်ခုကို ဘရိုရှာတစ်စောင်နှင့်စသောအခါတွင်မူ ပို၍အခွင့်သာပုံရပါသည်။” (ဂျာမနီ) “ဤကဲ့သို့သော ဘရိုရှာမျိုးသည် အသိပညာစာအုပ်နှင့် ဆက်သင်နိုင်သည့် ကျမ်းစာသင်အံမှုအသစ်များစတင်ရာတွင် အထိရောက်ဆုံးဖြစ်လိမ့်မည်။” (အီတလီ) “ဂျပန်လူမျိုးတို့သည် ပညာရေးအဆင့်မြင့်မားကြသော်လည်း အများစုမှာ ကျမ်းစာနှင့် ယင်းအခြေခံသွန်သင်ချက်များဆိုင်ရာ အသိပညာအလွန်နည်းကြပါသည်။ ဤဘရိုရှာသည် အသိပညာစာအုပ်အတွက် အလွန်ကောင်းသော အထောက်အကူဖြစ်သင့်သည်။”—ဂျပန်။

၁၈။ ဘုရားသခင့်တောင်းဆိုချက်များကို ကျေပွန်အောင်လုပ်ခြင်းနှင့်ပတ်သက်၍ မည်သည့်အရာကို ကျွန်ုပ်တို့ သတိရသင့်သနည်း။

^၁၈ ကမ္ဘာတစ်ဝန်းရှိ အဖွဲ့အစည်း၏ဌာနခွဲများသည် ဤဘရိုရှာကို တောင်းဆိုကြရာ ဘာသာစကား ၂၂၁ မျိုးသို့ ဘာသာပြန်ရန် လက်ခံအတည်ပြုထားပြီ။ ဤစာပေအသစ်သည် ယေဟောဝါဘုရားသခင် တောင်းဆိုထားသည့်အရာကို အခြားသူများသိရှိရန်ထောက်ကူပေးဖို့ ကျွန်ုပ်တို့အား အကူအညီပေးရာတွင် အဖိုးတန်ကြောင်းထင်ရှားပါလေစေ။ ဟောပြောပြီးတပည့်ဖြစ်စေပါဟူသည့် အမိန့်အပါအဝင် ဘုရားသခင့်တောင်းဆိုချက်များကို ကျွန်ုပ်တို့အပိုင်းမှ ကျေပွန်အောင်လုပ်ခြင်းသည် ယေဟောဝါရှင်ကို ကျွန်ုပ်တို့မည်မျှချစ်ကြောင်းပြဖို့ အဖိုးတန်အခွင့်ထူးကိုပေါ်စေကြောင်း သတိရကြစို့။ မှန်ပါသည်။ ကျွန်ုပ်တို့ထံမှ ဘုရားသခင်တောင်းဆိုထားသည့်အရာသည် ဝန်ထုပ်ဝန်ပိုးမဟုတ်ပါလေ။ ဤတောင်းဆိုချက်အတိုင်းနေထိုင်ခြင်းသည် အကောင်းဆုံးလမ်းစဉ်ဖြစ်သည်။—ဆာလံ ၁၉:၇-၁၁။

[အောက်ခြေမှတ်ချက်များ]

သင်ရှင်းပြနိုင်သလော

◻ ယေဟောဝါရှင်သည် မိမိ၏ကျေးကျွန်များအား အဘယ်တာဝန်နှစ်ရပ်တွင် ပါဝင်ကြဖို့ တောင်းဆိုသနည်း။

◻ ဟောပြောကာ တပည့်ဖြစ်စေရမည့် ကျွန်ုပ်တို့၏တာဝန်သည် အဘယ်ကြောင့် ဝန်ထုပ်ဝန်ပိုးတစ်ခုမဟုတ်သနည်း။

◻ “သစ္စာနှင့်သတိပညာရှိသောကျွန်” သည် ကျွန်ုပ်တို့၏ ဟောပြောခြင်းနှင့် တပည့်ဖြစ်စေခြင်းလုပ်ငန်းတွင် အသုံးပြုဖို့အတွက် မည်သည့်ကိရိယာများကို ထောက်ပံ့ပေးခဲ့သနည်း။

◻ တောင်းဆိုဘရိုရှာကို မည်သူများအတွက် ရည်ရွယ်ထားသနည်း၊ ယင်းကို ကျွန်ုပ်တို့၏ဓမ္မအမှုတွင် မည်သို့အသုံးပြုနိုင်သနည်း။

[စာမျက်နှာ ၂၄ ပါ ရုပ်ပုံ]

ကျွန်ုပ်တို့၏ဟောပြောခြင်းနှင့်တပည့်ဖြစ်စေခြင်းလုပ်ငန်းသည်ဝန်ထုပ်ဝန်ပိုးမဟုတ်ပါ

[စာမျက်နှာ ၂၆ ပါ ရုပ်ပုံ]

“ဘုရားသခင်သစ္စာတော်တည်စေသတည်း” (၁၉၄၆၊ ၁၉၅၂ ခုနှစ်တွင် ပြန်လည်တည်းဖြတ်)– ၅၄ ဘာသာဖြင့် ၁၉,၂၅၀,၀၀၀ စောင်

“ထာဝရအသက်သို့ပို့ဆောင်သောသမ္မာတရား” (၁၉၆၈)– ၁၁၇ ဘာသာဖြင့် ၁၀၇,၀၀၀,၀၀၀ စောင်(ပြင်သစ်စကားဖြင့်ပြထား)

“သင်သည် ကမ္ဘာ့ပရဒိသုအတွင်း ထာဝစဉ်အသက်ရှင်နိုင်သည်” (၁၉၈၂)– ၁၃၀ ဘာသာဖြင့် ၈၀,၉၀၀,၀၀၀ စောင်(ရုရှားစကားဖြင့်ပြထား)

“ထာဝရအသက်ရစေသောအသိပညာ” (၁၉၉၅)– ၁၂၅ ဘာသာဖြင့်၄၅,၅၀၀,၀၀၀ စောင်(ဂျာမန်စကားဖြင့်ပြထား)