ဘုရားသခင် ကျွန်ုပ်တို့ထံမှအဘယ်အရာကို တောင်းဆိုတော်မူသနည်း

“ဘုရားသခင်၏ပညတ်တော်များကို ကျွန်ုပ်တို့ စောင့်ခြင်းသည် ကိုယ်တော်ကို ချစ်ခြင်းမည်၏; မည်သို့ပင်ဖြစ်စေ ကိုယ်တော်၏ပညတ်တော်များသည် ဝန်ထုပ်ဝန်ပိုးမဟုတ်ပါ။”—၁ ယောဟန် ၅:၃၊ ကဘ။

၁၊ ၂။ ဘုရားသခင်နှစ်သက်သည့်နည်းအတိုင်း ဝတ်ပြုလိုသူများအတွက် ကိုယ်တော်၏ တောင်းဆိုချက်များရှိခြင်းကို အဘယ်ကြောင့် မအံ့သြသင့်သနည်း။

“ကျွန်တော့်ဘာသာနဲ့ပဲ ကျွန်တော်ကျေနပ်ပါတယ်!” လူအများက ဤသို့ပင်ပြောလေ့ရှိကြသည်မဟုတ်လော။ အမှန်မှာ “ကျွန်တော့်ဘာသာကို ဘုရားသခင် နှစ်သက်ပါသလော” ဟူ၍မေးသင့်သည်။ မှန်ပါသည်၊ ကိုယ်တော်နှစ်သက်သည့်နည်းအတိုင်း ဝတ်ပြုလိုသူတို့အတွက် ဘုရားသခင်ထံတွင် တောင်းဆိုတော်မူချက်များ ရှိပါသည်။ ယင်းကြောင့် ကျွန်ုပ်တို့အံ့သြသင့်ပါသလော။ အမှန်ပင် မအံ့သြသင့်ပါ။ သင့်တွင် မကြာသေးခင်ကမှ အကြီးအကျယ်အကုန်အကျခံကာ ပြန်လည်မွမ်းမံထားသည့် လှပသောအိမ်တစ်ဆောင်ကို ပိုင်ဆိုင်ထားသည် ဆိုကြပါစို့။ ထိုတွင် မည်သူ့ကိုမဆို သင်နေထိုင်ခွင့်ပြုမည်လော။ လုံးဝခွင့်ပြုမည်မဟုတ်! အိမ်ကိုငှားကောင်းငှားမည့်သူ မည်သူမဆို သင့်တောင်းဆိုချက်များကို ပြည့်မီရပါမည်။

^၂ အလားတူစွာ ယေဟောဝါဘုရားသခင်သည် ဤမြေကြီးဆိုင်ရာစံအိမ်ကို လူသားများအတွက် ပေးထားတော်မူသည်။ မဝေးတော့သော အနာဂတ်တွင် မိမိ၏နိုင်ငံတော်အုပ်ချုပ်မှုအောက် မြေကြီးကို လှပသောပရဒိသုအဖြစ်သို့ပြောင်းစေကာ “ပြန်လည်မွမ်းမံ” ပါလိမ့်မည်။ ယေဟောဝါသည် ယင်းကိုပြီးမြောက်စေပါလိမ့်မည်။ ၎င်းကို ဖြစ်မြောက်စေရန် ကိုယ်တော်တိုင် အကြီးအကျယ်အကုန်အကျခံကာ မိမိ၏တစ်ပါးတည်းသောသားတော်ကို ပေးအပ်တော်မူသည်။ သေချာသည်ကား ထိုတွင်နေထိုင်မည့်သူတို့အတွက် ဘုရားသခင်ထံတော်တွင် တောင်းဆိုချက်များရှိရမည်!—ဆာလံ ၁၁၅:၁၆; မဿဲ ၆:၉၊ ၁၀; ယောဟန် ၃:၁၆။

၃။ ဘုရားသခင် ကျွန်ုပ်တို့ထံမှ မျှော်လင့်သည့်အရာကို ရှောလမုန်က မည်သို့အတိုချုပ်ဖော်ပြခဲ့သနည်း။

^၃ ထိုတောင်းဆိုချက်များသည် အဘယ်အရာဖြစ်ကြောင်း ကျွန်ုပ်တို့မည်သို့သိရှိနိုင်မည်နည်း။ ပညာရှိဘုရင်ရှောလမုန်ကို ယေဟောဝါမှုတ်သွင်းခြင်းအားဖြင့် ကျွန်ုပ်တို့ထံမှ ကိုယ်တော်အဘယ်အရာမျှော်လင့်ကြောင်းကို အတိုချုပ်ဖော်ပြသည်။ စည်းစိမ်ဥစ္စာ၊ ဆောက်လုပ်ရေးစီမံကိန်းများ၊ ဝါသနာပါရာဂီတနှင့် ချစ်ရည်လူးခြင်းအပါအဝင် သူလိုက်စားခဲ့သမျှကို ပြန်ပြောင်းသုံးသပ်ပြီးသည့်နောက် ရှောလမုန် သဘောပေါက်လာခဲ့သည်ကားဤသို့– “အချုပ်အခြာစကားဟူမူကား ဘုရားသခင်ကိုကြောက်ရွံ့၍ ပညတ်တော်တို့ကို စောင့်ရှောက်လော့။ ဤရွေ့ကား လူနှင့်ဆိုင်သော အမှုအရာအလုံးစုံတို့ကို ချုပ်ခြာသတည်း။”—ဒေသနာ ၁၂:၁၃။

“ကိုယ်တော်၏ပညတ်တော်များသည် ဝန်ထုပ်ဝန်ပိုးမဟုတ်”

၄-၆။ (က) “ဝန်ထုပ်ဝန်ပိုး” ဟူ၍ပြန်ဆိုထားသော ဂရိစကားလုံး၏ စာသားအတိုင်း အဓိပ္ပာယ်ကား အဘယ်နည်း။ (ခ) ဘုရားသခင်၏ပညတ်တော်များသည် ဝန်ထုပ်ဝန်ပိုးမဟုတ်ဟု အဘယ်ကြောင့် ကျွန်ုပ်တို့ပြောနိုင်သနည်း။

^၄ “ပညတ်တော်တို့ကို စောင့်ရှောက်လော့။” အခြေခံအားဖြင့် ယင်းသည် ကျွန်ုပ်တို့ထံမှ ဘုရားသခင်မျှော်လင့်သောအရာပင်တည်း။ ကိုယ်တော်ယင်းသို့တောင်းဆိုခြင်းသည် အလွန်အကျွံတောင်းဆိုခြင်းလော။ လုံးဝမဟုတ်ပါ။ ဘုရားသခင့်ပညတ်တော်များ သို့မဟုတ် တောင်းဆိုချက်များနှင့်ပတ်သက်၍ အလွန်စိတ်ချနိုင်သည့်အချက်တစ်ခုကို တမန်တော်ယောဟန်က ကျွန်ုပ်တို့ကို ပြောပြသည်။ သူက “ဘုရားသခင်၏ပညတ်တော်တို့ကိုစောင့်ခြင်းသည် ကိုယ်တော်ကိုချစ်ခြင်းမည်၏။ မည်သို့ပင်ဖြစ်စေ ကိုယ်တော်၏ပညတ်တော်တို့သည် ဝန်ထုပ်ဝန်ပိုးမဟုတ်ပါ” ဟုရေးသားခဲ့သည်။—၁ ယောဟန် ၅:၃၊ ကဘ။

^၅ ဤတွင် “ဝန်ထုပ်ဝန်ပိုး” ဟူ၍ ဘာသာပြန်ထားသော ဂရိစကားလုံး၏ စာသားအတိုင်း အဓိပ္ပာယ်မှာ “လေးလံသော” ဟူ၍ဖြစ်သည်။ ယင်းက တောင်းဆိုထားရာများကို ပြည့်မီရန် ခဲယဉ်းခြင်း သို့မဟုတ် ပြီးမြောက်စေရန် ခက်ခဲခြင်းကို ရည်ညွှန်းနိုင်သည်။ မဿဲ ၂၃:၄ (သမ) တွင် ကျမ်းတတ်များနှင့် ဖာရိရှဲများက လူတို့အပေါ်တင်သည့် လူတို့စီရင်သောပညတ်နှင့် ထုံးတမ်းစဉ်လာများဖြစ်သော “လေးလံသောဝန်ထုပ်များ” ကိုဖော်ပြရန် ယင်းစကားလုံးကိုအသုံးပြုထားသည်။ သက်ကြီးရွယ်အိုယောဟန် ကောက်ချက်ချနေသည့်အချက်ကို သင်သဘောပေါက်ပါသလော။ ဘုရားသခင့်ပညတ်တော်များသည် လေးလံသည့်ဝန်ထုပ် မဟုတ်ပါ၊ လိုက်နာရန် အလွန်တရာမှ ခက်ခဲသည့်အရာလည်းမဟုတ်ပါ။ (တရားဟောရာ ၃၀:၁၁ နှိုင်းယှဉ်။) ဆန့်ကျင်ဘက်အနေနှင့် ကျွန်ုပ်တို့သည် ဘုရားသခင်ကို ချစ်မည်ဆိုလျှင် ကိုယ်တော့်တောင်းဆိုချက်များ ပြည့်မီခြင်းက ကျွန်ုပ်တို့ကို ပျော်ရွှင်စေမည်။ ယင်းက ယေဟောဝါကို ကျွန်ုပ်တို့ချစ်ကြောင်း ပြသဖို့ တန်ဖိုးရှိအခွင့်ထူးကို ရရှိစေသည်။

^၆ ကျွန်ုပ်တို့သည် ဘုရားသခင်ကိုချစ်ကြောင်းတင်ပြရန် ကျွန်ုပ်တို့ထံမှ ဘုရားသခင်မျှော်လင့်သည့်အရာများကို အတိအကျသိရှိရန်လိုသည်။ ဘုရားသခင့်တောင်းဆိုချက်ငါးခုကို ယခုသုံးသပ်ကြည့်ကြစို့။ ဤသို့သုံးသပ်ရင်း ‘ဘုရားသခင်၏ပညတ်တော်များသည် ဝန်ထုပ်ဝန်ပိုးမဟုတ်ပါ’ ဟုယောဟန်ရေးခဲ့သည့်အချက်ကို စိတ်ထဲစွဲထားပါ။

ဘုရားသခင်ကို သိကျွမ်းပါ

၇။ ကျွန်ုပ်တို့၏ကယ်တင်ခြင်းသည် မည်သည့်အရာပေါ်တွင် မူတည်သနည်း။

^၇ ပထမတောင်းဆိုချက်မှာ ဘုရားသခင်ကို သိကျွမ်းခြင်းဖြစ်သည်။ ယောဟန် အခန်းကြီး ၁၇ တွင်မှတ်တမ်းတင်ထားသည့် ယေရှု၏မြွက်ဆိုချက်ကို သုံးသပ်ကြည့်ပါ။ အဖြစ်အပျက်မှာ လူသားအဖြစ် ယေရှုအသက်တာ၏ နောက်ဆုံးညတွင်ဖြစ်သည်။ ယေရှုသည် ညနေပိုင်းအချိန်အတော်များများကို မိမိ၏ခွဲခွာမှုအတွက် မိမိ၏တမန်တော်များကို ပြင်ဆင်ပေးနေခြင်းတွင် အသုံးပြုခဲ့သည်။ ယေရှုသည် သူတို့၏ထာဝရအနာဂတ်တည်းဟူသော အနာဂတ်အတွက် စိုးရိမ်ကြောင့်ကြခဲ့၏။ ကောင်းကင်သို့မော်ကြည့်ကာ သူတို့အတွက် ကိုယ်တော်ဆုတောင်းတော်မူခဲ့သည်။ အခန်းငယ် ၃ တွင် ကျွန်ုပ်တို့ဤသို့ဖတ်ရသည်– “ထာဝရအသက်ဟူမူကား မှန်သောဘုရားသခင်တစ်ဆူတည်းဖြစ်တော်မူသော ကိုယ်တော်ကိုလည်းကောင်း၊ စေလွှတ်တော်မူသော ယေရှုခရစ်ကိုလည်းကောင်း သိကျွမ်းခြင်းတည်း။” မှန်ပါသည်၊ သူတို့၏ကယ်တင်ခြင်းသည် ဘုရားသခင်ကိုကော ခရစ်တော်ကိုပါ “သိကျွမ်းခြင်း” ပေါ်တွင် မူတည်သည်။ ယင်းသည် ကျွန်ုပ်တို့နှင့်လည်း သက်ဆိုင်ပါသည်။ ကယ်တင်ခြင်းရရှိရန် ထိုသို့သိကျွမ်းရမည်ဖြစ်သည်။

၈။ ‘ဘုရားသခင်ကို သိကျွမ်းသည်’ ဟုဆိုရာတွင် အဘယ်အရာကို ဆိုလိုသနည်း။

^၈ သို့သော် ဘုရားသခင်ကို ‘သိကျွမ်းသည်’ ဟုဆိုရာတွင် အဘယ်အရာကိုဆိုလိုသနည်း။ ဤတွင် “သိကျွမ်းခြင်း” ဟုပြန်ဆိုထားသော ဂရိစကားလုံးမှာ “သိရှိလာသည်၊ အသိအမှတ်ပြုသည်၊” သို့မဟုတ် “လုံးလုံးသဘောပေါက်သည်” ဟူသည့် အဓိပ္ပာယ်ထွက်သည်။ “သိကျွမ်းခြင်း” ဟူသည့်ပြန်ဆိုချက်သည် ဆက်၍ပြုလုပ်နေရသည့်ဖြစ်စဉ်နှင့် သက်ဆိုင်ကြောင်းကိုလည်း သတိပြုပါ။ ထို့ကြောင့် ဘုရားသခင်ကိုသိကျွမ်းသည်ဟုဆိုရာတွင် အပေါ်ယံမဟုတ်ဘဲ အတွင်းကျကျသိလာခြင်း၊ ကိုယ်တော်နှင့်သင့်မြတ်သောဆက်ဆံရေး တိုးတက်နေစေခြင်းကိုဆိုလိုပါသည်။ ဘုရားသခင်နှင့်ဆက်ဆံရေး ဆက်၍ရှိနေခြင်းကြောင့် ကိုယ်တော်ကိုသိကျွမ်းမှု အဆက်မပြတ်တိုးပွားလာပါသည်။ ယေဟောဝါအကြောင်း အလုံးစုံကိုသိသွားခြင်းဆိုသည်မှာ ဘယ်တော့မျှမဖြစ်နိုင်သောကြောင့် ဤဖြစ်စဉ်သည် ထာဝစဉ်ဆက်သွားနိုင်ပါသည်။—ရောမ ၁၁:၃၃။

၉။ ဖန်ဆင်းခြင်းစာအုပ်မှ ယေဟောဝါအကြောင်း အဘယ်အရာကို ကျွန်ုပ်တို့သင်ယူနိုင်သနည်း။

^၉ ကျွန်ုပ်တို့သည် ဘုရားသခင်ကိုသိကျွမ်းအောင် မည်သို့လုပ်မည်နည်း။ ကျွန်ုပ်တို့ကို ထောက်ကူနိုင်သည့် စာအုပ်နှစ်အုပ်ရှိသည်။ တစ်ခုမှာ ဖန်ဆင်းခြင်းစာအုပ်ဖြစ်သည်။ ယေဟောဝါဖန်ဆင်းထားသည့် သက်ရှိသက်မဲ့နှစ်မျိုးစလုံးက ကိုယ်တော်သည် မည်သို့သော ပုဂ္ဂိုလ်မျိုးဖြစ်ကြောင်း အတော်အတန်ထိုးထွင်းသိမြင်စေသည်။ (ရောမ ၁:၂၀) ပုံဥပမာတချို့ကို သုံးသပ်ကြည့်ပါ။ ခန့်ညားထည်ဝါသော ရေတံခွန်မှ စီးကျသံ၊ မုန်တိုင်းထန်စဉ် ပင်လယ်လှိုင်းအထပ်ထပ်ရိုက်ခတ်သံ၊ ကြယ်တာရာများစီခြယ်ထားသည့် ကြည်လင်သော ကောင်းကင်ညမြင်ကွင်း အစရှိသည့်အရာများက ယေဟောဝါသည် “တန်ခိုးနှင့်ပြည့်စုံ” သောဘုရားဖြစ်ကြောင်း သင်ကြားပေးသည်မဟုတ်လော။ (ဟေရှာယ ၄၀:၂၆) ခွေးကလေးတစ်ကောင်သည် နောက်ပြန်လှည့်ကာ မိမိ၏အမြီးကို လိုက်ဟပ်ခြင်း သို့မဟုတ် ကြောင်ကလေးတစ်ကောင် သိုးမွေးချည်လုံးဖြင့်ကစားနေခြင်းကို ကြည့်ကာ ရယ်မောနေသော ကလေးငယ်တစ်ဦး၏အဖြစ်က “ပျော်ရွှင်သောဘုရား” ယေဟောဝါတွင် ပျော်ရွှင်စေလိုသောသဘောရှိကြောင်း မဖော်ပြပေလော။ (၁ တိမောသေ ၁:၁၁၊ ကဘ) အလွန်မြိန်သော ထမင်းတစ်နပ်၏အရသာ၊ မြက်ခင်းပြင်ရှိပန်းမန်များ၏ စွဲမက်ဖွယ်ရနံ့၊ နုနယ်လှသည့်လိပ်ပြာများ၏ တောက်ပသည့်အသွေးအရောင်၊ နွေဦးပေါက်ရာသီတွင် ကျေးငှက်သာရကာတို့၏အသံ၊ ချစ်မြတ်နိုးရသူတို့၏ တယုတယပွေ့ဖက်မှု—ဤကဲ့သို့သောအရာတို့မှ ကျွန်ုပ်တို့၏ဖန်ဆင်းရှင်သည် ကျွန်ုပ်တို့အား ဘဝကိုမွေ့ပျော်စေလိုသည့် မေတ္တာရှိသောဘုရားသခင်ဖြစ်ကြောင်း ပိုင်းခြားသိရှိရသည်မဟုတ်လော။—၁ ယောဟန် ၄:၈။

၁၀၊ ၁၁။ ဖန်ဆင်းခြင်းစာအုပ်မှ ကျွန်ုပ်တို့မသိရှိနိုင်သည့် ယေဟောဝါနှင့် ကိုယ်တော့်ရည်ရွယ်တော်မူချက်များနှင့်ပတ်သက်သောအရာများကား အဘယ်နည်း။ (ခ) အဘယ်မေးခွန်းများ၏အဖြေများကို ကျမ်းစာထဲတွင်သာ တွေ့ရသနည်း။

^၁၀ သို့ရာတွင် ဖန်ဆင်းခြင်းစာအုပ်မှ ယေဟောဝါအကြောင်းကို အကန့်အသတ်ဖြင့်သာ သိရှိနိုင်သည်။ ဥပမာအနေဖြင့် ဘုရားသခင်၏နာမတော်ကား အဘယ်နည်း။ အဘယ်ကြောင့် ကမ္ဘာကိုဖန်ဆင်းပြီး ထိုတွင် လူကိုထားတော်မူသနည်း။ ဆိုးသွမ်းမှုကို ဘုရားသခင် အဘယ်ကြောင့် ခွင့်ပြုတော်မူသနည်း။ ကျွန်ုပ်တို့အတွက် အဘယ်အနာဂတ်ရှိသနည်း။ ထိုသို့သောမေးခွန်းများအတွက် အဖြေကို ဘုရားသခင်အကြောင်း သိရှိစေသည့် အခြားစာအုပ်တစ်အုပ်ဖြစ်သော သမ္မာကျမ်းစာတွင် ရှာဖွေရမည်ဖြစ်သည်။ အခြားအဘယ်နေရာတွင်မှမရရှိနိုင်သော အချက်အလက်များဖြစ်သည့် ကိုယ်တော့်နာမတော်၊ ကိုယ်တော်၏အရည်အသွေးများနှင့်ရည်ရွယ်တော်မူချက်များအပါအဝင် ကိုယ်တိုင်၏အကြောင်းအရာများကို ယင်းစာအုပ်တွင် ယေဟောဝါရှင် ဖော်ပြထားတော်မူသည်။—ထွက်မြောက်ရာ ၃၄:၆၊ ၇; ဆာလံ ၈၃:၁၈; အာမုတ် ၃:၇။

^၁၁ ကျမ်းစာတွင် ကျွန်ုပ်တို့သိရှိရန်လိုသည့် အခြားသောပုဂ္ဂိုလ်များနှင့်ပတ်သက်သော အရေးကြီးအသိပညာအကြောင်းကိုလည်း ယေဟောဝါဖော်ပြပေးထားသည်။ ဥပမာအနေဖြင့် ယေရှုသည် မည်သူနည်း၊ ယေဟောဝါ၏ရည်ရွယ်ချက်များကို အကောင်အထည်ဖော်ရာတွင် ကိုယ်တော်သည် အဘယ်အခန်းကဏ္ဍမှ လုပ်ဆောင်သနည်း။ (တမန်တော် ၄:၁၂) စာတန်မာရ်နတ်ကား မည်သူနည်း။ လူများကို အဘယ်နည်းများဖြင့် သူလှည့်ဖြားသနည်း။ သူ၏လှည့်ဖြားမှုကို ကျွန်ုပ်တို့ မည်သို့ရှောင်ကြဉ်နိုင်မည်နည်း။ (၁ ပေတရု ၅:၈) ဤမေးခွန်းများအတွက် အသက်ကယ်အဖြေများကို သမ္မာကျမ်းစာထဲ၌သာတွေ့ရသည်။

၁၂။ ဘုရားသခင်နှင့် ကိုယ်တော့်ရည်ရွယ်တော်မူချက်များကို သိကျွမ်းခြင်းသည် ဝန်ထုပ်တစ်ခု အဘယ့်ကြောင့်မဟုတ်ကြောင်း သင်မည်သို့ရှင်းပြမည်နည်း။

^၁၂ ဘုရားသခင်နှင့် ကိုယ်တော်၏ရည်ရွယ်ချက်များကို ဤသို့သိရန်မှာ ဝန်ထုပ်တစ်ခုဖြစ်ပါသလော။ လုံးဝမဖြစ်ပါလေ! ဘုရားသခင့်နာမတော်ကား ယေဟောဝါဖြစ်ကြောင်း၊ ကိုယ်တော့်နိုင်ငံတော်အားဖြင့် ဤကမ္ဘာပေါ် ပရဒိသုပြန်လည်တည်ထောင်မည်ဖြစ်ကြောင်း၊ ကျွန်ုပ်တို့၏အပြစ်အတွက် ရွေးနုတ်ဖိုးအဖြစ် မိမိ၏ချစ်တော်မူသောသားတော်ကို ပေးခဲ့ကြောင်း၊ ထို့ပြင် အခြားအခြားသော သမ္မာတရားများကို ဦးဆုံး သင်သိရှိခဲ့စဉ်က မည်သို့ခံစားခဲ့ရသည်ကို ပြန်မှတ်မိနိုင်ပါသလော။ အသိပညာမဲ့မှုမျက်နှာဖုံးကို ဖယ်ရှားလိုက်ပြီး အရာဝတ္တုများကို ဦးဆုံးအကြိမ်ရှင်းလင်းစွာတွေ့မြင်လိုက်ရသည့်နှယ် မဟုတ်လော။ ဘုရားသခင်ကိုသိကျွမ်းခြင်းသည် ဝန်ထုပ်မဟုတ်ပါ။ နှစ်ခြိုက်ဖွယ်ရာပင်တည်း!—ဆာလံ ၁:၁-၃; ၁၁၉:၉၇။

ဘုရားသခင့်စံနှုန်းများကို အမီလိုက်ခြင်း

၁၃၊ ၁၄။ (က) ကျွန်ုပ်တို့သည် ဘုရားသခင်ကို သိကျွမ်းသည်နှင့်အမျှ မိမိတို့အသက်တာတွင် မည်သည့်အပြောင်းအလဲများလုပ်ရန် လိုအပ်ပါသနည်း။ (ခ) မသန့်ရှင်းသည့်မည်သည့်အကျင့်အကြံများကို ကျွန်ုပ်တို့ရှောင်ကြဉ်ကြဖို့ ဘုရားသခင်တောင်းဆိုတော်မူသနည်း။

^၁၃ ကျွန်ုပ်တို့သည် ဘုရားသခင်ကို သိကျွမ်းလာသည်နှင့်အမျှ မိမိတို့၏အသက်တာတွင် အပြောင်းအလဲများလုပ်ရန်လိုကြောင်း သဘောပေါက်လာတော့သည်။ ယင်းက ဒုတိယတောင်းဆိုချက်ကို ပေါ်ပေါက်စေသည်။ ကျွန်ုပ်တို့သည် တော်မှန်သော အကျင့်အကြံဆိုင်ရာ ဘုရားသခင်၏စံနှုန်းများကို အမီလိုက်ကာ ကိုယ်တော်၏သမ္မာတရားကို လက်ခံရမည်။ သမ္မာတရားကား အဘယ်နည်း။ ကျွန်ုပ်တို့ အဘယ်အရာကိုလုပ်သည်၊ အဘယ်အရာကိုယုံကြည်သည်ဟူသောအချက်သည် ဘုရားသခင်အတွက် အမှန်ပင် အရေးကြီးသလော။ ယနေ့များစွာသောသူများသည် အရေးကြီးသည်ဟု မယူမှတ်ကြကြောင်း ထင်ရှားသည်။ မထိမ်းမြားဘဲ အတူတကွနေထိုင်ခြင်းကို အပြစ်တစ်ရပ်အဖြစ် မရှုမြင်သင့်ကြောင်း ၁၉၉၅ ခုနှစ်တွင် ထုတ်ဝေသော ချာ့ချ်အောဖ်.အင်္ဂလန်အသင်း၏အစီရင်ခံစာတစ်စောင်၌ အကြံပြုထားသည်။ “‘လက်မထပ်ဘဲ အတူနေခြင်းအပြစ်’ ဟူသောအသုံးအနှုန်းသည် အသရေဖျက်ခြင်းဖြစ်၍ အထောက်အကူမဖြစ်စေပါ” ဟုချာ့ချ်ဘိရှော့တစ်ဦး ထွက်ဆိုခဲ့သည်။

^၁၄ ဤသို့ဆိုလျှင် “လက်မထပ်ဘဲ အတူနေခြင်းအပြစ်” ဟူသည် အပြစ်မဟုတ်တော့ပြီလော။ ထိုသို့သောအကျင့်အကြံနှင့်ပတ်သက်၍ ယေဟောဝါရှင် မည်သို့သဘောထားကြောင်းကို ကျွန်ုပ်တို့အား ရှင်းလင်းပြတ်သားစွာ မိန့်တော်မူသည်။ ကိုယ်တော့်နှုတ်ကပါဌ်တော် သမ္မာကျမ်းစာက “ခပ်သိမ်းသောသူတို့၌ မင်္ဂလာဆောင်ခြင်းအမှုနှင့် သစ္စာသံဝါသပြုခြင်းအမှုသည် အသရေရှိစေလော့။ မတရားသောမေထုန်ကိုပြုသောသူနှင့် သူ့မယားကိုပြစ်မှားသောသူတို့ကို ဘုရားသခင်စစ်ကြောစီရင်တော်မူလိမ့်မည်” ဟုထုတ်ဖော်ပြောထားသည်။ (ဟေဗြဲ ၁၃:၄) မထိမ်းမြားမီ သံဝါသပြုခြင်းသည် တရားလက်လွတ်ဓမ္မဆရာများနှင့် ချာ့ချ်တက်သူအများ၏အမြင်တွင် အပြစ်ဖြစ်ချင်မှဖြစ်မည်မှန်သော်လည်း ဘုရားသခင့်မျက်မှောက်တော်တွင်မူ ကြီးလေးသောအပြစ်ဖြစ်သည်တကား! ထို့အပြင် သူ့သားအိမ်ရာပြစ်မှားခြင်း၊ သွေးသားနီးစပ်သူချင်း သံဝါသပြုခြင်း၊ လိင်တူမေထုန်ပြုခြင်းတို့သည်လည်း အလားတူအပြစ်မျိုးဖြစ်သည်။ (ဝတ်ပြုရာ ၁၈:၆; ၁ ကောရိန္သု ၆:၉၊ ၁၀) မသန့်ရှင်းဟူ၍ ကိုယ်တော်ရှုမြင်တော်မူသည့် ထိုသို့သောအကျင့်များကို ရှောင်ကြဉ်ရန် ကျွန်ုပ်တို့ထံမှ ဘုရားသခင်တောင်းဆိုတော်မူသည်။

၁၅။ ဘုရားသခင့်တောင်းဆိုချက်များတွင် သူတစ်ထူးကို ကျွန်ုပ်တို့ပြုမူဆက်ဆံပုံကော ကျွန်ုပ်တို့ယုံကြည်သည့်အရာပါ မည်သို့ပါဝင်သနည်း။

^၁၅ သို့ရာတွင် အပြစ်ဟူ၍ ဘုရားသခင်ရှုမြင်သောအကျင့်များကို ရှောင်ရုံဖြင့်မလုံလောက်ပါ။ ဘုရားသခင်တောင်းဆိုချက်များတွင် သူတစ်ထူးကို ကျွန်ုပ်တို့ပြုမူဆက်ဆံပုံလည်း ပါဝင်သည်။ အိမ်ထောင်တွင် လင်နှင့်မယားတို့သည် တစ်ဦးကိုတစ်ဦး မေတ္တာနှင့်လေးစားမှုရှိကြရန် ကိုယ်တော်မျှော်လင့်တော်မူသည်။ မိဘများအနေဖြင့် ကလေးများ၏လိုအပ်ချက်များဖြစ်သော ရုပ်ပစ္စည်း၊ ဝိညာဉ်ရေးနှင့် စိတ်လှုပ်ရှားမှုဆိုင်ရာတို့ကို ကြည့်ရှုပြုစုပေးရန် ကိုယ်တော်တောင်းဆိုတော်မူသည်။ သားသမီးတို့သည် မိမိတို့၏မိဘများစကားနားထောင်ကြရန် မိန့်တော်မူထားသည်။ (သု. ၂၂:၆; ကောလောသဲ ၃:၁၈-၂၁) ထို့ပြင် ကျွန်ုပ်တို့၏ယုံကြည်ချက်များနှင့်ပတ်သက်၍ကော မည်သို့နည်း။ မှောက်မှားသောဘာသာမှ ဆင်းသက်လာသော သို့မဟုတ် ကျမ်းစာတွင် သွန်သင်ထားသည့် ရှင်းလင်းပြတ်သားသော သမ္မာတရားနှင့် ဆန့်ကျင်ဖီလာသော ယုံကြည်ချက်များ၊ ထုံးတမ်းစဉ်လာများကို ကျွန်ုပ်တို့ရှောင်ကြဉ်ကြဖို့ ယေဟောဝါဘုရားသခင် အလိုရှိတော်မူသည်။—တရားဟောရာ ၁၈:၉-၁၃; ၂ ကောရိန္သု ၆:၁၄-၁၇။

၁၆။ တော်မှန်သောအကျင့်အကြံဆိုင်ရာ ဘုရားသခင့်စံနှုန်းများကို အမီလိုက်ခြင်းနှင့် ကိုယ်တော်၏သမ္မာတရားကို လက်ခံခြင်းသည် အဘယ်ကြောင့်ဝန်ထုပ်တစ်ခုမဟုတ်ကြောင်း ရှင်းပြပါ။

^၁၆ တော်မှန်သော အကျင့်အကြံအတွက် ဘုရားသခင့်စံနှုန်းများကို အမီလိုက်ခြင်းနှင့် ကိုယ်တော်၏သမ္မာတရားကို လက်ခံယူခြင်းသည် ကျွန်ုပ်တို့အတွက် ဝန်ထုပ်တစ်ခုဖြစ်သလော။ အောက်ပါ အကျိုးကျေးဇူးများကို ကျွန်ုပ်တို့သုံးသပ်ကြည့်လျှင် ဝန်ထုပ်မဟုတ်ပါလေ—အိမ်ထောင်တွင် ဖောက်ပြန်မှုကြောင့် အိမ်ထောင်ပြိုကွဲကာ ဝမ်းနည်းကြေကွဲမှုရှိမည့်အစား လင်နှင့်မယားသည် တစ်ဦးပေါ်တစ်ဦး မေတ္တာနှင့် ယုံကြည်စိတ်ချမှုရှိခြင်း; မိသားစုအတွင်း ကလေးများ အချစ်မခံရခြင်း၊ လျစ်လျူရှုခံရခြင်း၊ မလိုလားမှုခံရခြင်းတို့အစား အိမ်တွင် မိဘများ၏မေတ္တာနှင့်လိုလိုလားလားလက်ခံမှု ခံစားရသောကလေးများ; အပြစ်ရှိသည်ဟုခံစားရခြင်းနှင့် အေအိုင်ဒီအက်စ် သို့မဟုတ် လိင်ဆက်ဆံခြင်းဖြင့် ကူးစက်သည့်အခြားသောရောဂါများကြောင့် ခန္ဓာကိုယ်ချွတ်ယွင်းသွားခြင်းတို့အစား ကြည်လင်သောသြတ္တပ္ပစိတ်နှင့် ကျန်းမာရေးကောင်းမွန်ခြင်းတို့ဖြစ်သည်။ ယေဟောဝါ၏တောင်းဆိုတော်မူချက်များသည် ဘဝကိုမွေ့လျော်နိုင်ရန် ကျွန်ုပ်တို့လိုအပ်သည့် မည်သည့်အရာကိုမျှ မဆုံးရှုံးသွားစေပါ။—တရားဟောရာ ၁၀:၁၂၊ ၁၃။

အသက်နှင့်သွေးကို လေးမြတ်မှုပြပါ

၁၇။ အသက်နှင့်သွေးကို ယေဟောဝါမည်သို့ ရှုမြင်သနည်း။

^၁၇ သင့်အသက်တာကို ဘုရားသခင်၏စံချိန်နှင့်အညီဖြစ်စေသောအခါ အသက်၏အမှန်တကယ်တန်ဖိုးကြီးပုံကို သင်သဘောပေါက်လာသည်။ ယခုတတိယမြောက် ဘုရားသခင့်တောင်းဆိုချက်ကို ဆွေးနွေးကြစို့။ ကျွန်ုပ်တို့သည် အသက်နှင့် အသွေးအပေါ် လေးမြတ်မှုပြ ရမည်။ အသက်သည် ယေဟောဝါအတွက် မြင့်မြတ်သည်။ ကိုယ်တော်သည် အသက်၏ပင်ရင်းဖြစ်သောကြောင့် ဤသို့ဖြစ်အပ်သည်။ (ဆာလံ ၃၆:၉) မိခင်၏ကိုယ်တွင်းရှိ မမွေးသေးသောကလေး၏အသက်သည်ပင် ယေဟောဝါအတွက် တန်ဖိုးကြီးလှသည်တကား! (ထွက်မြောက်ရာ ၂၁:၂၂၊ ၂၃) သွေးသည် အသက်ကို ကိုယ်စားပြုသည်။ ထို့ကြောင့် သွေးသည်လည်း ဘုရားသခင်၏မျက်မှောက်တော်တွင် မြင့်မြတ်သည်။ (ဝတ်ပြုရာ ၁၇:၁၄) သို့ဖြစ်၍ အသက်နှင့်အသွေးအပေါ် ကိုယ်တော်ကဲ့သို့ ရှုမြင်ဖို့ ဘုရားသခင် ကျွန်ုပ်တို့ကို မျှော်လင့်ခြင်းမှာ မအံ့သြသင့်ပါ။

၁၈။ အသက်နှင့်သွေးအပေါ် ယေဟောဝါ၏သဘောထားက ကျွန်ုပ်တို့ထံမှ မည်သည့်အရာကို တောင်းဆိုသနည်း။

^၁၈ အသက်နှင့်သွေးကို လေးမြတ်မှုက ကျွန်ုပ်တို့ထံမှ မည်သည့်အရာကို တောင်းဆိုသနည်း။ ခရစ်ယာန်များဖြစ်သော ကျွန်ုပ်တို့သည် စိတ်လှုပ်ရှားမှုအတွက်မျှနှင့် မိမိတို့၏အသက်ကို မလိုအပ်သောစွန့်စားမှုမျိုးကို မပြုကြပါ။ ကျွန်ုပ်တို့သည် ဘေးအန္တရာယ်မရှိစေရေးနှင့်ပတ်သက်ပြီး စိုးရိမ်မကင်းဖြစ်ကြရာ ကျွန်ုပ်တို့၏ကားများနှင့် အိမ်များကို ဘေးအန္တရာယ်မဖြစ်စေရန် အသေအချာဂရုစိုက်ကြသည်။ (တရားဟောရာ ၂၂:၈) ဆေးရွက်ကြီးသုံးစွဲခြင်း၊ ကွမ်းဝါးခြင်း၊ အပျော်အပါးအတွက် စွဲစေသော သို့မဟုတ် စိတ်ကမောက်ကမဖြစ်စေသော မူးယစ်ဆေးဝါးသုံးခြင်းတို့ကို ကျွန်ုပ်တို့ မပြုလုပ်ကြပါ။ (၂ ကောရိန္သု ၇:၁) ထို့ပြင် ‘အသွေးကိုကြဉ်ရှောင်’ ရမည်ဟူသော ဘုရားသခင် မိန့်တော်မူချက်ကို နားထောင်ကြသောကြောင့် ကျွန်ုပ်တို့၏ခန္ဓာကိုယ်ထဲသို့ သွေးသွင်းခြင်းကို လက်မခံကြပါ။ (တမန်တော် ၁၅:၂၈၊ ၂၉) ကျွန်ုပ်တို့သည် အသက်ကိုမြတ်နိုးကြသော်လည်း ဘုရားသခင့်ပညတ်တော်ကိုချိုးဖောက်ကာ ထာဝရအသက်အလားအလာကို အထိအခိုက်ခံခြင်းဖြင့် လက်ရှိအသက်ကိုကယ်ဆယ်ရန် မကြိုးစားကြပါ!—မဿဲ ၁၆:၂၅။

၁၉။ အသက်နှင့်သွေးကို လေးမြတ်မှုတင်ပြခြင်းကြောင့် ကျွန်ုပ်တို့အကျိုးရရှိပုံကို ရှင်းပြပါ။

^၁၉ အသက်နှင့်အသွေးကို မြင့်မြတ်သောအရာအဖြစ်သဘောထားခြင်းသည် ဝန်ထုပ်ဖြစ်ပါသလော။ လုံးဝမဖြစ်ပါ! စဉ်းစားကြည့်ပါလေ။ ဆေးလိပ်သောက်ခြင်းကြောင့်ရလာသည့် အဆုတ်ကင်ဆာဘေးမှ ကင်းဝေးခြင်းသည် ဝန်ထုပ်တစ်ခုလော။ ဘေးဖြစ်စေနိုင်သောမူးယစ်ဆေးဝါးများကို စိတ္တနှင့်ကာယစွဲလမ်းမှုမှ လွတ်ကင်းခြင်းသည် ဝန်ထုပ်တစ်ခုလော။ သွေးသွင်းခြင်းမှကူးစက်သော အေအိုင်ဒီအက်စ်၊ အသည်းရောင်ရောဂါ သို့မဟုတ် အခြားသော ရောဂါများကို ကြဉ်ရှောင်ခြင်းသည် ဝန်ထုပ်ဖြစ်ပါသလော။ အန္တရာယ်ရှိသည့်အကျင့်နှင့် ဓလေ့များကို ကျွန်ုပ်တို့ရှောင်ကြဉ်ခြင်းသည် ကျွန်ုပ်တို့၏ အကောင်းဆုံးအကျိုးအတွက်ဖြစ်သည်မှာ ရှင်းနေသည်။—ဟေရှာယ ၄၈:၁၇။

၂၀။ မိသားစုတစ်စုသည် အသက်နှင့်ပတ်သက်သော ဘုရားသခင့်အမြင်ထားရှိခြင်းကြောင့် မည်သို့အကျိုးရရှိခဲ့သနည်း။

^၂၀ ဤတွေ့ကြုံမှုကို သုံးသပ်ကြည့်ပါ။ လွန်ခဲ့သောနှစ်အနည်းငယ်က ကိုယ်ဝန်သုံးလခွဲခန့်ရှိသူ သက်သေခံအမျိုးသမီးတစ်ဦးသည် တစ်ညနေခင်းတွင် စတင်သွေးသွန်လာသဖြင့် ဆေးရုံအမြန်တင်လိုက်ရသည်။ ဆရာဝန်သည် သူမကိုစစ်ဆေးပြီးသည့်အခါ မိမိတို့သည် ကိုယ်ဝန်ကိုဖျက်လိုက်ကြရတော့မည်ဖြစ်ကြောင်း သူနာပြုတစ်ဦးအား ပြောလိုက်သည်ကို သူမ အမှတ်မထင်ကြားလိုက်သည်။ မမွေးဖွားသေးသောအသက်နှင့်ပတ်သက်သည့် ဘုရားသခင်၏ရှုမြင်ပုံကို သူမသိရှိသဖြင့် ကိုယ်ဝန်ဖျက်ချခြင်းကို ခိုင်မာစွာငြင်းဆန်ကာ ဆရာဝန်ကို ဤသို့ပြောခဲ့သည်– “သူအသက်ရှင်နေတယ်ဆိုရင်၊ ဒီအတိုင်းပဲနေပါစေ!” သူမသည် သွေးသွန်ဝေဒနာကို အတန်ကြာဆက်ခံစားခဲ့ရသော်လည်း လအနည်းငယ်အကြာတွင် ကျန်းမာသောသားယောက်ျားလေးကို လမစေ့ဘဲ ဖွားမြင်ခဲ့ကာ ယခုမူ ၁၇ နှစ်ရှိနေပေပြီ။ “ကျွန်မတို့ရဲ့သားလေးကို ဖြစ်ပျက်ခဲ့သမျှကို ပြောပြလိုက်တော့ သူက သားကိုအမှိုက်ပုံထဲ မပစ်လိုက်တဲ့အတွက် ဝမ်းသာမိတယ်ဆိုပြီးပြောတယ်။ ဒီနေ့ သူအသက်ရှင်နေရတာဟာ ယေဟောဝါကို ကျွန်မတို့ဝတ်ပြုခြင်းကြောင့်သာဖြစ်တယ်ဆိုတာ သူသိတယ်” ဟူ၍ သူမရှင်းပြသည်။ အသက်နှင့်ဆိုင်သော ဘုရားသခင့်အမြင်ရှိထားခြင်းသည် ဤမိသားစုအဖို့ ဝန်ထုပ်မဟုတ်သည်မှာ သေချာသည်!

ယေဟောဝါရှင်၏ စနစ်တကျဖွဲ့စည်းထားသောလူမျိုးတော်နှင့်အတူ အမှုဆောင်ခြင်း

၂၁၊ ၂၂။ (က) ယေဟောဝါ၏အမှုတော်ကို မည်သူများနှင့်အတူထမ်းဆောင်ဖို့ ကျွန်ုပ်တို့ကို ကိုယ်တော်မျှော်လင့်သနည်း။ (ခ) ဘုရားသခင့်ဖွဲ့စည်းထားသော လူမျိုးကို မည်သို့ခွဲခြားသိမြင်နိုင်သနည်း။

^၂၁ အသက်တာကို ဘုရားသခင်၏စံနှုန်းများနှင့်အညီဖြစ်စေရန် လိုအပ်သောအပြောင်းအလဲများပြုလုပ်ကြသူများသည် ကျွန်ုပ်တို့ချည်းသာမဟုတ်ပါ။ ဤကမ္ဘာပေါ်တွင် ယေဟောဝါ၏ လူမျိုးတစ်မျိုးရှိပြီး သူတို့နှင့်အတူအမှုဆောင်ရန် ကိုယ်တော်မျှော်လင့်တော်မူသည်။ ယင်းက စတုတ္ထမြောက်တောင်းဆိုချက်ကို ကျွန်ုပ်တို့အတွက် ပေါ်ပေါက်စေသည်။ ကျွန်ုပ်တို့သည် ယေဟောဝါ၏ ဝိညာဉ်တော်လမ်းညွှန်သည့် အဖွဲ့အစည်းနှင့်အတူ အမှုဆောင် ရမည်။

^၂၂ သို့ရာတွင် ဘုရားသခင့်ဖွဲ့စည်းထားသောလူမျိုးကို မည်သို့ခွဲခြားသိမြင်နိုင်မည်နည်း။ ကျမ်းစာဖော်ပြထားသည့် စံများအရ သူတို့အလယ်တွင် စစ်မှန်သောမေတ္တာရှိသည်၊ ကျမ်းစာကို နှစ်နှစ်ကာကာလေးမြတ်မှုရှိသည်၊ ဘုရားသခင်၏နာမတော်ကိုဂုဏ်တင်သည်၊ ကိုယ်တော့်နိုင်ငံတော်အကြောင်း ဟောပြောကြပြီး ဤဆိုးသွမ်းသောလောက၏အစိတ်အပိုင်း မဟုတ်ကြပါ။ (မဿဲ ၆:၉; ၂၄:၁၄; ယောဟန် ၁၃:၃၄၊ ၃၅; ၁၇:၁၆၊ ၁၇) ဤကမ္ဘာပေါ်တွင် ဤစစ်မှန်သောခရစ်ယာန်အမှတ်အသားအားလုံးပါရှိသည့် ဘာသာရေးအဖွဲ့အစည်း တစ်ခုတည်းသာရှိသည်။ ၎င်းမှာ ယေဟောဝါသက်သေတို့ဖြစ်သည်!

၂၃၊ ၂၄။ ယေဟောဝါ၏ဖွဲ့စည်းထားသောလူမျိုးနှင့်အတူ ကိုယ်တော့်အမှုဆောင်ခြင်းသည် ဝန်ထုပ်တစ်ခုမဟုတ်ကြောင်း ကျွန်ုပ်တို့ မည်သို့ပမာပြနိုင်သနည်း။

^၂၃ ယေဟောဝါဖွဲ့စည်းထားသောလူမျိုးနှင့်အတူ ကိုယ်တော်ကိုအမှုဆောင်ခြင်းသည် ဝန်ထုပ်ဖြစ်ပါသလော။ မဖြစ်သည်မှာအမှန်! ယင်းနှင့်ဆန့်ကျင်လျက် ခရစ်ယာန်ညီအစ်ကို ညီအစ်မများပါဝင်သော ကမ္ဘာချီမိသားစုထံမှ မေတ္တာနှင့် ထောက်မမှုရရှိခြင်းသည် အဖိုးတန်အခွင့်အရေးပင်ဖြစ်ပါသည်။ (၁ ပေတရု ၂:၁၇) သာဓကအနေနှင့် သင်္ဘောပျက်ဘေးလွတ်ပြီး အသက်ရှင်ကျန်ကာ ရေထဲရောက်နေပြီး ရေပေါ်ပေါ်နေဖို့အတွက် ကြိုးစား၍ကိုယ်ဖော့နေသည်ဟု မိမိကိုယ်ကိုမြင်ယောင်ကြည့်ပါ။ သင်သည် ဆက်၍ကိုယ်မဖော့နိုင်တော့ဟုထင်မှတ်လိုက်ချိန်ဝယ် အသက်ကယ်လှေတစ်စင်းမှ သင့်ကို လက်ကမ်းလိုက်သည်။ မှန်ပါသည်၊ အသက်ရှင်ကျန်သော အခြားသူများ ရှိနေကြသည်တကား! အသက်ကယ်လှေပေါ်ရှိသင်နှင့်အခြားသောသူတို့သည် ကမ်းခြေသို့တစ်ယောက်တစ်လှည့် လှော်ခတ်ကာ လမ်းတစ်လျှောက် အခြားအသက်ရှင်ကျန်ရစ်သူများကို ဆွဲတင်သွားသည်။

^၂၄ ထပ်တူအခြေအနေမျိုးတွင် ကျွန်ုပ်တို့ရောက်နေကြသည်မဟုတ်လော။ ကျွန်ုပ်တို့သည် ဤဆိုးသွမ်းသောလောက၏ အန္တရာယ် “ရေ” ထဲမှ ယေဟောဝါ၏မြေကြီးဆိုင်ရာအဖွဲ့အစည်း၏ “အသက်ကယ်လှေ” ပေါ်သို့ ဆွဲတင်ခံခဲ့ကြရသည်။ ကျွန်ုပ်တို့သည် တစ်လှေတည်းစီးပြီး အမှုဆောင်ကာ ဖြောင့်မတ်သည့် ကမ္ဘာသစ်တည်းဟူသော “ကမ်းခြေ” သို့ တစ်ခရီးတည်းဦးတည်သွားကြသည်။ လမ်းခရီးတစ်လျှောက် ဘဝ၏ဖိစီးမှုများကြောင့် မောပန်းနွမ်းနယ်လာပါမူ စစ်မှန်သောခရစ်ယာန်ရောင်းရင်းများ၏ အကူအညီနှင့် နှစ်သိမ့်မှုရရှိသည့်အတွက် အလွန်ကျေးဇူးတင်စရာပင်!—သု. ၁၇:၁၇။

၂၅။ (က) ဆိုးသွမ်းသောဤလောက၏ “ရေ” ထဲတွင် ရှိနေသေးသူများနှင့်ပတ်သက်၍ ကျွန်ုပ်တို့တွင် အဘယ်တာဝန်ရှိသနည်း။ (ခ) ဘုရားသခင်၏အဘယ်တောင်းဆိုချက်ကို နောက်ဆောင်းပါးတွင် ဆွေးနွေးမည်နည်း။

^၂၅ သို့ရာတွင် “ရေ” ထဲ၌ရှိနေသေးသည့် စိတ်နှလုံးရိုးဖြောင့်သော အခြားသူများနှင့်ပတ်သက်၍ကော မည်သို့နည်း။ ယေဟောဝါ၏အဖွဲ့အစည်းအတွင်းသို့ ဝင်လာရန် ကူညီပေးဖို့ ကျွန်ုပ်တို့တွင် တာဝန်ရှိသည်မဟုတ်လော။ (၁ တိမောသေ ၂:၃၊ ၄) ဘုရားသခင့်တောင်းဆိုချက်များကို သိရှိဖို့ သူတို့ကိုကူညီပေးရန်လိုအပ်သည်။ ယင်းက ဘုရားသခင်၏ ပဉ္စမတောင်းဆိုချက်ကို ကျွန်ုပ်တို့အတွက် ပေါ်ပေါက်စေသည်။ ကျွန်ုပ်တို့သည် ကိုယ်တော်၏နိုင်ငံတော်ကို သစ္စာရှိရှိကြွေးကြော်သူများဖြစ် ရမည်။ ၎င်းတွင် အဘယ်အရာများပါဝင်ကြောင်းကို နောက်ဆောင်းပါးတွင် ဆွေးနွေးမည်။

သင်မှတ်မိသလော

◻ ဘုရားသခင့်ပညတ်တော်များသည် အဘယ်ကြောင့်ဝန်ထုပ်ဝန်ပိုးမဟုတ်သနည်း။

◻ ကျွန်ုပ်တို့သည် ဘုရားသခင်ကို သိကျွမ်းအောင် မည်သို့လုပ်မည်နည်း။

◻ တော်မှန်သောအကျင့်အကြံဆိုင်ရာ ဘုရားသခင့်စံနှုန်းများကိုအမီလိုက်ခြင်းနှင့် ကိုယ်တော်၏သမ္မာတရားကို လက်ခံခြင်းသည်အဘယ်ကြောင့်ဝန်ထုပ်တစ်ခုမဟုတ်သနည်း။

◻ အသက်နှင့်အသွေးအပေါ် ယေဟောဝါ၏သဘောထားကကျွန်ုပ်တို့ထံမှ အဘယ်အရာကို တောင်းဆိုသနည်း။

◻ ဘုရားသခင်၏အမှုတော်ကို မည်သူများနှင့်အတူ ထမ်းဆောင်ဖို့ ကျွန်ုပ်တို့ကို ကိုယ်တော်မျှော်လင့်သနည်း၊ ထိုသူတို့ကို မည်သို့ ခွဲခြားသိမြင်နိုင်သနည်း။

[စာမျက်နှာ ၁၈ ပါ ရုပ်ပုံ]

ဖန်ဆင်းခြင်းစာအုပ်နှင့် ကျမ်းစာမှ ယေဟောဝါရှင်အကြောင်း ကျွန်ုပ်တို့သိရှိလာသည်

[Credit Lines]

Crocodile: By courtesy of Australian International Public Relations; bear: Safari-Zoo of Ramat-Gan, Tel Aviv