အသင်းတော်စာအုပ်ကြီးသင်တန်းကြီးကြပ်မှူးများ ပုဂ္ဂိုလ်ရေးစိတ်ဝင်စားမှုပြကြပုံ

^၁ အသင်းတော်စာအုပ်ကြီးသင်တန်းကို စီစဉ်ထားခြင်းသည် “တစ်ဦးချင်းတစ်ယောက်ချင်းကို သေချာစွာဂရုစိုက်နိုင်ပြီး ဝိညာဉ်ရေးတိုးတက်မှုရအောင်လုပ်နိုင်” ရန်ဖြစ်သည်။ “မိမိလူမျိုးအပေါ်ထားရှိသော ယေဟောဝါ၏မေတ္တာကရုဏာနှင့် ကြင်နာစွာ စောင့်မပြုစုခြင်းတို့ကို ရောင်ပြန်ဟပ်ခြင်းပါတကား။” (ဓအ စ. ၇၅; ဟေရှာ. ၄၀:၁၁) အသင်းတော်စာအုပ်ကြီးသင်တန်းကြီးကြပ်မှူးသည် ထိုသို့တစ်ဦးချင်းကိုဂရုစိုက်ရာတွင် အဓိကအခန်းဏ္ဍမှပါဝင်သည်။

^၂ စာအုပ်ကြီးသင်တန်းတွင်– စာအုပ်ကြီးသင်တန်းအုပ်စုများကို တမင်ရည်ရွယ်၍ လူနည်းနည်းဖြင့်ဖွဲ့ထားရာ စာအုပ်ကြီးသင်တန်းကြီးကြပ်မှူးသည် မိမိ၏အုပ်စုဝင်များကို ကောင်းစွာသိကျွမ်းနိုင်သည်။ (သု. ၂၇:၂၃) အပတ်တိုင်း သင်တန်းမတိုင်မီ သို့မဟုတ် အပြီးတွင် ပေါင်းသင်းရန်အခွင့်အရေးများ ရလေ့ရှိသည်။ တစ်လအတွင်း သူသည် အုပ်စုရှိသူတိုင်းနီးပါးနှင့် စကားစမြည်ပြောဆိုနိုင်ပေမည်။ ယင်းက စာအုပ်ကြီးသင်တန်းအုပ်စုဝင်များသည် စုံစမ်းခြင်းများ ရင်ဆိုင်ရသည့်အခါ သို့မဟုတ် အားပေးမှုလိုအပ်သည့်အခါ သူ့ထံချဉ်းကပ်ရာ၌ သက်သောင့်သက်သာရှိရန် ကူညီပေးသည်။—ဟေရှာ. ၃၃:၂။

^၃ စာအုပ်ကြီးသင်တန်းကြီးကြပ်မှူးသည် သင်တန်းကျင်းပနေစဉ် ပါဝင်ကြရန် အုပ်စုရှိသူတိုင်းကို အားပေးဖို့ကြိုးစားသည်။ ယင်းကိုသူပြုလုပ်သည့်နည်းတစ်နည်းမှာ သင်တန်းကို ကြင်နာ၊ နူးညံ့သိမ်မွေ့စွာ ကျင်းပခြင်းအားဖြင့်ဖြစ်သည်။ (၁ သက်. ၂:၇၊ ၈) သူသည် ဆွေးနွေးခန်းတွင် ငယ်ရွယ်သူများအပါအဝင် အားလုံးပါဝင်ရန် နည်းလမ်းများရှာကြံသည်။ သူသည် အဖြေပေးရန် အချို့သူတို့မဝံ့မရဲဖြစ်လျှင် ကျမ်းချက်တစ်ချက်ဖတ်ပေးရန် သို့မဟုတ် အပိုဒ်တစ်ခုခုကိုအဖြေပေးရန် သူတို့အတွက် ကြိုတင်စီစဉ်ခြင်းဖြင့် သီးသန့်အကူအညီပေးနိုင်သည်။ သို့မဟုတ် ကိုယ်ပိုင်စကားဖြင့် မည်သို့အဖြေပေးရမည်ကို သူတို့အားပြပေးနိုင်သည်။

^၄ စာအုပ်ကြီးသင်တန်းကြီးကြပ်မှူး၏လက်ထောက်သည် ဓမ္မအမှုထမ်းတစ်ဦးဖြစ်လျှင် ကြီးကြပ်မှူးသည် နှစ်လလျှင်တစ်ကြိမ်သင်တန်းကိုင်ရန် သူ့အတွက်စီစဉ်သည်။ ဤသို့ပြုခြင်းဖြင့် ကြီးကြပ်မှူးသည် လက်ထောက်အား အကဲခတ်ကြည့်ရှုကာ အကူအညီဖြစ်စေသောအကြံပြုချက်များ ပေးခွင့်ရစေသည်။ သွန်သင်ခြင်းအတတ်ပညာတိုးတက်ဖို့ ညီအစ်ကိုများအားကူညီပေးရန် အလွန်ကောင်းမွန်သောအစီအစဉ်ပါတကား!—တိ. ၁:၉။

^၅ လယ်ကွင်းဓမ္မအမှုတွင်– စာအုပ်ကြီးသင်တန်းကြီးကြပ်မှူး၏ အဓိကတာဝန်တစ်ခုမှာ ဧဝံဂေလိဟောပြောခြင်းတွင် ဦးဆောင်ရန်ဖြစ်သည်။ (တော. ၂၇:၁၆၊ ၁၇) သူသည် အုပ်စုလိုက်သက်သေခံခြင်းအတွက် လက်တွေ့ကျသောအစီအစဉ်များပြုလုပ်ကာ ဓမ္မအမှုတွင် ပျော်ရွှင်မှုရရှိရန် အုပ်စုရှိသူအားလုံးကို ကူညီပေးဖို့ကြိုးစားသည်။ (ဧ. ၄:၁၁၊ ၁၂) သူသည် ယင်းကိုအထမြောက်စေရန် အုပ်စုဝင်တစ်ဦးစီနှင့် အတူအမှုဆောင်ရန် ပန်းတိုင်ထားသည်။ ဓမ္မအမှုကဏ္ဍအချို့တွင် တိုးတက်လိုသူများအတွက် အတွေ့အကြုံပိုရှိသောကြေညာသူတစ်ဦးထံမှ အကူအညီရရှိရန်စီစဉ်ပေးဖို့ လုပ်ငန်းတော်ကြီးကြပ်မှူးနှင့်လည်း အတူလုပ်ဆောင်သည်။

^၆ မေတ္တာပြည့်ဝသော သိုးထိန်းတစ်ဦးအနေနှင့်– စာအုပ်ကြီးသင်တန်းကြီးကြပ်မှူးသည် အခြေအနေကြောင့် ဟောပြောခြင်းလုပ်ငန်းတွင် အနည်းငယ်သာပါဝင်နိုင်သူများကို စိတ်ဝင်စားသည်။ သူသည် အသက်ကြီးလာခြင်း သို့မဟုတ် အိမ်အပြင်မထွက်နိုင်ခြင်းကြောင့် အကန့်အသတ်ရှိသူများနှင့် အသည်းအသန်ဖျားနာခြင်း သို့မဟုတ် ထိခိုက်ဒဏ်ရာရခြင်းကြောင့် ယာယီအကန့်အသတ်ရှိသူများအား တစ်လအတွင်း တစ်နာရီအပြည့်မှတ်တမ်းမသွင်းနိုင်လျှင် လယ်ကွင်းလုပ်ငန်းအချိန် ၁၅ မိနစ်အထိ မှတ်တမ်းသွင်းခွင့်ပြုသည့်အစီအစဉ်ကို သိရှိစေဖို့သေချာစေသည်။ (အသင်းတော်လုပ်ငန်းတော်ကော်မတီသည် ဤအစီအစဉ်အတွက် မည်သူ ဘောင်ဝင်သည်ကို ဆုံးဖြတ်သည်။) သူသည် အုပ်စုတွင်ရှိသည့် မလှုပ်မရှားဖြစ်လာနိုင်သူများကိုလည်း စိတ်ဝင်စားကာ သူတို့အား အသင်းတော်နှင့်အတူ ပြန်လှုပ်ရှားလာရန် ကူညီပေးဖို့ကြိုးစားသည်။—လု. ၁၅:၄-၇။

^၇ စာအုပ်ကြီးသင်တန်းကြီးကြပ်မှူးများပြသသော မေတ္တာပြည့်ဝသည့်စိတ်ဝင်စားမှုအတွက် မည်မျှကျေးဇူးတင်စရာပါတကား! တစ်ဦးချင်းအပေါ် သူတို့၏ဂရုစိုက်မှုသည် “ယုံကြည်ခြင်းသို့ . . . တညီတညွတ်တည်းရောက်၍ ခရစ်တော်၏ ပြည့်စုံခြင်းပမာဏအရပ်တည်းဟူသော ကြီးရင့်သောလူ၏အဖြစ်သို့ရောက်” ရန်ကူညီပေးသည်။—ဧ. ၄:၁၃။