စိတ်ဓာတ်ကျခြင်းနှင့်စပ်လျဉ်း၍ အဘယ်အရာကို ပြုလုပ်ပေးနိုင်သနည်း

စိတ်ဓာတ်ကျခြင်းကို လူတစ်ဦး မည်သို့တိုက်လှန်နိုင်သနည်း။ ဤမေးခွန်းကို ယေဟောဝါသက်သေများ၏အသင်းတော်များထံ မှန်မှန်လည်ပတ်ကြသော နယ်လှည့်ကြီးကြပ်မှူးများစွာအား မေးခဲ့၏။ သူတို့၏အဖြေများက မည်သည့်ခရစ်ယာန်မဆို ခံစားရနိုင်သည့် စိတ်ဓာတ်ကျခြင်း၏အကြောင်းရင်းများနှင့် ယင်းကိုပြုပြင်ပေးနိုင်သည့်နည်းများကို အသေးစိတ်သုံးသပ်ရန် အထောက်အကူပြုနိုင်သည်။

စိတ်ဓာတ်ကျခြင်းကို အသေးစိတ်သုံးသပ်ခြင်းထက်မက လိုအပ်သော်လည်း စိတ်ဓာတ်ကျရသောအကြောင်းများတွင် ဆုတောင်းခြင်း သို့မဟုတ် ကိုယ်ပိုင်လေ့လာမှုကို စိတ်ဝင်စားမှုမရှိခြင်း၊ အစည်းအဝေးပျက်ကွက်လာခြင်း၊ စိတ်အားထက်သန်မှုမရှိခြင်းအပြင် ခရစ်ယာန်အပေါင်းအသင်းများအပေါ် စိမ်းကားသည့်သဘောရှိခြင်းပါဝင်ပေမည်။ အသိသာဆုံးလက္ခဏာတစ်ခုမှာ ဧဝံဂေလိဟောပြောခြင်းတွင် ဇွဲလျော့နည်းသွားခြင်းဖြစ်သည်။ ထိုလက္ခဏာများကို ဆန်းစစ်ကာ ပြုပြင်ပေးနိုင်သောနည်းအချို့ကို သုံးသပ်ကြည့်ကြစို့လေ။

ကျွန်ုပ်တို့၏ဧဝံဂေလိလုပ်ငန်းတွင် စိတ်ဓာတ်ကျခြင်း

ယေရှုခရစ်သည် တပည့်ဖြစ်စေခြင်းလုပ်ငန်း၏အခက်အခဲများကိုသိရှိခဲ့သည်။ (မဿဲ ၂၈:၁၉၊ ၂၀) ဟောပြောခြင်းလုပ်ငန်းကြောင့် နှိပ်စက်ညှဉ်းပန်းခြင်းခံရမည်ကိုသိရှိလျက် ကိုယ်တော်သည် “တောခွေးစုထဲသို့ သိုးတို့ကိုစေလွှတ်သကဲ့သို့” မိမိ၏နောက်တော်လိုက်များကိုစေလွှတ်ခဲ့သည်။ (မဿဲ ၁၀:၁၆-၂၃) သို့တိုင် ၎င်းသည် စိတ်ဓာတ်ကျစရာအကြောင်းမဟုတ်ပါ။ အမှန်မှာ ယေဟောဝါအား ဆုတောင်းလျက် အားကိုးခဲ့ကြသော ဘုရားသခင်၏ကျေးကျွန်များသည် နှိပ်စက်ညှဉ်းပန်းမှုအားဖြင့် ခွန်အားရလေ့ရှိခဲ့ကြသည်။—တမန်တော် ၄:၂၉-၃၁; ၅:၄၁၊ ၄၂။

ခရစ်တော်၏တပည့်များသည် ပြင်းထန်သောနှိပ်စက်ညှဉ်းပန်းခြင်းမခံရသည့်ချိန်၌ပင် သူတို့အား တလိုတလားလက်ခံခြင်းအမြဲမရှိခဲ့ကြချေ။ (မဿဲ ၁၀:၁၁-၁၅) ထိုနည်းတူ ယနေ့ ယေဟောဝါသက်သေများ၏ဟောပြောခြင်းလုပ်ငန်းသည် အစဉ်မလွယ်ကူလှပါ။a လူအများအတွက် ဘုရားသခင်အားယုံကြည်ခြင်းကိစ္စသည် ကိုယ်ရေးကိုယ်တာကိစ္စဖြစ်ပြီး ယင်းကို သူတို့မဆွေးနွေးလိုကြချေ။ အခြားသူများမှာမူ သူတို့စိတ်စွန်းကွက်မှုရှိခဲ့သော ဘာသာရေးအဖွဲ့အစည်းနှင့် လုံးဝမပတ်သက်လိုကြချေ။ ဂရုစိုက်မခံရခြင်း၊ အကျိုးမဖြစ်ထွန်းခြင်း သို့မဟုတ် အခြားပြဿနာအမျိုးမျိုးသည် စိတ်ဓာတ်ကျစရာအကြောင်းရင်းများဖြစ်သည်မှာ ယုံမှားဖွယ်မရှိချေ။ အဆိုပါအခက်အခဲများကို မည်သို့အောင်မြင်နိုင်သနည်း။

အကျိုးရလဒ်များပိုမိုရရှိခြင်း

ကျွန်ုပ်တို့၏ခရစ်ယာန်ဓမ္မအမှုမှ ရရှိသောပျော်ရွှင်မှုသည် ရရှိသောအကျိုးရလဒ်များနှင့် တစ်စိတ်တစ်ပိုင်းဆက်နွှယ်လျက်ရှိ၏။ ထို့ကြောင့် ပိုမိုအကျိုးဖြစ်ထွန်းသောခရစ်ယာန်ဓမ္မအမှု မည်သို့ဖြစ်နိုင်မည်နည်း။ ကျွန်ုပ်တို့သည် “လူကိုမျှားသောတံငါ” သည်များဖြစ်ကြသည်။ (မာကု ၁:၁၆-၁၈) ရှေးဣသရေလတံငါသည်များသည် ငါးအများဆုံးဖမ်းနိုင်သောညအချိန်တွင် ငါးဖမ်းထွက်ခဲ့ကြသည်။ ကျွန်ုပ်တို့သည်လည်း လူအများ အိမ်၌ရှိကြမည့်အချိန်နှင့် သတင်းတရားကို ပို၍လက်ခံနိုင်ချိန်တွင် “မျှား” ရန်ရပ်ကွက်ကိုအသေးစိတ်သုံးသပ်ဖို့လိုသည်။ ၎င်းသည် ညနေပိုင်း၊ သီတင်းပတ်အကုန်ပိုင်း သို့မဟုတ် အခြားအချိန်တို့တွင်ဖြစ်ပေမည်။ နယ်လှည့်ကြီးကြပ်မှူးတစ်ဦးအရ တစ်နေကုန်အလုပ်ဆင်းကြသည့် ဒေသများတွင် ၎င်းသည်လက်တွေ့ကျ၏။ ညနေပိုင်းသက်သေခံခြင်းသည် အကျိုးများစွာရှိကြောင်း သူကဆိုသည်။ တယ်လီဖုန်း သို့မဟုတ် အလွတ်သဘောသက်သေခံခြင်းဖြင့်လည်း လူများစွာထံရောက်ရှိစေ၏။

ခရစ်ယာန်ဓမ္မအမှုတွင် ဇွဲရှိခြင်းက ရလဒ်မွန်များဖြစ်ထွန်းစေ၏။ အရှေ့ဥရောပနှင့် အာဖရိကနိုင်ငံအချို့တွင် ဘုရားသခင့်နိုင်ငံတော်ဟောပြောခြင်းလုပ်ငန်းသည် တိုးတက်လျက်ရှိရာ တိုးတက်မှုကောင်းများဖြစ်ပေါ်နေသည်။ ထို့အတူ တိုးတက်မှုမရှိဟု ကြာမြင့်စွာယူမှတ်ခဲ့သည့်ဒေသများနှင့် ထပ်တလဲလဲအမှုဆောင်ခဲ့သောရပ်ကွက်၌ပင် အသင်းတော်များစွာကို တည်ထောင်ခဲ့ပြီ။ သို့သော် သင့်ရပ်ကွက်သည် ဤသို့သောအကျိုးမဖြစ်ထွန်းသောနေရာမျိုး ဖြစ်နေလျှင်ကော။

စိတ်သဘောမှန်ကို ထိန်းထားခြင်း

ယေရှုချမှတ်ခဲ့သောပန်းတိုင်များကို ရှင်းလင်းစွာစိတ်စွဲမှတ်ထားခြင်းသည် ခရစ်ယာန်ဓမ္မအမှုတွင် ဥပေက္ခာပြုခံရသည့်အတွက် စိတ်ဓာတ်မကျရန် ထောက်ကူပေးပါလိမ့်မည်။ ခရစ်တော်သည် မိမိ၏တပည့်များအား လူအစုအပြုံလိုက် ဘာသာပြောင်းစေလိုခဲ့သည်မဟုတ်ဘဲ ထိုက်တန်သူများကိုရှာဖွေစေလို၏။ ဣသရေလအများစုသည် ရှေးပရောဖက်များ၏စကားကို နားမထောင်သကဲ့သို့ လူအများသည် သတင်းကောင်းကို လက်ခံမည်မဟုတ်ကြောင်း ကိုယ်တော်က အကြိမ်ကြိမ်ထောက်ပြခဲ့သည်။—ယေဇကျေလ ၉:၄; မဿဲ ၁၀:၁၁-၁၅; မာကု ၄:၁၄-၂၀။

“ဝိညာဉ်ရေးတွင် မိမိတို့လိုလျက်နေကြောင်း သတိပြုသူများသည်” ‘ဘုရားသခင့်နိုင်ငံတော်သတင်းကောင်း’ ကိုကျေးဇူးတင်စိတ်ဖြင့် လက်ခံကြ၏။ (မဿဲ ၅:၃၊ ကဘ; ၂၄:၁၄) သူတို့သည် ဘုရားသခင်ညွှန်ပြထားသောနည်းအတိုင်း အမှုတော်ထမ်းလိုကြသည်။ ထို့ကြောင့် ကျွန်ုပ်တို့၏ဆောင်ရွက်မှုမှ အကျိုးရလဒ်များသည် သတင်းတရားကို ဟောပြောနိုင်စွမ်းထက် လူတို့၏စိတ်နှလုံးသဘောထားနှင့်ပိုမိုပတ်သက်သည်။ သို့သော် သတင်းကောင်းကိုလူတို့လက်ခံနိုင်ကြဖို့ ကျွန်ုပ်တို့အတတ်နိုင်ဆုံးကြိုးစားရမည်ဖြစ်သည်။ သို့ရာတွင် အကျိုးရလဒ်များသည် ဘုရားသခင်အပေါ်မူတည်ကြောင်းကို ယေရှုက ဤသို့တင်ပြခဲ့၏– “ငါ့ကိုစေလွှတ်တော်မူသော ခမည်းတော်သည် သွေးဆောင်တော်မမူလျှင်၊ အဘယ်သူမျှ ငါ့ထံသို့မလာနိုင်။”—ယောဟန် ၆:၄၄။

ကျွန်ုပ်တို့၏ဧဝံဂေလိလုပ်ငန်းသည် ယေဟောဝါ၏နာမတော်ကို ထင်ရှားစေ၏။ လူတို့နားထောင်သည်ဖြစ်စေ၊ နားမထောင်သည်ဖြစ်စေ ကျွန်ုပ်တို့၏ဟောပြောခြင်းလုပ်ငန်းသည် ယေဟောဝါ၏သန့်ရှင်းသောနာမတော်ကို အထွတ်အမြတ်ဖြစ်စေသည်။ ထို့ပြင် ဧဝံဂေလိလုပ်ငန်းအားဖြင့် ကျွန်ုပ်တို့သည် ခရစ်တော်၏တပည့်များဖြစ်ကြောင်း ပြသရာရောက်သည့်အပြင် ကျွန်ုပ်တို့ခေတ်တွင် ဆောင်ရွက်နေသည့် အရေးအကြီးဆုံးလုပ်ငန်း၌ ပါဝင်ခွင့်ရရှိခဲ့ကြသည်။—မဿဲ ၆:၉; ယောဟန် ၁၅:၈။

စိတ်ဓာတ်ကျခြင်းနှင့် ပေါင်းသင်းဆက်ဆံရေးများ

မိသားစုတွင်ဖြစ်စေ၊ အသင်းတော်တွင်ဖြစ်စေ အချို့သောလူမှုဆက်ဆံရေးသည် စိတ်ဓာတ်ကျစေနိုင်သည်။ ဥပမာ၊ မိမိအားနားမလည်ကြဟု ခံစားမိမည်။ ယုံကြည်သူချင်းများ၏ မစုံလင်မှုတို့သည်လည်း ကျွန်ုပ်တို့ကိုစိတ်ဓာတ်ကျစေနိုင်သည်။ ကျမ်းစာသည် ကျွန်ုပ်တို့ကို များစွာကူညီပေးနိုင်၏။

ကမ္ဘာချီ “ညီအစ်ကိုများအသင်းအပင်းတစ်ခုလုံး” သည်ဝိညာဉ်ရေးမိသားစုကြီးဖြစ်သည်။ (၁ ပေတရု ၂:၁၇၊ ကဘ) သို့ရာတွင် ပုဂ္ဂိုလ်ရေးပဋိပက္ခများကြောင့် အခက်အခဲများဖြစ်ပေါ်လာသောအခါ စည်းလုံးသောလူစုတွင်ပါဝင်ရသည့်ခံစားချက် ပျောက်ကွယ်သွားနိုင်၏။ တမန်တော်ပေါလုသည် ပထမရာစုခရစ်ယာန်များကို စည်းလုံးစွာနေထိုင်ကြဖို့ ထပ်ခါတလဲသတိပေးခဲ့ရခြင်းက သူတို့တွင်လည်း ထိုသို့သောပြဿနာများရှိခဲ့ကြောင်း ထင်ရှားပါသည်။ ဥပမာ၊ သူသည် ခရစ်ယာန်အမျိုးသမီးနှစ်ဦးဖြစ်သည့် ဧဝေါဒိနှင့် သုန္တုတ်တို့၏ သဘောထားကွဲလွဲမှုများကို ဖြေရှင်းရန် တိုက်တွန်းခဲ့ရသည်။—၁ ကောရိန္သု ၁:၁၀; ဧဖက် ၄:၁-၃; ဖိလိပ္ပိ ၄:၂၊ ၃။

ဤပြဿနာရှိနေလျှင် ကျွန်ုပ်တို့၏ညီအစ်ကို၊ ညီအစ်မများအပေါ် စိတ်ရင်းမှန်ဖြင့်ချစ်ခြင်းကို မည်သို့ပြန်ပေါ်လာစေနိုင်သနည်း။ ခရစ်တော်သည် သူတို့အတွက် အသေခံခဲ့ကြောင်းနှင့် ကျွန်ုပ်တို့ကဲ့သို့ သူတို့သည် ကိုယ်တော်၏ရွေးနုတ်ဖိုးပူဇော်သကာကို ယုံကြည်ခြင်းတင်ပြခဲ့ကြောင်း မိမိကိုယ်ကိုသတိပေးခြင်းအားဖြင့်ဖြစ်သည်။ ကျွန်ုပ်တို့၏ညီအစ်ကိုများစွာသည် ကျွန်ုပ်တို့အတွက် အသက်စွန့်ခြင်းဖြင့် ယေရှုခရစ်အားတုပရန် အသင့်ရှိကြသည်ကိုလည်း သတိရနိုင်၏။

လွန်ခဲ့သောနှစ်အနည်းငယ်က ပြင်သစ်နိုင်ငံ၊ ပါရီမြို့ရှိ သက်သေခံလူငယ်တစ်ဦးသည် ဘုရားသခင့်နိုင်ငံတော်ခန်းမအပြင်ဘက်တွင်တွေ့ခဲ့သည့် ဗုံးတစ်လုံးပါသောအိတ်ကို လှမ်းယူရန်ချီတုံချတုံမဖြစ်ခဲ့ချေ။ ထိုဗုံးကိုဖောက်ခွဲဖို့ ရေပန်းထဲသို့ ၎င်းအိတ်ကိုမလွှတ်ပစ်မီ သူသည် လှေကားကိုအဆင့်ဆင့်ပြေးဆင်းခဲ့ရသည်။ သူ၏အသက်ကိုစွန့်၍ ဤသို့ပြုရန် မည်သည့်အရာကလှုံ့ဆော်ပေးသည်ကို မေးမြန်းခံရသောအခါ သူက “ကျွန်တော်တို့အားလုံး အသက်အန္တရာယ်ရှိတယ်ဆိုတာ ကျွန်တော်သဘောပေါက်တယ်။ ဒါကြောင့် အားလုံးသေတာထက် ကျွန်တော်တစ်ယောက်တည်းသေတာက ပိုကောင်းတယ်လို့ တွေးမိခဲ့တယ်” ဟုဖြေခဲ့သည်။b ယေရှု၏ပုံသက်သေကို ဤမျှအနီးကပ်လိုက်လျှောက်ရန် အသင့်ရှိကြသော အပေါင်းအဖော်များရရှိထားခြင်းသည် ကောင်းချီးပါတကား!

ထို့ပြင် ဒုတိယကမ္ဘာစစ်အတွင်း ချွေးတပ်စခန်းများမှ ယေဟောဝါသက်သေများစပ်ကြားရှိခဲ့သော ပူးပေါင်းဆောင်ရွက်စိတ်ကို ဆင်ခြင်သုံးသပ်နိုင်သည်။c မကြာသေးမီက မာလာဝီမှ ကျွန်ုပ်တို့၏ညီအစ်ကို၊ ညီအစ်မများသည် ခရစ်ယာန်စစ်များအဖြစ် ထိုအတိုင်းပင် သမာဓိစောင့်သိတည်ကြည်ခဲ့ကြ၏။ ဒေသခံအသင်းတော်ရှိ ညီအစ်ကိုများသည် ဆိုးဝါးသောအခြေအနေများအောက်တွင် အလားတူလုပ်ဆောင်လိမ့်မည်ဟူသောအသိစိတ်က နေ့စဉ်ကြုံတွေ့ရသော တင်းမာမှုများနှင့် အခက်အခဲများကို ဥပေက္ခာပြုရန် သို့မဟုတ် အနည်းဆုံးတော့လျော့နည်းစေရန် လှုံ့ဆော်ပေးမည်မဟုတ်လော။ ခရစ်တော်၏စိတ်ထားကို ကျွန်ုပ်တို့မွေးမြူမည်ဆိုပါက ဝတ်ပြုသူချင်းများနှင့် ကျွန်ုပ်တို့နေ့စဉ်ပေါင်းသင်းမှုသည် စိတ်ဓာတ်ကျစရာမဟုတ်ဘဲ လန်းဆန်းမှုပေးပါလိမ့်မည်။

စိတ်ဓာတ်ကျစေသောပုဂ္ဂိုလ်ရေးခံစားချက်များ

“မျှော်လင့်သောအရာသည် ဖင့်နွှဲလျှင်၊ စိတ်နှလုံးကိုပူပန်စေတတ်၏။ အလိုပြည့်စုံသောအခါမူကား အသက်ပင်ဖြစ်၏။” (သု. ၁၃:၁၂) ယေဟောဝါကျေးကျွန်အချို့၏အမြင်တွင် ဤအစီအစဉ်စနစ်၏ဆုံးခန်းသည် နှောင့်နှေးနေသည်။ မယုံကြည်သူများစွာကဲ့သို့ပင် ကျွန်ုပ်တို့အသက်ရှင်နေရသောအချိန်သည် “ခဲယဉ်းသောကာလ” ဖြစ်သည်ဟု ခရစ်ယာန်များတွေ့မြင်နေကြရသည်။—၂ တိမောသေ ၃:၁-၅။

သို့သော် မယုံကြည်သူများနှင့်ခြားနားစွာ ခရစ်ယာန်များသည် ဤခဲယဉ်းသောကာလတွင် ဘုရားသခင့်နိုင်ငံတော်က မကြာမီ ဤစနစ်ဆိုးကိုအဆုံးတိုင်စေတော့မည်ဖြစ်ကြောင်းထင်ရှားသည့် ယေရှုရောက်ရှိခြင်း၏ “နိမိတ်” ကိုမြင်တွေ့ရ၍ ဝမ်းမြောက်သင့်သည်။ (မဿဲ ၂၄:၃-၁၄) “ကြီးစွာသောဒုက္ခ” အတွင်း အမှန်ပင် အခြေအနေ ပိုဆိုးရွားလာသည့်တိုင်—ထိုအဖြစ်အပျက်များသည် ဘုရားသခင့်ကမ္ဘာသစ် ရောက်လုနီးကြောင်း ကြေညာသောကြောင့်ဝမ်းမြောက်စရာဖြစ်၏။—မဿဲ ၂၄:၂၁; ၂ ပေတရု ၃:၁၃။

မျက်မှောက်ခေတ်အရေးကိစ္စများတွင် ဘုရားသခင့်နိုင်ငံတော်၏ ဝင်စွက်မှုကို စိတ်ထဲရွှေ့ဆိုင်းခြင်းက ခရစ်ယာန်တစ်ဦးအား စည်းစိမ်ဥစ္စာရှာဖို့ ပို၍အချိန်ပေးစေနိုင်သည်။ သူ၏အချိန်နှင့်ခွန်အားရှိသမျှကို လောကအလုပ်နှင့်ဖြေဖျော်မှုအစရှိသည့်အရာတို့တွင် မြှုပ်နှံခဲ့မည်ဆိုလျှင် သူ၏ကျမ်းပေးတာဝန်များကို ကျေပွန်ရန် ခက်ခဲပါလိမ့်မည်။ (မဿဲ ၆:၂၄၊ ၃၃၊ ၃၄) ဤသို့သောစိတ်ထားသည် ပျော်ရွှင်မှုကိုပျောက်စေနိုင်ပြီး စိတ်ဓာတ်ကျစေ၏။ နယ်လှည့်ကြီးကြပ်မှူးတစ်ဦးက ဤသို့ပြောခဲ့သည်– “ဒီအစီအစဉ်စနစ်မှာ စနစ်သစ်ပုံစံကို ကြိုးစားဖော်တာက သဘာဝမကျပါဘူး။”

အကောင်းဆုံးပြုပြင်မှုများထဲမှနှစ်ခု

ရောဂါစစ်တမ်းထုတ်ပြီးနောက်တွင် ထိရောက်သောကုစားနည်းကို မည်သို့တွေ့ရှိနိုင်မည်နည်း။ ရှိရှိသမျှတို့တွင် ကိုယ်ပိုင်လေ့လာမှုသည် အကောင်းဆုံးနည်းတစ်ခုဖြစ်သည်။ အဘယ်ကြောင့်နည်း။ “ကျွန်တော်တို့လုပ်ကိုင်နေတဲ့အလုပ်ကို ဘာကြောင့်လုပ်ရတယ်ဆိုတာကို ကိုယ်ပိုင်လေ့လာမှုက သတိပေးတယ်” ဟုနယ်လှည့်ကြီးကြပ်မှူးတစ်ဦးကပြောခဲ့သည်။ နောက်ထပ်တစ်ဦးကလည်း ဤသို့ရှင်းပြခဲ့သည်– “တာဝန်အရသာ ဟောပြောတာဟာ ကြာလာရင် ဝန်လေးလာတယ်။” သို့သော် ကိုယ်ပိုင်လေ့လာမှုကောင်းကောင်းပြုလုပ်ခြင်းသည် အဆုံးသို့နီးကပ်လာစဉ် ကျွန်ုပ်တို့၏ကဏ္ဍကို ကွင်းကွင်းကွက်ကွက်ပြန်မြင်စေရန် အထောက်အကူပြုသည်။ ဘုရားသခင်၏အလိုတော်ဆောင်ရွက်ရာတွင် စစ်မှန်သောပျော်ရွှင်မှုရှိရန် ဝိညာဉ်ရေးအရကောင်းစွာစားသုံးဖို့လိုကြောင်းကို ကျမ်းစာက ထပ်တူသဘောမျိုးဖြင့်ထပ်ခါတလဲသတိပေး၏။—ဆာလံ ၁:၁-၃; ၁၉:၇-၁၀; ၁၁၉:၁၊ ၂။

အကြီးအကဲများသည် အခြားသူများထံ သိုးထိန်းလည်ပတ်ကာ အားပေးခြင်းဖြင့် စိတ်ဓာတ်ကျခြင်းကိုအောင်မြင်စေရန် ကူညီပေးနိုင်သည်။ ဤလည်ပတ်မှုများပြုချိန်တွင် အကြီးအကဲများက ကျွန်ုပ်တို့တစ်ဦးစီသည် အလွန်တန်ဖိုးရှိကြောင်းနှင့် ယေဟောဝါ၏လူမျိုးအလယ်တွင် အရေးပါသောနေရာတစ်နေရာကိုယူထားကြောင်းကို ဖော်ပြနိုင်သည်။ (၁ ကောရိန္သု ၁၂:၂၀-၂၆) အကြီးအကဲတစ်ဦးသည် ခရစ်ယာန်ချင်းများကိုရည်ညွှန်းကာ ဤသို့ပြောခဲ့သည်– “သူတို့၏တန်ဖိုးကိုဖော်ပြဖို့ အရင်က သူတို့ပြီးမြောက်ခဲ့တာတွေကို ကျွန်တော်ပြန်သတိပေးတယ်။ ယေဟောဝါရှေ့မှာ သူတို့ဟာ တန်ဖိုးရှိပြီး သူတို့အတွက် သားတော်က အသွေးသွန်းခဲ့တယ်ဆိုတာကို ကျွန်တော်ထောက်ပြတယ်။ အဲဒီလိုပြောတာကို အမြဲပဲကောင်းစွာလက်ခံခဲ့ကြတယ်။ အဲဒီနောက် ကျမ်းစာကိုးကားချက်တွေနဲ့ ထောက်ပြပြီးတဲ့အခါ စိတ်ဓာတ်ကျသူတွေက ပန်းတိုင်အသစ်တွေဖြစ်တဲ့ မိသားစုလိုက်ဆုတောင်းတာ၊ လေ့လာမှုပြုလုပ်တာ၊ ကျမ်းစာဖတ်တာတွေကို ချမှတ်ဖို့အနေအထားမှာရှိလာကြတယ်။”—ဟေဗြဲ ၆:၁၀။

အကြီးအကဲများသည် သိုးထိန်းလည်ပတ်နေစဉ် ဘုရားသခင့်စိတ်တော်နှင့်တွေ့ရန် ခဲယဉ်းသည်ဟု သဘောမပေါက်မိစေဖို့ သတိပြုရမည်။ ယင်းအစား၊ ယေရှုနောက်လိုက်များ၏ဝန်သည် ပေါ့ပါးကြောင်းကို စိတ်ဓာတ်ကျနေသောဝတ်ပြုသူချင်းများ သိမြင်စေရန် အကြီးအကဲများက ကူညီပေးနိုင်သည်။ ထို့ကြောင့် ကျွန်ုပ်တို့၏ခရစ်ယာန်လုပ်ငန်းတော်သည် ရွှင်လန်းမှု၏ရင်းမြစ်တစ်ခုဖြစ်သည်။—မဿဲ ၁၁:၂၈-၃၀။

စိတ်ဓာတ်ကျခြင်းကိုနိုင်နင်းခြင်း

မည်သည့်အကြောင်းကြောင့်ပင်ဖြစ်ပါစေ၊ စိတ်ဓာတ်ကျခြင်းသည် တိုက်လှန်ရမည့်ကပ်ဘေးတစ်ခုဖြစ်သည်။ သို့သော် ဤတိုက်ပွဲတွင် ကျွန်ုပ်တို့တစ်ဦးတည်းသာပါဝင်နေသည်မဟုတ်ကြောင်း သတိရပါ။ ကျွန်ုပ်တို့စိတ်ဓာတ်ကျနေလျှင် ခရစ်ယာန်အပေါင်းအဖော်များ၊ အထူးသဖြင့် အကြီးအကဲများ၏အကူအညီကို လက်ခံကြစို့လေ။ သို့ပြုခြင်းဖြင့် စိတ်ဓာတ်ကျခြင်းလျော့နည်းသွားပေမည်။

ထို့ထက်ကား စိတ်ဓာတ်ကျခြင်းကိုအောင်မြင်ရန် ဘုရားသခင့်အကူအညီကိုတောင်းဖို့လို၏။ ယေဟောဝါအား မှီခိုအားထားကာဆုတောင်းလျှင် စိတ်ဓာတ်ကျခြင်းကို လုံးလုံးလျားလျားနိုင်နင်းရန် ကိုယ်တော်ကူညီပေးပေမည်။ (ဆာလံ ၅၅:၂၂; ဖိလိပ္ပိ ၄:၆၊ ၇) မည်သို့ပင်ဖြစ်ပါစေ၊ ကိုယ်တော်၏လူမျိုးတော်အနေဖြင့် ကျွန်ုပ်တို့သည် “အိုထာဝရဘုရား၊ နှိုးဆော်တော်မူခြင်းအသံကိုနားလည်သောလူမျိုးသည် မင်္ဂလာရှိပါ၏။ သူတို့သည် မျက်နှာတော်အလင်း၌ သွားလာရကြပါ၏။ နာမတော်၌ အစဉ်ဝမ်းမြောက်၍ ဖြောင့်မတ်တော်မူခြင်းတရားအားဖြင့် ချီးမြှောက်ခြင်းသို့ရောက်ရကြပါ၏။ ကိုယ်တော်သည် သူတို့အစွမ်းသတ္တိ၏ဘုန်းဖြစ်တော်မူ၏။ ကျေးဇူးတော်အားဖြင့်လည်း အကျွန်ုပ်တို့၏ဦးချိုသည် ချီးမြှောက်လျက်ရှိပါ၏” ဟုသီဆိုခဲ့သော ဆာလံဆရာ၏သဘောထား ရှိနိုင်ကြမည်။—ဆာလံ ၈၉:၁၅-၁၇။

[အောက်ခြေမှတ်ချက်များ]

[စာမျက်နှာ ၃၁ ပါ ရုပ်ပုံ]

မေတ္တာရှိအကြီးအကဲများ၏တည်ဆောက်မှုဖြစ်စေသော သိုးထိန်းလည်ပတ်မှုများသည် ခရစ်ယာန်များ၏ စိတ်ဓာတ်ကျခြင်းကိုအောင်မြင်စေရန် ထောက်ကူပေးနိုင်