ရွေးနုတ်ဖိုးမှ အကျိုးကျေးဇူးရရှိရန် အခြားသူများကိုကူညီပါ

ဧပြီ ၁၂ ရက်တွင် ခရစ်တော်၏သေခြင်း အောက်မေ့ရာပွဲ ကျင်းပမည်

၁။ ရွေးနုတ်ဖိုးအတွက် ကျေးဇူးတော်ချီးမွမ်းမှုကို ဘုရားသခင့်လူမျိုးပြသသော နည်းတစ်နည်းကား အဘယ်နည်း။

^၁ “ပြော၍မကုန်နိုင်သော ဘုရားသခင်၏ ဆုကျေးဇူးတော်ကို အောက်မေ့၍ ချီးမွမ်းခြင်းရှိစေသတည်း။” (၂ ကော. ၉:၁၅) သားတော်ယေရှုခရစ်အားဖြင့် မိမိ၏လူမျိုးအား ဘုရားသခင်ပြသတော်မူသည့် ကောင်းမြတ်မှုနှင့် ချစ်ခင်ကြင်နာမှုကို ကျွန်ုပ်တို့ မည်သို့ယူမှတ်ကြောင်း အဆိုပါစကားများက သင့်လျော်စွာဖော်ပြ၏။ ထိုသို့သောကျေးဇူးတော်ချီးမွမ်းမှုသည် အထူးသဖြင့် ခရစ်တော်၏သေခြင်း အောက်မေ့ရာပွဲကျင်းပရန် ဧပြီ ၁၂ ရက်တွင် ကျွန်ုပ်တို့ အတူတကွစုဝေးကြစဉ် သိသာထင်ရှားမည်။

၂။ မည်သူတို့သည် ယေဟောဝါ၏ကျေးကျွန်များနှင့်အတူ အောက်မေ့ရာပွဲကို တက်ရောက်ကြသနည်း၊ သူတို့သည် ရွေးနုတ်ဖိုးမှ အကျိုးကျေးဇူးရရှိရန် အဘယ်အရာကို လုပ်ဆောင်ဖို့လိုသနည်း။

^၂ ယေဟောဝါ၏ကျေးကျွန်များနှင့်အတူ ဆယ်သန်းခန့်ရှိသော အခြားသူတို့သည် အောက်မေ့ရာပွဲကို နှစ်စဉ်တက်ရောက်ကြသည်။ ထိုသို့ပြုခြင်းဖြင့် သူတို့သည် ခရစ်တော်၏ပူဇော်သကာအတွက် ကျေးဇူးတင်မှုကို အတိုင်းအတာတစ်ခုအထိ ပြသကြသည်။ သို့သော် သူတို့သည် ရွေးနုတ်ဖိုးမှ အကျိုးကျေးဇူးရရှိရန် ယင်းကို ယုံကြည်ကြောင်းတင်ပြဖို့လိုသည်။ (ယော. ၃:၁၆၊ ၃၆) ထိုသို့သောယုံကြည်ခြင်းရှိရန် သူတို့ကို ကျွန်ုပ်တို့ မည်သို့ကူညီနိုင်သနည်း။ ဤအောက်မေ့ရာပွဲတော်ရာသီအတွင်း ကိုယ်ပိုင်ကျမ်းစာလေ့လာမှုပြုကြရန်နှင့် ပတ်စဉ် အသင်းတော်အစည်းအဝေးများတက်ရောက်ကြရန် သူတို့ကို အားပေးနိုင်သည်။ အောက်ပါအကြံပြုချက်များကို သုံးသပ်ပါ။

၃။ အောက်မေ့ရာပွဲသို့ ကျွန်ုပ်တို့ဖိတ်ခေါ်သူများနှင့် ကျမ်းစာသင်အံမှု မည်သို့စနိုင်သနည်း။

^၃ ကျမ်းစာသင်အံမှုများ– သင်သည် စိတ်ဝင်စားသူများအား အောက်မေ့ရာပွဲသို့ ဖိတ်ခေါ်သည့်အခါ သမ္မာကျမ်းစာသွန်သင်ရာ စာအုပ်အသုံးပြု၍ သူတို့နှင့် ကျမ်းစာသင်အံမှုစရန် ကြိုးစားပါ။ စာမျက်နှာ ၂၀၆-၈ ကိုဖွင့်ပြီး “သခင့်ညစာစားပွဲ—ဘုရားသခင်အား ဂုဏ်တင်သည့်ပွဲတော်” ဟူသောအကြောင်းအရာကို သုံးသပ်ခြင်းဖြင့် ထိုသူအား အောက်မေ့ရာပွဲအကြောင်းရှင်းပြရန် ကမ်းလှမ်းပါ။ သင်သည် အိမ်တံခါးဝ ကျမ်းစာသင်အံမှုတစ်ခုအနေဖြင့် လည်ပတ်မှုတစ်ကြိမ်နှစ်ကြိမ်တွင် ထိုအကြောင်းအရာကို သုံးသပ်နိုင်ပေမည်။ ထိုအကြောင်းအရာပြီးသွားသည့်အခါ ထိုသူသည် “ရွေးနုတ်ဖိုး—ဘုရားသခင်ထံမှ အကြီးမြတ်ဆုံးဆုကျေးဇူး” ဟူသော အခန်း ၅ ကိုဆွေးနွေးလိုပေမည်။ ပုံမှန်ကျမ်းစာသင်အံမှုတစ်ခုဖြစ်လာသည်နှင့် စာအုပ်၏အစပိုင်း အခန်းလေးခန်းသို့ ပြန်သွားကာ သုံးသပ်လိုပေမည်။

၄။ ဤအောက်မေ့ရာပွဲတော်ရာသီအတွင်း မည်သူတို့နှင့် ကျွန်ုပ်တို့ ကျမ်းစာသင်အံမှုစနိုင်သနည်း။

^၄ အထက်ပါချဉ်းကပ်နည်းကို အသုံးပြု၍ မည်သူတို့နှင့် ကျွန်ုပ်တို့ ကျမ်းစာသင်အံမှု စနိုင်သနည်း။ သင်၏အလုပ်ဖော်၊ ကျောင်းနေဖက် သို့မဟုတ် အိမ်နီးချင်းများမှ တချို့သူတို့သည် ထိုသို့သောဆွေးနွေးမှုများပြုရန် သဘောတူပေမည်။ ညီအစ်ကိုများသည် အသင်းတော်ရှိ ညီအစ်မများ၏ မယုံကြည်သူခင်ပွန်းများထံ ချဉ်းကပ်နိုင်ပေမည်။ သင်၏ သက်သေခံမဟုတ်သောဆွေမျိုးများကိုလည်း သင်အံမှုကမ်းလှမ်းရန် လျစ်လျူမရှုပါနှင့်။ ထို့ပြင် ကျွန်ုပ်တို့သည် တစ်ချိန်က အသင်းတော်နှင့် တက်တက်ကြွကြွပေါင်းသင်းခဲ့သူများကို အောက်မေ့ရာပွဲသို့ ဖိတ်ခေါ်ရန် အထူးကြိုးစားလိုပေမည်။ (လု. ၁၅:၃-၇) ရွေးနုတ်ဖိုးမှ အကျိုးကျေးဇူးရရှိရန် ထိုသို့သောသူအားလုံးကို ကြိုးစားကူညီပေးကြစို့။

၅။ ပတ်စဉ် အသင်းတော်အစည်းအဝေးများတက်ရောက်ရန် ကျမ်းစာသင်သားများနှင့် အခြားစိတ်ဝင်စားသူများအား ကျွန်ုပ်တို့ မည်သို့အားပေးနိုင်သနည်း။

^၅ အသင်းတော်အစည်းအဝေးများ– ကျမ်းစာသင်အံမှုများနှင့် အခြားစိတ်ဝင်စားသူများစွာအတွက် အောက်မေ့ရာပွဲသည် ပထမဆုံးတက်ရောက်သောအစည်းအဝေးဖြစ်ပေမည်။ သို့သော် အသင်းတော်၏ အခြားသောအစည်းအဝေးများကို တက်ရောက်၍ အကျိုးကျေးဇူးရယူကြရန် သူတို့ကို မည်သို့အားပေးနိုင်သနည်း။ ဧပြီ ၂၀၀၅ ကျွန်ုပ်တို့၏နိုင်ငံတော်ဓမ္မအမှု၊ စာမျက်နှာ ၆ တွင် ဤသို့အကြံပြုထားသည်– “နောက်အပတ် လူထုဟောပြောချက်ခေါင်းစဉ်ကို ပြောပြပါ။ ကင်းမျှော်စင် သင်တန်းနှင့် အသင်းတော်စာအုပ်ကြီးသင်တန်းတွင် သုံးသပ်မည့်အကြောင်းအရာကို သူတို့အား ပြောပြပါ။ သီအိုကရက်တစ်ဓမ္မအမှုကျောင်းနှင့် လုပ်ငန်းတော်စည်းဝေးအကြောင်းကို ပြောပြပါ။ ကျောင်းတွင် သင် တာဝန်တစ်ခုရသည့်အခါ သူတို့နှင့် ယင်းကို အစမ်းလေ့ကျင့်နိုင်သည်။ အစည်းအဝေးများတွင်တင်ဆက်ခဲ့သည့် ပေါ်လွင်သောအချက်များကို ဝေမျှပါ။ ဖြစ်ပျက်ရာများကို မြင်ယောင်နိုင်စေရန် ကျွန်ုပ်တို့၏စာပေများမှရုပ်ပုံများကို အသုံးပြုပါ။ ဦးဆုံးအကြိမ်သင်အံမှုမှစ၍ ထိုသို့ ပြုလုပ်ပါ။”

၆။ ရွေးနုတ်ဖိုးမှ အကျိုးကျေးဇူးရရှိရန် စိတ်နှလုံးရိုးဖြောင့်သူများအား မည်သည့်နည်းနှစ်နည်းဖြင့် ကူညီနိုင်သနည်း။

^၆ စိတ်နှလုံးရိုးဖြောင့်သူများသည် ပုံမှန်ကျမ်းစာသင်ပြီး အသင်းတော်အစည်းအဝေးများ ပုံမှန်တက်ရောက်သည့်အခါ ဝိညာဉ်ရေးတိုးတက်မှု မြန်ဆန်လေ့ရှိ၏။ ထို့ကြောင့် ဤဝိညာဏပြင်ဆင်ပေးမှုများနှင့် ဘုရားသခင်၏ အကြီးမြတ်ဆုံးဆုကျေးဇူးတို့မှ အကျိုးကျေးဇူးရယူကြရန် အခြားသူတို့ကို အားပေးနိုင်ကြပါစေ။