ကျမ်းစာစောင်နံပါတ် ၄၇—၂ ကောရိန္သု
ကျမ်းရေးသူ– ပေါလု
ရေးရာဒေသ– မက်ဆီဒိုးနီးယား
ရေးသားပြီးစီးချိန်– အေဒီ ၅၅ ခန့်
အေဒီ ၅၅ ၏နွေနှောင်း သို့မဟုတ် ဆောင်းဦးရာသီအစ ဖြစ်ပုံရသည်။ ကောရိန္သုရှိ ခရစ်ယာန်အသင်းတော်အတွက် တမန်တော်ပေါလု ရတက်မအေးနိုင်သော အကြောင်းတချို့ ရှိနေသေးသည်။ ပထမစာကိုရေးပြီး လပိုင်းမျှသာရှိပါသေးသည်။ ယုဒပြည်မှ သန့်ရှင်းသူတို့အတွက် အလှူငွေများကောက်ခံခြင်းကို ကူညီဆောင်ရွက်ပေးရန်လည်းကောင်း၊ မိမိ၏ ပထမစာစောင်ကို သူတို့မည်သို့ တုံ့ ပြန်ကြောင်း အကဲခတ်ရန်လည်းကောင်း တိတုကို ကောရိန္သုမြို့သို့ စေလွှတ်လိုက်၏။ (၂ ကော. ၈:၁-၆; ၂:၁၃) သူတို့မည်သို့ တုံ့ ပြန်ခဲ့ကြသနည်း။ သူတို့ဝမ်းနည်းပြီး နောင်တရကြကြောင်း ကြားသိရသောအခါ ပေါလု အလွန်စိတ်ချမ်းသာခဲ့ပေမည်။ တိတုသည် မာကေဒေါနိ [မက်ဆီဒိုးနီးယား] ပြည်ရှိ ပေါလုထံ ယင်းသတင်းကောင်းနှင့် ပြန်ရောက်လာသောအခါ တမန်တော်၏ရင်ထဲတွင် ကောရိန္သုမှ ယုံကြည်သူချင်းများကို ချစ်သောစိတ် ပြည့်လျှံနေတော့သည်။—၇:၅-၇; ၆:၁၁။
၂ ထို့ကြောင့် ပေါလုသည် ကောရိန္သုအသင်းသားများထံ နောက်စာတစ်စောင် ရေးပို့လိုက်၏။ လှိုက်လှိုက်လှဲလှဲနှင့် အားရပါးရရှိလှသော ဤဒုတိယစာကို မာကေဒေါနိပြည်မှရေးကာ တိတုနှင့်ပင် ပါးလိုက်ပုံရသည်။ (၉:၂၊ ၄; ၈:၁၆-၁၈၊ ၂၂-၂၄) ပေါလုအား ဒုတိယစာရေးရန်လှုံ့ဆော်ပေးသည့် အကြောင်းရင်းများအနက် တစ်ခုမှာ ‘တမန်တော်ယောင်ဆောင်များ၊ လှည့်ဖြားတတ်သောအမှုစောင့်များ’ ဟုသူခေါ်ခဲ့သော ‘ထူးချွန်တမန်တော်ကြီးများ’ (superfine apostles) သည် ကောရိန္သုအသင်းတော်တွင် ရှိနေခြင်းဖြစ်သည်။ (၁၁:၅၊ ၁၃၊ ၁၄) သက်တမ်းအားဖြင့် နုနယ်သေးသော အသင်းတော်၏ဝိညာဉ်ရေးသည် ဘေးအန္တရာယ်နှင့် ရင်ဆိုင်နေရပေပြီ။ တမန်တော်အဖြစ် ပေါလု၏ပြောရေးဆိုခွင့်ကိုလည်း စောဒကတက်နေကြပြီ။ ဤကိစ္စများအတွက် ကောရိန္သုဒုတိယစောင်ကို သူရေးလိုက်ခြင်းဖြစ်သည်။ ၎င်းစာက များစွာထောက်ကူပေးခဲ့၏။
၃ “ငါသည် သင်တို့ထံ လာရန်အသင့်ရှိသည်မှာ ဤတစ်ကြိမ်ဆိုလျှင် တတိယအကြိမ်ရှိပြီ” ဟုပေါလုဆိုကြောင်း သတိပြုပါ။ (၂ ကော. ၁၂:၁၄၊ ကဘ; ၁၃:၁၊ ကဘ) ပထမစာရေးစဉ်က သူတို့ထံသို့ ဒုတိယအကြိမ်သွားဦးမည်ဟု သူစိတ်ကူးခဲ့သည်။ သွားဖို့အသင့်ဖြစ်ခဲ့သော်လည်း ယင်း “ဒုတိယအကြိမ် ဝမ်းမြောက်ရမည်အကြောင်း” သည် အကောင်အထည်မပေါ်ခဲ့ပေ။ (၁ ကော. ၁၆:၅; ၂ ကော. ၁:၁၅၊ ကဘ) အမှန်မှာ၊ ပေါလုသည် ကောရိန္သုခရစ်ယာန်အသင်းတော်ကို တည်ထောင်ခဲ့သည့် အေဒီ ၅၀-၅၂ တွင် တစ်ကြိမ်တည်းသာ ရောက်ဖူးသည်။ ထိုတွင် ၁၈ လကြာနေထိုင်ခဲ့၏။ (တ. ၁၈:၁-၁၈) သို့သော် တစ်ကြိမ်လောက်တော့ ကောရိန္သုမြို့သို့ သွားရဦးမည်ဟု ပေါလုဆန္ဒရှိသည်။ အေဒီ ၅၆ ကဖြစ်ပါလိမ့်မည်။ ဂရိပြည်တွင် သုံးလခန့်ရောက်နေစဉ် ကောရိန္သုမြို့သို့ ပေါလု တစ်ခေါက်ပြန်သွားပါသည်။ ထိုတွင် ရောမအသင်းတော်ထံပေးပို့သောစာကို သူရေးခဲ့ခြင်းဖြစ်သည်။—ရော. ၁၆:၁၊ ၂၃; ၁ ကော. ၁:၁၄။
၄ ကောရိန္သုဒုတိယစောင်ကို ကောရိန္သုပထမစောင်အပြင် ပေါလု၏ အခြားသြဝါဒစာများနှင့်တွဲ၍ ကျမ်းစာလုံးချင်းတွင်အပါအဝင်ဖြစ်ကြောင်း အသိအမှတ်ပြုလေ့ရှိ၏။ ကျွန်ုပ်တို့သည် ယခုတစ်ဖန် ကောရိန္သုအသင်းတော်၏အတွင်းရေးများကို သိခွင့်ရပြန်လေပြီ။ သူတို့ကိုအပြင် ကျွန်ုပ်တို့ကိုပါ ဆုံးမထားသော ပေါလု၏မှုတ်သွင်းခံစကားများမှ အကျိုးရယူနိုင်ကြသည်။
အဘယ်ကြောင့် အကျိုးရှိကြောင်း
၁၈ ကောရိန္သုဒုတိယစောင်၌ ဖော်ပြထားသော ခရစ်ယာန်အမှုဆောင်လုပ်ငန်းအပေါ် ပေါလု၏ လေးမြတ်တန်ဖိုးထားမှုသည် တကယ်ပင် လှုံ့ဆော်မှုဖြစ်စေပြီး အားတက်ဖွယ်ဖြစ်သည်။ အမှုတော်ကို သူ့နည်းတူ သဘောထားကြစို့။ ဘုရားသခင်အစွမ်းပေးမှုကြောင့် အရည်အသွေးပြည့်ဝလာသော ခရစ်ယာန်အမှုဆောင်များသည် နှုတ်ကပါဌ်တော်မှ ကိုယ်ကျိုးရှာသူများမဟုတ်၊ စိတ်ရင်းစေတနာဖြင့် လုပ်ဆောင်သူများဖြစ်ပေသည်။ ထောက်ခံစာရ၍မဟုတ်၊ အမှုဆောင်လုပ်ငန်းတွင် မိမိ၏သီးပွင့်မှုက မိမိကိုယ်ကို အမှုဆောင်ဖြစ်ကြောင်း သက်သေထူနေပေသည်။ သို့ရာတွင် အမှုဆောင်လုပ်ငန်းသည် ဘုန်းကြီးသော်လည်း အမှုဆောင်အနေနှင့် ဝင့်ဝါစရာမရှိ။ မစုံလင်သောလူသားများဖြစ်သည့် ဘုရားသခင့်ကျေးကျွန်တို့သည် ကွဲလွယ်သောမြေအိုးကဲ့သို့သာဖြစ်ပြီး အမှုတော်ထမ်းဆောင်ခွင့်တည်းဟူသော ရတနာမြတ်ကို ထိန်းသိမ်းရသဖြင့် ဘုရားသခင်အစွမ်းပေးခြင်းကြောင့်သာ ဖြစ်ကြောင်း ထင်ရှား၏။ သို့ ဖြစ်၍ ဘုရားသခင့်အမှုတော်ဆောင်ဖြစ်ရခြင်းတည်းဟူသော အခွင့်ထူးကို နှိမ့်ချသောစိတ်ဖြင့် ခံယူထိုက်၏။ ‘ခရစ်တော်၏သံတမန်များ’ အဖြစ် ထမ်းရွက်ရသည်မှာ ဘုရားသခင်ထံမှ မခံစားထိုက်သော ကျေးဇူးတော်ပါတကား။ ယင်းကြောင့် ‘ဘုရားသခင့် မခံစားထိုက်သော ကျေးဇူးတော်ကိုလက်ခံပြီး ၎င်း၏ရည်ရွယ်ချက်ကို မမေ့နှင့်’ ဟူသော ပေါလု၏တိုက်တွန်းစကားမှာ တကယ်ပင်လျောက်ပတ်လှ၏။—၂:၁၄-၁၇; ၃:၁-၅; ၄:၇; ၅:၁၈-၂၀; ၆:၁။
၁၉ ခရစ်ယာန်အမှုဆောင်များအတွက် ပေါလု စံနမူနာကောင်းထားခဲ့ပေသည်။ တစ်ချက်အနေနှင့်၊ သူသည် ဟေဗြဲကျမ်းစောင်များကို တန်ဖိုးထား၏။ လေ့လာ၏။ အကြိမ်ကြိမ်ကိုးကား၏။ လိုက်နာကျင့်သုံး၏။ (၂ ကော. ၆:၂၊ ၁၆-၁၈; ၇:၁; ၈:၁၅; ၉:၉; ၁၃:၁; ဟေရှာ. ၄၉:၈; ဝတ်. ၂၆:၁၂; ဟေရှာ. ၅၂:၁၁; ယေဇ. ၂၀:၄၁; ၂ ရာ. ၇:၁၄; ဟော. ၁:၁၀) ၎င်းပြင် ကြီးကြပ်မှူးတစ်ဦးအနေနှင့် သိုးတော်စုအတွက် ကြောင့်ကြသောသဘောရှိခဲ့သည်။ ‘သင်တို့ . . . အကျိုးအလို့ငှာ ငါသည် ကိုယ်ဥစ္စာကိုလည်းကောင်း၊ ကိုယ်ကိုလည်းကောင်း အလွန်ဝမ်းမြောက်သောစိတ်နှင့် ကုန်စေမည်။’ ယင်းကျမ်းစာမှတ်တမ်း၌ ထင်ရှားစွာ တွေ့နိုင်သည့်အတိုင်း ညီအစ်ကိုများအကျိုးအတွက် မိမိကိုယ်ကို အကြွင်းမဲ့ အသုံးတော်ခံခဲ့သည်။ (၂ ကော. ၁၂:၁၅; ၆:၃-၁၀) ကောရိန္သုအသင်းတော်အတွင်း ပို့ချသင်ကြား၊ တိုက်တွန်းဆုံးမ၊ ပြုပြင်ပဲ့ထိန်းခဲ့သည်မှာ မမောနိုင်မပန်းနိုင် ဖြစ်ခဲ့သည်။ မှောင်မိုက်နှင့်မဆက်ဆံရန် ရှင်းလင်းစွာ ဤသို့သတိပေးခဲ့၏– “မယုံကြည်သောသူတို့နှင့်တွဲဖက်၍ ဆန့် ကျင်ဘက်ဖြစ်သောထမ်းပိုးကို မထမ်းကြနှင့်။” သူသည် ခရစ်ယာန်ညီအစ်ကိုများအတွက် အလွန်ကြောင့်ကြလွန်းသောကြောင့် “မြွေသည် မိမိပရိယာယ်အားဖြင့် ဧဝကိုလှည့်စားသကဲ့သို့” ခရစ်ယာန်တို့၏စိတ်နှလုံးယိုယွင်းမည်ကို အလိုမရှိသောကြောင့် “သင်တို့သည် ယုံကြည်ခြင်း၌တည်သလော၊ မတည်သလောဟု ကိုယ်ကိုကိုယ် စစ်ကြောကြလော့။ ကိုယ်ကိုကိုယ် စုံစမ်းကြလော့” ဟုဆော်သြခဲ့သည်။ ‘စေတနာစိတ်နှင့် စွန့်ကြဲသောသူကို ဘုရားသခင် ချစ်တော်မူ၏’ ဟုဆိုလျက် ရက်ရောသောသဘောထားရှိရန် သူနှိုးဆော်ခဲ့၏။ ပြော၍မကုန်နိုင်သော ဘုရားသခင်၏ဆုကျေးဇူးတော်အတွက် ဘုရားသခင်ကို အလွန်ကျေးဇူးတင်ကြောင်း သူဖော်ပြခဲ့၏။ ကောရိန္သုမြို့ရှိ ပေါလု၏ညီအစ်ကိုများသည် ပေါလု၏မေတ္တာနှလုံးပြားအပေါ် အမှန်ပင် အက္ခရာတင်လျက်ရှိပေသည်။ သူ၏ညီအစ်ကိုများအကျိုးကို မတွန့်မတို ထမ်းရွက်လိုသော ပေါလု၏သဘောသည် စိတ်ဇောထက်သန်၊ နိုးကြားသော ကြီးကြပ်မှူးတစ်ဦး၌ ရှိအပ်သည့် အရည်အသွေးအမှန်ဖြစ်ပေသည်။ ယနေ့ကျွန်ုပ်တို့အတွက် အလွန်ကောင်းသော စံနမူနာပင်။—၆: ၁၄; ၁၁:၃; ၁၃:၅; ၉:၇၊ ၁၅; ၃:၂။
၂၀ အကျပ်အတည်းနှင့်ရင်ဆိုင်ရစဉ် ‘သနားကြင်နာတတ်သည့်အဘ၊ နှစ်သိမ့်ခြင်းရှိသမျှတို့၏ဘုရားသခင်’ ထံမှ စစ်မှန်သောခွန်အားကို ရယူနိုင်မည်ဖြစ်ကြောင်း တင်ပြခြင်းအားဖြင့် တမန်တော်ပေါလုသည် ကျွန်ုပ်တို့စိတ်ကို လမ်းမှန်သို့ ညွှန်ပြပေးသည်။ ကိုယ်တော်သာလျှင် ‘ဆင်းရဲဒုက္ခရှိသမျှ၌ ငါတို့ကို နှစ်သိမ့်ပေးတော်မူ’ သောအရှင်ဖြစ်သောကြောင့် ကျွန်ုပ်တို့သည် ကိုယ်တော်၏ကမ္ဘာသစ်အတွင်းသို့ ကယ်တင်ခံရရန် ခံရပ်တည်ကြည်နိုင်ကြမည်ဖြစ်သည်။ “ကောင်းကင်ဘုံ၌ လူလက်ဖြင့်မလုပ်ဘဲ ဘုရားသခင်၏ ဖန်ဆင်းတော်မူသော နိစ္စထာဝရအိမ်” ရှိသည်ဟူသော မျှော်လင့်ချက်ကိုလည်း ပေါလုပြညွှန်၏။ ၎င်းနောက် “လူမည်သည်ကား၊ ခရစ်တော်၌ရှိလျှင် အသစ်ပြုပြင်သော သတ္တဝါဖြစ်၏။ ဟောင်းသောအရာတို့သည် ပြောင်းလဲ၍ . . . အသစ်ဖြစ်ကြပြီ” ဟုဆိုသည်။ ကောရိန္သုဒုတိယစောင်တွင် ပေါလုနည်းတူ ကောင်းကင်နိုင်ငံတော်အမွေခံမည့် ပုဂ္ဂိုလ်များအဖို့ အားတက်ဖွယ်ကောင်းသောစကားများ အမှန်ပါရှိသတည်း။—၁:၃၊ ၄; ၅:၁၊ ၁၇။