ကျွန်ုပ်တို့၏ဓမ္မအမှု—ဘုရားသခင်အား ကျွန်ုပ်တို့ချစ်ကြောင်း ဖော်ပြခြင်း

၁။ ဘုရားသခင်အားချစ်သည့်မေတ္တာက ယေရှုအား အဘယ်အရာလုပ်ဆောင်ရန် လှုံ့ဆော်ပေးခဲ့သနည်း။

^၁ မိမိ၏ဓမ္မအမှုကို ဆောင်ရွက်ရန် မေတ္တာက ယေရှုကို လှုံ့ဆော်ပေးခဲ့သည်။ ယေရှု၏ဓမ္မအမှုကဏ္ဍတိုင်းသည် ယေဟောဝါအား ကိုယ်တော်ချစ်ကြောင်း မငြင်းဆိုနိုင်သည့် သက်သေအထောက်အထားဖြစ်၏။ ယေရှုဤသို့ မိန့်ဆိုခဲ့သည်– “ငါသည် ခမည်းတော်ကိုချစ်ကြောင်း ဤလောကသိစေရန် ခမည်းတော်မိန့်မှာထားသည့်အတိုင်း ငါပြု၏။” (ယော. ၁၄:၃၁) ယေရှု၏ခြေရာကို လိုက်လျှောက်သူများအနေနှင့် ကျွန်ုပ်တို့လည်း ဓမ္မအမှုဆောင်ခြင်းဖြင့် ဘုရားသခင်အား အလွန်ချစ်မြတ်နိုးကြောင်း ဖော်ပြခွင့်ရရှိထားကြသည်။—မ. ၂၂:၃၇; ဧ. ၅:၁၊ ၂။

၂။ ယေဟောဝါအားချစ်သည့်မေတ္တာက ကျွန်ုပ်တို့၏ဓမ္မအမှုအပေါ် မည်သို့အကျိုးသက်ရောက်သနည်း။

^၂ “ကိုယ်တော်၏နာမတော်သည် သန့်ရှင်းမြင့်မြတ်ခြင်းရှိပါစေ”– ကျွန်ုပ်တို့သည် ယေဟောဝါနှင့် ကိုယ်တော့်နိုင်ငံတော်အကြောင်း အခြားသူများအား ပြောပြရန် အခွင့်အရေးမှန်သမျှကို ထက်သန်စွာရယူသည့်အခါ ဘုရားသခင်အားချစ်ကြောင်း ကျွန်ုပ်တို့ဖော်ပြကြသည်။ အမှန်မှာ ကျွန်ုပ်တို့သည် ကိုယ်တော်၏နာမတော် သန့်ရှင်းမြင့်မြတ်စေရန် လုပ်ဆောင်နေကြခြင်းဖြစ်သည်။ (ဆ. ၈၃:၁၈; ယေဇ. ၃၆:၂၃; မ. ၆:၉) ယေရှု၏ဓမ္မအမှုကဲ့သို့ပင် ကျွန်ုပ်တို့၏ဓမ္မအမှုသည်လည်း ယေဟောဝါ၏နာမတော် သန့်ရှင်းမြင့်မြတ်စေရေးနှင့် ကိုယ်တော်၏အလိုတော်ပြည့်စုံစေရေးအတွက် ကျွန်ုပ်တို့တွင် စိတ်ရင်းမှန်ရှိကြောင်း အဆက်မပြတ်ဖော်ပြနေပါသည်။—မ. ၂၆:၃၉။

၃။ ယေဟောဝါအား ကျွန်ုပ်တို့ချစ်သည့်မေတ္တာက အတားအဆီးများကို အောင်မြင်ကျော်လွှားရန် မည်သည့်နည်းဖြင့် ကူညီပေးသနည်း။

^၃ မေတ္တာက အတားအဆီးများကို အောင်မြင်ကျော်လွှားရန် ကျွန်ုပ်တို့အား လှုံ့ဆော်ပေး– ယေဟောဝါအားချစ်သည့်မေတ္တာက အတားအဆီးမှန်သမျှကို ကျော်လွှားစေသည်။ (၁ ကော. ၁၃:၄၊ ၇) ဓမ္မအမှုဆောင်ခြင်းကို အဟန့်အတားဖြစ်စေနိုင်ခဲ့သည့် ဘဝအခြေအနေအတော်များများကို ယေရှုရင်ဆိုင်ခဲ့သည်။ သို့ရာတွင် ကိုယ်တော်သည် အတားအဆီးများနှင့်ကြုံတွေ့ရသည့်အခါ ကိုယ်တော်၏ကြီးမားလှသည့်မေတ္တာနှင့် ယေဟောဝါ၏အလိုတော်ထမ်းဆောင်လိုစိတ်က ကိုယ်တော်အား မည်သည့်ပြဿနာကိုမဆို အောင်မြင်ကျော်လွှားနိုင်စေခဲ့သည်။ (မာ. ၃:၂၁; ၁ ပေ. ၂:၁၈-၂၃) ကျွန်ုပ်တို့လည်း အခက်အခဲများစွာနှင့် ရင်ဆိုင်ရနိုင်ပါသည်၊ သို့သော် ဘုရားသခင်အားချစ်သည့်မေတ္တာက ကျွန်ုပ်တို့အား ယင်းတို့ကို အောင်မြင်ကျော်လွှားနိုင်စေပါသည်။ ဓမ္မအမှုတွင် အတတ်နိုင်ဆုံးပါဝင်လုပ်ဆောင်ရာ၌ ခရစ်တော်ချမှတ်ခဲ့သည့် စံနမူနာကို အနီးကပ်လိုက်လျှောက်ခြင်းဖြင့် ကိုယ့်ကိုယ်ကို ယုံကြည်စိတ်ချမှုရှိကာ စိတ်ပျက်အားလျော့မည်မဟုတ်ပါ။ မိသားစုဆန့်ကျင်မှု၊ ကျန်းမာရေးချို့တဲ့မှု၊ အသက်အရွယ်ကြီးရင့်မှု သို့မဟုတ် လူတို့၏လျစ်လျူရှုမှုက ကျွန်ုပ်တို့ကို ထိခိုက်နိုင်သော်လည်း ကျွန်ုပ်တို့၏ဓမ္မအမှုကို အတတ်နိုင်ဆုံး ထိရောက်စွာ လုပ်ဆောင်ခြင်းဖြင့် ယေဟောဝါအားချစ်ကြောင်း ဖော်ပြခြင်းကို ယင်းတို့က မဟန့်တားနိုင်ပါ။

၄။ ဘုရားသခင်အား ကျွန်ုပ်တို့ချစ်သည့်မေတ္တာက အဘယ်အခွင့်ထူးကို ခံစားရရှိစေသနည်း။

^၄ ချစ်ခြင်းမေတ္တာသည် အစွမ်းတန်ခိုးကြီးပြီး ဓမ္မအမှုတွင် ဘုရားသခင်အား စိုးလ်အကြွင်းမဲ့ချစ်ကြောင်း ဖော်ပြနိုင်သည့်စွမ်းရည် ကျွန်ုပ်တို့တွင် ရှိနေခြင်းဖြင့် ကောင်းချီးခံစားကြရသည်။ (၁ ကော. ၁၃:၁၃) ကျွန်ုပ်တို့သည် ယေဟောဝါ၏နာမတော်ကို အပြီးအပိုင် သန့်ရှင်းမြင့်မြတ်စေမည့်အချိန်သို့ လျင်မြန်စွာ ချဉ်းကပ်လာသည်နှင့်အမျှ ကျွန်ုပ်တို့၏ “ချစ်ခြင်းမေတ္တာသည်လည်း တိုးပွားသည်ထက်တိုးပွား” နိုင်ပါစေ။—ဖိ. ၁:၉; မ. ၂၂:၃၆-၃၈။