ကျွန်ုပ်တို့၏ မဟာဖန်ဆင်းရှင်သည် ကျွန်ုပ်တို့ကို ဂရုစိုက်တော်မူ၏

^၁ နာခံမှုမရှိသော ဣသရေလလူမျိုးနှင့် ကျိုးကြောင်းဆင်ခြင်ရန် ကြိုးစားရာတွင် ယေဟောဝါ ဤသို့မေးခဲ့သည်– “ထာဝရဘုရား [“ယေဟောဝါ၊” ကဘ] သည် အစဉ်အမြဲတည်တော်မူသော ဘုရားသခင်ဖြစ်ကြောင်းကိုလည်းကောင်း၊ မြေကြီးစွန်းတိုင်အောင် ဖန်ဆင်းတော်မူသောအရှင်ဖြစ်ကြောင်းကိုလည်းကောင်း . . . သင်သည် မသိမကြားဖူးသလော။” (ဟေရှာ. ၄၀:၂၈) ကျွန်ုပ်တို့သည် မဟာဖန်ဆင်းရှင်ကိုသိရှိကြပြီး ကျွန်ုပ်တို့အပေါ် ကိုယ်တော်၏ မေတ္တာပါသောဂရုစိုက်မှုကို တွေ့မြင်ကြသည်။ သို့ရာတွင် သန်းပေါင်းများစွာသောသူတို့သည် ကိုယ်တော်၏တည်ရှိမှုကို သံသယဝင်ကြသည် သို့မဟုတ် ကိုယ်တော်နှင့်ပတ်သက်၍ သမ္မာကျမ်းစာတွင် ဖော်ပြထားရာများနှင့် ကိုက်ညီမှုမရှိသော ယူဆချက်များကို လက်ခံကြသည်။ သူတို့ကို ကျွန်ုပ်တို့ မည်သို့ကူညီပေးနိုင်သနည်း။

^၂ ထိုသို့သောသူတို့အားကူညီရန် သင့်အား ဂရုစိုက်စောင့်ရှောက်သည့် ဖန်ဆင်းရှင်တစ်ပါးရှိ၏လော စာအုပ်အသစ်ကို စီစဉ်ထားပါသည်။ ယင်းစာအုပ်က စဉ်းစားတွေးခေါ်တတ်သူများအား ဖြစ်ရပ်မှန်များကို ဆင်ခြင်သုံးသပ်စေနိုင်သည်။ ဤစာအုပ်တွင်ပါသည့် စိတ်ဝင်စားဖွယ်အကြောင်းအရာနှင့် လက်ခံနိုင်ဖွယ် အချေအတင်,တင်ပြချက်များက ဖတ်ရှုသူများ၏ အာရုံကို ဖမ်းစားနိုင်သည်။

^၃ ဖန်ဆင်းရှင်စာအုပ်နှင့် အကျွမ်းတဝင်ရှိပါ– ၎င်းတွင်ပါရှိသည့် အခြေခံအကြောင်းအရာများကို သိထားပါ။ အခန်း ၂ မှ ၅ တွင် စကြဝဠာ၊ အသက်နှင့် လူသားများ မည်သို့စတင်တည်ရှိလာကြောင်းနှင့် ယင်းတို့အားလုံး၏နောက်ကွယ်တွင် မည်သည့်အရာရှိကြောင်း သုံးသပ်ထားသည်။ အခန်း ၆ မှ ၉ တွင် သမ္မာကျမ်းစာနှင့် ယင်း၏အာဘော်ရှင်၊ အထူးသဖြင့် ဖန်ဆင်းခြင်းဆိုင်ရာ ကမ္ဘာဦးကျမ်းမှတ်တမ်းသည် ယုံကြည်စိတ်ချ၍ရမရကို ရှင်းပြထားသည်။ အခန်း ၁၀ တွင် “ဖန်ဆင်းရှင်သည် ဂရုစိုက်တော်မူလျှင် ဆင်းရဲဒုက္ခ အဘယ်ကြောင့်ဤမျှများပြားရသနည်း” ဟူသော လူအများမေးကြသည့် စိတ်ရှုပ်ထွေးဖွယ်မေးခွန်းအတွက် ကျေနပ်ဖွယ်အဖြေ ပေးထားသည်။

^၄ သံသယရှိသူများနှင့် ကျိုးကြောင်းဆင်ခြင်ရန် ကြိုးစားပါ– ဖန်ဆင်းရှင်စာအုပ်၊ စာမျက်နှာ ၇၈-၇၉ တွင် ဘုရားသခင်နှင့်ပတ်သက်၍ မှန်ကန်သောကောက်ချက်ချနိုင်ရန် အခြားသူများအား ကူညီပေးဖို့ သင်အသုံးပြုနိုင်သည့် အကြောင်းပြချက်ကို တင်ပြထားသည်။ “စကြဝဠာမှာ အစရှိသလား” ဟုသူတို့ကိုမေးပါ။ အများစုက အစရှိသည်ဟု သဘောတူကြပေမည်။ ထိုသို့သဘောတူပါက “အဲဒီအစဟာ အလိုလိုဖြစ်လာသလား ဒါမှမဟုတ် တစ်ခုခုကြောင့်ဖြစ်လာသလား” ဟုမေးပါ။ အများစုက တစ်ခုခုကြောင့်ဖြစ်လာသည်ဟု အသိအမှတ်ပြုကြ၏။ ထို့နောက် “စကြဝဠာရဲ့အစဟာ ထာဝရအရာတစ်ခုခုကြောင့်ဖြစ်လာသလား ဒါမှမဟုတ် ထာဝရပုဂ္ဂိုလ်တစ်ပါးပါးကြောင့် ဖြစ်လာသလား” ဟု ဆက်မေးပါ။ ဤချဉ်းကပ်နည်းက ဖန်ဆင်းရှင်တစ်ပါးရှိရမည်ဟု များစွာသောသူတို့အား သိမြင်စေနိုင်သည်။

^၅ ဖန်ဆင်းရှင်စာအုပ်သည် လူအများ အမှန်လိုအပ်သည့်အရာဖြစ်၏။ ယင်းကို သင့်ဆွေမျိုးများ၊ အလုပ်ဖော်များ၊ ကျောင်းနေဖက်များနှင့် အခြားအသိအကျွမ်းများကို ဝေငှပါ။ သင်နှင့်တွေ့ဆုံသည့် ဘုရားသခင့်တည်ရှိမှုနှင့်ပတ်သက်၍ သံသယဝင်သူများကိုဝေငှနိုင်ရန် ယင်းစာအုပ်ကို ဓမ္မအမှုတွင် သင်နှင့်တစ်ပါတည်းယူသွားပါ။ ဤစာအုပ်နှင့်ပို၍အကျွမ်းတဝင်ရှိလေ ကျွန်ုပ်တို့၏ ဖန်ဆင်းရှင်ကိုချစ်သည့်မေတ္တာသည် ပို၍သန်စွမ်းလေဖြစ်ပြီး ကိုယ်တော်၏မြင့်မြတ်သောစံနှုန်းများနှင့်အညီ ဆက်လက်လျှောက်လှမ်းရန် လှုံ့ဆော်ပေးသည်။—ဧ. ၅:၁; ဗျာ. ၄:၁၁။