ကျမ်းစာစောင်နံပါတ် ၅၈​—ဟေဗြဲ

ကျမ်းရေးသူ– ပေါလု

ရေးရာဒေသ– ရောမ

ရေးသားပြီးစီးချိန်– အေဒီ ၆၁ ခန့်

ပေါလုကို “တစ်ပါးအမျိုးသားများတို့” နှင့်ဆိုင်သောတမန်တော်အဖြစ် လူသိများသည်။ သို့သော် သူ့ဓမ္မအမှုသည် ဂျူးမဟုတ်သူများအတွက်ချည်းသာ ဖြစ်သလော။ လုံးဝမဟုတ်ပါ။ ပေါလုနှစ်ခြင်းမခံမီလေး၊ အလုပ်တာဝန်အပ်နှင်းမခံရမီလေးတွင် အာနနိကို သခင်ယေရှု ဤသို့ပြောခဲ့သည်– “ထိုသူ [ပေါလု]ကား တစ်ပါးအမျိုးသားတို့နှင့် ရှင်ဘုရင်တို့ထံလည်းကောင်း၊ ဣသရေလအမျိုးသားတို့ရှိရာသို့လည်းကောင်း ငါ၏နာမကို ပို့ဆောင်စေခြင်းငှာ ငါရွေးကောက်သောတန်ဆာဖြစ်၏။” (တ. ၉:၁၅; ဂ. ၂:၈၊ ၉) ဣသရေလအမျိုးသားတို့ထံ ယေရှုနာမတော်ကို ပို့ဆောင်ရန်ဖြစ်သော ပေါလု၏တာဝန်နှင့် ဟေဗြဲကျမ်းကို ရေးသားခြင်းသည် လုံးဝအပ်စပ်ဆီလျော်နေပါသည်။

^၂ သို့သော် ဟေဗြဲကျမ်းကို ပေါလုရေးခြင်းမဖြစ်နိုင်ဟု အချို့ဝေဖန်ရေးသမားများကဆိုသည်။ တစ်ချက်မှာ စာတွင် ပေါလုနာမည်မပါခြင်းကြောင့်ဖြစ်သည်။ သို့သော် ဤအချက်သည် ပြဿနာမဟုတ်ပါလေ။ သမ္မာကျမ်းစာလုံးချင်းတွင်ပါသော အခြားကျမ်းများ၌လည်း ရေးသူအမည်များ မပါပေ။ ကျမ်းအတွင်းပါ အထောက်အထားများဖြင့်သာ ကျမ်းရေးသူ မည်သူမည်ဝါဖြစ်သည်ကို သိရသည်။ ယုဒနယ်မှ ဟေဗြဲခရစ်ယာန်များထံ စာရေးလိုက်ရာတွင် ပေါလုသည် မိမိအမည်ကိုမထည့်ဘဲ တမင်ချန်ထားခြင်း ဖြစ်နိုင်သည်ဟု တချို့ဆိုကြသည်။ သူ့နာမည်ကို ထိုဒေသမှ ဂျူးတို့သည် နားကြားခါးနေသောကြောင့်ဖြစ်သည်။ (တ. ၂၁:၂၈) ပေါလု၏အခြားသြဝါဒစာများနှင့် ရေးဟန်မတူညီခြင်းကလည်း ၎င်းသည် ပေါလုရေးခြင်းမဟုတ်ဟု အခိုင်အမာဆိုစရာအကြောင်းမဟုတ်ပါလေ။ တိတ္ထိများကိုဖြစ်စေ၊ ဂျူးများကိုဖြစ်စေ၊ ခရစ်ယာန်များကိုဖြစ်စေ ဟောပြောသည့်အခါ မိမိသည် “ခပ်သိမ်းသောသူတို့၌ ခပ်သိမ်းသောအရာ” ဖြစ်နိုင်စွမ်းကို ပေါလုတင်ပြခဲ့သည်ချည်းဖြစ်သည်။ ဤတွင် သူ၏ကျိုးကြောင်းဆင်ခြင်မှုကို ဂျူးတစ်ဦးက ဂျူးတို့အား အချေအတင် တင်ပြနေပုံဖြင့် ရေးထားခြင်းဖြစ်ပြီး ယင်းကို သူတို့အပြည့်အဝနားလည်သဘောပေါက်၊ လေးမြတ်တန်ဖိုးထားနိုင်ကြသည်။—၁ ကော. ၉:၂၂။

^၃ ဤကျမ်းတွင်ပါသော အတွင်းအထောက်အထားတိုင်းသည် ပေါလုရေးသားခြင်းဖြစ်ကြောင်း ပြဆိုသည်။ စာရေးသူမှာ အီတလီပြည်တွင်ရှိပြီး တိမောသေနှင့်ပေါင်းနေသူဖြစ်သည်။ ပေါလုမှလွဲ၍ မည်သူရှိနိုင်အံ့နည်း။ (ဟေဗြဲ ၁၃:၂၃၊ ၂၄) ၎င်းအပြင် အချေအတင်ပြောဆိုချက်များကို ဂျူးတစ်ဦး၏ရှုထောင့်မှ တင်ပြထားပြီး ဟေဗြဲအသင်းတော်သို့သာ ရည်ညွှန်းပေးပို့လိုက်သောစာဖြစ်သော်လည်း အယူဝါဒသည် ပေါလု၏ဟန်ပန်မှ ပေါလု၏ဟန်ပန်သက်သက်ဖြစ်သည်။ ဤအချက်နှင့်ပတ်သက်၍ ကလပ်၏ဋီကာကျမ်း၊ အတွဲ ၆၊ စာမျက်နှာ ၆၈၁ တွင် ဟေဗြဲကျမ်းအကြောင်း ဤသို့ဆိုထား၏– “ဂျူးများထံသို့ရေးသည်ဆိုသောအချက်ကို ဤသြဝါဒကျမ်းတစ်ကျမ်းလုံးက ထောက်ခံသည်။ တစ်ပါးအမျိုးသားများထံ ရေးသားခြင်းဖြစ်ပါက ဂျူးအစီအစဉ်စနစ်နှင့် အကျွမ်းတဝင်မရှိသောကြောင့် အယောက်တစ်သောင်းမှတစ်ယောက်ပင်လျှင် ၎င်းသြဝါဒစာတစ်ခုလုံးတွင် ဖော်ပြထားပုံရသော အချေအတင်ပြောဆိုချက်များကို သဘောပေါက်လိမ့်မည်မဟုတ်ပါ။” ယင်းက ပေါလု၏အခြားစာပေများနှင့် ဤစာမတူရခြင်းကို ဖြေရှင်းပေးပေသည်။

^၄ ၁၉၃၀ ပြည့်နှစ်ခန့်တွင် တွေ့ရှိသော ချက်စတာဘီတီကျူစာနံပါတ် ၂ (P⁴⁶) က ပေါလုရေးကြောင်း ထပ်ဆင့် သက်သေခံသည်။ ပေါလုသေဆုံးပြီးနှစ်ပေါင်း ၁၅၀ အကြာခန့်လောက်တွင်သာ ရေးခဲ့သော ၎င်းလက်ရေးကျူစာအုပ်ကို ဗြိတိသျှလူမျိုး ကျမ်းစာသား စိစစ်ဝေဖန်သူ ဆာဖရက်ဒရစ်ကင်ညွန် ဤသို့ဆိုသည်– “ရောမကျမ်းနောက်တွင် ဟေဗြဲကျမ်းကို ထားရှိသည်။ (ယခင်က အစဉ်အလာမရှိခဲ့သလောက်ဖြစ်သည်) ဤကျူစာကိုရေးခဲ့စဉ်က ဤကျမ်းကို ပေါလုရေးခဲ့ခြင်းနှင့်ပတ်သက်၍ လုံးဝသံသယမရှိကြကြောင်း သာဓကဖြစ်၏။”a ယင်းကိစ္စနှင့်ပတ်သက်၍ မက်ကလင်းတော့ခ်နှင့် စထရောင်းတို့၏စွယ်စုံကျမ်းက ဤသို့ ရှင်းရှင်းလင်းလင်းဖော်ပြသည်– “ဤသြဝါဒစာကိုရေးသူသည် ပေါလုမဟုတ်ဘဲ အခြားသူတစ်ဦးဦးဖြစ်သည်ဟူသည့် အချက်အတွက် ခြေမြစ်ခိုင်လုံသည့် ပြင်ပ သို့မဟုတ် အတွင်း အထောက်အထားမရှိပါ။”b

^၅ အစောပိုင်း ခရစ်ယာန်များ ယင်းကျမ်းကို လက်ခံခဲ့သည့်အပြင် ယင်းကျမ်းတွင် ပါဝင်သောအရာများကိုယ်နှိုက်က “ဘုရားသခင်မှုတ်သွင်းတော်မူ” ကြောင်းသက်သေထူသည်။ ဟေဗြဲသြဝါဒစာသည် စာဖတ်သူများအား ဟေဗြဲကျမ်းမှပရောဖက်ပြုချက်များကို အမြဲထောက်ပြပြီး အစောပိုင်းကျမ်းစောင်များကို များစွာကိုးကားထားသည်။ ယင်းတို့သည် ခရစ်တော်ယေရှုတွင် မည်သို့ပြည့်စုံခဲ့ကြောင်း ထောက်ပြထားသည်။ ပထမအခန်းကြီး၌ပင် ဟေဗြဲကျမ်းစောင်မှ ခုနစ်ခါထက်မနည်း ကိုးကားကာ ယခု သားတော်သည် ကောင်းကင်တမန်တို့ထက် မြင့်မြတ်နေပြီဖြစ်ကြောင်းလည်း ဖော်ပြသွားသည်။ ယေဟောဝါ၏နာမတော်မြတ်နှင့် နှုတ်ကပါဌ်တော်အကြောင်းကို အမြဲတစေချီးမွမ်းပြောဆိုထားပြီး ယေရှုသည် အသက်ရှင်ခြင်းသို့ ပို့ဆောင်သောအရှင်ဖြစ်ကြောင်း၊ ဘုရားသခင့်နိုင်ငံတော်သာလျှင် လူသားတို့အတွက် တစ်ခုတည်းသောမျှော်လင့်ရာဖြစ်ကြောင်း ထောက်ပြထားသည်။

^၆ ရေးသားသည့်အချိန်မှာမူ ပေါလုအီတလီတွင်ရှိစဉ်က ရေးခဲ့ခြင်းဖြစ်ကြောင်း ဖော်ပြပြီးဖြစ်သည်။ စာကို အဆုံးသတ်ရာတွင် “ငါတို့ညီ တိမောသေလွတ်ကြောင်းသိမှတ်ကြလော့။ သူသည် မကြာမမြင့်မီရောက်လျှင် သူနှင့်အတူ ငါလာ၍ သင်တို့ကို တွေ့မြင်ရလိမ့်မည်” ဟုဆိုထားသည်။ (၁၃:၂၃၊ သမ္မာ) ယင်းက မိမိထောင်မှ စောစောလွတ်ကာ ထောင်ကျခဲ့ပြီး ထောင်မှလွတ်နှင့်ပြီဖြစ်သော တိမောသေနှင့်အတူ လာမည်ဟု ပေါလုမျှော်လင့်နေကြောင်း ဖော်ပြပုံရသည်။ ထို့ကြောင့် ပေါလု ရောမတွင် ပထမအကြိမ်ထောင်ကျသည့် နောက်ဆုံးနှစ် အေဒီ ၆၁ ခုနှစ်ကို ဤကျမ်းရေးရာနှစ်အဖြစ် ယူဆနိုင်သည်။

^၇ ဂျူးအစီအစဉ်စနစ်ဆုံးခန်းအတွင်း၌ ယုဒနယ်၊ အထူးသဖြင့် ယေရုရှလင်ရှိ ဟေဗြဲခရစ်ယာန်တို့သည် ပြင်းထန်သောစမ်းသပ်မှုများကို အလူးအလဲခံရကြသည်။ သတင်းကောင်း ဟောပြောကျယ်ပြန့်လာသည်နှင့်အမျှ ဂျူးတို့သည် ခရစ်ယာန်တို့ကို ခါးသီးစွာ မုန်းသည်ထက် မုန်းလာကာ သွေးရူးသွေးတန်းနှင့် အတိုက်အခံလုပ်လာသည့်အထိ ဖြစ်လာသည်။ လွန်ခဲ့သောနှစ်အနည်းငယ်ကပင် ယေရုရှလင်တွင် ပေါလုပေါ်လာရုံဖြင့် ဂျူးဘာသာရေးသမားတို့သည် အုတ်အုတ်ကျက်ကျက်ဖြစ်လာကြကာ “ထိုသို့သောသူကို မြေကြီးပေါ်မှ သုတ်သင်ပယ်ရှင်းလော့” ဟုငယ်သံပါအောင် အော်ကြတော့သည်။ ပေါလုကို ရှင်းမပစ်နိုင်မချင်း အစာကိုလည်း မစား၊ ရေကိုလည်းမသောက်ရဟု ဂျူးအယောက် ၄၀ ကျော်သည် ကျိန်ဆို၍ သန္နိဋ္ဌာန်ချထားကြသည်။ ယင်းကြောင့် ညဉ့်အချိန်တွင် ကဲသရိသို့ ပေါလုကိုခေါ်သွားဖို့ အစောင့်အကြပ်များစွာ လိုအပ်ခဲ့ပေသည်။ (တ. ၂၂:၂၂; ၂၃:၁၂-၁၅၊ ၂၃၊ ၂၄) ဤကဲ့သို့ ဘာသာရေးတစ်ယူသန်မှုနှင့် ခရစ်ယာန်များကိုမုန်းတီးမှုများအကြားတွင် ဤအသင်းတော်ခမျာ ဟောပြောခြင်း၊ ယုံကြည်ခြင်းတွင် ဆက်လက်ခိုင်မြဲစွာ အသက်ရှင်နေခဲ့ရသည်။ ယုဒဘာသာသို့ ပြန်မရောက်သွားရလေအောင် ခရစ်တော်သည် ပညတ်တရားကို မည်သို့ပြည့်စုံစေပြီဖြစ်ကြောင်း ရှင်းလင်းပြတ်သားစွာ သဘောပေါက်နားလည်ထားဖို့လိုပေသည်။ သို့မှသာ ထုံးစံသက်သက်မျှသာ အဓိပ္ပာယ်မဲ့လုပ်နေကြသော မောရှေပညတ်အောက် တိရစ္ဆာန်ပူဇော်ခြင်းများကို သူတို့ပြန်လုပ်ကြမည်မဟုတ်တော့ချေ။

^၈ ဂျူးခရစ်ယာန်များ ခံစားနေရသော ဖိစီးမှုနှင့် ညှဉ်းပန်းမှုတို့ကို တမန်တော်ပေါလုထက်ပို၍ နားလည်နိုင်သူမရှိပါလေ။ ဂျူးဓလေ့ထုံးစံများကို မမှန်ကန်ကြောင်း ယခင်က ဖာရိရှဲဖြစ်ခဲ့ဖူးသူ ပေါလုထက် ပို၍အခိုင်အမာ အချေအတင်ပြောဆိုနိုင်သူမရှိပါလေ။ ဂါမလျေလ၏ခြေရင်းတွင် သင်ကြားတတ်မြောက်ခဲ့သော မောရှေပညတ်အကြောင်း ကျယ်ပြန့်သောအသိပညာများကိုသုံးကာ ခရစ်တော်သည် ပညတ်တရားကိုလည်းကောင်း၊ ယင်း၏ဓလေ့ထုံးစံများကိုလည်းကောင်း၊ ယဇ်ပူဇော်ခြင်းများကိုလည်းကောင်း ပြည့်စုံစေပြီဖြစ်ကြောင်း ပြန်လှန်မချေပနိုင်အောင် ပိုင်နိုင်စွာ ပေါလုသက်သေထူပေးသည်။ ယင်းနေရာတွင် သာ၍ဘုန်းအသရေနှင့်ပြည့်ဝသည့် အဖြစ်မှန်များဖြင့် ယခုအစားထိုးလိုက်ပြီဖြစ်ကာ သာ၍မြတ်သောပဋိညာဉ်သစ်အောက်တွင် တန်ဖိုးမဖြတ်နိုင်လောက်အောင် ကြီးမြတ်သည့်အကျိုးကျေးဇူးများဖြစ်စေကြောင်း သူဖော်ပြခဲ့သည်။ သူ၏ထက်မြက်သောဉာဏ်က ရှင်းလင်းပြီး ယုံကြည်လောက်သော သက်သေအထောက်အထားများကို တစ်ခုပြီးတစ်ခု ဆက်တိုက်တင်ပြပေးခဲ့သည်။ ပညတ်ပဋိညာဉ်ကုန်ဆုံးပြီး ပဋိညာဉ်သစ်လာခြင်း၊ အာရုန်၏ယဇ်ပုရောဟိတ်အရာထက် ခရစ်တော်၏ယဇ်ပုရောဟိတ်အရာက သာလွန်ခြင်း၊ နွားများ သိုးများကိုပူဇော်ခြင်းထက် ခရစ်တော်၏ပူဇော်သကာ၏ စစ်မှန်သောတန်ဖိုး၊ ခရစ်တော်သည် မြေကြီးပေါ်ရှိ တဲတစ်ခုအတွင်းသို့မဟုတ်ဘဲ ကောင်းကင်ရှိ ယေဟောဝါရှေ့တော်မှောက်သို့ဝင်ခြင်း စသည့်တစ်မူထူးသောအယူဝါဒသစ်များ၊ မယုံကြည်သူတို့ မုန်းခြင်းမကမုန်းသောအယူဝါဒများကို ခရစ်ယာန်ဖြစ်လာသောဂျူးများအား ပေါလုက အစီအရီတင်ပြပေးသည်။ ဟေဗြဲကျမ်းချက်များစွာဖြင့်လည်း အထောက်အထားအဖြစ် တင်ပြထားလေရာ စဉ်းစားဉာဏ်ရှိသောဂျူးဖြစ်လျှင် လက်ခံလိုက်ရုံသာရှိတော့သည်။

^၉ ဤစာကို လက်ကိုင်ထားကြပြီဖြစ်သော ဟေဗြဲခရစ်ယာန်တို့သည် ညှဉ်းပန်းသောဂျူးများ၏နှုတ်များကို ပိတ်ရန် အစွမ်းထက်သော လက်နက်သစ်ကို ရရှိထားကြပေပြီ။ ဘုရားသခင့်သမ္မာတရားကို ရှာနေကြသည့် ဘာသာပြောင်းဝင်လာသူ ရိုးသားသောဂျူးများကိုလည်း ယုံလောက်သောအချေအတင်စကားများ တင်ပြနိုင်ကြပေပြီ။ ဟေဗြဲခရစ်ယာန်များကို ပေါလုအလွန်ချစ်ကြောင်း၊ အလိုအပ်ဆုံးအချိန်တွင် လက်တွေ့အကျဆုံးနည်းဖြင့် ကူညီလိုကြောင်း ဤသြဝါဒစာက သက်သေထူပေသည်။

အဘယ်ကြောင့်အကျိုးရှိကြောင်း

^၂၃ ဟေဗြဲသြဝါဒစာသည် ခရစ်တော်ဘက်မှနေ၍ တရားနှင့်ညီသော အချေအတင်ငြင်းခုံချက်တစ်ရပ်အနေနှင့် ပြိုင်စံမရှိ ပြောင်မြောက်သည့်လက်ရာ၊ ဟေဗြဲကျမ်းစောင်များမှ အကိုးအကားနှင့်တကွ လွတ်လွတ်လပ်လပ် ပြည့်ပြည့်စုံစုံသက်သေထူ ရေးသားသောစာတစ်စောင်ဖြစ်ပေသည်။ မောရှေပညတ္တိကျမ်းပါ အချက်အလက်အမျိုးမျိုးဖြစ်သော ပဋိညာဉ်၊ သွေး၊ အာမခံ [ဖျန်ဖြေစေ့စပ်သူ]၊ တဲတော်ဝတ်ပြုမှု၊ ယဇ်ပုရောဟိတ်၊ ပူဇော်သကာများအကြောင်း ခြုံငုံပြီးတင်ပြ၏။ ၎င်းတို့သည် နောင်လာမည့် သာ၍မြတ်သောအရာကို ပြညွှန်ရန် ဘုရားသခင်အသုံးပြုတော်မူသော နမူနာဖြစ်ကြောင်း၊ ၎င်းတို့သည် ခရစ်တော်ယေရှု၌ အဆုံးသတ်ကြောင်း၊ ကိုယ်တော်၏ပူဇော်သကာ၌ နိဂုံးချုပ်ကြောင်း၊ ကိုယ်တော်သည် ပညတ္တိကျမ်းပြည့်စုံချက်ဖြစ်ကြောင်း ရေးသားဖော်ပြထားသည်။ ‘ရွေ့လျော့၍ ဟောင်းနွမ်းသဖြင့် ကွယ်ပျောက်ခြင်းသို့ရောက်လုနီး’ သောပညတ်တရားအကြောင်း ပေါလုဆို၏။ သို့သော် “ယေရှုခရစ်သည် မနေ့၊ ယနေ့၊ နောင်ကာလအစဉ်အမြဲ မပြောင်းမလဲနေတော်မူ၏။” (၈:၁၃; ၁၃:၈; ၁၀:၁) ဤသြဝါဒစာကို ဟေဗြဲလူတို့ဖတ်သောအခါ မည်မျှ ဝမ်းမြောက်ဝမ်းသာခဲ့မည်ဖြစ်ခြင်း။

^၂၄ သို့သော် ဟေဗြဲလူတို့နှင့် အခြေအနေချင်းမတူသော ကျွန်ုပ်တို့အဖို့ အဘယ်အကျိုးရှိသနည်း။ ကျွန်ုပ်တို့သည် ပညတ်တရားအောက်၌ မရှိရကား ပေါလု၏အချေအတင်စကားမှ အကျိုးတစ်စုံတစ်ရာ ရယူနိုင်မည်လော။ မုချရနိုင်၏။ အာဗြဟံအမျိုးအနွယ်အားဖြင့် လူမျိုးအပေါင်း ကောင်းချီးခံစားရမည်ဟူသော ကတိတော်အပေါ် အခြေပြုထားသည့် မဟာပဋိညာဉ်သစ်အကြောင်း ဤစာစောင်၌ ဖော်ပြထား၏။ အာဗြဟံ၏မျိုးနွယ် ယေရှုခရစ်အားဖြင့် ကောင်းချီးခံစားရမည်ဟူသော ယေဟောဝါ၏ကတိတော် ပြည့်စုံချက်ကား ကျွန်ုပ်တို့အသက်အတွက် မျှော်လင့်ချက်၊ ကျွန်ုပ်တို့၏တစ်ခုတည်းသော မျှော်လင့်ချက်ပင်တည်း။ ကျွန်ုပ်တို့သည် ပညတ်တရားအောက်တွင်မရှိသော်လည်း အာဒံ၏သားမြေးများအနေနှင့် အပြစ်တရားအောက် မွေးလာကြသူများဖြစ်ကြသဖြင့် ကြင်နာတတ်သော ယဇ်ပုရောဟိတ်မင်းကြီး၊ တရားဝင်အပြစ်ဖြေရာယဇ်ရှိသော ယဇ်ပုရောဟိတ်၊ ယေဟောဝါကျိန်းဝပ်ရာကောင်းကင်ဘုံတိုင် ဝင်ရောက်ပြီး ကျွန်ုပ်တို့အဖို့ ဖျန်ဖြေစေ့စပ်ပေးမည့် ယဇ်ပုရောဟိတ်မင်းကြီးတစ်ပါးကို ကျွန်ုပ်တို့လိုအပ်ကြ၏။ ဤတွင် ကိုယ်တော်ကို ကျွန်ုပ်တို့တွေ့ရ၏။ ကိုယ်တော်သည် ယေဟောဝါ၏ကမ္ဘာသစ်အတွင်းသို့ ကျွန်ုပ်တို့အား ပို့ဆောင်မည့်အရှင်၊ ကျွန်ုပ်တို့၏အားနည်းချက်အတွက် ကျွန်ုပ်တို့ကို ကိုယ်ချင်းစာနာတတ်သောအရှင်၊ “ငါတို့ခံရသည်နည်းတူ အမျိုးမျိုးသောစုံစမ်းနှောင့်ယှက်ခြင်းတို့ကို ခံဖူးသော” အရှင်၊ “သနားခြင်းကရုဏာကိုလည်းကောင်း၊ တော်လျော်သောမစခြင်းကျေးဇူးတော်ကိုလည်းကောင်း ခံရမည်အကြောင်း ရဲရင့်သောစိတ်နှင့် ကျေးဇူးပလ္လင်တော်သို့ တိုးဝင်ချဉ်းကပ်” ပါဟု ကျွန်ုပ်တို့အား ခေါ်ဖိတ်တော်မူသောအရှင်၊ ယဇ်ပုရောဟိတ်မင်းကြီးဖြစ်တော်မူ၏။—၄:၁၅၊ ၁၆။

^၂၅ ဟေဗြဲလူတို့ထံရေးလိုက်သော ပေါလု၏ဤသြဝါဒကျမ်း၌ ရှေးအချိန် ဟေဗြဲကျမ်းများ၌ ရေးမှတ်ခဲ့သည့် ပရောဖက်ပြုချက်များ ထူးဆန်းအံ့သြဖွယ် ပြည့်စုံလာကြောင်း စိတ်တက်ကြွဖွယ်အထောက်အထားကိုလည်း တွေ့ရှိရသေး၏။ ယင်းတို့အားလုံးသည် ယနေ့ ကျွန်ုပ်တို့ကို ဆုံးမသွန်သင်ရန်၊ နှစ်သိမ့်ရန်ဖြစ်ပေသည်။ ဥပမာ၊ ဟေဗြဲကျမ်း၌ ပေါလုသည် ဆာလံ ၁၁၀:၁ ပါနိုင်ငံတော်ပရောဖက်ပြုချက်ကို ငါးကြိမ်ကိုးကားပြီး ယေရှုခရစ်သည် နိုင်ငံတော်မျိုးနွယ်ဖြစ်ကြောင်း၊ ‘ရန်သူတို့ကို မိမိခြေဖဝါးအောက် ချတော်မူမည့်အချိန်တိုင်အောင်’ ‘ဘုရားသခင်၏ပလ္လင်တော် လက်ယာဘက်တွင်ထိုင်လျက်’ စောင့်ဆိုင်းတော်မူမည်ဖြစ်ကြောင်း တင်ပြထားသည်။ (ဟေဗြဲ ၁၂:၂; ၁၀:၁၂၊ ၁၃; ၁:၃၊ ၁၃; ၈:၁) ၎င်းပြင် ဆာလံ ၁၁၀:၄ ကိုကိုးကားပြီး ဘုရားသခင့်သားတော်သည် “မေလခိဇေဒက်နည်းတူ ထာဝရယဇ်ပုရောဟိတ်” အဖြစ် အလွန်အရေးပါသည့်နေရာကို ယူတော်မူကြောင်း ရှင်းလင်းတင်ပြ၏။ ကျမ်းစာမှတ်တမ်း၌ ‘အဘမရှိ၊ အမိမရှိ၊ အမျိုးအနွယ်မရှိ၊ ဘဝအစနှင့်အဆုံးမပါရှိ’ သောမေလခိဇေဒက်နည်းတူ ယေရှုသည် ဘုရင်လည်းဖြစ်၊ ‘ထာဝရယဇ်ပုရောဟိတ်’ လည်းဖြစ်၍ မိမိရွေးနုတ်ဖိုးပူဇော်သကာ၏ အကျိုးကျေးဇူးများကို မိမိအုပ်ချုပ်မှုအောက်ရှိ နာခံသူတို့ပေါ်သို့ သက်ရောက်စေတော်မူမည်။ (ဟေဗြဲ ၅:၆၊ ၁၀; ၆:၂၀; ၇:၁-၂၁) ဘုရင်-ယဇ်ပုရောဟိတ်ဖြစ်သော ဤအရှင်ကို ရည်ညွှန်း၍ ဆာလံ ၄၅:၆၊ ၇ ကိုပေါလုကိုးကားကာ ဤသို့ဆို၏– “ကိုယ်တော်၏ပလ္လင်သည် နိစ္စထာဝရပလ္လင်ဖြစ်ပါ၏။ ကိုယ်တော်၏နိုင်ငံသည် တရားသဖြင့်စီရင်သောနိုင်ငံဖြစ်ပါ၏။ ကိုယ်တော်သည် ဖြောင့်မတ်ခြင်းတရားကိုနှစ်သက်၍ မတရားသောအမှုကို မုန်းတော်မူ၏။ ထို့ကြောင့် . . . ကိုယ်တော်၏ဘုရားသခင်သည် ကိုယ်တော်၏အပေါင်းအဖော်တို့ထက် ကိုယ်တော်ကို ချီးမြှောက်၍ ဝမ်းမြောက်ခြင်းဆီနှင့် ဘိသိက်ပေးတော်မူပြီ။” (ဟေဗြဲ ၁:၈၊ ၉) ဟေဗြဲကျမ်းစောင်များကိုးကားပြီး ခရစ်တော်ယေရှု၌ ၎င်းတို့ပြည့်စုံလာပုံကို ပေါလုရှင်းလင်းတင်ပြသောအခါ ဘုရားသခင်ပြတော်မူသော ပုံစံနမူနာများ တစ်စချင်းပေါင်းစပ်၍ ရုပ်လုံးပေါ်လာသည်ကို ကျွန်ုပ်တို့မြင်နိုင်၏။

^၂၆ ဟေဗြဲကျမ်း၌ ရှင်းလင်းစွာတင်ပြထားသည့်အတိုင်း အာဗြဟံသည် “ဘုရားသခင်တည်ထောင်ပြုစုတော်မူသော၊ ခိုင်ခံ့မြဲမြံသောမြို့”—‘ကောင်းကင်နှင့်ဆိုင်သော’ မြို့ကို စောင့်မျှော်ခဲ့သည်သည်။ “ယုံကြည်ခြင်းအားဖြင့်” နိုင်ငံတော်ကို အာဗြဟံတောင့်တ၏။ “သာ၍မြတ်သော ထမြောက်ခြင်း” အားဖြင့် နိုင်ငံတော်ကောင်းချီးများရရှိရေးအတွက် များစွာသောအရာတို့ကို သူစွန့်ခဲ့သည်။ အာဗြဟံသည်လည်းကောင်း၊ ဟေဗြဲအခန်းကြီး ၁၁ တွင်ပေါလုဖော်ပြထားသည့် “ဤမျှလောက်များစွာသောသက်သေ” ဖြစ်သော ယုံကြည်ခြင်းရှိသူ အခြားယောက်ျားမိန်းမတို့သည်လည်းကောင်း ကျွန်ုပ်တို့အဖို့ အတုယူဖွယ် ပုံသက်သေဖြစ်ပေသည်။ ၎င်းမှတ်တမ်းကိုဖတ်သောအခါ သစ္စာသမာဓိစောင့်သိသော ယင်းပုဂ္ဂိုလ်များနှင့်အတူ ကျွန်ုပ်တို့ရရှိထားသည့် အခွင့်အရေးနှင့် မျှော်လင့်ချက်ကို တန်ဖိုးထားလေးမြတ်မှုကြောင့် ကျွန်ုပ်တို့နှလုံးသည် ပီတိအဟုန်ဖြင့် ပြည့်လျှံသွား၏။ သို့ဖြစ်၍ “ငါတို့မျက်မှောက်၌ထားသော ပန်းတုံးတိုင်သို့ရောက်ခြင်းငှာ အားမလျော့ဘဲ ပြေးကြ” ရန်အားပေးခံရကြသည်။—၁၁:၈၊ ၁၀၊ ၁၆၊ ၃၅; ၁၂:၁။

^၂၇ ပေါလုသည် ဟဂ္ဂဲပရောဖက်ပြုချက်ကို ကိုးကားပြီး ဘုရားသခင့်အောက်ပါကတိတော်အကြောင်း သတိရစေသည်။ “ယခုတစ်ဖန် ငါသည် မြေကြီးနှင့် ကောင်းကင်ကိုလှုပ်ဦးမည်။” (ဟေဗြဲ ၁၂:၂၆; ဟဂ္ဂဲ ၂:၆) သို့ရာတွင် မျိုးနွယ်တော်၊ ခရစ်တော်ယေရှုအားဖြင့် ဘုရားသခင့်နိုင်ငံတော်မူ ထာဝစဉ်တည်တံ့ကျန်ရစ်ပါလိမ့်မည်။ “ထို့ကြောင့် ငါတို့သည် မလှုပ်နိုင်သောနိုင်ငံကိုရသည်ဖြစ်၍ ခန့်ညားကြောက်ရွံ့သောသဘောနှင့် ဘုရားသခင်ကို လျောက်ပတ်စွာ ဝတ်ပြုနိုင်မည်အကြောင်း ကျေးဇူးတော်ကိုစွဲလမ်းကြကုန်အံ့။” ဤလှုံ့ဆော်မှုဖြစ်စေသောမှတ်တမ်းက ခရစ်တော်သည် “အပြစ်ဒုစရိုက်ကို သုတ်သင်ပယ်ရှင်းရန်မဟုတ်ဘဲ မိမိကို စောင့်မျှော်နေသူတို့အား ကယ်တင်တော်မူ” မည့်အကြောင်း စိတ်ချယုံကြည်စေသည်။ သို့ဖြစ်၍ “ငါတို့သည် ဘုရားသခင်၏ကျေးဇူးတော်ကို ဝန်ခံလျက် နှုတ်ခမ်းအသီးတည်းဟူသော ချီးမွမ်းခြင်းယဇ်ကို သခင်ယေရှုခရစ်အားဖြင့် ဘုရားသခင့်ရှေ့တော်၌ အစဉ်ပူဇော်ကြကုန်အံ့။” ယေဟောဝါဘုရားသခင်၏ မဟာနာမတော်သည် ဘုရင်-ယဇ်ပုရောဟိတ်ယေရှုခရစ်အားဖြင့် ထာဝရချီးမွမ်းခြင်းခံရပါစေသော။—ဟေဗြဲ ၁၂:၂၈; ၉:၂၈၊ ခမ; ၁၃:၁၅။

[အောက်ခြေမှတ်ချက်များ]