ကျမ်းစာစောင်နံပါတ် ၅၇​—ဖိလေမုန်

ကျမ်းရေးသူ– ပေါလု

ရေးရာဒေသ– ရောမ

ရေးသားပြီးစီးချိန်– အေဒီ ၆၀ ခန့်-၆၁

ပေါလု၏ ဤလိမ္မာပါးနပ်ပြီး မေတ္တာပါသောစာသည် ယနေ့ခရစ်ယာန်များအဖို့ အလွန်အကျိုးရှိပေသည်။ “တစ်ပါးအမျိုးသားတို့နှင့်ဆိုင်သော တမန်တော်” ၏သြဝါဒစာများတွင် အတိုဆုံးဖြစ်သည်သာမက ကျမ်းစာတစ်အုပ်လုံး၌ ယောဟန်ဒုတိယစောင်နှင့် တတိယစောင်မှလွဲလျှင် အကြောင်းအရာ အနည်းဆုံးပါသောကျမ်းဖြစ်သည်။ ၎င်းအပြင် အသင်းတော်တစ်ရပ်လုံး သို့တည်းမဟုတ် အသင်းတော်မှတာဝန်ရှိ ကြီးကြပ်မှူးတစ်ဦးဦးသို့ လိပ်စာတပ်ထားသောစာ မဟုတ်ဘဲ ပုဂ္ဂိုလ်တစ်ဦးတည်းထံသို့ “သီးသန့်” ရေးလိုက်သည့် ပေါလု၏တစ်စောင်တည်းသော စာဖြစ်ပေသည်။ ၎င်းခရစ်ယာန်ညီအစ်ကိုနှင့် သီးသန့်ဆွေးနွေးလိုသော ကိုယ်ရေးကိုယ်တာအကြောင်းပါသည့် စာလည်းဖြစ်ပေသည်။ အာရှမိုင်းနားဗဟိုရှိ ဖြုဂိပြည်၊ ကောလောသဲမြို့တွင်နေသည့် ကြွယ်ဝသောဖိလေမုန်နှင့် ပေါလုဆွေးနွေးစရာရှိနေသည်။—ရော. ၁၁:၁၃။

^၂ စာ၏ရည်ရွယ်ချက်မှာ ရှင်းလင်းပေါ်လွင်လှပေသည်။ ရောမတွင် ပထမအကြိမ် ထောင်ကျစဉ်က (အေဒီ ၅၉-၆၁) ဘုရားသခင့်နိုင်ငံတော်အကြောင်းဟောပြောရန် လွတ်လပ်မှုနှင့် အခွင့်အရေးများ ပေါလု ရရှိခဲ့ပါသည်။ သူ့ဟောပြောချက်ကို နားထောင်ခဲ့သူတစ်ဦးမှာ သြနေသိမ်ဖြစ်သည်။ ပေါလု၏မိတ်ဆွေ ဖိလေမုန်မိသားစုမှ ထွက်ပြေးနေသော ကျွန်တစ်ဦးဖြစ်သည်။ သြနေသိမ်သည် ခရစ်ယာန်တစ်ဦးဖြစ်လာကာ သူ၏သဘောတူညီမှုဖြင့် သူ့ကို ဖိလေမုန်ထံပြန်လွှတ်ရန် ပေါလုဆုံးဖြတ်လိုက်သည်။ ဤအချိန်တွင်ပင် ဧဖက်နှင့် ကောလောသဲအသင်းတော်သို့ ပေါလုစာရေးလိုက်ခြင်းလည်းဖြစ်၏။ ၎င်းစာနှစ်စောင်တွင် ကျွန်ရှိသောသခင်များ မည်သို့ပြုမူလုပ်ကိုင်သင့်သည်၊ ကျွန်တို့က မည်သို့ပြုမူလုပ်ကိုင်သင့်သည်များ ရေးသားပါရှိလေသည်။ (ဧ. ၆:၅-၉; ကော. ၃:၂၂–၄:၁) သို့သော် ယင်းစာတို့နှင့်အတူ ဖိလေမုန်အတွက် သီးခြားစာတစ်စောင်ကိုလည်း ပေါလုရေးသားလိုက်ပါသည်။ ၎င်းစာတွင် သြနေသိမ်အတွက် ပေါလုကိုယ်တိုင် မေတ္တာရပ်ခံထားပါသည်။ ဤစာကို ပေါလုထူးထူးခြားခြား ကိုယ်တိုင်ရေးခဲ့ခြင်းဖြစ်သည်။ (ဖိလေ. ၁၉) ဤသို့ ကိုယ်တိုင်ကိုယ်ကျရေးခြင်းက ပေါလု၏မေတ္တာရပ်ခံချက်ကို ပို၍ အလေးစီးစေပါသည်။

^၃ ရောမတွင် ပေါလုဟောပြောပြီး ကြားနာသူများ ဘာသာပြောင်းလာကြရန်မှာ အချိန်အတန်အရာကြာသောကြောင့် ဤစာကို အေဒီ ၆၀-၆၁ လောက်တွင် ရေးခြင်းဖြစ်ပုံရသည်။ ထို့ပြင် အခန်းငယ် ၂၂ တွင်လွတ်မြောက်ဖို့ မျှော်လင့်သည်ဆိုသောကြောင့်လည်း ထောင်တွင် အတော်ကြာနေပြီးနောက် ဤစာကိုရေးခြင်းဖြစ်သည်ဟု ကျွန်ုပ်တို့ ကောက်ချက်ချနိုင်ပါသည်။ ကောလောသဲအသင်းသို့တစ်စောင်၊ ဧဖက်အသင်းသို့တစ်စောင်နှင့် ဖိလေမုန်သို့တစ်စောင်ဖြစ်သော ဤစာသုံးစောင်ကို တုခိတ်၊ သြနေသိမ်တို့နှင့် တစ်ပါတည်းပါးလိုက်ပုံရပါသည်။—ဧ. ၆:၂၁၊ ၂၂; ကော. ၄:၇-၉။

^၄ ဖိလေမုန်ကိုရေးသူမှာ ပေါလုဖြစ်ကြောင်း ပထမအခန်းငယ်ကပင် နာမည်နှင့်တကွ ဖော်ပြပါသည်။ ဤအချက်ကို သြရီဂျင်၊ တာတူလျန်တို့က ထောက်ခံသည်။a အေဒီဒုတိယရာစုမှ မူရေတိုရီယန်ကျမ်းအပိုင်းအစတွင် ပေါလု၏အခြားသြဝါဒစာများနှင့် ဤသြဝါဒစာကိုတွဲလျက် တွေ့ရသောကြောင့် ကျမ်းစစ်ကျမ်းမှန်ဖြစ်ကြောင်း သက်သေထင်ရှားသည်။

အဘယ်ကြောင့်အကျိုးရှိကြောင်း

^၇ ဤသြဝါဒကျမ်းတွင်တင်ပြသည့်အတိုင်း ပေါလုသည် တည်ဆဲဖြစ်သောလောကစနစ်နှင့် ကျွန်စနစ်စသော ၎င်း၏ဖွဲ့စည်းပုံကို တွန်းလှန်ဖို့ကြိုးစားသည့်အနေနှင့် “လူမှုရေးတရား” ဟောနေခြင်းမဟုတ်ပါ။ ခရစ်ယာန်ကျွန်များကိုပင် လွတ်မြောက်စေရန် နိုင်လိုမင်းထက်မပြုမူခဲ့ပါ။ သို့အစား၊ သခင်ထံမှ တိမ်းရှောင်နေသူ သြနေသိမ်အား မိမိသခင်ဖိလေမုန်ရှိရာ မိုင်ပေါင်း ၉၀၀ ကျော်ဝေးလံသည့် ကောလောသဲမြို့သို့ပြန်ရန် ရောမမြို့မှ စေလွှတ်ခဲ့သည်။ သို့ဖြင့် ပေါလုသည် ‘ဘုရားသခင့်နိုင်ငံတော်အကြောင်း ဟောပြောခြင်း၊ သခင်ယေရှုခရစ်နှင့်ပတ်သက်သောအရာများ သွန်သင်ပို့ချခြင်း’ တည်းဟူသော မိမိခန့်အပ်ခံရသည့် ဘုရားပေးလုပ်ငန်းကို စွဲစွဲမြဲမြဲလုပ်ဆောင်ခြင်းဖြင့် တမန်တော်တစ်ဦးအနေနှင့် အထက်မှခေါ်တော်မူခြင်းနှင့်အညီ ကျင့်သုံးနေထိုင်ခဲ့သည်။—တ. ၂၈:၃၁; ဖိလေ. ၈၊ ၉။

^၈ ဖိလေမုန်ကျမ်းသည် ပထမရာစုခရစ်ယာန်များအလယ်တွင် မေတ္တာနှင့် စည်းလုံးမှုရှိကြောင်း ပေါ်လွင်စေသည်။ အစောပိုင်းခရစ်ယာန်များသည် တစ်ဦးကိုတစ်ဦး “ညီအစ်ကို၊” “ညီအစ်မ” ဟုခေါ်ကြောင်း သိရပါသည်။ (ဖိလေ. ၂၊ ၂၀၊ ကဘ) ထို့ပြင် ခရစ်ယာန်ညီအစ်ကိုညီအစ်မများစပ်ကြား ကျင့်သုံးအပ်သော ခရစ်ယာန်မူများ၏ လက်တွေ့ကျပုံကို ယနေ့ခရစ်ယာန်များအား သိမြင်စေသည်။ ပေါလုကိုကြည့်လျှင် သူ၌ ညီအစ်ကိုချစ်ခြင်း၊ လူမှုဆက်ဆံရေးနှင့် သူတစ်ပါးပိုင်ဆိုင်ရာကို လေးစားသည့်စိတ်၊ ထိရောက်မှုရှိသည့် လိမ္မာပါးနပ်မှု၊ ချီးမွမ်းဖွယ်ကောင်းသော နှိမ့်ချသည့်သဘောတို့ကို တွေ့ရှိရပေသည်။ ခရစ်ယာန်အသင်းတော်ကို ဦးဆောင်နေသော ကြီးကြပ်မှူးတစ်ဦးအနေနှင့် မိမိ၏အခွင့်အာဏာသုံးပြီး ဖိလေမုန်အား သြနေသိမ်ကို ခွင့်လွှတ်ရမည်ဟု အတင်းအကျပ်တောင်းဆိုမည့်အစား ခရစ်ယာန်မေတ္တာနှင့် ပုဂ္ဂိုလ်ရေးခင်မင်မှုအပေါ် အခြေပြုပြီး ဖိလေမုန်ကို ပေါလုတောင်းပန်ခဲ့သည်။ ယနေ့ကြီးကြပ်မှူးများလည်း ပေါလု ဖိလေမုန်ထံချဉ်းကပ်သည့် အလိမ္မာသုံးပုံမှ အကျိုးထုတ်ယူနိုင်ပေသည်။

^၉ မိမိတောင်းပန်ချက်နှင့်အညီ ဖိလေမုန်ပြုရန် ပေါလုဧကန်မျှော်လင့်ခဲ့ပေသည်။ ဖိလေမုန်လည်း ထိုသို့ပြုလျှင် မဿဲ ၆:၁၄ ပါယေရှုစကားကိုလည်းကောင်း၊ ဧဖက် ၄:၃၂ ပါပေါလုစကားကိုလည်းကောင်း လက်တွေ့ကျင့်သုံးခြင်း ဖြစ်ပေလိမ့်မည်။ ယနေ့ခရစ်ယာန်များလည်း မိမိတို့ကို ပြစ်မှားခဲ့သည့် ညီအစ်ကိုကို ကြင်နာခွင့်လွှတ်မည်ဟု မျှော်လင့်ခံရနိုင်သည်။ မိမိပိုင်သဖြင့် တရားဥပဒေအရ မိမိစိတ်ကြိုက်ညှဉ်းဆဲနိုင်သောကျွန်တစ်ဦးအပေါ် ဖိလေမုန်ခွင့်လွှတ်နိုင်သည်ရှိသော် ယနေ့ခရစ်ယာန်များလည်း မိမိအား ပြစ်မှားခဲ့သည့်ညီအစ်ကို,ကို ခွင့်လွှတ်ဖို့ ပို၍လွယ်ကူသင့်သည်။

^၁၀ ဖိလေမုန်ကျမ်း၌ ယေဟောဝါဝိညာဉ်တော်လုပ်ဆောင်ချက်ကို ကောင်းစွာတွေ့မြင်နိုင်သည်။ စိတ်ထိခိုက်လွယ်သော ပြဿနာကို ပေါလုနိုင်နင်းစွာ ကိုင်တွယ်လိုက်ပုံကိုထောက်ခြင်းဖြင့် သိသာနိုင်သည်။ ပေါလုတင်ပြသော ကိုယ်ချင်းစာနာစိတ်၊ စုံမက်မြတ်နိုးမှုနှင့် ခရစ်ယာန်ချင်း ယုံကြည်စိတ်ချမှုတို့ကို ထောက်၍လည်း သိနိုင်သည်။ ဖိလေမုန်ကျမ်းသည် အခြားကျမ်းများနည်းတူ ခရစ်ယာန်မူများကို သွန်သင်၍ ခရစ်ယာန်စည်းလုံးမှုကို အားပေးသည့်အပြင် ဘုရားသခင့်နိုင်ငံတော်မျှော်လင့်သူ၊ ယေဟောဝါ၏မေတ္တာကရုဏာ ပေါ်လွင်အောင်နေထိုင်သော ‘သန့်ရှင်းသူများ’ ဘောင်တွင်လွှမ်းမိုးသော မေတ္တာနှင့်ယုံကြည်ခြင်းတရားတို့ကိုပါ ထင်ပေါ်စေသည်ဖြစ်၍ ယေဟောဝါ၏ဝိညာဉ်တော်လုပ်ဆောင်ချက်ကို ဤကျမ်းစောင်၌ အထင်းသားတွေ့ရှိနိုင်၏။—အခန်းငယ် ၅။

[အောက်ခြေမှတ်ချက်]