Vonona ho Amin’ny Fahoriana Lehibe ve Ianao?

1. Nahoana no hendry izay miomana ho amin’ny loza?

MAMONJY aina ny fiomanana. Rehefa misy loza, ohatra, dia azo inoana kokoa hoe izay niomana ho amin’izany no ho tafavoaka sy ho afaka hanampy ny hafa. Izao no nolazain’ny fikambanana iray mpanao asa soa any Eoropa: “Izay tsara fiomanana tsy tampohin’ny loza.”

2. Nahoana isika no tokony hiomana ho amin’ny fahoriana lehibe? (Matio 24:44)

² Hamely tampoka ny “fahoriana lehibe.” (Mat. 24:21) Tsy hoatran’ny loza hafa anefa izy io, satria tsy ho tampoka amin’ny olona sasany. Efa ho 2 000 taona mantsy i Jesosy no nampitandrina ny mpanara-dia azy mba hiomana ho amin’io andro io. (Vakio ny Matio 24:44.) Raha miomana isika, dia ho mora kokoa amintsika ny ho tafavoaka amin’io fotoan-tsarotra io, sy hanampy ny hafa hanao an’izany.​—Lioka 21:36.

3. Nahoana no hanampy antsika ho vonona ho amin’ny fahoriana lehibe ny fiaretana sy fangorahana ary fitiavana?

³ Andao isika handinika toetra telo hanampy antsika ho vonona ho amin’ny fahoriana lehibe. Ahoana, ohatra, raha asaina mitory didim-pitsarana henjana isika, dia misy manohitra? (Apok. 16:21) Hila fiaretana isika amin’izay. Hanampy antsika hankatò an’i Jehovah izany, sy hatoky hoe hiaro antsika izy. Ahoana indray raha mamoy ny fananany sasany na izy rehetra ny rahalahintsika? (Hab. 3:17, 18) Ny fangorahana no handrisika antsika hanampy an-dry zareo. Efa haintsika koa hoe hanafika antsika tsy ho ela ny firenena maromaro mitambatra. Dia ahoana no hataontsika raha voatery miara-miaina akaiky amin’ny mpiara-manompo isika mandritra ny fotoana kelikely? (Ezek. 38:10-12) Mila tena tia an-dry zareo isika, satria hanampy antsika ho tafavoaka amin’io fotoan-tsarotra io izany.

4. Ahoana no ampisehoan’ny Baiboly hoe tsy maintsy miezaka ny hiaritra sy hangoraka ary hampiseho fitiavana foana isika?

⁴ Ampirisihin’ny Tenin’Andriamanitra isika mba hiezaka hiaritra sy hangoraka ary hampiseho fitiavana foana. Hoy ny Lioka 21:19: “Raha miaritra ianareo dia ho voavonjinareo ny ainareo.” Izao koa no resahin’ny Kolosianina 3:12: “Mitafia ... fangorahana.” Hoy indray ny 1 Tesalonianina 4:9, 10: ‘Ianareo efa ampianarin’Andriamanitra hifankatia. Ampirisihinay ihany anefa ianareo, ry rahalahy, mba hanao an’izany bebe kokoa aza.’ Nosoratana ho an’ny mpianatr’i Jesosy ireo andininy ireo. Efa niaritra sy nangoraka ary nampiseho fitiavana ry zareo, nefa mbola nila nianatra nampiseho an’izany foana. Tsy maintsy manao an’izany koa isika. Andao àry hodinihintsika hoe ahoana no nataon’ny Kristianina voalohany mba hampisehoana ny tsirairay amin’ireo toetra ireo. Ho hitantsika avy eo hoe ahoana no anahafantsika an-dry zareo, mba ho vonona ho amin’ny fahoriana lehibe isika.

MIEZAHA HAHAY HIARITRA KOKOA

5. Ahoana no nahavitan’ny Kristianina voalohany niaritra fitsapana?

⁵ Nila niaritra ny Kristianina voalohany. (Heb. 10:36) Tsy hoe niatrika ny olana fahitan’ny ankamaroan’ny olona fotsiny mantsy ry zareo, fa nanatombo ny azy. Betsaka taminy no nenjehin’ny mpitondra fivavahana jiosy sy ny manam-pahefana romanina. Nanampy trotraka an’izany ny fianakaviany. (Mat. 10:21) Ary ahoana ny teo anivon’ny fiangonana? Tsy maintsy niady mafy ry zareo indraindray mba tsy ho voataonan’ny mpivadi-pinoana sy ny fampianarana nampisara-bazana naeliny. (Asa. 20:29, 30) Niaritra anefa ireny Kristianina ireny. (Apok. 2:3) Ahoana no nahavitany an’izany? Nisaintsaina ny modelin’ireo olona resahin’ny Soratra Masina hoe niaritra ry zareo, ohatra hoe i Joba. (Jak. 5:10, 11) Nivavaka koa ry zareo mba hahazo hery. (Asa. 4:29-31) Ankoatra izay, dia ny soa ho azony raha miaritra no nifantohan-dry zareo.​—Asa. 5:41.

6. Inona no ianaranao avy amin’i Merita mba hahavitanao hiaritra?

⁶ Hahavita hiaritra koa isika, raha mianatra tsy tapaka sy misaintsaina ny ohatr’ireo olona niaritra voatantara ao amin’ny Baiboly sy ao amin’ny boky sy gazetintsika. Izany no nataon’i Merita, anabavy any Albania. Nahavita niaritra izy na dia nanohitra be aza ny fianakaviany. Hoy izy: “Nihetsi-po be aho rehefa nianatra ny tantaran’i Joba ao amin’ny Baiboly. Nijaly be izy, sady tsy fantany hoe iza no nahatonga ny fitsapana nahazo azy, nefa niteny izy hoe: ‘Tsy hanaiky hivadika mihitsy aho mandra-pahafatiko.’ (Joba 27:5) Hoatran’ny hoe maivana be ny fitsapana nahazo ahy raha noharina tamin’ny azy. Izaho koa nahalala hoe iza no nahatonga an’ireny.”

7. Tokony hianatra hanao inona isika dieny izao, na dia mbola tsy miatrika fitsapana mafy aza?

⁷ Vao mainka koa isika hahay hiaritra, rehefa miresaka matetika amin’i Jehovah an’izay mampanahy antsika. (Fil. 4:6; 1 Tes. 5:17) Mbola tsy miatrika fitsapana mafy angamba ianao izao. Na izany aza, dia mitady ny tari-dalan’i Jehovah ve ianao isaky ny tezitra, na very hevitra, na mahatsiaro ho tsy afa-manoatra? Raha zatra mangataka ny fanampian’Andriamanitra ianao rehefa miatrika olana madinidinika isan’andro, dia tsy hisalasala hanao an’izany rehefa miatrika olana lehibe kokoa. Hatoky ianao amin’izay fa fantany tsara hoe rahoviana sy amin’ny fomba ahoana no hanampiana anao.​—Sal. 27:1, 3.

8. Nahoana ny ohatr’i Mira no mampiseho hoe hahavita hiaritra fitsapana amin’ny hoavy isika raha miaritra ny amin’izao? (Jakoba 1:2-4) (Jereo koa ny sary.)

⁸ Azo inoana kokoa hoe hahavita hiatrika ny fahoriana lehibe isika raha miaritra fitsapana dieny izao. (Rom. 5:3) Nahoana? Betsaka ny mpiara-manompo nahita fa ny fitsapana tsirairay niaretany no nanampy azy hiatrika ny manaraka. Nanatsara ny toetrany ny fiaretana, sady vao mainka nahatonga an-dry zareo hino hoe vonona sy te hanampy azy i Jehovah. Ny finoana indray avy eo no nanampy azy hiaritra ny fitsapana manaraka. (Vakio ny Jakoba 1:2-4.) Efa niaritra olana maro i Mira, mpisava lalana any Albania, dia hitany hoe izany no manampy azy hiaritra hatramin’izao. Niaiky izy fa indraindray izy mahatsapa hoe izy irery no tototry ny olana. Tadidiny anefa hoe efa im-be dia be i Jehovah no nanampy azy nandritra an’izay 20 taona izay, dia izao no ataony an-tsaina: ‘Aza mivadika mihitsy! Aza avela ho very maina any fotsiny ireo taona maro sy fandresena rehetra efa nomen’i Jehovah anao!’ Azonao saintsainina koa izay efa nataon’i Jehovah mba hanampiana anao hiaritra. Matokia fa isaky ny miaritra fitsapana ianao, dia hitany izany ary hamaly soa anao izy. (Mat. 5:10-12) Amin’izay rehefa manomboka ny fahoriana lehibe, dia ho efa nianatra ny hiaritra ianao sady ho tapa-kevitra hanao an’izany foana.

MANEHOA FANGORAHANA

9. Ahoana no nampisehoan’ny fiangonan’i Antiokia any Syria hoe nangoraka ny hafa ry zareo?

⁹ Eritrereto izay nitranga rehefa tratran’ny mosary lehibe ny Kristianina tany Jodia. Azo antoka hoe nangoraka an’ireo rahalahiny ireo ny fiangonan’i Antiokia any Syria, rehefa naheno momba an’ilay mosary. Tsy fihetseham-po fotsiny anefa izany, fa nasehony tamin’ny atao mihitsy. “Nanapa-kevitra” ry zareo “fa samy handefa fanampiana araka izay vitany, ho an’ireo rahalahy nipetraka tany Jodia.” (Asa. 11:27-30) Tapa-kevitra ny hanampy an-dry zareo àry ny Kristianina tany Antiokia, na dia lavidavitra ihany aza no nisy an’ireo rahalahy tratran’ny mosary ireo.​—1 Jaona 3:17, 18.

10. Ahoana avy no ampisehoantsika hoe mangoraka ny mpiara-manompo isika rehefa tratran’ny loza ry zareo? (Jereo koa ny sary.)

¹⁰ Azontsika aseho koa hoe mangoraka ny mpiara-manompo isika rehefa henontsika hoe tratran’ny loza ry zareo. Tonga dia manao zavatra isika, ohatra hoe manontany ny anti-panahy raha misy tetikasa azontsika anampiana. Afaka manao fanomezana ho an’ny asa maneran-tany koa isika, na mivavaka ho an’ireo tra-boina.b (Ohab. 17:17) Nisy 950 mahery, ohatra, ny Komitin’ny Vonjy Rano Vaky notendrena eran-tany tamin’ny 2020, mba hikarakara an’izay nilain’ireo nila fanampiana nandritra an’ilay valanaretina COVID-19. Tena mendrika ny hoderaintsika ireny rahalahy anisan’ny Komitin’ny Vonjy Rano Vaky ireny. Nangoraka ny rahalahy sy anabaviny ry zareo, dia nizara fanampiana sy nampahery azy ireny. Indraindray aza ry zareo nanamboatra ny simba na nanorina trano sy toeram-pivavahana mihitsy.​—Ampitahao amin’ny 2 Korintianina 8:1-4.

11. Nahoana no manome voninahitra an’ilay Raintsika any an-danitra ny fangorahana asehontsika?

¹¹ Rehefa maneho fangorahana isika aorian’ny loza, dia voamariky ny hafa ny sorona ataontsika. Ravan’ny Rivo-doza Dorian, ohatra, ny Efitrano Fanjakana iray tany Bahamas tamin’ny 2019. Rehefa nanorina an’ilay efitrano indray ny rahalahintsika, dia nanontany mpiara-miasa iray tsy Vavolombelona ry zareo hoe ohatrinona no hanaovany ny asa sasany. Izao no nolazain’ilay rangahy: ‘Ireo ny fitaovana sy ny mpiasa ary ny zavatra hafa ilainareo. Azonareo ampiasaina ireo fa izaho tsy hitaky vola. Te hanao an’izany ho an’ny fikambananareo fotsiny aho, satria nandona ny foko ny nahita an’izay tsapanareo ho an’ny namanareo.’ Tsy mahalala an’i Jehovah ny ankamaroan’ny olona eo amin’izao tontolo izao. Betsaka anefa no tena mandinika antsika Vavolombelon’i Jehovah. Tombontsoa be ny mahalala hoe manampy ny olona hanatona an’ilay Andriamanitra “tena mamindra fo” ny fangorahana asehontsika!​—Efes. 2:4.

12. Nahoana isika no hoe miomana ho amin’ny fahoriana lehibe raha miezaka mangoraka dieny izao? (Apokalypsy 13:16, 17)

¹² Maninona isika no mila maneho fangorahana mandritra ny fahoriana lehibe? Satria mety hila ny fanampiantsika ny rahalahy sy anabavintsika, vao hahazo an’izay tena ilainy eo amin’ny fiainana. Milaza mantsy ny Baiboly fa hahita olana izay tsy manaiky hanohana ny fitondram-panjakana, na amin’izao na mandritra ny fahoriana lehibe. (Vakio ny Apokalypsy 13:16, 17.) Rehefa ho avy hampihatra ny didim-pitsarany i Kristy Jesosy Mpanjakantsika, dia enga anie isika ho hitany hoe maneho fangorahana, amin’izay izy hanasa antsika ‘handova an’ilay Fanjakana.’​—Mat. 25:34-40.

AMPITOMBOY NY FITIAVANAO

13. Inona no nanampy ny Kristianina voalohany hifankatia kokoa, araka ny Romanina 15:7?

¹³ Ny fitiavana no namantarana ny Kristianina voalohany. Mora tamin-dry zareo ve anefa ny nampiseho fitiavana? Diniho ny fiangonana tany Roma. Samihafa be ny olona tao. Tsy hoe Jiosy nampianarina hankatò ny Lalàn’i Mosesy hatramin’ny mbola kely fotsiny no tao, fa nisy hafa firenena koa. Hafa mihitsy ny fomba nanabeazana an-dry zareo. Azo inoana hoe andevo ny Kristianina sasany, fa ny hafa olona afaka. Ny sasany aza angamba nanana andevo mihitsy! Inona no nanampy an’ireny Kristianina ireny hifankatia kokoa, na dia tsy nitovy aza? Nampirisika an-dry zareo ny apostoly Paoly mba ‘handray tsara’ ny hafa. (Vakio ny Romanina 15:7.) Inona no tiany hotenenina? Ilay teny nadika hoe ‘mandray tsara’ eo, dia midika hoe tsara fanahy amin’ny hafa na mandray azy ao an-trano, na manaiky azy ho namana. Nilaza tamin’i Filemona, ohatra, i Paoly hoe ahoana no tokony handraisany an’i Onesimosy. Andevon’i Filemona mantsy izy io fa nitsoaka. Hoy i Paoly taminy: “Raiso tsara izy.” (Filem. 17) Nandray tsara an’i Apolosy koa i Prisila sy Akoila, ka nitondra azy “niaraka taminy.” (Asa. 18:26) Tsy dia nahafantatra ny Fivavahana Kristianina mantsy i Apolosy, raha noharina tamin’izy mivady. Na dia samihafa aza ireny Kristianina ireny, dia tsy navelan-dry zareo hampisaratsaraka azy izany, fa noraisin-dry zareo tsara ny hafa.

14. Ahoana no nampisehoan’i Anna sy ny vadiny hoe tia olona ry zareo?

¹⁴ Asehontsika koa hoe tia an’ireo rahalahy sy anabavintsika isika, rehefa mandray azy ireo ho namana. Matetika izy ireny no hamaly fitia antsika. (2 Kor. 6:11-13) Diniho izay nitranga tamin’i Anna sy ny vadiny. Voatendry ho misionera tany Afrika Andrefana ry zareo. Vao tonga kelikely tany anefa izy mivady, dia nanomboka ny valanaretina COVID-19. Tsy afaka nihaona mivantana tamin’ilay fiangonana àry izy roa. Dia ahoana no nampisehoan-dry zareo hoe tiany ny mpiara-manompo? Nampiasa vidéoconférence izy mivady mba hifandraisana tamin-dry zareo, sady nolazainy hoe efa tsy andriny ny hifankahalala bebe kokoa amin-dry zareo. Nanohina ny fon’ireo mpiara-manompo izany, ka matetika izy ireo no niantso azy mivady na nandefa SMS. Fa maninona i Anna sy ny vadiny no niezaka mafy hifankahalala tamin’ny iray fiangonana taminy? Hoy i Anna: “Be dia be no nampiseho hoe tia ahy sy ny fianakaviako na tamin’ny mora na tamin’ny sarotra. Tsy afaka ao am-poko sy ao an-tsaiko ireny, dia izany koa no mandrisika ahy hampiseho fitiavana amin’ny hafa.”

15. Inona no ianaranao avy amin’i Vanessa momba ny hoe tia ny mpiara-manompo rehetra? (Jereo koa ny sary.)

¹⁵ Tsy mitovy koa ny fomba nanabeazana ny rahalahy sy anabavy ao amin’ny fiangonantsika, sady samy manana ny toetrany ry zareo. Vao mainka anefa isika ho tia azy rehetra, raha mifantoka amin’ny toetra tsarany. Sarotra tamin’i Vanessa, anabavy manompo any Nouvelle-Zélande, ohatra, ny nifandray tamin’ny sasany tao amin’ny fiangonany. Nanapa-kevitra anefa izy hoe tsy hihatakataka amin’ireo olona nahasosotra azy, fa naleony niaraka bebe kokoa tamin-dry zareo. Nanampy azy hahita izany hoe inona no itiavan’i Jehovah azy ireny. Izao no nolazainy: “Rehefa lasa mpiandraikitra ny faritra ny vadiko, dia vao mainka izahay nifanerasera tamin’ny ranadahy sy rahavavy samy hafa toetra, dia mora kokoa tamiko ny nifandray tamin-dry zareo. Lasa tiako ilay hoe tsy mitovy isika rehetra. Azo antoka fa tian’i Jehovah koa izany, matoa izy nitaona olona samihafa hanatona azy.” Rehefa mianatra mahita ny hafa hoatran’ny fahitan’i Jehovah an-dry zareo isika, dia mampiseho hoe tia an-dry zareo.​—2 Kor. 8:24.

16. Nahoana no tena hilaina ny fitiavana mandritra ny fahoriana lehibe? (Jereo koa ny sary.)

¹⁶ Tena hilaina ny fitiavana mandritra ny fahoriana lehibe. Aiza isika no hahita fiarovana rehefa manomboka izy io? Diniho izay nasain’i Jehovah nataon’ny vahoakany rehefa nisy nanafika i Babylona. Hoy izy: “Mandehana miditra ao amin’ny efitranonareo anatiny, ry vahoakako, dia hidio ny varavarana. Miafena kely vetivety, mandra-pahalasan’ny fahatezerana.” (Isaia 26:20) Toa mahakasika antsika koa ireo teny ireo rehefa hiatrika ny fahoriana lehibe isika. Mety ho ny fiangonantsika no tiana holazaina amin’ilay hoe ‘efitrano anatiny’ eo. Harovan’i Jehovah isika mandritra ny fahoriana lehibe, araka ny efa nampanantenainy, raha miray saina amin’ny mpiara-manompo foana. Tsy maintsy miezaka mafy àry isika dieny izao mba ho tia an’ireny rahalahy sy anabavintsika ireny, fa tsy hoe hizaka ny toetra ratsiny fotsiny. Mety hiankina amin’izany no hahatafavoaka velona antsika!

MIOMÀNA DIENY IZAO

17. Hahavita hanao inona isika mandritra ny fahoriana lehibe raha miomana dieny izao?

¹⁷ Hitondra fahoriana ho an’ny olombelona “ny andro lehiben’i Jehovah.” (Zef. 1:14, 15) Hiatrika zava-tsarotra koa ny vahoakan’i Jehovah. Raha izao anefa isika dia efa miomana, dia hahavita ho tony foana sy hanampy ny hafa. Hiaritra an’izay olana rehetra mitranga isika. Rehefa mijaly ny mpiara-manompo amintsika, dia hanao izay fara herintsika isika mba hanampiana an-dry zareo, ka hangoraka azy sy hanome izay ilainy. Tsy hahafoy an’ireo rahalahy sy anabavintsika koa isika, satria efa lasa tiantsika kokoa ry zareo. Hamaly soa antsika i Jehovah amin’izay, ka hanome antsika fiainana mandrakizay. Tsy hotsaroana intsony amin’izay ny loza sy ny fahoriana rehetra.​—Isaia 65:17.