Nihavana Indray i Jakoba sy Esao

Niteny tamin’i Jakoba i Jehovah hoe hiaro azy, hoatran’ny nataony tamin’i Abrahama sy Isaka. Tany Harana i Jakoba no nipetraka. Nanambady izy tany, ary nanan-janaka be dia be sady lasa nanan-karena.

Hoy i Jehovah tamin’i Jakoba, tatỳ aoriana: ‘Mandehana miverina any amin’ny taninao.’ Lasa àry izy dia nentiny ny fianakaviany. Nandeha lavitra be ry zareo. Teny an-dalana dia niteny tamin’i Jakoba ny mpiasany hoe: ‘Tamy any i Esao zokinao, ary mitondra lehilahy 400 izy.’ Natahotra be i Jakoba sao dia hovonoin’i Esao izy sy ny vady aman-janany. Nivavaka tamin’i Jehovah àry izy hoe: ‘Mba vonjeo re aho e!’ Nandefasan’i Jakoba ondry, osy, omby, rameva, ary ampondra be dia be i Esao ny ampitson’iny.

Nahita anjely i Jakoba ny alin’iny, ary irery izy tamin’izay. Nifampitolona izy sy ilay anjely mandra-paharainan’ny andro. Tsy niala mihitsy i Jakoba na dia efa voa mafy aza. Hoy ilay anjely taminy: ‘Avelao aho handeha.’ Te hahazo antoka anefa i Jakoba hoe hanampy azy i Jehovah, dia hoy izy: ‘Tsy avelako mandeha ianao raha tsy mitso-drano an’ahy.’

Nitso-drano an’i Jakoba ilay anjely tamin’ny farany. Lasa fantatr’i Jakoba àry hoe tsy avelan’i Jehovah hamono azy i Esao.

Tazan’i Jakoba teny lavitra teny i Esao sy ireo lehilahy 400 niaraka taminy, tamin’iny maraina iny. Nandeha teo alohan’ny fianakaviany i Jakoba, ary nandohalika impito teo anatrehan’i Esao. Dia iny i Esao fa nihazakazaka namihina an’i Jakoba. Samy nitomany izy roa lahy ary nihavana indray. Faly be mihitsy izao i Jehovah nahita ny zavatra nataon’i Jakoba!

Nandeha nody i Esao avy eo, fa i Jakoba kosa nanohy ny diany. Nanan-janakalahy 12 i Jakoba, dia i Robena, Simeona, Levy, Joda, Dana, Naftaly, Gada, Asera, Isakara, Zebolona, Josefa, ary Benjamina. I Josefa no nampiasain’i Jehovah mba hamonjena ny vahoakany. Andao ange hojerentsika e!