Ahoana no Azo Ampiasana ny Taratasy Mivalona mba Hanombohan-dresaka?

Nanomboka tamin’ny Janoary 2018, dia lasa nisy an’ilay hoe “Hevitra Azo Resahina” eo amin’ny pejy voalohany amin’ny Tari-dalana ho An’ny Fivoriana. Ny hiresaka amin’ny olona no asaina ifantohantsika amin’izao, fa tsy ny hanolotra boky na gazety fotsiny. Manampy antsika hanao an’izany ny video fitoriana, satria Baiboly fotsiny no ampiasain’ny mpitory ao amin’izy ireny. Midika ve izany hoe tsy tokony hametraka na inona na inona mihitsy isika rehefa mitory isan-trano? Tsy izany mihitsy! Azo ampiasaina tsara, ohatra, ny taratasy mivalona mba hanombohan-dresaka. Ity misy modely azo arahina:

1. Apetraho ilay fanontaniana eo amin’ny fonony ary asaivo misafidy amin’ireo valiny ilay olona.

2. Asehoy azy ny valiny omen’ny Baiboly eo amin’ny pejy 2, eo ambony. Raha ampy ny fotoana dia vakio sy iaraho midinika ny fanazavana sasany eo amin’ny pejy 2 sy 3.

3. Omeo an’ilay olona ilay taratasy mivalona, ary ampirisiho izy hamaky ny fanazavana hafa ao amin’ilay izy rehefa manam-potoana.

4. Amin’ny farany, dia asehoy azy ilay “Fanontaniana Hosaintsainina”, ary anontanio izy hoe rahoviana ianareo no afaka mandinika ny valiny omen’ny Baiboly.

Rehefa miverina mitsidika ianao, dia iaraho midinika ny valin’ilay fanontaniana. Mametraha indray fanontaniana hovaliana amin’ny manaraka. Afaka mifidy fanontaniana avy ao amin’ny jw.org ianao, na avy ao amin’ilay bokikely aseho eo amin’ny pejy farany amin’ilay taratasy mivalona. Manolora bokikely Vaovao Tsara na boky hafa anisan’ny Fitaovana Fampianarana, rehefa hitanao hoe mety izany.