Desemberi

ǁKhā ǀgaub ǃnâ da ga sada ra ǃhoa xūna ǃoa kō tama io, o da ge ǃgomsina a ǃaroma ǁkhā. Aiǁgause sada sîsenni mā-amhe tama hâ ǃhūb ǃnâ ra hâ ǃgâsa-i ǀkha da ga ǀhao o, o da ǁîna nî dî matib sîsenna ǁnā ǀkhab ai ra aiǃgû ǃkhaisa? ǂAn da ge a sada ǂâibasens a ǃgâi ǃkhaisa. Sada ǃgâsana da ge a ǀnam tsî xūn mati ra sîsensa ra ǂanǂgao. ǀGore da ga ǁaeb ai da ge ǁnā xūn tsîna ra ǀgoreba ǂgao. Xawe nēb ge ǁaeb sada kaise ǃhoa tideba. ǂGanǃgâsib ǃnâ nî hâse i ǂhôana ūhâ ǃgâsana da ga ǂgui dîna dî o, o da ge ǀnamma ǁgau tama hâ. Nēsa da ge nē ǃgâsa-i ǃoa-ai ǀgui dī tama hâ xawe nē ǃgâsa-e ǂgomǃgâ hâ ǃgâsan ǃoa-ais tsîna. Hoa da ge sada ǃgâsan hîna sada sîsenni mā-amhe tama hâ ǃhūgu ǃnâra hān mâsiga tsūtsū ǂgao tama hâ. ǁKhā ǀgaub ǃnân ge ǃgâsan hîna nē mâsiba ūhâ ǃhūgu ǃnâ ra hâna sada sîsenni nē ǃhūb ǃnâ ra dīhe ǀgaub xa khoena mîba mâ tide. w20.03 21 ¶11-12

Elob ǂâibasen tamas ge în khoena ǁō. Xawe ǀamosib kōse ûis ǃgao ra ge Adammi tsî Evas tsîra supu mîmāsa nî ǁnâuǀnams ge ge i: “Xawe ǁnā hais ǃgâib tsî ǂkhabab tsîkha ǂans dis xats ge ǂû tide; ǁîs xats ga ǂû tsēs hoas aits nî ǁō xui-ao.” (Gen. 2:16, 17) Tsîb ge ǁGâuaba ǃgomsina ge ǃaroma. ǀAob ǃnâ-ūb ge ǁîba Evasa ǃoa nētsēs xoas ǃnâ hâ mîde ge mî. ǁÎs ge nē ǂhumiba ge ǂgom tsî ge ǂû. Egab ge ǁîs aob tsîna ge ǂû. (Gen. 3:6) Nēs ǃnâ-ūb ge ǁoreb tsî ǁōb tsîna ge tsoatsoa. (Rom. 5:12) Adammi tsî Evas tsîn ge ge ǁō, Elob ge mîs ǁkhās khami. Xawe ǁGâuab ge ǁōb xa ge ǂhumi ǀû tama hâ i. Egab ge ǀnî hâ ǂhumin tsîna ge mî tsoatsoa. ǁNā ǂhumin di ǀgui i ge khoe-i soros ge ra ǁō xawe khoe-i ǃâ-i ge ǀnî hâba ǁkhawa ra ûi ǃkharu. Nē ǂâi ǀgaub ge ǂgui khoena ra gaxaǃnâ sida tsēdi ǃnâs tsîna.—1Tim. 4:1. w19.04 14-15 ¶3-4

ǀGôan ge ǁîn ǁnâuǃāb ǃnâ noxoba kai tama hâ tsî tsū xū-e mû tsî a ǁkhaubasen ǁoa. ǁNās ǀkha i ge kaise a supu khoe-e ǁîna ǂgaeǂhapu tsî tsûtsûsa. Tsûtsû-aon ge ǀgôana ra ǂhumiba tsî ra mîba în tā khoe-e mîba, khoe-i ǁî-e ǃgâ tide amaga tsî kai hâ khoe-i tsî ǀgôa-i tsîna ǁgoe-ūgus a ǃgâi di ra mî nēs ǀnamma ra ǁgau amaga. Nē ǂhumib ge ǀgôa-i ǂâi ǀgaub tsî amaba ǂgoms tsîna ǂgui kuriga a tsâǀkhā ǁkhā. ǁNā ǀgôa-i ge ǁî-i ûib ǂâibasensa ūhâ tama hâ khami ra tsâ tsî ǀnam-e tsî i ǁkhaeǂgaohe ǁoa khamis tsîna. Buru kai da tama i ge hâ ǀgaiǃkhō-ao-i hâhâ ra tsûba a ǃaroma ǁkhā ǃkhaisa. Nēs ge ra ǁgau ǀuni tsēdi ǃnâ da ûi hâsa, nē tsēdi ǃnân ge khoena nî “ǀnamoǃnâ” tsî “ǂkhaba khoen tsî ǂgaeǂhapu-aon ge ǃaruǀîǀgui nî tsū.”—2Tim. 3:1-5, 13. w19.05 15 ¶7-8

Jesuba mâ ǀgaugu ǃnâ gere ǁkhāǁkhā? ǂGuroseb ge khoena ǁîb gere mî xūna xu gere ǁkhāǁkhā. ǁÎb mîdi ge ǀgaiba ge ūhâ i, amaba i ǁîb ǁGûb xa gere ǁkhāǁkhā amaga tsî ama ǂâibasensa ûib xa tsî Elob Gaosib khoen hoan di ǃgomsiga nî ūbēsa. (Luk. 24:19) ǁÎb aiǁgaus ǀkhas tsînab ge gere ǁkhāǁkhā. ǁÎb gere ûi ǀgaub ǃnâ-ūb ge ǁîb saosabena gere ǁgau matin nî ûisa. (Jhn. 13:15) Mâ ǁaeb aib ge Jesuba gere ǁkhāǁkhā? Nēsab ge ǃhūbaib aib ge hâ i ǁaeb ai ge dī. (Mat. 4:23) ǁŌba xub ge khâis khaoǃgâs tsînab ge nēsa gere dī. Aiǁgauseb ge 500 ǁkhāǁkhāsaben ais ai ge ǂkhai tsîb ge ǁîna ge mîba în “ǁkhāǁkhāsabedī.” (Mat. 28:19, 20; 1Kor. 15:6) ǀHaohâb danab aseb ge Jesuba ǁîb ǁkhāǁkhāsabena noxoba gere ǁkhāǁkhā ǀhomma ǃoab ge oa o. Aiǁgause, 96ǁî kurib ǃnâb ge Xristuba ǁîb aposteli Johaneba ge mîba îb ǂkhauhesa Xristeǁîna ǂkhâǃnâ tsî daoǁgau.—Kol. 1:18; J.ǂHa. 1:1. w19.05 3 ¶4-5

Nētsēn ge khoena kaise ǃgarise nî sîsenni în ǂâusa mari-e ūhâ, în ûi ǁkhā. ǂGui ǃgâsan ge ǃnāsa ǁaeba ra sîsen în ǁîn omaridi ǂhâsiga kōǃgâ ǁkhā. ǂGuin ge ǁîn sîsen ǃkhaisa ǃoa mâ ǁgoas hoasa ī tsî ǁkhawa ra oaǀkhī. Tsî ǀnîn ge ǁîn ǃomdi ǀkha ǃgarise ra sîsen mari-e hōs ǃgao. Tsēs ǀams ain ge nē ǃgâsana kaise tsau hâ. Tsî ǁnās ǀkha ǁkhāǁkhāsens ǁkhāsiba ūhâ tama hâ. Xawe da ge hoada ǁaeba nî ǁamaǂui Elobmîs tsî sada ǂkhanin hîna Elobmîs ai a ǃgaoǃgaosan tsîna amabes ǃnâ ôaǃnâs ǃgao. Nēs ge kaise a ǂhâǂhâsa ǀgaisa ǀhōsagusisa da ga Jehovab ǀkha ūhâ ǂgao tsî ǀamose ûi ǂgao o. (1Tim. 4:15) ǀNîn ge ǁgoaga khâimân ra ǁaeb ai ra ǁkhāǁkhāsen, ǁnā ǁaeb ain ǃgâise ra ǂâi amaga. Tsî ǀnîn ge ǃuia ǁom hân nî aiǃâ Elobmîsa ôaǃnâ tsî ra ǂâiǃgâ. w19.05 26 ¶1-2

Nē ǀkharaǀkharan ge tsēs ǃnâ a dīhe ǁoa. Nēsa dīhōs ǃgao da ge “ôasasib hoab” ǃnâ kurina nî sîsen. (2Pet. 1:5) Xawe da ge ǀgaisase nî sîsen nēsa īǁkhā kais ǃaroma. ǀGores ge a ǂguro ǂhâǂhâsa ǃâ. Psalmdi xoa-aob khami da ge nî ǀgore: “ǃAnu ǂgaoba kuruba te re, ti Elotse, î ǁaposa gagasa ti ǃnāb ǃnâ ǀasa kaiba te re.” (Psa. 51:10) Sada ǂganagab khoesib ǀkharaǀkharasa ǂhâ hâsa mûǂan tsî da ge Jehovaba nî ǂgan îb huida. ǂÂiǃgâs ge a ǀgamǁî ǂhâǂhâsa xū. Elobmîsa da ga ǂōrisase tsēs hoasa khomai o, o da ge nēs xa nî ǂâiǃgâ tamas ka io khomai da ra xūna nî ôaǃnâ ǀkharaǀkhara da nî xūna mûs ǃaroma. (Psa. 119:59; Heb. 4:12; Jak. 1:25) Khoen di ǂâiǀgaugu xa a tsâǀkhāhe ǁkhā xūna da ge nî ôaǃnâ. Tsî da ge nî ǂanǃgâ ǂkhabusasiga da ūhâsa tsî nēsa nî sîsenǂam. w19.06 8 ¶1; 10 ¶10; 12 ¶11-12

Sadu mîǁguiba du nî dīǀoaǀoa ǁaeba ǁhûi re tsî tā nē ǁaeba ǀkharaǀkhara re. Tā ǃgâi mâsigu nē mîǁguiga du nî dīǀoaǀoaga ôa re; nē ǃgâi mâsiga du ǀnîsi ūhâ tide i ge. (Aoǁn. 11:4) ǂAnbasen re i du tā sadu di ǁaeba ǂhâǂhâsa tama xūn ai sîsen-ū hîna du sadu ǂhâǂhâsa mîǁguigu amsi ǂhâ hâna. (Fil. 1:10) ǁAeba ǁhûi re hînan khoena ǂhani du tideba dī du ra xūn ǃnâ. Khoena ǂanǂan re în tā ǂhani du î du nē xūn ai ǃgaoǃgâ. Sadu ǁâǁawaba ǀari re tsî sadu e-maildi tamas ka io internetsa toa du ga o ǀgui kō re. Sadu mîǁguigu ǀamǂoas ge ǃkhai-e ǃoa du ga ǃnari o du ra hō ǀamǂoas khami ī. ǁNā ǃkhai-i tawa du ga amabes ǃnâ sī ǂgao o, o du ge daob ga ǂganamsa xawe ǀnî hâ daoba nî ôa i du ǁnā ǃkhaib tawa sī ǁkhā. ǁKhā ǀgaub ǃnâ da ge sada mîǁguigu ǀamǂoasa ǃoa da ga mûǂui o, ǃgomsina da ga hōǃâ xawe nî mâǀgai.—Gal. 6:9. w19.11 30 ¶17-18

Mâ ǃaromas amsi du nî ǁāǁnâhe? Sadu ôaǃnâs hîna du Elobmîs ǃnâ ra dīsa xu du ge Jehovab ǀgaugu xa ra ǁkhāǁkhāsen. Tsî nē xūn hîna du ra ǁkhāǁkhāsen an ge ra ǃaroma i du ǀnamma omkhâiba bi. ǀNammi hîna du Jehovaba ūba hâb ge ra ǂkhâǃnâ du i du ǁāǁnâ kaisen. Sadu ǃaromas hîna du ra ǁāǁnâ kaisens ge Elobmîsa xu du ra hō amab ais tsîna a ǃgaoǃgaosa. ǂÂi re Jesub ge tae-e mîsa mîmās ǁkhāǁkhāsabedīs disab ge mā o. (Mat. 28:19, 20) Jesub ge mî mîdi ǃoagun ge ǁnān hîna ra ǁāǁnâhena “ǁGûb, ǀGôab, tsî ǃanu gagab ǀons ǃnâ” nî ǁāǁnâhe. Nēsa tae-e ra ǂâibasen? Sadu ǂgaob hoab ǀkha du ge Elobmîs amab hîna Jehovab; ǁîb ǀGôab tsî ǃanu gagab xa hâb ǃnâ nî ǂgom. Nē amab ge kaise a ǂhâǂhâsa tsî sadu ǂgaoba a tsâǀkhā ǁkhā. w20.03 9 ¶8-9

Jehovab ge ǀhomǃgāga ge sî Lota ǃkhâikhoms ǃgao ǀguis ose xawe hui bi sa îb tā Sodoms hîkākās ǃnâ ǃâ. (Gen. 19:12-14, 17) ǁKhā ǀgaub ǃnâ da ge sada ǃgâsana nî ǃkhâikhom ǁîna nî tsûtsû xū-en ga dī o. Elobmîsa xun ra hō daoǁgausa ûiǂuis ǃnân ga ǂau xawe da ge nî ǃnūǃnâxa. ǀHomǃgāga da ge ra ǁgae ǂgao. Sada ǃgâsana ǀûǀkhā tamas ka io ǁîna xu ǂgae-oasens xa da ge ǀgauna nî ôa hîna da a hui nî ǁkhā na. (1Jhn. 3:18) ǃOmi ai ǃkhō nîsa da ge a ǂgan ǁkhā gagasi ǀgaub ǃnâ tsî a hui nî ǁkhā ǃgâi daoǁgaude ūǃoa tsî sîsenǂuis ǃnâ. Jehovab ge Loti di ǃgâi tama ǀgauga ǃoa ge kō ǁkhā i. Xaweb ge apostel Petruba Loti xa ǂhauǃnâ khoeb ase ge xoa kai. (Psa. 130:3) Jehovab ge Lota gere mû ǀgauba da a ǁgae ǁkhā? Sada ǃgâsan di ǃgâi dīgu ai da ga ǂâisa ǂnûi o, o da ge ǁîn ǀkha nî ǃnūǃnâxa. Nēs ge nî supu kaiba nî ǁîna daoǁgaude ūǃoasa. w19.06 21 ¶6-7

Sada ǃhūb ǂhanub ga sada sîsenna a mâǃoa o, o da ge ǀnîse ǀnî ǃhūba ǃoa a doe ǂgao ǁkhā î da Jehovaba ǁnāba sî ǃnōrasase ǃoaba. Nē mîmâisa i ge mâ khoe-i hoa-e nî dī ǀnî ǃgâsa i ge nēsa a dība da ǁoa. Nēsan nî dīs aiǃân ge ǀnîna ôaǃnâsa a dī ǁkhā ǂguroǁaeb Xristeǁîn nē ǃnôa ǁhōgu ǃnâ mâ mîmâina ge a dīsa. ǁKhāǁkhāsabegu hîna ge Jerusalems ǃnâ hâ î ga Judeab tsî Samariab ǃnâ gere sarimâ, Fenisiab, Siprus tsî Antioxias kōse. (Mat. 10:23; ǃNǃkh. 8:1; 11:19) ǀNîn ge ge mûǂan ǂguro ǁaeb Xristeǁîn ge mâǃoahe tsoatsoa o, ob ge apostel Pauluba a mîǁguisa aoǁnâ sîsenni ra mâǃoahe ǃādi ǃnâ hâsa. (ǃNǃkh. 14:19-23) Tae-e da nēsa xu ra ǁkhāǁkhāsen? Mâ omaris danab hoab ge mîǁguiga nî dī does tawa i ga hā o. Mîǁguigab nî dīs aiǃâb ge aibe ǀgore tsî ǂōrisase ǁîb omaris mâsiga nî ǃgaoǃgâ tsî does mâ ǀamǂoasa ǁîb omaris ai nî ūhâs tsîna nî ôaǃnâ. Nau ǃgâsan di mîǁguiga da ge tā nî ǀgoraǃgâ. w19.07 10 ¶8-9

Jesub ge ge mî, “î go hoa ǁaede ǁkhāǁkhāsabedī.” (Mat. 28:19) Tsî da khoe-e Jesub tae-e ǁî-e xu ra ǃâubasens xa nî ǁkhāǁkhās aiǃâ da ge ra hui i ǂgao î-i ǁkhāǁkhāsen mati i ama Xristeǁî-i ase nî tanisensa. Elobmîs ǃnân ra ǁkhāǁkhāsen xūnan ra ûiǂui hîna da ge ǃnūǃnâxasib ǀkha ra hui nî ǂgao. ǀNîn ge ǃhaese ǀkharaǀkharana a dī ǁkhā. ǀNîn ge gaxu ǁaeba ra ū. Sîsabeb hîna Perub ǃnâ ge hâ îb ge ǃnūǃnâxasib di ǀkhaega ge hōǃâ. “ǀGam Elobmîs ai ǃgaoǃgaosa ǂkhanira ta ge Raúl di ǀon hâ khoeba gere ǁkhāǁkhā,” tib ge sîsabeba ra mî. “Xaweb ge ǁîba noxoba ǂgui ǃgomsina ge ūhâ i. ǁÎb ge ǃgomsina ǃgameb ǃnâ ge ūhâ i tsî ǁgai gowaba gere sîsen-ū tsî ǃgôasiba ǁîb ǀgôan xa ge ǁgauhe tama hâ i. Xaweb ge ǀhaode ǃoa gere hā tsî ta ge nēs ǃaroma hoaǁae ǁîba ǃoa gere oa î ta ǁîb tsî ǁîb omaris tsîna hui. ǃNona kurin ǃkharu hâse ta ge ge ǀhao-ūbi tsîb ge ǁae-e ǃkharu hâse ge ǁāǁnâhe.” w19.07 15 ¶3; 19 ¶15-17

Paulub gere dī xūn hoan xa ǂâi re Filipeǁîna ǃoab ge sîǂkhanisa a xoa o. ǁÎb ge Romes ǃnâ ǃkhōsis ǃnâ ge ūhe hâ i tsî ǁnās ǀkha ǃnorasase ge aoǁnâ ǁoa i. ǁÎb ge sari bi ra khoena gere aoǁnâba tsî sîǂkhanide ǀhaohâga ǃoa gere xoa. Paulub ge ge ǂan i Xristub khamib ǀams kōse nî mâǀgaibesa. Nēs ǃaromab ge Xristeǁî ûiba ǃkhoeǀhûgus ǀkha ge ǀgopeǀnō. (1Kor. 9:24-27) ǃKhoe-aob ge ǃkhoeǀhûgus ǃnâ ǁîb ǂâisa ǂnûi tsî mā-am tama hâ în ǀnî hâ xūna ǁîb ǂâisa ǂgaeǁnâ. Aiǁgause, ǃkhoe-aon hîna dorpi ǃnâ ǃkhoeǀhûgusa ūhân ge ǂgui xūn hîna ǁîn ǂâisa a ǂgaeǁnâ ǁkhāna ūhâ, ǁamaxū ǃkhaigu tsî ǀnî hâ ǂgui xūn tsîna. ǂÂi ǁkhāts a ǃkhoe-ao i hîna ǃkhoe ǀû tsî nē xūna ǃoa ra kō tsoatsoa i xa? ǁÎ-i ge nēsa dī tide ǁî-i ga dan ǂgao o. Ûib di ǃkhoeǀhûgus ǃnâs tsîna da ge sada ǂâisa ra ǂgaeǁnâ xūna xu ra ǂgōsen ǂgao. Sada ǂâisa da ga ǃkhōǃoa da nî ǀkhaegu ai ǂnûi o, o da ge Paulub khami ǀams kōse a mâǀgaibe ǁkhā. w19.08 3 ¶4; 4 ¶7

Jehovaba ǁnâuǀnam tsî da ga sada di ǂgoms tsî ûib ǃnâ ǀkharaǀkharana dī tsoatsoa o, on ge sada ǀaokhoena nēsa ūǃoas xa a ǃgombahe ǁkhā. ǂGuro ǀkharaǀkharan hînan da mûǂan i ge ǁîn ǀkha da kai tsēde tsēdī tama tsî ǂgīǂgōsi xūn ǃnâs tsîna ǃâ tama hâ ǃkhaisa. Tsoatsoas ǃnân ge ǀnî ǀaokhoen sada dina sada ǀkha a ǁaixa ǁkhā. (Mat. 10:35, 36) Xawe da ge tā nî ǂâi ǁîn ǀkharaǀkharasen tide di. Tā da ge ǁîna hui ǀû tsî ǀamo ûiba hō tide khoen ase nî ǀgoraǃgâ nî. Jehovab ge sada ǀgorasǃgâs sîsena mā tama hâ xawe ǁnāsa Jesuba ge mā. (Jhn. 5:22) ǃNūǃnâxasiba da ga ūhâ o, on ge sada ǀaokhoena ega ǃgâiǂhôasa a ǃgâ ǁkhā. Sada ǂgoms ǃnâ da ra mâ ǀkhara ǂgao xawe da ge ǃgôasib tsîna ra ǁgau ǂgao ǃgomsina da ga hōǃâ xawe. (1Kor. 4:12) ǁAeba i ge nî ū sada ǀaokhoena mûǂansa sada ti mîǁguib Jehovaba ǃoabas dib khoe-i xa ǀkharaǀkharahe tide ǃkhaisa. w19.08 17 ¶10, 13; 18 ¶14

“ǃKharu ǃnâ ta ge ǃgomsigu xa ta ga ǂâi o, o ta ge a ǂan nēsa ta ga ǀguri dīhō tama hâsa.” Sadu tsîna ǀnîsi nēti gere tsâ? ǂGui da â da ge nēti ī tsâ ǀgauba ge ūhâ i. ǀNîsi du ge nēsa ǀaesen du ge hâ ios tamas ka io du ge ǀnamsabe-e ǁōb ǃnâ a ǂoaǃnâ o, o ge mî. Nēs xa du ga ǂâi o, o du ge ra mûǂan nēs ge Jehovab di ǃanu gagab hîna “ǃnāǂamsasib ǀgaib” dib xa ǀoa hâb xa a īǁkhā kai-e ǃkhaisa. (2Kor. 4:7-9) ǃAnu gagab tsîna da ge ǂhâ hâ nē ǃhūbaib di ǃâitsâga xu ǂgōsens ǃaroma. (1Jhn. 5:19) ǁNās ǂam-ai da ge “ǂkhaba gagagu” ǃoagus tsîna nî ǃkham. (Efe. 6:12) Jehovab ǃanu gagab ge ǀgaiba ra mā da i da sida ǁgaumâide ǃgomsina da ga hōǃâ xawe dī. Apostel Paulub ge ǃgomsinab gere hōǃâ xawe noxoba gere aiǃgû sîsens ǀkha “Xristub di ǀgaib” aib gere ǂgomaiǂnûi amaga.—2Kor. 12:9. w19.11 8 ¶1-3

Elobmîs ge amaba ǃkhōǂgā hâ hînab Jesuba gere dī xūna ra ǁguiǃāba. Jesuba ǀnamsa ǁkhāǁkhāsen re ob ge Jehovaba du ūba hâ ǀnamma nî kai. Tae-i ǃaromasa nēsa? Jesub ǁîb ǁGûb di ǀgauga ra ǁgauǂûi amaga. Nēs ǃaroma du ga Jesub xa ǃnāsase ǁkhāǁkhāsen o, o du ge Jehovaba ǁnâuǃā tsî nî ǃgôaǃgâ. Jesub ge ǀgâsan, ǀaesen hân tsî ǃgôaǁnâhe gere khoena ǁgau tsâbaǁhaoxasib xa ǂâi re. Tsî hui ra daoǁgaudi hînab sada ra mādi sada ûiga ǃgâiǃgâis ǃaroma di xas tsîna ǂâi re. (Mat. 5:1-11; 7:24-27) Jesuba da ūba hâ ǀnammi ge nî kai, ǁîb ge sada ǁorena ǀûbahes ǃaroma a dība, da xū-i xa da ga ǂâiǃgâ o. (Mat. 20:28) Jesub ge māsenxase a ǁōba da ǃkhaisa da ga ǁnâuǃā o, o da ge sada ǁorena xu ǃhobasen tsî ǀûbaba Jehovab dawa a ǂgan ǁkhā. (ǃNǃkh. 3:19, 20; 1Jhn. 1:9) Jesub tsî Jehovab tsîkha du ǀnamma ra omkhâiba khami du ge ǁîkha a ǀnam khoen ǀkha ǀgui nî hâ ǂgao. w20.03 5-6 ¶10-12

Aiǁgauseb, ge Xristeǁî ǃgâsaba a ǂâi tsoatsoa ǁkhā ǁîb ǀguib ǀnî hâ xūna ǀhaohâb ǃnâ a dī ǁkhā di. Tamas ka ios ge Xristeǁî ǃgâsasa a ǂâi tsoatsoa ǁkhā ǁîs kaikhoeb ǀguib ǁnā xūna ǃgâise a dī ǁkhā di. Xawe da ga ǃgamǃgamsenxasiba ūhâ o, o da ge nē ǃnôa xūn xa ǂâis tsîna hî tide. Moseb ge nau khoen ge aiǂhanuga a māhe o, o tanisen ǀgauba xu da ge a ǁkhāǁkhāsen ǁkhā. Moseb ge ǁîb aiǂhanub Israelǁaesa ǂgaeǂguis tiba kaise gere ǃgôaǃgâ. Xaweb ge Jehovaba ǀnîhâ aiǂhanugu Moseb diga nau khoena a mā o, ob ge mati tanisen? ǁÎb ge ge surixa tama hâ i. (Num. 11:24-29) ǁÎb ge ge ǃgamǃgamsenxa i tsî nau khoena ge mā-am îb nē ǁaesa ǂgaeǂguis ǀkha hui-e. (Eks. 18:13-24) Nēs ge ǃgâi sîsenǂuiba Israelǁaes ai ge ūhâ i hînab ge ǂgaeǂgui kaihesa. Nēs ge ra ǁgau Moseb ge nau khoena gere hui ǂgaosa tsî ǂgui aiǂhanuga ge ǂhâba tama hâ isa nau khoen di ǃgâib xab gere ǂâi amaga. Nēs ge a ǃgâi aiǁgau sada ǃaroma. Jehovab xa da ga sîsen-ūhe ǂgao o, o da ge tā sada di ǁkhāsigu ai nî kō xawe ǃgamǃgamsenxasiba nî ūhâ. w19.09 5-6 ¶13-14

ǀŪ da ge a ǃhaodi mâ ǃaromasa nî māsa Babilons kaisan tae-i ǃaroma ra ǁnāǂamsa. ǁÎn ge ǀnîsi nî mî ama tama ǂgomdi ge ra ǃaroma i-i ǃhaode tā ǂkhîba ūhâ tsî hoaǁae ǂgīǂgōsi xūn ǃnâ ǃâ-e ra ūhâ di. Tamas ka ion ge ǀnîsi nî mî ama tama ǂgomdi ge ǃkhūsib tsî xūn tsîna ra ǀhaoǀhaobasen di. (J.ǂHa. 18:3, 7) ǃHaodi ga ama tama ǂgomde ǁnāǂam o, o i ge ama tama ǂgomdi ǁanin hoana hîgāgāhe tide. Xawe ǃhaodi ge ama tama ǂgomdi ǀapeǂhumidi hoade nî hîgāgā. Nē ǀapeǂhumidi ga hîgāgāhe o, on ge nē ǀapeǂhomidi ǁani ge i khoena nî mî nē ǀapeǂhumidi ge mîmâin ge hâ i xūna ge dī tama hâ i di tsî ǁîn ǀkha dī xū-e ūhâ ǂgao tide. Babilons kaisa nî hîgāgāhesa xawe da ge a ǂan nēs ǀgūǁae nî īsa. (J.ǂHa. 18:10, 21) Jehovab ge ge mîmâi kai ǁgâiǀāb ‘tsēdeb ge nî ǃnubuǃnubu di’ i-i ǁîb ǃkhōǂûibasenhe hâ khoen tsî ama ǂgoms tsîna sâuhe.—Mrk. 13:19, 20. w19.10 15 ¶4-5

ǀNî ǁgûdi ge ǃhaese ǁaixa tsî ǃgâi tama ǀgaub ǃnâ ǁîn ǀgôan ǀkha gere ǃhoa ǁgûn xa ge kaikaihe. Nēs ǃaroma du ge a ǂâi ǁkhā nēb ge a ǂhanu ǀgau ti ǀgôana kaikais diba di. ǀGôan ǀkha du nî hâ ǀgauba du ge Jehovaba xu a ǁkhāǁkhāsen xawe i ge ǁaen ai a ǃgom ǁkhā, ǃnomsa tsî ǃnūǃnâxasiba ūhâsa ǃgōsase ǀgôan ga ǃhoa du ra xūna ǃgâ ǂgao tama i o. (Efe. 4:31) Nēti i mâsigu ǃnâ du ga hâ o, o du ge Jehovab ai ǀgores ǃnâ-ū nî ǃgâsen. (Psa. 37:5) ǀNî hâ ǁgûdi ge a ǃgombahe ǁîdi ǀgôana ǀnamma ǁgausa.ǁÎdi ge ǀnîsi omaridi hînan ǁgûna ǃgâi ǀhōsagusisa ǀgôan ǀkha ūhâ tama hâdi ǃnâ ge kai. Sadu tsîn ga nēti kaikaihe o, tā sadu ǁgûn ge dī dīsāde sao re. ǁGûs hîna Jehovaba ǃnaga ra hâbas ge nî ǁkhāǁkhāsen mati ǀnamma ǁîs ǀgôana ǁgausa. Kaise i ge ǁîsa a ǃgomba ǀkharaǀkharana dīsa. Xawe nē ǀkharaǀkharan ge a dīhe ǁkhā tsî ǁîs tsî ǁîs omaris tsîna ǂkhîba a hauba ǁkhā. w19.09 18-19 ¶19-20

Khoe-i hîna Jehovaba ra ǃoaba xawe nau ǀkhāb ai nē ǃhūbaib di ǃkhūsisa ra ôa i ge ǀgam ǀhonkhoekha ra ǃoaba. ǁÎ-i ge Jehovaba hoase ǃoaba tama hâ. ǃKharu ge ǁaeb ǃnâ i ge Laodiseaǁî ǀhaohâb di ǁanina gere koasen mî rase: “ǃKhū ta hâ tsî xūxa ta a, o ta kom xū-i xare-e ǂhâba tamao.” Xawe Jehovab tsî Jesub tsîkha di mûǁaen ge ge ‘ǁkhoa tama tsî ǀkhomǀkhomsa tsî ǀgâsa tsî ǂgī tsî ǀōǀkhā-i.’ Jesub ge ǃkhūn hâ ǃkhais ǃgao ge ǁnama nî tama hâ i xawe ǁîn di ǀnammi mari-en ūba hâb ge Jehovab ǀkhan ūhâ ǀhōsagusisa gere tsâǀkhā. (J.ǂHa. 3:14-17) Mû da ga ra o mari-e da ge ra ǀnam tsoatsoa di, o da ge ǃhaese xū-e nēs xa nî dī. (1Tim. 6:7, 8) Xū-e da ga dī tama ga ra io, o da ge ǀnîhâ xūn tsîna nî ǀnam tsoatsoa tsîb ge Jehovaba sida ǃoabasa ūǃoa tide. ǁÎb ge a ‘tauxa Elo.’—Deu. 4:24. w19.10 27 ¶5-6

Grikegowab mîs hîna “doeǁgarihe” di hâs ge ‘tanisaohe tamas ka io ǂkhâǃnâhe’ di ra ǂâibasen. ǁKhā Grikegowab mîs ge Lukab hîna ge ǃNaeǃkhaidi ǂkhanisa a xoab xa ge sîsen-ūhe ǂgaub hîna ǂoab xa ra ‘ǁgari-eb’ xab ge xoa o. (ǃNǃkh. 27:15) ǀGui Elobmîs ôaǃnâ-aob ge ra mî Petrub ge Elobmîs xoa-aogu ge ǃanu gagab xa ‘doeǁgarihe’ hâ di a xoa o, ob ge khoena ǂgau ǃnaris xa nî ǂâi kai mîsa ge sîsen-ū. Petrub ge gere ǂâibasen ǂoab ǂgauba īb nî ǀkhāba ǃoa ra ǂhā ǁkhās khami i ge ǃanu gagaba Elobmîs xoa-aoga gere ǁgari îgu ǁîgu sîsen-e dīǀoaǀoa ǁkhā. ǁKhā Elobmîs ôaǃnâ-aob ge ge mî: “Elobmîs xoa-aogu ge ǃanu gagab gere daoǁgaugu sîsen-e gere dī.” Jehovab ge dī ǁkhāb ge i xūn hoana ge dī. ǁÎb ge ‘ǂoab’ tamas ka io ǃanu gagaba ge mā. Elobmîs xoa-aogu ge mā-e gu ge hâ i sîsen-e ge dī. ǁÎgu ge ǃanu gagab ǀkha ǀguiba gere sîsen. ǂOab ge ǂgauba a hui ǁkhā îb īb ra ǃkhaisa ǃoa sī hurib ga ǀgaisa ǃgabiga ga ra ūhâ xawe ǁkhā ǀgaub ǃnâb ge ǃanu gagaba ra huida ǃgomsina da ga hōǃâ o Elob mîmâisa ǃhūbaib ǃnâ da nî sīs kōse. w19.11 9 ¶7-9

ǁAen ai da ge ra ǂkhabuǂâi. Xawe da ge hoaǁae sada ǃgomsin xa ǀgui ǂâi ǂgao tama hâ. Nēsa da ga dī o, o da ge ǂgui ǃgâi ǀkhaegu hînab Jehovaba mîmâiba da hâ ga a ǀuru ǁkhā. (J.ǂHa. 21:3, 4) Nē ǂkhabuǂâis tsâsigu ge kai ǁgâiba a mā da ǁkhā tsî da ge Jehovaba a ǃoaba ǀû ǁkhā. Kō re ǃgâsas hîna Amerikab ǃnâ ra hâs ǁîs ǂgomsa ra ǃkhoǀgara ǀgausa ǁîs ti kaikhoeb hîna kaise ǀaesen hâbas ra kōǃgâ hîna. ǁÎs ge ge mî: “Sim di mâsib ge ra ǂkhabuǂâi kai mî tsî ra khôa mî xawem ge sim di ǂgomsa ra ūhâ ǀgara. Kaise ta ge ra ǃgôaǃgâ Jehovab sim ǂgomsa ǀgaiǀgai tsî sima ǂkhâǃnâs ǃaroma ra mā mî xūn hoan ǃaroma. Nē daoǁgaus tsî ǂkhâǃnâs tsînam ge amabes ǃnâ kaise ǂhâ hâ. Nēs ge ra hui mî Jehovaba ǃoabas ǀkha aiǃgûsa.” Nē ǃgâsas aiǁgausa xu da ge ra ǁkhāǁkhāsen ǂkhabuǂâis tsâsigu ǃnâ da a mâǀgai ǁkhā ǃkhaisa. Mati? ǃGomsina du ga hōǃâ o, Gâuab xa du ra ǃâitsâhesa mûǂan re. ǂAnǃgâ da ge nî Jehovab hoaǁae ra ǁkhaeǂgao da ǃkhaisa. Tsî ǁîb da mā da gagasi ǂûna ǃgôaǃgâ re. w19.11 16 ¶9-10

ǀHoahâb ǃûi-aogu ge ǃgōsase nē daoǁgausa nî sao. Xaweb ge ǀhaohâb ǃûi-aoba ra ǂanǃgâ ǀhaohâb ǃgâsan ‘ǂganǃgâsa’ xūnab ǂhaiǂhai tide ǃkhaisa. Nēsab ga dī o, ob ge ǁîn ǂgomǃgâsib tsî ǁîb ǃgâi ǀons tsîna a ǂoaǃnâ ǁkhā. ǁNān hîna ǀhaob ǃnâ aiǂhanuga ūhân ge “ǀgamnamxa” tsî ǂhumixa tide. (1Tim. 3:8) Nēs ǃaromagu ge ǂhumi tsî ǀhoexa tide. ǀHaohâb ǃûi-aob ga ǁîb tarasa a ǀnam o, ob ge ǁîba ǁîsa ǂganǃgâsib ǃnâ nî ūhâ-ese i xūna mîba tide. Taras ge ǁîs khaikhoeba a hui ǁkhā ǁîba ǂganǃgâsib ǃnâ nî ūhâ-ese i xūn xa dîǃnâ tama is ǃnâ. Taras ga nēsa dī o, os ge ǁîs kaikhoeb ǀguiba ǀnamma ǁgau tama hâ xawe ǁnān hîna ǁîs kaikhoeb ǃnâ ǂgomǃgâsiba ūhân tsîna. Tsîs ge ǀō-aisase Jehovaba ra ǂkhîǂkhî ǁîs ǀhaohâb di ǂkhîb tsî ǀguiǃnâxasib tsîna omkhâis ǀkha ra hui amaga.—Rom. 14:19. w20.03 22 ¶13-14

Tabernakeli ge 1512ǁî kuri Sinai ǃhommi ǃnāga a omhe o. Moseb ge Aronni tsî ǁîb ǀgôagu tsîn ge pristergu ase a ǁgaumâihe ǁaxasiba gere ǂgaeǂgui. (Eks. 40:17; Lev. 9:1-5) Jehovaba mati ǀasase ge ǁgaumâihe pristergab ra ǃkhōǃoa ǃkhaisa ge ǁgau? Aronni tsî Moseb tsîn khoena ra ǀkhae khamib ge Jehovaba ǀaeba ǀhomma xu ge sî i-i altars ai gere dī-e ǁguibade hîkākāhe. (Lev. 9:23, 24) ǀHomma xu ge ǀgapi pristergu gere ǁgaumâi-e tsēs ai hā ǀaeba tae-e ge ǁgau? Jehovab ge ǀaeba ge sî Îb ǁgau Aronni tsî ǁîb ǀgôagu hîna ge pristergu ase ǁgaumâi-egab ra ǃkhōǃoa ǃkhaisa. Israelǁîn ge mû o Jehovab pristerga ra ǂkhâǃnâ ǃkhaisa os ge nēsa ge dī în ǁîn tsîna pristerga ǂkhâǃnâ. Nēsa sida ǃgaos tsîna a ǂhâǂhâsa? Îo. Nē pristergu ge ǀgapi tsî ǂhâǂhâsa pristera gere ǂnûǁkhaeba. Xristub hîna a ǀgapi pristeri ge 144 000 pristerga ūhâ hîna ǁîb ǀkha ǀguiba ǀhommi ǃnâ nî ǂgaeǂguiga. (Heb. 4:14; 8:3-5; 10:1) Jehovab ge ǁîb ǀapeǂhumisa daoǁgau tsî ra ǀkhae nētsē. w19.11 23 ¶13; 24 ¶14, 16

Korintes ǃnâb ge hâ io, ob ge Pauluba, Akwilab tsî Prisilas tsîra ǀkha gere hâ tsî “ǁîra ǀkha . . . gere sîsen, tentomkuru-aora ge i amaga.” Paulub “tsēs tsî tsuxub” tsîna gere sîsen ǃkhais ge ǂâibasen tama hâ ǁîb ge sâ tama hâ i di. ǁÎb ge tentomkurusa xu gere sâ sâtsēs ai. Nēs ge aiǂhanuba gere mā bi Jodeǁîn hîna ge sâtsēs ai ǁîn tsîna sîsen tama hâ îna aoǁnâbasa. (ǃNǃkh. 13:14-16, 42-44; 16:13; 18:1-4) Paulub ge kōǃgâsens ǃaromab gere sîsen xaweb ge ǁaeba gere dī “ǃgâiǂhôas Elob disa nî ǃoabaga.” (Rom. 15:16; 2Kor. 11:23) Tsîb ge nauna gere ǂkhâǃnâ hoaǁae aoǁnâsa. Akwilab tsî Prisilas tsîra ge Paulub ǀkha ǀguiba tentomkurus ǃnâ gere sîsen xawe ǂhâǂhâsa as ge ǁîra ge ge ‘ǀhaoǃoaba-ao i Xristub Jesub ǃnâ.’ (Rom. 12:11; 16:3) Paulub ge Korinteǁîna ge ǂkhâǃnâ în “ǃaruǀîǀgui ǀaro ǃKhūb di sîsenni ǃnâ.” (1Kor. 15:58; 2Kor. 9:8) Jehovab ge apostel Pauluba ge ǂkhâǃnâ îb xoa: “Sîsen ǂgao tama khoe-i ǁkhāti ǂû tide ǃkhaisa.”—2Tes. 3:10. w19.12 5 ¶12-13

Jehovab ge ǂguro khoe-aogura ǀgôana ūhâs di turab ǀkha ge kuru. Xawe ham-e nî mîǁgui ǃgame hâ khoe-aogura ǀgôana nî hōs tsî mâǁae ra ǀgôana nî hōs tsîna? ǀNî ǃhaodi ǃnâ i ge ǀasase ǃgame hâ khoe-aogura ǃgameb khaoǃgâ ǀgôana nî hō ǃkhaisa ra ǂgaoǀkhāhe. ǁÎra omaris ǁanin tamas ka io ǀnî hâ khoen ge ǁîra a ǁgari ǁkhā i ra ǃgameb khaoǃgâ ǃhaese ǀgôana hō. Jethro di ǀon hâ ǃgâsab hîna Asiab ǃnâ ra hâb ge ra mî “ǀhoahâb ǃnâ i ge ǀnî ǃgâsan hîna ǀgôana ūhâna ǀgôana ûhâ tama hâ ǃgâsana ra ǁgari în ǁîn tsîna ǀgôana hō.” Jeffrey di ǀon hâ ǃgâsab hîna ǁîb tsîna Asiab ǃnâ ra hâb ge ra mî “ǀnîn ge ǀgôana ūhâ tama hâ ǃgâsana ra mîba ǁîn ge kairan ga o khoe-e ūhâ tama nî i kōǃgâ-es ǃgao di.” Xawe mâ ǃgamme hâ khoe-i hoa i ge aitsama nî mîǁgui ǀgôana i nî ūhâ ǃkhaisa. ǁÎra ge aitsama ǁnāsa nî mîǁgui ǁnās ge a ǁîra di ǃeream. (Gal. 6:5) ǀAsase ǃgame hâ khoe-aogura di omaris tamas ka io ǀhōsan ge ǁîra ǂkhîba nî ūhâsa ra ǂgao. Xawen ge ǁîna nî ǂan ǃgame hâ khoe-aogura nē mîǁguib ǀgôana ra nî ūhâ tamas ka io ūhâ tides diba nî dīsa.—1Tes. 4:11. w19.12 22 ¶1-3

Elob xa sadu ǁGûb ase ǂâisa kaise a ǃgomba du? ǀNî da âda ge Jehovab ǃoa-ai kaise ǂkharirose ra tsâ. ǁÎn ge Hoaǀgaixa Elob ǁîna ra kōǃgâ ǃkhaisa ǂgom tama hâ. Xaweb ge sada ǀnamxaǃnâ ǁGûba nēti da nî tsâ ǃkhaisa ǂgao tama hâ. ǁÎb ge ûiba ra mā da tsî ǁîb ǀkha da ǀhōsagusisa nî ūhâsa ra ǂhâba. Nēs xa ǃhoa toa tsîb ge Pauluba ǁîb ǃgâ-aona ǃoa ge mî, “mâ-i hoa-i âda xub kom ǃnūse hâ tamao.” (ǃNǃkh. 17:24-29) Elob ge ǂhâba hâ, sada ǁîba ǃoa ǀgôa-i ǁî-i ǁgû-e ǃoa ǀnammi xa ǁgari-e hâse ra ī ǀgaub ǁkhāb ǃnâ nî īsa. ǀNîn ge Jehovaba ǁîn ǁGûb ase mûs xa a ǃgombahe ǁîn ǁgûgu ge ǁîna ǀnamma ǁgau tama hâ i amaga. ǀGui Xristeǁî ǃgâsas aiǁgaus xa ǂâi re. “Ti ǁgûb ge kaise ǃgâi tama ǀgaub ǃnâ gere hâ-ū te. Tsî i ge kaise ge ǃgomba te i ti ǀhomsi ǁGûb ǀgūse tsâsa.” Sadu tsîna nēti ra tsâ? Nēs ga ama o, o tā ǂkhabu ǂâi re, ǁaeb da ī khami du ge Jehovaba sadu ǁGûb ase nî mû. w20.02 3 ¶4-5

Jesub ge ge ǁkhāǁkhā da dī da ra xū-i ga sida ǃgao ǂkharirose ga ra mûsen xaweb ge Jehovaba mâ xū-i hoa-i hîna da ǁîb ǃoabas ǃnâ ra dī-e ra ǃgôaǃgâ ǃkhaisa. (Psa. 92:12-15; Luk. 21:2-4) ǁNā-amaga dīǁkhā du a xūn ai sadu ǂâisa nûi re. Aiǁgause du ge Jehovab xa ǃhoa ǁkhā, sadu ǃgâsana ǀgoreba tsî nauna a ǂkhâǃnâ ǁkhā în ǂgomǂgomsase hâ. Jehovab ge ǁîb di ǀhao-sîsen-aose ra mû da dī ǁkhā da a xūn xas ose xawe ǁîba da māsenxase ra ǁnâuǀnam amaga. (1Kor. 3:5-9) Kaise da ge Jehovaba ǃoabasa ra ǃgôaǃgâ ǁîb ǁnān hîna ǁîba ra ǃoabana ǀō-aisase ra mû amaga. ǁÎb ge ǁîb ǂâisa da nî dīǀoaǀoa ǀgaub ǃnâ ge kuru da tsî ama ǃoabas ge ǂkhîba sida ûigu ǃnâ ra mā da. (J.ǂHa. 4:11) ǃHūbaib ga xūose ga ra mû da xaweb ge Jehovaba ǁnā ǀgaub ǃnâ mû da tama hâ. (Heb. 11:16, 38) ǀAeb mâsigu, mari ǃgomsigu tsî kairasis tsîn xa da ga ǂkhabuǂâi o, o da ge ǂâis ǃnâ nî ūhâ xū-i xare i Jehovab ǀnamma xu ǀgora da tide ǃkhaisa.—Rom. 8:38, 39. w20.01 18 ¶16; 19 ¶18-19

Surixasiba da ge a ǃkhamǃoa ǁkhā tsâmtsîǃnâsib tsî ǂâuxasib tsîna omkhâis ǃnâ. Nē ǃgâi ǀgauga da ga sada ǃnâ ūhâ o, o da ge surixasiba soa-e mā tide. Tsâmtsîǃnâsib ge nî hui da i da tā sada xa ǀgui ǃnāsase ǂâi. Tsâmtsîǃnâ khoe-i ge nau khoen xa i ǃnâsa xūna nî ūhâs tsâsiba hō tama hâ. (Gal. 6:3, 4) ǂÂuxasiba ūhâ khoen ge ūn hâ xūn ǀkha a ǂkhî tsî nau khoen ǀkha ǀgōpeǀnōsen tama hâ. (1Tim. 6:7, 8) Tsâmtsîǃnâsib tsî ǂâuxasiba ūhâ khoe-i ga nau khoen ǃgâi xūna ra hō ǃkhaisa mû o, o i ge ǁîn ǀkha a ǂkhî. Elob ǃanu gagaba da ge ǂhâ hâ ǃgâi tama ǀgaugu surixasib di ga da ga ǃkhamǃoa ǂgao tsî tsâmtsîǃnâsib tsî ǂâuxasib tsîna omkhâi ǂgao o. (Gal. 5:16; Fil. 2:3, 4) Jehovab ǃanu gagab ge nî hui da sada ǃgam tsâsigu tsî tanisen ǀgaugu tsîna ôaǃnâsa. Elob ǃanu gagab huib ǀkha da ge sada ǃgâi tama ǀgauga ǃgâigu ǀkha a ǃkhōǃkhuni ǁkhā.—Psa. 26:2. w20.02 15 ¶8-9

Māǁnâsens ge a mîmâi hîna du Jehovab ǃoa-ai ra dīsa tsîb ge ǁîba ǂhâba hâ, nē mîmâisa du nî dīǀoaǀoa ǃkhaisa. Sadu ǀhaohâb ǀgūse hâ re. Sadu ǃgâsan hîna ǀhaohâb ǃnâ hân ge a sadu di gagasi omaris ǁani. ǀHaode hoaǁae ǁhaoǃgâs ǃnâ-ū du ge sadu ǀhōsaguside sadu ǃgâsan ǀkha nî ǀgaiǀgai. Elobmîsa tsēs hoasa khomai tsî ǂâiǃgâ re. (Psa. 1:1, 2) ǁAeba ū re, nēsa ǂâiǃgâsa. O di ge nē mîde sadu ǂgaoba nî tsâǀkhā. Hoaǁae “ǀgore re.” (Mat. 26:41) Sadu ǂhanu-ai ǀgore di ge Jehovab ǀgūse nî hâ kai du. ‘ǂGurose ǁnâi . . . Gaosiba ôa.’ (Mat. 6:33) Nēsa du ge aoǁnâ sîsen-e ǂgurose sadu ûib ǃnâ mâis ǃnâ-ū a dī ǁkhā. Hoaǁae aoǁnâ sîsenni ǃnâ ǁhaos ǃnâ-ū du ge sadu ǂgomsa ǀgaisase a ūhâ ǁkhā. Nē ǃhūbaib ǃnâ du ra hōǃâ ǃgomsin ge ‘ǃhaese nî ǃgû-ī.’ (2Kor. 4:17) Xawe sadu māǁnâsens tsî ǁāǁnâs ge nēsi dao-amdi ǂkhîba ūhâde nî ǁkhowa-amba du tsî du ge ǃgâi ǃgaoǃgaoba ‘ǀamo ûib’ ǃaroma nî ūhâ. Nē ǃgomsina nî ǃao kai du? Hî-î.—1Tim. 6:19. w20.03 13 ¶19-21

Elobmîsa du ra ǁkhāǁkhā khoe-i ga ǀkharaǀkharana dī tama ī o, o du ge nî dîsen, ‘nē Elobmîs ǁkhāǁkhāsa da nî ǀam kai?’ Nē mîǁguiba du nî dīs aiǃâ dîsen re: ‘Tita Elobmîsa ra ǁkhāǁkhā khoe-e ǁî-i ǁkhāsib ra mā-am i ǀkharaǀkharana ǂhanu ǁaeb ai ra dī?’ ‘ǁKhāǁkhāsen i ra xūna i ra “ǃkhōǀgaipe” tamas ka io i ra ǁî-i ûib ǃnâ nē xūna ûiǂui?’ (Mat. 28:20) Tsûtsusa i ge a xawen ge ǀnî khoen hîna da Elobmîsa ra ǁkhāǁkhāna Esegieli ǁaeb ǃnâ ge ûi hâ i Israelǁîn khami ī. Jehovab ge ǁîn xa Esegiela ge mîba: “Tsî mû, sats ge ǁîna ǁâsab di ǁnaetsanas axase ība, ǀguib ǃgâidommi tsî ǃgâise ra ǀkhōb axase; ǁnā-amagan mîdi âtsan ra ǁnâu xawe ǁîde dī tama.” (Ese. 33:32) Kaise i ge a ǃgomba da ǁkhā Elobmîsa da ra ǁkhāǁkhā khoe-e mîbasa Elobmîs ǁkhāǁkhāsa da ra ǀam kai ǂgaosa. Xawe da ge nî ǂan ‘ǁaeb hîna ǃau hâb ge a ǃnubu.’ Sada ǁaeba ǀkharaǀkharana dī ǂgao tama hâ khoen ǀkha ǁores xa da ge “ǀamo ûiba ǃoa ǃkhōǂuibasenhe hâ” khoena nî ôa.—ǃNǃkh. 13:48. w20.01 6 ¶17; 7 ¶20

Nau ǂgomdi ge Elobmîsa xu ra ǂoaxa amab khoen ǀamose ǃhūbaib ai nî ûis diba ǁkhāǁkhā tama hâ. (2Kor. 4:3, 4) Nau Xristeǁî ǂgomdi ge ra ǁkhāǁkhā hoa ǃgâi khoen ǀhomma ǃoa ra ī di. Xawes ge nēsa ǂkhari ǃgôarob khoen hîna Elobmîsa gere ǁkhāǁkhāsen an ǃaroma ge ǀkhara i hîna Watch Tower ǂkhaniba 1800ǁî kuriba xu gere ǁgâina. ǁÎn ge gere ǁnâuǃā Elob ǁkhawa ǃhūbaiba nî paradai kai ǃkhaisa tsîn ǂgui khoen ǁnâuǀnam rana ǃhūbaib ai nî ûisa ǀhommi ǃnâs ose. Xawe i ge ǁîn tsîna ǁaeba ge ū ǁnâuǃāsa nē ǁnâuǀnamxa khoen a ham ǃkhaisa. Elobmîs ǁkhāǁkhāsen-aon ge ge mûǂan ǀnîn “ǃhūbaiba xu ǁamaǂuibasenhe” hâsa tsî Jesub ǀkha ǀhommi ǃnâ sī nî ǂgaeǂguisa. (J.ǂHa. 14:3) Nē 144 000 ǂgomǂgomsa ǁāǁnâsa Xristeǁîn ge ǁnān hîna Eloba ǂgomǂgomsase ra ǃhūbaib ai ǃoabana xu hâ. w19.09 27 ¶4-5