Novemberi

Nētsēn ge khoen hîna gā-aise ra mûhena Elobmîs daoǁgaudi ǁîǀnamsens didi ǃoa-ai ra ǂnoagu. ǁNîn ge ra mî nau khoena sa xa ǀgapise mûs ge ǀgaio khoe-i ase ra mûsen kai nî hîna nau khoen xa ǃgôasiba ǁgauhe tama hâna. Xawe amaba da ga mî o, ǁîǀnamsens ǂūga ǁGâuab ǃhūbaib ǃnâ mâ ǀgauga ra ǁgauǂui? ǁÎǀnamsenxa khoena ǂkhî khoena? ǂKhî omaridi tsî ama ǀhōsanan tsînan ūhâ? Elob ǀkhan ǀgū ǀhōsagusisa ūhâ? Mû da rasa xūs mâ ǀamǂoasa a ǃgâi, ǃhūbaib gā-aisiba saosa tamas ka io Elob gā-aisiba? (1Kor. 3:19) Khoen hîna nē ǃhūbaib xa gā-ai di ra mîhen daoǁgaude ra saon ge ǀūsabe-i khami i hîna nau ǀūsabe-i ai daoǁgausa ra ǂgan-e. Jesub ge ǁîb ǁaeb di gā-ai khoegu xa ge mî: “ǀÛǀkhā gu re, ǂgī hâ ǂgaeǂgui-aogu ǂgī hân digu kom ǁîgao; tsî ǂgī hâ-i ga ǂgī hâ-e daoba a ǁgauo, on kom hoana tsaus ǃnâ nî ǁnāo.” (Mat. 15:14) Amabes ǃnâb ge nē ǃhūbaib di gā-aisiba a gâre xū Elob mûǁae. w19.05 24-25 ¶14-16

ǃKharu go kurigu ǃnâ i ge ǁnān hîna Jesub ǁōb ǂÂiǂâisens tawa ra ǃân di ǃgôaba ge ǂguiǂguisen. Nēs xa da nî ǂâiǂhansen? Hî-î. ‘Jehovab ge ǁîb dina a ǂan.’ (2Tim. 2:19) Jehovab khami gu ge ǃgâsagu hîna Jesub ǁōb ǂÂiǂâisens tawa ra ǃâ ǃgâsan di ǃgôaba ra ū ga a ǀū ham-an hoan a ǂkhauhesa ǃkhaisa. Nēs ǃaromab ge nē ǃgôaba ǁnān hîna ǂkhauhen hâ di ra ǂâin tsîna ǃkhōǂgā hâ. Aiǁgausen ge ǀnîn hîna nēs ǃnâ gere ǃâna ǁaeb ge ī khami ge a ǀû. ǀNîn ge ǀnîsi danas ǃnâ ǃgâiro tama hâ tsî Xristub ǀkhan ǀhommi ǃnâ sī nî ǂgaeǂgui di gere ǂâi. Nēs ǃaroma da ge ǂgomǃgâsib ǀkha a mî ǁoa matikō ǂkhauhesa ǃgâsan noxoba ǃhūbaib ai ǃau hâ ǃkhaisa. ǃKhōǂuibasenhe hân ge nîra ǀhaoǀhaohe, haka ǂoade xu, ǀhommi di nē ǀamsa xu naus kōse. Elobmîs ge ra mî ǀuni tsēdi ǃnân ǀoro ǃgôab ǂkhauhesana ǃhūbaib ai nî hâ di. (J.ǂHa. 12:17) Xawe i ge mî tama hâ matikō ǂkhauhesan kai ǁgâiǀāb ǁaeb ǃnâ nî ǃausa. w20.01 29-30 ¶11-13

Jesub ge Jehovab ǁîb ǀgôana ūba hâ ǀnamma kā hâ ǀgôab ǂkhōs ǃnâ-ū ge ǁgau. (Luk. 15:11-32) ǁNā ǂkhōs ǃnâ hâ ǁgûb ge ǁîb ǀgôab nî oaǀkhī ǃkhaisa gere ǀgoreba. ǀGôab ge oasī o, ob ge ǁîb ǀgôaba ǃgâiaǂgaob ǀkha ge ǁkhoreǁhare. Jehovaba xu da ga hâbē xawe ǃhausen o, o da ge ǂgomǃgâsiba nî ūhâ, Jehovab māsenxase nî ǁkhoreǁhare da ǃkhaisa. Sida ǁGûb ge Adammi ge ǃaroma tsûgu hoaga nî ūbē. Adammi ǁnâuǀnamoǃnâsib khaoǃgâb ge Jehovaba ge mîǁgui 144 000 ǂkhauhesana ǁhûisa hîna ǁîb ǀGôab Jesub ǀkha ǀhommi ǃnâ sī nî ǂgaeǂguina. ǀAsa ǃhūbaib ǃnâ i ge Jesub tsî ǁîb ǀkha ra ǂgaeǂguin tsîna ǁnâuǀnamxa khoesiba ǀoasa kurusa hōs ǀkha nî hui. ǀUniga ǃnāsab ǁîn ǁnâuǀnamxasiba ǃâitsâ-e hâs khaoǃgâb ge Eloba ǀamo ûiba nî mā nî. Sida ǁGûb ge kaise nî ǃgâiaǂgao mûb ga ra o ǃhūbaib ǀoasa kurusa ūhâ khoen xa ǀoa hâ di. Nē ǁaeb ge kaise nî ǂoaǂamsa i. w20.02 6-7 ¶17-19

Hoada ge nî dîsen, ‘ǀkharaǀkharan hîna da ra dīna aisǀkhāb ai ǀgui a mûhe ǁkhā tamas ka io da ǂganagaba xu ama Xristeǁî kai hâ?’ Nē ǀkharaǀkharan ge a ǂhâǂhâsa. ǁÎb mîdi hîna Mateub 12:43-45 ǃnâ hâdi ǃnâb ge Jesuba ge ǁgau da tae-e da nî dīsa. ǁNā mîdi ge kaise ǂhâǂhâsa xū-e ra ǁkhāǁkhā da: ǁGai ǂâide ūbēs ǀguis ge ǂâu tama hâ; ǃgâi tama ǂâiǀgauga da ge ǃgâigu ǀkha nî ǃkhōǃkhuni. Sada ǂâiǀgaub tamas ka io ham da a ǃkhaisa da a dawa ǁkhā? Elobmîs ge ra ǃeream: “Tsî du nî anaga ǀasa khoeb, Elob ǃoa kuruhe hâba ama ǂhanu-aisib tsî ǃanusib ǃnâ.” (Efe. 4: 24) Nēs ǃaroma i ge a ama sada di ǁgai ǂâide da a ǀasa kai ǁkhāsa xawes ge nēsa supu tama hâ. ǃNāsa-e da ge nî dī nē ǁgai ǂâidi tsî tanisen ǀgaugu tsîna xu ǂgōsens ǃaroma. Sada ‘ǂâis di gagasa’ da ge nî dawa. Nēs ge ra ǂâibasen sada di turagu, ǂhâsigu tsî dī ǂgao da ra xūn tsîna da nî dawasa. Nēs ge aiǃgû ra sîsena ǂhâ hâ. w19.06 9-10 ¶6-7

Jehovab ge ǀhomǃgāga ge sî îs Loti omarisa nē hîkākāsa xu sī sâuhe. Loti ge gere “ǀhana” tamas ka io ǂauǂausen. ǀHomǃgāgu ge ǃomgu ai ǃkhō nî tsî ǃāsa xu ge ǂgaeǂgui nî. (Gen. 19:15, 16) ǀHomǃgāgu ge ǁnāpaxū ge mîba nî în ǃhomga ǃoa ǃkhoe. Xawe Jehovaba ǁnâuǀnams xab ge Lota ge ǂgan îb ǀgūse ǂnoa ǃāsa ǃoa ǃkhoe. (Gen. 19:17-20) Jehovab ge Lota ǃgâ tsî ge mā-am bi ǁnā ǃāsa ǃoa īsa. Loti ge ega ǁnāpa hâsa ǃao tsî ǃhomga ǃoa ge ī Jehovab ge ǂguro a ī kai bi ǃkhaiba ǃoa. (Gen. 19:30) Jehovab ge Lota kai ǃnūǃnâxasiba ge ǁgau. Loti khami i ge sada gagasi omaris khoe-e ǃgâi tama hâ mîǁguiga a dī ǁkhā tsî nēs ǀkha ǃgomsina a ǃaroma ǁkhā. Nēs ga ī o, o da tae-e a dī ǁkhā? Dī i go tsū xū-i xa da ge a mîba nî ǁkhā, dī i go tsūba xū i ǃgomsiba ra hōǃâsa hîna a ama-e. (Gal. 6:7) Xawe da ge nēs xa ǃgâi xū-e a dī ǁkhā. Jehovab ge Lota a hui ǀgauba da ge sao ǁkhā. w19.06 20-21 ¶3-5

Sida khākhoen ga sida sîsenga mâǃoa o, on ge ra ǃao kai da Jehovaba ǃoabasa. Sida sîsenga ǂkhās ǂam-ain ge ǀapaǃnamga a sî ǁkhā îgu sida omde ôaǃnâ, ǀgoraǃgâ ǃkhaiba ǃoa ī ū da tamas ka io ǃkhōsis ǃnâs tsîna a ū da ǁkhā. ǁÎn ge ra ǂâi ǃao da nî di sida ǃgâsanan ǃkhōsis ǃnâ ra ū amaga. ǁÎna da ga ǃao o, o da ge Jehovaba a ǃoaba ǀû ǁkhā. ǁNān hîna Levitikus 26:36, 37 tawa ra ǁguiǃāhen khami da ge ī ǂgao tama hâ. ǃAoba da ge mā-am tide Jehovaba ǃoaba ǀû kai dasa. Jehovab ai da ge hoase ra ǂgomaiǂnûi tsî ǃaoba xu ra ǂgōsen. (Jes. 28:16) ǀGore hâse da ge Jehovab daoǁgausa ra ôa. ǂAn da ge a Jehovab huib ǀkha gu ǂhanuga Jehovaba ǃoaba ǀû kai da tidesa. Sida ǃaoǃaos xa gu ge sida ra ǂkhâǃnâ î da Jehovaba ǃoaba ǀgara. w19.07 9-10 ¶6-7

Khoe-i hîna da Elobmîsa nî ǁkhāǁkhā-e da ga nēsi hō tama i xawe da ge tā nî ǂkhabuǂâi. Jesub ge ǁkhāǁkhāsabedīsa ǁauǃkhōs ǀkha ge ǀgopeǀnō. ǁAuǃkhō-ao i ge ǂgui ǁaeba ǁauǃkhōs ǃnâ ra ūhâ ǁau-eb nî ǃkhōs aiǃâ. ǁNaen ai gu ge ǂgui ǁaeba ǁauǃkhōs ǃnâ ra ūhâ tsî ǀnî ǁae ǁgoaga tamas ka io ǃui karab kōse ra ǁauǃkhō. (Luk. 5:5) ǁKhā ǀgaub ǃnân ge ǀnî Xristeǁîna ǂgui ǁaeba aoǁnâ sîsenni ǃnâ ra ǁhao tsî ǃkharagagu ǁaegu ai ra ǁauǃkhō. Tae-i ǃaroma? În khoena ǀhao-ū ǁkhā. ǃGâsan hîna nēsa ra dīn ge ǂgui ǁaena khoena ra ǀhao-ū hîna ǃgâiǂhôas ǃnâ ǃgâiǃgâibasensa ūhâna. Khoena du ǃnāsase ra hō ǁaen tsî ǃkhain ai du ǁaeba ǁamaǂui tsî aoǁnâ ǂgao tama hâ? Elobmîsa ǁkhāǁkhāsa tae-i ǃaroma ǃnūǃnâxasiba ǂhâ hâ? ǀGui ǃaromas ge khoena da ra hui ǂgao amaga în Elobmîs tsî Elobmîs amab tsîna ǀnamma omkhâiba. Elobmîs xoa-aoba ǀnamma omkhâibas ǀkhas tsîna da ge ra hui nî ǂgao. w19.07 18-19 ¶14-15

ǀNî da âda ge ǃkharu ge ǁaeb ǃnâ da ge dī tsū xūn di tsûaǂgaoba nî ǀurus ge. Nē ǃgomsiba da ga hōǃâ o, o da tae-i ǃaroma Xristub Xoremarib ǁguibasa ôaǃnâ tama hâ? Ôaǃnâ, ǂâiǃgâ tsî da ga ǂkhâǃnâ ra xūn xa ǀgore o, o da ge nē tsâsiga nî tani hō. Tsî da ge dī da ge ǁorena da Jehovab xa ǀûbahe hâ ǃkhaisa nî ūǃoa. ǀNî hâ xū-i hîna da Pauluba xu a ǁkhāǁkhāsen ǁkhā i ǃoa kō re. ǀNîn ge ǀgapi mari-e ra matare sîsenga ge xu Jehovaba ǃoaba ǀgaras ǃaroma. ǁNās nî amas ga o, o da ge tā ū da ga hâ ǃkhūsisa ǃoa nî kō-oa. (Num. 11:4-6; Aoǁn. 7:10) ‘ǃKharu’ ge xūn ge dī da ge ǃgâi xūn tamas ka io ǃkharu ǃnâ da ge ǃgomsin tsîna ǃkhōǂgā ǁkhā. Jehovab ge ǁgau da ǀkhaegu tsî huib tsîn ai da ga kō oa o, o da ge ǀgū ǀhōsagusisa ǁîb ǀkha ra omkhâi. Xawe da ge tātsē Jehovaba da go ǂâu hâse sîsenba di mî ǂgao tama hâ.—1Kor. 15:58. w19.08 3 ¶5-6

ǃGamǃgamsenxa ǀgaub ǃnâ da ge Eloba ǃoa a ǀgū ǁkhā mâpa ǀgui da ga hâ xawe. ǁÎb ge sada ǀgorede ǃoa ǃgâs ǃaroma ǀhape tama hâ xawe hoaǁae nî ǃgâ. Jehovab sada ǀgorede ra ǃgâ ǃkhaisa da ga mûǂan o, o da ge ǁîba ǀnamma ra omkhâiba. ‘Tita ge Jehovaba a ǀnam,’ tib ge psalmdi xoa-aoba ge mî, ǁîb ti ‘ǀkhomabasende ra ǁnâu amaga.’ (Psa. 116:1) Sada ǁGûb ge sada ǀgoredi ǀguide ǁnâu tama hâ xawe ra ǃeream. Apostel Johaneb ge ge mî: “Xū-e da ga Elob di ǂâis ǃoa ǂgano, ob ge ra ǁnâu-am da” di. (1Jhn. 5:14, 15) Jehovab ge ǁaen ai sada ǀgorede sada ǂhāba hâ ǀgaub ai ǃeream tide. ǁÎb ge tae-i sada a ǃgâiba ǃkhaisa a ǂan tsî ǁaen ai sada ǀgorede ǃeream tide xawe ǁaeba nî ǃkharu kai. (2Kor. 12:7-9) Jehovab ge ra kōǃgâ da. ǁÎb ge hoa ǁGûgu ūhâ ǃereamsa ra tani. (1Tim. 5:8) ǁÎb ge ǁîb ǀgôan di sorosi ǂhâsiga ra kōǃgâ. ǁÎb ge sada ǂûn, saran tsî hâǃkhai-i xa nî ǂâiǂhansen ǃkhaisa ǂgao tama hâ. (Mat. 6:32, 33; 7:11) ǀNamxaǃnâ ǁGûb aseb ge Jehovaba sada di hānîǁaeb ǂhâsigu tsîna nî dīǀoaǀoa. w20.02 5 ¶10-12

Hoa Xristeǁîn hîna ǀhommi ǃâubasensa ūhân ge “ǂgomǂgomsa tsî gā-ai ǃgāb” di ǃâ tama hâ. (Mat. 24:45-47) ǃKharu ge ǁaeb ǃnâ ge ī-i khami kha ge Jehovab tsî Jesub tsîkha ǀoro ǃgôab ǃgâsagu ǀguiga nētsē ra sîsen-ū gagasi ǂû-e mā tsî ǁkhāǁkhā das ǃnâ. ǀOro ǃgôab ǂkhauhesa Xristeǁîn ǀguin ge ǃkharu ge ǁaeb ǃnâ gere sîsen-ū-e Grikegowab di Xoade xoas ǃnâ. Nētsēs tsînan ge ǀoro ǃgôab ǂkhauhesa Xristeǁîna Elob xa ǁhûi-e hâ ‘ǂhanu ǁaeb ai’ ǁîb khoena gagasi ǂû-e mās ǃaroma. Jehovab ge ǃnāsa ǃâb ǁîb khoen diba ǃhūbaib ai ǀamose ûis aiǂhanuba ge mā tsî ǀoro ǃgôab khoen hîna Jesub ǀkha nî ǂgaeǂguise īna ǀhommi ǃnâ ûis aiǂhanuba. Jehovab ge ǁîb di ǃoaba-aon hoana ra ǀkhae “Jodeǁîn” tsî “disi khoegu” tsîn hoana tsî ǂhâba hâ în ǁîn hoana ǁîb ǂhanuga ǁnâuǀnam tsî ǂgomǂgomsase hâ. (Sax. 8:23) Hoada ge nî ǃgamǃgamsenxa. Tsî hoan ge ǁîba ǀguiǃnâxasib ǃnâ nî ǃoaba. Tsî hoan ge ǃgarise nî sîsen ǂkhîba ǀhaohâb ǃnâ ūhâs ǃaroma. Nē ǃhūbaib ǀamsa da ra ǀgū khami da ge Jehovaba ǀguiba nî ǃoaba tsî Xristuba ‘ǀgui gūn’ ase nî sao. w20.01 31 ¶15-16

Sida ǀaokhoena da ge a ǁgari ǁoa în ǃgâiǂhôasa ūǃoa. Xawe da ge ǁîna a ǂkhâǃnâ ǁkhā în ǁîn ǂâidi tsî ǂgaob tsîna ǁkhowa-am în Elobmîs haisi-amsa ūǃoa. (2Tim. 3:14, 15) Sada tanisen ǀgauba ab ǃnāsa-e sada xa mî. Sada ǀaokhoen ge dī da ra xūna ǃnāsase ra mû, mî da ra xūn xa. Tā da ge nî ǀûsen sada ǀaokhoena huisa. Jehovab ge nēs xa aiǁgausa ge mā da. ‘Mâ ǁaeb’ hoabab ge khoena ǃēsa ra mā în ǃgâiǂhoasa ūbasen tsî ǀamo ûiba hō ǁkhā. (Jer. 44:4) Apostel Paulub tsîn ge Timoteuba ge mîba îb nau khoena huis ǃnâ mâǀgâi. Tae-i ǃaromab nēsa ge dī? Nēsab ga dī o, ob ǁnān hîna ǁîba ǃoa ra ǃgân tsî ǁîb tsîna nî ǃgâiǃō xui-ao. (1Tim. 4:16) Sada ǀaokhoena da ge a ǀnam tsî da ge ǂhâba hâ Elobmîs amaban nî ǂan ǃkhaisa. w19.08 14 ¶2; 16-17 ¶8-9

ǂAn da ge nî ǃgâsa i ga ǁnama da o, o da tsū xū-e dī hâ ǃkhaisa. ǃGâsa i ga ǁnama da os ge nēsa a ǃgomba da ǁkhā ǁnā ǁnamasa ūǃoasa. ǁNamasa ra mā da khoe-e da ge a mîǁgaiǁgai ǁkhā ǁnamasa i ra mā da ǃkhais ǃaroma tamas ka io ǁnamasa i ra mā ǀgaub xa ǃaroma-e hâse. Xawe da ga ǃgamǃgamsenxasiba ūhâ o, o da ge nē mâsib ǃnâ nî dītsâ ǃgâise tanisensa. ǃGamǃgamsenxa khoe-i ge ǁnamasa ra ǃgôaǃgâ. Aiǁgause, ǂâi re Xristeǁî ǀhao-i tawa du hâsa. ǃKharagagu ǃgâsan ǀkha du ǃhoa hâ hîna i ge ǀgui ǃgâsa-e ra mîba du ǂû-i sadu di ǁgûgu ǃnâ hâsa. Nēs xa du ge kaise nî tao. Xawe du ge kaise nî gangan nē ǃgâsa i go ǁnāsa a mîba du ǃkhais ǃaroma. ǂÂis tsîna du ge a hî ǁkhā tae-i xa i go ǀnîhâ ǃgâsa-e nēsa ǀnai mîba te tama hâ i di. ǁKhā ǀgaub ǃnâ da ge ǃgamǃgamsenxasib ǀkha ǃgâsa i ga ǁnama da o, o nēsa nî ūǃoa ǁkhā. Nē ǃgâsana da ge sada ǀhōsan ase ra mû ǂgao tsî sada mâǃoa-aon ose.—ǂKhm. 27:6; Gal. 4:16. w19.09 5 ¶11-12

Jehovab ge mâ ǁgûs hoasa omaris ǃnâ aiǂhanuba ge mā, ǁîs di ǀgôana kōǃgâs diba. ǁGûdi ra mî tsî dī xūn ge ǁîdi ǀgôana ǁîn di ûigu hoaga a tsâǀkhā ǁkhā. (ǂKhm. 22:6) ǁGûdi Marias Jesub di ǁgûs aiǁgausa xu a ǁkhāǁkhāsen ǁkhā xūna ǂâis ǃnâ ūhâ re. Marias ge xoade ǃgâise ge ǂan i. ǁÎs ge ǃgam ǃgôasiba Jehovaba ge ūbā hâ i tsî ǃgâi ǀhōsagusis tsîna ǁîb ǀkha ge omkhâi. ǁÎs ge māsenxase Jehovab daoǁgaude ge ūǃoa, ǁîs ûiba i nî ǀkharaǀkhara se ge ī xawes tsîna. (Luk. 1:35-38, 46-55) ǁGûdi ge Mariasa ǃkharagagu ǀgaugu ǃnâ a ǁgae ǁkhā. Mati di nēsa a dī ǁkhā? ǂGurose ǃgâi ǀhōsagusis Jehovab ǀkha du ūhâsa ūhâ ǀgara re, Elobmîsa ôaǃnâ tsî ǀgores ǃnâ-ū. ǀGamǁîse māsenxase ǀkharaǀkharana sadu ûigu ǃnâ dī re Jehovaba ǂkhîǂkhîs ǃaroma. w19.09 18 ¶17-19

Apostel Johaneb ǁîb di ǁgâiǀāb ǃnâ hâ hînab ge Eloba ǃgâi kēbosa hānîǁaeb xa ge mā bi. Ne kēbos ǃnâ gu ge ǀhomǃgāga ra mîbahe i gu kai ǁgâiǀāb ǂoaba ǃkhō ǀgara saoǂûihe hân nî saohes kōse. (J.ǂHa. 7:1-3) Ne ǂnubis khoen ge 144 000 khoena xu a kuruǂûisa hîna Jesub ǀkha ǀhommi ǃnâ sī nî ǂgaeǂguise i na. (Luk. 12:32; J.ǂHa. 7:4) Tsîb ge Johaneba ǀnîhâ kaiǂnubis khoena ge mû tsî burub xa: ‘Kō’ ti ge mî. Johaneba tae-e ge mû? “Kai ǂnubis, khoe-i xare-i a ǃgôa ǁoas, ǀūbeǁaedi tsî ǃhaodi tsî ǁaedi tsî gowagu tsîn hoan dis ge trons tsî ǁKhaob aiǃâ ge mâ.” (J.ǂHa. 7:9-14) ǂÂi re Johaneb ge matikōse ǂkhî isa mûsa kai ǂnubis khoen hānîǁaeb ǃnâ ama ǃoabasa nî aiǃgû kai ǃkhaisa. ǂGomǃgâ ǁkhā da ge a ǁnā kēbos ge Johaneb di ǂgomsa a ǀgaiǀgai ǃkhaisa. Nē kēbos ge sada ǂgoms tsîna nî ǀgaiǀgai nē kēbos ra dīǀoaǀoa-e ǁaeb ǀuni tsēdi dib ǃnâ da ûi hâ amaga. Sada ǁaeb ǃnân ge kai ǂnubis khoen hîna kai ǁgâiǀāba ûiǃkharu tsî ǀamose ǃhūbaib ai nî ûise îna ra ǀhaoǀhao-e. w19.09 26 ¶2-3

ǂÂi re ǃhūbaib ǂgaeǂgui-aogu ga “ǂkhîb ge hâ tsî tsūǃgâ-i a ǀkhai” di hâ ǂanǂansa dī o. ǁÎgu ge a koasen ǁkhā ǃhūbaib ge kaise a ǃnorasa di. Tsî ǁîgu ǃhūbaib di ǃgomsin hoana ǀamsa a hā-ūba ǁkhā khami nî mûsen kai. Xawe gu ge ǁîga amabes ǃnâ ǁkhāsiba ūhâ tama hâ, ī nî xūna ǀamsa hā-ūbasa. ‘Babilons kais’ ge nî hîgāgāhe. (J.ǂHa. 17:5, 15-18) “Elob ge ǁîgu di ǂgaogu ǃnâ mā xui-ao, ǁîb di ǂâisa gu nî dīsa.” Nēsa tae-e ǃkhōǂgā hâ? Nēs ge hoa ama tama ǂgomdi tsî Xristeǁîn ase ra ǁgausen khoen tsîna hîgāgāsa ǃkhōǂgā hâ. Elob ge ǁîb di ǂâisa ‘disi ǁnâgu’ ‘skarlakǀapa ǀgurub’ digu di ǂgaob ǃnâ nî ǂgā. Nē disi ǁnâgu ge hoa ǂhanugu hîna United Nationsa ra ǂkhâǃnâga ra ǂnûǁkhaeba. (J.ǂHa. 17:3, 11-13; 18:8) Nē ǂhanugu ga ama tama ǂgomde ǁnāǂam o, o i ge kai ǁgâiǀāba nî tsoatsoa. Nēs ge kaise nî ǁkhōǁkhōsa i tsî ǃhūbaib ǂhawase hâ khoen hoana nî tsâǀkhā. w19.10 14 ¶1, 3

ǃKharu ge ǁaeb ǃnâb ge Diotrefeba ǁnān hîna ǀhaohâb ǃnâ aiǂhanuga ūhâna gere suri. ǁÎb ge gere “ǂguro ǂgao” ǀhaohâb ǁanin ǃnâ tsî nēs ǃaroma ama tama xūna apostel Johaneb tsî nau ǃgâsagu xa gere ǃhoa. (3Jhn. 10) Diotrefeb ge dī xū-i khami i xū-e da dī tide xawe da ge sada ǂhaba hâ aiǂhanu-e ga hō ǃgâsa-e a suri tsoatsoa ǁkhā. Nē khoe-i xa da, nē aiǂhanuba ǃgâise a dī ǁkhā di da ga ǂâi o. Surixasib ge ǃgāxa ǀgâ-i khami a ī. Surixa gagab ga sada ǂgaogu ǃnâ ǃnomaǃkhō tsoatsoa o, os ge nēsa ǃhomǂuisa supu tide. Surixasib ge ǀnîhâ ǀgaugu xa ra ǃaroma-e aiǁgause dauxasib, ǀgapiǂâixasib, tsî ǁîǃgôasenxasib tsîn xa. Surixasib ge sao ra ǃgâi ǀgauga a ǃgam ǁkhā ǀnammi, tsâbaǁhaoxasib tsî ǃgâixasib tsîna. Suribxasib sada ǃnâ ra tsoatsoa ǃkhaisa da ga hōǃâ o, o da ge nē tsâsiba nî ǃhomǂui. w20.02 15 ¶6-7

Nē xoaǀgoradi ǃnâb ge Pauluba tae-e gere ǂâibasen “ǀā ǁkhū-e ti ǁgans ǃnâ ge māhe” tib ge mî o? ǁKhūba du ga sadu soros ǃnâ ūhâ o, o du ge kai tsûba ra hōǃâ. ǁNās ǀkhab ge Pauluba gere mî ǁîb tsîn ge ǁkhā ǃgomsiga gere hōǃâ ti. ǁÎb ge nē ǃgomsina ‘Satanni di ǀhomǃgāb’ ase gere ǂgai hîna ‘ǃoms ǀkha ra ǂnaubiba.’ Nē ǀhomǃgāgu ge Paulub di ǃgomsina mûǂan o, o gu ge ǁîb di ǃgomsina ge ǂguiǂgui. Pauluba tae-e ge dī? ǂGuroseb ge Pauluba gere ǂhâba îb Jehovaba nē ‘ǁkhūba’ ūbe. ǁÎb ge ge mî: ‘ǃNona ǃnādi kōseb ge ǃKhūba ge ǀkhoma’ îb ǁîb ǃgomsiga ūbē. Paulub gere ǀgore xawe i ge ǃgomsina noxoba ge hâ i. Nēsa ra ǂâibasen Jehovab ge Paulub di ǀgorede ge ǁnâu-am tama hâ i di. Hî-i ti tamas ge. ǁÎb ge ge ǁnâu-am. Jehovab ge ǁîb ǃgomsiga ge ūbē tama hâ i xaweb ge Pauluba ǀgaiba ge mā îb mâǀgai ǁkhā. Jehovab ge ge mî: “Ti ǀgaib ra ǂkhabusasib ǃnâ ǀoa xui-ao.” (2Kor. 12:8, 9) Tsî Elob huib ǀkhab ge Pauluba ǁîb ti ǂkhîb tsî ǃnomsasib tsîna ge ūhâ ǀgara.—Fil. 4:4-7. w19.11 9 ¶4-5

Jehovab ǀguiba da ge nî ǃoaba ǁîb ge a kuru da tsî ûiba a mā da amaga. (J.ǂHa. 4:11) Xawe i ge ǁkhōǁkhōsasiba hâ. Jehovaba da ga ǀnam tsî ǃgôaǃgâsiba ūhâ xawe i ge ǀnî hâ xūna sida ûib ǃnâ a ǂhâǂhâsa ǁkhā tsî da ge ǁîba hoase ǃoaba tide. Elobmîs ǃnâ i ge Jehovaba hoase ǃoabasa ra ǂâibasen ǁîba da ge ǃgam ǀnamma nî ūhâba di. Jehovaba hoase ǃoabas ge ra ǂâibasen ǁîb ǀguiba da ge ra ǃoaba di. Khoe-i tamas ka io xū-e da ge mā-am tide ǁîb ǃkhaisa sida ǂgaob ǃnâ ūsa. (Ex. 34:14) Jehovaba da ge ǃgâi ǃaromadi ǃgao ra ǃoaba. Tae-i ǃaroma? Nēs ǁîb xa da ge ǁkhāǁkhāsen amab ai a ǃgaoǃgaosa ǃkhais ǃgao. ǁÎb di ǃgâi ǀgaugu xa da ge ge ǁkhāǁkhāsen. Jehovab tae-i xa ǃgâiba-e tsî tae-i xa ǃgâiba-e tamasa da ge a ǂan tsî sida tsîna ǁkhā ǀgaub ǃnâ ra tsâ. ǁÎb ǂâibasens khoesib ǀkhab ūhâsa da ge ra ǁnâuǃā tsî ra ǂkhâǃnâ. ǁÎb ǀkha ǀhōsagusisa ūhâs di aiǂhanuba da ge kaise ra ǃgôaǃgâ. (Psa. 25:14) Sida kuru-aob xa da ra ǁkhāǁkhāsen xūn hoan ge ǁîba ǃoa ra ǀgū kai da.—Jak. 4:8. w19.10 26 ¶1-3

Nētsēn ge sada ǃgâsana ǂgui ǃkharagagu ǃgomsina ra hōǃâ. Aiǁgause ǀnîn ge ǂoab mâsigu xa ra ǃaroma-e tamas ka io khoen xa ra ǃaroma-e ǃgomsiga ra hōǃâ. Nēs ga ī o, o da ge ǀnî da âda nē ǀhōsan sada dina sada omdi ǃnâ a hâ kai ǁkhā. ǀNîn ge marisise a ǂkhâǃnâ ǁkhā. Xawe hoa da ge Jehovaba a ǂgan ǁkhā îb sada ǃgâsana hui. ǃGâsa i ǃgomsib ǃnâ hâ di da ga ǁnâu o, o da ge a ǀū mati da ǁî-e nî ǂkhâǃnâ tamas ka io tae-e nî mîsa. Xawe da ge hoa da a hui ǁkhā. Aiǁgause da ge ǁaeba ǁamaǂui tsî sada ǀhōsan ǀkha a hâ ǁkhā. ǃHoan ra ǁaeb ai da ge a ǃgâ nî ǁkhā. Tsî da ge sada a ǃgâiba xoasa ǁîn ǀkha a ǀgoragu ǁkhā ǂkhâǃnâs ǃaroma. (Jes. 50:4) ǂHâǂhâsa as ge sada ǀhōsana da hâbasa ǂhâ dan ga ǁaeb ai. ǀGaisa ǀhōsaguside om tsî ūhâ ǀgarasa da ge nî mîmâi sada ǃgâsan ǀkha. Nē ǀhōsagusidi sada ūhâ di ge ǀuni tsēdi ǃnâ ǀgui mâhō tide xawe ǀamosib kōse nî hâ. w19.11 7 ¶18-19

Nē ǁguibasa i ge khoe-e māsenxase gere dī ǁî-i Elob Jehovaba i a ǀnam amaga. Khoe-i hîna ǁguibasa ra dī-i, ǁî-i omaris ǁanin tsî pristergu tsîn ge ǁguiba-e ge xamani-i ǁgan-e gere ǂû. Xawe ǀnî ǃâ-i xamani-i di i ge Jehovaba ǃoa ǁguibas ase gere māhe. Mâ ǃâna nēna ge ī? Jehovab ge kauba xamani-i ǃgâi ǃâb ase gere mû. ǁÎb ge mîs tsîna ge hî ǀnî ǃâgu xamani-i di-i ǃnaide ǃkhōǂgā hâse kaise ra ǃgôaǃgâhe ǃkhaisa. (Lev. 3:6, 12, 14-16) ǁNās ǀkhab ge Jehovaba kaise gere ǃgâiaǂgao Israelǁî-i ge ǁnā ǃâgu xamani-i di-i tsî kaub tsîna gere ǁguiba o. Israelǁî-i hîna ge nēti i ǁguibasa gere mā i ge gere ǁgau Eloba i ǁî-i ǁkhāsib ǃnâ hâ i hoa-e ra mā ǃkhaisa. ǁKhā ǀgaub ǃnâb ge Jesuba Jehovaba ǁîb ǁkhāsib ǃnâ ge hâ în hoana ge mā ǁîba ǃoabas ǃnâ-ū ǀnambib a amaga. (Jhn. 14:31) Jesub ge Elob ǂâisa dīs xa kaise ge ǃgâibahe i, ǁîb ge Elob di ǂhanuga ge ǀnam i. (Psa. 40:8) Jehovab ge kaise gere ǃgâiaǂgao Jesub ge māsenxase ǁîba gere ǃoaba o. w19.11 22-23 ¶9-10

Elobmîs ge ra mî ‘ǃnaniǁî tsēs’ aib ge Eloba ǃhūbaib ai hâ xūna kurus ǀkha ge ǀû. (Gen. 2:2) Xaweb ge Jehovaba sîsensa a ǀnam tsî “nēsis kōse ra sîsen.” (Jhn. 5:17) Jehovab ge ǃnani “tsēde” ge sîsen tsî hûǁî “tsēs” ai ge sâ, nēs ǃaromab ge Israelǁîna ge mîba în mâ hûǁî tsēs wekheb dis hoas ai sâ. Elob ge ge mî sâtsēs ge ǁîb tsî Israelǁîn ǁaegu ǁgauǁgaus ase ge ī-i di. (Eks. 31:12-14) ǁNā tsēs ai sîsen tama īs ge hoa khoena ge ǃkhōǂgā hâ i ǀgôaron, ǃgān tsî xamanin tsîn hoana. (Eks. 20:10) Nēs ge khoena gere hui în gagasi xūn ǃaroma ǃnāsa ǁaeba ūhâ. ǂGui ǂgomdi ǂgaeǂgui-aoga Jesub ǁaeb ǃnâ sâtsēs xa aitsama ǂhanuga ge ǂnûiǂgā. ǁÎgu ge gere mî sâtsēs ai ǃhoroba ǂûs amsi ǃōras tamas ka io ǀaesen hâ khoe-e ǂgauǂgaus ǂhanu tama hâ di. (Mrk. 2:23-27; 3:2-5) Xawe nēs ge Elob di ǂâibasen tama ge hâ īsa tsî Jesub ge nēsa ǁnâu ǂgao gere khoena ge ǂanǂan. w19.12 3-4 ¶8-9

Jehovab ǀgaugu xa da ga ǃnāsase ǁkhāǁkhāsen o, o da ge ǁîba ǃgâise a ǁgae ǁkhā. Davib ge ǁîb di ǀhomsi ǁGûba ǃgâise ge ǂan i tsî nau khoen ǀkhab gere sîsen o ǁîb ǀgauga ge ǁgae ǁkhā i. Davib ge ǃgâi ǀhōsagusisa Jehovab ǀkha ūhâ i amagab ge ge Israeli di Gao kai. Tsîn ge Israelǁîna ge ǀnam bi i tsîb ge Jehovaba ǃgâi aiǁgaus ase nau Gaogu ǃoa gere sîsen-ū bi. (1Gao. 15:11; 2Gao. 14:1-3) Tae-e da go ǁkhāǁkhāsen? “Elob di ǁgaeǁgae-ao” kai da ge nî. Jehovab ǀgauga da ga ǁgae o, o da ge ǁîb ǀgôa da a ǃkhaisa ra ǁgau. (Efe. 4:24) Jehovab xa da ge ǁkhāǁkhāsen ǀû tide. (Aoǁn. 3:11) Jehovab xa da matikō xūna a ǂans ge ǂhâǂhâsa tama hâ xawe ǂan da a xūn ǀkha da tae-e ra dīsa. ǁKhāǁkhāsen da ra xūna da ga ûiǂui tsî sada ǀnamǀnamxa ǁgûba ǁgae o, ob ge sada ǃoa nî ǀgū. (Jak. 4:8) ǁÎb mîs ǃnâb ge ra mîba da ǁîb ǁnān hîna ǁîb xa ra ǁkhāǁkhāsen ǂgaona ǁnāxūǃnâ tidesa. w19.12 20 ¶20; 21 ¶21, 23

Jakob ge ǁîb ǀgôagu haoga ge ǀnam i xaweb ge 17 kurixa Joseba ǃnāsase ge ǀnam i. Joseb ǃgâga mati nēs xa gere tsâ? ǁÎgu ge ǁîba ge suri tsoatsoa tsîgu ge nēs xa ǃaroma-e hâse ge ǃhui bi tsoatsoa. Joseb ge xū-e ge dī tama hâ i ǁîb ǃgâsagu nî ǃhuiba bi-e. Xawe gu ge Joseba ǃgādī-es ǃaroma ǁamaxū tsî ǁîgu ǁgûba ge mîba ǁîb ǀnamǀnamsa ǀgôab ǃgarob ǀguru-i xa ge ǃgamhe di. Surixasib ge ge ǃaroma i gu omaris ǂkhîba ūbe tsî ǁîgu ǁgûb ǂgaoba khôa. (Gen. 37:3, 4, 27-34) Surixasib ge ǁōb ǁkharagu di ǀgui hîna ‘ǁgans di sîsengu’ Elob gaosiba ǀumi tidegu di ǀguiba. (Gal. 5:19-21) Surixasib ge ǁgai ǀgaugu hîna sada ǃnâ a ǃhanasagu xa ra ǃaroma-e. Joseb ǃgâsagu aiǁgausa xu da ge a mû ǁkhā matib surixasiba ǀhōsaguside khôa tsî omaridi ūhâ ǂkhîba a ūbe ǁkhā ǀgausa. Joseb ǃgâsagu ge dī xūna da dī tide xawe da ge ǀoasa kurusa ūhâ tama hâ tsî tsū ǂgaogu tsîna ūhâ. Nēs ǃaroma da ge ǁaen ai surixa ǂgaoba a omkhâi ǁkhā. w20.02 14 ¶1-3

ǀGui ǃnās aib ge Jehovaba ǃanu gagaba Moseba xu ū tsî Israelǁî aogu hîna ge tents ǀgūse mâ i ga ge mā. Tsî ǁaero i khaoǃgâb ge Moseba ge mû ǀhaos dawa ge hâ tama hâ i ǀgam Israelǁî aokha tsîn ge ǃanu gagaba hō tsî kēbo-aokha ase a tanisen tsoatsoasa. Matib ge tanisen Josuab ge mîba bi o îb ǁnā khoega ǂkha? Moseb ge nē ǀgam khoega Jehovaba xu gere hō aiǂhanuba ge suri tama hâ i. Xaweb ge ǁîgu ǀkha ge ǂkhî i. (Num. 11:24-29) Tae-e da Moseba xu a ǁkhāǁkhāsen ǁkhā? ǀHaohâb ǃûi-aots ga io, ots ge ǃgâsa-e sadu a ǀnam aiǂhanuba ǁkhāǁkhā kai-e, i-i ǁî-e ǀhaohâba kōǃgâ ǁkhā? Xawe du ga tsâmtsîǃnâ o Moseb khami o du ge ǁaixa tide. ǀNî hâ ǃgâsa-e nēsa ǁkhāǁkhāsa du ga ǂgan-e o, î-i ǁî-i tsîna ǁaeb da ī khami nēsa ǃgâise dī ǁkhā. Xawe du ge ǃgâiǃgâibasensa nî ūhâ nau ǃgâsana ǁkhāǁkhās ǃnâ. w20.02 15 ¶9; 17 ¶10-11

ǀAeb mâsib ge emosioneel ǁgâiba sida ai a ūhâ ǁkhā. ǀNîsi da ge tao ǁkhā khoen ga mû o sida ǀkha i xū-e tsūsa tamas ka io da ga hoaǁae nau khoen huiba ǂhâ o. Nau khoen ga ǀaesen da hâsa ga ra ǀū i xawe da ge taos tsâsiga a ūhâ ǁkhā dī da geres xa da ǃnāsase a dīhō ǁoa amaga. Jehovab ge ǁnāti ī mâsigu ǃnâ ra ǂkhâǃnâ da. Mâ ǀgaub ǃnâ? Elobmîs ǃnâb ge Jehovaba ǂgui ǃgâi xūna ge mîba da hîna ra ǂâiǂâiǃnâ da na ǁîb ǃoagu da a ǂhâǂhâsa ǃkhaisa ǀaesen da ga xawes tsîna. (Psa. 31:19; 41:3) Elobmîs ǃnâ-ūb ge Jehovaba nî hui da i da sida ǀaeb mâsib xa da ūhâ ǂâiǂhansende sîsenǂam. ǂAn re Jehovab sida ra ǃkharu ǃnâ ǃgomga a ǂansa. ǁÎba ǂgan re îb hui du i du sadu mâsiba ǃgâi ǀgaub ǃnâ mû ǁkhā. Tsî Elobmîs ǃnâ ǁkhaeǂgao du ǁkhā a haisi-amsa ôa re hînab ge Jehovaba ǁnāpa a ǂgāsa sadu ǃgao. Xoadi hîna Jehovab matikōse ǁîb di ǃoaba-aona ra ǃgôaǃgâ ǃkhaisa ra ǁgaude ǃgaoǃgâ re. Nēsa du ra dī khami du ge nî mû Jehovab ǁnān hîna ǁîba ǂgomǂgomsase ra ǃoaban hoan ǃoa-ai a khoexaǃnâ ǃkhaisa.—Psa. 84:11. w20.01 15-16 ¶9-10; 17 ¶12

Isaki ge kaise ge ǃkhū hâ i tsîn ge Filisteǁîna Isaki ǃkhūsisa ge ǂhaba hâ i. (Gen. 26:12-14) ǁÎn ge Isaki ge ǁîb xamanina ǁgam-e gere mā xū tsaudi tsîna ǃhūb ǀkha ge ǂgan-am. (Gen. 26:15, 16, 27) Filisteǁîn khamin ge ǀnî khoena nētsē ǂgui ǃkhūsisa ǁîn xa ūhâ khoen xūna ra ǂhaba. ǁÎn ge ǁîn xūn ǀguina ǂhaba tama hâ xawe nē khoen ǁnā xūna nî ūhâs tsîna ǂgao tama hâ. Jodeǁî ǀgapipristergu ge Jesuba gere suri ǂgui khoen ǁîba gere ǃgôaǃgâ amaga. (Mat. 7:28, 29) Jesub ge ge Elob di ǂnûǁkhaeba-ao i tsî amaba gere ǁkhāǁkhā. Xawe gu ge nē ǀgapipristerga ǂhumiba Jesub xa gere ǃhoa ǁîb ǀonsa ǀuriǀuris ǃaroma. (Mrk. 15:10; Jhn. 11:47, 48; 12:12, 13, 19) Tae-e da nē aiǁgausa xu a ǁkhāǁkhāsen ǁkhā? ǃGâsan hîna ǀhaohâb ǃgâsan xa ǁîn ǃgâi ǀgaugu amsi a ǀnam-en ǃoa-ai surixa gagaba omkhâisa da ge ra ǂgōsen ǂgao. Tsî ǁîn ǃgâi ǀgauga ra ǁgae ǂgao.—1Kor. 11:1. w20.02 15 ¶4-5

ǂÂi re 2 500 kuriga ǃkharu hâse du Persiab ǃnâ ǁan hâ ǃkhaisa. ǃHūb di gao-aob ǀkha du ge xū-e ra ǃhoa ǂgao tsî du ge Shushansa ǃoa ra ǃnari. Gao-aoba du ge ǂanǂan tsî ǁîb mā-ams ose sī a mû ǁoa. Nēsa du ga dī o, o du ge sadu ûiba a ǂoaǃnâ ǁkhā. Jehovab ge Persiab gao-aob khami ī tama hâ khoesi gao-aogu xab a ǀgapi xawe. ǁÎba da ge hoaǁae a ǀgū ǁkhā. ǁÎb ge ǁîb ǀkha da supuse nî ǃhoa ǃkhaisa ǂhâba hâ. Aiǁgauseb ge ǀgapi ǂgai ǀonde ūhâ Hoaxūn kuru-aob, Hoaǀgaixab tsî Hoaxūn ǂgaeǂgui-aob di hâde xaweb ge ti “Îtse” di da nî ǂgai bi ǃkhaisa ra ǂhâba. (Mat. 6:9) Nēs ge kaise ra tsâǀkhā da Jehovab nēti ī ǀgaub ǃnâ da nî ǂgaiǀî bi ǃkhaisa ǂhâba hâsa. Jehovaba da ge ti “Îtse” di a ǂgai ǁkhā. ǁÎb ge sada ûiba a mā xui-ao. (Psa. 36:9) ǁÎb a sada ǁGû amaga da ge ǁîba nî ǁnâuǀnam. ǁÎb ta mî xūna da ga dī o, o da ge ǂgui ǀkhaega nî hōǃâ. (Heb. 12:9) Nē ǀkhaegu ge ǀamo ûiba ǃkhōǂgā hâ nēs ge ǀhommi ǃnâs gas tamas ka io ǃhūbaib aisa. w20.02 2 ¶1-3

Sada mîǁguib ge î da Elobmîsa da ra ǁkhāǁkhā khoena hui în gagasise kai. (Efe. 4:13) Elobmîs ǁkhāǁkhāsa i ga khoe-e ūǃoa, o i ge ǁî-i mati nēsa xu nî ǀamas ǃnâ ǀgui ǃgâiǃgâibasensa ūhâ. ǁÎn ǀnammi Jehovab ǃoa-ai ra kai khamin ge matin nau khoena nî huis xa a ǂâi tsoatsoa ǁkhā, nēs ge ǀhaohâb ǃgâsan tsîna ǃkhōǂgā hâ. (Mat. 22:37-39) ǁAeb ga ǂhanu o tā ǃkhō-oa re sadu Elobmîsa ra ǁkhāǁkhā khoe-e mîbasa sada aiǂhanuba ūhâsa ǀapeǂhomisa marisise ǂkhâǃnâsa. Sadu Elobmîsa ra ǁkhāǁkhā khoe-e hui re mati i ǃgomsina nî sîsenǂamsa. Nē aiǁgaus xa ǂâi re sadu Elobmîsa ra ǁkhāǁkhā khoe-i ǁāǁnâsa tama aoǁnâ-ao i ga mî o ǀhaohâb ǃnâ hâ ǃgâsa i xa i ge go tsûtsû-e di. Tā mîba i re ham-i a ǂhanu tamas ka io ǂhanu tama hâsa xawe ǁguiǃāba i re Elobmîs tae-e i ǁî-e nî dīsa ra mîsa. ǁÎ-i ge ǃgâsa-e ǀûba tsî nēsa a ǀuru ǁkhā tamas ka io i ga nēsa dī ǁoa o, o i ge ǃgâsa i ǀkha a ǃhoa ǁkhā ‘ǃgâsaba hōbasens’ ǃaroma. (ǀGopeǀnō re Mateub 18:15.) Sadu Elobmîsa ra ǁkhāǁkhā khoe-e hui re tae-e i sī nî mîsa. w20.01 5-6 ¶14-15

ǃGôaǃgâsiba da ge ra ǁgau, Jehovab xa ǀûba-esa da ga ǀgoreba, ǁnamasa ūǃoa tsî ǃgarise sîsen o, i da tā ǁkhawa ǁkhā, ǁore-e dī. Nē xūna da ga dī o, o da ge sada ǂkhîba nî hō-oa. ‘Jehovab ge ǀgūse hâba ǁnān, khôaǂkhūsa ǂgaoga ūhâna, tsîb ge khôaǂkhūsa ǂâidi â-ina ra sâu’ nēsa ǂans ge kaise ra ǂkhâǃnâ da. (Psa. 34:18) Nē ǀuni tsēdi ra ǀgu khami di ge ǂâi ǂkhansende nî ǂgui. ǂÂiǂhansens tsâsiga da ga hō o, o da ge ǁnā ǁaeb ai Jehovaba ǃoa nî ǀgore. Elobmîsa ǃgâise ôaǃna re. Hannas, apostel Paulub, tsî Gao-aob Davib tsîn di aiǁgaude xu ǁkhāǁkhāsen re. Sadu ǀhomsi ǁGûba ǂgan re îb hui du mûǂansa tae-i sadu ǂhansende ra ǃaromasa. (Psa. 139:23) Mā-am bi re îb sadu ǃgomsin ǀkha hui du ǃgōsase ǁnān hîna du a tani ǁoana. Nēsa du ga dī o, o du ge Psalmdi xoa-aob khami a i ǁkhā Jehovaba ǃoa ge ǁnaeba: “Ti ǂâidi ge ti ǃnâ ǂguio, o di ge sa ǁkhaeǂgaode ti ǀomsa ge khoakhoa.”—Psa. 94:19. w20.02 24 ¶17; 25 ¶20-21

Elob ge ǁîb di ǃanu gagaba ge sîsen-ū i i ǁîb di ǂâide Elobmîs xoa-aogu di ǂâidi ǃnâ “ǃgomǂgāǃnâhe.” Elobmîsa da ga khomai tsî khomai da ra xūna ǂâiǃgâ o, o i ge Elob di daoǁgaude sida ǂgaob tsî ǂâidi ai nî hâ. Nēs ge nî huida i da ǀkharaǀkharana sida ûib ǃnâ dī tsî Jehovaba ǃgâiaǂgao kai. (Heb. 4:12) Xawe ǃanu gagaba xu da ga hoase ǀama ǂgao o, o da ge ǁaeba ǁamaǂui tsî Elobmîsa nî ôaǃnâ tsî ôaǃnâ da ra xūn xa ǃgamse nî ǂâi. Nēsa da ga dī o, os ge Elobmîsa mî tsî da ra dī xūn hoana nî tsâǀkhā. Da ge Eloba ǀguiba nî ǃoaba. (Psa. 22:22) Sida di ǀhaodi tawa i ge Jehovab di ‘ǃanu gagaba’ hâ. (J.ǂHa. 2:29) ǀHaodi tawa da ge ǃanu gagaba ra ǀgoreba. Gaosib ǁnaetsanadi hîna Elobmîs ai ǃgaoǃgaosade ra ǁnae tsî Elobmîs ai ǃgaoǃgaosa daoǁgaude ra mā ǃgâsaga ra ǃgâ, hîna ǃanu gagab xa ǁgaumâisa ga. ǃAnu gagaba xu hoase ǀamas ǃgao da ge ǀhaodi ǃgaos tsîna nî aiǂhomisen i da ǃereamde mā ǁkhā. w19.11 11 ¶13-14