Oktoberi

Jehovab ǁîb khoena ra ǁkhauba ǃkhaisa da ge ra mû. ǂÂi re: Sada ge hoaraga ǃhūbaib ǃnâ amaba aoǁnâ tsî ra ǁkhāǁkhā. (Mat. 28:19, 20) Tsî da ge nēs ǀkha ǁGâuab ǂhumiba ra ǂhaiǂhai. Tsî ǁGâuab ge sada sîsenab ga ǀam kai ǂgao hâ o, o ǀnai ga dī hâ xawe ǁnā ǀgaiba ūhâ tama hâ. ǁNā-amaga da ge demonga a ǃao ǁoa. Jehovab ǃoa-ai da ga ǂgomǂgomsase hâ o, o gu ge demonga hâhâ ra tsûba ǃaromaba da tide. Xawe da ge hoada ǂkhaba gagaga mâǃoa tsî Jehovab ǃnâ nî ǂgom. Nēsa da ga dī o, o da ge ǂgui ǀkhaega ǃkhōǃoa tsî ǁGâuab ǂhumiba xu nî ǁkhaubahe. Tsî da ge demongu tsîna ǃaos gagaba omkhâi tide. Xawe hoan ǂam-ai da ge sada ǀhōsagusisa Jehovab ǀkha nî ǀgaiǀgai. “ǁGâuaba mâǃoa” dib ge Jakobuba ge xoa. “Ob ge nî ǁhâxū du; Eloba ǀgū, ob ge sado nî ǀgū.”—Jak. 4:7, 8. w19.04 24 ¶15; 25 ¶18

Sadu “ǀgôagu ge ǀumixūga” Jehovaba xu. ǁGûn di ǃereams ge ǁîn ǀgôana ǁkhaubasa. Tae-e du dī ǁkhā sadu ǀgôana ǁkhaubas ǃnâ ǀgaiǃkhōs ǃoa-ai? ǂGurose, sadu ǀgôana ǀgaiǃkhōs xa ǁkhāǁkhā re. Khoen hîna ǀgôana ra ǀgaiǃkhōn xa ǂanǂui re tsî tae ǃnôa ǀgaugan ra sîsen-ūs tsîna. Tsî nēs ǃoa-ai ǂkhaikharise nî hâ. (ǂKhm. 22:3; 24:3) ǂAn da ge nî ǀgôana ra ǀgaiǃkhō khoen ge ǃnāsa ǁaeba ǁnān ǀgôan a ǂan na. ǀGamǁîse, ǃgâi ǃhoa-ūgu ǀgauga ūhâ re, sadu ǀgôan ǀkha. (Deu. 6:6, 7; Jak. 1:19) ǂÂis ǃnâ ūhâ re ǀgôan ge nē ǃnôa ǁhōga ǂanǂans xa supubahe tama hâ. ǁÎn ge ra ǂâi ǂgomǃgâhen tide di tamas ka io ǁnān hîna ra ǀgaiǃkhō nîn xa ra ǃaoǃaohe în tā nēsa ǂanǂan. Xū-i a tsū ǃkhaisa du ga hōǃâ o, o dîǃnâ nî re tsî ǁnāpaxū ǂōrisase ǃgâ re. ǃNonaǁîse, sadu ǀgôana ǁkhāǁkhā re. Mî tsîn nî dī xūna ǁkhāǁkhā nî re khoe-i ga ǃgâi tama ǀgaugu ǃnâ tsâǀkhā nî o. w19.05 13 ¶19-22

Tae-i ǃaromab Jehovaba ǀgapi ǂgaoxa khoena a ǃhuisa? ǀGui ǃaromas ge ǁnān hîna ǀgapi ǂgaoxan ge ǁGâuab di ǂūga ra ǁgauǂui. ǂÂi re, ǁGâuab ge gere ǂgom Jesub hîna ge Elob ǀkha hoa xūna a kurub ǁîba nî ǀgoreǀî di. (Mat. 4:8, 9; Kol. 1:15, 16) ǁNān hîna nē ǂâiǀgauba ra ūǃoan ge ra mûǂan nē gā-aisib ǃhūbaib dib Elob xa gâresib ase ra mûhesa. (1Kor. 3:19) Elobmîs ge ra huida ǀnōsa mûǂuiba ǁîǀnamsenxasib ǃoa-ai ūhâsa. Elobmîs ge ra mî tsū tama i ge hâ aitsama ǀnamsensa di. Jesub ge ge mî: “ǀGūkhoebats ge nî ǀnam” nēs ge ra ǂâibasen i da ǀnōsa mûǂuiba sada ǂhâsigu ǃoa-ai ūhâ. (Mat. 19:19) Xawes ge Elobmîsa mî tama hâ i da nau khoen xa da a ǂhâǂhâsa di ǂâi. Xawe ra mî: “Xū-i xare-e tā ǂnīǂnīsens tsî ǁîǃgôasensa xu dī, î du ǃgamǃgamsens ǃnâ nē-e nau-e ǁî-i ǃgâ-ai ǀgapise ǃgôa.”—Fil. 2:3; Rom. 12:3. w19.05 24 ¶13-14

ǂÂi-oa re Elobmîsa du ge ǂguro a ǁkhāǁkhāsen tsoatsoa tsî ūǃoa tsî a dī ǀkharaǀkharan xa Jehovaba ǃoabas ǃaroma. ǂGui da xas ge nēsa ǁgai xūn hîna da gere dīna ǀûsa ge ǃaroma. (1Kor. 6:9-11) Jehovaba da ge ra gangan nēs ǀkhab ge huida ǃkhais ǃaroma. Xawe da ge tā tātsē nî mî ǃaruǀî da ǀkharaǀkharana dīsa ǂhâ tama hâ di. ǁGai ǁorena da ge dī ǀû ǁāǁnâhe da nîs aiǃâ xawe da ge noxoba ǀgaisase nî sîsen i da tā ǁîna ǃoa oa. Nēs ǃaroma da ge ǀgam xūna nî dī. ǂGurose da ge tā ‘nē ǃhūbaib ǀkha ǀguiti nî dīsen.’ ǀGamǁîse da ge nî ‘ǀasa kaisen’ sida ǂâiǀgaub ǃnâ. Nē ǀkharaǀkharan ge mûhe ǁkhā ǀkharaǀkharan xa ǀgui ge hâ tama hâ i. Xawe mâ ǃâb sada ûib dib hoaba ra tsâǀkhā. Sada di ǂâide da ge nî ǀasa kai sada ǂganagab, tsâsigu tsî tanisen ǀgaugu tsîn hoana ǃkhōǂgā hâse. w19.06 9 ¶4-6

ǃGomsina da ga hōǃâ o, o da geǀhaode ǁhaoǃnâs ǃnâ-ū ǀgaiba ra hō. ǀHaodi tawa da ga hâ o, o da ge Jehovaba ǃēsa ra mā ‘mâǃgâ tsî ǁkhaeǂgaodasa.’ ǁNāpab ge ǁîb ǃanu gagab, ǁîb Mîs tsî ǁîb khoen ǃnâ-ū ra ǀgaiǀgaida. ǀHaodi tawa da ge ǃēsa ra hō ‘ǁkhaeǂgaogusa.’ (Rom. 1:11, 12) Sophia di ǀon hâ ǃgâsas ge ge mî: “Jehovab tsî ti ǃgâsan tsîn ge ge huite aiǃgûsa. Sida ǀhaohâb ǀhaodi ge kaise tita ǃgao ge ǂhâǂhâsa i. Mûǂan ta ge ge aoǁnâ sîsenni tsî ti ǀhaohâb ǃnâs tsîna ta ǃgarise ra sîsen khami ta ge ti tsûaǂgaob tsî ǂâiǂhansendi tsîna ǃgâise ra sîsenǂam.” Tsûaǂgao hâse da ga tsâ o, o da ge ǂâis ǃnâ nî ūhâ Jehovab ge hānîǁaeb ǃnâ ǀgui tsûaǂgaoba ūbē tide xawe nēsis tsîna nî huida tsûaǂgaob hîna da ra hōǃâb ǀkha. ǁÎb ge “ǂâibasens tsî ǀgaib” tsîna ra māda tsûaǂgaob tsî xū tamase tsâs tsîn di tsâsiga sîsenǂams ǃaroma.—Fil. 2:13. w19.06 19 ¶17-18

Jesub ge ǀnîsi kaise ǂhâǂhâsa xū-e ge ūhâ i ǁînab gere mîba ǂgao-e nēs ǃaromab ge nēsa ǁîb ǁōb khâis khaoǃgâ ǂgurose ge a dī. Jesub ge ǁnā ǀhaos tawa ǁîb di ǁkhāǁkhāsabena nē ǂhâǂhâsa sîsenni hînan nî dīse ge ib xa ge a mîba, hîna da sada tsîna nētsē ra dība. Jesub ge ge mî: “ǁNā-amaga ǃgûǂoa, î go hoa ǁaede ǁkhāǁkhāsabedī . . . Î go ǁîna ǁkhāǁkhā sago ta gere mîmān hoana ǃkhōǀgaipesa.” (Mat. 28:19, 20) Jesub ge ǂhâba hâ ǁîb saosaben hoan aoǁnâ sîsenna nî dīsa. ǁÎb ge nēsa ǁîb di ǂgomǂgomsa 11 apostelgu hînab gere ǃhoa-ū gu ǀguiga ge mîmā tama hâ i. Mati da nēsa a ǂan? Jesub ge ǁîb ǁkhāǁkhāsabega nē mîmāsa a mā o, o gu ge ǁîgu ǀguiga Galileab ǃhommi ai ge hâ tama hâ i. ǂÂihō re ǀhomǃgāb ge tae-e khoede a mîbasa: ‘Galileab ǃnâ du ge nîra mû bi.’ (Mat. 28:7) Nēs ǃaroma i ge ǀnîsi ǂgomǂgomsa khoedi tsîna ǁnā ǀhaos tawa ge hâ i. w20.01 2-3 ¶1-4

Jesub ge ge ǁguiǃā tae-i ǃaroma da mâǃoahesa nî ǃâubasensa. ǁÎb ge ge mî nē ǃhūbaib ǃâ tama da hâ amaga da ge nî mâǃoahe di. Mâǃoahe da ra ǃkhais ge ǂâibasen tama hâ Jehovab ǀkhaeba da ge hō tide di. Xawe ra ǁgau ǂhanu xū-e da ra dīsa. Khoesib ge hoaǀgaixa Elob, Jehovab di sîsena a ǀam kai ǁoa. ǂGuin ge ge dītsâ xawe ge dan tama i. ǀGamǁî torob ǃnâ ge ī xū-e ǃoa kō re. ǁNā ǁaeb ǃnâ gu ge ǂgui ǂhanuga Jehovab khoena ǀgaisase gere mâǃoa. Jehovab di ǀHûǀguitimî-aon sîsenni ge Nazis xa ǀgui Duitsǃhūb ǃnâ ge ǀam kaihe tama hâ i xawe Australiab, Kanadab tsî ǀnî hâ ǃhūgu ǃnâs tsîna. Kō re tae-i ge īsa. 1939ǁÎ kurib ǃnâb ge toroba a tsoatsoa o, o i ge 72 475 aoǁnâ-aona ǃhūbaib ǂhawase ge hâ i. Torob ǀams ai 1945ǁî kurib ǃnâ i ge Jehovab ǀkhaeb ǀkha 156 299 aoǁnâ-aona ge hâ i. Aoǁnâ-aon di ǃgôab ge ge ǀarosen. w19.07 9 ¶4-5

Nēsi du ga khoe-e Elobmîsa ǁkhāǁkhā tama i xawe du ge ǀnî hâ ǀgaugu ǃnâs tsîna a ǁkhāǁkhāsabedī ǁkhā. Aiǁgause, ǀasase Gaosib ǀHû-ommi tawa ra sī khoena da ge nî ǁkhoreǁhare tsî ǁîn ǀkha ǀhōsagusisa nî kuru. Nē ǀgaub ǃnâ da ga ǀnamma ǁgau o, o da ge ǁîna ra ǁgau ama Xristeǁî da a ǃkhaisa. ǀHaodi tawa da ra mā ǃereamdi ge ǀasase ǀhaodi tawa ra sī khoena a ǂkhâǃnâ ǁkhā în ǁîn ǂgoms ǃnâ ǁgâiǂuisen. ǀAsa aoǁnâ-ao-i ǀkhas tsîna da ge aoǁnâ sîsenni ǃnâ a sîsen ǁkhā tsî ǁî-e a hui ǁkhā mati i Elobmîsa nî sîsen-ūsa khoe-e ǁkhāǁkhās ǃnâ. Nēsa da ga dī o, o da ge ǁî-e nî hui Xristuba ǁgaesa. (Luk. 10:25-28) ǂGui Xristeǁîn ge ǂhâǂhâsa xūn hînan ra dīna ūhâ. Xawen ge nē Xristeǁîna ǁaeba ra ǁamaǂui khoena Elobmîsa ǁkhāǁkhāsa tsî kai ǂkhîba nēsa xu ra hō. w19.07 17 ¶11, 13

Apostel Paulub ge ge mā-am tama hâ i, în dīb ge ǃgâi xūn tsî tsū xūn tsîna ǁîb ǂâisa Jehovaba ǃoabasa xu ǂgaeǁnâ bi. ǁÎb ge ge mî ‘ǃkharuge xūna ǀuru’ tsî ta ‘aiǃâ hâna ǃoa ra ǀhōǂuisen’ î ta nē ǃkhoeǀhûgusa ǀams kōse ǃkhoe. Mâ ǃnôa xūna Paulub di ǂâisa ga ǂgaeǁnâ hâ? ǂGuroseb ge Pauluba ǀgapi ǁkhāǁkhāsensa Xristeǁî kaib nîs aiǃâ ge ūhâ i Jodeǁîn ǁaegu. Xaweb ge nēn hoana “ǀapon ase ge ǃgôa.” (Fil. 3:3-8) ǀGamǁîse Xristeǁînab gere saoǃgon ǃkhais ge tsūse ga tsâ kai bi hâ xaweb ge nēsa ge mā-am tama hâ i Jehovaba ǃoaba ǀû kai bisa. ǃNonaǁîse ǁîb ge ge ǂâi tama hâ i hoa ǃgâi xūn hînab ge Jehovaba dīban ǂâu hâ di tsîb Jehovaba nî ǃoaba ǀû di. Paulub ge ǃgâi aoǁnâ sîsen-e ge ūhâ i ǃkhōsis ǃnâ ūhe, ǂnauhe tsîb ge saran tsî ǂûn tsîna ūhâ tama hâ i xawe. (2Kor. 11:23-27) Xaweb ge Pauluba ge ǂan i dīb ge ǃgâi xūn tsî ǃkharu ǃnâb ge ǃgomsin hoan ǃnâb nî mâǀgaibesa ǀams kōse. Sada tsîn ge ǁkhā xū-e nî dī. w19.08 3 ¶5

ǂGui ǃgâsan ge ǃnorasasen a aoǁnâ ǁoa ǃhūgu ǃnâ ra hâ ǁnā-amaga ǀnî hâ ǀgauga ra ôa aoǁnâs diga. (Mat. 10:17-20) ǀNî ǃhūb ǃnâb ge ǃnarimâ ra mûǂam-aoba ge mî, i i mâ aoǁnâ-ao i hoa-e ǁî-i ǀaokhoen, ǁî-i ǁan ǁare-aon, skol ǀhōsan, sîsenǀhao-aon tsî ǂan an a khoen tsîna aoǁnâba. ǀGam kurikha ǃnâ i ge ǀhaohâga ǁnā ǂharis ǃnâ ge ǀarosen. ǀNîsi i ge sida ǃhūb ǃnâ ǃnorasase aoǁnâsa mā-amsa. Xawe da ge nau ǃgâsan hîna aoǁnâsa mā-amsa tama ǃhūgu ǃnâ ra hâna xu ǂûǂûsa xū-e a ǁkhāǁkhāsen ǁkhā: Hoase da ga aoǁnâ sîsenni ǃnâ dī o, ob ge Jehovaba ǁkhāsiba nî mā da aoǁnâs diba ǃgomsina da ga hōǃâ xawe. (Fil. 2:13) Nēsi da ge ǁgariǁgarisase ǂhâǂhâsa xūna ǂgurose mâi, ǂnao-o, nau khoena ǃnôakaisa xu ǂgōsen tsî ǂhanu-aisib ǂûna nî tani. Nēsa da ga dī o, o da ge ǀnammi ǃnâ nî ǃnāǂam tsî ǂkhaisiba Jehova Eloba nî mā. w19.08 13 ¶17-18

Khoen hîna ǁîn ǂhâba hâ xūn ǀguin nî dī-es tsî nau khoen di ǂâide ǃgâ ǂgao tama hân ǀkha da ge hâǀhao ǂgao tama hâ. Xawe da ge kaise a ǃgâibahe sada ǃgâsan ǀkha hâsa ǁîn ‘ǀkhomxa, ǃgâsaǀnamxa, ǀkhomxaǃnâ tsî a ǃgamǃgamsenxa’ amaga. (1Pet. 3:8) Nēti i khoen ǀgūse da ga hâ ǂgao o, on ge ǁîn tsîna sada ǀgūse nî hâ ǂgao ǃgamǃgamsenxasiba da ga ūhâ o. ǃGamǃgamsenxasib ge sada ûiga ra supu kai. ǁAen ai da ge xūna mû tamas ka io a ǃkharu ǃnâ ǁkhā hîna ǂhanu tama hâna. Khoen hîna ǀgapi ǂansa ūhân ge hoaǁae koahe tama hâ. Tsî ǁnān hîna ǀoro ǂansa ūhân ge ǁaen ai ǃnāsase ra koahe. Xaweb ge Salomoba ge mûǂan ûiba da īb a khami nî ūǃoa tsî tā ǂhanuǂhanu ǁoa da a xūn xa nî tsûa danasa. (Aoǁn. 6:9) ǃGamǃgamsenxasiba da ga ūhâ o, o da ge ûiba hāb ra khami ūǃoa tsî ǃnāsa-e ǃâubasen tide. w19.09 4-5 ¶9-10

ǁGûgu hîna omaride kōǃgâs ǀgaiba māhe hâgu ge ǁîgu ǀgaiba nî sîsen-ū ǁîgu omaris ǁanina omkhâisa. Jehovab ge ǁgûga oms danigu ase ge ǁgaumâi tsî ǂhâba hâ îgu ǁîgu ǀgôana ǁkhāǁkhā, daoǁgau tsî ǁnama. (1Kor. 11:3) Nēs ge ǂâibasen tama hâ ǁgûgu ǁîgu aiǂhanuba mâ ǀgau i hoa-i ǃnâ a sîsen-ū ǁkhā di, ǁîgu ge Jehovab omaridi ǂnūbi-aob ǃoa-ai nî ǃeream. (Efe. 3:14, 15) ǁGûgu ge Jehovaba gu ra ǃnaga hâba ǃkhaisa ra ǁgau ǁîgu aiǂhanuba gu ga Jehovaba ra ǂkhîǂkhî ǀgaub ǃnâ sîsen-ū o. Tā Jehovab mā du hâ aiǂhanuga ǃgâi tama ǀgaub ǃnâ sîsen-ū re. Sadu dīsāde ǂanǃgâ tsî ǁnamasa ūǃoa re. Nēsa du ga dī o, on ge sadu omaris khoena sadu ǃgamǃgamsenxasib amsi ǃgôasiba nî ǁgau du. Sadu omaris ǀkha du ga ǀgore o, Jehovaba tsâ du ra ǀgausa mîba re, nēs ǃnâ-ūn ge sadu omaris khoena nî mû Jehovab huiba du ǂhâ hâ ǃkhaisa. Hoan ǂamai sadu ǃoabas Jehovab ǃoa-ai du ūhâsa as sadu ûib ǃnâ ǂhâǂhâsa. (Deu. 6:6-9) Sadu ǃgâi aiǁgaus ge ǀkhaeb ase sadu omaris ǃgao a īǁkhā. w19.09 15 ¶8; 17 ¶14; 18 ¶16

Markub ge nau khoena māsenxase gere hui. ǁAen aib ge apostel Paulub tsî apostel Petrub tsîkha ǀkha gere sîsen ǁîkha di ǁgaumâide kha ra taniǂui hîna. Markub ge ǁîkha ǂûn tsî hâǃkhais tsîna hōs ǀkha gere hui. (ǃNǃkh. 13:2-5; 1Pet. 5:13) Paulub ge Markub xa ge mî ǁîb ge ‘Elob gaosib ǃnâ ti ǀhaoǃoabasabe ge ība’ hîna ‘tita ǃoa ǁkhaeǂgaose ge ība.’ (Kol. 4:11) Markub ge ge Paulub di ǀgū ǀhōsa kai. Aiǁgause, Paulub ge ǀgamǁî ǃnāsa Romes ǃnâ 65ǁî kurib ǃnâ ǃkhōsis ǃnâ ūhe o, ob ge ǁîb di ǀgamǁî sîǂkhanisa Timoteuba ǃoa ge xoa. ǁNā sîǂkhanis ǃnâb ge Pauluba Timoteuba ge mîba îb Romesa ǃoa hā tsî Markub tsîna sī-ū. (2Tim. 4:11) Paulub ge Markub di ǂgomǂgomsa ǃoabasa gere ǃgôaǃgâ nēs ǃaromab ge Markub ǁnā ǃgom ǁaegu ǃnâ ǁnāpa nî hâ ǃkhaisa gere ǂhâba. Markub ge Pauluba ǂgui ǀgaugu ǃnâ gere hui, aiǁgauseb ge ǁîba ǂûn tsî scrolli tsî xoa-ū xūn tsîn ǀkha gere huiǃnâ. ǁKhaeǂgaos tsî ǂkhâǃnâs hînab Pauluba gere hōs ge ǁîba ge hui îb ǁîb ǃgom ǁaegu ǃnâ mâǀgai ǃgamheb nîs kōse. w20.01 11 ¶12-13

Sida ge aitsama māǁnâsens tsî ǃgarise ra sîsen-e ûiba ge ǁhûi. Jesub ge ge ǃkhâikhom da mâǃoa-e da nî di. Xawe da ge a ǂan Jehovab ge ǂhâ da hâ ǀgaiba nî mā da nē ǃgomsina mâǃoas ǃnâ. Mâǀgai da ra khami da ge ǀgaiba nî hō. (Jak. 1:2-4) ǂÂis ǃnâs tsîna da ge nî ūhâ Jehovab ge ǂhâ da hâ xūna nî mā da, Jesub ge nî kōǃgâ da tsî sida ǃgâsan ge nî ǂkhâǃnâ da di. (Mat. 6:31-33; Jhn. 10:14; 1Tes. 5:11) Jesub ge ǂgauǂgau kaikhoes ǁîs di “ǀaoǂnâba” xus ge khoakhoahe hâse gere tsâ. (Luk. 8:43-48) Xawes ge ǀamosib kōse khoakhoahes ǃgao nî Xristub di ǂgomǂgomsa ǁkhāǁkhāsabe kais ge ge ī. ǁÎsa tae-e ge dī? ǁÎs ga Jesub di ǁkhāǁkhāsabe kai hâ o, os ge kaise ǂoaǂamsa aiǂhanuba ga ūhâ ǁîb ǀkha ǀhommi ǃnâ ǃoabas tiba. Jesuba ǃoabas ǃgaos ge māǁnâ xūn hoan ge ǂâibasen-e ga ūhâ. Nēsi da ga ǀhommi tamas ka io ǃhūbaib ǃâubasensa ūhâ xawe da ge kaise ra ǃgâiaǂgao Jesub ǁkhauǂûis “tita ǃoa hā re” di hâsa da ge ūǃoa o. w19.09 25 ¶21-22

Davib ǃgāgu ge Nabal di ǀon hâ khoeb ai ǂû-e ge ǂgan. ǁÎgu ge ǃgarob ai gu Nabali gūna gere kōǃgâ amaga gu a ǂgan ǁkhā di ge ǂâi. Xaweb ge ǁîǃgôasenxa Nabala ge ǂkhā. Davib ge kaise nēs xa ǁaixa tsî Nabali tsî ǁîb di aore ǃgāgu tsîn hoana gere ǃgam ǂgao. (1Sam. 25:3-13, 22) Xawe Nabali kaikhoes Abigails ge ǁnâuǃāxa tsî kaise ge îsa ī. Xawes ge kai ǁkhoaǂgaosiba ǁgau tsî Davib ǂaidi tawa ge ǁnāǁgoe tsî ge ǀkhomma bi îb Nabali tsî ǁîb aogu tsîna tā ǃgam. ǁÎs ge ǃgâi ǀgaub ǃnâ ge mîba bi îb Jehovab di huib ai ǂgomaiǂnûi. Abigails di ǃgamǃgamsenxasib tsî ǃgâise ǁhûisa mîdi tsîn ge Davib ǂgaoba ge tsâǀkhā. ǁÎb ge ge mûǂan ǁîs Jehovab xa sîhe hâ ǃkhaisa. (1Sam. 25:23-28, 32-34) Abigails ge ǃgâi ǀgauga ge ūhâ i, nēs ǃaromab ge Jehovaba ǁîsa ge sîsen-ū. ǁKhā ǀgaub ǃnâb ge Jehovaba ǃgâsadi hîna nē ǀgauga ūhâde a sîsen-ū ǁkhā i di ǁîdi omaridi tsî ǀhaohâb tsîna ǂnubikhâi.—Tit. 2:3-5. w19.10 23 ¶10

Hoa ama Xristeǁîn ge nî dītsâ în tā Babilons kais ǀkha ǃgaeǀhao-e ūhâ. Amaba i nî ǁkhāǁkhāsen aiǃâ i ge Elobmîs ǁkhāǁkhāsen-ao-e ge ama tama ǂgoms di ǁani i. ǁÎ-i ge ǀnîsi ǁîn di ǂgomsa ǃoa ī tsî ǁnā ǁaxasigu ǃnâ gere ǁhao. Tamas ka io ǁnā ǀapeǂhumisa marisise gere ǂkhâǃnâ. Elobmîsa ra ǁkhāǁkhāsen khoe-i nî ǁāǁnâhe tama aoǁnâ-ao kais aiǃâ i ge ama tama ǂgoms ǀkha i ūhâ ǃgaeǀhaodi hoade nî ǀam kai. ǁÎ-i ge sîǂkhanisa ǁî-i hâǃnâ hâ ǂgomsa ǃoa nî xoa tamas ka io ǀapeǂhumidi hîna i ǃâ-e ūǃnâ hâde ǃoa, mî rase ǁî-i ǃaruǀî ǁîn ǀkha ǃgaeǀhao-e ūhâ tama hâ di. Ama Xristeǁî-i ge ǁî-i sîsenni Babilons kais ǀkha ǃgaeǀhaosa ūhâ tama hâ ǃkhaisa nî ôaǃnâ. (2Kor. 6:14-17) Tae-i ǃaroma da nēti ī ǂgomǁaposisa nēs xa ūhâ? Sada ge ama tama ǁkhāǁkhādi tsî dīxūn ama tama ǂgom didin hîna Elob mûǁae ǃgâi taman ǃnâ ǃâ ǂgao tama hâ.—Jes. 52:11. w19.10 12 ¶16-17

Jeremiab ge ǁîb ǀonsa tani hâ ǂkhanisa ge xoa tsî ǀnîsi 1 tsî 2ǁî Gao-aogu tsîna. Nē ǁgaumâis ge ge hui bi mûsa Jehovab ǀoasa kurusa ūhâ tama hâ khoen ǃoa-ai a ǀûbaǀnamxa ǃkhaisa. Aiǁgauseb ge ǁîba ge ǂan i Gao-aob Axab ge ǁîb di ǁgai ǀgauga xu ǃhōbasen o, ob ge Jehovaba ǁîb omaris ǁanin ra hîkākāhe ǀgausa mûsa xu ǁîba a ǁkhauba ǃkhaisa. (1Gao. 21:27-29) ǁKhā ǀgaub ǃnâb ge Jeremiaba ge ǂan i Manaseb ge ǃnāsa xūna Jehovaba tsûtsûs ǃnâ a dīsa Axab xa. Xaweb ge Jehovaba Manaseb tsîna ge ǀûba ǃhōbasen nî ge o. (2Gao. 21:16, 17; 2Kro. 33:10-13) Elob di ǃnūǃnâxasib tsî ǀûbaǀnamxasib tsîn ge Jeremiaba ge hui. Kō re Jeremiab ge mati Baruxa huisa ǁîb ǂâis ge ǁgaumâisa xu ǂgaeǁnâhe ǁaeb ǃnâ. Jeremiab ge ǃhaese ge mîǁgui tama hâ i Baruxi ǀkharaǀkharasen tide di xaweb ge ǁîba ge hui Elob di ǃgâi xawe ǂhanu haisi-amsa mîba bis ǃnâ.—Jer. 45:1-5. w19.11 6 ¶14-15

Levitikus ǂkhanis ǃnâ da ge ra ǁkhāǁkhāsen Israelǁî-i ge ǂkhîb di ǁguibasa “ganganǁguibas” ase ge mā ǁkhā i. (Lev. 7:11-13, 16-18) Nē ǁguibasan ge ǁgarisase ge dī tama hâ i xawe ǁîn gere ǂgao amaga gere dī. Sida ǃoabas Jehovab ǃoagu da ūhâs ge nē ǂkhîb di ǁguiba di khami ī nēs ǃnâ-ū da Jehovaba ra ǁgau amaga ǁîb xa da mati ra tsâsa. Jehovaba da ge sida ǁkhāsib hoab ǃnâ hâ-e ra mā ǁîba da sida ǂgaob hoab ǀkha a ǀnam amaga. Jehovab ge kaise ra ǃgâiaǂgao miliundi ǃoaba-aonab da mû o hîna ǁîb tsî ǁîb ǀgaugu tsînan a ǀnam amaga ra ǃoaba bina. Jehovab ge dī da ra xūn ǀguina ǃgôaǃgâ tama hâ xawe tae-i ǃaroma da nēsa ra dīs tsîna tsî nēs ge kaise a ǁkhaeǂgao da ǁkhā. Aiǁgause ǀnîsi du ga kaira tsî dī du geres xa ǃnāsase dīhō tama ga ra io, o du ge ǂgomǃgâsiba nî ūhâ Jehovab sadu ǁkhāsiga ra ǁnâuǃā ǃkhaisa. ǀNîsi du ge ra ǂâi Jehovab ǃoabas ǃnâ du ǃnāsase dīhō tama hâ di xaweb ge Jehovaba ra mû ǁîba du a ǀnam tsîb nē ǀnamma ra ǁgari du ǃkhaisa dī ǁkhā du an hoana dīsa. ǁÎb ge sida ǁkhāsib ǃnâ hâ i hoa i hîna da ra dī-e ra ūǃoa. w19.11 22 ¶9; 23 ¶11-12

ǂHanu mûǂuiba sîsenni xa ūhâs ge a ǂhâǂhâsa. Gao-aob Salomob ge ge xoa: “Mâ xū-i hoa-i ge ǁî-i di ǁaeba ūhâ.” ǁÎb ge ǁaeb ǂgās dib, ǂnubis dib, ās dib, âis dib tsî ǁaeb ǂkhîba ūhâs dib tsîn xa ge ǃhoa. (Aoǁn. 3:1-8) ǀGam ǂhâǂhâsa xūn ûib ǃnân ge sîsen-i tsî sâs tsîna. Jesub ge ǂhanu mûǂuiba sîsenni tsî sâs xa ge ūhâ i. ǀGui ǃnā gu ge apostelga aoǁnâ sîsenni ‘ǂûs ǁaeb tsîna gu ge ūhâ tama hâ i-e’ xu ge oaǀkhī. Jesub ge nētsēs xoas di mîde ǁîga ge mîba. (Mrk. 6:30-34) ǁÎb tsî ǁîb ǁkhāǁkhāsabegu tsîn ge ǂhâgu hâ sâsa ǁaen ai hō tama hâ i xaweb ge Jesuba ge ǂan i, hoagu sâsa ǂhâ hâ ǃkhaisa. Hoa da ge sâsa ǂhâ hâ tamas ka io tsēkorobe da ra dī xūna nî ǀkharaǀkhara. Nēsa da ge Elob ge ǁîb khoena a mā, mâ wekheb hoaba ge hâ i sâtsēsa xu a mû ǁkhā. Sada ge Moseb ǂhanub ǃnāga hâ tama hâ xawe da ge Moseb ǂhanub sâtsēs xa ra mî xūna xu a ǀama ǁkhā. w19.12 3 ¶6-7

Jehovab ge ge mîmâi ǁîb di ǂgomǂgomsa ǃoaba-aonab nî kōǃgâ ǃkhaisa tsî nē mîmâisab ge ǁgui-ais ase ra mû. (Psa. 31:1-3) Jehovab ge a ǂan tsûaǂgao da nî ǃkhaisa ǁnān hîna a ǁîb omaris ǁaninab ga kōǃgâ tama io. ǁÎb ge ge mîmâi sidab sorosises tsî gagasises tsîna nî kōǃgâ ǃkhaisa tsî xū-i ge ǁîba ǁkhae tide nē mîmâisa dīǀoaǀoas ǃnâ. (Mat. 6:30-33; 24:45) Jehovab tae-i ǃaroma ǁîb mîmâide ra dīǀoaǀoa ǃkhaisa da ga ǂâihō o, o da ge ǂgomǃgâsiba nî ūhâ ǁîb nî hui da ǃkhaisa mari ǃgomsi-e da ga ūhâ o. ǂGuro ǁaeb Xristeǁîn di aiǁgaus xa ǂâi re. Jerusalems ǃnâ hâ ǀhaohâb ge mâǃoahe tsoatsoa o, “on ge hoatsama ge ǀgaruǀgaruhe . . . apostelgu ǀguigu ose.” (ǃNǃkh. 8:1) ǂÂi re nēs ge tae-e gere ǂâibasensa. ǁÎn ge mari ǃgomsiga gere hōǃâ. Xristeǁîn ge ǀnîsî ǁîn omdi tsî ǁamaxū ǃkhaigu tsîna ge ǂoaǃnâ. Xaweb ge Jehovaba ǁîna ge ǁnāxū ǃnâ tama hâ i tsîn ge ǁîn di ǂkhîb tsîna ge ǂoaǃnâ tama hâ i. (ǃNǃkh. 8:4; Heb. 13:5, 6; Jak. 1:2, 3) Jehovab ge ǁnā ǂgomǂgomsa Xristeǁîna gere ǂkhâǃnâ tsîb ge sida tsîna noxoba nî ǂkhâǃnâ.—Psa. 37:18, 19. w20.01 17-18 ¶14-15

Davib ge xammi tsî bērs tsîra hîna ǁîb ǁgûb gūna gere ǂû ǂgaorab gere ǃkhamǃoa o, o ge mûǂan Jehovab ǁnā ǀgaiba gere mā bisa. Goliatab ge ǃgam o, ob ge Daviba ge mûǂan Jehovab nēs ǃnâ gere daoǁgau bi ǃkhaisa. (1Sam. 17:37) Tsîb ge tauxa Gao-aob Saula xu a ǃgoebē o, ob ge Daviba ge mûǂan Jehovab ge hui bi ǃkhaisa. (Psa. 18) Davib ga ǀgapiǂâixa hâ o, ob ge ga ǂâi hâ ǁîb nē xūna aitsama ge dī di. Xaweb ge Daviba ge tsamtsiǃnâ ī tsî Jehovab huiba nēn hoan ǃnâ ge mû. Tae-e da go ǁkhāǁkhāsen? Jehovab huiba ǂgans xa da ge ǃnāsa-e nî dī. Mâ ǁae tsî mâpab da huida ǃkhais tsîna da ge nî ǂanǃgâ. Tsamtsiǃnâ da ga o, o da ge nî ǁnâuǃā hoa xūna da a dīhō ǁoa ǃkhaisa tsî da ge nî mûǂan Jehovab dīhō ǁoa da a xūna dīs ǀkha ra huida ǃkhaisa. Mâ ǁaeb hoaba da ga Jehovab huiba mûǂan o, os ge ǁîb ǀkha da ūhâ ǀhōsagusisa nî ǀgai. w19.12 20 ¶18-19

Kaise ǂgui ǃaromade da ge ūhâ ǂgomsa Jehovab ra ǃgôaǃgâ da ǃkhaisa. ǁÎb ge ǁîba ǃoa ge ǂgae da tsî ǃgâiǂhôasa da ra ūǃoa ǀgauba ra kō. (Jhn. 6:44) Jehovaba ǃoa da ge ǀgū tsoatsoa khamib ge ǁîb tsîna sida ǃoa ge ǀgū. (Jak. 4:8) Jehovab ge ǁîb ǁaeb tsî ǁkhāsib tsîna ra sîsen-ū sida ǁkhāǁkhās ǃnâ nēs ge ra ǁgau ǁîb ra ǃgôaǃgâ da ǃkhaisa. ǁÎb ge a ǂan tae ǃnôa khoe da a sa nēsi tsî hānîǁaeb ǃnâ da mati a ǃgâiǃgâisen ǁkhāsa. Tsî ǁîb ge ǀnam dab a amaga ra ǁnama da. Nēs ge ra ǁgau Jehovab ra ǃgôaǃgâ da ǃkhaisa. ǀNîn ge Gao-aob Daviba xūose gere mû xaweb ge ǁîba ge ǂan i Jehovab a ǀnam bi tsî ra ǂkhâǃnâ bi ǃkhaisa. Davib ge nēsa ǂan i amagab ge ǁîb ǃgomsigu ǃnâ gere mâǀgai. (2Sam. 16:5-7) ǃGomsina da ra hōǃâ ǁaeb ǃnâb ge Jehovaba nî hui da nē ǃgomsin xa ǀkhara mûǂuiba ūhâsa tsî nē ǃgomsin ǃnâ mâǀgais ǀkhas tsîna nî hui da. (Psa. 18:27-29) Jehovab ǂkhâǃnâsa da ga ūhâ o, o i ge xū-e ǁkhae da tide ǁîba ǂkhîb ǀkha ǃoabasa.—Rom. 8:31. w20.01 15 ¶7-8

Elobmîs ǁkhāǁkhāsa du ga dī o, ǀgores ǀkha ǁkhowa-am re. ǂHâǂhâsa i ge a Elobmîs ǁkhāǁkhāsa da ǀgores ǀkha tsoatsoa tsî nî ǂganamsa, nēsa da ge ǂguro wekheb hîna da Elobmîs ǁkhāǁkhās ǀkha ra tsoatsoas ǃnâ a dī ǁkhā. Elobmîsa da ra ǁkhāǁkhā khoe-e da ge nî hui î-i mûǂan Elobmîsa da Elob di ǃanu gagab huib ǀkha ǀgui a ǁnâuǃā ǁkhā ǃkhaisa. ǀNî Elobmîs ǁkhāǁkhā-aon ge ǀgores xa ra ǃhoa Jakobub 1:5 sa ǃoa ra ǁnaeǁgause hîna ra mîsa: “Tsî ǀgui-i â du ga gā-aisiba tôasio, a-i Elob tawa ǂganbasen.” Elobmîs ǁkhāǁkhā-ao i ge ǁnās khaoǃgâ Elobmîsa i ra ǁkhāǁkhā khoe-e ra dî: “Mati da gā-aisiba Elob tawa a ǂgan ǁkhā?” Elobmîsa da ra ǁkhāǁkhā khoe-i ge ǃeream tsî nî mî Eloba ǃoa da ge nî ǀgore di. Elobmîsa du ra ǁkhāǁkhā khoe-e ǁkhāǁkhā re mati i nî ǀgoresa. Hui nî re în mû Jehovab ǁîn ǀgoredi hîna ǂgaoba xu ra ǂoaxade ra ǁnâu ǂgao ǃkhaisa. Mîba nî re ǁîn ǀgoredi hînan ra dī di ǃnâ-ūn Jehovaba hoa xūna a mîba ǁkhāsa hînan nau khoen ǀkha ǀgoragu ǂgao tama hâna. ǂÂis ǃnâ da ge ra ūhâ ǂgao Jehovab sada ǂgaogu ǃnâ hâ xūna ǀnai a ǂansa.—Psa. 139:2-4. w20.01 2 ¶3; 5 ¶11-12

Jehovab ge ra mîǁgui mâ ǁaeb ǂkhauhesana nî ǁhûi ǃkhaisa. (Rom. 8:28-30) Jehovab ge ǂkhauhesana Jesub ge ǁōba xu khâis khaoǃgâ ge ǁhûi tsoatsoa. ǃKharu ge ǁaeb ǃnân ge hoa Xristeǁîna ge ǂkhauhesa i. ǃKharu ge kurigu ǃnân ge ǁnān hîna ama Xristeǁîn a di gere mîna Xristuba ge sao ǀû. Xaweb ge Jehovaba ǁnā ǁaeb ǃnâs tsîna ama Xristeǁîn ǀnîna gere ǁhûi. ǁÎn ge Jesub ge mî ǃhorob hîna ǀomatsâb ǁaegu tsoro-e hâb khami ge ī-i. (Mat. 13:24-30) Nē ǀuni tsēdi ǃnâb ge Jehovaba noxoba ra aiǃgû 144 000 khoen di ǃâ nî se ī ǂkhauhesana ǁhûis ǀkha. Nēs ǃaroma da ge Elob ga ǀams aisi noxoba ǂkhauhesana ǁhûi o, o tā ǁîb gā-aisiba nî dîǃnâ. (Rom. 9:11) ǂAnbasen da ge nî i da tā Jesub ge ǁîb di ǂkhōs ǀguis ǃnâ ǁguiǃā sîsen-aon khami tanisen. ǁÎn ge ǁîn ǀhonkhoeb ge tsēs ǁaegub ǃnâ ge sîsen tsoatsoa hā sîsen-aon ǀkha a hâ ǀgaub xa ge ǃgâibahe tama hâ i.—Mat. 20:8-15. w20.01 30 ¶14

Jehovab ge ǂhâba îs ǁîb omarisa ǂkhîba ūhâ. ǂGui ǃaromade da ge ūhâ nēsi ǃgâiaǂgaosa ǃgomsina da ga hōǃâ xawe. Aiǁgause da ge ǂgomǃgâsiba ūhâ sada ǀhomsi ǁGûb a ǀnam da ǃkhaisa. Elobmîs xa da ge ǃnāsase a ǂan. (Jer. 15:16) Tsî da ge a ǀō-aisa omaris di ǃâ hîna Jehovaba ǀnam, ǁîb ǁgaraga ǀnam tsî ǁîn ǁaegus tsîna a ǀnamguna. (Psa. 106:4, 5) Hoaǁae da ge a ǃgâiaǂgao ǁkhā, ǂan da a amaga ûib hānîǁaeb ǃnâ nî ǃgâi ǃkhaisa. ǂAn da ge a ǀgūǁaeb Jehovaba Eloxoresasiba ūbe tsî ǁîb Gaosib ǃnâ-ū hoa ǃhūbaiba nî paradai kaisa. Tsî da ge ǂoaǂamsa ǃâubasensa ūhâ ǁnān hîna ge ǁōn khâisa nî hō tsî sada ǀkha ǁkhawa nî hâsa. (Jhn. 5:28, 29) Nēs ge kaise a ǀō-aisa. Tsî ǂhâǂhâsa as ge ǂgomǃgâsiba da ge ūhâ, hoa khoen hîna ǀhommi ǃnâs tsî ǃhūbaib ais tsîna hân ge sada ǀnamxaǃnâ ǁGûba ,ǁîb anu hâ ǃgôaǃgâsiba nî mā. w20.02 13 ¶15-16

Tsū ǁore-e du ga dī o, o tā nēsa sâu re. Xawe sadu ǁorena Jehovaba ǀgores ǃnâ mîba re. Nēs khaoǃgâ du ge ǃnomsase nî tsâ tsî ǂkhabuǂâi tide. Xawe du ga sadu ǀhōsagusisa Jehovab ǀkha dī-unu ǂgao o du ge ǀgores xa ǃnāsa-e nî dī. ǁNamasa ūǃoa re. Jehovab ge Natanna sî o, îb sī Davib ǁoreba Batsebas ǀkha ǂhaiǂhai, ob ge Daviba nēsa ge ǃhoabē tamas ka io ge mî tama hâ i, nē ǁoreb kaise ǁgai tama hâ di. Xaweb ge ge mûǂan ǁoreb ge ǃkhaisa Batsebas aob ǃoa-ai tsî ǂhâǂhâsase Jehovab ǃoa-ai. Davib ge ǁnamasa Jehovaba xu ge ūǃoa tsîb ge Jehovaba ge ǀûbabi. (2Sam. 12:10-14) Tsû ǁore-e da ga dī o, o da ge Jehovab ge sada kōǃgâs amsi a ǁgaumâi aogu ǀkha nî ǃhoa. (Jak. 5:14, 15) Tsî da ge sada a ǂhanu ǃkhaisa tā nî ǃkham ba. ǃHaese da ga ǁnamasa ūǃoa tsî daoǁgausa soa o, o da ge sada ǂkhîba nî hō-oa. w20.02 24-25 ¶17-18

“Disi khoegu” ge ǁnān hîna ǃhūbaib ai hâs di ǃâubasensa ūhâna ra ǂnûǁkhaeba. ǁÎn ge a ǂan nē ǃgâsan Jehovab xa ǂkhauhe hâ ǃkhaisa hîna “Jodeǁî” khoeb xa ra ǂnûǁkhaebahena tsî ǁîn ǀkha sîsenǀhaosa ǀō-aisase ra mû. ǂKhauhesa ǃgâsan di ǀondi hoaden a ǀū xawen ge ǁnān hîna ǃhūbaib ai ûis di ǃâubasensa ūhâna ǁîn ‘ǀkha ra ǃgû.’ Matin nēsa ra dī? Nētsēs xoas ge ra ǃeream. Kō re Elobmîs ge ǀgui Jodeǁî khoeb xa ǀgui ra ǃhoa. Xawe “sadu” tsî “sadu ǀkha” di hâ mîra ge ǂgui khoena ǃoa ra ǁnaeǁgau. Nēs ge ra ǂâibasen nē Jodeǁî khoeb ǀgui khoe-i ǀgui-e ǂnûǁkhaeba tama xawe hoa ǂnubis di ǂkhauhesa ǃgâsana ra ǂnûǁkhaeba ǃkhaisa. ǁNān hîna ǂkhauhesa taman ge ǂkhauhesan ǀkha Jehovaba ǀguiba ra ǃoaba. Xawen ge ǂkhauhesana ǂgaeǂgui-aon ase mû tama hâ, Jesub a ǁîn di ǂgaeǂgui-ao ǃkhaisan da mûǂan amaga.—Mat. 23:10. w20.01 26 ¶1-2

Jesub ge ge mî ǁîb ǁkhāǁkhāsaben nî ǂanǂûihe ǃkhaisa nau khoenan ga ǁîb ǁîna ǀnam khami ǀnam o. Nēs ge ǃkharu ge ǁaeb ǃnâ ge ama i tsî nētsēs tsîna a ama. Nēs ǃaroma i ge a ǂhâǂhâsa ǃgomsin hîna da ūhân hoan ǃnâ da ǀnamma nî ǁgaugu ǃkhaisa. Dîsen re: ‘Tae-e da ǃgâsan hîna ǃgomǁaegu ǃnâs tsîna ǀnamma gere ǁgaugun di aiǁgaude xu a ǁkhāǁkhāsen ǁkhā?’ Khoesi ǃnubusigu ge ra ǃgom kaiba da ǀnamma ǁgaugusa. Xawe da ge noxoba ǃgarise nî ǁgūtsâ Xristuba ǁgaesa. Jesub ge ǂkhîba sada ǃgâsa-i hîna tsūdi da hâ i ǀkha kurus ǂhâǂhâsasib xa ge ǃhoa. (Mat. 5:23, 24) ǁÎb ge ge mî Jehovab ǀkha da ga ǃgâi ǀhōsagusisa ūhâ ǂgao o, o da sada ǃgâsan ǀkhas tsîna ǃgâi ǀhōsagusisa nî ūhâsa. Jehovab ge a ǂkhî ǃgarise da ga sîsen o ǂkhîba sada ǁaegu ūhâs ǃaroma. ǁÎb ge ge mî sada ǃoabasab ūǃoa tide ǃkhaisa ǁaixa tsî da ga ǂkhîbagu ǂgao tama io.—1Jhn. 4:20. w20.03 24 ¶1-4

ǁGâuab hîna a “ǂhumib di ǁgûb” ge khoena ǁîn di tsoatsoasa xu ra gāxaǃnâ. (Jhn. 8:44) ǀNî ǂhumib ge ama tama ǁkhāǁkhādi hîna ǁōb tsî ǁōb khaoǃgâ hâ ûib tsîn xa hâde ǃkhōǂgā hâ. Nē ǁkhāǁkhādi ge nē ǁnaetigu tsî khoen ra ǂgom xūn ais tsîna a ǃgaoǃgaosa. ǂGui khoena tae-i ǃaroma ra gāxaǃnâhe? ǁGâuab ǂhumib hîna ǁōb xa hâb ge sida ǁōb xa ra tsâ ǀgauba ra tsâǀkhā. ǀAmosib kōse da nî ûise da ge kuruhe amaga da ge ǁō ǂgao tama hâ. (Aoǁn. 3:11) ǁŌba da ge khākhoeb ase ra mû. (1Kor. 15:26) ǁGâuab ra dītsâ xawe i ge ǁōb xa hâ amaba sâusa tama hâ. ǂGui khoen ge nēsi a ǂan Elobmîs tae-e ra ǁkhāǁkhāsa ǁō hâ khoen mâsib xa tsî ǁîn ǃâubasens xas tsîna. (Aoǁn. 9:5, 10; ǃNǃkh. 24:15) Nē amab ge ra ǁkhaeǂgao da tsî ra hui da, î da tā ǃao tsî ǂâiǂhansen tae-i ǁō da ga o ra īsa. w19.04 14 ¶1; 15 ¶5-6

Jehova elob ge ǁîb ǃoaba-aona a ǀnam. ǁÎb ge hoaǁae ǁîna a ǀnam tsî noxoba nî ǀnam. ǁÎb ge ǂhanu-aisib tsîna a ǀnam. (Psa. 33:5) ǁNās ǀkha da ge ǀgam xūna ǂâis ǃnâ nî ūhâ: (1) Jehovab ge ra tsûaǂgao ǁîb ǃoaba-aon ǃgâi tama ǀgaub ǃnâ ra hâ-ūhe o. (2) ǁÎb ge ra mîmâi ǁîb ǃoaba-aon ǂhanu-aisiba nî hōǃâsa. Elob ge Moseb ǃnâ-ū a mā ǂhanub ge ǀnammi ai ge ǃgaoǃgaosa i. Nē ǂhanub ge ǂhanu-aisiba gere ǂkhâǃnâ, hoa khoen ǃoagu ǃgōsase ǁnān hîna ge ǁkhaubasen ǁoa īna. (Deu. 10:18) ǁNā ǂhanub ge ge ǁgau Jehovab matikōse ǁîb ǃoaba-aona ra tsâbasa. Moseb ǂhanub ge 33ǁî kurib ǃnâ ge ǀam Xristeǁî ǀhaohâb ge omkhâihe o. Xristeǁîna ǂhanuba xu ga ǀama tama hâ hîna ǀnammi ai a ǃgaoǃgaosaba tsî ǂhanu-aisiba ra ǂkhâǃnâba? Hî-î. Xristeǁîn ge ǀasa ǂhanuba ge hō. ‘Xristub di ǂhanuba.’ Jesub ge ǂhanuga ǁîb saosaben ǃgao ge xoa tama hâ i xaweb ge ǁîna ǁgaragu, mîmādi tsî tsoatsoadi tsîna ge mā saohe nî ga. ‘Xristub di ǂhanub’ ge hoa xūn Jesub ge ǁkhāǁkhāna ǃkhōǂgā hâ. w19.05 2 ¶1-3

Khoesib ge ǁkhaeǂgao-esa ǂhâ hâ tsî nēsa kaise ǃgâi ǀgaub ǃnâ a dī ǁkhā. Aiǁgause, ǂkham ǀgôa-i ga ǁnā tsî ǁî-i di ǁgoasa a tsûtsû o ǀhuru-i ra hîna, o i ge ǁî-i ǁgûs tamas ka io ǁgûba ǃoa ā rase ra sī. ǁGûn ge ǀgôa-i tsûba a ūbē ǁoa xawen ge ǁî-e a ǁkhaeǂgao ǁkhā. ǁÎn ge tae-i go īsa a dî ǁkhā, ǁgamrona ǀombē tsî ǁî-e ǁkhaeǂgaos mîde a mā ǁkhā tsî sōǀoa-i tsîna. ǁAeb ǀkha i ge ǀgôa-e ra ā ǀû tsî ǁkhawa ra ǀhuru tsoatsoa. Tsî i ge ǁaeb ǀkha ra ǂgau. Xawe ǀnî ǁaegu ain ge ǀgôana kaise kai ǀgaugu ǃnâ ra tsûtsû-e. ǀNîn ge ra ǀgaiǃkhō-e. Nēs ge ǀgui ǃnāsa a īǁkhā tamas ka io ǂgui kuriga a aiǃgû ǁkhā. Nēs ge ǀgôa-e kaise a tsûtsûǂgao ǁkhā. ǀNî ǁaegu ai i ge tsūdī go khoe-e ǃkhōsis ǃnâ ūhe tsî a ǁkhara-e ǁkhā. ǀNî ǁaegu ai i ge tsūdī go khoe-e nē ǁkharaga ra ǂgōsen. Nēs ga ī xaweb ge ǁnā tsūdī go khoe-i go ǃaroma tsûba tsûtsû-e go khoe-i ǀkha nî hâhâ. w19.05 14 ¶1-2