Septemberi

Jehovab tsî Jesub tsîkha ǃgarise sîsens xa ra mā da aiǁgaude ra ǂâibasen sâ ǁoa da a di? Hî-î. Jehovab ge tsau tama hâ ǁnās ǃaromab ge xū-eb ga dī toa o, sâsa ǂhâ tama hâ. Elobmîs ge ra mî Jehovab ge ǀhommi tsî ǃhūbaib tsîna kuru toa o, ob ge “sâ tsî ge khoakhoasen” di. (Eks. 31:17) Nēs ge ra ǂâibasen Jehovab ge sîsen ǀû tsî kurub ge xūna ǃoa kō tsî ǂkhîba a hōsa. Jesub ge ǃhūbaib aib ge hâ io ǃgarise gere sîsen xaweb ge noxoba ǁaeba ǁamaǂûi tsî sâ tsî ǁîb ǀhōn ǀkha ǂûǀhaode gere ūhâ. (Mat. 14:13; Luk. 7:34) Elobmîs ge Elob ǃoaba-aona ra ǂkhâǃnâ în sîsen-e ǀnam. ǁÎb ǃoaba-aon ge ǃgarise nî sîsen tsî da nî ǀopesa. (ǂKhm. 15:19) ǀNîsi du ge ra sîsen sadu omarisa kōǃgâs ǃaroma. Tsî hoa Xristeǁîn ge aoǁnâs di ǁgaumâisa ūhâ. Xawe du ge noxoba ǂâusase nî sâ. w19.12 2 ¶2; 3 ¶4-5   

ǂKhaba gagagu xa hâ ǂhôana ǃhoasa xu ǂgōsen re. Nēs ǃnâ-ū da ge Jesub aiǁgausa nî ǁgae. ǃHūbaiba ǃoab nî hās aiǃâb ge Jesuba ǀhommi ǃnâ ge hâ i tsî ǁGâuab tsî ǁîb demongu xa a ǂan. Xaweb ge nē ǂkhaba gagagu xa ge ǃhoa tama hâ i. Jesub ge Jehovab xa gere aoǁnâ ǂgao ǁGâuab xas ose. Tsî da ge Jesub aiǁgausa ra sao ǂgao tsî demongu ra dī xūn xa ǃhoa ǂgao tama hâ. Tsî da ge sida mîdi ǃnâ ra ǁgau ǂgao ‘sida ǂgaogu ǃgâi mî-e ra ūǀkhīsa.’ (Psa. 45:1) Tā ǂkhaba gagaga ǃaoba omkhâiba re. Nē ǁgai ǃhūbaib ǃnân ge tsū xūna sada ǀkha a īǁkhā. Tsūkeǃgâb, ǀaeb tsî ǁōb tsîn ge a hāǂam da ǁkhā. Xawe da ge tā hoaǁae ǂkhaba gagaga nî ǂgā-am. Elobmîs ge ra ǁguiǃā “ǁaeb tsî hâsib tsîkha ī khami ra hōhe” di. (Aoǁn. 9:11) Jehovab ge ge ǁgau ǁîb demongu xa a ǀgaisasa. w19.04 23-24 ¶13-14   

ǀHaohâb ǃûi-aoga ǃhūb ǂhanugu ǀkha ra sîsenǀhao ǀgôa ǀgaiǃkhōna ǂhanuba ǂanǂans ǃnâ? Î. Nēti i ǂhanugu ra sîsen-ūheba gu ge ǀhaohâb ǃûi-aoga nē ǂhanugu ǀkha ra sîsenǀhao nē ǀgôa ǀgaiǃlkhōsa ǂanǂans ǃnâ. Nē ǃnôa ǂhanugu ge Elob digu ǀkha ǂgaogu tama hâ. (ǃNǃkh. 5:28, 29) Nēs ǃaroma gu ge ǀhaohâb ǃûi-aoga nē ǃnôa xūn ga ī o, o ra dītsâ ǃhūb ǂhanuga ǁnâuǀnamsa. ǀHaohâb ǃûi-aogu ge tsâǀkhāhe hâ khoe-i ǁî-i ǁgûn tsî nēs xa ǂan khoen hoana ra mîba ǁîn ǂhanuba nēs xa a ǂanǂan ǁkhāsa. Xawe nē ǃnôa xū-i ga ǀhoahâb khoe-i xa a dīhe tsî ǀhûhâsib ǃnâ a ǂansa os? O i Xristeǁî-i hîna nēsa ra ǂanǂan-e Jehovab ǀonsa i go ǀuriǀuri khami nî tsâ? Hî-î. Tsūdī-ao i ge Jehovab ǀonsa go ǀuriǀuri-e. w19.05 10 ¶13-14

Elobmîs ge aogu tsî taradi tsîna ra ǁkhāǁkhā în ǃgôagu tsî ǁîn ǃgammeb mîmâisa ūhâ ǀgara. ǃGamme hâ khoen ge ra ǂkhâǃnâ-e în ǃgâi ǃhoa-ūgu ǀgauga ūhâ: “ǁNā-amagab ge khoeba ǁgûb tsî ǁgûs tsîra ǁnāxū tsî nî ǁîb di taras tawa ǂgāmâisen, o ra ge ǁîǀgamra nî ǀgui ǁgan.” (Gen. 2:24) Xawen ge ǁnān hîna nē ǃhūbaib ǂâiǀgauba ūhâna ra mî ǃgamme hâ khoe-i aitsama ǂâibasens mûǂuiba nî ūhâsa. “ǀNî ǁaxasigu ǃnâ” dis ge ǀgui ǂkhanisa ra mî “ǃhaoǃnâbe ǁnaetigu hîna ‘hoam ûitsamas kōse’ di hâ ǃgameb mîmâis ge ǀnî mîdi ǀkha ge ǃkhōǃkhunihe ‘ǀnammi sam ǁaegu hâs kōse’ di hâdi ǀkha.” Nē mûǂuib ge ǂgui ǃgamega khôa tsî hâhâ ra tsûba ra ǃaroma. Nēs ǃaromab ge nē mûǂuib hînab ǃhūbaiba ǃgameb xa ūhâba a gâre. w19.05 23 ¶12

Paulub ge gere ǂâiǂhansen ǀnî Xristeǁîn ge omkhâi tama ǃhoa-ain tsî ǁGâuab ǃhūbaib di ǁgai ǂâiǀgaugu tsîn xa tsâǀkhāhesa. (Efe. 4:17-19) Nēs ge sada di ǀgui i tsîn ǀkha a īǁkhā. ǁGâuab ge a nē ǃhūbaib di ǂgaeǂgui-ao tsî ǃkharagagu ǀgauga a sîsen-ū ǁkhā ǂgaeǂhapu da tsî Jehovaba xu ūbē das ǃaroma. Aiǁgause, ǂhâǂhâsa tamas ka io ǀgapiǃgôahe ǂgao da ga o, ob ge nēsa nî sîsen-ū Jehovaba xu ūbē dasa. ǁÎb ge oms tamas ka io da ge skoli tsî khoen tawa a ǁkhāǁkhāsen xūna a sîsen-ū ǁkhā ǁîb ǀkhāba ǃoa ǂgae das ǃnâ. Sada ǂâidi ǃnâ “ǀgaisa hâǃkhaide” ǃhana hâ xūna da a hîkākā ǁkhā? (2Kor. 10:4) Paulub ge ǃeream ǀgausa kō re: “ǀApede ra hîkākāse, tsî mâ ǀgapib hoab, Elob ǂans ǃoagu ra khâib tsîna, tsî ge ge mâ ǂâis hoasa Xristub di ǁnâuǀnamxasib ǃnâ ra ǃkhō.” (2Kor. 10:5) Jehovab di huib ǀkha da ge nē ǁgai ǂâiǀgauga a dan ǁkhā. w19.06 8 ¶1-3   

Kaisen ge kai ǃgomsina gere hōǃâ xawen ge Hannas, Davib tsî ǀnî psalmdi xoa-aob tsîna Jehovab ai hoaǁae gere ǂgomaiǂnûi. Jehovaba ǃoan ge ǁîn tsûaǂgaob ǃgao gere ǀgore. ǁÎn ge ǁîb ǀkha tae-i ǃaroman ra tsûaǂgaosa gere ǀgoragu. ǁÎn ge Jehovab ǃoaba ǃkhaisa ǃoa gere ī ǀgara. (1Sam. 1:9, 10; Psa. 55:22; 73:17; 122:1) Jehovab ge ǀkhomxaǂgaosib ǀkha hoana ge hui. Hannas ge sâsiba ge hō. (1Sam. 1:18) Davib ge ge xoa: “ǂHanu-ai-i ge ǂgui tsūǃōna ra ǃoa, xawe ǃKhūb ge ǁî-e ǁîn hoana xu ra huiǂui.” (Psa. 34:19) Tsî psalmdi xoa-aob ge ega ge mî Jehovab ge “amǀkhāb ǃommi” ǀkha ǃkhōbi tsî ǀnamxaǃnâ ǀgaub ǃnâ gere daoǁgaubi. (Psa. 73:23, 24) Tae-e da nē aiǁgaude xu ra ǁkhāǁkhāsen? ǀNî ǁaegu ai da ge ǃgomsina ra hōǃâ hîna ra tsûaǂgao kai dana. Xawe da ge nî hui-e Jehovab ge huida ǀgausa ǂâiǃgâ, ǁîb ai ǀgores ǃnâ-ū ǂgomaiǂnûi tsî da ga ǁîba ǁnâuǀnam o ǁîb ra mî xūna dīs ǃnâ-ū.—Psa. 143:1, 4-8. w19.06 17 ¶14-15

Tā mā-am re in khoen ra dī tsî mî xūna Jehovab ǀHûǀguitimî-ao da a ǃkhais xa tao kai da. (Mix. 4:5) Jesub apostelgu aiǁgausa ǃoa kō re, hîna ge Jerusalems ǃnâ Jesub ǁōb aiǃâ. ǁÎn ge ge ǂan i Jodeǁîn xan ge kaise ǃhui-e hâ i ǃkhaisa. (ǃNǃkh. 5:17, 18, 27, 28) Xawen ge tsēs hoasa tempela ǃoa gere ī tsî aoǁnâs ǃnâ-ū gere ǁgau ǁîn a Jesub ǁkhāǁkhāsabesa. (ǃNǃkh. 5:42) ǁÎn ge ǃaob ǃnâ ge māǁnâsen tama hâ i. Sida tsîn ge ǃaoba a mâǃoa ǁkhā, hoaǁae Jehovab di ǀHûǀguitimî-aon ase ǁgausens ǃnâ-ū, sîsenni, skoli tsî sida ǀhûhâsib ǃnâs tsîna. (ǃNǃkh. 4:29; Rom. 1:16) Apostelga tae-i ǃaroma gere ǃgâiaǂgao? ǁÎgu ge ge ǂan i tae-i ǃaroma gu ge ǃhui-e hâ īsa tsî Jehovab ǀons ǃgao mâǃoahesa gere ǃgôaǃgâ. (Luk. 6:23; ǃNǃkh. 5:41; 1Pet. 2:19-21) ǃGâi xū-e da ra dī ǃkhais ǃgao da ǃhui-e hâsa da ga ǂan o, o da ge Jehovaba ǃoaba ǀû tide khoen ǃhui da hâ amaga. w19.07 7 ¶19-20

Jesub tsî ǁîb di Jodeǁî saosaben tsîn ge sâtsēsa gere tsēdī Moseb di ǂhanub ǃnāgan ge hâ i amaga. Xaweb ge Jesuba mîs tsî dīb tsîn ǀkha ge ǁgau tsū tama i hâsa ǃgâi xūna dī tsî huiba nau khoena sâtsēs ai māsa. (Mat. 12:9-11) ǁÎb ge sâtsēs ai ǃgâiba dī tsî huis a tsū ǃkhaisa ge mû tama hâ i. Jesub gere dī xūn ge ge ǁgau, ǁîb ge ǃamkuse gere ǁnâuǃāsa, tae-i ǃaromab Eloba ǁîb khoena sâtsēs ai gere sâ kai ǃkhaisa. Elob khoen ge ǁnā tsēs ai ǁîn di hoaǃnâ-aixa xūna xu gere sâ amagan ge Elob ǃoabas ǃnâ ǃnāsa-e ge dī ǁkhā i. Jesub ge omaris hîna sâtsēsa gagasi xūn ǃaroma gere sîsen-ūs ǃnâ ge kaikhâi. Nēsa da ge Jesub xa a ǂan khomai da ga o: “Tsîb ge Nasarets, kaikaiheb ge ǃās tawa sī, tsî ǁnaetib âb ǃoa sâtsēs ai sinagogeb ǃnâ ǂgâ tsî ge khâi, khomaib nîse.” (Luk. 4:15-19) ǁKhāǁkhāsabegu ge kai ǃgôasiba sâtsēsa ge ūba hâ i, nēs ǃaroma gu ge Jesub di ǁkhōs aiǂhomisende ge mâiǂui sâtsēs nî toas kōse.—Luk. 23:55, 56. w19.12 4 ¶10

Mâ Xristeǁî-i hoa-i ge nēs ǃnâ ǃâ-e ūhâ. Nēsa da ge kā hâ ǀgôa-e ôas ǀkha a ǀgopeǀnō ǁkhā. Mâ ǀgaub ǃnâ? ǂÂi re tae-i ge ǃnona kurixa axarob hîna ge omsa xu a kāb ǀkha a īsa. 500 Xa a ǃnāsa khoen ge ǁîba gere ôa. Hoa tsēsab ôa-e hâ hînab ge axaroba māsenxase gere ôa bi khoe-i xa ǃhanab ǃnâ sī ge hō-e. Axaroba ge hō khoe-i ge nēs ǃgao khoen xa ge koa-e ǂgao tama hâ i. ǁÎb ge ge mî: “ǂGui khoena i ge go ū axaroba hōsa.” ǂGui khoen ge nē axarob khami ra tsâ, kā hâse. ǁÎn ge ǃâubasen-e ūhâ tama hâ xawe ra hui-e ǂgao. 8 Miliuns xa a ǃnāsa ǀHûǀguitimî-aon ge ǀguiba ra sîsen, kā hâse ra tsâ khoena ôas ǃnâ. Sadu ge ǀnîsi Elobmîsa sadu ǀkha ra ǁkhāǁkhāsen ǂgao khoe-e hō tide. Xawe i ge ǀnî hâ aoǁnâ-ao-i hîna sadu ǂharis ǃnâ ra sîsen-e khoe-e a hō ǁkhā hîna Elobmîs amaba ra ǂan ǂgao-e. ǃGâsa-i ga khoe-e ga ra hui o, î-i Xristub ǁkhāǁkhāsabe kai, o i ge ôas sîsenni ǃnâ ǃâ-e ūhâ ǃgâsan hoana ra ǃgâiaǂgao kai. w19.07 16-17 ¶9-10

Apostel Paulub ge ǃgâsana Filipeǁîn ǃās ǃnâ ge mîba în ǃgomsina tani. ǀHaohâb ge tsoatsoasa xu ǃgomsina gere hōǃâ. Nēs ge ge tsoatsoa ‘Masedoniaba ǃoa īs’ di ǁkhauǂuis ge tsoatsoa o, Paulub tsî Silab tsîkha ge 50ǁî kurib ǃnâ Filipis ǃnâ a ǀkhī ǁaeb ai. (ǃNǃkh. 16:9) ǁNāpa gu ge Lydia di ǀon hâ khoesa ge ǀhao-ū hîna Eloba ra ǃaoǃgâsa, ‘ǁîs ge ge ǃgâ tsîb ge Jehovaba ǁîs ǂgaoba ge ǁkhowa-am’ ǃgâiǂhôas ǃoa-ai. (ǃNǃkh. 16:14) ǁÎs tsî ǁîs omaris tsîn ge ge ǁāǁnâhe. Xaweb ge ǁGâuaba ge ǃâitsâ nî tsoatsoa. ǃĀs di aogu ge Paulub tsî Silab tsîna ǃās di ǂhanub aisi ge sī ū tsî ge ǂgā-am kha ǃgomsina kha ra ǃaroma di. Nēs xa ǃaromahe hâse kha ge Paulub tsî Silab tsîkha ǂnau-e, ǃkhōsis ǃnâ ū-e tsî ega ǃāsa xu ge ǃkhaeǂuihe. (ǃNǃkh. 16:16-40) Nēsa ge ǂkhabuǂâi kai kha? Hî-î. O ǀasase ge tsoatsoa-e ǀhaohâb di ǃgâsana tae-e ge dī? ǁÎn ge ǃgâi aiǁgausa ge ǁgau, ǀams kōsen ge mâǀgai amaga. ǁÎn ge Paulub tsî Silab tsîkha di aiǁgaus xa kaise ge ǂkhâǃnâhe. w19.08 2 ¶1-2

Nē ‘ǂhanu-aisib ǂûn’ ge Jehovab tsî khoen tsînan ūba hâ ǀnamma ǃkhōǂgā hâ. Nēs ge ra ǂâibasen nau khoen ǀkha sida ǂgoms Jesub ǃnâ ǃnâ da ūhâs tsî hānîǁaeb ǀkhaegu xa ǃhoasa. ‘ǂHanu-aisib di ǂûna’ da ge ra tani ǁkhoaǂgaosib ǀkha da ga, aoǁnâ sîsenni ǃnâ ǁhao o tsî ǁkhāǁkhāsabedī o. (Mat. 28:18-20) Mâ mâsib hoab ǃnâ da ge ǃnâb ase a ǃnâ ǁkhā. ǀNî mâsigu ǃnâ i ge aoǁnâ sîsen-e ra ǃgom kai xūna a ǃē ǁkhā aoǁnâs diba. Aiǁgause Apostel Paulub ge ǃkhōsis ǃnâ Romes ǃnâ ge hâ i ǁîb sîǂkhanisab ge Filipeǁîna ǃoa xoa o. Xaweb ge ge ǀû tama hâ i ǁîb ǃûi-aogu tsî sari bi ra khoen tsîna aoǁnâbasa. Paulub ge ǁkhoaǂgaosib ǀkha nē mâsigu ǃnâ gere aoǁnâ tsîs ge nēsa ǃgâsana ǂgomǃgâsiba ge mā în ‘ǁkhoaǂgaosib ǀkha mîsa ǃaob ose ǃhoa.’—Fil. 1:12-14; 4:22. w19.08 12 ¶15-16

ǂHâǂhâsa ǃaromas hîna da ǃgamǃgamsenxasiba ra ūhâ ǂgaos ge Jehovaba i ra ǂkhî kai amaga. Apostel Petrub ge nēsa ge ǃgāsa kai nētsēs xoas ǃnâb ge mî mîdi ǀkha. Petrub mîdi ai ra ǀaroses ge ǂkhanis “Come Be My Follower” sa 3ǁî danaǃâs ǃnâ ra mî: “ǀGapiǀgapisens ge ǃgāb khami ī. Nēs ǀamǂoas ge kaise a tsū ǁkhā. ǁÎǃgôasen hâ tsî ǃgâi ǀgauga ūhâ khoe-i tsîn ge nēs xa ǃaroma-e hâse Jehovab ǃoa-ai a ǁgai. ǃGamǃgamsenxasib ge ǃgâi ǀgauga ūhâ tama hâ khoe-i tsîna Jehovab ǃoa-ai ǃgâi khoe-i ase ra mûsen kai. . . . ǁÎb ge ǃgâiǃgâibasensa ūhâ sa ǃgamǃgamsenxasib amsi ǀkhaetsisa.” ǂHâǂhâsa xū-i hîna da a dī ǁkhā i ge Jehovab di ǂgaoba ǂkhîǂkhîsa. (ǂKhm. 23:15) Jehovaba da ra ǂkhîǂkhî xawe da ga ǃgamǃgamsenxasiba ūhâ o,o da ge ǂgui ǃgâi xūn tsîna ra ǃkhōǃoa. ǃGamǃgamsenxasib ge nau khoena sada ǃoa ra ǂgae. Nēsa tae-i ǃaroma nēti ī? ǂÂi re tae ǃnôa khoen ǀkha du ra hâǀhao ǂgaosa.—Mat. 7:12. w19.09 4 ¶8-9

ǀHaohâb ǃûi-aogu ge ǃgarise ra sîsen ǃgâsana huis ǃnâ. ǁÎgu ge nau khoen xa gu ǀgapi di ǂâi tama hâ ǁîgu aiǂhanugu ǃaroma. Xawe gu ge ǀhaohâba ǀnammi ǀkha ra sîsen-ū. (1Tes. 2:7, 8) ǁÎgu ge ǃgamǃgamsenxa tsî ǃgâsana a ǀnam, nēs ǃaroma gu ge ǃgâi ǀgaub ǃnâ ǁîn ǀkha ra ǃhoa. Andrewb hîna ǂgui kuriga a ǀhaohâb ǃûi-aob ge ra mî: “ǀHaohâb ǃûi-aogu ga ǃgamǃgamsenxa tsî khoexaǃnâ o, os ge nēsa ǃgâsan ǂgaoga ra tsâǀkhā. Nē ǀgaugu ge ǃgâsana ra ǂkhâǃnâ tsîn ge ǀhaohâb ǃûi-aogu ǀkha ra sîsenǀhao.” ǀNîhâ ǀhaohâb ǃûi-aob Tony di ǀon hâb ge ra mî: “Filipeǁîn 2:3 ǃnâ hâ daoǁgausa ta ge ra sao tsî nau ǃgâsana ti xa ǂhâǂhâsase ra mû. Nēs ge ra hui te i ta tā ǃgâsana ǁgari în tita ǁnâuǀnam.” ǀHaohâb ǃûi-aogu ge ǃgamǃgamsenxasiba nî ūhâ, Jehovab ǃgamǃgamsenxasiba ūhâ khami. Jehovab a hoa xūn di kuru-ao xaweb ge ǃhūbaiba ǃoa kōǁnâ tsî “ǃharaxūsaba tsaraba xu ra ǃkhōkhâi.” (Psa. 18:35; 113:6, 7) Jehovab ge ǁîǃgôasenxa tsî ǀgapiǂâixa khoena a ǃhuisa. w19.09 16-17 ¶11-12

Jesub ǃnaob xa da ge nî khoakhoahe ǂhanu ǂâiǀgauba da ga ūhâ o. Jehovab sîsen-e da ge ra dī ǁnās ǀkha i ge Jehovab ǀgaub ai nî dī-e. Sida ge sîsen-ao tsî Jehovab ge a ǀhōnkhoe. (Luk. 17:10) ǁÎb sîsen-e da ga sida ǀgaub ai dī o, o da ge nēsa sida ǃgao nî ǃgom kai. Xawe da ga Jehovab ǀgaub ai ǁîb sîsen-e dī o, o da ge dīhō ǁoa da go i xūn tsîna a dīhō ǁkhā tsî ǃgomsin tsîna a mâǃoa ǁkhā. ǂÂis ǃnâ ūhâ re khoe-i ge Jehovab ǂâisa dīǀoaǀoahesa a ǁkhae ǁoa di. (Rom. 8:31; 1Jhn. 4:4) Sida mîǁguib ge Jehovab sida ǀnamxaǃnâ ǁGûba ǂkhaisiba māsa. Jesub tsēdi ǃnâ ge hâ i khoen ge kaiǂgaoxasib tsî ǁîǀnamsenxasib tsîn xa gere ǂkhâǃnâhe tsî nēs xa ǃaroma-e hâse Jesuba xu ge ī. (Jhn. 6:25-27, 51, 60, 66; Fil. 3:18, 19) Xawe ǁnān hîna ge Eloba ǀnam i tsî ǁîn di ǀgūkhoen tsîna ǀnam în ge nē sîsenni ǃnâ ge hâ ǀgara ǁîn ûib hoaba ǃhūbaib ai tsî ǀhommi ǃnâ Xristub ǀkha ǂgaeǂguis ǃâubasensa ge ūhâ i. ǁÎn khami da ge sida tsîna ǂkhîba nî ūhâ Jesub ge mā da sîsen-e da ga ǃgâi ǃaromas ǃgao dī o. w19.09 20 ¶1; 24-25 ¶19-20

ǂÂi re, ǀkhaegu hîna du ūhâgu xa ama tama ǁkhāǁkhāde xu du ge ǃnora kaihe amaga. Kaise da ge ra ǃgâiaǂgao nē ǃnôa ǃnorasasiba da ūhâ amaga. Kai ǃnorasasiba da ge hānîǁaeb ǃnâ nî ǃâubasen. ǀGūǁaeb ge Jesuba ama tama ǂgomdi tsî ǁgauoǃnâ ǂhanugu tsîna nî hîkākā. Elob ge “kai ǂnūbis” khoen hîna ǁîba ra ǃoabana nî ǁkhauba tsîb ge ǁîna ǃhūbaib ai paradais ǃnâ ûis ǀkhaeba nî mā. (J.ǂHa. 7:9, 14) ǂGui khoen ge khâisa nî māhe tsî Adammi ge ǃaroma ǁoreba xus tsîna ǃnorasasiba nî hō. (ǃNǃkh. 24:15) Jesub ǀoadisi ǂgaeǂguis ǁaeb ǃnâ i ge ǁîb tsî ǁîb ǀkha ra ǂgaeǂgui ǂkhauhesan tsîna khoesiba khâisa nî mā, ǀoasa sorosi tsî gagasi ǂurusib ǀkha. Nē ǁaeb ǃnorasasib dib ge dâkurib ǁaxasib hîna ge Israeli ǃnâ hâ îb khami nî ī. Nēs ge ra ǂâibasen hoa khoen hîna Jehovaba ǂgomǂgomsase ra ǃoaban ge ǀoasa kurusa nî ūhâ tsî ǁore tide di. w19.12 12-13 ¶14-16

ǃKharu ge ǁaeb ǃnâb ge Joseba (Barnababa) ge māsenxa i, Jehovab xa sîsen-ūhes ǃnâ. (ǃNǃkh. 4:36, 37) Saulub ge Xristeǁî kai o, on ge nau ǃgâsana ǁîba ǀgūsa gere ǃao, ǀhaohâgab gere saoǃgon xui-ao. Xaweb ge Barnababa Sauluba ǁkhaeǂgao tsî ge hui. (ǃNǃkh. 9:21, 26-28) Jerusalems ǀhaohâb ǃûi-aogu ge ǃnūse gere hâ ǃgâsana gere ǁkhaeǂgao ǂgao, hîna Antioxias tsî Siriab ǃnâ gere hâna. Ham-en ge sî? Barnabab. ǁÎn ge ǃgâise ge ǁhûi. Mîbahe da ge ra Barnabab “ǁîn hoana gere ǁnama, ǁaposa ǂgaob di ǂâibasens ǀkhan nî ǃKhūb tawa hâhâga.” (ǃNǃkh. 11:22-24) ǁKhā ǀgaub ǃnâb ge Jehovaba sada tsîna nētsē a hui ǁkhā î da nau Xristeǁîn ǃoa-ai ‘ǁkhaeǂgaos di ôa’ kai. Aiǁgauseb ge ǁōb ǃnâ ǀgūkhoe-e ǂoaǃnâ hâ khoe-e ǁkhaeǂgaos amsi a sîsen-ū da ǁkhā. Tamas ka iob ge a huida ǁkhā ǀaesen hâ ǃgâsa-e ǁkhami tamas ka io ǃgâi tama ǁaeb ǃnâ ra ǃkharu ǃgâsa-i ǀkha ǃgâi mîde ǀgoragus ǃnâ. Jehovaba du nî mā-am îb Barnababab ge sîsen-ū khami sadu tsîna sîsen-ū?—1Tes. 5:14. w19.10 22 ¶8

Sada ǀhōsan ǀkha da ga ǀguiba sîsenǀhao o, o da ge ǁîn di ǃgâi ǀgaugu ǀguiga mû tama hâ xawe ǁîn di ǂkhabusasigu tsîna. Tae-e a huida ǁkhā sada ǀhōsaguside ǀgaisase ūhâs ǃnâ ǃgomsina da ga hōǃâ xawes tsîna? Amaba da ga mî o, ǀoasasiba da ge sada ǃgâsana xu ǃâubasen ǁoa. Nēs ǃaroma da ge ǀasa ǀhōsaguside da ga om o ǃgarise nî sîsen nēsa ūhâ ǀgaras ǃaroma. Sada ǀhōsa i ga dīsā o, o da ge ǂhauǃnâ xawe ǃgâi daoǁgausa Elobmîsa xu ra mā nî ǂgao. (Psa. 141:5) Tsî tsûtsû dan ga o, o da ge nî ǀûba nî. ǀÛba nî toa da gas khaoǃgâ sada tsûtsûs ǃgaon ge dī xū-e ǁîn tamas ka io nau ǃgâsan ǀkha ǃhoasa xu ǂgōsen re. Nēs ge kaise a ǂhâǂhâsa nē ǀuni tsēdi ǃnâ sada ǃgâsan di ǃgâi ǀgaugu ai ǂâisa ǂnûisa tsî ǁîn di ǂkhabusasigu ose. Nēsa da ga dī o, o da ge sada ǃgâsan ǀkha da ūhâ ǀhōsaguside nî ǀgaiǀgai, nē ǀhōsaguside da ge kai ǁgâiǀāb ǁaeb ǃnâ ǂhâ hâ. w19.11 6 ¶13, 16

Elobmîsa da ra ǁkhāǁkhā khami da ge nî ǁgūtsâ ‘ǁkhāǁkhāsabedīsa . . . tsî khoena nî hui în Jesub ge mîmā xūn hoana ûiǂui.’ Khoena da ge nî hui în mûǂan matikōse i a ǂhâǂhâsasa în Jehovaba ǃoaba tsî ǁîb Gaosiba ǂkhâǃnâ. Nēs ge ra ǂâibasen î da khoena ǂkhâǃnâ în amaba ūǃoa tsî ǁkhāǁkhāsen an ra xūna ûiǂui tsî ǁîn ûiga Jehovab ǃoa-ai mâǁnâ tsî ǁāǁnâ-e. Nēsan ga dī o, o ǀguin ge Jehovab tsēs ai nî sâuhe. (1Pet. 3:21) ǃNubu ǁaerob ge nēsis tsî ǀams nî hās tsîn ǁaegu hâ. Nēs ǃaroma da ge ǀkharaǀkharana ǁîn ûib ǃnâ dī ǂgao tama tsî Jehovab di ǃoaba-ao kai ǂgao tama khoen ǀkha Elobmîsa ǁkhāǁkhāsens ǃnâ-ū ǁaeba ǁore ǂgao tama hâ. (1Kor. 9:26) Sada di sîsenni ge kaise a ǁgariǁgarisa. ǂGui khoen ge noxoba ǃau hâ hîna Gaosib haisi-amsa nî ǁnâuse īna. w19.10 11-12 ¶14-15

Mâ kurib hoaba ǂkhîbagus di tsēs ai, os ge Israelǁaesa ǀguiba gere hā tsî xamanina gere ǁguiba. ǁNā ǁguiban ge Israelǁaesa gere ǂâiǂâiǃnâ ǁîn ǁorena xun nî ǃanu ǃkhaisa. ǁNās khaoǃgâb ge pristera ǃgâihamxūna ǂnomdi ai ra ǁhō tsîs ge hoa ǃkhaisa ǁkhoaxase ra ham. Tae-e da xu ra ǁkhāǁkhāsen? Elobmîs ge ra ǁgau Jehovab ǂgomǂgomsa ǃoaba-aon di ǀgoredi hîna ǁîb xa ra ūǃoa-e di ge ǃgâihamxūn khami ī di. (Psa. 141:2; J.ǂHa. 5:8) ǀGapi pristeri ge ǃgâihamxūna ǃgôaǃgâsib ǀkha Jehovab aiǃâ gere sī-ū. ǁKhā ǀgaub ǃnâ da ge Jehovaba ǃoa da ga ǀgore o, o nēsa ǃgôaǃgâsib ǃnâ ra dī. Kaise da ge ra ǃgôaǃgâ Kuru-aob ge mā-am da o i da ǁîba ǃoa ǀgū ǀgôa i ǁgûba ǃoa ra ǀgu khami. (Jak. 4:8) ǁÎb ge ǁîb ǀhōsan ase ra ūǃoa da. (Psa. 25:14) Nē aiǂhanuba da ge kaise ra ǃgôaǃgâ tsî ǁîba ra ǂkhîoǃnâ kai xūna dī ǂgao tama hâ. w19.11 20-21 ¶3-5

Sadu ra hâ ǂharis ǃnân khoena sîsen-e mati ra mû? ǀNî ǃhūgu ǃnân ge khoena kaise ǃgarise ra sîsen. Kaise ra sîsen khoen ge ǁaeba ūhâ tama hâ în sâ, ǁîn omaridi ǀkha ǁaeba ūhâ tamas ka io ǁîn gagasi ǂhâsiga kōǃgâ. (Aoǁn. 2:23) ǀNî hâ ǃgomsib ge ǀnî khoen ge sîsen ǂgao tama hâ tsî ǃaromana ra ôa în tā sîsen. (ǂKhm. 26:13, 14) ǂGui khoen ge nē ǃhūbaib ǃnâ kaise ra sîsen tamas ka io ǀorose ra sîsen. Xawe Jehovab tsî Jesub tsîkha sîsenni xa ūhâ mûǂuiba ǃoa kō re. ǂAn da ge a Jehovab sîsensa kaise a ǀnam ǃkhaisa. Jesub ge nēsa ge ǃgāsa kai, mî rase: “Ti îb ge nēsis kōse ra sîsen, o ta ge tita ona ra sîsen.” (Jhn. 5:17) ǂÂi re sîsenni hînab ge Jehovaba a dīb xa ǀhomǃgāgu, ǀgamirodi tsî ǃhūbaib tsînab ge kuru o. ǂGui îsa xūn hînab ge Jehovaba a kurun tsîna da ge nēba ǃhūbaib ai ra mû. w19.12 2 ¶1-2

Daviba mati nē ǃgâi ǀhōsagusisa Jehovab ǀkha ge omkhâi? Davib ge Jehovab xa ǁîb kurus ǃnâ-ū ge ǁkhāǁkhāsen. Davib ge ǂkharirob ge ī o ǃnāsa ǁaeba ǃgarob ǃnâ ǁîb ǁgûb di gūna gere ǃûi. Nē ǁaeb ǃnâb ge ǀnîsi Jehovab ge kuru xūn xa gere ǂâiǃgâ. Davib ge kōkhâib gere o ǂgui ǀgamirode gere mû xaweb ge ǃnāsa-e ǀgamirodi xa gere mû. ǀGamirode ge kurub di ǀgaugu xab ge ǀgamirodi ǃnâ-ū gere ǁkhāǁkhāsen. (Psa. 19:1, 2) Davib ge ǁîb tsî nau khoen a kurusa ǀgaus xa gere ǂâiǃgâ o, ob ge Jehovab di gā-aisiba nēs ǃnâ gere mû. (Psa. 139:14) Davib ge Jehovab kuru hâ xūn xa gere ǂâiǃgâ o, ob ge kaise Jehovab ǃoa-ai ǂkharirose gere mûsen. (Psa. 139:6) Tae-e da go ǁkhāǁkhāsen? Tsēkorobe sadu ǂnamipe hâ xūn, hain, xamanin tsî khoen tsîn Jehovab xa ra ǁkhāǁkhā du xūn xa ǂâiǃgâ re. O du ge mâ tsēs hoasa sadu ǀnamxa ǁGûb xa xū-e a ǁkhāǁkhāsen ǁkhā. (Rom. 1:20) Tsî du ge nî mû matib sadu ǀnamma tsēs hoasa ǁîb ǃoa-ai ra ǀgai ǀgausa. w19.12 19-20 ¶15-17

Moseb ge Eloba ǃoabasa ge ǁhûi. 40 Kurixab ge io, ob ge Moseba ge ǁhûi Elob khoen Hebreǁîn ǀkha ǀhûǀhaosa, “Faraob ôas di ôab” ase ǂan-es xa. Moseb ge ǀgapi ǃharosa ūhâsa ge ǂkhā. Moseb ge Hebreǁîn hîna ge Egipteb ǃnâ ǃgā în ǀkhāba ge ǁhûi ǁîb ge ge ǂan i Faraob hîna ge ǁnā ǁaeb ǃnâ kaise ǀgaisa îb nēs xa kaise nî ǁaixasa. Nēs ge ra ǁgau Moseb ge ǀgaisa ǂgomsa ūhâ i ǃkhaisa. Moseb ge Jehovab ǃnâ ǂgomǃgâsiba ge ūhâ i. Nē ǂgomǃgâsib ge kaise ge ǂhâǂhâsa i nēs ǃaromab ge Moseba Jehovab ǀkha ǁîb ûib hoaba ǀhōsagusisa ge ūhâ i. (ǂKhm. 3:5) Tae-e da ra ǁkhāǁkhāsen? Moseb khami da ge hoada mîǁguiba nî dīs ge: Eloba ǃoaba tsî da ǁîb khoen ǀkha nî ǀhûǀhao? Jehovaba ǃoabas ǃaroma da ge ǀnî xūna xu nî ǂgōsens ge tsî ǁnān hîna Jehovaba ǀūn ge nēs ǃnâ nî mâǃoa da. Xawe da ga Jehovab ǃnâ ǂgomǃgâ o, ob ge ǁîba huida tsî nî ǂkhâǃnâ da. w19.12 17 ¶5-6

ǃHūbaib di tsaraba xu da kuru-e hâ xawe da ge nēs xa kaise a ǀō-aisa. ǀNî aiǁgaude ǃoa kō re hîna ra ǁgaude Jehovab ra ǃgôaǃgâ da ǃkhaisa. ǁÎb ge khoesiba ǁîb ǀgaugan nî ǁgae ǀgaub ǃnâ ge kuru. (Gen. 1:27) ǁÎb ge khoesiba nau xūn hoan xa ǀgapise ge kuru tsî ǁîna ǃhūbaib tsî xamanin tsîna kōǃgâs ǁgaumâisa ge mā. (Psa. 8:4-8) Adammi ge ǁores khaoǃgâs tsînab ge Jehovaba noxoba khoesiba gere ǃgôaǃgâ. ǁÎb ge sida kaise ra ǃgôaǃgâ ǁnā-amagab ge ǁîb di ǀnamǀnamsa ǀgôab Jesuba xoremarib ase sida ǁoren ǃgao ge mā. (1Jhn. 4:9, 10) Xoremarib di ǃgâigu ǃoagu ra sîsenseb ge Jehovaba ǁnān hîna ge Adammi di ǁoreb xa ǃaroma-e hâse a ǁōna khâisa nî mā ‘ǂhanu-ain tsî ǂhanuoǃnân tsîn hoana.’ (ǃNǃkh. 24:15) ǁÎb mîs ge ra ǁgau ǁîb mûǁae da kaise a ǀō-aisa ǃkhaisa ǀaesen, ǀgâsa tamas ka io da ga kaira xawes tsîna.—ǃNǃkh. 10:34, 35. w20.01 15 ¶5-6

Khoe-i ge ǁî-i di ǀhommi ǃâubasensa ǁî-i omaris ǁani-e xu ǀumi tama hâ. ǁÎ-i ge nēsa Eloba xu ra ǃkhōǃoa. (1Tes. 2:12) ǁNā-amaga da ge khoena nî ǁaixa kai dîna dîsa xu nî ǂgōsen. Aiǁgause da ge ǂkhauhesa ǃgâsab kaikhoesa dî tide matis ra tsâsa ǃhūbaib ai ǀamose ûisa ǁîs kaikhoeb ose. ǂGomǃgâ ǁkhā da ge a Jehovab ǀasa ǃhūbaib ǃnâ ‘ûitsaman hoan di turaga nî ǁâǁâ’ ǃkhaisa. (Psa. 145:16) ǂKhauhesa ǃgâsana da ga nau ǃgâsan xa ǀō-aisase mû tama ī o, o da ge nēsa xu a ǁkhaubasen ǁkhā. Mati da nēsa a dī ǁkhā? Elobmîs ge ra ǁgau ǀnî ǂkhauhesa ǃgâsan ǂgomǂgomsase hâ tide ǃkhaisa. (Mat. 25:10-12; 2Pet. 2:20, 21) Xawe da ga ‘khoen ǀgauga ǁgae’ tama i o da ge ǁîna sao tide, ǂkhauhesan, ǃgâise ǂansa khoen tamas io ǁnān hîna Jehovaba gaxuse ǃoaba hân gas xawes tsîna. (Jud. 16) Nēs ǃaroma da ge ǁîn ga ǂgomoǃnâ tsî ǀhaohâba xu bē o, Jehovab ǃoa-ai ǂgomoǃnâ tsî ǁîba ǃoaba ǀû tide. w20.01 29 ¶9-10

Jehovab di ‘ǀnamǀnamsa ǀgôan’ ase da ge ǃgarise ra ǁgūtsâ ǁîba ǁgaesa. ǁÎb ǀgauga da ge ra ǁgae, nau khoen ǃoagu da ga ǀnamxaǃnâ, khoexaǃnâ tsî ǀûbaǀnamxa o. ǁNān hîna Eloba a ǀūn ge sada ǃgâi tanisen ǀgauban ga mû o, o nî ǁgari-e Elob xa ǁkhāǁkhāsensa. (1Pet. 2:12) Xristeǁî ǁgûn ge nî ǁgūtsâ ǁîn ǀgôan ǀkha Jehovab sada ra hâ-ū ǀgaub ǃnâ ǁîn ǀkha hâsa. ǁGûn ga Jehovaba ga ra ǁgae o, on ge ǀgôana ra ǁgūtsâ ǁîb ǀkha ǀhōsagusisa ūhâsa. Sada ǀhomsi ǁGûb ǃnâ da ge kaise a ǂnīsa tsî da ge nau khoen tsîn ǁîba nî ǂansa ra ǂhâba. Sada ǂgaogu ǃnâ da ge Gao-aob Davib khami ra tsâ, hîna ge xoaba: ‘ǃKhūb ǃnâ ta nî koasen.’ (Psa. 34:2) Xawe da ga Jehovab xa ǃhoasa tao os? Mati da ǁkhoaǂgaosiba nî omkhâi? ǁKhoaǂgaosiba da ge ra omkhâi Jehovab ǁîb xa da ga ǃhoa o ra ǂkhî ǀgaus xa da ga ǂâi o. Tsî nau khoen matikōse nî ǀamasa Jehovab xa ǁkhāǁkhāsensa xu. Jehovab ge ǂhâ da hâ ǁkhoaǂgaosiba nî mā da. ǁÎb ge ǃkharu ge ǁaeb ǃnâ ge ûi hâ i ǃgâsana ge hui în ǁkhoaǂgaosiba ūhâ tsîb ge sada tsîna a hui ǁkhā.—1Tes. 2:2. w20.02 11 ¶12-13

ǂGui khoen hîna Elobmîsa ra ǁkhāǁkhāsen an ge ra aiǃgû ǁāǁnâs kōse. Xawe ǀnîn hîna sada ǀkha Elobmîsa ra ǁkhāǁkhāsen an ge ra ǃao ǁkhāǁkhāsabe kaisa. ǁÎn ge ǁîn Elobmîs ǁkhāǁkhās xa a ǃgâibahe xawen ge ǁāǁnâs kōse sī tama hâ. Khoe-e du ga Elobmîsa ǁkhāǁkhā o, o da ge a ǂan sadu nē khoe-e ra hui ǂgaosa î-i ǁkhāǁkhāsen i ra xūna ûiǂui tsî Xristub ǁkhāǁkhāsabe kai. Jehovab ge ǂhâba hâ în khoena ǁîba ǃoaba, ǁîban a ǀnam amaga. Nēs ǃaroma da ge sada Elobmîsa ra ǁkhāǁkhā khoena ra hui ǂgao în mûǂan Jehovab ǁîna kaise ra tsâba tsî a ǀnam ǃkhaisa. ǁÎna da ge ra hui ǂgao în Jehovaba “ǃoaǀgôan di î, tsî ǃoataradi di ǂhanuǂhanu-aob” ase mû. (Psa. 68:5) Elobmîsa du ra ǁkhāǁkhā khoe-i ga Jehovab ǀnamma ǃgôaǃgâ o, o i ge ǁîn ǂgaoga nî tsâǀkhā-e tsîb ge ǁîn ǀnamma Jehovab ǃoa-ai nî kai. Sadu Elobmîsa ra ǁkhāǁkhā khoena hui re în ǁnâuǃā sada ǀnamxaǃnâ Elob ǂhâba hâsa în ǀamo ûiba hō tsîb nēs ǃnâ nî hui nîsa. w20.01 3 ¶7-8

Apostel Paulub ge ge ǃgamǃgamsen xa i tsî ge mûǂan ǁkhaeǂgao-esab ǂhâ hâ ǃkhaisa ǁîb ǀhōsana xu. ǁÎb ge ge ǂâiǂhânsen tama hâ i, nau khoen ǁîb a ǂkhabusa di nî mîsa, ǁîb ǀhōsana xub huiba ra ǃkhōǃoa amaga. (Kol. 4:7-11) Mûǂan da ga o, ǂkhâǃnâ-esa da ǂhâ hâsa, on ge sada ǃgâsana mâsenxase, huib hîna da ǂhâ hâba nî mā da. Paulub ge ge ǂan i xoas ǁîba nî ǁkhaeǂgao ǃgâisa. (Rom. 15:4) Nēs ge gā-aisib tsîna nî mā bi ǁîb ǃgomsina tani hōs ǃaroma. (2Tim. 3:15, 16) ǀGamǁî ǃnāsab ge Romes ǃnâ ǃkhōsis ǃnâ ūhe o, ob ge Pauluba ǁîb ǁōb a ǀgūsa ge hōǃâ. ǁÎb ge Timoteuba ge ǂgan îb ‘ǂkhanide’ hā-ūba bi. (2Tim. 4:6, 7, 9, 13) Tae-i ǃaroma? Nē ǂkhanidi ǀnîsi Hebre Xoadi ǃâ-e ge ūhâ i amaga hînab ǁîb Elobmîs ǁkhāǁkhās ǃnâ a sîsen-ū ǁkhāde. Pauluba da ga ǁgae tsî hoaǁae Elobmîsa ôaǃnâ o, ob ge Jehovaba xoasa nî sîsen-ū ǁkhaeǂgao das ǃgao. w20.02 23-24 ¶14-15

Elifab, Bildab tsî Sofari hâgu gere ǃhoa xūna xu da ge a mû ǁkhā, ǁîgu ǁnā ǁaeb, hîna gu ge ǃnōsase ǂnôa îba Joba gu nî hui ǀgaub xa ge ǂâi tama hâ isa. Xawe gu ge Jobi ǀnîsi dī hâ tsū xūn xa ǀgui gere ǂâi. Ama xūna gu ge gere mî, xawe ǃnāsa xūn hîna gu Jobi tsî Jehovab tsîn xa gere mîn ge ge ama tama hâ i. ǁÎgu ge Joba tsū khoeb a ti gere ǂgā-am. (Job 32:1-3) Jehovaba tae-e nēs xa ge mî? ǁÎb ge nē ǃnona khoegu ǃoa-ai ge ǁaixa. ǁÎb ge ǁîga gâre di ǂgâi tsî Joba ge ǂgān îb ǁîga ǀgoreba. (Job 42:7-9) Elifab, Bildab tsî Sofari tsîgu di ǁgai aiǁgaude xu da ge xūna ra ǁkhāǁkhāsen. ǂGurose da ge tā sada ǃgâsana nî ǀgoraǃgâ. (Mat. 7:2-5) Xawe da ge xū-e da nî mîs aiǃâ ǃgâise ǁîna ǃoa nî ǃgâ. Nēsa da ga dī o, o ǀgui da ge sada ǃgâsan mâsiga nî ǁnâuǃā. (1Pet. 3:8) ǀGamǁîse da ge ǃhoa da ga o, o nî ǂan sada mîdi a ǀnamxaǃgâ tsî ama ǃkhaisa. (Efe. 4:25) Tsî ǃnonaǁîse, Jehovab ge nau khoen ǃoa-ai da ra mî xūn ǃnâ ǃgâiǃgâibasensa ūhâ. w20.03 22-23 ¶15-16

Nau khoena da ga Jehovab xa ǁkhāǁkhā o, o da ge sada tsîna Jehovaba ǃgâise ra ǂan. Aiǁgause da ge Jehovab di tsamtsîǃnâsiba ra mû khoen hîna ǂhanu ǂgaoga amaba ūba hâna ǃoab ra daoǁgau da hîna. (Jhn. 6:44; ǃNǃkh. 13:48) Elobmîs ǀgaiba ūhâ ǃkhaisa da ge ra mû sada Elobmîsa ra ǁkhāǁkhā khoen ga ǁîn di ǁgai ǀgauga xū ūdawasen tsî ǀkharaǀkharana ǁîn ûigu ǃnâ dī o. (Kol. 3:9, 10) Tsî da ge Elob di ǃnūǃnâxasiba ra mû ǂguinab ra sada ǂharidi ǃnâ ǁaeba mā hîna în ǁîb xa ǁkhāǁkhāsen tsî sâuhe ǁkhā. (Rom. 10:13-15) Matikō gaxuse da ga Jehovaba ǃoaba xawe da ge tā ǁîb ǀkha da ūhâ ǀhōsagusisa ǁau xū-i ase nî ū. ǀGui ǀgaub hîna da Jehovaba a ǁgau ǁkhās ǁîb ǀkha da ūhâ ǀhōsagusisa da ra ǃgôaǃgâs ge hoaǁae ǁîba ǃoa ǀgoresa. Khoe-i ǀkha du ga ǃgâi ǀhōsagusisa ūhâ ǂgao o, o du ge ǁî-i ǀkha hoaǁae nî ǃhoa. Nēs ǃaroma ǃgâi ǀhōsagusisa da ga Jehovab ǀkha ūhâ ǂgao o, o da ge hoaǁae ǁîba ǃoa nî ǀgore tsî tā nî ǃao sada ǂgaogu ǃnâ hâ xūna ǁîba mîbasa. w19.12 19 ¶11, 13-14

Nē ǂâis ge ǂkhîba ra hauba da. Elob Gaosib di Gao-aob aseb ge Jesuba hoaraga ǃgomsin hîna ǁGâuab xa ra ǃaroma-ena nî ūbē. (Jes. 65:17; 1Jhn. 3:8; J.ǂHa. 21:3, 4) Nēs ge ǃgâi ǃâubasensa ra mā da. Tsî Jesub ge ǃgom sîsen-e a mā da xaweb ge ra huida nē ǀuniga tsēdi ǃnâ ra ǂkhâǃnâ dase. (Mat. 28:19, 20) Nēs ge ǁkhoaǂgaosiba sada ǃnâ ra omkhâi. Sâsasib, mûǂuigu tsî ǁkhoaǂgaosib tsîn ge xūn hîna da ǃgaoǃgaodi ase sada ǂkhîb ǃaroma ūhâna. Nēs ǃoagu da mati, sada di ǂkhîba a ūhâ ǀgara ǁkhā ǂgui ǃgomsina da ga hōǃâ o? Jesub ge dī xūna ǁgaes ǃnâ-ū da ge nēsa a dī ǁkhā. ǂGurose, ǀgores ǃnâ mâǀgai re. ǀGamǁîse, Jehovaba ǁnâuǀnam tsî ǁkhoaǂgaosib ǀkha aoǁnâ re, mâsigu ga ǃgom xawe. Tsî ǃnonaǁîse sadu ǀhōsan di huiba ôa re, în sadu ǃgomsin ǀkha hui du. Ob ge Jehovab ǂkhîba sada ǂâidi tsî ǂgaogu tsîna sâsasiba nî mā. (Fil. 4:6, 7) Tsî da ge Jesub khami hoa ǃgomsina nî mâǃoa.—Jhn 16:33. w19.04 13 ¶16-17