Augustub

Jesub ge ǂkhîba ge ūhâ i ǃgomsinab gere hōǃâ xawe ǂan ni ge i amaga ǁîb ǁGûbab ra ǂkhî kaisa. ǁÎb ge ǂgomǂgomsase ge hâ ǃgom i ge i xawe. ǁÎb ge ǁîb ǁGûba ge ǀnam i tsî Jehovaba hoaǁae gere ǂkhîǂkhî ǂgao. ǃHūbaiba ǃoab nî hās aiǃâb ge ge Elob di ‘dana sîsenǀhao-ao’ i. (ǂKhm. 8:30) Tsî ǃhūbaib aib ge hâ io, ob ge khoena ôasase ǁîb ǁGûb xa gere ǁkhāǁkā. (Mat. 6:9; Jhn. 5:17) Nē sîsenni ge Jesuba kai ǂkhîba gere mā. (Jhn. 4:34-36) Jesuba da ge ra ǁgae Jehovaba da ga ǁnâuǀnam o tsî ‘ǃaruǀîǀgui ǀaro, o ǃKhūb di sîsenni ǃnâ.’ (1Kor. 15:58) Hoaǁae da ga “mîs ǀkha” ǀhape o, o da ge sada ǃgomsina nî tani ǁkhā. (ǃNǃkh. 18:5) Aiǁgause, ǁnān hîna da aoǁnâ sîsenni ǃnâ ra ǀhao-ūn ge ǀnî ǁaen ai ǂgui ǃgomsina sada xa ūhâ. Xawen ga Jehovab xa ǁkhāǁkhāsen tsî ǁîb daoǁgaude ǁîn ûigu ǃnâ ûiǂui o, on ge ǂkhî ûiga ra ūhâ tsoatsoa. Nēsa da ra mû ǁaeb hoaba da ge ra ǂkhî tsî ǂgomǃgâsiba ra omkhâi Jehovab nî kōǃgâ dasa. w19.04 10-11 ¶8-9

Nē khoen ge ǃgarise ge dītsâ nē ǂkhaba gagaga xu ǂgōsensa. ǁÎn ǂkhanin hîna ge ǃgaidīb xa hâ in ge ǂgui mari-e gere ǂgan. Xawen ge nē ǂkhanina khoena mā tamas ka io ǁamaxū tama i tsî ge hîkākā. ǁÎn ge Jehovaba ǂkhîǂkhîs xa gere ǂâi, nē ǂkhanin ge matikō mari-e gere ǂgans xas ose. Mati da ǁnā ǂguro ǁaeb Xristeǁîn aiǁgausa a ǁgae ǁkhā? ǃGaib ǀkha dī xū-e ūhâ xūn hoana da ga āxū o, o i ge nî ǃgâi. Nēs ge ǁgā-e ra xūn, ana-e ra xūn tamas ka io khoen ǂkhaba gagaga xu ǁkhaubasens ǃaroma ra ūhâ xūn tsîna ǃkhōǂgā hâ. (1Kor. 10:21) Sâǁaeb ǃnâ du ra dī xūna ǃgâise ôaǃnâ re. Dîsen re, ‘tita ra dī xūn hoana ǃgaidība ǃkhōǂgā hâ?’ Xawe da ga kō da nî xūna ǁhûi o, o da ge Jehovaba nî ǂkhîoǃnâ kai xūna xu ǃnūse ra hâ ǂgao. Hoa xūna da ge ra dī ǂgao ‘ǃanu ǃgâiǂâisa ūhâs’ ǃaroma.—ǃNǃkh. 24:16. w19.04 22-23 ¶10-12

ǀHaohâb ǃûi-aogu ge nēs ǃaroma ǂâiǂhânsende ūhâ, nē ǃnôa ǁhōgaguga hō o. ǀHaohâb ǃûi-aogu ge Elob ǀonsa ǃanuǃanus ai ǁîgu ǂâisa ra ǂnûi. (Lev. 22:31, 32; Mat. 6:9) ǁÎgu ǃgâsan di gagasi mâsib xas tsîna gu ge ǀhaohâb ǃnâ ra ǂâiǂhansen tsî ǀgaiǃkhōs xa tsâǀkhāhe hâ ǃgâsana ra hui ǂgao. Tsî nē î nî ǀhaohâb khoes ga io, o gu ge ǀhaohâb ǃûi-ao ga ra dītsâ nē khoe-e huisa nēs ga īǁkhā o. (Jak. 5:14, 15) ǃGâsa i hîna ǁî-i di turagu ǃnâ ra mâǁnâsen i ge gagasise ǀaesen hâ. Nēs ge ra ǂâibasen ǁî-i ǃaruǀî ǃgâi ǀhōsagusisa Jehovab ǀkha ūhâ tama hâsa. Nē ǀgaub ǃnâ gu ge ǀhaohâb ǃûi-aoga a gagasi ǀaeǃkhō-ao. ǁÎgu ge ra dītsâ nē khoe-e huisa, nē mâsib ǃnâ-i ge “ǀaesen hâ khoe-e” tsūdī-ao-e ǃoa ra ǁnaeǁgau. ǁÎgu di gagasi daoǁgaudi ge nē khoe-e a hui ǁkhā ǁî-i di ǀhōsagusisa Jehovab ǀkha ǃgâiǃgâis ǃnâ. Xawe nēs ge ǁî-i ga amabes ǃnâ ǃhausen o ǀgui a īǁkhā.—ǃNǃkh. 3:19; 2Kor. 2:5-10. w19.05 10 ¶10-11

Jehovab ge xū-e dīs ǁkhāsiba a mā da ǁkhā. Aiǁgause, da ge sada ǀhaohâb ǂganagas tamas ka io ǃgauga ǂhâsib hâsa ra mûǂan. O da ge a dîsen ǁkhā, ‘Mati ta nē ǂhâsib ǃnâ a hui ǁkhā?’ Tamas ka io da ge ǃgom sîsen-e a māhe ǁkhā tsî a ǂâi ǁkhā mati ta tita nē sîsen-e nî dīhō. Tamas ka io da ge ǃâ-e Elobmîs ǃnâ khomai tsî a ǂâi ǁkhā, ‘mati ta nē xū-e ti ûib ǃnâ ûiǂûi tsî nau khoen tsîna a hui ǁkhā?’ Jehovab ga mû o, māsenxase da ra ôaǃnâsensa, ob ge Jehovaba ǁkhāsiba a mā da ǁkhā ǁnā xū-e dīs diba. Jehovab ge xū-e dīs ǀgaib tsîna a mā da ǁkhā. (Jes. 40:29) ǁÎb ge ǁîb di ǃanu gagaba a mā da ǁkhā ǂkhâǃnâ das ǃaroma. (Eks. 35:30-35) ǁÎb di ǀapeǂhumis ǃnâ-ūb ge Jehovaba a ǁkhāǁkhā da ǁkhā mati ǀnî xūna dīsa. Xū-i ra dī-e ǀgauba du ga ǀū o, o huiba ǂgan re. ǃNorasase tsâ re sada mā ǀnamxa ǀhomsi ǁGûb tsîn ai huiba ǂgansa ǁîb ge ‘ǃnāǂamsase ǀgaiba’ ra mā.—2Kor. 4:7; Luk. 11:13. w19.10 21 ¶3-4

Buru tama da ge hâ ǃhūbaib khoen nē mûǂuiba ūhâ ǃkhaisa. ǀGui mîdi ǂkhanis ge ge mî 1970ǁî kurigu ǃnâ di “ge ǂkhanidi hîna ǃgâi ûiba ūhâs xa hâde ge hâ i” di. ǀNî ǂkhanidi ge “khomai aona gere ǂkhâǃnâ în tā ǀkharaǀkharasen tsî ǁîn ǀkha i xū-e a tsū di ǂâi.” ǀGui aiǁgausa ǃoa kō re, ǀgui ǂkhanis ǃnâ ge māsa i xoaǁguib ge ge mî: “Aitsama ǀnamsen re îsa, ǂoaǂamsa khoets hîna ûi hâts a amaga.” ǂHanub ai ǃgaoǃgaosa, nau khoena huis ǃgao hâ ǂkhanis ge ge mî “khoe-i ge aitsama mîǁguiga dī tsî ǁî-i ǂhanu di ra ǂâi xūn hoana nî dī.” Nē ǂâiǀgauba du ge ǀnai ǁnâu hâ i? ǁGâuab ge Evasa ge ǂkhâǃnâ is ǂhanu tama hâ xū-e dī. ǁÎb ge ǁîsa ge mîba: “Elob ǁkhāb khami nî ī, tsî ro ge nî ǂan mâ-i a ǃgâi tsî mâ-i a ǂkhaba ǃkhaisa.” (Gen. 3:5) Nētsēn ge ǂguina kaise a ǀgapiǂâixa tsî ǁîn ǀguin a ǂhanu tsîb Elob tsî khoen tsîna ǁîna xū-e mîba ǁoa ǃkhais ǂâiǀgauba ūhâ. Aiǁgause, nē ǂâiǀgaub ge khoen ǃgameba ra mû ǀgaub ǃnâ a mûhe ǁkhā. w19.05 23 ¶10-11

ǀNî ǁaegu aib ge Gao-aob Daviba kaise gere tsûaǂgao. ǁÎb gere hōǃâ ǃgomsigu xa ǂâi re. ǁÎb ge ǂgui tsūgu hînab gere ǃaromagu ǃgao gere tsûaǂgao. (Psa. 40:12) ǁÎb ǀnamǀnamsa ǀgôab Absalommi ge ǁîb ǃoagu ge ǁore, ǁîb ǁōba î ge ǃaromas kōse. (2Sam. 15:13, 14; 18:33) Tsî Davib ǀgū ǀhōsan ge ǁîba ge ǀapexū. (2Sam. 16:23–17:2; Psa. 55:12-14) ǂGui psalmdi Davib ge xoadi ge ǁîb tsâsigu tsî ǁîb ǂgomǃgâsib Jehovab ǃnâb ūhâb tsîna ra ǁguiǃā. (Psa. 38:5-10; 94:17-19) Egab ge psalmdi xoa-aoba ǂkhabaxa khoen di ûiǀgauga ra suri. ǁÎb ge ǀnîsi Leviǁî Asafi omarisa xu gere hā tsîb ge ǀnîse “tempeli” tawa Eloba gere ǃoabana. Psalmdi xoa-aob ge kaise gere tsûaǂgao tsî nēs ge gere ǂkhîoǃnâ tsî ǂkhabuǂâi kaibi. ǁÎb ge Elob ǀkhaegu tsîna ge dîǃnâ tsoatsoa.—Psa. 73:2-5, 7, 12-14, 16, 17, 21. w19.06 17 ¶12-13

ǁGâuab ǁgâiǀāb hoaǃnâ-aixa turagu ǃoa-ai. Hoada ge ǂansa ra ūhâ ǂgao hîna a huida ǁkhāsa sida omaride kōǃgâs ǃnâ. (1Tim. 5:8) Nē ǂansa da ge skoli tawa a hōǁkhā tsî ǃgâise da ga skoli tawa ǁkhāǁkhāsen o. Xawe da ge nî ǂanbasen. ǂGui ǃhūgu ǃnâ i ge hoaǃnâ-aixa xūn ǀguina ǁkhāǁkhā-e tama hâ xawe ǃhūbaib khoen gā-aisib xas tsîna ra ǁkhāǁkhā-e. Skolgu ge ǀgôana Elob a ǀkhai ǃkhaisa ra ǂgom kai tsî ra ǁkhāǁkhā în tā Elobmîsa ǃgôaǃgâ. ǀGôan ge ra ǁkhāǁkhā-e hoa gā-ai khoen ra ǂgomsa xūn ge aitsamaba xu a hāsa. (Rom. 1:21-23) Nē ǁkhāǁkhā-ain ge ‘Elob gā-aisiba’ ra mâǃoa. (1Kor. 1:19-21; 3:18-20) ǁGūtsâ da ge nî ǁGâuab ǃhūbaib di “khoesi gā-aisib tsî ǁau ǂgaeǂhapus” xa tā ǂgaeǂhapuhesa. (Kol. 2:8) Tā ǁGâuab xa ǂgaeǂhapuhesa mā-am re. (1Kor. 3:18) Tā ǁGâuaba mā-am re Jehovab xa ǀuru kai du sa. Jehovab ǀgapi Elobmîs daoǁgaudi ǃoagu da ge nî ûi. Tsî da ge tā nî mā-am îb ǁGâuaba Jehovab ǀapemāde xu ǂgōsen kai da. w19.06 5 ¶13; 7 ¶17

Tae-i ǀgui-i kas ǃhoaǃgao du ra-e xawe khoena ǂâis ǃnâ ūhâ re. ǂÂi re, Elobmîsan ga ǁkhāǁkhāsen on nēs xa nî hui-e ǀgaub xa. ǁÎn ǀkha du ga ǃhoa o, ǁîn ra ǃhoa xūna ǃgâ re tsî mîn ra xūn ǃoa-ai ǃgôasiba ǁgau re. ǁNā ǀgaub ǃnâ du ge ǃgâise a ǁnâuǃā nî ǁkhā tsîn ge sada ra mî xūn tsîna nî ǃgâ. Khoe-i ǀkha du Elobmîsa nî ǁkhāǁkhāsens aiǃâ du ge ǁaeba ǁamaǂui tsî ǁnā khoe-e nî sari. Tae-i ǃaroma da nēsa ra dī ǂgao? Khoen sada ǁîna ra sari ǁaeb ai ǁae-e ǀnîsi ūhâ tide amaga. ǂÂis ǃnâ ūhâ re hais ge ǁgam-es ga māhe o, o nî kai. ǁKhā ǀgaub ǃnâ i ge khoe-i Jehovaba ūba hâ ǀnamma nî kai hoaǁae da ga ǁîn ǀkha Elobmîs xa ǃhoa o. w19.07 14 ¶1; 15-16 ¶7-8

Jesuba tae-e gere ǂâibasen? Jesub ge ge mî tama hâ i în Xristeǁîna ǃhuihen hâ ǃkhais xa ǃgâibahe. Xawe gere ǃkhâikhom da tae-i a īǁkhā ǃkhais xa. Sada ge nē ǃhūbaib di ǃâ tama hâ. Sada ge Jesub di ǁkhāǁkhāde sada ûib ǃnâ ûiǂui tsî ǁîb gere dī aoǁnâ sîsen-e ra dī. Nēs ǃaromab ge ǃhūbaiba ǃhui da hâ. (Jhn. 15:18-21) Sada ge Jehovaba ra ǂkhîǂkhî ǂgao. Khoen ga Jehovaba da a ǀnam ǃkhais ǃaroma a ǃhui da o, os ge ǁnāsa a ǁîn ǃgomsi. Tā da ge ū da hâ ǃharode sida ǀkha nî ǀgopeǀnō. ǀŪ da ge a, mâǁae da nî mâǃoahe ǃkhaisa. Tsî ǁnās mati sada ǃoabasa Jehovab ǃoa-ai da ūhâsa a tsâǀkhā ǁkhā ǀgausa. Xawe da a ǂans ge nēsi sida ǀhōsagusisa Jehovab ǀkha ǀgaiǀgaisa. Tsî da ge nēsi ǀnai ǁkhoaǂgaosib tsî khoena xu da ra hō ǃhuiba nî sîsenǂam. Nē aiǂhomisendi ge hānîǁaeb ǃnâ nî hui da. w19.07 6 ¶17-18; 7 ¶21

Elob ǃnâ ǂgom tama khoena da ga Elobmîsa ǁkhāǁkhā o, o da ge ra hui nî ǂgao în ǁîn ǂgoms Elob ǃnân ūhâsa ǀgaiǀgai. Tsî da ge ra hui nî ǂgao în Elobmîs ǃnâs tsîna ǁîn ǂgomsa ǀgaiǀgai. Nēs ge ra ǂâibasen ǀnî xūna da ǀguis xa ǃnāsa ǃnāde nî ǁguiǃāsa în ǁnâuǃā ǁkhā. ǁÎn ǀkha da Elobmîs xa ra ǃhoa ǁaeb hoaba da ge nî hui nî mûsa Elobmîs Eloba xu ra hāsa. Elobmîs kēbodi ra dīǀoaǀoa-e ǀgaus, Elobmîs mati kurus ǂans tsî ǃkharu ge ǁaeb xūn xas ga ǃhoa o, o ama ǀgaub tsî matis Elobmîsa sida ûib ǃnâ ra huida ǀgaus tsîna. Khoena da ge ra hui Xristub di ǁkhāǁkhāsabe kais ǃaroma xawe da ge nēsa ǁîna ǀnamma ǁgaus ǃnâ-ū ǀgui a dī ǁkhā Elob ǃnân ga ǂgom tama i xawes tsîna. (1Kor. 13:1) ǁÎna da ra ǁkhāǁkhā khami da ge ra ǁgau nî ǂgao Elob a ǀnam da tsî ǂhâba hâsa î da ǁîb tsîna ǀnamma omkhâiba. Mâ kurib hoaban ge khoen hîna Elobmîs ǃnâ ǃgâiǃgâibasensa ūhâ tama hân tamas ka io ǀoro ǂansa Elobmîs xa ūhâna ra ǁāǁnâhe, Eloban ǀnamma ra omkhâiba amaga. ǁNā-amaga hoa ǃhaodi khoen ǃnâ ǃgâiǃgâibasensa ūhâ re. ǃHoan ga o ǃgâ nî re. Dītsâ re ǁnâuǃāsa tae-i ǃaroman ǁnāti ra tsâ tamas ka io ǂâisa. Sadu aiǁgaus ǀkha ǁgau nî re Xristub di ǁkhāǁkhāsabe kaisa. w19.07 24 ¶16-17

Salummi ǀgôade Jerusalems mirga dī-ūnus ǃnâ gere sîsen-ū-e khoen ǁaegu ge hâ i. (Neh. 2:20; 3:12) ǁÎdi ǁgûb ge Gao-ao i xawe di ge Salummi ǀgôade māsenxase nē ǃgom sîsena gere dī. (Neh. 4:15-18) Sada tsēdi ǃnâ di ge māsenxa ǃgâsade a ǂkhî ǀō-aisa aiǂhanugu ǀHû-omga om tsî kōǃgâs digu ǃnâ huis ǀkha. Nē māsenxa, ǁkhoaǂgao ǂgomǂgomsa ǃgâsade da ge ǂhâ hâ nē sîsenni aiǃgûs ǀkha huis ǃnâ. Jehovab ge Tabitasa ge ǂkhâǃnâ is ‘ǃgâidī tsî ǀgâsana hui’, ǃgōsase ǃoatarade. (ǃNǃkh. 9:36) ǁÎs di māsenxasib tsî khoexaǃnâsib ǃaroman ge ǂguina ǁōs ge o, o gere ā. Xawen ge kaise ge ǂkhî i apostel Petrub ge ǁîsa ǁōba xu khâisa mā o. (ǃNǃkh. 9:39-41) Tabitasa xu da tae-e ra ǁkhāǁkhāsen? Nēsi da ga ǂkham tamas ka io kaira xawe da ge hoa da xū-e a dī ǁkhā sada ǃgâsana huis ǃnâ. w19.10 23 ¶11-12

Mati da khoe-e a ǃnôa kai ǁkhā? Sao ra aiǁgaus xa ǂâi re. Kaise i ǃgarise ǁgūtsâ hâ hîna i ge Elobmîsa ra ǁkhāǁkhāsen khoe-e ǁî-i ā ǀgauba ǀnōsase ra ūhâ. ǁÎb ge ra ǁnâuǃā xûi-e āsa xūb hoase nî ūbēsensa. Tsî ǁnāpaxū ǂgui ǀkharaǀkharana ǁîb ûib ǃnâ dī tsî ra ǁāǁnâhe. ǁĀǁnâs khaoǃgâb ge ǃgâsaba ǂûǀhaosa ǃoa ǃgâsa i omsa ǃoa ra ǁkhauhe tsî xûi-e ra māhe tsî ra mîbahe: “Nēsits ge a Xristeǁî tsî Jehovab gagabats ge ūhâ. ǀGui ǂûb ǃanu gagab dib ge ǃkhō-oasensa. ǃKhō-oasensats ga ūhâ o, ots ge xûi-e ǀnōsa ǀgaub ǃnâ nî ā.” ǀAmǂoas ge kaise ga tsū hâ nē ǀasa ǃgâsab ga nē tsū ǀapemāsa ǃgâ tsî ǁkhawa xûi-e ā tsoatsoa hâ o. Sida Xristeǁî ǀhaodi ge nētsē māsa xoas ǃnâ ra huida. ǀHaodi tawa da ra ǃhoaǃgao xūn ge ra ǁgau Jehovab tae-e ǂhâǂhâsase ra mûsa. Tsî mati da ǁkhāǁkhāsen da go xūna nî ûiǂûisa ra ǁkhāǁkhāsen i da ǂnao-o. Tsî sida ǃgâsan tsîn ge ra ǂkhâǃnâhe în Elob tsî nau ǃgâsan tsîna ǀnam. Sida ǃgâsan tsî Elob tsîna da ga ǂgaoba xu ǀnam o, o da ge nau ǃgâsana ǃnôakaisa xū nî ǂgōsen. w19.08 10 ¶9; 11 ¶13-14

ǀNî khoen ge ǂgomǃgâsiba ǁîn ǃnâ ūhâ tsî mî ǂgaon ra xū-e ra mî xawes ge nēsa ǂâibasen tama hâ ǁîn ǃgamǃgamsenxasiba ūhâ tama hâ di. (Jhn. 1:46, 47) Nēsi da ga ǂgomǃgâsiba sada ǃnâ ūhâ tamas ka io ūhâ tama i xawe da ge nî dītsâ ǃgamǃgamsenxasiba omkhâisa. Apostel Paulub di aiǁgausa ǃoa kō re. ǁÎb ge Jehovab xa kaise gere sîsen-ūhe ǀhaohâga oms ǃaroma. Īǁkhā i ge a ǁîb ge ǃnāsa-e aoǁnâ sîsenni ǃnâ a dīsa, nau apostelgu Jesub Xristub digu xa. Xaweb ge Pauluba ge ǂâi tama hâ i ǁîb, ǁîb ǃgâsagu xa a ǂhâǂhâsa di. Tsîb ge ǁîba Jehovab ǀkhab ūhâ ǀhōsagusis Jehovab ǀkhomxaǂgaosib xa īǁkhā kai-e hâsa tsîb ǁîba ǂhâǂhâsa tama hâ ǃkhaisa. (1Kor. 15:10) Paulub ge a ǃgâi aiǁgau ǃgamǃgamsenxa khoe-i diba. ǁÎb sîǂkhanisab ge Korintes ǃnâ hâ Xristeǁîna ǃoa a xoa o, ob ge ǂhâǂhâsa khoe-i ase ge ǁgausen tama hâ i ǀnîn ǀhaohâb ǃnâ ǁîb xa ǁgaise gere ǃhoa xawe.—2Kor. 10:10. w19.09 3 ¶5-6

ǀGui ǃaromas hîna Jehovaba ǃnaga hâbasa ra ǃgom kais ge hoa da ge ǁoreba ge ǀumi tsî ǀoasa kurusa ūhâ tama hâ. Nēs ǃaroma i ge supu tama hâ Eloba hoaǁae ǁnâuǀnamsa. Adammi tsî Evas tsîra ge Eloba ǁnâuǀnamoǃnâ tsî ǂkhāsa haisa xu a ǂû o, o ra ge aitsama tae-i ǃgâi tsî tae-i tsūs mîǁguiga ge dībasen tsoatsoa. (Gen. 3:22) Nētsēs tsînan ge ǂgui khoena Adammi tsî Evas khami Eloba ǁnâuǀnam tama hâ tsî tae-i tsū tsî ǃgâisa aitsama ra mîǁguibasen. ǁNān hîna Jehovaba ǀnaman tsîn ge ǁaen ai a ǃgomba-e ǁîba ǁnâuǀnamsa. Apostel Paulub tsîn ge nēsa ge hōǃâ. (Rom. 7:21-23) Paulub khami da ge Jehovab mûǁae a ǂhanu xūna ra dī ǂgao. Xawe da ge hoaǁae ǂhanu tama xūna dīs di turaba nî ǃkhamǃoa. ǀNîhâ ǃaromas Jehovaba ǃnaga hâbasa ra ǃgom kais ge sada ge kaikhâi ǀgaub tsî sada ǂharis ǃnâ ra hâ khoen ra ǂâi ǀgaub tsîn xa ra tsâǀkhāhe. ǂGui khoen ge Jehovab ǂâi ǀgaub ǀkha ǃgûǀhao tama hâ xūna ra mîba da, nēs ǃaroma da ge nî dītsâ i da tā nē khoen khami ǂâi. w19.09 15 ¶4-6

Mûǂan da ge nî hoa da ge ǀgui ǃnôa ǁkhāsiga ūhâ tama hâ di. ǁNās ǃaroma da ge xū-e da nî dīs aiǃâ aibe ǃamkuse nî ǂâiǃgâ. Aiǁgause da ge sida ǁkhāsiba a sîsen-ū ǁkhā ǃhūbaib xūna ôas ǃnâ. Kō re Jesub ge tae-e ǂkham ǃkhū hâ khoeba a mîbasa dîb ge o: “Tare-e dī tsî ta ǀamo ûiba nî ǀumi?” Nē khoeb ge ǀnîsi ge ǃgâi khoe-i Markub di ǃGâiǂhôas ǂkhanis ǃnâ i a xoasa amaga Jesub ge ǁîba ge “ǀnam” di. Jesub ge nē ǂkham ǂgaeǂgui-aoba ǁkhauǂuisa ge mā. Nē khoeb ge Jesuba gere sao ǂgao xaweb ge ǁîb ‘ǂgui xūn’ hoana ge ǁnāxū ǂgao tama hâ i. (Mrk. 10:17-22) Nēs xa ǃaroma-e hâseb ge Jesub di ǁkhauǂuisa ge ǂkhā tsî ‘ǃkhūsisa ge ôa ǀgara.’ (Mat. 6:24) Sado mâ mîǁguiba ga dī hâ? ǁAeba xu ǁaeb ǀkha tae-e da sida ûigu ǃnâ ǂgurose ra mâis xa ǂâis ge a ǃgâi. Tae-i ǃaroma? Nēs ge nî huida i da sida ǁkhāsib hîna da ūhâba ǃgâise sîsen-ū. w19.09 24 ¶17-18

Sada Gaosib aoǁnâ sîsenni ge Jehovab toa i go di mî tama hâs kōse toa tide. Khoena matikō ǁae-e ūhâ Jehovab tsî Jesub Xristub tsîkha xa ǁkhāǁkhāsens amsi? (Jhn. 17:3) Sada ge nēsa a ǀū. ǂAn da ge a kai ǁgâiǀāb nî tsoatsoas kōsen ‘ǀamo ûiba ǃoa ǃkhōǂuibasenhe hâna’ ǃgâiǂhôasa nî ūǃoasa. (ǃNǃkh. 13:48) Nē khoena da mati a hui ǁkhā ǁaeba da noxoba ūhâ hîna? ǁÎb di ǀapeǂhumis ǃnâ-ūb ge Jehovaba hoa xūn hîna da ǂhâ hâna ra mā da, khoena amaba ǁkhāǁkhās ǃnâ. Aiǁgause da ge wekheb ǁaegub ǃnâ hâ ǀhaos tawa ra ǁkhāǁkhā-e. Nē ǀhaos ge ra huida î da ǂan tae-e da ǂguro saris tsî ǁkhawa saris tawa nî mîsa. Tsî ǃgâi ǁgamǀhaosa khoe-i ǀkha aoǁnâ sîsenni ǃnâ ūhâ tsî ǁnās khaoǃgâ ǁî-e Elobmîs ai ǃgaoǃgaosa ǂkhaniba mā o, o i ge ǁî-e ǁnā ǂkhaniba sadu ǁkhawa nî oasī ǁaeb kōse nî khomai. Sada ǃereams ge mâ ǁkhâb hoaba Gaosib di ǃgâiǂhôasa aoǁnâsa. w19.10 9 ¶7; 10 ¶9-10

Jehovab ge Jerusalems ǃnâ gere hâ ǂgomǂgomsa Simeona ge mîba, ǁîb Mesiabab mû tama hâ hîna ǁō tide di. Nē mîmâis ge Simeona ge ǂkhâǃnâ Mesiabab ge ǂgui kuriga ǃâu hâ i amaga. Jehovab ge Simeona ǁîb di ǂgoms tsî mâǀgaibesib amsi ge ǀkhae. ǀGui tsēb ge ‘gagab xa’ daoǁgau-e hâse tempeli ǃnâ ge ǂgâ. ǁNāpab ge Jesuba ǂkham ǀgôarob ase ge mû, Jehovab ge Simeona ge sîsen-ū îb kēbosa nē ǂkham ǀgôab hîna nî Xristu kaib xa mā. (Luk. 2:25-35) Simeoni ge Jesub ǁîb aoǁnâ sîsenni ǀkha nî tsoatsoas aiǃâ ge ǁō, ǁîb ge Jehovaba gere gangan sîsen-ū bib ge ǃkhais ǃaroma tsîb ge ǂgui ǃgâi ǀkhaega hānîǁaeb ǃnâ nî hō. ǀAsa ǃhūbaib ǃnâb ge nē aoba nî mû matis Jesub ǂgaeǂguisa ǃhūbaib omaridi hoade nî ǀkhae ǀgausa. (Gen. 22:18) Sada tsîn ge Jehovab ǁîb ǃoabas ǃnâ ra mā da aiǂhanugu hoaga ra ǃgôaǃgâ. w19.10 22 ¶7; 23 ¶12

Nēsi da ga ǂgui tamas ka io ǀoro mari-e ga ra ūhâ xawe da ge sida di ǂgaoga nî ǁkhauba. Mâ ǀgaub ǃnâ? Tā ǃKhūsiba ǀnamma omkhâiba re. Tsî tā sa sîsen-e ǂgurose mâi re Jehovab di ǃoabas xa. Mati du a ǂan nēs ga ra ī o? ǀNî dîdi hîna da a dîsen ǁkhā di ge: ‘ǀNî ǁaegu ai ta ǀhaodi tamas ka io aoǁnâ sîsen-i tawa ta hâ hîna ti sîsen-i xa ra ǂâi? Hoaǁae ta ǂâusa mari-e ta hānîǁaeb ǃnâ nî ūhâs xa ra ǂâi? Mari-i tsî ǃkhūsis tsîna ti ǃgammeb ǃnâ ǃgomsina ra hā-ū? Nau khoen xa ǂhâǂhâsase mû-e tama hâ sîsen-e ta nî dī Jehovaba ǃoabas di ǁaeba i ga ra mā te o?’ (1Tim. 6:9-12) Nē dîde da ra ǃhoaǃgao hîna da ge sao ra-e ǂâis ǃnâ nî ūhâ, Jehovab ge a ǀnam da tsî ǁîba ǂgaoba xu ra ǃoaba khoena sao ra-e ra mîmâiba: “Tita ge ǁnāxū tsi tide, tsî ta satsa xu ūdawasen tide.” ǁNā-amagab ge apostel Pauluba ge xoa: “Tanisensa as xūǃgunuxasib ose ī.”—Heb. 13:5, 6. w19.10 29 ¶10

Sada ǃgâsan ǀkha da ga ǀguiba sîsenǀhao o, ǁîn di mâǀgaibesiba mû tsî ǁîna xu a ǁkhāǁkhāsen ǁkhā tsî nēs ǃnâ-ū ǀgū ǀhōsaguside ǁîn ǀkha a omkhâi ǁkhā. Aiǁgause aoǁnâ sîsenni ǃnâ da hâ hîna i ga sada di ǀhōsa-e ǁkhoaǂgaosib ǀkha ǁî-i ǂgoms xa ǃhoa tamas ka io Jehovab ǂâisa dīǀoaǀoas ǃnâ i ūhâ ǂgomǃgâsib xa, o da mati ra tsâ? Nēs ǃaroma du ge kai ǀnamma nî omkhâiba nî. Adelines hîna 23 kurixas ge Candice sa ge ǂgan î ra kai ǂhâsiba ūhâ ǂharis ǃnâ sī aoǁnâ. “Sim ge ǁkhoaǂgaosib ǀkha gere aoǁnâ ǂgao tsî ǃgâi ǁaeba aoǁnâ sîsenni ǃnâ gere ūhâ ǂgao” dis ge ra mî. “Hoam ge ǂkhâǃnâsa ge ǂhâ hâ i Jehovaba ǃoaba ǀgaras ǀkha aiǃgûs ǃaroma.” Mati ra ǀguiba sîsenǀhaosa xu ge a ǀama? Adelines ge ra mî, “mâ tsēs hoas ǀams aim ge tsâm ta ǀgaub xa gere ǃhoa tsî tae-i ge tsâǀkhā mis tsî Jehovab daoǁgausam aoǁnâ sîsenni ǃnâ ge mû ǀgaus xas tsîna. Hoam ge nē ǃgam ǁgamǀhaode gere ǃgôaǃgâ tsîm ge ǃgâises tsîna ge ǂangu.” w19.11 5 ¶10-11

ǃKharu ge ǁaeb ǃnâ gu ge toro ǃkham-aoga toroba xub ga ǁîb di khōsikhōs ose oaǀkhī o, o kaise gere tao. Romeǁî Tacitusi ge ge xoa: “Toro ǃkham-aob ga ǁîb di khōsikhōs ose oaǀkhī o, ob ge kai ǃgôaoǃnâsiba gere ǁgau-e.” Nēs ǃaroma gu ge toro ǃkham-aoga hoaǁae ǁîgu di khōsikhōde gere ǃkhōǀgara. Sada di gagasi khōsikhōsa da ge ǀgaisase ra ǃkhōǀgara hoaǁae da ga Xristeǁî ǀhaode ǃoa ī, Jehovab ǀons xa ǃhoa tsî ǁîb Gaosib xa nau khoena aoǁnâba o. (Heb. 10:23-25) ǁKhā ǁaeb ai da ge Elobmîsa tsēs hoasa ra khomai tsî Jehovaba ǃoa ra ǀgore îb khomai da ra xūna ûiǂuis ǀkha huida. (2Tim. 3:16, 17) Nēsa da ga dī o, o gu ge Satanni sada ǃoa-ai ra sîsen-ū ǁgâiǀāga hâ hâ tide. (Jes. 54:17) Sada ‘khōsikhōb ǂgoms’ dib ge nî ǁkhauba da. ǁKhoaǂgaosib ǀkha da ge sada ǃgâsan ǀkha ǀguiba nî sîsenǀhao. Sada ǃkhams hîna da tsēkorobe ūhâsa da ge nî dan tsî sada ǂgomsa ǀgaisase nî ūhâ tsî kaise a ǂhâǂhâsas ge Jesub ǀkhāb ai da nî hâsa torob hînab Satanni tsî ǁîb saosaben ǃoa-ai ūhâ tsî nî dani ǃnâ.—J.ǂHa. 17:14; 20:10. w19.11 19 ¶18-19

ǃGāsa ǀapeǁguib sada mîǁguigu dib ge sada mîǁguiba sîsengu ǃnâ ra dawa. (1Kor. 14:40) Aiǁgause, ǀhaohâb ǃûi-aogu ge ǀgui ǀhaohâb ǃûi-aoba ra ǁhûi hîna mîǁguigu hoaga ra xoaba, ham-i nē mîǁguiga nî dīs tsî mâ ǁae gu nî dīǀoaǀoa-es tsîna. ǀHaohâb ǃûi-aogu hîna nē ǀgauba ra saogu ge ǁîgu di mîǁguiga a dīǀoaǀoa ǁkhā. Sada tsîn ge ǁkhā xū-e sada mîǁguigu ǀkha a dī ǁkhā. Aiǁgause du ge tsēs ǃnâ du nî dīse ī xūna a xoamâi ǁkhā tsî ǂhâǂhâsa xūna ǂgurose nî xoamâi. Nēsa du ga dī o, o du ge sadu mîǁguiga a dīǀoaǀoa ǁkhā tsî ǂgui xūn tsîna ǀoro ǁaeb ǃnâ a dī ǁkhā. Xawe ǃgarise ǁgūtsâ re. ǁAeba i ge ra ū sadu ǀapeǁguiga tsoatsoa tsî dīǀoaǀoasa. (Rom. 12:11) Apostel Paulub ge Timoteuba ge mîba “sa-aitsama kōǃgâsen”, i nē xūn ǃnâ “hâhâ” ǃgâi ǁkhāǁkhā-ao kais ǃaroma. Paulub daoǁgaosa da ge Jehovaba da ra dība ǂgao xūn hoan ǃnâ a sîsen-ū ǁkhā.—1Tim. 4:13, 16. w19.11 29-30 ¶15-16

Jehovab ge Moseba ǂgan o îb Israelǁaesa Egipteb di ǃgāsasisa xu doe-ū ob ge Jehovaba ge mîba nēs ǃaromab ǂhanu tama hâ di. Jehovab ge tsâbaǁhaoxasib ǀkha ge ǃeream bi hui bi ǂgao rase. (Eks. 4:10-16) Nēs xa ǂkhâǃnâ-e hâseb ge Moseba ǀgaisa haisi-amsa Faraoba sī ge mā. Moseb ge Elob ǁîb kai ǀgaiba ra sîsen-ū ǃkhaisa ge mû îb Israelǁaesa sâu, xawe Faraob tsî ǁîb ǃkham-aogu tsîna ǂāxa hurib ǃnâ hîgāgā. (Eks. 14:26-31; Psa. 136:15) Moseb ge Israelǁîna Egipteba xu a doe-ūs khaoǃgân ge Israelǁîna hoaǁae ǃgomsina ge ūhâ i. Xaweb ge Moseba gere mû matikōseb ge Jehovaba ǁîb di khoen ǀkha ǃnūǃnâxasiba ūhâ i ǃkhaisa. (Psa. 78:40-43) Moseb ge Jehovab di tsamtsîǃnâsib tsîna ge mû ǁîb ge ǂgan bi o îb tā Israelǁaesa hîgāgā. (Eks. 32:9-14) Eksodus khaoǃgâb ge Moseba kaise ǀgū ǀhōsagusisa Jehovab ǀkha ge ūhâ i nēs ge ǁîb di ǀhomsi ǁGûbab ra mû khami gere tsâ kai bi.—Heb. 11:27. w19.12 17 ¶7-9

ǂGui saosaben Jesub din ge ge Galileaǁî ī. Nēs ǃaroma i ge ge supu i Galileab ǃhommi tawa ǂgui khoen ǀkha ǀhaosa, Jerusalems ǃnâ khoe-i oms tawa ǀhaos xa. Jesub hîna ge ǁōba xu khâib ge ǀnai ǁîb di 11 apostelgu ǀkha Jerusalems ǃnâ oms tawa ge ǀhao hâ i. Jesub ga ǂhâba hâ o, îgu ǁîb apostelgu ǀguiga aoǁnâ tsî ǁkhāǁkhāsabedī sîsen-e dī ob ge ǁîgu ǀkha Jerusalems ǃnâ ǀgui ga ǃhoa hâ tsî khoedi tsî ǁîgu tsîna ga ǂgan tama hâ în Galileab ǃnâ sī ǀhao-ū bi. (Luk. 24:33, 36) Jesub ge mā mîmās ǁkhāǁkhāsabena dīs dis ge ǃkharu ge ǁaeb Xristeǁîn ǃgao ǀgui ge māhe tama hâ i. Mati da nēsa a ǂan? Jesub ge sao ra mîdi ǀkha ǁnā mîmāsa ǁîb ǁkhāǁkhāsabena ge mā: “Tsî mû, tita ge hoa tsēde sago ǀkha nîra hâ nē hâ ǁaeb di ǀams kōse.” (Mat. 28:19, 20) Nētsē ge ǂgui khoena ra ǁkhāǁkhāsabedī. Nēs xa ǂâi re. Mâ kurib hoaban ge 300 000 khoena Jehovab di ǀHûǀguitimî-aon ase ra ǁāǁnâhe tsî ra Jesub di ǁkhāǁkhāsabe kai. w20.01 2 ¶1; 3 ¶5-6

ǂKham xawe ǁkhōǁkhōsa ǀaeba ūhâ. Kaira ra tsî sîsen-e hōs ge kaise a ǃgom. Kairasis xa ǃaroma-e hâse da ge Jehovab ǃoabas ǃnâdī da gere khami ǃnāsase dīhō tama hâ. Sadu tsîn ga ǀgapise da goro ǃhoaǃgao mâsigu ǃnâ hōsen o, o du ge xūose a tsâ tsoatsoa ǁkhā. Nē mâsigu ge ǂkhîoǃnâse tsâ kai du, ǃgôaǁnâsen tsî nau khoen ǀkha du ūhâ ǀhōsagudi tsîna ǃgâi tama ǀgaugu ǃnâ nî tsâǀkhā. Nē ǃhūbaib ge Satanni ǂâi ǀgaub ûib xa hâba ūhâ. Satanni ge khoena hoaǁae xūose ra hâ-ū. ǁÎb ge ǁgai ǀgaub ǃnâ Evasa ge mîba Elobas ga ra ǁnâuǀnamoǃnâ o, os nî ǃnorasa di, ǂan i ge i xawe nēs ǁîs ǁōba ra ǂâibasensa. Satanni ge hoaǁae nē ǃhūbaiba ra ǂgaeǂgui. ǁNā-amagan ge ǂgīǂgōsi ǂgaeǂgui-aogu tsî ǂgomdi ǂgaeǂgui-aogu tsîna ûiba ǃgôasi-e ūhâba tama hâ tsî khoen ra tsâ ǀgaub xa ǁae tama. Xawe Jehovab ge ra ǂgao i da sida xa ǃgâise tsâ tsî xūose ra tsâ kai da mâsigu ǃnâ da ga hâ o, o ra ǂkhâǃnâ da.—Rom. 12:3. w20.01 14 ¶1-4

40 Kurigu ǀgaibab ge Jeremiaba ǂhauoǃnâ khoen, ǁîb ǁanǁare-aon tsî ǀaokhoen tsîna ǃkhōǂgā hân ǀkha ǁîb ge kai ǃnâ ǃās Anatots ǃnâ gere hâ. (Jer. 12:6) Xaweb ge ǁîba nē khoena xu ge ǂgae-oasen tama hâ i. ǁÎb ge ǁîb di ǂgomǂgomsa xoa-aob Baruxa ǁîb di tsâsigu xa ge mîba tsî sida tsîn ge ǁîb di tsâsigu xa a ǂan, xoahe i ge amaga. (Jer. 8:21; 9:1; 20:14-18; 45:1) Baruxi tsî Jeremiab tsîkha ge ǀnami tsî ǃgôasib tsîna ge omkhâiba gu, Baruxi Jeremiab ǀkha ge ī xūn hoana gere xoakâi ǁaeb ǃnâ. (Jer. 20:1, 2; 26:7-11) Jeremiab ge ǂgui kurina Jerusalems ǀkha nî īse ī xū-i ǃaroma Israelǁîna ǁkhoaǂgaosib ǀkha gere ǃkhâikhom. (Jer. 25:3) ǀUniga ǃnās hînab ge Jehovaba khoena ǂkhâǃnâs în ǃhōbasens aib ge Jeremiaba ge ǂgan îb ǁîb di ǃkhâikhomsa scrolli ai xoa. (Jer. 36:1-4) Jeremiab tsî Barux hâkha ge nē ǁgaumâis Eloba xu gere hās hîna ge ǀoro ǁkhâga a ūsa gere dī ǁaeb ǃnâ kha ge ǁîkha ǂgomsa ra ǀgaiǀgai ǃhoaǀhaode ge ūhâ i. w19.11 2-3 ¶3-4

Mati da ǂkhauhesa ǃgâsana nî hâ-ū? Kaise i ge a tsū ǂkhauhesa Xristeǁî ǃgâsan xa ǃnāsase ǂâisa. (Mat. 23:8-11) Elobmîs ga ǀhaohâb ǃûi-aogu xa ǃhoa o, o i ge nēsa ra ǂkhâǃnâ da i da “ǁîgu ǂgomsa ǁgaeǁgae” xawes ge nēsa ǂâibasen tama hâ i da khoena sida ǂgaeǂgui-aon ase mû. (Heb. 13:7) Ama i ge a Elobmîs ga mî o, ǀnîn ge ‘ǃhonarisa ǃgôasiba’ nî hō di. Xawe nēs ge ǁîgu ‘ǀō-aisa’ tsî ‘ǁkhāǁkhās tsîra ǃnâ ra ǃoaba’ amagasa tsî ǂkhauhesa gu a amagas ose. (1Tim. 5:17) ǂKhauhesa ǃgâsana da ga kaise koa tsî ǂgui ǁaeba mā o, o da ge ǁîna ǃgâi tamase a tsâ kai ǁkhā. ǀNî hâ xū-i tsîn ge a ī ǁkhā, ǁîna da ge a ǀgapiǂâixa kai ǁkhā. (Rom. 12:3) Sada ge nēti ī xūna dī ǂgao tama hâ hîna Xristub di ǂkhauhesa ǃgâsana nî ǃnôa kai-e.—Luk. 17:2. w20.01 29 ¶8

Apostel Paulub ge ǂgui ǃaromadi ǂkhabuǂâiba ǁkhāb ge î de ge ūhâ i. ǃGâsanab ge kaise ǀnam i amagab ge ǁîn ǃgomsin xa gere ǂâiǂhansen. (2Kor. 2:4) ǁÎba gere mâǃoa khoen ge ǂnaubi tsî tronkhes ǃnâ ge aoǂgābi. ǁÎb ge ǃgom ǁaegu ǃnâs tsîna ge ǃkharu hînab ge ‘ǂhâb ǃnâ hâ i ga.’ (Fil. 4:12) Tsîb ge ǂgau khôas ǃnâ ǃnona ǃāde ge hâ i tsî ǂgui ǃgomsin tsîna gere hōǃâ. (2Kor. 11:23-27) Tae-e Pauluba nē ǃgom ǁaegu ǃnâ ge hui? Paulub ge ǁîb ǃgâsan ǃgomsina gere hōǃâ ǁaeb ai gere ǂâiǂhansen, xaweb ge ǁîn ǃgomsina ǀguri ge sîsenǂam tama hâ i. Paulub ge ǀnōsa ǂaiǀgauba ge ūhâ i. ǁÎb ge ǀnîna aiǂhanuba gere mā, în ǀhaohâb ǃnâ hui. ǂGomǃgâhe ǁkhā khoegu Timoteub tsî Titub khami. Nē ǃgâsagu gere dī sîsen-i ge Paulub ǃgomsina gere ǀoroǀoro.—Fil. 2:19, 20; Tit. 1:1, 4, 5. w20.02 23 ¶11-12

Jehovab ge sada tsîn ǁîba nî ǁnâuǀnamsa ra ǂgao. ǁÎb ge sada xa ǁnâuǀnam-esa anu hâ, ǁîb a sada kuru-ao, ûib di mā-ao tsî gā-ai ǁgû amaga. Xawe ǂhâǂhâsa ǃaromas hîna da Jehovaba ra ǁnâuǀnambas ge ǁîba da a ǀnam amaga. (1Jhn. 5:3) ǂGui ǃaromade da ūhâ Jehovaba ǁnâuǀnams dide xaweb ge ǁîba nēsa dīsa ǁgari da tama hâ. Jehovab ge aitsama ǁhûis di ǁkhāsiba ge mā da tsîb ge kaise ra ǃgâiaǂgao ǁîba da ga ǀnam bi da a ǃkhais ǃaroma ǁnâuǀnam o. ǁGûn ge ǁîn ǀgôan ǃnorasase nî hâ ǃkhaisa ǂhâba hâ. ǁNā-amagan ge ǁgaraga ra mā ǁîn ǀgôana ǁkhaubas ǃgao. ǀGôan ga nē ǁgaraga ǁnâuǀnam o, on ge ra ǁgau ǁîn ǁgûnan ra ǂgomǃgâ tsî ǃgôaǃgâ ǃkhaisa. Kaise i ge ǂhâǂhâsa sada ǀhomsi ǁGûb di ǁgaraga da ǂan tsî ǁîga nî ǁnâuǀnamsa. Nēsa da ga dī o, o da ge Jehovaba ra ǁgau ǁîba da a ǀnam tsî ra ǃgôaǃgâsa tsî da ge sada tsîna nēsa xu ra ǀama. (Jes. 48:17, 18) Xawe ǁnān hîna Jehovab ǁgaraga ǁnâuǀnam tama hân ge aitsama ra tsûtsûsen.—Gal. 6:7, 8. w20.02 9-10 ¶8-9

Abigails khami da ge nî ǁkhoaǂgaoxa tsî khoe-i tsūba ǃoa ra ǃgû ǃkhaisa da ga mû o, o nî ǃhoa. (Psa. 141:5) ǃGôasiba da ge nî ǁgau xawe da ge ǁkhoaǂgaosib tsîna ra ūhâ ǂgao. ǀNamxaǃnâ ǀgaub ǃnâ da ga khoe-e ǁnamasa mā o, o da ge ama ǀhōsa da a ǃkhaisa ra ǁgau. (ǂKhm. 27:17) ǃGōsase gu ge ǀhoahâb ǃûi-aoga ǁnān hîna ǀhaohâb ǃnâ hân ǀkha nî ǃhoa tsū xū-en nî dīs aiǃâ. (Gal. 6:1) ǀHoahâb ǃûi-aogu ge ra mûǂan ǁîgu tsîn ǀoasa kurusa ūhâ tama tsî nî ǁnamahese i ǃkhaisa. Xawes ge nēsa tā ǀhaohâb ǃûi-aoga nî ǃkhō-oa nau ǃgâsana ǁnamasa xu. (2Tim. 4:2; Tit. 1:9) ǃGâsan ǀkha gu ga ǃhoa ǁaeb ai gu ge ǁîgu ǁkhāsib ǃhoas tiba ra sîsen-ū ǁîna ǃgâise tsî ǃnūǃnâxasib tsîn ǀkhā huis ǃnâ-ū. ǁÎgu ge ǁîgu ǃgâsana a ǀnam tsîb ge nē ǀnamma ra ǁgarigu ǁîna huisa. (ǂKhm. 13:24) Xawe ǁîgu di ǂam ǂâibasens ge Jehovab ǀonsa ǃanuse ūhâ tsî ǀhaohâba tsūba xu ǁkhaubasa.—ǃNǃkh. 20:28. w20.03 20 ¶8-9

Jehovab ge Moseba ge hui îb Israelǁaes di ǃnoraǃnora-ao kai. Jehovaba nēsa mâǁae ge dī? Nēsab “Egipteǁîn di gā-aisib” ǃnâb ge Moseba ǁkhāǁkhāhe toas khaoǃgâ ge dī? (ǃNǃkh. 7:22-25) Hî-î, Jehovab ge nēsa Mosebab ge ǃgamǃgamsenxa tsî tsauraǂgaoxa khoe kais khaoǃgâ ge dī. (ǃNǃkh. 7:30, 34-36) Jehovab ge Moseba ǁkhoaǂgaosiba ge mā îb ǀgaisa Gao-aob Egipteb dib aiǃâ mâ ǁkhā. (Eks. 9:13-19) Mû da ras ge Jehovab ge ǁnān hîna ǁîb ǀgauga ǁgau tsî ǁîb ai ra ǂgomaiǂnûina ra sîsen-ū. Kurigu ǃnâb ge Jehovaba ǁîb ǃoaba-aona ǃkharagagu ǀgaugu ǃnâ ge sîsen-ū. Jehovaba tae-e dīs ǁkhāsiba a mā du ǁkha? Nēs ge sada māsenxasiba xu hâ. (Kol. 1:29) Māsenxa du ga o, ob ge Jehovaba sao ra xūna dīs ǀkha a hui du ǁkhā, ǁkhoaǂgao aoǁnâ-ao kais, ǃgâi ǁkhāǁkhā-ao kais, ǃgâi ǁkhaeǂgao-ao kais, ǃgarise ra sîsen khoe-i tsî ǃgâi ǀhōsa i. w19.10 21 ¶5; 25 ¶14

ǃGâi ǀhōsan ge nî hui da î da ǂgomǂgomsase Jehovab ǃoagu hâ. ǃGâsa-i di ǃgâi ǀhōsa kai ǂgao da ga o, o da ge nî ǃgâi ǀhōsa i. (Mat. 7:12) Aiǁgause Elobmîs ge ra ǂkhâǃnâ da î da khoraǂuisen ǃgâsan hîna ǂhâsib ‘ǃnâ hân’ ǃoa-ai. (Efe. 4:28) Nau ǃgâsana huis ǀkha da ga ǀhape o, o da ge ǂkhîba nî ūhâ. (ǃNǃkh. 20:35) ǀHōsan hîna da ra kurun ge nî hui da ǃgomsina da ga hōǃâ o, nēs ge ǂkhîba nî mā da. Elihub ge Jobi ǃgomsina gere ǃgâ khamin ge sada ǀhōsan tsîna sada ǃgomsina ra ǃgâ mîba nî da ra ǁaeb ai. (Job 32:4) Sada ǀhōsan sada mîmâiga nî dīsa da ge ǂgao tama hâ. Xawe da ge ǃgâise ra dī, ǁîn ra mā Elobmîs ai a ǃgaoǃgaosa ǁgaumâide ǃgâs ǃnâ. (ǂKhm. 15:22) Gao-aob Davib ge tsamtsiǃnâsib ǀkha huiba ǁîb ǀhōsana xu a ūǃoas ǁkhās khami da ge sada tsîna ǃgomsina da ga ūhâ on sada ǀhōsana ra mā huiba nî ūǃoa. (2Sam. 17:27-29) Nē ǃnôa ǃgâi ǀhōsan ge ǀkhaeba Jehovaba xu.—Jak. 1:17. w19.04 11 ¶12; 12 ¶14-15