Julib

Khoe-i ga ǃgâi tamase ǃhoa-ū da o, o da ge ǁgaise ra tsâ. ǀŌ-aisase i ga ǁnā khoe-e sida di ǀhōsa tamas ka io ǀaokhoe io. Hannasa xu ǁkhāǁkhāsen re, ǁîs ge ǁîs kaikhoeb di ǀgamǁî kaikhoes xa gere ǁaixa kaihe. (1Sam. 1:12) Hannas sada khami da ge ǀgores ǃnâ Jehovaba taen xa da ra ǂhansen, ǃaos tsî sada ǂkhabusasigu xas tsîn xa a mîba ǁkhā. Sada ǀgorede ǂoaǂamsa ǀgaugu ǃnâ dīs ge ǂhâbasa tama hâ. ǀNî ǁaen ais tsîna da ge a ā ǁkhā Jehovaba da ga sada ǃgomsin xa a mîba o. Jehovab ge sada ǀgorede ǃgâsa tsau tide. ǀGore da ra ǁaeb ai da ge Paulub daoǁgaus hîna Filipeǁîn 4:6, 7 ǃnâ hâs xa nî ǂâi. Apostel Paulub ge ge mîba da i da Jehovaba sada ǀgoredi ǃnâ gangan. ǂGui ǃaromade da ge ūhâ Jehovaba da a gangan ǁkhābade. Ûib hînab ge mādab, kurus, ǂgomǂgomsa ǀnammi tsî ǃâubasens hîna da ūhâs ǃaroma a gangan ǁkhā. w20.02 21 ¶3; 22 ¶6

ǃHoas ǁkhāsib ge ǀkhaeba Jehovaba xu. (Eks. 4:10, 11; J.ǂHa. 4:11) ǁÎb mîs ǃnâb ge ra hui da mûsa mati da nē ǃhoas ǁkhāsiba nî sîsen-ūsa. Hoaǁae da ge nî aiǂhomisa Jehovab tsî ǁîb Gaosib tsîn xa ǃhoas ǃaroma. (Mat. 24:14; Rom. 10:14) Nēsa dīs ǃnâ da ge Jesuba ra ǁgae. ǀGui ǂhâǂhâsa ǃaromas hînab ge Jesuba ǃhūbaiba ǃoa a hābas ge îb nau khoena ǁîb ǁGûb xa hâ amaba ǁkhāǁkhā. (Jhn. 18:37) Xawe da ge nî ǂan mati da ra ǃhoa ǀgaub tsîn kaise a ǂhâǂhâsasa. Nēs ǃaroma da ge nau khoen ǀkha da ga Jehovab xa ǃhoa o, o nēsa “tsamtsiǃnâsib tsî ǃaob tsîkha ǀkha” ra dī ǂgao. Tsî da ge nau khoen tsâsigu tsî ǂgoms tsîna da ra ǃgôaǃgâ ǃkhaisa nî ǁgau. (1Pet. 3:15) Nēsa da ga dī o, o da ge ǃhoas ǀguisa dī tide xawe nî ǃgâ tsî nē ǀgaub ǃnâ khoe-i ǂgaoba a tsâǀkhā ǁkhā. ǀHaohâb ǃûi-aogu ge xū-e mîsa xu tā nî ǂgae-oasen mû gu ga o ǃgâsa-i ǁnamahesa ǂhâ hâ ǃkhaisa. ǂHanu ǁaeb nēsa dīs tiba gu ge nî ǁhûi i gu tā ǃgâsa-e taob ǃnâ mâi. w20.03 18-19 ¶2-4

Tae-e ta ǀgores ǃnâ ǂgan ǁkhā? Jehovaba da ge a ǂgan ǁkhā îb “ǂgomsa ǀaroba” da. (Luk. 17:5; Jhn. 14:1) ǀGaisa ǂgomsa da ge ǂhâ hâ ǁGâuab ǁnān hîna Jesuba ra saona ra saoǃgon amaga. (Luk. 22:31) Matis ǀgaisa ǂgomsa ūhâsa nî hui da? Dī ǁkhā da an, hoana da ga dī o, nē ǃgomsina ǀamsa hōbas ǃnâ, os ge ǀgaisa ǂgomsa nî hui da, nē ǃgomsina Jehovab ǃomgu ǃnâ ǁnāxūsa. ǁÎb sada xa ǃgomsina ǃgâise ra sîsenǂam ǃkhaisa ǂans ge sâsa ǂâis tsî ǂgaob tsîna ra mā da. (1Pet. 5:6, 7) ǀGores ge ra hui da sada ǂkhîba ūhâsa ǂgui ǃgomsina da ga ūhâ xawe. ǃGâsab Roberti aiǁgaus xa ǂâi re nēsi ǁîb 80 kurigu ǃnâ hâba. ǁÎb ge ra mî: “Filipeǁîn 4:6, 7 ǃnâ hâ daoǁgaus ge ge huite ti ǃgomsina tani ǁkhāsa ti ûib hoaba. Tita ge mari ǃgomsina ge ūhâ i. Tsî ǁaeroba ǀhaohâb ǃûi-aosisa xu ge ūǁnâhe.” Tae-e Roberta ge hui îb ǁîb ti ǂkhîba ūhâ ǀgara? “ǃGomsina ta gere hōǃâ o, o ta ge gere ǀgore tsoatsoa” tib ge ra mî. “Tita ge ra ǂgom ǀûs ose ta gere ǀgore o, o ta kai ǂkhîba gere hōǃâsa.” w19.04 9-10 ¶5-7

ǀGôa-e da ga ǀgaiǃkhō o, o da ge Elob ǃoagu ra ǁore. ǃGâsa-i ga nau ǃgâsa-i ǃoa-ai a ǁore o, o i ge Jehovab ǃoa-ais tsîna ra ǁore. Jehovab ge Israelǁaesa a mā ǂhanub xa ǂâi re. Nē ǂhanub ge gere mî khoeb ga ǁîb ǀgūkhoeb ǃoa-ai ǂhauoǃnâse tanisen o, ob ‘Jehovab ǃoagu ra ǁoresa.’ (Lev. 6:2-4) ǁNā-amaga i ge ǀhaohâb ǃnâ hâ khoe-i hîna ǀgôa-e ra ǀgaiǃkhō tsî nē ǀgôa-e ǁî-i di ǃnorasasiba ūxu-e Elob ǃoa-ai ra ǁore. Nē tsūdī-ao-i ge Jehovab di ǀonsa ra ǁgaiǁgai. Nēs ǃaroma i ge tsūdī-ao-e nî ǀgoraǃgâhe ǁî-i di ǁgai ǁoreb ǃaroma. Elob ǃoagu i go ǁore amaga. Aiǁgause, ǃKhē xu ǂgō-ommi tsî Awake ǂkhanikha tsîn ge nēsa ge ǃhoaǃgao. Matin ǁnān hîna nēs xa tsâǀkhāhe hâna ra tanisen ǀgaus, nau ǃgâsan ǁîna mati a hui tsî ǂkhâǃnâ ǁkhā ǀgaus tsî ǁgûn mati ǁîn ǀgôana a ǁkhauba ǁkhā ǀgaus tsîna. ǀHaohâb ǃûi-aogu ge xoade xu daoǁgaude ge hō matigu nē ǃnôa ǁhōga nî sîsenǂamsa. ǀApeǂhumis ge ǀgôa ǀgaiǃkhōs di ǁhōga ǃgâiǃgâis ǃnâ ra aiǃgû. w19.05 9 ¶8-9

Elobmîs ge ǀā gôab hîna ǁGâuab ǂhumiba ra ǀam kaib ase ī. (Efe. 6:17) Aiǁgause, Elobmîs ge ǂhumib hîna ǁō hân ge ûitsaman ǀkha ra ǃhoa di hâba ra ǂhaiǂhai. (Psa. 146:4) Tsî ra mîba da Jehovab ǀguib hānîǁaeb xa a ǂansa. (Jes. 45:21; 46:10) Elobmîsa da ga hoaǁae khomai tsî ǂâiǃgâ o, o da ge nî aiǂhomisa i nē ǂkhaba gagagu ǂhumiba ǃhui tsî ǁîga xu ǂgōsensa. ǃGaib ǀkha ǃgaeǀhaosa ūhâ xūn hoana xu ǂgōsen re. Ama Xristeǁîn ase da ge ǃgaib ǀkha dī xū-e ūhâ ǂgao tama hâ. Aiǁgause, da ge hānîǁaeb xa ra aimûǀgaru khoena sari tamas ka io ǁō hân ǀkha ǃhoa ǂgao tama hâ. ǁKhōdi ǁnaetigu hîna ǁō hâ khoen ûitsama di ra mîga xu ra ǂgōsen. Tsî da ge ǃgaidība sîsen-ū ǂgao tama hâ hānîǁaeb xa ǂanǂuis ǃaroma. Nē ǁnaetigu a tsūsa da ge a ǂan tsîgu ǁGâuab tsî ǁîb demongu ǀkha nî ǃgaeǀhao da ǃkhaisa. w19.04 21-22 ¶8-9

Khoen hîna nē ǃhūbaib gā-aisiba ūhân ge Elobmîs ǁgoe-ūgus xa ra mî xūna ra mâǃoa tsî nēn ge ama tama hâ di ra mî. ǁNāti ī khoen ge a dî ǁkhā, ‘Eloba tae-i ǃaroma ǁgoe-ūgus turagu ǀkha kuru da tsî tā nî mā-am î da nēsa sîsen-ū?’ ǁÎn ge nē dîsa ra dî ǂâin ra amaga khoen ge xū-en ga dī ǂgao o, o dīs ǀguisa nî hî. Xawe Elobmîs ge nēs xa ǀkhara-e ra mî. Elobmîs ge ra mî sida turagu hoaga da ge tā nî dīǀoaǀoa di xawe da ge ǁkhāsiba ūhâ ǃgâi tama xūna ǃkham ǃoasa. (Kol. 3:5) Jehovab ge nēs ǂam-ai ge dī î da ǁgoe-ūgub turab hîna da ūhâba ǃgameb ǃnâ dīǀoaǀoa. (1Kor. 7:8, 9) Elobmîs ge ǃgâi mûǂûiba ǁgoe-ūgus xa ra ǁkhāǁkhā da. Tsî ra mî ǁgoe-ūgus ǃnâ da ge ǃgâiba a hōǁkhā. (ǂKhm. 5:18, 19) Xawes ge Elobmîsa ra mî: “Mâ-i hoa-i nî ǂan ǃkhaisa, mati i nî ǁî-i soasa ǃanusib tsî ǃgôasib ǃnâ ūhâsa.”—1Tes. 4:4, 5. w19.05 22-23 ¶7-9

Elob ge ǃhaode ǁîb khoena hîgāgāsa mā-am tide. ǁÎb khoen ge ǁîb ǀonsa ra tani tsî Babilons Kaisa xu ǃkhoe ti hâ mîmāsa ge ǁnâuǀnam. (ǃNǃkh. 15:16, 17; J.ǂHa. 18:4) Tsîn ge nau khoen tsîna ra hui în Babilons Kaisa xu ǃkhoe. ǁNās ǀkhan ge Jehovab ǃoaba-aona ‘ǁîs di tsûtsû-aide’ hōǃâ tide. Xawe i ge ǁîn ǂgomsa noxoba nî ǃâitsâhe. (Ese. 38:2, 8) Jehovab ga ama tama ǂgomdi hoade hîgāgā o, o i ge ǀgui ǂgoms ǀguisa ǃhūbaib ai nî hâ. Jehovab ǃoaba-aon ǀguin ge nî ǃgau. Satanni ge kaise nî ǁaixa. ǁÎb ge nē ǁaiba nî ǁgau ‘ǃanuoǃnâ gagaga’ sîsen-ūs ǃnâ-ū îgu ama tama ǃnāsa ǃgāsasiba sîsen-ū hîna demonga xu ra hāba nēs ge nî ǃaroma î di ǃhaode Jehovab khoena ǁnāǂam. (J.ǂHa. 16:13, 14) Nē ǃhaodi ge “Gogi, ǃhūb Magogi dib” di ra ǂgai-e. ǃHaodi ga Jehovab khoena ǁnāǂam o, o i ge Armagedonsa nî tsoatsoa.—J.ǂHa. 16:16. w19.09 11 ¶12-13

ǃKharu ge ǁaeb Israelǁîn tsēdi ǃnâb ge ǁGâuaba ama tama ǂgomde gere sîsen-ū ǁgansi turaga aiǃgû kais ǃaroma. Nētsēs tsîna i ge ama tama ǂgomde ǂhanu tama ǁgoe-ūgusa ra mā-am tsî nēs tsîna ra aiǃgû kai. ǂGuin hîna Eloban ge ra ǃoaba di ra mîn ge ǁÎb ǁgaraga sao tama hâ. Apostel Paulub ge nēs di ǀamǂoasa Romeǁîna ǃoab ge xoa sîǂkhanis ǃnâ ge ǁguiǃā. (Rom. 1:28-31) “Anu tama hâ” xūn ǁaegu i ge ǂgui ǀgaugu ǁgoe-ūgus diga hâ, nēs ge aorese ǁgoe-ūgus tsî tarese ǁgoe-ūgus tsîna ǃkhōǂgā hâ. (Rom. 1:24-27, 32; J.ǂHa. 2:20) Kaise i ge a ǂhâǂhâsa Elobmîs ǁkhāǁkhāde da nî ǁnâuǀnamsa. Khoen ǂansa ūhâ gā-ai khoen ge Jehovab di ǂhanu-ai gā-aisiba ra mâǃoa. ǁÎn ge Elob ǃanu gagab ǂûga sao tama hâ xawe “ǁgans di sîsenga” ra sao. (Gal. 5:19-23) Nēs ge ǁîǂâixa tsî ǁîǃgôasenxasiba ra ǃaroma, nēs ǀamǂoas ge “khoen nîra ǁîǀnamsenxa.” (2Tim. 3:2-4) Nē ǀgaugu ge Elob khoen ǃgamǃgamsenxa gagab hînan ra ǂkhâǃnâ-e ūhâsaba ra mâǃoa.—2Sam. 22:28. w19.06 5-6 ¶12-14

Eliab ge Jehovaba ǃgom ǁaegu ǃnâ gere ǃoaba tsî kai ǃgomsina gere hōǃâ. Jehovab ge Eliaba ge mîba îb Elisaba ǀnî sîsengu ǁîb di ga mā. Nēs ǃnâ-ūb ge Jehovaba ǃgâi ǀhōsaba Eliaba ge mā hîna ǂkhabuǂâib ga o, o a huibi ǁkhāba. ǁKhā ǀgaub ai da ga sada ǀhōsana sada ǃgomsin xa mîba o, on ge nî huida sada ǃgomsina tanis ǀkha. (2Gao. 2:2) Sada ǃgomsina da nî ǀgoragu ū ǃgâsa-e da ga ūhâ tama io, o da ge Jehovaba ǃoa a ǀgore ǁkhā îb ǀgaisa Xristeǁî i hîna da sada ǃgomsina a mîba ǁkhā-e māda. Jehovab ge Eliaba ge hui ǁîb ǃgomsiga tanis ǀkha tsîb ge noxoba ǂgui kurina ǂgomǂgomsase ge ǃoababi. Eliab di aiǁgaus ge ǃâubasensa ra māda. Sida tsîn ge ǀnîsi ǂgui tsûaǂgaoga ra hōǃâ hîna sorosises tsî emosioneelses tsîna ra tsâǀkhā da ga. Xawe da ga Jehovab ai ǂgomaiǂnûi o, ob ge ǁîba ǃoabas ǀgaiba nî māda.—Jes. 40:28, 29. w19.06 15 ¶4; 16 ¶9-10

Sada ge Elob Gaosib ǃgâiǂhôasa aoǁnâs ǃnâ nēsi sada di ǁkhoaǂgaosiba a omkhâi ǁkhā. Tae-i ǃaroma da nēsa nî dī? Aoǁnâs, Jehovab ǃnâ ǂgomǃgâsiba omkhâis tsî sada ǃaoba ǀamsa hōbas ǀkhas tsîna ra huida amaga. Sada ǂkhōn ǂgamǂgamsen ǀhuruna da ga dī o ra ǀgais ǁkhās khamis ge sada ǁkhoaǂgaosib tsîna omsa xu oms, khoena da ra ǀhao-ū ǃkhain tawas tsîna da ga aoǁnâ o, o ra ǀgai. Aoǁnâs ǃaroma da ga ǁkhoaǂgaosiba nēsi omkhâi o, o da ge ǃgom ǁaegu ǃnâs tsîna nî aoǁnâ ǁkhā. (1Tes. 2:1, 2) ǀGuis ǃgâsas hîna ge ǂoaǂamsa ǁkhoaǂgaosiba a ǁgau ra di aiǁgausa xu da ge a ǁkhāǁkhāsen ǁkhā. Nancy Yuens ge kaise ge ǃnūbu i xawes ge ge ǃaoǃnâ tama hâ i. ǁÎs ge aoǁnâ sîsen-e dīs ǀkha ge aiǃgû. Nēs ǃaromas ge 20 kuriga Chinab ǃnâ ǃkhōsis ǃnâ ge ūhe. ǃKhōsis ǃnâ ge ūsi khoegu ge ge mî “ǁîs ge kaise ge ǁnâuǀnamoǃnâ i di” ǁîn ǃhūb ǃnâ. w19.07 5 ¶13-14

ǂGui khoen ge Elobmîsa ra ǁkhāǁkhāsen ǂgao xawen ge ǀnîna ǁae tama khami ra tanisen. Hui nî ǁkhā da ge a Elobmîsa ǁkhāǁkhāsens ǀkha. ǃGâise sada di aoǁnâ sîsenni ǃnâ dīs ǃaroma da ge nî aiǂhomisen. Khoen ǃgâiǃgâibasensa ūǃnâ hâ xūn xa ǃhoa re. Tsî ǂâiǃgâ re xoaǂamsa du mati nî mâi-aiǃâsa. Aiǁgause, du ge oms khoena a dî ǁkhā: “Xū-e ta a dî du ǁkhā? ǃGomsin hîna da nētsē ra hōǃân ge ǂgui khoena ra tsâǀkhā. ǃHūbaib ǂhanuga nē ǃgomsina a ūbē ǁkhā?” ǁNāpaxū Danieli 2:44 sa ǃhoaǃgao re. Tamas ka io du ge a dî ǁkhā: “Tae-e a huida ǁkhā ǃgâi ǂūga ūhâ ǀgôana kaikais ǃnâ?” Tsî ǁnāpaxū Deuteronomium 6:6, 7 sa ǃhoaǃgao re. Amase da ge kai ǂkhîba ra hōǃgâ khoena da hui o, în Jesub di ǁkhāǁkhāsabe kai. w19.07 15 ¶4, 6-7

ǃGâsab hîna gaxuse aoǁnâ sîsen-e ra dīb ge Elob ǃnâ ǂgom tama hâ khoen Taiwani ǃnâ hân xa ra mî: “Taiwani khoen ga mî o ‘ǁîn Elob ǃnâ ǂgom tama hâ di,’ on ge ǃnāsa khoen ra ǃoaba elogu xa ra ǃhoa. ǃKhō-am tsî ta ge ra mî ǂgui khoen aitsama eloga ra dībasensa. Tsî ta ge Jeremiab 16:20 sa ra khomai: ‘Mati da ama Eloba khoen eloga xu a ǂanǂui ǁkhā?’ ǃGâise ǃgâ tsî ta ge Jesajab 41:23 sa ra khomai: ‘Mîba da ǁnā xūn, ega nîra hāna, î da mûǂan, elo du a ǃkhaisa.’ Tsî ta ge ǁnāpaxū ra ǁgau mâ mîmâinab ge Jehovaba hānîǁaeb xa a māsa.” ǀGui ǃgâsab ge ra mî: “Elobmîs gā-aisib, Elobmîs kēbodi dīǀoaǀoas tsî ǃhūbaib ra sîsen ǀgaus tsîna ta ge ra ǁgau nî. ǁNāpaxū ta ge ra mî nē xūn hoan ra ǁgausa ûitsama Elob tsî kuru-aob hâsa. Khoen ga mûǂan tsoatsoa o Elob ûitsamasa, o ta ge Elobmîs Jehovab xa ra mî xūna ra ǁgau nî.” w19.07 23-24 ¶14-15

Nē ǂhâǂhâsa xūn ge Jehovab ǀonsa ǃanuǃanus ǁîb ǂâisa dīǀoaǀoas tsî ǀhaohâb ǃnâ hâ ǂkhîb tsî ǀguiǃnâxasib tsîna ǃkhōǂgā hâ. (Mat. 6:9, 10; Jhn. 13:35) Nē xūna da ga ǂhâǂhâsase sada ûib ǃnâ ūhâ o, o da ge ra ǁgau Jehovaba da a ǀnam ǃkhaisa. Apostel Paulub tsîn ge ge mî i da ‘ǂnao-o.’ Nēs ge ǂâibasen tama, i da ǀoasa kurusa ūhâ. Xawe Jehovab ge ǂnao-ose nî mû da ǁgūtsâ da ga ra o ǀnamma omkhâi tsî ǂhâǂhâsa xūna ǂgurose mâisa. Sida ǀnamma da ge ra ǁgau nau khoena da ga ǃnôakai tama io. Nau khoena ǃnôakaisa xu ǂgōsen di hâ ǁgarab ge kaise a ǂhâǂhâsa. Mati da khoe-e a ǃnôakai ǁkhā? Nēsa da ge ǃgâi ǁaeba da ra ūhâ ǀgaub, ana da ra ǀgaub tsî sîsen i hîna da ra dī i ǃnâ-ūs tsîna a dī ǁkhā. Dī da ra xū-i ge ǀnîsi tsū tama hâ. Xawe i ga sida ra dī xū-e nau khoe-i ǃgâiǂâisa tsâǀkhā tsî ǁî-e ǃnôakai o, os ge nēsa a ǁkhōǁkhōsa.—Mat. 18:6. w19.08 10 ¶9-11

1935ǁÎ kuriba xūn ge Jehovab di ǀHûǀguitimî-aona ge a ǁnâuǃā kai ǂnubis khoen Johaneb ge ǁîb di kēbos ǃnâ mûn a ǂgomǂgomsa Xristeǁîsa hîna ǃhūbaib ai ǀamose ûis aiǂhanuba ūhâna. (J.ǂHa. 7:9, 10) Kai ǁgâiǀāba ûi ǃkharus ǃaroman ge kai ǂnubis di khoena Jehovab ǀgaugu ǃnâ nî ǁkhāǁkhā-e Xristub di ǂGaeǂguis aiǃâ. ǁÎn ge ǀgaisa ǂgomsa nî ǁgau ‘ī nî xūn hoana’ ûi ǃkharus ǃaroma Xristub ǂGaeǂguis nî tsoatsoas aiǃâ. (Luk. 21:34-36) Kai ǂnubis khoen ge ǁîn di ǃâubasens ǃnâ kai ǂkhîba ūhâ. ǁÎn ge ra ǁnâuǃā Jehovab ra ǁhûisa ǁîb ǂgomǂgomsa ǃoaba-aon ǁîba māpaxū nî ǃoaba ǃkhaisa ǀhommi ǃnâs kas ǃhūbaib ais kas hoasa. ǂKhauhesa ǃgâsan tsî kai ǂnubis khoen hoan tsîn ge ra mûǂan ǁîn di aiǂhanub Jehovab ūba nî hâ kai ǀnammi hînab ge Jesub Xristub di xoremarib ǃnâ-ū a ǁgaub xa ra īǁkhā kaihesa.—Rom. 3:24. w19.09 28 ¶10; 29 ¶12-13

ǀAsa ǁgaumâi-e du ūhâ? ǃGâiba ǁnāpxū tsâ re. Jehovab ra hui du ǂgui ǀgaugu xa ǂâi tsî sadu di aoǁnâ sîsenni ǀkha aiǃgû re. ǂGuroǁaeb Xristeǁîn di ǃgâi aiǁgaude ǁgae re. Sīn gere ǃkhai-i hoa-i ain ge mîsa gere “ǂhôa.” (ǃNǃkh. 8:1, 4) Sadu aoǁnâ sîsenni ǀkha du ga aiǃgû o, o du ge ǃgâiba nî ǀama. Aiǁgause ra ge ǀnî hâ aimâba-aora ǃhūba xu ge ǂoa kaihe, o ra ge ǂhâsiba ge ūhâ i ǃhūba ǃoa ge doe. ǀOro ǁkhâgu ǃnân ge ǂgui khoena aimâba-aora gere ǃhoa gowab ǃnâ ǀhaode ge ǁhao tsoatsoa. Sada ǀnammi ge Jehovab ǀkha da ūhâ ǀhōsagusisa xu nî ǀkhī, sada ǁgaumâidi ose, kaise da ga sada ǁgaumâide ǀnam xawe. ǁNā-amaga Jehovab ǀkha sîsenǀhao tsî ǁîb gā-aisib, daoǁgaus tsî ǂkhâǃnâsa ǂgan re. Sadu di ǂguro ǁgaumâisa du ge ge ǀnam i khoena du gere hui amaga. Sadu di ǀasa ǁgaumâide ǀnam re, ob ge Jehovaba nî hui du.—Aoǁn. 7:10. w19.08 24-25 ¶15-16

Jehovaba da ge ǃnaga nî hâba sada kuru-aob a amaga. Nēs ǃaromab ge ǁgaraga a mā da ǁkhā tae-e da nî dīs diga. (J.ǂHa. 4:11) Xawe da ge ǀnîhâ ǂhâǂhâsa ǃaromas tsîna ūhâ Jehovaba ǁnâuǀnams diba. ǂGui kurigan ge khoena naun ǂamai gere ǂgaeǂgui. Xawe da ga ǁîn ǂgaeǂguis tsî Jehovab ǂgaeǂguis tsîna ǀgopeǀnō o, o da ge ra mû Jehovab a gā-ai, ǀnamxaǃnâ, ǀûbaǀnamxa tsî tsâbaǁhaoxasiba ūhâ ǂgaeǂgui-aosa. (Eks. 34:6; Rom. 16:27; 1Jhn. 4:8) Jehovaba da ge ǃnaga ra hâba aitsama ǁhûibasens, tae-i ǃgâis tsî tae-i a tsūs turaba da ga ǃkhamǃoa o. (ǂKhm. 3:5) Jehovab ǀgaugu xa da ga ǁkhāǁkhāsen, o da ge a supubahe ǁîba ǃnaga hâbasa. Tae-i ǃaroma? Nē ǀgaugu ge ǁîb ra dī xūn hoan ǃnâ a mûhe ǁkhā. (Psa. 145:9) Jehovab xa ǁkhāǁkhāsens ǀkha da ra aiǃgû khami da ge ǁîba ǀnamma nî omkhâiba. Tsî da ga Jehovaba nē ǀnamma omkhâiba, o da ge ǁgaragu tae-e da dī tide tsî tae-e dīs diga ǂhâ tide. w19.09 14 ¶1, 3

ǁGâuab ge khoena ǂhumib ǀkha ra ǁgâiǀā hîna ǁîna xūose ra tsâ kaiba. Aiǁgauseb ge ǁîba ra ǂgom kai da Jehovab sida ǁoren ǃgao ǀûba da tide tsîb ǁîba sida ǀnam tama hâ di. Nē ǂhumib ge kaise a ǁgai tsî khoena ra ǂkhabuǂâi kai. (Jhn. 8:44) Xristuba ǃoa da ga ‘ǀgū’ o, on ge sida ǁorena ra ǀûbahe. (Mat. 11:28) Tsî Jehovab ge hoa da kaise a ǀnam. (Rom. 8:32, 38, 39) Jesub ge mā da ǁgaumâis ge ǂgui ǀgaugu ǃnâ nau ǁgaumâide xu ra ǀkhara. Aiǁgause tsēs ǀams ai sîsen-e xun ga ǀkhī o, on ge ǂgui khoena tsauhâses tsî ǂkhîoǃnases tsîna ra tsâ. Xawe sida ge Jehovab tsî Xristub tsîna da ga ǃoaba o, o kaise ra ǃgâiaǂgao. Kaise da ge ra tsau xawe da ge ra ǁgūtsâ i da ǀhaohâb ǀhaode ǃoa ī. ǂGui ǁaegu ai da ge nē ǀhaode xu khoakhoahe hâse ra oaǀkhī. Nēs ge aoǁnâ sîsen i tsî Elobmîsa ôaǃnâs ǀkhas tsîna a ǀgui nēsa da ga dī o, os tsîna da ge khoakhoahe hâse ra tsâ. w19.09 20 ¶1; 23-24 ¶15-16

Nē ǃnubu ǁaerob ǁîb ‘kai tsēs’ aisi ǃau hâb ǃnâb ge Jehovaba ǂhâba hâ î da aoǁnâ sîsenni ǃnâ ǀhapese hâ. Dītsâ da ge nî i da “ǃaruǀîǀgui ǀaro ǃKhūb di sîsenni ǃnâ.” (1Kor. 15:58) Jesub ge ǀuni tsēdi ǃnâ nî īse ī mâǂoa ra xūn xa gere ǃhoa o, ob ge ge mî: “Tsîs ge ǃgâiǂhôasa aibe hoa ǁaedi ǃnâ nîra aoǁnâhe.” (Mrk. 13:4, 8, 10; Mat. 24:14) ǂÂi re: Sada aoǁnâ sîsenni ǃnâ ra dī xūn hoan ge Elobmîs kēbosa dīǀoaǀoahes ǀkha ra hui. Gaosib aoǁnâ sîsenni ra aiǃgû ǀgaus xa da tae-e a mî ǁkhā. Mâ kurib hoaban ge ǃnāsa khoena Gaosib ǃgâiǂhôas xa ra ǁnâu. Aiǁgause, ǂâi re matin ge Gaosib di aoǁnâ-aona ǃhūbaib ǂhawase a ǀarosen ǀgausa ǀuni tsēdi ǃnâ. 1914ǁÎ kurib ǃnân ge 5 155 aoǁnâ-aona 43 ǃhūgu ǃnâ ge hâ i. Nētsēn ge 8.5 miliun aoǁnâ-aona 240 ǃhūgu ǃnâ hâ. Xaweb ge sada sîsena noxoba toa tama hâ. Elob Gaosib ǃgâiǂhôasa da ge noxoba nî aoǁnâ nēs ǃnâ-ū ǀguin khoena ǁîn ǃgomsina ǀamsa nî hōba amaga.—Psa. 145:11-13. w19.10 8 ¶3; 9-10 ¶7-8

Jehovab ge Barsilaiba ge sîsen-ū Gao-aob Daviba huis ǃnâ. Davib tsî nau khoen tsîn ge ‘ǃâ tsî ge ǁgâ hâ i’ ǁîb ôab Absaloma xun gere ǃkhoe hîna. Barsilaib hîna ge kaise kaira hâ îb tsî ǀnî hân tsîn ge ǁîn ûiga ǁkhōǁkhōsasib ǃnâ mâi tsî Davib tsî ǁîb ǀkha ge hâ i khoen tsîna ge hui. Barsilaib ge kairab hâ ǃkhais ǃaroma ge ǂâi tama hâ i Jehovab ǃaruǀî sîsen-ū bi tide di. Xaweb ge ūb ge hâ i xūna sîsen-ū tsî Elob di ǃoaba-aona ge hui. (2Sam. 17:27-29) Tae-e da nēsa xu ra ǁkhāǁkhāsen? Kaise da ga kaira xaweb ge Jehovaba nî sîsen-ū da sada ǃgâsan di ǂhâsigu ǃnâ huis ǃnâ-ū, ǀgūse hân tsî ǃnūse hân tsîna ǃkhōǂgā hâse. (ǂKhm. 3:27, 28; 19:17) Aitsama da ga nēsa dī ǁoa xawe da ge marisise a hui ǁkhā, în sada ǃgâsan di ǂhâsiga nēs ǃnâ-ū kōǃgâhe ǁkhā.—2Kor. 8:14, 15. w19.10 21 ¶6

Kaise i ge a ǃgomba da ǁkhā sada ra tsâ ǀgauba nau khoen ǀkha ǀgoragusa, khoe-i xa da ga ǀnai tsûtsû-e hâ o. (ǂKhm. 18:19) Tamas ka io da ge a tsâ ǁkhā, ǁaeb tsî ǀgaib tsîna da ūhâ tama hâ di ǃgâi ǀhōsana kurus ǃnâ. Xawe da ge nēs dīhe ǁoa di tsâ tide. Sada ǃgâsan xa da ga ǃgom ǁaegu ǃnâ mâxōǀkhā-e ǂgao o, o da ge nēsi ǀgaisa ǀhōsaguside ǁîn ǀkha nî kuru. ǀGui ǀgaub hîna da nēsa a dī ǁkhāb ge ǁîna sada ra tsâ tsî ǂâi ǀgausa mîbasa. (1Pet. 1:22) Jesub ge ǁîb ǀhōsanab ra ǂgomǃgâ ǃkhaisa ǁîn ǀkha ǂhauǃnâse tsî xū-e sâu tamase ǃhoas ǃnâ-ū gere ǁgau. (Jhn. 15:15) ǁÎb aiǁgausa da ge a sao ǁkhā sada di ǂkhîb, ǃgomsin tsî ǁgâiǀāgu tsîna sada ǀhōsan ǀkha ǀgoragus ǃnâ-ū. Khoe-i ga ǃhoa o ǃgâise ǃgâ re, o du ge a ǂanǂui ǁkhā, ǁnā khoe-i ǂâidi, tsâsigu tsî mîǁguigu sadu digu ǀkha a ǀguisa. ǂHauǃnâ tsî ǃgâi ǁgamǀhaode da ga nau ǃgâsan ǀkha ūhâ o, o da ge ǃgâi ǀhōsaguside a omkhâi ǁkhā.—ǂKhm. 27:9. w19.11 4 ¶8-9

Kai ǁgâiǀāb ǁaeb ǃnâ i ge sida di haisi amsa ǀnîsi nî ǀkharaǀkharahe. Nēsi da ge Gaosib ǃgâiǂhôasa ra aoǁnâ tsî ra ǁgūtsâ ǁkhāǁkhāsabedīsa. Xawe da ge ǁnā ǁaeb ai kaise ǃoaǃū haisi-amsa nî aoǁnâ. Elobmîs ge nē haisi-amsa ǃnaredi ǀkha ra ǀgopeǀnō. (J.ǂHa. 16:21) Satanni ǃhūbaib ge ǀgūǁae nî hîgāgāhe di hâ haisi-amsa da ge ǀnîsi nî aoǁnâ. ǀGūǁae da ge nî ǂan sada haisi-ams nî tae-i sa tsî mati da nē haisi-amsa nî aoǁnâsa. Tamas ka io da ǀnî hâ ǀgauba nî sîsen-ū? Nēsa da ge ǃâu tsî nî mû. Mâ ǀgaub ǀguib ǃnâ da ga aoǁnâ xawe da ge aiǂhanuba nî ūhâ Jehovab di ǀgoraǃgâs haisi-amsa aoǁnâsa. (Ese. 2:3-5) Sida haisi-ams ge nî dī i i ǃhaode ǁgūtsâ sida aoǁnâ sîsen-e hoase ǀû kaisa. Nēsi da Jehovab di ǂkhâǃnâsa aoǁnâ sîsenni ǃnâ ǂhâ hâ khami da ge ǁnā ǁaeb ǃnâs tsîna ǁîb ǂkhâǃnâsa nî ǂhâ. ǂGomǃgâ da ge nî Jehovab ge ǀgaiba nî mā da di, ǁîb di ǂâisa dīǀoaǀoas ǃnâ.—Mix. 3:8. w19.10 16 ¶8-9

“ǃKhoeǂnâ” di hâ mîs ge ra ǂâibasen ǃkhūsisa ǀhaoǀhaobasens sada ǂâisa nî ǂgaeǁnâ ǃkhaisa. Nēsa da ga dī o, o da ge sada ǂgaoga “ǂgui gâre tsî ǂkhôasa tura-aigu” ǃoa-ai nî ǁkhowa-am. (1Tim. 6:9) Nē turaga sada ǂgaob ǃnâ mā-ams xa da ge nēsa Satanna xu ra hā ǁgâiǀāgu ase nî mû sada ǂgomsa ǂkhabuǂkhabus ǃaroma. ǂÂi re ǂhâba da hâ xūn hoana ǁamas ǃaroma da ge ǂâusa mari-e ūhâ. Tsū xū-e da ra dī, xū-i hîna da ǁnātikōse ǂhâ tama hâ-e da ga ǁama o? Hî-i. Xawe nē dîdi xa ǂâi re: Nē xū-e ǁamas di mari-e da ga ūhâ xawe da nē xū-e sîsen-ū tsî nî kōǃgâ? Tsî xūn hîna da sada mari i ǀkha ra ǁaman xa da ǃnāsase a ǂâi tsoatsoa ǁkhā? Mari-e ǀnamma omkhâibasa ǂkham khoeb hîna Jesub di ǁkhauǂuisa ge ūǃoa tama hâ i Eloba ǃnāsa-e dības ǃnâb khami a ī kai da ǁkhā? (Mrk. 10:17-22) Kaise i ge nî ǃgâi ǀguiǃgūpu ûiba ūhâ tsî da ga sada di ǁaeb tsî ǀgaib tsîna Elob di ǂâisa dīs ǃnâ sîsen-ū o. w19.11 17-18 ¶15-16

Elob ge “ǂâibasens tsî dīs” tsîra a mā du ǁkhā sadu mîǁguiga dīǀoaǀoas ǃaroma. (Fil. 2:13) Nēs ǃaroma Jehovaba ǁîb ǃanu gagaba ǂgan re, îb ǀgaiba mā du. Sadu ǀgoredi ǁnâu-am-e tama khami du ga tsâ xawe tā ǀgore ǀû re. Jesub ge mî khami: “ǂGan, [ǃanu gagaba] o du ge nîra māhe.” (Luk. 11:9, 13) ǀApeǁguiba ūhâ re. Mîǁgui-e du ga dī tsî nēsa dīǀoaǀoa ǂgao o, o du ge ǀapeǁguiba ǂhâ hâ. ǁNās khaoǃgâ du ge sadu ǀapeǁguib ǃoagu nî sîsen. ǁKhā ǀgaub ǃnâ mîǁgui-e du ga dī o nē mîǁguiba du nî dīǀoaǀoa ǀgausa xoamâi tsî nēsa sao re. Kai mîǁguiga da ga ūhâ o, o da ge nē mîǁguiga ǂkhari ǃârogu ǃnâ ra khôa ǂgao. Nēsa da ga dī o, o da sida mîǁguiga supuse nî dīǀoaǀoa amaga. Apostel Paulub ge Korinteǁîna ge ǂkhâǃnâ în “mâ ǂguro tsēs wekheb dis ai” māsenxa māde ǂnûiǂui, în tā nēsa ǁîb ga ǁnāpa sī ǁaeb ai ǀgui dī. (1Kor. 16:2) Kai mîǁguiga ǂkhari ǃârodi ǃnâ khôas ge sadu mîǁguiga du dīhō ǁoa khami tsâ kai du tide. w19.11 29 ¶13-14

ǂÂi ǁkhā da ge a Jehovaba da a ǂan di ǁîb ǀonsa ǂan tsî da ga ǁîb ge dī tsî mî xūn ǀnîn tsîna a ǂan o. Xawes ge nēsa ǂâibasen tama hâ Jehovaba da a ǂan di. Jehovaba ǂans ǃaroma da ge ǃnāsa-e nî dī. ǂGurose da ge Jehovab tsî ǁîb di ǃgâi ǀgaugu tsîn xa nî ǁkhāǁkhāsen. O da ge nî ǁnâuǃā tae-i ǃaromab Jehovaba xūna mî tsî ra dīsa. ǂAnǂui da ga o Jehovab tae-e sada xu ra ǃâubasensa o da ge ǁnāsa nî dī. ǀNî khoen ge Jehovab xa da ra ǁkhāǁkhāsen ǂgao ǃkhais ǃaroma xūna nî mî da tsî Jehovab khoen ǀkha da ga ǀhûǀhao tsoatsoa o ,o nî ǃâitsâ da. Xawe da ga Jehovab ai ǂgomaiǂnûi o, ob ge ǁîba xūǃnâ da tide. Nēs ǃnâ-ū da ge ǀhōsagusisa Jehovab ǀkha nî omkhâi hîna nî hâhâsa. Jehovaba da amabes ǃnâ ǃgâise a ǂan ǁkhā? Î nēsa da ge dī ǁkhā. w19.12 16-17 ¶3-4

ǁGûn ge ǀnî ǁaegu ai a ǃgombahe ǀgôana ǁkhāǁkhāsa xawe ǀgôan ge a ǀkhae hînan ge Jehovaba xu a hōna. Jehovab ge hoaǁae a hui nî ǁkhā. ǁÎb ge māsenxase ǁgûn di ǀgorede ra ǁnâu-am. Nē ǀgoredeb ge Elobmîs, Elobmîs ai ǃgaoǃgaosa ǂkhanin, tsî ǀhaohâb ǃnâ hâ ǁgûn di aiǁgaudi tsî ǀapemādi tsîn ǃnâ-ū ra ǃeream. ǀNî khoen ge ra mî 20 kuriga i ge ra ū ǀgôana kaikaisa di xawe ǁgûn ge ǁgûsisa ǀû tama hâ. ǀNî ǂoaǂamsa xūn hînan ǁgûna ǁîn ǀgôana a mā ǁkhān ge ǀnammi, ǁaeb tsî Elobmîs ai ǃgaoǃgaosa ǁkhāǁkhās tsîna. Mâ ǀgôa-i hoa-i ge ǁkhāǁkhāsa ǃkharagaǃnâgu ǀgaugu ǃnâ nî ūǃoa. ǂGuin ge Jehovaba a ǀnam ǁgûn xa ge kaikaihe tsîn ge Joanna Maes khami ra tsâ hîna Asiab ǃnâ ra hâsa: “To ǁgûra ta ge ra gangan ǁkhāǁkhā te ra ge ǃkhaisa i ta Jehovaba ǀnam. ǁÎra ge ûib ǀguiba ge mā te tama hâ i xawe ǂâibasensa ūhâ ûiba ge mā te.” (ǂKhm. 23:24, 25) ǂGui ǃgâsan ge ǁîn tsîna nē ǀgaub ǃnâ ra tsâ. w19.12 27 ¶21-22

Kaise i ge a supu ǁkhaeǂgaohesa ǂhâ hâ ǃgâsana hōsa. Māsenxase da ge ǀgauga ǃoa nî ôa nau ǃgâsana huisa ǃao da ga xawe. Aiǁgause da ge a ǃao ǁkhā tae-e da nî mî tsî dīsa ǃgâsa-i hîna ǁkhaeǂgaosa ǂhâ hâ-e huis ǃnâ. Xawe da ge a ǃgâi ǁkhaeǂgao-ao kai ǁkhā māsenxasiba da ga ǁgau o. Nē ǃhūbaib ǀams ra ǀgū khami gu ge mâsiga nî ǁgaoǂgâ tsî ǃgomsina nî ǂgui. (2Tim. 3:13) Tsî da ge ǃgomsin hîna sada ǀoasaoǃnâsib xa ra ǃaroma-en ǃaromas tsîna ǁkhaeǂgaosa hoaǁae ǂhâ hâ. Apostel Paulub tsîn ge ǂgomǂgomsase ge mâǀgai ǁkhā i ǁîb ûib ǃnâ, ǁkhaeǂgaos hînab ǁîb di Xristeǁî ǃgâsana xu gere hōs ǃaroma. Sada ǃgâsana da ge a hui ǁkhā în Jehovaba ǂgomǂgomsase ǃoabas ǀkha aiǃgû.—1Tes. 3:2, 3. w20.01 12-13 ¶17-19

ǂKhauhesa ǃgâsan ge nau ǃgâsan xan ǀō-aisa ǀgaub ǃnâ nî hâ-ūhe ǃkhaisa ǃâubasen tama hâ. (Fil. 2:2, 3) ǁÎn ge ra ǂanǃgâ Jehovab ga ǁîna ǁhûi, ob nau khoena ǂanǂan tama hâ ǃkhais tsîna. Nēs ǃaroman ge ǂkhauhesa ǃgâsana buru tama hâ nau ǃgâsan ga ǂkhauhen hâ ǃkhaisa ǂgom tama io. ǁÎn ge ra ǁnâuǃā Elobmîs da mîsa, tā khoe-i hîna Elob xa i ǀō-aisa aiǂhanuba i mā-e hâ di ra mî-e ǃhaese ǂgom di. ǂKhauhesa Xristeǁîn ge nau ǃgâsan xan ǀgapise nî mûhe ǃkhaisa ǂgao tama hâ. ǁNās ǃaroman ge ǀhao-ūn ra ǃgâsana ǁnā ǁaeb ai ǂkhauhen hâ ǃkhaisa mîba tama hâ. Nēs ǃaroma i ge nau ǃgâsana nēsa mîba mâ tide. (1Kor. 4:7, 8) ǂKhauhesa ǃgâsan ge nau ǂkhauhesa ǃgâsana ôaǂui tama hâ în ǁîn di ǂkhauhes xa ǃhoa tamas ka ion Elobmîsa ǀguiba nî ǁkhāǁkhāsen ga. (Gal. 1:15-17) ǀHaohâgu ge ǀguiǃnâxa tide ǂkhauhesa ǃgâsan ga nēti dī o. ǁÎn ge ǃanu gagab ǃoa-ai nî sîsen hîna Elob khoena ǂkhîb tsî ǀguiǃnâxasib tsîna ra māba.—Rom. 16:17, 18. w20.01 28 ¶6-7

Khoen hîna ge hîgāgā-e ge ǂgomdi ǃnâ hâ în ge nî ǁaixa Jehovab di ǀHûǀguitimî-aon di ǂgoms ǀguis ge hâhâ ǃkhais ǃgao. ǁÎn ge khoen hoana nēs xa nî ǂanǂan internets ǃnâ-ūs tsîna. ǃHaodi tsî ǁîdi ǂgaeǂgui-aob Satanni tsîn ge nî ǃhui da sida ǂgoms ǀguis hîgāgāhe tama hâ amaga. ǁÎn di mîǁguib hoa ǂgomde ǃhūbaiba xu hîgāgās diban ge ge dīǀoaǀoa tama hâ i. ǁNā-amagan ge ǁîn di ǂâide Jehovab ǃoaba-aon ai nî ǂnûi. ǁNā ǁaeb ǃnâ i ge nē ǃhaode nî Gogi Magogi di kai. Hoa ǃhaodi ge ǀguiǃnâxa tsî Jehovab khoena ǁîn ǀgaib hoab ǀkha nî ǁnāǂam. (Ese. 38:2, 14-16) Tae-i kai ǁgâiǀāb tawa nî īs xa da ge a ǂâiǂhansen tsoatsoa ǁkhā, ǃnāsa ǃgāsasiba da ūhâ tama hâ amaga. Xawe ǀgui xū i ge hâ: Kai ǁgâiǀāba da ge ǃao tama hâ. Jehovab ge sida ûiga nî sâu daoǁgaude nî mā da.—Psa. 34:19. w19.10 16-17 ¶10-11

ǃGôaǃgâsiba da ge tsâs ǀguisa hî tama hâ xawe da ge ǃgôaǃgâsiba Jehovaba sada dīgu tsî mîdi ǃnâ-ū ra ǁgau. Nēs ge ra ǁgau ǂgui khoena xu da nētsē ra ǀkharasa. ǂGui khoen ge nētsē Elob ra dība nî xūna ǃgôaǃgâ tama hâ. ǀGui xū-i hîna “ǀuni tsēdi” ǃnâ da ûi hâsa ra ǁgau i ge khoen ge a ganganoǃnâ. (2Tim. 3:1, 2) Sada ge nē ǀgauba ūhâ ǂgao tama hâ.ǁGûn ge ǁîn ǀgôan nî ǃkham ǃkhaisa ǂgao tama hâ xawen nî ǀhōsagusa ra ǂgao. ǁKhā ǀgaub ǃnâb ge Jehovaba ra ǂgao în ǁîb ǃoaba-aon hoana ǃgâi ǀhōsagusisa ūhâ. ǀNammi hîna da ūhâb ge ama Xristeǁî da a ǃkhaisa ra ǁgau. (Jhn. 13:35) Psalmdi xoa-aob ǀkha da ge a ǀguiǂâixa, hîna ge xoaba: “Matikōse i a ǃgâi tsî ǀnamǀnamsa, ǃgâsaga ǁkhāti ǀhû hâse ǁansa.” (Psa. 133:1) Sada ǃgâsana da ga ǀnam o, o da ge Jehovaba ra ǁgau ǁîba da a ǀnam ǃkhaisa. (1Jhn. 4:20) Kaise i ge a ǂoaǂamsa ǃgâsan hîna ‘khoexagu tsî ǀkhomxagun’ di ǃâse isa.—Efe. 4:32. w20.02 9 ¶6-7

Hannas ǃgomsiba gere ǃaroma xūn ge ǃhaese ge bē tama hâ i. ǁÎs ge noxoba Peninas ǀkha ǀgui oms ǃnâ gere hâ. Tsî Elobmîs ge mî tama hâ Peninas tanisen ǀgaub ge a ǀkhara ǃkhaisa. Nēs ǃaromas ge Hannasa noxoba Peninas tsûtsûsa mîde gere ǁnâu. Xawes ge Hannasa ǃaruǀî ge ǁaixa tama hâ i. Hannas ge ge ǂgomǃgâ Jehovab ge ǁîs di ǀgoresa a ǁnâu-amsa tsî nēs ǀkha ge ǃnomsa i. ǁÎs ge Jehovaba ge mā-am îb, ǁîsa ǁkhaeǂgao. ǁAe-e ǃkharu tsîb ge Jehovaba Hannas ǀgoresa ge ǁnâu-am tsîs ge Hannasa ǀgôana ge hō. (1Sam. 1:2, 6, 7, 17-20) Sada ǃgomsin ga bē tama i xawe da ge ǂkhîba a ūhâ ǁkhā. Hoaǁae da ra ǀgore tsî ǀhaode ǁhaoǃnâ xawen ge sada ǃgomsina bē tide. Xawe da ge Hannas aiǁgausa xu ra mû xū-i Jehovaba ǁkhae tide ǃkhaisa sada ǁkhaeǂgaos ǃnâ. Jehovab ge tātsē ǀuru da tide tsî sada ǂgomǂgomsasib ǃaroma nî ǀkhae da.—Heb. 11:6. w20.02 22 ¶9-10

ǀHaohâb ǃûi-aogu ge ǃgôasiba ra ǁgause hoaǁae ra ǃhoa. Xawe gu ge ǃkhō-oasen tama hâ Elobmîs daoǁgaudi hîna ǃgâsana a hui ǁkhāde ǁîn ǀkha ǀgoragus ǃnâ. Tae-i ǃaroma i a ǂhâǂhâsa ǂhâbasa i ga o xū-e mîs di ǀgaiba ūhâsa? Gapi pristeri Elib ge ǀgam ǀgôakha ge ūhâ i hînab ge kaise ǀnam i kha. Xawe kha ge nē ǀgôakha Jehovaba ǃgôasiba ge ūhâba tama hâ i. ǁÎkha ge ǂhâǂhâsa ǃharode ge ūhâ i, pristerkha ase tempeli tawa ǃoabasa. Xawe kha ge ǁîkha di ǂgaeǂguis ǃharode ǃgâi tama ǀgaub ǃnâ ge sîsen-ū tsî ǃgôaoǃnâsiba Jehovab ǁguiba di ǃoa-ai gere ǁgau tsî ǁgai ǁgoe-ūgu ǀgaugu ǀkhas tsîna ge ǀhabe i. (1Sam. 2:12-17, 22) Moseb ǂhanub ǃoagu kha ge Elib ǀgôakha nî ǃgamhe ge īs ge. Xaweb ge Eliba ǁîkha ǁnamas ǀguisa ge dī tsî ge mā-am îkha tempeli tawa ǃoabas ǀkha aiǃgû. (Deu. 21:18-21) Jehovaba Elib ge nē ǁhōba sîsenǂam ǀgaus xa mati ge tsâ? ǁÎb ge Eliba ge dî: “Tarexats kha satsa ǀgôakha âtsa tita xa ra ǃgôa?” Nēs khaoǃgâb ge Jehovaba nē ǀgam ǁnâuǀnamoǃnâ khoekha ǃgamsa ge mîmâi.—1Sam. 2:29, 34. w20.03 19 ¶4-5