Aprili
Satertaxtsēs, Aprili 1
Elob ge ǃhūbaiba ge ǀnam tsîb ge ǁîb di ǀguise ǃnae hâ ǀGôaba ge mā.—Jhn. 3:16.
Jesub ge ǀnamma ge ǁgau. Māsenxaseb ge sida ǃaroma a ǁō o. (Jhn. 15:13) Jehovab tsî Jesub tsîkha da ge a mātare oa ǁoa. ǁÎkha ge ǁgau da ǀnammi ǃaroma. Xawe tsēs hoasa da ra ûi ǀgaub ǃnâ-ū da ge a ǁgau ǁkhā. ǁÎkha da ra Gangansa. (Kol. 3:15) ǂKhauhesan ge xoremariba ra ǃgôaǃgâ. ǁNās ra ǁîn di ǃâubasensa īǁkhā kai amaga. (Mat. 20:28) Tsî Xristub di ǁguibas ǃnân ǂgomsa ūhâ amagab ge. Jehovaba ǁîna ǂhanu-ain tsî ǀgôan ase ge ǃkhōǃoa. (Rom. 5:1; 8:15-17, 23) ǀNî gūn tsîn ge xoremariba ra gangan. ǂGomsan Xristub di ǁōb ǃnâ ūhâ amagan, ge ǃanuse Jehovab aiǃâ mâ. Tsî ǃâubasensa a ūhâ ǁkhā ‘kai ǁgâiǀāba’ ûiǃkharusa. (J.ǂHa. 7:13-15) Hoa groep ra ge ǃgôaǃgâsiba ra ǁgau. Jesub di ǁōb ǂâiǂâisensa mâ kurib hoaba hâǃnâs ǃnâ. w22.01 23 ¶14-15
Jesub di ǁōb ǂâiǂâisens khomai ǃâs: (Tsē ǁaeb ǁaxasigu: 10ǁÎ Nisanni) Mateub 21:18, 19, 12, 13; Johaneb 12:20-50
Sontaxtsēs, Aprili 2
Xristub ge ǁamaǂui da hâ.—Gal. 3:13.
Jesuba ge tsûtsûsaba îs ge, dī tamab hâ xū-i ai ǂgari-amhe. Tsî ǁnās ǃaroma ǃkhamhesa. ǁÎn ge ǂhanu tama ǀgaub ai ǂgari-am bi. Tsî ge mî ǁîb Eloba, ǃgôasi-e ūhâba tama hâ. Tamas ka io ǁîb di ǀons tsîna di. (Mat. 26:64-66) Khoen ge ǁîba ǂgari-am. Tsî ǁîb Eloba ǃgôasi-e ūhâba tama, di a mîs ge kaise ǁîba gere tsûtsû. Tsîb ge gere ǃâubasen, îb ǁîb ǁGûba tā mā-am îb nēti taotaohe. (Mat. 26:38, 39, 42) Jesub ge ǃgâuhaib ai nî ǃgâu-es ge ge ī, îb Jodeǁîna ǀâxareba xu ǃnora kai. (Gal. 3:10) ǁÎn ge nēti ǀâxareba ge ūhâ i, Jehovab di ǂhanuban nî ǁnâuǀnam din ge mî. Xawen ge ǁnâuǀnam tama hâ i amaga. Adammi di ǀgôan a amagan ge ǁōba ge anu hâ i. Xawen ge ǁîn tsîna nē ǀâxareba ge ūhâ i. (Rom. 5:12) Elob di ǂhanub ge gere mî. Khoeb ga ǁōba anu hâ ǀgaub ǃnâ ga ra ǁore, ob nî ǃgamhesa. ǁNāpaxu i ge ǀnî ǁaega ǁîb di ǁō hâ sorosa haib ai gere ǃgâumâihe. (Deu. 21:22, 23; 27:26) Jesub ge ǃgâuhaib ai ǃgâuhe amagan ge Jodeǁîna. Nē ǀâxareba xu ge ǃnora kaihe ǁkhā i. Tsî ǁîb di māsenxa mās ge ǁnān hîna ge ǁîba. Ūǃoa ǂgao tama hâ in tsîna ge ǃkhōǂgā hâ i. w21.04 16 ¶5-6
Jesub di ǁōb ǂâiǂâisens khomai ǃâs: (Tsē ǁaeb ǁaxasigu: 11ǁÎ Nisanni) Mateub 21:33-41; 22:15-22; 23:1-12; 24:1-3
Mantaxtsēs, Aprili 3
Ti ûiba ta ra ǁguiǁnâ.—Jhn. 10:17.
Mûnanai re Jesub di ǀuniga tsēs hînab ge ǃhūbaib ai ūhâ isa. Romeǁî soldagu xa ǃkhōhe tsîb ge ge ǂnâuhe. (Mat. 26:52-54; Jhn. 18:3; 19:1) ǁÎgu ge ǃnababa gere sîsenū hîna ge ǂnau-ūheb gere o khōba soroba xu gere ūǁnāba. Tsî gu ge ǃgom haiba ge tani kaibi ǀaoba ra hî ǁâb ai. Tsîb ge Jesuba ǁnā haiba gere ǂgae ǃgâuheb nî sī ǃkhaisa ǃoa. Xawe ǁaeroba ǃkharu tsîgu ge Romeǁî soldaga ǀnîa khoeba ge mîba îb tani huihe. (Mat. 27:32) Tsîb ge Jesuba ǁōb nî ǃkhais ai a sī o. O gu ge soldaga spaikergu ǀkha ǁîb di ǃomman tsî ǂaidi ǃnâ ge ǃgâumâi bi. Jesub di soros di ǃgomsib ge ǁnā spaikergu ǃgâumâihe hâ ǃkhaiga gere doa. ǁÎb di ǀhōn gere ǃoa tsî ǁîb di mamas ge gere ā. Xawe Jodeǁî ǂgaeǂgui-aogu ge ǁîba gere ǂoeǂoe. (Luk. 23:32-38; Jhn. 19:25) Jesub ge ǂgui īrga ǃgomma gere hōǃâ. ǁÎb di ǂgaob tsî sōn aib ge ǃgomsiba gere hōǃâ. ǁNās ǃaromas tsînab ge ǃgomse gere ǀom. ǁŌb nî aiǃâb ge ǁîba Jehovab ǃoa ge ǀgore ǀuniga ǃnâsa. Tsîb ge ǁîb di danasa ǃgam tsî ǁîb di ûiba ge māǁnâ. (Mrk. 15:37; Luk. 23:46; Jhn. 10:18; 19:30) Kaise ge ǂau, tsûtsûsa tsî taotaosa ǀgaub ǃnâb ge ǁîba ge ǁō. w21.04 16 ¶4
Jesub di ǁōb ǂâiǂâisens khomai ǃâs: (Tsē ǁaeb ǁaxasigu: 12ǁÎ Nisanni) Mateub 26:1-5, 14-16; Lukab 22:1-6
JESUB ǁŌB ǂÂIǂÂISENS DI TSĒS
Sores ǂgâ toa hâ hîna
Dinstaxtsēs, Aprili 4
Dī nēsa ti ǂâiǂâisensa ǃoa.—Luk. 22:19.
Jesub ge pere-i tsî xûi-i tsîna ǁîb di ǂgomǂgomsa. Disiǀguiǀā (11) apostelgu ǀkha ge ǂû. Jesub ge ǁîgu ǀkha ǀgam ǃgaeǀhao ra xa ge ǃhoa. ǀAsa ǃgaeǀhaos tsî Gaosib di ǃgaeǀhaos tsîra xa. (Luk. 22:20, 28-30) Tsî ǁnā ǃgaeǀhao ra ge daoba ge ǁkhoba-am. ǀOro ǃgôab khoen hîna nî Gao kai. Tsî nî prister kain ǃaroma, ǀhommi ǃnâ. (J.ǂHa. 5:10; 14:1) Tsî ǁnān hîna ǂkhauhe hân. Hîna nē ǀgam ǃgaeǀhao ra ǃnâ hân ǀguin ge sī. Xûi-e ās ǃnâ a ǁhao ǁkhā. Jesub di ǁōb di ǂâiǂâisen tawa. Jehovab ge ǁîna ǀō-aisa ǃâubasensa ge mā, în ǃgâi ǁaeba ūhâ ǁō tamase. Tsî ǂhanihe tamase ǀhommi ǃnâ. Jesub tsî 144 000 nan ǀkha ǀguiba ǃoabasa. Tsî hoan ǂamai Jehovab ǀgūse nî hâ. (1Kor. 15:51-53; 1Jhn. 3:2) ǂKhauhesan ge ra mûǂan ǂgomǂgomsase nî hâ ǀgarasa, ǁîn di ǁōb kōse.—2Tim. 4:7, 8. w22.01 21 ¶4-5
Jesub di ǁōb ǂâiǂâisens khomai ǃâs: (Tsē ǁaeb ǁaxasigu: 13ǁÎ Nisanni) Mateub 26:17-19; Lukab 22:7-13 (Sores ǂgâs khaoǃgâ hâ ǁaxasigu: 14ǁÎ Nisanni) Mateub 26:20-56
Wunstaxtsēs, Aprili 5
Tita ǀkhats ge paradais ǃnâ nîra hâ.—Luk. 23:43.
ǀGam ǂkhabadī-aokha tsîn ge Jesub xōǀkhā ge ǃgâumâihe hâ i. (Luk. 23:40, 41) Xaweb ge ega ǀguiba Jesuba ǃoa dawasen tsîn ge mî: “ǂÂi te re, ǃKhūtse, sa gaosib ǃnâts ga sīo.” (Luk. 23:42). Jesub ge nē ra ǁō ǂkhabadī-aoba ǃâubasensa ge mā ǁkhā i. ǁÎb di Dadasab a ǀkhomxaǂgao amaga. (Psa. 103:8; Heb. 1:3) Tsū xūn hîna da ge dīn xa da ga ǃhausen o. Ob Jehovaba ra ǀkhom da tsî ra ǀûba da. Tsî da ge ǂgomsa a ǁgau ǁkhā sida di dīsan ǃaroma. Jesub ge ǂnâxū ǀaob ǃnâ-u. (1Jhn. 1:7) Tsū xūn hînan ge dīnab ge Jehovaba a ǀûba nîsan ge. ǀNî khoena ǂgom tama hâ. ǀNî ǁaegu ai du ga ǁnāti tsâ, o nēsa kō re. ǁŌb nîs aisib ge Jesuba ǂkhaba dī-aob hîna ge ǁîb ǃnâ ǂgomsa a ǁgau tsotsoaba ge ǀkhomxa. Ob kom Jehovaba ǁkhān a ǀgaub hoab ai ra ǁîba ra ǃoabana nî ǀkhomxa o.—Psa. 51:1; 1Jhn. 2:1, 2. w21.04 9 ¶5-6
Jesub di ǁōb ǂâiǂâisens khomai ǃâs: (Tsē ǁaeb ǁaxasigu: 14ǁÎ Nisanni) Mateub 27:1, 2, 27-37
Donertaxtsēs, Aprili 6
Jesub ge ge mî: “Dītoahe go.”—Jhn. 19:30.
ǁŌb nîs kōseb ge Jesuba ǁîb di ǂgomsa a ǃkhōǀgara, amagab ge ǀnî xūna ge dīǀoaǀoa. ǂGuroseb ge ge ǁgau ǁGâuab a ǂhomi-ao ǃkhaisa. Jesub ge ge ǁgau ǀoasa kurusa ūhâ khoeb. ǀOasa ǂgomsa ǁGâuab ga dī xūn hoan ǃnâ nî mâǃkharu ǁkhāsa. ǀGamǁîseb, ge Jesuba ǁîb di ûiba xoremarib ase ge mā. ǁÎb di xoremarib di ǁguibas ge ge mā-am în. ǀOasa kurusa ūhâ tama khoena ǂhanu-ai mâǃkhaisa Elob ǀkha ūhâ ǁkhā. Tsî i ge ǁnāsa ra īǁkhā kai în ǀamo ûiba ǃkhōǃoa. ǃNonaǁîseb, ge Jesuba ge ǁgau Jehovab a ǂhanu-ai ǂgaeǂgui-aosa. Tsî ǁnās ǀkhas tsîna ǁîb di ǁGûb di ǀonasa ge ǃanuǃanu. ǁNā-amaga ǀuniga tsēs hîna du ûib ǃnâ ūhâs ase sîsenū re hîna du ǂhauǃnâsiba ra ǁgausa. ǁNā-amaga da ge ǁōba da ga hōǃâ xawe a mî ǁkhā. “Jehova, ǁkhā ta a i hoa-e ta ge go dī i ta ti ǂhauǃnâxasiba ǃkhōǀgara. Tsî ǁGâuaba ǂhomi-aob asa ǁgau. Tsî ǁnās ǀkha sadu ǀonsa ǃanuǃanu. ǁGai mâsiga xu tsî sado ǂkhâǃnâ.” w21.04 12 ¶13-14
Jesub di ǁōb ǂâiǂâisens khomai ǃâs: (Tsē ǁaeb ǁaxasigu: 15ǁÎ Nisanni) Mateub 27:62-66 (Sores ǂgâs khaoǃgâ hâ ǁaxasigu: 16ǁÎ Nisanni) Mateub 28:2-4
Fraitaxtsēs, Aprili 7
Nēb ge ti ǀnamǀnamsa ǀGôab, ǃgâiǃgâibasensa ta ūǃnâ hâba; ǁîba ǁnâu.—Mat. 17:5.
ǂHomi ǂgā-amheb ges kaoǃgâb ge ǀgoraǃgâ-e. Tsî ǀhapixase ge hō-e dī tamab ge hâ i xū-i ǃaroma. Jesub ge mîǁgaiǁgaihe, ǂnauhe tsî ǃgâuhaib ai ge ǂgāmâihe. ǁÎb di ǃomdi tsî ǂaidi ǃnâ i ge Spykerga ra ǃkhā ǃkharu. Tsî mâ ǀoms hoas hînab ra ǀomǂuis tsî mâ mîs hoas hînab ra ǃhoas ge ra tsû. Xaweb ge nî ǃhoas ge ǂhâǂhâsa xūnab nî mîs ge. Jesub di ǀuniga mîde xu da ge ǂhâǂhâsa xūna a ǁkhāǁkhāsen ǁkhā. ǂÂiǂâiǃnâhe da ge ra i da nau khoena ǀûba. Tsî ǂgomǃgâ Jehovab tsîn nî ǀûba da sa. Kai aiǂhanub ge gagasi omarisa ūhâsa hîna hoaǁae ra hui da ǂgaosa. Xawe da ga huiba ǂhâ o, o da ge ǁîn ai nî ǂgan. ǂAn da ge a Jehovab ge nî hui da i da mâǀgai ǃgomsina da ga hōǃâ o. Tsî da ge ra mû tae-i ǃaroma i a ǂhâǂhâsasa. Î da mâtsēs hoasa ǀuniga tsēs ase ûi. Tsî ǁnās ǀkha sida di ǂhauǃnâsiba ǁgau. Tsî ǁnās ǀkhas tsîna ǂgomǃgâsiba ūhâ. Sida di ûib Jehovab di ǃomman ǃnâ hâsa. w21.04 8 ¶1; 13 ¶17
Jesub di ǁōb ǂâiǂâisens khomai ǃâs: (Tsē ǁaeb ǁaxasigu: 16ǁÎ Nisanni) Mateub 28:1, 5-15
Satertaxtsēs, Aprili 8
Tsî nēb ge ǀamo ûiba, sats ǀguise ama-ai Elots, tsî sats ge sîb Jesub Xristub onan nî ǂan ǃkhaisa.—Jhn. 17:3.
Jesub di daoga da ga sao, o da ge ǀamo ûiba nî ǃkhōǃoa. ǂKham ǃkhū hâ khoeb ge ge dî. Tae-eb a dī ǁkhāsa îb ǀamo ûiba ǃkhōǃoa. Ob ge Jesuba ǃeream tsî ge mî: “Î hā, î sao te re.” (Mat. 19:16-21) ǀNî Jodeǁîn hîna ge ǂgom tama hâ în, ǁîb a Xristusa. Ob ge Jesuba ǁîna ǃoa ge mî: ‘Ti gūn ge tita ra sao’ tsî tita ge ǁîna ǀamo ûiba ra mā.’ (Jhn. 10:24-29) Sida ǂgomsa da ge Jesub ǃnâ ra ǁgau. ǁÎb ge ǁkhāǁkhā xūna da ga ûiǂui tsî ǁîba ǁgae o. ǁNāsa da ga dī o, o da ge ǀamo ûib di daob ǃnâ nî hâ ǀgara. (Mat. 7:14) Jesub daoga da nî sao tsoatsoas aisi da ge aibe. ǁÎba ǂgurose nî ǂan tsoatsoa. Jesuba ‘ǂans’ ge hoaǁae da nî dī xū-e. Hoaǁae da ge nî dītsâ î da tsēs hoasa ǁîba ǃnāsase ǂan. ǁNās ge ǁîb di ǀgaugu, ǁîb di ǂâiǀgaub tsî ǁîb di mâǃkhaidi tsîna da ge nî ǂan. Nēsi da ga gaxuse amab ǃnâ ga ra hâ. Xawe da ge nî aiǃgû Jehovab tsî Jesub tsîn xa ǃnāsase ǂansa. w21.04 4 ¶9-10
Sontaxtsēs, Aprili 9
Tita aibe ǃkhāǃkhā-ao tsî ǃgôaǃgonao ge i ta.—1Tim. 1:13.
Apostel Paulub ge ǀnîsi ǀnî ǁaega kaise ǁgaise gere tsâ. Xristeǁî kaib nîs aiǃâb gere dī ǁgai xūn xa. Tsî da ge buru tama hâ ǁîb ge aitsâma ‘ǂguro’ ǁore-aon di ǀguib di a ǂgaisen o. (1Tim. 1:15) Paulub amaba nî ǁkhāǁkhāsens aiǃâb ge Xristeǁîna gere ǁgâiǀā. Tsî ǀnîna tronkhedi ǃnâ gere ǂgā. (ǃNǃkh. 26:10, 11) Mûnanai re matib ge Pauluba gere tsâsa. ǂKham xristeǁîn ǀkhab gere ǀgao o. ǁÎb mā-ams ǀkha ge ǃkhamhe ǁgûn dina? Paulub ge ǁîb di dīsāde gere ǃhausen. Xaweb ge ge ǂan i ǃkharuge xūnab a dawa ǁoasa. ǁÎb ge ge ūǃoa Xristub ge ǁîba ǁōbasa. Tsîb ge ǂgomǃgâsib ǀkha nēti ge xoa: ‘Xawe Elob di ǀkhomma xu ta nē ta īse ī.’ (1Kor. 15:3, 10) Tae-e da nēba xu ra ǁkhāǁkhāsen? Ūǃoa re Xristub ge satsa a ǁōbasa. Tsîb ge ǁîba dao-amsa ge ǁkhoba-amba du. Î du Jehovab ǀkha ǀō-aisa ǀgū ǀhōsagusa ūhâ. (ǃNǃkh. 3:19) Jehovab ǃoagu a ǂhâǂhâsa i ge nēsi da ra dī-i. Tsî hānîǁaeb ǃnâ da sī nî dī i tsîna. Tsî dīsādi hîna da ge ǃkharu ge ǁaeb ǃnâ dīn ose.—Jes. 1:18. w21.04 23 ¶11
Mantaxtsēs, Aprili 10
Î du gagade ǃâitsâ, ise di Eloba xu hâsa; ǂgui ǂkhaba kēbo-aogu ge ǃhūbaib ǃoa ǃgûǂoa xuige.—1Jhn. 4:1.
Ama as ge Jesub di tsēdi ǃnân ge ǂgui Jodeǁîna ǃâubasen tama hâ isa, îb Mesiaba ǁō. Kō re tae-i ge xoadi ǃnâ kēbohe hâ isa: ‘ǀOms âbab ǁōb ǃnâ ge ǁhōxū, tsî ǁore-aon ǀkhab ge ǃgôahe, tsî ǂguin ǁorenab ge tani, tsî ǁore-aona ǀgoreba amaga’. (Jes. 53:12) Jodeǁîn ge ǃaroma-e ge ūhâ tama hâ i. Jesub ge ǃgauhe ǃkhais ǃaroma ǃnôas xa. Nētsē da ge amaba ǂanǂui ǁkhā. Tsî ǁnās xa ǃnôa kaihe tide. ǃHommi aib gere mā aoǁnâs ǃnâb ge Jesuba ǃgâ gere khoena ge mîba. ǀNîn nî ‘ǂhumib ǀkha hoa ǂkhaba xūna ǁîn ǃoagu’ ǃhoa ǃkhaisa. (Mat. 5:11) ǁNā ǂhomib ge ǁGâuaba xu ra ǀkhī. ǁÎb ge mâǃoa-aona ra sîsenū în ama tama hâ xûna. Amaba ǀnam hâ khoen ǃoagu ǃhoa. (J.ǂHa. 12:9, 10) Sida ǃoagu ra ǃhoa-e ama tama xūna da ge tā nî ūǃoa. Tā da ge khoen ra mî ǂhomi xūna nî mā-am. În tā ǃnôa kai da Jehovaba ǃoabas ǃnâ. Tamas ka io sida ǂgomsa ǂkhabu kaisa. w21.05 11 ¶14; 12 ¶16
Mantaxtsēs, Aprili 11
ǁNā-amaga tā ǃao; sago ge ǂgui ǀhomaniron xa ǃnāsase a ama-ai.—Mat. 10:31.
Elobmîsa ra ǁkhāǁkhāsen khoe-e hui re. Î Jehovab ǃnâ ǂgomǃgâsiba ūhâ. Jesub ge ǁîb di ǁkhāǁkhāsabega ge mîba. Jehovab ǁîgu tsîna nî huisa, ǁîb a ǀnamgu amaga. (Mat. 10:19, 20, 29, 30) ǁKhāǁkhāsen ra khoe-i ǂâiǂâiǃnâ re. Jehovab ǁî-i tsîna nî huisa. ǁKhāǁkhāsen ra khoe-e du ge a hui ǁkhā î Jehovab ai ǂgomaiǂnûi. Tsî ǁîb ǀkha ǀgores ǃnâ ū ǃhoa. “Tita ra ǁkhāǁkhā khoe-i ge. Hoaǁae hānîǁaeb ǃnâ ta a dī ǁkhā. Mîǁguiga ǀgores ǃnâ ra ǂgai.” Dib ge Franciszekba ra mî, hîna Polandi ǃnâ ra hâba. “Mû ta ge o matib ge Jehovaba. Tita ra ǁkhāǁkhā khoeb di ǀgoresa a ǃereamsa. O ta ge tita tsîna ǃhaese ge ǀgore tsoatsoa. Jehovab di huiba ta ge ge hōǃâ. Ti ǀasa sîsen-e xu ta ge tsērode gere ǂgan ǁnāsen ǂgao. Î ta ǀkharib di ǀhaodi tsî ǀhaohâb di ǀhaodi tsîna hâǃnâ.” Jehovab ge kaise Elobmîsa ra ǁkhāǁkhāsen khoena ra tsâba. Tsîb ge kaise ra ǃgôaǃgâ Xristeǁî ǁkhāǁkhā-aon. Hîna ǃgarise ra sîsenna. În nau khoena hui în Jehovab ǀgūse sī. Tsî ǁîb ge ǁnās ǃaroma ǁîna kaise a ǀnam. (Jes. 52:7) Nēsi du ga Elobmîs ǁkhāǁkhāsa mā tama i xawes tsîna. Du ge ǁkhāǁkhāsen ra khoe-e a hui ǁkhā în ǁāǁnâs kōse sī. Nau aoǁnâ-aona du ga ǁîn di Elobmîs ǁkhāǁkhāsa ǃoa ga ra sao o. w21.06 7 ¶17-18
Wunstaxtsēs, Aprili 12
Nāb, ǁîb di turaba ǃKhūb di ǂhanub ǃnâ ūhâb tsî ǁîb di ǂhanub xa ra ǂâiǂâisenna, tsēs tsî tsuxub tsîra.—Psa. 1:2.
Aiǂhanub Elobmîsa da ūhâs diba, da ra ǃgôaǃgâsa da ge a ǁgau ǁkhā. ǁÎsa da ga hoaǁae khomai o. ǁAeba da ge nî ǀapeǁgui Elobmîsa khomai tsî ôaǃnâsa. Elobmîsa hoaǁae khomaisa da ga ǃkhōǀgara o. O da ge sida di ǂgomsa ǀgaisase a ūhâ ǀgara ǁkhā. “Gā-ai tsî ǁnâuǃāxan” nē ǃhūbaib dina xu da ge a ǀkhara. Sada ge ǁkhāposa ǂgoms, Elobmîs ai a ǃgaoǃgaosasa ūhâ. (Mat. 11:25, 26) Elobmîs ge ra ǁguiǃāba da, ǃhūbaib ai hâ mâsigu. Tae-i ǃaroma nēti ra ǁgai ǂoasa. Tsî tae-eb Jehovaba ǁnās xa nî dīsa. Hā da ǁkhā da i hoa-e dī tsî sada di ǂgomsa ǀgaiǀgai. Tsî ǂgui khoena hui, în ǂgomsa. Sada di Kuru-aob ǃnâ ūhâ. (1Tim. 2:3, 4) Hā re da aiǃgû tsî mûǂui ǁnā ǁaeba ǃoa. Hînan hoa ûitsama xūn ǃhūbaib ai hâna. Jehovaba koa tsî ǂHaiǂhais 4:11 ǃnâ hâ mîde nî mîsa: “Sats ǃKhūts ge a anu, ǂkhaisib tsî ǃgôasib. Tsî ǀgaib tsîna māhesa; sats ge hoana kuru xui-ao.” w21.08 19 ¶18-20
Donertaxtsēs, Aprili 13
ǃGâsaǀnamguba ūhâ. Tsî nē-e, nau-e ǃgôasiba ǁgausa turaxaba.—Rom. 12:10.
ǃÛi-aogu ase gu ge ǀhaohâb ǃûi-aoga. ǃEreamsa ūhâ ǁnamasa māsa ǂhâbasa i ga o. ǁîgu ge nî dītsâ, ǁnamasa ǃgâi tsî ǂkhâǃnâ ra ǀgaub ǃnâ māsa. Tsî ǁnās ge “ǂgaoba ra ǃgâiaǂgao kai.” (ǂKhm. 27:9.) ǀHaohâb ǃûi-aogu ge ǁîgu di ǃgâsana a ǀnam. ǀNî ǁaegu ai gu ge nē ǀnamma, ǂhanu tama daob ai garu khoe-e ǁnamas ǃnâ-ū ra ǁgau. (Gal. 6:1) ǀHaohâb ǃûi-aob khoe-i ǀkha nî ǃhoas aiǃâb ge. Paulub ge ǀnammi xa mî mîdi xa nî ǂâiǃgâ. ‘ǀNammi ge ǃnūǃnâxa, tsîb ge a ǃgâi. . . . Hoanab ra ǃgū-ai, hoanab ra ǂgom, hoanab ra ǃâubasen, hoanab ra taniǀnam.’ (1Kor. 13:4, 7) ǀHaohâb ǃûi-aogu ga ǃgamse nē Elobmîs xoaǀgoradi xa ǂâiǃgâ o. O i ge nî hui gu î gu ǀnammi ǀkha ǁnamasa mā. ǁNamasa ra māhe i ga hōǃâ o, ǀhaohâb ǃûi-aob ra tsâba nîsa. O i ge ǁnamasa nî ūǃoa. w22.02 14 ¶3; 15 ¶5
Fraitaxtsēs, Aprili 14
Xawe ǁîn ge ge mâǃoaxa, tsî ǁîn ge ǃAnu Gagaba ge ǃoaǃoa.—Jes. 63:10.
Jehovab ge ǀhomǃgāgu tsî ǂguro khoera ǀoasase ge kuru. Xaweb ge Satanna (ǀons ǂâibasens ge “Mâǃoa-aob”) ǀoasa kurusa ūhâ khoera ge ǃhoa ǁnā dana. Tsî ra ge Adammi tsî Evas tsîna Jehovaba ge mâǃoa. Tsî egan ge ǀnî ǀhomǃgān tsî khoen tsîna. Jehovaba ge mâǃoa tsoatsoa. (Jud. 6) Jehovab ge ǀapexūheb ge khami gere tsâ. Xaweb ge ǁîba noxoba a ǃnūǃnâxa. Tsîb ge ra aiǃgû ǃnūǃnâxasa. ǁAeb nî hās kōse, îb nē mâǃoade ǀam kai. Nēs ge ǂkhîba nî ǀkhī-ū. ǀKhaehe tsî a ǂgomǂgomsa khoen ai. Hîna ǁîb ǀkha ra ǃnūǃnâxana, nē ǁgai ǃhūbaib ǃnâ. Satanni ge Jehovab ǂhanu-ai ǃoaba-aob Joba ge ǂgari-am. Tsî ge mî, Jehovab di ǂgomǂgomsa ǃoaba-aon. ǁÎba ra ǃoabasa ǃgâi xūn hînan ǁîba xu ra hōn ǃaroma. (Job. 1:8-11; 2:3-5) ǁGâuab ge ra aiǃgû khoena ǂgari-amsa nētsē. (J.ǂHa. 12:10) ǁGâuab a ǂhumi-aosa da ge nî ǁgau. Sida ga ra tani ǀnamxa o. ǃGomsin hîna da ra hōǃân ǃnâ. Tsî da ge ǂgomǂgomsase nî hâ. Jehovab ǀkhāb ai, ǁîba da a ǀnam amaga. w21.07 9 ¶7-8
Satertaxtsēs, Aprili 15
Ti mûǁaeba xu sadu ǁorena ūbē; ǂkhabadība ǀû.—Jes. 1:16.
Apostel Paulub ge aiǁgausa ge mā da hîna ra ǁkhāǁkhāda sa. Matikōse î a ǂhâǂhâsasa sida ûiǀgauba dawa sa. ǁÎb ge ge xoa i da sida ‘ǀoro ǂūba ǃgâumâi.’ (Rom. 6:6) ǀNî mîdi ǃnâ Xristub di aiǁgausa da ge ra sao ǂgao. Jehovab ǃhui hâ xūna ǃhuis ǃnâ-ū. Nē xūna da ga dī o ǀgui da ge ǃanu ǃgâiǂâisa nî hō. Tsî aiǂhanub tsîna nî ūhâ ǀamo ûib di ǃâubasensa. (Jhn. 17:3; 1Pet. 3:21) Jehovab ge tātsē ǁîb di ǀgauga dawa tide, îb sida ǂkhîǂkhî. Xawe da ge sida ǀgauga nî dawa. Tsî ǁnās ǀkha ǂgaoǀkhādi ǁîb dide nî sīǃnâ. (Jes. 1:16-18; 55:9) ǁĀǁnâhe toa da ga xawes tsîna da ge nî aiǃgû sorosi turaga ǃkhamǃoasa. Jehovab huiba ǀgoreba. Tsî ǁîb gagab ai ǂgomǃgâ re, sadu ǀgaib ais ose. (Gal. 5:22; Fil. 4:6) ǃGarise da ge nî sîsen î da ǀoro ǂūba ǁhûǁnâ. Tsî ǁnāti ūhâ ǀgara. w22.03 6 ¶15-17
Sontaxtsēs, Aprili 16
[Jehovab] ge nîra ǂhansenba tsi.—Psa. 55:22.
Jehovab ge ra mîmâi. ǁÎb nî ǂûn, saran tsî hâǃkhais tsîna mā da sa. Sida ga ǁîb di Gaosiba ǂgurose mâi. Tsî ǁîb di ǂhanu-aisib ǃoagu ûi o. ( Mat. 6:33) Nē mîmāsa da ga ǂgomǃgâ. O da ge ǂâi tide ǃhūbaib di xūn nî ǁkhauba da. Tsî ǀamo ǂkhîba nî māda sa. ǂAn da ge a ǀgui ǀgaub hîna da ama ǂkhîba a hō ǁkhāb ge. Jehovab di ǂâisa dīsa. (Fil. 4:6, 7) ǂGui mari-e ūhâ tsî da ga ǂgui xūna ǁama ǁkhā. Xawe da ge nî ǂâiǃgâ amabes ǃnâ da ǁaeb tsî ǀgaib. Tsîna ūhâsa nē xūna sîsenū tsî kōǃgâsa. Sida ūhâ xūna da kaise ǀnam tsî ǂgurose ra mâi sida ûib ǃnâ? ǂÂihō re, Jehovab ge sîsen-e māda hâ. ǁÎb omaris ǃnâ da nî dī-e. ǁNās ge ra ǂâibasen î da tā mā-am tsî ǂgaeǁnâhe. ǁNā khoeb khami da ge ī ǂgao tama hâ. ǁÎb di ǃkhūsiba ge kaise ǀnam îba. Tsî a ǂkhāba Jesuba saosa. ǁÎb ge ǁnā aiǂhanuba ge ǂoaǃnâ Jehovaba ǃoabasa. Tsî ǁîb di ǀgôagu di ǀguise ūǂgā-esa.—Mrk. 10:17-22. w21.08 6 ¶17
Mantaxtsēs, Aprili 17
ǃEreamsa ǂgaoǀkhā du hâ i hoa-e ǃereamsa mā.—1Pet. 3:15.
Xoade du ra ôaǃnâ khami du ge. Jehovab tsî ǁîb di ǀgaugu xa nî ǁkhāǁkhāsen. Tsî nē gu ge ǁkhā ǀgaugu hîna du ge ǁkhāǁkhāsen ga. Elobmîsa du gere ǁkhāǁkhāsen o. Jehovab ǀgaugu xa ǁkhāǁkhāsens ge ge ǂgom kai da. Jehovab amabes ǃnâ hâ ǃkhaisa. (Eks. 34:6, 7; Psa. 145:8, 9) Jehovaba du ǃgâise ra ǂan. Khami i ge sadu di ǂgomsa ǁîb ǃnâ nî ǀgai. ǁÎba du ūba hâ ǀnammi ge nî kai. Tsî sadu ǀhōsagusis ǁîb ǀkha du ūhâs. Tsîn ge nî ǀgaisa tsoatsoa. ǀGoragu re Elob ǃnâ du ūhâ ǂgomsa nau khoen ǀkha. Xawe aoǁnâba du ra khoe-i ga. Elob hâ ǃkhaisa dî du o. Tsî du ga ǃereamsa ǀū o. Mati du nî dī? Dītsâ re i xoade xu dî-e ǃeream, sida di ǂkhaniga xu. ǁNāpaxu ǁnā khoe-i ǀkha ǀgoragu re. ǀHaohâb ǃgâsa-i ǃnāsa ǂansa ūhâ-i. Tsîna du ge ǂan ǁkhā. Î du dîsa ǃereams ǀkha hui-e. Khoe-i ga ǃereamsa Elobmîsa xu ga ūǃoas. Tamas ka io ūǃoa tama i. Xawe du ge ǃgâiba sadu go dī ôaǃnâsa xu nî hō. Sadu ǂgoms ge ǀgaisase nî kai. w21.08 18 ¶14-15
Dinstaxtsēs, Aprili 18
Xū-i xare-e ta ǃkhōǃgau tama hâ.—ǃNǃkh. 20:20.
ǂHâbasa tama i ge hâ. ǃGâi ǀgaub ǃnâ ra hui da xūna ǁnāxu. Tsî ǀgui Jehovaba ǂkhîǂkhîsa. (Aoǁn. 5:19, 20) Sida a ǃgâiba xūna da ǁnāxu ǂgao tama hâ. Amaga da Jehovab ǃoabas ǃnâ ǃnāsase dīsa xu ra ǃkhō-oasen? Sida tsîn ge Jesub di aiǁgaus ǃnâ ge hâ i. Khoeb ge dīsā khami a dīsā ǁkhā. ǃGarise sîsen tsî ge ǂgui xūna ǀhaoǀhaobasena. Tsî ǁnās ǀkha Elob ai ǂâisa ǂnûi tama hâ iba. (Luk. 12:16-21) ǃGomsina da ga hōǃâ, o da ge huiba ra ǀgoreba. Tsî da ge ra ǂâi tae-e da ǁnās ǂamai a dī ǁkhās tsîna. (ǂKhm. 3:21) Jehovab ge ǂgui ǀgaugu ǃnâ ra ǀkhae da. ǁGau ǁkhā da ge a nē ǀkhaega da ra ǃgôaǃgâsa. ǁKhā da a i hoa-e dīs ǃnâ-ū da ge ǁîba koasa ra mā. (Heb. 13:15) Nēs ge ǂâibasen ǁkhā, î da sada aoǁnâ sîsenni ǃnâ ǃnāsa-e dī. Tsîb ge Jehovaba ǁnā ǀgaub ai. Sida noxoba ǂgui ǀkhaega a mā ǁkhā. ǁNā-amaga a da tsēs hoasa ǀgauga ôa. Tsî ‘tsâ tsî nî mû, Jehovab a ǃgâi ǃkhaisa.’ (Psa. 34:8) O da ge Jesub khami nēti a mî ǁkhā: “Nēs ge ti ǂûsa, sî te geb di ǂâisa ta nî dī, tsî ǁîb di sîsenna ta nî dītoasa.”—Jhn. 4:34. w21.08 30-31 ¶16-19
Wunstaxtsēs, Aprili 19
ǃGuriǂgaoxasib ge khôaǂkhūs aiǃâ ra hā, tsî ǀgapisib gagas diba ǁnās aiǃâ.—ǂKhm. 16:18.
ǁGâuab ge ra ǂhâba î da ǀgapiǂâixa ǀgauba ūhâ. ǁÎb ge a ǂan ǀgapiǂâixa da ga o. O da ǁîb khami nî isa tsî da ge ǀamose ûi tidesa. ǁNā-amagab ge apostel Pauluba ǁnama tsî ge mî. ‘Î da tā khūkhūsen tsî tā ǁgâuab di ǀgoraǃgâs ǃnâ ǁnā.’ (1Tim. 3:6, 7) ǁNā î ge mā khoe-i hoa-i ǀkha a īǁkhā. Nēsi da ga ǀasase amab ǃnâ hâs. Tamas ka io Jehovaba ǂgui kurina ǃoaba xawes tsîna. ǀGapiǂâixa khoen ge ǁîn xa ǀgui ra ǂâi. ǁGâuab ge ra ǂhâba î da ǀguriǂâixa. Tsî ǁnās ǀkha sida ai ǀgui ǂâisa ǂnûi. Tsî Jehovab ais ose. Tsî ǃnāsase ǃgomsina da ga hōǃâ o. Aiǁgause khoe-e sado dī tama du hâ xū-i ai ge ǂkhari-am hâ i? Tamas ka io i ge khoe-e sado ǃgâi tama ǀgaub ǃnâ hâ-ū hâ i? ǁGâuab ge nî ǂkhî sadu ga Jehovab. Tamas ka io sadu di ǃgâsana ga ra ǂkhari-am o. Tsî ǁGâuab ge ra ǂhâba î du ǂâi sadu ǃgomsina ǀamsa hō kais ǃaroma du. Aitsâma ǁnāsa nî dīsa. Tsî tā Jehovab ǁîb di mîs ǃnâ mā hâ daoǁgaude nî saosa.—Aoǁn. 7:16, 20. w21.06 15 ¶4-5
Donertaxtsēs, Aprili 20
Îs ǀgai sas ǁaes ǃhūb dise, tib ra ǃKhūba mî, î du sîsen, tita sadu ǀkha hâ xuige, tib ra ǃKhūb ǂnubidi diba mî.—Hag. 2:5.
Jehovab ge kēbo-aob Hagaiba. ǂHâǂhâsa sîsen-e ge mā hînab nî dī-e. 537ǁÎ kurib (Jesub ǃnaes aiǃâ) ǃnân ge Jodeǁîna. Jerusalemsa ǃoa ge oa hā Babilonsa xu. Hagaib ge ǀnîsi nē khoen ǁaegu ge hâ i. Jerusalemsa xun ge oaǀkhīs khaoǃgân ge. ǂGomǂgomsa ǃoaba-aon Jehovab dina tempela ge om tsoatsoa. (Esr. 3:8, 10) ǃHae ǁaeb ǃnâ i ge ǁgai xū-e ge a ī. ǁÎn ge ge ǂkhabu ǂâi tsoatsoa tsî tempela ge om ǀû. ǁÎn ǂnamipe hâ khoen ge mâǃoa nî tsoatsoa amaga. (Esr. 4:4; Hag. 1:1, 2) 520ǁÎ kuri (Jesub ǃnaes aiǃâ) ǃnâb ge Jehovaba. Hagaiba ge mîba îb Jodeǁîna hui în. ǁKhoaǂgaosib ǀkha tempela om toa. (Esr. 6:14, 15) Hagaib haisi-ams di ǂâibasen ge īs ge Jodeǁîna ǀgaiǀgaisa. ‘Jehovab ǂnubidi dib’ ti hâ mîdi ge ǁîna ge ǂkhâǃnâ. Jehovab ge kai ǃgôab ǃnâ ǀhomǃgāga ūhâ. Nēs ǃaroman ge Jodeǁîna ǁîb ǃnâ nî ǂgom ge īs ge. ǃKham dan ǂgaon ga o. w21.09 15 ¶4-5
Fraitaxtsēs, Aprili 21
Nēs tawan ge hoana nî mûǂan, ti ǁkhāǁkhāsabe go asa, ǀnamguba go ga sago ǃnâ ūhâo.—Jhn. 13:35.
Nētsēn ge ǃhūbaib ǂhabase hâ Jehovab di ǃoaba-aona. Ama ǀnammi tsî ǀguiǃnâxasib tsîna ra hōǃâ. Nau ǂgomde xu da ge ra mâǂoa. ǀGui omaris ase da ra mûgu amaga. ǃKharagagu ǃhūga xu da hâ. Tsî ǃkharagagu khaoǃhūga ūhâ xawe. Nē ama ǀnamma da ge sida ǀhaodi. ǂHaris ǀhaodi tsî ǀkharib kai ǀhaodi tawa ra mû. Nēs ge ra hui da mûǂansa Jehovaba da. ǁÎba ra ǂkhîǂkhî ǀgaub ǃnâ ra ǃoabasa. (Jhn. 13:34) Xoas ge ra ǂkhâǃnâ da ‘sâuǀnamgu du re ǁgarihes ose.’ (1Pet. 4:8) ǀGui ǀgaub hîna da ǀnamma nî ǁgaub ge. ǀÛbagus tsî sada di ǀoasa-oǃnâsib ǃnâ tanigusa. ǀGauna ǃoas tsîna da ge nî kō î da māsenxasiba ǁgau. Tsî sada ǃgâsan ǀhaohâb din hoana sada omde ǃoa ǁkhau. ǁNān hîna ge tsûtsû dan tsîna. (Kol. 3:12-14) Nēti i ǀnamma da ga ūhâ o. O da ge ama Xristeǁî da a ǃkhaisa ra ǁgau. w21.10 22 ¶13-14
Satertaxtsēs, Aprili 22
Xawe ǁîb [ǀgôaba] ǀnam hâb, ge ǃhaese ǁîba ra ǁkhara.—ǂKhm. 13:24.
ǂNûiǂuisa ǃgâsa-e mati a ǀkharaǀkharasen ǁkhā? Ama as ge ǀkharaǀkharasen ǁkhā a. ǂGui ǃgâsan hîna ge ǁgai ǁorena dī. Tsî ǂnûiǂuihe hâ în ge ra mî. ǂNûiǂuihes ge ǁîna ge mûǂan kai. Kaisen tsū ǁore-e dī hâsa. Tsîn nî ǃhausen tsî Jehovaba ǃoa oaǀkhīsa. (Heb. 12:5, 6) Sao ra aiǁgaus xa ǂâi re. ǃÛi-aob ge ra mû gūro-i ǀaesen hâsa. Nē gūro-e ǂuru kais ǃaromab ge a ǂan. Nē gūro-eb ǀguri ūǂûi tsî nî kōǃgâsa. Gūn ge ǀguiba hâsa ǁnaeti hâ. Tsî i ge gūro-e, nau gūna xu i ga. ǀGorahe o, a ǀguritsâsen ǁkhā. Xawe nēsa ra ǂâibasen, gūro-i ga ǀguri ūhâhe o. O i ǃgâi tamase ra hâ-ūhe di? Hî-î, di ǂâibasen tama. ǃÛi-aob ge a ǂan nē ǀaesen hâ. Gūro-eb ga nau gūn tawa xū o. On hoa gūna nî ǀaesensa. ǀAesen hâ gūro-eb ga nau gūna xu ūbē o. Ob ge nau gūn hoana ra ǁkhauba. w21.10 10 ¶9-10
Sontaxtsēs, Aprili 23
ǁNāti ǃnâb âdo khoen aiǃâ ǃnâǃnâ, în sadu ǃgâi sîsenga mû, în sadu Îb ǀhommi ǃnâ hâba ǂkhaiǂkhai.—Mat. 5:16.
Kai aiǂhanub ge ǃhūbaib ǂhawase hâ ǃgâsan omaris ǃâsa. ǂGui khoen sada ǀkha Eloba nî ǃoabasa da ge ǂhâba hâ. ǁNāsa ǂâis ǃnâ ūhâse da ge tātsē tā xū-e nî dī. Khoena Jehovab tamas ka io ǁîb di ǃoaba-aon xa ǁgaise nî ǂâi kai-e. Dītsâ da ge ra î da ǃgâise tanisen. În khoena Jehovab xa ǁkhāǁkhāsen tsî ǁîba ǃoaba ǂgao. ǀNî ǁaegu ain ge ǀnî khoena a mîǁgaiǁgai da ǁkhā. Tamas ka io a ǃgôaǃgôn da ǁkhā. Sida ǀhomsi ǁGûba da ra ǁnâuǀnam amaga. Nau khoena sada ǂgoms xa mîbas xa da ga ǃao o. O da tae-e a dī ǁkhā? ǂGomǃgâsiba da ge ūhâ Jehovab tsî ǁîb di ôab tsîn nî hui da sa. Jesub ge ǁîb di ǁkhāǁkhāsabega ge mîba. Î gu tā ǂâiǂhansen tae-e gu nî ǃhoasa. Tae-i ǃaroma? “ǃHoa go nî xūna go ǁnā ǁaeb ai nîra māhe xuige. Sa tama go ge, ǁnā ǃhoa ra go. Xawe Gagab sago Îb dib ge ǁnāb, sago ǃnâ ra ǃhoaba.”—Mat. 10:19, 20. w21.09 24 ¶17-18
Mantaxtsēs, Aprili 24
Tita ge Jehovaba ǃoa ra mî: Sadu ge a ti ǁhaiǁhâ, ti ǁaposa hâǃkhai.—Psa. 91:2.
Moseb ge ǁkhā ǀgopeǀnō ra mîsa ge sîsenū, sâuǃkhaib di hâsa. (Psa. 90:1) ǁŌb nîs aiǃâb ge Moseba ǀnî hâ ǂkhâǃnâ ra ǀgopeǀnōsa ge sîsenū. ǁÎb ge ge xoa: ‘Ab ǀamo Eloba satsa hâǃkhaise ība tsî ǃnagaba xu ǀamo ǁôase.’ (Deu. 33:27) ‘ǁÎb ǀamo ǁôab ge sadu ǃnaga hâ.’ Di hâ mîde tae-e Jehovab xa ra mîba da? ǂGom da ga o Jehovab sida ra ǁkhaubasa. Os ge nēsa nî ǂkhâǃnâ da. Xawe ǀnî ǁaegu ai da ge ǂkhabuǂâi ǁkhā, tsî nēti tsâ ǀû tide. ǁNāti-i ǁaegu ǃnâb Jehovaba tae-e nî dība da? (Psa. 136:23) ǁÎb ge ǁîb di ǁôaga sada ǃnāka nî ǂgā tsî tsaurase nî ūkhâi da. Tsî nî hui da î da ǂkhabuǂâi ǀû. (Psa. 28:9; 94:18) ǂAn da ge a hoaǁae da ge Elob ai nî ǂgomaiǂnûi. Nēs ge ǀgam ǀgaukha ǃnâ nî hui da. ǂGurose, mapa ǀgui da ga hâ xawe da ge nî ǂanǃgâ. Jehovab nî ǁkhauba dasa. ǀGamǁîse, sada ǀhommsi ǁGûb ge ra tsâba da. w21.11 6 ¶15-16
Dinstaxtsēs, Aprili 25
Nēsi ǂkharirose ǂguiǃnâgu ǃâitsâdi ǃnâ ǃoa hâdo.—1Pet. 1:6.
Jesub ge ge ǂan i ǂhanuoǃnâsib. ǁÎb ǁkhāǁkhāsaben ǂgomsa nî ǃâitsâsa. Nēsa mâǃkharus ǀkha hui nîs ǃaromab ge. Lukab ǃnâ xoamâisa ǂkhōsa ge mā nî. Jesub ge ǃoataras hîna ge ǀû tamase. ǂHanuoǃnâ ǂgaeǂgui-aob tawa gere ǂhanu-aisiba ǂgāns xa ge ǃhoa. ǁÎs ge ǂgomǃgâsiba ge ūhâ i. ǀÛ tamases ga ǂgān ob nî huisisa. ǀAms aib ge ǂgaeǂgui-aoba ǁîs ti ǂgansa ge ūǃoa. Tae-e da nēsa xu ra ǁkhāǁkhāsen? Jehovab ge ǂhanuoǃnâ tama hâ. Nēs ǃaromab ge Jesuba ge mî: “Eloba ǁîb di ǃkhōǂuibasensan. Tsēs tsî tsuxub tsîra ǁîba ra ǂgaiǀîna. ǂHanuǂhanubab tide.” (Luk. 18:1-8) Jesub ge ǀaro tsî ge mî: “Tsî Khoen Ôab ga hā ǃnubai. Xare kha ǂgom-e hōb nî ǃhūbaib ai?” ǂHanuoǃnâsib xa ǃaromahe hâse da ga ǃgoma tsâ o. O da ge ǃnūǃnâxasib ǀkha, ǀgaisa ǂgomsa da ūhâ ǃkhaisa. ǃOataras khami nî ǁgau. Nēti ī ǂgomsa da ga ūhâ o. O da ge a ǂgomǃgâ ǁkhā. Jehovab nēsi tamas ka io ega nî hui dasa. ǀGores di ǀgaib ǃnâs tsîna da ge nî ǂgom. w21.11 23 ¶12; 24 ¶14
Wunstaxtsēs, Aprili 26
Tare-i ǀkhab nî ǂkhamkhoeba daob âba ǃanuse ūhâ? Sa mîs ǃoab ga ǁîba taniseno.—Psa. 119:9.
ǂKhamkhoedo, ǀnî ǁaegu ai du ra tsâ. Jehovab di daoǁgaudi kaise a ǀādi? ǁNāti du nî ǂâisab ge ǁGâuaba ra ǂhâba. ǁÎb ge ra ǂhâba îdu ǂâi tsoatsoa ǁnān hîna ǂhaba daob ai hân ra dī xūn. Tsî ǃgâi ǁaeb hînan mûsen i ras ǃoagu ūhâba a ǃgâisa. Sadu ǀhōsan skoli ai ra dī xūnab ge a sîsenū ǁkhā. Tamas ka io internets ai du ra mûna a sîsenū ǁkhā. Î du tsâ ǃgâi ǁaeba du ra ǂoaǃnâ khami. ǁGâuab ge ra ǂhâba î du ǂâi tsoatsoa. Jehovab di daoǁgaudi ra ǁkhae du sa î du ǃgâi ǁaeba tā ūhâ. Xawe ǂâihō re nē-e: ǁGâuab ge ǂgao tama hâ, în ǁnān hîna ǁîb daob ai hâna ǂan. Nē daob mapa ra ī-ū nî ǃkhaisa. (Mat. 7:13, 14) Xawe Jehovab ge ra ǂhâba î du ǂan. Matikō ǁkhoaxa ǁaeba du nî ūhâsa. Ûib di daob ai du ga hâ ǀgara o.—Psa. 37:29; Jes. 35:5, 6; 65:21-23. w21.12 23 ¶6-7
Donertaxtsēs, Aprili 27
Mâ-i hoa-e ǁî-i ǃgâsa-e ǂgaoba xu ǀûba.—Mat. 18:35.
ǂAn da ge a ǀûba da nî sa. Tsî ǁnā i ge ǂhanu xū-i hîna da a dī ǁkha-e. Xawe ǁnāsa dīs ge a ǃgom ǁkhā. Apostel Petrub tsîn ge ǀnî ǁaega ǁnā di gere tsâ. (Mat. 18:21, 22) Tae-e a hui ǁkhā? ǂGurose ǂâiǃgâ re matikōseb Jehovaba ǀûba du hâsa. (Mat. 18:32, 33) ǁÎb xa ǀûbahesa da ge anu tama hâ. Xaweb ge māsenxase sida ra ǀûba. (Psa. 103:8-10) ǁKhā ǁaeb ai, ‘da ge sada ona surude hâ, ǀnamgu da nîsa’. ǀÛbas ge dī da nî xū-i ǀgui. Sida ǃgâsana da ge ǀûbasa surude hâ. (1Jhn. 4:11) ǀGamǁîse ǂâiǃgâ re tae-i nî īsa ǀûba du ga o. Tsûtsû da hâ khoe-e da ge a hui ǁkhā. O da ge ǀhaohâba ra ǀgaiǀgai. Tsî da ge Jehovab ǀkha da ūhâ ǀhōsagusisa ra ǁkhauba. Tsî da ge ǃgomsina sida di ǃhōde xū ra ūǁnā. Tsî ǁnās ǀkha khoakhoahe hâse ra tsâ. (2Kor. 2:7; Kol. 3:14) ǀAms ai da ge ǁnāb hîna sida ra mîbaba, î da ǀûbaba ǃoa nî ǀgore. Tā ǁGâuaba mā-am re îb sadu ūhâ ǃgâi ǀhōsagusisa. Sadu ǃGâsan ǀkha ǀgora. (Efe. 4:26, 27) Jehovab di huiba da ge ǂhâhâ. Î da ǂkhîba ǀhaohâb ǃnâ ūhâ. w21.06 22 ¶11; 23 ¶14
Fraitaxtsēs, Aprili 28
Sats ge Israeli ǂama nî gao. —1Sam. 23:17.
Davib ge ǁîb di ûiba gere ǃkhoeba. Sauli hîna a Israelǁaes di ǀgaisa gao-aob ge, amabes ǃnâ gere ǃgambi ǂgao. Davib ge ǂû-e ǂhâhâ io, ob ge ǃās Nos tawa ge sī. Tsîb ge ǃgâi ǀgaub ǃnâ koro perega ge ǂgan. (1Sam. 21:1, 3) Ega gu ge ǁîb khoegu tsî ǁîb tsîna. ǃHommi tamas ka io ǀkhomab ǃnâ ge sâusen. (1Sam. 22:1) Tae-i ǃaromab ge Daviba nēti i mâsib ǃnâ hâ i? Sauli ge Daviba kaise gere suri. ǁÎb di ǂanǂansasib tsî toro dandi ǃaroma. Sauli ge ge ǂan i, ǁîb ǁnâuǀnamoǃnâsib ge ǃaromasa. Îb Jehovaba Israels di gaose tā ūǃoa bi. Jehovab ge Daviba gao-aose ǁhûisa. (1Sam. 23:16, 17) Israelǁaes di gao-aob a hînab ge Saula. ǂGui toro ǃkham-aogu tsî mâxōǀkhā-aon tsîna ge ūhâ i. Tsî ǁnās xa ǃaromahe hâseb ge, Daviba ǁîb ûib ǃaroma ge ǃkhoe. Saula ge ǂâi hâ i Elobab nî mâǃoa hōsa, Daviba gao-aose mâis ǃnâ? (Jes. 55:11) Elobmîs ge mî tama hâ. Xawe da ge ǀgui xū-e a ǂgom ǁkhā: Sauli ge aitsama nē ǁkhōǁkhōsa mâsib ǃnâ a mâisen ǃkhaisa. ǁNān hîna Eloba ra mâǃoan ge hoaǁae a ǂoaǃnâ. w22.01 2 ¶1-2
Satertaxtsēs, Aprili 29
Nikodemub . . . ge tsuxuba ǁîb tawa ge hā.—Jhn. 3:1, 2.
Jesub ge ǃgarise aoǁnâ sîsen-i ǃnâ gere sîsen. Jesub ge khoena ge ǁgau, ǁîb khoena a ǀnamsa. Aiǃgû tsîb ge mâ ǃēs hoas, hînab gere hōs tawa gere ǁkhāǁkhā nî o. (Luk. 19:47, 48) Tae-e ge ǁgaribi îb ǁnāsa dī? ǀNî ǁaegu ain ge ǂguina, Jesub gere ǁkhāǁkhā xūna gere ǁnâu ǂgao. Tsî i ge ǁîb tsî ǁîb ǁkhāǁkhāsebegu tsîna ‘ǂûs ǁaeb tsîna ge ūhâ ǁoa i.’ (Mrk. 3:20) Tsî ǀgui khoeb ge ǃui ǁaeb ai. Jesub ǀkha gere ǃhoa ǂgao o. Ob ge māsenxase ǁnāsa ge dī. ǂGuin hîna ge Jesuba gere ǃgân ge ǁkhāǁkhāsabe kai tama ge hâ i. Xawe ǁnān hoan hîna gere ǃgân, ge ǃgâi aoǁnâsa gere hō. Nētsē da ge hoa khoena ǃēsa ra mā ǂgao. În ǃgâiǂhôas xa ǁnâu. (ǃNǃkh. 10:42) Nēsa sīǃnâs ǃaroma da ge, aoǁnâ sîsenne da ra dī ǀgauba nî ǀkharaǀkhara. ǀApeǁguib hîna sida ǃaroma a ǃgâib ai ǀgui sîsens xa da ge. Sida ǀapeǁguiba māsenxase nî dawa. Î da aoǁnâ ǁkhā khoena da a ǀhao-ū ǁkhā ǁaegu ai. Tsî da ga ǁnāsa dī o. O da ge ǂgomǃgâ ǁkhā, Jehovab nî ǂkhî ǃkhaisa. w22.01 17 ¶13-14
Sontaxtsēs, Aprili 30
khoeb nau khoeba ra gaoǂam.—Aoǁn. 8:9.
ǂGuin ge nētsē ǃgoma ra tsâ. ǀGapi ǃharode ūhâ khoena ǂgomǃgâsa. Tamas ka io ǀgapi sîsenga ūhâ khoena ǂgomǃgâsa. ǁÎn ge mû hâ ǂhanub ǃnāsase. ǃKhūhân tsî ǀgaisa khoena ra ǁkhauba ǃkhaisa. Xawe ǀgâsana huiba mā tama hâ ǃkhaisa. Tsî ǁnās ǀkhas tsîna ǀnî ǂgomdi. ǂGaeǂgui-aogu ge ǃgâi tama xūna ra dī. Nēs ge ge ǃaroma în ǀnî khoena. Elob ǃnâ ǂgomǃgâsiba ūhâ tama i. ǁNā-amaga i ga khoe-e mîǁgui o. Î-i Elobmîsa sida ǀkha ǁkhāǁkhāsen. O da ge ǃgomsiba ra hōǃâ ǁî-e huisa. Î-i ǁî-i ǂgomǃgâsiba Jehovab ǃnâ omkhâi. Tsî ǁÎb di ǃhūbaisi ǂnûǁkhaeba-aogu ais tsîna ǂgomǃgâ. Ama as ge Elobmîsa ra ǁkhāǁkhāsen khoen ǀguin. Jehovab tsî ǁîb ǀapeǂhomîs ǃnâ ǂgomǃgâsa ǁkhāǁkhāsen tidesa. Nēsi da ga Jehovaba ǂgomǂgomsase ǂgui kuriga ǃoaba. Xawe da ge tātsē tā ǂgomsa nî ǂoaǃnâ. Jehovab di ǀgaub hoaǁae a ǃgâi ǃkhaisa. ǀNî ǁaegu ai i ge xū-e nî ī. Hîna sida ǂgomǃgâsiba Jehovab ǃnâ nî ǃâitsâ-e. w22.02 2 ¶1-2