Desemberi

Nē Etopiaǁîba aiǂhomisa-i ge i ǁāǁnâhes ǃaroma? ǂÂiǃgâ re: Etopiaǁî-aob ge “ǀgoreǀîb nîse Jerusalems ǁga ge ǃgû hâ i.” (ǃNǃkh. 8:27) ǁÎb ge ǀnîsi ge Jodeǁî tama hâ i xawe ge Jodeǁîn ǂgomsa a ūǃoaba. ǁNā-amagab ge Jehovab xa Hebre Xoade xu gere ǁkhāǁkhāsen. Noxobab ge māsenxase ǃnāsase gere ǁkhāǁkhāsen ǂgao. ǁÎb ge Kēbo-aob Jesajab di xoade xub ra khomai hîna ge ǀhao-ūhe. (ǃNǃkh. 8:28) ǁÎb ge ǃnāsase gere ǁkhāǁkhāsen ǂgao. Etopiaǁîba mati gere ǁgau, ǃnāsaseb ra ǁkhāǁkhāsen ǂgaosa? Nē Etopiaǁîb ge ǁaeba gere ǁamaǂui Jehovaba ǃoabas ǃaroma. ǁNā-amagab ge ǁîba Etopiaba xu Jerusalemsa ǃoa gere ī, îb Jehovaba sī ǃoaba tempeli ǃnâ. Etopiaǁîb ge ǂhâǂhâsa amaba Filipuba xu ge ǁkhāǁkhāsen, Jesub a Mesia ǃkhaisa ǃkhōǂgā hâse. (ǃNǃkh. 8:​34, 35) Jehovab tsî ǁîb ǀGôab tsînab ūba hâ ǀnammi ge ge ǀgai. ǁÎb ge ge ǂkhâǃnâhe îb ǂhâǂhâsa mîǁguiba dītsî Jesub Xristub di saosabeb ase ǁāǁnâhe. Filipub ge mû o, nē aob a ǂhanusa ǁāǁnâhes ǃaroma ob sī ge ǁāǁnâ bi. w23.03 8-9 ¶3-6

Jehovaba da ge a ǂkhîǂkhî ǁoa, ǂhumibagu da ga o. (ǂKhm. 6:​16, 17) ǂGui khoen ge ǂhumis xa a ǃgâibahe nētsē. Xawe sida ge ǁnāsa dī tama hâ, Jehovaba i ǃgâiba tama hâ amaga. (Psa. 15:​1, 2) ǂGōsen da ge nî ǂkhari amab ǀguiba ǃhoasa xu, în tā ǀnî khoena ǃgâi tamase ǁnâuǃā da. ǀHoeba xu da ge nî ǂgōsen. (ǂKhm. 25:23; 2Tes. 3:11) Mû da ga o, ǃgâi ǁgamǀhaos ǀhoeb ǃnâ ra dawasa, o omkhâi ra xūn xa ǃhoa re. Nē da ûi ǃnâ hâ ǃhūbaib ǃnâ i ge ǁgai ǃhoa ǀgauba hoaǁae ra sîsenūhe. Xawe da ge sida nî dītsâ Jehovaba ra ǂkhîǂkhî ǃhoa ǀgauba sîsenūsa. Jehovab ge nî ǀkhae da, aoǁnâ sîsenni, ǀhaodi tsî tsēs hoasa da ra dī ǁgamǀhaodi ǃnâs tsîna. Jehovab ga nē ǁgai ǃhūbaiba ǀams ai dīkākā, o i ge kaise nî supu Jehovaba sida nams ǀkha koasa.—Jud. 15. w22.04 9 ¶18-20

ǂÂi da ga o, Jehovab tsî Jesub matikōse a ǀnam dasa. O da ge ra ǂkhâǃnâhe î da ǁîkha tsîna ǀnam. (1Jhn. 4:10) ǁÎkha da ge ǃnāsase ra ǀnam, mûǂan da ga o Jesub ge sida ǃaroma ǀō-aisase a ǁōsa. Apostel Paulub ge nēsa ge ǂanǃgâ tsîb ge ǁîb di ǃgôaǃgâsiba ge ǁgau. Galateǁîn ǃoab ge xoa o, mî rase: “Elob Ôab . . . ǁnāb tita ǀnam tsî ge ǁîb di ûiba ǁguiba teba.” (Gal. 2:20) Xoremarib ai ǃgaoǃgaohe hâseb ge Jehovaba, sado ǁîb ǃoa ge ǂgae, î du ǁîb ǀhōsa kai. (Jhn. 6:44) Nēsa sadu di ǂgaoba tsâǀkhā tama hâ, ǂansa Jehovab ge sadu ǃnâ ǃgâi xū-e a mûsa? Tsîb ge kaise a mataresa î du sado ǁîb di ǀhōsa kai? Nēsa sado ǀnammi Jehovab tsî Jesub tsîna du ūba hâba ǀgaiǀgai tama hâ? Dîsen da ge nî, ‘Nē ǀnamma tae-e ra ǁgarite dīsa?’ Jehovab tsî Jesub tsîna da ūba hâ ǀnammi ge ra ǁgarida, î da nauna ǀnamma ǁgau.—2Kor. 5:​14, 15; 6:​1, 2. w23.01 28 ¶6-7

Elobmîs ge kaise a ǂhâǂhâsa ǃâ hîna Jehovab ǃoaba-aona ra huisa în ǁîba “ǀguiǃnâxase ǃoaba.” Jehovab ge xoadi ǃâga ge xoa kai î-i ǃgamǃgamsenxa khomai-aon xa ǀgui ǁnâuǃāhe ǁkhā. (Luk 10:21) Hoa khoen ge Elobmîsa ra khomai. Xawe ǃgamǃgamsenxa khoen ǀguin ge ǁîsa ǁnâuǃā tsî khomain ra xūna a sîsenǂui ǁkhā.(2Kor. 3:​15, 16) Jehovab di gā-aisiba da ge Elobmîs ǃnâ ra ǁkhāǁkhāsen. Jehovab ge Xoade sîsenū tama hâ, îb groeps ǃnâ ǀguiba ǁkhāǁkhāda. Xaweb ge ǁîba mâ khoe-i hoa-e daoǁgau tsî ra ǁkhaeǂgao. Jehovab mîsa da ga khomai, o da ge ra hōǃâ ǁîb mâ khoe-i hoa-i ǀkha ǁae hâsa. (Jes. 30:21) Matiko ǃnāde du xoasa khomai tsî ǂâi tama hâ i, nēs ge tida ǃaroma ǀgui xoahe hâ? Xawe Elobmîs ge ge xoahe îs ǂgui khoen xa ǁnâuǃāhe ǁkhā. Elobmîs ge amase sadu ǂhâsib ǃoagu hâ xūna ǃkhōǂgā hâ. Nēs ge amase Elobmîs Xoa-aob a gā-ai amaga ǀgui a īǁkhā.—2 Tim. 3:​16, 17. w23.02 4-5 ¶8-10

Ama Xristeǁîn ase da ge Jehovaba kaise a ǀnam. Jehovaba da ge ǁkhā da a-i, hoa-e ra mā ǂgao. Gagasi mîǁguiga da ge nî dī. Aiǁgause da ge Xristeǁî ǀgauga nî omkhâi, ǀasa ǂansa nî ǁkhāǁkhāsensî ǀgauna nî ôa nauna huisa. Tae-i ǃaroma da gagasise ra aiǃgû ǂgao? ǂGurose, da ge sida ǀnamxaǃnâ ǀhomsi ǁGûba ra ǂkhîǂkhî ǂgao. Jehovab ge ra ǂkhî mûb ga o, sida ǁkhāsiga da ǁîba ǀoasase ǃaobas ǃnâ ra sîsenū o. ǁNā-amaga da ge gagasise nî aiǃgû î da ǃnāsase sîda di ǃgâsana hui ǁkhā. (1Tes. 4:​9, 10) Matikō gaxuse da ga amab ǃnâ ga ra hâ. Xawe da ge hoada gagasise nî ǀgaiǀgaisen. w22.04 22 ¶1-2

Nē ǃhūbaib ǂhanugu ge Babilons kais, ama tama ǂgomdi ǂnûǁkhaeba-aosa ǀgūǁae nî ǁnāǂam. Nēs ge nî kai ǁgâiǀāb di tsoatsoa i. Nēs xa ǃaromahe hâsen, ǂguina Jehovaba nî ǃoaba tsoatsoa? Hî-i. ǂHaiǂhais 6ǁî danaǃâs ge ra ǁgau nē ǁaeb ǃnân, Jehovaba ǃoaba tama khoena politik ǃnandi tsî ǂhanuga xu ǁkhaubasa nî ôasa. Nēs ge ǃhomgu ǀkha ra ǀgopeǀnōhe. ǁNā khoen Elob Gaosiba ǂkhâǃnâ tama hâ amagab ge Jehovaba, ǁîna mâǃoa-aon ase nî mû. (Luk. 11:23; J.ǂHa. 6:​15-17) Jehovab ǂgomǂgomsa ǃoaba-aon ge, kai ǁgâiǀāb ǃnâ nau khoena xu nî mâǂoa. ǁÎn ǀguin ge Jehovaba ra ǃoaba khoen ase nî ǃgau. Tsî “ǀgurub” tamas ka io nē ǃhūbaib ǂhanuga ǂkhâǃnâ tide.—J.ǂHa. 13:​14-17. w22.05 16-17 ¶8-9

“ǃGâiǂhôas Elob Gaosib” dis ǀguisan ge Elob ǃoaba-aona aoǁnâ tama hâ. (Mat. 24:14) ǁÎn ge ǀhomǃgāgu di sîsenni tsîna nî ǂkhâǃnâ. ǂHaiǂhais 8ǁî danaǃâsa xu 10ǁî danaǃâdi ǃnâ i ra ǃhoaǃgaohe khami. Nē ǀhomǃgāgu ge ǃkharagagu ǃgomsin hînan, Elob Gaosiba ūǃoa tama khoena nî hōǃân xa ra ǃhoa. Xawen ge Jehovab di ǃoaba-aona ǀgoraǃgâs di haisi-amsa aoǁnâ hâ. Hîna “ǃnareb tsî ǀaes” ǀkha ra ǀgopeǀnōhesa. Tsî ra ǁguiǃāsa Elob di ǀgoraǃgâsa ǁGâuab di ǁgai ǃhūbaib ǃoagu. (J.ǂHa. 8:​7, 13) Khoen nî ǂans ge ǀams go ǀkhīsa, în ǁnās ǃaroma ǂgui ǀkharaǀkharana ǁîn di ûigu ǃnâ dī. Tsî Jehovab di ǁaib di tsēsa ûiǃkharu ǁkhā. (Sef. 2:​2, 3) Xawe nē haisi-ams ge ge ǂanǂansa tama hâ i. ǁKhoaǂgaosiba da ge nî ūhâ, î da nē haisi-amsa ǂhôa ǁkhā. Kai ǁgâiǀāb di ǁaeb ǃnâ nî hâ, ǀuniga ǀgoraǃgâs di haisi-ams ge ǂgui khoena nî ǁaixa kai.—J.ǂHa. 16:21. w22.05 7 ¶18-19

Kō re, ǁgû kai ra Xristeǁîra di aiǁgausa. ǃKharu goro kurin ǃnâ ra ge ǀgôana kaikais xa hâ ǃhoade ge ǁnâu. Xawe i ge nēsi ǁnā ǃhoadi ǃnâ ge hâ i ǀapemāde ǁîra ǂhâǂhâsaba. Nēsi ra ge ǁîra nî kaikai ǀgôa-e ūhâ, nēs ge kai ǃereamsa. ǁNā-amaga i ge xūn ga sida ûib ǃnâ dawa, o ǀnî xoade kaise ra ǂhâǂhâsaba da. Nēs ge ǀgui ǃaromas Jehovab ǃoaba-aon xoade ra khomaisa. Israelǁî gao-aogu ge mîbahe hâ i khami, î gu ǂâiǃgâ ǁîgu ‘ûitsēdi hoade.’ (Deu. 17:19) ǁGûdo kaise kai aiǂhanuba du ge Xristeǁî-i ase ūhâ, sadu ǀgôana Jehovab xa ǁkhāǁkhāsa. Xawe du ge ǃnāsa-e ra dī ǂgao, ǁîna Elob xa hâ amaba ǁkhāǁkhāsa. Sadu ǀgôana du ge ra hui ǂgao în ǁîba ǀnam. w22.05 26 ¶2-3

ǂÂu tama i ge hâ tsūdī da go xū-i xa ǁgaise ǀgui tsâsa, xū-i tsîna da ge nî dī nēs xa. ǀNî xū-i hînab Jehovaba ǀûbab nîs aiǃâ ǂâis ǃnâ ra ūhâ i ge ǃhobasensa. ǃHobasens ge ‘dawasen’ ti ra ǂâibasen. ǁNās ge ra ǂâibasen khoe-i, dī i goro ǁgai xūna xū tsî Jehovab ra ǂgao khami ra ûisa. (Jes. 55:7) ǁNā khoe-i ge ǁî-i ra ǂâi ǀgauba nî dawa, î-i Jehovab ǂâiǀgaub xa daoǁgauhe. (Rom. 12:2; Efe. 4:23) ǁÎ-i ge nî dītsâ î-i ǀnai i ge ūhâ-i, ǃgâi tama ǂâiǀgaub tsî dīgu tsîna ǁnāxu. (Kol. 3:​7-9) Jehovab ge Xristub di ǁguibas ǃnâ-ū a ǀûba da ǁkhā. Tsî sida ǁorena a ǃanuǃanu ǁkhā. Jehovab ge nē ǁguibas ǃnâ-ū nî ǀûba da. Mûb ga o dītsâ da rasa, dī da ge ǁgai xūna xu hâbesa.—1Jhn. 1:7. w22.06 6 ¶16-17

Khoen ge ǃgâi tama ǁkhōǁkhōsa ǀgaub ǃnâ ra ûi-ūgu. (Aoǁn. 8:9) Aiǁgausen ge khoena ǁîn di ǀgaiba ǃgâi tama ǀgaub ǃnâ ra sîsenū. ǂKhabadī-aon ge ǁgai xūna ra dī. ǁOrexa ǀgôan ge ǁîn skol ǀhōsana mîǁgaiǁgai tsî ra ǃaoǃao. Tsî ǀnîn ge ǁîn omaris khoena ǁgai ǀgaub ǃnâ ra hâ-ū. ǁNā-amaga i ge buruxa tama hâ khoena ǃaogusa. ǁGâuaba mati nē ǃaoba khoen ǃoagu ra sîsenū? ǁGâuab ge ra dītsâ î da khoena ǃao tsî aoǁnâ ǀû. Tamas ka io Jehovab ra ǂgaoǀkhā da xūna dī tama i. ǁGâuab di ǂgaeǂguis ǃnāga gu ge ǂhanuga, sida sîsen-e ǂkhā tsî ra mâǃoa. (Luk. 21:12) ǁGâuab ǃhūbaib ǃnân ge ǂgui khoena ǂhanu tama ǂhôan tsî ama tama xūna Jehovab ǃoaba-aon xa ra ǃhoa. Khoen hîna nē ǂhumiba ra ǂgoman ge ǃkhāǃkhā da tsî ǂnau da ǁkhā. (Mat. 10:36) ǁGâuab di ǀgauga ra buru kai da? Hî-î, tātsē. ǁÎb ge ǁnā ǀgauga ǃkharuge ǁaeb ǃnâ gere sîsenū.—ǃNǃkh. 5:​27, 28, 40. w22.06 16 ¶10-11

Hamna “ǂgui” khoen hîna ǂhanu-ai daob ai nî ǂgaeǂguihen ǁaegu nî hâ? ǁNān ge khâisa ge hōn tsî Armagedonsa nî ûiǃkharun tsîna ǃkhōǂgā hâ. Tsî ǀnîsi ǀgôaron hîna ǀasa ǃhūbaib ǃnâ nî ǃnaehen. 1 000 Kurigu khaoǃgân ge ǁnān ǃhūbaib ai ǁan hâna ǀoasa kurusa nî ūhâ. ǂÂis ǃnâ da ge nî ūhâ, ǀoasa kurusa ūhâs ge ǂâibasen tama hâ, khoe-i ǀamo ûiba xū-e dī tamase nî hōsa. Adammi tsî Eva hâra xa ǂâi re. ǁÎra ge ǀoasa kurusa ūhâ i xawe i ge ge ǂhâǂhâsa i, ǁnâuǀnamxasiba ra Jehova Elob ǃoagu nî ǁgausa, ǀamo ûiba ra nî māhes aiǃâ. Xawe i ge ge tsûaǂgaoxa i, ǁîra ge Jehovaba ǁnâuǀnam tama ge i. (Rom. 5:12) Hoan ge ǀoasa kurusa 1 000 kurigu di ǀams ai nî ūhâ. Xawe ǀoasa kurusa ūhân hoana, Jehovab ǂgaeǂguisa ǀamose nî ǂkhâǃnâ? Tamas ka io ǀnîna Adammi tsî Eva hâra khami nî ī, ǀoasa kurusa ra ūhâ hîna ge ǁnâuǀnam tama hâ i ra? ǂHâbasa i ge a nē dîdi nî ǃereamhesa. w22.09 22-23 ¶12-14

Nētsē du ǃhūbaib ǃnâ ra mû ǃgomsina a ǃgomba du, ǃgâi mûǂuiba ūhâs ǃaroma? Omaridi ge ǂguros khami ǀnamgu tama. Khoen ge ǂkhabaxa tsî ǃnāsase ǁîn xa ǀgui ra ǂâi. ǂGuin ge ǃgombahe ǂgaeǂgui ra khoen ǃnâ ǂgomǃgâsiba ūhâs xa. Xawe nē xūn ge ǂgomǃgâsiba a mā du ǁkhā xūn nî ǃgâi ǃkhaisa. Tae-i ǃaroma? Khoen “ǀuni tsēdi” ǃnâ Elobmîs kēbodi ǃnâ i ra mî-e khami, ra tanisen amaga. (2Tim. 3:​1-5) Nē kēbos di dīǀoaǀoas ge mûǃāxase ra ǁgau. Jesu Xristub ge Elob Gaosib di Gaob ase, a ǂgaeǂgui tsoatsoasa. Xawe nēs ge ǂgui kēbodi di ǀguis hîna Elob Gaosib xa hâsa. w22.07 2 ¶1-2

Koronas ǁaeb ǃnâs tsîna da ge, ǃgāsa doaǁgaude ge hō, mati da sida ǀhaode a ūhâ ǁkhāsa. Tsî aoǁnâ sîsenni ǃnâs tsîna a ǁhao ǁkhā ǀgausa. ǃHaese da ge ǀhaohâb ǀhaodi, ǂharis ǀhaodi sî ǀkharib kai ǀhaodi tsîna, internets ǃnâ-ū ge ūhâ tsoatsoa. Tsî da ge ǁnās ǀkhas tsîna sîǂkhinidi tsî telefongu ǃnâ-ū ge aoǁnâ tsoatsoa. Jehovab ge sida ǁgūtsâde ǀkhae hâ. ǂGui ǁnaub berodi ge, kai ǃgôab aoǁnâ-aon dib hâsa ge ǃnuri. Tsî ǁnās ǀkhas tsînan ge ǂguina, ǂkhâǃnâ ra xūna ǁnā ǁaeb ǃnâ ge hō. ǂGuin ge gere tsâ ǀapeǂhumis ge ǀgaisase gere ǁkhaubasa, Koronas ǁaeb ǃnâ. Xawe da ge ge mûǂan, māhe gere daoǁgaudi ge gā-ai i ǃkhaisa. Jesub ǀnamxaǃnâ ǀgaub ǃnâ, ǁîb khoena ra ǂgaeǂui ǀgaub xa da ga ǂâiǃgâ. O da ge ǂgomǃgâsiba nî ūhâ tae-i ǀgui i ga hānîǁaeb ǃnâ ī xaweb Jehovab tsî ǁîb di ǀGôab tsîna sida ǀkha nî hâ ǃkhaisa.—Heb. 13:​5, 6 w22.07 13 ¶15-16

Jehovaba koasa mās ǂamai da ge ǁîba nî gangan, buruxa xūn hînab mā da hân ǃaroma. Aiǁgause da ge nî ganganbi îsa kleuran hîna da blomdi ǃnâ ra mûn xa. Tsî ǁkhoaxa ǂû-i tsî ǃgâiǁaeb ǀgū ǀhōsan ǀkha da a ūhâ ǁkhāb ǃaromas tsîna. Sida di ǀnamxaǃnâ ǁGûb ge nēn tsî ǃnāsan tsîna ra mā da, î da ǂkhîba ūhâ. (Psa. 104:​12-15, 24) ǂHâǂhâsase da ge Jehovaba ra gangan daoǁgaudi hînab ra mā dan ǃaroma, î da sida di ǂgomsa ǀgaiǀgai ǁkhā. Tsî buruxa ǃâubasens hîna da ūhâs ǃaroma. Jehovab ge dība da xūn ǃaroma gangansa māsa, da ge a ǀuru ǁkhā. Tae-e a hui du ǁkhā î du ǁnāsa ǂâihō? ǃKharagagu xūn hîna du ǀgores ǃnâ a ǂgan ǁkhāna, du ge a xoamâi ǁkhā. Tsî du ge ǁaeba xu ǁaeb ǀkha a kō ǁkhā, matib ge Jehovaba sadu ǀgorede a ǃereamsa. ǁNāpaxu ǀgore, î ǁîba huib ǃaroma gangan.—Kol. 3:15 w22.07 22 ¶8-9

ǂAn da ge a ǂâu tama i hâsa, amab xa ǀgui ǁkhāǁkhāsensa. ǃGâiba nēsa xu hōs ǃaroma da ge amaba nî ûiǂui, ǁnās ge sida ûigu ǃnâ sîsenūsa. Tsî ǁnā ǁaeb ai ǀgui i ge amaba ǂkhîba a māda ǁkhā. (Jak. 1:25) Mati da nî ǁgau amaba da ra ûiǂuisa? ǀGui ǃgâsab ge ra mî, î da ǂanǂui mâpa da ǃgâise ra dīsa. Tsî mâpa da noxoba ǃnāsase a dī ǁkhā ǃkhaisa. Apostel Paulub ge nēti ge mî: “A da ǀnai ta ge ǃkhōǃoan ǃoa ǀgui ûi re.” (Fil. 3:16) ǂÂi re ǃgâib hîna da ra hōba ‘amab ǃnâ da ga ǃgû ǀgara o.’ Sida ûib ǀguiba da ge ǃgâiǃgâi ǂgao tama hâ. Xawe da ge ǃgâiaǂgaoba Jehovab tsî sada ǃgâsan tsîna ra mā. (ǂKhm. 27:11; 3Jhn. 4) ǃGâi ǃaroma-e da ūhâ amaba ǀnam tsî ûiǂuisa? w22.08 18-19 ¶16-18

ǀHaohâb ǃûi-aoga mati a ǁgau ǁkhā, Jehovab tsî Jesub tsîna gu a ǀnam ǃkhaisa? ǀGui ǂhâǂhâsa ǀgaub ge, gūn di ǂhâsiba kōǃgâs ǃnâ-ū. (1 Pet. 5:​1, 2) Jesub ge apostel Petruba ǁnāsa ge ǃgāsa kaiba. Jesubab ge ǀūxū toas khaoǃgâb ge Petruba ǀnîsi ǀgaisa turaba ge ūhâ i, ǁgausa ǁîb Jesuba a ǀnamsa. ǁÎb di khâis khaoǃgâb ge Jesuba Petruba ge dî: “Simon, Johaneb ôatse, ǀnam tets a?” ǂGomǃgâ da ge ra Petrub ga xū-i hoa-e dī hâsa îb ǁîb di ǀhonkhoeba mîba ǀnambib asa. Jesub ge Petruba ge mîba: ‘O, ti gūna ǂûmâ re.’ (Jhn. 21:​15-17) Tsî ǁnāpaxūb ge Petruba ǁîb di ûib hoab ǃnâ, ǃKhūb di gūrona gere kōǃgâ, ǁgaurase ǁîb ge Jesuba ǀnam isa. ǀHaohâb ǃûi-aogo mati go Jesub ge Petruba a mîba mîde a ǁgau ǁkhā? ǁNāsa go ge a dī ǁkhā, ǁaeba go ga ǁamaǂui o î go gūna sī ǂkhâǃnâ. Tsî amab ǃnâ ǃkhai hâ ǃgâsana hui, în Jehovaba ǃoa oaǀkhī.—Ese. 34:​11, 12. w23.01 29 ¶10-11

Nau khoen sadu ra hōǃâ ǃgomsina, ǁnâuǃā tide ti hâ ǂâiǀgauba xu ǂgōsen re. ǁNāti ī ǂâi ǀgaub ge nî ǃaroma î du ǂâi, ǀgaiba du ūhâ tama hâsa ǃgâi tama turaga ǃkhamǃoasa. Elobmîs ge ǀnî hâ xū-e ra mî: “Nē ǃâitsâs ǀkhab ge ǁkhāti mâǃkharus di ǀgaiba nî mā du tsî ǁnāti huiba nî mā.” ǁNās ǀkha i ga ǃgâi tama turaga kaise a ǀgaisa, o da ge ǁnās ǃnâ a mâǀgai ǁkhā. Jehovab ge nî hui da, î da nēs ǃnâ tā māǁnâsen. ǂÂis ǃnâ ūhâ re: ǀOasa kurusa da ūhâ tama amaga, da ge ǃgâi tama turaga ūhâ ǁkhā. Xawen ga khâi, o da ge ǁîna ǃkhaese a mâǃoa ǁkhā. Josefi ge Potifari tarasa xu a ǃkhoebē khami. (Gen. 39:12) ǃGâi tama turagu ǃnâ māǁnâsens ge ǂhâbasa tama hâ. w23.01 12-13 ¶16-17

Elobmîs ge ra ǁgau Jehovab a ǂhanu-aisa. (Deu. 32:4) ǂHanu-aisib tsî ǀgorasa ūhâ tama is tsîn ge ǀguiba ra sîsenǀhao. Tsîb ge Jehovaba ǀgora-e ūhâ tama hâ. (ǃNǃkh. 10:​34, 35) ǁÎb ǀgorasa ūhâ tama hâsa da ge ǃamkuse ra mû, Elobmîs ge khoen ge ǁnā ǁaeb ai gere ǁnâuǃā gowab ǃnâ xoahe hâ i amaga. Jehovab ge ge mîmâi, ǀuniga tsēdi ǃnâs Elobmîs ǃnâ ra hō-e “ǂansa nî ǀarosen.” Hîna ǂguin xa nî ǁnâuǃāhesa. (Dan. 12:4) ǀGui ǀgaub hînan ǂguina nē amaba ra ǁnâuǃās ge Elobmîs tsî Elobmîs ai ǃgaoǃgaosa ǂkhinin ǂnûiǃkhunihe, ǁgâihe tsî ra māǂuihe amaga. Jehovab di ǃoaba-aon ge Elobmîsa ǀoasase tamas ka io ǃkharese ǂnûiǃkhuni hâ, nēs ge 240 xa a ǃnāsa gowagu ǃnâ. Tsîn ge nēsa marioǃnâse ra māǂui. Tsî nēs di ǀamǂoas ge ge ǃaroma în hoa khoena, ǃhūbaib ǂhawase ǀams nî hās aiǃâ ‘ǃgâiǂhôas Gaosib disa’ ǁnâu. (Mat. 24:14) ǂHanu-aisib di Elob aseb ge Jehovaba mâ khoe-i hoa-e ǃēsa ra mā, î-i ǁîb mîsa khomai tsî ǁîb xa ǂan. Nēsab ge hoadab a ǀnam ǃkhais ǃaroma ra dī. w23.02 5 11-12

ǂHanu-aisiba du a ǀnam? ǂAn da ge a sadu tsîn ǂhanu-aisiba ǀnamsa. Xawe da ge sada hoada ǀoasa kurusa ūhâ tama hâ. Tsî da ga ǂanbasen tama io, o i ge ǃhūbaib ǂhanu-aisiba ra mû ǀgauba a tsâǀkhā da ǁkhā. (Jes. 5:20) ǂHanu-ai khoe-i xa da ga ǀnîsi ǂâi, o da ge khoe-i hîna ǀgapiǂâixa. Tsî naun ǀkha ǁae tama i hîna ǁî-i a ǃgâi di ra ǂâisen i xa ra ǃhoa. Xawe Elob ge ǁnā ǀgaugu xa ǃgâibahe tama hâ. Jesub ge ǃhūbaib ai hâ iob ge ǀgaisase ǂgomdi ǂgaeǂgui-aogu. Hîna ge ǁîb di tsēdi ǃnâ hâ î ga gere ǁnama. ǁÎgu ge ǂhanu-aisib ǁîgu diba aitsama a ǂnûiǂgā ǃkhais ǃaroma. (Aoǁn. 7:16; Luk. 16:15) Ama ǂhanu-aisib ge ǁî-aitsama ǂhanu-aisib khami ī tama hâ. ǂHanu-aisib ge kaise ǃgâi ǀgauba. Mî da ga, o i ge ra ǂâibasen Jehovab ǃgâi a di ra mî xū-e dīsa. Elobmîs ǃnâ i ge “ǂhanu-aisib” ǃaroma ra sîsenūhe mîsa, ǂhanu ǀgaub ai ûisa ǃoa ra ǁnaeǁgau. Jehovab di ǁgaragu ǃoagu. w22.08 27 ¶3-5

Jesub ge ǁîb di ǁkhāǁkhāsabega ge ǂgomǃgâ hâ i, dīsā gu gere xawe. (Jhn. 15:16) Jakobub tsî Johaneb tsîkha ge Jesuba ǀō-aisa ǃkhai-e Gaosib ǃnâ a ǂgan, ob ge Jesuba ǁîkha Jehovaba kha ra ǃoaba ǃaromasa ge dî tama hâ i. Tamas ka io apostelsisa xu ge ūǁnâ kha tama hâ i. (Mrk. 10:​35-40) ǁAe-i khaoǃgâ, ǃkhō-eb ge ǃuis ai gu ge Jesub di ǁkhāǁkhāsabegu hoaga ǁnāxubi tsî ge ǃkhoebē. (Mat. 26:56) Xaweb ge Jesuba ǁîgu ǃnâ ǂgomsa ge ǀû tama hâ i. ǁÎb ge ǁîgu ǀoasa kurusa ūhâ tamasa ge ǂan i tsî ǁîga ‘ǀunis kōse ge ǀnam i.’ (Jhn. 13:1) ǁÎb di khâis khaoǃgâb ge Jesuba ǁîb di 11 ǂgomǂgomsa apostelga, ǂhâǂhâsa ǁgaumâisa ge mā, ǁkhāǁkhāsabedī sîsenni ǃnâ. Tsî ǁîb di ǀō-aisa gūna kōǃgâsa. (Mat. 28:​19, 20; Jhn. 21:​15-17) ǁÎb ge ǃgâi ǃaromasa ge ūhâ i, nē ǀoasa kurusa ūhâ tama khoega ǂgomǃgâsa. Hoagu ge ǂgomǂgomsase ge ǃoaba ǁōgu nîs kōse. Jesub ge ǃgâi aiǁgausa ge ǁgau, ǀoasa kurusa ūhâ tama khoena ǂgomǃgâsa. w22.09 6 ¶12

Jehovab ǀnam dasa da ga ǂgomǃgâ o. Tsîb sida ǀkhāb ai hâsa, o da ge ǁGâuaba ǃao tide. Aiǁgauseb ge Psalmdi 118ǁî danaǃâs di xoa-aob tsîna, ǃgomsina gere hōǃâ. ǁÎb ge ǂgui khākhoena ge ūhâ i, ǀgapiǃgôahesa khoen tsîna ǃkhōǂgā hâse. (9 tsî 10ǁî ǁāraǃā ra) ǁAeb ǃnâb ge ǀgaisa ǁgâiba gere hōǃâ. (13ǁî ǁāraǃās) Tsîb ge ǀgaisa ǁnamasa Jehovaba xu ge hō. (18ǁî ǁāraǃās) Xaweb ge Psalms di xoa-aoba ge ǁnae: ‘Tita ge ǃao tide.’ ǁÎb ge ge ǂan i Jehovab ge ǀgaisa ǁnamasa mābi xaweb ǁîb ǀhomsi ǁGûba kaise ǀnambi ǃkhaisa. Psalmdi xoa-aob ge gere ǂgomǃgâ mati ǀguib ga mâsiba īxaweb ǁîb di ǀnamxaǃnâ Eloba, hoaǁae nî huibi ǃkhaisa. (Psa. 118:29) Jehovab a ǀnam dasa da ge nî ǂgom, nēs ge nî hui da î da ǃnona ǂanǂansa ǃaoga dan ǁkhā: (1) Omarisa kōǃgâ ǁoas di ǃaob; (2) khoena ǃaos tsî (3) ǁōba ǃaos. w22.06 15 ¶3-4

Jehovaba ǃoabasa da ge ǂgurose sada ûib ǃnâ nî ūhâ. Sada Kuru-aob aseb ge Jehovaba ǀoasase anu hâ, sada xa ǃoabahesa. (J.ǂHa. 4:11; 14:​6, 7) ǁNā-amaga sida ûib ǃnâ nî ǂhâǂhâsa xū-i ge Jehovaba, ǁîb ra ǃoabahe ǂgao ǀgaub ǃnâ ǃoabasa. ǁNās ge “gagab tsî amab” ǃnâ. (Jhn. 4:​23, 24) Sida ǃoabas Elob gagab xa nî daoǁgauhesa da ge ǂhâba hâ. Î-î ǀguiǃnâxa ǁîb mîs ǃnâ ra hō-e amab ǀkha. Sada ǃoabas ge ǂguro nî ǀkhī, sada sîsenni ǃnorasase mā-amhe tama, tamas ka io ǂkhāsa ǃhūb ǃnâ da ga ǁan xawe. Nēsi î ge 100 xa ǃnāsa ǃgâsana tronkes ǃnâ ǂnôa, Jehovaban ra ǃoaba amaga. ǁNāti i ga i xawen ge ǃgâiaǂgao rase dī ǁkhān a-i hoa-e ra dī în ǀgore, Elobmîsa ǁkhāǁkhāsen tsî nauna sida Elob tsî ǁîb Gaosib xa ǁgamba. Mîǁgaiǁgaihe tamas ka io da ga ǃgôaǃgonhe, o da ge a ǃgâiaǂgao ǁkhā. Jehovab sada ǀkha hâsa da a ǂan amaga. Tsîb ǁîba nî mādawa-am dasa.—1Pet. 4:14. w22.10 9 ¶13

ǂkhoamîdi ǂkhanis ǃnâ i ra ǂoaxa khami, Jehovab ge mâǁae-i hoa-i ai nî sîsen ǀapemādi ǀkha ra ǂkhâǃnâ da. Sîsenū da ga o, sida di ûiba nî ǃgâiǃgâide. Hā re î da ǀgam aiǁgaudi gā-aisib di ǁnamas dide ǃoa kō. ǂGurose, ū da hân ǀkha da ge nî ǂâu. ǂKhoamîdi 23:​4, 5 ge saora ǀapemāsa ra mā da: “Tā ǃkhūsib ǃaroma dītoasen . . . ǃKhūsib ge hāb ra khami ǃhaese ra ǃkharu; ǁîb ge ǁnātimîsi ǁgapokha hō tsî kai anis khami ǂoab ǃnâ ra ǁkhanabē.” Xawe ǂgui khoen ǃkhū hân tsî ǀgâsan ge mari-i xa ra ǂâiǂhansen. ǁNās ǀkhan ge hoaǁae ǁîn a ǂansa ǀgaub, ǀhōsagusis tsî ǁîn ǂurusib tsîna ra tsûtsû xūna ra dī. (ǂKhm. 28:20; 1Tim. 6:​9, 10) ǀGamǁîse, ǃhoa du nîs aiǃâ ǂâi re. ǂAnbasen tama da ga io, o da ge sida ra mî mîdi ǀkha khoe-e a tsûtsû ǁkhā. ǂKhoamîdi 12:18 ge ra ǀapemā: “ǂÂiǃgâ tamase ra ǃhoa khoe-i mîdi ge ǀā gôab khami ra ǃkhāǃganu, xawe gā-ai khoe-i nams ge ra ǂuruǂuru.” ǂKhîba ūhâ ǀgaras ǃaroma da ge ǀhoeb tsî nau khoen xa ǃgâi tamase ǃhoasa xu nî ǂgōsen.—ǂKhm. 20:19. w22.10 21 ¶14; 22 ¶16-17

Esegieli aoǁnâb nî kēbosa ǀoasase nî ǁnâuǃās ge ge ǂhâbasa i. ǁÎb nē haisi-amsa nî ǂgoms ge ge ī, îb ǁîs xa ǂkhâǃnâhe tsî aoǁnâ. ǁNāpaxū i ge buruxa xū-e ge ī. Esegieli ge ge ǂanǂui nē ǂkhanis ge ‘dani-i khami ǂkhon isa.’ (Ese. 3:3) Tae-i ǃaroma? Esegieli xa i ge Jehovaba ǂnûǁkhaebas di ǃgôasiba, ǂkhon. Tamas ka io ǃgâi xū-i hînab gere hōǃâ i khami ge ī-i. (Psa. 19:​8-11) ǁÎb ge ge ganganxa i, Jehovab ge ǁîba a mā-am o, îb ǁîb kēbo-aose ǃoaba. Egab ge Jehovaba Esegiela ge mîba: “Ti mîdi tita ga satsa mîbadi hoade, sa ǂgaob ǃnâ ū, îts sa ǂgaera ǀkha ǃgâ.” (Ese. 3:10) Nē mîmādi ǀkhab ge Jehovaba Esegiela ge mîba, îb nē ǂkhanis ǃnâ ge xoasa ī mîde ǁîb ǂâis ǃnâ sâu tsî ǂâiǃgâ. Esegieli ge ǁnāsa a dī, o i ge ǁîb ǂgomsa ge ǀgai tsoatsoa. Tsî i ge ǁîb tsîna ǀgaisa haisi-ams khoenab nî aoǁnâbasa ge mā. (Ese. 3:11) Esegieli ge Jehovab di haisi-amsa ǀoasase ǁnāuǃātsî a ǂgom ob ge ge ǂhumisa i, aoǁnâ tsoatsoa tsî aiǃgû ǀgarasa. ǁÎb di ǁgaumâisab nî dīǀoaǀoas kōse. w22.11 6 ¶12-14

Jehovab ǀapeǂhumis ǃnâ ra dīhe ǀkharaǀkharan ga sadu ǂgomǃnâsiba ǃâitsâ, o du tae-e nî dī? ǀApeǂhumis ra dī xūna ǀoasa ǂkhâǃnâ re. Israelǁîn gere doe ǁaeb hoaba gu ge Kohatǁîga ǃgaeǀhaos ǂgaesa, hoa khoen aisǀkhāb ai gere tani. (Num. 3:​29, 31; 10:33; Jos. 3:​2-4) Kai aiǂhanub ge ge i xawen ge xūna ǁîgu ǃaroma ge dawa. Israelǁaes ge mîmâisa ǃhūb ǃnâ sī a ǁan, o i ge Tabernakela hoaǁae doe-ūsa ge ǂhâbasa tama hâ i. Tsî gu ge Kohatǁîga ǀnî hâ ǁgaumâide ge māhe. (1Kro. 6:​31-33; 26:​1, 24) Xū-i hîna ra ǁgau i ge a ǀkhai, Kohatǁîgu ge gere ǃgae tamas ka io ǀkhara ǁgaumâi-e ǂhâbasa ǁîgu di ǀumis ǃaroma. Tae-e da ra ǁkhāǁkhāsen? ǀOasa ǂgaob ǀkha da ge Jehovab ǀapeǂhumis ra dī ǀkharaǀkharana nî ǂkhâǃnâ, sa ǁgaumâis tsîna ǃkhōǂgā hâse. ǂKhîba ūhâ re mâ ǁgaumâis hînats ra māhes hoas ǃnâ. ǂÂis ǃnâ ūhâ re, sa ǁgaumâis ge khoets asets a hamsa ǁgau tama. Xawe Jehovab ge sa ǁnâuǀnamxasiba sa ǁgaumâis xa ǃnāsase ra ǃgôaǃgâ. w22.11 23 ¶10-11

Onesiforub ge Pauluba ôa tsî hōbib ge o, dītsâ tsî ǂhâb ge hâ i xūna ge mā. ǁNāsa dīs ǃnâ-ūb ge Onesiforuba ǁîb di ûiba ǁkhōǁkhōsa mâsib ǃnâ gere mâi. Tae-e da nēsa xu ra ǁkhāǁkhāsen? Tā da ge nî mā-am î-i khoena ǃaosa sida ǃao kai tamas ka io ǁkhae da, sida ǃgâsan hîna ra ǃgôaǃgonhena ǂkhâǃnâsa. Xawe a da ǁkhā da a i hoa-e dītsâ tsî ǁîna hui. (ǂKhm. 17:17) ǁÎn ge sida ǀnammi tsî ǂkhâǃnâs tsîna ǂhâhâ. Kō re matin sida ǃgâsan hîna Russiab ǃnâ hâna ǁîn di ǀnamǀnamsa ǃgâsan hîna ǃkhōsis ǃnâ ǂnôana ra hui ǀgausa. ǀNîn ga ǁnâuǃgâhe on ge ǂgui ǃgâsana ǁnâuǃgâ ǃkhaib dawa ra sī, în ǁîna sī ǂkhâǃnâ. Tae-e da nēsa xu ra ǁkhāǁkhāsen? ǂGaeǂguira ǃgâsagu ga mîǁgaiǁgaihe, ǃkhōhe tamas ka io ǃgôaǃgonhe, o du ge tā nî ǃao. ǀGoreba gu tsî ǁîgu omaris ǁanina kōǃgâ. Tsî ǀnî hâ ǀgauga ôa re dīgu ǃnâ du sadu di ǂkhâǃnâsa nî ǁgauga.—ǃNǃkh. 12:5; 2Kor. 1:​10, 11. w22.11 17 ¶11-12

ǃGâsana Elobmîsa xu ǂkhâǃnâs ge ǀhaohâb ǃûi-aogu di sîsenni ǃâ. (1Pet. 5:2) Tsūkēǃgâb ǃnâ gu ge ǀhaohâb ǃûi-aoga ǂgurose nî kō, hoa ǃgâsan ǂûn, saran tsî hâ ǃkhais tsîna ūhâsa. Tsî ǂgui ǁkhâgu ga ǃkharu xawen ge Elobmîsa xū ǂkhâǃnâsa ǂhâhâ. (Jhn. 21:15) “ǁAeba i ge ra ū ǂgausa” tib ge Harolda ra mî, ǁNâub komites ǃnâ ra ǃoababa tsî ge ǂgui ǃgâsan hîna ge tsūkēǃgâba a hōǃân ǀkha a ǀhaoba. “ǁÎn ge ǀnîsi ǃgâise a tsâ ǁkhā. Xawe ǁîn ge ǂoaǃnâ ǀnamsaben di ǂâidi, ūn ge hâ i xūn tamas ka ion ge mati ǁkhōǁkhōsa mâsiba a ǃkharu ǃnâs ge ǁîn ǂâidi ǃnâ a aiǃgû ǁkhā. Nēti ī ǂâidi ge tsûba ǁkhawa a ǃaroma ǁkhā. Nēs ge ǂâibasen tama hâ ǁîn ǂgomsa ūhâ tamasa. Xawe i ge khoesis ǀguisa ī ǁnāti tsâsa.” ǀHaohâb ǃûi-aogu ge ǀapemās “ā ran ǀkha ā re” ti hâsa ǂhâǂhâsa xū-i ase ra ū.—Rom. 12:15 w22.12 22 ¶1; 24-25 ¶10-11

Jehovab ge ǁîb di ǃanu gagaba ra māda, î da ǂhanu xū-e dī. Elobmîsa da ga ǁkhāǁkhāsen, o da ge Elob di gagaba ra mā-am îb ǂgaeǂguida. Tsî ǀhaode da ga hâǃnâ, o da ge ǃanu gagab tsîna ra hō. ǁNā ǀhaodi tawas tsîna da ge ǃgâsan hîna sida khami ǃgâi xūna ra dītsân ǀkha ra hâ ǀhao, ǁnās ge kaise ǂkhâǃnâxa. (Heb. 10:​24, 25; 13:7) Jehovaba ǃoa ǀgore tsî da ga ǀkhoma o, îb hui da sida ǂkhabusasigu ǀkha. Ob ge sida ǀgaiǀgais ǃaroma ǁîb ǃanu gagaba nî māda, î da ǃkhams ǀkha aiǃgû. Nē xūn hoana dīs ge ǃgâi tama turaga ūbē tidexawe nî hui da, î da tā ǁîna sîsenǂui. Jehovab ǀkha ǃgâi ǀhōsagusisa ūhâs ǀkha ra hui da, xūna da ga dī tsoatsoa. O i ge a ǂhâǂhâsa ǁnā gagasi xūna da nî dī ǀgarasa. Nēs ǃgâi turaga omkhâis ǀkha ra hui amaga. w23.01 11 ¶13-14

Elobmîs ge sida ǂurusib tamas ka io tae-e da nî ǂûs xa mîba da tama hâ. Xawe î ge Jehovab di ǂâi ǀgauba nē xūn ai ra ǁgauda. Aiǁgause, ǁîb ge ra ǀapemāda, “tā i xū-i xare-e tsû kai du” hîna sida sorode a ǁgaiǁgai ǁkhā-e. (Aoǁn. 11:10) Kaise ǂûs tsî ǀhoros hîna ûiba ǁkhōǁkhōsa mâsib ǃnâ a mâi ǁkhā ra ge, Elobmîs ǃnâ ra ǂkhāhe. (ǂKhm. 23:20) Jehovab ge ra ǃâubasen î da ǃkhō-oasen matikōse da ra ǂûs tsî ās xa i ga hâ o. (1Kor. 9:25) Mîǁguiga da ge a dī ǁkhā hîna ra ǁgauga Elob ǀkhaeb ûib diba da ra ǃgôaǃgâsa, sida di ǂâiǀgauga ǃgâise sîsenūs ǃnâ-ū. (Psa. 119:​99, 100; ǂKhm. 2:11) Aiǁgause da ge ǃgâi mîǁguiba nî di ǂû da ra xūn xa. ǂAn da ga o, ǀnî ǂûn ra ǀaesen kai dasa, o î ge sida ǂâis di ǁkhāsiba ra hui, î da ǁîna xu ǂgōsen. ǁGaus tsîna da ge ra dī gā-ai da asa ǂâusase ǁom, hoaǁae oefens tsî sida sorodi tsî omdi tsîna ǃanuse ūhâs ǃnâ-ū. w23.02 21 ¶6-7

Mati du gagasi xūna Elobmîsa xu hōǁkhā? Mû re 2 Timoteub 3:​16, 17 ra mî xū-e. Nēs ge ra ǁgau “hoaraga Xoas . . . ge a sîsenūhe ǁkhā” (1) ǁkhāǁkhās, (2) ǂgōǀaus, (3) ǀkharaǀkharas tsî (4) ǂhanu-aisiba dīs ǃaroma. ǁNā haka xūna xu du ge ǃgâiba a hō ǁkhā, hoaǁae du sîsenū tama hâ Elobmîs ǂkhanide khomaisa xus tsîna. Khomai du ra ǃnaeǃkhaide ôaǃnâ tsî kō re tae-e i Jehovab tsî ǁîb di ǂâibasens, tamas ka io Elobmîs tsoatsoadi xa ra ǁkhāǁkhāsa. Kō re, matis ǂgōǀausa ra huisa ǁāraǃāde ǃgaoǃgâs ǃnâ-ū, î du ǁgai ǁnaediga mûǃā tsî ǁîna xu ǂgōsen. Tamas ka io ǁgai ǂūba xū, î du Jehovab ǃoagu ǂgomǂgomsase hâ. Ôaǃnâ re, matis xoaǀgorasa a sîsenūhe ǁkhāsa xūna ǀkharaǀkharas ǃnâ tamas ka io ǂhanu tama ǂâi ǀgauba ǂhanu kaisa. Tsî ôa re xoadi hîna ǂhanu-aisiba dīs ǀkha a hui du ǁkhāte, î du Jehovab ǂâi ǀgauba ūhâ ǁkhā. Nē haka xūna du ga ǂâis ǃnâ ga ūhâ, o du ge ǀō-aisa gagasi xūna nî hō. Hîna a hui du ǁkhāna î du Elobmîs khomaisa xu ǃnāsa ǃgâiba hō. w23.02 11 ¶11

ǀNî hâ kēbos hîna Danieli ǂkhanis ǃnâ hâs ge ra mî. Jesub hûǁaegu ǀams ai ǂgaeǂgui tsoatsoasa. Jesub ge mâǁaeb ai a Gao-ao kaisa ǂansa īǁkhā-e? (Dan. 4:​10-17) “Hû kurigu” ge 2 520 kuriga ra ǂnûǁkhaeba. ǁNā kurib ge 607ǁî kuri ge tsoatsoa Jesub ǃnaes aiǃâ. Babilonǁîn ge ǀuniga gao-aoba a ūǁnâ o, Jehovab di tronsa xu Jerusalems ǃnâ. Tsî nēs ge 1914ǁî kurib ǃnâ ge ǀam, Jehovab ge Jesuba Gaob ase a ǁgaumâi o, “ǂhanuba” ūhâba Elob Gaosib ǃnâ. (Ese. 21:​25-27) Matis nē kēbosa sida ǃgâiba a ǀkhī-ūba ǁkhā? Hû kurigu xa hâ kēbosa da ga ǁnâuǃā, os ge ǁnāsa ǂgomǃgâsiba ra mā da, Jehovab ǁîb mîmâide ǂhanu ǁaeb ai ra dīǀoaǀoasa. Jehovab ge ge mîmâi Jesub ǂhanu ǁaeb ai nî Gao kai ǃkhaisa. Tsîb ge ǁnā ǁaeba a ǀkhī, ob ge Jehovaba ǁnāsa ge dī. ǁNā-amaga da ge a ǂan nau kēbodi hînab mîmâi hâdi tsînab, nî dīǀoaǀoa ǃkhaisa. Îo, Jehovab tsēs ge nî hā tsîs ge “ǃonkhao tide.”—Hab. 2:3. w22.07 3 ¶3-5