Novemberi

ǀUrixa gowaba sîsenūs ge Xristeǁî-i ûib ǃnâ ǃâ-e ūhâ tama. ǀNî ǃhoa ǀgaugu ge ǀurixase ǀō tama xawe da ge ǁnāti i ǃhoa ǀgauga xus tsîna nî ǂgōsen. Aiǁgause, da ge ǃgâi tamase ǀnî khoen ǃhaodi. Tsî ǀnî ǃhūgu khoena ǀgopeǀnō ǂgao tama hâ. Khoena ra tsûtsû mîde da ge sîsenū ǂgao tama hâ. Omkhâi ra xūna ǃhoa. ǃHaese koa re, mîǁgaiǁgais tsî ǃgaes xa. Israelǁaes ge ǂgui xūn ǃaroma ga ganganxa hâ. Xawen ge hoaǁae gere ǃgae. ǃGâsa-i ga ǃgaexa on ge nau ǃgâsan tsîna a ǃgae tsoatsoa ǁkhā. ǃGâi tama xū-i ge ǃkhē-aogu xa mîhe, os ge ǁnāsa ge ǃaroma îs ‘Israeli ôan hoana Moseb tsî Aronni tsîkha ǃoagu ǃgae.’ (Num. 13:31–14:4) Koagu da ga ra, o da ge hoa da a ǂkhî ǁkhā. ǀGauna ôa tsî ǃgâsana koa. w22.04 8 ¶16-17

Elobmîs ǁaeba xub ge Jehovaba ǂgui ǂkhamkhoena hui hâ ǁîb di ǀhō kaisa. Sadu ǀgôan tsînab ge a hui ǁkhā în gagasise kai, ǁnāb ga ǁîn tura o. (1Kor. 3:​6, 7) Sadu ǀgôan da ǂgae-oasen khami i ga ǁgausen. Xaweb ge Jehovaba ǀnamǀnamsase ǁîna nî kō. (Psa. 11:4) ǂKharirosen ga ‘ǃgâiǃgâibasensa ǁgau’ ob ge ǁîba ǀgūse nî hâ, ǁîb ǃomma ǀhōǂuis ǃaroma. (ǃNǃkh. 13:48; 2Kro. 16:9) ǁÎb ge a hui du ǁkhā î du ǂhanu xū-e ǂhanu ǁaeb ai mî. Sadu ǀgôan ǁnāxū-e ra ǁnâu ǂgao ǁaeb ai. (ǂKhm. 15:23) Tamas ka iob ge tsâbaǁhao ra ǃgâsa-e ǀhaohâb ǃnâ a sîsenū ǁkhā. Î-i ǀō-aisase ǃgâiǃgâibasensa sadu ǀgôa-i ǃnâ ǁgau. Kaikhâi toan hâs khaoǃgâs tsînab ge Jehovaba, sadu ǀgôan ǂgaogu ǃnâ ǁkhāǁkhā nî du ge xū-e a ǂoaxa ū ǁkhā. (Jhn. 14:26) Jehovaba du ge ǀkhaeb nî xū-e ra mā, aiǃgû tsî du ga ǀgôana sadu dīgu tsî mîdi ǃnâ-ū ǁkhāǁkhā o. w22.04 21 ¶18

ǁGâuab ge ǀhomma ǃoa a ī ǁoa ǁnā-amagab ge Elob di ǂkhauhesan hîna ǃhūbaib ai hâna ra ǁnāǂam. Nēn ge Elob Gaosiba ra ǂnûǁkhaeba. Tsîn ge ‘Jesu Xristub di ǃkhō-amsa’ ūhâ. (2Kor. 5:20; Efe. 6:​19, 20) 1918ǁÎ kurib ǃnâ i ge ǁkhaisa ǃgâsagu, ǀapeǂhumis ǃnâ ǂgaeǂguisa ra ū ga ǂhomi ǂgā-amhe tsî ǀhapixase ge hō-e. Tsî kaxuse tronkhes ǃnâ ge ǂnû. ǂKhauhesagu di sîsenan ge ǀûhe khami i ge gere mûsen. (J.ǂHa. 11:​3, 7-11) 1919ǁÎ kurib ǃnâ gu ge ǂKhauhesa ǃgâsaga tronkhesa xu ge ǂoa kaihe. Tsî i ge ǁhōga ge axuhe. Nē ǃgâsagu ge ǁkhawa aoǁnâs tsî ǁkhāǁkhās di sîsenni ǃnâ ge ǂgaeǂgui tsoatsoa. Xawe ǁGâuab ge ge ǀû tama hâ i, Elob di khoena ǁnāǂamsa. ǁNā ǁaeba xub ge ǁGâuaba Elob di khoena “ǃāb” khami gere ǁgâiǀā. (J.ǂHa. 12:15) Amase i ge mâ ǀguiǀguibe khoe-i hoa-e “taniǀnamxasib tsî ǂgoms” tsîna ǂhâhâ.—J.ǂHa. 13:10. w22.05 5-6 ¶14-16

Apostel Johaneb ge ǀgam groep ra hîna Jehovab ǂgaeǂguisa ǂkhâǃnâ tsî ǀamo ûib ǀkhaega ra hōna ra mû. ǂGuro groeps khoen ge 144 000. ǁÎn ge ǃhūbaiba xu ǁhûisa în ǂhanuba kuruǂui. Tsîn ge Jesub ǀkha ǀhomma xu ǃhūbaib ai nî ǂgaeǂgui. (J.ǂHa. 5:​9, 10; 14:​3, 4) Johaneb ge ǁîb di ǁhapos ǃnâ Jesub ǀkhan Sionǃhommi ai ǀhommi ǃnâ mâse ra mû nî. (J.ǂHa. 14:1) Apostelgu ǁaeba xu nēsis kōsen ge ǂgui khoena ra ǁhûihe, în 144 000 khoen di ǃâ kai. (Luk. 12:32; Rom. 8:17) Johaneb ge ra mîbahe ǂkhari ǃgôab di khoen ǀuni tsēdi ǃnâ ǃhūbaib ai nî ûitsâmasa. (J.ǂHa. 12:17) Kai ǁgâiǀāb ǁaeb ǃnân ge, nē ǂkhari ǃgôab di khoena ǀhomma ǃoa nî ī. Tsî ǀnai ge ǂgomǂgomsase a ǁō, 144 000 ǂkhauhesan ǀkha nî ǀhaoǀhaohe. ǁNāpan ge Jesub ǀkha Elob Gaosib ǃnâ nî ǂgaeǂgui.—Mat. 24:31; J.ǂHa. 5:​9, 10. w22.05 16 ¶4-5

Jesub ge ǁîb di saosabena ge mîba, în ǃgâi mûǂuiba ǁîn xa ūhâ. Jesub ge nēti ge mî: “Tsîn ge ǁkhāti danaǀûn sago din hoana ǃgôahe hâ.” (Mat. 10:30) ǁNā mîdi ge sida ra khoakhoa. ǃNāsase da ga ǃgâi tama ǂâiǀgauba sida xa ūhâ o. Nēs tsîn ge ra ǂâibasen sida di ǀhomsi ǁGûb sida ǃnâ ǃgâiǃgâibasensa ūhâsa. Tsî da kaise ǁîb di mûǁae a ǀō-aisa ǃkhaisa. Tātsē da ge Jehovab di ǀgoraǃgâsa dîǃnâ ǂgao tama hâ. Tsî mî ǂgao tama hâ, xū tama ǃoaba-ao da a ǃkhaisa. Tsî da anu tama hâsa ǀasa ǃhūbaib ǃnâ ûisa. Watchtower ǂkhanib ge 15 kurina ǃkharu tsî ge mî î da, ǀnōsa mûǂuiba sida xa ūhâ: “Tā da ge nau khoen xa da ǀgapi di nî ǂâi î da tā ǀgapiǂâixa. Xawes tsîna da ge tā nî ǃgôaǁnâsen, î da tā ǁgaise tsâ. ǂKhâǃnâs hîna hâs ge î da sida xa ǂhanu mûǂuiba ūhâ. Nēs ge ra ǂâibasen, î da sida ǂkhabusasigu tsî ǀgaigu tsîna ǁnâuǃā.” w22.05 24-25 ¶14-16

Mâ ǀguiǀguibe khoe-i hoa-e tae-e a dī ǁkhā, î-î ǀhaohâb di ǀguiǃnâxasiba ǂkhâǃnâ? ǂKhîb kuru-ao da ge nî. (Mat. 5:9; Rom. 12:18) Naun ǀkha da ǀhaohâb ǃnâ ǂkhîba ra ūhâ ǁaeb hoaba da ge îsasib gagasi paradais dib ai ra ǀaro. ǂÂis ǃnâ da ge nî ūhâ Jehovab ge mâ khoe-i hoa-i hîna gagasi paradais ǃnâ hâ-e, ǃanu ǃoabasa ǃoa a ǂgaesa. (Jhn. 6:44) Mûnanai re matikōseb Jehovaba a ǂkhîsa, mûb ga o, mati da ǃgarise sîsen tsî ǂkhîb tsî ǀguiǃnâxasib tsîna ra ǀgaiǀgaisa. ǁNān hîna ǁîba a ǀō-aisaban ǁaegu, ǁîb ǃoaba-aona. (Jes. 26:3; Hag. 2:7) Mati da ǀoasase ǃgâiba a hō ǁkhā, ǀkhaeb hîna da Elob ǃoaba-aose ra hōba xu? ǃGamse da ge a ǂâi ǁkhā Elobmîs ǃnâ da ra ǁkhāǁkhāsen xūn xa. ǁNāti i ǁkhāǁkhāsens tsî ǂâiǃgâs ge a huida ǁkhā, î da Xristeǁî ǀgauga sîsenū. Hîna ra ǂkhâǃnâ da ga î da ǁgau “ǃgâsaǀnamgub” tsî “nau-e ǃgôasiba ǁgausa” ǀhaohâb ǃnâ.—Rom. 12:10. w22.11 12-13 ¶16-18

Jehovab ge ǀûba dasa da ga ǂanǃgâ, o da ge “ǀasa gagasi ǀgaiba” ra hō. Tsî da ge ǂkhî tsî ǃanu ǃgâiǂâis tsîna ra ūhâ. ǁNāti ī ǀûbaba du ge khoena xu a hō ǁoa. Xawe ‘Jehovaba xu’ ǀgui a hō ǁkhā. (ǃNǃkh. 3:19) Jehovab ga ǀûbada o. O da ge ǁkhawa ra ǁîb di ǀhōsa kai. Tsî i ge ǁore tama da ge hâ-i khami nî tsâ. Jehovab ǀûba da hâs khaoǃgâb ge ǂgari-am da tamas ka io ǁkhara da tama hâ, ǁnā ǁoreb ǃaroma. (Jes. 43:25) “Aiǂoas huriǂoasa xu ǃnūs ǁkhās khamib” ge Jehovaba sida ǁorena ra ūbē. (Psa. 103:12) Jehovab ǀûbab ǃkhōǂgā hâ xūn xa da ga ǂâi, o da ge buru tsî ra gangan. (Psa. 130:4) Jehovab ga khoe-e ǀûba o, ob ge khoe-i ǁoreb go kai tamas ka io ǂkhariro īs ai kō tama hâ. Jehovab ge sida Kuru-aob, ǂHanub mā-ao tsî ǀGoraǃgâ-aob aseb ūhâ ǂansa ra sîsenū, khoe-eb ga ǀûba o. w22.06 5 ¶12-14

Jehovab ge ǁîba a ǀnaman hoana ǃgâi ǃâubasensa ge mā. ǀGūǁaeb ge ǁîba ǀaeb, ǃoab tsî ǁōb tsîna nî ūbe. (J.ǂHa. 21:​3, 4) ǁÎb ge ‘tsamtsiǃnâna’ nî hui hîna ǃhūbaiba paradais ǃnâ ǀkharaǀkharas ǃâubasensa ūhâna. (Psa. 37:​9-11) ǁÎb tsîn ge nî īǁkhā kai, î da hoada ǁîb ǀkha ǀgū ǀhōsagusisa ūhâ nēsis xa. Nēs ge amase ǀō-aisa ǃâubasensa. Tae-i ǂgomǃgâsiba da ūhâ, Elob ǁîb mîmâide nî dīǀoaǀoasa? Jehovab ge tātsē ǁîb mîmâisa ū-oa tama. ǁNās ǀkha da ge ǃgâi ǃaromasa ūhâ Jehovab ai ‘ǃâusa.’ (Ps. 27:14) Nēsa da a dī ǁkhā ǀgaub ge ǃnūǃnâxasib tsî ǃgâiaǂgaob ǀkha Elob ǁîb ǂâibasensa nî dīǀoaǀoas kōse ǃâusa. (Jes. 55:​10, 11) A da sida tsîna Jehovab ǃoa ai ǂgomǂgomsase hâ. ǂGomǃgâsiba ūhâse, ‘ǁnān ǁîba ra ôanab nî mādawa-am ǃkhaisa.’ w22.06 20 ¶1; 25 ¶18

ǂGomǃgâsiba da ge a ūhâ ǁkhā, omaris danab aseb Jehovaba 1 Timoteub 5:8 ǃnâ i xoasa tsoatsoasa ra saosa. Jehovab sida tsî sida omaride a ǀnamsa da ga ǂgomǃgâ o. O da ge a ǂgomǃgâ ǁkhā, ǂhâ da hâ xūna da nî ūhâsa. (Mat. 6:​31-33) Jehovab ge ra kōǃgâ da ǂgao, ǁîb ge a māxa. ǃHūbaibab ge a kuru, ob ge ǂhâ da hâ xūn xa ǃnāsase ge mā da. ǁÎb ge ǂgui xūna ge kuru, î da ǁîn ǃnâ ǃgâiaǂgaoba ūhâ. (Gen. 2:9) ǀNî ǁaegu ai da ga ǂhâ da hâ xūn ǀguina ūhâ, o da ge ǂâis ǃnâ nî ūhâ, ǂhâ da hâ xūna da ūhâsa, Jehovab ra mā amaga. (Mat. 6:11) ǂÂis ǃnâ da ge nî ūhâ, Jehovab nî mā da xūn a ǀō-aisa ǃkhaisa nēsi da ra ǂoaǃnâ xūn xa. Tsîb ge hānîǁaeb ǃnâs tsîna ǀamo ûiba nî māda.—Jes. 65:​21, 22. w22.06 15 ¶7-8

ǀAsase ǃgâiǃgâibasensa ūhâ khoen ǀguin ge Jehovab. Tsî Elobmîs xa ǃgamse ǁkhāǁkhāsen tide. Hoa da ge ǁnāsa nî dī. Paulub ge ge xoa, Elobmîs ǃnâ da ra ǁkhāǁkhāsen xūna da ga sîsen-ū. Os ǁnāsa nî hui dasa, î da “ǃgâin tsî tsūn ǁaegu” ǃkharagagusiba dī. Kaise i ge a ǃgom ǁkhā Jehovab di ǀgauga nēsi ǁnâuǀnamsa, ǂgui khoen ǃgâi tama xūna ra dī amaga. Xaweb ge Jesuba ra mûǂam, î da ǂhâ da hâ xūna ǁkhāǁkhāsen. Tsî ǁnās ǀkha sida ǂgomsa ǀgaisase ūhâ. Nē ǀapemāde da ge Elobmîsa xu ra hō. Jesub khami da ge sida tsîna, Elob di ǀonsa anus hâ koasa mā hâ. (Jhn. 17:​6, 26) Aiǁgause 1931ǁî kuri da ge xoadi ǃoagu hâ ǀons, Jehovab ǃoaba-aon, ti hâsa ge sîsen-ū tsoatsoa. Tsî da ge ǁnāsa dī, o da ge ge ǁgau, matikōses Elob di ǀonsa kaise ǂhâǂhâsa sa sida ǃaroma. Tsî da ǁnā ǀons ai ra ǂanhe ǂgaosa. (Jes. 43:​10-12). ǁNās ǂam-ais ge New World Translation of the Holy Scriptures sa, Elob di ǀonsa ǂhâbasa ǃkhaidi ai ǂgā-oa hâ. w22.07 11 ¶11-12

Elobmîs amab ge ǃgâiǂhôas, Elob gaosib dis tsîna ǃkhōǂgā hâ. Jesub ge Gaosib amaba sâusa ǁuib ǀkha gere ǀgopeǀnō. Mateub 13:44 ǃnâb ge Jesuba ra mî: “ǁKhātib ge Gaosib ǀHommi diba ǁuib, ǃhanab ǃnâ sâusab hîa khoeb xa hōhe tsî ra gaugauheb khami ī. ǁÎb ge kaise ǃgâiaǂgao tsî ǃgû tsî ūb hân hoana ǁamaxū tsî oa tsî ǁnā ǃhanaba ra ǁama.” ǃGaoǃgâ re, aob ge ǁuiba ge ôa tama hâ i. Xawe hōb ge, ob ge kai ǁguibana ge dī, îb ūhâ ǀgara. Ūb hâ xūn hoanab ge ge ǁamaxu. Tae-i ǃaroma? ǁÎb ge ge ǂan i matikōseb ge ǁnā ǁuiba ǂhâǂhâsa īsa. ǁGuibab ge xūn hoan xa-i ge ǁnā, ǁuiba ǃnāsase ge ǂhâǂhâsa i. ǂAn da ge a xū-i nē ǃhūbaib ǃnâ ǂkhîb hîna da Jehovaba ǃoabasa xu ra hōb, ǀkha a ǀgopeǀnōhe ǁoasa. ǁNās ge ǀamo ûiba, hānîǁaeb di ǃâubasensa Elob Gaosib di ǂgaeǂguis ǃnāga ūhâsa. Aiǂhanub hîna da ǀgūǀhōsagusisa Jehovab ǀkha ūhâs ge, dī da ge ǁguiba-i hoa-i ǂamai a kai. Sida kaise ra ǃgâiaǂgao kai i ge Jehovaba ǂkhîǂkhî tsî ǁîba “anu hâse” ûisa.—Kol. 1:10. w22.08 15 ¶8-9; 17 ¶12

Matib ge Josefa ǂan i ǁîb di Elob, ǀaiba “ǂkhaba xū-i” ase nî mûsa? Israelǁîn ge Moseb di ǂhanub hîna “ǃgamekhôats ge tide” ti ra mîba, 200 kurigu khaoǃgâ ǀgui ge hō. (Eks. 20:14) Xaweb ge Josefa Jehovaba ǃgâise ge ǂan i. Tsî ǁnās ǀkha gere tsâ Jehovba nē-e mā-am tamasa. Aiǁgauseb ge Josefa ge ǂan i, Jehovab ge ǃgameba, ǀgui-aob tsî ǀgui taras ǁaegu ǀgui a ǂnûiǂgāsa. Tsîb ge ǀnîsi ge ǁnâu, matib ge Jehovaba ǀgam ǃnāra ai ǁîb di aumas Sarasa ǁkhauba hâ īsa, îs ǂgomǂgomsase ǁîs di aob ǃoagu hâ. (Gen. 2:24; 12:​14-20; 20:​2-7) ǁNāti i xūn xab Josefa ra ǂâi hînab ge mâ i-a ǂhanus tsî mâ i Elob mûǁae ǂhanu tamas tsîna ge ǂan. Josefi ge ǁîb di Eloba ǀnam i amagab ge, Jehovab di ǂhanu-aisib di ǁgaragu tsîna ge ǀnam i. Tsîb ge ǁnās ǀkha ǁnā ǀgauga gere ǃkhōǀgara ǂgao. w22.08 26 ¶1-2

ǂGuro da ge gere ǁnâuǃā Danieli 12:2 ǀhommi khâis tamas ka io aoǁnâ sîsenni ge 1918 nî ǃnâ. Mâǃoa-aon xa gere ǀû kaihes, khaoǃgâ ge hâ i sîsen-e ǃoa gere ǁnaeǁgausa. Xawe da ge nēsi ra ǁnâuǃā, nē mîdi ǁō hân di khâis hîna ǀasa ǃhūbaib ǃnâ nî hâsa ǃoa ra ǁnaeǁgausa. Tae-i ǃaroma da ti ra mî? “Tsarab” ti hâ ǁgâiǂûisens ge Job 17:16 ǃnâs tsîna ra sîsenūhe. Tsî “ǀhowas” ti hâ mîs ǀkha ǀguiti ra ǂâibasen. Nē amab ge ra ǁgau Danieli 12:2 ama khâis hîna ǀuni tsēdi ǀams tsî Armagedons torob khaoǃgâ nî hâsa ǃoa ra ǁnaeǁgausa. Danieli 12:2 sa tae-e ra ǂâibasen mîs ga o, ǀnîn “ǀamo ûib” khâisa nî hō ti? Nēs ge ra ǂâibasen, khâisa hō tsîn Jehovab tsî Jesub tsîn xa ra ǂan tsoatsoa. Tamas ka io ǁîkha ǂans ǀkha aiǃgû tsî ra ǁnâuǀnaman duisend kurigu di ǁaeb ǃnâ, ǀamo ûiba nî ǃkhōǃoasa.—Jhn. 17:3. w22.09 21 ¶6-7

ǁNā ǃkhais ge ǂâibasen tama hâ Jehovab ra ǂhâbasa, î da ǁîna ǂgomǃgâ ǃgâi ǃaroma i-a ǀkhai hîna. Xaweb ge ra ǃâubasen î da ǁîna ǂgomǃgâ, ǂgomǃgâhe ǁkhān a ǃkhaisan ra ǁgau amaga. ǂGomǃgâsib ge ǃgôasib khami nî hō-e tsî nēs ge ǁaeba ra ū. Mati du ǂgomǃgâsiba sadu ǃgâsan ǃnâ omkhâi ǁkhā? ǁÎna ǃgâise ǂan tsî ǀhaohâb di ǀhaodi tawa ǁîn ǀkha ǃhoa re. ǀApe tsî ǁîn ǀkha aoǁnâ sîsenni ǃnâ ǀguiba sîsen. ǃNūǃnâxa tsî ǃēsa mā nî re în ǁgau, ǂgomǃgâhe ǁkhān a ǃkhaisa. ǂGurose du ge ǀnîsi nî mîǁgui, î du tā nēsi ǀgui du ra ǂan khoe-e hoa xūna mîba. Sadu ǀhōsagusis ra ǀgai khami du ge ǀnîsi nî tsâ, ǁîna harase sadu tsâsiga mîba. (Luk. 16:10) Xawe tae-e du nî dī, ǃgâsa i ga sadu ǂgomǃgâsiba ǃgâi tamase sîsenū o? Tā ǃhaese ǁnā ǀhōsagusisa ǀam kai re. Xawe ǁaeba mā re, nē xū-i ǃoagu. Tā ǀoro khoen xa ǂhapuǂâi kaihesa mā-am, î du sadu ǃgâsana ǂgomǃgâ tama i. w22.09 4 ¶7-8

Miqueas ti ǀon hâb ǀhaohâb ǃûi-aob di aiǁgausa kō re. ǂÂi-oab ge ra ǁaeb hînab ge ǀnî ǃgâsagu ǃereamsa tani hâ gu xa ǁgaise gere hâ ūhesa. ǁNān hoan ǃnâb ge Miqueasa ǁîb ǁnâuǃāxa ǂâisa ge ūhâ ǀgara tsî ǃgarise gere sîsen ǁîb tsâsiga ǃkhō-oasa. Hoaǁaeb ge ǀgore tsî Jehovaba ǁîb ǃanu gagab tsî ǀgaib tsîna gere ǂgan îb mâǀgai. Huib ǃaromab ge Elobmîs ai ǃgaoǃgaosa ǂkhanin tsîna gere ôaǃnâ. Tae-e da ra ǁkhāǁkhāsen? ǃGâsa-i xa du ǁgai ǀgaub ǃnâ ra hâ ūhe ti du ga tsâ, o ǃnomsase hâ tsî dītsâ re, ū du hâ ǁgai ǂâiǀgaugu hoaga xu ǃnorasa. ǀNîsi du ge a ǀū, mâ mâsigu go a ǃaromasa î-i khoe-e ǁnā ǀgaub ǃnâ ǃhoa tamas ka io tanisen. ǃGâsa-i xa du ǁgai ǀgaub ǃnâ ra hâ ūhe ti du ga tsâ, o Jehovab ǀkha ǀgores ǃnâ ǃhoa tsî ǂgan re, îb hui du î du mâsiga ǁîb ra mû ǀgaub ǃnâ mû. Sadu ǃgâsa-e kē ǃkharuba tsî ǁî-e a ǀûba. (ǂKhm. 19:11) ǂÂis ǃnâ ūhâ re Jehovab ge sadu mâsiba a ǂan tsîb ge ǂhâ du hâ ǀgaiba nî mā du î du mâǀgai.—Aoǁn. 5:8. w22.11 21 ¶5

Jehovaba a ǀnam ǀhōsana ǁhûi re. ǀHōsan hînats ra ǁhûin ge a huitsi ǁkhā, îts gagasise ǀgaisa Xristeǁî kai. (ǂKhm. 13:20) Julienni hîna nēsisa ǀhaohâb di ǃûi-aob ase ra ǃoabab ge ra mî: “ǂKham ta ge i, o ta ge ǃgâi ǀhōsana aoǁnâ-ū ta gere ǃgâsan ǁaegu ge hō. ǁNā ǀhōsan ge ge ǁkhoaǂgaoxa i tsî ge hui te î ta mû, aoǁnâ sîsenni a ǁkhoaxa ǁkhā ǀgausa. Mûǂans tsîna ta ge ge di, ǃgâi ǀhōsan tsîna ta gere ǂoaǃnâ ǃkhaisa. Tsî ǃaromas hîna ta ge ǃgâi ǀhōsana ūhâba tama hâ is ge, tita ǀkha ǀgui kurina ūhâ khoen ǀguina ta gere ôa amaga.” Tae-e du nî dī, ǀhaohâb ǃnâ hâ khoe-i ga Jehovab ǀkha du ūhâ ǀhōsagusisa ra ǁgaiǁgaisa du ga mûǂan o? Paulub ge ge ǂan i ǂguro ǁaeb di Xristeǁî ǀhaohâb ǃnâ ge hâ i, khoen ǀnîn ge gagasi mûǂuiba ūhâ tama hâ isa. ǁNā-amagab ge Timoteuba ge mîba, îb ǁîna xu hâbē. (2Tim. 2:​20-22) Sida ǀhōsagusis Jehovab ǀkha da ūhâs ge kaise a ǀō-aisa. Tātsē da ge mā-am ǂgao tama, î-i khoe-e sida ǀhōsagusis hîna da Jehovab ǀkha ūhâsa ǂkhabuǂkhabu hîna ge kurina a ūsa omkhâisa. w22.08 5-6 ¶13-15

Sida ge ǁnān hîna Elob di ǀapemāde, ǃhui hân khami ī ǂgao tama. Tsî da ge ra ǁkhāǁkhāsen Elob ra ǂâi ǀgauba ǀnamsa, ǁîb di ǂhanuga ǃkhōǂgā hâse. ǁNâuǀnamxasib tsî ǁnâuǀnamoǃnâsib xa ra ǃaromahe xūna da ge ra ǀgopeǀnō ǂgao. Nēsa da ga dī, ob ge sida ǀnamma nî ǀgai. ǃGaoǃgâ re khoen ra ǃkharuǃnâ ǃgomsina, ǁîn Jehovab gā-ai ǀapemāde ūǃoa ǂgao tama amaga. ǁNāpaxu ǂâi re matikōseb sadu ûiba a ǃgâisa, Eloba du ra ǁnâuǀnam amaga. (Psa. 32:​8, 10) Jehovab ge gā-aisiba hoa khoena ra mā xaweb ge ǁgari da tama ǁî-e ūǃoasa. Xaweb ge ra ǁguiǃā tae-i nî hāsa, khoen ga ǁîb gā-aisiba ūǃoa tama io. (ǂKhm. 1:​29-32) ǁÎn ge “ǁîn ǁoreb di ǂûba nî ǂû.” Ûin gere ǀgaub xa ǃaromahe hâsen ge tsûb tsî ǃgommi tsîna nî hōǃâ. Tsî ǀams aib ge Jehovaba nî hîkākā nî. Xawe ǁnān hîna Jehovab di gā-ai ǀapemāde ǃgâ tsî ra dīn ge ra mîmâibahe: “Tita ga ǃgân ge ǃnorasase nî ûi tsî ǂōǂōsi-i xare-e ǃao tide.”—ǂKhm. 1:33. w22.10 21 ¶11-13

Jehovaba ǃaos ge ra ǂâibasen, ǁîba da ge kaise ra ǃgôa. Tsî ǁîba nî ǂkhîoǃnâ kai xūna dīsa xu ra ǂgōsen. (ǂKhm. 16:6) ǁNā-amaga da ge ǁkhā da a-i hoa-e ra dī ǀgara, î da Jehovab di ǂhanuga sao, ǃgâib tsî tsūb digu hînab Elobmîs ǃnâ ra ǁguiǃāga. (2Kor. 7:1) ǃNāsa ǃgâiaǂgaoba da ge nî ūhâ. Jehovab a ǀnam xūna da ga dī tsî ǁîb ǃhui hâ xūna xu ga ra ǂgōsen o. (Psa. 37:27; 97:10; Rom. 12:9) Khoe-i ge ǀnîsi a ǂan ǁkhā Jehovab ǁkhāsiba ūhâsa tae-i a ǂhanu tsî tae-i a tsūsa mîsa. Xawe î ge ǁî-i tsîna, Elob ǂhanuga saosa nî ūǃoa. Sada di tanisens ǃnâ-ū da ge ra ǁgau, ama ǂgom da rasa Jehovab di ǂhanuga saos a ǃgâi ûiǀgausa. (ǂKhm. 12:28) Davib tsîn ge ǁnāti gere tsâ. Tsîb ge Jehovab xa ge mî: “Ti ûib di daob, ǃgâiǃgâisendi xa ǀoa hâb, sa aiǃâ hâbats ge nî ǂanǂan te tsî gu ge ǀnamǀnamsasigu âtsa ǀamose sa amǀkhāb ǃommi ǃnâ hâ.”—Psa. 16:11. w22.10 8 ¶9-10

Jesub ge ǀnōsa mûǂuiba ge ūhâ i. Tsî ǃgamǃgamsenxase gere tanisen. Jesub ǃhūbaiba ǃoa nî ǀkhīs aiǃâb ge kaise ǂgui ǃgâi xūna Jehovab ǃoabas ǃnâ gere dī. Jesub ǃnâ-ūn ge ‘xūn hoana ge kuruhe ǀhommi ǃnâ hân tsî ǃhūbaib ai hân hoana.’ (Kol. 1:16) ǁĀǁnâheb gere ǁaeb aib ge Jesuba ǁîb ǁGûb ǀkha ge hâ i. (Mat. 3:16; Jhn. 17:5) Xawe Jesub ge ge ǀgapiǂâixa tama hâ i, ǁnā xūn xab gere ǂâi ǁaeb ai. Tsîb ge ǁîba tātsē nau khoen xab ǀgapi khami ge tanisen tama hâ i. ǁÎb di ǁkhāǁkhāsabegab ge ge mîba, ǃhūbaiba ǃoab ge a ǀkhīsa, khoen xab ǃoabahe tidese. ‘Xaweb nî ǃoaba tsî ǁîb di ûiba māse ǂguin di oresa ǃoa.’ (Mat. 20:28) ǁÎb ge ge mî xū-eb aitsamaba xu a dī ǁoasa, kaiseb ge ǃgamǃgamsenxasiba ge ǁgau. Jesub ge ǃgâi aiǁgausa sida ge mâiba î da ǁîba sao. w22.05 24 ¶13

ǀÛbab nî aiǃâb Jehovab ǂâis ǃnâ ra ūhâ i ge ǁore-ao-e, ǂan-e dī i ra xū-i a tsūsa. Jesub ge nēsa ǃgāsase ge ǁgau Lukab 12:​47, 48 ǃnâ. Khoe-i ga ǂan i a hîna Jehovab ǂkhā hâ xūna ǀape tsî a dī o, i ge ǁî-e ǀgaisa ǁoreba go dī. Jehovab ge mîǁgui ǁkhā îb, ǁnā khoe-e tā ǀûba. (Mrk. 3:29; Jhn. 9:41) ǁNāti ī mâsib ǃnâ da ga hâ o, ǀûbahe ǁkhā î da a? Îo. Jehovab ge ǀnî hâ xū-i tsîna ǂâis ǃnâ ra ūhâ, ǁore-ao-i amabes ǃnâ ǃhausen hâsa. ǃHausen ra khoe-i ge “ǁî-i di ǂâiǀgaub tsî tanisen ǀgaub tsîna ra ǀkharaǀkhara.” ǁÎ-i ge dī i go ǁgai xū-i xa ǁgaise tsâ tsî ǃgamse ra tsâǀkhāhe. Tamas ka io ǂhanu xū-i hîna i ga dī hâ-e, i dī tama hâ ǃkhais ǃaroma. ǃHausen hâ khoe-i ge ǁî-i dīsā hâ, xū-i ǃaroma ǀgui ǁgaise tsâ tama. Xawe Jehovab ǀkha i ūhâ ǀhōsagusis ge ǂkhabu kais ǃaromas tsîna ǁgaise ra tsâ. ǁNās ge nē ǁoreba a ǃaroma amaga. w22.06 5-6 ¶15-17

Sada khākhoen ge ǂhôan tsî internets ǃnâ-ū, Jehovab ǀapeǂhumis ǃnâ ǃereamsa tani hâ ǃgâsagu xa ama tama xūna ra ǃhoa. (Psa. 31:13) ǀNî ǃgâsagu ge ǃkhō-oms ǃnâ ge ǂganamǂgāhe tsî ǂkhabadī-ao-i ase ge ǁkharahe. ǃKharu ge ǁaeb Xristeǁîn tsîn ge ǁkhā mâsiba ge hōǃâ, apostel Paulub ge ama tama xūn ai ǀhapiǂgā-amhe tsî ǃkhōhe o. Apostel Paulub ge Romes ǃnâ ǃkhō-oms ǃnâ ǂnôa i, on ge ǀnîna ǁîba ge ǂkhâǃnâ ǀû. (2Tim. 1:​8, 15, 2:​8, 9) Xawe mûnanai re matib ge Pauluba gere tsâsa. ǁÎb ge ǂgui ǃgomsigu ǃnâ ge mâǀgai tsî ǁîb ûib tsîna ǁîn ǃaroma ǁkhōǁkhōsa mâsib ǃnâ gere mâi. (ǃNǃkh. 20:​18-21; 2Kor. 1:8) A da tātsē tā ǁnān hîna ge apostel Pauluba ǁnāxu ǃgân khami ī. Tā da ge nî buru ǁGâuab ǃgōsase ǃereamsa ūhâ ǃgâsaga ra ǁnāǂamsa. ǁÎb ge ǂhâba hâ, î gu nē ǃgâsaga tā Jehovab ǃoagu ǂgomǂgomsa. Tsîb ge sida tsîna ra ǃaoǃao ǂgao. (1Pet. 5:8) Aiǃgû re, ǃgâsaga ǂkhâǃnâ tsî ǂgomǂgomsase ǁîn ǃoagu hâsa.—2Tim. 1:​16-18. w22.11 16-17 ¶8-11

ǃKhausen ge ǂkhābadī-aob Jesub xōǀkhā ge ǃgâuheb ge ǀnîsi ge Jodeǁî-i. Jodeǁîn ge ǀgui Eloba gere ǃoaba xawe nau ǁaedi khoen ge ǂgui elogu ǃnâ gere ǂgom. (Eks. 20:​2, 3; 1Kor. 8:​5, 6) ǁNā ǂkhabadī-aob ga Jodeǁî tama i hâ, ob ge ǀnîsi nētsēs xoas ǃnâ dîsa ga dî hâ, ‘elogats ǃao tama hâ?’ ti. Jesub ge nau ǁaedi khoena ǃoa ge sî-e tama hâ i. ‘Xawe Israeli di kā hâ guna ǃoa.’ (Mat. 15:24) Elob ge Israelǁîna ge mîba, ǁō hânab khâisa nî mā ti. Nē ǃhōbasen hâ ǂkhabadī-aob ge ǀnîsi nēs xa ge ǂan i. ǁÎb mîdi ge ra ǁgau, Jehovab Jesuba khâisa nî māsa îb Elob Gaosib ǃnâ sī ǂgaeǂgui. Nē khoeb ge ǀnîsi gere ǃâubasen, Elob xab khâisa nî māhesa. Jodeǁîb aseb ge tsūdī-aoba Adammi tsî Eva hâra xa ǀnîsi ge ǂan i. ǁNā-amagab ge nē tsūdī-aoba ǀnîsi ge mûǂan Jesub gere mî paradais, Lukab 23:43 ǃnâ hâb nî îxa ǃhanaba ǃhūbaib ai.—Gen. 2:15. w22.12 8-9 ¶2-3

Aoǁnâ sîsen-e da ge Jehovab gagab huib ǀkha ǀgui a dī ǁkhā. Tae-i ǃaroma? ǁGâuab ge sida ǃoagu toroba ra ǃkham, îb sida aoǁnâ sîsen-e mâ kai. (J.ǂHa. 12:17) ǂGui khoen ge ra ǂgom ǁGâuab kaise a ǀgaisasa tsî da ǁîba a ǃkham danǁoasa. Xawe sida aoǁnâ sîsenni ǃnâ-ū da ge ǁîba ra dan. (J.ǂHa. 12:​9-11) Mâ ǀgaub ǃnâ? Aoǁnâ da ga, o da ge ra ǁgau, ǁGâuab mâǃoadi xa da ǃaoǃoahe tamasa. Mâ ǃnās hoas hîna da ra aoǁnâs aib ge ǁGâuaba ra danhe. ǃGāsa i ge a Jehovab ǀgaiba ra mādasa, ǁîb di ǃanu gagab ǃnâ-ū. Tsî da Jehovab mā-amsa ūhâ ǃkhaisa. (Mat. 5:​10-12; 1Pet. 4:14) Elob gagab ge ǂhâ da hâ ǀgaiba a māda ǁkhā, î da mâ ǃgomsi-i hoa-i hîna da sida aoǁnâ sîsenni, ǃnâ ra hō-i hoa-e dan ǁkhā. (2Kor. 4:​7-9) O tae-e da a dī ǁkhā, î da Elob gagaba ūhâ ǀgara? ǀGore ǀgara ǁkhā da ge a ǂgomǃgâsib ǀkha, Jehovab sida ǀgorede nî ǁnâu-amsa. w22.11 5 ¶10-11

Sida ǃgâsana da ge ǀnamma ra ǁgau, ǃgarise da ga sîsen o, î da ǁîn ǀkha ǂkhîba ūhâ. Jehovab nau khoena ra ǀûba ǀgauba da ge ra ǁgae. Jehovab ge ǁîb di ǀGôaba māsenxase sida ǁoren ǃaroma a mā. O da sida ǃgâsana māsenxase ǁîn di ǁōren ǃaroma ǀûba tide? Sida ge ǁnā ǁgai ǃgāb Jesub di aiǁgaus ǃnâ ge hâ îb khami ī ǂgao tama hâ. ǁÎb ǀhōnkhoeb ge, ǁîb di ǂgui surudena ge ǀari. Xaweb ge nē ǃgāba ǁîb horesab ǂkhari surudeba ge ǀûba ǁoa i. (Mat. 18:​23-35) ǀHaohâb ǃnâ da ga khoe-i ǀkha ǁnâusāgu, o da ǂgurose ǂkhîba sī a dī ǁkhā Jesub di ǁōb ǂâiǂâisens aiǃâ? (Mat. 5:​23, 24) ǁNāsa da ga dī, o da ge Jehovab tsî Jesub tsîna da ūba hâ ǃgam ǀnamma ra ǁgau. w23.01 29 ¶8-9

ǀNî ǀgaub sida ǃgâsan xa da ǃnāsase a ǁkhāǁkhāsen ǁkhab ge, ǁîna tao kai tide dîde dîsa. (ǂKhm. 20:5) ǁÎna ǂâusa ǂûn, sōǀôan tsî ǂhân hâ xūn tsîna ūhâ? Īǁkhā-e ǁîn di sîsenni tamas ka io omsan nî ǂoaǃnâsa? ǂHanub ra mâ huib ǃaroma xoaǂgāsens ǀkhan huiba ǂhâ hâ? Jehovab ge ra ǂhâba î da hoada ǂkhâǃnâ tsî hui gu. (Gal. 6:10) ǀAesen hâ khoe-e da ge ǂkhari ǀgaub ǃnâs tsîna a hui ǁkhā. Nēs ge kaise ǁîna a ǂkhâǃnâ ǁkhā. ǃGâsa-e ǂkhâǃnâs ǃaroma i ge ǀgôaro-e karkirosa a dī ǁkhā. Tsî ǂkhaman ge ǃgâsasa xūna ǁamaba tamas ka io sī matarebas ǀkha a hui ǁkhā. ǀNîsis tsîna du ge ǀaesen hâ khoe-e a sâiba ǁkhā. ǀNî ǃgâsan ge gangans sîǂkhanirode ǀnî ǀhaohâb ǃûi-aoga sîba hâ. ǁÎgu ǀaeb khoraǂuisens ǁaeb ǃnâ ǃgâsana ǂgui xūna ra dība amaga. Kaise ǃgâi xū-i ge sida ǀkhāba hau tsî da ga ‘ǀgaiǀgaiǃnâgu tsî ǂhâkhâigu’ o.—1Tes. 5:11. w22.12 22 ¶2; 23 ¶5-6

Sadusegu ge Hebreǁîn di xoadi ǂguro koro ǂkhanide kaise ǃgâise ge ǂan i. Xawe gu ge ǁnā ǂkhanidi ǃnâ hâ ǂhâǂhâsa xūna ge ūǃoa tama hâ i. Aiǁgause, kō re Jesub ge mati Sadusegu ge ǁîba khâis xa a dî o, o a ǃeream ǀgauba. ǁÎb ge ge dîgu: “Xawe ǁō hân di khâis xa go kha ǁnâi khomai tama hâ Moseb di ǂkhanis ǃnâ, ǁnā xoaǃâs hîa khau ra ǁkhūhais ǂama ra ǃgûsa, mâtib ge Eloba ǁîba mîba? ‘Tita ge Abrahammi, Isaki tsî Jakob di Elota.’” (Mrk. 12:​18, 26) Sadusegu ge ǂgui ǃnāde ǁnā ǃnaeǃkhais xa ge khomai hâ i. Xawe Jesub dîs ge ge ǁgau ǁîgu ǂhâǂhâsa gagasi amaba ra kō ǃkharusa, ǁnās ge khâis di amaba. (Luk. 20:38) Sida tae-e ǁnāpaxu ra ǁkhāǁkhāsen? Supu xūn ǀguina da ge ǁnâuǃā ǂgao tama hâ. Xawe da ge îxa amab tsî daoǁgaudi tsîna ra mûǃā ǂgao. Khomai da ga, o da ge ǁāraǃās tamas ka io Elobmîs ǃnaeǃkhais ra ǁkhāǁkhāda xūna ra kō ǂgao. w23.02 11 ¶9-10

Nētsēs xoas ǃnâ hâ ǃoaba-aon hoan ge ǃgomsina gere hōǃâ ǁîn di ûigu ǃnâ. Xawen ge ǂgomǂgomsase Jehovab ǃoagu ge hâ. (Heb. 11:​36-40) ǁÎn di taniǀnamxasib tsî ǃgari sîsenni tsîna ǃgôaǃgâhe tama? ǃGôaǃgâhe ra. ǁÎn ge ûi hâ i ǁaegu ǃnâ i ge Elob di mîmâide gere dīǀoaǀoahe, ǀgauban ge ge mû tama hâ i. Xawen ge aiǃgû tsî Jehovab ǃnâ ǃâubasensa ge ūhâ ǀgara. Xawen ge ǂgomǃgâsiba ge ūhâ i, ǁnā mîmâidi nî ama kaisa. (Heb. 11:​4, 5) ǁÎn di aiǁgaus ge nî hui da, î da sida ǃâubasens Jehovab ǃnâ da ūhâsa ǀgaiǀgai ǀgara. Nētsē da ge ǁgaiǂoa ra ǃhūbaib ǃnâ ûihâ. (2Tim. 3:13) ǁGâuab ge toa tama hâ, Elob di khoena ǃâitsâsa. Mâ ǃgomsi-i ǀgui-i ga, ais ai hā xawe da ge ǃgarise Jehovaba nî sîsenba. ǂGomǃgâsib ǀkha “ǀoasa ǃâubasensa ūhâse ûitsama Elob” ǃnâ.—1Tim. 4:10. w22.06 25 ¶17-18

ǀGui ǃaromas dītsâ tsî da ǂuruse nî hâbas ge, î da Jehovaba ū da hâ ǁkhāsib hoab ǀkha ǃoaba ǁkhā. (Mrk. 12:30) ǁNā-amaga da ge sida sorosa a tsûtsû ǁkhā xūna xu nî ǂgōsen. (Rom. 12:1) Amase da ge a mîǁoa, ǀaesen da tidesa. Xawe ǁkhā da-e da ge nî dītsâ, î da sida ǀhomsi ǁGûba ǁgau ûib di ǀkhaeba da ra ǃgôaǃgâsa. ǀAeb tsî kairasis ge ǁkhaeda ǁkhā, ǀnai da gere dī xūna dīsa. Nēs xa ǃaromahe hâse da ge ǁaixa tsî ǁgaise a tsâ ǁkhā. Xawe da ge tā ǀûsen tsî sida ǂurusiba nî kōǃgâ ǀû. Tae-i ǃaroma? Matikōse da ga kaira tamas ka io ga ǀaesen xawes tsîna da ge Jehovaba Gao-aob Davib khami a ǃoaba ǁkhā. Matikōse i ra tsâǀkhā da ǂansa, sida Elob ra ǃgôaǃgâsa ǀoasa kurusa da ūhâ tama hâ xawes tsîna. (Mat. 10:​29-31) ǁŌ da gas tsînab ge ǁîba ra ǁkhore sida khâisa māsa. (Job. 14:​14, 15) Ûitsama da a hîna da ge ra dītsâ ǂgao, sida ǂurusib tsî ûib tsîna ǁkhaubasa. w23.02 20-21 ¶3-5

Armagedonsan ga ûi ǃkharu, o i ǀnî gūn di ǀonde ûib ǂkhanis ǃnâ noxoba nî hâ ǀgara? Îo. (J.ǂHa. 7:14) Jesub ge ge mî, gūn khami īn ge “ǀamo ûiba nî hō” ti. (Mat. 25:46) Xawe ǁnān hîna Armagedonsa ra ûi ǃkharun ge, ǁnā ǁaeb ǂûb ai ǀamo ûiba hō tide. Duisend (ǀoadisi) kurigu ǂgaeǂguis ǁaeb ǃnâb ge Jesuba nî “ǁîn di ǃûi-ao tsî ǁîna ûitsama ǁgamǀaudi” ǃoa nî ǂgaeǂgui. ǁNān hîna Xristub di daoǁgaude ra ǁnâuǀnaman tsîn ge ǀunis ai Jehovab xa ǂgomǂgomsase nî ǀgoraǃgâhe. Tsî i ge ǁîn ǀonde ûib ǂkhanis ǃnâ nî xoamâihe ǀamose. (JǂHa 7:​16, 17) Xawe pīrin ge ǁnān hîna Armagedons ǃnâ nî dīkākāhe na. Jesub ge ra mî “on ge ǁîna ǀamo ǁkharab ǃaroma nî ūbēhe” ti. (Mat. 25:46) Paulub ge ǃanu gagab daoǁgaus ǃnâ-ū ra mîba da, “ǁîn ge ǁkharab ase ǀamo hîkākāsa nî tsâ.”—2Tes 1:9; 2Pe 2:9 w22.09 16 ¶7-8

Omaridi ge Jehovab di kurus ǃnâ ǃgâiba ra hō, ǀguiban ga nēsa ôaǃnâo tsîn ǃnomsase a hâ ǁkhā. Nēs ge nî hui în ǃnāsase ǀnamgu. Jehovab ge îsa ǃkhaiga ge kuru, hîna da sida a ǀnam xūna dīs ǃnâ a sîsenū ǁkhāga. ǂGui omaridi ge ǀguiba ǃgāro ǃkhai-i ai sī hâs tamas ka io hurib aisi hâs xa a ǃgâibahe. Elob di ǀasa ǃhūbaib ǃnân ge ǀgôan tsî ǁgun tsîna nēsin ǃgâiba a hō ǁoa ǀgaub ǃnâ, Elob di kurusa xu ǃgâiba nî hō. Nētsēs khami da ge ǃaromasa ūhâ tide xamanina ǃaosa tsîn ge ǁîn tsîna sida ǃao tide. (Jes. 11:​6-9) ǀAmosib kōse da ge Jehovab ge kuru xūn ǃnâ ǃgâiba a hō ǁkhā. (Psa. 22:26) Xawe ǁgûdo, tā ǁnā ǁaeb kōse ǃâu re, sadu di ǀgôana huisa în kurus ǃnâ ǃgâiba hō. Kurusa du ra sîsenū hîna sadu ǀgôana Jehovab xa ǁkhāǁkhā, on ge ǁîna Gao-aob Davib ge mî xū-e nî ǃkhō-am tsoatsoa: ‘Jehova, ǀgui-i di sîsengu tsîn ge sagu ǀkha a ǀgopeǀnōhe ǁoa.’—Psa. 86:8. w23.03 25 ¶16-17