Oktoberi

Hoa da ge ǀhaodi tawa ǃgari dommi ǀkha ǁnaetsanade ǁnaeǀhao ǁkhā. Tsî ǃamkuse da aiǂhomi hâ ǃereamde a mā ǁkhā. Xawe ǀnî ǃgâsana i ge a ǃgomba ǁnae tamas ka io ǃereamde māsa. Sadu tsîna a ǃgombahe? ǁNāti i ga io, o ǁkhāǁkhāsen re. Tae-en ge ǀnî ǃgâsana dīsa în ǁnaes tsî ǃereamde mās ǃaoba dan. ǀNîn ge ra huihe, ǂgaob ǃgamsiba xu ǁnaes xa. Gaosib amde da ga ǁnae, o da ge Jehovaba koas ai sida ǂâisa ra ǂnûi ǂgao. ǁNā-amade oms ai ǃgâise aiǂhomisen, ǀhaos ǃaromats ra aiǂhomisen khami. ǁNaetsanadi ǃaromas tsîna. ǁNaetsanade oms ai ǁnae tsâ re tsî mû mati i ra ǃhoaǃâdi ǀkha ǃgûǀhaosa. Mîdi xa ǂâi tsî tā ǁnae ǁoats a ǀgaub xa ǂâi re. ǀNî ǃgâsan ge a ǃgombahe ǃereamsa. Tae-e a hui du ǁkhā? Hoaǁae ǀhaodi tawa ǃeream re. Tsî ǂâis ǃnâ ūhâ re ǃgâi i ge a sadu ǃereams ga ǃnuburo tsî dîhe ra dîs ǀguisa ǃeream o. Jehovab ge kaise ra ǃgôaǃgâ ǀhaodi tawa da ga ǁîba koasa mā o. w22.04 7-8 ¶12-15

Nē mîs “hui-ao” ti hâs ge khoe-i hîna ǃnoesase ǂhâsib ǃnâ hâ khoe-e ra hui-e ǃoa ra ǁnaeǁgau. Mûnan-ai re Jehovab ǃnoesase ǃgomsib ǃnâ hâ khoe-e ra huisa. Amabes ǃnâ du nî ǃkhō-am nē ra ǁguiǃāhe ǀgaubab ǁîba ra ǁgausa. Îo, Jehovab ge ǀgaisa turaba ūhâ sida huisa. Jehovab ga hui da, o da ge sida ǃgomsin ǃnâ ǃgâiaǂgaob ǀkha a mâǀgai ǁkhā. Mâ ǀnî ǀgaugu ǃnâb Jehovaba ra hui da? ǃEreamsa hōs ǃaroma hā re, î da Jesajab ǂkhanisa xu ǃâ-e khomai. Tae-i ǃaroma? Jesajab ge xoa ǂgui kēbodi ge Jehovab ǃoaba-aon xa, nētsē a sîsenūhe ǁkhā. Jesajab ge Jehovab xa sida supuse a ǁnâuǃā ǁkhā ǀgaugu ǃnâ gere ǁguiǃā. Jesajab di 30ǁî danaǃâsa aiǁgaus ase kō re. Nē ǁkhāǁkhāǃâs ǃnâb ge Jesajaba îxa aiǁgaude ra sîsenū, matib Jehovaba ǁîb khoena ra hui ǀgausa (1) ǃgaoǃgâxase ǃgâ tsî sida ǀgorede ǁnâu-ams, (2) daoǁgaude mādas tsî (3) ǀkhaega nēsi tsî hānîǁaeb ǃnâ mādas ǃnâ-ū. w22.11 8 ¶2-3

Jesub ge Smirnas tsî Filadelfias ǀhaohâga ǃoa a mî haisi-amdi ǃnâb ge Xristeǁîna ge mîba, în tā mâǃoahesa ǃao. ǁÎn di ǂgomǂgomsasib nî ǀkhaehe xui-ao. (J.ǂHa. 3:10) Mâǃoahesa da ge nî ǃâubasen tsî māsenxase nî mâǀgai. (Mat. 24:​9, 13; 2Kor. 12:10) ǂHaiǂhais di ǂkhanis ge ra ǁgau Elob di khoen “ǃKhūb di tsēs” ai nî mâǃoahesa. Tsî ǁnā tsēdi ǃnâ da ge nētsē ûi hâ. (J.ǂHa. 1:10) ǂHaiǂhais di 12ǁî danaǃâs ǃnâ i ge ra ǂoaxa, ǀhommi ǃnâ i ge toroba hâ isa. ǁNās khaoǃgâb ge Jesuba Elob Gaosib di Gao-ao kai ǃkhaisa. Mixaeli hîna Jesu Xristub ge ǀhomma ǃoa oa, ob ge ǁîb di ǀhomǃgān ǀkha ǁGâuab tsî ǁîb demongu ǃoagu ge ǃkham. (J.ǂHa. 12:​7, 8) Nēs xa ǃaromahe hâse î ge Elob di khākhoega ge hîkākāhe. Tsî ǃhūbaib ai ge aoǁnâhe. Tsî gu ge ǃgomsina ǃhūbaib ǃnâ hâna ra ǃaromaba.—J.ǂHa. 12:​9, 12. w22.05 5 ¶12-13

Jehovab di ǀgoraǃgâs ge hoaǁae a ǂhanu-ai. ǁÎb ge ǀoasase ǀkhā-e ǁhûi tama. Jehovab ge tātsē khoe-e ǁî-i îsa, ǃkhū, ǂhâǂhâsa tamas ka io ǂgui ǁkhāsiga ūhâs ǃoagu ǀûba tama hâ. (1Sam. 16:7; Jak. 2:​1-4) Khoe-i ge tātsē Jehovaba ǁamaǃkhuni tamas ka io a ǁgari ǁoa îb xū-e dī. ǁÎb di mîǁguigu ge tātsē ǁaixasib. Tamas ka io tsâsigu ai ǃgaoǃgaohe tama. (Eks. 34:7) Jehovab ge a ǂhanu ǀgoraǃgâ-ao. ǁÎb hoa xūn tsî mâsigu tsîna ra ǁnâuǃā amaga. (Deu. 32:4) Hebreǁî Xoadi di xoa-aogu ge ge mûǂan, Jehovab di ǀûbas kaise a ǀō-aisa ǃkhaisa. ǀNî ǃâgu ǃnâ i ge Hebre mîsa ra sîsenūhe. ǀGui ôaǃnâ ǂkhanis ge ra mî, nē mîs “Elob ǁore-aona ra ǀûba ǀgauba ǃoa ǀgui ra ǁnaeǁgausa. Tsî ǁnā mîs ge khoen ra ǀûbagu ǀgauba ǃoa ǁnaeǁgau tama hâ.” Jehovab ǀguib ge ǃhausen hâ ǁore-ao-e ǀoasase a ǀûba ǁkhā. w22.06 4 ¶10-11

Sadu ǀgôana du ga ǁgû-i ose kaikai o. Tamas ka io gagasise ǀgorasa omaris ǃnâ. ǂAnǃgâ re sadu di ǂgomǂgomsa aiǁgaus sadu ǂnâmipe hâna ra ǂkhâǃnâ tsî ǀgaiǀgaisa. Sadu ôa-i ga sadu ǁgūtsâ di ǃnâ ǃgâiǃgâibasensa ūhâ tama ios? ǂÂihō re, ǀgôa-e ǁkhāǁkhās ge ǁaeba ra ū. ǃKhom-e du ga ǂgā, o du ge a ǂâiǂhansen ǁkhā. Nē ǃkhomsa ǂûna nî mā hais ǃnâ nî kai. Nē hais nî kai ǃkhais xa du ge xū-e dī ǁoa. Xawe du ge ra aiǃgû ǁgamme mās ǀkha. (Mrk. 4:​26-29) ǁKhā ǀgaub ǃnâ, ǁgûdu ase du ge ǂâiǂhansen ǁkhā. Sadu ǂkham ǀgôan ǂgaoga du ra tsâǀkhā ǃkhâis ǃnâ. ǀAmǂoas xa du ge xū-e a dī ǁoa. Xawe du ga aiǃgû tsî hoana dī ǁîna ǁkhāǁkhās ǃnâ, o du ge ǃgâise ra dī ǁîn di gagasi kais ǃaroma. w22.04 19-20 ¶16-17

Jehovab ǂgomǂgomsa ǃoaba-aob ge i, ob ge Salomoba ǀnōsa mûǂuiba ǁîb xa ge ūhâ i. ǂKham i ge i ob ge ge ǂanǃgâ ǀnî xūnab ge dī ǁoa īsa. Tsî Jehovab ai hui ba gere ǂgan. (1Gao. 3:​7-9) ǂGaeǂgui tsoatsoab ge ob ge Salomoba ge ǂan i. ǃGâi tama i ge hâ isa ǃguriǂgaoxasiba ūhâsa. Xaweb ge ega Salomoba ǁîb ge mā ǀapemāsa ge sîsenū ǁoa i. ǁÎb gaosis ǂgaeǂguis di tsoatsoas ǃnâb ge ge ǀgapiǂâixa tsoatsoa. Tsî Elob di ǂhanuga ge ǁnâuǀnam tama hâ i. Aiǁgause ǀgui ǂhanub Hebreǁî gao-aogu ǃaroma ge hâ îb ge gere mî. ‘ǂGui tarade gu ǀhaoǀhaobasen tidesa, ǂgaob ǂgaeǂhapuhe tidega.’ (Deu. 17:17) Salomob ge ǁnā ǂhanuba ge sao tama hâ i. Tsî 700 taradi tsî 300 khoedi (xoǀkhā hâ taradi) tsîna ge ūhâ i (1Gao. 11:​1-3) Salomob ge ǀnîsi ge ǂâi hâ i, nē i ge ǃgomsi tama hâ i ǃkhaisa. Xaweb ge ega Salomoba ǃgomsina ge hōǃâ. Jehovabab ge ǁnâuǀnam tama hâ i ǃkhais ǃaroma.—1Gao. 11:​9-13. w22.05 23 ¶12

Khoen ge nētsē ǂhâǂhâsa mîǁguiba nî dī. Jehovaban ǀhommi tsî ǃhūbaib di ǂgaeǂgui-aob ase nî ūǃoa. Tamas ka ion ǁîb di khākhoeb ǁGâuaba nî ǂkhâǃnâ? Hoa khoen ge ǀkhā-e nî ǁhûi. ǁÎn ra ǁhûi mîǁguib ge, ǁîn ǀamo ûiba nî tsâǀkhā. (Mat. 25:​31-33, 46) ‘Kai ǁgâiǀāb’ ǃnân ge ûiǃkharus tamas ka io dīkākās ǃgao nî saohe. (J.ǂHa. 7:14; 14:​9-11; Ese. 9:​4, 6) Jehovab ǂgaeǂguisa ǂkhâǃnâsa du ga ǁhûi, o du ge gā-ai mîǁguiba dī hâ. Tsî du ge nauna ra hui ǂgao în ǂhanu mîǁguiba dī. Jehovab ǂgaeǂguisa ǂgomǂgomsase ra ǂkhâǃnân ge ǀkhaega nî hō. Nē ǂhâǂhâsa amaba da ge nî ôaǃnâ. Nēsa dīs ge nî hui da î da Jehovaba ǃoaba ǀgara. ǁNās xōǀkhā da ge ǁkhāǁkhāsen da ra xūna a sîsenū ǁkhā, î da nauna hui în, ǃgâi mîǁguiga dī tsî Jehovaba ǃoaba ǀgara. w22.05 15 ¶1-2

Jehovaba da ge nî ǃgâ, sida khākhoen ose. Jobi ge Jehovaba ǃgâise gere ǃgâ, ǁîb ǀkhab ge ǃhoa o. Elob ge Joba ǀnî dîde ge dî, îb mû ǁîbab ra tsâba ǃkhaisa: ‘ǃKharuǃnâts ta xūna ta ge ra mû. ǂÂi tama its hâ, tsâba tsi ta rasa?’ Jobi ge ǃgamǃgamsenxasib tsî ǃgôaǃgâsib tsîn ǀkha, Jehovab ǃgâisiba nēti ge ǃeream. “Sats xa gere ǃhoahe xūna ta ge, ǂgaera ǀkha ǀgui gere ǁnâu, xawe ta ge nēsi ti mûra ǀkha go mû tsi.” (Job. 42:5) Jobi ge noxoba tsao i ǃnâ ge ǂnoa i, ǀkhapin xa ǀoa hâ ǀkhāb ǀkha. Tsîb ge ǁîb ǀgôan di ǁōb xa gere ǃoa. Xaweb ge Jehovaba, Jobab a ǀnam di ge mî. Tsî ge ǂgomǃgâ kai bi, ǁîb mā-amsab ūhâsa. (Job. 42:​7, 8) Nētsēs tsînan ge khoena mîǁgaiǁgai da tsî xu tama da hâ khami a hâ-ū da ǁkhā. ǀGuiǀguibese tamas ka io ǀapeǂhumis asen ge ra dītsâ, sida di ǀonsa ǁgaiǁgaisa. Jobi di ǃâsa xu da ge ra ǁkhāǁkhāsen, Jehovab sida ǃnâ ǂgomǃgâsiba ūhâsa. ǂGomǂgomsase da nî hâsa ǃgomsin ǃnâ da ga ǂgâ o. w22.06 24 ¶15-16

Babilons ga dīkākāhe tsîb ga kai ǃgâiaǂgaoba ǀhommi ǃnâ hâ. Xawe i ge ǀkhara xu i tsîna hâ ǃgâiaǂgaoba nî hau-e. (J.ǂHa. 19:​1-3) ǁNā i ge kaise ǂhâǂhâsa xū-i hîna, ǂHaiǂhais ǂkhanis ǃnâ ra mîhe-e. ǁNāb ge ‘ǁKhaob di ǃgammeba.’ Armagedons di torob nî tsoatsoas aiǃâ i ge, hoa 144 000 ǃgâsana ǀhommi ǃnâ nî hâ. Xawe ǁnāb ge ǁKhaob di ǃgamme tamaba. (J.ǂHa. 21:​1, 2) ǁKhaob di ǃgammeb ge Armagedons di torob khaoǃgâ ǀgui nî hâ. Elob khākhoen ga ūbēhe o. (Psa. 45:​3, 4, 13-17) ǁKhaob di ǃgammeba ǂhauhesan ǃaroma tae-e ra ǂâibasen? ǃGamme-aob tsî taras tsîn ra ǀhao khamib ge, ǁkhā ǀgaub ǃnâ ǁKhaob di ǃgammeba gao-aob Jesub Xristub tsî ‘taras’ 144 000 ǃgâsan tsîna nî ǀhaoǀhao-e. ǁNā ǂhâǂhâsa ǁaxasib ge ǀasa ǂhanuba nî ǂnûiǂgā. Hîna ǃhūbaiba 1 000 kuriga nî ǂgaeǂguiba.—J.ǂHa. 20:6. w22.05 17 ¶11-13

Jesub ge ge mî, ǀams di ǁaeb ǃnâb ‘ǂgomǂgomsa tsî ǁnâuǃāxa ǃgāba’ nî ǁgaumâi ǃkhaisa, î gu gagasi ǂû-e mā ǁkhā. (Mat. 24:45) ǁNās ge nēsis kōse a ama. Jesub ge ǂkhari groeps di ǂkhauhesa ga sîsenū hâ, î gu Elob khoen. Tsî ǃgâiǃgâibasensa ūhâ khoen tsîna “ǁaeb ai” gagasi ǂûna mā. Nē khoegu ge ǀhonkhoegu ase dīsen tama hâ, ǂgomsa ūhâ khoen ǂam ai. (2Kor. 1:24) Xawe gu ge ra ǂanǃgâ Jesu Xristub a “ǂgaeǂgui-ao tsî mîmā-ao” sa, ǁîb khoen ǃoagu. (Jes. 55:4) ǂGomǂgomsa tsî ǁnâuǃāxa ǃgāb ge ǃkharagagu ǂkhinina aiǂhomi hâ, 1919ǁî kuriba xu. Tsîs ge nēsa ǃgâiǃgâibasensa ūhâ ǀasa khoena, aiǂhanuba ra mā în amaba Elobmîsa xū ǁkhāǁkhāsen. 1921ǁÎ kurib ǃnâb ge nē ǃgāba, The Harp of God di ǀon hâ ǂkhinisa ge aiǂhomi. Tsî nēs ge ǃgâiǃgâibasensa ūhâ khoena gere hui în supu Elobmîs ǁkhāǁkhāde ǂan ǁkhā. ǁAeb ra ī khami i ge, ǀnî hâ ǂkhinin tsîna ge dīhe. Mâ ǂkhini-e sado ge hui, î du sida ǀhomsi ǁGûba ǂan tsî ǀnam tsoatsoa? w22.07 10 ¶9-10

Jehovab ge kaise a māxa. ǁÎb ge ǁîba du ra mā xū-i xa ǃnāsa-e nî mā-oa du. (Mrk. 10:​29, 30) ǁÎb ge ǂûǂûxa tsî ǂâibasensa ūhâ ûiba nî mā du. Nē eloxoresa ǃhūbaib ǃnâs tsîna. Tsî ǁnās ge tsoatsoas ǀguisa ī. Aiǃgû tsî du ge sadu ǁGûba ǀamosib kōse a ǃoaba ǁkhā. Sadu tsî sadu ǁGûb ǁaegu hâ ǀnammi ge ǀgai ǀgaras ǀguisa nî dī. Tsî du ge ǁîb khami ǀamosib kōse nî ûi ǀgara. Māǁnâsen tsî du ga ǁāǁnâhe, o du ge aiǂhanuba ūhâ ǀō-aisa xū-e sadu ǁGûba māsa. ǁÎb ge ǃgâi xūn hîna du ūhâna sado ge mā. ǁNās ǀkha du ge ǀhommi tsî ǃhūbaib di ǀhonkhoeba xū-e a mā ǁkhā, hînab ūhâ tama hâ-e. ǁNās ge sadu ǂgomǂgomsa ǃoabasa. (Job. 1:8; 41:11; ǂKhm. 27:11) Amase, Jehovaba du ūba hâ ǀnammi ge a ǃgâi ǃaroma ǁāǁnâhes diba. w23.03 6 ¶16-17

ǂKhamsis ǃnâ i ge ǁgoe-ūgus di tsâsiga kaise a ǀgaisa ǁkhā. Tsî ǀnî ǁaegu ain ge ǀnîna a ǁgari du ǁkhā, î du ǁnāsa dī. Satanni ge ra ǂhâba î du ǁnā turagu ǃnâ māǁnâsen. Tae-e a hui du ǁkhā î du sorosise ǃanuse hâ ǀgara? (1Tes. 4:​3, 4) Jehovaba ǃoa du ra ǀgore ǁaeb ai sadu tsâsiga ǁîba mîba re. Tsî ǂgan bi re îb ǀgaiǀgai du. (Mat. 6:13) ǂÂis ǃnâ ūhâ re, Jehovab ge ra hui du ǂgao tsî ǀgoraǃgâ du ǂgao tama hâ. (Psa. 103:​13, 14) Sadu ǃgomsina tā aitsama ǃgâiǃgâi ǂgao re. Sa ǁgûn ǀkha ǃhoa re ǃgomsin xa. Supu tama i ge hâ ǁnā xūn xa ǃhoasa xawe i ge a ǂhâǂhâsa îts ǁnāsa dī. Elobmîsa khomai tsîts ga ǁîs di ǀapemādi xa ǂâiǃgâ o. O i ge kaise nî supuba tsi, îts mîǁguigu hîna Jehovaba ra ǂkhîǂkhî ga dī. Mûǂants ge nî mâ xū-i hoa-i ǃaromats, ǂhanu-e ǂhâba tamasa. Jehovab xūn xa ra ǂâi ǀgaubats nî ǁnâuǃā amaga. w22.08 5 ¶10-12

Xristeǁî dana-i ge ǁî-i omarisa kōǃgâs xa kaise a ǂhâǂhâsaba-e. Omaris di danase, go ge ǀnîsi ra ǂâiǂhansen omaris hâǃkhai-i tsî ǂû-i tsîna go mâba xu nî hōsa, î go omarisa kōǃgâ. Tsî ǀnîsi ra ǃao sîsen-e ǂoaǃnâsa. Tamas ka io go ge ǀnîsi, gere ǂâi ǀoro mari-i ai go a ûi ǁoa ǃkhaisa. ǁGâuab ge ǂgui ǃgâsana Jehovaba xu ge ǂgaebē. ǁGâuab ge ra ǂgom kai da ǂgao Jehovab ǀnam da tama hâsa. Tsî da ǀguri hâsa, sida omarisa kōǃgâs ǃnâ. Nēs xa ǃaromahe hâse da ge ǀnîsi nî ǂâi. Î da ǁkhā da a xū-i hoa-e dī tsî tā sida sîsen-e ǂoaǃnâ. Tsî da ge sida ǀhōsagusisa Elob ǀkha a ǁgaiǁgai ǁkhā xū-i tsîna a dī ǁkhā. w22.06 15 ¶5-6

ǂAn da ge a sida Elob “ǀkhomxasib tsî ǀkhommi xa ǀoa hâ, ǃhaese ǁaixa tama hâ. Tsî ǃnāǂamsa ǀnammi tsî ǂgomǂgomsasiba” ra ǁgausa. (Eks. 34:6) Jehovab ge ǂhanu-aisiba a ǀnam. (Jes. 61:8) Sida ǃgomsina ra hōǃâ sab ga mû, ob ge ra tsûtsûhe. Tsîb ge aiǂhumisa sida ǃgomsina ǂhanu ǁaeb ai ǀam kaisa. (Jer. 29:11) Sida tsîn ge ǁnā ǁkhoaxa ǁaeba ǃoa ra mûǂui. Tsî ǁnās ge ǀgui ǃaromas Jehovaba da kaise a ǀnamsa. Mâsa a ǀnî ǃaroma amaba da a ǀnambasa? Amab ge ǃgâiba sida ǃoa ra ǀkhī-ū. Aiǁgau-i xa ǂâi re. Elobmîs amab ge hānîǁaeb di ǃâubasensa ǃkhōǂgā hâ. Anker-i ǂgausa ra ǃkhōmâi khami i ge Elobmîs di ǃâubasensa a ǀgaiǀgai da ǁkhā, ûib ǃgomsina da ga hōǃâ o. Nētsēs xoas ǃnâb ge apostel Pauluba ǀhomsi ǃâubasensa ūhâ, ǂkhauhesa Xristeǁîn ra ǃgôaǃgâ ǃâubasens xa ra ǃhoa. ǁÎb di mîdi ge Xristeǁîn hîna paradais ǃhūbaib ai ûis ǃâubasensa ūhân tsîna ǃkhōǂgā hâ. (Jhn. 3:16) ǀAmo ûib di ǃâubasens xa ǁkhāǁkhāsens ge sida ûiba ǂâibasensa ge mā. w22.08 14-15 ¶3-5

ǀNammi ge a ǃgaoǃgao ǂgomǃgâsib diba. ǂGuro Korinteǁîn di 13ǁî danaǃâs ge ra ǁguiǃā. ǂGui ǃkharagagu ǀgaugu hînab ǀnamma a hui da ǁkhāba, î da ǂgomǃgâsiba naun ǃnâ omkhâi. (1Kor. 13:​4-8) Aiǁgause vers 4 ge ra mî “ǀnammi ge ǃnūǃnâxa tsî a ǃgâi” ti. Jehovab ge a ǃnūǃnâxa ǁîb ǃoagu da ga ǁore xawes tsîna. Tsî ǁnās ǃaroma da ge sida tsîna nî ǃnūǃnâxa sida ǃgâsan ǃoagu. Mî tsîn ga xūna dī hîna ra tsûtsû da tamas ka io ǂhani da na. Vers 5 ge ǀaro tsîra mî: ‘ǀNammi ge ǃhaese ǀarakaisen tama tsîb ǁîb ǃoagu ra dīhe tsū xūna ǃgôakhâi tama hâ.’ Sida ǃgâsan sida ǃoagu ra ‘dī xūna’ da ge hānîǁaeb ǃnâ da ǁnā xūna nî sîsen-ūse ǃkhō ǀgara ǂgao tama. Aoǁnâ-aob 7:9 ge ra mî: “Tā ǃhaese ǁaixa.” Dītsâ re sadu ǃgâsana Jehovab ǁîna ra mû khami mûsa. Elob ge ǀnam nî tsî ǁîn ǁoren ai kō tama. Tsî da ge sida tsîna ǁîn ǁoren ai kō ǂgao tama hâ. (Psa. 130:3) ǁÎn di dīsādi ai ǀgui sida ǂâide ǂnûis xa, da ge ǁîn ra dī ǃgâi ǀgaugu ai nî kō.—Mat. 7:​1-5. w22.09 3-4 ¶6-7

Danieli di ǂkhanis ge mâ ǃâgu ǃnân xūna, ǀams ǁaeb ǃnâ nî ī ǀgauba ra ǁguiǃā. Aiǁgause Danieli 12:1 ge ra ǁgau, Mixaeli hîna a Jesu Xristub, Jehovab “ǁaes ǂama” ra ǃûisa. ǁNā ǃâb kēbos dib ge 1914 nî ǃnâ ge dīǀoaǀoahe. Jesub ge Elob di ǀhomsi Gaosib, Gaose ǁgaumâihe o. Danieli ge ge mîbahe “ǁnā ǁaeb ǃnâb ge kaise kai ǂōǂōsib, tātsēs tsîna ge ǃhūbaib ǃnâ ī tama hâ i tsî ǁkhāti ǁkhawa mûhe tideba nî ī.” Tsîb Jesuba nî ‘khâisa.’ Nē “kai ǂōǂōsib” ǁaeb ge kai ǁgâiǀāb Mateub 24:21 ǃnâ ra mîheba. Jesub ge Elob ǁaesa ǃûi tamas ka io ra ǁkhauba. ǁNās ge “ǂōǂōsib di ǁaeb” ǃnâ, Armagedons tawa. ǂHaiǂhais ǂkhanis ge nēna kai ǂnubis din hîna, “kai ǁgâiǀāba xu go ǀkhīn” ase ra ǁnaeǁgau.—J.ǂHa. 7:​9, 14. w22.09 21 ¶4-5

Nēsi ǁnā ǂkhanis ǃnâ xoamâihe hân, di ǀondi ge a ǀariǂuihe ǁkhā. Jehovab ǁnā ǀonde potlop ǀkha xoamâi hâ khami i ge ī. (J.ǂHa. 3:5) Dītsâ da ge nî î-î sida ǀonde nē ǂkhanis ǃnâ, peni ǀkha i a xoasa khama hâhâ. ǀNî groeps di khoen hîna ǁîn ǀonde ûib ǂkhanis ǃnâ xoamâihe hân ge Jesub ǀkha, ǀhommi ǃnâ nî ǂgaeǂguise ǁhûihe hâna. Apostel Paulub di mîdi hînab ge ǁîb ‘ǃoabaǁare-aon’ Filipes ǃnâ hâna ǃoa a xoa di ge ra ǁgau. ǂKhauhesan hîna Jesub ǀkha ǀguiba nî ǂgaeǂguise ǁkhauhe hân di ǀondi nēsi ûib ǂkhanis ǃnâ xoasasa. (Fi. 4:3) Xawe ǁîn di ǀonde, ûib ǂkhanis ǃnâ ūhâ ǀgaras ǃaroman ge ǂgomǂgomsase nî hâ. ǀUnisin ga saohe toas khaoǃgâ i ge ǁîn ǀonde ûib ǂkhanis ǃnâ ǀamose nî xoamâihe. Tsî nēs ge ǁōn nîs aiǃâ tamas ka io kai ǁgâiǀāb nî tsoatsoas aiǃâ nî ī.—J.ǂHa. 7:3. w22.09 14 ¶3; 15 ¶5-6

Elobmîsa du ga khomai o, sadu ǁaeba ū re î ǃgâibahe khomai du ra xūn xa. Aiǁgause, nēti i xū-e hōǃâ tsâ i du ge hâ i? Khoe-i ge sado a ǃgâiba ǂû-e ra sâi, xawe du ge ǀnîsi ǂâusa ǁae-e ūhâ tama ǂûs di-e. Tamas ka ios ge sadu ǂâisa ǀkhara xūn xa ra ǂgaeǁnâhe. Tsî du ge ǃkhaese ra ǂû, ǁkhoa-e du hō tamase. ǂÛ toa du hâs khaoǃgâ ǀgui du ge, kaise du go ǃkhaese ǂûsa ra ǂâihō. Tsî du ge ra ǃhausen, ǂause ǂû tsî du ga mâ nâs hoas ǁkhoaba hō hâsa. ǁNās ge a ǀgui ǁkhā Elobmîsa da ga ǀnî ǁaegu ai ǃkhaese khomai o. ǁNāsa da ga dī, o da ge ǁkhoa-e hō tama Jehovab ra ǁkhāǁkhāda xūna xu. Elobmîsa ǁaeb ǀkha khomai tsî ǁkhoaba hō re. Mûnanai re, ǃkhain tsî domgu di ǀōn tsîna i du khomai du ra xūna ǂâiǃgâ. Nēsa du ga dī, o du ge ǃnāsa ǃgâiaǂgaoba nî hō. Jesub ge “ǂgomǂgomsa tsî ǁnâuǃāxa” ǃgāba ge ǁgaumâi. Gagasi ǂûnab ǂhanu ǁaeb ai nî māse. Tsî da ge kaise ǃgâise ra ǂûmāhe. (Mat. 24:45) Elobmîs ain ge hoa xūn hînab ǂgomǂgomsa ǃgāba ra dīna a ǃgaoǃgaosa.—1Tes. 2:13. w22.10 7-8 ¶6-8

Elobmîs ge ra mî ǀuniga tsēdi ǃnâ i, ǂgui ǃhō-aona nî hâsa. (2Pet. 3:​3, 4) ǃHō-aon ge ǁîn di “eloxoresa xūn” xa ra ǂkhâǃnâhe. (Jud. 7, 17, 18) Mati da a dī ǁkhā î da tā ǃhō-ao kai? ǀGui ǀgaub hîna da nēsa a dī ǁkhāb ge, xū-i hoa-i xa a tsūbahe khoena xu hâbēsa. (Psa. 1:1) Nēs ge ra ǂâibasen, î da tā Jehovaba ǃoaba ǀû hâ khoena ǃgâ. Tamas ka io ǁîna xu hâ ǂkhinina khomai. Xū-i hoa-i xa a tsūbahe tsî Jehovab ǁîb ǀapeǂhomis ǃnâ-ū ra mā daoǁgaude ūǃoa ǂgao taman ǀkha da ge tā nî hâ. Nēti ī ǀgauba xu ǂgōsens ǃaroma da ge nî dîsen: ‘ǀasa xūn tsî ǀkharaǀkharan ga hâ, o ta hoaǁae xū-i xa a tsūbahe? ǂGaeǂguisa ra ū ǃgâsagu ǀkha ta hoaǁae ǃgomsiba ūhâ?’ Nēti ī ǀgauga da ga ǃhaese ǀû o, ob ge Jehovaba sida ǀkha nî ǂkhî.—ǂKhm. 3:​34, 35. w22.10 20 ¶9-10

Elob gagab ge Esegiela ge ǀgaiǀgai, ǁgaumâis hînab ge a ǃkhōǃoas ǃaroma. ǁNās ge “ǃnâudanaxa tsî karosaǂgao” xa khoen, hîna ge ǁîb da hâba hâ īna aoǁnâbasa. Jehovab ge Esegiela ge mîba: “Tita ge ǁîn aidi ǃoa-ai karosa aisa nî dība tsi, tsî ǁîn ǃūdi ǃoa-ai sa ǃūsa nî ǃgariǃgari. Sa ǃūsa ta ge diamantǀuis khami nî dī, ǃgareǀuib ǃgâ-ai karosase; ǁîna tā ǃao tamas ka io tā ǃhuri ǁîn ra mûsen ǀgaub xa.” (Ese. 3:​8, 9) Jehovab ge Esegiela nēti gere mîba khami i ge ge ī-i. ‘Tā mā-am î-i khoen di ǃnâudanxasiba satsa ǂkhabuǂâi kai, tita ge satsa nî ǀgaiǀgai.’ ǁNās khaoǃgâb ge Elob gagaba, Esegiela ǁîb di aoǁnâ sîsenni ǃnâ gere hui. Esegieli ge ge xoa, ‘ǃKhūb [Jehovab] ǃommi ge tita ai ǀgaisase ge hâ i.’ Kēbo-aoba i ge wekheba ge ū, aoǁnâb nî haisi-amsab ǀoasase nî ǁkhāǁkhāsensa. Îb ǁkhoaǂgaosib ǀkha aoǁnâ ǁkhā. (Ese. 3:​14, 15) ǁNāpaxūb ge Jehovaba ge mîba bi, îb Kebardǃāba ǃoa ǃgû. ǁNāpab ge ‘gagaba ǁîb ǃnâ ge ǂgâ.’ (Ese. 3:​23, 24) Esegieli ge ge aiǂhomisa ī, ǁîb di aoǁnâ sîsen-e tsoatsoasa. w22.11 4-5 ¶8-9

Kēbo-aob Habakuki ge ǂgui ǃgomsina ge hōǃâ. ǀNî ǁaeb ge Jehovab xab gere tsâbahe ǃkhaisa gere ǂgom ǀoro. ǀGores ǃnâb ge ǁîb tsâsiga Jehovab ǃoagu ge ǁhōǂui. Jehovab ge ǁîb ǃgāb ǂgaoba xu ra ǀgore, ǀgoresa ge ǃeream. (Hab. 2:​2, 3) Habakuki ge ǃgamse Jehovab ge ǁîb di khoena ore ǀgaus xa a ǂâiǃgâs, khaoǃgâb ge ǁkhapa ǃgâiaǂgaob xa ge ǀoa. ǁÎb ge ge ǂgom tsoatsoa Jehovab ra tsâbabi tsîb nî huibisa, îb mâ ǃgomsi-i hoa-i ǃnâ mâǀgai ǁkhā. (Hab. 3:​17-19) Tae-e da nēsa xu ra ǁkhāǁkhāsen? ǃGomsina du ga hōǃâ, o Jehovaba ǃoa ǀgore re tsî ǁîba mîba mati du ra tsâsa. ǁNāpaxu ôa re ǁîb xa ǂkhâǃnâhesa. ǁNāsa du ga dī o, du ge a ǂgom ǁkhā Jehovab ǂhâ du hâ ǀgaiba nî mā dusa î du mâǀgai. ǁÎb ǂkhâǃnâsa du ga hōǃâ, os ge sadu ǂgomsa ǁîb ǃnâ nî ǀgai. Sadu gagasi ǀapeǁguiba du ga hoaǁae dī, os ge ǁnāsa nî hui du în ǃgomsina tā Jehovaba xu ūbē du.—1Tim. 6:​6-8. w22.11 15 ¶6-7

Jesub tsî ǁîb xōǀkha ge mâ-i ǀgam ǂkhabadī-aokha tsîn ge kaise kai tsûba gere tsâ, ǂause gu ra ǁō hîna. (Luk. 23:​32, 33) Hoa ǀgam ǂkhabadī-aokha ge ǁgai ǀgaub ǃnâ Jesub ǀkha gere ǃhoa. (Mat. 27:44; Mrk. 15:32) Xawe ǁîkha di ǀguib ge, ǁîb tanisen ǀgauba ge dawa. ǁÎb ge ge mî: “ǂâis ǃnâ ūhâ te re Jesutse, sa gaosib ǃnâts ga sīo.” Jesub ge ǁîba nētsēs mîdi ǀkha ge ǃeream. (Luk. 23:​39-43) Jesub ge ǂkhabadī-aoba ǃoa a mî, mîdi ge nî ǂkhâǃnâ da, î da ǂâi ûib mati nî ī ǀgauba Paradais ǃnâ. Gao-aob Salomoni ǂkhîsa ǂgaeǂguisa xu da ge xū-e paradais xa ǁkhāǁkhāsen ǁkhā. ǁNās ǀkha da ge a ǃâubasen ǁkhā Jesub hîna Salomonni xa a kaib tsî ǁîb ǀkha nî ǂgaeǂguin, ǃhūbaiba îsa paradais ǃnâ nî ǀkharaǀkharasa. (Mat. 12:42) ǁNās ge ra ǂâibasen în ‘ǀnî gūna’ ǃgâiǃgâibasensa ūhâ. ǀAmosib kōse Paradais ǃnâ ûis ǃaroman nî dī xū-i xa.—Jhn. 10:16. w22.12 8 ¶1; 9 ¶4

Jesajab ge ra ǁapoǁapo Jehovab ǃgaoǃgâxase nî ǃgâ dasa, ǁîba ǃoa da ga ā o. Tsîb ǃkhaese sida ǀgorede nî ǁnâu-am ǃkhaisa. Jesajab ge ǀaro tsî ra mî: “Sadob ga ǁnâu, ob ge nî ǃeream du.” Nē mîdi ge ra hōhōǃnâda sida di ǁGûb māsenxa. Tsî ǁkhoasa ǁnān hîna ǁîb ai huiba ra ǂanna huisa. Nēsa ǂans ge nî hui da ǃgâiaǂgaob ǀkha mâǀgaisa. Jehovab ge ǃgaoǃgâxase mâ khoe-i hoa-i di ǀgorede ra ǃgâ. Tae-i ǃaroma da ti a mî ǁkhā? ǀApaǃaogowab Elobmîs da mîs ǃoagu i ge ǂguro ǃâb Jesajab 30ǁî danaǃâs ǃnâ hâ mîs “sats” ti hâsa, Jehovab ǃgubis khoen ǀkha ra ǃhoase ra ǁnaeǁgau. Xawe 19ǁî ǁaraǃās ǃnâ hâ mîs “sats” di hâs ge ǀguri hâ khoe-e ǃoa ra ǁnaeǁgau. Jesajab ge ge xoa: “ǃAruǀî du ge ā tide.” ‘Sadob ge ǀkhomxaǂgaosiba nî ǁgau,’ “ob ge nî ǃeream du.” ǀNamǀnamxa ǁGûb aseb ge Jehovaba, mâ ǀguiǀguibe khoe-i hoa-e ra tsâba. Tsî sida ǀgorede ǁîb ǃgâiǃgâibasensa ra mā.—Psa. 116:1; Jes. 57:15. w22.11 9 ¶5-6

ǃGôaǃgonhe da ga xawe aoǁnâ tsî ǁkhāǁkhās ge ǃgâiaǂgaob tsî ǂkhîba ra mā da. ǃKharuge ǁaeb Jodeǁîn ǂgaeǂgui-aogu ge apostelga ge mîmā î gu tā aoǁnâ. Xawe gu ge nē ǂgomǂgomsa aoga Eloba ǁnâuǀnamsa ge ǁhûi. ǁÎgu ge ge aoǁnâ ǀgara. Tsî i ge ǁnā sîsen-e ǁîga kaise ge ǃgâiǂgao kai. (ǃNǃkh. 5:​27-29, 41, 42) Xawe hâ as ge aoǁnâ sîsen-e dīsa da ga ǂkhāhe ǁaeb ai da ge nēsa ǂanbasen hâse nî dī. ǁKhā da a-i hoa-e dītsâ tsî da ga aoǁnâ ǀgara, o da ge sâsasiba nî hōǃâ hîna Jehovaba ǂkhîǂkhîsa xu ra hāba. ǂGomǃgâsiba ūhâ re ǃgomǁaegu ǃnâs tsîna da ǂkhîba a ūhâ ǁkhāsa. ǁNā ǁaeb ais tsîna da ge ǂâis ǃnâ nî ūhâ, Jehovab ǀguib ge ǁnā ǂkhîba a mā da ǁkhā. ǁÎb ai ǂgomaiǂnûi, ǀaeb khoraǂuisens, tsūkēǃgâb tamas ka io du ga ǃgôaǃgonhe o. ǁÎb ǀapeǂhumis ǀkha ǀguiba sîsenǀhao re. Hānî buruburuxa ǁaeb ai ǂâisa ǂnûi re. Nēsa du ga dī, ob ge “ǂkhîb di Eloba sadu ǀkha nî hâ.”—Fil. 4:9. w22.12 21 ¶17-18

ǁNās ge sîsen-e ǃkhōǂgā hâ. Nēn hoan xōǀkhā da ge ǃgarise nî sîsen, î da ǁaib, ǃaugub tsî ǃkhāǃkhāgub khami ī ǀgauga xu ǂgōsen. (Efe. 4:​31, 32) ǁNāsa tae-i ǃaroma a ǃgom ǁkhā? ǀNî ǁgai ǀgauga xu ǂgōsens a ǃgom ǁkhā amaga. Aiǁgauses ge Elobmîsa ra mî, khoen ge ǃnāsase “ǁaiǁaisen xa” tsî “ǂkhabaxa.” (ǂKhm. 29:22) Nēti ī ǀgauba ǁnāxus ge sîsen-e ǃkhōǂgā hâ ǁāǁnâs khaoǃgâs tsîna. (Rom. 7:​21-23) ǃGomsib hîna du ūhâb xa, Jehovaba ǃoa ǀgore tsî ǂgomǃgâ re ǁîb nî hui dusa. (1 Jhn. 5:​14, 15) Jehovab ge ǁnā ǁgai ǀgauba buruburuxa ǀgaub ǃnâ ūbē tide. Xaweb ge nî ǀgaiǀgai du, î du tā ǁnās ǃnâ māǁnâsen. (1Pet. 5:10) ǁNās ǀkha ǀguiǃnâxase sadu ǀgoredi ǀkha sîsen re, î gu ǀoro ǀgauga tā ǁkhawa oaǀkhī. Tsî tā ǃgâi tama turagu xa ǂâi re.—Fil. 4:8; Kol. 3:2. w23.01 10 ¶7, 9-10

ǀGui ǀgaub hîna da ǁnā ǀnamma ra ǁgaub ge, ǁkhoaǂgaoxase aoǁnâ sîsenni ǃnâ ǁhaosa. ǀHao-ū da ra khoen hoan ǀkha da ge ra ǃhoa. Khoe-i xare-e da ge ǀgoraǃgâ tama, ǁî-i di ǃhaos, khaoǃhūb, mariǁhogu tamas ka io ǁî-i skole ūhâ tamas ǃaroma. Nē ǀgaus ǃnâ da ge Jehovab di ǂâis ǀkha ǀguiba ra sîsenǀhao, “mâ khoe-i hoa-i nî ǃgâiǃō kaihe tsî amaba ǂan ǃkhaisab ra ǂgao amaga.” (1Tim. 2:4) Jehovab tsî Jesub tsîna da ūba hâ ǀnammi tsîna da ge ra ǁgau. Sida ǃgâsana ǀnamma ǁgaus ǃnâ-ū. ǁÎn ǀkha da ge nî ǁae tsî nî ǂkhâǃnâ nî tsî ǃgomsigan ga ūhâ o nî hui nî. ǁÎna da ge ra ǁkhaeǂgao, ǀnamsabe-en ga ǁōb ǃnâ ǂoaǃnâ o. Tsî ǀaesenan ga, o da ge nî sari nî. Tsîn ga ǂkhabuǂâi, o da ge nî ǁkhaeǂgao nî. (2Kor. 1:​3-7; 1Tes. 5:​11, 14) ǁÎna da ge ra ǀgoreba, sao ra-e ǂâis ǃnâ ūhâse, “ǀgores ǂhanu-ai khoe-i dis ge kai tsî ǀgaisa sîsenǂuiba ūhâ.”—Jak. 5:16. w23.01 28-29 ¶7-8

Om kuru-aob ǁîb ǂansa ǁaeb ǀkha ra ǃgâiǃgâi. Khami da ge sida tsîna a ǃgâiǃgâisen ǁkhā, omkhâigu da ga o. Nauna da ge a hui ǁkhā, în ǀgaiba ūhâ tsî ǁîn ǃgomsina mâǃkharu. ǁÎn ǀkha da ga aiǁgaudi hînan ge ǃgâsana ǃgomsin ǃnâ gere mâǃkharu, ǀgauba ga ra ǀgoragu o. (Heb. 11:​32-35; 12:1) Nau khoen ǃnâ da ra mû ǃgâi xūna da ga mî, o da ge ǂkhîba a omkhâi ǁkhā. Tsî da ge ǂkhîba a ūhâ ǁkhā ǃkharagagusigu tsî ǃgom mâsigu ǃnâ. (Efe. 4:3) Tsî da ge aiǃgû tsî sida ǃgâsan ǂgomsa a omkhâi ǁkhā. ǁÎn ǀkha da ga Elobmîs amaba ǀgoragu tsî ǂhân hâ huiba mā nî o. Tsî ǁnās xōǀkhā gagasise ǂkhabu hâna ǂkhâǃnâ o. ǂKhîba da ge a ūhâ ǁkhā, sida ǃgâsan ǂgomsa da ga ǀhaodi tawa ǀgaiǀgai o. Nētsē da ra om, omdi ge ega a ǁgai ǁkhā. Xawe i ge sida sîsenga ǀamose a hâ ǁkhā. w22.08 22 ¶6; 25 ¶17-18

Jesub ge ǂhâǂhâsa ǀgauba ge ǁgau, Elobmîsa da ga ǁnâuǃā ǂgao, o da nî ūhâba. ǁNāb ge xūn ǁaegu ǀgorasa ūhâsa. (Mat. 24:15) Xūn ǁaegu ǀgorasa ūhâsa a tae? ǁNāb ge ǀgaub hîna ra huiba, î da ǂan ǀgui xū-i mati nau-e xu ra ǀkharasa. Tsî mati i nau-i ǀkha ǀguiti īsa tsî matikōse i ǂanhe tama hâsa. ǁNās xōǀkha Jesub ge mî khami, da ge ǀgoraǃgâ ǀgauba ǂhâhâ. Î da mû Elobmîs kēbodi mati ra dīǀoaǀoahe ǀgauba. ǁNā ǀgauba da ge ǂhâhâ, î da Elobmîsa xu ǃgâiba hō. Jehovab ge ǁîb ǃoaba-aona xūna ǀgoras di ǁkhāsiba ra mā. ǁÎba ǃoa ǀgore tsî ǂgan re îb hui du nē ǀgauba omkhâisa. Mati du sadu ǀgoredi ǀkha ǀguiǃnâxase a sîsen ǁkhā? ǂŌrisase kō re tae-e du ra khomaisa tsî mati i nau xūn ǀkha ra ǃgûǀhaosa. Elobmîs di khomaiǃâ di ǃnâ ǂâibasensa ôaǃnâ re. Tsî du mati sadu ûib ǃnâ a sîsenǂui ǁkhāsa. (Heb. 5:14) ǁNāti du ra khomai hîna î ge xoade du ra ǁnâuǃā ǀgauba nî kai. w23.02 10 ¶7-8

Mûnan-ai re sadu ǀhōsa î ge ǀoro xawe ǀō-aisa ǀkhaeba ra mā du. Xawe î ge nē ǀkhae xū-e ǀhai, ǀurixa tsî ǂhan hâ. ǁNā ǃnubusigu ga hâ xawe î ge ǁnā ǀkhaexu-e mîliundi mari-e ra ǂgan. ǁNās ǀkha du ge ǀkhaexū-e kaise nî ǃgôaǃgâ tsî nî kōǃgâ. ǁKhā ǀgaub ǃnâb ge Jehovaba ǀō-aisa ǀkhaeba ge mā da, ǁnāb ge ûib di ǀkhaeba. Jehovab ge sida ûibab kaise ra ǃgôaǃgâsa ge ǁgau, ǁîb ǀGôaba sida ǃaroma Xoremarib ǀkhaeb ase mās ǃnâ-ū. (Jhn. 3:16) Ûib ge Jehovaba xu hâ. (Psa. 36:9) Apostel Paulub ge nē amaba ge ǃkhō-am mîb ge o: ‘ǁÎb ǃnâ da ûi, gon tsî hâ xui-ao.’ (ǃNǃkh. 17:​25, 28) ǁNā-amaga da ge a mî ǁkhā, sada ûib ge Eloba xu hâ ǀkhaeba. ǁÎb ge ǀnamxaǃnâse ûis ǃaroma da ǂhâhâ xūna ra mā da. (ǃNǃkh. 14:​15-17) Xawe Jehovab ge nēsi buruxa sōǀôana dī tama, î da ûitsâmase hâ ǀgara. ǁÎb ge ra ǂhâba î da sida gagasi tsî sorosi ûiba kōǃgâ ǁkhā da as kōse.—2 Kor. 7:1. w23.02 20 ¶1-2

Jehova Eloba da ge kaise ra gangan, Elobmîs ǃaroma. Elobmîs ǃnâ-ūb ge ǁîba gā-ai ǀapemāde ra mā da, î da ǃgomsina nētsē ǃgâi ǀgaub ǃnâ sîsenǂam ǁkhā. ǁÎb ge hānîǁaeb xas tsîna buruxa ǃâubasensa ra mā da. Xawe ǂhâǂhâsaseb ge Jehovaba Elobmîsa ra sîsenū, îb ǁîb di ǀgaugu xa ǂanǂan da. Tsî da ga ǁîb di îsa ǀgaugu xa ga ǂâi o, os ge nēsa sida ǂgaoga ra tsâǀkhā tsî ra ǂkhâǃnâ da, î da Elob ǃoa ǀgū tsî ǁîb ǀkha ǃgâi ǀhōsagusisa ūhâ. (Psa. 25:14) Jehovab ge ǂhâba hâ în khoena ǁîba ǂan. ǃKharu ge ǁaeb ǃnâb ge ǁîba ǁhapodi, kēbodi tsî ǀhomǃgāgu ǃnâ-ū gere ǂanǂansen. (Num. 12:6; ǃNǃkh. 10:​3, 4) Nē ǁhapodi, kēbodi tsî ǀhomǃgāgu ǃnâ-ū gere māhe haisi-amde da ge a ǁkhāǁkhāsen ǁoa, xoamâihe tama i ka hâ io. ǁNās ǀkhab ge Jehovaba sida nî ǂansab ǂhâba hâ xūna, khoega ge “xoamâi” kai ǁîb ǂkhanis ǃnâ. Jehova “Elob ra dīn ge a dīǀoaǀoasa.” ǁNās ǃaroma da ge ǂgomǃgâsiba a ūhâ ǁkhā, ǁîb sida ǀkha ra ǃhoa ǀgaub kaise a ǂoaǂamsasa. Tsî î sida ǃgâib ǃgao ǀgui hâsa.—Psa. 18:30. w23.02 2 ¶1-2

Sīǃnâ ǁkhā du a mîǁguiga dī re. Mîǁguigu hîna sadu ǂgomsa ǀgaiǀgai tsî nî hui du ga ǁhûi re. (Efe. 3:16) Aiǁgause du ge ǀnîsi a mîǁgui ǁkhā, î du ǁkhāǁkhāsen. Tsî ǃnāsase Elobmîsa khomai. (Psa. 1:​2, 3) Tamas ka io du ge dītsâ ǁkhā, î du ǃnāsase sadu ǂgaoba xu ǀgore. Tamas ka io du ge ǀnîsi nî ǂanbasen, mâ ǀgaub ai du ǁkhoaxa ǁaeba ra ūhâs. Tsî mati du sadu ǁaeba ra sîsenū ǀgaub tsîna. (Efe. 5:​15, 16) Jehovab ga mû o, ǃgarise du ra sîsensa î du ǃgâiǃgâisen ob ge kaise nî ǂkhî. Nau ǃgâsana du ga hui, o du ge gagasise ra kai. Aiǁgause, du ge ǀnîsi a mîǁgui ǁkhā, î du kairan tsî sorosi ǃnubusiga ūhân tsîna sadu ǀhaohâb ǃnâ hui. ǀNîsi du ge a hui nî ǁkhā, xūna sī ǁamas ǀkha. Tsî ǁîn di elektronik xūn ǀkha a hui nî ǁkhā. Tsî du ge ǁnān hîna ǀhaohâb ǃauga hân tsîna ǀnamma ra ǁgau. ǃGâiǂhôasa du ga ǁîn ǀkha ǀgoragu o. (Mat. 9:​36, 37) Īǁkhā i ga o, mîǁguiba dī re î du Jehovaba ǀoasase ǃoaba. w22.08 6 ¶16-17