Septemberi

ǃHoas ǀkhaeba da ga ǃgâise sîsenū, o da ge ra ǁgau, Jehovaba da ra ǃoabasa. Sida ǃhoa ǀgaub ge ra ǃgāsa kai, “ǁnāb Eloba ra ǃoabab tsî ǁnāb, ǁîba ǃoaba tamab tsîkha ǁaegu.” (Mal. 3:18) Khomai re, ǁnās ge mati a ama isa ǃgâsas Kimberlys ǃaroma. ǁÎs ge ge ǁgaumâihe îs skol sîsen-e skol ǀhōsa-i ǀkha dī. ǁNā skol sîsenni ge toa, os ge nau skol ǀhōsasa ge mû Kimberlys a ǀkhara ǃkhaisa. ǁÎs ge nau ǀgôana ge ǀhoe tama hâ i tsî ǃgâi xūn ǀguina gere ǃhoa. ǁGai gowabas ge ge sîsenū tama hâ i. Kimberlys klas ǀhōsas ge ǁnās xa ge ǃgâibahe tsî Elobmîsa ge ǁkhāǁkhāsen tsoatsoa. Jehovab ge ra ǂkhî khoena amaba ǃoa ra ǂgae ǀgaub ǃnâ da ga ǃhoa o. Hoa da ge Jehovaba ǂkhaisiba ra mā ǀgaub ǃnâ ra ǃhoa ǂgao. w22.04 5-6 ¶5-7

Jesub ge Maria Magedalensa hû demonga xu ge ǃnoraǃnora. ǁÎs di ǃgôaǃgâsib ge ge ǃaroma, îs ǁîba sao tsî aoǁnâ sîsenni ǃnâ ǂkhâǃnâ. (Luk. 8:​1-3) Marias ge ǀnîsi Jesub ge dībasi xū-e ǃgam ǃgôasiba ge ūba hâ i. Xawes ge ge ǀū i, Jesub ga ǁnā-i xa ǃnāsa xū-e dībasi hâsa. ǁÎb ge ǁîb di ûiba ga mā hâ în ‘ǁîb ǃnâ ra ǂgom na’ ǀamo ûiba hō ǁkhā. (Jhn. 3:16) ǁNās ǃnâ-ūs ge Mariasa, ǁîs di ǃgôaǃgâsiba ge ǁgau. Jesub ǃoagu ǂgomǂgomsase hâsa. Jesub ge tsûb ǃnâ ǃgâuhaib ai mā io, os ge Mariasa ǁîb xōǀkhā ge mā i, îs ǁîb tsî naun tsîna ǂkhâǃnâ. (Jhn. 19:25) Jesub ǁōb khaoǃgâ î ge Marias tsî ǀkhara ǂkham khoera tsîna, ǂkhau-ū xūna ǁîb ge ǁkhō-e ǃkhaisa tawa ge sī-ū. (Mrk. 16:​1, 2) Marias ge aiǂhanuba ge ūhâ i, khâisa ge māhe Jesub ǀkha ǀhao tsî ǃhoasa. Jesub di ǂgui ǁkhāǁkhāsabegu ge ǁnā aiǂhanuba ge ūhâ tama hâ i.—Jhn. 20:​11-18. w23.01 27 ¶4

Tātsē da ge ǃkharu ge ǁaeb ǃnâ da ge, Jehovab ǃoabas ǃnâ dī hâ i xūn ai ǂgomǃgâ ǂgao tama. Nēsi da ga ǃnubusina ǀnais xa ūhâ xawe da ge noxoba nî aiǃgû ǀhapesa ‘ǃkhūb di sîsenni ǃnâ.’ ǂKhaikarihâs tsî xūna ǂans ǃnâ-ū, ǀams kōse. (1 Kor. 15:58; Mat. 24:13; Mrk. 13:33) Ôasa tsî da ge ǂgaob hoab ǀkha nî ǃoaba. Jesub di haisi-ams Laodiseas ǃnâ ge hâ în ǃoagus ge ǀkhara ǃgomsiba gere ǁgau. ǁÎn di ǃoabas ǃnân ge ge ‘ǂoposa’ i. ǁÎn ge ǀopesa i amagab ge Jesuba ǁîna ge mîba. “ǀKhomǀkhomsa tsî ǀgâsa” mâsib ǃnân ge hâ isa. ǁÎn ge ôasasiba Jehovab tsî ǁîb ǃoabas ǃnâ nî ǁgau ge is ge. (J.ǂHa. 3:​16, 17, 19) Tae-e da ra ǁkhāǁkhāsen? Sida ôasasiba da ga ǂoaǃnâ, o da ge ǃgôaǃgâsiba Jehovab tsî ǁîb di ǀapeǂhumis ge dība da xūna nî ǁgau. (J.ǂHa. 3:18) ǃGâi ûiba da ge tā nî ôabasen î da tā ǂâi. Jehovaba ǃoabas sida ûib ǃnâ ǂhâǂhâsa tama sa. w22.05 3-4 ¶7-8

Duisend kurigab ge Jehovaba ǀō-aisa ǂkhanisa ra xoa. Nē ǂkhanis ge ǂgui ǀonde ǃkhōǂgā hâ. Tsî ǂgurose ǂgomǂgomsa ǃoaba-aob Abeli ǀons ǀkha ra tsoatsoa. (Luk. 11:​50, 51) ǁNā ǁaeba xub ge Jehovaba nē ǂkhanis ǃnâ ǀonde ge ǀaro. Tsî nētsē miliuns ǃnâ hâ ǀonde ǃkhōǂgā hâ. Elobmîs ǃnâs ge nē ǂkhanisa “ǂâiǂâisens di ǂkhanis,” ‘ûib di ǂkhanis’ tsî ‘[scrols] xamîsa ûib ǂkhanis’ ti ra ǂgaihe. (Mal 3:16; JǂHa 3:5; 17:8) Nē ǀō-aisa ǂkhanis ge khoen ǀonde ǃkhōǂgā hâ hîna ge Jehovaba ǃaoǃgâsib tsî ǃgamǃgôasib ǀkha gere ǃoabana. Tsî ǁîb ǀonsa a ǀnamna. ǁÎn ge ǀamo ûiba ǃkhōǃoas di ǃēsa nî hō. Nētsēs tsîna î ge sida ǀonde, ǁnā ǂkhanis ǃnâ a xoahe ǁkhā. ǀGū ǀhōsagusisa da ge Jehovab ǀkha a omkhâi ǁkhā. Tsî da ge ǁîb ǀgôab Jesub Xristub ge dība da xoremarib ǁguibas ǃnâ ǂgomsa nî ǁgau. (Jhn. 3:​16, 36) Hoa da ge ǂhâba hâ, î-î sida ǀonde ǁnā ǂkhanis ǃnâ xoamâihe, nēsi da ga ǀhommi di ǃâubasens tamas ka io ǃhūbaib disa ūhâ xawe. w22.09 14 ¶1-2

ǂHaiǂhais ge “kai ǀapa draki” xas tsîna ra ǃhoa. (J.ǂHa. 12:3) ǁNā draki ge Jesub tsî ǁîb ǀhomǃgāgu tsîn ǀkha ra ǃkham. (J.ǂHa. 12:​7-9) Tsîb ge Elob khoena ra ǁnāǂam tsî ǀgaiba khoesi ǂgaeǂgui-aoga ra mā. (J.ǂHa. 12:17; 13:4) Nē draka a ham? ǁÎb ge ‘kaira ǀaob, ǁGâuab tsî Satanni ti ra ǂgaiheba.’ (J.ǂHa. 12:9; 20:2) ǁÎb ge Jehovab di khākhoen hoana ra ǂgaeǂgui. Tae-e draki ǀkha nî ī? ǂHaiǂhais 20:​1-3 ge ra ǁguiǃā, ǁGâuab nî ǃgam āb ǃnâ aoǂgāhesa. Tsî ǁnā āb ge tronkhes khami ī mâsiba ǃoa ra ǁnaeǁgau. ǁNā tronkes ǃnâb ge ǁGâuaba ‘ǃhaode ǂgaeǂhapu tide, 1 000 kurigu nî toas kōse.’ ǀAms aib ge ǁGâuab tsî ǁîb demongu tsîna, ‘ǀaes’ ǃnâ nî aoǂgāhe. Nēs ge ra ǂâibasen ǀamosib kōse gu nî dīkākāhesa. ǂÂi re ǃhūbaib hîna ǁGâuab tsî demonga ūhâ tideb xa. ǁNāb ge kaise nî ǃgâi ǁaeba. w22.05 14 ¶19-20

Jesub ge ge ǃgari sîsen-ao i. ǂKham-i ge i, ob ge ǃnao kuru sîsen-e gere dī. (Mrk. 6:3) ǁÎb ǁgûra ge kaise ǁîb huiba gere ǃgôaǃgâ, kai omarisa ra gere kōǃgâ amaga. Jesub ge ǀoasa kurusa ge ūhâ i tsî ǁnās ǀkha ǃgâi sîsen-e gere dī. Tsîn ge khoena ǀnîsi ǁîb gere dī xūna gere ǂhâba. ǁÎb di sîsenni xab ge ge ǃgâibahe i. ǃGari sîsen-aob i xaweb ge Jesuba ǁaeba gere ǁamaǂui Jehovaba ǃoabas ǃaroma. (Jhn. 7:15) Tsîb ge ega ǀoasa aoǁnâ-aob ase, ǁîb di ǃgâ-aona ge ǀapemā: “Tā kā ra ǂû-i ǃaroma sîsen, î du ǁnā ǂû-i, ǀamo ûib kōse ra hâhâ-i Khoen Ôab nîra mā du-i ǃaroma sîsen.” (Jhn. 6:27) Jesub ge ǃhommi aoǁnâs ai ge mî: “Î du ǁuiba ǀhommi ǃnâ ǀhaoǀhaobasen.” (Mat. 6:20) Jehovab gā-ai ǀapemāsa da ga sîsenū, o da ge ǀnōsa mûǂuiba sîsenni xa nî ūhâ. Xristeǁî da ase da ge ra ǁkhāǁkhāhe, î da ǃgarise sîsen tsî ‘ǃomkha ǀkha ǃgâi xū-e dī.’ w22.05 22 ¶9-10

Eunikes ge ǃgâi aiǁgausa Timoteuba ge mā. ǁÎb ge ge mû ǁkhā i ǁîb mas dīgu Jehovabas ūba hâ ǀgaisa ǀnammi xa ra ǂkhâǃnâhesa. Jehovaba ǃoabas ge ǁîb mamasa gere ǂkhî kai. ǁKhā ǀgaub ǃnâ di ge ǂgui ǁgûde nētsē ‘mî-i ose.’ ǁÎdi omaridi khoen ǂgaoga ge tsâǀkhā. (1Pet. 3:​1, 2) Sadu tsîn ge nēsa a dī ǁkhā. Mati? Sadu Jehovab ǀkha du ūhâ ǀhōsagusisa as ǂhâǂhâsa re. (Deu. 6:​5, 6) ǂGui ǁgûdi khami du ge sadu tsîna ǂgui xūna ra dī. Sadu ǁaeb, mari-i, ǁoms tsî ǀnîhâ xūn tsîna du ge ǀguiǀkhāb ai ra mâi, sadu ǀgôan sorosi ǂhâsiga kōǃgâs ǃaroma. Xawe du ge tā ǁnātikō ǁaeba nē xūna kōǃgâs ǃnâ nî sîsenū. Î du tā sadu Jehovab ǀkha ūhâ ǀhōsagusisa ǂhābē. Hoaǁae ǀguri ǀgore, Elobmîsa ôaǃnâ tsî ǀhaodi ǃaroma ǁaeba ǁamaǂui re. Nēsa du ga dī, o du ge sadu gagasi mâsiba nî ǀgaiǀgai. Tsî ǃgâi aiǁgausa sadu omaris tsî naun tsîna nî ǁgau. w22.04 16 ¶1; 19 ¶12-13

ǂKhîba i ge ra mā da ǂan da ga o. Sida a mîǁgui ǁoasa, mati i khoe-e nî ǀgoraǃgâhesa. ǀGapi ǀgoraǃgâ-aob a amagab ge Jehovaba nē ǂhâǂhâsa sîsen-e nî kōǃgâ. (Rom. 14:​10-12) ǀGaisa ǂgomǃgâsiba da ge a ūhâ ǁkhā. ǁÎb hoaǁae ǂhanu ǀgaugu ai nî ǀgoraǃgâsa. (Gen. 18:25) ǁÎb ge tātsē ǂhanu-oǃnâ xū-e dī tide. Mûǂui da ge ra ǁnā ǁaeb hînab Jehovaba ǀoasase. Khoesi ǀoasa tama kurus tsî ǁoreb tsîna nî ūbēsa. ǁNā ǁaeb ai i ge sida di sorosi tsûgu tsî hânîse ī tsûn hoana nî ūbēhe. (Psa. 72:​12-14; J.ǂHa. 21:​3, 4) ǁÎn ge tātsē sida di ǂâidi ǃnâ hā tide. ǁNā ǁkhoaxa ǁaeba da ge ǃâu hâ. Tsî da ge kaise ra gangan. Jehovab ǀûbas ǁkhāsiba mā da hâ ǃkhais ǃaroma, î da ǁîba ǁgae. w22.06 13 ¶18-19

ǃGâi ǀgoraǃgâ-aob ge ǃgamse ǂhanuba nî ǂan. ǁÎb ge nî ǂan mâ i-a ǂhanu tsî mâ i ǂhanu tamasa. ǃGâi ǀgoraǃgâ-aoba tae-i tsîna ǂhâhâ? ǂHâbasa xūn hoanab ge nî ǂan ǀgoraǃgâb nîs aiǃâ. Jehovab ge a ǂhanu ǀgoraǃgâ-ao. ǁÎb hoaǁae amaba a ǂan amaga. Jehovab ge khoesi ǀgoraǃgâ-aogu i khami ī tama hâ. ǁÎb ge ǀgoraǃgâb nîs aiǃâ hoa xūna a ǂan. (Gen. 18:​20, 21; Psa. 90:8) ǁÎb ge khoen ra ǁnâu tsî mû xūn ǀguina ǂan tama. ǁÎb ge ra ǁnâuǃā khoe-i ge ǁgûna xu hō ǂūb. Skoli ǂans, mâpa i ge kais, ǁî-i tsâsib tsî ǁî-i ǂâiǀgaub, tanisen ǀgauba ra tsâǀkhāsa. Jehovab ge ǂgaob tsîna ra khomai. ǁÎb ge ǃamkuse ra ǁnâuǃā tae-i ǃaroma i khoe-e xū-e ra dīsa. ǁÎba xu a sâuhe ǁkhā xū-i ge ǀkhai. (Heb. 4:13) Jehovab ga khoe-e ǀûba, ob ge hoa xūnab a ǂan amaga ǁnāsa ra dī. w22.06 4 ¶8-9

ǁGâuab ge Jobi ai a sîsenū ǃnûide da ge nî ǂanǂui. ǁÎb ge ǁkhā ǀgauga sida ai ra sîsenū. ǁGâuab ge ra mî, sida Jehova Eloba ǀnam tama hâsa. Tsî da sida ûiba sâus ǃaroma ǁîba nî ǁnāxusa. ǁGâuab ge noxoba ra mî, Elob ǀnamda tama hâsa tsîb dī da ra xūna mû tidesa. ǁGâuab tae-e ra sīǃnâ ǂgaosa da a ǂan, amaga da ge ǁîb ǂhumiba ǂgom tama. ǃGomsin hîna da ra hōǃâna xu, da ge a ǁkhāǁkhāsen ǁkhā. Jobi ge hōǃâ ǃgomsin ge ge hui bi, îb ǁîb ǂkhabusasiga mûǃā tsî dī-ūnu. Aiǁgauseb ge ge ǁkhāǁkhāsen ǃgamǃgamsenxasibab ǂhâhâsa. (Job. 42: 3) Sida tsîn ge ǃgomsin ǃnâ da ga ǂgâ o, mâ khoeda asa a ǁkhāǁkhāsen ǁkhā. Sida di ǂkhabusasiga da ga mûǃā o, da ge ǀkharaǀkharana a dī ǁkhā. w22.06 23 ¶13-14

Jehovab ge huidab nî ǃkhaisa ra mîmâiba da. Aiǁgause, “sadu ge ti ǃkhō-amaodo” tib nî mîs aiǃâb ge ge mî: “ǁGammi ǃnâ-uts ga ǃkharu, o ta ge sats ǀkha nî hâ, ǃāgu tsîn ge dâuǂam tsi tide. ǀAes ǃnâ-uts ga ǃkharu, xawets ge ǂhubi tide tsî ǀaeǁhabub on ge ǂhubi tsi tide.” (Jes. 43:2) Aoǁnâ da ra hîna da ge ǀnî ǁaegu ai, xūn hîna ǁgam dâus khami ra ǁkhaedana ra hōǃâ. Tsî kai ǃgomsin hîna da ǀaes ǀkha a ǀgopeǀnō ǁkhāna. ǁNāti i ga ī xawe da ge Jehovab huib ǀkha ra aoǁnâ ǀgara. (Jes. 41:13) ǂGui khoen ge nētsē sida haisi-amsa ūǃoa tama. ǂÂis ǃnâ da ge nî ūhâ, ǁîn ūǃoa tamas ge ǂâibasen tama ǃgâise da aoǁnâ tama hâ ti. Jehovab ge a ǂkhî ǂgomǂgomsase da ga aiǃgû tsî ǁîb di haisi-amsa ga ra aoǁnâ o. ǁNāsa ǂansa xu da ge ǁkhaeǂgaos tsî ǀgaib tsîna ra hō. Apostel Paulub ge ge mî: “Mâb hoab ge ǁîb di mādawa-amsa ǁîb di sîsenni ǂûb ǃoa nî ǃkhōǃoa.”—1Kor. 3:8; 4:​1, 2. w22.11 4 ¶5-6

Elobmîs kēbodi nētsē ra dīǀoaǀoahesa da ge ra mû. ǃKharagagu “ǁaedi tsî gowaga xu” hâ khoen ge ra ǁkhāǁkhāsen în “ǀgoreǀî tsî ǀguiǃnâxase ǃoaba.” (Sax. 8:23; Sef. 3:9) 8 000 000 Xa ǃnāsa khoen ge, 240 ǃhūgu ǃnâ Jehovab ǀapeǂhumis di ǃâ. Tsî mâ kurib hoaba i ge ǂgui khoena ra ǁāǁnâhe. Nē ǃgôagu hoagu xa ǂhâǂhâsa i ge Xristeǁî ǀgauga ‘ǀasa ǂūb’ hînan nē ǁkhāǁkhāsabena ūhâba. (Kol. 3:​8-10) ǂGuin ge ǂhumib, ǂkhabadīb, ǀgoras tsî tradisi xūn ǃnâ ge ǁhao ǀû. Nē kēbos hîna, Jesajab 2:4 ǃnâ hâs ge ra dīǀoaǀoahe, mî ra sa; ǁÎn ge “tātsēs tsîna ǁkhawa ǃkhams ǃaroma ǂhomisen tide.” ǀAsa ǂūba ǂgaeǂgās ai da ǃgarise ra sîsen, hîna da ge khoena ra hui în Jehovab di ǀapeǂhomis tawa ǀgū. ǁNās ǀkhas tsîna ra ǁgau sida di mûǂam-aob Jesub Xristuba da ra saosa. (Jhn. 13:35) Tae-i ǃaroman nē xūna ra ī? Jesub ǂhâ da hâ huiba ra mā da amaga. w22.07 9 ¶7-8

Jehovaba ǃoa da ga ǀgore, o da ge nēsa kai ǃgôaǃgâsib ǀkha nî dī. Jesajab, Esegieli, tsî Johaneb ge hō buruxa ǁhapodi xa ǂâi re. Hoadi ge Jehovab buruxa ǃkhaisa ra ǁguiǃā. Jesajab ge Jehovaba “ǀgapiseb trons ai ǂnôase ge mû.” (Jes. 6:​1-3) Esegieli ge Jehovaba trons aib ǂnôase ge mû, tsî ǁîb ǂnamipe i ge ‘ǂkhai ra ǃnâba ge hâ ī . . . ǀapiǃhanab (rainbow) khami ī ba.’ (Ese. 1:​26-28) Danieli ge ‘ǀamosib kōse ûi hâba ge mû.’ ǁÎb di saran ge ge ǃuri ī tsî ǀaes ge ǁîb di tronsa xu gere khau. (Dan. 7:​9, 10) Johaneb ge Jehovaba trons aib ǂnôase ge mû, ǁîb ǂnamipe i ge îxa emraldǃam rainbow ba ge hâ ī. (J.ǂHa. 4:​2-4) Jehovab di ǀgopeǀnōhe ǁoa ǂhaisib xa da ga ǂâi, o da ge ra hōhōǃnâhe. Matikōse da kai aiǂhanuba ūhâsa ǁîba ǀgores ǃnâ-ū ǀgūsa. Kaise da ge Jehovaba ra ǃgôaǃgâ ǀgores aiǂhanubab mā da hâs ǃaroma. w22.07 20 ¶3

ǂKhamkhoedo, ǁgâuab ge nî dītsâ tsî sa ǂgomsa nî ǂkhabuǂkhabu îts tā Jehovab ǀgūse sī. ǀGui ǀgaub ǁîb ǁnāsa a dī ǁkhāb ge, îganǀgēs tsâsiga sats ǃnâ omkhâisa. Elobmîs ra ǁkhāǁkhān ama tama ǃkhaisa. Aiǁgause, i ge ǀnî khoena a mîba tsi ǁkhā Elob ge sida kuru tama hâ īsa. Tsî da ge ǃhūbaib ai evolusib ǃnâ-ū a ǀkhīsa. ǀNîsi du ge ǂkham du ge io, ǁnā i xa ǂâis tsîna ge di tama hâ i. Xawe du nēsi kai hâ, o du ge ǁnā-e skoli tawa ra ǁkhāǁkhāhe. ǀNîsin ge sa ǁgauǃnâ-aon ra mî xūna, nēsi ǁnâuǃāxase ra mûsen. Xawe i ge a īǁkhā, ǁîn ge tātsē dītsâ tama hâ isa în ǂanǂui Kuru-aob hâsa. ǂÂihō re ǀapemās hîna ǂKhoamîdi 18:17 ǃnâ hâsa: “ǂGurose ǁî-i ǁhōba ra aoǁgui khoe-i a ǂhanu khami i ge ra mûsen, ǁî-i di mâǃoa-ao-i hā tsî ǁî-e dîǃnâ tamas kōse.” Skoli aits ra ǁkhāǁkhāhe xūna ūǃoas ǀuisa dīs xa ǃamkuse amaba Elobmîs tsî sida di ǂkhanin ǃnâ ôaǃnâ re. w22.08 2 ¶2; 4 ¶8

Elobmîs ǃnâ da ra khomai xūn di ǂâibasensa da ge ra ǁnâuǃā ǂgao. ǁNāsa da ga dī tama io, o i ge khomai da ra xūna sida ai ǃgâiǃgâibasensa ūhâ tide. Aiǁgause, Jesub ge “ǂanǂansa ǂhanuǂanseb” ǀkha gere ǃhoa ǀgauba mû re. (Luk. 10:​25-29) Khoeb ge dî o, tae-eb a dī ǁkhāsa îb ǀamo ûiba hō, ob ge Jesuba ǁîba Elobmîsa ǃoa ge ǁnaeǁgau dî rase: “Mâti i Moseb ǂhanub ǃnâ xoahe hâ? Tare-ets ǁnāpa ra khomai?” Khoeb ge ǂhanu ǃereamsa ge mā, xoasa ǃoa ra ǁnaeǁgause Eloba ǀnams tsî ǀgūkhoena ǀnams. (Lev. 19:18; Deu. 6:5) Xawe mû re ǁîb ge ǁnāpaxū tae-e a mîsa: “Tari-e a ti ǀgūkhoe?” ǁÎb ge ge ǁgau, ǁîb ǁnâuǃā tama hâsa khomaib ra xūna. Tsî ǁnās xa ǃaromahe hâseb ge ge ǀū-i matib ǁnā xoade ǁîb ûib ǃnâ nî sîsenǂuisa. Jehovab huiba da ge ǂhâhâ xoade ǁnâuǃāsa, ǁnā-amaga da ge ǁîb di gagaba ra ǂan îb hui da ǃgaoǃgâsa. ǁNās ge nî hui î du khomai du ra xūna ǁnâuǃā. w23.02 9 ¶4-5

“Mati du ge amaba hō?” ǂGom da ge ra ǁnā dîsa du ge ǂgui ǃnāde a ǃereamsa. ǁNāti ge ǂguro dîdi hînan ǃgâsana ǂangu ǂgaon ra ǃkhais ǃaroma ra dîna. ǃGâibahe da ge a sida ǃgâsana xu ǁnâusa, matin ge Jehovaba ǂan tsî a ǀnam tsoatsoasa. Kaise da ge a ǃgâibahe khoena mîbasa. Tae-i ǃaroma da ge Jehovaba a ǃoaba tsoatsoasa. (Rom. 1:11) Nē ǁgamǀhaodi ge ra ǂâiǂâi da matikōseb amaba a ǀō-aisasa. Tsî da ge ǁnās ǃnâs tsîna ra ǁguiǂgāsen, î da ǃnāsase ‘amab ǃnâ ǃgû ǀgara’ ǁkhā. Tsî ǁnās ge Jehovaba ra ǂkhîǂkhî ǀgaub ǃnâ ûisa. ǂGui ǃaroma di ǃgao da ge amaba a ǀnam. ǂHâǂhâsase da ge Jehova Eloba a ǀnam, amab mā-aoba. Elobmîs ǃnâ-ū ǀgui da ge ǁîba ǂan tama hâ, ǀgaisa Kuru-aob ase ǀhommi tsî ǃhūbaib diba. Xawe da ge ǁîba ǀnamxaǃnâ ǀhomsi ǁGûb ases tsîna a ǂan, sida ra tsâbaba.—1Pet. 5:7. w22.08 14 ¶1, 3

Apostel Paulub ge ǃgâsana gere ǂkhâǃnâ, în ǀnamma ‘ǃgâi sîsengu’ ǃnâ-ū ǁgaugu. (Heb. 10:24) ǁÎb di ǃgâsanab ge ge hui mîb gere xūn ǃnâ ǀguis ose xawe dīb gere xūn ǃnâ-ūs tsîna. Aiǁgausen ge Judab ǃnâ ge hâ i ǃgâsana ǃâtsūǀkhāba gere hōǃâ, ob ge Pauluba ǂhân ge hâ i xūna ge sī-ūba nî. (ǃNǃkh. 11:​27-30) Aoǁnâs tsî ǁkhāǁkhās sîsenni ǃnâb ge ǀhabe i. Xaweb ge Pauluba ǀgauga hoaǁae gere ôa, îb ǂhâsib ǃnâ hâna hui. ǁNātib gere dī amagab ge ǃgâsan ǂgomǃgâsiba gere omkhâi, Jehovab nî kōǃgâ nîsa. Nētsē da ga sida ǁaeb, ǀgaib tsî ǂandi tsîna ga sîsenū, o da ge tsūkēǃgâb ǃnâ hâna hui. Tsî sida ǃgâsan ǂgomsa ra omkhâi. Tsî ǁnāsa da ge a dī ǁkhā, ǃhūbaib ǂhawase ra dīhe aoǁnâ sîsen-e ǂkhâǃnâs ǃnâ-ū. Nēn tsî ǀnî hâ ǀgaugu ǃnâ da ga sida ǃgâsana a hui. O da ge ǂgomǃgâsiba ra mā nî, Jehovab tātsē ǁnāxu nî tidesa. w22.08 24 ¶14

Elobmîs ge ǂgui kēbode ūhâ, hîna ge dīǀoaǀoahede. ǀNîn ge ge ama kai, 100 kurigu aiǃân ge xoahe hâ i xawe. ǃKharu ge ǁaeb ǃnâ ge ī xūn ge ra ǁgau, nē kēbodi ge ama īsa. Nēs ge buru kai da tama hâ, ǂan da a amaga nē kēbode ge xoaǁnâ kai khoeb a Jehovasa. Aiǁgause, Babilons di ǁnās di kēbodi xa ǂâi re. 778 Tsî 732ǁî kurigu Jesub ǃnaes aiǃâb ge Jesjaba ge kēbo ǁnā ǁaeb di Babilons nî dīkākāhesa. ǁÎb tsîn ge ǁîsa nî ǁnāǂam khoeb di ǀonsa ge mā, Kores dib ge gere ǂgaihe. Tsîb ge kēbos tsîna ge dī, Koresi mati ǁnāsa nî dīsa. (Jes. 44:27–45:2) Jesajab ge kēbos tsîna ge dī, Babilons hoase nî dīkākāhesa. Tsî i khoe-e, ǁkhawa ǁnāpa hâ tidesa. (Jes. 13:​19, 20) Babilons ge Medeǁîn tsî Perseǁîn xa 539ǁî kuri, Jesub ǃnaes aiǃâ ge dīkākāhe. Tsî ǁnā ǃās hîna ge ǀgui ǃnās ai, kaise kai is ge hâǃnâhe tama hâ. w23.01 4 ¶10

Jehovab ge sida ǁhûiǂui hâ î da ǃhūbaib ǂhawase hâ, omaris ǃoaba-aon di ǃâ kai. Nēb ge kaise kai aiǂhanub hîna ǂgui ǀkhaega ǃkhōǂgā hâba. (Mrk. 10:​29, 30) ǃHūbaib ǂhawase da ge ǃgâsan hîna ǀnamma Jehovaba ra ǁgauna ūhâ. Tsî ǁnās ǀkha ǁkhān a-e ra dītsâna, în ǁîb di ǂhanugu ǃoagu ûi. Sida gowaba ǃhoas tsî ana ǀgaub ge ǀnîsi a ǃkharagagu ǁîn dina xu, xawe da ge ǁîn ǀgūse ra tsâ. Nēsi da ga ǂguroǃnās ase ǁîna ǀhao-ū xawes tsîna. Tsî da ge kaise a ǃgâibahe, koas tsî ǃoabas tsîna sida ǀnamxaǃnâ ǀhomsi ǁGûba ǁîn ǀkha ǀguiba māse. Tsî nēsi da ge ǁîn ǀkha ǀguiǃnâxase nî hâ ǀgara. (Psa. 133:1) ǀNî ǁaegu ain ge a hui da ǁkhā în sida ǃgomsina taniba da. (Rom. 15:1; Gal. 6:2) ǁÎn ge ǂkhâǃnâ das tsîna ra di, î da Jehovab di ǃoabas ǃnâ hâ ǀgara. Tsî ǁnās ǀkhas tsîna gagasise ǀgai ǁkhā. (Heb. 10:​23-25) ǂÂis ǀguisa di re mati da nî tsâsa, ǀhaohâb xa da ga ǁkhaubahe tama ī. Tsî hui-e hō tama ga io, î da sida ǂanǂansa khākhoeba mâǃoa. Satanni hîna a ǁGâuab tsî nē ǁgai ǃhūbaiba xus tsîna. w22.09 2-3 ¶3-4

Sada di ǃkhō-oasens ge a ǃâitsâhe ǁkha internetsa da ga sîsenū o. ǂAnbasen tama da ga io, o da ge ǀūǃgâsib ǃnâ ǂganǃgâsa xuna ǂgui khoena a mîba ǁkhā. ǀGui ǃnāsa i ga ǁnâ xū-e internets ai a ǂoa, o da ge a ǁkhae ǁoa mati i nî sîsenūhesa tamas ka io mâ ǀamǂoasa i nî ūhâsa. ǃKhō-oasens ge ra ǁkhāǁkhā da, î da ǃnō mâǃoa-aon ga gaxaǃnâ da. Tsî sida ǃgâsan xa xūna dîǃnâ da o, hîna ǁîna ǁkhōǁkhōsa mâsib ǃnâ mâi ǁkhana. Nēs ge sida aoǁnâ sîsenni a ǂhāsa ǃhūgu ǃnâ a īǁkha. Nē daoǁgausa da ge nî sao ‘tsî da ge sida namsa tomsa nî ǂgā-amǃnâ’ nēti ī mâsigu ǃnâ. (Psa. 39:1) Sida omaris ǁanin, ǀhōsan tsî ǃgâsan tamas ka io da ga ǀnîha khoen ǀkha hâǁae, o da ge ǂhauǃnâsiba nî ǁgau. ǂHauǃnâsib ǃaroma da ge ǃkhō-oasensa ǂhâhâ. w22.09 13 ¶16

Ama ǃgâiaǂgaoba da ga ūhâ ǂgao, o da ge gagasi ǂû-e nî ūǂgā. ǁÎ-e da ge ǂhâhâ, ǁnā-amagab ge Jesuba ge mî: “Khoe-i ge pere-e xu ǀgui ûi tama hâ, xawe mâ mîs Elob amsa xu ra ǂoas hoasa xu.” (Mat. 4:4) ǁNā-amaga î ge tā, tsēsa nî ǃkharu Elob ǀō-aisa ǂkhanis, Elobmîsa xu da khomai tama ha hîna. Jehovab a ǀnam da amagab ge Elobmîs ǃnâ ra ǁgau da, î da ǃgâiaǂgaob ǀkha ûi. ǁKhāǁkhāsen da ge ra ǁîb ǂâibasens a taesa, sada ûib ǃaroma. ǁKhāǁkhāsen da ge ra mati da ǁîba nî ǀgūsa. Tsî tae-i a ǂhâbasasa dī da nîse în sida ǁorena ǀûbahe. ǃGâi ǃâubasens hînab hānîǁaeb xa mîmâihâs xas tsîna da ge ra ǁkhāǁkhāsen. (Jer. 29:11) Nē amab hîna da Elobmîsa ǁkhāǁkhāsensa xu ra hōb ge, sada ǂgaoga ǃgâiaǂgaob ǀkha ra ǀoaǀoa. Ûib ǃgomsigu xa du ga ǂhapuǂâi ǁaeb hoaba. ǃNāsa ǁaeba Elobmîsa khomai tsî ǂâiǃgâ re. Jesub ge ge mî: “ǀKhaehen ge hâ ǁnān Elob di mîsa ǁnâu tsî ra sâubasenna.” w22.10 7 ¶4-6

ǃGâi ǃaromas ǀkhas ge Elobmîsa ra ǂkhâǃnâ da, î da ‘ǂansa ūhâ tamase’ tā hâ ǀgara. Gā-aisiba da ge ra hō, Elobmîs gā-aisiba da ga sida ûigu ǃnâ sîsenū o. Nēsa da ga dī, o da ge nî mû matis Elobmîsa ra hui dasa, î da ǃgomsina xu ǂgōsen tsî gā-ai mîǁguiga dī. Mîǁguigu hîna da ra dīgu xa ǂâis ge a ǃgâi. Aiǁgause, Elobmîsa ǁkhāǁkhāsen tsî du ǀhaode ǃoa ra ī, xawe du noxopa māǁnâsen tsî ǁāǁnâ kaisen tama hâ? ǀNîsi da ge nî dîsen, tae-e da nî dī î da ǁnā mîǁguiba sīǃnâ? Tsî tae-i ǃaroma da ǁnāsa noxoba dī tama hâ? ǁĀǁnâhe du ga o, aoǁnâ-ao-i tsî ǁkhāǁkhā-ao-i ǃgâiǂhôas di i ase du ǃgâise ra dī? Sida mîǁguiga ra ǁgau Elobmîs xa da ra daoǁgauhesa? Sida Xristeǁî ǀgauga ǁgau-i ra nau khoen ǀkha da ra hâ ǀgaub ǃnâ? ǀKharaǀkharana dīs ga ǂhâbasa o, hā re î da Jehovab di hōhōǃnâdi ai ǂâisa ǂnûi. Hîna “ǁau khoe-i tsîna” ra gā-ai kai-e.—Psa. 19:7. w22.10 20 ¶8

Esegieli ge ge mû, matib Elob gagaba a ǀgaisa ǀgausa. ǁÎb ge ai-īsib ǃnâ a mû i ge ǁîba ge hui îb ǂanǃgâ. ǃAnu gagab ge ǀgaisa ǀhomǃgāgu tsî kai kunis ǀnūde gon kais ǀkha gere huisa. (Ese. 1:21) Esegiela tae-e ge dī? ǁÎb ge tae-i ge īsa ge xoa. “Nēsa ta ge mû, o ta ge ais âtas ai ge ǁnāǁgoe.” Esegieli ge kaise ge buru hâ i. Tsî ǃhūb ai ge ǁnāǁgoe. (Ese. 1:28) Esegieli ge ega ǁnā buruxa ai-īsib xa a ǂâi, ob ge ǁîb ǂgomǃgâsiba ge ǀgaiǀgaihe. Tsîb Jehovab ǃanu gagab huib ǀkha ǁîb di aoǁnâ sîsen-e nî dīǀoaǀoasa. Jehovab ge Esegiela ge mîba: “Khoeǃnôa ǀgôatse, khâimâ, sa ǂaira ai mâ, î ta sats ǀkha ǃhoa.” ǁNā mîmās ge Esegiela ǂhâb ge hâ i ǀgaib tamas ka io “gagaba” ge mā îb ǃhūba xu khâi. (Ese. 2:​1, 2) Egab ge ǁîb di aoǁnâ sîsenni hoa-i ǃnâ gere daoǁgauhe “ǃKhūb di ǃommi” xa. ǁNāb ge Elob ǃanu gagaba.—Ese. 3:22; 8:1; 33:22; 37:1; 40:1. w22.11 4 ¶7-8

Nēbab ge kēbo-aob Jesajaba Jehovaba ǁgâuǃnâ-aob, hîna ǁîb studentan ǃgâb ai ǃgû tsî ǁîna ra daoǁgauba, mâ daob ain nî ǃgûsa. Nētsē da ge Elob domma sida ǃgâba xu ra ǁnâu. Xawe mati? ǂGui kuriga ǃkharu hâse di ge Elob di mîde, Elobmîs ǃnâ ge xoa-e sida ǁaeb aiǃâ. ǁNā-amaga i ge Elobmîsa da ga khomai o, Elob domma da sida ǃgâba xu ra ǁnâu khami i. (Jes. 51:4) Mati da ǀoasase ǃgâiba a hō ǁkhā, Jehovab ra mā daoǁgaude saos ǃnâ-ū? ǃGaoǃgâ re Jesajab ge ǀgam xūn xa ge ǃhoa. ǂGurose, “nēb ge daoba.” ǀGamǁîse “ǁÎb ai ǃgû re.” ǂÂu tama i ge hâ “daob” ǀguiba da nî ǂansa. ǂHâbasa i ge a ǁîb ai da nî “ǃgûsa.” Jehovab mîs tsî ǁîb ǀapeǂhumis ra ǁguiǃāba da xūna xu da ge ra ǁkhāǁkhāsen. Jehovab tae-e sida xu ǂgaoǀkhā hâsa. ǁKhāǁkhāsen da ge ra, ǁkhāǁkhāsen da ra xūna da mati nî ûiǂuisa. Jehovab ǃoabas ǃnâ ǃgâiaǂgaob ǀkha mâǀgais ǃaroma i ge a ǂhâbasa hoa ǀgam xūna dīsa. ǁKhāǁkhāsen da ra xūna da ga ûiǂui, o ǀgui da ge Jehovab xa a ǀkhaehe ǁkhā. w22.11 11 ¶10-11

Jesub di apostelgu ge ǁō toas khaoǃgâ, î ge ama tama Xristeǁîna ǀhaohâb ǃnâ ge ǂgâxa. (Mat. 13:​24-27, 37-39) ǁÎn ge ‘ǂhumi-aon hîna saoǃgonaona’ ǁîn ǃoa ra ǂgaena. (ǃNǃkh. 20:30) ǀGui ǀgaub hînan ǁnā ǂhumi Xristeǁîna ‘ama tama’ xūna ra ǁkhāǁkhā tsoatsoas ge Jesub ge ǁîb di sorosa ‘ǀguiǃnās ǀguisa ge ǁguibasa, ǂguin di ǁorenab nî ūbēse.’ Elobmîs ra mî khami. Xawen ge ǁîna gere ǁkhāǁkhā, ǁîb ǁguibas ǂguiǃnāde nî dīhesa. (Heb. 9:​27, 28) Nētsēn ge ǂgui khoena, ǁnā ama tama ǁkhāǁkhāsa ra ǂgom. ǁÎn ge hoaǁae kerkhegu tawa ra ǀhao tsî ǀnî ǁaegu ai tsēs hoasa, în Jesub di ǁguibas xa ǂâiǂâisen hîna Katoliks kerkheb ǃnâ “the Sacrifice of the Mass” di ra ǂgaihesa. Tsî nau kerkhegu ge ǁnāsa ǀoro ǁaeb ǀguiba ra dī. Tsî ǁnā kerkhegu ǃnâ hâ khoen ge ǁnâuǃā tama, Jesub ǁguibas tae-e ra ǂâibasensa. w23.01 21 ¶5

Jesub duisend kurigu ǂgaeǂguis ǁaeb ǃnân ge ǁō hâna khâisa nî māhe. Tsî hoan hîna Jehovaba ra ǁnâuǀnaman ge ǀoasa kurusa nî hō. ǁNān ǂhanu-aise nî hō-en ge ‘ǃhūbaiba ǀumi tsî ǀamose ǁîb ǃnâ nî ǁan.’ (Psa. 37:​10, 11, 29) ǃGâiaǂgaoxase “ǀuni khākhoeb, hîkākāhe nîb ge ǁōba.” (1Kor. 15:26) Sida di ǃâubasens ǀamose ûis dis ge ǁaposase Elobmîs ai a ǃgaoǃgaosasa. ǁNā ǃâubasens ge a hui da ǁkhā î da ǂgomǂgomsase hâ ǀgara nē ǃgom tsēdi ǃnâ. ǀAmose ûis turab ǀguiba ūhâs ose da ge ǂgui xūn xa nî ǂkhâǃnâhe Jehovaba ǂkhîǂkhîsa. ǁÎkha da ǃgam ǀnamma ūba hâ amaga da ge Jehovab tsî Jesub tsîn ǃoagu ǂgomǂgomsase ra hâ. (2Kor. 5:​14, 15) ǁNā ǀnammi ge ra ǂkhâǃnâ da î da ǁîkha ǁgae. Tsî sida ǃâubasensa naun ǀkha ǀgoragu. (Rom. 10:​13-15) ǁKhāǁkhāsen da go khami da ge tā nî xūǃgunūxa. Xawe da ge nî māxa, î da ǀamose Jehovab di ǀhōsa kai. w22.12 6-7 ¶15-16

ǃGôaǃgonhe da ga, o da ge ǂkhîba ra mā da xūn hoana a ǂoaǃnâ ǁkhā. Nē xūna da ga dīhō tama io, o da ge ra ǂâiǂhansen. Tae-i sao rase nî īsa da a ǀū amaga. Nē ǀgaub ǃnâ tsâs ge tsū tama xawes tsîna da ge noxoba nî ǂanbasen. Jesub ge ge mî, ǃgôaǃgonhes ge ǁîb di saosabena nî ǃnôa kai. (Jhn. 16:​1, 2) Jesub ge ǃgôaǃgonhe da nîsa ǃâubasen ti a mî. Xaweb ge ǂgomǃgâsiba ge mā da ǂgomǂgomsases tsîna da a hâ ǁkhāsa. (Jhn. 15:20; 16:33) Sida sîsenni ga ǂhanub xa ǂgāhe ǁaeb ai da ge, daoǁgaude ǁnâub beros tsî ǀhaohâb ǃûi-aoga xus tîna nî hō. Nē daoǁgaudi ge sada ǃgâib ǃaroma hâ. Tsî ra hui î da gagasi ǂûna ǃkhōǃoa. Tsî ǁkhā da as kōse ra hui, î da aoǁnâ sîsenni ǀkha aiǃgû. ǁKhā du as kōse dītsâ re, nē daoǁgaude saosa ǁnâuǃā tama du ga ī xawe. (Jak. 3:17) Tā da ge sada ǃgâsan xa hâ xūna nau khoen hîna ǂan ǁoan ǀkha nî ǀgoragu.—Aoǁn. 3:7. w22.12 20-21 ¶14-16

Nētsēb ge Jesuba aiǃgû tsî ǁîb di ǁkhāǁkhāsabena ra daoǁgau. Elob Gaosib xan nētsē ǃhūbaib ǂhawase ra aoǁnâ hîna. ǁÎb mîmâisab ge ge dīǀoaǀoa. Jehovab ǀapeǂhumis ǃnâ-ūb ge Jesuba ra ǁkhāǁkhā da mati da nî aoǁnâsa. Tsîb ge ǃgâiǂhôasa da nî aoǁnâ-ū xūn tsîna ra mā da. (Mat. 28:​18-20) Jesub sida xu ǃâubasen hâ xūna da ge ra dī, nau khoena aoǁnâba tsî ǁkhāǁkhās ǃnâ-ū. Tsî da ge ǂkhaikharise ra hâ ǀgara ǂgao, Jehovab ǀamsa nē ǁgai ǃhūbaib ai nî hausa da ǃâuhâ hîna. Hebreǁîn 6:​11, 12 ǃnâ hâ ǀapemāde sîsenūs ǃnâ-ū da ge, sida ǃâubasens ai ra ǃâu ǀgara “ǀunis kōse.” Jehovab ge mîǁgui hâ, mâǁaeb ǁGâuab di ǂgaeǂguisa nî dīkākāsa. ǁNā tsēs ga hā, ob ge Jehovaba ǁîb mîs ǃnâ hâ kēbode nî dīǀoaǀoa. ǀNî ǁaeb ai da ge ǀnîsi a ǂâi ǁkhā, ǃhūbaib ǀams ǀgū ǁae hā tidesa. Jehovab tsēs ge “ǃonkhao tide.” (Hab. 2:3) ǁNā-amaga da ge mîǁgui tsî ‘ǃKhūb Jehovab ai nî kō.’ “Elob hîa nî huiǂui” dab ai nî ǃâu.—Mix. 7:7. w23.02 19 ¶15-16

ǃHommi ai ra ǂoa khoe-i di mîǁguib ge, ǃhommi ǀgapiga sīsa. Xawe i ge ǁnā daob ai ǂgui ǃēde ūhâ, hîna i stop tsî mû-i ra xūn di îsasiba a kō ǁkhāsa. ǁKhā ǀgaub ǃnâ, hoaǁae ǁaeba ǁamaǂui tsî stop tsî ǂâi re. Jehovab mati sado ra ǃgâiǃgâ kai ǀgauba, ǃgomsigu ǃnâ du ra mâǀgai hîna. Tsēs hoas ǀams ai, dîsen re: ‘Mâ ǀgaub ǃnâ ta go Jehovab di ǀkhaeba nētsē mû? ǃGomsin hâ xawe Jehovaba mati ra hui te î ta mâǀgai?’ Kō re, mûǃā ǁkhā du asa Jehovab ge tae-e a dība dusa hui dus ǃaroma. Ama as ge ǀnîsi du ge ra ǀgore, î-i sadu ǃgomsiba ǀam. (Fil. 4:6) Xawe da ge nēsi da ra hōǃâ ǀkhaegu tsîna nî mûǂan. Nēn hoan ǃnâb ge Jehovaba ra mîmâi, ǁîb nî ǀgaiǀgai dasa. Tsî nî hui da, î da mâǀgai. ǁNās ǀkha ganganxa re Jehovab hoaǁae ra hui du ǃkhais ǃaroma. O du ge nî mû, Jehovab mati ra hui du ǀgausa î du ǃgâiǃgâ, ǃgom mâsigu ǃnâs tsîna.—Gen. 41:​51, 52. w23.01 19 ¶17-18

Dîsen re: ‘Tî ûiba ra ǁgau ǁnâuǃā ta rasa, nē ǃhūbaib di ǀams go ǀgū toasa? ǀGapi ǁkhāǁkhāsens tsî sîsenni xa ta ra dī mîǁguiga ra ǁgau, Jehovaba ǃoabas ǂgurose ti ûib ǃnâ ra hāsa? ǂGomsa ta ūhâ Jehovab tita tsî ti omaris tsîna nî kōǃgâsa? Jehovab ge kaise a ǂkhî mûb ga o, ǁîb di ǂâis ǃoagu da ra ûisa. (Mat. 6:​25-27, 33; Fil. 4:​12, 13) Sada di ǂâiǀgauba da ge hoaǁae nî ôaǃnâ tsî ǂhâbasa ǀkharaǀkharana nî dī. Paulub ge Korinteǁîna ge mîba: ‘Aitsama ǃâitsâsen tamas ka io ôaǃnâsen, ise du ǂgoms ǃnâ ûi hâ ǃkhaisa.’ (2Kor. 13:5) Sida di ǂâisa da ge nî ǀasa kai Elobmîsa khomais ǃnâ-ū. Tsî nî ǁkhāǁkhāsen ǁîb ra ǂâi khami ǂâisa. Tsî ǁnā ǀgaub ǃnâ xū-i hoa-e nî dī, î da Jehovab ǂâis ǃoagu ûi.—1Kor. 2:​14-16. w23.01 9 ¶5-6