Augustub

ǃAroma i xa ǂâi re, Jehovab ǁîba ra ǃao. Tsî ǁîb ǀons xa ra ǂâiǂâisen khoen di ǀonde ǁîb di ‘ǂâiǂâisen ǂkhani-i’ ǃnâ ra xoasa? Sida ra ǃhoa xūn ge ra ǁgau tae-i sida ǂgaob ǃnâ hâsa. Jesub ge ge mî: ‘ǀOasib ǂgaob diba xus kom amsa ra ǃhoa o.’ (Mat. 12:34) Jehovab ge ra ǂhâba în ǁnān hîna, ǁîba a ǀnamna ǀamosib kōse ûi hānî ǀasa ǃhūbaib ǃnâ. Sida ra ǃhoa ǀgaub ge a dī ǁkhā, îb Jehovaba sida ǃoabasa ūǃoa. (Jak. 1:26) ǁNān hîna Jehovaba ǀnam taman ge ǃgâi tama ǀgaub ǃnâ ra ǃhoa. ǁÎn ge ǁaixasa, karoǂgaoxa tsî ǂnīsa ǀgaub ǃnâ ra ǃhoa. (2Tim. 3:​1-5) ǁÎn khami da ge ī ǂgao tama hâ. Jehovaba da ge ra ǂkhîǂkhî ǂgao, sida ǃhoa ǀgaub ǀkha. Xawe Jehovaba nî ǃgâibahe omkhâi ra gowaba da ga ǀhaodi tsî aoǁnâ sîsenni ǃnâ sîsenū o, tsî karoǂgaoxase sida omaris ǁanin tsî ǀgū ǀhōsan ǀkha ǃhoa o?—1Pet. 3:7. w22.04 5 ¶4-5

Elob ge 10 ǁnâgu tsî ǀgurub di ǂgaob ǃnâ, ǁîb di ǂâisa gu nî dīsa nî ǂgā, î gu Babilons kaisa hîkākā. Jehovab ge ǀgaisa ǀapa ǀguruba nî sîsenū. ǁNā ǀgurub ge United Nationsa, ǃoa ra ǁnaeǁgau. Nē ǀgurub ge ama tama ǂgomde nî dīkākā. (J.ǂHa. 18:​21-24) Nēsa tae-e sida ǃaroma ra ǂâibasen? ‘Elob tsî ǁGûb aiǃâ ǃanu tsî ǂnao-oǃnâse ī eloǃoabasa’ da ge nî ǃkhōǀgara. (Jak. 1:27) Tātsē da ge mā-am tide, î-i ama tama ǁkhāǁkhā di, Jehovaba a ǀū khoen sâtsēdi, ǃgâi tama ǁgoe-ūgu ǀgaugu. Tsî ǃgaidīb Babilons kais dina sida ǂgaeǂhapu. ǁNā-amaga da ge khoena ra mîba în ‘ǁîsa xu ǂoa’ în ǁîn tsîna tā ǀhapixase Elob xa hōhe.—J.ǂHa. 18:4. w22.05 11 ¶17; 14 ¶18

ǀGauna ôa re sadu ǀgôana, Jehovab xa ǁkhāǁkhāsa. Tsî ǂgui ǃgâi xūn hînab ge dība dun xa. (Deu. 6:​6, 7) Nēs ge a ǂhâǂhâsa sadu ǀgôan ǀkha du ga, hoaǁae oms ai Elobmîs xa ǃhoa ǁoa o. Christine, ti ǀon hâ ǃgâsas ge ra mî: “Gagasi xūn xa ǃhoas ge kaise ge ǀoro i. ǁNā-amaga ta ge hō ta gere ǁae-i hoa-e gere sîsenū.” ǁNās xōǀkhā Jehovab ǀapeǂhumis tsî sadu ǃgâsan xa ǃgâise ǃhoa re. Tā ǀhaohâb ǃûi-aogu xa ǃgâi tamase ǃhoa. ǁÎgu xa du ra mî xūn ge nî dī, sadu ǀgôan ǃgom ǁaegu ǃnâ ǁîga ǃoa nî īsa. ǂKhîba oms ai kuru re. Hoaǁae sadu aob tsî ǀgôana ǀnam nî du asa mîba re. Sadu aob xa ǃgâi tsî ǃgôasiba ra ǁgau ǀgaub ǃnâ ǃhoa re. Tsî sadu ǀgôana hui re în ǁkhā xū-e dī. Nēsa du ga dī, ob ge ǂkhîba nî hâ. Tsî i ge nî supu Jehovab xa ǁkhāǁkhā nîsa.—Jak. 3:18. w22.04 18 ¶10-11

Jesub di haisi-ams Efeses ǀhaohâba ǃoa ge hâ is ge gere ǁgau, ǁîn ge taniǀnamxasiba ǁgausa. Tsîn ge a aiǃgûsa Jehovaba ǃoabasa, ǃgomsinan gere hōǃâ xawe. ǁNāti i ge î-i xawen ge ǂguron ge ūhâ i ǀnamma ge ǂoaǃnâ. ǂOaǃnân ge ǀnamman ga ǁkhawa hō-oa tama io, i ge ǁîn di ǃoabasa ūǃoahe ǁkhā tide. Nētsēs tsîna i ge ǁnāti ǀgui ī, mâǀgai da ge nî. ǃGâi ǃaromadi ǃgao da ge nî mâǀgai. Sida Elob ge tae-e da ra dīs ai ǀgui ǂâisa ǂnûi tama hâ. Xawe tae-i ǃaroma da ra dīs ais tsîna. ǃAromas sida xū-e ra dīs ge ǁîba kaise a ǂhâǂhâsaba. ǁÎb ra ǂgao amaga îs sida ǃoabasa ǃgam ǀnammi. Tsî ǃgôaǃgâsib ǁîb ǃoagu hâb ai ǃgaoǃgaosa. (ǂKhm. 16:2; Mrk. 12:​29, 30) ǂKhaikari hâ tsî da ge xūna nî ǂan ǀgara. Sardis ǀhaohâb ǃnâ ge hâ i khoen ge ǀnî hâ ǃgomsiba ge ūhâ i. Jehovaban ge ǃkharu ge ǁaeb ǃnâ gere ǃoaba. Xawen ge nēsi ǁnā-e ge dī tama hâ i.  Jesub ge ǁîna “ǂkhai re” ti ge mîba. (J.ǂHa. 3:​1-3) Jehovab ge tātsē sida sîsenga ǀuru tide.—Heb. 6:10. w22.05 3 ¶6-7

Salomob ge ge mî ǃgari sîsenni khoe-e ǃgâiaǂgaoba ra māsa. Tsîb ge nēb ‘Eloba xu hâ ǀkhae’ ti ge mî. (Aoǁn. 5:​18, 19) Salomob ge ge ǂan i, tae-i xab gere ǃhoasa. ǁÎb ge ge ǃgari sîsen-ao i. ǁÎb ge omna om, xûi ǃhanaga ǂgā tsî ǃhanaba gere dī. ǃĀdi tsînab ge gere om. (1Gao. 9:19; Aoǁn. 2:​4-6) ǁNā i ge ge ǃgari sîsen i. Tsî i ge ǂkhîba gere mā bi. Xaweb ge Salomoba ge ǂan i, ama ǂkhîbab ga ǂhâba, ob ǃnāsa-e nî dīsa. Tsîb ge ǂgui xūna Jehovaba gere dība. Aiǁgauseb ge Jehovaba ǃoabas ǃaroma gere omhe tempela gere kōǃgâ. ǁNā om sîsenni ge 7 kuriga ge ū. (1Gao. 6:38; 9:1) ǂGui ǃkharagagu xūnab ge dīs khaoǃgâb ge Salomoba ge mûǂan. ǂHâǂhâsa xū-i khoe-i nî dī i ge Jehovaba ǃoabasa. ǁÎb ge ge xoa: “ǁNān, hîa da go ǁnâun di danaǃkhais ge nēsa: Eloba ǃao îts ǁîb di mîmāde ǃkhōǀgaipe.”—Aoǁn. 12:13. w22.05 22 ¶8

Elobmîs ǃnâ i ge ǂgui aiǁgauna hâ, khoen hîna ge Jehovab xa māsenxase a ǀûbahena. Ham-i xa du ra ǂâi? ǀNîsi du ge Gao-aob Manaseb xa ra ǂâi. ǁNā eloxoresa khoeb ge dī ǁoreb ge Jehovab ǃoa-ai ge ǁgai i. ǁÎb ge ama tama eloga gere ǃoaba. Tsî nau khoen tsîna gere ǂkhâǃnâ în ǁkhā xū-e dī. ǁÎb ge ǁîb ǀgôana ge ǃgam tsî ama tama eloga ǃoa gere ǁguiba. ǁNās xōǀkhāb ge ama tama elob īsiba Jehovab ǃanu tempeli ǃnâ ge mâi. Elobmîs ge ra mî: “ǁÎb ge kaise ǃKhūb ǃoagu ǁore tsî ǁîba ge ǁaiǁai.” (2Kro. 33:​2-7) Xawe Manaseb ge ǂgaoba xu a ǃhausen, ob ge Jehovaba māsenxase ge ǀûba bi. (2Kro. 33:​12, 13) ǀNîsi du ge Gao-aob David xas tsîna ra ǂâi. ǁÎb ge kai ǁoreba Jehovab ǃoagu ge dī, ǃgam tsîb ge ǃgamme khôa o. Xawe Davib ge ama ǃhausen tsî ǁîb ǁoreba ǂanǃgâ o. Ob ge Jehovaba ǁîb tsîna ge ǀûba. (2Sam. 12:​9, 10, 13, 14) Îo, ǂgomǃgâ ǁkhā da ge a Jehovab ra ǀûba da ǂgaosa. w22.06 3 ¶7

Hoaǁae i ge supu tama hâ, sida ǃâubasensa ǀgaisase ūhâ ǀgarasa. ǃNūǃnâxa ǀû tsoatsoa ǁkhā da ge a, ǃâusa ib Eloba ǁîb mîmâide dīǀoaǀoa. Xawe Jehovab ge ǀamosib kōse hâ. ǁÎb ǁaeba ra mû ǀgaub ge sida mû ǀgauba xu a ǀkhara. (2Pet. 3:​8, 9) ǁÎb di mîmâideb ge nî dīǀoaǀoa ǃgâi ǀgaub ǃnâ. Xaweb ge sada ra ǃâubasen ǁaeb ai dī tide. Tae-e a hui da ǁkhā î da sida ǃâubasensa ǀgaisase ūhâ ǀgara, ǃnūǃnâxase da Jehovab ǁîb mîmâide nî dīǀoaǀoasa ǃâu hâ hîna? (Jak. 5:7) Jehovab ǀgūse da ge nî hâ ǀgara, ǁîb hîna sida ǃâubasensa ra ama ī kaiba. ǃÂubasensa da ga ra ūhâ ǂgao, o da ge nî ǂgom Jehovab hâsa. Tsîb “ǁîba ra ôana ra mādawa-am ǃkhaisa.” (Heb. 11:​1, 6) Jehovab amase hâ ǃkhaisa da ga ǂgom, o da ge ǃnāsa ǂgomǃgâsiba nî ūhâ. ǁÎb mîmâib ge xūn hoana nî dīǀoaǀoasa. Tsî sida ǃâubasensa da ga ǀgaisase ūhâ ǀgara, o da ge Jehovaba ǃoa ǀgore tsî ǁîb mîsa nî khomai. Jehovaba da a mû ǁoa xawe da ge ǁîba a ǀgū ǁkhā. ǀGores ǃnâ-ū da ge ǁîb ǀkha ǃhoa tsî ǂgomǃgâ ǁkhā ǁnâu dab ra ǃkhaisa.—Jer. 29:​11, 12. w22.10 26-27 ¶11-13

Sao ra i xa ǂâi re. Jobi ge tsaob ǃnâ ǂnû tsî kai tsûba ra hōǃâ. (Job. 2:8) Tsî gu ge ǁnā khoega aiǃgû tsî ra mî, Jobi ge ǃgâi tama khoeba. Tsî ǁîb ra dī xūn ǂâibasen-e ūhâ tama hâsa. ǁÎb di ǃgomsin ge ǃgom ǀui-i khami ge ī-i. Tsî i ge ǁîb ǀgôanab ge ǂoaǃnâs di ǃoaba, ǁîb ǂgaob ǃnâ ge ǀoa hâ i. ǂGuroseb ge Joba ge ǃnō. (Job. 2:13) Khoegu hîna ge Jobi ǀhōsagu ase gere tanisen gu ge ge ǂâi hâ i. ǁÎb ge ǃnō hâ i ǃkhais ra ǁgausa, ǁîb Jehovaba nî ǁnāxu di. ǁÎgu ge ge ǂhanu tama hâ i. ǀGui ǃnā i aib ge Joba, ǁîb di ama tama ǀhosaga ais ǃnâ kō tsî ge mî: “ǁŌ ta nî tsēs kōse ta ǀhapio ta asa nî mî.” (Job. 27:5) Tae-e Joba ge hui îb ǁkhoaǂgaoxa tsî ǀgaisa, ǁîb di ǃgomsin hoan ǃnâ? ǂKhabuǂâib gere xaweb ge ge ǃâubasen ǀû tama hâ i. ǁÎb di ǀnamǀnamsa Elob ǁîb ǃgomsina nî ūbe ǃkhaisa. ǁÎb ge ge ǂan i, ǁōb ga xaweb Jehovaba khâisa nî mā bisa.—Job. 14:​13-15. w22.06 22 ¶9

ǀHommi tsî ǃhūbaib di Kuru-aob ge ǀō-aisa ǀkhaeba mā da hâ. Mā-am dab ge ra î da ǁîba ǃoa ǀgore. ǂÂis ǀguisa hî re: Sida di ǂgaoga xu da ge harase mâ ǁae-i hoa-e Jehovab ǀkha a ǃhoa ǁkhā. ǀAekharob tamas ka io da ge tronkesa xu a ǀgore ǁkhā. ǂGomǃgâsiba ūhâse, sida di ǁGûb nî ǃgâ da sa. Nē aiǂhanuba da ge ǁause ū tama hâ. Gao-aob Davib ge ǀgores aiǂhanuba gere ǃgôaǃgâ. ǁÎb ge Jehovab ǃoa ge ǁnae: ‘As ti ǀgoresa sa aiǃâ ǃgâihamǁguibas ase ī.’ (Psa. 141:​1, 2) Davib ǁaeb ǃnâ i ge ǃgâihamxūn hîna ge ama ǃoabas ǃnâ priestergu xa. Tempeli tawa gere sîsen-ūhena, ǃgâise gere aiǂhumihe. (Eks. 30:​34, 35) Davib ge tae-eb Jehovaba ǀgores ǃnâ nî mîbas xa gere ǂâi ǂgao, ǃgâihamxūn ǃgâise ra aiǂhumihe khami. Tsî ǁnāb ge sida di turab tsîna. ǂHâba da ge ra î-i sada di ǀgorede, Jehovaba ǂkhî kai. w22.07 20 ¶1-2; 21 ¶4

ǀKhaos ge a Jehovab ti. Jehovab ge ǁnā ǀgaiba mā da tama hâ, î da sida tsūdī hâ khoe-e dīǃoa. (Rom. 12:​20, 21) Sida ǀoasa kurusa ūhâ tama hâ amaga da ge, ǁnā ǁkhāsiba ūhâ tama hâ ǂhanu ǀgaub ǃnâ ǀgoraǃgâsa Elob khami. (Heb. 4:13) ǀNî ǁaegu ai i ge sida di tsâsiga a mā-am da ǁoa, î da ǃgâi ǀgaub ai ǀgoraǃgâ. Jehovab ge Jakobuba ge ǂkhâǃnâ, îb xoa: “ǁAixasib Elob di ǂhanu-aisiba sîsenǂui tama xuige.” (Jak. 1:20) ǂGomǃgâ ǁkhā da ge a Jehovab nî ǂhanu xū-e dī tsî ǃgâise ǀgoraǃgâ ǃkhaisa. ǀÛbas ge ǂgomǃgâsib hîna da Jehovab di ǂhanu-aisib ǃnâ ūhâba ra ǁgau. Jehovaba da ga ǂgomǃgâ o, îb hoa xūna ǂhanuse ǀgoraǃgâ. O da ge ra ǁgau ǂgomǃgâ da rasa Jehovab hoa ǁgai xūn hîna ǁoreb xa ǃaromahe hâna nî dī-ūnu ǃkhaisa. ǁÎb di ǀasa mîmâisa ǃhūbaib ǃnâ i ge tsûtsûsa. Tsî ‘ǃkharu ge xūna tātsē ǁkhawa ǂâihōhe tide. Tamas ka io ǂâis ǃnâ hā tide.’—Jes. 65:17. w22.06 10-11 ¶11-12

Khoen xa da ǃhuihe hâs ge ra ǁgau, Jehovab mā-amsa da ūhâsa. (Mat. 5:​11, 12) ǁGâuab ge nē mâǃoade ra ǂkhâǃnâ. Xawe Jesub ge ǁGâuab xa a ǀgaisa. Jesub di ǂkhâǃnâs ǀkhas ge ǃgâiǂhôasa, hoa khoen ǃoa ra aoǁnâhe. Sao ra aiǁgaudi xa ǂâi re. ǀNî hâ ǃgomsib hîna da ra hōǃâb ge, khoen ge ǂgui ǃkharagagu gowaga ra ǃhoa. Apostel Johanebab ge mā ǂhaiǂhais ǃnâb ge Jesuba ge mî. Sida di tsēdi ǃnâs ǃgâiǂhoâsa nē ǃgomsina nî mâǃkharusa. (J.ǂHa. 14:​6, 7) Mâ ǀgaub ǃnâ? ǂGui khoena da ge ǃēsa ra mā, în Gaosib haisi-amsa ǃkhōǃoa. Nētsēn ge khoena ǃhūbaib ǂhabase. Elobmîs ai a ǃgaoǃgaosa ǂkhanina, jw.orgs ai a khomai ǁkhā, 1000 xa ǃnāsa gowagu ǃnâ i hâ amaga. ǂGaeǂguira soros ge ge mā-am î-i, ǀAmosib kōse ǃgâiaǂgao re ti ǀon hâ ǂkhinisa ǂnûiǃkhunihe. Nē ǂkhinis ge ǃnāsa ǁaeba, aoǁnâ sîsenni ǃnâ ra sîsenūhe tsî 700 xa ǃnāsa gowagu ǃnâ hâ. w22.07 9 ¶6-7

Jesub ge tsâba ǁkhaoxasiba khoena gere ǁgau. Apostel Mateub ge nēti ge xoa: “Tsî Jesub ge ǂnubis khoena mû, ob ge ǁîna ge ǀkhom, tsau hâ tsî ǁnāxūhe hâ gūn, ǃûi-ao-i ose hân khamin ge ī i amaga.” (Mat. 9:36) Jehovaba mati ra tsâ? Jesub ge nēti ge mî: “ǁKhā ǀgaub aib ge sago Îb ǀhommi ǃnâ hâba mā-am tide nē ǂkhariron di ǀgui-i tsîn nî kāǁō ǃkhaisa.” (Mat. 18:14) Nē mîdi ge kaise ra ǂkhî kai da, ǁgau i ra amaga Jehovab kaise a ǀnam da ǃkhaisa. Jesuba da ǃnāsase ra ǂan, khami i ge sida ǀnammi Jehovaba da ūba hâba ra kai. ǁKhāǁkhāsen ǁkhās tsîna du ge i, mati du ǀnamma a ǁgau ǁkhāsa. ǀHaohâb ǃnâ hâ ǃgâsan ǀkha du ga hâǀhao, o kō re matikōsen ǁîna a ǂkhîsa. ǁÎn ge ǃhausen tama hâ Jehovaba ǃoabasan ge mîǁgui o. Dî nî re, mâ ǂanden ge Jehovaba ǃoabas ǃnâ a hōsa. ǂHâǂhâsa mîǁguiba du ga dī o, ǁîn ai ǀapemāde dî re. ǂÂis ǃnâ ūhâ re, “ǂgui ǀapemā-aon hâpab ge ǃnorasasiba hâ.” w22.08 3 ¶6-7

Hoada ge ǃgomsina ra hōǃâ. Xawe da ge tātsē ǀguri hâ tide. ǀNamxaǃnâ ǁgûb khamib ge Jehovaba hoaǁae sada ra kōǃgâ. ǁÎb ge sida ǀgūse hâ tsî sida ǀkhomâde ra ǁnâu tsî māsenxase ra hui da. (Jes. 43:2) ǂGomǃgâ da ge ra, ǃgomsina da tani tsî a mâǀgai ǁkhāsa. Jehovab ǂhâ da hâ xūn hoana ra mā da amaga. ǁÎb ge ǀkhaeb ǀgores dib, Elobmîs, ǂgui gagasi ǂûn. Tsî ǀnamǀnamsa ǃgâsan tsîna ge mā da, în ǂhâsib ǃnâ hui da. Kaise da ge ra gangan, kōǃgâ da ra ǀhomsi ǁGûba ūhâsa. “Sida ǂgaogu ge ǁîb ǃnâ ra ǃgâiaǂgao.” (Psa. 33:21) Jehovaba da ge a ǁgau ǁkhā, ǁîb ǀnamxaǃnâse ra kōǃgâ da ǀgauba da ra ǃgôaǃgâ ǃkhaisa. Hoa xūn hînab sida huis ǃaroma ra māda na sîsenūs ǃnâ-ū. Sida tsîn ge sida xu ǂgaoǀkhāsa xūna nî dī, î da Jehovab kōǃgâs ǃnāga hâ ǀgara. ǀNî mîdi ǃnâ, aiǃgû tsî da ga Jehovaba ǁnâuǀnam tsî ǁîb mûǁae ǂhanu xūna dī, ob ge ǀamosib kōse nî kōǃgâ da. w22.08 13 ¶15-16

ǂGui khoen ge xūn ǃnâ ǀoro ǂgomǃgâsiba ūhâ. ǁÎn ge a ǀū ham-en nî ǂgomǃgâsa. ǁÎn ge ra ǂâi ǂgīǂgōsi ǂgaeǂgui-aogu, ǂansa ūhâ khoen tsî ǁamaxū-aon ǁîn ǃgâib kōse nî kōsa. ǁNās ǀkhan ge kerkhegu ǂgaeǂgui-aogu tsîna ǃgôa tama hâ. ǁNā-amagan ge ǁnā ǂgaeǂgui-aogu ra mî, ǂkhanis Elobmîsa ǂgomǃgâ tama hâ. Jehovab di ǃoaba-aon ase da ge ra ǂgomǃgâ ‘Jehovab a amab’ di Elosa. Tsîb sida ǃaroma ǃgâib ǀguiba ra ǂhâbasa. (Psa. 31:5; Jes. 48:17) ǂAn da ge a, Elobmîs ǃnâ da ra khomai xūna da a ǂgomǃgâ ǁkhā ǃkhaisa. Elobmîs ôaǃnâ-aob ge sao ra-e ge mî: “Elob ra mî, xū-i xare-i ge ǂhumi tama hâ. Tsî ǁÎb ra mî xūn hoan ge, ra ama kai. Elob khoen ge ǁîb ra mî xūna ra ǂgom, ǁîban ra ǂgomǃgâ amaga.” w23.01 2 ¶1-2

Sida ǃgâsana da ge ra omkhâi, ǁîn ǂgomsa da ga Jehovab ǃnâ ǀgaiǀgai o. ǀNîn ge Jehovaba ǃoaba tama hâ khoen xa ra mîǁgaiǁgaihe. ǀNîn ge ǂūrusib ǃgomsina ūhâ tamas ka io ǃgomsiba ra hōǃâ tsûtsûhen ge amaga. ǀNî Xristeǁîn ge ǂgui kurina ǃhūbaib nî ǀamsa ǃâu hâ. Nē mâsigu ge nētsē Xristeǁîn ǂgomsa a ǃâitsâ ǁkhā. ǂGurokam ǁaeb Xristeǁîn ǀhaohâb tsîn ge nē ǃgomsina gere hōǃâ. Apostel Paulub ge xoade gere sîsenū, îb ǃgâsan di ǂgomsa ǀgaiǀgai. Aiǁgausen ge ǀnîsi Jode Xristeǁîna ge ǀū i matin nî ǃeremasa. Jehovaba ǃoaba tama omaris ǁanin gere mî o, Jodeǁîsis ge Xristeǁîsis xa kai īsa. Paulub di sîǂkhinis hîna ge Hebreǁîna ǃoa hâ is ge, ǁnā Xristeǁîna ge ǀgaiǀgai. (Heb. 1:​5, 6; 2:​2, 3; 9:​24, 25) ǁÎb di ǀgaisa mîdi ge ge hui nî, în ǂan tae-en Jehovaba ǃoaba tama omaris ǁanina nî mîbasa. w22.08 23-24 ¶12-14

ǁGâuab ǃhūbaib ǃnâ hâ khoen ge ham-en nî ǂgomǃgâ ǃkhaisa a ǀū. ǁÎn ge hoaǁae ǁamaxu ra khoen di tanisen ǀgaugu, ǂgīǂgōsi tsî ǂgomdi ǂgaeǂgui-aon xa ra ǂkhabuǂâi kaihe. ǀNîn ge ra tsâ ǁîn di ǀhōsan, ǁanǁare-aon. Tsî omaris ǁaninan a ǂgomǃgâ ǁoasa, nēs ge tā nî buru kai da. Elobmîs ge ra mî: “ǀUni tsēdi ǃnân ge khoena. . . , ǃanuoǃnâ . . . mîǁgaiǁgaixa, . . . tsî nî ǀapexūxa.’ Nēs ge ra ǂâibasen khoen ǁGâuab ǀgauga nî ūhâsa. Nē ǃhūbaib di elob, ǂgomǃgâhe ǁoaba. (2 Tim. 3:​1-4; 2 Kor. 4:4) Xristeǁî da a amaga da ge a ǂan, sida ǂgomǃgâsiba da Jehovab ǃnâ a mâi ǁkhāsa. ǂGomǃgâsiba da ge ūhâ ǁîb a ǀnam da tsî ǁîb ǀhōsana “ǁnāǃgâ” tidesa. (Psa. 9:10) ǂGomǃgâsib tsîna da ge Jesub Xristub ǃnâ a ūhâ ǁkhā, sida ǃaromab ge ǁîb ûiba a mā amaga. (1Pet. 3:18) Tsî da ge sida di aiǁgaude xus tsîna ǁkhāǁkhāsen hâ. Elobmîs ǂgomǂgomsa daoǁgaude ra māsa.—2Tim. 3:​16, 17. w22.09 2 ¶1-2

Ama ǃgâiaǂgaob ge ǃgâi tsâsib hîna hā tsî ra bē tamaba. ǁNāb ge hoa ûiǁaeb khoe-i dib ǃnâ a hâ ǁkhā. Matis nēsa īǁkhā? ǁÎb ǃhommi aoǁnâs aib ge Jesuba ge ǁguiǃā: “ǀKhaehen ge hâ gagasise ǀgâsana.” (Mat. 5:3) Jesub ge ge ǂan i khoen ge ǀgaisa turab ǀkha kuruhesa, ǁîn Kuru-aob Jehova Eloba ǂan tsî ǃoabasa. ǁNāb ge a sida di ‘gagasi ǂhâsi.’ Jehovab a ‘ǃgâiaǂgaob di Elo’ amagan ge ǁîba ra ǃoaban tsîna a ǃgâiaǂgao ǁkhā. (1Tim. 1:11) ǃGâi mâsiga da sida ûib ǃnâ ǂhâhâ, ǃgâiaǂgaoba ūhâs ǃaroma? Hî-î. ǃHommi aoǁnâs aib ge Jesuba ge mî, “ǁnān ǃoa ran” tsîn ge a ǃgâiaǂgao ǁkhā. Jesub ge ǁkhā xū-e “ǁnān ǂhanu-aisib ǃaroma ra ǃgôaǃgonhen” xa ge mî. (Mat. 5:​4, 10, 11) Jesub ge ge ǁkhāǁkhāda, ama ǃgâiaǂgaob ǃgâi mâsigu hîna sida ûib ǃnâ hâ ga xu hâ tamasa. Xawe sida gagasi ǂhâsiga ǀoaǀoa tsî Elob ǀgūse hâsa xu hâ.—Jak. 4:8. w22.10 6 ¶1-3

ǃKharagagusiga kōǂuis ge Xristeǁî-e nî hui, î-î ǀgorasa dī “ǁaeb ǃnōs dib tsî ǁaeb ǃhoas dib” ǁaegu. (Aoǁn. 3:7) “ǃHoas ge a ǀhaiǀuri, xawe ǃnōs ge a ǃhûniǀuri” nēs ge ǀnî ǃhaodi ǃnâ a ǂansa ǂkhoamîsa. ǀNî mîdi ǃnâ, ǀnî ǁaegu ai i ge a ǃgâi ǃnōsa, ǃhoas xa. Aiǁgau-e kō re. ǀGui ǀhaohâb ǃûi-aob hîna ǂansa ūhâb ge ǀnî ǁaegu ai ra ǂganhe, îb nau ǀhaohâga ǁîn ǃgomsin ǀkha hui. ǃGaoǃgâ re tae-eb nau ǀhaohâb ǃûi-aoba ǁîb xa ra mî ǃkhaisa. “ǁÎb ge hoaǁae ra ǂanbasen, îb tā nau ǀhaohâgu xūn xa ǃhoa.” ǁÎb gā-aisib ge ra ǃaroma, î-î ǁîb ǀkha ǀguiba ra ǃoaba ǀhaohâb ǃûi-aoga ǁîba ǃgôa. ǁÎgu ge a ǂan ǁîb ǁîgu ǀguigu nî ǂan xūna, nau khoena mîba tidesa. ǂHauǃnâsib ge ǀnî hâ ǀgaub ǂgomǃgâsib diba. ǂHauǃnâ khoe-e da ge ra ǂgomǃgâ, mâǁae i amaba ra ǃhoasa da a ǂan amaga.—Efe. 4:25; Heb. 13:18. w22.09 12 ¶14-15

ǂGui khoen ge ama gā-aisib ga ‘ǃganni ǃnâ mâ tsî ga ra ǂgaiǂuihe’ o ǃgâ tama. (ǂKhm. 1:20) Elobmîs ǃoagu î ge ǃnona ǃnâ gu khoena hâ, Elob gā-aisiba ūǃoa ǂgao tamana: ǁnān ge [“ǂansa ūhâ taman” NW,] ‘ǃhō-aon’ tsî “gârena.” (ǂKhm. 1:​22-25) [“ǂAnsa ūhâ taman” NW] ge ǁnān hîna ǁnâun ra xū-i hoa-e supuse ra ǂgomna. Tsî ǃhaese ra ǂgaeǂhapuhena. (ǂKhm. 14:15) Aiǁgause ǂâi re, ǂguin hîna ǂgomdi tsî ǂgīǂgōsi ǂgaeǂgui-aon xa ra ǂgaeǂhapuhena. ǀNîn ge ra buru ǂgaeǂgui-aon ra ǂhumisan ga ǂanǂui o. ǂKhoamîdi 1:22 ǃnâ ra mîhen ge gârese hâ ǀgarasa ra ǁhûi, ǁnā ǀgaub xan a ǃgâibahe amaga. (Jer. 5:31) ǁÎn ge Elobmîs ra mî xūna ǁkhāǁkhāsen ǂgao tama. Tamas ka io Elob ǂhanuba ǁnâuǀnam ǂgao tama hâ. ǂAnapegase ǁnâuǀnam tamana da ge ǁgae ǂgao tama.—ǂKhm. 1:32; 27:12. w22.10 19 ¶5-7

Elob ǀapeǂhomis tsîn ge daoǁgaude ra mā da, î da ǃnorasase hâ ǁkhā. ǃNās hoasa da ge ra ǂâiǂâiǃnâhe, î da ǀhaohâb ǃûi-aoga sa da di selfon ǃgôade mā, î gu tsūkēǃgâb ga hâ ǁaeb ai ǃkhaese bel da ǁkhā. ǀNîsi da ge daoǁgaude nî hō tsūkēǃgâb ǁaeb ǃnâ da nî hâ ǃkhais, mati da ǃāsa xu nî ǂoa ǀgaub. Tsî mati da ǂhâ da hâ xūna nî hō ǀgaub tsîna. Tamas ka io mati da nauna nî hui ǀgauba. Nē daoǁgaude da ga sao tama io, o da ge sida tsî ǀhaohâb ǃûi-aogu di ûib tsîna, ǁkhōǁkhōsa mâsib ǃnâ a mâi ǁkhā. ǁÎgu ge sida gu nî kōǃgâse ǁgaumâisa. (Heb. 13:17) ǂGui ǃgâsan ge tsūkēǃgâb, torob tamas ka io ǃhaoǃnâbe torob xa ǃaromahe hâse ǁîn omde xu ra ǃkhoe. Tsîn ge ǁkhān an hoana ra dītsâ în ǀasa mâsiba ūǃoa tsî Jehovaba ǃoaba ǀgara. ǂGurokham ǁaeb Xristeǁîn hîna ge ǃgôaǃgonhen ge o, “ǃgâiǂhôasa” gere aoǁnân khami. (ǃNǃkh. 8:4) Aoǁnâ sîsenni ge ǁîna ra hui în ǃgomsib ai tā ǂâisa ǂnûi. Xawe Gaosib ǃgâiǂhôasa aoǁnâ. Tsî nēs xa ǃaromahe hâsen ge, ǁîn ǃgâiaǂgaob tsî ǂkhîb tsîna ra ǃkhōǀgara. w22.12 19 ¶12-13

Mâ khoe-i hoa-i ge Jehovaba a ǀō-aisaba. ǁÎb di apostelgab aoǁnâ sîsenni ǃnâ nî sîǂoas aiǃâb ge Jesuba ǁîga ge hui, î gu tā mâǃoa gu nî khoena ǃao. (Mat. 10: 29-31) ǁÎb ge ǁnāsa ge dī, Israeli ǃnâ a ǂanǂansa anisa ǃoa ra ǁnaeǁgause: ǀHomanirosa. ǁNā anirodi ge Jesub di tsēdi ǃnâ ǂgui mari-e ge ǂan tama hâ i. Xaweb ge ǁîb di ǁkhāǁkhāsabega ge mîba: “Tsî ǀgui-i xare-i ge sadu Îb di ǂâis ose ǃhūb ai ǁnā tama hâ.” Tsîb ge ge ǀaro: “ǂGui ǀhomaniron xa ǃnāsase a ama-ai.” ǁNās ǃnâ-ūb ge Jesuba ǁîb di ǁkhāǁkhāsabega, ge ǂâiǂâiǃnâ Jehovab ǁîga ǀō-aisase ra mûsa. Tsî gu ge ǃaromasa ūhâ tide mâǃoahesa ǃaosa. ǁKhāǁkhāsabe gu ge Jesub di mîde ge ǂâi oa, aoǁnâ gu ra hîna gu ge ǀhom anirode a mû o, ǃādi tsî ǃgāro ǃādi ǃnâs tsîna. ǁKhawa du ga ǃgārob anirode mû, o ǂâis ǃnâ ūhâ re Jehovaba du a ǀō-aisabasa. Tsî du “ǂgui ǀhomaniron xa ǃnāsase a ama-ai” sa. Jehovab di huib ǀkha î ge ǃaosa ǂhâbasa tama hâ, nau khoen ga ra mâǃoa du o. w23.03 18 ¶12

ǀNî ǁaeb ai da ge ǃgomsina ra hōǃâ. Aiǁgause omaris ǁanin xa mâǃoahes tamas ka io sîsen-e ǂoaǃnâs ǃnâ-ū. ǃGomsina da ga gaxu ǁae-e hōǃâ, o da ge ǃâubasen-e ūhâ tama xū-i khami ǂkhabuǂâi hâses tsîna a tsâ ǁkhā. ǁGâuab ge nē ǃēde ra sîsenū tsî ra ǂâi kai da Jehovab ǀnam da tama hâsa. ǁGâuab ge ǂhâba hâ, î da dî Jehovab tsî ǁîb ǀapeǂhumis tsîn sada ǃgomsina ra ǃaromasa. ǁNāti i xū-i ge ǀnai Israelǁaes ǀkha, Egipteb ǃnâ ge ī. ǂGurosen ge ge ǂgom hâ i, Jehovab ge Moseb tsî Aronni tsîna a ǁgaumâisa i kha ǁîna ǃgāsisa xu ore. (Eks. 4:​29-31) Xawe egab ge Faraoba ǁîn ûiga ǃgomǃgom, on ge Moseb tsî Aronni tsîna gere ǀhapiǂgā-am, ǁîn ǃgomsin ǃaroma. (Eks. 5:​19, 20) ǁÎn ge Elob di ǂgomǂgomsa ǃgākha gere ǀhapiǂgā-am. Kaise i ge a ǃoaxa. Gaxu ǁaeba du ga ǃgomsina ga ra hōǃâ, o ǀgores ǃnâ ǁîn xa Jehovaba mîba tsî ǁîb di huiba ôa re. w22.11 15 ¶5-6

Jehovab ge ûib di mā-ao. Tsî khoena ǁkhawa ûiba ǃoa hau oas di ǀgaiba ūhâ. ǁÎb ge kēbo-aob Eliaba ǀgaiba ge mā, îb ǃoa taras Sarefats ǀgôaba ǁōba xu ǂhaiǂhai. (1Gao. 17:​21-23) Egab ge Elisaba Elob huib ǀkha Sunemǁî taras ǀgôaba ǁōba xu khâisa ge mā. (2Gao. 4:​18-20, 34-37) Nēs tsî nau khâidi tsîn ge ra ǁgau, Jehovab ǀgaiba ūhâsa khoena ûiba ǃoa oaǀkhī ūs diba. Jesub ge ǃhūbaib ai hâ io, ob ge ge ǁgau ǁîb Îb ge ǁnā ǀgaiba a mā bisa. (Jhn. 11:​23-25, 43, 44) Nēsib ge Jesuba ǀhommi ǃnâ hâ tsîb ge “hoa ǁkhāsiba ǀhommi tsî ǃhūbaib ai māhe hâ”. ǁNā-amagab ge ǁîba ǁnā mîmâisa a dīǀoaǀoa ǁkhā. ǁNān ‘ǀhobadi ǃnâ hân hoan’ nî khâisa māhe tsî ǀamo ûib di ǃâubasensa hōse.—Mat. 28:18; Jhn. 5:​26-29. w22.12 5 ¶10

Esegielan ge ūǃoa tama hâ i on ge khoena, Jehovaba ge ūǃoa tama hâ i. Nētsēs xoas mîdi ge Esegiela ge ǁapoǁapoba, ǁgaiseb ge kēbo-aob ase dī tama hâ i ǃkhaisa. Khoen ge ūǃoa bi tama hâ i xawe. Jehovab ge Esegieli tsîna ge ǁapoǁapoba. ǁÎb da aoǁnâ kēbos ga ama kai, on khoena nî “ǂan kēbo-ao-i ǁîn ǁaegu hâ ǃkhaisa.” (Ese. 2:5; 33:33) ǂGom ǁkhā da ge a, ǁnā ǁkhaeǂgao mîdi ge Esegiela ǂhâb hâ ǀgaiba a māsa, îb ǁîb di aoǁnâ sîsen-e dīǀoaǀoa. Sida tsîn ge ǁkhoaǂgasiba ūhâ ǂan da a amaga, Jehovab xa da ge sîhesa î da aoǁnâ. ǁÎb ge ra ǃgôaǃgâ da tsî ǁîb ‘ǃkhō-amaon’ ti ra ǂgai da. (Jes. 43:10) ǁNāb ge kai aiǂhanuba. Jehovab ge Esegiela: “Tā ǃao” ti a mîba khamib ge sida tsîna ra mîba, î da “tā ǃao tamas ka io ǃhuri.” (Ese. 2:6) Tae-i ǃaroma da sida mâǃoa-aona ǃao tide? Esegieli khami da ge Jehovab xa sîhe hâ tsî ǁîb di ǂkhâǃnâsa ūhâ.—Jes. 44:8. w22.11 3-4 ¶4-5

Nētsē da ge sida di ǂgomǂgomsa ǀhaohâb ǃûi-aogu tsî ǀhaohâb hui-aogu tsîna ǃgam ǃgôaǃgâsiba ūba hâ. Nē ǂgomǂgomsa ǃgâsagu ge ǃgâise ra kōǃgâ da tsî da ge Jehovaba ǁîgu ǃaroma ra gangan. Sida ǂgomǂgomsasiba da mâ ǀgaugu ǃnâ a ǁgau ǁkhā? Sida ǃgâsana da ge ǀnam tsî da ge ǁîn ra dī xūn ǃnâ ǃgâiǃgâibasensa ūhâ. Xawe da ge ǁnā î ǃnâ ǀnōsa ǀgauba nî ūhâ tsî ǁîn ûigu ǃnâ ra ī xūna ǃgôaǃgâsiba nî ǁgau. ǃKharuge ǁaeb Xristeǁî ǀhaohâb ǃnân ge ǀnîna ‘ǀhoeǂnûmas ǀkha ǁaeba gere ǁore, nau khoen ǂhôan ǀkha ǂnûkhâisen’ tsî mî ǁoan a xūn tsîna gere mî. (1Tim. 5:13) Amase da ge ǁîn khama ī ǂgao tama. Xawe ǀnîsi i ga khoe-e, ǁî-i ǃgam xū-e sida ǀkha ǀgoragu. O da ge nî ǁnauǃā khoe-i ga mîba da o, î da tā ǀnî hâ khoena ǁnā xū-e sī ǁgam ǃkharuba. Aiǁgauses ge ǀnîsi ǃgâsasa ūs hâ ǀaeb tsî ǃkharuǃnâs ra ǃgomsib xa ra mîba da. Tsî ra ǂgan î-i saro ǁaegu ǀgui hâ, o da ge ǁîs ǂgansa nî ǃgôaǃgâ. w22.09 10 ¶7-8

“ǂÂisa ǀasa kai” di hâ Grikegowab mîs tsîn ge a ǂâibasen ǁkhā, “ǂâisa hoaǁae ǀkharaǀkharasa.” ǁNās ge ǂâibasen tama, ǀnî xūn ǀguina da nî ǀkharaǀkharasa. ǁNā-amaga da ge nî kō mati da ǂganaga īsa. Tsî ǁnās ǃnâ-ū ǀkharaǀkharana nî dī, î da Jehovab di ǁgaraga ǁnâuǀnam. Nēsa da ge ǀguiǃnâs ǀguisa dī tide, xawe hoaǁae. ǀOasa kurusa da ga hō, o da ge hoaǁae dī da ra xūn ǃnâ Jehovaba nî ǂkhîǂkhî. Xawe da ge nēsi aiǃgû tsî ǃgarise nî sîsen, î da Jehovaba ǂkhîǂkhî. Kō re, Paulub ge sida di ǂâisa ǀasa kais tsî Jehovab ǂâisa ôasa mati gere ǀgopeǀnōsa. Romeǁîn 12:2 ǃnâ i ra mîhe khami. Nē ǃhūbaiba sida ǂâide ǂgaeǂguisa mā-ams xa da ge nî ôaǃnâ. Matikōse da ra mā-amsa îb Jehovab di ǂâisa sida di mîǁguigu tsî sīǃnâ ǂgao da ra xūna ǂgaeǂgui. w23.01 8-9 ¶3-4

Jehovaba hōǃâ da ra mâsib hoab ǃnâ ra hui da? ǁÎba sida di ûib ǃnâ ra ī xū-i hoa-e ra dawa, în ǁgai xūn hoana ǃgâib ǃaroma ǀgui ī? Hî-i, Elobmîs ge ǁnāsa ǃkhō-am tama hâ. (Aoǁn. 8:9; 9:11) Xawe da ge nēsa a ǂan, ǃgomsiga da ga hōǃâ, ob Jehovaba nēna a ǂan tsî ra mû. Tsîb ge ǁîb ai da ra ǂgan huiba ra ǁnâu. (Psa. 34:15; Jes. 59:1) ǁNās xa ǃnāsaseb ge Jehovaba a hui da ǁkhā, î da ǃgomsiga ǃgâiǃgâ hâse ǃkharuǃnâ. Nēsab mati ra dī? ǀGui ǀgaub Jehovab ra hui dab ge ǁkhaeǂgaos tsî ǂkhâǃnâsa, ǂhâ da hâ ǁaeb ai mādasa. (2Kor. 1:​3, 4) Jehovaba xu du ge sadu ûib ǃnâ ǁkhaeǂgaos tsî ǂkhâǃnâs tsîna ǂhâhâ i ǁaeb xa, du a ǂâi hō ǁkhā? ǂGui ǁaegu ai da ge Jehovab ǃgomsigu ǃnâ ra hui da ǀgauba, ǃgomsigu ga toa ǁaeb ai ǀgui a mûǃā ǁkhā. w23.01 17-18 ¶13-15

Nē ǀgurub ge hû danade ūhâb ǀkha ǀguise ra mûsen, xawe a ǀgaisa ǀapa. ǁÎb ge ‘ǀgurub di īb’ ase ǂansa. Tsî nēs ge ‘ǁkhaisaǁî gao-aob’ ase ra ǁguiǃāhe. (J.ǂHa. 13:​14, 15; 17:​3, 8) Johaneb ge ge ǁkhāǁkhāsen nē “gaob” ra ǀkhī tsî ra kā tsî ǁkhawa ra oaǀkhīsa. Nēs ge United Nation sa ǃamkuse ra ǁguiǃā hîna ǃhūbaib ǂhawase hâ ǂgīǂgōsi ǃnande ra ǂkhâǃnâsa. ǂGuro i ge League of Nations ti gere ǂgaihe. ǁNāpaxu i ge 2ǁî torob ǃnâ ge ǀkhai i. Tsî i ge ǁkhawa ega United Nations ase ge oaǀkhī. ǂHanugu ge khoena ra ǂkhâǃnâ î gu, Jehovab tsî ǁîb khoena mâǃoa. Johaneb ge ge mî: “ǃHūbaib di gao-aogu” Armagedons torob ǃaroma ra ǀhaoǀhaohesa. “ǁNā kaitsēs Hoaǀgaixa Elob dis” ǃaroma.—J.ǂHa. 16:​13, 14, 16. w22.05 10 ¶10-11

Jesuba ge aitsama xoade khomaisa ge ǁkhāǁkhāsen. ǁNās ǀkhab ge Jesuba xoade ǃgâise ǀgui ge ǂan tama hâ i. Xaweb ge xoadi tsîna ge ǀnam-i tsî ge mā-am î-i ǁîb ûiba daoǁgau. Aiǁgause ge Tempeli ǃnâ a ī xū-i xa ǂâi re, Jesub ge ge 12 kurixas ī. ǁKhāǁkhā-aon hîna ge Moseb ǂhanuba ǃgâise ǂan în ge ‘ǁîb di gā-ai ǃereamdi xa gere buru.’ (Luk. 2:​46, 47, 52) Sida tsîn ge Elobmîsa ǂan tsî a ǀnam ǁkhā ǁîsa da ga hoaǁae khomai o. Jesub ge ǂhanuba ǂan khoena a mîba xūna xu da ge a ǁkhāǁkhāsen ǁkhā. Nēs ge ǁkhāǁkhā-aogu, farisegu tsî Sadusegu tsîna ǃkhōǂgā hâ. ǁNā kerkhen ǂgaeǂgui-aogu ge xoade hoaǁae gere khomai. Xawe ǁîna xu ǃgâiba ge hōǁoa ī. Jesub ge ǃnona ǀgauga ge ǁgaugu, tae-e gu a dī ǁkhāsa î gu khomaisa xu ǃgâiba hō. ǁÎb ge ǁîga a mîba xū-i ge nî hui da, î da (1) khomai da ra xūna ǁnâuǃā, (2) ǀō-aisa gagasi xūna ôa tsî (3) Elobmîsa mā-amsa îs sida ǀkharaǀkhara. w23.02 8-9 ¶2-3

ǀNî ǁkhōǁkhōsa xūn hîna da nî ǂgōsen xun ge aiǁǀgause, ǁâǁâsens, kaise ās, ǂû ǃnās, nauna tsûtsû ǁkhā xūna mîs, ǂkhābadība ūhâ xūna kōs. Tsî ǀōǀkhā khoen xūna kōs tsîna ǃkhōǂgā hâ. (Psa. 101:3) ǁGâuab ge hoaǁae ǃēde ra ôa, Jehovab ǀkha da ūhâ ǀhōsagusisa ǁgaiǁgaisa. (1Pet. 5:8) ǂKhaikarise da ga hâ tama io, ob ge ǁGâuaba sida di ǂâidi tsî ǂgaogu tsîn ǃnâ. Surigub, ǂhauǃnâoǃnâsib, xūǃgunuxasib, ǃhuigub, ǀgapiǂâixasib tsî ǁhangub ǃkhomde a ǃhana ǁkhā. (Gal. 5:​19-21) ǁKhā da a-i hoa-e dī tsî da ga ǃkhaese nē mâsiga xu ǂgōsen tama io. O gu ge aiǃgû tsî ǃgāxa hai-i khami nî kai tsî ǁgai xū-e nî ǃaroma. (Jak. 1:​14, 15) ǀGui ǁkhōǁkhōsa xū-i hîna da ǃkhaese a mûǃā ǁoa-î ge ǁgai ǀhōsana. ǂÂis ǃnâ da ge nî ūhâ, hâ ǀhao ū da ra khoen khami da ge ega ra tanisen tsoatsoa. (1Kor. 15:33) ǃÛisen da ga, o da ge ǂhâbasa tama ǀhōsana xu nî ǂgōsen, hîna Jehovab di ǂhanugu ǃoagu ûi tama hâna. (Luk. 21:34; 2Kor. 6:15) Tsî da ge ǁkhōǁkhōsa i a ǀgausa mû tsî ǁî-e xu nî ǂgōsen. w23.02 16 ¶7; 17 ¶10-11

Jehovab xa du ge ǁkhāǁkhāsen khami î ge, ǁîba du ūba hâ ǀnamma ge kai. Amase du ge nēsis tsî hānîǁaeb ǃnâs tsîna ǁîb ǃoa ra ǀgū ǂgao. Nēs ge a īǁkhā. ǁÎb ge sado ra ǂkhâǃnâ, î du ǁîb ǂgaoba ǂkhîǂkhî. (ǂKhm. 23:​15, 16) ǁNāsa du ge a dī ǁkhā, mîdi ǀkha ǀguis ose xawe dīgu ǃnâs tsîna. Sadu ûiba du ra ûi ǀgaub ge nî ǁgau, Jehovaba du amase a ǀnamsa. ǁNāb ge ǃgâi mîǁguib hîna du sadu ûib ǃnâ a ǁhûi ǁkhāba. Mati du sadu ǀnamma Jehovaba a ǁgau ǁkhā? ǂGurose du ge ǀō-aisa māǁnâsens ǀgoresa Jehovaba ǃoa nî dī. (Psa. 40:8) Tsî du ge ǁnāpaxu ǁnā ǀgoresa ra ǂanǂan, ǁāǁnâhes ǃnâ-ū. ǁNās ge ǃgâiaǂgaob tsî ǂkhîb xa ǀoahâ ǂhâǂhâsa ǃâ, sadu ûib ǃnâ. ǀAsa ûiba du ge ra tsoatsoa, sadu ǃaromas ose xawe Jehovab ǃaroma. (Rom. 14:8; 1Pet. 4:​1, 2) Nēb ge dī du nî kai mîǁguib ase ra mûsen xawe î ge nēsi ra hui du ǃgâi ûiba ūhâsa. w23.03 5-6 ¶14-15