Julib

Jehovab ge ǁkhāsiba mā da hâ, î da ǃhoa. Xawe i ge ǃhoas di ǀkhaeba ǁgai ǀgaub ǃnâ ge sîsenūhe tsoatsoa. ǁGâuab ge Evasa ge ǂhumiba. Tsî ǁnā ǂhumib ge ge ǃaroma în khoena, ǁoreba ǀumi tsî ǀoasa kurusa ǂoaǃnâ. (Gen. 3:​1-4) Adammi ge Evas tsî Jehovab tsîna ge ǂgari-am ǁîb nams ǀkha, ǁîb ge ǃaroma ǃgomsib ǃgao. (Gen. 3:12) Kainni ge Jehovaba ge ǂhumiba, Abelab ge ǃgam toa o. (Gen. 4:9) ǃNāsa muvin ge nētsē ǃgâi tama gowaba ra sîsenū. ǀGôan ge skoli tawa ǀurixa gowaba ra ǁnâu. Tsî kaikhoena sîsen-aib ai. ǂAnbasen tama da ka io, o da ge sida tsîna ǁgai gowaba a sîsenū ǁkhā. Tsēs hoasa da ǁî-e ra ǁnâu amaga. Ama as ge Jehovaba da ge ra ǂkhî kai ǂgao tsî da ge ǁgai gowaba sîsenū ǂgao tama hâ. ǃHoas di ǀkhaeba da ge ǃgâi ǀgaub ǃnâ ra sîsenū ǂgao tsî Jehovaba ra koa. w22.04 4 ¶1-3

Jesub ge ǀnōsa mûǂuiba ǃhūbaisi xūn xa ge ūhâ i. ǁÎb ge ǂûs tsî ās xa ge ǃgâibahe i. (Luk. 19:​2, 6, 7) ǀGui ǃnā i aib ge xûi-e ge kuru tsî ǁnās ge ge ǁîb di ǂguro buruxa dī i. (Jhn. 2:​10, 11) Tsî ǁōb ge tsēs aib ge ǂgui mari-e ra ǂgan saraba ge ana hâ i. (Jhn. 19:​23, 24) Xaweb ge Jesuba ge mā-am tama hâ i, în nē xūna ǁîb ûib ǃnâ ǂhâǂhâsa. Jesub ge ge ǁkhāǁkhā Elob Gaosiba da ga ǂgurose ôa. Ob Jehovaba ǂhâ da hâ xūna nî māda ǃkhaisa. (Mat. 6:​31-33) ǂGuin ge ǃgâiba ge hō Jehovab di ǀapemās mari-i xa hâsan ge sîsenū amaga. ǃGamme tama ǃgâsab, Daniel ti ǀon hâb di aiǁgausa kō re. ǁÎb ge ra mî: “ǂKham ta ge io, ta ge ge mîǁgui ǂhâǂhâsa xū-i hîna ta nî dī i ge, Jehovaba ǃoabasa.” ǀGui ǃgupu ûibab ge ūhâ i amagab ge Jehovaba ǂgui ǃkharagagu xūna ge dība ǁkhā i. Aiǁgauseb ge tsūkēǃgâb ǃnans tsî Betels tawa gere hui. ǀAro tsîb ge ra mî: “Jehovab ge ǃnāsa ǃgâiaǂgaoba ge mā te mari-i xa.” w22.05 21-22 ¶6-7

Amaba da a ǀnamsa da ge a ǁgau ǁkhā Elobmîs tsî Elobmîs ai a ǃgaoǃgaosa, ǂkhanina da ga khomai o. Matikō gāxuse da ga amab ǃnâ hâ xawe da ge Elobmîs xa ǃnāsase nî ǃkhāǁkhāsen. ǁKhāǁkhāsens ge ǁguiǂgāsensa ǂhâhâ, xawes ge ǀamǂoasa a ǃgâi. Hoa da ge khomais tsî ǁkhāǁkhāsens tsîna ǀnam tama. Xaweb ge Jehovaba ra ǁkhauda, î da ‘ôa ǀgara.’ Tsî ‘ǃgamse ôaǃnâ’ î da amaba ǁnâuǃā. (ǂKhm. 2:​4-6) Nēsa da ga dī, o da ge hoaǁae ǃgâiba ra hō. ǁÎb di Elobmîs khomai ǃâs xab ge Koriba ra mî, ǁîb ge ǀgui xoasa ǀgui ǁaeb ai ra kō. ǁÎb ge ra ǁguiǃā: “Tita ge hoa ǀgamirodi tsî ǁnaeǁgau ra xoadi tsîna ra khomai. Tsî ǃnāsase ra ôaǃnâ. . . . ǂGui ǃgâiba ta ge ra hō ti khomaisa xu.” Nēsi da ga nē ǀgaub tamas ka io ǀnî hâ ǀgauba sîsenū. Xawe da ge ra ǁgau amaba da ra ǃgôaǃgâsa. ǁAeba da ga ǁamaǂui tsî ǁgūtsâ tsî ǁkhāǁkhāsen o.—Psa. 1:​1-3. w22.08 17 ¶13; 18 ¶15-16

ǃHūbaib aib ge hâ iob ge Jesuba, kurusa ge sîsenū ǁîb ǁGūb xa ǁîb di ǁkhāǁkhāsabena ǁkhāǁkhāsa. ǀGui xū-i hînab ge ǁkhāǁkhā-e kō re. Jehovab ge ǁîb di ǀnamma hoa khoena ra ǁgau. ǃHommi aoǁnâs tawab ge Jesuba ǁîb di saosaben di ǂâisa, 2 xūn kuruhe gen ai ge ǂnûi kai. Hîna hoaǁae ra kō ǃkharuhena: Sores di ǃnâb tsî ǀanus tsîna. Nē hoa 2 xūn ge a ǂhâǂhâsa, ûib ǃaroma. Jehovab ga ǂhâba hâ o i ge ǁîba ǃoaba tama hâ khoena nē 2 xūna xū ǃgâiba ga hō tama hâ. Xaweb ge ǀnamxaǃnâse hoa khoena sores di ǃnâb tsî ǀanuba ra mā. (Mat. 5:​43-45) Jesub ge nē xūna ge sîsenū îb ǁîb di saosabena ǁkhāǁkhā, Jehovab ra ǂhâbasa în hoa khoena ǀnamma ǁgau. Sores îxase ra ǂgâ ǀgauba du ga mû tamas ka io ǁkhoaxase î ra ǀapi ǁaeba. O Jehovab di ǀnammi hînab hoa khoena ra ǁgauba ǂâis ǃnâ ūhâ re. ǁÎb di aiǁgaus ge nî ǂkhâǃnâ da, î da ǁkhā ǀnamma khoena ǁgau, aoǁnâba nîs ǃnâ-ū. w23.03 17 ¶9-10

Tae-e apostel Johaneba ge buru kai? Tarekhoes hîna ǀapa ǀgurub ai ǂnôasa. ǁÎs ge a “kai ǀai-ao” tsî ǁîs ǀons ge “Babilons kais” di hâ. ǁÎs ge “ǃhūbaib di gao-aogu” ǀkha ra “ǀai.” (J.ǂHa. 17:​1-5) ‘Babilons kaisa’ a ham? Nē khoes ge politiek ǃnande a ǂnûǁkhaeba ǁoa. ǁÎs ge ǃhūbaib di ǂgaeǂgui-aogu ǀkha ra ǀai. (J.ǂHa. 18:9) Tsî ǁîs nē ǀgurugu [ǂgaeǂgui-aogu] ai ǂnôas ge ra ǁgau ǁîs ǁîga ra ǂgaeǂguisa. ǁNās xōǀkhās ge ǁîsa, nē kai ǂgaoxa ǁGâuab ǃhūbaiba a ǂnûǁkhaeba ǁoa. ǁNāgu ge ‘ǃhūbaib ǁamaxū-aoga’ hîna ǂHaiǂhais ǂkhanis ǃnâ a xoamâisaga. (J.ǂHa. 18:​11, 15, 16) Ama tama ǀgoreǀî ǀgaub ge ǀorokam Babilons ǃnâ ge tsoatsoa. ǁNā-amagas ge Babilonsa hoa ama tama, ǂgomde ra ǂnûǁkhaeba. Tsîs ge ǃhūbaib hoab ǃnâ ama tama ǂgomdi dana.—J.ǂHa. 17:​5, 18. w22.05 11 ¶14-16

ǀNî ǁaen ais ge ǁgûsa a ǂâiǂhansen ǁkhā, ǁîs ôan Jehovaba ǃoabasa nî ǁhûisa. ǁGûn ge a ǂan matikō ǁgâibab ǁGâuab ǃhūbaiba ǁîn ôana ra māsa. ǁNās xōǀkhā di ge ǁgûde ǁîdi ǀgôana, dadasa-i ōse tamas ka io. Jehovaba ǃoaba tama ao-i ǀkha ra kaikai. Jehovab tsî Jesub tsîn ge ǁîn omaris ase ra dība bi xūna ra ǃgôaǃgâ. Jehovaba ǃoaba tama khoen tsî ǃgamme hâ khoen ǀguin ge ǁîn ôana Jehovaba ǀnamsa huis ǀkha ǃgomsiba ūhâ tama. Hoa ǁgûra ga Jehovaba ǃoaba xawe i ge a ǃgom ǁkhā, ǀgôan di ǂgaoga tsâǀkhāsa, în Jehovab di ǂgomǂgomsa ǃoaba-ao kai. Tā kaise ǂâiǂhansen re. Jehovab ge nî hui du. Tae-i ǃaroma du ǃnāsa ǂansa xūn xa ūhâ ǁgûn ǀkha ǃhoa tama hâ în ǁnā ǂansa sadu ǀkha ǀgoragu? (ǂKhm. 11:14) Jehovaba ǃoa du ge a ǀgore ǁkhā tsî ǂganbi ǁkhā îb hui du, î du ǂanǂui tae-en sadu ǀgôana tsâ tsî ra ǂâisa.—ǂKhm. 20:5. w22.04 17 ¶4, 7; 18 ¶9

Jehovaba da ge ǀnam tsoatsoa ǁkhā, ǁîb di ǀgôaba da ga ǃgâise ǂan o. Hîna ǃgâise ǁîb di dadab di ǀgauga ra ǁgaeba. (Heb. 1:3) Jesuba da ga ǃgâise a ǂan ǂgao, o da ge haka ǃnaeǃkhaidi ǁîb xa hâde nî ǁkhāǁkhāsen. Elobmîsa du ga tsēs hoasa khomai tama io, o du ge Jesub xa hâ ǃâde nēsi a khomai tsoatsoa ǁkhā. Jesub xa du ra khomai khami, sadu ǂâisa ǁîb ǀgaugu ai ǂnûi re. Khoen ge ǁîb ǀkha hâ tsî ǃhoas xa ge ǃgâibahe i. ǁÎb ge ǂkhari ǀgôarona ǁîb di ǃom di ǃnâ gere tani. (Mrk. 10:​13-16) Jesub ge ǃgâi tsî ge khoexaǃnâ i. Tsî i ge ǁîb di ǁkhāǁkhāsabena ge ǃao tama hâ i, ǁîn di tsâsiga ǁîba mîbasa. (Mat. 16:22) Tsî nē ǀgaub ǃnâb ge Jesuba ǁîb di ǀhomsi ǁGûba gere ǁgae. Jehovab tsîn ge mâǁae-i hoa-i ai a ǃhoa-ūhe ǁkhā. ǁÎba ǃoa da ge ǀgore tsî sida di ǂgaoba a ǁkhōǂui ǁkhā. ǂGomǃgâsiba da ge ūhâ, ǁîb sida ǀgoraǃgâ tidesa. ǁÎb ge ǀnam da tsî ra tsâba da.—1Pet. 5:7. w22.08 3 ¶4-5

Sida di kuru-aob aseb ge Jehovaba, hoa xūna sida xa a ǂan. ǂÂis ǀguisa di re. Kaise i ge buruxa, hoa khoen hîna nē ǃhūbaib ǃnâ hânab a ǂansa. (Psa. 139:​15-17) ǁNā-amagab ge sida ǁgûna xu da ge hō ǀoasa tama kurus a ǂan. ǁNās xōǀkhāb ge sida tanisen ǀgauba ge tsâǀkhā xūn tsîna a ǂan. Jehovaba khoenab ǃamkuse a ǂan ǃkhais ǃaroma tae-e a dī ǁkhā? ǁNās ge ra ǂkhâǃnâbi, îb ǀkhom da. (Psa. 78:39; 103:​13, 14) Jehovab ge ge ǁgau khoenab ra ǀûba ǂgaosa. ǁÎb ge a ǂan ǂguro khoeb Adammi ge, dī xū-i ǃaroma da hoa da a ǁore-ao tsî nî ǁōsa. (Rom. 5:12) Sida tsî nau khoe-i tsîna da ge ǁoreb tsî ǁōba xu a ǁkhae ǁoa. (Psa. 49:​7-9) Xaweb ge sida ǀnamxaǃnâ Eloba ǀkhom da tsî xū-e ge dī, î da orehe. Johaneb 3:16 ǃnâ i ra ǂoaxa khamib ge, Jehovaba ǁîb di ǀguise ǃnae hâ ǀGôaba ge sî, îb sida ǁōba.—Mat. 20:28; Rom. 5:19. w22.06 3 ¶5-6

ǁNā ǀûba-aon nî ǀûbahesab ge Jehovaba ǃamkuse ge ǁgau, Joba ǃoab ge mî xūna xu. ǁNā ǂgomǂgomsa khoeb ge ǀgaisase ǂgaob ai ge tsûtsûhe. ǃNona khoegu Elifab, Bildadi tsî Sofar hâ gu ge mî xūn xa. Jehovab ge Joba ge mîba îb ǁîga ǀgoreba. Jobi ge ǁnāsa dī toas khaoǃgâb ge Jehovaba ǁîba ge ǀkhae. (Job. 42:​8-10) Tsûtsûsen da ge ra ǁaixa hâse da ga hâ o. ǁAib ge ǃgom xū-i khami ī. ǁNā-amagab ge Jehovaba ra ǂhâba, î da ǁnā xūna ǁnāxu tsî ǂkhîba hō ǁkhā. (Efe. 4:​31, 32) ǂKhâǃnâ dab ge ra î da ‘ǁaiba xu ūdabasen tsî ǁaixasiba ǁnāxu.’ (Psa. 37:8) ǁNā ǀapemāsa da ga sao, o i ge nî hui da. Tsî khoe-i ga tsûtsû da tsî da ga ǁaiba ǃkhōǀgara, o da ge sida tsâsigu tsî ǂurusib tsîna a tsûtsû ǁkhā. (ǂKhm. 14:30) Nau khoe-i ǀkha da ga noxoba ǁaixa ǀgara, o i ge ǁî-e tsûtsû tama hâ. Tsî ǁnās ge sida ǃgā-e ās ǀkha a ǀgui. ǁNās ge nau khoe-e tsûtsû tama hâ. ǁNā-amaga da ga nauna ǀûba, o da ge ǀkhaeba aitsama ra māsen. Tsî da ge ǁnās ǀkha ǂkhîba ūhâ. Tsî noxoba a aiǃgû ǁkhā Jehovab di ǃoabas ǃnâ. w22.06 10 ¶9-10

Sida ǃâubasens ge ǀgapas hîna, danasa ra ǁkhaubas khami sida ǁnâuǃāga ra ǁkhauba. Tsî ra hui da î da tā sida xa ǀgui ǂâi. ǁNās ge sida ǀhōsagusis hîna da Jehovab ǀkha ūhâsa nî ǁgaiǁgai. (1Kor. 15:​33, 34) Sida ǃâubasens ǀgapas ge sida ǂâiǀgauga a ǁkhauba ǁkhā, tātsē da Jehovaba ǂkhîǂkhî tide, ti da ga ǂâi o. ǂÂi-oa re Jobi di ama tama ǁkhaeǂgao-aob, Elifasi ge Jobi ǀkha ǁkhā ǀgauba ge sîsenū. Elifasi ge ge mî: “Tare-e khoe-e, o i a ǃanu ǁkhā?” Aiǃgû tsîb ge Elob xa ge mî: “Elob ge ǁîb ǀhomǃgāgu ǂûga ǂgomǃgâ tama hâ, tsî ǀhommi tsîn ge ǁîb mûǁae ǃanu tama hâ.” (Job. 15:​14, 15) ǁNāb ge a ǂhumi. ǂÂihō re, ǁGâuab ge ǂhâba hâ î du ǁnā ǂâiǀgauba ūhâ. ǁÎb ge a ǂan ǁnā ǀgaub ai du ga ǂâi ǀgara, o du sadu ǃâubasensa nî ǂoaǃnâ tsoatsoasa. ǁNā-amaga ǁnāti i ǂhumiba xu ǂgōsen, î Jehovab mîmâis ai ǂâisa ǂnûi. Tātsē du ge ǂgom ǀoro tide Jehovab ǀamose du nî ûi ǃkhaisa ǂhâba hâsa. Tsîb nî hui du sa î du ǁnā mîǁguiba sīǃnâ.—1Tim. 2:​3, 4. w22.10 25-26 ¶8-10

ǁGâuab ge gere ǂhâba îb Joba ǂâi, Jehovab ǁîb ǀkha ǁaixa hâ amagab ge nē ǃgomsina gere hōǃâsa. Aiǁgauseb ge ǁGâuaba ǀgaisa ǂoasa ge sîsenū, îb Jobi di ǀgôan ge ǀguiba gere ǂûǁae omsa hīkākā. (Job. 1:​18, 19) Tsîb ge ǀaeba ǀhomma xu ge ǁnā kai tsî Jobi di xamanin tsî ǁîb di ǃgān tsîna ge ǃgam. (Job. 1:16) ǂOab tsî ǀaeb ge ǀhomma xu ǁgôaxa, amagab ge Joba ge ǂâi hâ i,Jehovaba xu i ra ǀkhī ti. Nēs xa ǃaromahe hâseb ge Joba gere ǂâi, Jehovabab ge ǁaixa kai di. Xawes tsînab ge Joba ǁîb di ǀhomsi ǁGûba ge ǁaixa kai ǂgao tama hâ i. Jobi ge ge ǂanǃgâ, ǃkharu gere kurigu ǃnâb ge Jehovaba xu ǃgâi xūna gere hō ǃkhaisa. ǁNā-amagab ge gere ǂâi ǃgâinab ga ūǃoa, ob tsūn tsîna nî ūǃoasa. Tsîb ge ge mî: ‘Ās Jehovab di ǀonsa koahe.’—Job. 1:​20, 21. w22.06 21 ¶7

Jesub ge ǁîb di ǁkhāǁkhāsabega, ǁnā i xa ge ǂanǂan Johaneb 17:14 ǃnâ. Sida ge ǁnā kēbos di dīǀoaǀoasa ge mû tsî ǃnāsase nē 100 kurigu di ǀuniga tsēdi ǃnâ. Mâ ǀgaub ǃnâ? Jesub ge 1914ǁî kurib ǃnâ Gaob ase a ǁgaumâihe toas khaoǃgâb ge ǁGâuaba ǀhomma xu ge aoǁnâhe. ǁÎb ge nēsisa ǃhūbaib ai hâ, tsî ǁîb di dīkākāsa ǃâu ǀgara hâ. (J.ǂHa. 12:​9, 12) Xaweb ge ǁnā ǁaeba xu kaise a ǀhape. ǁGâuab ge ǁaixa hâ tsî Elob khoena ra ǁnāǂām. (J.ǂHa. 12:​13, 17) ǁNā-amagas ge ǁGâuab di ǃhūbaib kaise ǃhui da hâsa. ǃAroma i ge a ǀkhai î da ǁGâuab tsî ǁîb di saosaben tsîna ǃao. Xawe da ge sida tsîna ǁnā ǂgomǃgâsib apostel Paulub ge ûhâ iba ūhâ, xoab ge o: “Elob ga sada ǀkha hâo, tari-e kha sada ǃoagu nî hâ?” (Rom. 8:31) ǀGaisa ǂgomǃgâsiba da ge Jehovab ǃnâ ūhâ ǁkhā. w22.07 18 ¶14-15

Jesub ge ge ǂâiǂhansen tama hâ i, ǀuniga tsēdi ǃnâ i sîsen-aon ǃnubusiba nî hâsa. ǁÎb ge ge ǂan i saora mîdi, Psalms xoa-aob ge kēbodi nî dīǀoaǀoahesa: “Sa ǁaes ge nî māsenxa, sa ǀgaib di tsēs ai.” (Psa. 110:3) ǃGâiǂhôasa du ga aoǁnâ, o du ge Jesub tsî ǂgomǂgomsa ǃgāb tsîna ra ǂkhâǃnâ. Tsî ra hui îs ǁnā kēbosa dīǀoaǀoahe. Sîsen-i ge ra aiǃgû, xawe i ge ǃgomsina hâ. ǀGui ǃgomsib hînan Gaosib aoǁnâ-aona ra hōǃâb ge, mâǃoahesa. Jehovaba ǃoaba tama khoen, kerkhen ǂgaeǂgui-aon. Tsî politieks ǂgaeǂgui-aon ge, ama tama xūna sida sîsenni xa ra mî. Sida omaris ǁanin, ǂan da a khoen tsî sîsenū da ra khoen ga nē ama tama ǂhôan xa ǂgaeǂhapuhe o. On ge a ǁgari da ǁkhā î da, Jehovaba ǃoaba ǀû tsî aoǁnâ ǀû. ǀNî ǃhūgu ǃnâ i ge sida khākhoena, ǃaoǃao da, ǁnāǂam da tsî sida ǃgâsana tronkede ǃoa ra sî. w22.07 8 ¶1; 9 ¶5-6

Jehovab ge ǂhâba hâ, î da ǁaeba ǁamaǂui tsî Elobmîsa ǁkhāǁkhāsen. Tsî khomai da ra xūn xa ǃgamse ǂâiǃgâ. ǁKhāǁkhāsen da ra xūna da ga ûiǂui, os ge sida ǂgomsa ra ǀgai. Tsî da ge sida ǀhomsi ǁGûb ǃoa ra ǀgū. ǁNās xa ǃaromahe hâse da ge ra ǀgaiǀgaihe, î da ǃgomsigu ǃnâ mâǀgai. Jehovab ge ǃanu gagab tsîna ǁnān hîna ǁîb mîs ai ra ǂgomǃgâna ra mā. Tsî nē gagab ge ‘kai ǀgaiba’ a mā da ǁkhā, î da mâ ǃgomsi-i hoa-i ǃnâ mâǀgai. (2Kor. 4:​7-10) Jehovab ge “ǂgomǂgomsa tsî ǁnâuǃāxa” ǃgāba ra hui, î-i ǂgui ǂkhinin, vidion tsî musik-i tsîna kuruhe. Hîna a hui da ǁkhāna, î da sida ǂgomsa ǀgaiǀgai, omkhâi tsî gagasise ǂkhaikari hâ. (Mat. 24:45) Jehovab ge ǁîb khoena ge ǁkhāǁkhā, în ǃgom ǁaegu ǃnâ ǀnamgu tsî ǁkhaeǂgaogu. (2Kor. 1:​3, 4; 1Tes. 4:9) Sida ǃgâsan ge, māsenxase ra hui da, î da ǂgomǂgomsase mâǀgai ǃgomsiga da ga hōǃâ o. w22.08 12 ¶12-14

ǃNorasase da ga sida ǃgâsan ǃgâi ǀgauga mî, o da ge ǀgū ǀhōsagusisa ǁîn ǀkha ra omkhâi. Tsî ǀhaohâb ǃnâ hâ ǀnamma ra ǀgaiǀgai. ǀNî ǁaegu ain ge ǂansa ūhâ Xristeǁîn tsîna ǁnâusagu tamas ka io a ǂnoagu ǁkhā. Tsî ǁnās ge Paulub tsî ǁîb ǀgū ǀhōsab, Barnabab ǀkha ge i. Nē ǀgam khoega ge ǀgaisase ge ǁnâusāgu, Markuba ǁîkha di sîsabe sîsenni ǃnâ nî ūsao xa. “Nēs ai kha ge ge ǁnâuǃāgu” ǁoa i. Tsî kha ge ǀguiba ge ǃnarima ǀû. (ǃNǃkh. 15:​37-39) Xawe gu ge Paulub, Barnabab tsî Marku hâga ǂkhîba ge kuru. Paulub ge ega Barnabab tsî Marku hâkha xa ǃgâise gere ǃhoa. (1Kor. 9:6; Kol. 4:10) Sida tsîn ge nî dītsâ î da ǁnâusagudi hîna da naun ǀkha ūhâ de ǃgâiǃgâi. Tsî ǁîn ǃgâiǀgaugu ai sida ǂâisa ǂnûi. ǁNāsa da ga dī, o da ge ǂkhîb tsî ǀguiǃnâxasib tsîna nî ūhâ. w22.08 23 ¶10-11

Jehovab ǂhanu-ai ǁgaragu ǃoagu da ra dītsâ tsî ûi hîna da ge nau khoena ǀgoraǃgâsa xu nî ǂgōsen. ǂÂis ǃnâ ūhâ re, Jehovab ge “hoaraga ǃhūbaib di ǀgoraǃgâ-aoba.” (Gen. 18:25) Jehovab ge ǀgoraǃgâs di ǃereamsa mā da tama hâ. Hā re, î da ǁkhawa ǂhanu-ai khoeb Josefi aiǁgausa ǃhaoǃgao. ǁÎb ge nau khoena ǀgoraǃgâsa xu gere ǂgōsen. ǁNān hîna ge ǁîba ǃgâi tama ǀgaub ǃnâ gere hâ-ūn tsîna. ǁÎb ǃgâsagu ge ǁîba mîǁgaiǁgai, ǃgāse ǁamaxu tsî ǁîgu dadaba ge ǂgom kai Josefi ge ǁōsa. ǀGaisa ǂgaeǂgui-aob aseb ge Josefa ǁîb ǃgâsaga ǀgoraǃgâ tsî ga ǀhao ǃoa hâ. Josefi di ǃgâsagu ge gere ǃao, ǁîb ǁkhā xū-e ǁîga nî dī ǃkhaisa. Xawe gu ge kaise gere ǃhausen dīgu ge xū-i xa. Xaweb ge Josefa ǂgomǃgâ kai gu tsî ge mî: “Tā ǃao re, tita ge Elob di soasa a ū ǁoa.” (Gen. 37:​18-20, 27, 28, 31-35; 50:​15-21) Josefi ge ǃgamǃgamsens ǀkha ǀgoraǃgâsa Jehovaba ge ǁnāxuba. w22.08 30 ¶18-19

ǂAn i du a, Jehovab sado a sîsenū ǁkhāsa, nau khoe-i di ǀgoresa ǃereams ǃnâ? Nēs ge ǀhaohâb ǃûi-aob, ǀhaohâb hui-aob, aimâba-ao-i tamas ka io aoǁnâ-ao-i ǀhaohâb ǃnâ hâ i tsîna ǃkhōǂgā hâ. Kairan, ǂkham-an, ǃgâsab, ǃgâsas, mâ-i hoa-i tsîn ge a hui ǁkhā. Jehovaba a ǀnam khoe-i ga huiba ǂgan o. Ob ge ǁîba ǀhaohâb ǃûi-aogu tsî nau ǂgomǂgomsa ǃoaba-aon tsîna a sîsenū ǁkhā, în “kai ǁkhaeǂgaos” ase ī ǁnā khoe-i ǃoagu. (Kol. 4:11) Kaise da ge ra ǂkhî Jehovab tsî nau ǃgâsan tsîna da ra ǃoaba o. ǀAeb khoraǂuisens, tsūkēǃgâb tamas ka ion ga ǃgôaǃgonhe ǁaeb ai. ǃGâiaǂgob ǀkha da ge hui tsî a ǁkhaeǂgao nî ǁkhā. Nauna da ge ǀnîsi ra hui ǂgao. Xawe i ge nēsa a īǁoa sida omaris tsîn ǃgomsiga ra hōǃâ amaga. Noxoba hâs ge, sida ǃgâsana da ge ra hui ǂgao. Tsî ǁkhā da a-i hoa-e da ga dī o ǁîna huis ǃaroma, ob ge Jehovaba kaise ra ǂkhî.—ǂKhm. 19:17. w22.12 22 ¶1-2

ǀNammi ge ǃgaoǃgaob ǂgomǃgâsib diba. Jesub ge ge mî ǀgam kai mîmā ra ge, Jehovab tsî sida ǀgūkhoeba ǀnamsa. (Mat. 22:​37-39) Jehovaba da ge a ǀnam. Tsî da ge ǁîb di ǀoasa aiǁgaus, ǂgomǂgomsasib disa ra ǁgae ǂgao. Aiǁguase, ǀnammi hîna da sida ǃgâsana ūba hâb ge ra ǂkhâǃnâ da î da ǁîn di ǂganǃgâsa xūna sâusase ūhâ. Tātsē da ge sida ǃgâsana tsûtsû, tao kai tsî tsûaǂgaoba a ǃaroma ǁkhā xūna ǃhoa tide. ǃGamǃgamsenxasib tsîn ge nî hui da, î da ǂgomǂgomsa. ǃGamǃgamsenxa Xristeǁî-i ge ǁgausen ǂgao tama hâ, ǁî-î ǂgurose nau khoena xū-e nî mîbasa. (Fil. 2:3) ǁÎ-î ge nau khoena ǂâi kai ǂgao tama hâ, ǂhâǂhâsa xū-i hîna i-a ǃhoa ǁoa-i xa i a ǂansa. ǃGamǃgamsenxasib ge nî ǁkhae da, î da tā khoena sida ǂâiǀgauba mîba. Xūn hîna Elobmîs tsî sida ǂkhanin ǃnâ ǃhoaǃgaohe taman xa. w22.09 12 ¶12-13

ǀHomǃgāb ge Daniela ge mîba, nē kēbo mîdi hîna Danieli ǂkhanis ǃnâ hâ di ge ǀoasase Elob khoen xa nî ǁnâuǃāhe. Xawe “eloxoresan ge ǁnâuǃā tide.” (Dan. 12:10) Nēb ge ǁaeb hîna da sida tanisens ǃnâ-ū nî ǁgauba, eloxoresan ǁaegu da hâ tama ǃkhaisa. (Mal. 3:​16-18) Jehovab ge ǁnān hînab “ǃgomǀgausa” tamas ka iob ǀō-aisa xūn ase ra mûna ra ǀhaoǀhao. Amabes ǃnâ da ge ǁnān ǁaegu ra hâ ǂgao. Amase da ge ǃgâi ǁaeb ǃnâ ûihâ. Xawe kaise buruxa xūn ge ǀgū ǁaeb ǃnâ nî ī. ǀGūǁae da ge eloxoresan nî dīkākāhe ǀgauba nî mû. ǁNāpaxu da ge nî mû, Jehovab ge Daniela ǃoa a mî mîmâis nî dīǀoaǀoahe ǀgauba: “ǁKhawats ge nî khâi tsî ǂnûiǂuibahets hâ amǃnâsa ǀuni ǁaeb ai nî ǃkhōǃoa.” (Dan. 12:13) ǁKhore i du ra ǁnātsēs hînab Daniela, sadu ǀnamsaben ǀkha ‘ǁkhawa khâisa’ nî hōsa? Ti i ga io, ǁkhā du a xū-i hoa-e dī re î du ǂgomǂgomsase hâ. O du ge ǂgomǃgâ ǁkhā, sadu ǀons Jehovab ûib ǂkhanis ǃnâ nî hâ ǀgarasa. w22.09 24 ¶17; 25 ¶19-20

ǁNā mîdi ge Esegiela ge ǀgaiǀgai. Tae-i ǃaroma? Esegieli ge ǀnîsi ge ǂâihō, Jehovab ge ǁnā mîde Moseb tsî Jesajab tsîna a mîbasa. ǁÎb di kēbo-aokha aseb ge a ǁhûi kha o. (Eks. 3:10; Jes. 6:8) Esegieli tsîn ge ge ǂan i matib ge Jehovaba, ǁnā ǀgam kēbo-aokha a huisa, ǁîkha di ǃgom ǁgaumâide dīǀoaǀoasa. Jehovab ge Esegiela ǀgamǁî ǃnāsa ge mîba: “Tita ge ǁîn ǃoa ra sî tsi.” Kēbo-aob Esegieli ge ǃgâi ǃaromasa ge ūhâ i, Jehovab di ǂkhâǃnâs ǃnâ ǂgomsa. Esegieli tsîn ge ǂgui ǃnāde ge xoa: ‘Jehovab di mîdi ge tita ǃoa ge hā.’ (Ese. 3:16) ‘Jehovab ge ǁkhapa tita ǃoa ge mî,’ ti hâ mîs ge ǂgui ǃnāde xoasa. (Ese. 6:1) Amaseb ge Esegiela gere ǂgom Jehovab xab ge sîhesa. Esegieli dadab ge ge pristeri i, tsîb ge ǁîba ǀnîsi Esegiela gere ǁkhāǁkhā, Jehovab ge hoaǁae ǁîb di kēbo-aoga gere mîbasa ǁîkhab nî hui ti. Jehovab ge Isaki, Jakob tsî Jeremiab ǃoa nē mîde ge mî: ‘Tita sats ǀkha hâ xuige.’—Gen. 26:24; 28:15; Jer. 1:8. w22.11 2 ¶3

Adammi tsî Eva hâra ge ǁōre tsî ǁîra di ǀgôana ǁōba mā, xawes tsînab ge Jehovaba ǁîb di ǂâibasensa dawa tama hâ. (Jes. 55:11) ǁÎb di ǂâibasens ge noxoba ǂgomǂgomsa khoen ǀamose nî ûisa. Ôaǃnâ re Jehovab ge ǁîb ǂâibasensa dīǀoaǀoas ǃaroma mî tsî a dī xūn xa. Jehovab ge ge mîmâi, ǁō hânab khâisa mā tsî ǁîna ǀamose ûis ǃēsa nî māsa. (ǃNǃkh. 24:15; Tit. 1:​1, 2) ǂGomǂgomsa khoeb Jobi ge gere ǂgom, Jehovab ra ǁkhoresa ǁnān hîna ǁō hâna khâisa māsa. (Job. 14:​14, 15) Kēbo-aob Danieli ge ge ǂan i khoen ǃâubasensa ūhâsa, în ǁōba xu khâi ǀamose ûis di aiǂhanub ǀkha. (Psa. 37:29; Dan. 12: 2, 13) Jodeǁîn hîna ge Jesub tsēdi ǃnâ hâ în tsîn ge ge ǂan i. Jehovab ǁîb ǂgomǂgomsa ǃoaba-aona ‘ǀamo ûiba’ a mā ǁkhāsa. (Luk. 10:25; 18:18) Jesub ge nē mîmâis xa ǂguiǃnāde gere ǃhoa, ǁîb tsîn ge khâisa ge māhe ǁîb Îb xa.—Mat. 19:29; 22:​31, 32; Luk. 18:30; Jhn. 11:25. w22.12 4-5 ¶8-9

Jehovab ge ra ǁkhau da î da ǁîb ǀgūse hâ. (Jak. 4:8) ǁÎb ge ra sida Elo, ǁGû tsî ǀhōsa kai ǂgao. ǁÎb ge sida ǀgorede ra ǃeream tsî ǃgomsin ǃnâ da ga hâ, o ra hui da. Tsîb ge ǁîb ǀapeǂhumisa ra sîsenū sida ǁkhāǁkhā tsî ǁkhaubasa. Jehovaba ǃoa da ge a ǀgū ǁkhā, ǀgores, ǁîb mîsa khomais tsî ǂâiǃgâs ǃnâ-ū. Nēsa da ga dī, o da ge ǀnammi tsî ganganxasib tsîna ǁîba ra ǁgau. ǂKhâǃnâhe da ge ra î da ǁîba ǁnâuǀnam tsî koa ǁîb anu hâ ǀgaub ǃnâ. (J.ǂHa. 4:11) ǃNāsase da ga Jehovaba ǂan, o da ge ǁîba ra ǂgomǃgâ tsî ǁîb di ǀapeǂhumis hînab mā da hâs tsîna. ǁGâuab ge ra dītsâ îb ǂkharirobese sida ǂgomǃgâsib Jehovab tsî ǁîb ǀapeǂhumis ǃnâ da ūhâba ǂkhabuǂkhabu. Xawe da ge aitsama ǁîb di ǁnāǂamde a mâǃoa ǁkhā. Sida ǂgoms ga ǀgaisa tsî i ga, Jehovab ǃnâ da ūhâ ǂgomǃgâsiba ǁnōbeǁoasa, o da ge sida Elob tsî ǁîb di ǀapeǂhumis tsîna ǁnāxu tide.—Psa. 31:​13, 14. w22.11 14 ¶1-3

ǂGui ama Xristeǁîn ge ǁîn ǃnorasasib tsî ûigu tsîna ǁkhōǁkhōsa mâsigu ǃnâ gere mâi. Jehovaban hoan xa a ǀgapi ǂGaeǂgui-aob ase ǀnam amaga. ǁNā Xristeǁîn ge mîǁgui hâ, Jehovab ǃoagu ǂgomǂgomsase hâ ǀgarasa. ǁÎn ge ǂhauǃnâsib ǃkhōǀgara-ao tsîn ge ǃnona Hebreǁîgu khami ī hîna ge hoan xa a ǀGapib ǃoagu gu ge ǂgomǂgomsase hâ ǀgara ǃkhais ǃaroma, ǂhubira ǀaeba xu ǁîgu ûiba sâuhe ga. Psalms di xoa-aob Davib ge ǂhauǃnâsib ǂhâǂhâsasib hîna da Jehovab ǃoagu nî ūhâ ǀgarab xa ge xoa: ‘Sats ge hoaraga khoesiba ra ǀgoraǃgâ, xuige ti ǃgâib ǃoa ǀgoraǃgâ re Jehova ǀhapio ta a ǃkhaisats a ǂan xuige.’ (Psa. 7:8) Davib ge ǁkhaba ge xoa: “Ab ǃgâisib tsî ǂhauǃnâsib tsîna tita sâu.” (Psa. 25:21) ǃGâi ǀgaub hîna da nî ûib ge, Jehovab ǃoagu ǂgomǂgomsase hâ ǀgarasa. Tsî da ge sida ǂgomǂgomsasib ǁîb ǃoagu da ūhâba, nî ūhâ ǀgara. O da ge Psalms xoa-aob gere tsâ khami nî tsâ saora mîde ge xoaba: ‘ǀKhaehen ge hâ ǁnān ǂhauǃnâna, Jehovab di ǂhanub ǃoa ra ûina.’—Psa. 119:1. w22.10 17 ¶18-19

Hoa ǁgamǀhaodi hînab ge Joba ǁîb ûib ǃnâ ūhâ i di xas, ge ǀguisa gere mâǂoa. ǁNās ge Jehova Elob ǀkhab ge ūhâ i ǁgamǀhaosa. ǁNā ǁgamǀhaos ǃnâb ge Jehovaba, Jobi di ǂgomǃgâsiba ǁîb di gā-aisib ǃnâ gere ǀgaiǀgai. Tsîb ǁkhāsiba ūhâsa ǁîb di ǃoaba-aona kōǃgâsa. Jehovab ge ǀnî xūn hînab kurus ǃnâ ra mâǂoa kaina ǃoa ge ǁnaeǁgau. Aiǁgauseb ge Eloba Joba gere ǂâiǂâiǃnâ, ǁîb xamanina ra kōǃgâsa tsîb Jobi tsîna a kōǃgâ ǁkhāsa. (Job. 38:​39-41; 39:​1, 5, 13-16) Kurus di aiǁgaudi xa ǂâiǃgâs ǃnâ-ūb ge Joba, ǃgâise Elob di ǀgaugu xa ge ǁkhāǁkhāsen. Sada tsîn ge Elob xa ǃnāsase a ǁkhāǁkhāsen ǁkhā, ǁîb ge kuru xūna da ga ôaǃnâ o. Xawe î ge ǁnāsa dīsa ǀnî ǁaegu ai a ǃgomba da ǁkhā. Kai ǃās ǃnâ da ga hâ, o da ge ǀnîsi Jehovab ge kuru ǂgui xūna tsēs hoasa mû ǁkhā tide. Kai ǃās ǃauga da ga hâ xawe da ge ǀnîsi a tsâ ǁkhā, ǂkhari ǁaeroba da ūhâsa Jehovab di kurusa ôaǃnâsa. ǁNās ǀkha î ge a ǃgâi, ǁaeba ǁamaǂui tsî Jehovab di kurusa ǃoa kōsa. w23.03 15 ¶1-2

Jesub ge ge mî, “ǃhuriǃhurisa ǃhūǂgubigu” tsî ǀnî hâ tsūkēǃgâgu tsîn nî hâsa ǀams nî hās aiǃâ. (Luk. 21:11) Tsîb ge ǁîb tsîna ge mî, “ǁgauoǃnâsib di ǀarosens” nî hâsa. Nēsa da ge nētsē sada ǂnamipe ra ī ǂkhābadīb. Tsî teroresmeb ǁnāǂamdi ǃnâ-ū ra mû. (Mat. 24:12) Jesub ge ge mî nē ǃgomsigu ge, Jehovaba ǃoaba tama hân ǀguina hāǂam tide ti. Xawe hâs ge Jehovaba ǂgomǂgomsase ra ǃoaban tsîn ge tsūkēǃgâb xa ge tsâǀkhāhe. (Jes. 57:1; 2Kor. 11:25) Jehovab ge buruburuxa ǀgaub ǃnâ nē tsūkēǃgâga xū ǁkhauba da tide. Xaweb ge ǁîba ǂhâ da hân hoana nî mā da, î da ǃnomsase hâ tsî ǂkhîba ūhâ. ǁAeb aiǃâ da ga aiǂhomisen o. Os ge ǁnāsa nî supu kai tsūkēǃgâb ga hā ǁaeb ai sâsase hâsa. Xawe tsūkēǃgâb ǃaroma aiǂhumisensa ra ǁgau, Jehovab ǃnâ da ǂgomsa ūhâ tama hâsa? Hî-i. Tsūkēǃgâb ǃaroma aiǂhumisens ge ra ǁgau, ǁîb sida nî huis ǃnâ da ra ǂgomsa. Mâ ǀgaub ǃnâ? Elobmîs ge ra ǀapemā da, î da hānî tsūkēǃgâgu ǃaroma ǀnai aiǂhumisen. w22.12 18 ¶9-10

Josefi ge ǃkhō-oms ǃnâ hâ io. Ob ge Jehovaba ge ǃaroma îb Egipteb di Gao-aoba ǀgam ǃaoǃaosa ǁhapo ra ūhâ. Gao-aob ge ǂanǂui o, Josefi ǁkhāsiba ūhâsa, ǁhapode ǁguiǃās diba, ob ge ǁîba sī ge ū kai. Jehovab huib ǀkhab ge Josefa ǁnā ǁhapode ge ǁguiǃā. Tsîb ge Faraoba kaise ge buru Josefi ge ǁîba a mā ǀapemādi ǀkha, mûb ge o, Jehovab nē ǂkhamkhoeb ǀkha hâsa, ob ge Faraoba nē ǂkhamkhoeba ǂûn mûǂam-aob ase hoa Egipteb ǃhūb ǃnâ ge ǁgaumâi. (Gen. 41:​38, 41-44) Ega i ge ǃâtsūǀkhāba ge hâ i, hîna ge Egipteb ǀguiba tsâǀkhā tama hâ îba. Xawe i ge Kanani, Josefi omaris gere hâǃnâ ǃhūb tsîna ge tsâǀkhā. Josefi ge nēsi ǁîb omarisab a sâu ǁkhā mâsib ǃnâ ge hâ i. Tsî Mesiab ge hā xu daoba ge sâu. Amase Jehovab ǀguib ge, Josefi gere dī xūn hoana ǃgâise gere ǃgûǁnâ kaiba. ǀAms aib ge Jehovaba, Josefi ǃgâsagu di ǁgai ǂâibasensa ge dawa, î-i ǁîb di ǂâibasensa dīǀoaǀoahe ǁkhā. w23.01 17 ¶11-12

Khoe-i hîna ra ǃûisen î ge ǂkhaikarise ra hâ, xūn hîna ǁî-i di ǀhōsagusisa Jehovab ǀkha a ǁgaiǁgai ǁkhā i ǃoagu tsî xū-e ra dī în ǁîna xu ǂgōsen. ǁNā ǀgaub ai î ge ǁî-e Elob ǀnammi ǃnâ ra hâhâ. (ǂKhm. 22:3; Jud. 20, 21) Apostel Paulub ge Xristeǁîna ge mîba, în ǃûisen. Aiǁgauseb ge ǁîba Efesers ǃnâ hâ Xristeǁîna ge mîba: “ǁNā-amaga ǂōrisase kōbasen mâ ǀgaus aits ra ûi ǃkhaisa. Tā gâre khoe-i khami ûi, xawe gā-ai-i khami.” (Efe. 5:​15, 16) ǁGâuab ge hoaǁae ra dītsâ, sida Jehovab ǀkha ūhâ ǀhōsagusisa dīkākāsa. ǁNās ǃaromas ge Elobmîsa ra ǀāpemā, î da ‘ǃKhūb ra tare-e ǂgaoǀkhā da ǃkhaisa ǁnâuǃā.’ Nēs ge nî hui da, hoa ǁnāǂamdi hîna ǁGâuaba xu ra hāde xu ǁkhaubasensa. (Efe. 5:17) ǂHanu mîǁguiga dīs ǃaroma î ge a ǂhâbasa Jehovab ra ‘ǂgaoǀkhā xūna ǁnâuǃāsa.’ Nēsa da ge a dī ǁkhā, hoaǁae Elobmîsa ǁkhāǁkhāsen tsî ǂâiǃgâs ǃnâ-ū. Jehovab di ǂâisa da ǃnāsase ra ǁkhāǁkhāsen khami î ge nî hui da “Xristub di ǂâisa” ūhâ tsî ‘gā-ai khoe-i khami’ ûisa, xūna da mati nî dī ǀgauba mîba da tama ǁgaragu ga ǀkhai xawe.—1Kor. 2:​14-16. w23.02 16-17 ¶7-9

Matikō ǃnāde du sadu di omsa ra ǃanu? ǀNîsi du ge doe ǂgâ du nîs aiǃâ kaise ge ǃanu, tae-e nî ī ǁkhawa du ga ǃanu tama io? ǂAn du ase i ge ǃkhaese ǁkhawa a ǀurixa ǁkhā. Sadu omsa du ga ǃanuse a ūhâ ǂgao, o du ge hoaǁae nî ǃanu. ǁKhā sîsenni ge a ǂhâbasa sada ǂâi ǀgaugu tsî ǂūb tawa i ga hā o. ǂAn da as ge ǁāǁnâhe da nîs aiǃâ da ge ǃgarise gere sîsen, î da ǂhâbasa ǀkharaǀkharana dī. Î da ‘soros tsî gagas tsîra nî ǀuriǀuri ǁkhā xū-i hoa-e xu ǃanuǃanusen.’ (2Kor. 7:1) Xawe da ge nēsi apostel Paulub di ǀapemāsa nî sao, î da aiǃgû ‘hoaragase ǀasaǀasahesa.’ (Efe. 4:23) Nē ǃhūbaib di ǀurib sida ǃnâ ǃhaese a ǂgâ ǁkhā amaga. Xawe da ga Jehovaba ǂkhîǂkhî ǂgao, o da ge ǁaeba xu ǁaeb ǀkha sida di ǂâidi, ǂūb tsî turagu tsîna nî ôaǃnâ. w23.01 8 ¶1-2

ǂÂis ǀguisa di re, mati i gere tsâsa Jesub ra ǁkhāǁkhā hîna ǃgâsa. Matikō ǃnādeb ge ǁîb di danasa xu xoade ǃoa gere ǁnaeǁgausa. ǁÎb di ǁāǁnâs khaoǃgâb ge mî ǂguro mîdi tsî ǁōb nîs aiǃâb ge mî mîdi, ǃnâb ge Jesuba xoade ǃoa gere ǁnaeǁgau. (Deu. 8:3; Psa. 31:5; Luk. 4:4; 23:46) Jesub ge ǃnona tsî ǃkhare kurigu ǃnâ ǃnāsa ǁaeba xoade ǃoa gere ǁnaeǁgau tsî ǁîde gere ǁguiǃā. (Mat. 5:​17, 18, 21, 22, 27, 28; Luk. 4:​16-20) ǁÎb di aoǁnâ sîsen-eb nî tsoatsoas aiǃâb ge Jesuba ǃnāsa ǁaeba Elobmîs xa ǁnâu tsî gere khomai. Amaseb ge oms ai Marias tsî Josefi tsîn ǁgamǀhaodi ǃnâ Elobmîs ǃoa ra ǁnaeǁgau hîna gere ǁnâu. (Deu. 6:​6, 7) Tsî da ge a ǂgom ǁkhā Jesub ge mâ Sâtsēs hoasa, sinagogeba ǃoa gere īsa, ǁîb di omaris ǀkha. (Luk. 4:16) ǁNāpap ge hâ i, ob ge amabes ǃnâ ǃgâise gere ǃgâ xoadi gere khomaihe hîna. w23.02 8 ¶1-2

Jehovaba da ge ǂgui xūn ǃaroma a ǀnam. Aiǁgause ǁkhāǁkhāsen du ge go ǁîb a ‘uîb di ǀausa’ tsîb ǁîba “mâ ǃgâi tsî dīǀoaǀoasa mās” di mā-aosa. (Psa. 36:9; Jak. 1:17) ǃGâi xūn hoan hîna da nētsē ūhân ge sida māxa Eloba xu ra hā. Xoremarib ge Jehovab ge mā da ǀoasa ǀkhaeba. Tae-i ǃaroma da ti a mî ǁkhā? Jehovab tsî ǁîb ǀGôab tsîn ǁaegu hâ ǀgū ǀhosagusis xa ǂâi re. Jesub ge ge mî: ‘Ti Îba ta ge tita a ǀnam’ tsî ‘ti Îb ge tita a ǀnam.’ (Jhn. 10:17; 14:31) ǁÎkhā ǀhosagusis ge ǂgui kuriga ǃkharuhase ge ǀgai. (ǂKhm. 8:​22, 23, 30) Elob ge hōǃâ tsûb xa ǂâi re mā-am î ge o, ǁîb ǀGôaba ǃgoma tsâ tsî ǁōsa. Jehovab ge khoesiba a ǀnam, sadu tsîna ǃkhōǂgā hâse. Tsîb ge māsenxase ǁîb ǀGôaba ge mā ǁguibas ase, în sadu tsî nau khoen tsîna ǀamose ûiǁkhā. (Jhn. 3:16; Gal. 2:20) Nēs xa a kai ǃaroma î ge a ǀkhai Eloba ǀnamsa. w23.03 4-5 ¶11-13

Ama tama ǁkhāǁkhāde xu da ge nî ǂgōsen. Jesub ge Pergamums ǃnâ ge hâ i ǃgâsana ge ǁnama ǁîn ge ǃgâsan ǁaegu ǀgorasa gere dī amaga. (J.ǂHa. 2:​14-16) ǁÎb ge Tiatiras ǃnâ hâna ge koa ǁîn ge ‘Satanni xūna xu’ gere ǂgōsen amaga. Tsîb ge ǁîna ge mîba în amaba ‘ǃkhōǀgara.’ (J.ǂHa. 2:​24-26) ǂKhabusa Xristeǁîn hîna ge ama tama ǁkhāǁkhāde, a sao tsoatsoan ge gere ǂkhâǃnâhe în ǃhōbasen. Sida tae-e nētsē nî dī? Jehovab ǁkhāǁkhāde ra mâǃoa, ǁkhāǁkhāde xu da ge nî ǂgōsen. Eloba ge ǃoaba ǀû khoen [Apostates] ge ‘Eloǃaoǃgâxasib di īsiga ūhâ.’ Xawe i ge ǁîn di tanisen ǀgauba ti ǁgau tama hâ. (2Tim. 3:5) Elobmîsa da ga ǃamkuse ǁkhāǁkhāsen, o da ge ama tama ǁkhāǁkhāde ǂanǂui. Tsî ǁîna xu a ǂgōsen ǁkhā. (2Tim. 3:​14-17; Jud. 3, 4) Sida ǃoabas Jehovab xa ra ūǃoahesa da ge nî ǂanǂui. Sida ǃoabasa ra ǂhani xū-e da ga dī, o da ge ǀkharaǀkharana nî dī, îs sida ǃoabasa Jehovab xa ūǃoahe.—J.ǂHa. 2:​5, 16; 3:​3, 16. w22.05 4 ¶9; 5 ¶11