Junib

Jobi ge ǀgū ǀhōsagusisa Jehovab ǀkha ge ūhâ i. ǁÎb ge kai tsî ǂkhîba ūhâ omarisa xu gere ǀkhī tsî kaise ge ǃkhū hâ i. (Job. 1:​1-5) Xaweb ge ǀguitsēs ǃnâ xūn hoana ge ǂoaǃnâ. ǂGurose, i ge ǁîb di xamanina ge ǁō. (Job. 1:​13-17) ǁNāpaxu i ge ǁîb di ǀnamǀnamsa ǀgôana ge ǁō. ǂÂi re mati ra ge Jobi tsî ǁîb kaikhoe hâra ǃoa tsî gere tsûaǂgao ǀgausa, ǁnâu ra ge o, ǁîra ǀgôan ge ǁōsa. ǁNā-amagab ge Joba ǁîb saraba ǀkhauǃā tsî ǃhūb ai ge ǁnā ǁgoe. (Job. 1:​18-20) ǁGâuab ge sao rase Jobi di ǂurusiba ge tsâǀkhā. Tsî tsûtsûsa taoxa ǀaeba ge mā bi. (Job. 2:​6-8) ǁNās aiǃâb ge Joba ǀhūhâsib ǃnâ kaise ge ǃgôahe hâ i. Khoen ge ǁîb tawa ǀapemāde gere ôa. (Job. 31:18) Nēsisan ge mûbi ǂgaos tsîna ge hî tama hâ i. ǁÎb di ǃgân, ǀgū ǀhōsan tsî ǃgān xab ge ge ǂgaohe tama hâ i.—Job. 19:​13, 14, 16. w22.06 21 ¶5-6

ǁĀǁnâs khaoǃgâ da ge sida tsîna apostel Paulub ge, Efeses ǃnâ ra hâ ǃgâsana a mā ǀapemāsa nî sao. ǁÎb ge ǁîna ge ǂkhâǃnâ în ‘ǀoasa kaikhoesisa’ Xristeǁîn ase ūhâ. (Efe. 4:13) Tsî ǁnās ge ra ǂâibasen în ‘aiǃgû tsî gagasise ǀgaiǀgaisen.’ ǀNai du ge Jehovaba kaise a ǀnam. Xawe i ge sadu ǁîba ūba hâ ǀnamma noxoba a ǀgaisa ǁkhā. Mâǀgaub ǃnâ? Apostel Paulub ge ǀgui ǀgaub xa Filipeǁîn 1: 9 ǃnâ ra mî. Paulub ge ge ǀgore în Filipeǁîn di ǀnamma ‘ǃnāsase kai.’ Sida ǀnammi ǃnâ da ge a kai ǁkhā. Mati da ǁnāsa a dī ǁkhā? Nēsa da ge ‘ǂans tsî hōǃâs ǃnâ ǃnāsase’ dīs ǃnâ a dīhō ǁkhā. ǃNāsase da ga Jehovaba ǂan, o da ge ǃnāsase ǁîba ra ǀnam. Tsî ra ǃgôaǃgâ tsoatsoa, ǁîb xūna ra dī ǀgauba. Tsî da ge ǁnās ǀkha sida ǁkhāsib ǃnâ ra kai, î da ǁîba ǂkhîǂkhî. Tsî da ge tātsēs tsîna, ǁîba ǂkhî kai tama xū-e dī tide. ǃGarise da ge ra dītsâ, î da ǂanǂui ǁîb di ǂâis a taesa. Tsî mati da ǁnās ǀkha ǀguiǃnâxase a sîsen ǁkhā ǀgaus tsîna. w22.08 2-3 ¶3-4

ǂHaiǂhais ǃnâ a xoasa xūn ge ǀnî hâ khoen di tama hâ. Xawe Jehovab ǃnâ māǁnâsen hâ khoen di. Elob di ǃoaba-ao da a amaga da ge buru tama hâ. ǂAnǂui da ga o, nē kēbode dīǀoaǀoas ǃnâ da sida tsîna ǃâ-e ūhâsa. Hîna nē ǁkhoaxa ǂkhanis ǃnâ ra hō-e na. Apostel Johaneb ge nē kēbos nî dīǀoaǀoahesa ge mî nē mîdi ǀkha: ‘ǃKhūb di tsēs ai ta ge Gagab ǃnâ ge hâ i.’ (J.ǂHa. 1:10) Johaneb ge 96ǁî kuri nē mîde a xoa, os ge “ǃkhūb di tsēsa” ge ǀgū tama hâ i. (Mat. 25:​14, 19; Luk. 19:12) Xawe Elobmîs di kēbodi ǃoagus ge ǁnā tsēsa 1914ǁî kuri ge tsoatsoa, Jesub ge Gao-aob ase ǀhommi ǃnâ a ǂnûiǂgāhe o. ǁNā kuriba xu i ge ǂHaiǂhais di kēbodi. Hîna Elob di khoena ǃkhōǂgā hâde ge dīǀoaǀoahe tsoatsoa. Nēsi da ge “ǃKhūb di tsēs” ǃnâ ûi hâǃ—J.ǂHa. 1:3. w22.05 2 ¶2-3

Ûitsamase kha ge ǀgurub tsî ǂkhaba kēbo-aob tsîna, ǀaes hurib, sulfuri ǀkha ra khaub ǃnâ ge aoǂgāhe. Khoesi ǂhanugu ra ǂgaeǂgui hînab ge Eloba ǁîga nî dīkākā. Nēsa tae-e sida ǃaroma ra ǂâibasen? Xristeǁî da a amaga da ge Elob tsî ǁîb Gaosib ǃoa-ai nî ǂgomǂgomsa. (Jhn. 18:36) Nēsa dīs ǃaroma da ge tā, nē ǃhūbaib ǂgīǂgōsi xūn ǃnâ ǀkhā-e nî ǁhûi. Nēsa dīs ge kaise nî ǃgom. ǂHanugu mî tsî da ra dī xūn ǃnâ da ǁîga nî ǂkhâǃnâsa ra ǂgao amaga. ǁNā khoen hoan hîna ǂhanugu, ǁgâib ǃnâ ra māǁnâsenan ge nî saohe. (J.ǂHa. 13:​16, 17) ǁNān hîna ǁnā saosa ra ūǃoan ge, Jehovab mā-amsa hō tide tsî ǀamo ûiba nî ǂoaǃnâ. (J.ǂHa. 14:​9, 10; 20:4) ǁNā-amaga i ge kaise a ǂhâǂhâsa, î da tā ǀkhāga ǁhûi. Khoesi ǂhanugu ga ǁgâiba, mā da xawes tsîna. w22.05 10-11 ¶12-13

ǀNî hâ mîǁguib hîna du a dī ǁkhāb ge sîsenū ǁkhā du a ǀgau-e ǁkhāǁkhāsensa. Sida di ǂansa da ga ǀāǀā, o da ge ǃnāsa ǁgaumâide a ūǃoa ǁkhā. ǂÂi re matikō sîsen-aon a ǂhâsa sa. Betels omgu, kai ǀhaode da ra ūhâ ǃnâ ǃkhaigu. Tsî Gaosib ǀhû-omga oms ǃaroma. ǂGui ǃgâsan ge ǂânsa ūhâ ǃgâsan ǀkha sîsen sa xu, ǁîn ǂande ra ǁkhāǁkhāsen. Nētsen ge ǃgâsana kai ǀhaode da ra ūhâ ǃnâ ǃkhâigu tsî Gaosib ǀhû-omga ǃgâi mâsib ǃnâ ūhâs xa ra ǁkhāǁkhāsen. Nē gu tsî ǀnî hâ ǀgaugu ǃnâb ge Jehova Elob “ǀamosigu di gao-aob” tsî Xristub Jesub “gao-aogu di Gao-aob” tsîna, nē xūna ǀō-aisa ǀgaugu ǃnâ, nē māsenxa sîsen-aon ǃnâ-ū ra īǁkhā kai. (1Tim. 1:17; 6:15) ǃGarise da ge ra sîsen ǂgao î da sida ǂansa sîsenū tsî Jehovaba ǂkhaisiba mā.—Jhn. 8:54. w22.04 24 ¶7; 25¶ 11

Salomob ge kaise ge ǃkhū hâ i. Tsî îsa oms ǃnâ gere hâ. (1Gao. 10:​7, 14, 15) Jesub ge ǀoro xūna ge ūhâ i. Tsî om-i tsîna ge ūhâ tama hâ i. (Mat. 8:20) Hoa ǀgamkha ge ǀnōsa mûǂuiba ǁîkha xūn ǃaroma ge ūhâ i. ǁÎkha di gā-aisib ge Jehova Eloba xu gere hā amaga. Salomob ge ge ǂanǃgâ mari-i ǀkha da ge ǂhâ da hâ xūn tsî ǂhâba da hâ xūn tsîna a hō ǁkhā. Kaiseb ge ǃkhū hâ i xaweb ge Salomoba ge ǁnâuǃā ǂhâǂhâsa xū-i hâsa mari-i xōǀkhā. Aiǁgauseb ge ge xoa: ‘ǃGâi ǀonsa ūhâs ge ǂhâǂhâsa ǃkhūsib xa.’ (ǂKhm. 22:1) Salomob ge ge mû khoen hîna mari-e ūhân, ǁîn ūhâ xūn ǀkha ǂkhî tama hâsa. (Aoǁn. 5:​10, 12) Tsîb ge ge mî, î da tā ǂâi mari-i kaise a ǂhâǂhâsa di, ū da hâ mari-i ǃhaese a toa ǁkhā amaga.—ǂKhm. 23:​4, 5. w22.05 21 ¶4-5

Sida ǀkhaeb nēsi da ūhâba da ra ǂâiǃgâ khami da ge, sida ǀhōsagusis Jehovab ǀkha da ūhâsa ra ǀgaiǀgai. Tsî Jehovab hānîǁaeb ǃaroma mîmâiba da hâ ǃgâi xūna da ga ǂâiǃgâ, os ge ǃâubasens ǀamose ǃoabas disa nî amaba da. Nēn hoan ge nî huida, î da Jehovaba ǃgâiaǂgaob ǀkha ǃoaba. Jehovab ge sida ǃaroma nî “khâimâ,” nē eloxoresa ǃhūbaibab ga dīkākā ǁaeb ǃnâ. ǂGomǃgâsiba da ge ūhâ, Jehovab “ǂhanu-aisib di Elob” ǃnâ. ǁÎb ge mā-am tide ǁGâuab ǃhūbaib gaxuse nî hâhâsa. (Jes. 25:9) Jehovab ǀkha da ge ǃnūǃnâxase ores di tsēsa ǃâuhâ. ǁNās ǀkha da ge nēsi nî mîǁgui ǀgores aiǂhanub, Elobmîsa ǁkhāǁkhāsen tsî dīs tsî sida ǀkhaegu xas tsîna ǂâiǃgâsa. ǁNāsa da ga dī, ob ge Jehovaba nî huida, î da ǃgâiaǂgaob ǀkha mâǀgai ǁîba ǃoabas ǃnâ. w22.11 13 ¶18-19

Elobmîs ge Timoteub di ǁāǁnâs xa ǁnātikōse ǃhoa tama. Xawe da ge a mûnanai ǁkhā, matis ge ǁîb di ǁgûs Eunikesa ǁnā tsēs ai gere tsâ ǀgaus xa. (ǂKhm. 23:25) Eunikes ge ǁîs di ôaba ge ǁkhāǁkhā îb Jehovab tsî ǁîb di ôab Jesub Xristub tsîna ǀnam. Timoteub di ǁgûra ge ge ǀgui ǂgoms di tama hâ i. ǁÎb ǁgûb ge ge Grikeǁî i tsî ǁîb mas tsî aumas tsîra ge ge Jodeǁî i. (ǃNǃkh. 16:1) Timoteub ge ge ǂkham i Eunikes tsî Lois hâra ge Xristeǁî kai o. Xaweb ge ǁîb di ǁgûba ge Xristeǁî kai tama hâ i. Mâ Xristeǁî ǃoabasab Timoteuba nî ǁhûi? Xristeǁî ǁgûdi tsîn ge nētsē ǁîdi omaride a ǀnam. Tsî di ge ǁîdi ǀgôana ra hui ǂgao, în ǀgū ǀhōsagusisa Jehovab ǀkha omkhâi, sada Elob ge ǁîdi ǁgūtsâde ra ǃgôaǃgâ. (ǂKhm. 1:​8, 9) Jehovab ge ǂgui ǁgûde ge hui î di ǁîdi ǀgôana Jehovaba ǀnam tsî ǃoabasa ǁkhāǁkhā. w22.04 16 ¶1-3

Jehovaba ge ǀgūǁae ǂgīǂgōsi ǂgaeǂgui-aogu di ǂgaogu ǃnâ “ǁîb ǂâisa gu” nî sîsenǂuisa nî īkhai. Mâ ǀamǂoas ǀkha? ǁNā politiek ǂgaeǂguidi hîna “disi gaoga” ra ǂnûǁkhaeba di ge, ama tama ǃoabas ǃoagu nî khâi tsî ǁîsa nî dīkākā. (J.ǂHa. 17:​1, 2, 12, 16) Mati da a ǂan Babilons, hoaraga ǀai-aon di îs di ǀams go a ǀgū ǃkhaisa? ǁNā dîsa ǃereams ǃaroma i ge nî ǃgâi ǂâihōsa. Babilons di ǃkhare ǃâb ge Eufratǃāb ǁgammgu xa ǁkhaubahe hâ isa. ǂHaiǂhais di ǂkhanis ge miliuns di ǂkhâǃnâ-aon Babilons kais dina ǁnā ǁkhauba ra “ǁgammi” ǀkha ra ǀgopeǀnō. (J.ǂHa. 17:15) Xawe i ge ra mî, ǃāb nî “ǂnâsa” tsî ǁnās ge ra ǁgau ǁnā ama tama ǂgoms ǂkhâǃnâ-aon ǂguina nî ǂoaǃnâ ǃkhaisa. (J.ǂHa. 16:12) ǁNā kēbosa dīǀoaǀoas ǃaroma i ge nētsē ǂanǃgâsa ǃgôab di khoena, ama tama ǂgomsa ǁnāxu hâ. Tsî ǁnās ǀkha ǀnî hâ ǃkhain ai ǁîn di ǃgomsin di ǃereamde ra ôa. w22.07 5-6 ¶14-15

ǀÛbas ge ǃgôaǃgâxasiba ra ǁgau. ǀGui ǂkhōs ǃnâb ge Jesuba, Jehovaba ǀhōnkhoeb hîna ge ǃgāb, ǂgui mari-e surude hâ îba, a ǀûbab xa ge ǃhoa. Xawe nē ǃgāb ǀûbahe geb ge, nau ǃgāb ǃoagu ǀkhomxaǂgaosiba ge ǁgau tama hâ i. Hîna ge ǁîba ǀoro mari-e surude hâ îba. (Mat. 18:​23-35) Jesuba tae-e gere ǁkhāǁkhā da? Amabes ǃnâ da ga Jehovab di ǃgâisiba sida ǃoagu a ǃgôaǃgâ, o da ge nî ǁgari-e î da nau khoena ǀûba. (Psa. 103:9) Watchtower ǂkhinib ge kurina ǃkharu tsî ge mî: “Matikō ǂgui ǃnāde da ga sida di ǃgâsana ga ra ǀûba. Xawe i ge tātsēs tsîna ǀgui tide sida di Elob ra ǁgauda ǀkhomxasib. Tsî ǀûbab hînab Xristub ǃnâ-ū mā da hâb ǀkha.” ǀÛba-aon ge nî ǀûba-e. Jehovab ge ǀkhomma, ǁnān hîna ǀkhomxaǂgaona ra ǁgau. (Mat. 5:7) Jesub ge ǁnāsa ǃgāsase ge ǂoaxa ū. ǁÎb di ǁkhāǁkhāsabegab ge ǁkhāǁkhā o, mati gu nî ǀgoresa.—Mat. 6:​14, 15. w22.06 10 ¶8-9

Jesub ge khoeb ase ǃhūbaiba ǃoa ge ǀkhī. ǁÎb ge ǃamkuse ǁîb di ǁGûb di ǀgauga ǁgae hâ. (Jhn. 14:9) ǁÎb ǃnâ-ū da ge ǂan tsî ǀnam tsoatsoa hâ Jehova Eloba. Jesub di ǁkhāǁkhādi tsî daoǁgaude xu da ge ǃgâiba hō hâ. Hînab Xristeǁî ǀhaohâba nētsē ra māba. ǁÎb ge ǁkhāǁkhā da hâ ǀgaugu hîna da a ûi ǁkhā ga î da ǁnās ǀkha Jehovaba ǂkhîǂkhî. Tsî hoada ge ǃgâiba Jesub di ǁōba xu a hō ǁkhā. Jesub ge khâisa mā toahes khaoǃgâb ge Jehovaba, ǁîb di ǀgôab di ǁguibasa ge ǃkhōǃoa. Hîna ‘hoa khoen di ǁorena ra ǃanusa.’ (1Jhn. 1:7) Nēsib ge ǀamosib kōse a Gao-ao tsîb ge ǀgūǁae Jesuba, ǀaob di danasa nî ǂkhūǂkhū. (Gen. 3:15) Elob di ǃoaba-aon ge kaise nî ǂkhî, Satanni ga dīkākāhe o. ǁNā ǁaeb kōse, tā ǀûsen re. Sida Elob ge a ǂgomǃgâhe ǁkhā. ǃGôahe ǁoa ǀkhaebab ge “hoaraga ǁaedi” ai nî ha-ū. w22.07 18 ¶13; 19 ¶19

Supu ba da i ge nî nē mîǁguiba sīǃnâsa. Tae-i ǃaroma? Sida di mâsigu nî sîsenǂui ǀgauba da a ǀū amaga. Aiǁgause: Apostel Paulub ge ǀasa ǀhaohâba Tesalonikas ǃnâ tsoatsoas ǀkha ge hui. Xawe mâǃoa-aon ge Pauluba ge ǁgari îb ǃāsa xu ī. (ǃNǃkh. 17:​1-5, 10) Paulub ga hâsa mîǁgui hâ, ob ge ǃgomsina ǁîb ǃgâsana ga ǃaroma ba hâ. Xaweb ge Pauluba ǁîna huis ǃnâ ge ǀûsen tama hâ i. Tsîb ge ǀkharaǀkharasen ra mâsigu ǃoa-ai ge dawa. Egab ge Pauluba Timoteuba ǀasa ǀhaohâb. Tesalonikas ǃnâ hâb ǃoa ge sî, îb ǃgâsan di gagasi ǂhâsiga kōǃgâ. (1Tes. 3:​1, 2) Kaisen ge Tesalonikaǁîna ge ǂkhî i. Paulub aiǁgaus Tesalonikas ǃnâb ge ūhâ isa xa da ge a ǁkhāǁkhāsen ǁkhā. ǀNîsi da ge mîǁguiba a dī ǁkhā xawe gu ge sida di mâsigu. Hîna ra ǀkharaǀkharasenga a ǁkhae da ǁkhā, nē mîǁguiga sīǃnâsa. (Aoǁn. 9:11) Nēs ga sadu mâsib ǃnâ ama o. ǀKhara mîǁgui i hîna du sīǃnâ ǁkhā-e ǁhûi re. w22.04 25-26 ¶14-15

Jehovab ge hānîǁaeb xa ǃâubasensa mādas ǀkha ra ǁkhaeǂgao da. ǂÂi re, ǀnî xūn Elobmîs ǃnâ hân hîna a ǁkhaeǂgao da ǁkhān xa ǃgomsiga da ga ǃkharuǃnâ o. Elobmîs ǃnâb ge Jehovaba ra mîmâiba da, xū-i xare i—“sada ǁîb di ǀnama xu a ǀgora ǁoasa.” ǁNās ge ǁgai ǁgâiǀāgu tsîna ǃkhōǂgā hâ. (Rom. 8:​38, 39) ǁÎb ge mîmâiba das tsîna ra dī ǀgores ǃnâ “ǁîba ra ǂgaiǀîn hoan” ǀgūseb hâsa. (Psa. 145:18) Jehovab ge ra mîba da, ǁîb ai da ga ǂgomaiǂnûi. O da mâ ǃâitsâ-i hoa-i ǃnâ nî mâǀgai ǁkhā ǃkhaisa. Tsî ǂkhîba nî hōsa, ǃgomsina da ga hōǃâ xawe. (1Kor. 10:13; Jak. 1:2) Elobmîs ge ra ǂâiǂâiǃnâ da, sida ǃgomsin ǃnubu ǁaerob dis ǀguisa īsa. ǀAmo ûib di ǀkhaeb ǀkha da ga ǀgopeǀnō o. (2Kor. 4:​16-18) Jehovab ge ama ǃâubasensa ra mā da, ǁnān hîna hoa ǃgomsina ra ǃaromanab nî dīkākāsa. ǁNās ge ǁGâuab tsî ǁîb ǁgai ǀgauga ra saon tsîna ǃkhōǂgā hâ. (Psa. 37:10) ǁKhaeǂgao ra Elobmîs xoade du ǃkhōmâi hâ, hānîǁaeb ǃgomsigu ǃnâ mâǀgais ǀkha nî hui duna? w22.08 11 ¶11

ǂÂiǂhansen î du ra Jehovab di ǂhanu-ai ǁgaragu ǃoagu du aiǃgû tsî a ûi ǁkhāsa? Jehovab ge ra mîmâi sida di ǂhanu-aisib “hurib ǃgabigu khami” nî īsa. (Jes. 48:18) Mûnanai re hurib xōǀkhā mâ tsî du, hurib ǃgapigu toa tamase nēba xu naub ǀkhāb ǀkha ra saogu ǀgauba ra kōsa. ǁNā ǂkhîsa mâsib ǃnâ ǂâiǂhansen î du nî, ǀguitsē gu nē ǃgapiga nî toasa? ǂAn du as ge ǀû tamase i nî hā ǀkharasa. Sadu di ǂhanu-aisib ge hurib ǃgapigu khami a ī ǁkhā. Matis ǁnāsa a ī ǁkhā? Dī du nî mîǁguiga du ga ūhâ o. ǂGuro kō re, Jehovab tae-e du nî dīsa ǂhâba hâsa. Tsî ǁnāpaxu dī re. Matikōse gu ga mîǁguiga ǃgom. Xaweb ge sadu di ǀnamxaǃnâ ǁGûba hoaǁae hâ, îb ǀgaiba mā du, î du tsēs hoasa ǂhanu xū-e dī ǀgara.—Jes. 40:​29-31. w22.08 30 ¶15-17

1 000 Kurigu di ǀams aib ge Satana ǃkhōsisa xu nî ǃnoraǃnorahe. Tsîb ge ǀoasa kurusa ūhâ khoena nî ǂgaeǂhapu tsâ. ǀUniga ǃâitsâb ǁaeb ǃnân ge hoa ǀoasa kurusa ūhâ khoena ǃhūbaib ai ǃēsa nî hō, în ǁgau Elob ǀonsa ǃgôaǃgâ. Tsîn ǁîb ǂgaeǂguisa ra ǂkhâǃnâ ǃkhaisa. (J.ǂHa. 20: 8-10) Tae-en ǁnā ǁaeb ǃnâ ra dīs ge nî ǁgau, ǁîn ǀondi ǀamo ûib ǂkhanis ǃnâ nî xoamâihesa. Elobmîs ge ra mîba da, ǀnî khoen Adammi tsî Eva hâra khami nî ǁnâuǀnamoǃnâ ǃkhaisa. Tsî Jehovab ǂgaeǂguisa ūǃoa tidesa. Tae-e ǁîn ǀkha nî ī? ǂHaiǂhais 20:15 ge ra mîba da: “ǁNān ǀondi ân ûib di ǂkhanis ǃnâ xoamâisa taman hoan ge hurib khami ī ǀaeb ǃnâ ge aoǂgāhe.” Ama i ge nē mâǃoa-aon ge ǀamose nî dīkākāhe. Xawe ǃnāsan ǀoasa kurusa ūhân ge nē ǀuniga ǃâitsâsa nî ǃkharu. w22.09 23-24 ¶15-16

ǀNîn hîna ge ǂguro ǁaeb Xristeǁîn ǀhaohâb ǃnâ ge hâ în ge Jodeǁî tama khoen. Hîna ge Xristeǁî kain nî ǃgaohe ǃkhaisa gere ǂhâba în tā mîǁgaiǁgaihe. (Gal. 6:12) Apostel Paulub ge ǁnā mûǂuib ǀkha ge ǀguiǂâixa tama hâ i. ǁÎb di ǀgaub nî sao-aihesa ǁgari tama i tsîb ge ǀapemāde apostelgu tsî ǀhaohâb ǃûi-aogu, hîna Jerusalems ǃnâ hâgu ai gere ôa. (ǃNǃkh. 15:2) Paulub ge nēti i ǀgaub ǃnâ mâsiga gere sîsenǂam, amaga i ge Xristeǁîna ǀhaohâb ǃnâ ǂkhîba ge ūhâ ǁkhā i. (ǃNǃkh. 15:​30, 31) ǂNoagu i ga hâ, o da ge ǂkhîba ra ūhâ ǂgao. Tsî Jehovab ǀhaohâb ǃnâ ǁgaumâihe hâ gu daoǁgaude ra ôa ǂgao. ǃNāsa ǁaeba da ge Elobmîs ai ǃgaoǃgaosa daoǁgaude sida ǂkhanin. Tamas ka io ǀapeǂhumis xa ra māhe daoǁgaudi ǃnâ hō ǁkhā. Dītsâ tsî da ga ǁnā ǀapemāde sao o. Tsî sida dib ose, o da ge ǂkhîb hîna ǀhaohâb ǃnâ hâb ai nî ǀaro. w22.08 22 ¶8-9

Sida di ûib ǃnâ i ge ǁaega nî hā, sida ǀgū ǀhōsa-e da amabes ǃnâ tsâ da ra ǀgauba nî ǀgoragu ū-e. ǀNî ǁaegu ais ge ǁnāsa a ǃgom ǁkhā. ǀNîsi da ge supubahe tide, nau khoe-e sida ǃgam tsâsiga mîbasa. Tsî da ge nî ǁaixa sida ǀhōsa i go nau khoe-e ǁgamǃkharubasa da ga ǁnau o. Xawe da ge kaise ra ǃgôaǃgâ, ǀhōsa-e ūhâsa hîna da sida tsâsiga a mîba ǁkhā-e. Tsî da ge a ǂan ǁî-î ge ǀnî hâ khoe-e mîba tide. ǀHaohâb ǃûi-aogu hîna ǂgomǃgâhesase ǂansa gu ge “ǀgaisa ǂoab ǃnâ sâuǃkhaise nî ī” ǁîgu ǃgâsan ǃaroma. (Jes. 32:2) ǀHaohâb ǃûi-aogu ǀkha da ge mâ xū-i hoa-i xa a ǃhoa ǁkhā. Tsî ra ǂgomǃgâ mîba gu da ra xūna gu khoe-e mîba tidesa. ǁÎga da ge ǁgâiba mā tama hâ î gu sida, ǂan da tidese ī xūna tā mîba. ǁNās xōǀkhā da ge sida ǀhaohâb ǃûi-aogu tarade ra ǃgôaǃgâ. ǁÎdi aoga xu di ǂhôana ǀāǂui tama hâ amaga. Ama ǀkhaeb ge ǀhaohâb ǃûi-aob taras ga, ǁîs di ǃgâsan xas ǂan tide ǂhôana mîbahe tama io. w22.09 11 ¶10-11

ǂGomǃgâ ǁkhā da ge a Jehovab ǁîb ǂgomǂgomsa ǃoaba-aona, hānî ‘kai ǁgâiǀāb’ ǃnâ nî ǁkhaubasa. (Mat. 24:21; Dan. 12:1) Nēsab ge nî dī, ǁaedi Gogi tsî magogi di ǂansan ga ǁnān hîna Jehovab ǃoagu ǂgomǂgomsana ǃhūbaib ǂhawase ǁgaise ǁnāǂam o. Nēs ga 193 ǁanin United Nations dina ǃkhōǂgā, xawen ge hoan xa a ǀgapib tsî ǁîb di ǀhomsi toro ǃkham-aon ǃoagu ǃkham ǁkhā tide. Jehovab ge ra mîmâi: ‘ǁNāti ta ge ǂgui ǁaedi mûǁae kaikaisen tsî nî ǂhaiǂhaisen, on ge tita a Jehova ǃkhaisa nî ǂan.’ (Ese. 38:​14-16, 23) Gogi di ǁnāǂams ge Armagedons toroba nî ǃaroma. ǁNā ǁaeb ǃnâb ge Jehovaba “ǃhūbaib di gao-aogu” hoa ga nî hîkākā. (J.ǂHa. 16:​14, 16; 19:​19-21) Tsî ǁnās ǃoagu a ǀkhara i ge “ǂhanu-ain ge ǃhūba nî ǁanǃnâ tsîn ge ǀhapiona ǁnāpa nî ǁanhâhâ.”—ǂKhm. 2:21. w22.10 16-17 ¶16-17

Sida ge ǂgaoga a khomai ǁoa. Jehovab ge “ǂâidi hoade ra ôaǃnâba.” (ǂKhm. 16:2) ǁÎb ge hoa khoena a ǀnam ǃkharagagu ǁnaetigu tsî ǃhaoǃnâbe ǁnaetiga ūhâ na. Tsî Jehovab ge ra ǂkhâǃnâ da î da sida “ǂgaoga ǁkhāti harase ǁkhowa-am.” (2Kor. 6:13) Sida di gagasi ǃgâsan hoana da ge nî ǀnam, tsî tā nî ǀgoraǃgâ nî. Nēs tsîn ge ra ǂâibasen ǀhaohâb ǃauga hâ khoena da ge tā nî ǀgoraǃgâ. Sadu ǀaokhoe-i hîna sadu ǀkha ǀgui ǂgoms ǃnâ hâ tama hâ-e. ǀGoraǃgâ tsî du nî mî, “nē khoeb ge tātsē amab ǃnâ ǂgâxa tide ti”? Hî-î, ǁnās ge aitsama ǃgôasen tsî ǁî-aitsama ǂhanu-ai. Jehovab ge ‘mâ khoe-i hoa-e ǃhōbasens’ ǃēsa ra mā. (ǃNǃkh. 17:30) ǂÂis ǃnâ ūhâ re Jehovab ge nau khoen xan a ǂhanu-ai di ra ǂâi khoena, ǂhanu-ōǃnâse ra mû. w22.08 31 ¶20-22

ǃÂubasen ǁkhā da ge a ǀnî khoen aoǁnâ da ra hîna nî mâǃoa dasa. Tsî da ge ǀgaisase hānîǁaeb ǃnâ nî mâǃoahe. (Dan. 11:44; 2Tim. 3:12; J.ǂHa. 16:21) Xawe da ge a ǂgomǃgâ ǁkhā, Jehovaba ǂhâ da hâ huiba a māda ǁkhāsa. Tae-i ǃaroma? Jehovab ge hoaǁae ǁîb di ǃoaba-aona gere hui, în ǁîn ǁgaumâide dīǀoaǀoa mati ǀgui i ga ǃgom xawe. Aiǁgause, Hā re î da ǀnî xūn hîna ge kēbo-aob Esegieli ûib ǃnâ gere īna ǃhoaǃgao. Hîna ge Babilons ǃnâ hâ i Jodeǁî ǃkhōsabena gere aoǁnâba ba. Mâǃnôa khoenab ge Esegiela gere aoǁnâba? Jehovab ge ge mî ǁîn ge ‘mâǃoaxa, ǃnâudanaxa tsî a khâikhâisenxa.’ ǁÎn ge ǁkhūn tsî ǁaruben khami ge ǁkhōǁkhōsa i. ǁNā-amagab ge Jehovaba Esegiela ǃnās hoasa gere mîba: “Tā ǁîn xa ǃao.” (Ese. 2:​3-6) Esegieli ge ǁîb sîsen-e ge dī ǁkhā i, saora xūn ǃaroma. (1) Jehovab xab ge ge sîhe. (2) Jehovab gagab xab ge ge ǀgaiǀgaihe (3) Elobmîs ge ǁîb ǂgomsa ge ǀgaiǀgai. w22.11 2 ¶1-2

Jehovab ge kuru ûitsâma xūn hoan ge ge kuruhe în ǁō ǁkhā, xawe khoen ose. ǁÎb ge ǁîna ǀō-aisa ǁkhāsiba ge mā în tā ǁō. Jehovab ge ǀamosib kose ûi ǂgaos turab ǀkha ge a kuru da. Elobmîs ge ra mî: ‘Khoesi ǂgaob ǃnâb ǀamosiba ra mâi-aiǃâsa.’ (Aoǁn. 3:11) ǁNās ge ǀgui ǃaromas ǁōba da khākhoeb ase ra mûba. (1Kor. 15:26) ǀAesen da ga o, o da ǀaeba ūǃoas ǀguisa ra dī tsî xu-e dī tama hâ? Hî-i, ǂgui ǁkhaegu ai da ge doktera ra mû. Tsî soǀôana ra ū î-i ǀaeb ǀkha hui da. Tsî da ge hoa-e ra dītsâ î da tā ǁō. Sada di ǀgūkhoe i ga ǁō o, ǂkham tamas ka io kaira-e. O da ǃgam tsûba gaxuse hōǃâ tama hâ? (Jhn. 11:​32, 33) Amase da ge ǀamosib kōse ra ǁkhāǁkhāsen. Tsî ǀamosib kōse ûis di turaba ūhâ. Sida di Kuru-aob ge ǁnāti a kuru da amaga. ǁÎb ge amase nî ǃaroma î da ǀamosib kōse ûi ǁkhā. w22.12 3 ¶5; 4 ¶7

ǂGui ǃgâsan ge ǃgomsina ra hōǃâ, aiǁgause ǀaegu, ǃaos tsâsigu tamas ka io ǀuritsâsensa ǃgom ǁaegu ǃnâ. Dītsâ re sadu ǃgâsan ǀkha ǃhoasa. ǀAeb khoraǂuisens ge a ǃaroma ǁkhā, î da tā ǀgūguse sida ǃgâsan ǀkha hâ. ǁNāti i ga ī ǁaeb ai da ge, apostel Johaneb gere tsâ khami ǀnîsi a tsâ ǁkhā. ǁÎb ge ǀhōsab Gajuba gere mû ǂgao. (3Jhn. 13, 14) Xaweb ge Johaneba ge mûǂan, Gajubab ǁaerob ǀgaiba mû tide ǃkhaisa. Johaneb ge dī ǁkhāb a-e ge dī. ǁÎb ge Gajuba sîǂkhanisa ge xoaba. Īǁkhā tama i ga io sadu ǃgâsana sarisa, o ǁîn ǀkha selfoni ǃnâ-ū ǃhoa re. Nau Xristeǁîn ǀkha du ga ǁkhā du as kōse a ǃhoa o. O du ge ǃnorasase tsâ tsî ǂkhîb tsîna nî ūhâ. ǃGōsase du ga ǂâiǂhânsens tsâsiba ga ra ūhâ o. O ǀhaohâb ǃûi-aogu ǀkha ǃhoa tsî ǁîgu di ǀnamxaǃnâ ǂkhâǃnâsa ūǃoa re.—Jes. 32:​1, 2. w22.12 17-18 ¶6-7

Elobmîs tsîn ge ra ǁgau, ǁaeroba i ge Josefi di ǂaidi tsî ǂhorob tsîna ǀurib ǀkha ǃgaehe hâ īsa. (Psa. 105:​17, 18) Josefi di mâsib ge ǁgaiǂoas ǀguisa gere di. ǁÎb ge ǂgomǃgâhe gere ǃgāba xu ge, xū tama hâ ǃhōsabe kai. ǁGaiǂoas ǀguisa ra dī mâsib ǃnâ du hâ tsâ hâ, ǀgaisase du gere ǀgore xawe? ǁNā i ge a īǁkhā. Jehovab ge ǁGâuab xa ra ǂgaeǂguihe ǃhūbaib ǃnâ, ǃgomsina xu ǁkhaeda tama hâ. (1Jhn. 5:19) Xawe du ge nēsa a ǂgomǃgâ ǁkhā. Jehovab ge ǃkharuǃnâ du ra xūna a ǂan tsîb ge sadu ǀkha ǁae hâ. (Mat. 10:​29-31; 1Pet. 5:​6, 7) ǁNās xōǀkhāb ge ra mîmâi: “Tita ge tātsē ǁnāxū tsi tsî ǃharaxū tsi tide.” (Heb. 13:5) Sadu mâsib ga ǁgaiǂoa xaweb ge Jehovaba a hui du ǁkhā. w23.01 16 ¶7-8

Xoadi ge ǂgomǃgâsiba ra mā da tsūdī da ga, ob Jehovaba ǁnāxuǃnâ da tidesa. ǃNās hoasas ge Israelǁaesa Jehovab ǃoagu gere ǁore. Xaweb ge ǁîba ǁîn gere ǃhausen, o gere ǀûban nî. ǂGurokham ǁaeb Xristeǁîn tsîn ge ge ǂan i, Elob ǁîna kaise a ǀnamsa. Apostel Paulub ge daoǁgaus ǃnāga Xristeǁîna ge ǂkhâǃnâ, în ǃhausen ge tsūdī-aoba “ǀûba tsî . . . ǁkhaeǂgao.” (2Kor. 2:​6, 7; 1Kor. 5:​1-5) Kaise î ge a ǂoaǂamsa ǁkhāǁkhāsensa, Jehovab ǁîb ǃoaba-aona tsūdīn go ǃkhais ǃaroma ǂkhābe tama hâsa. Xaweb ge ǁîba ǀnamxaǃnâ ǀgaub ǃnâ ǁîna ra hui în ǀkharaǀkharana dī tsî ǁîb ǀkha ǀhōsagusisa ǁkhawa ūhâ. Jehovab ge nēsa nētsēs tsînab nî dīsa ra mîmâi, ǃhausen ra khoen ǃoagu. (Jak. 4:​8-10) Jehovab ge ǃgâi ǀkhaeba ge māda. ǁÎb mîsa tae-i ǃaroma a ǀō-aisa? Elobmîs ge Elob a gā-ai, ǂhanu-ai tsî kaise a ǀnamdasa ra ǁgau. Nē ǂkhanis ge ra ǁgau, Jehovab ra ǂhâbasa î da ǁîba ǂan. ǁÎb ge ǂhâba hâ, î da ǁîb ǀhōsa kai. w23.02 7 ¶16-17

ǃGâi ǃaroman ge hâ, tae-i ǃaroma da ǃgâiǃgâibasensa ūhâsa. Tsî mûsa mati i nēsi ǃhūbaib ǃnâ ra ī xūna Elobmîs kēbode ra dīǀoaǀoasa. Jesub ge ī nî xūn xa ge mîba da, hui nî na î da ǂan mâǁaeb ǁGâuab ǃhūbaib di ǀamsa nî ǀgūsa. (Mat. 24:​3-14) Apostel Petrub ge ra ǂkhâǃnâ da, î da Elobmîs kēbodi dīǀoaǀoahes ai ǃgaoǃgâ ,îs sida ǂgomsa ǀgaisase hâ ǀgara ǁkhā. (2Pet. 1:​19-21) ǁÎb ge ra ǂhâba î da ǃaroman xa ǂai, mati io da Elobmîs kēbode nî ôaǃnâsa. ǁÎb ge ra hōhōǃnâ da, î da “ǂâis ǃnâ ūhâ Elob hās di tsēsa.” (2Pet. 3:​11-13) Tae-i ǃaroma? ǂAn ǂgao da ra amagas ōse, “tsēs tamas ka io īri” hînab Jehovaba Armagedonsa nî ǀkhī-ūba. Xawe da ge ǁaeb hîna ǃgau hâba ra sîsenū ǂgao, “ǃanu tanisens tsî eloǃaoǃgâxasib” ǃnâ ûisa. (Mat. 24:36; Luk. 12:40) ǂHanu ǀgaub ǃnâ da ge ra tanisen ǂgao. Tsî dī da ra xū-i hoa-e Jehovaba da ǃgam ǀnamma ūba hâ amaga ra dī. ǁNā ǂâisa ǃkhōǀgaras ǃaroma da ge nî ǃûisen. w23.02 16 ¶4, 6

Xawe xūn ge hâ “ǀnî gūn” nî dīna în Paradais ǃhūbaib ai ûi ǁkhā. Jesub xa da ra tsâ ǀgauba da ge nî ǁgau. Aiǁgause, ǁîba da a ǀnam ǃkhaisa da ge ra ǁgau ǂkhauhesa ǃgâsana da ra ûi-u ǀgaub ǃnâ. Jesub ge ge mî, ǁîb ǃgâsana da ra hâ-ū ǀgaub ǃoagub nî ǀgoraǃgâ da sa. (Mat. 25:​31-40) ǁÎga da ge ǁkhoaǂgaose aoǁnâs tsî ǁkhāǁkhāsabedīs ǃnâ-ū a ǂkhâǃnâ ǁkhā. (Mat. 28:​18-20) Paradais nî hās aiǃâ da ge nēsi ǀnai ǀkharaǀkharana ra dī ǂgao, Jehovab ǂhâba hâse. Nēsi da ge ǀnai a ǂhauǃnâ ǁkhā sida mîdi tsî dīgu ǃnâ. Tsî sida ûiba da ra ûi ǀgaub ǃnâs tsîna. Tsî da ge ǂgomǂgomsase Jehovab, ǃgamme da hâ khoe-i tsî nau xristeǁîn ǃoagus tsîna ra hâ ǂgao. Nē eloxoresa ǃhūbaib ǃnâ da ûi hâ hîna da ga Elob di ǂgaoǀkhādi ǃoagu a ûi o. O i ge nî supu nē ǀgauga Paradais ǃnâ ǁgausa. Nēsi da ge ǃgâi ǂansa a omkhâi ǁkhā hānîǁaeb ǃaroma. w22.12 11-12 ¶14-16

Sada di Gao-aob Jesuba da ge a ǀnam, ǃgâi ǂgaeǂgui-aob a amaga. Jehovab ge ǁîb ǀGôaba ge ǁkhāǁkhā tsî ge ǁgaumâi îb ǂgaeǂgui. (Jes. 50:​4, 5) ǁÎb ge māsenxase a ǁgau ǀnammi xa ǂâi re. (Jhn. 13:1) Jesub a sadu Gao-ao amagab ge ǀoasase sadu ǀnamma nî hō. ǁÎb ge ra ǁguiǃā ǁnān hîna ǁîba a ǀnaman. Tsîb ǁîb ǀhōsan ase ra ǂgain ge ǁîb di mîmāde ǁnâuǀnams ǃnâ-ū ǁîn ǀnamma ra ǁgau. (Jhn. 14:15; 15:​14, 15) Kai aiǂhanub ge Jehovab ǀGôab ǀkha ǀhōsagusisa ūhâsa. Jesuba da ge ǃgamǃgamsenxaseb, ǂōrisase ǁîb ǁGûba ra ǁgaese ra mû. ǁKhāǁkhāsen du ge ge, ǁîb ge ǂgui khoen hîna ge ǃâ hâ īna a ǂûmâsa. Tsûaǂgao hâna ǁkhaeǂgao tsî ǀaesen hân tsîna a ǂgauǂgau ǀgauba. (Mat. 14:​14-21) Tsî du ge ra mû, matib ǁîb ǀhaohâba ra daoǁgau ǀgauba nētsē. (Mat. 23:10) Elob Gaosib di Gao-aob aseb ge ǁîba, ǂgui buruxa xūna hānîǁaeb ǃnâ nî dī. Mati du a ǁgau ǁkhā ǁîba du a ǀnamsa? Nēsa du ge ǁîb aiǁgausa saos ǃnâ-ū a dī ǁkhā. Tsî ǀgui ǀgaub hîna du ǁîb aiǁgausa a ǁgae ǁkhāb ge, Jehovab ǃoa-ai māǁnâsen tsî ǁāǁnâ kaisensa. w23.03 4 ¶8, 10

Jehovab ge hoa xūna ǀhommi, ǃhūbaib tsî hurib ǃnâs tsîna ge kuru. Hîna ǁîb xa ra ǁkhāǁkhāda na. (Psa. 104:​24, 25) Elob ge kuru da ǀgaub xas tsîna ǂâi re. ǁÎb ge ge īǁkhā kai, î da kurub ge xūn ǃnâs tsîna ǃgâiaǂgao. ǁÎb ge ǁkhāsiba ge māda, î da ǃkharagagu xūna mû, ǁnâu, tsâǀkhā, tsâ tsî ham ǁkhā. Hîna ra īǁkhā kaina î da ǁîb ge kuru xūn xa ǃgâibahe. Elobmîs ge ǀnî hâ ǂhâǂhâsa ǃaromasa ra mîba da, tae-i ǃaroma da kurusa nî ôaǃnâsa. Nēs ge Jehovab di ǀgaugu xa ra ǁkhāǁkhā da. (Rom. 1: 20) Aiǁgause, Jehovab ge kuru xūna kō tsî mû re ǁîn ge îxase a kuruhe ǀgauba. ǁÎna Elob gā-aisiba ǁgau tama hâ? ǃKharagagu ǂûn hîna a ǁkhoaxan xa ǂâi re. ǁNā î ge ǃnāsase ra ǁgau, ǀnammi hînab khoena ūba hâba. Jehovab ge kuru xūna xu da ga ǁîb ǀgauba mû, o da ge ra ǂkhâǃnâhe ǁîba ǃnāsase ǂan tsî ǁîba ǃoa ǀgūsa. w23.03 16 ¶4-5

Nē ǃhūbaib ra ǁgaiǂoa khamib ge sida di ǂgomǃgâsib, Elobmîs ǃnâ da ūhâba nî ǃâitsâhe. Khoen ge a dī ǁkhā, î da tā Elobmîs ǃnâ ǂgom. Tsî Jehovab gā-ai tsî ǂgomǂgomsa ǃgāba nētsē ra sîsenūsa, tā ǂgomǃgâ. Xawe da ga ra ǂgom o, Jehovab mîs a amasa. O da ge ǁnāti i ǃâitsâga a mâǃoa ǁkhā. ǁNā-amaga da ge sao ra-e ra ǃkhō-am “ti ǂgaoba ta ge sa ǁguiǂamde dīǀoaǀoas ai ra ǃammâi ǀamosiba xu, ǀunis kōse.” (Psa. 119:112) “Tao” da ge tide khoena amaba mîbasa. Tsî da ge ǁîna nî ǂkhâǃnâ, în amab ǀkha ǀguiǃnâxase ûi. (Psa. 119:46) Tsî da ge ‘taniǀnamxasib ǀkha nî mâǃkharu tsî ǃgâiaǂgaob ǀkha’ ǃgom mâsigu ǃnâ. (Kol. 1:11; Psa. 119:​143, 157) Amab ge ra ǀgaiǀgai da, î da nē ǁgai ǃhūbaib ǃnâ ǃâubasens tsî ǃgāsa daoǁgaus tsîna ūhâ. Tsî î ge hānîǁaeb ǃaroma ǃgâi ǃâubasensa ra mā da, Elob Gaosib ǂgaeǂguis ǃnaga. w23.01 7 ¶16-17

ǁŌb nî ǃoes aiǃâb ge Jesuba, ǁîb di ǁkhāǁkhāsabega kaxuse ge ǀgoreba. Tsî ǁîb ǁGûba gere ǂgan îb ǁîna “ǂkhababa xu sâu.” (Jhn. 17:15) ǁNās ge gere ǁgau Jesub ge ǁîna kaise ǀnam isa. ǀGūǁaeb ǃgoma nî tsâsab ge ǂan i, xaweb ge ǁîb di ǁkhāǁkhāsaben xa gere ǂâiǂhansen. Jesuba da ge ra ǁgae, tsî da ge sida di ǂhâsin xa ǀgui ǂâi tama hâ. Xawe da ge hoaǁae sida ǃgâsana ra ǀgoreba. ǁNāsa da ga dī, o da ge Jesub di mîmās ǀnamgu da ge nî ti hâsa ra ǁnâuǀnam. Tsî da ge Jehovaba ra ǁgau, matikōse da sida ǀkha ǀguiba ra ǃoaba ǃgâsana a ǀnamsa. Sida di ǃgâsana da ga ǀgoreba, o da ge sida di ǁaeba ǁore tama hâ. Elobmîs ge ra mî “ǀgores ǂhanu-ai khoe-i dis ge kai tsî ǀgaisa sîsenǂuiba ūhâ.” (Jak. 5:16) Sada ǃgâsan ge sida di ǀgorede ǂhâhâ, ǂgui ǃgomsin ǃnân ra ǃkharu amaga. w22.07 23-24 ¶13-15