Januarib

Jesub ge ǃoara ǁgûsa ge “mû” tsîb ge “kaise ge ǀhomsi.” (Luk. 7:13) Jesub ge nē ǁgûsa ǀkhom tsâsib ǀguiba ge ūhâba tama hâ i. Xaweb ge ge ǁgau ǁîsab ra tsâbasa. ǁÎb ge ǁîsa tsaura dommi, ǂgomǃgâsiba ra ǁgaub ǀkha ge ǃhoa ū tsî ge mîba si: “Tā ā re” di. Tsîb ge māsenxase xū-e ge dī, ǁîb ge ǀgâoba ǁōba xu ge ǂkhaiǂkhai tsî “ǁgûsa ǀgôaba . . ge mā-ao.” (Luk. 7:​14, 15) Tae-e da Jesub di buruxa dīb ǃoataras di ǀgôaba khâisa mās dība xu ra ǁkhāǁkhāsen? ǀKhomxaǂgaosiba nauna ǁgausa da ge ra ǁkhāǁkhāsen. Xawe Jesub khami da ge ǃoaran ǃaroma ǀkhomxaǂgaosiba omkhâi ǁkhā, ǁîna kōǃgâs ǃnâ-ū. ǀKhomxaǂgaosiba da ge ǁgau ǁkhā ǁîna hui tsî kōǃgâs ǃnâ-ū. (ǂKhm. 17:17; 2Kor. 1:​3, 4; 1Pet. 3:8) Mî tsî da ra dī ǂkhari xūron ge a ǁkhaeǂgao nî ǁkhā. w23.04 5-6 ¶13-15

Jesub ge ǁîb ǀhōsab ge ǁnā ǁaeb ai a ǁōsa ge ǂan-i. Xawe noxopa ǀgamtsē ra hâb ge i ǃkhais tawa hâ tsî ǁnāpaxū ǀgui Betanisa ǃoa ge ī. Jesub ge sī, ob ge Lasaruba ǀnai 4 tsēde ge ǁō hâ i. Jesub ge ǁîb ǀhōsan ǃgâiba nî hō xu xū-e ge dī. Tsî Eloba ǂhaisiba ge mā. (Jhn. 11:​6, 11, 17) Nē ǃnaeǃkhais ǃnâ da ge ǃgâi ǀhōsagusis xa ra ǁkhāǁkhāsen. Nēs xa ǂâi re: Marias ge haisi-amsa Jesuba ǃoa a sî, os ge ge ǂganbi tama hâ i îb Betanisa ǃoa hā. ǁÎra ge ge mî ǁîb di ǀhōsab ǀaesen hâsa. (Jhn. 11:3) Lasarub ge ǁō, ob ge Jesuba ǃnūseba xu ǁîba khâisa ga mā hâ. Xaweb ge Jesuba Betanisa ǃoa ge ī, îb ǁîb ǀhōra Marias tsî Martas tsîn ǀkha sī hâ. ǀHōsa-e du uhâ hîna nî hui du-e ǁî-e du ǂgan tama hâ hîna? ǁNās ǃnâ-ū du ge a ǂan, ǁî-e du a ǂgomǃgâ ǁkhāsa “ǂhâb” ǃnâ du ga hâ o. (ǂKhm. 17:17) A da Jesub khami naun ǃoagu ǁnāti ī ǀhōsa re. w23.04 10 ¶10-11

ǃGomsiba da ra hōǃâ ǁaeb ai da ge ǀnîsi a tsâ ǁkhā Jehovab ǀasa ǃhūbaib tātsē ǀkhī tide di. Nēsa sida ǂgoms ǂkhabusa di ra ǂâibasen? Hî-i. Nē aiǁgaus xa ǂâi re. Saob ǁaegub ǃnâ da ge kaise i ga ǃkhaio, a tsâ ǁkhā tātsē i ǀgammi ǁaeba hā tide di. Xaweb ge ǀgammi ǁaeba ra hā. ǁNās khami da ge kaise da ga ǂkhabuǂâio, ǀnîsi ǀasa ǃhūbaib tātsē hā tide khami a tsâ ǁkhā. ǀGaisa ǂgomsa da ga ūhâ, o da ge a ǂan Elob mîmâidi nî dīǀoaǀoahesa. (Psa. 94:​3, 14, 15; Heb. 6:​17-19) ǁNā ǂgomǃgâsib ǀkha da ge aiǃgu tsî Jehovab di ǃoabasa ǂgurose sada ûib ǃnâ a mâi ǁkhā. Aoǁnâ sîsenne dīs ǃaromas tsîna da ge ǀgaisa ǂgomsa ǂhâhâ. ǂGui khoen aoǁnâba da ran ge ra tsâ “ǃgâiǂhoâs” hîna Elob ǀasa ǃhūbaib xa hâs ama hā tidesa. (Mat. 24:14; Ese. 33:32) Tā mā-am î-i Jehovab ra ǁkhāǁkhā da xūna ǂgomoǃnâ kai da, ǁîn ra dī khami. ǁNās nî īs aiǃâ da ge aiǃgû tsî sida ǂgomsa nî ǀgaiǀgai. w23.04 27 ¶6-7; 28 ¶14

Dîsen tsâ î du hâ, Jehovab amabes ǃnâ sadu ǀgorede ra ǃereamsa? ǁNāti î ga ī, o du ge ǀguri hâ tama hâ. ǂGui ǃgâsan ge ge mî ǁîn tsîn ǁnāsa ra dîsensa, ǃgōsase ǃgomsînan ga hōǃâ o. ǃGomsiga da ga ǃkharuǃnâ, o da ge sida tsîna Jehovab sida ǀgorede ra ǃereamsa a dîsen ǁkhā. Tae-i ǃaroma da ǂgomǃgâsiba ūhâ ǁkhā Jehovab ǁîb di ǃoaba-aon ǀgorede ra ǃereamsa? Xoadi ge ra ǂâiǂâiǃnâ da, Jehovab kaise a ǀnamdasa. Tsî da sida ǁîba a ǀō-aisabasa. (Hag. 2:7; 1Jhn. 4:10) Nēs xa ǃaromahe hâseb ge ra ǁkhauǂui da, î da ǀgores ǃnâ-ū ǁîb ai huiba ǂgan. (1Pet. 5:​6, 7) ǁÎb ge ra hui da ǂgao, î da ǁîb ǀgūse hâ. Elobmîs ǃnâ da ge ra khomai matib ge Jehovaba ǁîb ǃoaba-aon di ǀgorede gere ǁnâu-am ǀgausa. ǀNî aiǁgaus xa du a ǂâi ǁkhā? w23.05 8 ¶1-4

Marias ge ǀhōsagusisa Jehovab ǀkha ge ūhâ i. ǁNās ǀkha î ge ǁîs ǂgomsa Josefi gere dīn ai ge ǃgaoǃgaosa tama hâ i. ǁÎs ge xoade kaise ǃamkuse ge ǂan i.  Tsîs ge ǁkhāǁkhāsens go xūna ǂâiǃgâs ǃaroma ǁaeba gere ǁamaǂui. (Luk. 2:​19, 51) ǁNās ǀkha da ge a mî ǁkhā, Marias di ǀhōsagusis hînas ge Jehovab ǀkha ūhâ is ge ǁîsa ge hui is ǃgâi tara kai. Nētsēs tsîna di ge ǂgui tarade Marias aiǁgausa ra ǁgae. Aiǁgause, Emiko ti ǀon hâ ǃgâsas ge ra mî: “ǃGamme tama ta ge hâ io, o ta ge Elobmîsa ôaǃnâs di ǀapeǁguiba ge ūhâ i. Xawe ǃgammeb khaoǃgâb ge ti aoba hoaǁae gere ǀgore. Tsî omaris ǃoabasa gere ǂgaeǂgui. Tsîs ge ti ǂgomsa ǁîb gere dībate xūn ai ge ǃgaoǃgaohe tsoatsoa. Mûǂan ta ge ge Jehovab ǀkha ta ūhâ ǀhōsagusisa ta aitsâma ǀgaisase nî ūhâsa. ǁNās ǀkha ta ge nēsi ǁaeba Elob ǀkha ra ǁamaǂui ǁnās ge ǀgores, Xoade khomais tsî Elobmîs xa ǂâiǃgâsa.” (Gal. 6:5) Taradi, aiǃgû tsîso ǀhōsagusisa Jehovab ǀkha ra ǀgaiǀgai khami gu ge aoga ǃgâi ǃaromade nî ūhâ, koa tsî ǀnamsosa.—ǂKhm. 31:30. w23.05 22 ¶6

Jehovaba ǃaos di ǁkhāsib ǀkha da ge ǃnaehe tama hâ, nēsa da ge aitsâma nî omkhâi. ǀGui ǀgaub nēsa da a dī ǁkhāb ge, kurusa ôaǃnâsa. Elob di gā-aisib, ǀgaib tsî ǀnammi tsîna da “ǁîb ge kuru xūn” ǃnâ ra mû khami, î ge ǁîba da ūba hâ ǀnammi tsî ǃgôasib tsîna nî kai. (Rom. 1:20) ǀNî ǀgaub Eloba ǃaosa da omkhâi ǁkhāb ge hoaǁae ǀgoresa. ǀGore da ra ǃnās hoasa da ge Jehovaba ǃnāsase ra ǂan. ǃGomsina da ga hōǃâ o da ga Jehovab ai huiba ǂgan, o da ge ra ǂâiǂâiǃnâhe matikōseb ǀgaisasa. Jehovaba da xoremarib ǀkhaeb ǃaroma ra gangan ǃnās hoasa da ge ra ǂâihō matikōseb ǀnamdasa. Tsî da ga Jehovaba hōǃâ da ra ǃgomsin ǃaroma ǀkhoma. O da ge ra ǂâihō matikōseb gā-aisa. Nēti i ǀgoredi ge Jehovaba da ūba hâ ǃgôasiba ra ǀgaiǀgai. Tsî î ge ra hui mîǁguisa, î da tā xū-e dī Jehovab ǀkha da ūhâ ǀhōsagusisa a ǁgaiǁgai ǁkhā-e. w23.06 15 ¶6-7

Jehovab ge a ǂHanub di mā-ao tsîb ge ǁnās ǃaroma ǃgāsa ǂhanuga ǁîb khoena gere mā. Aiǁgause, ǂgurokam ǁaeb di ǂGaeǂguira soros ge ǃnona ǀgaugu Xristeǁîn nî mâǀgai ǃnâ ga ge mā: (1) ama tama hâ eloga xu ǂgōsens tsî Jehovab ǀguiba ǃoabas, (2) în ǀaoba ǂhâǂhâsa xū-i ase mû. Tsî (3) în Elobmîs di ǀgapi daoǁgaude ǀoasase sao-ai. (ǃNǃkh. 15:​28, 29) Xristeǁîna nētsē mati nē 3 ǀgaugu ǃnâ a mâǁapo ǁkhā? Jehovab ǀguiba ǃoabas ǃnâ-ū. ǁÎb ge Israelǁaesa ge mîmā, ǁîb ǀoasase ra ǃoabahe ǂgaosa. (Deu. 5:​6-10) Tsî Jesub ge ǁGâuab xa a ǃâitsâhe o, ob ge Jesuba ge ǃgāsa kai Jehovab ǀguiba da nî ǃoabasa. (Mat. 4:​8-10) ǁNā-amaga da ge tā ama tama eolga nî ǃoaba. Tsî da ge khoen tsîna ǃoaba tama hâ. Nēsin ga kerkheb di ǂgaeǂgui-ao, ǂgīǂgōsi ǂgaeǂgui-ao tamas ka io ǂgamǂgamsen ǀhurugu tsî ǂanǂansa khoe-i xawes tsîna. ǁÎna da ge elogu ase mû tama hâ. ǁîb ge “hoaraga xūna kuru xui-ao” da ge ǁîb ǀguiba ra ǃoaba.—J.ǂHa. 4:11. w23.07 14-15 ¶3-4

ǁGâuab di ǃhūbaib ge ǃgâi tama ǁgoe-ūgudi tsî ǀōǀkhā khoena ūha kōs xa ǃgâibahe. (Efe. 4:19) ǁNā-amaga da ge aiǃgû tsî eloǃaoǃgâxasiba nî ūhâ tsî ǁgai xūna xu nî ūdawasen. ǂKhoamîdi 9ǁî danaǃâs ǃnâ da ge gā-aisib tsî ǁnâuǃāoǃnâsib xa ra khomai. Nēs ge ǀgam khoera ǀkha ra ǀgopeǀnōhe. Nē ǁkhauǂuis ge “ǁnâuǃāoǃnân” ǃoagu ra māhese ra ǁguiǃāhe. Mâ khoes hoas ge ǀnî mîdi ǃnâ ra mî: ‘Ti omsa ǃoa hā re î da ǂûǀhaosa ūhâ’. (ǂKhm. 9:​1, 4-6) Xawe ǁnān hîna nē ǁkhauǂuisa ra ǃkhōǃoan di ǀamǂoas ge a ǃkharagagu. ‘Gâre tarekhoes’ di ǁkhauǂuisa !gao!gâ re. (ǂKhm. 9:​13-18) ǁÎs ge ǁkhoaǂgaoxase ǁnâuǃāoǃnâna ra ǁkhau, “hā” ī tida ǀkha ǂûǀhao. ǀAmǂoasa ge tae-i? “ǁŌb ǁnāpa hâ ǃkhaisan ge a ǀū.” ‘ǂGaeǂhapuxa ǀgai-aosa’ xu da ge ra ǃkhâikhom-e. Mîbahe da ge ra “ǁîs ǁkhausaben ǃgamse ǁōhan hâǃkhaib ǃnâ hâsa.” (ǂKhm. 2:​11-19) ǂKhoamîdi 5:​3-10 ge ǀnî hâ ǃkhâikhomsa ūhâ ǂgaeǂhapu ra ǀai-aos xa, “ǂaira âs ge ǁob ǃoa ra ǂgaeǂgui.” w23.06 21-22 ¶6-7

ǀHaohâb ǃûi-aogu ge ǃgâi aiǁgausa ǁîgu mûǃāxasib ǃnâ nî ūhâ. (1Tim. 3:​2, 3) Aiǁgause ǀhaohâb ǃûi-aob ge tā nî ǂâi ǁîb di ǂâiǀgaub hoaǁae nî ūǃoahesa, ǁîb naugu xa a kai ǃkhais ǃaroma. ǁÎb ge ra ǂanǃgâ Jehovab di gagab mâ ǁanib hoab ai a sîsen ǁkhāsa. Îb ǁîb di ǁgâiǂuisende gā-ai mîǁguib ai ǀaro. Tsî Elobmîs di daoǁgaudi ga ǃgûǂamhe tama io, o gu ge ǁnâuǃāxa ǀhâohâb ǃûi-aoga ǃnāsa ǃgâsagu di mîǁguiga māsenxase ra ǂkhâǃnâ. ǀNîsi gu ga ǀkhara mîǁguib xa ǃgâibahe xawe. Xristeǁîn ge ǂgui ǀkhaega ra hō ǁîn ǁnâuǃāxasiba xu. ǃGâiaǂgao da ge ra sida ǃgâsan ǀkha da ūhâ ǃgâi ǀhōsagusis xa tsîb ge ǀhaohâba ǂkhîb ǃaroma ra ǃgâiaǂgao. ǃKharagagu ǀgaugu ǃnâ da ge ǃgâiba ra hō. Tsî ǁnaedigu hîna Jehovab di ǀguiǃnāxa ǃoaba-aon ǁaegu hâb. Hoan ǂamai da ge ǃâiba ra hō ǂansa, Jehovab di ǁnâuǃāxasiba da ra ǁgaesa. w23.07 25 ¶16-17

Danieli ge Elobmîs kēbode ǂhanu ǃaromas ǀkha ge ǁkhāǁkhāsen, amabab gere ǂan ǂgao amaga. Danieli ge ge ǃgamǃgamsenxa-i. ǁÎb ge ge ǂan-i Jehovab nî hui bisa îb kēbode ǁnâuǃā, ǁîb ǀgūse hâ tsîb ga ǁnâuǀnambi o. (Dan. 2:​27, 28) ǁGaub ge ge ǃgamǃgamsenxab asa, Jehovab huib ai ǂgomaiǂnûis ǃnâ-ū. (Dan. 2:18) Danieli ge ǂōrisase gere ǁkhāǁkhāsen, ǁîb ge ǁnā ǁaeb aib ge ūhâ i Elobmîs ǂkhanidi ǃnâ ǃereamde gere ôa. (Jer. 25:​11, 12; Dan. 9:2) Sado mati Daniela ǁgae ǁkhā? Tae-i ǃaroma du Elobmîs kēbodi xa ra ǁkhāǁkhāsens xa ǂâi re. Elobmîs kēbode amaba ǂans ǀgaisa turaba du ūhâ amaga ra ǁkhāǁkhāsen? Ti i ga ī ob ge Jehovaba nî hui du. (Jhn. 4:​23, 24; 14:​16, 17) ǀNîn ge ǁnāsa ra dī ǁgau ǂgaon ra amaga, Elobmîs Eloba xu hā tama hâsa. ǁÎn ge ra ǂâi ǁgau ǁkhān ga o, Elobmîs Eloba xu hā tama hâsa. on tae-i a ǂhanu tsî tae-i ǂhanu tama hâsa aitsama ǁhûibasen ǁkhāsa. Xawe sida ge ǃgâi ǃaromas ǃgao nî ǁkhāǁkhāsen. w23.08 9 ¶7-8

Sīǃnâǁoa da a ǃâubasena da ge nî tani, nau khoen ǀkha da ga ǀgopeǀnōsen o. (Gal. 6:4.) Hoaǁae da ga ǁnāsa a dī, o da ge surixa tsî nî ǀnûgu tsoatsoa. (Gal. 5:26) Nau khoen ra dī xūna da ga dī ǁoa da a hîna ga ra dītsâ, o da ge aitsama tsûtsûsen ǁkhā. Nē i xa ǂâi re, Elobmîs ge ra mîba da: ‘Mâiǂuihe hâ ǃâubsens ra ǂgaoba tsûtsûsa.’ ǁNā-amaga î ge kaise nî ǂkhabuǂâi kai da, tātsē da ǀnîsi hō ǁoa xū-i ai ǃâusa. (ǂKhm. 13:12) ǁNā-e da ga dī, o da ge kaise a tsau ǁkhā tsî sada ûib di ǃkhoeǀnûgus ǃnâ nî ǂau. Tā sado xu ǃnāsa-e ǃâubasen, Jehovab ǂgaoǀkhā hâs xa. ǁÎb ge tātsē ǃâubasen tama hâ, ūhâ tama du hâ xū-e du nî māsa. (2Kor. 8:12) ǂGomǃgâ re, Jehovab ge dī du rana naun ra dīn ǀkha ǀgopeǀnō tama. (Mat. 25:​20-23) ǁÎb ge sada ǂgaob hoaba xu hâ ǃoabas, ǂgomǂgomsasib tsî mâǀgais tsîna ra ǃgôaǃgâ. w23.08 29 ¶10-11

Jehovab ge Simsonni di ǀgoresa ge ǃeream, buruxa ǀgaub ǃnâ ǁîba ǁgam-e mās ǃnâ-ū. Simsonni ge ǁnā ǁgam-e ā, ob ge ǀgai tsî “ǃgâi tsâsiba” ge ūhâ i. (ǂHǂh. 15:19) Mîhe ras ǃoagu î ge nē ǀasa ǀausa, noxopa kēbo-aob Samueli ge ǂHanuǂhanu-aogu ǂkhanisa xoa, o ge hâ i. Israelǁaes hîna ge ǁnā dâu ra ǁgam-e a mûs ge ge ǂâiǂâiǃnâhe, Jehovab ain ga ǂgomaiǂnûi ob ǁîb ǂgomǂgomsa ǃoaba-aona ǂhâsib ǃnâ nî huisa. Sida tsîn ge Jehovaba ǃoa nî kō, gā-aisib tsî ǁkhāsib tsîna da ga ūhâ xawe. Tamas ka io Jehovab ǃoabas ǃnâ da ge dī xūn ǃaroma. ǃGamǃgamsenxase da ge nî ǁnâuǃā Jehovab ra ǂgan da xūna da, ǁîb ai da ga ǂgomaiǂnûi o ǀgui a dīhō ǁkhāsa. Simsonni ge ǂhâb ge hâ i ǀgaiba ge hō Jehovab ge mābi ǁgam-eb ge ā o. Simsonni khami da ge sida tsîna Jehovab huiba nî ūǃoa, î da ǂgomǂgomsase ǁîb ǃoa hâ.—Mat. 11:28. w23.09 4 ¶8-10

Tae-e da a dī ǁkhā khoe-i ga ǃkhāǃkhā da o? Aiǁgause ǁî-i ga ǃâi tama xūna Jehovab xa a mîs, tamas ka io Elobmîsa a mîǁgaiǁgai o. Jehovab ǃanu gagab tsî gā-aisib tsîna da ge a ǂgan ǁkhā, î da tsamtsiǃnâsib ǃnâ ǃeream. ǂÂi da ra khami da ga ǃeream tama i, o da tae-e a dī ǁkhā? Nē ǃgomsib ǃaroma da ge a ǀgore ǁkhā, î da ǂâi hānîǁaeb ǃnâ da tae-e nî dīsa. Nēs xa da ge ǀgore tsî a ǂâi ǁkhā, mati da sao ra ǃnās ai ǃgâise nî dīsa. Jehovab ge ǁîb di ǃanu gagaba nî mā da, î da sida ǁaiba xu ǃkhō-oasen tsî tsamtsiǃnâsiba ǁgau. ǀNî Elobmîs xoadi ge a hui da ǁkhā î da sida di ǃhoa ǀgauba ǃkhō-oa ǃgom mâsigu ǃnâ da ga hâ o. Elob di ǃanu gagab ge a huida ǁkhā, î da ǁnā xoade ǂâihō. (Jhn. 14:26) Aiǁgause ǂKhoamîdi ǃnâ da ra hō dauǁgaudi ge a huida ǁkhā î da tsamtsiǃnâ. (ǂKhm. 15:18) ǁNā Elobmîs ǂkhanis ge ra ǁgau ǃgâiba da ra hōsa, ǃgom mâsigu ǃnâ da ga ǃkhō-oasen o.—ǂKhm. 10:19; 17:27; 21:23; 25:15. w23.09 15 ¶6-7

Apostel Petrub ge ge ǂan i, ǁîb ûib ǀgūǁae nî ǀamsa. Tsîb ge ǂgomǂgomsase Jehovaba ǂgui kuriga ge ǃoaba. Tsî Jesub ǀkha ǀguipa aoǁnâ sîsenne gere dī. Aoǁnâ sîsen-eb ge Jodeǁî taman ǁaegu ge dī tsoatsoa. Tsî ega ge ǂgaeǂguira soros ǁani kai. ǁÎb ûib ǀams aib ge Jehovaba ǃnāsa sîsen-e ge mābi. 62-64ǁÎ kurigu ǃnâb ge Jehovaba ǁîba ge sîsenū îb 1Petrub tsî 2Petrub sîǂkhani ra xoa. (2Pet. 1:​13-15) Petrub ge nē sîǂkhanide ge xoa, ǃgâsan ge ‘ǃkharagaǃnâgu ǃâitsâna’ gere hōǃâ ǁaeb ǃnâ. (1Pet. 1:6) ǂKhabadī-aogu ge ama tama ǁkhāǁkhādi tsî ǃgâi tama tanisen ǀgaugu tsîna ǀhaohâb ǃnâ gere ǂgâxa-ū ǂgao. (2Pet. 2:​1, 2, 14) Jerusalems ǃnâ gere hâ Xristeǁîn ge gere ǃâubasen ǀgūǁaen ǃās di hîkākās tsî Jodeǁîn ǂhanub “ǀams xūn hoan” disa nî hōǃâsa, Romeǁî toroǂnubis xa ǃaromahe hâse. (1Pet. 4:7) Petrub di sîǂkhanidi ge Xristeǁîna ge hui în mûǂan, tae-en a dī ǁkhāsa. Tsî ǂgomǂgomsase ǁnān gere hōǃâ ǃgomsin ǃnâ mâǀgai. Tsî hāni ǃgomsin ǃaromas tsîna gere aiǂhomi. w23.09 26 ¶1-2

Jesub khami da ge ǁnâuǀnamxasiba ǃgom mâsigu ǃnâ ra ǁkhāǁkhāsen. Aiǁgause, Koronas ge tsoatsoa ǁaeb ǃnâ i ge ǀhaohâga sîsenūs, omsa xu oms ǀkha aoǁnâs tsîna ge ǂkhahe. Nē daoǁgausa supu i ge ī? Sadu ǁnâuǀnamxasib ge ǁkhauba du, ǀguiǃnâxasiba ǀhaohâb ǃnâ hā-ū tsî Jehovab tsîna ra ǂkhîǂkhî. Hoa da ge kai ǁgâiǀāb ǃnâ nî hā daoǁgaude ǁnâuǀnams ǃaroma ǀnâi aiǂhomisen hâ. ǁNā daoǁgaude saos ge sida ûiba nî sâu. (Job 36:11) Sada ge Jehovaba da ǀnam tsî ra ǂkhîǂkhî ǂgao ǃkhais ǃaroma ǁîba ra ǁnâuǀnam. (1 Jhn. 5:3) Jehovaba da ge tātsēs tsîna dība dab ge xūn ǃaroma mādawa-am hō tide. (Psa. 116:12) Xawe da ge ǁîb tsî ǁnān hînab ge ǁgaumâin tsîna a ǁnâuǀnam ǁkhā. ǁNâuǀnam da ga o da ge gā-aisiba ra ǁgau. Tsî gā-ai da ga, o da ge Jehovab ǂgaoba ra ǂkhîǂkhî.—ǂKhm. 27:11. w23.10 11 ¶18-19

ǀHomǃgā-i ga sadu ǀkha ǃhoa, o ǃgâ î du nî ǁî-i ra mî xū-e? Nētsēb ge ǀhomǃgāba “ǃhūbaib ai ǁan hâ ǁaes, ǃhaos, gowab tsî khoen” ǀkha ra ǃhoa. Tae-eb ra mî? ‘Eloba ǃao, î ǁîba ǃgôasiba mā . . . ǀgoreǀî re ǁîb ǀhommi tsî ǃhūbaib tsîna ge kuruba.’ (J.ǂHa. 14:​6, 7) Jehovab ge ǀguri ama Eloba, hoa da ge ǁîba nî ǃoaba. Matikōse da a ganganbi ǁkhā îxa aiǂhanub hînab ge mā dab ǃaroma, î da ǁîba ǁîb kai gagasi tempeli ǃnâ ǃoaba. Gagasi tempela a tae tsî mâpa da ǁgûiǃā ra ǂansa hō ǁkhā? Gagasi tempeli ge kuru mâisa om tamaba. Jehovab ǂnûiǂgās ge ǁîb ra ūǃoa ǃoabas ǃaroma, Jesub xoremaris ǁguibas ai ǃgaoǃgaosaba. Apostel Paulub ge nē ǂnûiǂgāsa ǁîb ǂguro ǂkhanis, Hebre Xristeǁîn hîna Judiab ǃnâ ra hâna ǃoab ge xoas ǃnâ ra ǁgûiǃā. w23.10 24 ¶1-2

Tsî 522ǁî kuri Jesub ǃnaes aiǃân ge ǁîn khākhoena, Persiab ǂhanuba ge ǂkhâǃnâ î-i tempela om-oas sîsenne ǀû kaihe. Xaweb ge Saxariaba Jodeǁîna ge hōhōǃnâ Jehovab ǁîb ǃanu gagaba sîsenū tsî nî hui nîsa ǃgomsinan ga hōǃâ xawe. Tsî 520ǁî kuri Jesub ǃnaes aiǃâb ge Gao-aob Dariuba marisa mā tsî ge mā-am nî în aiǃgû tempel om sîsenni ǀkha. ǁNās xoǀkhās tsînab ge ǂhanuba ge mîmā în hui-e. (Esr. 6:​1, 6-10) Jehovab ge ǁîb khoena ge mîmâiba, tempela om-oas ain ga ǁîn ǂâisa ǂnûi, ob nî hui nîsa. (Hag. 1:​8, 13, 14; Sax. 1:​3, 16) Kēbo-aogu xa ǂkhâǃnâhe hâsen ge ǁkhapa Jodeǁîna tempel om sîsenni ǀkha ge tsoatsoa, 520ǁî kuri Jesub ǃnaes aiǃâ. Tsî nē sîsenne koros xa ǀoro kurigu ǃnâ ge dītoa. ǃGomsinan gere hōǃâ xawen ge Jehovab di sîsenne ǂgurose gere mâi. ǁNā-amagab ge Jehovaba ǂhân hâ xūna mānî tsî gere hui nî în ǁîb ǀgūse hâ. ǁNās xa ǃaromahe hâsen ge ǃgâiaǂgaob ǀkha Jehovaba gere ǃoaba.—Esr. 6:​14-16, 22. w23.11 15 ¶6-7

ǂGui khoen ge Abrahammi xa ge ǁnâu xawen ge ǁîb xa hâ amab hoaba ǂan tama. Xawe sadu ge ǂguina Abrahammi xa a ǂan. Aiǁgause du ge a ǂan, ‘Abrahammi hoan Elob ǃnâ ra ǂgoman’ di ǁgû ǃkhaisa. (Rom. 4:11) Sadu tsîn ge Abrahammi khami Jehovab ǃnâ ǀgaisa ǂgomsa omkhâi ǁkhā, nēs ge amase a īǁkhā. Abrahammi ge ūhâ-i ǂgomsa da a omkhâi ǁkhā ǀgaub ge, ǁîb di aiǁgaus xa ǁkhāǁkhāsensa. Abrahammi ge hoaǁae Elob gere mîmābi khami gere dī, ǁîb ge ǃnū ǃāsa ǃoa ge doe tsî tendi ǃnâ ǂgui kuriga gere hâ. Tsîb ge ge māsaenxa-i ǁîb ǀgôab Isaki tsîna ǁguibas ase māsa. Nē ǀgaugu Abrahammi digu ge ǀgaisa ǂgomsa ra ǁgau. ǁÎb di ǂgoms tsî ǃgâi dīgu ǃnâ-ūb ge Abrahamma, Jehovaba kaise gere ǂkhî kai tsî ǁnās ǀkha Jehovab di ǀhōsab ase ge ǂgaihe. (Jak. 2:​22, 23) Jehovab ge ǂhâba hâ î da hoa da, sats tsîna ǃkhōǂgā hâse, ǁîb di mā-amsa hō tsî ǁîb ǀkha ǀgū ǀhōsagusisa ūhâ. ǁNās ǀkhab ge Jehovaba Paulub tsî Jakobub tsîkha ge mîmā îkha Abrahammi aiǁgaus xa xoa. w23.12 2 ¶1-2

ǃGâsade a di ǃgâise ǃhoa tsî ǂōrisase ǁkhāǁkhāsen. Kaise i ge a ǂhâǂhâsa Xristeǁî-i ǁnāsa dīsa nî ǁkhāǁkhāsensa. ǁKhāǁkhāsabeb Jakobub ge ǃgâi ǀapemāsa ge māda. ǃGâise du ga ǃgâ naun ra ǃhoa hîna, o du ge ‘ǀkhomxaǃnâsiba’ ra ǁgau. (1Pet. 3:8) Khoe-i ra mî xū-e du ga ǃgâise ǁnâuǃā tama i, o ǂhâbasa dîna dî re. ǁNāpaxu ǁaeba ū re ǃhoa du nîs aiǃgâ. (ǂKhm. 15:28) Dîsen re, ‘nēsi ta nî mî xū-e ama tsî ǂkhâǃnâxa-e? Nē xū-e ǃgôasiba ra ǁgau?’ ǃGâsadi hîna ǃgâise ǃhoa tsî ra ǃgâde xu ǁkhāǁkhāsen. (ǂKhm. 31:26) ǁÎdi ra ǃhoa ǀgauba ǃgaoǃgâ. Nē ǀgaugas ra ǁkhāǁkhāsen khami i ge naun ǀkhas ūhâ ǀhōsagusisa nî ǃgâi. w23.12 21 ¶12

Nētsēb ge Jehovaba omaris khoe-i, ǀhōsa-i tamas ka io ǀhaohâb ǃûi-ao-e a sîsenū ǁkhā î-i sida ǂkhâǃnâ. Xawe ǀnî ǁaegu ai da ge tsûtsûhe da ga o nauna xu ra ǂgae-oasen. ǀGuri ǀgui da ge ra hâ ǂgao tsî ǁnāb ge ǁnaetisa tsâsiba. Tae-e da a dī ǁkhā î da Jehovab di ǂkhâǃnâsa ǃkhōǃoa? Dītsâ re î tā ǀguriǀgurisen. ǀGuriǀgurisen da ga o da ge ǃnāsa ǁaeba sida tsî ū da hâ ǃgomsib xa ǀgui a ǂâi ǁkhā. Nēti-i ǂâi ǀgaub ge sida mîǁguiga a tsâǀkhā ǁkhā tsî da ge ǃgâi mîǁguiga dī tide. Ama as ge ǀnî ǁaegu ai da ge ǀguri ra hâ ǂgao, ǃgōsase ǁgai xū-i ga sida ûib ǃnâ ī o. Xawe da ga gaxu ǁaeba ǀguriǀgurisen, o da ge Jehovab ra sîsenū ǂgao khoen huiba a ǂhābe ǁkhā. ǁNā-amaga sadu omaris, ǀhōsan tsî ǀhaohâb ǃûi-aogu huiba ūǃoa re. Jehovab sado ra ǂkhâǃnâ ǀgaub ase ǁîna mû re.—ǂKhm. 17:17; Jes. 32:​1, 2. w24.01 24 ¶12-13

Nasirǁîn ge ge mîmâi ǁîn ǀûnan ǁara tidēsa. Nēs ge ra ǁgau ǀoasasen ge Jehovaba ǃoa gere ǃgamǃgamsensa. Tsûaǂgaoxase i ge ǀnî ǁaegu ai Nasirǁîna ǃgôahe tamas ka io ge ǂkhâǃnâhe tama hâ i.  ǀNî ǁaegu ain ge Nasirǁîna ǁkhoaǂgaosiba ge ǂhâha i, ǁîn di mîmâisa ǃkhōǀgara tsî mâǂoasa. (Amo. 2:12) Jehovab ǂâisa dīsa da ra ǁhûi, amaga da ge sida tsîna hoa khoena xu ra mâǂoa. ǁKhoaǂgaosiba da ge ǂhâ hâ, î da khoena sîsenni tamas ka io skoli tawa mîba Jehovaba da ra ǃoaba ǃkhaisa. Nē ǃhūbaib tanisen ǀgaub tsî ǂâiǀgaub ra ǁgaiǂoa khami da ge ǃnāsase nî ǃgombahe, Elobmîs ǂgaoǀkhādi ǃoagu ûi tsî ǃgâiǂhôasa nau khoena aoǁnâbasa. (2Tim. 1:8; 3:13) Hoaǁae ǂâis ǃnâ ūhâ re, Jehovab ǂgaoba da ge ra “ǂkhîǂkhî,” ǁkhoaǂgaose da ga ǁîba ǃoaba tama khoena xu mâǂoa tsî ǀkhara o.—ǂKhm. 27:11; Mal. 3:18. w24.02 16 ¶7; 17 ¶9

ǃKharagagusib hîna ge Romeǁîn ǀhaohâb ǃnâ hâ îb xa ǂâi re. ǁÎn ǁaegu î ge Jodeǁîn ǀguina ge hâ tama hâ i, hîna ge ǁkhāǁkhāhena în Moseb di ǂhanuba ǁnâuǀnam. Xawen ge ǀūbeǁaes di khoen tsîna ge hâ i. Hîna ge kaise ǀkhara khaoǃhūba Jodeǁîna xu ūhâ īna. ǀNî Xristeǁîn ge ǀnîsi ge ǃgā-i. Tsîn ge ǀnîn tsîna ǀnîsi ǃgāna ge ūhâ i. Matin ga ǁnā Xristeǁîna ǃkharagagusiba sîsenǂam tsî ǁîn ǀnamma ǀgaiǀgai hâ? Apostel Paulub ge ǁîna ge ǂkhâǃnâ, în ǃkhōǃoagu. ǁNāsa tae-e ra ǂâibasen? ǃKhōǃoagu di hâ mîs ge ra ǂaibasen, sarira khoe-e ǃgâi ǀgaub ǃnâ hâ-ūsa. Sa oms tamas ka io ǀhōsan ǁaegu. Aiǁgause, Paulub ge Filimona ge mîba matib ǃkhoebē ge ǃgāb Onesimuba nî ǃkhōǃoa ǃkhaisa, mîb ge ge ǁîba ‘ǁkhoreǁhare re.’ (Flm. 17) Priskilas tsî Akwilab tsîra ge Apoloba ge ǃkhōǃoa. ǁÎb ge ǀoro ǂansa ǁîra xa ge ūhâ i. Tsî ra ge “ǁîra tawa ge ūbi.” (ǃNǃkh 18:26) ǁNā Xristeǁîn ge ge mā-am tama hâ i, în ǁîn di ǃkharagagusiba ǁîna ǀgora. Xawen ge ǁnā ǃgomsiga ǀguiba ge sîsenǂam tsî gere ǃkhōǃoagu. w23.07 6 ¶13

ǃUru ǂâibasens Jehovaba ǃoa du ra māǁnâsens ge ǀnambi du a amaga. Sadu ǀnammi ge tsâsib ai ǀgui ǃgaoǃgaosa tama. Xawe nēs ge “hoa gā-aisib tsî gagasi ǁnâuǃāb” ai a ǃgaoǃgaosa. Jehovab xa du ge ǁkhāǁkhāsen xūn ge ge ǃaroma î-i ǁîba du ūba hâ ǀnamma kai. (Kol. 1:9) ǁKhāǁkhāsen du ge xoadi ge ǂgomǃgâsiba ge mā du (1) Jehovab a amasa, (2) Elobmîs Elob gagab xa ǃgomǂgāǃnâhe hâsa, tsîb (3) ǁîb ǀapeǂhumisa ra sîsenusa îb ǁîb ǂâisa dīǀoaǀoa. ǁNān hîna ge Jehovab ǃoa a māǁnâsenan ge Elobmîs ǃnâ hâ ǁkhāǁkhāde nî ǂan tsî Elob ǂhanuga nî ǁnâuǀnam. ǁÎn ǂgomsan ge naun ǀkha ra ǀgoragu, ǁîn ǁkhāsib ra mā-ams kōse. (Mat. 28:​19, 20) ǁÎn Jehovaba ūba hâ ǀnammi ge ge kai tsî ǁîn ǂgaob turab ge ǁîb ǀguiba ǃoabasa. ǁNāsa sado ra ǁguiǃā? w24.03 4-5 ¶6-8

Abigails ge Nabala ge ǃgamme hâ i Elobmîs ǃnâ ǁgaiǂūb tsî ǃgâi tama tanisen ǀgauba ūhâse gere ǁguiǃāheba. (1Sam. 25:3) Abigails ge ǀnîsi ge ǃgombahe i ǁnāti ī aob ǀkha hâ ǀhaosa. Xawe Abigailsa supu ǀgauba gere ôa ǁîs ǃgammeba ǀam kaisa? ǁÎs ge ǃēsa ge ūhâ i hānîǁaeb di Gao-aob Davidi ge ǁîs aoba gere ǃgam ǂgao o, ǁîb tsî ǁîb khoegu ge mîǁgaiǁgaihe ǃkhais ǃaroma. (1Sam. 25:​9-13) Abigails ge ǁhûi tsî ga mā-am hâ îb Davida ǁîs aob Nabala ǃgam. Xawes ge ǁnāsa ge dī tama hâ i tsî Davidi ǀkha ge ǃhoa î-i ǁîs aoba tā ǃgam-e. (1Sam. 25:​23-27) Tae-e ǁîsa ge ǂkhâǃnâ? Abigails ge Jehovaba ge ǀnam i tsî ǁîb di ǂhanugu tsîna ǃgammeb ǃoagu. Abigails ge Eloba gere ǂkhîǂkhî ǂgao tsî ǁnās ge ǂkhâǃnâ tsî ge huisi îs ǁîs omarisa sâu, aob tsîna ǃkhōǂgāhâse. ǃHaeses ge ge sîsen îs Davida ǁkhae îb tā Nabala ǃgam. w24.03 16-17 ¶9-10

Sadu ǀhaohâb ǃnân ǀnîna hâ ǁîn ûiga ra ǀgui ǃgubu kai ǂgaona în Jehovaba ǃnāsase dība. ǂKham khoen hîna ǃgom i ga xawe skoli ǃnâ ra mâǂoana du ūhâ? ǂGomǂgomsase mâǀgaras ǀkha ǃgomsi-e ūhân tsîna hâ, omaris khoen xan ra ǁgâiǀāhe amaga. A da mâǃēs hoasa sîsenū tsî sida ǃgâsan ǀkha ǃhoa tsî ǁgâiǂûisen, matikōse da ǁîn di māsenxa gagab tsî Jehovaban ra dība xūna ra ǃgôaǃgâ ǃkhaisa. (Flm. 4, 5, 7) Jehovab ge ǁîba da ra ǂkhîǂkhî ǂgao ǃkhaisa ǂan tsî da māsenxase sida māǁnâsens mîǁguiba ra dīǀoaǀoa ǂgaosa. ǃGôasibab ge ra ǁgau da mati da ǁîba ǀnamma nî ǁgaus ǃēsa mā das ǃnâ-ū. (ǂKhm. 23:​15, 16) A da aiǃgû tsî māsenxase Jehovaba ǃoaba ǀgara tsî sida ǁkhāsib hoaba ǁîba mā. w24.02 18 ¶14; 19 ¶16

Mûnanai re, 29ǁî kuri Jesub ge ǁîb di aoǁnâ sîsen-e a tsoatsoa o. Jesub tsî ǁîb ǁgûs Marias tsîn ge ǃgammeba ǃoa ge ǁkhauhe. Marias ge ǀnîsi ǃhaokhoena ǃkhōǃoas ǀkha gere hui, xawe ǃgammeb ǁâudib tawa î ge xûi-e ge toa. Marias ge ǁîs di ǀgôaba ǃoa ge mî: “ǂAuxûi-i ge go toa.” (Jhn. 2:​1-3) Jesuba tae-e ge dī? ǁÎb ge ǁgamme “ǃgâi ǂauxûi-e” ǃoa ge tawa. (Jhn. 2:​9, 10) Jesub ge ǂgui buruxa dīga ǁîb gere aoǁnâ ǁaeb ǃnâ ge dī. ǁÎb buruxa ǀgaib ǀkhab ge ǂgui khoena gere hui. Aiǁgause da ge ǁîb di 2 buruxa dīga xu ra ǁkhāǁkhāsen, ǂguroseb ge 5 000 khoega ge ǂûma tsî ēga 4 000 khoega. Nēn ge ǀnîsi ge 27 000 khoe-i, tarekhoedi tsî ǀgôan tsîna ǃkhōǂgā hâse. (Mat. 14:​15-21; 15:​32-38) Hoa ǀgam ǃnāra aib ge Jesuba, ǀaesen ge hâ i khoena ge ǂgauǂgau.—Mat. 14:14; 15:​30, 31. w23.04 2 ¶1-2

Kaise ǁgai xū-i ga sida ǀkha i, o da ge ǀnî tsēdi ai sorosise ǁgaise tsâ tsî gagasise ǂkhabu ǁkhā. Eliab khami i ge ǀnîsi kaise a ǃgom khâimâsa tsî da ge ǁom ǂgaos ǀguisa nî hî. (1Gao. 19:​5-7) ǁNā-amaga da ge huiba ǂhâhâ î da Jehovab di ǃoabas ǃnâ hâ ǀgara. ǁNā mâsib ǃnâb ge Jehovaba saorase ra ǁapoǁapo, hui dab nîsa nētsēs mîs ǃnâb ra mî khami. Gao-aob Davidi ge nē huiba ge hōǃâ. ǃGomsinab gere hōǃâ tsî khākhoen xa gere mâǃoahe, ob ge Jehovaba ǃoa ge mî: ‘sa huib ge ge ǀgaiǀgaite.’ (Psa. 18:35) Jehovab ge ǃnāsa ǁaeba nauna ra ǂkhâǃnâ în hui da. Aiǁgause, Davidi ge ǀgui ǁaeb ai ǂkhabusase tsâ, ob ge ǁîb ǀhōb Jonatanna saribi tsî ǂkhâǃnâbi tsî ge ǀgaiǀgaibi. (1Sam. 23:​16, 17) ǁNās ǁkhās khamib ge Jehovaba Elisaba ge ǁhûi îb huiba Eliaba mā.—1Gao. 19:​16, 21; 2Gao. 2:2. w24.01 23-24 ¶10-12

Jehovab ge a māxa tsî ǃnāsase ra mā da. Tarekhoes ‘ama gā-aisiba’ ra ǂnûǁkhaebas ǂKhoamîdi 9ǁî danaǃâs ǃnâ hâsa xu da ge ra ǁkhāǁkhāsen, Jehovaba a māxa ǃkhaisa tsîb sida ǂgui ǃgâi xūna ra māsa. Nē xoas ge ra mî nē tarekhoes ǃhaokhoena ǁkhauǂui hâsa în ǁîs oms ǃnâ ǂâxa. Tsî ǁkhoaxase ǁgan-e ra ǂûsa, ǁîs go aiǂhomi ǂâuxûi-i ǀkha. (ǂKhm. 9:2) Aiǃgû tsî î ge 4 tsî 5ǁî ǁaraǃādi ǃnâs ge ǁnâuǃāoǃnâba ǃoa ra mî: ‘Hā i ti pereba ǂû.’ Tae-i ǃaroma da nē tarekhoes di ǁkhauǂûisa nî ūǃoa? Jehovab ge ǁîb ǀgôan nî gā-ai tsî ǃnōrasase nî hâsa ra ǂhâba. ǁÎb ge ǂhâba tama hâ î da, dīsā tsî tsûtsûhe. ǁNā-amagab ge “ǂhauǃnâ khoena hui tsî ra ǃgâiǃgâxa kai.” (ǂKhm. 2:7) ǀNōsa eloǃaoǃgâxasiba da ga ūhâ, o da ge ǁîba nî ǂkhîǂkhî ǂgao. ǁÎb di gā-ai ǁnamasa da ge ra ǃgâ tsî ǁîsa ra ûiǂûi.—Jak. 1:25. w23.06 23 ¶14-15

Elob ǃoabas ǃnâ da ǃnubusiga ūhâ khami da ga tsâ xawe da ge ǂgomǃgâsiba ūhâ, Jehovab sida ǁgūtsâdi ǀkha ǂkhî ǃkhaisa. Mati da ǁnāsa a ǂan? Saxariab di tsēdi ǃnâb ge Jehovaba ǁîb kēbo-aoba ge ǂgan, îb ǀhaiǀurib tsî ǃhuniǀurib ǁnān Babilons ǃnâ hân gere sîna xu kronsa kuru. (Sax. 6:11) “ǁNā krons ge” ǂâiǂâisen xus ase nî ī, ǁîn māsenxa mā di ǃaroma. (Sax. 6:14) ǂGomǃgâsiba da ge ūhâ ǁkhā, Jehovab tātsē sida di ǁgūtsâdi ǃgom ǁaegu ǃnâ da ge ǁîba gere ǃoabade ǀuru tide ǃkhaisa. Nē ǀuniga tsēdi ǃnâ da ge ra ǃâubasen, xūn hānîǁaeb ǃnâ nî ǁgai ǂoasa. (2Tim. 3:​1, 13) Kaise ǂâiǂhansens ge ǂhâbasa tama hâ. Saora mîdi Jehovab ge Hagaib di tsēdi ǃnâ, ǁîb khoena mîba di xa ǂâi-oa re “xawe tā nēs xa ǂkhabuǂâi . . . tita sadu ǀkha hâ xuige.” (Hag. 2:​4, 5) ǂGomǃgâsiba da ge ūhâ Jehovab sida ǀkha nî hâsa ǁîb ǂâisa da ga dī o. w23.11 19 ¶20-21

Apostel Petrub di ǃnubusigu ge Elobmîsa xu ga ūǂuihe hâ, xawe i ge sida ǁîna xu nî ǁkhāǁkhāsen ga hâ. (2Tim. 3:​16, 17) Petrub gere ǃkharuǃnâ xūna ǁkhāǁkhāsens ge ra huida, î da ǁnâuǃā Jehovab sida xu ǀoasasiba ǃâubasen tama hâ ǃkhaisa. ǁÎb ge ra ǂhâba î da mâǀgai tsî dītsâ ǂhabusasiga da ga ūhâ xawe. Tae-i ǃaromas mâǀgaisa ǂhâbasa? ǀNî ǁaegu ai da ge ū da hâ ǂkhabusasiga ǃoa a ǁnā-oa ǁkhā. Xawe da ge ra dītsâ î da aiǃgû tsî sida di ǂkhabusasigu ai sîsen. Hoa da ge ǀnî ǁaegu ai ega ra ǃkhausen kai da xūna mî tsî ra dī. Xawe da ga ǀûsen tama i, ob ge Jehovaba nî huida î da aiǃgû tsî ǀnai da koro dīs xa ǃgâise dī. (1Pet. 5:10) ǃNubusigab ge ūhâ i xaweb ge Jesuba Petruba a ǁgau ǀhomxaǂgaosib ge sida a ǂkhâǃnâ ǁkhā, î da aiǃgû tsî Jehovaba ǃoaba ǀgara. w23.09 20-21 ¶2-3

Ama as ge Jesub ga Lasaruba ǂuruǂuru ǁkhā hâsa. Martas nēstēs xoas ǃnâ mî hâ i khami. Xawe Jesub ge buruxa xū-e gere dī ǂgao. ǁÎb ge ge mîmâi: ‘sa ǃgâsab ge nî khâi.’ ǁÎb ge ge mî: “tita ge khâita tsî ûita.” (Jhn. 11:​23, 25) ǁÎb ge Elob xa ǁōb tsî ûib ǂam-ai ǀgaiba māhe hâ. ǁAeroba ǃkharu hâseb ge ǂkham ǀgôaros tsî ǂkhamkhoeb tsîna ǁōra ge tsēs ai khâisa ge mā. (Luk. 7:​11-15; 8:​49-55) Xawe khoe-i hîna haga tsēde ǁō tsî sorosa ǀō tsoatsoa hâ-eb khâisa a mā ǁkhā? Lasarub nau ǃgâsas Marias ge ra ǂoa is Jesuba sī ǀhao ū. ǁÎs ge ǁkhā mîdi ǃgâsas ge mîte ra mî: “ǃKhūtse, ti ǃgâsab ge ga ǁō tama hâ, sats ga nēpa hâ hâo.” ǁÎs tsî ǁîs ǀkha hâ khoen ge kaise ǃoa hâ. (Jhn. 11:32) Jesub ge Marias tsî naun ra ā ǀgauba mû tsî a ǁnâu, ob ge kaise ge tsûaǂgao. ǁÎb di ǀhōsanab ūba hâ ǀkhomxaǂgaosib xa tsâǀkhāhe hâseb ge ge ā. ǁÎb ge ra ǁnâuǃā matikōse i a tsûtsûsasa sida a ǀnam khoe-i ga ǁō o. Amabes ǃnâb ge ǁîba, ǁîn ǁgamrona ra ǃaroma xūna ra ūbe ǂgao. w23.04 10-11 ¶12-13