Februarib

Gao-aob Hiskiab ge kaise ǀaesen hâ i, ob ge Jehovaba gere ǀkhoma îb ǂgauǂgauhe ǁkhā. Jehovab ge ǁîb ǀgoresa ge ǁnâu-am tsî ge ǂgauǂgau bi. (2 Gao. 20:​1-6) Xaweb ge Apostel Paulub tsîna Jehovaba ge ǀkhoma îb “sorosi ǃgomsiba” ūbēbahe. ǁNā i ge ǀaeba ǃoa ǀnîsi gere ǁnaeǁgau. Xaweb ge Jehovaba ǁnā ǃgomsiba Pauluba xu ge ūbē tama hâ i. (2Kor. 12:​7-9) Apostel Jakobub tsî Petrub tsîkha ge Gao-aob Herodeb xa gere ǃgamhe ǂgao. Jakobuba ge ge ǃgamhe tsîb ge Petruba buruburuxa ǀgaub ai ge sâuhe. (ǃNǃkh. 12:​1-11) ǀNîsi du ge ǂâi ǁkhā, ‘Jehovaba tae-i ǃaroma Petrub ǀguiba ge sâu?’ Elobmîs ge ǁnā-e ǁguiǃā tama hâ. Xawe ǀgui xū-i hîna da a mî ǁkhā i ge Jehovab ge a ǂgomǂgomsa. (Deu. 32:4) ǀNî ǁaegu aib ge Jehovaba sida ǀgorede ǃâubasen tama da hâ ǀgaub ai ǃeream ǁkhā. ǂGomǃgâ da ge ra Jehovab a ǂgomǂgomsa ǃkhaisa tsîb hoaǁae ǀnammi xa ra ǂkhaǃnâhesa. ǁNā-amaga da ge ǃgae tama ǁîb sida ǀgorede ra ǃeream ǀgaub xa.—Job 33:13. w23.11 21 ¶6

Jakobub ge ge xoa gā-ai khoen “mîbakaisenxa” tamas ka io hoaǁae ra ǀnâuǀnamsa. ǁNās tae-e ra ǂâibasens xa ǂâi re. ǁKhoaǂgao tsî māsenxase da ge ǁnān hînab ge Jehovaba ǂgaeǂguis aiǂhanuba a māna nî ǁnâuǀnam. Jehovab ge ǃâubasen tama î da khoe-i hîna ǁîb mîmāde ǁnâuǀnam tama-e ǁnâuǀnam. (ǃNǃkh. 4:​18-20) Khoena ǁnâuǀnams xa da ge, Jehovaba ǁnâuǀnams xa kaise supubahe ǁkhā. Hoan ǂam-aib ge Jehovaba hoaǁae ǂhanu daoǁgausa ra mā. (Psa. 19:7) Xawe khoesi ǂgaeǂgui-aogu ge ǀoasa kurusa ūhâ tama. Jehovab ge ǁgûn, khoesi ǂgaeǂgui-aogu tsî ǀhaohâb ǃûi-aogu tsîna ǂgaeǂguis aiǂhanuba ge mā. (ǂKhm. 6:20; 1Tes. 5:12; 1Pet. 2:​13, 14) ǁÎna da ga ǁnâuǀnam, o da ge Jehovaba amase ra ǁnâuǀnam. w23.10 6 ¶2-3

ǀGamǁî ǀgaub hîna da sida ǂgomsa nî ǀgaiǀgaib ge Jehovab di ǀgaib xa ǂâisa. ǁÎb ge mîmâib ge xūn hoana dīs di ǀgaiba ūhâ. Nēsab ge a dī ǁkhā Hoaǀgaixa Elob a amaga. (Job. 42:2; Mrk. 10:27; Efe. 3:20) ǁÎb ge Abrahammi tsî Saras tsîna ge mîba, ǁîra kairasis ǃnâ ra ǀgôaba nî hōsa. (Gen. 17:​15-17) ǁÎb ge Abrahammi tsîna ge mîba ǁîb surib Kanaanǃhūba nî māhesa. Abrahammi surib Israelǁîn ge ǃgāse Egipteb ǃnâ hâ i ǂgui kurigu di ǁaeb ǃnâ i ge ǀnîsi gere mûsen ǁnā mîmâis tātsē dīǀoaǀoahe tidesa. Xawe î ge ge ama kai. ǁÎb ge Marias hîna ge ao-i ǀkha ǁgoeǀhao tsâ tama hâ īs tsîna ge mîba, ǁîb di ǀgôabas nî ǁorasa. Nēs ge mîmâis hînab ge Jehovaba duisend kuriga ǃkharu tsî Eden ǃhanab ǃnâ a mîmâisa nî dīǀoaǀoa. (Gen. 3:15) Jehovab ge dī mîmâidi hoadi xa da ga ǂâi tsî matib ge ǁîde a dīǀoaǀoasa, o da ge ra ǁnâuǃā kai ǀgaibab ūhâsa. Tsîs ge sada ǂgomsa nî ǀgai, ǁîb di mîmâis ǀasa ǃhūbaib dis ǃnâ.—Jos. 23:14; Jes. 55:​10, 11. w23.04 28 ¶10-12

Jehovab ge Davib di ǀgoredi sauhes tide ge ǃeream. (1Sam. 19:​10, 18-20; 2Sam. 5:​17-25) Sida tsîn ge ǁkhā ǂgomǃgâsiba ūhâ ǁkhā. (Psa. 145:18) Jehovab ge sida ǀgorede ǃâubasen da ra ǀgaub ai ǀnîsi ǃeream tide. Paulub ge Eloba ge ǂgan, îb “tsûsa sorosi ǃgomsiba” ūbe. Paulub ge ǃnona ǃnāde nē ǃgomsiba ge ǀgoreba. Jehovaba ǁîb di ǀgorede ge ǁnâu-am? Îo, xawe î ge Paulub gere ǃâubasen ǀgaub xa ge ǀkhara i. Jehovaba ge ǃgomsiba ūbes xa ǁîba ǂhâbab hâ ǀgaiba ge mā, îb ǂgomǂgomsase ǃoaba ǀgara ǁkhā. (2Kor. 12:​7-10) Sida tsîn ge ǀnî ǁaegu ai ǃâubasen tama da hâ ǀgaub ai ǃereamsa a hō ǁkhā. ǂGomǃgâ ǁkhā da ge a Jehovab ǂansa, tae-i sida ǃaroma ǃgâisa. ǁÎb tsîn ge ‘sada ra ǂgan tsî ǂâi xūn hoan ǃgâ-ai a dība da ǁkha.’ (Efe. 3:20) ǁNā-amaga î ge sida di ǀgorede, ǃâubasen tama da hâ ǁaeb tsî ǀgaub ai a ǃeream-e ǁkhā. w23.05 8-9 ¶4-6

Hoa da ge ǃgâise ra dī, Elobmîs mîmâis hāniǁaeb khâis dis xa da ga ǁaeba xu ǁaeb ǀkha ǂâio. Tae-i ǃaroma? Tātsē da ǂan tama hâ amaga mâǁae da ǁkhōǁkhōsa ǀae-e a hō ǁkhās. Tamas ka io ǃâubasen tama da hâse ǀnam da a khoe-e a ǂoaǃnâ ǁkhāsa. (Aoǁn. 9:11; Jak. 4:​13, 14) Khâis di ǃâubasens ge a hûi da ǁkhā, i da ǁnāti-i ǃgomsin ǃnâ mâǀgai. (1Tes. 4:13) Xoadi ǃnâ da ge ra ǁapoǁapoba-e, sada ǀhomsi ǁGûb ǃgâise a ǂan da tsî kaise a ǀnam da ǃkhaisa. (Luk. 12:7) Jehova Elob ge ǃgâise a ǂan da tsî khoe-e î-i a ǀgaub ai khâisa nî mā, ǁkhā ǀgaugu tsî ǂâi di ǀkha. Jehovab ge kaise a ǀnam da tsî ge īǁkhā kai i da ǀamose ûi. ǁŌ da ga xaweb ge ǁîba khâisa nî mā da. Tae-i ǃaroma da khâis di ǃâubasens ǃnâ ǂgom ǁkhā? ǂGomǃgâsiba da ūhâ amaga Elob nēsa ge mîmâib ra ǁkhore, tura tsî ǀgaiba ūhâsa ǁî-e dīǀoaǀoasa. w23.04 8-9 ¶2-4

Josefi tsî Marias tsîn ge ǀguiba gere sîsen, î ra Jehovab ǀkha ra ūhâ ǀhōsagusisa ǀgaisase ūhâ ǀgara. ǁÎra ge ǀguiba Jehovaba omaris ase ǃoabas di ǂhâǂhâsasiba ge mû. (Luk. 2:​22-24; 4:16) Nēs ge kaise ǃgâi aiǁgausa ǃgamme hâ khoen ǃaroma. ǀGôana du ga Josefi tsî Marias khami ūhâ, o î ge ǀnîsi a ǃgom ǁkhā ǀhaode hâǃnâs tamas ka io ǁaeba omaris ǃoabas ǃgao ǁamaǂuisa. ǀNî ǁaega î ge ǀnîsi a ǃgom ǁkhā, ǃgamme hâ khoero ase ǀguiba ǁkhāǁkhāsen tamas ka io ǀgoresa. Xawe ǂâis ǃnâs tsîna ūhâ re, ǀguiba ro ga Jehovaba ǃoaba. O ro ge ǁîba ǃoa ǀgū tsî saro ǁaegus tsîna ra ǀgū. ǁNās ǀkha Jehovab ǃoabasa saro ûib ǃnâ ǂgurose ūhâ re. Tae-e du a dī ǁkhā, ǃgamme ommi ǃnâ du ga ǃgomsiga a ūhâ o? Omaris ǃoabasa ǀguiba dīs ge ǀnîsi ǃgâi tamase a mûsen ǁkhā. Ti i ga īo, o hoaro a ǁkhoaxaba xūna dī re. Nēs ge nî hui, îro saro ǀhōsagusisa ǀgaiǀgai tsî ǀguiba Jehovaba ǃoaba ǂgao. w23.05 22 ¶7-8

Eloǃaoǃgâxasiba mati Obajaba ge hui? ǂGurose Obajab ge kaise ǂhauǃnâ tsî ge ǂgomǃgâhe ǁkhā ī. ǁNās ǀkhab ge gao-aoba ǁîba oms xūn hoan ǂam-ai ge ǁgaumâi. (ǀGopeǀnō re Nehemiab 7:2.) Obajab di eloǃaoǃgâxasib ge ǁîba ǁkhoaǂgaoxasiba ge mā. ǁÎb ge eloxoresa Gao-aob Axab ǁaeb ǃnâ ge ûi hâ-i. (1Gao. 16:30) Axab di taras Isabels Baala gere ǀgoreǀîs ge Jehovaba kaise ge ǃhui hâ i. ǁÎs ge Jehovab ǃoaba-aon noordes gaosis ǃnâ gere ǁanan tsîna gere ǃgam ǂgao. Tsî ǁîs ge ǂgui kēbo-aogu Elob digu tsîna ge ǃgam. (1Gao. 18:4) Isabels ge Elob di kēbo-aoga gere ǃgam ǂgao, ob ge Obajaba 100 kēbo-aoga ū tsî “korodisiga nau ǁhoab ǃnâ gaugau tsî ǁîga ǂû-i tsî ǁgam-i tsîna gere mā.” (1Gao. 18:​13, 14) Isabels ga ǂanǂui hâ o, Obajab ge tae-e dīsa ob ge ga ǃgamhe hâ. Khoeb a amagab ge Obajaba ǁōsa gere ǃao. Obajab ge Jehovaba kaise ge ǀnam ī tsîb ge ǁîba ǁnān Jehovaba ra ǃoaban tsîna ǁîb ûib xa ǃnāsase ge ǀnam-i. w23.06 16 ¶9-10

Jehovab ge aiǃgû tsî ǁîb khoena ra daoǁgau, ǃkharuge ǁaeb ǃnâb gere dī khami. Nēsab ge Elobmîs tsî ǁîb ǀGôab ǀhaohâb danab ǃnâ-ūs tsîna ra dī. ǁGauǁgauna da a mû ǁkhā, Elob nētsēs tsîna khoega ra sîsenūsa daoǁgaude mās ǃaroma? Îo. Aiǁgause, tae-i ge 1870 a īsa ǃgaoǃgâ re. Charles Taze Russeli tsî ǁîb ǀhōsagu tsîn ge ge ǁnâuǃā mati iob 1914 na ǂhâǂhâsa kurisa Elob gaosib ǃgao. (Dan. 4:​25, 26) Nēsa ǁnâuǃās ǃaroma gu ge Elobmîs kēbode ge ôaǃnâ tsî ǂgomǃgâsiba ge ūhâ i nē kēbos nî dīǀoaǀoahesa. Jehovaba nē Elobmîs ôaǃnâsa gere daoǁgau? Îo, ǁîb ge ti ge dī. Elob Gaosib ge 1914 a ǂgaeǂgui tsoatsoasa da ge nētsē ra ī xūn ǃnâ ra mû. ǂGuro ǃhūbaib torob ge ge tsoatsoa tsî i ge ǁnāpaxu ǂhīǀaegu, ǃhūǂgubigu tsî ǂûn ǃnūbusigu tsîna ge hâ tsoatsoa. (Luk. 21:​10, 11) Jehovab ge amase ǁnā ǂgomǂgomsa-aoga gere sîsenū ǁîb khoena huis ǃaroma. w24.02 22 ¶11

Jehovab khoen ase da ge a ǂan ǁîb a ǀnamdasa. Tsîb ǃgâi ûiba da nî ūhâsa ǂhâba hâsa. (Rom. 8:​35-39) ǂGoms tsîna da ge ra dī Elobmîs daoǁgaude da ga ǀnam, o da hoaǁae ǃgâiba ra hōsa. (Jes. 48:​17, 18) Xawe tae-e da nî dī ǃâubasen tama da hâ ǃgomsina da ga hōǃâ o? Aiǁgause, ǀnîsi da ge omaris ǁani-i xa ǀnî ǀgau-i ǃnâ tsûtsûhe hâ. ǁKhōǁkhōsa ǀae-i tsîna da ge a ūhâ ǁkhā, hîna a ǃaroma ǁkhā-e î da tā ǃnāsa-e Jehovab ǃoabas ǃnâ dī. Tsūkēǃgâb xa ǃaromahe hâ ǃgomsin tsîna da ge a hōǃâ ǁkhā. Tamas ka io da ge sada di ǂgoms ǃaroma a ǃgôaǃgonhe ǁkhā. Nēti-ī ǃâitsâna da ga ǃkharuǃnâ, o da ge ǀnîsi ra dîsen: ‘Tae-i ǃaromas nēsa tita ǀkhā ra ī? Tsū xū-e da ge dī? Nē ǃgomsina Jehovab xa da ǀkhaehe tama hâ di ra ǂâibasen?’ Nē ǀgaub ǃnâ nēti ǂâi tsâ î du ge hâ i? ǁNāti i ga īo, o tā ǂkhabuǂâi. ǂGui ǂgomǂgomsa ǃoaba-aon Jehovab din ge ǁkhā tsâsiga gere hōǃâ.—Psa. 22:​1, 2; Hab. 1:​2, 3. w23.04 14 ¶1-2

ǃÂitsâhe da ga, o da ge xū-i hîna sada ǀhōsagusis Elob ǀkha da ūhâsa nî ǁgaiǁgai-e dī tamas ka io ǂâi tide. Jehovab ge ra ǃâubasen, î da “ǂgaob hoaba xu ǁnâuǀnam.” (Rom. 6:17) ǁÎb daoǁgaus ge hoaǁae sida ǃaroma a ǃgâi. Tsî da ge ǁîb daoǁgaude a dawa ǁoa. (Jes. 48:​17, 18; 1Kor. 6:​9, 10) ǁGâuab ge sorosise tsî ǃgam tsâsigu tsîna ra sîsenū tsî ra ǂkhabu kai da. ǁÎb ge ra “hapu” da ǂgao îb Jehovab ǀkha da ūhâ ǀhōsagusisa dīkākā. (1Pet. 5:8) ǂGurokam ǁaeb Xristeǁîn ge ǃkhâikhomhe, ǂnauhe tsî ge ǃgamhe ǁîn ge mâǀgai ǃkhais ǃaroma. (ǃNǃkh. 5:​27, 28, 40; 7:​54-60) ǁGâuab ge nētsē ra aiǃgû ǃgôaǃgonsa sîsenūsa. Russiab tsî ǀkhara ǃhūgu ǃnâs tsîna da ge nēsa ra mû. ǁÎn sida ǃgâsana ǁgaise ra mâǃoa amaga. Xawe nēs tsîna da ge ǃhūbaib ǂhawase ra mû. Mâǃoa-aon ǀnî hâ ǀgaugu ǃnâ sida ǃgâsana ra ǃgôaǃgon amaga. ǁGâuab ge ‘ǀapena’ ra sîsenū îb ǁnāǂamda.—Efe. 6:11. w23.07 15-16 ¶6-9

Elobmîsa du ra ǁkhāǁkhāsen khami i ge, Jehovaba du ūba hâ ǀnamma nî kai. ǁNā ǀnammi ge ge ǂkhâǃnâ du, î du ǁkhāǁkhāsen du ra xūna ûiǂui. Tsî du ge ǃgâi mîǁguiga Elobmis daoǁgaudi ǃoagu gere dī. Sadu di ǂūb tsî dī du ra xūn tsîna du ge ge dawa, Eloba du ra ǂkhîǂkhî ǂgao amaga. ǂKhari ǀgôaro i ǁî-i di ǀnamǀnamsa ǁgû-e ra ǁgae, khami du ge sadu tsîna sadu ǀhomsi ǁGûba ra ǁgae. (Efe. 5:​1, 2) ǀNîsi da ge a dîsen ǁkhā: ‘Jehovaba ta ūhâba hâ ǀnama, nēsi a ǀgaisa Xristeǁî kai ta nîs aiǃâ ta ge ūhâ ib xa? Ti ǁāǁnâs khaoǃgâ ta ǃnâsase Jehovab khami ǂâi tsî xūna ra dī—ǃgōsase ti ǃgâsana ǀnama ǁgausa?’ ‘Sadu ge ūhâ i ǂguro ǀnammi’ ga ǃkhaiǁnâ o, o tā ǂkhabuǂâi re. ǁKhā xū-i ge ǂgurokam ǁaeb Xristeǁîn ǀkha ge ī. Jesub ge ǁîna ge ǂhābe tama hâ i, tsîb ge sida tsîna ǂhābe tite. (J.ǂHa. 2:​4, 7) Elobmîsa da ge ǂgurose ǁkhāǁkhāsen tsoatsoa, o da ge ūhâ i ǀnamma da ge ǁkhapa a omkhâi ǁkhā. w23.07 8 ¶2-3

Apostel Petrub ge ǂguiǃnāde ge dīsā tsî ǁnās xa ǃaromahe hâse kai ǁoreba ge dī. ǂGuroseb ge Petruba kaise ǂgomǃgâsen tsî gere koasen, nau apostelgu ga Jesuba ǁnāxuǃgâ xaweb ǂgomǂgomsase nî hâ ǀgarasa. (Mrk. 14:​27-29) ǀGamǁîse, Getsemane ǃhanab ǃnâb ge Petruba ǃnās hoasa Jesub ge ǂkhaikari hâ i ǀgore ti gere mî xawe gere ǁom. (Mrk. 14:​32, 37-41) Kai ǂnubis khoen ge gôagu tsî ǃhôadi ǀkha ge hā, în Jesuba ǃkhō, ob ge Petruba ge ǃkhoe. (Mrk. 14:50) ǀAms aib ge Petruba Jesuba ǃnona ǃnāde ge ǀūxu tsî ge mîǁgui ǁîbab a ǀūsa. (Mrk. 14:​66-71) Petruba tae-e ge dī kai ǁorebab dī hâ ǃkhaisab ge ǂâihō o? ǀHapitsâsen tsîb ge kaise tsûsase ge ā. (Mrk. 14:72) ǁÎb dīsān ǃaroma ǁnama bi tama i tsîb ge Jesuba Petruba ge mîba kai ǁgaumâiteb nî hōsa. (Jhn. 21:​15-17) Petrub ge ge ǂan i kai ǁorebab ge dīsa xaweb ge ge ǀû tama hâ i ǃgâiba dīsa. Tae-i ǃaroma? ǁÎb ge ǂgomǃgâsiba ge ūhâ i Jesub noxopa a ǀnambisa. Tae-e da ra ǁkhāǁkhāsen? Jehovab ge ǂhâba hâ î da ǁîb ǀnammi tsî ǀûbab ǃnâ ǂgomǃgâsiba ūhâ.—Rom. 8:​38, 39. w24.03 18-19 ¶13-15

ǃGâi tama hâ ǁgoe-ūgu ǀgaugu ge taoba a ǃaroma ǁkhā. ǁGaise a tsâ kai du ǁkhā tsî ǂhâbasa tama hâ ǀgamǀkhān tsî omaridi tsîna a ǀgora ǁkhā. Amase î ge nî gā-ai gâre khoes di ǁkhauǂûisa ūǃoa tamaisa. ǃGâi tama hâ ǁgoe-ūgun ǃnâ ra ǁhao khoen ge gāgāsise ǀgui ǁō tama hâ. Xawen ge ǃgaman ǁkhā a ǀaegu tsîna a hōǁkhā. (ǂKhm. 7:23) ǂKhoamîdi 9ǁî danaǃâs di 18ǁî ǁaraǃās ge saorase ra ǀam: ‘ǁÎs ǁkhausaben ǃgamse ǁōhân hâǃkhaib ǃnâ hâ.’ Tae-i ǃaroman ǂgui khoena, ǁîs di gāxaǃnâ ǁkhauǂuisa ra ūǃoa hîna kai tsûba ra ǃaromasa? (ǂKhm. 9:​13-18) ǀGui kai xū-i hîna da nî ǂgōsen î ge, ǀōǀkhā khoena ūhâ xūna kōsa. ǀNî khoen ge ra ǂâi ǀōǀkhā khoen xūna kōs ge tsū tama di. Xawe î ge ǀōǀkhā khoen xūna kōsa, khoena a tsûtsû ǁkhā tsî ǃgôasiba a ǂoaǃnâ kâisen ǁkhā. Tsî du ge nau khoen tsîna ǃgôasiba ūhâba tide, kaise î ge a ǃgom nē xūna kō ǀûsa. ǀŌǀkhā khoen ai-īsigu ge khoen di ǂkhûdi ǃnâ ra hâ ǀgara tsî ǃgomse ra ǀuruhe. Tsî ǃnāsa î ge ǀōǀkhā khoen xūna kōs ge sida ǃnâ hâ, ǃgâi tama turaga ǃgam tama xawe ra ûi-ûi. (Kol. 3:5; Jak. 1:​14, 15) Îo, nē xūna ra kō khoen ge ǃgâi tama hâ ǁgoe-ūgun ǃnâ ra ǁhao. w23.06 23 ¶10-11

Nau ǁaedi ga ǀnî ǁaegu ai Anglo-Amerikaba mâǃoa, xawen ge ǁîba ǃkhōǃkhuni tide. Nēsa da ge a ǂan “ǀuis” hîna ǂaira ra dīkākās Elob di Gaosiba ra ǂnûǁkhaebasa. ǁNā ai-īsib hîna Anglo-Amerikaba ra ǁgauǂûiba. (Dan. 2:​34, 35, 44, 45) ǂGomǃgâ î du ra Danieli di kēbos, ǂaidi ǀurib tsî ǂgoab xa hâs a amasa? ǁNāti i ga ī, os ge ǁnāsa sadu ûiba du ra ûi ǀgauba nî tsâǀkhā. ǀGūǁae nî dīkākāhe ǃhūbaib ǃnâ du ge ǃkhūsiba ôa tide. (Luk. 12:​16-21; 1Jhn. 2:​15-17) Nē kēbosa ǁnâuǃās tsîn ge nî hui da, î da aoǁnâ tsî ǁkhāǁkhās ǂhâǂhâsasiba mû. (Mat. 6:33; 28:​18-20) Nē kēbosa du ga ǁkhāǁkhāsen toa o, tae i ǃaroma du dîsen tama hâ: ‘Dī ta ra mîǁgui ga ra ǁgau ǂgomǃgâsiba ta ūhâsa, Elob Gaosib ǀgūǁae khoesi gaosigu hoaga nî dīkākāsa?’ w23.08 11 ¶13-14

ǃGamǃgamsenxa tsî mûǂan, ǀnîsi du nēsi ra dī ǂgao xūn hoana du a dīǁoasa, sadu kurin, ǂurusib tsî mâsigu xa ǃaromahe hâse. Barsiliab mâhe hâ-i khami ī aiǂhanuga du ga māhe o, māsenxase hî-î ti mî re, sadu ǂurusib tamas ka io kurin ga ǁgaumâisa dīsa ǃgom kai o. (2Sam. 19:​35, 36) Moseb khami huiba ūǃoa tsî nau khoena ǂhâbasa i ga o, ǁgaumâite mā re. (Eks. 18:​21, 22) ǁNāti i ǃgamǃgamsenxasib ge nî ǁkhae da, sīǃnâǁoa da a ǃâubasena mâibasensa xu. Naun ra dī ǁgai mîǁguigu ǃaroma da ge ǃereamsa tani tide. Nau khoena da ge mîǁguiga a dība ǁoa, tamas ka io da ge ǁîn ra dī ǁgai mîǁguigu xa ǃaroma-e hâ xūna xu hoaǁae a sâu nî ǁoa. Aiǁgause, i ge ǀgôab tamas ka io ǀgôasa ǀnîsi a mîǁgui ǁkhā, Jehovaba î go ǃoaba ǀû ti. ǁNā mîǁguib ge kai tsûba ǁgûra ai a hau ǁkhā. Xawe ǁgûn hîna ǁîn ǀgôan ge dī ǃgâi tama mîǁguigu ǃgao ra ǀhapitsâsenan ge kaise ǃgoma ra ǁgui-aisen. Jehovab ge ǃâubasen tama hâ în ǁîna ǁnā ǃgomsiba tani. w23.08 29 ¶11-12

Simsonni ge sida khami ǀoasa kurusa ge ūhâ tama hâ i. Tsîb ge ǀnî ǁaegu ai ǃgâi tama mîǁguiga ge dī. ǀGui mîǁguib hînab ge dīb ge ǃgâi tama ǀamǂoasa ge hau. ǂHanuǂhanu-aob aseb ǁaeroba ǂgaeǂgui hâ hînab ge Simsonna, “Delila ti ǀon hâ khoes Sorekǃgoaǃnāb ǃnâ ge ǁan hâ isa ge ǀnam.” Aiǃâb ge ǀnai Simsonna Filisteǁî khoesab nî ǃgammesa ge mîmâi hâ i. Xawe ǁnā ǃgaeǁaes ge Jehovaba xu ge hâ i. “ǃKhūb ge Filisteǁîn ǃoagub nî ǃkham soa-e gere ôa xui-ao.” Egab ge Simsonna ǀai-aos di oms ǃnâ gere hâ, Filisteǁîn ǃās Gasas ǃnâ. ǁNā ǃnās aib ge Eloba Simsonna ge ǀgaiǀgai îb ǁnā ǃās di dao-amde tani bē tsî ǃāsa ǂkhabu kai. (ǂHǂh. 14:​1-4; 16:​1-3) Delilas ǀkha î ge ge ǀkhara i, ǁîs ge ǀnîsi Israelǁî i amaga. Delilas ge kai mari-e Filisteǁîna xu ge ǃkhōǃoa îs Simsonna ǀapexū. w23.09 5 ¶12-13

ǁNâuǃāxasib ge a huida ǁkhā î da tsamtsiǃnâsiba ūhâ. ǁNâuǃāxa khoe-i ge ra ǃkhō-oasen khoe-i ga ǃgâi tama dîna ǁî-i di ǂgoms xa a dî o. Nē aiǁgaus xa ǂâi re, ǃkhoaba da ga mû, o da ge ǁgami ǀgapiga hâ ǃârob ǀguiba ra mû. Xawe i ge nau kai ǃâb hoaba ǁgammi ǃnāka hâ. ǁNās ǁkhās khamin ge ǃnāsa ǁaeban ga khoena dîna a dî da o, mîba da tama hâ tae-i ǃaroman ǁnā dîna ra dîsa. ǁNā-amaga da ge ǃeream da nîs aiǃâ nî mûǂan, ǁnā khoe-i go dîsa a dîba ǃaromasa da a ǀūsa. (ǂKhm. 16:23) Gideonni ge mati Efraimǁî khoega a ǃeream ǀgauba ǃgaoǃgâ re. ǁÎgu ge ǁaixa hâse Gideonna ge dî tae-i ǃaromab ge ǀnai ǁîga ǁkhau tama hâ isa, î gu Israelǁaes di khākhoen ǃoagu ǃkham. Tae-i ǃaroma gu ge ǁnātikōse ǁaixa hâ i? ǀGapiǂâixasiba ǀnîsi ge ī? Tae-i ǀgui-i ge ī xaweb ge Gideonna ǁnâuǃāxa ǃgôasiba ǁgau tsî tsamtsiǃnâsib ǀkha ge ǃeream. ǀAmǂoasa ge tae-ī? ǁÎgu ge “ǃaruǀî ǁâixa tama ge i.”—ǂHǂh. 8:​1-3. w23.09 16 ¶8-9

Jehovab tsî Jesub tsîn ge kai ǀnamma ūba gu hâ, ǀgôab tsî dadasab ǁaegu a hâ ǁkhāba. Jesub ge ǃhūbaib ai gere hōǃâ ǃgomsinab gere mû, ob ge kaise gere tsûaǂgao. ǀGôa-e ǁōb ǃnâ ǂoaǃnâ hâ ǁgû-i ge ǃgâise a ǂan, ǀgôa-e ǂoaǃnâs ra hau ǃoab tsâsiba. ǀGaisa ǂgomsa da ge khâis ǃnâ ūhâ, xawes ge ǁnāsa khoe-i ga ǁō, o da ra hōǃâ tsûba ūbē tama. Nē aiǁgaus ge ra hui da î da ǁnâuǃā Jehovab ge mati gere tsâ ǃkhaisa, ǁîb ǀnamǀnamsa ǀGôab ge 33ǁî kuri tsâ tsî a ǁōsab ge mû o. (Mat. 3:17) Jesub di ǁōb ǂâiǂâisensa du ǃâu hâ ǁaeb ǃnâ, Elobmîsa aitsama ôaǃnâ tamas ka io omaris ǃoabas ǃnâ ǃnāsase xoremarib xa ǁkhāǁkhāsen re. Jesub di ǁōb ǂâiǂâisens tsēs ai tā ǀuru re ǀō-aisa ǁgoas ǃoabasa kēsa. Sida ǂgaoga da ga Jesub di ǁōb ǂâiǂâisens ǃaroma aiǂhumi, o da ge nauna a hui ǁkhā în nēsa xu ǃgâiba ǀama.—Esr. 7:10. w24.01 11 ¶10-12

ǀGui ǀgaub hîna da Jehovaba xu ǀgaiba ra hōb ge, ǁîba ǀgores ǃnâ-ū ǀgūsa. Sida ǀgorede ǁnâu-ams ǃnâ-ūb ge Jehovaba “kai ǀgaiba” mā da ǁkhā. (2Kor. 4:7) Sida tsîn ge nî ǀgaiǀgaihe, Elobmîsa khomai tsî da ga ǂâiǃgâ o. (Psa. 86:11) Jehovab di haisi-ams hîna Elobmîs ǃnâ hâs ge sida ‘ǀgaiba’ ra mā. (Heb. 4:12) Jehovaba ǃoa ǀgore tsî du ga ǁîb mîsa khomai, o du ge ǂhâ du hâ ǀgaiba nî hō tsî sadu ǂkhîba nî ūhâ ǀgara, ǃgom ǁgaumâisa dīǀoaǀoas ǃnâ. ǃGaoǃgâ re matib ge Jehovaba ǁîb kēbo-aob Jonaba ǀgaiǀgai ǀgausa. Jonab ge Jehovab ge mābi ǁgaumâisa xu ge ǃkhoe. Tsî nēs xa ǃaromahe hâse î ge ǁîb ǀkha ge ǂgaub ǃnâ hâ î gu tsîna ge ǁō ǁkhā. ǂGauba xub ge aoǁnâhe, ob ge kai ǁaub xa ge hara-e. Tae-eb ge Jonaba dī, îb ǀgaiba hō, ǀguritsâsen i gere ǁaeb ai? ǁÎb ge Jehovaba ǃoa ge ǀgore.—Jon. 2:​1, 2, 7. w23.10 13 ¶4-6

Apostel Petrub ge nē sîǂkhanide ǁnā ǁaeb ǃnâ ge ûi hâ i Xristeǁîna ǃoa ge xoa. Xaweb ge Jehovaba ǁîb mîs ǃnâ nē sîǂkhanide ge ǃkhōǂgā. ǁNā-amaga da ge ǁîde xu ǃgâiba a hō ǁkhā. (Rom. 15:4) Nē ǃhūbaib ǃnâ da ge Elobmîs kēbodi ǃnâ ǂgom tama khoen ǁaegu ûi hâ. Maǃoa-aon ge ra mîǁgaiǁgai da ǂgao, ǂgui kuriga da ǀams nî hāsa ra mî xawe î noxoba hā tama hâ amaga. ǂGui maǃoa-aon ge ra mî ǀams tātsē hā tidesa. (2Pet. 3:​3, 4) Nēti-i xūna da ga aoǁnâba da ra khoena xu ǁnâu, os ge sida ǂgomsa ǂkhabu ǁkhā. Petrub ge tae-i a huida ǁkhāsa ra ǁguiǃā. ǀNîn ǃaroma i ge mûsen ǁkhā, Jehovab a ǂausa nē eloxoresa ǃhūbaiba dīkākāsa. Petrub di mîdi ge ra hōhōǃnâ da, Jehovab mûǂui ǀgaub ǁaeb dib khoen diba xu ra ǀkharasa. (2Pet. 3:​8, 9) Jehovab ǃoagu î ge duisend kuriga, ǀguitsēs khami ī. Elob ge a ǃnūǃnâxa tsîb ge khoe-i nî dīkākāhesa ǂgao tama ǁîb tsēs ga hā, o î ge nē ǃhūbaiba nî ǀam. w23.09 26-27 ¶2-5

Tae-i ǃaromab ge apostel Pauluba ǁîb sîǂkhanisa, Judiab ǃnâ ra hâ Hebre Xristeǁîna ǃoa xoa? ǀGam ǃaroma ra ge hâ: ǂGurose ǁîna ǂkhâǃnâs ǃaroma. Xristeǁî kain nîs aiǃân ge ǂguina Jodeǁî ǂgomsa gere sao. Xristeǁî kain ge, on ge ǁîn Jodeǁî ǂgaeǂgui-aon xa gere ǃhōhe. Tae-i ǃaroma? Xristeǁîn ge ǁguiban nî altar-i, ǃoaba ǃnân nî tempel-i tsî ǂgaeǂguin nî pristeri tsîna ūhâ tama hâ i amaga. Nēn xa ǃaromahe hâsen ge Xristub saosabena gere ǂkhapuǂâi tsî î ge ǁîn ǂgomsa gere ǂkhapu. (Heb. 3:​12, 14) ǀNîn ge Jodeǁî ǂgomsa ǃoa-oasa gere ǂâiǃgâ. ǀGamǁîseb ge Pauluba ǁnā Hebre Xristeǁîna ge mîba, ǁîn ǁguiǂgāsen tsî ǀasa tamas ka io “ǀgaisa ǂû-i” Elobmîs ǃnâ hâ ǃgam gagasi ǁkhāǁkhāde ǁnâuǃā tamasa. (Heb. 5:​11-14) ǃGāsa i ge a ǂguin ge noxopa Moseb ǂhanuba gere saosa. w23.10 24-25 ¶3-4

ǀNî ǃgâsadi ge ra mîǁgui, ǃgamme tamase hâsa. (Mat. 19:​10-12) ǂÂis ǃnâ ūhâ re Jehovab tsî Jesub tsîn ge ǃgamme tama hâ Xristeǁîna ǃgôaǁnâ tama. ǃHūbaib ǂhabase i ge ǃgamme tama ǃgâsade kai ǀkhaeb ase i ǀhaohâgu ǃnâ. Nauna di ǀnam tsîra tsâba amaga di ge ǂguina ǃgâsadi tsî ǁgûdi ase ība. (Mrk. 10: 19, 30) ǀOasase du ge Jehovaba ǃoaba ǁkhā. Xristeǁî ǃgâsadi ge ǃhūbaib ǂhabase ǃnāsase aoǁnâ sîsen-e ra dī. (Psa. 68:11) Nēsis ge a ǀapeǁgui ǁkhā ǀoasase aoǁnâ sîsen-e dī, ǁnaetisa aimâba-ao kai tsî om sîsengu ǀkha hui tamas ka io Betels tawa sī ǃoabasa. Sas go dī mîǁguib xa ǀgore re. ǃGâsan hîna ge ǁnāti ī mîǁguiba sīǃnân ǀkha ǃhoa re. Tsî ǂanǂui tae-es nî dīs a ǂhâbasasa ǀoasase ǃoabas ǃaroma. Tsî ǁnāpaxu sīǃnâ hōs nî ǀapeǁguiba dī re. ǀOasases ga ǃoaba tsoatsoa, os ge ǂgui aiǂhanuga Jehovab di ǀapeǂhumis ǃnâ a ūhâ ǁkhā. w23.12 22 ¶16-17

Kai ǁgâiǀāb ra ǀgū khami da ge nēsi ǃnāsase ra mûǂan ǂhâǂhâsasib, Jesub di mîmās aoǁnâ sîsenni ǃnâ ǃâ-e ūhâsa ǁnâuǀnamsa. Xawe i ge ǀnî ǁaegu ai a ǃgom ǁkhā sida ǂâisa aoǁnâ sîsenni ai ǂnûisa mari ǃgomsina da ga ūhâ tamas ka io i ga aoǁnâ sîsenne mâǃoahe o. Tae-e a hui da ǁkhā î da Gaosib ǂhâsiba aisi mâi? ǂGomǃgâsiba da ge ūhâ ‘ǃKhūb Hoaǀgaixab’ sida ǀkha hâsa. Gaosib ǂhâsiba da ga sida dib xa ais ai mâi, ob ge aiǃgû tsî nî ǂkhâǃnâ da. ǁNā-amaga da ge ǃao da nî xū-e ūhâ tama hâ. (Hag. 2:4) Jehovab ge ǂhâba hâ î da ûiga ra sâu sîsenni, ǁkhāǁkhāsabedīs di i ai ǂâisa ǂnûi. Hagaib ge Jehovab khoena ge ǀkhoma, în ǀasase ǁîn ǃoabasa tsoatsoa, tempeli di ǃgaoǃgaoban ra tsoatsoas ǁkhās khami. ǁNāsan ga dī, ob ge Jehovaba ra mîmâiba nî ‘ǀkhaebab’ nî sîba nî ǃkhaisa. (Hag. 2:​18, 19) Sida tsîn ge ǂgomǃgâsiba ūhâ Jehovab sida tsîna nî ǀkhaesa, ǁgaumâihe da hâ sîsenne da ga sida ûigu ǃnâ ǂgurose mâi o. w23.11 16 ¶8; 17 ¶11

Romeǁîna ǃoab ge xoa sîǂkhanis ǃnâb ge apostel Pauluba ge mî, hoa khoen a ǁore-ao ti. ǁNās ǀkhab Eloba mati sida ǂhanu-ai khoen ase mû ǁkhā? ǁNā dîsa ǃereams ǃaromab ge Pauluba, Abrahamma ǃoa ge ǁnaeǁgau. Jehovab ge Abrahamma Kanaanǃhūb ǃnâb ra hâ hîna ǂhanu-ai khoeb ase ǀnai ge mû. Jehovab ge Abrahamma ǂhanu-ai ti ge ǂgai tama hâ i, Moseb ǂhanubab gere ǁnâuǀnam ǃkhais ǃaroma. ǁNāsa da mati a ǂan? (Rom. 4:13) Jehovab ge Abrahamma ǂhanu-ai khoeb ase a ǂgai ǁaeb aib ge Moseb ǂhanuba noxopa ge hâ tama hâ i. Nē ǂhanub ge 400 kurigu khaoǃgâ ǀgui ge hā. ǁNās ǀkha tae-i ai ǁgauǁgau hâseb ge Jehovaba Abrahamma ǂhanu-ai ti ǂgai? Jehovab ge ǀkhomxaǂgaosib di Elob ase, Abrahamma ǁîb ǂgoms ai kō hâse ǁîba ǂhanu-ai khoeb ase ge mû.—Rom. 4:​2-4. w23.12 3 ¶4-5

ǁNā tsuxub ǁkhāb ǃnâb ge Jehovaba, Natana ge mîba Davib tempela om tidesa. Xawe i ǁîb ǀgôagu di ǀguiba ǁnāsa nî dīsa. (1Kro. 17:​3, 4, 11, 12) Daviba mati ge tanisen ne haisi-amsab ge hō o?. Mari-e ǀhaoǀhao tsîb ge ǁîb ǀgôab om sîsen-i ǃaroma nî ǂhâ xūn ai ǁîb ǂâisa ge ǂnûi. (1Kro. 29:​1-5) Jehovab ge Davib ǁîb tempela om tide di a mî toas khaoǃgâb ge, ǁkhā ǁaeb ǃnâ ǁîb ǀkha ǃgaeǁaesa ge dī. Jehovab ge Daviba ge mîmaiba, ǁîb suriba xu ra hā khoe-i ge ǀamosib kose ni ǂgaeǂgui. (2 Sam. 7:16) ǀAsa ǃhuibaib, Jesub di 1 000 kurigu di ǂgaeǂguis ǃnâb ge Daviba kaise nî ǃgâiaǂgao ǁkhāǁkhāsen nî gara o Gao-aob Jesub ǁîb di suriba xu hâsa. Nē ǃnaeǃkhais ge ra hui da, î da mûǂân. Jehovaba da ra dība ǂgao xūn hoana da ga dī ǁoa. Xaweb ge sada Eloba, ǃâubasen tama da hâ ǀkhara ǀkhaega a mā da ǁkhāsa. w23.04 16 ¶8-10

ǀNî ǃâgu Elobmîs diga khomais ge nî ǁkhaeǂgao du. Aiǁgause du ge ǁkhaeǂgaosa Jobi, Psalmdi tsî ǂKhoamîdi ǂkhinide khomais ǃnâ-ū a hō ǁkhā. Jesub mîdi Mateub 6ǁî danaǃâs ǃnâ xoasa di ǃnâs tsîna. Jehovaba ǃoa ǀgore tsî du ga ǁîb Mîsa khomai, o du ge ǁîb ǁkhaeǂgaosa nî hōǃâ. ǂGomǃgâsiba da ge ūhâ ǁkhā, Jehovab hoaǁae ǃgomǁaegu ǃnâ nî hâba dasa. Tsî da ge tātsē ǀguri hâ tide. (Psa. 23:4) Jehovab ge ra mîmâi sâu, ǁapoǁapo, ǂkhâǃnâ tsîb nî ǁkhaeǂgao da ǃkhaisa. Jehovab xas ge Jesajab 26:3 sa ra mî: “Sats ai ra ǂgomaiǂnûina ǂkhîb ǃnâ ǃkhōǀgara, satsan ra ǂgomǃgâ xuige.” ǁNā-amaga Jehovab ǃnâ ǂgom ǀgara, its ǁîb ra mā huiba xu ǃgâiba ǀama. Nēsa du ga dī, o du ge ǀgaiba hō tsî ǃgom ǁaegu ǃnâ mâǀgai ǁkhā. w24.01 25 ¶16-17

Nētsēs xoas ǃnâ hâ mîdi, ǁnā kēbos didi ge nēsi ra dīǀoaǀoahe. Sao ra ǁkhaeǂgaos mîdi ge sida ǁaeb ǃnâs tsîna ra sîsenūhe: “Sa ôagu hoagu ge ǃKhūb xa nî ǁgauǃnâhe tsî sa ôan di ǂûtanib ge nî kai. ǂHanu-aisib ǃnâs ge nî ǃgaoǃgaohe . . ǃaos tide xui-ao, tsî ǃaorosasib ge sas tawa ǀgūse hā tide.” (Jes. 54:​13, 14) Nē ‘ǃhūbaib di elob’ ǁGâuab tsîn ge Jehovab di ǁgauǃnâs sîsen-e ǀam kai tide. (2Kor. 4:4) Ama ǃoabas ge ge ǀasa kaihe tsî i ge tātsēs tsîna ǁgaoǁgaohe tide. Nēs ge ǀamosib kōse nî hâhâ. Sada ǃoagu ra sîhe ǃkham gôagu ge ǃgâiǃgâ tide. w24.02 4 ¶10

Xristeǁîn ase da ge sida māǁnâsens mîǁguiba ǂhâǂhâsase ra mû. Sida omaridi ǃaroma da ra dī mîǁguigu tsî tanisen ǀgaub ge nēsa ra tsâǀkhā. ǃGarise da ge ra sîsen sida omaride kōǃgâs ǃnâ xawe da ge tātsē sida omaris turaga Jehovab ra ǂgaoǀkhā xūn ǂamai mâi tama. (Mat. 10:​35-36; 1Tim. 5:8) ǀNî ǁaegu ai da ge sida omaris khoena ǂkhîǂkhî tama xawe da ge Jehovaba ra ǂkhîǂkhî mîǁguiga a dī ǁkhā. Jehovab ge omarisa ge ǂnûiǂgā tsîb ge ǂhâba hâ î da ǂkhîsa omarisa ūhâ. (Efe. 3:​14, 15) Ama ǂkhîba da ga ra hōǃâ ǂgao, o da ge Jehovab ra ǂgaoǀkhā da xūna nî dī. ǂÂis ǃnâ ūhâ re Jehovab māsenxase du ra dī xūna ra ǃgôaǃgâ ǃkhaisa, sadu omaride kōǃgâ tsî du ǁîna ǀnammi tsî ǃgôaǃgâsiba ra ǁgau o.—Rom. 12:10. w24.02 18 ¶11, 13