Maarti

Ama as ge ǀasa ǃhūbaib ge noxoba hā tama. Xawe ǀnî xūn hîna nēba hân xa ǂâi re. Aiǁgause ǀgamirodi, hain, xamanin tsî sadu ǀgū khoen. ǀGui khoe-i tsîn ge îganǀgē tide nē xūn hoan a ama ǃkhaisa. Nē xūn ge ǀkhai i ǁaeb tsîn ge hâ i xawe. Jehovab ge ǁîna a kuru amaga ǀguin ge nēsi nēba hâ. (Gen. 1:​1, 26, 27) Sada Elob ge ǀasa ǃhūbaibab nî kuru tis tsîna ge mîmâi. ǁÎb ge ǁnā mîmâisa nî dīǀoaǀoa. ǀAsa ǃhūbaib ǃnân ge khoena ǀam-e ūhâ tama ûiba ǀoasa ǂurusib ǀkha nî ūhâ. ǂGomǃgâ ǁkhā da ge a ǀasa ǃhūbaib Elob mîǁgui hâ ǁaeb ai nî ǀkhīsa. (Jes. 65:17; J.ǂHa. 21:​3, 4) Nē ǁaeb ǃnâ ǁkhā du a i hoa-e dī tsî sadu, Jehovaba ǃoa ra ǀgū kai du xūna dī re. ǁNāsa du ga dī, o du ge ǁnān “ǂgoms tsî ǃnūǃnâxasib” ǃnâ-ū ge Elob mîmâi hâ xūna a ǀumin ǁaegu nî hâ.—Heb. 6:​11, 12. w23.04 31 ¶18-19

Jesub ge ǀhomma ǃoa kō tsî ge ǀgore. ǁÎb ge saorase nî ī xū-i xa Jehovaba hoa koasa ra mâ ǂgao. Tsîb ge Jesuba ǃgari dommi ǀkha ge ǂgai: “Lasarutse, ǂoaxa!” (Jhn. 11:43) Tsîb ge Lasaruba ǀhobasa xu ge ǃgû ǂoa. Jesub ge ǀnîn īǁoa tide ti ge ǂâi xū-e ge dī. Nē ǃnaeǃkhais ge, sida ǂgomsa khâis ǃnâ ra ǀgaiǀgai. Mâ ǀgaub ǃnâ? ǂÂi oa re Jesub ge Martasa ge mîmâiba: ‘Sa ǃgâsab ge nî khâi.’ (Jhn. 11:23) ǁÎb ǁgûb khamib ge Jesuba turab tsî ǀgaib tsîna ūhâ, ǁnā mîmâisa dīǀoaǀoasa. ǁÎb ǁgamron ge ra ǁgau, ǀgaisa turabab ūhâsa khoena ǁōba xu khâisa māsa. Tsî ǁōb ra ǃaroma tsûb tsîna ūbēsa. Tsî Lasarub ge ǀhobasa xu a ǃgû ǂoas ge ra ǁgau, Jesub ge ǀgaiba ūhâsa ǁōhâna khâisa māsa. Jesub ge Martasa a ǂâiǂâiǃnâ xū-i xas tsîna ǂâi re nētsēs xoas ǃnâ. ǃGâi ǃaromade da ge ūhâ ǂgomsa, Elob ǁîb mîmâide nî dīǀoaǀoasa ǁōhâna khâisa māsa. w23.04 11-12 ¶15-16

Jehovab di ǂâisa da ǃnāsase ra mûǃā khami da ge ǀgoreba da ra xūna nî dawa. ǂÂis ǃnâ da ge nî ūhâ, Jehovab ge ǂâibasensa ūhâ ǁîb ǁaeb aib nî dīǀoaǀoasa. ǁNā ǂâibasens ge hoaragase tsî ǀamosib kōse nēstē tsûba ra ǃaroma xūna ūbesa. Nēn ge tsūkēǃgâgu, ǀaegu tsî ǁōb tsîna ǃkhōǂgā hâ. Jehovab ge ǁîb di Gaosib ǃnâ-ū ǁnā ǂâibasensa nî dīǀoaǀoa. (Dan. 2:44; J.ǂHa. 21:​3, 4) Xawe ǁnā ǁaeb nî hās kōseb ge Jehovaba ǁGâuaba mā-am hâ îb ǃhūbaiba ǂgaeǂgui. (Jhn. 12:31; J.ǂHa. 12:9) Jehovab ga nēsi ǃgomsina ǃgâiǃgâi, o î ge ǁGâuab ǂgaeǂguis a ǃgâi khami nî mûsen. Ama as ge Jehovab ǀnî mîmâide nî dīǀoaǀoasa da ǃâu hâsa. Xawe î ge nēsa ǂâibasen tama hâ ǁîb huib ose nî ǁnāxu dasa. Jehovab ge ni huida. w23.05 8 ¶4; 9-10 ¶7-8

Mati da nauna a hûi ǁkhā în Jesub di ǁōb ǂâiǂâisensa xu ǃgâiba ǀama? ǂGurose da nî dīs ge ǁîna ǁkhauǂuisa. Aoǁnâ sîsenni ǃnâ da ra ǀhao-ū khoen tsî ǁkhau ǂgao da ra khoen di ǀonde da ge nî xoamâi. ǁNās ge sida omaris ǁanin, sîsenū da ra khoen, skol ǀhōsan tsî ǂan da a khoen tsîna ǃkhōǂgā hâ. ǁGâisa ǁkhauǂui ǂkhaniga da ga ūhâ tama i xawe da ge internets linka a sîba nî ǁkhā. Buru da ge nî matikō khoen ǁkhauǂui da ran Jesub di ǁōb ǂâiǂâisensa nî hâǃnâ ǁkhā ǃkhaisa. (Aoǁn. 11:6) ǂÂis ǃnâ da ge nî ūhâ ǁkhau da ra khoen ǀnîsi dîde nî ūhâsa, ǃgōsase ǂguro ǃnāsan ga sida ǀhaode hâǃnâ o. ǁÎn dîde ǃoa da ge ra mûǂui, ǁnā-amaga da ge nî aiǂhumisen ǁîn dîde ǃereamsa. Jesub di ǁōb ǂâiǂâisens khoaǃgân ge ǀasase ǃgâiǃgâibasensa ūhâna dîde a ūhâ ǁkhā. ǁKhā da a-i hoa-e da ge ra dītsâ Jesub di ǁōb ǂâiǂâisens aiǃâs, Jesub di ǁōb ǂâiǂâisens ǁaeb tsî ǁnās khaoǃgâs tsîna “ǀamo ûib ǃaroma ǂgaimâisana” huisa în ǃgâiba ǀama.—ǃNǃkh. 13:48. w24.01 12 ¶13, 15; 13 ¶16

Elobmîs ǃnâ î ge 8 ǃnaeǃkhaide hâ, khoen hîna ge khâisa a māhen xa în ǃhūbaib ai ûi. Tae-i ǃaroma du mâ ǃnaeǃkhais hoasa ǂōrisase ôaǃnâ tama? ǁNāsa du ra dī khami kō re tae-e du ǁnāpaxū a ǁkhāǁkhāsen ǁkhāsa. ǂÂi re mati di nē aiǁgaude ra ǁgausa, Elob turab tsî ǀgaib tsîna ūhâsa ǁōhâna khâisa mās diba. Xawe hoan ǂamai, ǂhâǂhâsa khâis Jesub dis xa ǂâi re. ǂÂis ǃnâ ūha, nē khâis ge ǂgui khoen xa ge mûhe tsî î ge ǃgâi ǃgaoǃgaoba ra māda sida ǂgomsa ǀgaiǀgais dī-e. (1Kor. 15:​3-6, 20-22) Kaise da ge Jehovaba ra gangan, khâis di mîmâisa ǃaroma. ǂGom ǁkhā da ge a nē mîmâis nî ama kaisa, Jehovab ǁkhoreb tsî ǀgaib tsîna ūhâ amaga nē mîmâisa dīǀoaǀoasa. ǁKhā da a-i hoa-e da ge nî dī, î da sada ǂgomsa nē ǀō-aisa ǃâubasens ǃnâ ǀgaiǀgai ǀgara. ǁNāsa dīs ǃnâ-ū da ge Eloba ǃoa nî ǀgū. Hîna ‘sadu ǀnamsaben ge nî khâi’, ti ra mîmâiba.—Jhn. 11:23. w23.04 8 ¶2; 12 ¶17; 13 ¶20

ǃGamǃgamsenxasib ge ǀgam ǂâibasen ra a ūhâ ǁkhā. ǂGurose da ge nî ǂan taena da a dī ǁkhāsa tsî ǀgamǁîse da ge tā sida xa ǀgui nî ǂâi. ǃGamǃgamsenxasiba da ga ūhâ, o da ge nauna ǃgôasiba ǁgau tsî ǁîn tsîna sida xa ǂhâǂhâsase nî mû. (Fil. 2:3) Gideonni ge kaise ge ǃgamǃgamsenxa-i aoba. Jehovab di ǀhomǃgāb ge Gideonna ge mîba, ǁîb ge ǁhûihesa îb Jehovab di khoena ǀgaisa Mîdiaǁîna xu sī ore. Ob ge ǁîba nē ǀgaub ǃnâ ge ǃeream: “Ti ǀaokhoen ge hoan xa Manaseb ǃhaos ǃnâ a ǂkhabusa khoena, tsî tita ge ti ǀaokhoen mûǁae xū tama khoeta.” (ǂHǂh. 6:15) ǁÎb ge ǁnā ǁgaumâisab anu tama hâ khami gere tsâ. Xaweb ge ge ǂan-i Jehovab huib ǀkhab ǁnāsa a dīhō ǁkhāsa. Jehovab di huib ǀkhab ge Gideonna ǁnā ǁgaumâis ǃnâ ge ǃgâiǃgâ. ǀHaohâb ǃûi-aogu ge ra dītsâ hoaǁae ǃgamǃgamsenxasiba ǁgausa. (ǃNǃkh. 20:​18, 19) ǁÎgu ge dī gu ge xūn tsî ǁgaumâidi ǃaroma koasen tama hâ. Xawe ǁkhā ǁaeb ai gu ge mā-am tama hâ, î gu ǁîgu dīsādi xa ǃaromahe hâse xū tama gu hâ khami tsâ. w23.06 3 ¶4-5

ǀUniga ǃâb ǁnā kēbos dib ge ǁGâuab danas nî ǂkhūǂkhūhesa, ǁnās ge hânîǁaeb ǃnâ nî ī. (J.ǂHa. 20:​7-10) ǁNās nî īs aiǃâs ge Elobmîsa ǂgui xūn hîna nî īn xa ra mî. ǂGurosen ge khoena “ǂkhîb tsî ǃnorasasib ge hâ” ti nî ǂgaiǂûi. (1Tes. 5:​2, 3) ‘ǃHaese’ î ge kai ǁgâiǀāba nî tsoatsoa nē ǁaedi ga hoa ama tama hâ ǂgomde ǁnâǂam o. (J.ǂHa. 17:16) ǁNâs khaoǃgâb ge Jesuba khoena nî ǀgoraǃgâ, pirin tsî gūn ase. (Mat. 25:​31-33, 46) Nē ǁaeb ǃnâb ge ǁGâuaba, ǁîb mâǃoas ǀkha nî âiǃgû tsî Jehovab ǃoagu nî sîsen. Elob khoenab ǁnātikose ǃhui hâ amagab ge ǃhaode nî ǀhaoǀhao, Elobmîs ge nē ǃhaode Gogi Magogi di ra ǂgai, ǁîn ge Elob di khoena nî ǁnāǂam. (Ese. 38:​2, 10, 11) ǂKhauhesa Xrîsteǁîn hîna ǀhommi ǃnâ hân ge nî ǀhaoǀhaohe, în ǀhommi ǃnâ Xristub ǀkha ǁîb di ǀhommsi toro ǂnubis ǀkha Armagedons di toroba ǃkham. ǁNās ge kai ǁgâiǀāb di ǀamsa. (Mat. 24:31; J.ǂHa. 16:​14, 16) ǁNās khaoǃgâs ge Xristub di 1 000 kurigu di ǂgaeǂguisa nî tsoatsoa, ǃhūbaib ǂhabase.—J.ǂHa. 20:6. w23.10 20-21 ¶9-10

Nētsēn ge Jehovab di ǃoaba-aon ǀnîna, sida sîsenni mā-amhe tama hâ ǃhūgu ǃnâ ǁan hâ. ǁÎn ge ǂhanuba anub hâ ǃgôasiba ra ǁgau. Xawen ge nē ǃgâsana Obajab khami Jehovaba anub hâ ǃgôasiba ra mā. (Mat. 22:21) ǁÎn ge Eloban ra ǃaosa ra ǁgau, khoena ǃaos xa. (ǃNǃkh. 5:29) ǁÎn ge aoǁnâ sîsen-e dī tsî ǀhaodi tsîna ǂanǃgâsib ǃnâ ra ūhâ. (Mat. 10:​16, 28) ǁÎn ge ra dītsâ ǃgâsana gagasi ǂûna ǂhanu ǁaeb ai māsa. Henri ti ǀon hâ ǃgâsab aiǁgausa ǃgaoǃgâ re, Afrikab ǃnâ ra hâba. ǁNā ǃhūb ǃnâ î ge sida sîsen-e ge mā-amhe tama hâ i. ǁNā ǁaeb ǃnâb ge Henriba māsenxase gagasi ǂûna ǁîb ǃgâsana māǂuibas ǁgaumâisa ge ūhâ i. ǁÎb ge ge xoa: “Tita ge kaise a taoxa. Jehovaba ta ūba hâ ǃgam ǃgôasib ge tita ǂhâ ta hâ ǁkhoaǂgaosiba ge mā.” Henrib khami du ǁkhoaǂgaosiba ǁgau ǁkhā? Sadu tsîn ge ǁkhoaǂgaosiba omkhâi ǁkhā, eloǃaoǃgâxasiba du ga ūhâ o. w23.06 16 ¶9, 11

Adammi tsî Eva hâra ge Jehovaba a mâǃoa, o i ge ǀnîsi ge mûsen ǁkhā i ǀoasa kurusa ūhâ khoen, Jehovaba nî ǁnâuǀnaman ǃhūbaiba ǀoaǀoa tidesa. ǁGâuab ge ǀnîsi gere ǂâi Jehovab ǁîb mîmâisa ǃkhōǀgara tide ti. ǀNîsib ge gere ǂâi Jehovab Adammi tsî Eva hâra nî ǃgam ti. Xaweb ga ǁnāsa dī hâ ob ge ǁGâuaba ǂhûmi-aob a di ga ǂgari-am bi hâ. Tae-i ǃaroma? Genesis 1:28 ǃnâb ge Jehovaba Adammi tsî Evas tsîna ge mîba, ǁîra surib ǃhūbaiba nî ǀoaǀoasa. ǀNîsib ge ǁGâuaba ge ǂâi hâ i Jehovab, Adammi tsî Eva hâra nî mā-amsa î ra ǀoasa kurusa ūhâ tama suriba hō, tātsēs tsîna ǀoasasiba sīǃnâ tidena. (Aoǁn. 7:20; Rom. 3:23) Ti i ga ī hâ, ob ge ǁGâuaba Jehovaba mîs di dī-ao tamab hâ ti ga ǂgari-am hâ. Tae-i ǃaroma? Nēs Elob ǂâibasens ǃhūbaiba ǀoasa kurusa ūhâ surib Adammi tsî Evas tsî ra dib ǀkha ǀoaǀoasa dīǀoaǀoa tama hâ amaga. w23.11 6 ¶15-16

ǀNî ǁaegu ai da ge a ǂâi ǁkhā, Jehovab ra māda daoǁgaudi ǃgāsa tama hâsa. ǀNîsi da ge nî ǃâitsâhe î da tā “xoahe gena ǁnâuǀnam.” Jehovab ge ǃgāsa daoǁgauna ǁîb Mîs tsî ǀapeǂhumis ǃnâ-ū ra mā da. ǃAroma î ge a ǀkhai ǁîb di daoǁgaudi ai ǀarosa. (ǂKhm. 3:​5-7) ǁNā-amaga da ge xoahe gena ra ǁnâuǀnam. Tsî Elobmîs ǂgaoǀkhā tama hâ xūn ai ǂhanuga ǁgui tama hâ. ǁGâuab ge “xū tama gāxaǃnân tsî khoesi gā-ai ǃhoaxūn” ǃhūbaib din tsîna ra sîsenū, îb khoena gāxaǃnâ tsî ǀgora. (Kol. 2:8) ǂGurokam ǁaeb ǃnâ î ge nē khoesi gā-aisiba khoen di ǂâi ǀgaub ai ge ǃgaoǃgaosa-i. Xoas ai ge ǃgaoǃgaohe tama hâ i Jodeǁîn ǁkhāǁkhādi tsî ǁkhāǁkhās hîna gere mîsa Xristeǁîn ge Moseb di ǂhanuba nî ǁnâuǀnam. Nē ǁkhāǁkhādi ge khoena gere gâre mû. Khoen di ǂâide î ge Jehovaba xu gere ūbe amaga, ǁîb hîna a gā-aiba. Nēstēb ge ǁGâuaba internetsa ra sîsenū îb ama tama hâ ǂhôana ǂhôaǂui, hîna ǀnî ǁaegu ai ǂgīǂgōsi ǂgaeǂgui-aona xū ra hāna. w23.07 16 ¶11-12

ǂHûmi-ao tamab hâsa ǁgaus xab ge Jehovaba Adammi tsî Eva hâra ge mā-am î ra ǀgôana hō. Nē ǀgaub ǃnâ i ge Jehovab mîsa ge ama kai tsîb ǁîba ǂhûmi-ao tama hâsa. Tsîb ge Jehovaba ge ǁgau xū-e dīsab ga mîmâi, o i xū-i xare-e ǁkhaebi tidesa. ǁÎb ǂâibasensab ge ge ǃkhōǀgara. Tsîb ge ǁnâuǀnamxa “surib” Adammi tsî Eva hâra tiba nî sâu, suriba ge mā. Nē surib ge ǁîb ûiba xoremarib ase nî mā, îb khoena sâu. (Gen. 3:15; 22:18) ǁGâuab ge nēsa ge ǃâubasen tama hâ i. Tae-i ǃaroma? Nē xoremarib ǀnammi ai a ǃgaoǃgaosa amaga. (Mat. 20:28; Jhn. 3:16) ǁGâuab ge nē ǀgauba ūhâ tama, ǁîb xa ǀguib ge ra ǂâi. Xoremarib xa ǃaroma-e hâse i tae-e a īǁkhā? Xristub ǂgaeǂguis ǀoadisi kurigu ǀams dis ai i ge, ǁnâuǀnamxa surib Adammi tsî Evas hâra diba paradais ǃhūbaiba nî ǀumi, Jehovab ge tsoatsoas ǃnâ mîmâi hâ-i khami. w23.11 6 ¶17

Jehovab ǂhanub ǀaob ǂhâǂhâsasib xa hâba da ge ra ǁnâuǀnam. Tae-i ǃaroma? Jehovab ra mî amaga ǀaob ge ûiba ra ǂnûǁkhaeba. Tsî nēb ge ǀō-aisa ǀkhaeba ǁîba xu. (Lev. 17:14) Jehovab ge ǂgurose khoena a mā-am o, în ǁgan-e ǂû ob ge ǁîna ge mîba în tā ǀao-e ǂû. (Gen. 9:4) ǁKhawab ge nē xū-e ge mî, Israelǁaesab ge Moseb ǂhanuba a mā o. (Lev. 17:10) Tsîb ge ǁkhawa ǂgurokam ǁaeb ǂGaeǂguira sorosa ge mîba, î-i hoa Xristeǁîna mîbahe în “ǀaoba āsa xū ūdawasen.” (ǃNǃkh. 15:​28, 29) Nē mîmāsa da ge kaise ra ǁnâuǀnam ǀaeǃkhōs mâsib tawa î ga hā os tsîna. Jehovab ǂhanuga da ge ra ǁnâuǀnam, ǁgoe-ūgub tawa ī ga hā o. Apostel Paulub ge ge mî, î da sada sorosi ǃâga “ǃgam.” ǁNās ge xū-e dīsa î da ǃgâi tama hâ tsâsiga ūbe. ǀAi kai da nî xūna da ge kō tamas ka io dī tide.—Kol. 3:5; Job. 31:1. w23.07 15 ¶5-6

Kaiseb ge ǀnîsi ǀnam ǁō hâ i tsîb ge Delilas tae-e ra dī ǂgaosa ge ǀū i? Mâ ǃaroma-i ǀgui i ga hâ xawes ge Delilasa Simsonna ǃnās hoasa gere dî, tae-i ǃaromab ge ǀgaisa isa tsîb ge ǁîsa ge mîba. Tsûaǂgaoxaseb ge Simsonna ge mā-am î-i ǁnā mâsiba ǃaroma, îb ǁîb ǀgaib tsî Jehovab di mā-ams tsîna ǁaeroba ǂoaǃnâ. (ǂHǂh. 16:​16-20) Simsonni ge tsûba ge hōǃâ, Delilas ǃnâ ǂgomǃgâ tsîb ge Jehovab ǃnâ ǂgomǃgâsiba ǁgau tama hâ i ǃkhais ǃaroma. Filisteǁîn ge Simsonna ǃkhō tsî ǁîb mûde ge xoroǂûi. Gasa ti ǀon hâ ǃās di ǃkhō-oms ǃnâb ge ge ǂganamǂgāhe hâ i. Tsîb ge ǁnā ǃās khoen di ǃhoro-i di ǁkhami-aob ase ge hâ i. Tsî ǁîn di ama tama elob dagon ti ǀon hâban ge ǁguibade ge dība, Simsonab ge ǁîn di ǃomaǁae mā amaga. “ǁKhoaxasi-e dī” tsîn ge Simsonna ǃkhōsisa xu ge sī-ū, în ǁîba ǃhō.—ǂHǂh. 16:​21-25. w23.09 5-6 ¶13-14

ǀNîsi i ge sîsenǁare-ao i tamas ka io skola da ra ǂgâ-ū ǀhōsana a dîda ǁkhā, tae-i ǃaroma da Elobmîs ǁgaraga ra ǁnâuǀnamsa. ǁKhā da a-i hoa-e dī tsî da ge Elobmîs tae-i ǃaroma a ǃgâisa nî ǁguiǃā. Xawe da ge ǁkhā ǁaeb ai khoe-e ǃgôasiba nî ǁgau ǁî-i di ǂâiǀgaub ǃaroma. (1Pet. 3:15) Khoe-i ra dîs sada ra ǁnāǂam ti ǂâis xa ǂâi re, matis nē dîsa sada nî huisa î da ǁnâuǃā tae-i ǁî-e a ǂhâǂhâsabasa. Khoe-i dîsa ra dîba ǃaromasa da ga ǀū, xawe da ge khoexaǃnâ ǀgaub ǃnâ nî ǃeream. Sida ǃereams ge ǀnîsi ǁî-e a hui ǁkhā, î-i ǁî-i ǂâiǀgauba ǀkharaǀkhara. Aiǁgause i ga ǀnîsi sîsenǁare-ao-e dî du o, tae-i ǃaroma du ǃnaetsēde tsēdi tama hâsa? Sao ra-e ǂâiǃgâ re. ǁî-e ǀnîsi a ǂâi ǁkhā ǁkhoaxa ǁaeba ūhâsa da mā-amhe tama hâsa? ǀNîsi da ge sada sîsenǁare-ao-e ǁî-i ra ǁgâiǂuisen ǀgaub xa a gangan ǁkhā. ǁÎ-i nau sîsen-aon ǀkha ǁae hâ amaga. ǁNās ǃnâ-ū i ge īǁkhā Elobmîs tae-e ǃnaetsēdi xa ra ǁgausa khoe-i ǀkha harase ǁgamǀhaosa. w23.09 17 ¶10-11

Kai aiǂhanub ge ū da hâ ǁaeba sîsenū tsî ǃhūbaib ǂhawase hâ khoena aoǁnâbasa. Apostel Petrub ge ra ǀkhoma da, î da Jehovab tsēsa ǃâu ǀgara. (2Pet. 3:​11, 12) ǁNāsa da mati a dī ǁkhā? Mâ tsēs hoasa da ge, ǀasa ǃhūbaib mati nî īsa a ǂâiǃgâ ǁkhā. Mûnain-ai re mati du ǃanu ǂoaba ra ǀomǂgā, ǁkhoaxa ǂûna ra ǂû, ǀnamasabe-e ǁōba xu ra ǁkhoreǁhare ǀgausa. Tsî Elobmîs kēbodi ge dīǀoaǀoahe ǀgauba, kuriga ǃkharu tsî ge uitsâma i khoena ra ǁkhāǁkhāsa. Nēs xa ǂâiǃgâs ge nî hui du, î du ǁnā ǁaeba ǃâu ǀgara tsî ǁnā ǂgomǃgâsiba ūhâ ǀams nî hāsa. Hānîǁaeb ǃnâ nî ī xūn ‘ǂansa’ ūhâs ge nî hui da, î da tā ǂhumi ǁkhāǁkhā-aon xa “ǂgaeǂhapuhe.” w23.09 27 ¶5-6

ǂKhamkhoen ge ‘ǁgûna ǁnâuǀnam’ tama ǀhōsan ǁaegu ra hâ. (2Tim. 3:​1, 2) Tae-i ǃaroman ǀnîna ra ǁnâuǀnamoǃnâ? Nēs ge ǁgûn ǀgôana nē-e dī kai tsî ǀkhara xū-e ra dī ǃkhais xa ǃaromahe ǁkhā tsîn ge ǀgôana ǁnās xa ǃgâibahe tama hâ. ǀNîn ge ra tsâ ǃhūbaib ra dawa khamin, ǁîn ǁgûn ra mā ǀapemāde a sîsenū ǁoasa. Tamas ka ion ǁgûna kaise karosasa. ǂKhamkhoets asets ti ra tsâ? ǀNîn ge saora mîmās Jehovaba xu ra hāsa saos xa ǃgombahe. Tae-e huitsi ǁkhā? ǁNâuǀnamxasibats ge Jesuba xu a ǁkhāǁkhāsen ǁkhā. (1Pet. 2:​21-24) ǁÎb ge ǀoasa kurusa ūhâ i xawe ra ge ǁîb ǁgûra ǀoasa kurusa ge ūhâ tama hâ i. ǁÎra ge dīsā tsî ǂhanu tama ǀgaub ǃnâ ǁîba gere ǁnâuǃā xaweb ge hoaǁae ǁîb ǁgûra gere ǁnâuǀnam.—Eks. 20:12. w23.10 7 ¶4-5

Apostel Paulub ge ge ǁguiǃā ǁnā ǂhanub gere ǂgaoǀkhā ǁguiba di ge khoen ǁorena hoase ūbē tama hâ isa. ǁNā-amaga i ge nē ǂhanuba ‘ǃaruǀî ge sîsenūhe ǁoa i.’ Paulub ge aiǃgû tsî ǃgam amab Elobmîs ǃnâ hâba ǁîna ge ǁkhāǁkhā. ǁÎnab ge ge ǂâiǂâiǃnâ ‘ǃgâi ǃâubasens’ Jesub xoremarib ǁguibas ai ǃgaoǃgaosaba, hîna ama hui nî ǁkhāba în ‘Elob kōse ǀgū.’ (Heb. 7:​18, 19) Paulub ge Hebreǁî ǃgâsana ge ǁguiǃāba, nēsin Jehovaba Xristeǁîn ase ra ǃoaba ǀgaub ǃkharugeb xa a ǃgâi ǃkhaisa. Jodeǁîn ge ǂhanub ǃoagu gere ǃoaba ǀgaub ge “ǃgôaxaǁaeb di som, xawe amab ge Xristub ǃnâ hâ.” (Kol. 2:17) Xū-i xa ra dīhe som-i ge ǁnā xū-i ǀkha ǀgui tama hâ xawe i ge ǁnā xū-i īsib ǀguiba ūhâ. ǁKhā ǀgaub ǃnâ da ge a mî ǁkhā, Jodeǁîn ge ǃkharuge ǁaeb ǃnâ Jehovaba ǃoaba ǀgaub ge som isa, hānîǁaeb ǃnân ǃgâi ǀgaub ǃnâ Eloba nî ǃoabas dib nî hāse ge ī xūiao. Jehovab ge ǂnûiǂgā xū-e da ge nî ǁnâuǃā, sida ǁoren ǀûbasa da ga ǂhâba o, î da ǁîb ǂhâba hâ ǀgaub ai ǁîba ǃoaba. w23.10 25 ¶4-5

Danieli di 11ǁî danaǃâs ge ǀgam gao-aokha xa ra ǃhoa, ǁîkha ǁaegu ra ǀhûgu kha. Nē kēbosa da ga naudi ǀkha ǀgopeǀnō, o da ge ra mû Rusiab tsî ǁîba ra hui ǃhūgu ge a “ǀapas di gao-ao.” Tsî Anglo-Amerikab ge “ǃkhawagas” di gao-ao. Elob di khoen hîna nētse ‘ǀapas di gao-aob’ ǂgaeǂguis ǃnāga ra hân, ge nē gao-aob xa ra ǃgôaǃgonhe. ǀNî ǃoaba-aon ge ǂnauhe tsî ǁîn ǂgoms ǃaroma ǃkhōsis ǃnâ hâ. ‘ǀApas di gao-aob’ di xūn ge sida di ǃgâsana ǃaoǃao tama hâ xawe ǁîn di ǂgoms ǀguisa ra ǀgaiǀgai. Tae-i ǃaroma? Sida ǃgâsan ge a ǂan Elob di khoen ga ǃgôaǃgonhe, o i Danieli ǃnâ hâ kēbosa ra dīǀoaǀoahesa. (Dan. 11:41) ǁNāsa ǂans ge sida ǃâubasensa ra ǀgaiǀgai tsî ra hui da î da Jehovab ǃoagu ǂgomǂgomsase hâ. w23.08 11 ¶15-16

Jehovab ge ǁîb mûs di ǂganagab ǀkha ra ǀgopeǀnō da. Mûs ge kaise ǀō-aisa ǃâb soros diba, ǁnā-amaga î ge khoe-i hîna sado ra tsûtsû-i ǃoagu Jehovaba ra mî, ‘khoe-i sado ra tsûtsû i ge ǀō-aisa xū-e ra tsûtsû.’ (Psa. 17:8) Jehovab ge ǀnam dab a amaga, sida tsâsiga ǃkhaese ra ǁnâuǃā tsîb ge ra mûǂûi sida sâusa. ǁÎb ge kaise ra tsûaǂgao, sida ga ǂâiǂhansen o. Jehovab ge ra ǂhâba î da ǁîb ǀnam da ǃkhais di ǂgomǃgâsiba ūhâ. ǃKharuge ǁaeb ǃnâ da gere hōǃâ xūn ǃaroma da ǂâiǂhansen ǁkhāsab ge a ǂan. Tamas ka io da ge mâsiga nēsi ra ǃkhāruǃnâ hîna sida di ǂgomǃgâsiba Jehovab ǀnammi ǃnâ da ūhâ-e a ǃâitsâ ǁkhā-e. Tae-e sida di ǂgomǃgâsiba nî ǀgaiǀgai? Jehovab ǁîb di ǀnamma Jesub, ǂkhauhesan tsî hoada ǃoa ra ǁgâiǂûi ǀgauba ǁkhāǁkhāsens ge nî hui da. w24.01 27 ¶6-7

Esrab ge Jehovab ǁîb khoena ǃgomǁaegu ǃnâ ra ǂkhâǃnâ ǀgausa ge mû. ǃKharuge kurigu ǃnâ 484ǁî kuri Jesub ǃnaes aiǃâb ge Esraba, ǀnîsi Babilons ǃnâ ge hâ i, gao-aob Ahasverosi ge mîmā o în hoa Jodeǁîn Persiab ǃnâ hâna ǃgamhe. (Est. 3:​7, 13-15) Esrab ûib ge ǁkhōǁkhōsa mâsib ǃnâ ge hâ i. Nēs xan ge ǁnâu, on ge Jodeǁîn “hoa ǀkharigu” ǃnâ hâna ǂû ǀû tsî gere ǃoa. Tsîn ge ī ǁkhā î ga o kaise gere ā, Jehovaba ǃoan gere ǀgore o daoǁgaus ǃaroma. (Est. 4:3) ǂÂi re matib ge Esrab tsî Jodeǁîn tsîna tsâsa, ǁîna gere ǃgam ǂgaon ge ǃgamhe o. (Est. 9:​1, 2) Esrab ge ǁnā ǁaeb ǃnâ hōǃâ xū-i ge hānîǁaeb ǃgomsigu ǃaroma ǁîba gere aiǂhomi. Jehovab ǁîb khoena nî ǁkhaubas di ǂgomǃgâsib tsîna i ge ǁîb ǃnâ ge ǀgaiǀgai. w23.11 17 ¶12-13

Apostel Paulub ge Sinaiǃhommi ai gere māhe Moseb ǂhanub di “sîsengu” xa gere ǃhoa. (Rom. 3:​21, 28) ǁGauhe ras ǃoagu i ge Jode Xristeǁîna gere ǂgom, Moseb ǂhanuban noxopa nî sao ǃkhaisa. ǁNās ǀkhab ge Pauluba Abrahammi aiǁgausa gere sîsenū, ǁgau rase khoe-i ‘ǂhanuba’ î ga sao, o ǀgui ǂhanu-aise Elob xa mûhe tama hâ ǃkhaisa. Paulub gere ǁguiǃās ge, ǂgomsa da ge nî ūhâ. Nēs ge kaise ǂkhâǃnâxa, ǁkhāǁkhā da î ra amaga Elob tsî Xristub ǃnâ ǂgomsa ūhâs ǃnâ ǀgui da nî ūǃoahesa. Jakobub 2ǁî danaǃâs ǃnâ ra ǃhoahe “sîsengu” ge Paulub gere mî sîsenga ǃoa ǁnaeǁgau tama. Jakobub gere mî sîsengu ge Xristeǁîn tsēkorobe ra dī xūna ǃoa gere ǁnaeǁgau. (Jak. 2:24) Nē dīgu ge ra ǁgau, Xristeǁîn ama ǂgomsa Elob ǃnâ ūhâsa tamas ka io ūhâ tamasa. w23.12 3 ¶8; 4-5 ¶10-11

ǃGammes nîsas ga ǁhûi ǁaeb ais ge ǃgâsasa, ǃgamme ǂgaos ra khoeba ǃgâise nî ǁhûi. ǂÂis ǃnâ ūhâ re ǁhûis go aob di daoǁgautes ge nî sao. (Rom. 7:2; Efe. 5:33) Dîsen re: ‘Nē ta ra ǃgamme ǂgao khoeba dītsâ îb ra Jesub khami ǂâi tsî tanisensa? Jehovabab ǁîb ûib ǃnâ ǂgurose ra mâi? Gā-ai mîǁguigab ra dī? Dīsāb ga, ob dīb go xū-e ra ǂanǃgâ? Tarekhoedeb ǃgôasiba ūba hâ? Jehovab ǀkha ta ūhâ ǀhōsagusisa ǀgaiǀgais ǀkhab nî huite? Ti sorosi ǂhâsigab nî kōǃgâ hō tsîb nî ti ǃgâi ǀhōsa kai? Ama as ge ǃgâi-aobas ga ra ǂhâba, os ge sas tsîna nî ǃgâi tara i. Elobmîs ge ra mî ǃgâi taras ge ǁîs aob “hui-ao” tsî ǁîb di “anusasi.” (Gen. 2:18) Jehovabas a ǀnam amagas ge ǁkhās a-e ra dī. Tsî nau khoena ra hui în ǁîs aob di ǃgâi ǀgauga mû. (ǂKhm. 31:​11, 12; 1Tim. 3:11) Nēsis ge ǃgâi tara kais ǃaroma a aiǂhumisen ǁkhā. Jehovabas ūba hâ ǀnamma ǀgaiǀgai, oms tsî ǀhaohâb ǃnâ nau khoena huis ǃnâ-ū. w23.12 22-23 ¶18-19

Jehovab ge ra mîmâi, ǂhâbasa gā-aisibab nî mādasa î da ǃgâi mîǁguiga dī. Elosi gā-aisiba da ge ǂhâhâ, mîǁguiga da ga dī o hîna sida ûiga ǀamosib kōse nî tsâǀkhā ga. Apostel Paulubab ge dība khamib ge Jehovab sida tsîna ǂhâba da hâ ǀgaiba mā ǁkhā. Î da ǃgomsîgu ǃnâ mâǀgai. (Fil. 4:13) ǀGui ǀgaub hînab nesa ra dīs ge sida gagasi omarisab ge ra sîsenū. ǃGam-eb nî ǃuis aiǃâb ge Jesuba ǀgaisase gere ǀgore. ǁÎb ge Jehovaba gere ǀkhoma în khoena tā ǂâi ǁîbab gere ǃkhāǃkhāsa. Jehovab ge ǁnāsa ge dī tama hâ i xawe ǁîb di ǀhommsi ǃgâsagu di ǀguiba ge sî, îb Jesuba ǀgaiǀgai. (Luk. 22:​42, 43) Jehovab tsîn ge sida a hui ǁkhā, ǃgâsana sîs ǃnâ-ū în selfoni ai tamas ka io omdi ai sari da în ǂkhâǃnâda. Hoada ge ǀgauga ôa ǁkhā î da sida ǃgâsana ‘ǃgâi mîs’ ǀkha hui ǁkhā.—ǂKhm. 12:25. w23.05 10-11 ¶9-11

ǃKhai hâ ǃgâsan ge ǀnîsi gere ǃao ǃgâisen ǃkhōǃoahe tidesa. ǁNā-amaga tā ǁîna nî tao kai dîn tsî mîna mî re. Nē ǃgâsan ge Jehovaba sida ǀkha ǀguiba ra ǃoaba. Kaise da ge ra ǃgâiaǂgao ǁîn ǀkha ǁkhapa ǀguiba ǃoaba ǀhaosa. (Psa. 119:176; ǃNǃkh. 20:35) Kaise da ge ra ǃgôaǃgâ Jesub ge mîba da o, î da ǁîb ǁōb ǂâiǂâisensa mâ kurib hoaba hâǃnâ. ǁNâuǃā da ge ra tae-i ǃaromas nēsa ǂhâǂhâsasa. Nēsa da ga dī, o i ge sida tsî nau khoen tsîna ǂgui ǀgaugu ǃnâ ǃgâiba ra hō. (Jes. 48:​17, 18) Jehovab tsî Jesub tsîna da ūba hâ ǀnammi ge ra ǀgai. ǁÎkha ge dība da xūna da ra ǃgôaǃgâ ǃkhaisa da ge ra ǁgau. Sida ǃgâsan ǀkha da ūhâ ǀhōsagusisa da ge ra ǀgaiǀgai. Tsî da ge naun tsîna ra hui în ǁkhāǁkhāsen, matin xoremarib xa ra īǁkhā kaihe ǀkhaeba xu ǃgâiba ǀama ǁkhāsa. A da ǁkhā da a-i hoa-e dī tsî Jesub di ǁōb ǂâiǂâisensa aiǂhumisenba. ǁNā tsēs kurib ǃnâ kaise ǂhâǂhâsa amaga. w24.01 14 ¶18-19

Jehovaba mati ra daoǁgau da? ǂGuroseb ge ǁîb Mîs ǃnâ-ū ra daoǁgau da. Xaweb ge khoen tsîna ra sîsenū în daoǁgauda. Aiǁgauseb ge “ǂgomǂgomsa tsî ǁnâuǃāxa ǃgāb” tsîna ra sîsenū î da gagasi ǂûna māhe, hui da ra na î da gā-ai mîǁguiga dī. (Mat. 24:45) Jehovab tsîn ge ǁkhāsiga ūhâ aoga ra sîsenū î da daoǁgauhe. Aiǁgause, ǃnarimâra mûǂam-aogu tsî ǀhaohâb ǃûi-aogu tsîn ge ra ǂkhâǃnâ da. Tsî hui da ra daoǁgaus tsîna ra mā da î da nē ǃgom ǁaegu ǃnâ ûi. Kaise da ge Jehovaba ra ǃgôaǃgâ nē ǃgom ǁaegu ǃnâb, ǀams nî hās aiǃâ nēti ǃgâise ra daoǁgau dasa. Nēs ge ra hui da, î da Jehovab ǀhōsan ase hâ ǀgara tsî nēsi ǃgâiaǂgao ûib ǃnâ ǀamosib kōse. ǀNî ǁaegu ai i ge ǃgomba da ǁkhā daoǁgausa saosa, ǃgōsase ǀoasa kurusa ūhâ tama khoena xū i ga hā o. Nēti ī ǁaegu ai da ge ǂgomǃgâsiba ǂhâ hâ Jehovab ǀguib ǁîb khoena ra daoǁgausa tsî i ǁîb daoǁgausa saosa ǂgui ǀkhaega ra hauba dasa. w24.02 20 ¶2-3

Sida ge Jehovaba da ūba hâ ǀnamma a ǀgaiǀgai ǁkhā. ǁÎb di mîsa da ga ǂōrisase ǁkhāǁkhāsen o. Elobmîsa du ra khomai khami, kō re mâ ǃhoaǃâdi tae-e Jehovab xa ra mîsa. Tsî dîsen re: ‘Nē ǃhoaǃâsa mati ra ǁgau, Jehovab tita a ǀnamsa? Mâ ǃaromade î ra māte î ta Jehovaba ǀnam?’ ǀKhara ǀgaub hîna da Jehovaba da ūba hâ ǀnammi ǃnâ a ǀgai ǁkhāb ge, ǁîba ǃoa sada ǂgaoba xu ǀgoresa. (Psa. 25:​4, 5) Tsîb ge Jehovaba sida di ǀgorede nî ǃeream. (1Jhn. 3:​21, 22) Nauna da ūba hâ ǀnammi tsîn ǃnâ da ge nî ǀaro. Kurinab Apostel Pauluba Xristeǁî kai toa hâs khaoǃgâb ge Timoteub ti ǀon hâ ǂkhamkhoeb ǀkha ge ǀhao. Timoteub ge kaise Jehovaba ge ǀnam-i tsî ǁîb di khoen tsîna. Paulub ge Filipeǁîna ge mîba: “ǀGui khoe-i ǁîb khami sadu di mâsigu ǃnâ ǂhauǃnâse nî ǁae-e ta ǂan tama amaga.” (Fil. 2:20) Paulub ge nēba Timoteub di ǃgâi sîsen-i tamas ka io ǁîb mati ǃhoade ra mâ ǀgaus xa ge ǃhoa tama hâ i. Xaweb ge Timoteub mati ǁîb ǃgâsana a ǀnam ǀgaus xa ge tsâǀkhāhe. Ama as ge Timoteub gere ǃoaba ǃnâ ǀhaohâgu ge hoaǁae ǁîb di saride ǃoa gere mûǂui.—1Kor. 4:17. w23.07 9 ¶7-10

Israelǁaes mîmâisa ǃhūb ǃnâ nî sīs aiǃâb ge Moseba ge ǁō. ǁNā ǂgomǂgomsa-aob ǁōb khaoǃgâb ge Jehovaba ǁîb khoena hui ǀû? Hî-i. ǁÎn gere ǂgomǂgomsase Jehovab ǃoagu hâ, kōseb ge ǁîba ǁîna gere hui. Moseb nî ǁōs aiǃâb ge Jehovaba ǁîba ge mîmā, îb Josuaba ǁgaumâi khoena nî daoǁgause. Moseb ge Josuaba ǂgui kuriga gere ǁkhāǁkhā. (Eks. 33:11; Deu. 34:9) ǁNās ǂam-ais tsîna i ge ǀoadisidi, kaidisidi, korodisidi tsî disidi ǃgôab khoega ge hâ ī khoena gere kōǃgâ ga. (Deu. 1:15) Elob khoen ge ǃgâi ǀgaub ǃnâ gere kōǃgâ-e. ǁKhā aiǁgausa da ge Eliaba xu ra mû. ǁÎb ge ǂgui kuriga ǃgarise ge sîsen, îb Israelǁaesa hui Jehovaba ǃoabasa. Xaweb ge Jehovaba ǁîba ge ǁgaumâi, îb Judab ǃnâ sī ǃoaba. (2Gao. 2:1; 2Kro. 21:12) Nē ǁaeb ǃnâs ge Israelǁaesa ǀguri hâ i? Hî-î. Eliab ge Elisaba ǂgui kuriga gere ǁkhāǁkhā. Jehovab ge aiǃgû tsî ǁîb ǂâibasensa ge dīǀoaǀoa tsî ǁîb ǂgomǂgomsa ǃoaba-aon tsîna gere kōǃgâ. w24.02 5 ¶12

Efeseǁî Xristeǁîn ge Jehovab mîs ǃoagu gere hâ, hîna ge ǁîna ǃnâb khami gere daoǁgausa. (Psa. 119:105) Efeseǁîn ge ǁîn di ama tama ǂgomdi tsî ǃgâi tama ǁgoe-ugu ǀgaugu tsîna ge ǁnāxu. ǁÎn ge nēsi ‘Eloba gere ǁgae’ tsî ǁîn di ǁkhāsib ǃnâ hâ i hoa-e gere dītsâ, în Jehovaba ǃoaba tsî ǁîba ǃgâina dī. (Efe. 5:1) ǁKhā ǀgaub ǃnâ da ge sida tsîna amaba da nî ǁkhāǁkhāsens aiǃâ ǃkhaenab ǃnâ ge hâ i. Ama tama ǂgomdi tsî ǃgâi tama ǁgoe-ugu ǀgauga ǃkhōǂgā hâse. ǀNî da ge ama tama ǂgomdi ǁaxasiga gere tsēdī. ǀNîn ge ǃgâi tama ǁgoe-ugu ǀgaugu ǃnâ ge ûi hâ i. Xawe da ge Jehovab di ǂhanuga ǁkhāǁkhāsen, o da ge tae-i a ǂhanu tsî tae-i ǂhanu tamasa ge mûǃā. ǀKharaǀkharana dī tsî da ge Jehovab da ǂhâba khami ge ûitsoatsoa. ǁNās xa ǃaroma-e hâse da ge ǃgâib ǀguiba ra ǀama. (Jes. 48:17) Xawe da ge nēsi ǃgomsirona ra hōǃâ. Hoaǁae i ge supu tama ǃgâb ai da go ǁnāxu ǃkhaenaba xu hâbē tsî “ǃnâb di ǀgôan ase ǃgû ǀgarasa.” w24.03 21 ¶6-7

ǀNîsi du ge māǁnâsen tsî ǁāǁnâ kaisens ǃaroma du aiǂhumisa tama ti a tsâ ǁkhā. ǀKharaǀkharana du ge ǀnîsi sadu ûib ǃnâ ra dī ǂgao î du Jehovab ǂhanugu ǃoagu ûi. Tamas ka io du ge ǀnîsi ǂâusa ǁaeba ǂhâ hâ î du sadu ǂgomsa ǀgaiǀgai. (Kol. 2:​6, 7) Elobmîsa ra ǁkhāǁkhāsen khoen hoan ge ǀgui ǁaeb ai Jehovaba ǀnam tsoatsoa tama. Hoa ǂkhamkhoen ge ǀgui kurin ǀkha māǁnâsen tsî ǁāǁnâ kaisen tama. ǁNâuǃā re mâ ǀkharaǀkharana du nî dīsa tsî tae-e du a dī ǁkhāsa, nau khoen ǀkha ǀgopeǀnōsen tamase. (Gal. 6:​4, 5) Jehovab ǃoa māǁnâsens ǃaroma du ǂhanu tamasa du ga mûǂan, xawe ǁnā mîǁguib hîna du ūhâba ǃkhōǀgara re. Jehovab ǀkhaeba sadu ǁguiǂgāsens ǃaroma ǂgan, î ǂhâ du hâ ǀkharaǀkharana dī. (Fil. 2:13) ǂGomǃgâsiba du ge a ūhâ ǁkhā, sadu ǀgorede ǁnâu-am tsîb nî ǃereamsa.—1Jhn. 5:14. w24.03 5 ¶9-10

ǀGui ǃnās ais ge Sarasa matis ge ǁaixa hâ is xa Abramma mîba tsîs ge ǁîb tsîna ge ǂgari-am. Abrammi ge ge ǂan-i Saras ge ǁîb ǃnāga ǂgāmâisensa tsî ǁîb gere dī mîǁguiga ǂkhâǃnâsa. ǁÎb ge ǁîsa ǃgâ tsî mâsiba ge ǃgâiǃgâi. (Gen. 16:​5, 6) Tae-e da ra ǁkhāǁkhāsen? Aogo sago ge ǀgaiba ūhâ, omaris ǃgao mîǁguiga dīsa. (1Kor. 11:3) Xawe ǀnamxaǃnâ xū-i hîna gu aoga a dī ǁkhā î ge ǁîgu di tarade ǃgâ tsî gu ǁîdi ǂâi ǀgaub tsîna dîsa. ǃGōsase mîǁguib ga ǁîs tsîna a tsâǀkhā o. (1Kor. 13:​4, 5) ǀGui ǃnâs aib ge Abramma ǃâubasen tamase ge hā ǃhaokhoena ge ǃkhōǃoa. ǁÎb ge Sarasa ge ǂgan îs ǁîs gere dī xūna ǁnāxū tsî kai ǃgôab di pere-e am. (Gen. 18:6) Saras ge ǃhaese Abrammi ge ǂgan xū-e ge dī tsî ǁîb mîǁguiba ge ǂkhâǃnâ. Taradi tsîn ge Saras aiǁgausa ǁgae ǁkhā, aogu ra dī mîǁguiga ǂkhâǃnâs ǃnâ-ū. ǁNāsa so ga dī, oso ge ǃgammeba ra ǀgaiǀgai. —1Pet. 3:​5, 6. w23.05 24-25 ¶16-17

Gideonni ge ǂhanuǂhanu-aob ase ǁgaumâihes khaoǃgâ, î ge ǁîb di ǁnâuǀnamxasib tsî ǁkhoaǂgaosib tsîna ge ǃâitsâhe. ǁÎb ge kaise ǁkhōǁkhōsa ǁgaumâisa ge māhe, îb ǁîb ǁgûb di Bali altarsa dīkākā. (ǂHǂh. 6:​25, 26) Gideonni ge ǁîb di khoega ǀhaoǀhaos khaoǃgâb ge Jehovaba ǀgam ǃnāra ge mîba bi îb toroǂnûbisa ǀoroǀoro. (ǂHǂh. 7:​2-7) ǀAms aib ge ge mîbahe îgu tsuxub ǃnâ ǁnāǂam. (ǂHǂh. 7:​9-11) ǀHaohâb ǃûi-aogu ge “ǃgâidīgu xa ǀoa hâ.” ǁNâuǀnamxa ǀhaohâb ǃûi-aob ge hoaǁae, xoadi tsî Jehovab ǀapeǂhomis tae-e ra mîs xa a ǂhâǂhâsabahe. ǁNā ǀgaub ǃnâb ge nauna ǃgâi aiǁgausa ra ǁgau. Xawe î ge ǁîb ǁnâuǀnamxasiba noxoba a ǃâitsâhe ǁkhā. ǀNîsib ge daoǁgaude saos xa a ǃgombahe ǁkhā. Tsîb ge ǀnî ǁaegu ai a ǂâi ǁkhā, nē daoǁgausa amabes ǃnâ gā-ai tsî a ǃgâi ti. Tamas ka iob ge ǀnîsi ǁgaumâisa ra hō, hîna nî ǃaromasa îb ǃkhōsis ǃnâ ǂganamǂgāhe. ǀHaohâb ǃûi-aoga mati Gideonni aiǁgausa ǁnāti-i mâsigu ǃnâ a ǁgae ǁkhā? Daoǁgaude ǂōrisase ǃgâ tsî sîsenūs ǃnâ-ū. w23.06 4-5 ¶9-11