Aprili

Elobmîs ǁaeb ǃnân ge Jehovab di ǃoaba-aona, ǃâubasen taman ge hâ i ǃgomsina gere hōǃâ. Jakob aiǁgausa kō re. ǁÎb ge dadasab xa ge mîbahe îb tara-e, Labanni di ǀgôati hîna Eloba ra ǃoabatexu sī ū. Tsî ǁîb dadab xa ge mîbahe Jehovab nî ǀkhaebi ǃkhaisa. (Gen. 28:​1-4) ǁNās ǀkhab ge Jakoba ǂhanu xū-e ge dī. ǁÎb ge Kanaanǃhūba xu Labanni omsa ǃoa ge ī. Hîna ge ǀgam ǀgôara Leas tsî Raxels tsîna ūhâ îba. Jakobi ge Labanni di ǂkham ǀgôas Raxelsa ge ǀnam. Tsî ǁîs dadasaba ge mîǁguiba ǃgammeb nîs aiǃâb ǁîba 7 kuriga nî sîsenbasa. (Gen. 29:18) Xawe xūn ge Jakob ge ǃâubasen hâ i khami ge sîsenǂui tama hâ i. Labanni ge ge gāxaǃnâ bî tsîb ge ǂguro ǀgôas Leasa ge ǃgamme. Labanni ge Jakoba ge mā-am îb Raxelsa ǃgamme xaweb ga ǁkhapa hû kuriga sîsen o ǀgui. (Gen. 29:​26, 27) Labanni ge ǂhanuoǃnâses tsîna Jakobi ǀkha gere sîsen. Hoanǂam aib ge Labana Jakoba 20 kuriga ǂhanuoǃnâse ge sîsen-ū.—Gen. 31:​41, 42. w23.04 15 ¶5

Ham-e ǃoa da nî ī ǁkhaeǂgaos tsî daoǁgaus tsîna da ga ǂhâba o? ǁNā dîs di ǃereamsa da ge a ǂan. Jehova Eloba ǃoa da ge a ǀgore ǁkhā. Jehovab ge ra ǁkhau da, î da ǁnāsa dī. ǁÎb ge ra ǂhâba î da ǀgore, ǁnās ge ‘ǀûs ose ǀgoresa.’ (1Tes. 5:17) ǁÎba ǃoa da ge ǀgore tsî da ge daoǁgausa sida ûib ǃaroma a ǂgan ǁkhā. (ǂKhm. 3:​5, 6) ǁÎb a māxa Elo amagab ge Jehovaba ra mî, î da ǂhâba da hâs kōse ǁîba ǃoa ǀgore. Jesub ge ge ǁnâuǃā, ǀgores Jehovab ǃaroma a ǂhâǂhâsa ǃkhaisa. ǃHūbaiba ǃoab nî hās aiǃâb ge ge mû, ǁîb ǁGûb mati ǂgomǂgomsa aogu tsî taradi ǀgorede ra ǃeream ǀgausa. Aiǁgauseb ge Jesuba ǁîb ǁGûb ǀkha ge hâ i Hannas, Davidi, Eliab tsî ǀnî ǂgomǂgomsa khoen di ǀgoredeb gere ǃereamhe o. (1Sam. 1:​10, 11, 20; 1Gao. 19:​4-6; Psa. 32:5) ǁNā-amagab ge Jesuba ǁîb ǁkhāǁkhāsabega ge ǁkhāǁkhā, î gu ǁkhoaǂgaose ǀgore.—Mat. 7:​7-11. w23.05 2 ¶1, 3

ǀGapi pristeri Jojadab ge Jehovaba gere ǃao. Nēs ge ge mûhe ǁkhā i, Isabels ǀgôas Atalias ge ǂhanu tama ǀgaub ǃnâ gao-aos ase a ǂgaeǂgui tsoatsoa o Judab ǃnâ. ǁÎs ge kaise ge eloxoresa i. Tsî ǂgaeǂgui ǂgaos gere ǃkhais ǃaroma ǁîs di ǁnuriǀgôagu tsîna ge ǃgam. (2Kro. 22:​10, 11) ǁÎs di ǁnurisagu di ǀguib ge ge ûi. Jojadab tsî ǁîb taras Jehosebas tsîn ge ǁîba sâu ǃkhais ǃaroma. ǁÎra ge sâubi tsî gere kōǃgâbi. Nē ǀgaub ǃnâ ra ge Jojadab tsî ǁîb taras Jehosebas tsîna ge dī, î-i Gao-aob Davib di surib ǃnâ-ū nî hā gaoba ǁkhaubahe ǁkhā. Jojadab ge Jehovab ǃoagu ge ǂgomǂgomsa i tsî Ataliasa ge ǃao tama hâ i. Joasi a 7 kurixa hînab ge Jojadaba ǁkhapa ǂhauǃnâsiba Jehovaba ge ǁgau. ǁÎb ge ǀapesa ge dī. Nē ǀapes ga sîsen ob ge Joasa ga ǂhanumâ gao-ao kai hâ, Davib suriba xu. Tsî nē ǀapes ga sîsen tama i, ob ge Jojadaba nî ǁō. Jehovab huib ǀkhas ge nē ǀapesa ge sîsen. w23.06 17 ¶12-13

Gao-aob Nebukadnesari ge ǀnîsi ga ǂâi hâ, Danieli ǁîba ra mâǃoasa. Xawe Danieli ge ǁkhoaǂgaosiba ǁgau tsî ǁhaposa ge ǁguiǃā. Tae-e Daniela ga hui hâ, îb ǁîb ûiǁaeb ǃnâ ǁkhoaǂgaoxa? ǂGomǃgâ ǁkhā da ge a Danieli ǁgûra ge ǁîba ǃgâi aiǁgause îba isa ǂkham î ge īo. (Deu. 6:​6-9) Danieli ge disi mîmādi ǀguiti ge ǂan tama hâ i. Xaweb ge Israelǁaes tae-e a ǂû ǁkhās tsî tae-e ǂû tides daoǁgaudi tsîna ge ǂan-i. (Lev. 11:​4-8; Dan. 1:​8, 11-13) Danieli ge Jehovab khoen ǀkha î ge tae-e a isa ge ǁkhāǁkhāsen, ǁîban ge ǁnâuǀnam tama hâ io. (Dan. 9:​10, 11) ǁÎb di ûib ǃnâb ge hōǃâ xū-i ge Daniela ǂgomǃgâsiba ge mā, Jehovab tsî ǁîb ǀgaisa ǀhomǃgāgu tsîn ǁîba nî huisa.—Dan. 2:​19-24; 10:​12, 18, 19. w23.08 3 ¶5-6

Rebekas ge ge gā-ai tarekhoe-i hîna ge ǁîs ûib hoab ǃnâ ǁkhoaǂgaoxase mîǁguiga dī tsî ǂan isa matis tsî mâǁaes nî tanisen ǃkhaisa. (Gen. 24:58; 27:​5-17) Xawes ge khoe ǃgôaxa tsî daoǁgaude gere sao. (Gen. 24:​17, 18, 65) Jehovab di ǂnûiǂgāde du ga Rebekas khami ǃgamǃgamsenxase ǂkhâǃnâ, o du ge sadu omaris tsî ǀhaohâb ǃnâ ǃgai aiǁgause nî ī. ǀNî hâ ǀgaub hînan hoa Xristeǁîna ǂhâhâb ge ǀnōsa mûǂuiba sats xa ūhâsa. Elobmîs ge ra mî ǃgamǃgamsenxasib ge gā-aisiba ra ǃaroma. Esters ge ǃgamǃgamsenxase tsî Eloba ǂgomǂgomsase gere ǃoaba. ǃGamǃgamsenxas ge ī amagas ge ge ǀgapiǂâixa tama hâ i gao-ao kais ge o. ǁÎs omeb ǀgôab Mordikaib xas ge māhe ǀapemāsa ǃgâ tsî ge sao. (Est. 2:​10, 20, 22) ǁKhā ǀgauba du ge nau khoen tawa ǃgâi ǀapemāsa dî tsî sîsenǂuis ǃnâ-ū a dī ǁkhā. (Tit. 2:​3-5) Esters ge ǃgamǃgamsenxasiba ǀkhara ǀgaugu ǃnâs tsîna ge ǁgau. ǁÎs ge îsa ǂkhamkhoes îsa sorosa ge ūhâ isa. Xawes ge khoen hoan nî mûsi ǀgaub ǃnâ ge tanisen tama hâ i.—Est. 2:​7, 15. w23.12 19-20 ¶6-8

Hoaǁae ǀhapixase tsâsensa tanis ge sida ǁkhāsiba ǃnâ hâ tama hâ. Sada ǁoreba da ga ǁguiǁnâ, ǃhobasen tsî ǂhâbasa xūn hoana gara dī, o tā ǁkhapa ǁnā ǁoreba dī. ǂGomǃgâ ǁkhā da ge a Jehovab nî ǀûba dasa. (ǃNǃkh. 3:19) Nē xūn hoana da ga a dī toa, ob ge Jehovaba ǂhâba tama hâ î da aiǃgû tsî ǀhapitsâsen. ǁÎb ge a ǂan hoaǁae da ga ǀhapitsâsen, o i sida ǃaroma a tsūsa. (Psa. 31:10) Kaise da ga ǀhapitsâsen, o da ge ǀnîsi ûib di ǃkhoeǀnûgusa a ǃkhoe ǀû ǁkhā. (2Kor. 2:7) Kaise du ga ǀhapitsâsen, o Elob di ama ‘ǀûbas’ hînab ra mādas ai ǂâisa ǂnûi re. (Psa. 130:4) ǁNān hîna amase ra ǃhausenab ga ǀûba, ob ge nēti ra mîmâi: ‘Tita ǁîn ǁoren xa ǃaruǀî ǂâi tide.’ (Jer. 31:34) ǁNās ge ra ǂâibasen, Jehovab ge ǀnaib ǀûba da hâ ǁoren xa ǁkhapa ǂâi tidesa. Tsî tā ǁaixa-ūsen, ǀnîsi du ga ǁgaumâide ǀhaohâb ǃnâ ga ra ǂoaǃnâ o. Jehovab ge sadu di ǁoren xa ǂâi tama hâ tsî du ge sadu tsîna ǁnāsa nî dī. w23.08 30-31 ¶14-15

ǂGui ama tama ǂhôan tsîn ge Coronas ǁaeb ǃnâ ge hâ i. Jehovab di ǃoaba-aon hîna ge ǀapeǂhumisa xu gere hā, ǂhôana gere ǃgân ge khoen gere hōǃâ ǂâiǂhansende ge ūhâ tama hâ i. (Mat. 24:45) Tā da ge ‘ǂhâǂhâsa’ xūna xu sada ǂâisa nî ǂgaebe. (Fil. 1:​9, 10) Sida ǂâis ga ǀkhara ǃkhai-i tawa hâ o, o da ge ǂgui ǁaeb tsî ǀgaib tsîna ra ǂoaǃnâ. Tsēkorobe ûib di xūn ǂûs, ās, ǁkhoaxa ǁaeba ūhâs tsî sîsenni tsîn ge sida ǂâisa a ūbe ǁkhā mā-am da ga o. (Luk. 21:​34, 35) ǁNās xōǀkhā da ge tsēs hoasa ǂgīǂgōsi ǂhôan tsî mâǃoadi xa ra ǁnâu. Tā da ge nî mā-am în nē xūna sida ǂâisa ǂgae. ǁNāsa da ga dī, o da ge sida ǂâis tsî ǂgaob tsîn ǃnâ ǀkhā-e a ǁhûi ǁkhā. ǁGâuab ge ǃkharagagu ǀgauga ra sîsenū, îb sida ǂgaeǂhapu ǃgâi xū-e dīsa xu. w23.07 16-17 ¶12-13

Jehovab khoen ǃaroma î ge Jesub ǁōb ǂâiǂâisensa, kaise ǂhâǂhâsa tsē kurib ǃnâ. Jesub ge ǁîb ǁkhāǁkhāsabena ge mîba în nē tsēsa tsēdī. (Luk. 22:​19, 20) ǁNā tsēs ge ǀgaugu xa ra hōhōǃnâ da, Jesuba da ǁîb ǁguibas ǃaroma ǃgôaǃgâsiba a ǁgau ǁkhāga. (2Kor. 5:​14, 15) ǁNā tsēs ge ǃēsa ra mā da, î da sida ǃgâsan ǀkha “ǂgaoǂgaoǃnâgu” tamas ka io ǂkhâǃnâgu. (Rom. 1:12). ǂGui khoen ge ǁnā tsēs ain ra mû tsî ǁnâu xūn xa ra ǂkhâǃnâhe în Elobmîsa ǁkhāǁkhāsen tsoatsoa. ǂÂiǃgâ re matis Jesub di ǁōb ǂâiǂâisensa, ǃhūbaib ǂhawase sida ǃgâsan ǀkha ra ǀguiǃnâxa kai da ǀgauba. Nē xūn hoan ge ra ǃaroma î-i Jesub ǁōb ǂâiǂâisensa sida ǃaroma kaise ǀō-aisa. w24.01 8 ¶1-3

Jehovab tsî Jesub tsîn ge dība da xū-i xa da ǃnāsase ra ǂâiǃgâ khami da ge nî ǁnâuǃā matikōse i ǁîkha mâ ǀguiǀguibe khoe-i hoa-e ǀnamsa. (Gal. 2:20) Xoremarib ge ǀnammi ai a ǃgaoǃgaosa ǀkhae. Jehovab ge ǁîb di ǀnamma ge ǁgau da Jesub hîna kaise ǀō-aisaba ǁguibas ǃnâ-ū. Jehovab ge ge mā-am, îb ǁîb ôaba ǃgomma tsâ tsî ǁō sida ǃaroma. Jehovaba ge ǁîb tsâsiga ǃhō-oa tama xaweb ge ra mîba da matikōseb a ǀnam dasa. (Jer. 31:3) Jehovab ge ǁîb ǃoa ge ǂgae da, ǀnamdab a amaga. (ǀGopeǀnō re Deuteronomium 7:​7, 8 sa.) Khoe-i tamas ka io ǀkhara xū-i ge ǁnā ǀnamma xu a ǀgora da ǁoa. (Rom. 8:​38, 39) ǁNā ǀnamma mati ra tsâ kai tsi? w24.01 28 ¶10-11

ǂKhauhesa Xristeǁîn ge ǁîn ǃâubasensa kaise a ǀnam. ǃGâsab Frederick Fransi ǂkhauhesa ǃgâsab ge nēti ǁîb ǂgaoba xu ra mî: “Nē ǃâubasens ge nî ama ī tsî 144 000 ǀuniga ǁani-i ǁî-i di ǃâubasensa nî hōs kōse nî dīǀoaǀoahe. Sida mādawa-ams ge kaise hoa xūn xa a ǃgâi.” ǃGâsab Fransi ge 1991 ǂanǃgâ tsî ge mî: “Noxopa da ge sida ǃâubasensa ǀû tama tsî nēsa kaise ra ǃgôaǃgâ . . . Nē mādawa-ams ge ǃâusa anu hâ. ǂGuros xa da ge nēsi sida ǃâubasens xa kaise ǃgâibahe.” Nēsi da ga ǀamo ûiba ǀhommi tamas ka io ǃhūbaib ai hō xawe da ge, ǂkhaisib di ǃâubasensa ūhâ hîna ǃaromasa ra mādasa î da ǃgâiaǂgao. Tsîb ge sada ǂgomǃgâsiba noxopa a ǀgai ǁkhā sada ǃâubasens ǃnâ. w23.12 9 ¶6; 10 ¶8

Tabernakeli ǃaugab, ǂgâ-ams tawa i ge Jehovaba ǃoa gere ǁguibahe xamanin altars koper-e xu kurusasa ge hâ i. (Eks. 27:​1, 2; 40:29) Xawen ge ǁnā ǁguibana khoen ǁorena hoase ge ǀûba ǁoa i. (Heb. 10:​1-3) Tabernakeli tawa gere dīhe xamarin ǁguibadi ge, khoen ǁoren nî ǀûbahe ǀgauba ǃoa gere ǁnaeǁgau. Jesub ge ge ǂan i Jehovab ge ǃhūbaiba ǃoa a sîbisa, îb ǁîb di khoesi ûiba xoremarib ase mā, khoen ǃaroma. (Mat. 20:28) ǁNā-amagab ge Jesuba ǁîb di ǁāǁnâs tawa ge māsen îb Jehovab ǂhâba hâ-e dī. (Jhn. 6:38; Gal. 1:4) Jesub ûib ge “ǀguiǃās ama” ge māhe, în khoen hîna ǁîb ǃnâ ra ǂgoman di ǁorena ǀûbahe ǁkhā.—Heb.10:​5-7, 10. w23.10 26-27 ¶10-11

Aitsama da ge tātsē ǁōb tsî ǁoreba xu ga ǃnora kaisen ǁoa hâ. (Psa. 49:​7, 8) ǁNā-amagab ge Jehovaba xū-e ge dī, îb Jesuba ǁîb ûiba mā tsî sida ûiba sâu. Jehovab tsî Jesub tsîkha hoakha ge kai ǁguibasa ge dī. Jehovab tsî Jesub tsîn ge dī ǁguibas xa da ǃnāsase ra ǂâiǃgâ khami da ge ǃnāsase xoremariba nî ǃgôaǃgâ. Adammi ge ǁoreb ge o ǀamo ûiba ge ǂoaǃnâ. ǁÎb ǃaromas ǀguis ose xawe ǁîb ǀgôan hoan ǃaromas tsîna. Adammi ge ǂoaǃnâ xū-e ǁama-oas ǃaromab ge Jesuba ǁîb ǀoasa ûiba ge mā. ǃHūbaib aib ge hâ i, ob ge Jesuba ‘ǁore-i xare-e ge dī tama hâ i tsî ams âba xu i ge gāxaǃnâsi-i xare-e ge ǂoaxa tama hâ i.’ (1Pet. 2:22) ǁŌb ge o i ge Jesub ûib tsîna Adammi ûib khami ge ǀoasa i.—1Kor. 15:45; 1Tim. 2:6. w24.01 10 ¶5-6

Jesub ge khâisa hō toas khaoǃgâb ge hoan xa ǃanub gagasi tempeli ǃnâ ge ǂgâ. Nēba da ge ǃgāsase ra mû Jehovab ǂnûiǂgās, ama ǃoabas tis mati a ǃgâisa. Tsî ǁnās ge Jesu Xristub xoremari ǁguibas tsî pristersis ai a ǃgaoǃgaosa. Israeli di ǀgapipristeri ge khoen xa ge kuruhe hoan xa ǃanub ǃnâ gere ǂgâ, xamarin di ǀaob ǁguiba di ǀkha. Xaweb ge Jesuba hoan xa ǃanu ǃkhaib “ǀhommi ǂûb” ǃnâ ra ǂgâ, îb Jehovab aiǃâ ǂhai. ǁNābab ge Jesuba ūb ge hâ i ǂhanuba ge ǁguiba, îb ǀoasa kurusa ūhâ khoeb ase ǃhūbaib ai ûi sida ǃaroma. Îb “ǀgui ǃnās ama ǃhūbaib di ǀuni ǁaegu ǃnâ ǁî-aitsama ǁguibasens ǃnâ-ū ǁorena” ūbē. (Heb. 9:​24-26) Nēsi da ga ǀhomsi tamas ka io, ǃhūbaisi ǃâubasensa ūhâ xawe da ge hoa da Jehovaba gagasi tempeli ǃnâ ǃoaba ǁkhā. w23.10 28 ¶13-14

Jesub di ǃâb xa ǂâiǃgâ re, ǀkhomxaǂgaoxa ǀGapipristeri hîna ǀhomma xu, sida di Gao-aob ase ra ǂgaeǂguiba. ǁÎb ǃnâ-ū da ge Elob di “ǀkhommi trons” aiǃâ ǀgores ǃnâ-ū ǂhai ǁkhā, tsî huiba ‘ǂhanu ǁaeb ai’ a ǂgan ǁkhā. (Heb. 4:​14, 15) Hā re î da tsēs hoasa ǂâiǃgâ Jehovab tsî Jesub ra dība da xūn xa. ǁÎkha sida ūba hâ ǀnammi ge nî tsâǀkhā da, î da ǂgaob ǃgamsiba xu Jehovaba ǃoaba. (2Kor. 5:​14, 15) ǀGui ǃgâi ǀgaub hîna da ǃgôaǃgâsiba ra ǁgaub ge dītsâsa, î da nau khoena hui în ǁîn tsîna Jehovab di ǃoaba-ao tsî Jesub di ǁkhāǁkhāsabe kai. (Mat. 28:​19, 20) Nē i ge Apostel Paulub ge dī-e. ǁÎb ge ge ǂan i “mâ khoe-i hoa-i nî ǃgâiǃō tsî amaba ǂan ǃkhaisab ra ǂgao amaga.”— 1Tim. 2:​3, 4. w23.10 22-23 ¶13-14

Nē xoade da ge aoǁnâ sîsenni ǃnâ khoena ǁkhaeǂgaos ǃaroma ra sîsenū. Tsî ra ǁgau paradais mati nî īsa. ǁNā-amaga da mati nauna nî hui în ǂHaiǂhais 21:3, 4 ǃnâ hâ mîmâis nî ama īsa ǂgom? Tsî mati da sida di ǂgomǃgâsiba a ǀgaiǀgai ǁkhā Jehovab tsî ǁîb mîmâidi ǃnâ? Jehovab ge ǁaposa ǃaromade ge mā da î da ǁîb mîmâide ǂgomǃgâ. ǃAromas hîna da Jehovab mîmais paradais dis ǃnâ ǂgom ǁkhās ge sao ra xoas ǃnâ hâ. ǁNāpa da ge ra khomai: “Tsîb ge trons ai ǂnôaba ge mî: “Mû, hoana ta ra ǀasa kai!” Tsîb ge ǁnāpa xu ge mî: “Nē mîde xoamâi re, ǁîdi a ama tsî ǂgomǂgomsa xuige.”—J.ǂHa. 21:​5, 6. w23.11 3 ¶3-5

Jehovab ǂâiǀgauba go ǁkhāǁkhāsen ǂkham khoeb ge, ǁîb ra ana xūn ǃnâ-ū a ǁgau ǁkhā ǂhanu mîǁguigab ra dīsa. Khoen hîna nētsē sarana ǂom tsî ra ǁgauǂuin ge, Jehovaba ǃgôasiba ūhâba tama hâ. Tsîn ge ǁîna ǁgauoǃnâ ûiga ra ûi. ǁÎn di ǁgauoǃnâ ûib ge ǂaera saran hînan ta anan, tamas ka io aore khoegu tare khoedi khami ra mûsen anaǀgaub ǃnâ-ū ra mûhe. Jesuba ra ǁgae ǂkham ǃgâsab ge amase nî ǂâi Jehovab tae-e ra ǂgaoǀkhā bisa. Tsî nî dītsâ ǁîba ǁgaesa. ǁÎb ge a dîsen ǁkhā: ‘Ti mîǁguiga ra ǁgau ǁnâuǃāxasiba ta ra sîsenūsa tsî ta nauna ǃgôasiba ra ǁgausa? Ti ana ǀgauba nauna ra ǁgau amase ta Eloba ra ǃoabasa?’ (1Kor. 10:​31-33) ǁÎb ǂâiǀgauba ǃgâise ra sîsenū ǃgâsab ge, ǃgâsan xa ǀgui ǃgôahe tide xawe ǁîb di ǀhomsi ǁGûb xas tsîna ǃgôasiba nî ǁgauhe. w23.12 26 ¶7

ǃKharuge ǁaeb ǃnâb ge ‘ǃkhawagas di gao-aoba’ Jehovab di khoen tsîna gere ǃgôaǃgon. (Dan. 11:40) ǂGuro tsî ǀgamǁî torob ǁaeb ǃnâ î ge ǂgui ǃgâsana, toroba ǃoan ge ī ǂgao tama hâ i amaga ǃkhōsis ǃnâ gere ǂganamǂgāhe. Tsî Jehovab ǃoaba-aon ǀgôan tsîn ge skolga xu gere ǃhae-e, ǀkhā-en ge ǁhûi tama hâ i amaga. Xawe nē kurigu ǃnâ î ge Jehovab di khoen hîna ǁnā gao-aob ǃnāga ra hâna ǀkhara ǃâitsâna ra hōǃâ. Aiǁgause, î ge ǃgâsa-e ǁhûis ǁaeb ǃnâ ǁhûi tama i hâ xawe ǀnîsi a tsâ ǁkhā ǀgui ǂgīǂgōsi ǃnans naus xa a ǃgâisa. Tsî a ǃâubasen ǁkhā îs ǁnā ǃnansa ǁhûisa dan. Kaise î ge ǂhâǂhâsa î da tā ǂgīǂgōsi xūn ǃnâ ǀkhā-e ǁhûi, sida dīgu ǃnâs ǀguis ose xawe sida ǂâiǀgaugu tsî tsâsigu ǃnâs tsîna.—Jhn. 15:​18, 19. w23.08 12 ¶17

Ûib di ǀnûgus ǃnâ da ra ǃkhoe hîna, da ge ‘ǁnā ǀgaub ǃnâ nî ǃkhoe, danao kai’ da nîse. (1Kor. 9:24) Jesub ge ge mî: Tā “ǃnāsa ǂûb tsî āb tsî ǂgui ǂhansenain ǀkha ǂgaogu âdo ǃgomǃgom.” (Luk. 21:34) Nē xoas tsî ǀnî hâ di tsîn ge hui du ǁkhā, î du mû mâ ǀkharaǀkharana du nî dīsa, ûib di ǃkhoeǀnûgusa du ra ǃkhoe hîna. ǂAn da ge a ûib di ǃkhoeǀnûgusa da a dan ǁkhāsa, Jehovab ǂhâ da hâ ǀgaiba ra mā da amaga. (Jes. 40:​29-31) ǁNā-amaga, tā ǂau re. Apostel Pauluba ǁgae, ǃgarise ǃkhoe tsî ge ǁîb aisi mâ dansa gere ǁgūbaba. (Fil. 3:​13, 14) ǀNî khoe-i ge nē ǃkhoeǀnûgus ǃnâ ǃkhoebatsi ǁoa, xawe Jehovab di huib ǀkha ǀgui. Jehovab ge a hui du ǁkhā nē ǃgomsina tanisa tsî ǂhâbasa tamana aoǁnâsa. ǁÎb di huib ǀkha da ge nē ǃkhoeǀnûgusa mâǀgai tsî nî dan. w23.08 31 ¶16-17

Jesub ge 12 kurixa, o ra ge ǁîb ǁgûra Jerusalems ǃnâ ge ǁnāxubi. (Luk. 2:​46-52) Josefi tsî Marias tsîn ge ga kō hâ, hoa ǀgôan ge ǁîra ǀkha hâ isa, Jerusalemsa xun gere oa ǁaeb ai. Josefi tsî Marias tsîn ge ǁîba ega sī a hō, os ge Mariasa kaise Jesub ǀkha ge ǁaixa tsî ǁîba ge ǀhapiǂgā-am. Jesub ge nēs a ǁîra ǀhapi ti ga mî hâ xaweb ge ǁîb ǁgûra ǃgôasib ǀkha ge ǃeream. Josefi tsî Marias tsîn ge “tare-eb ǁnās ǀkha ra ǂâibasensa ge ǁnâuǃā tama hâ i.” Xaweb ge noxopa Jesuba “ǁîra gere ǁnâuǀnam.” ǂKhamkhoets asets a ǃgombahe sa ǁgûna ǁnâuǀnamsa, ǁîra ga dīsā tamas ka io ǁnâuǃātsi tama io? Tae-e a huitsi ǁkhā? ǂÂi re, Jehovab nēs xa mati ra tsâsa. Elobmîs ge ra ǁgau, sa ǁgûnats ga ǁnâuǀnam os ge nēsa “ǃKhūba ǃgâiba.” (Kol. 3:20) Jehovab ge a ǂan sa ǁgûn ga hoase ǁnâuǃātsi tama io, tamas ka ion ga satsa ǁnâuǀnams ǃgao a ǃgom ǁkharaga ǁgui o. Xawets ga ǁhûi o ǁîna ǁnauǀnamsa, ots ge kaise Jehovaba ra ǂkhîǂkhî. w23.10 7 ¶5-6

Sa skol ǀhōsa-i ge ǀnîsi a mî ǁkhā, Jehovab ǃoaba-aon ge ǁîn di ǂâiǀgaub mofin xa hâba nî dawa. Nēti-i khoe-e da ge ǂgomǃgâsiba nî mā hoa khoena da ra ǃgôasa. Tsî ra mûǂansa mâ khoe-i hoa-i aitsâma mîǁguiba nî dīsa ǁî-i ûib xa. (1Pet. 2:17) ǁÎ-e da ge a mîba ǁkhā Elobmîs ta mîsa. Elobmîs ǁgaraga da ga sao, o da ǃgâi tsî ǂkhîxa ûiba nî ūhâsa. Khoe-i ga sida ra mî xūn ǀkha ǃgûǀhao tama io, o da ge tā khoe-e ǃhaese nî ǀgoraǃgâ. Aiǁgause, sadu ra skola ǂgâ-u khoe-i ga mî o, mati-i khoe-e amabes ǃnâ Elob ǃnâ a ǂgom ǁkhā? Mî i du nî, khoe-i ge evolusib ǃnâ ra ǂgom tsî ǃnāsa xūn evolusib xa hâna a ǂan ti? ǀNîsi i ge nē khoe-e ǁnâu-i hâ xūn ǀguina ra ǃhoa. ǀNîsi du ge ǁî-e xū-e a mā ǁkhā hîna jw.org sa ǃoa ǁî-e nî ǁnaeǁgau-e kurus xa. ǀNîsi i ge ega nî mā-amsen ǁnāpa i go mû khomaiǃâ-i tamas ka io vidio-e ǃhoaǃgaosa. Nēti i ǀgaub ǃnâ da ga ǁî-e ǃgôasiba ǁgau, o i ge a hui ǁkhā î-i nē khoe-e ega ǃnāsase ǂan ǂgao Elobmîs da mî i xa. w23.09 17 ¶12-13

Jehovab sîsenū da ǁkhā tsîb nî ǀkhae dasa da ge a ǂan, dīsā da ga xawe. ǁKhā da a-i hoa-e dī tsî da ge sida daoga nî ǂhanuǂhanu, î da aiǃgû tsî ǁîb ai ǂgomaiǂnûi ǁkhā. (ǂKhm. 28:13) Simsonni ge ǀoasa kurusa ge ūhâ tama hâ i, xaweb ge ǀûsen tamase Jehovaba ǃoabas ǃnâ ge ǁgūtsâ, Delilas ǀkhab ge dīsās khaoǃgâs tsîna. Jehovab ge ǁîb ǃnâ ge ǀûsen tama hâ i. Elob ge ǁkhawa Simsonna kai ǀgaub ǃnâ ge sîsenū. Jehovab ge noxoba ǁîba ǀgaisa ǂgomsa ūhâ khoeb ase gere mû. Tsîb ge ǁîba ǂgomǂgomsa khoen hîna Hebreǁîn 11ǁî danaǃâs ǃnâ xoamâisan ǃnâ ge ǃkhōǂgā. Kaise i ge ra ǁkhaeǂgao da ǂansa nēti ī ǀnamxaǃnâ ǁGûba da ra ǃoaba ǃkhaisa. ǀGaiǀgaidas turaba ūhâba, ǃgōsase ǂkhabu da ga ǁaeb ai. ǁNā-amaga da ge Simsonni khami Jehovaba nî ǀkhoma ǀgara: “Tita xa ǂâi re. Nē ǃnās ǀguisa ǁkhawa ǀgaiǀgai te re.”—ǂHǂh. 16:28. w23.09 7 ¶18-19

Jehovab di tsēsa ǂâis ǃnâ ūhâs ge, nî ǂkhâǃnâ da nau khoen ǀkha amab ǃgâiǂhôasa ǀgoragusa. Xawe da ge ǀnî ǁaega aoǁnâsa îganǀgē ǁkhā. Tae-i ǃaroma? ǀNî ǁaega da khoena ra ǃao amaga. ǁNās ge Petrub ǀkha ge ī. Jesub nî ǃgamhe ǃoes aib ge Petruba gere ǃao, Jesub di ǁkhāǁkhāsabeb ase ǂanhesa tsîb ge ge ǀūxu bi. (Mat. 26:​69-75) Xaweb ge ega Petruba ǁîb di ǃaoba dan tsî ge xoa: “ǁÎn di ǃaoǃaosa tā ǃao, î ǁkhāti tā ǂâiǂhansen.” (1Pet. 3:14) Petrub di mîdi ge ra ǂgomǃgâ kai da, khoena ǃaosa da a dan ǁkhāsa. Tae-e hui da ǁkhā, î da khoena ǃaosa dan? Petrub ge ra mî ba da: “Xawe sadu ǂgaogu ǃnâ Xristuba ǃaoǃgâba ūhâba.” (1Pet. 3:15) Tsî nēs ge sida ǃKhūb tsî Xristub, ūhâ ǃkharos tsî ǀgaib xa ǂâiǃgâsa ǃkhōǂgā hâ. w23.09 27-28 ¶6-8

Sida tsîn ge aiǃgû tsî nî ǃkham i da tā “xū-e hārebe tama sîsengu ǃkhaenab digu” ǃnâ māǁnâsen. (Efe. 5:11) Ama as ge khoe-i ǃgâi tama ǁgoe-ugu ǀgauga kō tsî ǃgâ. Tsî ǁî-i xa ǃhoa o i ge a supu ǁkhā î-i ǁî-e tsūxu-e dī. (Gen. 3:6; Jak. 1:​14, 15) ǁGâuab ǃhūbaib ge gaxaǃnâ da tsî ra ǂgom kai da, Jehovab ǀaib tsî ǃanuoǃnâsib xa ra mîn ǂhanu tamasa. (2Pet. 2:19) Nē i ge buru kai da tama. ǀGui xū-i ǁGâuab hoaǁae ra sîsenu-i ge khoena ǀkhomaxa kaisa, în tā aitsama ǂâibasen tae-i ǂhanu tsî a tsūs ǁaegu. (Jes. 5:20; 2Kor. 4:4) Buru kai da tama i ge hâ muvin tsî internets ǂhawegu ai hâ xūn, Jehovab ǂhanu-ai ǁgaraga ra ǃgûǂamsa. ǁGâuab ge ra ǂâi kai da ǂgao ǃanuoǃnâ xūn tsî ǃgâi tama ǁgoe-ugu ûiǀgaub, nētsē ǃnāsa khoen xa ra dīhen tsū tamasa. Tsîn ǁnā xūna a ǃnorasa ǃkhaisa.—Efe.5:6. w24.03 22 ¶8-10

Tabernakeli ge Israelǁîn ge tani tsî gere doemâ ū tents khami gere mûsen. ǁAubexan ge 500 kuriga nē tabernakela ge sîsenū, tempeli Jerusalems ǃnâ nî omhes aiǃâ. (Eks. 25:​8, 9; Num. 9:22) Tabernakeli ǃnân ge Israelǁîna ǀhao tsî ǁîn ǁguibade dī tsî gere ǃoaba. (Eks. 29:​43-46) Xaweb ge nē tabernakela Xristeǁîn ǃaroma nî hā ǃgâi xū-i tsîna gere ǂnûǁkhaeba. ‘ǀHomsi xūn sommi’ ase i ge ge ī-i tsî î ge Jehovab kai gagasi tempela ǃoa gere ǁnaeǁgau. Apostel Paulub ge nē “tentommi” [tamas ka io tabernakeli] xa saorase gere mî, “nēs ge ǁgauǁgaus nē hâ ǁaeb ǁga ra ǁnaeǁgausa.” (Heb. 9:9) Hebreǁîna ǃoab gere xoa ǁaeb ǃnâ i ge ǀnai nē gagasi tempela ge hâ i. Nēs ge 29ǁî kurib ǃnâ ge tsoatsoa. ǁNā kurib ǃnâb ge Jesuba ge ǁāǁnâhe tsî Jehovab “kai ǀgapipristeri” ase gagasi tempeli ǃnâ ge ǃoaba tsoatsoa.—Heb. 4:14; ǃNǃkh. 10:​37, 38. w23.10 25-26 ¶6-7

Sada tsîn ge supuse ǀkharaǀkharana nî dī, xūn ga sada ûib ǃnâ ǃgom o î da Jehovaba ǃgâiaǂgaob ǀkha ǃoaba ǀkhara. Mati da a dī ǁkhā? Sada mâsigu ga dawa, o da ge ǁnâuǃāxa tsî ǁî-e nî ūǃoa. Tsî nau khoen di ǂâiǀgaugu tsî mîǁguigu tsîna ǃgôaǃgâsiba nî ǁgau. Jehovab di ǃoaba-aoda ase da ge ra ǁnâuǃāxa ǂgao. Tsî da ge ǃgamǃgamsenxa tsî ǀkhomxaǂgaosib tsîna ra ūhâ ǂgao. Jehovab ge “ǃGareǀui” ti ra ǂgaihe. ǁÎb a ǁaposa tsî gongonhe ǁoa amaga. (Deu. 32:4) Xaweb ge ǁnâuǃāxas tsîna ī. Nē ǃhūbaib ǃnân xūna ra ǀkhara khamib ge sida Eloba mâsib ǃoagu ra dawa. Îb ǁîb ge mîmai xūn hoana ama kai. Jehovab ge ǁîb īsib ǃoagu ge kuru da tsî ǁkhâsib tsîna ge mā î da sida ûigu ga ǀkhara o, ǀkharaǀkhara na dī. ǁÎb ge ǃgāsa Elobmîs tsoatsoade ra mā da, hîna ra hui da na î da gā-ai mîǁguiga dī. Tae-i ǀgui-e da ga ǃkharuǃnâ xawes tsîna. Jehovab aiǁgaus tsî ǁîb mā da hâ tsoatsoadi tsîn ge ra hui da î da ǂan ‘ǃGareǀuib’ a xaweb a ǁnāuǃāxasa. w23.07 20 ¶1-3

Elobmîs ǃnâb ge ǀnamxaǃnâ ǁgûs ǀkha ra ǀgopeǀnōsen. (Jes. 66:​12, 13) Mûnan-ai re ǀnamxaǃnâ ǁgûs ǁîs ǀgôaro-e ra kōǃgâ ǀgausa tsî ǂhâ i hâ xū-e ra māsa. ǂÂiǂhansen da ga, o da ge Jehovab di ǀnammi ai ra ǂgomǃgâ. Tsū xū-e da ga dī, ob ge ǁîba sida ǀnam ǀû tama hâ. (Psa. 103:8) Israelǁaes ge Jehovaba ǃnās hoasa gere tsûtsû xawen ge dīn gere xūn ǃaroma gere ǃhausen, on ge ǁîb di hâhâ ra ǀnamma gere hōǃâ. Aiǁgauseb ge ǀgui ǁae ge mî: ‘Sats ge ti mûǁae a ǃgomǀgausa, tsî a ǃgôaǃgôasa tsî ta ge ǀnam tsi.’ (Jes. 43:​4, 5) Elob di ǀnammi ge dawa tama. Kaise da ga dīsā xawe ǃhōbasen tsî ǁîb ǃoa oa, o da ge nî mû ǀnam dab a ǃkhaisa. ǁÎb ge ra mîmâi ‘ǃnāǂamsaseb nî ǀûba’ dasa. (Jes. 55:7) Elobmîs ge saorase Jehovab di ǀûbasa ra ǁguiǃā, “î gu khoakhoahes di ǁaega hā ǃkhūb di aisa xu.”—ǃNǃkh. 3:19. w24.01 27 ¶4-5

Jehovab ge hōǃâ da ra ǃgomsigu ǃnâ hui da ǁkhā. Aiǁgause, da ga ǀnîsi ǀkharib kai ǀhaos ǃaroma sâǁaeba ǂhâba o. Tamas ka io da ga wekheb ǁaegu hâ ǀhaos ǃaroma ǂgān ǁnâsen o. ǃEna da ge a ôa ǁkhā, î da Jehovab ǃomma sida ûib ǃnâ mû. Buru kai da ra ǃereamdi ǃâubasen tama da hâde da ge a hō ǁkhā. ǁNās xa ǃaromahe hâse î ge sida ǂgomǃgâsib Jehovab ǃnâ da ūhâba a ǀgai ǁkhā. Esrab ge ǃgamǃgamsenxasib ǀkha Jehovab ai huiba ge ǂgan. Dīb nî xūn xab gere ǂâiǂhansen ǃnās hoasab ge ǃgamǃgamsenxase Jehovaba ǃoa gere ǀgore. (Esr. 8:​21-23; 9:​3-5) Esrab tanisen ǀgaub ge ǁîb ǂnamipe ge hâ i khoena ge hui, în ǁîba ǂkhâǃnâ tsî ǁîb ǂgomsa ǁgae. (Esr. 10:​1-4) ǂHâ da hâ xūn tamas ka io sida omaris ǃnorasasib xa da ga ǂâiǂhansen, o da ge ǂgomǃgâsib ǀkha Jehovaba ǃoa nî ǀgore. w23.11 18 ¶15-17

Jehovab ge mî tama hâ ǂhanu-aise da ga mûhe ǂgao, o da Abrahammi ge dīs ǁkhāsa nî dīsa. ǂGui ǀgaugu ǃnâ-ū da sida ǂgomsa ǁgau ǁkhā amaga. ǀHaohâb ǃnâ ǀasase ra hā khoena da ge ǁkhoreǁhare, ǂhâsiba ūhâna a hui tsî omaris ǃnâs tsîna khoexaǃnâsiba ǁgau ǁkhā. Elob ge nē ǀgauga ūǃoa tsî amabes ǃnâ nî ǀkhae da. (Rom. 15:7; 1Tim. 5:​4, 8; 1Jhn. 3:18) ǂHâǂhâsa ǀgaub sida ǂgomsa da a ǁgau ǁkhāb ge, ǁkhoaǂgaose aoǁnâ sîsenni ǃnâ ǁhaosa. (1Tim. 4:16) Jehovab ge mîmâin nî ama īsa da ge sida ǂgoms tsî sîsengu ǃnâ-ū nî ǁgau. Tsî î ǁîb ǀgauga a ǃgâisa. Nēna da ga dī, o da ge ǂgomǃgâsiba ūhâ Elob ǂhanu-ai khoen ase nî mû dasa tsî da nî ǁîb ǀhōsa kaisa. w23.12 2 ¶3; 6 ¶15

ǁŌb nîs aiǃâb ge Gao-aob Davida Salomoba ge mîba: “ǀGaisa îts aose i.” (1Gao. 2:​1, 3) Hoa Xristeǁî aogu ge nētsē ǁnā ǀapemāsa nî sîsenū. ǁNāsa dīs ǃaroma gu ge Elob di ǂhanuba ǁkhāǁkhāsen tsî Elobmîs di daoǁgaude nî sîsenū, ǁîgu di ûib hoab ǃnâ. (Luk. 2:52) Tae-i ǃaroma i a ǂhâǂhâsa î gu ǂkham ǃgâsaga Jehovaba a ǀnam aore-khoe kai? Xristeǁî aorekhoeb ge ǂgui ǂhâǂhâsa ǃereamde omaris tsî ǀhaohâb ǃnâ ūhâ. ǃGâsago ǂgomǃgâsiba da ge ūhâ, hānîǁaeb ǃnâ go nî ūhâ ǃereamdi xa go ra ǂâiǃgâsa. ǀNîsi go ge a mîǁgui ǁkhā Jehovaba ǀoasase ǃoaba tamas ka io ǀhaohâb hui-ao kaisa. Tsî ega ǀhaohâb ǃûi-ao kai. Tsî ǀnîsi ǃgamme tsî ǀgôana ūhâ. (Efe. 6:4; 1 Tim. 3:1) Nē mîǁguiga sīǃnâs ǃaroma go ge Jehovaba ǀnam Xristeǁî kai ǁkhā. w23.12 24 ¶1-2

Xristeǁî ǀhaohâb ǃûi-aogu ge ge ǁgaumâihe, î gu Jehovab di gūna kōǃgâ. Nē ǂgomǂgomsa aogu ge ǃgâsana kōǃgâs di ǁgaumâisa kaise ra ǃgôaǃgâ. Tsî ǃgarise ra sîsen îgu “ǃûi-aogu” hîna ra ǃûigu khami ī. (Jer. 23:4; 1Pet. 5:2) Kaise da ge ra ǃgôaǃgâ, ǁnāti-ī aoga ǀhaohâb ǃnâ ūhâsa. ǀHaohâb ǃûi-aogu ge Gideonni di aiǁgausa xu a ǁkhāǁkhāsen ǁkhā. (Heb. 6:12) ǁÎb ge ge sâuǃkhai-i xawe ǁkhā ǁaeb ais tsîna Elob di khoena gere kōǃgâ. (ǂHǂh. 2:16; 1Kro. 17:6) Gideonni khami gu ge ǀhaohâb ǃûi-aoga ge ǁgaumâihe, î gu Elob di khoena ǃgom ǁaegu ǃnâ kōǃgâ ǁkhā. (ǃNǃkh. 20:28; 2Tim. 3:1) Gideonni di ǃgamǃgamsenxasib tsî ǁnâuǀnamxasiba xus tsîna da ge xū-e a ǁkhāǁkhāsen ǁkhā. ǁÎb di mâǀgais di ǁkhāsib ge ge ǃâitsâhe ǁîb ǁgaumâisab ra dī hîna. Nēsi da ga ǀhaohâb ǃûi-ao tamas ka io ǀnî hâ ǁgaumâisa ūhâ xawe da ge ǁîga da ūba hâ ǃgôaǃgâsib ǃnâ nî kai. Nē ǃgarise ra sîsen gagasi aoga da ge ǂkhâǃnâ ǁkhā.—Heb. 13:17. w23.06 2 ¶1; 3 ¶3