Oktoberi

ǀNî ǁaega i ǁnâuǀnamsa kaise a ǃgomba du? Gao-aob Davidi tsîn ge ti gere tsâ, ǁnās ǀkhab ge ge ǀgore: ‘ǀAsaǀasa re tita ǃnâ sa ores di ǃgâiaǂgaoba, î ǁnâuǀnamxasib gagas ǀkha ǂkhâǃnâte.’ (Psa. 51:12) Davidi ge kaise Jehovaba ge ǀnam i. Xawes tsîna i ge ǀnî ǁaega ǁîba ge ǃgomba i ǁnâuǀnamsa, sada tsîn a ǃgombahe khami. Tae-i ǃaroma? ǂGurose, ǁnâuǀnamoǃnâsib ǀkha da ge ge ǃnae. ǀGamǁîse, ǁGâuab ge ra dītsâ î da sida tsîna Jehovaba mâǃoa, ǁîb ge dī khami. (2Kor 11:3) ǃNonaǁîse, mâǃoaxa ǀgauga ūhâ khoen ǁaegu da ge ûihâ hîna “ǁnān Elob ǃoagu ǁnâuǀnamoǃnân sîsen ga ra saona.” (Efe. 2:2) ǃGarise da ge nî sîsen î da tā ǁore ǂgaos di ǃâitsâgu ǀguiga ǃkham. Xawe ǁGâuab tsî nē ǃhūbaib tsîn da ǁgari da ǁnâuǀnamoǃnâsib tsîna mâǃoa ǁkhā. Jehovab ge ǂnûiǂgā khoesi ǂhanub tsîna da ge nî ǁnâuǀnam. w23.10 6 ¶1

Tae-e da Jesub ge ǁgamme ǂauxûi-i ǃnâ a dawa, buraxa dība xu a ǁkhāǁkhāsen ǁkhā? ǃGamǃgamsenxasib xa da ge ra ǁkhāǁkhāsen. Jesub ge buruxadīb xa ge koasen tama hâ i tsîb ge tātsēs tsîna ǁîb gere dī xūn xa ge koasen tama hâ i. Xaweb ge hoaǁae ǃgamǃgamsenxasib ǀkha, hoa ǂkhaisib tsî koas tsîna ǁîb ǁGûba gere mā. (Jhn. 5:​19, 30; 8:28) Jesuba ǁgae tsî da ga ǃgamǃgamsenxa ǂâiǀgauba sida xa ūhâ. O da ge dī da ra xū-i xare-i xa koasen tide. Tā aitsama koasen. Xawe buruxa Eloba da ra ǃoabas aiǂhanub xa koasen. (Jer. 9:​23, 24) Anub hâ ǃgôasiba da ge nî mā bi. Tātsē da ge Jehovab di huib ose, ǃgâi xū-i xare-e a dī ǁoa. (1Kor. 1:​26-31) ǃGamǃgamsenxa da ga, o î ge ǂhâbasa tama nau khoena da ra dība ǃgâi xūn ǃgao da koasa nî ūsa. Jehovab dī da ra xūna mû tsî ra ǃgôaǃgâsa ǂans ǀkha da ge ǂâu hâ. (ǀGopeǀnō re Mateub 6:​2-4; Heb. 13:16) Jesuba ǁgae tsî da ga ǃgamǃgamsenxasiba ga ra ǁgau, o da ge Jehovaba ra ǂkhî kai.—1Pet. 5:6. w23.04 4 ¶9; 5 ¶11-12

ǃAnu gagab xa ǂkhâǃnâhe hâseb ge apostel Pauluba ǃgâsana ge ǂkhâǃnâ în naun di ǃgâib xas tsîna ǂâi. Mati da ǁnā ǀapemāsa ǀhaodi tawa a ûiǂûi ǁkhā? ǁNāsa da ge a dī ǁkhā ǂâis ǃnâ da ga ūhâ o, naun sida khami ra ǃeream ǂgaosa. Nē ǀgaub ǃnâ ǂâi re. Sadu ǀhōsan ǀkha du ga ǁgamǀhao, o du kaise nî ǃhoa în sadu ǀhōna ǃhoas di ǃē-e tā hō? Tātsēs tsîna. Sadu ge ra ǂhâba în ǁîn tsîna ǁgamǀhaos ǃnâ ǃâ-e ūhâ. ǁKhā ǀgaub ǃnâ da ge ǀhaodi ai nauna ǃēde ra mā ǂgao, în ǁîn tsîna ǃeream ǁkhā. ǀGui ǀgaub hîna da sida di ǃgâsana ra ǂkhâǃnâb ge, ǁîna ǃēsa māsa în ǁîn di ǂgomsa ǁguiǃā. (1Kor. 10:24) Sida di ǃereamde ǃnubuse ūhâ, î-i ǂâusa ǁaeba hâ în naun tsîna ǃeream ǁkhā. ǃNubu ǃereamsa du ga mā, o tā ǂgui xūn xa ǃhoa re. Xoaǀgoras ǃnâ hâ xūn hoana du ga mî o, on ge nauna ǃereaman nî xūna ūhâ tide. w23.04 22-23 ¶11-13

Mâsigu ga dawa, o i ge kaise a ǂhâǂhâsa î da nauna huisa ǂâis ǃnâ ūhâ. ǃGōsase sida aoǁnâ sîsenni ǃnâ-ū.Sida aoǁnâ sîsenne da ge mâsib ra dawa khami nî dī ǁkhā. Aoǁnâba da ra khoen ge ǃkharagagu ǂâi ǀgauga Elob xa ūhâ tsî ǃkharagagu ǃhaodi tsî ǃhūga xu hâ. Apostel Paulub ge mâ mâsib hoab ǃoagu gere dawa. Tsî da ge ǁîb aiǁgausa xūs tsîna ra ǁkhāǁkhāsen. Jesub ge Pauluba ‘apostelse’ ǃhaodi ǃoa ge ǁgaumâi. (Rom. 11:13) ǁNās ǀkhab ge apostel Pauluba Jodeǁîn, Grikeǁîn, gā-ain, ǃgamǃgamsenxan, ǂhanu ǂgaeǂui-aogu tsî gao-aogu tsîna gere aoǁnâba. ǃKharagagu khoen di ǂgaogab nî tsâǀkhā ǃkhais ǃaromab ge Pauluba, “hoana ta ge hoaraga xūn ase ība” ti ge mî. (1Kor. 9:​19-22) ǁÎb ge aoǁnâbab da khoen mapa xu ra hās tsî taen da ǂgomsa ǂōrisase gere kō. Tsîb ge ǁnās ǀkha mâ khoe-i hoa-i mâsib ǃoagu khoen Elob xa nî ǂgaehe ǀgaub ǃnâ ǁîn ǀkha gere ǃhoa. Sida tsîn ge ǃgâi sîsenǂuiba aoǁnâ sîsenni ai a ūhâ ǁkhā, khoen a ǂan xūna sîsenūs tsî ǁîn di ǂhâsib ǃoagu aoǁnâsa. w23.07 23 ¶11-12

Tsamtsiǃnâsib ge ǂkhabusats a ti ǂâibasen tama hâ xawe ǀgaibats ūhâ ti. ǀGaiba i ge ǂhâhâ ǃgom mâsibats ga hōǃâ ǁaeb ai ǃnomsase hâsa. Tsamtsiǃnâsib ge “gagab ǂûb” di ǃâba. (Gal. 5:​22, 23) Grikegowab mîs “tsamtsiǃnâ” ti hâs ge ǀnî ǁaega ra sîsenūhe, ǃgarob di hāba ǃoa ra ǁnaeǁgause noxopa ǂauǂauhe tama hâba. Nē hāb nēsi a ǂau xaweb ge noxopa a ǀgaisa. Khoen ase da mati tsamtsiǃnâ tsî ǁkhā ǁaeb ai a ǀgaisa ǁkhā? Nēsa da ge aitsama dīhō ǁoa. Jehovab ǃanu gagaba da ge nî ǀgoreba tsî nî ǂgan bi, îb hui da î da nē îxa ǀgauba omkhâibasen. ǂGui khoen ge ge ǁkhāǁkhāsen nē îxa ǀgaub tsamtsiǃnâsib tiba ūhâsa. Aiǁgause, ǂgui ǃgâsan ge tsamtsiǃnâsiba ge ǁgau khoen xan gere ǃhō-e o în ǂkhaba. Tsîs ge nēsa mû gere khoena ge hui în ǃgâi ǂâiǀgauba Jehovab ǃoaba-aon ǃoagu hō.—2Tim. 2:​24, 25. w23.09 15 ¶3

Buruxa kēbos ǃnâb ge apostel Johanneba, 24 ǀhaohâb ǃûi-aoga ge mû ǃgōsase Jehovaba ra koa ga. ǁÎgu ge Eloba ge koa mî rase, ǁÎb a anu ǃkhaisa ‘ǂkhaisib, ǃgôasib tsî ǀgaib tsîna ǃkhōǃoasa.’ (J.ǂHa. 4:​10, 11) ǂGomǂgomsa ǀhomǃgāgu tsîn ge ǂgui ǃaromade ūhâ Jehovaba koas diga. ǁÎgu ge ǁîb ǀkha ǀhommi ǃnâ hâ tsî ǃgâise a ǂganbi. ǁÎb di ǀgauga gu ge ra mû, dīb da xūn ǃnâ-ū. Jehovab xūna ra dī ǀgausa gu ga mû o, os ge ǁnāsa ǁîga ra ǂkhâǃnâ î gu ǁîba koasa mā. (Job. 38:​4-7) Sada tsîn ge ǀgoredi ǃnâ Jehovaba nî koa. Tsî da ge ra mîba bî ǂgao, taena da a ǀnams tsî taena da ra ǃgôaǃgâsa ǁîb xa. Elobmîsa du khomai tsî ra ǁkhāǁkhāsen ǁaeb ai, ôa re mâ ǀgaugu Jehovab diga du sado ra ǃgôaǃgâsa. (Job. 37:23; Rom. 11:33) Tsî ǁnāpaxū Jehovaba mîba re, mati du ǁnā ǀgaugu xa ra tsâsa. Tsî da ge Jehovab tsîna a koa ǁkhā, sida tsî ǃhūbaib ǂhawase hâ ǃgâsan tsînab ra hui ǃkhais ǃaroma. ǁÎb ge hoaǁae kōǃgâ tsî ra ǁkhauba da.—1Sam. 2:​1, 2. w23.05 3-4 ¶6-7

Babilons kais ge 1919 nî ǃnâ, Elob khoen ǂam-ais ūhâ ǀgaiba ge ǂoaǃnâ. ǁNā kurib ǃnâ î ge ‘ǂgomǂgomsa tsî ǁnâuǃāxa ǃgāba’ ge īǁkhā kai, în ǃgâi ǂgaoba ūhâ khoena “ǃanu daob” ai ǃgû tsoatsoa. (Mat. 24:​45-47; Jes. 35:8) Kai gangans ǃkharuge ǁaeb di ǂgomǂgomsan hîna ge “ǂhanu-ain di daob” ai a ǃgûna. Tsî a īǁkhā kaina în ǂguina nē gagasi daob aiǃgû tsî Jehovab tsî ǁîb ǂâibasens xa ǁkhāǁkhāsen. (ǂKhm. 4:18) Nēs ge ge īǁkhā kai, în ǀguiǃnâxase Jehovab di ǂgaoǀkhādi ǀkha ûi. Jehovab ge ǃâubasen tama hâ în ǁîna hoase ǀkharaǀkharana dī. Xaweb ge ǁîba ǁîna ǁaeba xu ǁaeb ǀkha ra hui în amaba mûǃā. Kaise da ge hoa da nî ǂkhî mûǂan da ga o, Jehovaba da dī da ra xūn hoan ǃnâ a ǂkhîǂkhî ǁkhāsa. Mâ daob hoab ge ǁaeba xu ǁaeb ǀkha kōǃgâhesa ǂhâhâ. Tsî 1919 na xu î ge “ǃanu daob” ai ge sîsen-e tsoatsoa, în khoena Babilons kaisa xu ǂoa ǁkhā, ama ǃoabasa ǃoa. w23.05 17 ¶15; 19 ¶16

ǂGaeǂguira soros ge ǃkharagagagu komites hui-aogu tsîna ra ǁkhāǁkhā. Nē hui-aogu ge nēsi ǂgomǂgomsase ǁnā ǁgaumâidi ǃnâ ra ǃoaba. ǁÎgu ge a aiǂhumisa Xristub di gūna kōǃgâsa. ǂKhauhesan di ǀgui-i ga kai ǁgâiǀāb ǀams aiǃâ ǀhomma ǃoa ī, ǁaeb ai î ge noxopa ama ǃoabasa nî aiǃgû ǃhūbaib ǂhawase. Jesub Xristub di ǂgaeǂguis ǃnāgan ge Jehovab di khoena tātsē ǀû tide ǁîba ǂgomǂgomsase ǃoabasa. ǂAn da ase i ge ǁnā ǁaeb ai Gogi Magogi, ti Elobmîs ǃnâ a ǂansa ǃhaode ǀhaohâse Elob khoena nî ǁnāǂam. (Ese. 38:​18-20) Xawe ǁnā ǁnāǂams ge ǁaerob ǀguiba nî hâ tsî Elob khoena ǁkhae tide ǁîba ǃoabasa xu. Jehovab ge amase ǁîb khoena nî sâu. ǁHapos ǃnâb ge apostel Johaneba “kai ǂnubis” Xristub di nau gūna ge mû. Johaneb ge ge mîbahe nē “kai ǂnubis . . kai ǁgâiǀāba” ûiǃkharu hâsa. (J.ǂHa. 7:​9, 14) ǂGomǃgâsiba da ge a ūhâ ǁkhā Jehovab ǁîna nî huisa. w24.02 5-6 ¶13-14

Tae-e da a dī ǁkhā î da ǃanu gagaba hō? ǁÎ-e da ge a ǀgoreba ǁkhā, Elobmîsa ǁkhāǁkhāsen tsî Jehovab ǀapeǂhomis ǀkha nî sîsenǀhao. ǁNāsa da ga dī, o î ge nî hui da ‘gagab di ǂûba’ omkhâisa. (Gal. 5:​22, 23) Elob ge ǁîb di gagaba ǁnān hîna ǃanu ǂâis tsî tanisen ǀgauba ra ūhâ ǀgaran ǀguina ra mā. ǁÎb ge ǃanu gagaba māda tide ǁgai xūna da ga ǂâi tsî dī o. (1Tes. 4:​7, 8) Elob ǃanu gagaba da ga ǃkhōǃoa ǂgao, o da ge ‘kēbode tā nî ǃharaxū.’ (1Tes. 5:20) “Kēbodi” ti hâ mîs ge, Jehovab di ǃanu gagab ra mā haisi-amde ǃoa ra ǁnaeǁgau. Nēs ge ǁîb tsēs tsî sîda ûiǃnâ hâ ǁaeb di ǂhâǂhâsasib xas tsîna ra ǃhoa. ǁNā tsēsa da ge ǂhābe tama hâ, ǂâi rase Armagedons sida ûiǁaeb ǃnâ hā tidesa. Xawe da ge hoaǁae ǁîsa sida ǂâis ǃnâ ra ūhâ ǂgao. ǁNās ǀkha da ge “ǃanu tanisens tsî eloǃaoǃgâxasib ǃnâ nî ûi.”—2Pet. 3:​11, 12. w23.06 12 ¶13-14

Xrîsteǁîn ase da tae-e nî dī, ǀōǀkhā khoen di ai-īsigu ga sida selfongu ai ǁgau o? ǃKhaesa da ge nî ûbe tsî kō tide. Nēsa dīs ǀkha da ge nî hui-e ǂâiho da ga a o, sida di ǀhōsagusis Jehovab ǀkha da ūhâs a ǀō-aisa ǃkhaisa. ǀNî ai-īsin ge ǀōǀkha khoen di tama hâ xawe ǃgâi tama ǂâi ǀgauba sida ǃnâ a omkhâi ǁkhā. Tae-i ǃaroma da ǁîna xu nî hâbe? Sida di ǂgaogu ǃnâs tsîna da ge ǃgamme khôas xa ǂâi ǂgao tama hâ. (Mat. 5:​28, 29) ǀHaohâb ǃûi-aob Thailandi ǃnâ ra hâb David ti ǀon hâb ge ra mî: “Dîsen ta ge ra: ‘Ai-īsigu ga ǀōǀkhā khoena ǃkhōǂga tama i xawe ta ga ǁîna a kō o, Jehovaba mati ǁnās xa nî tsâ?’ Nē ǂâi ǀgaub ge ra huite î ta gā-aise tanisen.” Jehovaba ǃaos ge nî hui da, î da tā ǁîba nî ǂkhî-oǃnâ kai xu-e dī. ǁNās ge nî huida î da gā-aise tanisen. ǃKhūba ǃaoǃgâs ge ǂans di ‘tsoatsoasa’ tamas ka io ǃanub di ǂans ge “ǁnâuǃāba hōsa.” w23.06 23 ¶12-13

ǁNā ‘omdi’ ge ǀnîsi sada ǀhaohâga ǃoa ra ǁnaeǁgau. Jehovab ge ra mîmâi kai ǂōǂōsib ǃnâb nî sâu dasa, sada ǃgâsan ǀkha da ga hâ ǀhao o. ǁNā-amaga da ge ǃgarise nî sîsen î da tā sada ǃgâsan ǀkha taniǀnamxas ǀguisa hî. Xawe ǁîn tsîna ama ǀnam, î da ǁnās ǃnâ-ū sâuhe. ‘Jehovab di kai tsēs’ ge kai ǁgâiba khoen ai nî hau. (Sef. 1:​14, 15) Jehovab di khoen tsîn ge ǃgomsiga nî hōǃâ. Xawe da ga nēsi ǀnai aiǂhumisen, o da ge ǃnomsase nî hâ ǁkhā. Tsî nau khoen tsîna nî hui ǁkhā. Tsî da ge mâ ǃgomsi-i hoa-i ǃnâ nî mâǀgai. Tsîn ga sada ǃgâsana ǃgomma hōǃâ. O da ge ra dītsâ ǁîna ǀkhomxaǂgaosiba ǁgausa ǁîna huis ǃnâ-ū. Tsî da ge sida ǃgâsan ǀgūse nî tsâ, ǀnai da ǁîna a ǀnam amaga. Jehovab ge ǁnāpaxu ǀamo ûib ǀkha nî ǀkhae da, hoa ǃgomsin tsî tsūkēǃgâgu ǀuruhe hâ ǃhūbaib ǃnâ.—Jes. 65:17. w23.07 7 ¶16-17

Elobmîs ge ǃnāsase ǂgomǂgomsa-aoga, ǀgaisa khoegu ase ra ǁguiǃā. Xawe hoaǁae a ǀgaisa khoeb tsîn ge hoaǁae ǀgaisase tsâ tama hâ. Aiǁgause, ǀnî ǁaeb aib ge Gao-aob Davidi ‘ǃhomgu’ khamib a ǀgaisa khama gere tsâ. Xaweb ge ǀnî ǁaegu ai gere “ǃao.” (Psa. 30:7) Simsonni ge Elob gagaba xu ǂoaǂamsa ǀgaiba gere hō xaweb ge gere ǂanǃgâ, Elob ǀgaib oseb “nau khoen ǁkhān khami nî ǂkhabusasa.” (ǂHǂh. 14:​5, 6; 16:17) Nē ǂgomǂgomsa-aogu ge ge ǀgaisa ī, Jehovab ǁîga ǀgaiba gere mā amaga. Apostel Paulub ge ge mûǂan ǁîb tsîn ǀgaiba, Jehovaba xu ǂhâ hâsa. (2Kor. 12:​9, 10) ǁÎb ge ǀaeb ǃgomsiba gere hōǃâ. (Gal. 4:​13, 14) ǀNî ǁaegu aib ge ǁîb tsîna ge ǃgombahe i ǂhanu xūna dīsa. (Rom. 7:​18, 19) Tsî ǀnî ǁaeb aib ge gere ǃao tsî ge ǀū-i tae-i ǁîb ǀkha nî īsa. (2Kor. 1:​8, 9) Xaweb ge ǂkhabub gere ǁaeb ai gere ǀgaisa. Mâ ǀgaub ǃnâ? Jehovab ge Pauluba ūhâ tamab ge hâ-i ǀgaiba gere mā, ǁîb ge Pauluba ge ǀgaiǀgai. w23.10 12 ¶1-2

ǀNî ǁaegu ai da ga xū tama ī khami ga ra tsâ, o da ge hoaǁae ǂâis ǃnâ ni ūhâ Jehovab ge aitsama ǁîba ǃoa a ǂgae dasa. (Jhn. 6:44) ǁÎb ge sida ǃnâ mûǁoa da a ǃgâiba ra mû tsî ham da as tsîna ǂgaob ǃnâ a ǂan. (2Kro. 6:30) ǁNās ǀkha da ge Jehovaba a ǂgomǃgâ ǁkhā, ǁîb ga kaise da a ǀō-aisa ti mî o. (1Jhn. 3:​19, 20) Amaba da nî ǁkhāǁkhāsens aiǃâ da ge ǀnîsi nēsi ra ǀhapitsâsen kai da xūna ge dī. (1Pet. 4:3) Jehovaba ǂgomǂgomsase ra ǃoaba ǃgâsan tsîn ge khoesi ǂkhabusasigu ǃoagu noxopa ra ǃkham. ǀNî ǁaegu ai da Jehovab tātsē a ǀûba da ǁoa khami ra tsâ? Aiǁgause apostel Paulub tsîn ge ǀhapitsâsen hâse gere tsâ ǀoasa kurusab ūhâ tama amaga. (Rom. 7:24) Paulub ge ǃhobasen tsî ge ǁāǁnâhe. Xaweb ge noxopa “tita ge apostelgu hoagu xa a ǂkhari” tsî “hoan xa a kai ǁore-ao” ti ge ǂgaisen.—1Kor. 15:9; 1Tim. 1:15. w24.03 27 ¶5-6

ǀGui xū-i hîna da Gao-aob Joasi di ǁgai aiǁgausa xu a ǁkhāǁkhāsen ǁkhā î ge, Jehovaba ǀnam tsî ǁîba ra ǂkhîǂkhî ǂgao ǀhōsana ǁhûisa. Sida xa a kai tamas ka io ǂkham ǀhōsana da ge a ǁhûi ǁkhā. ǂÂis ǃnâ ūhâ re Joasi ge ǁîb di ǀhōsab Jojadab xa ge ǂkham i. ǀHōsana du ga ǁhûi, o dîsen re: ‘ǁÎna ra huite i ta ti ǂgomsa Jehovab ǃnâ ǀgaiǀgai? ǁÎna ra ǂkhâǃnâte i ta Jehovab daoǁgaudi ǃoagu ûi? Jehovab tsî Elobmîs ǃnân ra ǁkhāǁkhāsen xūn xan ra ǃhoa? Jehovab di ǂgaoǀkhān ǃoagun ǃgôasiba ra ǁgau? ǁNâuǂgao ta ra xūn ǀguinan ra mî tamas ka ion ra mî-ūnubate?’ (ǂKhm. 27:​5, 6, 17) Sa ǀhōsan ga Jehovaba ǀnam tama io, ots ge ǁîna ǂhâ tama hâ. Xawets ga Jehovaba ǀnam ǀhōsana ūhâ, o ǁîna ǃkhōǀgara ǁîn ge hoaǁae nî huitsi.—ǂKhm. 13:20. w23.09 9-10 ¶6-7

Grike gowab xoaǀgaub ge Alfa ti hâ mîs ǀkha tsoatsoa tsî Omega ti hâ mîs ǀkha ra ǀam. “Tita ge Alfata tsî Omegata” ti hâ mîs ǃnâ-ūb ge, Jehovaba ra hui da î da ǁnâuǃā, xū-eb ga tsoatsoa ob nî dītoasa. Jehovab ge Adammi tsî Eva hârab ge kuru toas khaoǃgâ, ǁîra ge mîba: ‘Ôananôagu, î ǃgôab ǃnâ ǂguiǂguisen, î ǃhūbaiba ǀoaǀoa, î ǁîb ǂama gaosîsen.’ (Gen. 1:28) “Tita ge tsoatsoata,” ǁnāpab ge ǁîb ǂâibasensa ge ǁguiǃā. ǁAeb ge nî hā ǀoasa ǁnâuǀnamxa surib, Adammi tsî Eva hâra xu ra hāb ǃhūbaiba paradais ǃnâ nî ǀkharaǀkharasa. ǁNā ǁaeb ai i ge Jehovab tita ge “Omegata” ti ra mî khami nî ī. “ǀHommi tsî ǃhūbaib tsîkhab” ge ǂnubi toas khaoǃgâb ge Jehovaba xū-e ge mî, hîna ra ǁgau-e ǁîb ǂâibasens nî ama dīǀoaǀoahesa. Jehovab ge ge ǁapoǁapo khoesib tsî ǃhūbaib ǃaromab ūhâ ǂâibasensab nî dīǀoaǀoasa. Nēs ge hoase nî dīǀoaǀoahe hû tsēdi ǀams ai.—Gen. 2:​1-3. w23.11 5 ¶13-14

Daob hîna Babilonsa xu Israela ǃoa gere īb ge kaise ge ǃgom i. Xaweb ge Jehovaba ge mîmai ǃgomsin hoanab ni ūbesa. ǂGomǂgomsa Jodeǁîn ge ge ǂan i oan ga, on nî hō xūn, ǁîn ge ǁnāxu xūn ǃgâ ai nî ǃgâisa. ǁÎn ga hō hâ ǃgâi xu î ge ama ǃoabasa. Babilons ǃnâ î ge ama tama hâ elogu ǃaroma 50 tempelga ge hâ i. Xawe î ge ǀgui tempeli tsîna Jehovab ǃaroma ge ǀkhai i. Israelǁîn xa î ge altars tsîna ǁîn ǁguibadi ǃaroma ge ǀkhai i, Moseb ǂhanub gere ǂgaoǀkhā khami. Pristergu tsîn ge ge ǀkhai i ǁguibade dīs ǃaroma. ǁNās ǀkha î ge ama tama hâ eloga gere ǃoaba khoena, Jehovaba gere ǃoaban xa ge ǂgui-i. ǁNā ǃkhais ǃaroman ge ǂgui Jodeǁîna gere mûǂui în ǁîn di omsa ǃoa oatsî ama ǃoabasa ǁkhawa tsoatsoa. w23.05 14-15 ¶3-4

Elob ǃanu gagab huib tsîna da ge ǂhâhâ î da aiǃgû tsî ‘ǃnâb ǀgôan’ ase tanisen. Tae-i ǃaroma? ǃAnuse nē ǃhūbaib ǃnâ hâs supu tama amaga. (1Tes. 4:​3-5, 7, 8) ǃAnu gagab ge nî hui da î da tā ǃhūbaib di khoen khami ǂâi, hîna xūna Jehovab ra mû khami mû tama hâna. ǃAnu gagab tsîn ge a hui da ǁkhā î da “ǃgâisib, ǂhanu-aisib tsî ǂgomǃgâsib tsîna” ūhâ. (Efe. 5:9) ǃAnu gagaba da ge ǀgores ǃnâ hō ǁkhā. Jesub ge ge mî Jehovab ge “ǃanu gagaba ǁnān ǂgān bi rana nî mā.” (Luk. 11:13) Jehovaba da ga ǀguiba sida di ǀhaodi tawa koa, os tsîna da ge ǁîb ǃanu gagaba ra hō. (Efe.5:​19, 20) ǃAnu gagab ge nî hui da Jehovaba ra ǂkhîǂkhî ǀgaub ǃnâ ûisa. w24.03 23-24 ¶13-15

ǃNāsase du ǃnūǃnâxasiba ǂhâ hâ? Ti i nî īs ga o, ǁî-e ūhâsa ǀgoreba. ǃNūǃnâxasib ge gagab ǂûn di ǀgui. (Gal. 5:​22, 23) ǁNā-amaga da ge ǀgore tsî ǃanu gagab Jehovab diba nî ǂgan, îb hui da î da ǁnā gagab di ǂû-e omkhâi. Sada ǃnūǃnâxasiba ra ǃâitsâ mâsiba da ga hōǃâ, o da ge ǃanu gagaba nî ‘ǂgan ǀgara’ îb hui da î da ǃnūǃnâxasiba ūhâ ǀgara. (Luk. 11:13) Jehovaba da ge ǂgan ǁkhā îb hui da, î da ǁîb da mû khami xūna mû. ǀGore toa da ga, o da ge tsēs hoasa nî dītsâ î da ǃnūǃnâxasiba ǁgau. ǃNāsase da ǃnūǃnâxasiba ra ǀgoreba, khamib ge nē ǀgauba sada di ǂgaogu ǃnâ nî ǀgai tsî nî sada ûib di ǃâ kai. Elobmîs di aiǁgaudi xa ǂâiǃgâs tsîn ge nēs ǀkha ra hui. Elobmîs ge ǂgui aiǁgaude ūhâ ǃnūǃnâxa ge i khoen dina. ǁNā aiǁgaudi xa da ga ǂâiǃgâ, o da ge ǃnūǃnâxasiba da a ǁgau ǁkhā ǀgaugu xa ra ǁkhāǁkhāsen. w23.08 22 ¶10-11

Jesub ge apostel Petruba ge ǁapoǁapo ba, Jehovab ǁîb di ǂhâsiga nî kōǃgâ ǃkhaisa. Jesub ge ǁîb khâis khaoǃgâ Petrub tsî ǁîb sao-aogu tsîna buruburuxa ǀgaub ǃnâ ǁau-e ge ǃkhōba. (Jhn. 21:​4-6) Nē buruburuxa dīs ge Petruba ge ǂgomǃgâ kai, Jehovab supuse ǂhâb hâ xū-i hoa-e nî mā bi ǃkhaisa. ǀNîsib ge Apostela ra ǂâi-oa Jesub ge mî mîde, Jehovab ǂhâsib ǃnâ hân hoana ‘ǂgurosen ga Elob gaosiba ôa,’ o nî kōǃgâsa. (Mat. 6:33) Nēn hoan ge Petruba ge hui, îb aoǁnâ sisenne ǂgurose ǁîb ûib ǃnâ mâi, ǁîb di ǁauǃkhō sîsenni ose. 33ǁÎ kuri Pinkstertsēs aib ge ǁkhoaǂgaoxase ǂgui khoena ge hui, în ǃgâiǂhôasa ūǃoa. (ǃNǃkh. 2:​14, 37-41) ǁNās khaoǃgâb ge Samariaǁîn tsî Jodeǁî tamana ge hui în ǁkhāǁkhāsen tsî Xristuba sao. (ǃNǃkh. 8:​14-17; 10:​44-48) Jehovab ge Petruba kai ǀgaub ǃnâ ge sîsenu, îb hoa ǃhaodi khoena ǀhaohâb ǃnâ ǂgâxa-u. w23.09 20 ¶1; 23 ¶11

Babilonǁîn ǀgam kuriga ǃkharu hâse Jerusalemsa dīkākā hâs khaoǃgâb ge Babilons di Gao-aob Nebukadnessara kaise ǃaoǃaoxa ǁhaposa ge ūhâ i, kai ai-īsib xa. ǁÎb ge ǁîb di gā-ai khoegu tsî Danieli tsîna ǃkhōǂgā hâse ge mîba î gu ǁîb ǁhapos xa mîba bi tsî tae-es ra ǂâibasens tsîna. Tsî gu ga nēsa dīhō tama io, ob ge ǁîga nî ǃgam. (Dan. 2:​3-5) Danieli ge ǃkhaese xū-e ga dī hâ tamas ka ion ge ǂgui khoena ga ǃgam-e hâ. ǁÎb ge “sī tsî gao-aob mîmās ǁaeb aibe nî mâiǂuihesa ge ǂgan, îb gao-aoba ǁhapos di ǂâibasensa mîǃāba ǁkhā.” (Dan. 2:16) ǁNās ge ǂgoms tsî ǁkhoaǂgaosib tsîna ge ǂhâ hâ i. Elobmîs ge mî tama hâ, Danieli ge ǁhapode ǀnai gere ǁguiǃāsa. ǁÎb ge ǁîb ǀhōsaga ge ǂgan î gu “ǀhommi di Elob ai ǀkhomxaǂgaosiba ǂgan, îb nē ǂganǃgâsiba ǁîga ǂhaiǂhaiba.” (Dan. 2:18) Jehovab ge ǁnā ǀgorede ge ǃeream. Jehovab huib ǀkhab ge DanielaG-aob Nebukadnesari ǁhaposa ge ǁguiǃā. Danieli tsî ǁîb ǀhōsagu di ûib ge ge sâuhe. w23.08 3 ¶4

Kō re ǀnî ǃgâi xūn hîna da ra hōǃâna ǃnūǃnâxa da ga o. ǃNūǃnâxa da ga o da ge ǃnāsase ǂkhî tsî a ǃnomsa. ǁNās ǃnâ-ū i ge ǃnūǃnâxasiba sada sorosi ǂurusib tsî ǂâis ǃaroma a ǃgâi. Nau khoen ǀkha da ga ǃnūǃnâxa, o da ge ǁîn ǀkha ǃgâi ǀhōsagusisa ra ūhâ tsî i ge sada di ǀhaohâb tsîna ra ǀguiǃnâxa. ǃNūǃnâxa da ga, o da ge khoe-i ga ǀara kai da xawe ǃkhaese ǁaixa tide tsî mâsiba ǁgai ǂoa kai tide. (Psa. 37:8; ǂKhm. 14:29) Xawe hoan ǂam-ai da ge sada di ǀhomsi ǁGûba hoaǁae ra ǁgae tsî ǁîb ǃoa ra ǀgū. ǃNūǃnâxasib ge kaise îsa tsî ǃgâi ǀgauba. Hoaǁae i ge supu tama hâ ǃnūǃnâxasiba ǁgausa. Xawe Jehovab di huib ǀkha da ge aiǃgû tsî nē ǀgauba a omkhâi ǁkhā. ǃNūǃnâxasib ǀkha da ǀasa ǃhūbaiba ra ǃâu, hîna da ge saora xū-i ǃnâ ǂgomǃgâsiba a ūhâ ǁkhā: “Mû, ǃKhūb di mûs ge ǁnān ǁîba ra ǃaoǃgân ai hâ ǁnān ǁîb di hâhâ ra ǀnammi” ai ra ǃâuna. (Psa. 33:18) A da sida hoa da aiǃgû tsî ǃnūǃnâxasiba ana re. w23.08 22 ¶7; 25 ¶16-17

Jakobub gere ǁgaus ge nē khoeb ge ǂgomsab ūhâ ti a mî ǁkhā xawe ǁîb di sîsenga tae-e ra ǁgau? (Jak. 2:​1-5, 9) Jakobub ge ‘sara-i tsî ǂû-i tsîna ūhâ tama ǃgâsa-e,’ hui tama ǃgâsa-i xa ra ǃhoa. ǁÎ-i ga ǂgomsa i ūhâ ti mî xawe ǃgâsa-e hui tama io, o î ge ǁî-e ra ǁgau ǂgomsa i ūhâ tamasa. (Jak. 2:​14-16) Jakobub ge ge xoa Raxas a ǃgâi aiǁgausa ǂgomsa sîsengu ǃnâ-ū ǁgaus disa. (Jak. 2:​25, 26) ǁÎs ge Jehovab xa ge ǁnâu tsî ge mûǂan ǁîb Israelǁaesa ra huisa. (Jos. 2:​9-11) ǁÎs sîsengu ǃnâ-ū ǂgomsa ǁgau tsîs ge 2 Israelǁaes ǃkhē-aokha ǁkhōǁkhōsa mâsib ǃnâ ge hui. Nē sîsengu ǃnâ-ūs ge Israelǁaes di tama khoesa, ǂgomsa Abrahammi khami ge ǁgau. Raxas aiǁgausa xu da ge ra ǁkhāǁkhāsen kaise i a ǂhâǂhâsasa, î-i sida ǂgomsa sîsengu ǃnâ-ū mûhe ǁkhā. w23.12 5-6 ¶12-13

Xrîsteǁîn ase da ge ǂkhî tama, Elobmîs di ǃgam xūna da ga ǁnauǃā tama io. Jehovab di ǃanu gagab huib ǀkha da ge, ǃgam xūn Elobmîs ǃnâ hâna ra ǁkhāǁkhāsen ǂgao. (1Kor. 2:​9, 10) Projeksa du ge a tsoatsoa ǁkhā î du ǃgamse ôaǃnâ, Jehovab ǀgūse du nî hāsa ǂâis ǃnâ ūhâse. Aiǁgause, du ge a ôaǃnâ ǁkhā matin ge ǃkharuge ǁaeb Xrîsteǁîna ǀnamma a ǁgau ǀgausa. Tsîs ǁnāsa mati ra ǁgausa, sadob a ǀnam ǃkhaisa. ǁKhāǁkhāsen ǁkhā du ge a matib ge Jehovaba Israelǁîn nî ǃoababi sa gere ǂhâbasa. Tsî a ǀgopeǀnō ǁkhā matib ra ǂhâbasa î da ǃoaba bi. Tamas ka io da ge Jesub ge dīǀoaǀoa kebode a ôaǃnâ ǁkhā nē ǃhūbaib aib ge hâ io. Kaise du ge ǃgâiba a hō ǁkhā nēti i xūna du ga ôaǃnâ o, Ôaǃnâs ǀkha ra hui ǂkhanib Jehovab ǃoaba-aon diba ra sīsen-ūse. Elobmîsa da ga ǃgamse ôaǃnâ, o i ge sida ǂgomsa nî ǀgaiǀgai tsî nî hui da î da ǃKhūba “ǃaoǃgâsa ǁnâuǃā.”—ǂKhm. 2:​4, 5. w23.10 18-19 ¶3-5

Petrub ge sîsenū mîs “ǀaexase” ti hâs ge ra ǂâibasen, “khoraǂuisen” ti. Tsî ǀgamǁî ǃâb ǁnā ǁaraǃās dib ge, ǀaexase ǀnamgus mati nî tsâǀkhā dasa ra ǁgau. Nē ǀaexa ǀnamma ūhâbagus ge ǃgâsan di ǁorena kōǃkharus ti ra ǂâibasen. Nēs xa da ge saorase a ǂâi ǁkhā: ǀNîsi du ge tafelsa ūhâ tsîs ge ǁnā tafelsa ǂgui ǂnaote ūhâ tamas ka io khôahâ ǃâroga. Kaise î ge nî supu, lapiba ū tsî tafelsa ǃgū-aisa, ǀgui ǀkhāb ǀguib ose xawe hoa tafelsa. “ǃGū-ais” ge ra ǂâibasen khoen ǁorena ǀûbasa. ǁNās ǁkhās khami î ge lapib tafels ai hâ ǂnaote ra ǃgū-ai khami, ǀnamma ra ǂkhâǃnâ da nau khoen di ǂkhabusasiga kōǃkharusa. Nau khoena da ūba hâ ǀnammi ge ǁnātikōse nî ǀgaisa, î-i hui da sida ǃgâsana ǀûbasa. Nēs ge ǀnî ǁaegu ai ǁguiǂgāsensa nî ǂhâ. (Kol. 3: 13) Nau khoena da ga ǀûba, o da ge ra ǁgau sida ǀnammi a ǀgaisasa. Tsîs ge nēsa Jehovab tsîna ra ǂkhîǂkhî. w23.11 11-12 ¶13-15

Gao-aob Josiab ge 26 kurixab a hîna tempela ge dī-unu tsoatsoa. ǁNā sîsenni ra dīhe hîna i ge, ‘ǃKhūb ge Moseba mā hâ i ǂhanuba’ ge hō-e. Gao-aob ge nēs tae-e ra mîsa a ǁnâu, ob ge ǁnātimîsi ǀkharaǀkharana dī tsî ǁnāpa a xoasa xūna ge ǁnâuǀnam. (2Kro. 34:​14, 19-21) Elobmîsats tsēs hoasa ra khomai ǂgao? ǁNāsats ga ǀnai ga dī o, ǁkhoaxabahe its a? Huitsi ǁkhā a xoatets ra xoamâi? Josiab ge 39 kurixab a hîna ge dīsā tsîs ge nēsa ǁîb ǁōba ge ǃaroma. Jehovab aib huiba nî ǂgans xab ge ǁîb ǃnâ ge ǂgomǃgâ. (2Kro. 35:​20-25) Nēba da ge xū-e ra ǁkhāǁkhāsen. Matikō kurixa da ga tamas ka io da ga matikō gaxuse, Elobmîsa ga ǁkhāǁkhāsen xawe da ge Jehovaba nî ôa ǀgara. ǁNās ge hoaǁae ǁîb daoǁgausa ǀgoreba, Elobmîsa ǁkhāǁkhāsen tsî gagasise ǀgaisa Xristeǁîna xu da ra hō ǀapemāsa saosa ǃkhōǂgā hâ. ǁNāsa da ga dī, o da ge ǀorose dīsā tsî ǂkhîba nî ūhâ.—Jak. 1:25. w23.09 12 ¶15-16

Elobmîs ge ǂgui taradi hîna Eloba ǃoaba tsî a ǀnam di xa ra ǃhoa. ǁÎdi ge “ǃnomsase tanisen tsî nî ǂgomǂgomsa” dī di ra xūn ǃnâ. (1Tim. 3:11) ǁNās ǂam-ai di ge ǃgâsade ǁîdi ǀhaohâb ǃnâ hâ, Xristeǁî taradi hîna Jehovaba a ǀnamte xu ǂgui xūna a ǁkhāǁkhāsen ǁkhā. ǂKham ǃgâsaso ǂâi re mâ ǃgâsadi ǃgâi aiǁgaute so a ǁgae ǁkhāsa. ǁÎdi ǀgauga ǃgaoǃgâ tsî ǁnāpaxu ǂâiǃgâ re, mati so ǁnā ǀgauga a ǁgau ǁkhāsa. Gagasise kai ǀoahâ Xristeǁî kai ǂgaos ǃaroma da ge ǃgamǃgamsenxasiba ǂhâhâ. Tarekhoes ge ǃgamǃgamsenxas ga, o ǃgâi ǀhōsagusisa Jehovab tsî naun tsîn ǀkha nî ūhâ. Aiǁgause, tarekhoes hîna Jehovaba ǀnams ge ǃgamǃgamsenxase ǁîs ǀhomsi ǁgûb ǂnûiǂgā hâ daoǁgausa ra ǁnâuǀnam. (1Kor. 11:3) ǁNāpab ge Jehovaba ra ǁguiǃā ham-eb ǀhaohâba tsî omarisa kōǃgâs ǃereamsa mā hâsa. w23.12 18-19 ¶3-5

Jehovab ge ra ǃâubasen îb aoba ǁîb tarasa ǀnam tsî ǁîsa sorosise, ǁîs tsâsigu tsî gagasises tsîna kōǃgâ. ǂÂiǀgauba omkhâi, ǃgôasiba tarekhoede ǁgaus tsî ǂgomǃgâhe ǁkhāts a ǃkhaisa ǁgaus ge nî huitsi sa ǃgammeb ǃnâ. ǃGammeb khaoǃgâts ge ǀnîsi a dadasa kai ǁkhā. Tae-ets Jehovaba xu a ǁkhāǁkhāsen ǁkhā îts ǃgâi dadasa kai? (Efe. 6:4) Jehovab ge ǃkhō-oa tamase, ǁîb ǀgôab Jesuba ge mîba ǁîbab a ǀnam tsî ra ūǃoa ǃkhaisa. (Mat. 3:17) Dadasa kaits ga o dītsâ tsî hoaǁae sa ǀgôana mîba re, ǁînats a ǀnamsa. ǁÎn ga ǃgâi xū-e a dī, o tā ǃkhō-oasen ǁîna koasa. Jehovab aiǁgausa ra ǁgae dadasa gu ge ǀgôana ra hui, în ǀgaisa Xristeǁî-ao tsî tara kai. ǀNai nēsi aiǂhomisen re ǁnān hîna sa omaris tsî ǀhaohâb ǃnâ hâna ǀnamma ǁgausa. ǁÎnats a ǀnam tsî ra ǃgôaǃgâsa mîdi ǃnâ-ū nēsi ǁgau re.—Jhn. 15:9. w23.12 28-29 ¶17-18

ǂGomǂgomsa ǃoaba-aon Jehovab din tsîn ge ǃgomsina hōǃâ tsî ra ǀaesen nau khoen khami. ǁNās ǂam-ais tsînan ge ra mâǀgai Eloba ǃhui hâ khoen xan ra mâǃoahe tamas ka io ǁgâiǀa-e amaga. Jehovab nēti-i ǃgomsin sida ǀkha nî īsa ǁkhae tama xaweb ge ra mîmâi huidab nî ǃkhaisa. (Jes. 41:10) ǁÎb ǂkhâǃnâs ǀkha da ge sida ǃgâiaǂgaoba ǃkhōǀgara tsî ǂgomǂgomsase ǁîb ǃoagu a hâ ǀgara ǁkhā, ǃgom ǁaegu ǃnâ. Jehovaba mati nî hui da. Elobmîs ra mî “ǂkhîbab” nî mā da ǃkhaisab ge ra mîmâi. (Fil. 4:​6, 7) Nē ǂkhîb ge ǁîb ǀkha da ūhâ ǀgū ǀhōsagusisa xu ra hā ǃnomsasiba ǃoa ra ǁnaeǁgau. Nē ǂkhîb “ǁnâuǃāb hoaba ǃnā hâb” ge kaise a buruburuxa. Aiǁgause du ge ǀnîsi ra buru, ǀgore toa du hâs khaoǃgâ du ǃnomsase ra tsâ ǀgaub xa. ǁNā tsâsiba du ge ra hōǃâ ǁîb “ǂkhîb” Eloba xu ra hāba ra mā du amaga. w24.01 20 ¶2; 21 ¶4

Jehovaba ǀnam khoen ge ǁîb ǀonsa ǂgaob hoab ǀkha ra koa. Davidi ge ge ǂan i Jehovab ǀonsa koas Jehovaba koas ǀkha a ǀguisa. Jehovab ǀonsa da ga ǁnâu, o da ge ǁîb a mâǃnôa khoesa ra ǂâi. Aiǁgause ǁîb îsa ǀgaugu tsî dīb ge buruxa xūn xa. Davidi ge ǁîb ǁGûb ǀonsa ǃanuse ūhâ tsî gere koa ǂgao. ǁÎb ge ǁnāsa ǁîb “ǃnâ hân” hoan tsî ǁîb ǂgaob hoab ǀkha gere dī ǂgao. ǁNā ǀgaub ǃnân ge Leviǁîna Jehovaba koas ǃnâ ǂgurose daoba ge ǁgau. ǁÎn ge ǃgamǃgamsenxase ge ǂanǃgâ, ǁîn Jehovab ǃanu ǀons anu hâ koasa ǁguiǃā ǁkhā hō tidesa. (Neh. 9:5) Amase ǁnāti i ǃgamǃgamsenxa koas, ǂgaoba xu ra hās ge Jehovab ǂgaoba ra ǂkhîǂkhî. w24.02 9 ¶6

Nēs sadu ǀkha ra īsa du ga mû, o sadu mîǁguib xa ǁkhawa ǂâi re. ǀNîsi i a ǁnâuǃāxasa ǁî-e du a sīǃnâ ǁkhā ǃkhais ǃaroma. Sīǃnâ ǁkhā du a mîǁguiba du ga dīho tama i, ob ge Jehovaba ǁgai xū-i ase mû du tide. (2Kor. 8:12) ǀNai du go sīǃnâ xūna ǂâis ǃnâ ūhâ re. Elobmîs ge ra mî: ‘Elob ge ǂhanuoǃnâ tama hâ. Sadu sîsenneb nî ǀuruse.’ (Heb. 6:10) ǁNā-amaga du ge sadu tsîna tā nî ǀuru. ǀNai du go sīǃnâ xūn xa ǂâi re. Nēsi î ga Jehovab ǀkha ǀhōsagusisa omkhâis, naun ǀkha ǁîb xa ǃhoas tamas ka io ǁāǁnâ kaisensa. ǀNai du ge aiǃgû tsî gagasi mîǁguiga sīǃnâ khami du ge nēsis tsîna sadu di gagasi mîǁguiga a sīǃnâ ǁkhā. Jehovab huib ǀkha du ge, sīǃnâ ǂgao du ra xūna a sīǃnâ ǁkhā. Hoaǁae Jehovab ra hui du ǀgausa mû re. Tsî ǁnās ge nî hui du î du ǃgâiaǂgao, sīǃnâ ǂgao du ra xūn ai du ga sîsen ǁaeb ai. (2Kor. 4:7) ǀÛsen tama du ga io, o du ge kai ǀkhaeba nî ūhâ.—Gal. 6:9. w23.05 31 ¶16-18

Jehovab ge ǀgauga ra ôa îb ǁîb khoena ǁgau ǁînab a ǀnamsa tsîb ǁîna ra ūǃoasa. Xoadi ge ra ǁgau matib ge ǀgam ǃnāra kōse ǁgausa Jesubab a ǀnam tsî ra ūǃoasa. (Mat. 3:17; 17:5) Jehovab sado ra ūǃoasa du ra ǁnâu ǂgao? ǁÎb ge ǀhomma xu sada ǀkha a ǃhoa ǁoa xaweb ge Elobmîs ǃnâ-ū ǁnāsa ra dī. Jehovab Jesub ǃnâ ǃgâiǃgâibasensa ūhâs xa da ga khomai, o da ge ǁîb sida ra ūǃoasa ra ǁnâu. Jesub ge ǁîb ǁGûb ǀgauga ǀoasase gere ǁgae. Jesub ge mati ǁîb ǂgomǂgomsa saosabenab ra ūǃoasa gere ǁgau ǀgausa da ga khomai, o da ge a mûnan-ai ǁkhā Jehovab ǁnā mîde sada ǃoa ra mîsa. (Jhn. 15:​9, 15) ǃGomsina da ga hōǃâ, o i ge ǂâibasen tama Elob di ūǃoasa da go ǂoaǃnâ ti. Xawes ge nēsa ǃēsa ra mā da î da ǁgau, matikōse da Eloba a ǀnam tsî ǁîb ai ra ǂgomaiǂnûisa.—Jak. 1:12. w24.03 28 ¶10-11