Novemberi

ǁGûn ase ǀgôana hui re în, ǁîn a mā ǁkhā ǃeream di ǃaroma aiǂhomisen. ǀNî ǁaegu ai î ge ǂhâǂhâsa xūna ra ǃhoaǃgoahe aiǁgause, ǃgammeb ǃgomsin tsî ǁōreb xa hâ xūn tsîna. Xawe i ge ǀnîsi xoaǀgorasa nî hâ, ǀgôaro-i a ǃeream ǁkhā-e. ǁNās xōǀkhā sadu ǀgôan tsîna hui re în ǁnâuǃā, tae-i ǃaroman ǁîn di ǃomgan ga khui xawe ǃereams ǃēsa māhe tidesa. ǁNāsa du ga dī, o du ge sadu ǀgôana nî hui în tā ǂkhâbuǂâi naun ga ǃēsa māhe o. (1Tim. 6:18) Sida hoa da ge ǂkhâǃnâxa ǃereamde a aiǂhumi ǁkhā, î da Jehovaba koa tsî sida di ǃgâsana ǂkhâǃnâ. (ǂKhm. 25:11) ǀNîsi da ge ǀnî ǁaegu ai sida ǀkha ge ī xū-i xa ǃnubuse a ǃhoa ǁkhā. Xawe da ge nî ǂanbasen î da tā sida xa kaise ǃhoa. (ǂKhm. 27:2; 2Kor. 10:18) Dītsâ da ge ra î da Jehovab, ǁîb mîs tsî hoa khoen ai sida ǂâisa ǂnûi.—J.ǂHa. 4:11. w23.04 24-25 ¶17-18

ǀNammi ge ǂhâǂhâsa, ǂkhaikari tsî ǃgāsase da ga hâ ǂgao o. (Mat. 22:​37-39) Eloba da ūba hâ ǀnammi ge ra hui da, î da aoǁnâ sîsenni ǃnâ mâǀgai ǃgomsina da ga hōǃâ xawe. (2Tim. 1:​7, 8) ǁNān Jehovaba ǃoaba taman tsîna da a ǀnam amaga da ge aiǃgu tsî ra aoǁnâ, selfongu tsî sîǂkhanidi ǃnâ-ūs tsîna. ǃÂubasen da ge ra sida ǁanǁare-aon tsîn ǀgui tsē ǀkharaǀkharana dī tsî ǂhanu xūna nî dīsa. (Ese. 18:​27, 28) ǁAnǁare-aona da ūba hâ ǀnammi ge Xristeǁî ǃgâsan tsîna ǃkhōǂgā hâ. Tsî da ge ǁnā ǀnamma ra ǁgau, ǁîna da ga ‘ǀgaiǀgaiǃnâ tsî ǂkhâkhâi’ o. (1Tes. 5:11) Soldagu ǀguiba torob ǃnâ ra ǃkhamgu khami da ge sida tsîna nî ǂkhâǃnâ gu. ǁNās ǀkha da ge sida tsîna tātsē ǃgâsana ǂanapegase tsûtsû tide. Tamas ka io ǁî-i go tsûtsû da ǃkhais ǃaroma dī ǃoa tide. (1Tes. 5:​13, 15) Sida ǀnammi tsîna da ge ra ǁgau, ǃgâsagu ǀhaohâba ra ǃûiga ǁnâuǀnams ǃnâ-ū.—1Tes. 5:12. w23.06 10 ¶6; 11 ¶10-11

ǀGui ǀgaub sada di ǂgomsa da a ǀgaiǀgai ǁkhāb ge xoremarib xa ǂâiǃgâsa. Xoremarib ge Elob mîmâidi nî ama dīǀoaǀoahesa ra ǁapoǁapo. Xoremarib ge tae-i ǃaroma māhes tsî tae-e î ge ǃkhōǂgā hâ is xa da ga ǃgamse ǂâiǃgâ, o da ge sida ǂgomsa ra ǀgaiǀgai. Elob mîmâis ǀamo ûib ǃgâi ǃhūbaib dis nî dīǀoaǀoahe ǃkhaisa. Tae-i ǃaroma da ǁnāsa a mî ǁkhā? Xoremariba tae-e ge ǃkhōǂgā hâ i? Jehovab ge ǁîb di ǀnamǀnamsa ǀguise ǃnae hâ ǀgôaba, ǀhomma xu ǃhūbaiba ǃoa ge sî, îb ǀoasa kurusa ūhâ khoese ǃnaehe. Jesub ge ǃhūbaib aib ge hâ io ǃkharagagu ǃgomsin ǃnâ ge mâǀgai. ǁNāpaxub ge tsâ tsî tsûtsûsa ǁōba ge ǁō. Jehovab ge kaise ǀgapi marisa ge matare. Sada ǀnamxaǃnâ Elob ge tātsē ga mā-am tama hâ ǁîb ǀGôaba ǃgoma tsâ tsî ǁōsa. Sada ǃgâi xawe ǃnubu ûiroba mās ǃaroma. (Jhn. 3:16; 1Pet. 1:​18, 19) Jehovab ge ǁîb ǀō-aisa ǀGôaba sada huis ǃaroma a mā, amagab ge nî īǁkhā kai î da ǀamose ǀasa ǃhūbaib ǃnâ ûi ǁkhā. w23.04 27 ¶8-9

Jehovaba ǁōhâna khâisa mās di ǁkhoreba ūhâ? Amase ūhâ. ǁÎb ge Elobmîs xoa-aoga ǃanu gagab ǀkha ge daoǁgau, î gu ǁîb mîmâis hānîǁaeb khâis dis xa xoamâi. (Jes. 26:19; J.ǂHa. 20:​11-13) Jehovab ga xū-e mîmâi, ob ge hoaǁae ra dīǀoaǀoa. (Jos. 23:14) Jehovab ge ra ǁkhore ǁōhâna khâisa māsa. Jobi di mîdi xa ǂâi re, ǁîb ge gere ǂgom ǁōb ga xaweb Jehovaba ra ǁkhoresa ǁîba ǁkhawa ûitsamase mûsa. (Job. 14:​14, 15) Jehovab ge ǁkhā ǁkhoreba ǁîb di ǃoaba-aon hoan hîna ge ǁōna ûba hâ. ǁÎb ge khâisa ra mā nî ǂgao în ǂuru tsî ǂkhî ûiba ūhâ ǁkhā. O, biliundi khoen hîna ge Jehovab xan amaba ǁkhāǁkhāsens ǃēsan ūhâ tama hâ hîa a ǁōn xa matis? Sada ǀnamxaǃnâ ǁgûb ge ǁîn tsîna khâisa ra mā ǂgao. (ǃNǃkh. 24:15) ǁÎb ge ra ǂgao în ǃēsa hō tsî ǁîb ǀhōsa kai tsî ǀamose ǃhūbaib ai ûi.—Jhn. 3:16. w23.04 9 ¶5-6

Mati du sadu ǃâubasensa ǀgaiǀgai ǁkhā? Aiǁgause, ǃhūbaib ai ûis ǃâubasensa du ga ūhâ, o khomai re Elobmîs Paradaisa ra ǁguiǃā ǀgausa tsî ǁnās xa ǂâiǃgâ. (Jes. 25:8; 32:​16-18) Mûnanai re ûib mati nî īsa ǀasa ǃhūbaib ǃnâ. ǁNāpa mûnan-aisen re. ǀAsa ǃhūbaib di ǃâubasensa da ga ǀgaisase ǂâis ǃnâ ūhâ ǀgara, on ge sida ǃgomsina “ǁaerob . . tsî . . ǂkhaisib” dis ǀguisa nî ī. (2Kor. 4:17) ǃÂubasens hînab ge mādas ǃnâ-ūb ge Jehovaba nî ǀgaiǀgai da. ǁÎb ge ǀnai ǂhâ da hâ xū-e ge mā da, î da ǁîba xu ǀgaiba hō. ǁGaumâisa dīǀoaǀoas, ǃgomsi-e mâǀgais tamas ka io ǂkhîba ūhâ ǀgaras ǀkha du ga huiba ǂhâ, o Jehovaba ǃoa ǀgore. Tsî ǁîb daoǁgausa ôa Elobmîsa ôaǃnâs ǃnâ-ū. Nau Xristeǁîna xu huiba ūǃoa re. ǁAeba ǁamaǂui tsî hānîǁaeb ǃâubasens xa mûnanai re. ǁNāsa du ga dī, o du ge ‘ǁîb ǂkhaisib di ǁkhāsiba ǃoa hoa ǀgaib ǀkha nî ǀgaiǀgaihe, taniǀnamxasib ǀkha du nî mâǃkharuse, ǃgâiaǂgaob ǀkha.’—Kol. 1:11. w23.10 17 ¶19-20

ǂGui ǃaromade da ge ūhâ, Jehovaba ǀgores ǃnâ-ū gangansa. Ū da hâ ǃgâi xūn hoan ǃaroma da ge a ganganbi ǁkhā. Hoa ǃgâi mādi ǁîba xu ra hā amaga. (Jak. 1:17) Aiǁgause, da ge Eloba gangan ǁkhā sida îxa ǃhūbaib tsî kurub ge xūn hoan ǃaroma. Tamas ka io da ge ǁÎba a gangan ǁkhā sida ûib, omaris, ǀhōsan tsî hānîǁaeb ǃâubasens ǃaromas tsîna. Tsî da ge Jehovaba ra gangan ǂgao, mā-am dab ra ǃkhais ǃaroma î da ǁîb ǀkha ǀō-aisa ǀhōsagusisa ūhâ. ǀNîsi da ge nî ǁgūtsâ, î da ǃaromadi xa ǂâi Jehovab ǃoagu da nî ganganxa di xa. Ganganoǃnâ ǃhūbaib ǃnâ da ge ûi hâ. Khoen ge ǁîn ra ǂhâban ai ǂâisa ra ǂnûi xawe ūnhâna ǃgôaǃgâ tama. Nēti ī ǀgauba da ga ǁgae, o î ge sida ǀgorede hoaǁae ǂgans xa ǀgui nî hâ. Nēs sada ǀkha nî īsa da ga ǂhâba tama io, o da ge aiǃgû tsî Jehovab sida ra dība xūn ǃaroma ǃgôaǃgâsiba nî ǁgau.—Luk. 6:45. w23.05 4 ¶8-9

ǀNamxaǃnâ ǁGûb aseb ge Jehovaba ǂhâba tama hâ tsûba da nî hōǃâsa. (Jes. 63:9) Xaweb ge ǁîba ǁkhauba da tama hâ hōǃâ da ra ǃgomsina xu. ǀNî ǁaegu ai ǃāgu tamas ka io ǀaes flaman ǀkha ra ǀgopeǀnōhena. (Jes. 43:2) Xaweb ge ra mîmâiba da huidab nîsa î da sida ǃgomsina ‘ǃkharu’ nē ǃāgu tsî flamga ǃoa ra ǁnaeǁgauna. Mâ ǃgomsi-i ǀgui-e da ga nēsi ūhâ xaweb ge Jehovaba hoaǁae nî hui da î da ǁîba ǃoaba ǀgara. Jehovab tsîn ge ǁîb di ǀgaisa ǃanu gagaba sida ra mā, î da hui-e tsî nē xūn ǃnâ mâǀgai. (Luk. 11:13; Fil. 4: 13) ǁNās ǃaroma da ge hoaǁae ǂgomǃgâsiba a ūhâ ǁkhā ǁîb hoaǁae ǂhâ da hâna nî mā dasa, î da mâǃkharu tsî ǁîb ǃoagu ǂgomǂgomsase hâ. Jehovab ge ra ǂhâba î da ǁîba ǂgomǃgâ. (Heb. 11:6) ǀNî ǁaegu ai da ge tsâ ǁkhā sida gomsin kaise kai tsî da ǁîna tani ǁoasa. Tsî da ge a înganǀgē ǁkhā Jehovab nî huidasa. Xawes ge Elobmîsa ǂgomǃgâsiba ra mā da, Jehovab ǀgaib ǀkha da ‘ǂnubiǂgoaga [mīrga] nî dan’ ǃkhaisa. (Psa. 18:29) ǁNāti i ǂâiǀgauba da nî mā-ams xa da ge ǂgomǃgâsib ǃnâ nî ǀgore. Tsî da ge nî ǂgomǃgâ Jehovab hoaǁae sida di ǀgorede nî ǃereamsa.—Jak. 1:​6, 7. w23.11 22 ¶8-9

Nēb ge kaise ǀō-aisa ǀgaub ǀnammi ra ǁguiǃāheba. Nē mîdi ge ǃgamme hâ khoen ǃaroma ǁkhaeǂgaos ase ī. Ama ǀnamma ro ge a ūhâba gu ǁkhā. ǁGuiǂgāsensa î ge ǂhâhâ, ǃgamme hâ khoera ga ûitsama ra as kōse ǀnamgu ǂgao o. Nēsa ǁguiǃās ǃaroma da ge ǀaes xa a ǂâi ǁkhā. ǀAes ge gāxuse a khau ǁkhā, khoe-i ga ǀaena ǁgui-aisi o. Xawe i ga khoe-e ǁnāsa dī tama io, os ge ǀaesa a ǁō ǁkhā. ǁNās ǁkhās khami ra ge, ǀnî ǁaega ǃgamme hâ khoera tsîna a tsâ ǁkhā ǁîra ǁaegu hâ ǀnammi ra ǃkhai di. Nēs ge mari ǃgomsigu, ǀaeb mâsigu tamas ka io ǀgôana kaikais danatsûb xa ǃaromahe ǁkhā. ‘ǀAes Jehovab disa’ ra ga ûitsâmase ūhâ ǂgao. O ra ge aob tsî taras tsîna ǃgarise nî sîsen î ra Jehovab ǀkha ra ūhâ ǀhōsagusisa ǀgaiǀgai. w23.05 20-21 ¶1-3

ǁKhoaǂgaosiba omkhâis ǃaroma da tae-e nî dī? Sida di ǁgûn ge a ǂkhâǃnâ da ǁkhā, î da ǁkhoaǂgaoxa. Xawen ge ǁîna sida ǁkhoaǂgaoxa kai ǁoa, ǁîn ǁnā ǀgauba ūhâ amaga. ǁKhoaǂgaosiba ūhâs ge ǀasa xū-e ǁkhāǁkhāsens khami i. ǀGui ǀgaub hîna du ǁnā xū-e ǃgâise a ǂan ǁkhāb ge, sadu ra ǁkhāǁkhā khoe-i xū-e ra dī ǀgauba ǃgâise kō tsî ǁî-i aiǁgausa ǁgaesa. ǁKhā ǀgaub ǃnâ da ge sida tsîna ǁkhoaǂgaoxa ǁkhā, naun di aiǁgausa da ga kō tsî ǁgae o.  Danieli khami da ge Elobmîsa ǃgâise nî ǂan. Tsî da ge Jehovab ǀkha ǀgū ǀhōsagusisa nî omkhâi, ǁîba ǃoa hoaǁae ǃhoas ǃnâ-ū. Jehovab ǃnâs tsîna da ge ǂgomǃgâsib nî ūhâ ǁîb sida ra kōǃgâsa. Tsîs ga sida ǂgomsa ǃâitsâhe, o da ge nî ǁkhoaǂgaoxa. ǁKhoaǂgaoxa khoen ge ǀnî ǁaegu ai khoena xu ǃgôasiba ra hō. ǁÎn ge ǂhauǃnâ ǂgaoga ūhâ khoen tsîna Jehovaba ǃoa a ǂgae ǁkhā. Amase da ge ǁkhoaǂgaosiba da nî omkhâiba ǃgâi ǃaromade ūhâ. w23.08 2 ¶2; 4 ¶8-9

Grike gowab mîs hîna “kōǃgâ” tamas ka io “ǃâitsâ” ti hâs ge, khoen ǃhuniǀurib tsî ǀhaiǀuriba gere ôa ǀgaub ǀkha ra ǀgopeǀnōhe. ǁNā-amaga da ge nî kōǃgâ, khomai tsî da ra ǁnâu xūn a amasa. Nēs ge sida ǃaromas tsîna ǂhâǂhâsa, kai ǁgâiǀkhāb ra ǀgū khami. Khoen ra mî xūn hoana ǂgom tamase da ge sida ǂâi ǀgauba sîsenū tsî ǁî-i ra mî xū-e Elobmîs tsî Jehovab ǀapeǂhomis ra mî xū-i ǀkha nî ǀgopeǀnō. ǁNāsa da ga dī, o da ge demongu di ǂhumib xa ǂgaeǂhapuhe tide. (ǂKhm. 14:15; 1Tim. 4:1) Jehovab di ǃoaba-aon ge ǂnubis (groeps) ase kai ǁgâiǀāba nî ûiǃkharu. Xawe î ge mâ khoe-i hoa-e a ǀū ǁari-i tae-e nî īsa. (Jak. 4:14) Nēsi da ga kai ǁgâiǀāba ûiǃkharu tamas ka io kai ǁgâiǀāb nî hās aiǃâ ǁō. Xawe da ge a ǂan ǂgomǂgomsase da ga hâ, o da ǀamo ûib ǀkha nî ǀkhaehesa. A da hoa da sada ǃâubasens ai ǂâisa ǂnûi tsî aiǂhomisen hâse Jehovab tsēs ǃaroma hâ ǀgara. w23.06 13 ¶15-16

ǀNî kēbodi mati nî dīǀoaǀoahesa da ge a ǀū. (Dan. 12:​8, 9) Xawe mati-i kēbo-e nî dīǀoaǀoahesa da ǀoasase ǂan tama hâs ge ǂâibasensen tama hâ ama kai i tidesa. ǂGom ǁkhā da ge a Jehovab ǂhanu ǁaeb ai, ǂan da nîse ī xūna ǂhanu ǁaeb ai nî mîba dasa nau ǁaeb ǃnâb gere dī khami. ǀGūǁae î ge “ǂkhîb tsî ǃnorasasib ge hâ” ti nî mîhe. (1Tes. 5:3) ǁNāpaxū î ge ǃhūbaib di ǂhanuga, ama tama hâ ǂgomde ǁnāǂam tsî nî dīkaka. (J.ǂHa. 17:​16, 17) ǁNāpaxūn ge Elob di khoena nî ǁnāǂam. (Ese. 38:​18, 19) Nē xūn ge Armagedons toroba nî ǃaroma. (J.ǂHa. 16:​14, 16) ǂGomǃgâ ǁkhā da ge a nē xūn ǀgūǁae nî īsa. ǁNās nî īs kōse hā re î da aiǃgû tsî sada ǀhomsi ǁGûba ǃgôaǃgâsiba ǁgau. Elobmîs kēbodi ai sada ǂâisa ǂnûi tsî naun tsîna huis ǃnâ-ū în ǁkhā xū-e dī. w23.08 13 ¶19-20

Apostel Paulub ge ǂgoms, ǃâubasens tsî ǀnammi xas tsîna a ǃhoa, xaweb ge ǀams ai ge mî: “Nē ǃnonan ǃnâ a kaib ge ǀnamma.” (1Kor. 13:13) Pauluba tae-i ǃaroma ti ge mî ǁkhā i? Hānîǁaeb ǃnâ î ge Elob mîmâi hâ ǀasa ǃhūbaib ǃnâ ǂgomsa ǁgausa ǂhâbasa tide, nē xūn hoan nî ama kai ǃkhais ǃaroma. Xawe da ge hoaǁae Jehovab tsî khoena ǀnams ǂhâsiba nî ūhâ. ǁÎna da ūba hâ ǀnammi ge ǀamosib kōse nî ǀgai. ǀNammi ge ama Xristeǁîn ase ra mâǂoa kai da. Jesub ge Apostelga ge mîba: “Sadu ǁîǃnābe ūbagu hâ ǀnammi aib ge ǃhūbaiba nî mûǂan, ti ǁkhāǁkhāsabedu a ǃkhaisa.” (Jhn. 13:35) ǀNamma ūhâs tsîn ge ra ǀguiǃnâxa kai da. Paulub ge ge mî, ǀnammi ge ‘ǀoasa tsî ǀguiǃnâxa ǃgaeǀhaosa.’ (Kol. 3:14). Apostel Johaneb ge ǁîb ǃgâsana ǃoa ge xoa: “ǁNā-i hîa Eloba ǀnam-i ge ǁî-i di ǃgâsa-i tsîna ǁkhāti nî ǀnam.” (1Jhn. 4:21) ǀNamma da ga ǁgaugu, o da ge Elob tsîna ǀnamma ra ǁgau. w23.11 8 ¶1, 3

Elobmîs ge sada Xristeǁî ûiba ǃkhoes ǀkha ra ǀgopeǀnō. ǃKhoe-aon hîna nē ǃkhoeǀnûgusa ǀams kōse ra ǃkhoe toan ge ǀamo ûiba nî māhe. (2Tim. 4:​7, 8) ǁGūtsâ da ge nî î da ǃkhoe ǀgara, ǃgōsase ǃkhoeǀnûgus ǀams go ǀū amaga. Apostel Paulub ge ǃkhoeǀnûgus ǀkha hui da ǁkhā xū i xa ge mî. ǁÎb ge ge mîba da, ‘mâ ǃgom-i hoa-e dībē, tsî sada aiǃâ ǁgoe ǃkhoeǀnûgusa ǁaposa mâǃkharus ǀkha ǃkhoe.’ Pauluba gereǂâibasen mâ Xristeǁî-i hoa-i ǃgomma nî tani ti? Hî-i, ǁîb ge ti ge ǂâibasen tama hâ-i. ǁÎb gere ǂâibasens ge î da ǂhâbasa tama ǃgom-i hoa-e aoǁnâ. Nē ǃnôa ǃgomsin ge ǂhani da tsî nî tsau kai da. ǃKhaese da ge nēti-i ǃgomsi-e da ūhâsa nî mûǃā, î da ǃkhaese aoǁnâ. Xawe ǁkhā ǁaeb ai da ge tā tani da nî xūna nî aoǁnâ. Nē ǃgomsina da ga tani ǀû, o da ge ǃkhoeǀnûgus ǃnâ ǃâ-e ūhâ tide.—2Tim. 2:5. w23.08 26 ¶1-2

ǁNâuǃāxasib ge ra hui da î da nau khoen di ǂâiǀgauga ǃgôasiba ǁgau. Aiǁgause ǀnî ǃgâsadi ge îsaîsasens xa ǃgâibahe xawe di ge naude ǁnās xa ǃgâibahe tama. ǀNî ǃgâsan ge xûi-e ǀnōsa ǀgaub ǃnâ ās xa ǃgâibahe xawen ge nauna ā tama hâ. Hoa Xristeǁîn ge ǃgâi ǂurusiba ra ǂhapa xawn ge ǃkharagagu ǂurusib ǃgao hâ xūna ra ǁhûi. Hoaǁae da ga sida mîǁguigu ǀguigu ge a ǂhanu di ǂâi tsî ǁnā ǂâiǀgauba naun ai ǁhûi ǁnā. Os ge nēsa ǀnîna ǃnôa kai tsî ǀgorasa ǀhâohâb ǃnâ a ǃaroma ǁkhā. (1Kor. 8:9; 10:​23, 24) Aiǁguase Jehovab ge ana da nî ǀgauba xoaǁgui tama hâ xaweb ge Elobmîs daoǁgaude ra mā da. Elob ǃoaba-aon khami da ge ra ana ǂgao. ǁNās ge ǁnâuǃāxasib, ǃgamǃgamsenxasib, “taob tsî îǂhôasib” tsîna ūhâse. (1Tim. 2:​9, 10) Sida ana ǀgaub ge tā ǁgauǂui da ra khami nî mûsen. Elobmîs daoǁgaudi ge ǀhaohâb ǃûi-aoga nî hui, i gu tā anas tsî ǀûn dawa i ga hā o, ǁîgu di ǁgaraga ǁgui. w23.07 23-24 ¶13-14

Jehovab ge ǁnā ǀgam tarekhoera di aiǁgausa ra sīsen-ū, îb ǁgauda mati da ǂkhîxa hāniǁaeba nî ūhâsa. ǁNān hîna “gâre tarekhoes” di ǁkhauǂuisa ra ūǃoan ge ǁkhoaxa xūna ra ôa, ǃgai tama hâ ǁgoe-ūgu ǀgaub ǃnâ. ǁÎn ge mûǂan tama hâ, ǁnān ra dī xūn ǁîn ǀkha hâna nî ǁaeb ǀkha tsâǀkhāsa. ǁÎn di ǀamǂoas ge “ǃgamse ǁōhân hâǃkhaib ǃnâ hâ.” (ǂKhm. 9:​13, 17, 18) ǁNān hîna tarekhoes ama “gā-aisiba” ra ǂnûǁkhaebas, di ǁkhauǂuisa ra ūǃôan ge ǃgâi hāniǁaeba nî ūhâ. (ǂKhm. 9:1) ǁKhāǁkhāsen da ge ra, î da Jehovab a ǀnam xūna ǀnam tsî ǁîb ǁkhân hâna ǁkhân. (Psa. 97:10) Tsî da ge a ǁkhoaxabahe nauna huisa în, ǃgâiba hō ama “gā-aisiba” xu. Sida ge ǁnā ǃoaba-aon khami ī hîna ǃās di ǀgapiseba xu ra ǂgaiǂuina: ‘ǁNâuǃāoǃnâna ân nēpa ǂâxare.’ Sida tsî ǁnān hîna nē ǁkhauǂuisa ra ūǃoan ǃaroma hâ ǃgâib ge nēsi ǀgui hâ tama hâ. ǁÎn ge ra ‘hâhâ’ tsî ra mā-am da î da ǀamosib kose hâ, ‘ǁnâuǃāxa daoba ra saose.’—ǂKhm. 9:​3, 4, 6. w23.06 24 ¶17-18

Mati du ra tsâ sîsenǁare-ao-i tamas ka io skol ǀhōsa i ga sadu ǂgoms xa a dî du o? Nēsa ra ǂâiǂhansen kai du? ǂGui da âda ge ti ra tsâ. Xawe ǁnāti i dîdi ge khoe-i tae-e ra ǂâis tamas ka io tae-i ǃnâ ra ǂgomsa ǃgāsase a ǁgau da ǁkhā. Tsî da ge ǁnā ǃēsa sîsenū tsî ǁî-i ǀkha ǃgâiǂhôasa a ǀgoragu ǁkhā. ǀNî ǁaega i ge khoe-e sida ǀkha i ra ǂnôagu ǂgao ǃkhais ǃaroma dîsa a dî ǁkhā. ǁNās ge ta nî buru kai da, ǁîn ǀnai sida xa ama tama xūna mîbahe hâ amaga. (ǃNǃkh. 28:22) “ǀUni tsēdi” ǃnâ da ge ûihâ tsîn ge khoena nēs ǀkha ‘nauna mîǁgaiǁgai tsî a ǁkhaesen ǁoa.’ (2Tim. 3:​1, 3) ǀNîsi du ge ra dîsen, ‘mati ta khoexaǃnâ tsî ǃnomsa ǀgaub ǃnâ khoe-i ga ti ǂgoms xa dîna ǃgai tama ǀgaub ǃnâ dîte o nî ǃeream?’ Tae-e sado a hui ǁkhā? ǀGui ǀgaub ǀguib ge hâ, ǁnāb ge tsamtsiǃnâsiba. Tsamstiǃnâxa khoe-i ge ǃhaese ǁaixa tama, xawe ra ǃkhō-oasen ǁî-e ra ǀara kai mâsib ǃnâ i ga hâ o. w23.09 14 ¶1-2

ǀNî ǁaega da ge ǁkhauba da ra ǀapemāde ǀapeǂhumisa xu ra hō. Aiǁgause da ge ra hui-e, î da tā mari-e ǀnam tsî xūn hîna Jehovab ǁgaraga a khôa kai da ǁkhān ǃnâ ǃâ. ǁNā mâsigu ǃnâs tsîna da ge ra mû, mati da ǃgâiba ra hōsa Jehovab daoǁgausa da ga sao o. (Jes. 48:​17, 18; 1Tim. 6:​9, 10) Jehovab ge aiǃgû tsî khoega nî sîsenū daoǁgaude māǃkharusa, kai ǁgâiǀkhāb tsî 1 000 kurigu ǂgaeǂguis ǁaeb ǃnâs tsîna. ǁNā daoǁgaude da nî sao? Jehovab nēsi ra mā daoǁgaude da ra saos ais ge ǁnāsa ǃgaoǃgaosa. ǁNā-amaga hā re î da aiǃgû tsî Jehovab ra mā daoǁgaude sao, ǁgaumâihe hâ aogu ǃnâ-ū. (Jes. 32:​1, 2; Heb. 13:17) ǀGaisa ǂgomǃgâsib ǀkha da ge sida daoǁgau-aob Jehovaba a sao ǁkhā. ǁÎb sida ǀhōsagusis ǁîb ǀkha da ūhâsa a ǁgaiǁgai ǁkhā xūna xu ra ǁkhauba da tsî ǀamo ûiba ǃoa ra daoǁgauda amaga. w24.02 25 ¶17-18

Apostel Paulub ge gere ǃgâiaǂgao, Jehovaba ǃoabasa. Xawe î ge ǁnāsa hoaǁae supu tama ge hâ i. Paulub ge ǃnāsa ǁaegu ai gāxu daoga gere ǃgû. Tsî ǁnās ge ǁnā ǁaeb ǃnâ kaise ge ǃgom i. Tsîb ge Pauluba nē ǁaeb ǃnâ, ‘ǁkhōǁkhōsa dâura ǃāgu ǃnâ-ū gere ǃgû. Tsî tsudī-aon ǀkha’ gere ǀhao. ǂGui ǁaegab ge ǁîna gere mâǃoa khoen xa gere ǂnauhe. (2Kor. 11:​23-27) Tsîn ge ǁîb di ǃgâsan tsîna ǁîb di dītsâna ge ǃgôaǃgâ tama hâ i. (2Kor. 10:10; Fil. 4:15) Tae-e Pauluba ge hui îb Jehovab di ǃoabas ǃnâ aiǃgû? Paulub ge ǃnāsase xoadi ǃnâ Jehovab xa gere ǁkhāǁkhāsen. Tsî ǁîb gere hōǃâ xūn ǃnâ-ūs tsîna. Paulub ge gere ǂgomǃgâ Jehovab a ǀnambisa. (Rom. 8:​38, 39; Efe. 2:​4, 5) Tsîb ge ǁîb tsîna Jehovaba kaise ge ǀnam tsoatsoa. Paulub ge Jehovabab ūba hâ ǀnamma ‘ǁîb khoena ǃoaba-ū tsî ganupe ra ǃoabab’ ǃnâ ge ǁgau.—Heb. 6:10. w23.07 9 ¶5-6

ǂGui khoen ge ra mûǂan ǂhanuba da ǂhâ hâsa tsî da ǀnî ǁgaragu “ǂhanub” ǂnûiǂgā hâ ga nî ǁnâuǀnamsa. Xawe ǀnî khoen ge a îganǀgē ǁkhā, ǂhanuba ǁnâuǀnamsa ǁîna i ǃgâi tamase ra mûsenba amaga. Tamas ka ion ǂhanuoǃnâsiba ǂhanuba xu ra hōǃâ amaga. Elobmîs ge ra mî khoesi ǂgaeǂguidi ǃgomsiga ra ǃaromasa, ǁGâuab ǂgaeǂguis ǃnagan hâ amaga. Xawen ge ǀgūǁae ǁîn hoana nî dīkākāhe. (Psa. 110:​5, 6; Aoǁn. 8:9; Luk. 4:​5, 6) Elobmîs tsîn ge ra mîba da, “ǂhanuba ra mâǃoa-i hoa-i ge Elob di ǂnûiǂgāsa ra mâǃoa” tsî mâǃoa ra î ge ǀgoraǃgâsa nî ǃkhōǃoa. Xawe nēsis ǃaromab ge Jehovaba ge mā-am î gu khoesi ǂhanuga ǃhūbaiba ǂgaeǂgui tsî kōǃgâ hoa xūn ǃgâise ǃhūbaib ǃnâ ra ǃgûsa. Tsîb ge ra ǃâubasen i da ǁîba ǁnâuǀnam. ǁNā-amaga i ge “mâ-i hoa-e . . . surude i hâ-e nî mā,” ǁnās ge ǁgui-ai maris, ǃgôasib tsî ǁnâuǀnamxasib tsîna. (Rom. 13:​1-7) ǁGaraga da ge ǀnîsi sida ǃgâiba tama xū-i, ǂhanuoǃnâ xū-i tamas ka io ǁnā ǂhanuga ǁnâuǀnams a ǃgomsa ra mû. Xawe da ge ǁnā ǂhanuga ra ǁnâuǀnam, Jehovab ti ra mî amaga tsî gu ga ǃaroma tama io, i da sida ǂgomǂgomsasiba Jehovab ǃoagu khôa.—ǃNǃkh. 5:29. w23.10 8 ¶9-10

Simsonni gere ǃnae ǁaeb ǃnâ i ge, Filisteǁîna Israelǁaesa ǂgaeǂgui tsî gere ǁgâiǀā. (ǂHǂh. 13:1) Israelǁaes ge ǃgoma gere tsâ, Filisteǁîn ge ǁgai ǀgaub ǃnâ gere ǂgaeǂgui amaga. Jehovab ge Simsonna ge ǁhûi îb, ‘Israelǁîna Filisteǁîna xu huiǂui.’ (ǂHǂh. 13:5) Nē ǁgaumâisa dīǀoaǀoas ǃaromab ge, Simsonna Jehovab ai ǀoasase ge ǂgomaiǂnûi. ǀGui ǃnâ-i ai î ge, Filisteǁî toroǂnubisa Simsonna Lehi ti ǀon hâ ǃās Judab dis ǃnâ ge ǃkhō. Judab ǃnâ hâ khoegu ge ǃaob xa Simsonna ǃkhō tsî khākhoeb ǃomǁae ge māǁnâ. Simsonni khoen ge ǁîba ǃkhō tsî ǀgam tsurigu ǀkha ge ǃgae tsî ǁîba Filisteǁîna ǃoa ge sī-ū. (ǂHǂh. 15:​9-13) Xawe ‘Jehovab di gagab ge ǀgaiǀgai bis’ khaoǃgâb ge Simsonna ge oresen. Tsîb ge “ǀase ǁō hâ dâuki-i di ǃnâniǂkhōba” hō tsî 1 000 Filisteǁî khoega ge ǃgam.—ǂHǂh. 15:​14-16. w23.09 2 ¶3-4

Jehovab ge ǃkharagagu ǀgauga a ǁhûi ǁkhā, îb ǁîb di ‘ǂâibasensa’ dīǀoaǀoa. “ǁÎb ge kuru xū-i hoa i ge ǁî-i di ǃaromasa ūhâ.” (ǂKhm. 16:4) Tsî Jehovab ra dī xū-i hoa-i ge ǀamosib kōse nî hâhâ. Jehovab di ǂâibasensa a tae? Tsî mâ ǀkharaǀkharanab ge dī, îb nē ǂâibasensa dīǀoaǀoa? Elob ge ǂguroseb ge kuru khoera ǁîb ǂâibasens a taesa ge mîba. ǁÎra ge ge mîbahe “Ôananôagu, î ǃgôab ǃnâ ǂguiǂguisen, î ǃhūbaiba ǀoaǀoa, î ǁîb ǂama gaosîsen. ǁKhati hurib ǁaun, ǀhommi anin tsî hoaraga xamarin tsî ǀguruǃnôan ǂama gaosîsen re.” (Gen. 1:28) Adammi tsî Eva hâra ge Jehovaba ǁnâuǀnamoǃnâ, o i ge ǂâibasen tama ge hâ î Jehovab ǂâibasens dīǀoaǀoahe tidesa. ǁÎb ǂâibasensab nî dīǀoaǀoa ǀgausab ge ge ǀkharaǀkhara. ǂGui kurina ǃkharuhâseb ge ge mîmâi Gaosibab ǀhommi ǃnâ nî ǂnubisa, ǁîb di ǂâibasensa nî dīǀoaǀoase, khoesib ǃaroma nē ǃhūbaib ai.—Mat. 25:34. w23.10 20 ¶6-7

Jehovab ge a hui da ǁkhā î da mâǀgai. Hoaǁae i ge supu tide ǃgōsase da ga ǀgui ǂhabusasiba gaxu ǁae-e a ūhâ o. ǀNî ǁaegu ai da ge sida di ǃgomsin a kai khami a tsâ ǁkhā, apostel Petrub gere ǃkharu ǃnân xa. Jehovab ge ǀgaiba a mā da ǁkhā î da tā ǀûsen. (Psa. 94:​18-19) Aiǁgause ǀgui ǃgâsab ge mofin ǀgauba ǂgui kuriga ge ūhâ i, amabab nî ǁkhāǁkhāsens aiǃâ. ǁÎb ûibab ge ge dawa tsîb ge Elobmîs ǃoagu ge ûi tsoatsoa. Xaweb ge ǀnî ǁaegu ai ǃgâi tama turagu ǀkha ǃgomsiba ge ūhâ i. Tae-e ge huibi îb mâǀgai? “Jehovab ge ra ǀgaiǀgai da.” “Jehovab di ǃanu gagab ǀkha . . . , ta ge ge ǁkhāǁkhāsen, īǁkhā i asa amab di daob ǃnâ aiǃgûsa . . . Jehovab ge ge sîsenute ǀoasa kurusa ta ūhâ tama xawe, tsîb ge hoaǁae aiǃgû tsî ra ǀgaiǀgaite” tib ge ra mî. w23.09 23 ¶12

ǂKham ǃgâsago ǁaeba go ge nî ū, Jesuba ǁgaesa. ǁGae ǁkhāts a ǃgâi aiǁgaude ôa, ǃgâi ǂâiǀgauba omkhâi, ǂgomǃgâhe ǁkhā, xūna ǁkhāǁkhāsen tsî hānîǁaeb ǃaroma aiǂhumisen re. Sîsen aits nî xūn hoan xats ga ǂâi, ots ge ǀnîsi a tsâ ǁkhā nēna sīǃnâs a ǃgom ti. Xawe dīhō ǁkhāts ge a. ǂÂis ǃnâ ūhâ re, Jehovab ge māsenxase ra huitsi ǂgao. (Jes. 41:​10, 13) Tsî ǀhaohâb ǃnâ hâ ǃgâsan tsîn ge a huitsi ǁkhā. Jehovab ǂhâba hâ Xristeǁî-ao kaits ga, ob ge sa ûiba kaise nî ǁkhoaxa. ǂKham ǃgâsago kaise da ge a ǀnam go. Ab Jehovaba sago ra dī sîsen-e ǃnāǂamsase ǀkhae, gagasise ǀgaisa Xristeǁî-ao kai go ra khami. w23.12 29 ¶19-20

Mûnan-ai re ǁkhoaxa ǁaeba du ǃgâsan ǀkha ūhâsa. Tsî du ǁnā ǁkhoaxa ǂûǀhaos tawa fotosa ra ǃkhō. Tsî ǂguro fotos ǀnîsi ǃgâi tamase nî mûsen ti du ra ǂâi, amaga du ge ǁnās ǀkha ǀgam tamas ka io ǃnāsa fotote ra ǃkhō kai. Xawe du ge ra mû ǁnā foto di ǀguis ǃnâb ge ǃgâsaba ǀnom tama hâ. ǁÎsa du ge ǀariǂui tsî nau ǀgam foto ra nî ūhâ ǀgara hoa khoen ǀnom hâ amaga, ǁnā ǃgâsab tsîna ǃkhōǂgā hâse. ǃNāsase da ge ǃgâsan ǀkha da ra ūhâ ǁkhoaxa ǁaega ra ǂâihō. Xawe î ge ǀnîsi ǃgâsa-e ǀnî ǁae ǃgâi tama xū-e mî tamas ka io a dī ǁkhā. Tae-e da ǁnā ǁae nî dī? ǁNā fotosa du go ǀariǂuis ǁkhās khami, ǁnā tsū xū-e ǀariǂui. (Efe. 4:32) ǃGâsa-i go dī xū-e da ge a ǀuru ǁkhā, ǁkhoaxa ǁaeba da ge ǁî-i ǀkha ūhâ-i amaga. ǁNāti ī xūn ǂâis ǃnâ da ǃkhō-mâi hâna da ge, hoaǁae ǃkhōǀgara tsî nî ǃgôaǃgâ. w23.11 12-13 ¶16-17

Xrike mîs nēba ra sîsenūhes ge ra ǁgau tarekhoes ǃamku ǀgaub ǃnâ nî anasa. Tsîs hoaǁae ǃgôasiba nî ǁgausa nau khoen ǁîs ra ana xūn xa mati ra ǂâi tsî ra tsâsa. Kaise da ge a ǂnīsa ǃgâsadi hîna nē ǀapemāsa sao tsî ǃamkuse ra ana di xa. ǂAnsa ūhâs ge ǀkhara ǀgaub hîna di ǃgâsade a ǁgau ǁkhāba. ǂAnsa ūhâsa tae-a ra ǂâibasen? ǂAnsa ūhâs ge ra ǂâibasen mâ-i a ǂhanu tsî mâ-i ǂhanu tamasa ǂans tsî ǂhanu xū-e dīsa ǂansa. Abigails aiǁgausa ǃgaoǃgâ re, ǁîs aob ge ǁgai mîǁguiba ge dī, hîna ge hoa omarisa gere tsâǀkhāba. Abigails ge ǁkhā ǁaeb ai xū-e ge dī. ǂHanu xū-e dīsas ge ge ǁnâuǃā tsî ûiga ge sâu. (1Sam. 25:​14-23, 32-35) ǂAnsa ūhâs tsîn ge ra hui da, i da ǂan mâǁae da nî ǃhoa tsî mâǁae da nî ǃnōsa. Nēs ge ra hui da î da ǀnōsa ǀgauba ūhâ, naun ǃnâ da ga ǃgâiǃgâibasensa ǁgau o.—1Tess. 4:11. w23.12 20 ¶8-9

Apostel Paulub ge nē mîde Romeǁîn di ǀhaohâba ǃoa ge xoa. ǁNāpa ge hâ i ǃgâsan ge Jehovab tsî Jesub tsîn xa ge ǁkhāǁkhāsen. ǁÎn ge ǁkhāǁkhāsenan ge xūn ǃnâ ǂgom tsî ge Xristeǁî kai. ǁNās ǀkhab ge Eloba ǁîna ‘ǂgoms ǃnâ-ū ǂhanu-ai kai,’ tsî ǁîn ai ǃanu gagaba ge ǁhōǂui. Jehovab ge ǁîna ǃanu gagab ǀkha ge ǂkhau. (Rom. 5:1) ǁÎn ge ǃgâi mādawa-amsa ǃoa ge mûǂui ǁkhā i tsî ǃâubasensa ge ūhâ i. Paulub ge ega ǂkhauhesa Xristeǁîn Efeses ǃnâ ge hâ-ina ǃoa, Elob xan ge māhe ǃâubasens xa ge xoaba. Nē ǃâubasens ge “ǀumis . . ǃanun” disa ge ǃkhōǂgā hâ i. (Efe. 1:18) Paulub ge Koloseǁîn tsîna ge mîba, mâpan ǁîn di ǃâubasensa nî hōsa. ǁÎb ge “ǁnā ǃâubasens hîa du ǀhommi ǃnâ ūbahe hâs” ti ge mî. (Kol. 1:​4, 5) ǂKhauhesa Xristeǁîn di ǃâubasens ge, ǀhommi ǃnâ ǀamosib kōse Xristub di ǂgaeǂguis ǃnâ ǀguiba sī ǂgaeǂguisa.—1Tes. 4:​13-17; J.ǂHa. 20:6. w23.12 9 ¶4-5

“Sâu” ti hâ mîs ge soldagu hîna ge ǃāsa gere ǁkhauba ga ǃoa gere ǁnaeǁgau. ǁNā ǁanǂgāsaben ge ǃnorasase gere ǁom, soldagu ǃāsa ra ǁkhaubasan ge ǂan i amaga. ǁNās ǁkhās khami i ge Eloba xu ra hā ǂkhîba sida ǂgaogu tsî ǂâide ra sâu. Tsî da ge ǃnomsase ra tsâ ǃnorasa da asa da a ǂan amaga. (Psa. 4:8) Hanas ǀkha î ge î-i khami i ge sida di mâsiba ǁnā ǁaeb ai dawa tama xawe da ge ǃnomsasiba ra hōǃâ. (1Sam. 1:​16-18) ǃNomsase da ga tsâ o i ge a supu ǃgāsase ǂâi tsî gā-ai mîǁguiga dīsa. Tae-e da dī ǁkhā? ǂÂiǂhansen da ga ǁaeb ai da ge Jehovaba nî ǂgan îb hui da. Mâ ǀgaub ǃnâ? Elob di ǂkhîba du nî hōs kōse ǀgore re. (Luk. 11:9; 1Tes. 5:17) ǃGomsina du ga hōǃâ o ǀgores ǃnâ hâhâ, ǁnāsa du ga dī o du ge Jehovab di ǂkhîb sadu ǂgaogu tsî ǂâide ra sâuba nî hōǃâ.—Rom. 12:12. w24.01 21 ¶5-6

Jesub ge ǁîb ǁGûb ǀonsa ǃanuǃanus ǃaroma tsûtsûhe, mîǁgaiǁgaihe tsî ge ǂhumiǂgā-amhe. ǁÎb ge ge ǂan i ǁîb ǁGûbab ge hoa xūn ǃnâ a ǁnâuǀnamsa tsîb taob nî xū-e ūhâ tamasa. (Heb. 12:2) Jesub tsîn ge ge ǂan i ǁGâuab tsîn ge ǁnā ǁaeb ǃnâ gere ǁnāǂam bisa. (Luk. 22:​2-4; 23:​33, 34) ǁGâuab ge Jesub ǂgomǂgomsasiba gere khôa ǂgao xaweb ge nēs ǃnâ ge dan tama hâ i. Jesub ge ge ǁgau ǁGâuab a kai ǂhumi-aosa tsîb Jehovaba ǂgomǂgomsa ǃoaba-aona ūhâsa, ǃgomsigu ǃnâs tsîna ra mâǀgaina. Sadu ǂgaeǂgui-aoba du ra ǂkhîǂkhî ǂgao? Aiǃgû tsî Jehovab ǀonsa koa re tsî nau khoen tsîna ǁkhāǁkhā în Elob îsa ǀgaugu xa ǁǁkhāǁkhāsen. Nēsa du ga dī, o du ge Jesub aiǁgausa ra sao. (1Pet. 2:21) Jesub khami da ge Jehovab ǂgaoba kaise ra ǂkhî kai tsî ǁGâuab a ǂhumi-aosa ra ǁgau. w24.02 11-12 ¶11-13

ǃKharuge koro kurin ǃnâ î ge miliuns xa ǃnāsa khoena Jehovab di ǃoaba-aose ge ǁāǁnâhe. Jehovab ǃoa du ga māǁnâsen, o du ge Jesub Xristub di ǁkhāǁkhāsabe kaisa ra ǁhûi. Tsî du ge Elob di ǂâisa dīsa ǂhâǂhâsa xū-i ase sadu di ûib ǃnâ ra mâi. Nēsa tae-e ǃkhōǂgā hâ? Jesub ge ge mî: ‘Tita ga sao ǂgaob hoab ge ǁî-aitsama nî ǀurusen.’ (Mat. 16:24) Xrikeǁî mîs “ǀurusen” ti hâs ge “aitsama hî-i” ti mîsen tis tsîna a ǂâibasen ǁkhā. Jehovab ǃoa du ga māǁnâsen o du ge ǁîb ǂâis ǀkha ǃgûǀhao tama xūn hoana nî ǂkhā. (2Kor. 5:​14, 15) ǁNās ge ra ǂâibasen “sorosi turagu,” ǀaiba ǃkhōǂgā hâ ga xu du nî ǂgōsensa. (Gal. 5:​19-21; 1Kor. 6:18) Nē mîmāde ǁnâuǀnamsa sadu ûiba ra ǃgom kai? Hî-î, Jehovaba du ga ǀnam tsî ǁîb ǂhanub sadu ǃgâib ǃoa hâ ti ǂgom, o du ge ti tsâ tide.—Psa. 119:97; Jes. 48:​17, 18. w24.03 2 ¶1; 3 ¶4

Jehovab ge ǁîb mā-amsa ūhâ khoena ǃanu gagaba ra mā. (Mat. 12:18) Dîsen ǁkhā da ge a, ‘ti ûib ǃnâ ta Elob ǃanu gagab xa ra ǃaromahe ǀgauga ra ǁgau?’ Jehovaba du ge ǂans aiǃâsa xu du nēsi ǃnāsase ǃnūǃnâxasiba ūhâsa du ra ǃgaoǃgâ? Elob gagab ǂûga ǁgausa du ra ǁkhāǁkhāsen khami i ge ra ǃgāsa Jehovab mā-amsa du ūhâsa. Jehovab ge ūǃoab ra khoena xoremariba ra mā. (1Tim. 2:​5, 6) Xoremarib ǃnâ ǂgom tsî da ga ǁāǁnâhe xawe da noxopa Jehovab ūǃoa da tama khami ra tsâ? ǂÂis ǃnâ ūhâ re hoaǁae ta ge sida tsâsiga ǂgomǃgâ tama. Xawe da ge Jehovaba ǂgomǃgâ ǁkhā. Xoremarib ǃnâ ra ǂgomnab ge ǂhanu-aise ǁîb mûǁae ra mû tsîb ge ra mîmâi ǁînab nî ǀkhaesa.—Psa. 5:12; Rom. 3:26. w24.03 30 ¶15; 31 ¶17