Desemberi

Jehovaba ǁōhâna khâisa mās di ǀgaiba ūhâ? Îo, ǁÎb ge a “Hoaǀgaixa.” (J.ǂHa. 1:8) ǁÎb ge kai ǀgaiba ūhâ mâ khākhoe-i hoa-e dansa, ǁōb tsîna ǃkhōǂgā hâse. (1Kor. 15:26) ǀNî hâ ǃaromas hîna ta a ǂan, Elob ǁōhâna khâisa mās di ǁkhāsiba ūhâs ge ǁîb ge mâ xū-i hoa-e a ǂâihō ǁkhā. Tsîb ge mâ ǀamiros hoasa ǁîs ǀons ai ra ǂgai. (Jes. 40:26) ǁÎb ge ǁnān hîna ge ǁōn tsîna ra ǂâihō. (Job. 14:13; Luk. 20:38) ǁÎb ge khâisab nî mā khoena īn ge ī ǀgaub hoab tsî ǁîn ǂâi di ǀkha supuse a ǂâihō ǁkhā. Jehovab di mîmâis hāniǁaeb di khâis ǃnâ da ge a ǂgom ǁkhā. ǂAn da amaga ǁîb xū-e di ǀoaǀoas di turab tsî ǀgaib tsîna ūhâsa. ǂÂi re ǀnî ǃaromas hîna da Elob mîmais ǃna ǂgom ǁkhāsa. Jehovab ge ǀnai khoena khâisa ge mā. Elobmîs di ǁaeb ǃnâb ge Jehovaba ǀoro ǂgomǂgomsa-aoga ǀgaiba ge mā, î gu ǁōhâna ǂkhaiǂkhai Jesuba ǃkhōǂgāhâse. w23.04 9-10 ¶7-9

ǃGâi tsî tsamtsiǃnâǀgaub ǃnâ da ga ǃhoa, on ge khoena ǃgâ tsî ǁgamǀhaos ǀkha aiǃgû ǁkhā. Xawe i ga khoe-e ǃhō da tsî ǂkhawa u da, o i ge ǂhabasa tama hâ ǁî-i ǀkha ǂnoagusa. (ǂKhm. 26:4) Xawe ǃnāsa khoen ge ti ī tama hâ, ǂguin ge a ǃgā ǁkhā. ǃGâiba da ge nî hō, tsamtsiǃnâsiba da ga ǁkhāǁkhāsen o. ǀGore tsî Jehovab ai ǀgaiba ǂgan re î du tsamtsiǃnâsiba ūhâ ǀgara, khoe-i ga ǃgom dîde dî tamas ka io ǃgâi tama ǀgaub ǃnâ hâ-ū du o. Sadu tsamtsiǃnâsib ge nî hui, î-i ǃkharagaǃnâgu ǂâiǀgauga tā ǂkhabab ǃnâ ǀam. Sadu tsamtsiǃnâ tsî ǃgôasib ǀkha ra dî-e ǃereamdi ge, ǀnî ǃgâ-aona nî hui ǁîn ǂâiǀgaub sida tsî Elobmîs xan ūhâb dawa. “Hoaǁae ǂhomisen hâse hâ. . . ǃereams ǃaroma.” Xawe ǁnāsa tsamtsiǃnâsib tsî ǃgôasib tsîkha ǀkhā dī re. (1Pet. 3:15) Ab tsamtsiǃnâsiba sadu ǀgai. w23.09 19 ¶18-19

Kō re mati da ǃnūǃnâxasiba saora haka ǃâgu ǃnâ a ǁgau ǁkhā ǀgausa. ǂGurose, ǃnūǃnâxa khoe-i ge ǃhaese ǁaixa tama. ǁAixa kaihe i ga, o î ge ǃnomsase ra hâ tsî i ge ǁnā khoe-e dī ǃoa tamas ka io ǃhoa ǃoa tama hâ ǁaixa i ga xawe. (Eks. 34:6) ǀGamǁîse, ǃnūǃnâxa khoe-i ge ǃnomsase ra ǃâu ǀgara. ǃÂubasenhe tama hâse i ga xū-e gaxuse ū, o i ge ǃnūǃnâxa khoe-e ǁaixa tama i tsî ǂhanihe tsoatsoa tama hâ. (Mat. 18:​26, 27) ǃNonaǁîse, ǃnūǃnâxa khoe-i ge ǃnoesase xū-e dī tama. ǃNūǃnâxa khoe-i ga ǂhâǂhâsa sîsenne ūhâ, o i ge ǃnoesase ǁî-e dī tama hâ. Xawe i ge ǂhâbasa ǁaeba ǁamaǂui tsî ra ǀapeǁgui nē sîsen-e ǃgâise dīsa. Hakaǁîse, ǃnūǃnâxa khoe-i ge ra dītsâ î-i ǃgae tamase ǃgomsin ǃnâ mâǀgai. ǁÎ-i ge ǁkhā i a-i hoa-e ra dī, î-i ǃâitsâgu ǃnâ ǃgâi mûǂuiba ūhâ. (Kol. 1:11) Jehovab di ǃoaba-aose da ge ǃnūǃnâxasiba nē hoa ǀgaugu ǃnâ nî ǁgau. w23.08 20-21 ¶3-6

Jehovab sida ǂgaoga ra ôaǃnâ amaga, î ge a ǂhâǂhâsa ǂgaoga da nî ǁkhaubasa. ǁÎb ge nau khoen da mûs xa ǃgamse ra mû tsî a ǂan mâ khoeda asa. ǁÎb ge nî ǀnamda ǁîb di ǀapemādi xa da ga ǂâi o, hîna ǀamo ûiba nî mādate. (Jhn. 4:14) ǁNā-amaga da ge nē ǃhūbaib di ǁgai ǀgaugu tsî ǁGâuab di ǂhumib xa tsâǀkhā-e tide. (1Jhn. 5:​18, 19) Jehovaba da ra ǀgū khami î ge sida ǀnammi tsî ǃgôaǃgâsib ǁîba da ūba hâba nî kai. Sida ǁGûba da tsûtsû ǂgao tama hâ amaga da ge ǁoreb xa ǂâis tsîna nî ǃhui. Martas, ǃgâsas hîna Kroatiab ǃnâ ra hâs tsî ǃgâi tama hâ ǁgoe-ūgub ǀkha ge ǃâitsâhes ge ra mî: “Kaise ta ge ge ǃgombahe i ǃgâise ǂâisa. Tsî ǁnā ǁoreb tsâsiga dansa, ǁaerob di ǁkhoab ǀguisa î-i amaga. Xawe Jehovaba ǃaos ge ge huite.” Eloǃaoǃgâxasiba nēsa mati ge īǁkhā kai? Martas ge ra mî, ǁîs nē mîǁguib ga hau hâ ǃgomsigu xa gere ǂâisa. Sida ge ǁkhā xū-e a dī ǁkhā. w23.06 20-21 ¶3-4

Jesub ge ge ǂan i, Jehovab ǂâibasens asa ǁîb ǀonsa ǃanuǃanusa. ǁNā-amagab ge ǁîb saosabena ge mîba în: “Sida Îtse ǀhommi ǃnâ hâtse sa ǀonsa as khaihe re” ti ǀgore. (Mat. 6:9) Jesub ge ge ǁnâuǃā hoa kurusaben [khoen] nē ǃgomsiba ra hōǃâsa. ǀNî hâ gagasi kurusabe-i xare i tsîn ge Jesub ge ǁîb ǁGûb ǀonsa ǃanuǃanu ǀgaub ǃnâ ǃanuǃanu tsâ tama. Jesub ge ǃkhōhe, o i ge ǁîb mâǃoa-aona ge ǂgāri-am bi ǁîb ǁGûbab ǃgôasiba ūhâba tamasa. Jesub ge gere tsâ ǁîb ǁGûb ǀonsa ǁgaiǁgai, tamas ka io ǂhumiǂgā-ams ge hoan ǂam-ai kai ǁore ti. ǁÎb ge gere ǂâiǂhansen nēs ǃaromab īǁkhā î ga, o ǀhapiǂgā-amhe tsî nî ǁkharahesa. ǁNā-amagab ge ǀnîsi Jesuba kaise gere “ǃao” ǃkhōheb nîs aiǃâ.—Luk. 22:​41-44. w24.02 11 ¶11

Sada ûib di ǃkhoeǀnûgus ǃnâ da ge Jehovab tsî Jesub tsîna ǃnāsase nî ǀnam, omaris khoena da a ǀnams xa. (Mat. 10:37) Nēs ge ǂâibasen tama sada omaris ǃereamde da nî ǁnāxūǃnâsa, ǁî-i Elob tsî Xristub tsîna ǂkhîǂkhîsa xu ra ǃkhō-oa dase. Elob tsî Xristub tsîna ǂkhîǂkhîs ǃaroma î ge a ǂhâbasa, sida di omaris ǃereamde da nî kōǃgâsa. (1Tim. 5:​4, 8) ǁNāsa da ga dī, o da ge ǃnāsa ǂkhîba nî hō. ǁNās ǂam-aib ge Jehovaba a ǂan omaridi nî ǂkhîsa, aob tsî taras tsîn ga ǀnammi tsî ǃgôasib ǀkha hâ-ūgu. ǁÎra ǀgôana ǀnam tsî ǁkhāǁkhā tsîn ga ǀgôana ǁgûna ǁnâuǀnam o. (Efe. 5:33; 6:​1, 4) Nēsits ga ao, tara tamas ka io ǀgôa xawe Elobmîs gā-ai ǀapemāde sao. Tā sats ǂhanu a ti ra ǂâi xū-e dī tsî khoen hoaǃnâ-aixase ūhâ ǁnaetiga sao. Tamas ka io ǂansa ūhâ khoen ra mî xūna dī. Elobmîs ai a ǃgaoǃgaosa ǂkhanina ǃgâise sîsenū. ǁÎn ge mati da Elobmîs tsoatsoade nî sîsenū ǀapemāde ǃkhōǂgā hâ. w23.08 28 ¶6-7

Xristeǁî ǃgâsas ge ǀnî xūna nî ǁkhāǁkhāsen. ǀNî xūn hînas tare ǀgôasa ǁîs ǀgôasis ǃnâ ra ǁkhāǁkhāsenan ge ǁîs ûib ǃnâ nî huisi. Aiǁgause, khomai tsî xoasa ǁkhāǁkhāsen re. ǀNî ǃhaodi ǃnâ i ge khomai tsî xoasa ǂhâǂhâsa tama hâ tarekhoedi ǃaroma. Xawe i ge a ǃgâi tsî ǂhâǂhâsa în hoa Xristeǁîna khomâi tsî xoasa ǁkhāǁkhāsen. (1Tim. 4:13) ǁNā-amaga ǃgom i ga xawe aiǃgû re i ǁkhāǁkhāsen ǀgara. Tae-i ǃaroma? ǁNās ge a huisi ǁkhā is sîsen-e hō. Tsî i ge nî supuba si Elobmîsa ǁkhāǁkhāsen tsî nauna ǁkhāǁkhāsa. ǁNās ǂam-ais tsînas ge Jehovaba nî ǀgū, Elobmîsa khomâi tsîs ra ǂâiǃgâ ǁaeb ai.—1Tim. 4:15. w23.12 20 ¶10-11

Jehovab ai huiba ǂgan re î du ǃâitsâga mâǃoa. ǀOasa kurusa da ūhâ tama hâ xui-ao da ge hoaǁae, tsū xūna dis di ǃâitsâga ra ǃkharuǃnâ. ǁGâuab ge ǁkhāb a-i hoa-e ra dī îb ǁnā ǃkhamsa ǃgomǃgom. ǀGui ǀgaub hînab ǁnā-e ra dī î ge sida ǂâi ǀgauba ǀuriǀurisa, ǃgâi tama ǁkhoaxa ǁaeba ūhâs ǃnâ-ū. ǁNāti-i ǁkhoaxa ǁaeba ūhâs ge sida ǂâi ǀgauba, ǀurixa ǂâi ǀgaugu ǀkha a ǀoaǀoa ǁkhā, ǂâidi hîna sida ǂganagab di khoeba a ǀuriǀuri ǁkhāna tsî a ǁore kai da ǁkhana. (Mrk. 7:​21-23; Jak. 1:​14, 15) Jehovab huiba da ge ǂhâhâ, tsū xūna dīs di ǃâitsâba da ga dan ǂgao o. Jesub ge saora-e ǁîb di ǁkhāǁkhāsabega ge ǁkhāǁkhā sida îtseb ǀgores ǃnâ: “Î tā ǃâitsâb ǃnâ ǂgaeǂgui da, î ǂkhababa xu ore da.” (Mat. 6:13) Jehovab ge ra huida ǂgao xawe da ge nî ǂgan îb huida. Tsî da ge sida ǀgoredi ǀkha nî sîsenǀhao. w23.05 6-7 ¶15-17

ǃGamme hâ khoe-aogu ra ga, ǁîra ǀhommsi ǁGûb ǀkha ra ūhâ ǀhōsagusisa a ǃgôaǃgâ. O ra ge ǁîra māsenxase ǁîb ǀapemāde a ǃgâ ǁkhā, î ra ǃgomsin hîna ǁîra ūbagu hâ ǀnamma a ǃkhai kai ǁkhāba xu ǂgōsen tsî sîsenǂam ǁkhā. Gagasi khoen tsîn ge ra dītsâ Jehovaba ǁgaesa. Tsîn ge ǁîb ūhâ ǀgaugu tsîna ra ǁgau. Aiǁgause, khoexaǃnâsib, ǃnūǃnâxasib tsî ǀûbaǀnamxasib tsîna. (Efe. 4:32–5:1) ǃGamme hâ khoe ra ga nē ǀgauga ǁgau, ob ge ǀnamma ǁîra ǁaegu supuse nî kai. ǀNî ǃgâsas Lena ti ǀon hâs, 25 kurigu xa ǃnāsase ǃgamme hâs ge ra mî: “Kaise î ge a supu gagasi khoe-e ǀnam tsî ǃgôasiba ǁgausa.” Saora Elobmîs aiǁgaus xa ǂâi re. Jehovab ge Mesiab di ǁgûrab ge ǁhûi. O Josefi tsî Marias tsîna Davib di surib khoen hoana xu ge ǁhûi. Tae-i ǃaroma? ǁÎra hoa ra ge Jehovab ǀkha ǀhōsagusisa ge ūhâ i. Tsî Jehovab ge ge ǂan i, ǁî ra ǁîba ǂgurose ǃgammeb ǃnâ nî ūhâsa. w23.05 21 ¶3-4

Jesub ge ǀhaohâb di danab ase ǀoasa kurusa ūhâ xawe i ge, ǁnā gu hînab ǁgaumâi hâga ǀoasa kurusa ūhâ tama hâ. Dī ǂgao tama da hâ xū-e gu ga ǂgan da, o i ge ǀnî ǁaega a ǃgomba da ǁkhā ǁnâuǀnamsa. Apostel Petrub ge māheb ge daoǁgausa ǂgurose ge ǁnâuǀnam ǂgao tama hâ i. ǁÎb ge Moseb ǂhanub ǃoagu, ǃanuoǃnâ ti ra mîhe xamanina ǂûs daoǁgausa ge māhe. Xaweb ge Petruba ge ǂgao tama hâ i, nēsab ge ǃnona ǃnādi kōse ge ǂkhā. (ǃNǃkh. 10:​9-16) Tae-i ǃaroma? ǁÎb ge nē ǀasa daoǁgausa ge ǁnâuǃā tama hâ i. Xaweb ge Apostel Pauluba ge ǁnâuǀnam Jerusalems ǀhaohâb ǃûi-aogu ge ǁîba a daoǁgau o, îb haka khoega tempela ǃoa ūsao tsî ǃanuǃanusens ǁaxasib ǃnâ ǁhao. Tsî nēs ǃnâ-ū ǁgau ǂhanubab ta ǁnâuǀnamsa. Paulub ge ge ǂan i Xristeǁîn ge ǂhanub ǃnaga hâ tama hâ isa tsîb tsū xū-e dī tamasa. Paulub ge ‘ǁnā khoega ū tsî saora tsē ǁîgu ǀkha ge ǃanuǃanusen.’ (ǃNǃkh 21:​23, 24, 26) Paulub di ǁnâuǀnamxasib ge ǀguiǃnâxasiba ge ǀkhī-ū.—Rom. 14:​19, 21. w23.10 10 ¶15-16

ǀNîsi du ge ra ǂâi, khoe ǀhōgun ǁaegus ǃaosa ǁnātikōse ǂhâǂhâsa tama hâsa. Xawe ǀgū ǀhōsagusisa da ga Jehovab ǀkha ūhâ ǂgao, o da ge ǁîba nî “ǃao.” Nēsi da ga gaxuse Jehovaba ǃoaba xawe da ge ǁîba eloǃaoǃgâxasiba nî ūhâba. Xawe Eloba ǃaosa tae-e ra ǂâibasen? Khoe-i hîna ǂhanu ǀgaub ǃnâ, eloǃaoǃgâxasiba ūhâ î ge Eloba a ǀnam. Tsî ǁîb ǀkha î ūhâ ǀhōsagusisa ǁgaiǁgai ǁkhā xū-e xu ra ǂgōsen. Jesub tsîn ge ǁkhā ‘eloǃaoǃgâxasiba’ ge ūhâ i. (Heb. 5:7) ǁÎb ge tātsē Jehovaba ge ǃao tama hâ i. (Jes. 11:​2, 3) Xaweb ge ǁîba ge ǀnammi tsî hoaǁae gere ǁnâuǀnam. (Jhn. 14:​21, 31) Jesub khami da ge hoada Jehovaba ǃgam ǃgôasiba ūba hâ. ǁÎb a ǀnamxaǃnâ, gā-ai, ǂhanu-ai tsî a ǀgaisa xui-ao. Tsî da ge a ǂan Jehovab ǀnamdasa. Sida ǁîb daoǁgaude ra sao ǀgaub ǁîba ra tsâǀkhā. Jehovaba da ga ǁnâuǀnamoǃnâ, ob ge ra tsû. Xawe da ga ǁîba ǁnâuǀnam, ob ge kaise ra ǂkhî.—Psa. 78:41; ǂKhm. 27:11. w23.06 14 ¶1-2; 15 ¶5

Gao-aob Usiab ge ǀgaibab ge hō, o ge ǀuru Jehovab ge ǁîba ǀgaiba gere māsa tsîb ge Jehovab ǂkhâǃnâs ǀkha xūna dī ǁkhā isa. Tae-e da ra ǁkhāǁkhāsen? Hoaǁae da ge nî ǂâiǂâiǃnâsen, sada ǀkhaegu tsî aiǂhanugu Jehovaba xu ra hāsa. Sīǃnâ da hâ xūn xa koasens xa da ge Jehovaba ǁîb anu hâ koasa nî mā, dī ǁkhā da a xūn ǃaroma. (1Kor. 4:7) ǃGamǃgamsenxase da ge nî ǂanǃgâ ǀoasa kurusa da ūhâ tamasa tsî da ǁnamahesa ǂhâhâsa. ǃGâsab hîna ǁîb di 60 kurin ǃnâ hâb ge ge xoa: “ǁKhāǁkhāsen ta ge ge î ta, tā ǁaixa tamas ka io ǂkhabuǂâi nau khoen ka tita ra dīsā xūna mû o. Dīsā ta ra gâre xūn ǃaroma da ga ǀnî ǁaega ǁnamahe, o ta ge ra dītsâ î ta aiǃgû tsî Jehovaba ǁkhā ta a-i hoa-e dība.” Jehovaba da ga ǁnâuǀnam tsî ǃgamǃgamsenxase hâ ǀgara, o da ge ama ǂkhî ûiba nî ūhâ.—ǂKhm. 22:4. w23.09 10 ¶10-11

ǂGurokam ǁaeb di Xristeǁîn ge mâǀgaisa ge ǂhâhâ i. ǁÎn ge ǁkhā ǃgomsin hînan ge ǃnāsa khoena ǁnā ǁaeb ai ûhâ īna gere hōǃâ. Xawen ge ǁnās xōǀkhā ǀnî ǃgomsin tsîna ge ūhâ i, Xristeǁîn ge i amaga. ǂGuin ge gere ǃgôaǃgonhe, Jodeǁî ǂgaeǂgui-aogu tsî Romeǁîn ǂhanub di khoegu xa ǀguis ose. Xawe ǁîn Omaris khoen xas tsîna. (Mat. 10:21) ǀNî ǁaegu ain ge Jehovaba ge ǃoaba ǀû aogu di ǂhomi ǁkhāǁkhāde xu ga ǂgōsen hâ, ǀhaohâba gere ǀgora ǂgaoga. (ǃNǃkh. 20:​29, 30) Xawen ge ǁnā Xristeǁîna ge mâǀgai. (J.ǂHa. 2:3) Mati? ǁÎn ge Elobmîs aiǁgaudi mâǀgai ge khoen din xa gere ǂâiǃgâ. Jobi di aiǁgaus khami. (Jak. 5:​10, 11) ǁÎn ge ǀgaiba ge ǀgoreba. (ǃNǃkh. 4:​29-31) Tsî ǂâis ǃnâ gere ūhâ ǀgara Jehovab mâǀgain ga, o nî mādawa-am nî ǃkhaisa. (ǃNǃkh. 5:41) Sada tsîn ge a mâǀgai ǁkhā hoaǁae da ga Elobmîs tsî sada ǂkhanin ǃnâ mâǀgai ge khoen di aiǁgaudi xa khomai tsî ǂâiǃgâ o. w23.07 3 ¶5-6

Jehovab tsî Jesub tsîn ge tātsē ǁnāxū da tide. Jesubab ge ǀūxus khaoǃgâb ge apostel Petruba ǂhâǂhâsa mîǁguiga ge dī. ǀÛsen îb nî tamas ka iob Xristub di ǁkhāǁkhāsabe i khama nî mâǁgai? Jesub ge Jehovaba ge ǀkhoma î-i Petrub di ǂgomsa tā toa. Jesub ge ǁnā ǀgores xa Petruba ge mîba tsî ǁîb ǃgâsaga ǀgaiǀgais di ǂgomǃgâsib tsîn xa ge mîba. (Luk. 22:​31, 32) Nēs ge ǀnîsi Petruba gere ǂkhâǃnâ, Jesub di mîdi xab gere ǂâi-oa o. ǂHâǂhâsa mîǁguiga da ga sida di ûib ǃnâ dī, ob ge Jehovaba ǀnamxaǃnâ ǃûi-aoga a sîsenū ǁkhā î gu ǂhâ da hâ ǂgômǃgâsiba mā da, î da ǂgomǂgomsase hâ ǀgara. (Efe. 4:​8, 11) Jehovab ge Petrub tsî nau ǁkhāǁkhāsabegu tsîna a hui, khamib ge Jehovab tsîna sida nî hui aoǁnâ sîsenne da ga ǂgurose sida di ûib ǃnâ mâi o. w23.09 24-25 ¶14-15

Jehovab ge nau khoena da ga ǀnamxaǃnâ tsî ǃgâi ǀgaub ǃnâ ga ra hâ-ū o a mû ǁkhā. Tsîn ge ǁnās ǃaroma kaise ra ǃgôaǃgâ da. ǀHaohâb di hui-ao tamas ka io ǃûi-aob ase du ga ǃoaba ob ge Jehovaba ǃkharuge ǁaeb ǃnâ du ge ūhâ i ǀnamma nî ǂâihō. Tsî ǀnammi hîna ge ǂkhâǃnâ du ba ǁnāsa dīsa. (1Kor. 15:58) ǁÎb ge aiǃgû tsî du ra ǁgau ǀnammi tsîna ra mû. Jehovab ge ra ǂhapa î da sida hoa da ǁîb tsî nauna da ūba hâ ǀnammi ǃnâ kai. Jehovaba da ūbahâ ǀnamma da ge a ǀgaiǀgai ǁkhā ǁîb di mîsa khomais ǃnâ-ū. Tsî ǁîs xa ǂâiǃgâsa, hoaǁaes tsîna da ge ǁîb ǀkha ǀgores ǃnâ nî ǃhoa. Sida di ǃgâsana da ūbahâ ǀnamma da ge a ǀgaiǀgai ǁkhā ǁîna da ga hui o. Sida ǀnammi ra kai khami da ge Jehovab tsî sida gagasi omaris ǀgūse nî hā. Tsî da ge ǁîn ǀkha da ūhâ ǀhōsagusis ǃnâ ǀamosib kōse nî ǂkhî. w23.07 10 ¶11; 11 ¶13; 13 ¶18

Mâ Xristeǁî hoa î ge nî mîǁgui mati î ǁî-i ǂurusiba nî kōǃgâsa, Elobmis ǂhanub ǀnîgu ǀguigu ge Xristeǁî-i di ǀaeǃkhōs mîǁguiga ra tsâǀkhā. ǀAob tsî ǃgaidiba xu ūdawasen di ra mî mîmādi khami. (ǃNǃkh. 15:20; Gal. 5:​19, 20) ǀNî xūna da ge aitsama nî ǃereambasen. ǀNî khoen ge ǀhaohâsib di ǀaeǃkhō ǃkhaiga ǃoa ǀgui ra ī, ǁîn di ǂurusiba kōǃgâs ǃaroma. ǀNîn ge ǀkhara ǀaeǃkhō ǀgaugu xa a ǃgâibahe. Mati ǀgui da ga ǀgaisase ga ra tsâ o, ǀaeǃkhō ǀgaugu xa. Xawe da ge sada di ǃgâsan da dī mîǁguiga nî ǃgôaǃgâ, ǁîn di ǂurusib xa hâba. Nēs ǃaroma da ge saora xūna ǂâis ǃnâ nî ūhâ: (1) Elob Gaosib ǀguib ge ǀamosib kōse nî hâ ǂurusiba nî ǀkhī-ū. (Jes. 33:24) (2) Mâ Xristeǁî-i hoa î ge nî ǂan, tae-i ǁî-i ǃaroma a ǃgâi ǃkhaisa. (3) Nau khoena da ge ǀgoraǃâ tamas ka io ǃnôa xū-i ase ība tide. (Rom. 14:13) (4) Xristeǁîn ge ǀnamma ra ǁgau tsîn ge ǁîn di ǃnorasasiba aitsama ǁhûibasens diba, ǀhâohâb di ǀguiǃnâxasib aiǃâ mai tama.—Rom. 14:​15, 19, 20. w23.07 24 ¶15

Jehovab ǀkha da ūhâ ǀhōsagusisa da ra ǃgôaǃgâ? Îo, ǀguri da ge hâ tama. ǃKharuge ǁaeba xūn ge ǂgui khoena sadu ra tsâ khami gere tsâ. (Psa. 104:​33, 34) ǂGuin ge ǁguibade ge dī în Jehovaba ǃoaba. ǁNāsan ge ǀorogam ǁaeb Israelǁîn hîna ge Nasirǁîn ti ǂansa îna gere dī. Tamas ka io māǁnâsen hâna. Nasirǁîn ge ôasa ge i Israelǁîn hîna ge Jehovaba ǀō-aisa ǁguibade gere dībana în ǁîba ǃoaba. Moseb di ǂhanub ge aorekhoeb tamas ka io tarekhoesa gere mā-am, î-i ǀō-aisa mîǁguiga dī Jehovaba ǁaeroba Nasirǁîse ǃoabasa. (Num. 6:​1, 2) Israelǁî-i ga Nasirǁîsisa mîmâi o i ge ǁî-e nau Israelǁîn gere sao daoǁgaun ǀnîna ge sao-ai tama hâ i. Tae-i ǃaroman ge ǀnî Israelǁîna gere ǁhûi Nasirǁî kaisa? ǁÎ-i Jehovaba ūba hâ ǃgam ǀnammi tsî ǃgôaǃgâsib ǁîb ǀkhaegu dib ǃaroma.—Deu. 6:5; 16:17. w24.02 14 ¶1-2

Elobmîs ge ǂguiǃnāde “ǂgomǂgomsasib” tamas ka io ‘hâhâ ra ǀnamma,’ Jehovab ǁîb di ǀhōsan ǃoagu ra ǁgauba ǃoa ra ǁnaeǁgau. ǁKhā mîs tsîn ge ra sîsenūhe, Elob ǃoaba-aon ǁîn ǁaegu ra ǁgaugu ǀnamma ǁguiǃāsa. (2Sam. 9:​6, 7) Sada ǂgomǂgomsasib tsîn ge ǁaeb ǀkha a ǀgai ǁkhā. Hā re î da kō, matib ge Danieli di ǂgomǂgomsasiba a ǀgaisa ǀgausa. Danieli di ǂgomǂgomsasib Jehovab ǃoagub ge ūhâ îb ge, ǁîb di ûib hoaba gere ǃâitsâhe. Xawe î kaise ǃgom xū-e, ǁîb 90 kuriga ǃkharu hâ hîna ge ī. Gao-aob Dariuba gere sîsenba mûǂam-aogu ge Daniela ge ǃhui hâ i. Tsî ǁîb Elob tsîna ǃgôasiba ge ūhâba tama hâ i. ǁNā-amaga gu ge ge ǀape îb Daniela ǃgamhe. ǁÎgu ge Gao-aoba xoaǁguisa ǂkhaniba ge xoaǃgao kai. Hîna nî ǃâitsâba, Danieli ǁîb Elob tamas ka io Gao-aob ǃoagu ǂgomǂgomsase nî hâsa. Danieli ga dī hâs ge, Gao-aob ǃoagu ǂgomǂgomsase hâ tsî hoan khami 30 tsēdi di ǁaeba Jehovaba ǃoa ga ǀgore tama hâ. Danieli ge ge ǁhûi Jehovab ǃoagu ǂgomǂgomsase hâsa.—Dan. 6:​12-15, 20-22. w23.08 5 ¶10-12

Jehovab ge ra ǂhâba î da ǃnūǃnâxa sada ǃgâsana da ga ǀnama ǁgau o. Xristeǁî ǃgâsa i ga sada ǀkha ǃgâi tama ǀgaub ǃnâ tanisen xawe da ge ǂâis ǃnâ nî ūhâ. ǁÎ-i sada tsûtsûsa ǂâibasen tama xawe i Elobmîs ǃoagu ǂhanu xū-e ra dītsâsa. (ǂKhm. 12:18) Elob ge ǁîb di ǂgomǂgomsa ǃoaba-aona a ǀnam, ǂkhabusasinan ga ūhâ xawe. ǁÎb ge dīsā da ga xawe aiǃgû tsî sida di ǀhōsab ase ra hâ ǀgara tsî ǁgaixa hâse hâ tama. (Psa. 103:9) Kaise i ge a ǂhâǂhâsa sada di ǀûba ǀnamxa ǁGûba ǁgaesa. (Efe. 4:32–5:1) ǂÂis ǃnâ ūhâ re ǂhâǂhâsa i ge a, ǀams ra ǀgū khami da sada ǃgâsan ǀgūse nî hâsa. ǀGaisa ǁgâiǀāba da ge a ǃâubasen ǁkhā. Sida ǂgoms ǃaromas tsîna da ge ǃkhōsis ǃnâ ǂgāhe ǁkhā. Tsî ǁnās ka ī, o da ge nēsis xa ǃnāsase sada di ǃgâsana nî ǂhâ.—ǂKhm. 17:17. w24.03 15-16 ¶6-7

Elobmîs ǃnâ î ge ǂkhamkhoen xa xoa-e hâ, Jehovaba ǀgū, ǁîb ǀkhaeba hō tsî ge ǃgâi ûiba ūhâ îna. Davidi ge ge ǁîgu ti ǀgui i, hîna ge ǂkhamsis ǃnâ mîǁguiba, îb Jehovaba ǃoaba. Tsîb ge ega ge ǂgomǂgomsa gao-ao kai. (1Gao. 3:6; 9:​4, 5; 14:8) Davidi tsî ǁîb aiǁgaus xats ga ǁkhāǁkhāsen, ots ge nî ǂkhâǃnâhe Jehovaba ǂgomǂgomsase ǃoabasa. Tamas ka iots ge Markub tsî Timoteub tsîn di aiǁgaus xa a ǁkhāǁkhāsen ǁkhā. ǁÎgu ge ǂkhamsis ǃnâ Jehovaba ge ǃoaba tsoatsoa tsî ge aiǃgû ǀgara ǂgomǂgomsase ǁîba ǃoabasa. Jehovaba ǃoabasa gu ge ǁîga mîǁgui, o gu ge kaise ǁîba ge ǂkhîǂkhî. Sa ûibats nēsi ra sîsenū ǀgaus ge, sa ûib mati hānîǁaeb ǃnâ nî ī ǀgausa ra ǁgau. Jehovab aits ga ǂgomaiǂnûi tsî sa ǁnâuǃāb ais ose, ob ge nî huitsi gā-ai mîǁguiba dīsa. ǃGâiaǂgaoxa tsî ǂâibasensa ūhâ ûibats ge a ūhâ ǁkhā. ǂÂis ǃnâ ūhâ re, Jehovab ge ǁîbats ra dība xūna ra ǃgôaǃgâ. ǀNî hâ ǃgâi ǀgau-i ge ǀkhai sa ûiba sîsenūsa sada ǀnamǀnamsa ǁGûb, Jehovaba ǃoabas ǃnâ. w23.09 13 ¶18-19

Apostel Paulub ge ge ǂan i ǁîb di Xristeǁî ǃgâsan ǀoasa kurusa ūhâ tamasa. Aiǁgause ǁîb ge ǂhanu tamase ge ǀgoraǃgâhe ǀhoahâb di khoen ǀkhab ge hâǀhao amaga. (ǃNǃkh. 9:26) Egan ge ǀnîna ǁîba ǃgâb ai gere ǀhoe tsî ǁîb ǀonsa ge ǁgaiǁgai. (2Kor. 10:10) Paulub ge ǀhaohâb ǃûi-aoba ge mû nauna a ǃnôa kai ǁkhā ǁgai mîǁguiba ge dība. (Gal. 2:​11, 12) Paulub di ǀgūǀhōsab, Markub ge kaise ge ǂkhabuǂâi kaibi. (ǃNǃkh. 15:​37, 38) Paulub ge ǃkharuǃnâb ge mâsigu xa ǃaromahe hâse, tsûtsûbi ge khoen ǀkha ge hâ ǀû tama hâ i. Xawe ǁîb ǃgâsan di ǃgâi ǀgaugu xa ǂâi tsî Jehovaba ǂgomǂgomsase ge ǃoaba ǀgara. Tae-e Pauluba ge hui îb mâǃkharu? Paulub ge ǁîb Xristeǁî ǃgâsana ge ǀnam i. ǁÎnab ge ūba hâ i ǀnammi ge ge huibi îb tā ǁîn di ǂkhabusasigu ai ǂâisa ǂnûi xawe ǁîn di ǃgâi ǀgaugu ai. Paulub ge ūb ge hâ-i ǀnammi xas tsîna ge hui-e, îb nētsēs mîs ǃnâb ge aitsama xoamâi xūna dī. w24.03 15 ¶4-5

ǂGui ǃnaeǃkhaidi Elobmîs ǃnâ hâ ti ge ra ǁgau, tsamtsiǃnâsib matikōse a îxa ǀgau ǃkhaisa. Isaki di aiǁgaus xa ǂâi re. Filisteǁîn ǃādi Geras ǃnâ hâdi ǃnâb ge sī a ǁan, on ge ǁîb di surixa ǁanǁare-aona ǁîb di dadasab ǃgān ge khao hâ i tsauga ǃhūb ǀkha ge ǁhânǂgan. Nē tsaugu ǃaroma ǃkhams xab ge Isaka ǁîb omarisa ū tsî ǁnāpaxu ǃnūse ge doe bē. Tsî ǀnî hâ tsauga sī ge khao. (Gen. 26:​12-18) Xawen ge Filisteǁîna ǁkhawa ge mî, ǁnā ǃās tsaub ǁgammi tsîn a ǁîn disa. Nēn hoan ǃnâb ge Isaka ǂkhîsase gere tanisen (Gen. 26:​19-25) Tae-e ge huibi îb tsamtsiǃnâse hâ ǀgara nau khoen xab gere ǁaiǁaihe xawe? ǁÎb ǁgûra aiǁgausa ǃgaoǃgâ tsîb ge ǂgui xūna ǁîra ǂkhîsa ǀgauga xu ge ǁkhāǁkhāsen. ǁÎb îb Abrahami ge ge ǂkhîsa-i tsî Saras ge “tsamtsiǃnâ tsî ǃnosa” gagasa ge ūhâ i.—1Pet. 3:​4-6; Gen. 21:​22-34. w23.09 15 ¶4

Jehovab ge ǁîb ge ǁhûi ǁaeb ai ǀnamxaǃnâse ǁîb di ǀguise ǃnaehâ ǀgôaba ǃhūbaiba ǃoa ge sî, îb khoena ǁnā Goasis xa ǁkhāǁkhā. Tsî ǁîb ûiba mā îb ǂgui khoena ǁōb tsî ǁoreba xu sâu. Tsîb ge Jesuba ǀhomma ǃoa khâisa ge māhe îb Gao-aose Elob Gaosib ǃnâ ǂgaeǂgui. Elobmîs di danaǂâibasens ge îs Jehovab ǀonsa khaihe, ǁîb di ǂâisab ga nē ǃhūbaib ai dīǀoaǀoa o. Jesub xa ra ǂgaeǂguihe Gaosiba ra sîsenūse. Jehovab ǂâibasens ge a dawahe ǁoa, ǁîb ge mîmâi xūn hoan ge nî dīǀoaǀoahe. (Jes. 46:​10, Heb. 6:​17, 18) ǁAeb ra ī khamib ge nē ǃhūbaiba paradaisa ǃoa nî ǀkharaǀkharahe. ǀOasa kurusa ūhâ khoen tsî ǂhanu-ai khoen Adammi tsî Eva hâra di surib din ge ‘ǀamosib kōse nî ûi.’ (Psa. 22:26) Xawe Jehovab ge nēs ǀguisa dīǀoaǀoa tide. ǁÎb ǃoaba-aon hoanab ge nî ǀguiǃnâxa kai, ǀhommi tsî ǃhūbaib ai. Tsîn ge hoana Jehovaba ǂgomǂgomsase ǁîn ǂgaeǂgui-aob ase nî ǁnâuǀnam. (Efe. 1:​8-11) Buru tama du hâ Jehovab nē īxa ǀgaub ǃnâ ǁîb mîmaisa nî dīǀoaǀoasa? w23.10 20 ¶7-8

Jodeǁîn hîna ge Babilonsa xu Jerusalemsa ǃoa a doen ge ǁnā ǃhūb ǃnân kaixuse hâ tama hîna ǁîn omaride kōǃgâs, ǂgīǂgōsi ǃgomsin tsî ǁgâiǀāb tsîna gere hōǃâ. ǁNā-amagan ge ǀnîna ge ǃgombahe i, Jehovab tempela om-oas ai ǂâisa ǂnûisa. Tsîb ge Jehovaba ǀgam kēbo-aokha ge sî, Hagaib tsî Saxariab tsîna, îkha khoen ôasasib Jehovab sîsenni ǃnân ūhâba ǁkhapa ǀgaiǀgai. Nē kēbo-aokha ge mā ǂkhâǃnâs ge ǃgâi ǀamǂoasa ge hau. (Hag. 1:1; Sax. 1:1) Xawen ge ǁaubexa 50 kurigu khaoǃgân Jodeǁîna, ǂkhâǃnâsa ǁkhapa ge ǂhâhâ i. Esrab hîna ǂhanuba xoas ǃnâ ǂansa ūhâb ge Babilonsa xu Jerusalems ǃoa ge sîhe, îb Elob khoena ǂkhâǃnâ în Jehovab di ǃoabasa ǂgurose ǁîn di ûigu ǃnâ mâi. (Esr. 7:​1, 6) Hagaib tsî Saxariab di kēbodi ge Elob khoena ǃkharuge ǁaeb ǃnâ ge hui în Jehovab ai ǂgomaiǂnûi mâǃoahen gere ǁaeb ǃnâ. Khami î ge sida tsîna nētsē ǂgomǃgâsiba ra mā Jehovab nî huida sa, mâ ǃgomsi-i ǀgui-e da ga sida di ûib ǃnâ ǃkharuǃnâ xawe.—ǂKhm. 22:19. w23.11 14-15 ¶2-3

Mati da sida ǃgâsana ǀnamma ra ǁgau? ǀGui ǀgaub nēsa da dī ǁkhāb ge ǁîna ǁkhaeǂgaos ǃnâ-ū. Nau khoena da ga ‘ǀkhomxaǂgaosiba’ ūhâba, o da ge aiǃgû tsî nî ǁkhaeǂgaogu ǀgara. (1Tes. 4:18) Mati da sida ǁaegu hâ ǀnamma ǀgaisase ūhâ ǀgara ǁkhā? ǃGâsan di dīsāde ǀûbas ǃnâ-ū, ǁnāsa dīs ga ǃgom xawe. Tae-i ǃaroma i nētsē ǃgōsase ǂhâǂhâsa ǀnamma ǁgaugusa? ǃGaoǃgâ re Petrub ge mā ǃaromasa: ‘ǀAms xūn hoan dis ge go ǀgū. ǁNā-amaga ǀaexase ǀnamgu re.’ (1Pet. 4:​7, 8) Nē ǁgai ǃhūbaib di ǀams ra ǀgū khami da tae-e ǃâubasen ǁkhā? ǁÎb saosaben xab ge Jesuba saorase ge kēbo: “Ti ǀons ǃaroma du ge hoaraga ǃhūbaib khoen xa nî ǁkhanhe.” (Mat. 24:9) Nēti ī ǁkhangus ǃnâ mâǀgais ǃaroma da ge ǀguiǃnâxase nî hâ ǀgara. Nēsa da ga dī, ob ge ǁGâuaba sida ǀgora ǁkhā tide. ǀNammi xa da ǃgaeǀhaohe hâ amaga, ǁîb hîna “ǀguiǃnâxasib ǃnâ ra ǃgaeǀhaoba.”—Fil. 2:​1, 2. w23.11 13 ¶18-19

Elobmîs amab ge kai ǀgaiba ūhâ. Khoena da ga Jehovab tsî ǁîb ǀgaub xa ǁkhāǁkhā, o da ge kaise buruburuxa xū-e ra mû. ǁÎn mûdi ge ra ǁkhowa-amhe tsîn ge ǁGâuab di ǂhumiba ǃgāsase ra mû. Nēs tsîn ge ra īǁkhā kai în sada ǁGûb îsa ǀgauga mû ǁkhā. Tsîn ge ǁîb kai ǀgaib xa ra buru kaihe. (Jes. 40:26) Jehovab ai ǂgomaiǂnûis tsînan ge ra ǁkhāǁkhāsen ǁîb a ǂhanu-ai amaga. (Deu. 32:4) ǁÎb di kai gā-aisib xas tsînan ge ra ǁkhāǁkhāsen. (Jes. 55:9; Rom. 11:33) Jehovab a ǀnammi di ǃgaoǃgaos xan da ǁkhāǁkhāsen, on ge kaise ra ǁkhaeǂgaohe. (1Jhn. 4:8) Jehovaba ǃoan ra ǀgū khami i ge ǁîb ǀgôan ase ǀamose ǃhūbaib ai ûis di ǃâubasensa ra ama kai. Kai aiǂhanub ge khoena huisa în sida ǁGûb ǀkha ǀgū ǀhōsagusisa ūhâ. Nēsa da ga dī, ob ge Jehovaba ǁîb “sîsenǁare-aon” ase ra mû da.—1Kor. 3:5. w24.02 12 ¶15

Elobmîsa du ra ǁkhāǁkhāsen tamas ka io du Jehovaba ra ǃoaba ǁgûn xa ra kaikaihe tsî du ǁāǁnâs xa ra ǂâi? ǁNāb ge kaise ǃgâi mîǁguiba. ǁĀǁnâ kaisen du nîs aiǃâ du ge Jehovaba ǃoa nî māǁnâsen. Mati du Jehovaba ǃoa ra māǁnâsen? ǀGores ǃnâ du ge ra mîmâi ǁîb ǀguiba du ǃoaba tsî ǁîb ǂâisa ǂgurose sadu ûib ǃnâ nî mâisa. ǁNāpaxu du ge aiǃgû tsî ra mîmâi Jehovaba du nî ǀnamsa “sa ǂgaob hoab ǀkha, sa ǀoms hoas ǀkha, sa ǂâis hoas ǀkha tsî sa ǁkhāsib hoab ǀkha.” (Mrk. 12:30) Māǁnâsensa du ge ǀguri sadu tsî Jehovab ǁaegu ra dī xawe ǁāǁnâs ge naun aiǃâ ra dīhe. Nēs ǀkha du ge ra ǁgau māǁnâsen du go sa. Māǁnâsens ge ǀō-aisa mîmâisa, Jehovab ge ra ǃâubasen dī du go mîǁguiba du ǃkhōǀgara tsî ǁîb ǃoagu nî ûi ǃkhaisa.—Aoǁn. 5:4. w24.03 2 ¶2; 3 ¶5

Hoa ǃgamme gu ge ǃgomsina ra hōǃâ. Elobmîs ge ra ǂanǃgâ, ǃgamme hâ khoen “ǁgans ǃnâ nî ǁgâiǀā-e” ǃkhaisa. (1Kor. 7:28) Tae-i ǃaroma? ǃGammeb ge ǀoasa kurusa ūhâ tama khoe ra ra ǀhaoǀhao, ǃkharagagu ǀgauga ūhâ ra, hoa ra ge ǀgui xūn xa ǃgâibahe tama. ǁÎra ge ǃkharagagu khaoǃhūgu tsî ǁnaetiga ūhâ. ǀGui i ge ǀnîsi ǃgameb aiǃâ ge mûsen tama hâ i ǀgauga a ǁgau ǁkhā. ǁNā ǀgaugu di ǀgui-i ge ǁkhamasa mâsiba a ǃaroma ǁkhā. ǁÎra ge a ǀhapiǂgā-amgu ǁkhā hoa ra ǃgomsina ūhâ xawe, ǀguiba sîsen tsî ra ǁnā ǃgomsina nî sîsenǂams xa. Hâǀgora tamas ka io ǃgamme khôas tsîna ra ge a ǂâiǃgâ tsoatsoa ǁkhā. Xawe hâǀgoras tamas ka io ǃgamme khôasa ǃgomsina nî ūbe? Hi-î Jehovab ge ǃgamme hâ khoena ra daoǁgau în ǃgammeba ǃgôa, ǁî-i ǃgamme hâ khoe-i ǀkha ǀguiba ûiǀhaos ga ǃgom xawe. w24.03 16 ¶8; 17 ¶11

Māǁnâsen tsî ǁāǁnâs khaoǃgâ, i ge sadu ǃâubasens ǀamose paradais ai hâsa ra ǀgai. Tsî da ge ǃnāsa ǂgomǃgâsiba ra omkhâi. (Heb. 5:13–6:1) ǀNîsi du ge Romeǁîn 5:​2-4 ǃnâ ra mîhe xūna ge hōǃâ. ǃKharagagu ǃâitsâna du ge ra ǃkharuǃnâ xawe ra mâǀgai tsîb ge Jehovaba ra ǁgau sadu ǀkhab a ǂkhîsa. Jehovaba a ǀnam du tsî sadu ǀkha a ǂkhî ǃkhaisa du ǂan amaga du ge ǃgâi ǃaromasa ūhâ, ǁîb ge mîmâi xūna ǃâubasensa. Sadu ǂgoms ge nēsi ǀgaisa ǂguro du ge ūhâ is xa. Nēs ge a ama tsî ra tsâǀkhā du. ǃÂubasens ge sadu ûib ǃnâ sîsenǂuiba ūhâ, omaris ûib, dī du ra mîǁguigu tsî sadu ǁaeba du ra sîsenū ǀgaub ǃnâs tsîna. Apostel Paulub ge ǂhâǂhâsa ǃâb hîna da ūhâb xa ra ǀaro, Elob xa ūǃoahesa da ǃkhōǃoa hâs khaoǃgâ. ǁÎb ge sadu ǃâubasensab nî dīǀoaǀoas ǂgomǃgâsiba ra mā du.—Rom. 15:13. w23.12 12-13 ¶16-19

ǃGomsina da ga hōǃâ, o da ge hoaǁae da ra ǂâi tsî dī khami dī tide. ǂGaus ǂoab xa ra ǂhāmâhe khami i ge sida tsâsiga nē mâsiba xu naub ǀkha a dawa ǁkhā. ǁApoǁapo dab nîsab ge ra mîmâi. ǀGaisa ǂoabas ga ǂgausa hōǃâ, os ge ǃaoǃaosase a ǂhāmâhe ǁkhā. ǂGausa ǁaposase ǃkhōmâis ǃaroma i ge ǂgaus ǃnaka ǀō-aisa xū-e hâ ǂgausa ǁgammi ǃnaka ǁaposase ra ǃkhōmâi-e. Nēs ge ǂgausa ra hui îs tā kaise ǀgapisen tsîn ge khoen ǂgaus ai hâna ǁnās ǀkha a ǃnorasa. Xawe nēs ge ǂgaus aisa ǃoa ra ī ǁaeb ai ǀgui a sîsen ǁkhā. ǁNās ǁkhās khamib ge Jehovaba a ǁapoǁapo da ǁkhā ǂgomǂgomsase da ga ǃgom ǁaegu ǃnâ aisa ǃoa i ǀgara o. w24.01 22 ¶7-8

ǃAo tsâsiba du ga hōǃâ o, dîsen re, ‘Jehovaba tae-e ǀnai ge dī?’ ǁÎb kurus xa ǂâiǃgâ re. Aiǁgause “ǃgaoǃgâ” re matikōseb Jehovaba anirodi tsî ǃkhādi tsîna, ǁîb īsib ǃnâ di kuruhe tama tsî ǁîba ǃoaba ǁoa xawe ǁîna ra kōǃgâsa, o matikō ǃnāsaseb sida ra tsâba. Nē xūn xa ǂâiǃgâs ge sida ǂgomǃgâsiba nî ǀgaiǀgai. (Mat. 6:​25-32) Jehovab ge ǁîb di ǃoaba-aona a dība xūn xas tsîna ǂâiǃgâ re. Elobmîs ǃnâ hâ khoe-i hîna ge ǀgaisa ǂgomsa a ǁgau i xa du ge a ǁkhāǁkhāsen ǁkhā. Tamas ka io du ge nētsē Jehovaba ra ǃoaba ǃgâsan ûib xa a khomai ǁkhā. ǁNās ǂam-ai Jehovab ge ǀnai kōǃgâ du hâ i ǀgaub xa ǂâiǃgâ re. Matib ge hui du ǁîba ǂans ǀkha? (Jhn. 6:44) Matib ge sadu ǀgorede ǃeream? (1Jhn. 5:14) Mati du tsēs hoasa ǁîb ǀnamǀnamsa ǀgôab di ǁguibasa xu ǃgâiba ra ǀama?—Efe. 1:7; Heb. 4:​14-16. w24.01 4 ¶6; 7 ¶17