January

Aob tsî taras tsîn ge ra ǃgâiaǂgao ǁîra babakiro-i ga ǃnae o. ǁGûra ge ǁîra babakiro-e ra a ǀnam xawe ra ǁkhore î-i kai. ǁÎra ge nî ǂâiǂhansen babakiro-i ga kai tama io. ǁNās ǁkhās khamib ge Jehovaba ra ǂkhî ǁîb xa da ga ǁkhāǁkhāsen tsoatsoa o. ǁÎb ge ǂgao tama hâ î da ǁnāpa ǀgui mâǀgara. (1Kor. 3:1) ǁÎb ge ra ǂhâba î da Xristeǁî “kaikhoe kai” sada ǁnâuǃāb ǃnâ. Elobmîs ǃnâs ge Grikegowab mîs “kaikhoe” ti hâsa “kaiǀoa” tamas ka io “ǀoasasib” ti ra ǂâibasen. (1Kor. 2:6) ǂKhari ǀgôaro-i kai tsî ra kaikhoe kai, khami da ge sada tsîna Jehovab ǀkha da ūhâ ǀhōsagusis ǃnâ nî kai. ǁNā ǀgaub ǃnâ da ge Xristeǁî-i ase gagasise ra kaiǀoa. Xristeǁî-i ase da ga kaiǀoas khaoǃgâ da ge tā nî ǀû gagasise ǀāǀāsensa.—1Tim. 4:15. w24.04 2 ¶1, 3

Jehovaba mâ ǃâ-e sadu ûib ǃnâ ra ǀhuru? ǀNîsi du ge nî ǃeream, ‘Jehovab ge ti ǁGû, ti Elo tsî ti ǀhōsa.’ ǀNî ǀgaugu ǃnâs tsîna du ge ǀnîsi Jehovab a hamsa ra ǁguiǃā. Xawe mî ǁkhā i du a ‘Jehovab ge ti ǃhaokhoeǃkhōǃoa-aoba’? Gao-aob Davidi ge Jehovab tsî ǁîb ǃoaba-aon ǁaegu hâ ǀhōsagusisa, ǃhaokhoeǃkhōǃoa-ao-i tsî ǃhaokhoe-i ǁaegu hâ ǀhōsagusis ǀkha gere ǀgopeǀnō. ǁÎb ge ge dî: “ǃKhūtse, tari-e sa Tempeli ǃnâ a ǂgâ ǁkhā? Tari-e sa ǃanu ǃhommi, Sionni ai a ǃoaba ǁkhā?” (Psa. 15:1) ǁNā mîde xu da ge ra ǁkhāǁkhāsen Jehovab ǃhaokhoe ǁkhā da asa, ǀnî mîdi ǃnâ ǁîb ǀhōsa kai ǁkhā da asa. Jehovab ge hoa xūnab nî kuru tsoatsaos aiǃâ ǀguri ge hâ i. Xaweb ge ǁaeb khaoǃgâ ǁîb ǀGôaba ge kuru. Jehovab ge ǃhaokhoeǃkhōǃoa-aob ase gere tanisen hîna ge ǂguro ǃhaokhoe-e ǁîb tentommi ǃnâ a ǁkhauba. Jehovab ge nēsab ge dī, o kaise ge “ǃgâiaǂgao.” Tsîb ge ǁîb ǀGôab tsîna “hoaǁae ǁîb aiǃâ ra dâse” ge hâ.—ǂKhm. 8:30. w24.06 2 ¶1-3

Mûnan-ai re 340 000 xa a ǃnāsa khoegu ǀguiba mâ ǀgauba. ǁÎgu ge ǀhao hâ î gu Davida Israeli gao-aob ase ǁgaumâi. Nē khoegu ge ǃnona tsēde Hebrons ǂnamipe ge hâ i. ǁÎgu ge âi, ǁgam tsî koas ǁnaetsanade Jehovaba gere ǁnaeba. (1Kro. 12:39) Nē khoegu ǁaegu i ge Sadok ti ǀon hâ ǂkhamkhoeba ge hâ i. ǁÎb ǁnāpa hâsan ge ǂgui khoen tsîna ge ǀū i. Xaweb ge Jehovaba ǁîba ge ǃgaoǃgâ. Tsî ge ǂhâba hâ i, î da Sadoki ge ǁnāpa hâ isa ǂan. (1Kro. 12:​22, 26-28) Sadoki ge ge Prietser i tsî ǀgapi priesteri Abiatari ǀkha ǀguiba gere sîsen. Jehovab ge Sadoka gā-aisib tsî ǁîb ǂâisa ǁnâuǃās ǁkhāsib tsîna ge mā. (2Sam. 15:27) Nē aob ge kaise ge ǁkhoaǂgaoxa ī. Nē ǀuniga tsēdi ǃnâb ge ǁGâuaba ra dītsâ, îb sida Jehovab ǃnâ ūhâ ǂgomsa khôa. (1Pet. 5:8) ǁNā-amaga da ge ǁkhoaǂgaosiba ǂhâhâ î da mâǀgai, Jehovab ǁGâuab tsî ǁîb eloxoresa ǃhūbaiba nî dīkākās kōse. (Psa. 31:24) ǁNāsa dīs ǃnâ-ū da ge Sadoki ǁkhoaǂgaosiba ǁgae ǁkhā. w24.07 2 ¶1-3

Jehovab ge ǂguro khoe-aogu rab ge kuru o gere ǂhâba î ra ǂkhîb ǃnâ ûi. ǁÎb ge ǁîra îsa oms, ǃgammeb ǀkhaeb tsî ǂoaǂamsa ǁgaumâis tsîna ge mā. ǁÎra ge ǃhūbaiba ǁîra ǀgôan ǀkha ǀoaǀoa tsî hoaraga ǃhūbaiba ga paradais kai hâ Edenni ǃhanab khami. ǁÎb ge ǁîra ǀgui ǃkhâikhoms ǀguisa ge mā. Tsîb ge ǁîra ge mîba ǁnâuǀnamoǃnâ ra ga, o ra ǁore tsî nî ǁōsa. Tae-i ge īsa da ge a ǂan. ǁGai ǀhomǃgāb hîna ge Elob tsî ǁîra tsîna ǀnam tama hâ îb ge Adammi tsî Evas tsîra ge ǃâitsâ îra Eloba ǁnâuǀnamoǃnâ. ǁÎra ge ǁGâuab gere ǂhâba xū-e ge dī. ǁÎra ǀnamxaǃnâ ǁGûb ǃnâ ǂgomǃgâsiba ūhâ tama ī tsî ra ge ge ǁore. ǂAn da ase i ge Jehovab mîde ge ama kai. ǁNā tsēsa xu ra ge ǁoreb ge ǃaroma xūna ge hōǃâ tsoatsoa: Kaira tsî ra ge ge ǁō.—Gen. 1:​28, 29; 2:​8, 9, 16-18; 3:​1-6, 17-19, 24. w24.08 3 ¶3

Jehovab tsî ǁîb ǀnamǀnamsa ǀGôab tsîn ge ǂhâba hâ î da ǂkhîba ūha. Psalmdi 119:2 ge ra mî: “ǀKhaehen ge hâ ǁnān ǁîb mîmāde ǃkhōǀgaipe tsî ǂgaob hoab ǀkha ǁîba ra ôana.” Jesub ge ge mîmâi: “ǀKhaehen ge hâ ǁnān Elob di mîsa ǁnâu tsî ra sâubasenna.” (Luk. 11:28) Jehovab ǃoaba-aon ge ǂkhî khoena. Elobmîsa da tsēs hoasa khomai tsî ǁkhā da a-i hoa-e ra dītsâ khami da ge ǁkhāǁkhāsen da ra xūna nî sîsenǂui. (Jak. 1:​22-25) Nē ǀgaub ǃnâ da ge Jehovaba ra ǂkhîǂkhî. (Aoǁn. 12:13) Elobmîs ǃnâ hâ ǀapemāsa da ga sao, o da ge sida omaris ǁanin tsî sida ǃgâsan ǀkha da ūhâ ǀhōsagusisa ra ǀgaiǀgai. Nēs ǀkha da ge Jehovab daoǁgaude ǁnâuǀnam tama khoen ra hōǃâ ǃgomsina xu ra ǂgōsen. Gao-aob Davidi ge mî, mîde da ge ra ǃkhō-am. ǁÎb ǁnae-ams ǃnâb ge ǂhanugu, daoǁgaudi tsî Jehovab ǀgoraǃgâdi xa mî toa tsî saorase ge ǀamǀam: “Tsî ta ge ǁîde ǁnâuǀnams di mādawa-amsa ra hō.”—Psa. 19:​7-11. w24.09 2 ¶1-3

Jehovab ge ǁîb ǃoaba-aon hoan ra ǃkharuǃnâ xūna ra mû. ǁÎb ge ǃgâiaǂgao tsî da ga tsûaǂgao o ra mû. (Psa. 37:18) ǁKhā da a-i hoa-e da ga hōǃâ da ra tsûaǂgaob ǂam-ai ǁîb ǃoabas ǃnâ dītsâ, ob ge kaise sida ǀkha a ǂkhî. ǁÎb ge ǃnāsase ǁnās ǂam-ai hui tsî ra ǁkhaeǂgao da ǂgao. Psalmdi 147:3 ge ra mî Jehovab ge tsûaǂgao hâna ra “ǂgauǂgau.” Nē xoas ge ra ǁguiǃā matib Jehovaba tsûaǂgao hâna ra kōǃgâ ǀgausa. Tae-e da nî dī î da hōǃâ Jehovab ra kōǃgâ da ǀgauba? Sao ra aiǁgaus xa ǂâi re, ǀaedī-aob ge tsû hâ khoe-e a hui ǁkhā î-i ǂgau. Tsû hâ khoe-i ge ǀaedī-aob go mā daoǁgausa i ga ǂōrisase sao-ai o ǀgui nî ǂgau. Jehovab ge ǁîb mîs ǃnâ-ū tsûaǂgao hân ǀkha ra ǃhoa tsî ǁîna ǁîb ǀnamxaǃnâ daoǁgausa ra mā. w24.10 6 ¶1-2

ǃKharu ge ǁaeb ǃnân ge sida ǂkhanina sao ra dîsa gere ǃhoaǃgao. Tae-e ǁnān Jehovab ǂhanuoǃnâse ra ǀgoraǃgân ǀkha ra ī? Mî da ge ge ǁnāti i khoen tātsē khâisa hō tidesa. ǂGui Elobmîs ǃnaeǃkhaidi ge hâ Jehovab ǀgoraǃgâdi xa ra ǃhoade, ǂhanuoǃnâ khoen ǃoagu. Aiǁgauseb ge Jehovaba kai ǁgammi dâus tawa hoa khoena ge hîkākā xawe Noaxi tsî ǁîb omaris tsîn ǀguina ge sâu. Israelǁîn tsînab ge ge sîsenū îb hû ǃhaodi khoena hîkākā, mîmâisa ǃhūb ǃnâ gere hâna. Tsîb ge ǀgui ǀhomǃgāba ge sîsenū 185 000 Asariab soldaga ǀgui ǃoes ǃnâ ǃgamsa. (Deu. 7:​1-3; Jes. 37:​36, 37) Nē ǃnaeǃkhaidi ǃnâs Elobmîsa ǃgāsase ra mîba da, nē khoen ǀamosib kōse nî ǁōsa tamas ka iob nē khoena khâisa mā tidesa? Hî-i, ti mî tama hâ. Nē go ǃhoaǃgaohe aiǁgaun ǃnâ da ge a ǀū Jehovab ge mati nē khoena a ǀgoraǃgâsa. Tsî da ge a ǀū ǃēsan ge ūhâ isa Jehovab xa ǁkhāǁkhāsen tsî ǃhōbasensa. w24.05 3 ¶5-7

Jesub ge ǃoa taras ǂkhōs xa gere ǃhoa, ǀgoraǃgâ-aoba gere ǀkhomasa îs ǂhanu-aise hâ-ūhe. Jesub ǁkhāǁkhāsabegu ge ǁnā ǃoa taras gere tsâ ǀgauba gere ǁnâuǃā. ǂGui khoen ge ǁnā ǁaeb ai ǃgâi tamase gere hâ-ūhe amaga. (Luk. 18:​1-5) Sada tsîn ge ǁîs gere tsâ ǀgauba ra ǁnâuǃā, hoa da ǁaeba xu ǁaeb ǀkha ǂhanuoǃnâsiba ra hōǃâ amaga. ǂGui khoen ge nētsē ǃhaoǃnâbe ǀgorasa ūhâ, khoexaǃnâ tama tsî a xūǃgunuxa. ǁNā-amaga da ge buru tama hâ ǃgâi tamase da ga hâ-ūhe o. (Aoǁn. 5:8) Xawe da ge ra tsûaǂgao ǃgâsa-i ga ǃgâi tamase hâ-ū da o. Sida ǃgâsan ge amaba mâǃoa tama hâ nau khoen ra dī khami. ǁÎn ge ǀoasa kurusa ūhâ tama hâ. ǂGui xūna da ge Jesub ge ǂhanuoǃnâsiba mâǃoa ǀgauba xu a ǁkhāǁkhāsen ǁkhā. ǂHanuoǃnâse ra hâ-ū da mâǃoa-aon ǀkha da ga ǃnūǃnâxa, o i ge kaise a ǂhâǂhâsa î da sida ǃgâsan ǃoagus tsîna ǃnūǃnâxa. w24.11 2 ¶1-2

Elobmîs ǁaeb ǃnâ ge ûihâ i khoen ge pere-i xa kaise ge ǂhâǂhâsabahe i. (Gen. 14:18; Luk. 4:4) Pere-i ge ǃnāsa ǁaeba gere ǂûhe tsîs ge Elobmîsa ǃkharagagu ǂûn xas ra ǃhoa ǃkhain ais tsîna ‘pere-i’ xa ǀgui ra ǃhoa. (Mat. 6:11; ǃNǃkh. 20:7) Jesub ge ǁîb ge dī ǀgam ǂanǂansa buruxa dīkha ǃnâ pere-e ge sîsenū. (Mat. 16:​9, 10) Johaneb 6ǁî danaǃâs ǃnâ da ge nē dīkha di ǀguib xa khomai ǁkhā. Jesub Apostelgu ge aoǁnâ sîsenni khaoǃgâ kaise ge tsâu hâ i tsî sâ ǁaeba ge ǂhâhâ i. Tsî gu ge ǂgaus ǃnâ ǂgâ tsî Jesub ǀkha Galileab huriba ge ǃgâu î gu sī sâ ǁkhā. (Mrk. 6:​7, 30-32; Luk. 9:10) Betsaidas ǃnâ gu ge ǃnōsa ǃkhai-i ai ge sī. Xawen ge khoena ge ǁnâu Jesub ǁnāpa hâsa tsîn ge ǂgui khoena ǁnāpa ge sī în ǁîba mû. Jesub ge ǁîna ǁaeba ge ūba hâ i. ǁÎb ge ǁaeba ū tsî ǁîna Gaosib xa ge ǁkhāǁkhā tsî ǀaesen hâna ge ǂgauǂgau. ǃKhae-i gere ama gu ge Jesub apostelga gere ǂhâ, nē khoen mâpa ǂûn nî xū-e nî hōsa. ǀNî khoen ge ǂûn nî xū-e ge ūhâ i xawen ǃnāsa khoena ǃāsa ǃoa nî ī ge is ge în ǂû-e sī ǁama.—Mat. 14:15. w24.12 2 ¶1-2

Sada kai ǁgûra Adammi tsî Evas tsî ra ge ǀoasa kurusa ge ūhâ i tsî îsa Paradais ǃnâ gere hâ. (Gen. 1:27; 2:​7-9) ǁÎra ge ǀamosib kōse ǃgâiaǂgaob ǃnâ ûis di ǃēsa ge ūhâ i. Xawe i ge ǁgai xū-e ge ī, Adammi tsî Evas tsîn ge ge ǁore. Nēs xa ǃaromahe hâseb ge Jehovaba ǁîra Edenni ǃhanaba xu ge ūǂûi tsî ra ge ǀamose ûis di ǃēsa ge ǂoaǃnâ. ǁÎra ǀgôana tae-e ge ǀûmi? Elobmîs ge ra mîba da: “ǀGui khoeb ǃnâ-ūb ge ǁoreba ǃhūbaib ai ge hā tsî ǁoreba xu ǁōba. Tsî ǁnātib ge ǁōba hoaraga khoen ǃnâ ge khoraǂuisen, hoan ge ǁore amaga.” (Rom. 5:12) Adamma xu da ge ǁoreba ge ǀûmi tsîs ge nēsa ǁōba ge ǃaroma. ǀÛmi da ge ǁoreb ge kai surudeb khami ī tsî i ge khoe-i xare-e nēsa matare ǁnā hō tide. (Psa. 49:8) Elobmîs ge ‘ǁoreba’ surudeb ǀkha ra ǀgopeǀnō. (Mat. 6:12; Luk. 11:4) ǁOre da ga o da ge ǀnî mîdi ǃnâ Jehovaba ra surude. Jehovab ge sida a ǂgan ǁkhā î da ǁnā surudeba matare. ǁNā surudeba da ga matare tama ī, oi ge ǁō da ga o ǀgui nî ǀariǂûihe.—Rom. 6:​7, 23. w25.02 2-3 ¶2-3

Kai aiǂhanub ge nauna Elob Gaosib xa mîbasa. Hoa khoe taman ge ǁnā aiǂhanuba ūhâna. Aiǁgause, Jesub ge ǃhūbaib ai hâ i ob ge ge mā-am tama hâ i, în ǂkhaba gāgāde ūhâna tā ǁîb xa aoǁnâ. (Luk. 4:41) Nētsē i ge khoe-e Jehovab ǃoaba-aon ǀkha-i nî aoǁnâ tsoatsoas aiǃâ Jehovaba ra ǂkhîǂkhî ǀgaub ǃnâ nî ûi. Nē aiǂhanuba da kaise ra ǃgôaǃgâsa da ge ra ǁgau, khoen ǀkha Elob Gaosib xa hō da ra ǃē-i hoa-i ai ǃhoasa. Jesub khami da ge ra mîǁgui î da Gaosib amaba khoen ǂgaogu ǃnâ ǃhana tsî ǂnâ. (Mat. 13:​3, 23; 1Kor. 3:6) Jehovab ǀapeǂhomis ge Jesub aiǁgausa ra ǁgae tsî ǁkhās a xūn hoana ra dī în nauna Elob ǀonsa ǂan. ǀGui ǀgaub sida ǀapeǂhomis ge nēsa dīs ge New World Translation of the Holy Scriptures ǃnâ-ū. Nē ǂnûiǃkhunis ge Elob ǀonsa xoaǃnâhe ge hâ i gowagu ǃnâ i ge hâ i ǃkhais ai ge ǂgā-oa. Nē Elobmîs ǂnûiǃkhunis ge ǃâb tamas ka io ǀoasase 270 gowagu ǃnâ a hō-e ǁkhā. w24.04 9 ¶8-9

ǀNî ǃgâsagu ǂkhî ǃgammeba ūhâ gu ge ra dītsâ, î gu tsēs hoasa xū-e dī tarade ǀnamma ǁgausa. (1Jhn. 3:18) ǃGamme-aob ge ǁîb tarasa ǀnamma a ǁgau ǁkhā ǀguiǃgupu ǀgaub ǃnâ. Aiǁgauseb ge ǁîs ǃomsa ǃkhō tamas ka io a ǁnamǂgāsi ǁkhā. ǁÎsab ge smsa a xoaba ǁkhā mîrase, “ǁkhōre du ta ge hâ” tamas ka iob ge a dî ǁkhā “sadu tsēsa mati tsâ?” ǁAeba xu ǁaeb ǀkhab ge ǃgâiseb ǂâiǂui hâ mîde a xoa ǁkhā, ǁîs xab ra tsâ ǀgausa ra mîbasi sîǂkhanis ǃnâ-ū. Aob ga nēti ī xūna dī, ob ge ǁîb tarasa ǃgôasiba ǁgau tsî ǁîra ǃgammeba ra ǀgaiǀgai. ǁÎb tarasa ra ǃgôaǃgâ aob ge ra mîbasi tae-i ǃaromab ra ǃgôaǃgâsisa tsîb ge ǁîsa ǃgâise ra tsâ kai. ǀGui ǀgaub nēsab a dī ǁkhās ge ǁîb tarasa gangansa, dīs ra xūn ǃaroma. (Kol. 3:15) Aob ga ǂgaob ǃgamsiba xu ǁîb tarasa ǃgôa, os ge ǁîsa kaise ǃgâise ǁnās xa ra tsâ. Aob ga ǁîb tarasa mîba tae-i ǃaromab a ǀnamsisa, os ge ǀnam-e tsî ǃgôahes hâ khami nî tsâ. w25.01 11 ¶15; 13 ¶16

Psalmdi 15 ge sao ra mîmâis ǀkha ra ǀam: “Nēna ga dī-i hoa-i ge ǀamose ǁnobe tide.” Psalmdi xoa-aob ge nēba ra ǁguiǃā tae-i ǃaromab Jehovaba ra ǂhâbasa î da nē go ǃhoaǃgaohe xūn hoana dī. Jehovab ge ra ǂhâba î da ǃgâiaǂgao. Jehovab ra ǂgan da xūna da ga dī, o da ge ǃgâi ûiba nî ūhâ tsîb ge ǁîb tsîna nî ǁkhauba da. Jehovab ǃhaokhoen ge buruburuxa hānîǁaeba ǃoa a mûǂui ǁkhā. ǁNān ǀhommi khâis ǃâubasensa ūhân ge Jesub ge aiǂhomiban ‘ǃnā-omdi’ ǃnâ sī nî ǁan. (Jhn. 14:2) ǁNān ǃhūbaib ai ûis ǃâubasensa ūhân ge ǂHaiǂhais 21:3 ǃnâ hâ mîmâide ǃoa ra mûǂûi. Kai aiǂhanub ge Jehovab xa da ǃhaokhoen ase ǁîb tentommi ǃoa ra ǁkhauhesa.—Psa. 15:​1-5. w24.06 13 ¶19-20

ǂKhaisiba a tae? “ǂKhaisib” ti hâ mîs ge Elobmîs ǃnâ xū-e mâǂoa kaisa ǃoa ra ǁnaeǁgau. Jehovab ge ǁîb ǂkhaisiba Israelǁaesab ge Egipteb ǃgāsisa xu ǃnora kai ǁaeb ai ge ǁgau. Sao ra xū-e mûnan-ai re: ǂGui Israelǁîn ge Sinaiǃhommi tawa ǀhao hâ, în Elob tae-e nî mîba nîsa ǁnâu. ǃHommi ge ǀgaisa ǂnū ǃâus xa ge ǃgū-aihe hâ i tsî i ge ǃâubasen taman hâ ǀgaisa ǃhūǂgubiba ge tsoatsoa. ǁÎn ge mâ-ai hâ i ǃhūb ge ge ǀgabisen tsoatsoa tsîb ge ǃgurub tsîna ge hâ i, ǃgari xaiǁnâ ǀōb ǀkha. (Eks. 19:​16-18; 24:17; Psa. 68:8) Jehovab ge nē xūna a dī os ge Israelǁaesa ǁîb di ǀgaib xa kaise ge buru. ǀGui ǀgaub Jehovaba da ǂkhaisiba nētsē ra māb ge ǁîb ǀgaib tsî mâǂoa ra ǀgaugu xa nau khoena mîbasa. Eloba da ge ǂkhaisib tsîna ra mā ǁîb ǀgaib ǃnâ-ū da ge dīhō xūn hoan ǃaroma.—Jes. 26:12. w25.01 2 ¶2-3

Israelǁaes ge mîmâisa ǃhūba ǃoa gere ī ǁaeb ǃnâ gu ge ǀnî ǂanǂansa khoega, Moseb tsî Jehovab ge mābi ǁgaumâis ǃoagu ge khâikhâisen. ǁÎgu ge sao rase ge mî: “Nē ǀhaohâb hoab, ǁîn hoan kom a ǃanuo, tsî ǃKhūb ǁîn ǁaegu hâo.” (Num. 16:​1-3) Ama as ge Jehovab mûǁae i ge hoa ǁaesa ǃanu isa. Xaweb ge Jehovaba Moseba ge ǁgaumâi îb ǁîb ǁaesa ǂgaeǂgui. Moseba gu gere mîǁgaiǁgai, o gu ge ǁîgu tsîna ǀnî mîdi ǃnâ Jehovab tsîna gere mîǁgaiǁgai. ǁÎgu ge Jehovab tae-e gere ǂhâbas ai ǂâisa ge ǂnûi tama hâ i. Xawe ǁîgu tae-e gere ǂhâbas ai ǀgui ǂâisa gere ǂnûi, ǁnās ge ǀgaib tsî mûǂanhesa naun xa. Jehovab ge nē mâǃoa-ao gu tsî ǁîga gere ǂkhâǃnân tsîn hoana ge ǃgam. (Num. 16:​30-35, 41, 49) ǁKhā ǂgomǃgâsiba da ge nētsē ūhâ, Jehovab ǁnān ǁîb ǀapeǂhumîsa xu ra hā daoǁgaude ra mâǃoana ūǃoa tama hâsa. w24.07 11 ¶11

Nē xūn di ǀams nî hāsa ǂgom tama khoen ǁaegu da ge ra hâ. ǁÎn ge nē xūna da ra ǂgom amaga ra ǃhō da. (2Pet. 3: 3, 4) ǁNās xōǀkhās ge Elobmîsa kai ǁgâiǀāb nî ī ǀgaub xa ra mîba da, xawe î ge noxopa ǂgui xūna hâ ǀū da a na. ǀGaisa ǂgomsa da ge ǂhâhâ nē xūn di ǀams ǂhanu ǁaeb ai nî hāsa tsîb Jehovaba nî kōǃgâ dasa. Kai ǁgâiǀāb tsoatsoas ǃnâ da ge ǀnîsi sida ûiga nî sâu daoǁgaude nî ǃkhōǃoa, Hebre Xristeǁîn ge Romeǁî toroǂnubis ge Jerusalemsa xāǂgā o a hō ti khami. Kaise î ge a ǂhâǂhâsa î da Jehovab ǀapeǂhumis ǃnâ ra ǂgaeǂgui ǃgâsaga ǂgomǃgâ. ǁÎgu daoǁgausa ǂgomǃgâsib ǀkha kai ǁgâiǀāb ǃnâ saosa da ge ǃâubasen tama, nēsi da ga ǁîgu daoǁgaude saos xa ǃgombahe o. w24.09 11 ¶11-12

Xristeǁî ǁgûn ge ra mûǂan ǀgôan ǂgoms ǀkha ǃnae tama hâsa. ǁAeb ra ī khami i ge sadu ǀgôa-e saora dîna dî ǁkhā: ‘Mati ta a ǂan Elo-i hâsa? Amabes ǃnâ ta Elobmîs ra mî-e a ǂgom ǁkhā?’ Elobmîs ge ra mî î da “gā-ai” ǂâiǀgauba sîsenū tsî “xūn hoana ǃâitsâ.” (Rom. 12:1; 1Tes. 5:21) Mati du sadu ǀgôana a hui ǁkhā în ǁîn ǂgomsa ǀgaiǀgai? Sadu ǀgôana ǂkhâǃnâ în ǁgauǁgauna ôa Elobmîs ra mî-i a amasa. Sadu ǀgôan ga dîna dî, o nē ǃēsa ū tsî ǁgau nî re matin ǃereamde nî hōsa. Ôaǃnâs ǀkha ra hui xūna ra sîsenūse. Aiǁgause Ôaǃnâs ǀkha ra hui ǂkhanib Jehovab ǃoaba-aon dib khami. ǁNā ǂkhanib ǃnâts ge “Elobmîs” ti xoa tsî a ôa ǁkhā “Elob xa ǃgomǂgāǃnâhe hâ” ǃâba. Îts ǁgauǁgauna hō Elobmîs ǃgâi ǂkhanis ǀguisa i tamasa khoegu xa xoahe hâsa. “Xawe ama mîs Elob dis” asa. —1Tes. 2:13. w24.12 14-15 ¶4-5

ǀHaohâb ǃûi-aoga mati Jesuba a ǁgae ǁkhā? ǃGâsaga gu ge nî ǁkhāǁkhā, ǂkham gu ga xawes tsîna î gu ǃnāsa sîsen-e ǀhaohâb ǃnâ dī. ǀHaohâb ǃûi-aogu ge ra ǁnâuǃā nē ǃgâsagu ǂgui xūna nî ǁkhāǁkhāhesa. ǂKham ǃgâsaga ǁnama tsî gu ge ǀnamxaǃnâ ǀgaub ǃnâ ǁîga nî ǁkhāǁkhā. Î gu ǃgamǃgamsenxasiba ǁkhāǁkhāsen, ǂgomǃgâhe ǁkhā tsî nauna huis turaba ūhâ. (1Tim. 3:1; 1Pet. 5:5) Jesub ge ǃereamsa ǁîb ǁkhāǁkhāsabega ge mā î gu nauna ǃgâiǂhôas xa mîba tsî xoade ǃgāsase ǁîna ǁguiǃāba. ǁKhāǁkhāsabegu ge ǀnîsi gere ǂâi Jesub xa gu ra ǂgaoǀkhāhe xūna gu a dī ǁoa ǃkhaisa. Xaweb ge Jesuba ge ǂgomǃgâ ǁîgu ǁnā sîsen-e nî dī hō ǃkhaisa tsîb ge ti ge mîba gu. ǁÎgab ra ǂgomǃgâ ǃkhaisab ge ge mîba gu mîb ge o: “Ti Îb ge tita sîs ǁkhās khami ta ge ra sî go.”—Jhn. 20:21. w24.10 16 ¶15; 17 ¶17

Davidi ge ge ǃgâi gao-ao i. ǁÎb ge ǁnae-amde ǀkhō, xoa-ao, ǀgaisa ǃkham-ao tsî ge kēbo-ao i. ǁÎb ge ǂgui ǃgomsiga gere hōǃâ. ǂGui kurigab ge gao-aob Saula xu gere ǃkhoenî ǁîb gere ǃgambi ǂgao amaga. ǁÎb ge Gao-ao kai toas khaoǃgâs tsînab ge ǁîb ûiba gere ǃkhoeba, Absalommi ǁîb ôab gere ǃgambi ǂgao amaga îb ǁîb soas ǃnâ gao kai. Nē ǃgomsin tsî ǁîb gere dī dīsan ǂam-aib ge Davida ǂgomǂgomsase Jehovab ǃoa-ai ge hâ ǁōb nîs kōse. “Ti ǂgaob ǃoa hâ khoeb” tib ge Jehovaba ǁîb xa ge mî. Amase da ge Davidi gā-ai ǀapemāsa nî ǃgâ. (1Gao. 15:5.) ǃGaoǃgâ re Gao-aob Davidi ge tae-e ǁîb ôab Salomob sao rase Israeli Gao-aob ase nî ǂgaeǂguiba a ǀapemāsa. Jehovab ge Salomoba ge ǁhûi, îb khoen Eloba nî ǃoaba ǃnâ Tempela om. (1Kro. 22:5) Nē sîsenni ge ge kai i tsîb ge Jehovab huiba ge ǂhâ hâ i îb Israelǁaesa ǂgaeǂgui. Davida tae-e ǁîba ge mîba? Davidi ge ǁîb ôaba ge mîba, Jehovabab ga ǁnâuǀnam ob nî ǃgâi Gao-ao kai tsîb ǁîb xa nî ǀkhaehesa.—1Gao. 2:​2, 3. w24.11 10 ¶9-11

Aob ǁîb tarasa ǂnau tsî ra mîǁgaiǁgaib ge xūna ūhâ dīb nîse îb nēb go ǁgaiǁgai ǃgammeba ǃgâiǃgâi. ǂGuroseb ge nî mûǂan kai ǃgomsibab ūhâ ǃkhaisa. Jehovab ge dīb ra xūn hoana mû tsî mîb ran hoana ra ǁnâu. (Psa. 44:21; Aoǁn. 12:14; Heb. 4:13) ǀGamǁîseb ge ǁîb tarasa ǃgâi tamase hâ-ū ǀû tsî ǁîb ǀgauba nî ǀkharaǀkhara. (ǂKhm. 28:13) ǃNonaǁîseb ge ǁîb taras tsî Jehovab ai ǀûbaba ǂgan tsî ǁîra di ǀûbasa nî ôa. (ǃNǃkh. 3:19) Tsîb ge Jehovaba nî ǀkhoma îb ǀkharaǀkharasen tsî hui-e îb ǁîb ǂâiǀgaub tsî ǃhoa ǀgaub tsîna ǀkharaǀkhara. (Psa. 51:​10-12; 2Kor. 10:5; Fil. 2:13) Hakaǁîseb ge ǁîb ǀgores ǀkha nî sîsenǁare tsî hoa ǁgai xūn, tarasa mîǁgaiǁgais, ǃau tsî ǂnaus tsîna nî ǃhui tsoatsoa. (Psa. 97:10) Koroǁîseb ge ǀhaohâb ǃûi-aogu ǀkha nî ǃhoa, î gu hui bi. (Jak. 5:​14-16) ǃNaniǁîseb ge nî ǀapeǁgui matib nēti ī xūna xu ǂgōsen tsî tā ǁkhapa ǁgai xūna nî dīsa. w25.01 11 ¶14

Jehova elobats a ǀnam, mâ ǃgâi ǀkhaeb hoaba ge mā tsi ba, ûib tsîna ǃkhōǂgā hâse? Sa ǀnamats ǁîba ra ǁgau ǂgao? ǃGâi ǀgaub nēsa dīs ge sa ûiba Jehovaba ǃoa mā tsî ǁāǁnâ kaisensa. Nēsats ga dī ots ge Jehovab omaris di ǃâ kai ǁkhā. Nēs xa ǃaromahe hâseb ge sa ǁGûb tsî ǀHōsaba daoǁgau tsî nî kōǃgâ tsi, ǁîb omaris di ǃâts a amaga. (Psa. 73:24; Jes. 43:​1, 2) Māǁnâsen tsî ǁāǁnâ kaisens ge ǃēsa nî mā tsi îts ǀamosib kōse ǃgâiaǂgao. (1Pet. 3:21) ǁĀǁnâhe ǂgaots ra xawe i xū-e ra ǃkhō-oa tsi? Ti i ga ī, ots ge ǀguri hâ tama. ǂGuin ge ǀkharaǀkharana ge dī ǁîn tanisen ǀgaub tsî ǂâiǀgaub ǃnâ în ǁāǁnâhe ǁkhā. Tsîn ge ǁîna nēsi Jehovaba ǃgâiaǂgaob tsî ǁkhoaǂgaosib ǀkha ra ǃoaba. w25.03 2 ¶1-2

Elobmîs ǃnâ i ge ǃnāsa ǁaeba ǁorena kai ǃgommi ǀkha ra ǀgopeǀnōhe. Gao-aob Davidi ge ǁîb di ǁorena saora ǀgaub ǃnâ ge ǁguiǃā: “ǂHanuoǃnâsib ge ti danasa go ǃnā tsî kaise ǃgom ǃnaob khami a ǃgomba te.” (Psa. 38:4) Xawe Jehovab ge ǃhobasen ran di ǁorena ra ǀûba. (Psa. 25:18; 32:5) Hebreǁî mîs ǀûbas ǃaroma ra sîsenūhes ge “ūkhâi” tamas ka io “tani” ti ra ǂâibasen. ǀNîsi da ge Jehovaba ǀgaisa khoeb ǁorena sada di ǃhōde xu ra ūǁnâb ase a mûnan-ai ǁkhā. Elobmîs ge ǀkhara aiǁgaude sîsenū tsî ra ǁgau matikō ǃnūseb Jehovaba sada ǁorena ra ūbēsa. Psalmdi 103:12 ge ra mîba da: “Aiǂoas huriǂoasa xu ǃnūs ǁkhās khamib ge ǁîba ǁoren âda sada xu ǃnūse ra ūbē.” Sores ǂoas tsî sores ǂgâs tsîn ge ǀgam ǃkharagagu ǁaegu ai ra ī tsî tātsē ǀgui ǁaeb ai ī tide. ǁNās ge ra ǂâibasen Jehovab sada di ǁorena kaise ǃnūse ra ūbēsa. Nēs ge ra ǂgomǃgâ kai da, Jehovab sada ǁorena hoase ra ǀûba ǃkhaisa. w25.02 9 ¶5-6

Jesub ge ǀhomma ǃoa oas khaoǃgâb ge Petruba buruxa sîsen-e ge dī. ǃNaesa xu ge ǃhora-i khoebab ge ge ǂgauǂgau. (ǃNǃkh. 1:​8, 9; 3:​2, 6-8) Kai ǂnubis khoen ge nē buruxa dīsa ge mû tsî ǁîb ǂnamipe ge mā. (ǃNǃkh. 3:11) Xaweb ge Petruba khoen xa ge ǂanǃgâhe ǂgao tama hâ i, ǁnātib ge kaikaihe xawe. ǃGamǃgamsenxab ge ge ī tsîb ge ǁnā kai ǂnubis khoena ge mîba în Jehovab tsî Jesub tsîna koa. Sao ra mîdi ǀkha: “Israelǁîdo, tarexa du nē go ī ǃkhais xa nēti burugâ hâ? Sikhom di ǀgaib tamas ka io elosiba xu khom go ǁîba ǂuruǂuru, ti du ra ǂâi?” (ǃNǃkh. 3:​12-16) Petruba ǁgae ǁkhā tsî da ge ǃgamǃgamsenxasiba a ǁkhāǁkhāsen ǁkhā. Nau khoena ǃoa da ge ra ǃgâidī Jehovab tsî khoena da a ǀnam amaga, khoen xa da ra koahe ǂgao amagas ose. Ama ǃgamǃgamsenxasiba da ūhâsa da ge ra ǁgau, Jehovaba da ga ǂkhîb ǀkha ǃoaba o. Tsî da ga sida ǃgâsana xūna dība o khoen xa da ga mûhe tama īs hoan ǃnâ.—Mat. 6:​1-4. w25.03 10-11 ¶11-12

Aoǁnâ sîsenni ǃaroma da ūhâ ôasasiba da ge a ǀaro ǁkhā. Jehovab tsî sida ǀgūkhoena da uba hâ ǀnammi ai da ga ǂâisa ǂnûi o. (Mat. 22:​37-39) Mûnan-ais ǀguisa dī re matikōseb Jehovaba nî ǂkhîsa mûb ga o sîsen-e da ra dīsa. Tsî matikōsen khoena nî ǂkhîsa Elobmîsan ga ǁkhāǁkhāsen tsoatsoa o. Sida haisi-amsa ra ǃkhōǃoan di ores xas tsîna ǂâiǃgâ re. (Jhn. 6:40) Sadu omsa xu du ga ī ǁoa, o dī ǁkhā du a xūn ai ǂâisa ǂnûi re. ǁNās ge Jehovab tsî sadu ǀgūkhoen tsîna ǀnamsa. Koronas ǁaeb ǃnâ ra ge Samueli tsî ǁîb taras Danias tsîra omsa xu ge ī ǁoa i. ǁNā ǃgomǁaeb ǃnâ ra ge telefonni ǃnâ-ū aoǁnâ, sîǂkhanide xoa tsî Elobmîs ǁkhāǁkhāde zooms ǃnâ-ū gere dī. Samueli tsî Dania hâra ge ǂguros khami ǃnāsa-e ge dī ǁoa i, xawe ra ge ǁkhā ra a-e gere dī tsî ǃgâiaǂgaoba gere hōǃâ. w24.04 18 ¶15-16

ǃGammets ga o ǀguits ge ǃgâiaǂgaoba ûib ǃnâ ūhâ tama. ǃGamme tama Xristeǁîn, ǂkhaman tsî kairan hoan ge ǀguitsē ra mûǂui ǃgammesa. ǂAngu ro nîs aiǃâ i ge aibe khoe-i hoa-e Jehovab ǀkha ǀgaisa ǀhōsagusisa omkhâi, ǃgâise ǂansen tsî ǁkhāsiba nî ūhâ omarisa marisise ǃgâise kōǃgâsa. (1Kor. 7:36) ǃGâi i ge a ǂansa mâ ǀgaugats ǃgamme ǂgaots ra khoe-i ǃnâ ra ôa ǃkhaisa. Tsî ǁnāsats ge ǀnai dî-amguro nîs aiǃâ nî ǂan. Nēsats ga dī tama i, o i ge a īǁkhā sats ǃaroma a ǃgâi khoe-e kō ǃkharusa. Tamas ka io satsa ǃgâiba tama khoe-i ǀkha ǃgammesa. Xawe hoan ǂam-ai, ǃgamme ǂgaots ra khoe-i ge nî ǁāǁnâsa Xristeǁî. (1Kor. 7:39) Xawe mâ ǁāǁnâsa Xristeǁî-i hoa-i ge sats ǃaroma ǃgâi tide. ǁNās ǀkha dîsen re: ‘Tita mâ mîǁguiga ti ûib ǃnâ ūhâ? Mâ ǀgauga ǃgamme ǂgao ta ra khoe-i ǃnâ a ǂhâǂhâsabate? ǃÂubasen ta ra xūna a ǁnâuǃāxa?’ w24.05 20 ¶1; 21 ¶3

Dî-amgu ra khoera ǃgomsin tsî ǁnâusāgun tsîna mati a sîsenǂam ǁkhā ǁaeba xu ǁaeb ǀkha ra nî ūhâna? ǁNâusāgu ro ga, o i ra ǂâibasen ǃgâiba gu tama ro hâ ti? Hoaǁaes ose o. ǃGamme hâ khoen ge ǀnî ǁaegu ai ra ǁnâusāgu. ǀGaisa ǃgammeb ge ǀgam khoen ǀguiba sîsenǀhao tsî ǁîn ǃkharagagusiga a sîsenǂam ǁkhāna xu hâ. ǁNā-amaga i ge nēsi ro saro ǃgomsina ra sîsenǂam ǀgauba ra ǁgau, saro ǃgammeb nî sîsens tamas ka io sîsen tidesa. Sao ra xūna ro ge a dîsen ǁkhā: ‘ǃHoaǃgaom ra xūnam ǃnomsase ǃgôasib ǃnâ ra dī? Sîm ǃnubusina mûǂan tsîm ra dītsâ ǃgâiǃgâisa? ǃKhaesem nau khoe-e ǃēsa mā, ǀûbaba ǂgan tsî ra ǀûba?’ (Efe. 4:31) Xawe ro ga ǃnāsa ǁaeba ǁnâugu tama ī tamas ka io dî-amgu ro ra ǁaeb ǃnâ ǂhāba, ob ge nē mâsiba ǃgammeb khaoǃgâ ǃgâiǃgâihe tide. Mûǂants ga o nau khoe-i sats ǃgao ǃgâi tamasa, o dî-amgusa ǀam kai. ǁNās ge hoaro ǃaroma nî ǃgâi mîǁgui. w24.05 29 ¶12

Jehovab ra mî xūn hoana da ga ǁnâuǀnam tsî Elobmîs ai ǃgaoǃgaosa mîǁguiga dī, o da ge ǃgâi aiǁgause nauna nî ība. Elobmîsa ǁkhāǁkhāsen tsî da ga sida ǂgomsa Jehovab ǃnâ ǀgaiǀgai, o da ge ǁîb tsî ǁîb ǂhanugu ǃoagu nî ǂgomǂgomsa. ǂHumi ǁkhāǁkhādi tsî Jehovab ǂâiǀgaub ǀkha ǀgui tama hâ xūn tsîn da ge nî mûǃā. Tsî da ge naun xas tsîna supuse ǂgaeǂhapuhe tide. (Efe. 4:14; Jak. 1:​6-8) ǁNān hîna ǃgomsiga ra hōǃân tsîna da ge hui ǁkhā. (1Tes. 3:​2, 3) ǀHaohâb ǃûi-aogu ge ǀnōsa ǀgauga nî ūhâ, ǁnâuǃāxa tsî nî ǃamku. Nē aogu ge nauna ra hui “ǀgaisase tsî ǁaposase” Elobmîsa ǃkhōǀgarasa. (Tit. 1:9; 1Tim. 3:​1-3) ǁÎgu aiǁgaus tsî ǃûigu ra ǀgaus ge ǃgâsana ra hui în ǀhaodi ǃnâ ǁhao, aoǁnâ sîsen-e dī tsî aitsâma Elobmîsa ôaǃnâ. ǃGâsan ga ǂâiǂhansen kai nî ra ǃgomsina hōǃâ, o gu ge ǁkhā gu ana nî dī în Jehovab tsî ǁîb ǂâibasens ais tsîna ǂâisa ǂnûi. w24.06 31 ¶16-18

Jesub ge ǃhūbaib aib ge hâ i o ge ǁkhāǁkhā, ǁîb îb ǀûbaǀnamxasa tsîb ra ǀûba da ǂgaosa ǁore da ga o. ǀGui ǀgaub Jesub ge nē-e dīs ge îxa ǂkhōsab ge ge sîsenū ǁgûb tsî ǀgôab dīsa. ǁNā ǀgôab ge ge ǁhûibasen îb omsa xu ī tsîb ge kaise ǁgai xūna sī ge dī. Xaweb ge ǁaerob khaoǃgâ omsa ǃoa ge oasī. ǁÎb îba tae-e ge dī? Jesub ge ge mî: “Mûǃāhe ǁkhāb a ǃnūsib aib ǃgoaxa hîab ge ǁgûba mûǃgoaxa bi tsî kaise ǃoatsâsib xa ge khâiǃnâhe. ǁÎb ge ǃkhoeǃoa bi, ǁnam bi tsî ge ǁoa bi.” Nē ǀgôab ge ge ǃâubasen tama hâ i ǁîb îb nî ǀûbabisa. ǁNā-amagab ge ge ǂganamsen îb ǃgā-i ase oms ǃnâ sîsen. Xaweb ge ǁîb îba ge ǀûbabi. “Nē ǀgôab tib” tib ge ge ǂgaibi tsî ge ū-oabi. Dadasab ge ge mî: “Kāb ge go hâ i tsî ta ge ǁkhawa go hō-oa bi.” (Luk. 15:​11-32) Jesub ge ǀhommi ǃnâ ûi hâ-i ob ge ge mû matib ge ǁîb îba khoena ǀnam i tsî ǃhaese gere ǀûbasa ǁoren gere o. Jesub ǂkhōs ge ra ǁkhaeǂgao da tsî ra ǁgau Jehovab mati ǀkhomxaǂgao ǁGû ǃkhaisa. w24.08 11 ¶11-12

ǃGāsase da ga ǂâio da ge Jehovab xūna ra mû ǀgaub xa nî ǂâi, mîǁguiga da ga dīo. Xristeǁî-i ǃgāsase ra ǂâi i ge ǁî-i ǁkhāsib hoab ǃnā ra dītsâ, î-i ǃgâi mîǁguiga dī Jehovab ǂâiǀgauba ra ǁgauga. ǂÂihō da ge nî Jehovab ǀkha da ūhâ ǀhōsagusis hoa xūn ǂam-ai a ǂhâǂhâsa ǃkhaisa. Nēti ī Xristeǁî-i tsîn ge ǁî-i xa ǃnāsase ǂâisa xus tsîna nî ǂgōsen tsî ra ǁnâuǃā hoa xūna i ǂan tama hâ ǃkhaisa. ǃGāsase da ga ǂâi, o da ge Jehovab ai nî ǂgomaiǂnûi ǀgores ǃnâ-ū tsî ǁîb daoǁgausa nî ǂgan. Mûǂan da ge ra Jehovab ai da ǀgores ǃnâ-ū huiba nî ǂgansa, ǀnî ǁaega i ga supu tama îs hoan ǃnâ. ǁNā-amaga ǃgōsase ǂhâǂhâsa mîǁguiga da ga dī, o da ge Jehovaba ǃoa daoǁgaus ǃaroma nî ǀgore. ǂGomǃgâ hâse ǁîb a ǂansa tae-i sida ǃaroma a ǃgâisa. ǃGôaǃgâ da ge ra Jehovab ge ǁîb ǀgauga da nî ǁgaese kuru da ǃkhaisa. (Gen. 1:26) Ama as ge Jehovaba da ge ǀoasase a ǁgae ǁoa.—Jes. 55:9. w25.03 11 ¶13; 13 ¶17-18

Tā naun xa ǁgaise ǂâi. Naun ga ganganxasiba ǁgau tama io, ǁîna da ge diba xūn xa o da ge a dîsen ǁkhā: ‘Ama ganganoǃnân a tamas ka ion go ǀuru ganganan ra ǃkhaisa mîsa?’ ǀNîsi di ge ǃkharagagu ǃaromade hâ ǁîn ganganxasiba ǁgau tamasa. ǀNîn ge ǃgam ǃgôasiba ūhâ ǁkhā xawe ǃgomse a ǁgâiǂûisen ǁkhā. ǀNîsin ge ra tao huiba ǃkhōǃoasa, ǃgōsasen ge ǁîna nauna ǀnîsi ǃkharuge ǁaeb ǃnâ gere hui amaga. Mâ i ga mâsi xaweb ge sida ǀnamma nî hui da î da sida ǃgâsana kō ǃkharuba tsî ǃgâiaǂgaoba mās ǃnâ hō. (Efe. 4:2) ǃNūǃnâxa. Ganganxasib xab ge gā-ai gao-aob Salomoba ge xoa: “Sa pere-e ǁgam-i ai aoǂui, ots ge ǂgui tsēdi khaoǃgâ ǁî-e nî hō.” (Aoǁn. 11:1) Nē mîdi ge ra ǁgau ǀnî khoen gaxu ǁae-i ǃkharu hâs khaoǃgâ ǀgui ǁîn ganganxasiba a ǁgâiǂûi ǁkhā ǃkhaisa. w24.09 30 ¶18-19

Khoe-i ga ǁgau-oahe o i ge ǀnî ǁaega ǂanǂansa ra dīhe. Nēti ī khoe-i ǀkha da ge a hâ ǀhao ǁkhā. ǁÎ-i go ǁgai ǂâiǀgaub tsî tanisen ǀgaub tsîna ǁnāxū amaga. ǁÎ-i ge noxopa ǀhaohâb di ǃâ. ǁÎ-i tsîn ge ǃgâsan ǀkha hâ ǀhaosa xu ra hā ǂkhâǃnâsa ǂhâ hâ. (Heb. 10:​24, 25) Xawe nē mâsib ge ǁnā-i ǀhaohâba xu ūǂuihe hâ i ǀkha a ǀkhara. ǁÎ-i ǀkha da ge ‘habagu tsî ǁkhāti ǂû’ ǀhaos tsîna dī tide. (1Kor. 5:11) ǁNāsa ra ǂâibasen khoe-i ǀhaohâba xu ūǂuihe hâ-e da ǀhaode ǃoa ǁkhau tide tamas ka io da ǁî-e tawede tidesa? Hî-î. Ama as ge ǁî-i ǀkha da hâ ǀhao tidesa. Xristeǁî-i ge ǃgâiǂâisa nî sîsenū, ǁî-i ga ǀhaohâba xū ūǂuihe hâ omaris ǁani-i tamas ka io ǀgū ǀhōsa-e ǁkhau o. w24.08 30 ¶13-14