Februarib

ǃGâsagu hîna ǃgâi xristeǁî ǀgauga ūhâ gu ge kai huib ase ǀhaohâb ǃnâ ī. ‘Tsamtsiǃnâ-aogu’ ge ǂkhîba ǀhaohâb ǃnâ ra aiǃgû kai. Tsamtsiǃnâ khoe-i ge nauna ǂōrisase ǃgâ tsî ǁîn ra tsâ ǀgaub tsîna ra ǁnâuǃā. Aiǁgause, ǀhaohâb ǃûi-aogu ga Elobmîs ai ǃgaoǃgaosa mîǁguiga dī, ots ǁnā daoǁgaute nî sao? Ta sa ǀgaugats nau khoen di gu ǂam-ai ǁgariǁnâ. ǂHâǂhâsa i ge a nau khoen ǀapemāde ǃgôaǃgâ tsî ǃgâsa. (Gen. 13:​8, 9; ǂKhm. 15:22) Sats ge “ǃkhamxa” tamas ka io ‘ǃhaese ǁaixa tide.’ Nēs ge ra ǂâibasen sats khoena ǃgôasiba ǁgau tsî ǂkhāba tamasa xawe ǁîn ǃoagu a ǃgâisa. ǂKhîxaǃnâ khoe-i ge ǃgarise sîsen tsî ǃgom ǁaegu ǃnâ ǂkhîba ra kuru. (Jak. 3:​17, 18) Sa ǃgâi mîdi ge mâǃoa-aon tsîna nî ǃnomsa kai.—ǂHǂh. 8:​1-3;ǂKhm. 25:15; Mat. 5:​23, 24. w24.11 23 ¶13

Xristub ge “ǀgui ǃnās” ǃaroma ge ǁō, xaweb ge noxopa ǁguibade sida ra dība. (Rom. 6:10) Tae-eb ra dība da? Aiǃgû tsîb ge ǂgui ǃgâi xūna ra mā da nēsi ra īǁkhāna xoremarib xa ǃaromahe hâse. ǃGaoǃgâ re tae-eb nēsi ra dīsa. ǁÎb ge nēsi sida Gao-ao, ǀGapi Prister tsî ǀhaohâb di danase ra ǃoaba. (1Kor. 15:25; Efe. 5:23; Heb. 2:17) ǁÎb ge ǂkhauhesan tsî kai ǂnubis khoena ǀhaoǀhaos sîsen-e ra mûǂam. ǁNā sîsenni ge kai ǁgâiǀāb nî ǀams aiǃâ nî dī toahe. (Mat. 25:32) ǂGomǂgomsa ǃgāb tsînab ge ra sîsenū î gu ǂhâ da hâ gagasi ǂûna ǂhanu ǁaeb ai mā da, î da Jehovaba ǂgomǂgomsase ǃoaba ǀuniga tsēdi ǃnâ. (Mat. 24:45) Tsîb ga sida ǂam-ai 1 000 kurigu ǁaeb ǃnâ ǂgaeǂgui, ob ge aiǃgû tsî sida xūna nî dība. Jehovab ge amabes ǃnâ ǁîb Ôaba sida ǃaroma ge mā. w25.01 24 ¶12

Jehovab ga sada ǁorena ǀûba, oi ge sada ǁoren ge tātsē ī tama hâ i khami ī. Tsî da ge ǂgomǃgâsiba ūhâ hānîǁaeb ǃnâb ǁnā ǁoren ǃaroma ǁkhara da tide ǃkhaisa. Nēs ge ra īǁkhā kai, î da ǃgâi ǀhōsagusisa sada ǀhomsi ǁGûb ǀkha ūhâ. Xawe da ge a ǂan Jehovaba xu ra hā ǀûbab a ǀkhae ǃkhaisa tsîb nēsa ǀnamda tsîb a māxa amaga ra dīsa, anu tama da hâ ǃkhais ǃaromas ose. Kaise da ge ra ǃgôaǃgâ Jehovab ra ǀûba ǃkhaisa. (Psa. 130:4; Rom. 4:8) Xawe da ga Jehovab nî ǀûba dasa ǂhâba, o da ge ǂhâǂhâsa xū-e nî dī. ǃGaoǃgâ re Jesub ge tae-e a mîsa: “ǁNān sa ǃoagu ra tsūdīnats ga ǀûba, ob ge sa Îb ǀhommi ǃnâ hâb tsîna nî ǀûba tsi.” (Mat. 6:​14, 15) ǁNā-amaga da ge Jehovaba ǁgae tsî nauna nî ǀûba. w25.02 13 ¶18-19

Sodoms tsî Xomoras khoen xa ǃgoaǃgâ re. ǂHanu-ai Khoeb Lot ti ǀon hâb ge nē khoen ǁaegu gere hâ. Xawe ǂan i da a Loti ge ǁîn hoana aoǁnâbasa? Hî-i, ǁîn ge ge eloxoresa i, xawe ǂan în ge i tae-i a ǂhanus tsî tae-i ǂhanu tamasa? ǂÂihō re Elobmîs ge ra mî, ǂgui aogu ǁnā ǃās ǃnâ hâgu ge Loti di sari-aoga gere ǀgaiǃkhō ǂgaosa. Elobmîs ge ra mî ǁnā ǂgui khoegu ge “kaigu tsî ǂkhamgu hoagu” tsîna ge ǃkhōǂgā hâ i. (Gen. 19:4; 2Pet. 2:7) Amabes ǃnâ da a mî ǁkhā, ǀkhomxaǂgao Elob Jehovab ge mîmâisa ǁnā khoen ǀgui-i xare-i tsîn khâisa hō tidesa? Hî-i, ǁnāti da ge a mî ǁoa. Jehovab ge Abrahamma ge mîba, disi ǂhanu-ai khoen tsîn ǁnā ǃās ǃnâ ǀkhaisa. (Gen. 18:32) Hoa khoen ge ge ǂhanuoǃnâ i tsîb ge Jehovaba ge ǂhanu i ǁîna hîkākāsa. Mî ǁkhā i da a ǀgui-i xare-i tsîn “ǂhanuoǃnân di khâis” ǃnâ khâi tidesa? Hî-i ǁnāsa da ge a mî ǁoa. w24.05 2 ¶3; 3 ¶8

Mari-i ǃgomsin xa ǃaromahe hâsen ge ǀnîna ǁîn omaride xū tsî ge doe sîsenni ǃgao xawe ega ge mûǂan nēs ge gā-ai tama hâ isa. ǀAsa sîsen-e du nî ūǃoas aiǃâ tā matikō mari-e du nî hōs xa ǀgui ǂâi. Xawe ǂâi re nēs mati sadu tsî sadu omaris tsîna nî huisa î du Jehovab ǀgūse hâ. (Luk. 14:28) Dîsen re: ‘Ī ta ga os nēsa mati ti ǃgammeba tsâǀkhā ǁkhā? Hoa ǀhaodi tsî aoǁnâ sîsenni tsîna ta nî hâǃnâ ǁkhā? Ti ǃgâsan ǀkha ta ǀguiba ǁkhoaxa ǁae-e nî ūhâ ǁkhā?’ ǀGôana du ga ūhâ, o sao ra ǂhâǂhâsa dîsa dîsen re: ‘Ti ǀgôana ta a hui ǁkhā în Jehovab ǀgūse hâ tsî ǁîba ǁnâuǀnam?’ (Efe. 6:4) Mîǁguiba du ga dī, ob Jehovaba nēs xa ra tsâ ǀgauba ǂâiǃgâ re. Tā Elobmîs ǃnâ ǂgom tama ǀaokhoen tamas ka io ǀhōsan xa mîbahe nē mîǁguiga dīs ǃnâ. w25.03 29 ¶12

Gagasise kaiǀoa tama hâ Xristeǁî-i ge “ǂgaeǂkhapu-aon,” “ǀhôagao ǀāpedi” tsî “ǂhûmi ǁkhāǁkhādi” tsî ǁnaǁgôa-aon xas tsîna a ǂgaeǂkhapuhe ǁkhā. ǁÎ-i ge surib, ǂkhaba-ôas, ǃhaese ǁaixas tamas ka io ǃâitsâ-i ǃnâs tsîna a māǁnâsen ǁkhā. (1Kor. 3:3) Xoadi ge gagasise kaisa, sorosise kais ǀkha ra ǀgōpeǀnō. (Efe. 4:15) ǀGôan ge ǂgui xūna a ǀū tsî ǁnās ǀkha kōǃgâhesa ǂhâ hâ. Aiǁgause, mamasas ge audodi hâbas ga ǀgôaros ǀkha ǃgû, o ǁîs ǃoma a ǃkhō ǁkhā. Xawe nē ǀgôaros ra kai khamis ge ǁgûsa ǁîsa a mā-am ǁkhā is aitsama audodi daoba ǃgâu. Xawes ge noxoba ǁîsa a hōhoǃnâ ǁkhā, is hoaǁae kō mâpas ra ǃgûsa. Tsîs ge nē ǀgôarosa kaikhoe kais ga, o ra dītsâ is ǁnā ǁkhōǁkhōsa mâsiga xu ǃkhō-oasen. Gagasise kaiǀoa hâ Xristeǁîn ge mîǁguigan ga dī, o Elobmîs di tsoatsoadi ai ra kō în Jehovab ǂâiǀgauba nēs ai ôa. Tsî ǁnās ǀkha ǁkhāǁkhāsenan go xūna ra sîsenǂûi. w24.04 3 ¶5-6

ǂGui kurigab ge Jehovaba ǁîb ǀhomsi kurusaben ǀkha ǀgui ǀhommi ǃnâ gere hâ. Xaweb ge ega khoena ge kuru tsîn ge ǁîn tsîna ǃhaokhoese gere hâ. ǁÎb ǃhaokhoen ge Enoxi, Noaxi tsî Jobi tsîna ge ǃkhōǂgā hâ i. Nē ǃhaokhoen ge Elob ǀhōsan ase ra ǁguiǃāhe tamas ka io “eloǃaoǃgâxase gere tanisen” khoen ase. (Gen. 5:24; 6:9; Job. 29:4; Jes. 41:8) Jehovab ge aiǃgû tsî ǁîb ǀhōsana ǃhaokhoen ase ra ǁkhau. (Ese. 37:​26, 27) Aiǁgaus ase Esegieli kēbosa xu da ge ra ǁkhāǁkhāsen, Elob amase ǂhâba hâsa în ǁîb ǃoaba-aona ǁîb ǀkha ǀgū ǀhōsagusisa ūhâ. ǁÎb ge ra mîmâi ǁîn ǀkhab “ǂkhîb di ǃgaeǀhaosa” nî dīsa. ǁNā kēbos ge ǁnān ǀhomsi ǃâubasensa ūhân tsî ǃhūbaib ǃâubasensa ūhân mati ǀguiba tentommi ǃnâ nî “ǀgui gū” kais di kēbosa ǃoa ra ǁnaeǁgau. (Jhn. 10:16) ǁNā kēbos ge nēsi ra dīǀoaǀoahe. w24.06 2 ¶2, 4; 3 ¶5

Jehovab khoen ase da ge ǂgaoba xu ǁîb Gaosiba ra ǂkhâǃnâ. Xawe da ge ǀnî ǁaegu ai ǁkhoaǂgaosiba ǂhâhâ ǁnāsa dīs ǃaroma. (Mat. 6:33) Aiǁgause, nē eloxoresa ǃhūbaib ǃnâ da ge ǁkhoaǂgaosiba ǂhâhâ Jehovab ǂgaoǀkhādi ǃoagu ûisa. Tsî da ga Gaosib ǃgâiǂhôasa aoǁnâ ǂgao o.  Nē da ûiǃnâ hâ ǃhūbaib ǃnâ i ge ǂgīǂgōsi ǀgoras tsîna hâ. ǁNā-amaga da ge ǁkhoaǂgaosiba ǂhâhâ î da tā nē xūn ǃnâ ǃâ-e ūhâ. (Jhn. 18:36) Jehovab ǃoaba-aon ge ǂgui ǃhūgu ǃnâ marisi ǃgomsiga ra hōǃâ, ǂgīǂgōsi xūn ǃnân ǃâ tama ǃkhais ǃaroma. ǂNauhe tsîn ge ǃkhōsis ǃnâ ra ǂgāhe. ǀGaib tsî ǁkhoaǂgaosib tsîna da ge ra hō, naun Jehovab Gaosiba ge ǂgomǂgomsase ǂkhâǃnân aiǁgaus xa da ga ǂâiǃgâ o. Sida Gao-aob, Jesub Xristub ge ǀgaisase Satanni ǂgīǂgōsi ǁaxasiga ge mâǃoa ǃhūbaib aib ge hâ io. (Mat. 4:​8-11; Jhn. 6:​14, 15) ǁÎb ge hoaǁae Jehovab ai ge ǂgomaiǂnûi hâ i îb ǂhâbab ge hâ i ǀgaiba māhe. w24.07 3 ¶4; 4 ¶7

Jehovab ge nē xūna Elobmîs ǃnâ ge xoa-mâi î da ǂhâǂhâsa xū-e ǁnâuǃā. ǁNās ge ra hui da î da ǁnâuǃā tae-i ǃaromab ǁîba ǁoreba ǃhui hâsa. ǁOreb ge sida ǁGûb ǀkha da ūhâ ǀhōsagusisa ǁgaiǁgai tsî ǁōba ra ǃaroma. (Jes. 59:2) ǁNā-amagab ge ǁGâuaba, Jehovab tsî khoen tsîna ǃhui hâ. ǁÎb ge Adammi tsî Evas tsîra ge ǃâitsâ î ra ǁore tsîb ge nēsis kōse khoena ra ǃâitsâ. ǁÎb ge ge ǂâi Edenni ǃnâb ge dansa. Xaweb ge Jehovab a ǀnamxaǃnâ ǀgauba ge ǁnâuǃā tama hâ ī. Elob ge Adammi tsî Eva hâra ǀgôan ǃaromab ge ūhâ i ǂâibasensa ge dawa tama hâ i. Elob ge khoena a ǀnam tsî ǁkhā ǁaeb ai ǃâubasensa ǁîna ge mā. (Rom. 8:​20, 21) Jehovab ge ge ǂan ī ǀnîn ǁîra suriba xu ra hān nî ǁhûisa ǁîba ǀnamsa tsî ǁîba nî ǁnâuǀnam ǂgaosa. ǁÎn ǁGûb tsî Kuru-aob aseb ge ǁîba daoba ge ǁkhowa-am în ǁîna ǁîba ǃoa ǀgū tsî ǁōb tsî ǁoreba xu sâuhe. w24.08 3 ¶3-4

Jehovab khoen ge kaise ǂgui xūna ra dī. Aiǁgause ǃnāsa ǁaeba da ge ra sîsen, aitsâma kōǃgâsen tsî sida omaridi tsîna kōǃgâsa. (1Tim. 5:8) ǃNāsa Xristeǁîn ge ǀaesen hâ tamas ka io kaira omaris ǁanina ra kōǃgâ. Tsî hoa da ge sida ǂurusiba kōǃgâsa ǂhâhâ, nēs tsîn ge ǁaeba ra ū. Nē xūn hoan xōǀkhā da ge ǂhâǂhâsa ǁgaumâide ǀhaohâb ǃnâ ūhâ. Tsî ǂhâǂhâsa ǁgaumâis ge ǁkhā da a-i hoa-e dī tsî ǃgâiǂhôasa aoǁnâsa. Elobmîsa khomais ge “ǂhâǂhâsa xūn” di ǀgui Xristeǁîn ǃaroma. ǁNā-amaga da ge ǁkhā da a-i hoa-e dī tsî nî khomai. ǂKhî khoeb xa i ge psalmdi xoa-aoba ge mî: “Xawen ge ǃKhūb di ǂhanub ǃnâ ǃgâiǃgâisen tsî ǁîba tsēs tsî tsuxuba ra ǂâiǃgâ.” (Psa. 1:​1, 2) ǃGāsases ge ǁnāsa ra ǁgau ǁaeba da nî ǁamaǂuisa î da Elobmîsa khomai. Mâpa a ǂhanu ǁae Elobmîsa khomaisa? Mâ khoe-i hoa-i ge khomai ǂgao i ra ǁaeba tsēs ǃnâ a ǁhûi ǁkhā. Xawe ǂhâǂhâsa as ge, ǁhûi da ra ǁaeb ge nî hui da î da Elobmîsa tsēs hoasa khomai. w24.09 3 ¶5-6

Gagasise kaiǀoa hâ Xristeǁîna nauna xu huiba ǂhâ hâ? Îo, ǁîn tsîn ge ǁaeba xu ǁaeb ǀkha nauna xu huiba a ǂgan ǁkhā. Xawe nēsi ǀgui ra kai khoe-i ge ǀnîsi nî ǂhâba în nauna tae-en nî dīs, tamas ka io mâ mîǁguiba i nî ūsa mîba nî. ǃKharagagusib hîna hâb ge gagasise kaiǀoa hâ Xristeǁî-i ge gā-aisiba ūhâna xu huiba a ǂgan ǁkhā. Xawe i ge a ǂan ǁî-i aitsama nē mîǁguiba nî ūsa tsî i ǁî-i “tanisensa nî ǃereamba” ǃkhaisa. Kai hâ khoen īsib ǃnâ a ǀkhara ǁkhās khamis tsînan ge Xristeǁîna gagasi ǀgaugu ǃnâ ǃkharagagusiba ūhâ. Aiǁgause, gā-aisib, ǁkhoaǂgaosib, māxasib tsî ǀkhomxaǂgaosib khami. ǀGam gagasise kaiǀoa hâ Xristeǁîra ge ǀgui mâsib ǃnâ ǃkharagagu ǀamǂoasa ūhâ ǁkhā, Elobmîs ai ǃgaoǃgaosa kha. Nēs ge ǃgōsase ǃanu ǃgâiǂâis ai i ga ǃgaoǃgaosa o. Nēsa mûǂans ge nî hui da, î da tā ǃkharagagusib hîna hâb ai ǀgoraǃgâgu. ǀGuiǃnâxase hâs ai da ge ǂâisa nî ǂnûi.—Rom. 14:10; 1Kor. 1:10. w24.04 4 ¶7-8

Tae-ets a dī ǁkhā xū tamasets ga tsâ o? Jehovab aiǃâts a ǀō-aisas xa hâ xoade khomai tsî ǂâiǃgâ re. Tā naun ǀkha ǀgopeǀnōsen tsî dī ǁoats a xūn ai ǂâisa ǂnûi. Jehovab ge dīho ǁkhāts an ǂam-ai ǃnāsa-e ǂgaoǀkhā tsi tama hâ. (Psa. 103:​13, 14) ǃKharu ge ǁae i ga khoe-e ǂnau tsi tamas ka io ǀnîsi ǀgaiǃkhō tsi, o tā nēs xa ǀhapiǂgā-amsen re. ǁNā ǀgaub ǃnâ tsūdīhesats ge anu tama hâ. ǂÂis ǃnâ ūhâ Jehovab ge ǁnān nauna ra tsūdīna ǀhapixase nî ǀgoraǃgâ. Xaweb ge tsûtsûhe hâna nî hui. (1Pet. 3:12) ǂGomǃgâ re Jehovab ge satsa a sîsenū ǁkhā îts nauna hui. ǁÎb ge aoǁnâ sîsenni ǃnâ sats ǀkha ǀguiba sîsenǁares aiǂhanuba mā tsi hâ. (1Kor. 3:9) Sats ge ǃkharuǃnâ ǃgom mâsigu ge supusupuba tsi ǁkhā îts ǃgoma ra tsâ khoena ǁnâuǃā ǁkhā. ǂGui ǀgaugu ǃnâts ge ǁîna a hui ǁkhā. w24.10 7-8 ¶6-7

Jehovab ge ra tsâǀkhāhe khoen ra hâ-ū da ǀgaub xa, ǁîb ge “ǂhanu-aisiba a ǀnam.” (Psa. 37:28) Jesub ge ǂgomǃgâsiba ra māda, Jehovab “ǃhaese . . ǂhanu-aisiba” nî hā-ūsa ǂhanu ǁaeb ai. ǁÎb ge ǀgūǁae ǃgomsina nî ǀariǂûi tsî mā-am tide î da ǂhanuoǃnâsiba hōǃâ. (Psa. 72:​1, 2) Jehovab hoa ǃgomsina nî ǀariǂûis kose da ge nî ǃâu. Xaweb ge ǁîba nēsis tsîna ra hui da, ǂhanuoǃnâse da ga hâ-ūhe o. (2Pet. 3:13) Aiǁgause ǁîb ge ra ǁkhāǁkhā da ǂhanuoǃnâse da ga hâ-ūhe, o da nî tanisen ǀgauba î da tā ǃgomsina hōǃâ. ǁÎb ge Elobmîs ǃnâ-ū ra ǁgau da, ǁîb ǀGôab ge ǂhanuoǃnâseb ge hâ-ūhe o a tanisen ǀgauba. Jehovab ge Elobmîs ǃnâ-ū ǀapemāde ra māda ǂhanuoǃnâse da ga hâ-ūhe, o da nî tanisen ǀgaub xa. w24.11 2-3 ¶3-4

Jesub khoena ni ǂûmas ge īǁoa khami î ge gere mûsen, ǁîb 5 000 khoega nî ǂûmā amaga. Nēs ge ǀgôan tsî tarekhoedi tsîna ge ǃkhōǂgā hâ i, ǀnîsi î ge ǁaubexa 15 000 khoena ge hâ i ǂû-e ge ǂhâhâ īna. (Mat. 14:21) Andreab ge ge mî: “Nēpab ge axarob koro ǃhoroperegu tsî ǀgam ǁaurokha tsîna ūhâba hâ, xawe tarena ǁîna nētikō kai ǂnubis khoen ǃaroma?” (Jhn. 6:9) ǃHoro-i ǀkha kurusa pere-i ge ǃnāsa ǁaeba gere ǂûhe. Tsî ǂkhari ǁaun ge ǂō-i ǀkha tsoro-aihe tsî gere ǂnâǂnâhe. Xawe axab ge ūhâ i pere-i ge ǂgui khoena ǂûmasa ge ǂâu tama hâ i. Jesub ge khoena ǃhaokhoeǃkhōǃoaxasiba gere ǁgau ǂgao tsîb ge ǁîna ge mîba în ǀgarib ai ǃâdi ǃnâ ge ǂnû. (Mrk. 6:​39, 40; Jhn. 6:​11-13) ǁNāpaxub ge Jesuba papasaba gangansa pere-i tsî ǁau-i ǃaroma ge mā. Nēsa dīs ǃnâ-ūb ge ǁîba ge ǁgau, Elob ge nē ǂûna a māsa tsîb ǂû-i ǃaroma ra gangansa. Kaise i ge a ǂhâǂhâsa î da Jesub aiǁgausa sao tsî ǀgore ǂû da nîs aiǃâ. Jesub ge ǁîb ǁkhāǁkhāsabega ge mîba, î gu ǂû-e ǀgoraǂûi tsîn ge khoena ǂû tsî ge ǁâ. w24.12 2-3 ¶3-4

Jesub ge ǃhūbaib aib ge hâ io, ǁîb ǁGûba ǂkhaisiba gere mā khoena mîbas ǃnâ-ū Jehovab ǀgaiba ra mābisa îb ǁnā buruxa dīna dī. (Mrk. 5:​18-20) Jesub ge Jehovaba ǂkhaisiba ge mā ǁîb xab gere ǃhoa xūn ǃnâ-ū tsî nau khoenab gere hâ-ū ǀgaub ǃnâs tsîna. ǀGui ǃnās aib ge Jesuba sinagogegu ǃnâ gere ǁkhāǁkhā. ǁNāpa i ge tarekhoes 18 kuriga ge demonga ūhâ isa ge hâ i. Demongu ge ge ǃaroma îb ǁîs ǁâba gama tsîs ge ǂgōse ge ǃgû ǁoa i. Nēs ge kaise ge tsûtsûsa i tsîb ge Jesuba gere ǁnâuǃā. ǁÎsab ge gere hui ǂgao. ǁÎs ǀgūse sī tsîb ge khoexaǃnâ ǀgaub ǃnâ ǁîs ǀkhā ge ǃhoa. Mîb ge ge: “Tarase sa ǀaesenna xus ge go ǃnora!” ǁÎb ǃomkhab ge ge ǁgui-aisi tsîs ge ǁnātimîs ai “ǂhanuse mâ tsî Eloba ge koatsoatsoa,” ǁîs ge ge ǂgau. (Luk. 13:​10-13) ǁNā tarekhoes ge ǃgâi ǃaromasa ge ūhâ-i Jehovaba ǂkhaisiba māsa. ǁKhā xū-e da ge sada xa a mî ǁkhā. w25.01 2-3 ¶3-4

Īǁkhā-e Adammi tsî Eva hâra ge ǂoaǃnâ xū-e hō-oasa? Nēsa da ge aitsama dīhō ǁoa. (Psa. 49:​7-9) Huib ose da ge ǃâubasens tsî khâis tsîna ga ūhâ tama hâ. Sida ǁōb ge xamanin dib khami ga ī hâ, ǁō tsî da ge ǁkhapa khâisa ga hō tama hâ. (Aoǁn. 3:19; 2Pet. 2:12.) ǁNās ǁkhās khamib ge sida ǀnamxaǃnâ ǁGûb Jehovaba, sida surudeba a matare ǁkhā ǀkhaeba ge mā da. Jesub ge nēsa sao rase ge ǁguiǃā: “ǁNātikōseb ge Eloba ǃhūbaiba ge ǀnam tsîb ge ǁîb di ǀguise ǃnae hâ ǀGôaba ge mā, ǁîb ǃnâ ra ǂgomn hoan kāǁō tide, xawen nî ǀamo ûiba ūhâse.” (Jhn. 3:16) Nē ǀkhaeb tsîn ge ra īǁkhā kai î da Jehovab ǀkha ǀgū ǀhōsagusisa ūhâ. Mati da ǃgâiba nē ǀō-aisa ǀkhaeba xu a hō ǁkhā tsî sida ǁoren tamas ka io “surudena” ǀûbahe ǁkhā? w25.02 3 ¶3-6

Tae-e Sauluba ge hui îb ǁāǁnâ kaisen? Jesub ge Saulub ǀkha ǀhomma xu ǃhoa, ob ge ǃnâba ǁîba ge ǂgī kai. (ǃNǃkh. 9:​3-9) ǃNona tsēdeb ge ǂû tamase hâ tsî gere ǂâiǃgâ tae-i go ǁîb ǀkha īsa. Saulub ge ǂgomǃgâsiba ge ūhâ i Jesub ge Messia isa tsî ǁîb saosaben ge ama ǂgomde gere ôaǃnâsa. Tae-e da Saulub aiǁgausa xu nî ǁkhāǁkhāsen? ǁÎb ge ǀgapiǂâixasib tamas ka io khoena ǃaos di ǂâiǀgauba ga mā-am hâ îb tā ǁāǁnâ kaisen. Xaweb ge ǁnāsa ge mā-am tama hâ i.  Saulub ge māsenxase ge Xristeǁî kai ǁgâiǀāheb nî ǃkhaisab ge ǂan i xawe. (ǃNǃkh. 9:​15, 16; 20:​22, 23) ǁÎb ǁāǁnâs khaoǃgâb ge aiǃgû tsî Jehovab ai ge ǂgomǃgâ îb huihe tsî ǃkharagagu ǃgomsina mâǃkharu. (2Kor. 4:​7-10) Sa ǂgoms ge nî ǃâitsâhe tamas ka iots ge ǀnî hâ ǀgaub ǃnâ a ǃgôaǃgonhe ǁkhā, Jehovab ǃoaba-aon asets ga ǁāǁnâhe o. Xawe ǂgomǃgâsiba ūhâ Elob tsî Jesub tsî kha nî hui tsi sa mâǀgai tsî ǂgomǂgomsase hâ ǀgarasa.—Fil. 4:13. w25.03 4 ¶8-9

Elobmîsa khomais ge ǃgâi mîǁgui xawe ǁnāsa dīs ge ǃnāsa-ē ǃkhōǂgā hâ î da ǃgâiba ǀama. Elobmîsa khomai tsoatsoas mîǁguib ge a ǃgâi, xawe ǁnās ge tsoatsoas ǀguisa ī. ǁNās xa da ge ǃnāsa-e nî dī Elobmîs khomaisa xu da ga ǃgâiba ǀama ǂgao o. Sao ra aiǁgaus xa ǂâi re. Hain ge ǁgam-e ǂhâhâ în kai. Xawe i ga kaise ǀapi ob ge ǃhūba kaise ra ǀâ tsîn ge haina nî ǁō. ǁNās ǀkha i ge kaise ǀapisa ǃgâi tide. ǃHūb ge ǁaeba ǂhâhâ, î-i ǁgamme āǂgā în haina kai. ǁNās ǁkhās khami da ge Elobmîsa tā ǃnoesase nî khomai, î da tā ǁaeba ūhâ tama ī, khomai da ra xūna ǂâiǃgâ tsî sida ûigu ǃnâ sîsenūsa. (Jak. 1:24) ǃNoesase du Elobmîsa ǀnî ǁaegu ai ra khomaisa du ra hōǃâ? Tae-e du nî dī? ǂAuse khomai re. ǁKhā du a i hoa-e dītsâ, î du khomai du go xū-i xa ǂâiǃgâ. Mâ ǁae-i ǀgui-i ai du ga sadu Elobmîsa khomai tsî matikō gaxūse du ga khomai xawe ǀgauga ôa re î du khomai du ra xūna sadu ûib ǃnâ sîsenǂui. w24.09 4 ¶7-9

ǀHaohâb ǃûi-aogu ga ǀapeǂhomisa xu daoǁgaude ǃkhōǃoa, o gu ge ǁîde ǂōrisase khomai tsî ǁkhā gu a i hoa-e nî dī ǁîde dīǀoaǀoasa. ǁÎgu ge mati gu ǀhaodi ǃâga nî dīs daoǁgaudi ǀguide ǃkhōǃoa tama tsî mati gu ǀhaohâb ǃnâ hân hoana nî ǀgoreba ǀgaus tsîna. Xawe gu ge daoǁgaudi tsîna ra māhe mati gu Xristub gūn tsîna nî kōǃgâ ǀgausa. ǀHaohâb ǃûi-aogu ga ǀapeǂhomisa xu gu ra hō daoǁgaude sîsen-ū, on ge ǃgâsana Jehovab xan a ǀnamhe tsî ra kōǃgâhesa ra hōǃâ. ǀHaohâb ǃûi-aoga xu da ga daoǁgaude hō, o da ge māsenxase nî sao. ǁNāti du ga dī, o du ge ǀhaohâb ǃûi-aogu ra dī sîsen-e ra supusupu. Elobmîs ge ra ǂkhâǃnâ da î da ǀhaohâb ǃûi-aoga ǁnâuǀnam tsî ǁîgu ǃnāga ǃgamǃgamsen. (Heb. 13:​7, 17) ǁNāsa dīs ge ǀnî ǁaega ǃgom ǁkhā. Tae-i ǃaroma? Nē khoegu ǀoasa kurusa ūhâ tama amaga. Xawe da ga ǁîgu di ǁgai ǀgaugu ai ǀgui kō tsî ǁîgu ǃgâi ǀgauga mû tama io, o da ge sada khākhoena ra ǂkhâǃnâ. Tae-i ǃaroma da ti ra mî? Sida khākhoen ge ra ǂhâba î da tā ǂgom Elob ǀapeǂhomis ra daoǁgauda ǃkhaisa. ǁNā-amaga da ga ǀhaohâb ǃûi-aogu xa ǃgâi tamase ǂâi, o da ge ǀapeǂhomis ǃoagus tsîna ǃgâi tamase a ǂâi tsoatsoa ǁkhā tsî ǁîs ǃnâ nî ǂgomǃgâ ǀû. w24.04 10 ¶11-12

Hoa khoen kai ǁgâiǀāb tawa ra ǁōna nî hîkākāhe ǀamosib kōse khâis di ǃâubasens ose? Xoadi ge ra ǃgāsa kai mâǃoa-aon Jehovab tsî ǁîb toroǂnubin xa ra hîkākāhen Armagedons tawa tātsē khâisa māhe tidesa. (2Tes. 1:​6-10) O nau khoen xa matis, aiǁgausen ge ǀnîna kai ǁgâiǀāb ǁaeb ǃnâ nî ǁō ǀaeb xa ǃaromahe hâse, tamas ka io kairasib xa, ǀnîn ge a ǃgamhe ǁkhā tsūkēǃgâgu ǃnâ tamas ka io ǀnî khoen xa a ǃgamhe ǁkhā? (Aoǁn. 9:11; Sax. 14:13) Nē khoena ǀnîsi ǁnān hîna a “ǂhanu-on” hîna khâisa nî hōn ǀāsa ǃhūbaib ǃnân di ǃâ? (ǃNǃkh. 24:15) ǀGuiǃgupuse, ǀū da ge a. Xawe da ge ǀnî xūrona a ǂan hānîǁaeb di ǃnaeǃkhaidi xa. Aiǁgause da ge a ǂan Armagedons ain ge khoena nî ǀgoraǃgâhe, Xristub di ǃgâsagan gere hâ-ū ǀgaub ai ǃgaoǃgaosase. (Mat. 25:40) Tsî gūn ase ra ǀgoraǃgâhen ge ǂhauhesa ǃgâsan tsî Xristub tsîna gere ǂkhâǃnâ.—J.ǂHa. 12:17. w24.05 10-11 ¶9-11

Elobmîs ge ra mî, “ǀuni tsēdi ǃnâ gu kaise ǃgom ǁaega nî hâsa.” (2Tim. 3:1) Nē ǃhūbaib ǃnâ hâ khoen hoan ra hōǃâ ǃgomsin ǂamain ge Jehovab ǃoaba-aona mâǃoahes tsî ǁgâiǀāhes tsîna ra hōǃâ. Tae-e ra hui da i da aiǃgû tsî Jehovaba ǃoaba nē ǃgomsin ǂamai? ǀGui xū-i hîna ra mâǂoa i ge Jehovab di huiba da ge ge hōǃâ “ûitsama Elob” a ǃkhaisa. (Jer. 10:10; 2Tim. 1:12) Jehovab ge ûitsama khoeba, sida ǃgomsin ǃnâ kōǃgâ da tsî ǃēde ra ôaba îb ǂkhâǃnâ da. (2Kro. 16:9; Psa. 23:4) Ûitsama Elob ase ǁîba mûs ge nî hui da i da ǀgaiba ūhâ tsî ǃgomsina mâǃkharu. w24.06 20 ¶1-2

Jehovab ǀapeǂhumis ǃnâ da ūhâ ǂgomǃgâsiba da ge nî ǃkhōǀgara. Elobmîs amaba da ra ǁnâuǃā ǀgaub ga ǀkharaǀkharahe tamas ka io i ga aoǁnâ sîsen-e da ra dī ǀgauba ǀkharaǀkharahe, o gu ge ǁnā gu hîna ǃereamsa ǀapeǂhumîs ǃnâ ūhâ ga hâ nē ǀkharaǀkharana ra dī. Nē ǀkharaǀkharana gu ge ra dī, hoan ǂam-ai gu Jehovaba ra ǂkhîǂkhî ǂgao amaga. ǁÎgu ge ǁkhā gu an hoana ra dī î-i ǁîgu mîǁguiba Elobmîs ai ǃgaoǃgaosa. Nēb ge ǀgaub hoa khoen nî saoba. Apostel Paulub ge ge lapemā: ǁkhāǁkhāsen “ǂuru ǁkhāǁkhāsa.” (2Tim. 1:13) ǂUru ǁkhāǁkhās ge Xristeǁîn ǁkhāǁkhādi Elobmîs ǃnâ hâde ǃoa ra ǁnaeǁgau. (Jhn. 17:17) Nē ǁkhāǁkhādi ge ǂgom da ra xūn hoan di ǃgaoǃgaoba. Jehovab ǀapeǂhomis ge ge ǁkhāǁkhā da, î da sida ǂgomsa ǁnā ǃgaoǃgaob ai ūhâ ǀgara. Nēsa da ga dī ǀgara, o da ge nî ǀkhaehe. w24.07 11-12 ¶12-13

Petrub ge gere ǁnâuǃā mati i ra tsâsa ǃhobasen tsî ǀûbahesa. ǁNā-amagab ge ǁkhāǁkhāsen nî ge xūna naun ǀkha ge ǀgoragu. Pasxab ǁâudīb tsēs khaoǃgâb ge Petruba kai ǂnubis Jodeǁîna ge ǁguiǃāba Jesub ge ǃgamhesa. ǀNamxaǃnâseb ge ge ǂkhâǃnâ ni: “ǁNā amaga ǃKhub ǃoa ǃhobasan ob ge ǁîba sa ǁorena nî ǀariǂûi tsîb ga ǁaeba ǀoa ob ge ǃKhuba sado ǀasa gagasi ǀgaiba nî mā.” (ǃNǃkh. 3:​14, 15, 17, 19) Petrub ge ge ǁkhāǁkhā ǁore-ao i ra ǃhobasensa ūdawasen i ga o. Nēs ge ra ǂâibasen ǁî-i tsū ǂâiǀgauba i ge ra dawa, tsū xūna dī ǀû tsî Jehovaba ra ǂkhîǂkhî xūna ra dī tsoatsoa. Nē aposteli ge ge ǁgau Jehovab ge hoase nî ǀûba da, ǁnās ge ra ǂâibasen nē ǁoren ge nî ǀariǂûihe tsîn ge hoase nî ǀkhai. Matikōsen ga sida ǁorena ǀgaisa xawe da ga ǃhobasen, ob ge Jehovaba hoase nî ǀûba da nēs ge ra ǁkhaeǂgao da. w24.08 12 ¶14

ǀGaisa ǂgomsa da ga ūhâ Jehovab ǀgūǁae eloxoresa ǃhūbaiba nî hîkākāsa, o da ge ǂgui xūn tsî ǃnāsa mari-e ūhâs sida ûib ǃnâ ǂhâǂhâsa ti ǂâi tide. Kai ǁgâiǀāb ǃnâ i ge mari-e xū-e ǂâibasen tide. Elobmîs ge ra mî: “ǁÎn ge ǀhaiǀurib âna ǃgangu ai ǀapob khami nî aoxū. . . ǁîn di ǀhaiǀurib tsî ǃhuniǀurib tsîkha ge ǃKhūb ǁaib di tsēs ai ǁîna hui ǁkhā tide.” (Ese. 7:19) ǂGui mari-e ǀhaoǀhaos xa da ge ǁkhā da a i hoa-e nî dī î da sida ûiga ǀguiǃupu kai tsî Jehovaba ǃoabas ǀkha nî hui mîǁguiga dī. ǁNās ge ǂhâbasa tama surudeba kurus tamas ka io ǀhaoǀhao da hâ xūn ai sida ǁaeba ǂhôas tsîna ǃkhōǂgā hâ. ǂAnbasen da ge nî î-i ǀhaoǀhao da hâ xūna tā sida ûib ǃnâ ǂhâǂhâsase ī. (Mat. 6:​19, 24) Nē da ûiǃnâ hâ ǃhūbaib ǀams ra ǀgū khami da ge nî ǁhûi Jehovab ǃnâ da ra ǂgomǃgâ tamas ka io da ū da hâ xūn ǃnâ ra ǂgomǃgâsa. w24.09 11 ¶13-14

Īǁkhāsib ga hâ, o da ge sada ǂkhabusasiga a ǃkham dan ǁkhā. Xawe da ge ǀnî ǁaegu ai aiǃgû tsî ǀnî ǂkhabusasiga nî ǃkham ǀgara. Apostel Petrub aiǁgausa ǃgaoǃgâ re. ǁÎb ge khoena gere ǃao amagab ge Jesuba ǃnona ǃnādi kōse ge ǀū xu. (Mat. 26:​69-75) Xaweb ge Petruba ega nē ǂkhabusasiba ge dan, ǁkhoaǂgaoseb ge ǀāpemāǃnans aiǃâ Jesub xa aoǁnâ o. (ǃNǃkh. 5:​27-29) Kuriga ǃkharu hâseb ge Jode Xristeǁî taman ǀkha ge ǂû ǀû, “Jodeǁîgu nî mî xūnab gere ǃao amaga.” (Gal. 2:​11, 12) Petrub ǂkhabusasib ge ge oaǀkhī tsîb ge ǀoasase ge ǃnōra tama hâ i nē ǂkhabusasiba xu. Sada tsîn ge ǁkhā mâsib ǃnâ a hōsen ǁkhā. Jesub ge ǃâitsâb xa a mî ǀāpemāsa da ge nî sao: “ǂKhaikari hâ.” (Mat. 26:41) ǁNās ge ra ǂâibasen î da sida ǃâitsâgu ǃoagu ǁkhaubasen. ǀGaisa du a ti du ga ǂansens tsîna aiǃgû tsî ǃâitsâga a ǃaroma ǁkhā xūna xu ǂgōsen. Aiǃgû tsî ǂkhabusasiga ǃkhamǃoas ǀkha ra hui du xūna dī ǀgara re.—2Pet. 3:14. w24.07 18-19 ¶17-19

Jesub khami ge māxa i khoe-i ge a ǀkhai. ǃHūbaib aib ge hâ i o, ob ge buruxa dīgu ǃnâ-ū khoena gere hui. (Luk. 9:​12-17) Kai ǀkhaeb hînab ge māb ge ǁîb ûiba sida ǃgao māsa. (Jhn. 15:13) ǁŌba xub ge khâi ob ge Jesuba noxopa aiǃgû tsî ra hui da. Mîmâib ge khamib ge Jehovab ai ǃanu gagaba ge ǂgan î da ǁkhāǁkhāhe tsî ǁkhaeǂgaohe. (Jhn. 14:​16, 17; 16:13) ǀHaohâb ǀhaodi ǃnâ-ūb ge Jesuba ǁîb ǁkhāǁkhāsabena ǃhūbaib ǂhawase ra hui în ǁkhāǁkhāsabedī. (Mat. 28:​18-20) Apostel Paulub ge ge xoa, Jesub ge ǀhomma ǃoab ge īs khaoǃgâ khoega “māde a māsa”. (Efe. 4:​7, 8) Paulub ge ge mî Jesub ge nē khoega a māsa, i gu ǀhaohâga ǃkharagaǃnâgu ǀgaugu ǃnâ hui. (Efe. 1:​22, 23; 4:​11-13) Nē aogu ge ǀoasa kurusa ūhâ tama hâ, ǁnā-amaga gu ge ra dīsā. (Jak. 3:2) Xaweb ge Jesub Xristuba ǁîga ra sîsenū sida huisa, ǁîgu ge sidab ge mā ǀkhaega. w24.10 18 ¶1-2

Davidi ge Salomoba ge mîba Jehovabab ga ǁnâuǀnam ǀgaras kōseb nî ǃgâiǃgâsa. Xaweb ge Salomoba kaib ta khami ǀnî Eloga ge ǃoaba tsoatsoa. Jehovab ge ǁnā i xa ge ǃgâibahe tama hâ i tsî Salomoba gā-aisiba ge mā ǀû, khoena ǂhanu-aise tsî ǃgâise ǂgaeǂguis ǃaromab ge ǂhâhâ îba. (1Gao. 11:​9, 10; 12:4) Tae-e da ra ǁkhāǁkhāsen? Jehovaba da ga ǁnâuǀnam ob ge ǀkhaeda tsî nî hui da. (Psa. 1:​1-3) Ama as ge Jehovab sida mîmâiba tama hâsa, ǃkhū tsî da nî ǂanǂansasa Salomob khami. (ǂKhm. 2:​6, 7; Jak. 1:5) Jehovab ǀapemās ge nî hui da mîǁguiga da ga dī o sîsenni, skoli, mari-i tsî ǁkhoaxa ǁaeba da ga ūhâ ǁaeb ai. ǁÎb ǀapemāde da ga sao, o da ge ǁîb ǀkha da ūhâ ǀhōsagusisa ra ǁkhauba tsî da ge ǀamo ûib tsîna nî hō. (ǂKhm. 2:​10, 11) ǃGâi ǀhōsana da ge ūhâ tsî sida omaris tsîn ge ǂkhîba a ūhâ ǁkhā. w24.11 10-11 ¶11-12

ǁGûn ge ǂgui ǃkharagagu ǃēna ūhâ ǁîn ǀgôan ǀkhan Elobmîs tsî Elob ǃnâ ǂgoms xa ǃhoa ǁkhāna. Sadu ǀgôana du ge nē xūn xa a ǁkhāǁkhā ǁkhā musiumsa du ga sari o.  Sadu ǀgôa-e du ge a ǁgau ǁkhā ǁnāpa hâ xū-i tamas ka io ǃkharu ge ǁaeb ǃnâ ge ī xū-i mati Elobmîs ǃnâ hâ xū-i ǀkha ra ǃgûǀhao ǀgausa. Nēs ge sadu ǀgôa-e nî hui în mû Elobmîs ra mî i ama ǃkhaisa. ǀNîsi du ge sadu ǀgôa-e Moabit ǀuib xa a ǁkhāǁkhā ǁkhā. Nē ǀuib ge 3 000 kuriga hâ tsî Jehovab ǀonsa xoa-aihe hâ. Moabit ǀuiba ǁgae tsî ge kuruhe ǀuib ge “The Bible and the Divine Name” ti ǀon hâ ǃâb dana beros Jehovab ǃoaba-aon dis Amerikab ǃnâ ǁgauǂuihe hâ. Moabit ǀuib ge ra mî gao-aob Mesab Moab dib ge Israelǁîn ǃoagu khâikhâisen ti. Tsî nēs ge Elobmîs ǃnâs tsîna hâ. (2Gao. 3:​4, 5) Sadu ǀgôa-i ga ǁgauǁgauna mû Elobmîs ra mî-i a amasa, oi ge ǁî-i ǂgomsa nî ǀgai. w24.12 14 ¶4; 15 ¶6