Maarti

Elobmîs ǃnâ di ge ǃnaeǃkhaide hâ ǂhanu-ai khoen hîna ge ǂhanuoǃnâ kain dide. Gao-aob Salomob ge a ǀgui aiǁgau. ǁÎb ge Jehovab a hamsa ge ǂan i tsî matib Jehovaba nî ǃoabasa. Jehovab ge kaise ge ǀkhae bi xaweb ge Salomoba ega ama tama eloga ge ǃoaba tsoatsoa. Nē i ge kaise Jehovaba ge ǁaixa kai tsîs ge hoa Israelǁaesa 100 kurigu xa ǃnāsase ǁîb di ǁoren ǃaroma ǃgoma gere hōǃâ. xoas ge ra mî Salomob ge ǁōb ge o, “ǁîb îb Davidi di ǃās ǃnâ ge ǁkhōhe.” (1Gao. 11:​5-9, 43; 2Gao. 23:13) Xawe nēsa ra ǂâibasen ǁîb ge ǁkhōhe ǀgaub ra ǁgausa ǁîb khâisa nî hōsa? Elobmîs ge mî tama. Khâis ge sida ǀnamxaǃnâ Eloba xu hâ ǀkhaeba. Tsîb ge ǁnā ǀkhaeba khoena ra mā ǂhâbab ra na în ǁîba ǀamosib kōse ǃoaba. (Job. 14:​13, 14; Jhn. 6:44) Salomoba ǁnā ǀkhaeba nî hō? Jehovab ge ǃereamsa a ǂan, sida ge a ǀū. ǂAn da as ge Jehovab ge ǂhanu xū-e nî dī. w24.05 4 ¶9

Jehovab ǃoa-ai da ga māǁnâsen, o da ge ǁîb tentommi ǃnâ ra ǃhaokhoe kai. Jehovab ǀkha da ūhâ ǀhōsagusisa ǀgaisase ūhâ ǀgaras ǀkha ra hui da gagasi ǂûna da ge ra ǃkhōǃoa. Tsî da ge ǂgui ǃgâi ǀhōsan tsîna ǁîb tentommi ǃnâ ra ǀhao-ū. Jehovab ra ǁkhau da tentommi ge ǀgui ǃhaos ǀguisa ǃoa hâ tama ǁkhauǂûisa. Jehovab tentommi ge ǁîb ǂgomǂgomsa ǃoaba-ao-i hoa-i hâ ǃkhais hoas tawa hâ. (J.ǂHa. 21:3) Jehovab ǂgomǂgomsa ǃoaba-aon ǁō gen ǀkha i tae-e nî ī? Mî ǁkhā î da a ǁîn tsîn Jehovab tentommi ǃnâ noxopa a ǃhaokhoesa? Îo. Tae-i ǃaroma da ti a mî ǁkhā? Jehovab ge nē ǂgomǂgomsa ǃoaba-aona tāstē ǀuru tama hâ. ǁÎn ge noxopa ǁîb aiǃâ a ûitsama. Jesub ge ge ǁguiǃā: “ǁŌ hân ge ûib ǃoa a khâi ǃkhaisab ge Moseba ge ǂhaiǂhai. ǂHubi ra ǁkhūhais di ǃnaeǃkhais ǃnâb ge ǃKhūba Abrahammi, Isaki tsî Jakob tsîgu di Elob ti ǂgaio. Elob ge ǁō hân di Elo tamaba tsîb ge a ûitsaman di, hoan ra ǁîba ûiba xui-ao.”—Luk. 20:​37, 38. w24.06 3 ¶6-7

Sadoki ge ǃkham-ū xūna ge ūsao tsî ge ǂhumisa i ǃkhams ǃgao. (1Kro. 12:38) ǁÎb ge ge ǂhumisa i Davida ǃkham huisa tsî Israelǁaesa khākhoena xu ǁkhaubasa. Sadoki ge soldab ase ǃgâi ǂansa ge ūhâ tama hâ i xaweb ge ǁîba kaise ge ǁkhoaǂgao i. Sadoka ǁkhoaǂgaosiba mâpa ge ǁkhāǁkhāsen? ǁÎb ge ǀgaisa tsî ge ǁkhoaǂgao-i khoegu ǂnamipe gere hâ tsîb ge ǁîgu aiǁgaude xu ge ǁkhāǁkhāsen. Aiǁgause, Davidi ge ǁkhoaǂgaoxase “Israelǁîna torob ǃnâ gere ǂgaeǂgui.” Tsîs ge ǁaesa nēs xa ǁîba māsenxase gere mâxōǀkhā. (1Kro. 11:​1, 2) Davidi ge hoaǁae Jehovab ai gere ǂgomaiǂnûi, khākhoen ǃoagub gere ǃkham o. (Psa. 138:3) Sadoki ge ǀnî hâ ǁkhoaǂgaoxa khoega xus tsîna ge ǁkhāǁkhāsen. Aiǁgause Jojadab tsî ǁîb ǀgôab Benajab tsî nau nî hâ 22 danaǂgaeǂgui-aogu hîna ge Davida gere mâxōǀkhā ga xus tsîna.—1Kro. 11:​22-25; 12:​26-28. w24.07 3 ¶5-6

Paulub ge ǂgui ǁgai xūna gere dī. ǁÎb ge Xristeǁîna gere saoǃgon. ǃNāsa Xristeǁîn ge ǀnîsi gere ǂâi ǁîb tātsē dī-unusen tidesa. Xawe Jesub ge ge ǂan-i Paulub dī-unusen tsî nî ǃhobasen ǃkhaisa. ǁÎb tsî ǁîb Îb ge ǃgâi ǀgauga Paulub ǃnâ ge mû. Jesub ge ge mî: Nēb ge “tita ǀō-aisase ǁhûiǂuibasen” hâba. (ǃNǃkh. 9:15) Jesub ge buruxa dī-e ge sîsenū îb Pauluba ǃhobasen kai. (ǃNǃkh. 7:58–8:3; 9:​1-9, 17-20) Paulub ge ǃhobasen tsî ge Xristeǁî kai tsîb ge Jesub xa sîsen-e ge māhe aposteli ase. Paulub ge ǁaeba xu ǁaeb ǀkha ǃgôaǃgâb rasa gere mî, Jehovab tsî Jesub tsîn ge ǃgâisib tsî ǀkhomxaǂgaosiba ǁgaubi ǃkhais ǃaroma. (1Tim. 1:​12-15) ǀGui ǃnās aib ge Pauluba ǁnâu o, Korintes ǀhaohâb ge ǀai-aoba ǁnāxūsa îb ǀhaohâb ǃnâ hâ ǀgara, ob ge ǁîna tae-e mîba în dī? ǁÎb ge mî xū-e xu da ge ra ǁkhāǁkhāsen, Jehovab mati ǀnama ra ǁgausa ǁîb ǃoaba-aonab ga ǁnâma o tsîb mati ǀkhomxaǂgaosiba ra ǁgausa ǃhobasenan ga o. w24.08 13 ¶15-16

ǁAeb ra ī khamib ge Jehovaba ge ǃgāsa kai ǁore-aon ǁîba mati a ǀgū ǁkhāsa. Adammi tsî Eva hâra ǀgamǁî ǀgôab ge ge ǂguro khoe-i Jehovab ǃnâ ge ǂgomsa ǁgauba, Edenni ǃnâ ge ī xū-i khaoǃgâ. Abeli ge Jehovaba ge ǀnam ī tsî ǁîb ǃoa gere ǀgū ǂgao ǁnā-amagab ge ǁguibasa ge dī. Abeli ge gūna gere ǃûi ǁnā-amagab ge ǁkhaoroga ǂā tsî Jehovaba gere ǁguiba. Jehovaba nēsa mati ge ǃkhōǃoa? Jehovab ge “Abeli tsî ǁîb ǁguibasa ǃgâise ge ǃkhōǃoa.” (Gen. 4:4) Jehovab ge nau khoen ǁguibadi tsîna gere ǃkhōǃoa. ǁÎn ge ǁîba ǀnam tsî ǂgomǃgâ hâ i amaga, Noaxi khami. (Gen. 8:​20, 21) ǁNā ǁguibadeb ge ūǃoa, ob ge Jehovaba ge ǁgau ǁîb ra ǁore-aona ǃkhōǃoa tsîn ǁîb ǀkha ǀgū ǀhōsagusisa ūhâ ǁkhāsa. w24.08 3 ¶5-6

ǂHanuoǃnâsib ge ǂâiǂhânsendi tsî tsûb tsîna a tsâ kai da ǁkhā. (Aoǁn. 7:7) Jehovab ǂgomǂgomsa ǃgān tsîn ge ǁkhā tsûba gere hōǃâ aiǁgause, Jobi tsî Habakuki khami. (Job. 6:​2, 3; Hab. 1:​1-3) Tsū tama i ge hâ nēti tsâsa xawe da ge nēs ǃoagu da ra tanisen ǀgauba nî ǂanbasen, î da tā tsū xū-e dī. Nēs ge ǂgui ǃgomsiga a ǃaroma ǁkhā. Mû da ga tsū xūna ra dī khoen ǁkharahe tama hâsa, o da ge a ǂâi tsoatsoa ǁkhā ǃgâi xūna dīs mādawa-am-e ūhâ tama ti. ǀGui ǂgomǂgomsa ǃoaba-aob Jehovab dib ge ge mû, ǃgâi khoen eloxoresa khoen xa ra tsūdīhesa tsîn eloxoresana ǁkhoaxa ûiba ūhâsa. ǁÎb ge ge mî: ‘Eloxoresa khoen ge . . hoaǁae sâsase ra hâ’ tsî ǃkhūsib ǃnâ ra ǀarosen. (Psa. 73:12) ǁÎb ge kaise ǂhanuoǃnâsib xa ge tsûtsûhe tsî gere ǂâi hui tama i hâsa Jehovaba ǃoabasa. ǁÎb ge ge mî: “Nēsa ǁnâuǃās xa ta gere ǂâi os ge nēsa kaise ǃgom ǁgui-ais ase ge ība te i.”—Psa. 73:​14, 16. w24.11 3 ¶5-7

Jehovaba da ge ǂkhaisiba ra mā ǃgam ǃgôasiba da ūba bi hâ amaga. ǂGui ǃaroma di ǃgao da ge ǁîba ǃgôasiba ra ǁgau. Jehovab ge ǀgaiba ūhâ ǂhâbab ra xū-i hoa-e dīs tiba. Tsîb ge ǁîba tātsē tsau tama hâ. (Psa. 96:​4-7) ǁÎb gā-aisiba da ge kurub ge xūn ǃnâ-ū ra mû. ǁÎb ge ûiba ge mā da tsî ûitsamase hâs ǀkha nî hui da xūn tsîna. (J.ǂHa. 4:11) Kaiseb ge a ǂgomǂgomsa. (J.ǂHa. 15:4) Jehovab ra dī xūn hoan ge ra ǃgâiǃgâ tsîb ge hoaǁae ǁîb mîmâide ra dīǀoaǀoa. (Jos. 23:14) ǁNā-amagab ge kēbo-aob Jeremiaba Jehovab xa sao rase ge xoa: “Sats ge ǃgôahesa a anu. Hoaraga gā-ain ǁaes din ǃnâ, tsî ǁîn di gaosigu hoagu ǃnâ i ge ǀgui-i xare-e a ǀkhai, sats khami ī-e.” (Jer. 10:​6, 7) ǂGui ǃaromadi ge ra ǁgau tae-i ǃaroma da sida ǀhomsi ǁGûba ǃgôasiba nî ǁgausa. Jehovaba da ge ǃgôasib ǀguiba ǁgau tama hâ, xawe da ge ǁîba kaise a ǀnam. Hoan xa ǂhâǂhâsase, Jehovaba da ge ǂkhaisiba ra ǁgau ǁîba da a ǀnam amaga. w25.01 3 ¶5-6

Elob mâǃoa-aon ge ra dītsâ în ǃgâi xūn Jehovab ǀapeǂhomis ra mā da na ǁgai xūn ase mûsen. Aiǁgaus ase da ge xoade xu ge ǁkhāǁkhāsen Jehovab ra ǃâubasensa î da sida sorode ǃanuse ūhâ, ǃanu ǀgaub ǃnâ tanisen tsî ǁîb ra ūǃoa ǀgaub ǃnâ ǁîba ǃoaba. Aiǁgause khoe-i hîna ǁgai xūna dī tsî ǀû ǂgao tama i ge ǀhaohâba xu nî ūiǂuihe. (1 Kor. 5:​11, 12; 6:​9, 10) Xoas ai ǃgaoǃgaosa mîmās ǁnāsa da ge ra ǁnâuǀnam. Nē mîmāsa da ra ǁnâuǀnam amaga i ge sida ra mâǃoana ra mî, khoena ǀnam tama ī tsî da ǁîna ra ǀgoraǃgâ ti. Tsî da sida ǂgom ǀgaub xa ra ǀkhara khoena ra mâǃoasa. ǀApeǂhomis ǁnāǂam-aona da ge nî mûǂan. Satanni ge nē ǂhomigu ǀapeǂhomis ǃoagu hâ ga ra ǂkhâǃnâ. ǁÎb ge a “ǂhomib di î.” (Jhn. 8:44; Gen. 3:​1-5) ǁNā-amaga da ge a ǃâubasen ǁkhā Satanni sida khākhoena nî sîsen-ūsa, în ǂhomi ǂhôana Jehovab ǀapeǂhomis xa ǃhoa tsî khoraǂui. w24.04 10-11 ¶13-14

Kai ǁgâiǀāb ga tsoatsoas khaoǃgân ge khoena nî ǂâihō Jehovab ǃoaba-aon ge ǂgui kuriga a mîsa “Babilons kais” nî hîkākāhesa. ǀNîn Babilons kais ra hîkākāhe ǀgausa ga mûna, Jehovab ǃnâ ǂgomsa nî omkhâi? (J.ǂHa. 17:5) Nēti-i xū-i ga ī, oi ge Moseb ǀkha ge Egipteb ǃnâ ī xū-i ǀkha a ǀgui. ǂÂihō re “kai ǂnubis di khoen” ge Israelǁîn ǀkha Egipteba xu ge ǂoa. ǀNîn ge ǂgomsa ge omkhâi tsoatsoa, mûn ge o Moseb di ǃkhâikhomdi tsî disi ǁkharagu ge ama kai o. (Eks. 12:38) ǁKhā xū-i ga ī o Babilons kais hîkākās aiǃâ, o da sida nî tsûaǂgao khoen ǀams go ǀgū ǁaeb ai ǀgui sida ǀkha ra ǁhao ǃkhaisa? Hî-i, sida ǀhomsi ǁGûb khami da ge ra ī ǂgao, ǃKhūb “ǀkhomxasib tsî ǀkhommi xa ǀoa hâ, ǃhaese ǁaixa tama tsî ǃnāǂamsa ǀnammi tsî ǂgomǂgomsasiba” ra ǁgauba.—Eks. 34:6. w24.05 11 ¶12-13

Tae-e a īǁkhā sida ǂgomǀgauba da ga “ǂuru ǁkhāǁkhās” ai ǃgaoǃgao tama io? Sao ra aiǁgausa ǃgaoǃgâ re. ǂGurokham ǁaeb Xristeǁîn ǁaegu i ge ama tama ǂhôana gere khōraǂûihe. Khoen ge gere mî Jehovab tsēs go hāsa. ǁNāpa î ge sîǂkhanisa ge hâ i tsîn ge khoena gere ǂâi Apostel Paulub ge nēsa a xoasa. Nēs a amasa ôaǃnâs xan ge Tesalonikas ǃnâ hâ Xristeǁîna nēsa ǂgom tsî naun khoen ǀkhas tsîna gere ǀgoragu. ǁÎn ge ga gâre mûhe tama hâ, Paulub ge ǁîn ǀkha hâ i ob gere ǁkhāǁkhāni xūnan ga ǂâi-oa hâ o. (2Tes. 2:​1-5) Paulub ge ǁîb ǃgâsana ge ǁnama în tā ǁnâun ra xūn hoana ǂgom. ǁÎna hānîǁaeb ǃnâ huis ǃaromab ge Pauluba Tesalonikaǁîna ǃoab ge xoa ǀgamǁî sîǂkhanisa nēti ge ǀamǀam: “Ti ǂhunuma ǃommi ǀkha ta ge nēsa ra xoa: Pauluba xu hâ tawedes. Nēs ge mâ sîǂkhanis, tita ra xoas hoas di saosa.”—2Tes. 3:17. w24.07 12 ¶13-14

Hebre Xristeǁîn Judeab ǃnâ ge hâ în ge ǁîn ǃoabas ǃnâ ga mâǀgai hâ ǃgom ǁaegu ge ǃgôaxa i amaga. Hebre Xristeǁîn ge ǀgaisase gere ǁgâiǀāhe xawen ge ǀnîna nēsa ge hōǃâ tama hâ i. ǁNā-amagab ge apostel Pauluba ge hōhōǃnâ ni, în aiǂhumisen ǃnāsa ǁgâiǀāb ǃaroma. Aiǂhumisa tsîn ge ǂgomǂgomsase nî Jesub khami ǁōb kōse nî hâ. (Heb. 12:4) ǂGui Jodeǁîn ge kaise ǁaixa tsî gere ǃkham ǂgao ǂgui khoen gere Xristeǁî kai amaga. ǀOro kurin aiǃâ i ge hakadisis (40) xa ǃnāsa Jodeǁîn ge “ǀhao tsî ǀhûpe ge nū, Pauluban ǃgam tama hîan xū-i xare-e ǂû tamas ka io ā tide ǃkhaisa.” (ǃNǃkh. 22:22; 23:​12-14) ǃHuihe tsîn gere ǁgâiǀāhe xawen ge Xristeǁîna aiǃgû tsî ǀhaode hâǃnâ, ǃgâiǂhôasa aoǁnâ tsî ǁîn ǂgomsa ǀgaisase gere ūhâ ǀgara. w24.09 12¶15

Johaneb ge Jesub di ǀgū ǀhōsa tsî ge Apostel i. (Mat. 10:2) Johaneb ge ǃnāsa ǁaeba Jesub ǀkha aoǁnâ sîsenni ǃnâ gere ǁhao tsî ge mû Jesub gere dī buruxa dīna. ǁÎb ge ǂgomǂgomsase Jesub ǃoa-ai ge hâ ǃgom ǁaegu ǃnâ. Mûb ge ge Jesub ge ǃgamhe ǀgausa tsîb ge Jesuba khâisab ge hō toas khaoǃgâs tsîna ge mû. Xristeǁî ǀhaohâb ra kai ǀgausab ge ge mû. Johanneb ge gaxuse ûi tsî ge mû, “ǀhommi ǃnaka hâ kurusaben hoan” ra aoǁnâbahesa. (Kol. 1:23) ǁÎb ûib nî ǀams aiǃâb ge Johaneba kai aiǂhanuba ge ūhâ i tsî Elob xa ǃgomǂgāǃnâhe hâ mîde ge xoa. ǁÎb ge “ǂhaiǂhais Jesub Xristub ge Elob” xa māhes xa ge xoa. (J.ǂHa. 1:1) Johaneb ge ǁîb ǀonsa tani hâ Elobmîs ǂkhanisa ge xoa. Tsîb ge ǃnona sîǂkhanide ge xoa, nētsē da 1 Johaneb, 2 Johaneb tsî 3 Johaneb ti ǂande. ǁÎb ǃnonaǁî sîǂkhanisab ge ǂgomǂgomsa Xristeǁîb Kajub ti ǀon hâb ǃoa ge xoa, ǁîb ge ǀgôa-i khami ǀnam îba. (3Jhn. 1) Nē ǂgomǂgomsa ǁkhara-aob ge xoa mîdi ge Jesub ǁkhāǁkhāsabena ra ǂkhâǃnâ nētsēs kōse. w24.11 12 ¶15-16

Aob ǁîb tarasa a ǀnammi ge ǁîsa ǃgôaǃgâ tsî ǃgôasiba nî ǁgau. ǁÎsab ge ǀō-aisa ǀkhaeb Jehovaba xu ra hāb ase ra mû. (ǂKhm. 18:22; 31:10) ǁNās xa ǃaromahe hâseb ge khoexaǃnâ tsî ǃgôasib ǀkha ra hâ-ūsi, sorosise ra ga ǂharugu ǁaeb ais tsîna. Tsîb ge ǁgâiba māsi tide îs dī ǂgao tamas hâ xū-e tā dī tsî ǃgâi tamases ra hâ-ūhe khami tsâ. Tamas ka io ǁîs ǃgâiǂâisa tsâǀkhāhe sorosise ra ga ǂharugu ǁaeb ai. ǁÎb tsîn ge nî dītsâ îb tā ǁîb ǃgâiǂâisa ra tsâǀkhā xūna dī sorosise ra ga ǂharugu ǁaeb ai. (ǃNǃkh. 24:16) Aogo Jehovab ge kaise ra ǃgâiaǂgao mûb gao ǃgarise go ra dītsâsa, sago taradi dī tsî ra mî xūn ǃnâ ǃgôasiba ǁgausa. Mîǁgui re ǁîsa ǃgôasa, îts tā ǁîsa nî tsûtsû xūna dī. ǁÎsa khoexaǃnâsib, ǃgôasib tsî ǀnamma ǁgau re. ǁNātits ga dī ots ge nî ǁgausi ǀnammsi tsîts ra ǃgôaǃgâsi ǃkhaisa. Sa tarasa ǃgôa, ots ge Jehovab ǀkhats ūhâ ǂhâǂhâsa ǀhōsagusisa nî ǁkhauba.—Psa. 25:14. w25.01 13 ¶17-18

ǀGui xū-i Jehovab ǃoaba-aona ra mâǂoa kai i ge, ǁîn ge ôasasib ǀkha ra aoǁnâ. Tae-e nî hui da î da ôasase hâ ǀgara tsî ǃgâiǂhôasa aoǁnâ? Jesub aiǁgaus ge nî hui da, î da ôasasib ǀkha aoǁnâ sîsen-e dī. Jesub ge ǃhūbaib aib ge hâ i o ǃgarise gere sîsen îb khoena ǃgâiǂhôasa aoǁnâba. Jesub ge ǁîb aoǁnâ sîsenni ǃnâ ôasasiba ge ǂoaǃnâ tama hâ i. ǁÎb ge ǀams kōse aoǁnâ sîsen-e ge dī. Jesub ge aoǁnâ sîsen-e draibe ǃhanaǂgā-aob ǀkha ge ǀgopeǀnō. Khoeb ge ǀnomahaisa ǃnona kuriga kōǃgâ xawes ge ge ǂûtani tama hâ i. ǁNās ǁkhās khamin ge Jodeǁîna Jesub ge ǃnona kuriga aoǁnâba nî xawe ǃgâiǂhôasa ge ūǃoa tama hâ i. Xawe Jesub ge ge ǀûsen tama hâ î ǁîna aoǁnâbasa. ǁÎb ge aiǃgû tsî draibe ǃhanaǂgā-aob hais nî ǂûtanisa ge ǃâubasen hâ îb khami ge ī-i. (Luk. 13:​6-9) ǁÎba da ga ǁnâuǀnam tsî dīb gere xūna ǁgae, os ge nēsa nî hui da î da nētsē ôasase aoǁnâ ǀgara. w25.03 14-15¶1-4

Tae-ets nî dī, nē î ge ǃgâi ǃgamme ū ǀhōsa-e tits ga ǂâi o? ǁKhā ǁaeb aits ǁî-e nî mîba ǁî-i ǃnâts ǃgâiǃgâibasensa ūhâsa? Elobmîs ge ra mî, ǁnâuǃāxa khoe-i ge ǁî-i ǂansa ra sîsenū xū-e i nî dīs aiǃâ. ǁNâuǃāxa khoe-i ge ǁnā khoe-i ǀgauga ǃnūseba xu ra kō, ǁî-e i nî mîbas aiǃâ mati-i ǁî-i xa ra tsâsa. Aiǁgause, khoe-i mati ǀhaohâb ǀhaodi, ǁaxasigu tsî khoen ǁaegu ra tanisen ǀgaub tsîna î ge ra ǃgaoǃgâ. Matits ǃgamme ǂgaots ra khoe-i ǂan tamase ǁî-e ǃnūseba xu nî ǃgaoǃgâ? ǀHaohâb ǀhaodi tamas ka io ǁaxasigu tawa da ge a mûǃā ǁkhā ǁnā khoe-i di gagasi ǀgaub, ǂūb tsî tanisen ǀgaub tsîna. ǁÎ-i ǀhōsana a ham tsî taen xan ra ǃhoa? (Luk. 6:45) ǁÎ-i di mîǁguib ûib diba tib ǀkha a ǀgui? ǁÎ-i ǀhaohâb ǃûi-aogu tamas ka io ǀnî Xristeǁî-i ǁnā khoe-e ǃgâise a ǂan-ets ge a dî ǁkhā. (ǂKhm. 20:18) ǁÎ-i dībasen hâ ǀons tsî ǀnî hâ xūn tsînats ge a dî ǁkhā. (Rut. 2:11) Nē khoe-ets ra ǃgaoǃgâ tsî kō ǁaeb ai tā ǁnā khoe-e ǃgâi tamase tsâ kai. Nēsats ra dīsets ge ǁnā khoe-e ǃgôasiba nî ǁgau. Tsîts ge tā hoaǁae ǁî-i ǂnamipe nî hâ tsî hoa xūna ǁî-i xa nî ǂan ǂgao. w24.05 22 ¶7-8

ǀHaohâb ǃûi-aogu ge Jesuba ǁgae tsî tā nî mîǁgui ǁoreba go dī khoe-i ǃhobasen tidesa. ǀNîn ge ǂguro ǀhaos ǃnâ a ǃhobasen ǁkhā. Xawen ge nauna ǁaeroba ǂhâhâ. ǁNā-amaga gu ge ǀhaohâb ǃûi-aoga a mîǁgui ǁkhā i gu ǁore-ao i ǀkha ǀguis xa ǃnāsa ǃnāde ǀhao. ǀNîsi i ge ǂguro ǀhaos khaoǃgâ Xristeǁî-e tsūdī i go xū-i xa ǀgaisase ǂâi tsoatsoa ǁkhā. Tsî i ge ǃgamǃgamsenxasiba ǁgau tsî Jehovaba a ǂgan ǁkhā î-i ǁîb ǁoreb ǃaroma ǀûba bi. (Psa. 38:18) ǁNās ǀkha i ge ǁore-ao-e ǀkhara ǂâiǀgauba ūhâ ǁkhā, ǂguro ǀhaos tawa i go ūhâ îb xa. ǁOre-ao-e ǃhobasensa ǃoa huis ǃaroma gu ge ǀhaohâb ǃûi-aoga ǁore-ao-e ǀkhom tsî ǃgâise nî hâ-ū. ǁÎgu ge ra ǀgore îb Jehovaba ǁîgu ǁgūtsâde ǀkhae tsî nē Xristeǁî-e hui î-i ǃhobasen.—2Tim. 2:​25, 26. w24.08 22-23 ¶12-13

Jehovab ge ǂhâba tama hâ î-i khoe-e dīkakahe. ǁÎb ge ra ǂhâba în ǁîna ǁîb ǀkha ǂkhîbagu. (2Kor. 5:20) ǁNā-amagab ge Jehovaba ǃkharuge ǁaeb ǃnâ ǁîb khoena gere ǀkhoma în ǃhobasen tsî ǁîba ǃoa oasī. ǀHaohâb ǃûi-aogu ge ǀguiba Jehovab ǀkha ra sîsenǀhao î gu ǁore-aona hui în ǃhobasen. (Rom. 2:4; 1Kor. 3:9) ǁOre-aon ga ǃhobasen, oi ge ǀhommi ǃnâ kai ǃgâiaǂgaoba ra hâ. Sida ǀhomsi ǁGûb Jehovab ge kaise ra ǃgâiaǂgao, ǃnās hoasa i ga ǀgui kā hâ gū-e ǀhaohâba ǃoa a oaǀkhī o. Jehovaba da ūba hâ ǀnammi ge ra kai, ǁîb ǀkhomxaǂgaosib tsî anu tama da hâ ǃgâisib tsîn xa da ga ǂâiǃgâ o.—Luk. 1:78. w24.08 31 ¶16-17

Jesub ga nēsa mā-am hâ, ob ge Jodeǁîn hîna ge Romeǁîn ǂgaeǂguis ǃnaga hâ în ǂgīǂgōsi xūn ǃnâ ga ǃâ hâ. Jesub ge ǀguri ǃhomma ǃoa ge ī. Nau khoen xab gere ǁgarihe xaweb ge Jesuba ǂgīǂgōsi xūn ǃnâ ge ǃâ tama hâ i. ǁNās ge kaise ǂhâǂhâsa xū-e ra ǁkhāǁkhā da. Ama as ge khoen ge ǂgan da tide î da ǁîna buruxa ǀgaub ǃnâ ǂû-e mā, ǀaeba xu ǂgauǂgau tamas ka io ǁîn gao-ao kai. Xawen ge ǀnîsi a mîba da ǁkhā, î da ǂgīǂgōsi xūn ǃnâ ǃâ tamas ka io khoe-i hîna ǃgâise nî ǂgaeǂgui ti ra mî-e ǁhûiba. Jesub ge amase ǃgâi aiǁgausa ge ǁnāxupa da. Jesub ge ǂgīǂgōsi xūn ǃnâ ge ǃâ tama hâ i, ǁnās ǀkhab ge ega ge mî: “Ti Gaosib ge nē ǃhūbaib di tama.” (Jhn. 17:14; 18:36) Xristeǁîn ase da ge Jesub gere ǂâi khami ǂâi tsî ǁîb aiǁgausa nî ǁgae. ǁÎb khami da ge Elob Gaosiba ǂgomǂgomsase ǂkhâǃnâ, nauna ǁnā Gaosib xa mîba tsî ra ǀgore îb ǁnā Gaosiba hā.—Mat. 6:10. w24.12 4 ¶5-6

ǁKhāǁkhāsen du gao, ǂâi re mati du nē xūna sadu ûib ǃnâ a sîsenū ǁkhā ǀgausa. Aiǁgause, Jehovab di ǂhanu-aisiba ǁgae re, nauna ǀgora-e ūhâ tamase hâ-ūs ǃnâ-ū. Jesub Dadasab tsî naun tsîna ūba hâ ǀnamma ǁgae tsî māsenxase Jehovab ǂhâba hâ xūna dī. Tsî nauna hui re sadu ûiba i ga ǀnî ǁaegu ai ǃgom kai xawe. Jesub tsîna ǁgae re nauna aoǁnâbas ǃnâ-ū, în ǁîn tsîna ǃēsa ūhâ tsî Jehovab di ǀō-aisa ǀkhaeba ūǃoa. Xoremariba da ra ǃgôaǃgâ khami da ge ǃnāsase Jehovab tsî ǁîb Ôab tsîna nî ǀnam. ǁÎkha da ǃnāsase ra ǀnam khami kha ge ǁîkha tsîna nî ǀnam da. (Jak. 4:8) ǁNās ǀkha hā re î da aiǃgû tsî Jehovab māda hâ ǃgâi xūn hoana sîsenū tsî xoremarib xa ǁkhāǁkhāsen. w25.01 25 ¶16-17

Nētsēs xoas ge saorase mîhe ǁkhā: “Sats ge ti ǁorena ī tama i ge hâ i khami ra ūǃoa.” Elobmîs ge nē ǂâibasensa ǀnî hâ xoadi ǃnâs tsîna ǃamkuse ra ǁguiǃā. Jehovab ge ǁkhā mîde Mixab 7:​18, 19 ǃnâ ra mî. ǁNā xoadi ǃnâb ge Jehovaba ra mî, sada di ǁorenab ǃgamse hurib ǃnâ ra aoǂgāsa. ǀOrokam ǁaeb ǃnâ i ga xū-e hurib ǃnâ ǃgamse ǁnā, o i ge ǁkhapa ge hō-e tama hâ i. Elobmîs ge ǃgāsase ra ǁgau Jehovab ga sada ǁorena ǀûba, ob hoase ra ūbēsa î da tā ǀhapitsâsen. Davidi ge mî khami i ge ī: “ǀKhaehen ge hâ ǁnān ǃûǂamde ǀûbahe tsî ǁoren âna ǃgū-aibahe hâna.” (Rom. 4:7) ǁNās ge ama ǀûbasa. w25.02 9 ¶7-8

Gagasi paradaisa da ge nētsē ǃhūbaib ai ūhâ, miliundi khoen ama ǂkhîba ra hōǃân xa ǀoa hâsa. ǀNai nē paradais ǃnâ hâ khoen ge mîǁgui hâ tātsēn nē paradaisa ǁnāxū tidesa. ǂGui khoen ǁîn ǀkha nēs ǃnâ nî ǁhaosan ge ǂhâba hâ. Nēsa a tae? Nēs ge gagasi paradaisa. Buruxa ǀgaub ǃnâb ge Jehovaba ǃkhai-e kuru hâ, ǁîb khoen ǂkhîb tsî ǀguiǃnâxasib tsîna ūǃnâ hâba, ǁGâuab di eloxoresa tsî ǁkhōǁkhōsa ǃhūbaib khoen ǃhuigu hâb ǃnâ. (1Jhn. 5:19; J.ǂHa. 12:12) Sida di ǀnamxaǃnâ Elob ge ra mû, nē ǃhūbaib mati khoena ra tsûtsûsa. Xaweb ge ǁîb ǃoaba-aona ǃnōrasase ra tsâ kai, în aiǃgû tsî ǁîba ǃgâiaǂgaob ǀkha ǃoaba ǁkhā. ǁÎb mîs ge gagasi paradaisa “sâusen ǃkhais” tsî “ǃgâise ǂnâsa ǃhânab” ase ra ǁguiǃā. (Jes. 4:6; 58:11) Jehovab ǀkhaeb ǀkhan ge ǁnān hîna nē gagasi paradais ǃnâ ra hâna ǂkhîxase tsî ǃnorasase ra tsâ nē ǃgom ǀûni tsēdi ǃnâ.—Jes. 54:14; 2Tim. 3:1. w24.04 20 ¶1-2

Ama-as ge ǀgorets ge sa îts ǃgâi ǃgamme-ūts nî khoe-e hō, ǁnāsats ga ǁkhorebasen o. Ī a ǃkhais ge Jehovab mîmâi tamasa, mâ khoe-i hoa-eb ǃgamme-i nî khoe-e nî māsa. Xaweb ge sa ǂhâsib tsîna a ǂan tsî nî huitsi îts ǃgâi ǃgamme khoe-e hō. ǁNās ǀkha aiǃgû tsî sa ǁkhoreb tsî tsâts ra ǀgaub tsîna Jehovaba mîba re. (Psa. 62:8) ǃNūǃnâxasib tsî gā-aisib tsîna ǀgores ǃnâ ǂgan. (Jak. 1:5) ǃGamme ǁkhāts a khoe-e ǀhao-ū sats ga gaixuse ǃâu xawe ǂâis ǃnâ ūhâ re, Jehovab ge ra mîmâi ǀnammi tsî ǂhâts hâ xūn tsînab nî mā tsisa. (Psa. 55:22) ǂAnbasen re î-i tā ǃgamme ǂgaots ra khoe-e ôasa ǂhâǂhâsa xūse sa ûib ǃnâ ī. (Fil. 1:10) Ama ǃgâiaǂgaob ge Jehovab ǀkhats ūhâ ǀhōsagusisa xu ra hā. Tsî ǃgammets hâ tamas ka io ǃgamme tamats hâsa xu hā tama. (Mat. 5:3) ǃGamme tamats hâ ǁaeb ǃnâts ge ǃnorasasiba ūhâ îts ǃnāsase Jehovab ǃoabas ǃnâ dī ǁkhā. (1Kor. 7:​32, 33) Nēts ūhâ ǁaeba ǃgâise sîsenū re. w24.05 21 ¶4; 22 ¶6

Matikō gaixuse ro nî dî-amgu? ǃKhae mîǁguigu ge ǃgâi tama ǀamǂoasa ra hau. (ǂKhm. 21:5) ǂÂusa ǁaeba ū tsî dî-amgus ge nî hui i ro ǃgâise ǂangu. Xawe ro ge tā ǂanapegase gaxuse nî dî-amgu. Elobmîs ge ra mî: “Mâiǂuihe hâ ǃâubasens ra ǂgaoba tsûtsû.” (ǂKhm. 13:12) Nau khoena tae-e a dī ǁkhā dî-amgu ra khoera ra ǂangu ǁaeb ǃnâ? ǁÎra da ge ǁkhau ǁkhā î ra sida ǀkha ǂûǀhao, omaris ǃoabasa dī tamas ka io ǃgâi ǁaeba ūhâ. (Rom. 12:13) ǀNîsi du ge ǁîra ǀkha ǀguipa ǂoa, audos ǃnâ ǃnari tsî sadu omsa ǃoa a ǁkhau ra ǁkhā i ra tā ǀguri hâ. (Gal. 6:10) ǁÎra ǀkha hoaǁae hâsats ga ǂganhe, ots tae-i ǃaroma nēsa aiǂhanub ase mû tama? ǂAnbasen its tā dî-amgu ra khoera ǀguri ǁnāxu xawe ǂanǃgâs tsîna di re mâ ǁaets ǁîra soa-e nî māsa i ra ǁgamǀhao. w24.05 30 ¶13-14

ǀHaohâb ǃûi-aogu ge ra ǂanǂui ǂgao tae-i ge ǃaromasa î-i nē khoe-e tsū ǁore-e dī. Aiǁgause tae-e Jehovab ǀkha i ūhâ ǀhosagusisa ge ǂkhabuǂkhabu? Elobmîsa i go ôaǃnâ ǀû tamas ka io aoǁnâ sîsenni ǃnâ ǂoa ǀû? ǁÎ-e Jehovab kōse hoaǁae ge ǀgore ǀû? ǁÎ-e ge mā-am î-i ǃgâi tama turaga ǂgaeǂgui nî? Ham-i ǀkha i ra hâǀhao tsî mati i ǁkhoaxa ǁaeba ra ǁhûi? Mati i nē mîǁguiga ǁî-i ǂâiǀgaub tsî turaga ge tsâǀkhā? ǁNâuǃā i ra ǁî-i ǁGûb Jehovab mati ǁî-i go dī xū-i xa ra tsâǀkhāhesa? ǀHaohâb ǃûi-aogu ge ǃgâi ǀgaub ǃnâ dîna nî dî xawe gu ge tā ǂhâbasa tama dîna nî dî. Nē ǀgaub ǃnâ gu ge ǀhaohâb ǃûi-aoga ǁî-e ra hui, î-i Jehovab ǀkha i ūhâ ǀhōsagusisa ge ǂkhabu kai tsî ǁore kai-i go xū-i xa ǂâi. (ǂKhm. 20:5) ǁNās xōǀkhā gu ge aiǁgaude a sîsenū ǁkhā i gu ǁore-ao-e hui ǁî-i ǁoreba mûǃā. ǀNîsi i ge khoe-e ǂguro ǀhaos ǃnâ ǁî-i go dī xū-i xa ǁgaise nî tsâ tsî i ge ǀnîsi ǃhobasens tsîna a hî ǁkhā. w24.08 22 ¶9-11

Jesub ge ôasasib ǀkha “ǃGâiǂhôas Elob Gaosib disa” ge aoǁnâ. ǁÎb ge ǂan i amaga Elob ge ǂhâba hâ isa îb nē sîsen-e dī. Jesub di ûib ǃnâ i ge ǃgâiǂhôasa aoǁnâsa kaise ge ǂhâǂhâsa i. ǁÎb di ǀuniga ǁkhâgu ǃnâb ge Jesuba “ǃādi tsî ǃārodi” ǃnâ gere aoǁnâ. (Luk. 13:22) Nau ǁkhāǁkhāsaben tsînab ge ge ǁkhāǁkhā în ǃgâiǂhôasa ǁîb khami aoǁnâ. (Luk. 10:1) Nētsēs tsîna î ge aoǁnâ sîsen-e ǂhâǂhâsa, ǁnā-amaga kha ge Jehovab tsî Jesub tsîkha ra ǂhâba î da aoǁnâ. (Mat. 24:14; 28:​19, 20) Sida ôasasiba da ge aoǁnâ sîsenni ǃnâ a ǀgaiǀgai ǁkhā khoena Jehovab ra mû khami mûs ǃnâ-ū. ǁÎb ge ra ǂhâba în ǂgui khoena ǃgâiǂhôasa ǁnâu tsî ūǃoa. (1Tim. 2:​3, 4) Nē ǃgâiǂhôas khoen ûiga nî sâu amagab ge Jehovaba ra hui da, î da khoen ǀkha da aoǁnâ sîsenni ǃnâ ra ǃhoa ǀgauba ǃgâiǃgâi. Khoen ga nēsi ǃgâiǂhôasa ūǃoa tama i xawen ge noxopa kai ǁgâiǀāb nî toas aiǃâ ǃēsa ūhâ în ǁnāsa dī. w25.03 15-16 ¶5-7

Mâ Xristeǁî-i hoa-i ge ǁî-i di ǃgâiǂâisa nî sîsenū nē mâsib ǃnâ. ǀNîn ge ǀnîsi a tsâ ǁkhā khoe-e tawede tamas ka io ǀhaos tawa ǁî-e ǁkhoreǁharesa. Xawe da ge ǁîn ǀkha ǂanapega gaxu ǁgamǀhaode tā nî ūhâ tsî ǁîna tā nî sari. ǀNîn ge ra dîsen Elobmîs ge ra mî, î da tā ǀnî ǁore-aona tawede. ǁNāti ī khoe-e da ga tawede, o da ge ǁî-i di eloxoresa dīgu ǃnâ ra ǃâ. (2Jhn 9-11) Nē xoas ge ǁnāǁgôa-ao-i tsî ǁnān hîna nauna ǁgai xūna dīs ǃnâ ra ǂgaeǂhapuna ǃoa ra ǁnaeǁgau. (J.ǂHa. 2:20) ǁNā-amaga i ga khoe-e ǁnāǁgôa-ao-i ǁkhāǁkhāde ǂkhâǃnâ tsî ǀnî ǁgai ǁorena dī, o gu ge ǀhaohâb ǃûi-aoga ǁî-e sari tide. Ama as ge ǁnā khoe-i a ǃhobasen ǁkhāsa. ǁNās nî īs kōse da ge nēti ī khoe-e tawede tsî ǀhaode ǃoa ǁkhau tide. w24.08 30-31 ¶14-15

Jesub ge khoena ǂûmā toa ob ge ǁîb apostelga Kapernaumsa ǃoa ge oa kai ǂgaus ǀkha. Tsîb ge ǁnāpaxu ǃhomga ǃoa ge ī, khoen ge gao-aob ase gere mâibi ǂgao amaga. (Jhn. 6:​16-20) Apostelgu ǂgaus ǀkha ra ǃnari hîna i ge ǀgaisa ǂoab tsî hurib ǃgabigu tsîna ge tsoatsoa. Tsîb ge Jesuba ǁgammi ai ra ǃgûse ǁîgu ǃoa ge sī. Tsîb ge apostel Petruba ge ǁkhau îb tsîna ǁgammi ai ǃgû. (Mat. 14:​22-31) Jesub ge ǂgaub ai a ǂoa khamib ge ǂoaba ge ǃnom. ǁKhāǁkhāsabegu ge burugâ hâse ge mî “amase, Elob Ôats ge satsa.” (Mat. 14:33) Xawe gu ge ǁîga noxopa nē buruxa dī-i tsî noxopa nî ī-i tsîn ra ǃgûǀhao ǀgauba ge mûǂan tama hâ i. Markub ge ra ǀaro: “O gu ge kaise ǃhuri tsî ge buru. Peren tawa gu ge ǁnâuǃākaisen tama” amaga. (Mrk. 6:​50-52) ǁKhāǁkhāsabegu ge ge ǁnâuǃā tama hâ i, Jehovab ge Jesuba ǁnā ǀgaiba a māsa îb buruxa dīga dī. w24.12 5 ¶7

ǀGui ǀgaub Jehovaba da ǃgôaǃgâsiba a ǁgau ǁkhāb ge ǁkhāsiba sîsenū tsî Jesub ǁōb ǂâiǂâisens ǁaeb ǃnâ Jehovaba ǁgau xoremariba da ra ǃgôaǃgâsa. Jesub ǁōb ǂâiǂâisensa hâǃnâs xōǀkhā da ge nau khoen tsîna nî ǁkhau. ǂÂiǂâisensa ǃoa du nî ǁkhau khoena mîǃāba re tae-i ǁnāpa nî īsa. ǁÎna du ge vidiokha ǁgau ǁkhā, Jesuba tae-i ǃaroma ge ǁō? tsî Jesub di ǁōb xa ǂâiǂâisen re ti hâkha. ǀHaohâb ǃûi-aogu ge gagasise ǃkhai hâ ǃgâsan tsîna nî ǁkhau. Kai ǃgâiaǂgaob ge ǀhommi tsî ǃhūbaib ais tsîna hâ, kā hâ gū-i ga oaǀkhī o. (Luk. 15:​4-7) ǂÂiǂâisens tawa da ge ǂan da a khoen ǀguina tawede tide, xawe ǁnān ǀasase ra ǀkhīn tsî gaxu ǁaeba ge hâǃnâ tama hâ în tsîna nî tawede. ǁÎna da ge ǁkhoreǁharesase ra tsâ kai ǂgao.—Rom. 12:13. w25.01 29 ¶15

ǀKhara ǀgaub ge hâ Jehovaba ge ǂkhâǃnâba îb ǁîb Ôaba sî, îb sida ǁoren ǃaroma ǁō. ǁNāb ge sidab ūba hâ ǀnamma. (Jhn. 3:16; 1 Jhnb. 4:​9, 10) Jehovab ge ǁîb Ôaba ge sî ǀamosib kōse da nî ûi ǃkhais ǃaroma ǀguis ose, xaweb ge ra ǂhâba î da ǁîb omaris ǃâ kai. Adammi ge ǁōre, ob ge ge Jehovab di omaris ǃâ kai ǀû. ǁNās xa ǃaromahe hâse da ge hoa da Elob omaris ǃauga ge ǃnae. Xaweb ge Jehovaba sida ǁorena ra ǀûba xoremarib ǃnâ-ū. Tsîb ge ǁîb omaris ǃnâ hoa khoena nî ūǂgā, ǁîb ǃnâ ǂgom tsî ǁîba ra ǁnâuǀnamna. Nēsis tsîna da ge ǃgâi ǀhōsagusisa Jehovab tsî sida ǃgâsan ǀkha a ūhâ ǁkhā. Amaseb ge Jehovaba a ǀnam da.—Rom. 5:​10, 11. w25.01 21 ¶6

Jehovab ge kaise ǀō-aisa ǀkhaeba ge mā da ǁîb Ôabab ge sîo, îb khoen ǃaroma ǁō. (2Kor. 9:15) Jesub ge ǁōba da amaga da ge Jehovab ǀkha ǀgū ǀhōsagusisa a ūhâ ǁkhā. ǀAmo ûiba ǃoas tsîna du ge a mûǂui ǁkhā. ǂGui ǃaromade da ge ūhâ Jehovaba gangansa xoremarib ǃaroma, ǀnam dab a amaga. (Rom. 5:8) Ganganxase mâǀgara tsî da Jehovab tsî Jesub ge dība da xūna tā nî ǀuru amagab ge Jesuba ge mîmā, î da ǁîb ǁōb ǂâiǂâisensa kurib hoaba tsēdī. (Luk. 22:​19, 20) Jesub ǁōb ǂâiǂâisensa da ge nē kuri Dondertaxtsē, Aprili 2 2026 nî tsēdī. Amase da ge hoa da ra aiǂhumisen ǁnā tsēsa hâǃnâsa. Kaise i ge nî ǃgâi mâ khoe-i hoa-i ga Jesub ǁōb ǂâiǂâisens ǁaeb ǃnâ Jehovab tsî Jesub ge dība da xūn xa ǂâiǃgâ o. w25.01 20 ¶1-2

Aiǃgû tsî du ge Jehova Elob tsî Jesub Xristub ūba da hâ ǀnammi xa a ǁkhāǁkhāsen ǀgara ǁkhā. ǁÎb ge dība da xūna du ga ǃgamse ǂâiǃgâ o. ǀNîsi du ge nē kuri Jesub ǁōb ǂâiǂâisens ǁaeb ǃnâ ǀgui tamas ka io ǀgam ǃnaeǃkhaidi Jesub ûib xa hâde a khomai ǁkhā. Tā ǂgui danaǃâde ǀgui ǁaeb ai khomai re. Xawe ǂause khomai tsî ǀarosa ǃaromade ôa re, tae-i ǃaroma da Jehovab tsî Jesub tsîna nî ǀnamsa. Amab ǃnâ du ga gaxuse hâ, o du ge ǀnîsi a dîsen ǁkhā ǀasa xūna hâ ǁkhāǁkhāsen ǁkhā ta a na? Aiǁgause, Elob di ǂhanu-aisib, ǁîb ǀnammi tsî xoremarib xa. Ama as ge hoaǁae i ge ǀasa xūna hâ ǁkhāǁkhāsen ǁkhā da a na. Elobmîs ai a ǃgaoǃgaosa ǂkhanina khomai tsî ǁkhāǁkhāsen. ǁNâuǃā tama du hâ xū-e du ga Elobmîs khomais ǃnâ hō, o ôaǃnâsa dī re. Tsî tsēs ǃnâ ǁkhāǁkhāsen du go xūna ǂâiǃgâ re. Tae-e i Jehovab, ǁîb Ôab tsî ǁîkha sado ūba hâ ǀnammi xa ra mîba du ǃkhaisa. w25.01 24-25 ¶13-15