Aprili

Jesub xoremarib ǁguibas ǃnâ da ūhâ ǂgoms ǀamo ûiba da ga hō ǂgao o. (Efe. 1:7) Jesub ge “ǀnî gūn” ase a ǁnaeǁgaun ge, tā ǃKhūb ǃui ǂûs tawa pere-e ǂû tsî xûi-e nî ā. (Jhn. 10:16) Xawen ge ǁîna Jesub ǀaob tsî soros ǁguibas ǃnâ-ū ǃgâiba ra ǀama. Jesub xoremarib ǁguibas ǃnân ge ǂgomsa ra ǁgau tsî ǁnāpaxu ra hā buruxa ǀkhaega xu ra ǀama. (Jhn. 6:53) ǃKhūb ǃui ǂûs tawa pere-e ǂû tsî xûi-e ra ān ge ra ǁgau, ǁîn ǀasa ǃgaeǀhaos di ǃâsa tsîn ǀhommi ǃnâ ǂgaeǂguis ǃâubasensa ūhâsa. Nēsi da ga ǂkhauhesan tamas ka io ǀnî gūn ǃâ xawe da ge hoa da kaise ǂhâǂhâsa xū-e ra ǁkhāǁkhāsen. ǀGaisa ǂgomsa da ge xoremarib ǁguibas ǃnâ nî ūhâ ǀamosib kōse da ga ûi ǂgao o. w24.12 13 ¶14, 16

ǃKhūb ǃui ǂûs tawab ge Jesuba ǁîb apostelga pere-e ge mā tsî ge mîba gu ǁnās ǁîb sorosa ra ǂnûǁkhaebasa. Tsîb ge xûi-e mā gu tsî ge mî nē xûi-i ǀasa ǃgaeǀhaos ‘ǀaob’ disa ra ǂnûǁkhaeba ti. (Mrk. 14:​22-25; Luk. 22:20; 1Kor. 11:24) Nē ǀasa ǃgaeǀhaos ge gagasi “Israel ommi” tsî Jehovab ǁaegu hâ. ǁNān ge Jesub ǀkha ǀguiba ‘ǀhommi ǃnâ nî ǂgaeǂguina.’ (Heb. 8:​6, 10; 9:15) ǃKhūb ǃui ǂûs tawab ge Jesuba ‘ǂkhari gūron’ ai ǂâisa ge ǂnûi hâ i. ǁÎb ǂgomǂgomsa apostelgu ǁnā ǃui ge ǁnāpa hâ i gu ge a ǁnā ǂkhari ǃgôarob di tsoatsoa. ǁÎgu ge Jesub ǀkha ǀhommi ǃnâ ǀguiba nî ǂgaeǂgui. w24.12 11 ¶9-10

Jesub ge ǁîb ǀgū ǀhōsan xa ge ǀapexūhe. ǁÎb khākhoen ge ǂganamǂgā, mîǁgaiǁgai bi tsî dī tamab hâ xūn xa ge ǂgari-am bi. ǁÎn ge Jesuba ǁōba ǃoa ǁkhara tsî ǁnāpaxu gere ǂnaubi. ǀAms ai gu ge soldaga Jesuba haib ai ge ǃgâu ǃgambi gu nîse. Nē tsûbab ge ǂgomǂgomsase tani ǃkharu xawe i ge khoe-e ge hâ-i hîna ge nēsa ǃnāsase gere hōǃâ-e. Jehovab ge ǀgaib tsî ǁkhāsib tsîna ge ūhâ i, ǁîb ǀgôab gere hōǃâ tsûba ǀam kaisa xaweb ge ǁnāsa ge dī tama hâ i. Tae-i ǃaroma? Jehovab ge ǁîb ǀGôaba kaise ge ǀnam i. Jesub ǁguibas ge a ǁgauǁgau, Jehovab kaise ǀnam tsisa. ǁÎb ge ǁîb ǀnamǀnamsa ǀGôaba ge ǁguiba tsî kai tsûba ge ǃkharuǃnâ îb sado ǁōb tsî ǁoreba xu sâu ǁkhā. (1Jhn. 4:​9, 10) ǁÎb ge ra ǂhâba î-i mâ ǀguiǀguibe khoe-i hoa-e ǁoreba ǃkhamǃoa tsî dan. w24.08 6 ¶13-14

Jehovab matikōse a ǀnam da ǃkhaisa da ge a ǁnâuǃā ǁkhā, ǁîb Ôab ge ǃgoma gere tsâ ǀgausa mûs ge ǀnîsi matikōse gere tsûtsûbis xa da ga ǂâiǃgâo. ǁGâuab ge ra mî Elob ǃoaba-ao-i ǁîb ǃoagu ǂgomǂgomsase hâ tidesa ǃgom ǁaegu ǃnâ. ǁGâuab a ǂhumi-aosa ǁgaus ǃaromab ge Jehovaba ge mā-am îb Jesuba ǃgomma tsâ, ǁōb nîs aiǃâ. (Job. 2:​1-5) Jehovab ge ge mû ǂgomdi khoen ge Jesuba ǃhō, ǂnau tsî haib ai a ǃgâu mâisa. ǁNāpaxub ge Jehovaba ǁîb ǀnamǀnamsa Ôab ǃgomma tsâ tsî ra ǁō ǀgauba ge mû. (Mat. 27:​28-31, 39) Jehovab ge ǀgaiba ge ūhâ i ǁkhaesa în nē xūn hoana tā ī. (Mat. 27:​42, 43) Xaweb ga Eloba ǁnāsa dī hâ, o i ge xoremariba ga matare-e tama hâ tsî da ge ǃâubasen-e ga ūhâ tama hâ. ǁNā-amagab ge Jehovaba ge mā-am îb ǁîb Ôaba ǃgomma tsâ tsî ǁō. w25.01 22 ¶7

Nisan 16, 33 gu ge Jesub ǁkhāǁkhāsabega kaise tsûaǂgao tsî gere ǃao. ǀGam kha ge Jerusalemsa xu ge ǃgû Emmaus ti ǀon hâ ǃâsa ǃoa. ǀŪkha a khoeb ge daob ai kha garu hîna ǀhao-ūkha tsî ǁîkha ǀkha ge ǃgû tsoatsoa. ǁKhāǁkhāsabekha ge nē khoeba Jesub ǀkha ge ī xūna ge ǁgamba. Nē khoeb ǀūkha ge īb ge tātsē kha ǀuru tide xūna ge ǁgamba kha tsoatsoa. ǁÎb ge “Moseb di ǂkhanidi ǀkha tsoatsoa tsî kēbo-aogu di ǂkhanidi kōse ǁîkha ge ǁguiǃāba” tae-i ǃaromab Mesiaba nēti ī ǀgaub ai ǃgoma tsâ tsî nî ǁōsa. Emmaus tawa gu ge sī o kha ge ge mûǂan, nēb a Jesu ǃkhaisa Elob xa ge khâisa māheba. (Luk. 24:​13-35) Jesub ge 40 tsēde ǃhūbaib ai ge hâ i ǀhomma ǃoab nî oas aiǃâ. Tsîb ge ǂgui ǃkharagagu ǃādi ai ǁîb ǁkhāǁkhāsabegu aiǃâ ge ǂhai. Jesub ge ǁîb ǁkhāǁkhāsabega gere ǂkhâǃnâ tsûaǂgao tsî ge ǃao hâ i ga. Nēs xa ǃaromahe hâse gu ge kai ǂkhîba ge hōǃâ tsî gu ge ǁkhoaǂgaosiba ge hō î gu aiǃgû tsî aoǁnâ tsî khoena ǁkhāǁkhā ǃgâiǂhôas Elob Gaosib dis xa. w24.10 12 ¶1-3

ǀGôa-i ge ǁaeb ra ī khami ra kai, xawe i ge aitsama Jehovab ǀkha i ūhâ ǀhōsagusis ǃnâs tsîna nî kai. Aiǁgause, Korintes ǃnâ ge hâ i ǃgâsan ge ǃgâiǂhôasa ūǃoa, ǁāǁnâhe, ǃanu gagaba ǃkhōǃoa tsî Apostel Paulub ge mâ daoǁgaude xus tsîna ǃgâiba ge hō. (ǃNǃkh. 18:​8-11) Xawen ge ǀnîna ǁîn di ǁāǁnâs khaoǃgâ noxoba gagasise ge kaiǀoa tama hâ i Xristeǁîn ase. (1Kor. 3:2) Gagasise da ga kai ǂgao, o da ge ǁnā turaba ǂgurose nî omkhâi. ǁNān hîna gagasi ǀgôaron ase ra hâhâ ǂgaon ge ‘gâresiba a ǀnam’ tsî ǁnās ǀkhā aiǃgû tama hâ gagasise kaisa. (ǂKhm. 1:22) Sada ge kaikhoe-i ǁî-i ǁgû-i ǃoa mîǁguiba dīs ǃgao ra kō-i khami ī ǂgao tama hâ. Xawe da ge aitsama gagasise kais di mîǁguiba ra dī ǂgao. Xristeǁî ǀoasasiba du ga sīǃnâ ǂgao, o Jehovaba ǃoa ǀgore îb ‘māsenxasib . . tsî . . ǁkhāsib’ tsîna mā du.—Fil. 2:13. w24.04 4 ¶9-10

Jehovab ge ra mîba da matib ra tsâsa khoena ǀgoraǃgâs tawa i ga hā o. (Ese. 33:11) Jehovab ge khoe-e hîkākā tide ǃgâi ǃaroma-i ose. ǁÎb ge ǀkhomxaǂgaosib xa ǀoa hâ tsîb ge ǁîba ǀkhomxaǂgaosiba nî ǁgau. Tae-e da a ǂan khâisa hō tide khoen xa? Elobmîs ge ǀoro aiǁgaun xa ra ǃhoa. Jesub ge Judab Iskariob ge khâisa hō tide ti ge mî. (Mrk. 14:21; Jhn. 17:12) Judab ge ge ǂan i dīb ta xū-i Jehovab tsî ǁÎb ǀgôab ǃoagu hâsa xaweb ge aiǃgû tsî ǁnā-e ge dī. (Mrk 3:29) ǁKhā ǀgaub aib ge Jesuba ge mî, ǀnî ǂgomdi ǂgaeǂgui-aogu hîna gere mâǃoa bi gu nî ǁōsa khâis di ǃâubasens ose. (Mat. 23:33; Jhn. 19:11) Apostel Paulub ge ge ǃkhâikhom ǃhobasen hâ ǁnāǁgôahâ Xristeǁîn tsîn khâisa hō tidesa.—Heb. 6:​4-8; 10:29. w24.05 4 ¶10-11

Jehovab ǀgūse da ga hâ ǀgara, ob ge ǁgâuaba ǃē-e hō tide sida tsûtsûsa. (1Jhn. 3:8) ǀAsa ǃhūbaib ǃnâb ge Jehovaba aiǃgû tsî ǁîb ǂgomǂgomsa ǀhōsana gagasi tsûba xu ǀgui ǁkhauba tide xawe ǁōba xus tsîna ǁîna nî ǁkhauba. (J.ǂHa. 21:4) Kaise kai aiǂhanub ge Jehovab tentommi ǃnâ ǃhaokhoese hâ tsî ǁîb ǀkha hâhâ ra ǀhōsagusisa ūhâsa. (Ese. 37:27) Tae-e da nî dī î da Jehovab tentommi ǃnâ ǃhaokhoese hâ ǀgara? Khoe-i xa du ga ǁkhauhe, o du ge nî dītsâ î du ǃhaokhoese tanisen. ǁNās ǁkhās khami da ge ra ǂanǂûi ǂgao, Jehovab tae-e ǁîb ǃhoakhoena ra ǂgaoǀkhāsa. Jehovaba da ūba hâ ǀnammi ge ra ǂkhâǃnâ da î da ǁkhā da a-i hoa-e dī ‘ǁîba ǂkhîǂkhîsa.’ (Kol. 1:10) ǁNāsa ǂâis ǃnâ ūhâse da ge tāstē nî ǀuru ǁîb ǃgôahesa anu hâsa. ǃGam ǃgôasiba Jehovaba ūhâbas ge nî hui da, î da ǁîba nî tsûtsû xūna dīsa xu ǂgōsen. Hoaǁae da ge dītsâ tsî “ǂhanuse” sida Elob ǀkha ra ǃgû ǀgara ǂgao.—Mix. 6:8. w24.06 4 ¶8-9

Jehovab ge Abrahamma ge ǂgan îb ǁîb ǀgôab Isaka ǁguiba. Nē i ge Abrahamma kaise ge ǃgomba ī xaweb ge Jehovaba ge ǁnâuǀnam. Abrahammi ǁîb ǀgôaba ra ǃgam ǂgao ǁaeb ǃnâb ge Jehovaba ǁîba ge ǂkhā. Nēs ge ra ǁgau da Jehovab tae-e hānîǁaeb ǃnâ nî dīsa. Jehovab ge ǁîb di ǀnamǀnamsa ǀGôaba ǁguibas ase ga mā hâ. Jehovab ge khoena ǁnātikōse a ǀnam. (Gen. 22:​1-18) Jehovab ge Israelǁaesa ǂhanuba a mā, ob ge ǁîna ge mîba ǁguibanan a dī ǁkhāsa în ǁîn ǁorena ǀûbahe. (Lev. 4:​27-29; 17:11) ǁNā ǁguibadi ge kai ǁguibasa ǃoa gere ǁnaeǁgau. ǁNās hîna khoena ǀoasase ǁoreba xu nî ǃnora kaisa. Elob kēbo-aogu ge ge ǁguiǃā, ǁnā mîmâihe hâ ǁguibas Elob ǀGôaba ǃoa ra ǁnaeǁgausa. Tsîb ǁîba ǃgomma hōǃâ tsî nî ǁōsa, îb khoena ǁoreb tsî ǁōba xu ǃnora kai ǁkhā.—Jes. 53:​1-12. w24.08 4 ¶7-8

Elobmîsa du ra khomai ǁaeb hoaba ǀgauga ôa re, î du khomai du ra xūna sadu ûib ǃnâ sîsenǂui. Elobmîsa du ra khomai ǁaeb ǃnâ dîsen, “mati ta nē ta go khomai xūna nēsi tamas ka io ǀgūǁae a sîsenū ǁkhā?” Aiǁgaus ase sadu Elobmîs khomais ǃnâ du ge ǀnîsi 1 Tesalonikaǁîn 5:​17, 18 sa ra khomai. ǁNā ǀgam ǁaraǃāra khomai toa tsî du ge a dîsen ǁkhā, ǂgaoba xu ta ra ǀgore tsî matikōǃnāde ta ra ǀgore? ǃGôaǃgâ du ra xūn xas tsîna du ge a ǂâi ǁkhā. ǀNîsi du ge ra mîǁgui Jehovaba du ǃnona xūna nî gangansa. ǃNubu ǁaeroba du ga Elobmîsa xu du go ǁkhāǁkhāsen xūna ǂâiǃgâ, o i ge nî hui du mîs ǁnâu-ao tsî dī-ao kaisa. Mâ tsēs hoasa du ga Elobmîs ǃnâ du ra khomai xūna dī, o du ge ǁaeb ra ī khami nî Jehovab di ǃgâi ǃoaba-ao kai. w24.09 4-5 ¶9-10

Jehovab ge ǀō-aisa ǁkhāsib ǀkha ge kuru da. Naun xa māhes xa da ǃgâibahe xawe da ge ǃnāsa ǃgâiaǂgaoba ra hō nauna da ga mā o. ǃGâise da ge ra tsâ sida ǃgâsana da ga hui o tsî da ge ra ǂkhî ǁîn ga ganganxasiba ǁgâiǂûisen o. Khoe-i ga ǃgôaǃgâ tamas ka io ǃgôaǃgâ tama ī xawe da ge nî ǂkhî ǂhanu xū-e da ra dī amaga. Tā da ge nî ǀuru “ǃKhūb ge ǁnās xa ǃnāsana a mādawa” ǁkhā. (2Kro. 25:9) Jehovab ra mās xa da ge ǃnāsase a mā ǁoa. ǃNāsa ǃgâiaǂgaob ge hâ Jehovab xa aitsama mādawa-amhesa. Hā re î da aiǃgû tsî sida ǀHomsi ǁGûb māxasiba ǁgae. w24.09 31 ¶20-21

Jehovab ge kaise a ǀkhomxaǃnâ. (Psa. 103:13; Jes. 49:15) Jehovab ge tsû da gao ra hōǃâ. (Sax. 2:8) ǁÎb ge ra hui da î da ǃgâise ǂan bi tsî ǁîb di ǀhōsa kai. (Psa. 25:14; ǃNǃkh. 17:27) ǁÎb ge a ǃgamǃgamsenxa ǁnās ǀkhab ge ‘ǃgamǃgâ . . tsî ǀhommi ǃnâ tsî ǃhūbaib ai kō . . tsî ǀgâsana tsaraba xu . . ra ūkhâi.’ (Psa. 113:​6, 7) Nē xūn hoan ǃaroma da ge kai aiǂhanuba ūhâ sida Eloba ǂkhaisiba māsa. Jehovaba da ge ǂkhaisiba ra mā, nau khoen ǁîba nî ǂansa da ra ǂhâba amaga. ǂGui khoen ge amaba Jehovab xa a ǀū. Tae-i ǃaroma? ǁGâuab ge ǂhumi ǂhôana ǁÎb xa a mî amaga. Tsîn ge khoena ǁnā ǂhôana ra ǂgom. (2Kor. 4:4) ǁGâuab ge khoena ge ǂgom kai Elob a ǁaixasā, sida ǀkha ǁae tama tsî sida ǃgomsin hoana ra ǃaromasa. Xawe da ge sada amaba Elob xa a ǂan. ǁNā ǃēsa da ge ūhâ khoena Elob xa hâ amaba mîbasa tsî ǁîna huisa în ǃoaba bi.—Jes. 43:10. w25.01 3 ¶6-7

Elob ǀgôab Jesub ge ǀoasa kurusa ge ūhâ ī tsî buruxa dīna gere dī, xaweb ge ǁGâuaba ǀnî khoena gere sîsen-ū în ǂgui ǂhomi ǂhôana Jesub xa mî. Aiǁgaus ase kherkhen di ǂgaeǂgui-aogu ge khoena gere mîba, Jesub ǁîb ǀgaib demonga khoena xu ǃnora kaib diba “ǁgâuagu di danaǂgaeǂgui-aoga” xu gere hōsa. (Mrk. 3:22) Jesub ǀgoraǃgâs ǃnâ gu ge ǂgomdi ǂgaeǂgui-aoga Jesuba gere ǂgāri-am, Elobab ǃgôasi-e ūhâba tama tsî ra ǃhōbi ti. Tsî gu ge khoena gere ǂkhâǃnâ îb Jesuba ǁōb ǁkharaba māhe. (Mat. 27:20) Jesub saosaben ge ǃgâiǂhôasa gere aoǁnâ, on ge ǁîna gere mâǃoa khoena ge “khâikhâiǃnâ” în ǁnā Xristeǁîna ǁgâiǀā. (ǃNǃkh. 14:​2, 19) ǃKhē xu ǂgō-ommi Desemberi 1, 1998, dib ge ǃNaeǃkhaidi 14:​2, xa sao rase ra ǁguiǃā: “ǁGâuab di ǂkhâǃnâ-aon ge Xristeǁîn haisi-amsa gere mâǃoa. Tsî ǁnās ǂam-ai kaise tsū xūna ǁîn xa gere ǃhoa în khoena ǁîna ta ǃgâ tsî ǃhui.” ǁGâuab ge noxopa nētsē ‘hoaraga ǃhūbaiba ra ǂgaeǂhapu.’ w24.04 11 ¶15-16

Khoe-i di khâis ǃâubasens ge mâǁae i go ǁōsa xu hâ tama hâ. Jehovab ge ǃgâi ǀGoraǃgâ-aoba, ǁîb di mîǁguigu ge hoaǁae a ǂhanu. (Psa. 33:​4, 5) ǂGomǃgâ ǁkhā da ge a ‘hoaraga ǃhūbaib di ǀGoraǃgâ-aob,’ hoaǁae ǂhanu xū-e nî dīsa. Mî ǁkhā da ge a khoe-i di ǀamo ûib ǃâubasens ge khoe-i mâpa ra hâsa xu hâ tama. Īǁoa i ge a Jehovab miliundi khoena “pīrin” ase nî ǀgoraǃgâ ǃkhaisa, ǁîn ǀnî ǃhūgu ǃnâ ra hâ amaga tsîn ge ǁîna ǃē-e ūhâ tama hâ i ǃkhais ǃgao, în Gaosib di haisi-ams ǃoagu dawasen. (Mat. 25:46) Hoaraga ǃhūbaib di ǀGoraǃgâ-aob ge ǁnā khoen xa kaise ǁae hâ sida ǁîn xa ǁae hâs ǂam-ai. ǀŪ da ge a Jehovab taen hoana nî dīsa, kai ǁgâiǀāb ǁaeb ǃnâ. ǁÎn ga mû o taen kai ǁgâiǀāb ǁaeb ǃnâ ra īsa, on ge nē khoena ǀnîsi Jehovab ǃnâ ǂgomsa nî omkhâi ǁîb ga hoa ǃhūbaib ǃnâ ǁîb di ǀonsa ǂanǂan o.—Ese. 38:16. w24.05 12 ¶14-15

Jehovab khoen ge hui gu sa a ǀnam. (2Kor. 8:4) Ama as ge ǀnî ǁaegu ai da ge ǁkhoaǂgaosiba ǂhâhâ nauna huisa. Aiǁgaus ase torob ga tsoatsoa, o i ge ǁnāpa hâ ǀhaohâb ǃûi-aoga ra mûǂan ǃgâsan ǂkhâǃnâhesa ǂhâhâsa. Nē ǃgâsan ge huiba ǂhâhâ în Elobmîs tsî Elobmîs ǂkhanina hō tsî ǂûn, saran tsî hâ ǃkhais tsîna. ǀHaohâb ǃûi-aogu ge ǁîgu ǃgâsana a ǀnam ǁnās ǃaroma gu ge ǂhân hâ xūna ra mā nî, ǁîgu ûib ga ǁkhōǁkhōsa mâsib ǃnâ hâ xawe. Nē ǁkhōǁkhōsa ǁaegu ǃnâ i ge kaise a ǂhâǂhâsa, î da ǁnâuǀnam nēs nî ǀguiǃnâxa kai da amaga. ǁNâub berosa xu ra hā daoǁgaude da ge nî ǁnâuǀnam. (Heb. 13:17) ǀHaohâb ǃûi-aogu ge ǁaeba xu ǁaeb ǀkha tsūkeǃgâb ga hâ, o nî saohe ǀapemāde nî kōǃgâ i gu ǂan tae-i nî dīhesa tsūkeǃgâb ga hā o. (1Kor. 14:​33, 40) ǁKhoaǂgaoxa xawe ǂanbasen. (ǂKhm. 22:3) Sadu ǁnâuǃāba sîsenū tsî ǁkhā du as kōse dītsâ ǁkhaubasensa. Jehovab ai ǂgomaiǂnûi. ǂÂis ǃnâ ūhâ Jehovab ge ǂhâba hâ î-i sats tsî ǃgâsan tsîna ǃnorasase hâ. ǁÎb ge ǃgâsana kōǃgâs ǀkha nî huitsi. w24.07 4 ¶8; 5 ¶11

Gao-aob Davidi ge Jehovaba ge ǂan i tsî ǁîb ai gere ǂgomaiǂnûi. Gao-aob Sauli tsî naun ge Davida gere ǃgam ǂgao, ob ge Davida Jehovaba ǃoa huib ǃaroma ge ǀgore. Elob ge ǁîb ǀgoresa ǃeream tsî ǀûbabis khaoǃgâb ge Davida ge ǂanǂan: “ǃKhūb ge a ûitsama!” (Psa. 18:46) Nē mîdi ǀkhab ge Davida Jehova Elob a ûitsama ǃkhais ǀguisa ge ǂanǃgâ tama hâ i. Tae-eb gere ǂâibasen? Davidi ge gere ǂanǃgâ Jehovab ge ama Elo isa ǁîb ǃoaba-aona hoa ǁae ra huiba. Davidi ge ge ǂan-i Jehovab a ǂansa ǁîb ǀkha i tae-e ra isa tsîb hoaǁae ǁîba ra hui ǂgaosa. ǁNās ge Davida ge ǂkhâǃnâ îb aiǃgû Jehovaba ǃoaba tsî koasa. (Psa. 18:​28, 29, 49) Jehovab a ûitsama ǃkhaisa ǂanǃgâs ge nî hui da î da ǁîba ôasasib ǀkha ǃoaba. ǀGaiba da ge nî ūhâ i da ǃgomsin ǃnâ mâǀgai tsî ǂkhâǃnâhe ǃgarise ǁîb ǃoabas ǃnâ sîsen ǀgarasa. ǀGaisa turab tsîna da ge ūhâ Jehovab ǀgūse hâ ǀgarasa tae-i ǀgui-i ga ī xawe. w24.06 20-21 ¶3-4

Apostel Paulub mîdi Tesalonikaǁîna ǃoa hâde xu da tae-e nî ǁkhāǁkhāsen? Elobmîs ǀkha ǃgûǀhao tama ǂhôa-e da ga ǁnâu tamas ka io ǃhuriǃhurisa ǂhôa-e ga ǁnâu, o da ge gā-aisiba nî sîsenū. Soviet Unions ǁaeb ai i ge sida khākhoena sîǂkhanisa ǃgâsana ge mā mî rase dana berosa xu i ra hā ti. Sîǂkhanis ge ǃgâsana gere ǂkhâǃnâ în ǀgurihâse ǀnî hâ ǀapeǂhomisa ǂnûbikhâi. Nē sîǂkhanis ge ama a xū-i ase gere mûsen. Xawe ǂgomǂgomsa ǃgâsan ge nēs xa ge gâre mûhe tama hâ i. ǁÎn ge ge mûǂan nē sîǂkhanis ǁîn ge ǁkhāǁkhāhe xūn ǀkha ǃgûǀhao tama hâsa. Nētsēn ge amaba ra mâǃoa khākhoena internetsa ra sîsenū tsî ra dītsâ ǀgorasa sada ǁaegu kurusa. ‘ǃKhaese nēs xa ǁnobe’ kaihes xa da ge ǂōrisase khomai tamas ka io da go ǁnâu xūna nî ǀgōpeǀnō ǁkhāǁkhāsen da ge amab ǀkha. Nēsa dīs ǃnâ-ū da ge ra ǁkhaubasen.—2Tes. 2:2; 1Jhn. 4:1. w24.07 12 ¶14-15

Mâ khoe-i hoa i a dī ǁkhā ǂhâǂhâsa mîǁguib ge Jehovaba ǃoa māǁnâsen tsî sida ǃgâsan ǀkha ǃoababisa. Jehovab ge ǁnāsa mâ khoe-i hoa-e ra turaba. Tae-i ǃaroma? ǂHâbab ge ra în khoena ǁîb ǀkha ǀgū ǀhōsagusisa ūhâ tsî ǀamosib kōse ûi. (Deu. 30:​19, 20; Gal. 6:​7, 8.) Jehovab ge khoe-e ǁgari tama hâ ǁîba ǃoabasa. ǁÎb ge mâ khoe-i hoa-e ra mā-am î-i mîǁgui tae-e î ra dī ǂgaosa. ǀHaohâb ǃûi-aoga tae-e nî dī ǁāǁnâsa Xristeǁî-i ga Jehovab ǂhanuba khôa tsî ǀgaisa ǁoreba dī o? ǃHobasen tama î ga ī, oi ge ǀhaohâba xu nî ūǂûihe. (1Kor. 5:13) Khoe-i ga ǀgaisa ǁoreba dī tsî ǀhaohâba xu ūǂûihe xaweb ge Jehovaba ra ǂhâba î-i nē khoe-e ǃhobasen tsî ǁîb ǀkha ǀgū ǀhōsagusisa ūhâ. ǂHâǂhâsa ǃaromas Jehovab ge xoremariba mābas ge îb ǁnān hîna ra ǃhōbasenan di ǁorena ǀûba. Jehovab ge a ǀnamxaǃnâ Elo tsîb ge ǁnān hîna tsū ǁorena ra dīna ra ǂkhâǃnâ în ǃhobasen.—Sax. 1:3; Rom. 2:4; Jak. 4:8. w24.08 14 ¶1-2

Johaneb ge ǁîb ǃnonaǁî ǂkhanisa xoa ǁaeb ai i ge khoena ge hâ i ǂhûmi xūna gere ǁkhāǁkhāna tsî ǀgorasa ǀhaohâgu ǃnâ gere ǃaromana. Xawen ge nauna “amab daob” ǃnâ ge ǃgû ǀgara. ǁÎn ge Jehovaba ǁnâuǀnam tsî “ǁîb mîmādi” ǃoagu gere ûi. (2Jhn. 4, 6) Nē ǂgomǂgomsa ǃoaba-aon ge Johaneb tsî Jehovab tsîkha kaise gere ǂkhî kai. (ǂKhm. 27:11) Tae-e da ra ǁkhāǁkhāsen? ǂGomǂgomsase da ga Jehovaba ǃoaba, o da ge ǂkhîba nî ūhâ tsî nau khoen tsîna nî ǂkhî kai. (1Jhn. 5:3) Aiǁgause, kaise da ge a ǂkhî ǂan da a amaga Jehovaba da ra ǂkhîǂkhîsa. Jehovab ge kaise ra ǃgâiaǂgao mûb ga o, ǁgai xūna xu da ra hâbe tsî da ǁîb mîsa ra ǁnâuǀnam ǃkhaisa. ǀHomǃgāgu tsîn ge ǀhommi ǃnâ ra ǃgâiaǂgao. (Luk. 15:10) Sida tsîn ge kaise ra ǃgâiaǂgao mû da gao sida ǃgâsan Jehovab ǃoa ǂgomǂgomsase ra hâ ǃkhaisa. (2Tes. 1:4) Tsî ǁGâuab ǃhūbaib ga hîkākāhe o da ge kaise nî ǃgâiaǂgao, Jehovab ǃoagu da ge ǂgomǂgomsase hâ ǃkhais ǃaroma. w24.11 12 ¶17-18

Matikō gaxusets nî ǃâu khoe-ets, ǁî-i ǃnâts soregus ǃgâiǃgâibasensa ūhâ ti nî mîbas aiǃâ? ǃKhae ǁaeb ǃnâts ga ǁî-e tsâts ra ǀgauba mîba, o i ge ǁî-e ǀnîsi a ǂâi ǁkhā hoaǁaets ǂâi tamase mîǁguiga ra dīsa. (ǂKhm. 29:20) Xawets ga gaxuse ū khoe-e ǁî-i xats a ǃgâibahesa mîbasa, o i ge a ǁgau ǁkhā sats mîǁguiga a ū ǁoasa, ǃgōsase i ga ǁnā khoe-e a ǂan o sats ǁî-i xa a ǃgâibahesa. (Aoǁn. 11:4) ǂÂis ǃnâ ūhâ re khoe-i ǃnâts ǃgâiǃgâibasensa ra ǁgaus ge ǂâibasen tama ǁî-i ǀkhats nî ǃgammesa. Xawets ge nî ǂansen aiǂhumisents hâsa ǃgammeb ǃaroma tsî i nau khoe-e īǁkhā î ga o, a sa ǃgamme-ao tamas ka io tara ǁkhāsa. Tae-ets a dī ǁkhā mûǂants ga o khoe-i satsa ǃnāsase ra ǂan ǂgaosa? Sats ga ǁî-i ǀkha ǂangusa dī ǂgao tama io, ǃgāsase sa dīgu ǃnâ-ū ǁnāsa ǁgau re. Khoexaǃnâsiba i ge ǁgau tide, sats ga khoe-i ǀkhats ra ǂangu ǂgao khami tanisen o tits tsâ tama hâ hîna.—Efe. 4:25. w24.05 22-23 ¶9-10

ǂGomǂgomsa ǂkhauhesan ǀguin ge nî ‘ūsao-e’ tsî Jesub ǀhomsi Gaosib ǃnâ nî ūǃoahe. ǂKhauhesa i ǂkhaikarise hâ tama hâ i ge ‘ǃkhōǂuibasen-e’ han ǀkha ūsao-e tide. (Mat. 24:31) Xūn hoan ǀams ain ge Elob khoen hoana mâpa ǀguin ga ǁîn di ǃâubasensa ūhâ, xawe Jesub di ǃkhâikhomsa nî ǃgaoǃgâ. Tsî ǂgomǂgomsase hâ tsî ǂkhaikarisiba nî ǁgau. Jehovaba da ge kaise ǃgâise ge ǂan tsî da ge ǁnās ǀkha ǁîb ra dī xūn hoana ra ǂgomǃgâ. Jehovab sida ǁaeb ǃnâ ǂkhauhesana ra ǁhûis xa da ge ǂâiǂhansen tama hâ. Jesub ge tae-e draibeǃhanab ǃnâ ge 11 īrga sîsen ǃgāgu xa mî-e da ge ra ǂâi-oa. (Mat. 20:​1-16) ǃHanab ǃnâ ge ǁgoaga a sîsen tsoatsoan tsî tsēs ǁaegub ǃnâ a sîsen tsoatsoan tsîn ge ǀams ai ǀguitiko marisa ge matare-e. ǁNās ǁkhās khamin ge ǂkhauhesan sida ǁaeb ǃnâ ra ǁhûiǂûi-en tsîna ǂgomǂgomsasen ga hâ, o ǁîn ǀhomsi mādawa-amsa nî hō. w24.09 24 ¶15-17

Jesub ge ǀoasa aiǁgausa ge māda tae-e da nî dīsa ǂhanuoǃnâse da ga hâ-ūhe o. ǁÎb ge ǂgui khoen xa ǂhanuoǃnâse ge hâ-ūhe, ǁîb omaris khoen tsîna ǃkhōǂgā hâse. ǁÎb ǀaokhoen ge ǃkhaub hâ ti gere ǀhapiǂgā-ambi. ǂGomdi ǂgaeǂgui-aogu ge gere mî, ǁîb ǀgaiba demonga xu gere hō ti. Romes soldagu ge ǁîba ǂnau tsûtsû tsî ǀams ai ge ǃgam. (Mrk. 3:​21, 22; 14:55; 15:​16-20, 35-37) Nētikō ǂhanuoǃnâsibab gere ǃkharuǃnâ xaweb ge Jesuba ge dī ǃoa tama hâ i. ǁÎb aiǁgausa xu da tae-e ra ǁkhāǁkhāsen? (1Pet. 2:​21-23) Jesub ge ǃgâi aiǁgausa ge ǁnāxupa da, ǂhanuoǃnâsiba da ga ǃkharuǃnâ o da nî saoba. ǁÎb ge mâǁaeb ǃhoa tsî nî ǃnōsa ge ǂan i. (Mat. 26:​62-64) ǀHapiǂgā-amheb gere ǁaeb aib ge ǁîba xū-e ge mî tama hâ i. (Mat. 11:19) ǃHoab gere ǁaeb aib ge ǁîb mâǃoa-aona mîǁgaiǁgai tamas ka io ge ǃaoǃao tama hâ i. w24.11 4-5 ¶9-10

ǂÂi re ǀnam du a khoe-e du îsa tsî sîsenū ǁkhā i a ǀkhaeba ra māsa. ǁGaise du ge nî tsâ khoe-i ga ǁnā ǀkhaeba kas ǃnâ ǂgā tsî sîsenū tama ga io. Xawe du ge nî ǂkhî ǁnā khoe-i ga gangan du tsî ǁnā ǀkhaeba sîsenū o. Nē aiǁgausa mati Jehovab ǀkhaeb, xoremarib dib ǀkha ra ǃgûǀhao? Jehovab ge ǁîb ǀgôaba ge mā îb ǁōba da. Jehovab ge kaise ra ǂkhî ǁîb ǀō-aisa ǀkhaeb tsî ǀnammi tsîna da ra ǃgôaǃgâsa da ga ǁgau o. ǁÎb ǀnammi ge ge ǃaroma îb xoremariba mā da. (Jhn. 3:16; Rom. 5:​7, 8) ǁAeb ra ī khami da ge xoremariba da ūba hâ ǃgôaǃgâsiba a ǂoaǃnâ ǁkhā. Elob mā da hâ ǀkhaeba da ǃkhai-i ai sâube tsî ǁî-i xa ǂâi tama khami î ge nî tsâ. ǁNās nî īsa da ga ǂgao tama io, da ge ǁaeb hoaba Elob tsî Xristub dība da hâ xūna nî ǂâiǃgâ. w25.01 26 ¶1-2

ǃGâsab ǀhaohâb ǃûi-aob ase nî ǁgaumâiheb ge “ǂgoms ǃnâ kaise ǀasa tide.” ǂGui kurinats ga ǁāǁnâhe tama ī xawets ge ǁaeba ǂhâhâ sa ǀhōsagusisa Jehovab ǀkha ǀgaiǀgaisa. Îts ǁkhāǁkhāsen matits Elobmîsa a sîsenū ǁkhāsa ǃgâi mîǁguiga dīs ǃaroma. Jesub khamits ge ǃgamǃgamsenxa tsî māsenxase Jehovaba nî ǃoaba. Sats ge ǃnūǃnâxa tsî nî ǃâu Jehovab ǃnāsa ǁgaumâide ǀhaohâb ǃnâ nî mā tsisa. (Mat. 20:23; Fil. 2:​5-8) ǁGauts ge nî ‘ǂgomǂgomsasets’ Jehovab ǁgaragu ǃoagu ra ûisa tsîts ǁîb ǀapeǂhumis ra mā daoǁgaude ra saosa. Xoadi ge ǃgāsase ra mî, mûǂam-aogu “ǁkhāǁkhās ǂansa nî ūhâ” ǃkhaisa. Nēsa ra ǂâibasen ǃgâi ǃhoadets nî māsa? Hî-î. Hoa ǀhaohâb ǃûi-aogu ge ǃgâi ǃhoade mā tama. Xawe gu ga aoǁnâ tsî ǃgâsana gagasise ǂkhâǃnâs ǃaroma sari o gu ge ǁnāsa ǃgâi ǀgaub ǃnâ nî dī Elobmîsa ra sîsenūse. w24.11 23-24 ¶14-15

Elobmîsa du ra khomai ǁaeb ai du ga xū-e ǁnâuǃā tama i, o ôaǃnâsa dī re. Tsî tsēs ǃnâ-ū khomai du ra xūn xa ǂâiǃgâ tsî kō tae-i Jehovab, ǁîb ǀGôab tsî sado kha ūbâ hâ ǀnammi xa ra ǁkhāǁkhāsa. (Psa. 119:97) ǃHuniǀurib ǀuriba ra ôa khoe-i aiǁgaus xa ǂâi re. ǃNāsa ǁaeba i ge ǃhuniǀurib ǀuriba ra ôa khoe-e ǂgui tsēde ra sîsen î-i ǂkhari ǃârob ǃhuniǀurib ǀuriba hō. Xawe i ge ǀûsen tama tsî aiǃgû tsî ǃnūǃnâxase ǁnā xū-e ra ôa ǀgara, kaise i a ǀō-aisa amaga. ǁNās ǂam-ai i ge Elobmîsa xu da ra ǁkhāǁkhāsen xūna, ǃhuniǀuribǀurib xa ǃnāsase a ǀō-aisa. (ǂKhm. 8:10) ǁNā-amaga ǃnūǃnâxase Elobmîsa khomai ǀgara.—Psa. 1:2. w25.01 25 ¶14-15

Jehovab ge ra ǂgaoǀkhā da î da māsenxase ǁnān hîna ra tsûtsû da na ǀûba. (Psa. 86:5; Luk. 17:4; Efe. 4:32) ǃGōsase da ge khoe-i ga sada ǀgū ǀhōsa tamas ka io omaris ǁani o, ǁî-i ra mî ǁgai xū-i tamas ka io i ra dī ǁgai xū-i xa kaise ra tsûtsûhe. (Psa. 55:​12-14) ǀNî ǁaegu ai da ge ti kōse ra ǁaixa tamas ka io ra tsû, î da ǃkhā-e go khoe-i khami tsâ. (ǂKhm. 12:18) Tsûaǂgaoba da ge ǀnîsi a kōǃkharu ǁkhā. Xawe ǁnās ge ǀnîsi ǃkhāmâihe hâ gôas ǀkha hâ mâs khami a tsâ kai tsi ǁkhā. ǁNās ǁkhās khami da ge a ǃâubasen ǁoa sada tsûaǂgaob ǃgâis ǀguisa nî hî ti kōǃkharu da ga o. Khoe-i ga tsûtsû da, o da ge ǃnāsa ǁaeba ǃhaese ra ǁaixa. Elobmîs ge ra ǂanǃgâ ǀnîsi da kaise a ǁaixaǃnā ǁkhā ǃkhaisa. Xawes ge ra ǃkhâikhom da î da tā ǁaixasase hâ ǀgara. (Psa. 4:​4, Efe. 4:26) Tae-i ǃaroma? ǁAib ge ǃnāsase ǁgai ǀamǂoasa ūhâ. (Jak. 1:20) ǁAib ge tsâsigu ai a ǃgaoǃgaosa xawe ǁaixa hâse hâ ǀgarasats ge aitsama ra ǁhûi. w25.02 15 ¶4-6

Jesub ge ǂkhōs ǃnâ ge mî khoe-i mari-e ra sâubasen î xawe “Elob ǃnâ ǃkhū tama-i” a gâre ǃkhaisa. (Luk. 12:​16-21) Sida ûib ǁari tsî aetsē nî ī ǀgauba da ge a ǀū. (ǂKhm. 23:​4, 5; Jak. 4:​13-15) Xristub saosaben ase da ge ǃgomsiba ra hōǃâ. Jesub ge ge mî, î da ǂhumisen ǃhûbaib xūna “ǁnāxu” tsî ǁîb ǁkhāǁkhāsabe kai. (Luk. 14:33) Nēs ge Judab ǃnâ ge hâ i Xristeǁîn ǀkha ge ī, ǁîn ge ǃhūbaib xūna ǂkhîb ǀkha ge ǁnāxū. (Heb. 10:34) ǂGui ǃgâsan ge ǁîn di xūna ge ǂoaǃnâ ǂgīǂgōsi xūn ǃnân ge ǃâ tama hâ i ǃkhais ǃaroma. (J.ǂHa. 13:​16, 17) Tae-e ǁîna ge hui ǁnāsa dīsa? ǁÎn ge sao ra mîmâis Jehovab dis ǃnâ ǀgaisa ǂgomǃgâsiba ge ūhâ i: “Tita ge tātsē ǁnāxū tsi tsî ǃharaxū tsi tide.” (Heb. 13:5) ǁNā-amaga da ge ǁkhā da a na nî dī, î da ǂâuna mari-e ūhâ kairasis ǃaroma. ǀGaisa ǂgomǃgâsiba da ge Jehovab ǃnâ nî ūhâ ǃâubasen tama da hâ xū-i ga ī o, ǁîb nî kōǃgâ dasa. w25.03 29 ¶13-14

Jehovab ge ǃâubasen tama hâ, î da Xristeǁî ǀoasasiba ǃoa aitsama kai. ǁÎb ge ǀhaohâb ǃûi-aogu tsî ǁgauǃnâ-aogu tsîna ǀhaohâb ǃnâ ge mā da î gu hui da, î da “kaikhoe” kai Xristeǁîn ase tsî ǁnās ǀkha “dīǀoaǀoasa kaikhoesis Xristub disa sīǃnâ” ǁkhā. (Efe. 4:​11-13) Jehovab ge ǁîb ǃanu gagab ǃnâ-ūs tsîna ra hui da, î da “Xristub di ǂâisa ūhâ.” (1Kor. 2:​14-16) ǁNās xōǀkhab ge Eloba noxoba aiǃgû tsî haka ǂkhanidi Jesub ûib xa hâ di ǃnâ-ū Jesub ge ǂâi, ǃhoa tsî aoǁnâ sîsenni ǃnâ gere tanisen ǀgaub xa ra ǁkhāǁkhā da. Jesub ǂâiǀgaub tsî tanisen ǀgaub tsîna ǁgaes ǃnâ-ū da ge Xristeǁî ǀoasasiba gagasise a sīǃnâ ǁkhā. Xawe Xristeǁî ǀoasasiba da ga sīǃnâ ǂgao, o da ge “tā ǂguro ǁkhāǁkhādi Xristub xa hâdi tawa nî mâǃari” xawe ǁnās ǂam-ai ǃnāsase nî dī. w24.04 4-5 ¶11-12

Tsēs hoasa da ge mîǁguiga ra dī. ǀNî mîǁguigu ge a supu dīsa, aiǁgause tae-e du ǁgoaga nî ǂûs tamas ka io mâǁae du nî ǁoms khami. Xawe ǀnî mîǁguigu ge kaise a ǃgom. Dī da ra mîǁguigu ge sida ǂurusib, omaris ase da ǂkhîba nî ūhâ ǀgaub tamas ka io Jehovaba da nî ǃoaba ǀgaub tsîna ra tsâǀkhā. Sida mîǁguigu sida tsî omaris tsîna nî huisa da ge ra ǂhâba, î da ǃgâiba ǀama. Xawe ǂhâǂhâsa as ge sida mîǁguigu Jehovaba nî ǃgâiaǂgao kaisa. (Rom. 12:​1, 2) Mîǁguiga du nî dīs aiǃâ du nî dī xū-i ge hoa amaba ǂansa. Nēsa tae-i ǃaroma a ǂhâǂhâsa? Sao ra aiǁgaus xa ǂâi re, ǀaesen hâ khoe-i ge ǁkhōǁkhōsa ǀaeb ǃgao ǀaeǃkhō-aoba ǃoa ra ī. ǀAeǃkhō-aoba ǁî-e dî tamas ka io ôaǃnâ tamase mîǁguiba a dī ǁkhā mati i ǁî-e nî ǀaeǃkhōsa? Hî-î, ǁnāsab ge dī tide. Sadu tsîn ge mîǁgui-e du nî dīs aiǃâ, ǂgurose hoa amaba nē mâsib xa nî ǂan. w25.01 14 ¶1-3

Tae-e da Jehovab ǀkhomxaǂgaosib xa a ǂan? Matib ge ǁîba ǁgau ‘ǂgao tamab hâsa în khoena hîkākāhe?’ (2Pet. 3:9) Matib ge ǀkhomxaǂgaosiba ǁgau ǀnîn hîna ge ǀgaisa ǁorena dīn ǃoagu? Gao-aob Davidi ge ǀgaisa ǁorena ge dī, ǁîb ge ǀai tsî ge ǃgam. Xaweb ge Davida ge ǃhobasen tsîb ge Jehovaba ǀkhomxaǂgaose ge ǀûba bi. (2Sam. 12:​1-12) Gao-aob Manaseb ge ǂgui ǁgai xūna ge dī ǁîb di ûi kurigu ǃnâ. ǁNā ǁgai xūnab ge dī xaweb ge Jehovaba ǀkhomxaǂgaosiba ge ǁgau bi. Tsî Manaseba ge ǀûba nē ǁgai xūn ǃaroma, ǁîb ge ǃhōbasen xui-ao. (2Kro. 33:​9-16) Nē aiǁgau ra ge ra ǂâiǂâiǃnâ da Jehovab ǀkhomxaǂgaosiba ra ǁgausa, mûb ga o ǃaromas hâsa ǁnāsa dīsa. ǁÎb ge nē khoega khâisa nî mā mûǂan gu ge xui-ao ǀgaisa ǁoreba gu ge dīsa tsî gu ge ǁnā ǁoren ǃaroma a ǃhobasensa. w24.05 4 ¶12